📜

၂။ နီဝရဏပ္ပဟာနဝဂ္ဂဝဏ္ဏနာ

၁၁။ ဒုတိယဿ ပဌမေ ဧကဓမ္မမ္ပီတိ ဧတ္ထ ‘‘တသ္မိံ ခေါ ပန သမယေ ဓမ္မာ ဟောန္တီ’’တိအာဒီသု (ဓ။ သ။ ၁၂၁) ဝိယ နိဿတ္တဋ္ဌေန ဓမ္မော ဝေဒိတဗ္ဗော။ တသ္မာ ဧကဓမ္မမ္ပီတိ နိဿတ္တံ ဧကသဘာဝမ္ပီတိ အယမေတ္ထ အတ္ထော။ အနုပ္ပန္နောဝါတိ ဧတ္ထ ပန ‘‘ဘူတာနံ ဝါ သတ္တာနံ ဌိတိယာ သမ္ဘဝေသီနံ ဝါ အနုဂ္ဂဟာယ (မ။ နိ။ ၁။၄၀၂၊ သံ။ နိ။ ၂။၁၁) ယာဝတာ၊ ဘိက္ခဝေ၊ သတ္တာ အပဒါ ဝါ ဒွိပဒါ ဝါ’’တိ (အ။ နိ။ ၄။၃၄၊ ဣတိဝု။ ၉၀) ဧဝမာဒီသု ဝိယ သမုစ္စယတ္ထော ဝါသဒ္ဒေါ ဒဋ္ဌဗ္ဗော၊ န ဝိကပ္ပတ္ထော။ အယဉှေတ္ထ အတ္ထော – ယေန ဓမ္မေန အနုပ္ပန္နော စ ကာမစ္ဆန္ဒော ဥပ္ပဇ္ဇတိ၊ ဥပ္ပန္နော စ ကာမစ္ဆန္ဒော ဘိယျောဘာဝါယ ဝေပုလ္လာယ သံဝတ္တတိ၊ တမဟံ ယထာ သုဘနိမိတ္တံ၊ ဧဝံ အညံ န ပဿာမီတိ။ တတ္ထ အနုပ္ပန္နောတိ အဇာတော အသဉ္ဇာတော အပါတုဘူတော အသမုဒါဂတော။ ကာမစ္ဆန္ဒောတိ ‘‘ယော ကာမေသု ကာမစ္ဆန္ဒော ကာမရာဂေါ ကာမနန္ဒီ ကာမတဏှာ’’တိအာဒိနာ (ဓ။ သ။ ၁၁၅၆) နယေန ဝိတ္ထာရိတံ ကာမစ္ဆန္ဒနီဝရဏံ။ ဥပ္ပဇ္ဇတီတိ နိဗ္ဗတ္တတိ ပါတုဘဝတိ။ သော ပနေသ အသမုဒါစာရဝသေန ဝါ အနနုဘူတာရမ္မဏဝသေန ဝါ အနုပ္ပန္နော ဥပ္ပဇ္ဇတီတိ ဝေဒိတဗ္ဗော။ အညထာ ဟိ အနမတဂ္ဂေ သံသာရေ အနုပ္ပန္နော နာမ နတ္ထိ။

တတ္ထ ဧကစ္စဿ ဝတ္တဝသေန ကိလေသော န သမုဒါစရတိ၊ ဧကစ္စဿ ဂန္ထဓုတင်္ဂသမာဓိ- ဝိပဿနာနဝကမ္မာဒီနံ အညတရဝသေန။ ကထံ? ဧကစ္စော ဟိ ဝတ္တသမ္ပန္နော ဟောတိ၊ တဿ ဒွေအသီတိ ခုဒ္ဒကဝတ္တာနိ စုဒ္ဒသ မဟာဝတ္တာနိ စေတိယင်္ဂဏဗောဓိယင်္ဂဏပါနီယမာဠကဥပေါသထာဂါရအာဂန္တုကဂမိကဝတ္တာနိ စ ကရောန္တဿေဝ ကိလေသော ဩကာသံ န လဘတိ။ အပရဘာဂေ ပနဿ ဝတ္တံ ဝိဿဇ္ဇေတွာ ဘိန္နဝတ္တဿ စရတော အယောနိသောမနသိကာရဉ္စေဝ သတိဝေါဿဂ္ဂဉ္စ အာဂမ္မ ဥပ္ပဇ္ဇတိ။ ဧဝမ္ပိ အသမုဒါစာရဝသေန အနုပ္ပန္နော ဥပ္ပဇ္ဇတိ နာမ။

ဧကစ္စော ဂန္ထယုတ္တော ဟောတိ၊ ဧကမ္ပိ နိကာယံ ဂဏှာတိ ဒွေပိ တယောပိ စတ္တာရောပိ ပဉ္စပိ။ တဿ တေပိဋကံ ဗုဒ္ဓဝစနံ အတ္ထဝသေန ပါဠိဝသေန အနုသန္ဓိဝသေန ပုဗ္ဗာပရဝသေန ဂဏှန္တဿ သဇ္ဈာယန္တဿ ဝါစေန္တဿ ဒေသေန္တဿ ပကာသေန္တဿ ကိလေသော ဩကာသံ န လဘတိ။ အပရဘာဂေ ပနဿ ဂန္ထကမ္မံ ပဟာယ ကုသီတဿ စရတော အယောနိသောမနသိကာရသတိဝေါဿဂ္ဂေ အာဂမ္မ ဥပ္ပဇ္ဇတိ။ ဧဝမ္ပိ အသမုဒါစာရဝသေန အနုပ္ပန္နော ဥပ္ပဇ္ဇတိ နာမ။

