📜

၈။ အနုရုဒ္ဓသံယုတ္တံ

၁။ ရဟောဂတဝဂ္ဂေါ

၁-၂။ ပဌမရဟောဂတသုတ္တာဒိဝဏ္ဏနာ

၈၉၉-၉၀၀။ အနုရုဒ္ဓသံယုတ္တဿ ပဌမေ အာရဒ္ဓါတိ ပရိပုဏ္ဏာ။ သင်္ခေပတော ပနေတ္ထ ဆတ္တိံသာယ ဌာနေသု အရဟတ္တံ ပါပေတွာ ဝိပဿနာ ကထိတာ၊ ဒုတိယေ ဒွါဒသသု ဌာနေသု အရဟတ္တံ ပါပေတွာ ဝိပဿနာ ကထိတာ။

၃။ သုတနုသုတ္တဝဏ္ဏနာ

၉၀၁။ တတိယေ မဟာဘိညတန္တိ ဆအဘိညာဘာဝံ။ ဟီနံ ဓမ္မန္တိအာဒီသု ဣမာယ ပါဠိယာ အတ္ထော ဝေဒိတဗ္ဗော –

‘‘ကတမေ ဓမ္မာ ဟီနာ? ဒွါဒသ အကုသလစိတ္တုပ္ပာဒါ၊ ဣမေ ဓမ္မာ ဟီနာ။ ကတမေ ဓမ္မာ မဇ္ဈိမာ? တီသု ဘူမီသု ကုသလံ၊ တီသု ဘူမီသု ဝိပါကော၊ တီသု ဘူမီသု ကိရိယာဗျာကတံ သဗ္ဗဉ္စ ရူပံ၊ ဣမေ ဓမ္မာ မဇ္ဈိမာ။ ကတမေ ဓမ္မာ ပဏီတာ? စတ္တာရော မဂ္ဂါ အပရိယာပန္နာ၊ စတ္တာရိ စ သာမညဖလာနိ နိဗ္ဗာနဉ္စ၊ ဣမေ ဓမ္မာ ပဏီတာ’’တိ (ဓ။ သ။ ၁၄၂၃-၁၄၂၅)။

၄-၇။ ပဌမကဏ္ဍကီသုတ္တာဒိဝဏ္ဏနာ

၉၀၂-၉၀၅။ စတုတ္ထေ ကဏ္ဍကီဝနေတိ မဟာကရမန္ဒဝနေ။ ဆဋ္ဌေ သဟဿံ လောကန္တိ ဣမိနာ ထေရဿ သတတ ဝိဟာရော ဒဿိတော။ ထေရော ဟိ ပါတောဝ မုခံ ဓောဝိတွာ အတီတာနာဂတေ ကပ္ပသဟဿံ အနုဿရတိ။ ပစ္စုပ္ပန္နေ ပန ဒသစက္ကဝါဠသဟဿံ ဧကာဝဇ္ဇနဿ အာပါထမာဂစ္ဆတိ။ သတ္တမံ ဥတ္တာနမေဝ။

၈။ သလဠာဂါရသုတ္တဝဏ္ဏနာ

၉၀၆။ အဋ္ဌမေ သလဠာဂါရေတိ သလဠရုက္ခမယာယ ပဏ္ဏသာလာယ၊ သလဠရုက္ခဿ ဝါ ဒွါရေ ဌိတတ္တာ ဧဝံနာမကေ အဂါရေ။ ဣမသ္မိံ သုတ္တေ ဝိပဿနာယ သဒ္ဓိံ ဝိပဿကပုဂ္ဂလော ကထိတော။

၉။ အမ္ဗပါလိဝနသုတ္တဝဏ္ဏနာ

၉၀၇။ နဝမေ အာသဘိံ ဝါစန္တိ အတ္တနော အရဟတ္တဘာဝဒီပကံ ဥတ္တမဝါစံ။ သေသံ သဗ္ဗတ္ထ ဥတ္တာနတ္ထမေဝါတိ။

ရဟောဂတဝဂ္ဂေါ ပဌမော။

၂။ ဒုတိယဝဂ္ဂဝဏ္ဏနာ

၉၀၉-၉၂၂။ ဒုတိယဝဂ္ဂေ ဌာနဉ္စ ဌာနတောတိအာဒီဟိ ထေရော ဒသဗလဉာဏံ ပဋိဇာနာတိ။ ကိမ္ပနေတံ သာဝကာနံ ဟောတီတိ? ဧကဒေသေန ဟောတိ၊ သဗ္ဗညုဗုဒ္ဓါနံ ပနေတံ နိပ္ပဒေသံ သဗ္ဗာကာရပရိပူရန္တိ။

အနုရုဒ္ဓသံယုတ္တဝဏ္ဏနာ နိဋ္ဌိတာ။