ဧကစ္စော ပန ဓုတင်္ဂဓရော ဟောတိ၊ တေရသ ဓုတင်္ဂဂုဏေ သမာဒါယ ဝတ္တတိ။ တဿ ပန ဓုတင်္ဂဂုဏေ ပရိဟရန္တဿ ကိလေသော ဩကာသံ န လဘတိ။ အပရဘာဂေ ပနဿ ဓုတင်္ဂါနိ ဝိဿဇ္ဇေတွာ ဗာဟုလ္လာယ အာဝတ္တဿ စရတော အယောနိသောမနသိကာရသတိဝေါဿဂ္ဂေ အာဂမ္မ ဥပ္ပဇ္ဇတိ။ ဧဝမ္ပိ အသမုဒါစာရဝသေန အနုပ္ပန္နော ဥပ္ပဇ္ဇတိ နာမ။

ဧကစ္စော အဋ္ဌသု သမာပတ္တီသု စိဏ္ဏဝသီ ဟောတိ၊ တဿ ပဌမဇ္ဈာနာဒီသု အာဝဇ္ဇနဝသိအာဒီနံ ဝသေန ဝိဟရန္တဿ ကိလေသော ဩကာသံ န လဘတိ။ အပရဘာဂေ ပနဿ ပရိဟီနဇ္ဈာနဿ ဝါ ဝိဿဋ္ဌဇ္ဈာနဿ ဝါ ဘဿာဒီသု အနုယုတ္တဿ ဝိဟရတော အယောနိသောမနသိကာရသတိဝေါဿဂ္ဂေ အာဂမ္မ ဥပ္ပဇ္ဇတိ။ ဧဝမ္ပိ အသမုဒါစာရဝသေန အနုပ္ပန္နော ဥပ္ပဇ္ဇတိ နာမ။

ဧကစ္စော ပန ဝိပဿကော ဟောတိ၊ သတ္တသု ဝါ အနုပဿနာသု အဋ္ဌာရသသု ဝါ မဟာဝိပဿနာသု ကမ္မံ ကရောန္တော ဝိဟရတိ။ တဿေဝံ ဝိဟရတော ကိလေသော ဩကာသံ န လဘတိ။ အပရဘာဂေ ပနဿ ဝိပဿနာကမ္မံ ပဟာယ ကာယဒဠှီဗဟုလဿ ဝိဟရတော အယောနိသောမနသိကာရသတိဝေါဿဂ္ဂေ အာဂမ္မ ဥပ္ပဇ္ဇတိ။ ဧဝမ္ပိ အသမုဒါစာရဝသေန အနုပ္ပန္နော ဥပ္ပဇ္ဇတိ နာမ။

ဧကစ္စော နဝကမ္မိကော ဟောတိ၊ ဥပေါသထာဂါရဘောဇနသာလာဒီနိ ကာရေတိ။ တဿ တေသံ ဥပကရဏာနိ စိန္တေန္တဿ ကိလေသော ဩကာသံ န လဘတိ။ အပရဘာဂေ ပနဿ နဝကမ္မေ နိဋ္ဌိတေ ဝါ ဝိဿဋ္ဌေ ဝါ အယောနိသောမနသိကာရသတိဝေါဿဂ္ဂေ အာဂမ္မ ဥပ္ပဇ္ဇတိ။ ဧဝမ္ပိ အသမုဒါစာရဝသေန အနုပ္ပန္နော ဥပ္ပဇ္ဇတိ နာမ။

ဧကစ္စော ပန ဗြဟ္မလောကာ အာဂတော သုဒ္ဓသတ္တော ဟောတိ၊ တဿ အနာသေဝနတာယ ကိလေသော ဩကာသံ န လဘတိ။ အပရဘာဂေ ပနဿ လဒ္ဓါသေဝနဿ အယောနိသောမနသိကာရသတိဝေါဿဂ္ဂေ အာဂမ္မ ဥပ္ပဇ္ဇတိ။ ဧဝမ္ပိ အသမုဒါစာရဝသေန အနုပ္ပန္နော ဥပ္ပဇ္ဇတိ နာမ။ ဧဝံ တာဝ အသမုဒါစာရဝသေန အနုပ္ပန္နဿ ဥပ္ပန္နတာ ဝေဒိတဗ္ဗာ။

ကထံ အနနုဘူတာရမ္မဏဝသေန? ဣဓေကစ္စော အနနုဘူတပုဗ္ဗံ မနာပိယံ ရူပါဒိအာရမ္မဏံ လဘတိ၊ တဿ တတ္ထ အယောနိသောမနသိကာရသတိဝေါဿဂ္ဂေ အာဂမ္မ ရာဂေါ ဥပ္ပဇ္ဇတိ။ ဧဝံ အနနုဘူတာရမ္မဏဝသေန အနုပ္ပန္နော ဥပ္ပဇ္ဇတိ နာမ။

ဥပ္ပန္နောတိ ဇာတော သဉ္ဇာတော နိဗ္ဗတ္တော အဘိနိဗ္ဗတ္တော ပါတုဘူတော။ ဘိယျောဘာဝါယာတိ ပုနပ္ပုနဘာဝါယ။ ဝေပုလ္လာယာတိ ဝိပုလဘာဝါယ ရာသိဘာဝါယ။ တတ္ထ သကိံ ဥပ္ပန္နော ကာမစ္ဆန္ဒော န နိရုဇ္ဈိဿတိ၊ သကိံ နိရုဒ္ဓါ ဝါ သွေဝ ပုန ဥပ္ပဇ္ဇိဿတီတိ အဋ္ဌာနမေတံ။ ဧကသ္မိံ ပန နိရုဒ္ဓေ တသ္မိံ ဝါ အာရမ္မဏေ အညသ္မိံ ဝါ အာရမ္မဏေ အပရာပရံ ဥပ္ပဇ္ဇမာနော ဘိယျောဘာဝါယ ဝေပုလ္လာယ သံဝတ္တတိ နာမ။

သုဘနိမိတ္တန္တိ ရာဂဋ္ဌာနိယံ အာရမ္မဏံ။ ‘‘သနိမိတ္တာ၊ ဘိက္ခဝေ၊ ဥပ္ပဇ္ဇန္တိ ပါပကာ အကုသလာ ဓမ္မာ၊ နော အနိမိတ္တာ’’တိ ဧတ္ထ နိမိတ္တန္တိ ပစ္စယဿ နာမံ။ ‘‘အဓိစိတ္တမနုယုတ္တေန၊ ဘိက္ခဝေ၊ ဘိက္ခုနာ ပဉ္စ နိမိတ္တာနိ ကာလေန ကာလံ မနသိကာတဗ္ဗာနီ’’တိ (မ။ နိ။ ၁။၂၁၆) ဧတ္ထ ကာရဏဿ။ ‘‘သော တံ နိမိတ္တံ အာသေဝတိ ဘာဝေတီ’’တိ (အ။ နိ။ ၉။၃၅) ဧတ္ထ သမာဓိဿ။ ‘‘ယံ နိမိတ္တံ အာဂမ္မ ယံ နိမိတ္တံ မနသိကရောတော အနန္တရာ အာသဝါနံ ခယော ဟောတီ’’တိ (အ။ နိ။ ၆။၂၇) ဧတ္ထ ဝိပဿနာယ။ ဣဓ ပန ရာဂဋ္ဌာနိယော ဣဋ္ဌာရမ္မဏဓမ္မော ‘‘သုဘနိမိတ္တ’’န္တိ အဓိပ္ပေတော။ အယောနိသောမနသိကရောတောတိ။ ‘‘တတ္ထ ကတမော အယောနိသောမနသိကာရော? အနိစ္စေ နိစ္စန္တိ၊ ဒုက္ခေ သုခန္တိ၊ အနတ္တနိ အတ္တာတိ၊ အသုဘေ သုဘန္တိ၊ အယောနိသောမနသိကာရော ဥပ္ပထမနသိကာရော၊ သစ္စဝိပ္ပဋိကူလေန ဝါ စိတ္တဿ အာဝဇ္ဇနာ အနွာဝဇ္ဇနာ အာဘောဂေါ သမန္နာဟာရော မနသိကာရော။ အယံ ဝုစ္စတိ အယောနိသောမနသိကာရော’’တိ (ဝိဘ။ ၉၃၆) ဣမဿ မနသိကာရဿ ဝသေန အနုပါယေန မနသိကရောန္တဿာတိ။

၁၂။ ဒုတိယေ ဗျာပါဒေါတိ ဘတ္တဗျာပတ္တိ ဝိယ စိတ္တဿ ဗျာပဇ္ဇနံ ပကတိဝိဇဟနဘာဝေါ။ ‘‘တတ္ထ ကတမံ ဗျာပါဒနီဝရဏံ? အနတ္ထံ မေ အစရီတိ အာဃာတော ဇာယတီ’’တိ (ဓ။ သ။ ၁၁၆၀) ဧဝံ ဝိတ္ထာရိတဿ ဗျာပါဒနီဝရဏဿေတံ အဓိဝစနံ။ ပဋိဃနိမိတ္တန္တိ အနိဋ္ဌံ နိမိတ္တံ။ ပဋိဃဿပိ ပဋိဃာရမ္မဏဿပိ ဧတံ အဓိဝစနံ။ ဝုတ္တမ္ပိ စေတံ အဋ္ဌကထာယံ – ‘‘ပဋိဃမ္ပိ ပဋိဃနိမိတ္တံ၊ ပဋိဃာရမ္မဏောပိ ဓမ္မော ပဋိဃနိမိတ္တ’’န္တိ။ သေသမေတ္ထ ကာမစ္ဆန္ဒေ ဝုတ္တနယေနေဝ ဝေဒိတဗ္ဗံ။ ယထာ စေတ္ထ၊ ဧဝံ ဣတော ပရေသုပိ။ တတ္ထ တတ္ထ ဟိ ဝိသေသမတ္တမေဝ ဝက္ခာမာတိ။

၁၃။ တတိယေ ထိနမိဒ္ဓန္တိ ထိနဉ္စေဝ မိဒ္ဓဉ္စ။ တေသု စိတ္တဿ အကမ္မညတာ ထိနံ၊ အာလသိယဘာဝဿေတံ အဓိဝစနံ။ တိဏ္ဏံ ခန္ဓာနံ အကမ္မညတာ မိဒ္ဓံ၊ ကပိမိဒ္ဓဿ ပစလာယိကဘာဝဿေတံ အဓိဝစနံ။ ဥဘိန္နမ္ပိ ‘‘တတ္ထ ကတမံ ထိနံ? ယာ စိတ္တဿ အကလျတာ အကမ္မညတာ ဩလီယနာ သလ္လီယနာ။ တတ္ထ ကတမံ မိဒ္ဓံ? ယာ ကာယဿ အကလျတာ အကမ္မညတာ ဩနာဟော ပရိယောနာဟော’’တိအာဒိနာ (ဓ။ သ။ ၁၁၆၂-၁၁၆၃) နယေန ဝိတ္ထာရော ဝေဒိတဗ္ဗော။ အရတီတိအာဒီနိ ဝိဘင်္ဂေ ဝိဘတ္တနယေနေဝ ဝေဒိတဗ္ဗာနိ။ ဝုတ္တဉှေတံ –

‘‘တတ္ထ ကတမာ အရတိ? ပန္တေသု ဝါ သေနာသနေသု အညတရညတရေသု ဝါ အဓိကုသလေသု ဓမ္မေသု အရတိ အရတိတာ အနဘိရတိ အနဘိရမနာ ဥက္ကဏ္ဌိတာ ပရိတဿိတာ၊ အယံ ဝုစ္စတိ အရတိ။ တတ္ထ ကတမာ တန္ဒီ? ယာ တန္ဒီ တန္ဒိယနာ တန္ဒိမနတာ အာလဿံ အာလဿာယနာ အာလဿာယိတတ္တံ၊ အယံ ဝုစ္စတိ တန္ဒီ။ တတ္ထ ကတမာ ဝိဇမ္ဘိတာ? ယာ ကာယဿ ဇမ္ဘနာ ဝိဇမ္ဘနာ အာနမနာ ဝိနမနာ သန္နမနာ ပဏမနာ ဗျာဓိယကံ၊ အယံ ဝုစ္စတိ ဝိဇမ္ဘိတာ။ တတ္ထ ကတမော ဘတ္တသမ္မဒေါ? ယာ ဘုတ္တာဝိဿ ဘတ္တမုစ္ဆာ ဘတ္တကိလမထော ဘတ္တပရိဠာဟော ကာယဒုဋ္ဌုလ္လံ၊ အယံ ဝုစ္စတိ ဘတ္တသမ္မဒေါ။ တတ္ထ ကတမံ စေတသော စ လီနတ္တံ? ယာ စိတ္တဿ အကလျတာ အကမ္မညတာ ဩလီယနာ သလ္လီယနာ လီနံ လီယနာ လီယိတတ္တံ ထိနံ ထိယနာ ထိယိတတ္တံ စိတ္တဿ၊ ဣဒံ ဝုစ္စတိ စေတသော စ လီနတ္တ’’န္တိ (ဝိဘ။ ၈၅၆၊ ၈၅၇၊ ၈၅၉၊ ၈၆၀)။

ဧတ္ထ စ ပုရိမာ စတ္တာရော ဓမ္မာ ထိနမိဒ္ဓနီဝရဏဿ သဟဇာတဝသေနာပိ ဥပနိဿယဝသေနာပိ ပစ္စယာ ဟောန္တိ၊ စေတသော စ လီနတ္တံ အတ္တနောဝ အတ္တနာ သဟဇာတံ န ဟောတိ၊ ဥပနိဿယကောဋိယာ ပန ဟောတီတိ။

၁၄။ စတုတ္ထေ ဥဒ္ဓစ္စကုက္ကုစ္စန္တိ ဥဒ္ဓစ္စဉ္စေဝ ကုက္ကုစ္စဉ္စ။ တတ္ထ ဥဒ္ဓစ္စံ နာမ စိတ္တဿ ဥဒ္ဓတာကာရော။ ကုက္ကုစ္စံ နာမ အကတကလျာဏဿ ကတပါပဿ တပ္ပစ္စယာ ဝိပ္ပဋိသာရော။ စေတသော အဝူပသမောတိ ဥဒ္ဓစ္စကုက္ကုစ္စဿေဝေတံ နာမံ။ အဝူပသန္တစိတ္တဿာတိ ဈာနေန ဝါ ဝိပဿနာယ ဝါ အဝူပသမိတစိတ္တဿ။ အယံ ပန အဝူပသမော ဥဒ္ဓစ္စကုက္ကုစ္စဿ ဥပနိဿယကောဋိယာ ပစ္စယော ဟောတီတိ။

၁၅။ ပဉ္စမေ ဝိစိကိစ္ဆာတိ ‘‘သတ္ထရိ ကင်္ခတီ’’တိအာဒိနာ (ဓ။ သ။ ၁၁၆၇) နယေန ဝိတ္ထာရိတံ ဝိစိကိစ္ဆာနီဝရဏံ။ အယောနိသောမနသိကာရော ဝုတ္တလက္ခဏောယေဝါတိ။

၁၆။ ဆဋ္ဌေ အနုပ္ပန္နော ဝါ ကာမစ္ဆန္ဒော နုပ္ပဇ္ဇတီတိ အသမုဒါစာရဝသေန ဝါ အနနုဘူတာရမ္မဏဝသေန ဝါတိ ဒွီဟေဝ ကာရဏေဟိ အနုပ္ပန္နော န ဥပ္ပဇ္ဇတိ၊ တထာ ဝိက္ခမ္ဘိတောဝ ဟောတိ၊ ပုန ဟေတုံ ဝါ ပစ္စယံ ဝါ န လဘတိ။ ဣဓာပိ ဝတ္တာဒီနံယေဝ ဝသေန အသမုဒါစာရော ဝေဒိတဗ္ဗော။ ဧကစ္စဿ ဟိ ဝုတ္တနယေနေဝ ဝတ္တေ ယုတ္တဿ ဝတ္တံ ကရောန္တဿေဝ ကိလေသော ဩကာသံ န လဘတိ၊ ဝတ္တဝသေန ဝိက္ခမ္ဘိတော ဟောတိ။ သော တံ တထာဝိက္ခမ္ဘိတမေဝ ကတွာ ဝိဝဋ္ဋေတွာ အရဟတ္တံ ဂဏှာတိ မိလက္ခတိဿတ္ထေရော ဝိယ။

သော ကိရာယသ္မာ ရောဟဏဇနပဒေ ဂါမေဏ္ဍဝါလမဟာဝိဟာရဿ ဘိက္ခာစာရေ နေသာဒကုလေ နိဗ္ဗတ္တော။ ဝယံ အာဂမ္မ ကတဃရာဝါသော ‘‘ပုတ္တဒါရံ ပေါသေဿာမီ’’တိ အဒူဟလသတံ သဏ္ဌပေတွာ ပါသသတံ ယောဇေတွာ သူလသတံ ရောပေတွာ ဗဟုံ ပါပံ အာယူဟန္တော ဧကဒိဝသံ ဂေဟတော အဂ္ဂိဉ္စ လောဏဉ္စ ဂဟေတွာ အရညံ ဂတော။ ပါသေ ဗဒ္ဓမိဂံ ဝဓိတွာ အင်္ဂါရပက္ကမံသံ ခါဒိတွာ ပိပါသိတော ဟုတွာ ဂါမေဏ္ဍဝါလမဟာဝိဟာရံ ပဝိဋ္ဌော ပါနီယမာဠကေ ဒသမတ္တေသု ပါနီယဃဋေသု ပိပါသာဝိနောဒနမတ္တမ္ပိ ပါနီယံ အလဘန္တော၊ ‘‘ကိံ နာမေတံ ဧတ္တကာနံ ဘိက္ခူနံ ဝသနဋ္ဌာနေ ပိပါသာယ အာဂတာနံ ပိပါသာဝိနောဒနမတ္တံ ပါနီယံ နတ္ထီ’’တိ ဥဇ္ဈာယိတုံ အာရဒ္ဓါ။ စူဠပိဏ္ဍပါတိကတိဿတ္ထေရော တဿ ကထံ သုတွာ တဿ သန္တိကံ ဂစ္ဆန္တော ပါနီယမာဠကေ ဒသမတ္တေ ပါနီယဃဋေ ပူရေ ဒိသွာ ‘‘ဇီဝမာနပေတကသတ္တော အယံ ဘဝိဿတီ’’တိ စိန္တေတွာ၊ ‘‘ဥပါသက၊ သစေ ပိပါသိတောသိ၊ ပိဝ ပါနီယ’’န္တိ ဝတွာ ကုဋံ ဥက္ခိပိတွာ တဿ ဟတ္ထေသု အာသိဉ္စိ။ တဿ ကမ္မံ ပဋိစ္စ ပီတပီတံ ပါနီယံ တတ္တကပါလေ ပက္ခိတ္တမိဝ နဿတိ၊ သကလေပိ ဃဋေ ပိဝတော ပိပါသာ န ပစ္ဆိဇ္ဇိ။ အထ နံ ထေရော အာဟ – ‘‘ယာဝ ဒါရုဏဉ္စ တေ၊ ဥပါသက၊ ကမ္မံ ကတံ၊ ဣဒါနေဝ ပေတော ဇာတော၊ ဝိပါကော ကီဒိသော ဘဝိဿတီ’’တိ?

သော တဿ ကထံ သုတွာ လဒ္ဓသံဝေဂေါ ထေရံ ဝန္ဒိတွာ တာနိ အဒူဟလာဒီနိ ဝိသင်္ခရိတွာ ဝေဂေန ဃရံ ဂန္တွာ ပုတ္တဒါရံ ဩလောကေတွာ သတ္ထာနိ ဘိန္ဒိတွာ ဒီပကမိဂပက္ခိနော အရညေ ဝိဿဇ္ဇေတွာ ထေရံ ပစ္စုပသင်္ကမိတွာ ပဗ္ဗဇ္ဇံ ယာစိ။ ဒုက္ကရာ၊ အာဝုသော၊ ပဗ္ဗဇ္ဇာ၊ ကထံ တွံ ပဗ္ဗဇိဿသီတိ? ဘန္တေ၊ ဧဝရူပံ ပစ္စက္ခကာရဏံ ဒိသွာ ကထံ န ပဗ္ဗဇိဿာမီတိ? ထေရော တစပဉ္စကကမ္မဋ္ဌာနံ ဒတွာ ပဗ္ဗာဇေသိ။ သော ဝတ္တာရဘိတော ဟုတွာ ဗုဒ္ဓဝစနံ ဥဂ္ဂဏှန္တော ဧကဒိဝသံ ဒေဝဒူတသုတ္တေ ‘‘တမေနံ၊ ဘိက္ခဝေ၊ နိရယပါလာ ပုန မဟာနိရယေ ပက္ခိပန္တီ’’တိ (မ။ နိ။ ၃။၂၇၀၊ အ။ နိ။ ၃။၃၆) ဣမံ ဌာနံ သုတွာ ‘‘ဧတ္တကံ ဒုက္ခရာသိံ အနုဘဝိတသတ္တံ ပုန မဟာနိရယေ ပက္ခိပန္တိ၊ အဟော ဘာရိယော၊ ဘန္တေ၊ မဟာနိရယော’’တိ အာဟ။ အာမာဝုသော၊ ဘာရိယောတိ။ သက္ကာ၊ ဘန္တေ၊ ပဿိတုန္တိ? ‘‘န သက္ကာ ပဿိတုံ၊ ဒိဋ္ဌသဒိသံ ကာတုံ ဧကံ ကာရဏံ ဒဿေဿာမီ’’တိ သာမဏေရေ သမာဒပေတွာ ပါသာဏပိဋ္ဌေ အလ္လဒါရုရာသိံ ကာရေဟီတိ။ သော တထာ ကာရေသိ။ ထေရော ယထာနိသိန္နောဝ ဣဒ္ဓိယာ အဘိသင်္ခရိတွာ မဟာနိရယတော ခဇ္ဇောပနကမတ္တံ အဂ္ဂိပပဋိကံ နီဟရိတွာ ပဿန္တဿေဝ တဿ ထေရဿ ဒါရုရာသိမှိ ပက္ခိပိ။ တဿ တတ္ထ နိပါတော စ ဒါရုရာသိနော ဈာယိတွာ ဆာရိကဘာဝူပဂမနဉ္စ အပစ္ဆာ အပုရိမံ အဟောသိ။

သော တံ ဒိသွာ၊ ‘‘ဘန္တေ၊ ဣမသ္မိံ သာသနေ ကတိ ဓုရာနိ နာမာ’’တိ ပုစ္ဆိ။ အာဝုသော၊ ဝိပဿနာဓုရံ၊ ဂန္ထဓုရန္တိ။ ‘‘ဘန္တေ၊ ဂန္ထော နာမ ပဋိဗလဿ ဘာရော၊ မယှံ ပန ဒုက္ခူပနိသာ သဒ္ဓါ၊ ဝိပဿနာဓုရံ ပူရေဿာမိ ကမ္မဋ္ဌာနံ မေ ဒေထာ’’တိ ဝန္ဒိတွာ နိသီဒိ။ ထေရော ‘‘ဝတ္တသမ္ပန္နော ဘိက္ခူ’’တိ ဝတ္တသီသေ ဌတွာ တဿ ကမ္မဋ္ဌာနံ ကထေသိ။ သော ကမ္မဋ္ဌာနံ ဂဟေတွာ ဝိပဿနာယ စ ကမ္မံ ကရောတိ၊ ဝတ္တဉ္စ ပူရေတိ။ ဧကဒိဝသံ စိတ္တလပဗ္ဗတမဟာဝိဟာရေ ဝတ္တံ ကရောတိ၊ ဧကဒိဝသံ ဂါမေဏ္ဍဝါလမဟာဝိဟာရေ၊ ဧကဒိဝသံ ဂေါစရဂါမမဟာဝိဟာရေ။ ထိနမိဒ္ဓေ ဩက္ကန္တမတ္တေ ဝတ္တပရိဟာနိဘယေန ပလာလဝရဏကံ တေမေတွာ သီသေ ဌပေတွာ ပါဒေ ဥဒကေ ဩတာရေတွာ နိသီဒတိ။ သော ဧကဒိဝသံ စိတ္တလပဗ္ဗတမဟာဝိဟာရေ ဒွေ ယာမေ ဝတ္တံ ကတွာ ဗလဝပစ္စူသကာလေ နိဒ္ဒါယ ဩက္ကမိတုံ အာရဒ္ဓါယ အလ္လပလာလံ သီသေ ဌပေတွာ နိသိန္နော ပါစီနပဗ္ဗတပဿေ သာမဏေရဿ အရုဏဝတိယသုတ္တန္တံ သဇ္ဈာယန္တဿ –

‘‘အာရမ္ဘထ နိက္ကမထ၊ ယုဉ္ဇထ ဗုဒ္ဓသာသနေ၊

ဓုနာထ မစ္စုနော သေနံ၊ နဠာဂါရံဝ ကုဉ္ဇရော။

‘‘ယော ဣမသ္မိံ ဓမ္မဝိနယေ၊ အပ္ပမတ္တော ဝိဟဿတိ၊

ပဟာယ ဇာတိသံသာရံ၊ ဒုက္ခဿန္တံ ကရိဿတီ’’တိ။ (သံ။ နိ။ ၁။၁၈၅) –

ဣဒံ ဌာနံ သုတွာ ‘‘မာဒိသဿ အာရဒ္ဓဝီရိယဿ ဘိက္ခုနော သမ္မာသမ္ဗုဒ္ဓေန ဣဒံ ကထိတံ ဘဝိဿတီ’’တိ ပီတိံ ဥပ္ပာဒေတွာ ဈာနံ နိဗ္ဗတ္တေတွာ တဒေဝ ပါဒကံ ကတွာ အနာဂါမိဖလေ ပတိဋ္ဌာယ အပရာပရံ ဝါယမန္တော သဟ ပဋိသမ္ဘိဒါဟိ အရဟတ္တံ ပါပုဏိ။ ပရိနိဗ္ဗာနကာလေ စ တဒေဝ ကာရဏံ ဒဿေန္တော ဧဝမာဟ –

‘‘အလ္လံ ပလာလပုဉ္ဇာဟံ၊ သီသေနာဒါယ စင်္ကမိံ၊

ပတ္တောသ္မိ တတိယံ ဌာနံ၊ ဧတ္ထ မေ နတ္ထိ သံသယော’’တိ။

ဧဝရူပဿ ဝတ္တဝသေန ဝိက္ခမ္ဘိတကိလေသော တထာ ဝိက္ခမ္ဘိတောဝ ဟောတိ။

ဧကစ္စဿ ဝုတ္တနယေနေဝ ဂန္ထေ ယုတ္တဿ ဂန္ထံ ဥဂ္ဂဏှန္တဿ သဇ္ဈာယန္တဿ ဝါစေန္တဿ ဒေသေန္တဿ ပကာသေန္တဿ စ ကိလေသော ဩကာသံ န လဘတိ၊ ဂန္ထဝသေန ဝိက္ခမ္ဘိတောဝ ဟောတိ။ သော တံ တထာ ဝိက္ခမ္ဘိတမေဝ ကတွာ ဝိဝဋ္ဋေတွာ အရဟတ္တံ ဂဏှာတိ မလိယဒေဝတ္ထေရော ဝိယ။ သော ကိရာယသ္မာ တိဝဿဘိက္ခုကာလေ ကလ္လဂါမကေ မဏ္ဍလာရာမမဟာဝိဟာရေ ဥဒ္ဒေသဉ္စ ဂဏှာတိ၊ ဝိပဿနာယ စ ကမ္မံ ကရောတိ။ တဿေကဒိဝသံ ကလ္လဂါမေ ဘိက္ခာယ စရတော ဧကာ ဥပါသိကာ ယာဂုဥဠုင်္ကံ ဒတွာ ပုတ္တသိနေဟံ ဥပ္ပာဒေတွာ ထေရံ အန္တောနိဝေသနေ နိသီဒါပေတွာ ပဏီတဘောဇနံ ဘောဇေတွာ ‘‘ကတရဂါမဝါသိကောသိ တာတာ’’တိ ပုစ္ဆိ။ မဏ္ဍလာရာမမဟာဝိဟာရေ ဂန္ထကမ္မံ ကရောမိ၊ ဥပါသိကေတိ။ တေန ဟိ တာတ ယာဝ ဂန္ထကမ္မံ ကရောသိ၊ ဣဓေဝ နိဗဒ္ဓံ ဘိက္ခံ ဂဏှာသီတိ။ သော တံ အဓိဝါသေတွာ တတ္ထ နိဗဒ္ဓံ ဘိက္ခံ ဂဏှာတိ၊ ဘတ္တကိစ္စာဝသာနေ အနုမောဒနံ ကရောန္တော ‘‘သုခံ ဟောတု၊ ဒုက္ခာ မုစ္စတူ’’တိ ပဒဒွယမေဝ ကထေတွာ ဂစ္ဆတိ။ အန္တောဝဿေ တေမာသံ တဿာယေဝ သင်္ဂဟံ ကရောန္တော ပိဏ္ဍာပစိတိံ ကတွာ မဟာပဝါရဏာယ သဟ ပဋိသမ္ဘိဒါဟိ အရဟတ္တံ ပါပုဏိ။ နေဝါသိကမဟာထေရော အာဟ – ‘‘အာဝုသော မဟာဒေဝ၊ အဇ္ဇ ဝိဟာရေ မဟာဇနော သန္နိပတိဿတိ၊ တဿ ဓမ္မဒါနံ ဒဒေယျာသီ’’တိ။ ထေရော အဓိဝါသေသိ။

ဒဟရသာမဏေရာ ဥပါသိကာယ သညံ အဒံသု – ‘‘အဇ္ဇ တေ ပုတ္တော ဓမ္မံ ကထေဿတိ၊ ဝိဟာရံ ဂန္တွာ သုဏေယျာသီ’’တိ။ တာတာ၊ န သဗ္ဗေဝ ဓမ္မကထံ ဇာနန္တိ၊ မမ ပုတ္တော ဧတ္တကံ ကာလံ မယှံ ကထေန္တော ‘‘သုခံ ဟောတု၊ ဒုက္ခာ မုစ္စတူ’’တိ ပဒဒွယမေဝ ကထေသိ၊ မာ ကေဠိံ ကရောထာတိ။ မာ၊ တွံ ဥပါသိကေ၊ ဇာနနံ ဝါ အဇာနနံ ဝါ ဥပဋ္ဌဟဿု၊ ဝိဟာရံ ဂန္တွာ ဓမ္မမေဝ သုဏာဟီတိ။ ဥပါသိကာ ဂန္ဓမာလာဒီနိ ဂဟေတွာ ဂန္တွာ ပူဇေတွာ ပရိသန္တေ ဓမ္မံ သုဏမာနာ နိသီဒိ။ ဒိဝါဓမ္မကထိကော စ သရဘာဏကော စ အတ္တနော ပမာဏံ ဉတွာ ဥဋ္ဌဟိံသု။ တတော မလိယဒေဝတ္ထေရော ဓမ္မာသနေ နိသီဒိတွာ စိတ္တဗီဇနိံ ဂဟေတွာ အနုပုဗ္ဗိံ ကထံ ဝတွာ – ‘‘မယာ မဟာဥပါသိကာယ တယော မာသေ ဒွီဟေဝ ပဒေဟိ အနုမောဒနာ ကတာ၊ အဇ္ဇ သဗ္ဗရတ္တိံ တီဟိ ပိဋကေဟိ သမ္မသိတွာ တဿေဝ ပဒဒွယဿ အတ္ထံ ကထေဿာမီ’’တိ ဓမ္မဒေသနံ အာရဘိတွာ သဗ္ဗရတ္တိံ ကထေသိ။ အရုဏုဂ္ဂမနေ ဒေသနာပရိယောသာနေ မဟာဥပါသိကာ သောတာပတ္တိဖလေ ပတိဋ္ဌာသိ။

အပရောပိ တသ္မိံယေဝ မဟာဝိဟာရေ တိဿဘူတိတ္ထေရော နာမ ဝိနယံ ဂဏှန္တော ဘိက္ခာစာရဝေလာယံ အန္တောဂါမံ ပဝိဋ္ဌော ဝိသဘာဂါရမ္မဏံ ဩလောကေသိ။ တဿ လောဘော ဥပ္ပဇ္ဇိ၊ သော ပတိဋ္ဌိတပါဒံ အစာလေတွာ အတ္တနော ပတ္တေ ယာဂုံ ဥပဋ္ဌာကဒဟရဿ ပတ္တေ အာကိရိတွာ ‘‘အယံ ဝိတက္ကော ဝဍ္ဎမာနော မံ စတူသု အပါယေသု သံသီဒါပေဿတီ’’တိ တတောဝ နိဝတ္တိတွာ အာစရိယဿ သန္တိကံ ဂန္တွာ ဝန္ဒိတွာ ဧကမန္တံ ဌိတော အာဟ – ‘‘ဧကော မေ ဗျာဓိ ဥပ္ပန္နော၊ အဟံ ဧတံ တိကိစ္ဆိတုံ သက္ကောန္တော အာဂမိဿာမိ၊ ဣတရထာ နာဂမိဿာမိ။ တုမှေ ဒိဝါ ဥဒ္ဒေသဉ္စ သာယံ ဥဒ္ဒေသဉ္စ မံ ဩလောကေတွာ ဌပေထ၊ ပစ္စူသကာလေ ဥဒ္ဒေသံ ပန မာ ဌပယိတ္ထာ’’တိ ဧဝံ ဝတွာ မလယဝါသိမဟာသင်္ဃရက္ခိတတ္ထေရဿ သန္တိကံ အဂမာသိ။ ထေရော အတ္တနော ပဏ္ဏသာလာယ ပရိဘဏ္ဍံ ကရောန္တော တံ အနောလောကေတွာဝ ‘‘ပဋိသာမေဟိ၊ အာဝုသော၊ တဝ ပတ္တစီဝရ’’န္တိ အာဟ။ ဘန္တေ၊ ဧကော မေ ဗျာဓိ အတ္ထိ၊ သစေ တုမှေ တံ တိကိစ္ဆိတုံ သက္ကောထ၊ ပဋိသာမေဿာမီတိ။ အာဝုသော၊ ဥပ္ပန္နံ ရောဂံ တိကိစ္ဆိတုံ သမတ္ထဿ သန္တိကံ အာဂတောသိ၊ ပဋိသာမေဟီတိ။ သုဗ္ဗစော ဘိက္ခု ‘‘အမှာကံ အာစရိယော အဇာနိတွာ ဧဝံ န ဝက္ခတီ’’တိ ပတ္တစီဝရံ ဌပေတွာ ထေရဿ ဝတ္တံ ဒဿေတွာ ဝန္ဒိတွာ ဧကမန္တံ နိသီဒိ။

ထေရော ‘‘ရာဂစရိတော အယ’’န္တိ ဉတွာ အသုဘကမ္မဋ္ဌာနံ ကထေသိ။ သော ဥဋ္ဌာယ ပတ္တစီဝရံ အံသေ လဂ္ဂေတွာ ထေရံ ပုနပ္ပုနံ ဝန္ဒိ။ ကိံ၊ အာဝုသော၊ မဟာဘူတိ အတိရေကနိပစ္စကာရံ ဒဿေသီတိ? ဘန္တေ၊ သစေ အတ္တနော ကိစ္စံ ကာတုံ သက္ခိဿာမိ၊ ဣစ္စေတံ ကုသလံ။ နော စေ၊ ဣဒံ မေ ပစ္ဆိမဒဿနန္တိ! ဂစ္ဆာဝုသော၊ မဟာဘူတိ တာဒိသဿ ယုတ္တယောဂဿ ကုလပုတ္တဿ န ဈာနံ ဝါ ဝိပဿနာ ဝါ မဂ္ဂေါ ဝါ ဖလံ ဝါ ဒုလ္လဘန္တိ။ သော ထေရဿ ကထံ သုတွာ နိပစ္စကာရံ ဒဿေတွာ အာဂမနကာလေ ဝဝတ္ထာပိတံ ဆန္နံ သေပဏ္ဏိဂစ္ဆမူလံ ဂန္တွာ ပလ္လင်္ကေန နိသိန္နော အသုဘကမ္မဋ္ဌာနံ ပါဒကံ ကတွာ ဝိပဿနံ ပဋ္ဌပေတွာ အရဟတ္တေ ပတိဋ္ဌာယ ပစ္စူသကာလေ ဥဒ္ဒေသံ သမ္ပာပုဏိ။ ဧဝရူပါနံ ဂန္ထဝသေန ဝိက္ခမ္ဘိတာ ကိလေသာ တထာ ဝိက္ခမ္ဘိတာဝ ဟောန္တိ။

ဧကစ္စဿ ပန ဝုတ္တနယေနေဝ ဓုတင်္ဂါနိ ပရိဟရတော ကိလေသော ဩကာသံ န လဘတိ၊ ဓုတင်္ဂဝသေန ဝိက္ခမ္ဘိတောဝ ဟောတိ။ သော တံ တထာ ဝိက္ခမ္ဘိတမေဝ ကတွာ ဝိဝဋ္ဋေတွာ အရဟတ္တံ ဂဏှာတိ ဂါမန္တပဗ္ဘာရဝါသီ မဟာသီဝတ္ထေရော ဝိယ။ ထေရော ကိရ မဟာဂါမေ တိဿမဟာဝိဟာရေ ဝသန္တော တေပိဋကံ အတ္ထဝသေန စ ပါဠိဝသေန စ အဋ္ဌာရသ မဟာဂဏေ ဝါစေတိ။ ထေရဿ ဩဝါဒေ ဌတွာ သဋ္ဌိသဟဿ ဘိက္ခူ အရဟတ္တံ ပါပုဏိံသု ။ တေသု ဧကော ဘိက္ခု အတ္တနာ ပဋိဝိဒ္ဓဓမ္မံ အာရဗ္ဘ ဥပ္ပန္နသောမနဿော စိန္တေသိ – ‘‘အတ္ထိ နု ခေါ ဣဒံ သုခံ အမှာကံ အာစရိယဿာ’’တိ။ သော အာဝဇ္ဇေန္တော ထေရဿ ပုထုဇ္ဇနဘာဝံ ဉတွာ ‘‘ဧကေနုပါယေန ထေရဿ သံဝေဂံ ဥပ္ပာဒေဿာမီ’’တိ အတ္တနော ဝသနဋ္ဌာနတော ထေရဿ သန္တိကံ ဂန္တွာ ဝန္ဒိတွာ ဝတ္တံ ဒဿေတွာ နိသီဒိ။ အထ နံ ထေရော ‘‘ကိံ အာဂတောသိ၊ အာဝုသော၊ ပိဏ္ဍပါတိကာ’’တိ အာဟ။ ‘‘သစေ မေ ဩကာသံ ကရိဿထ၊ ဧကံ ဓမ္မပဒံ ဂဏှိဿာမီ’’တိ အာဂတောသ္မိ၊ ဘန္တေတိ။ ဗဟူ၊ အာဝုသော၊ ဂဏှန္တိ၊ တုယှံ ဩကာသော န ဘဝိဿတီတိ။ သော သဗ္ဗေသု ရတ္တိဒိဝသဘာဂေသု ဩကာသံ အလဘန္တော၊ ‘‘ဘန္တေ၊ ဧဝံ ဩကာသေ အသတိ မရဏဿ ကထံ ဩကာသံ လဘိဿထာ’’တိ အာဟ။ တဒါ ထေရော စိန္တေသိ – ‘‘နာယံ ဥဒ္ဒေသတ္ထာယ အာဂတော၊ မယှံ ပနေသ သံဝေဂဇနနတ္ထာယ အာဂတော’’တိ။ သောပိ ထေရော ‘‘ဘိက္ခုနာ နာမ၊ ဘန္တေ၊ မာဒိသေန ဘဝိတဗ္ဗ’’န္တိ ဝတွာ ထေရံ ဝန္ဒိတွာ မဏိဝဏ္ဏေ အာကာသေ ဥပ္ပတိတွာ အဂမာသိ။

ထေရော တဿ ဂတကာလတော ပဋ္ဌာယ ဇာတသံဝေဂေါ ဒိဝါ ဥဒ္ဒေသဉ္စ သာယံ ဥဒ္ဒေသဉ္စ ဝါစေတွာ ပတ္တစီဝရံ ဟတ္ထပါသေ ဌပေတွာ ပစ္စူသကာလေ ဥဒ္ဒေသံ ဂဟေတွာ ဩတရန္တေန ဘိက္ခုနာ သဒ္ဓိံ ပတ္တစီဝရမာဒါယ ဩတိဏ္ဏော တေရသ ဓုတဂုဏေ ပရိပုဏ္ဏေ အဓိဋ္ဌာယ ဂါမန္တပဗ္ဘာရသေနာသနံ ဂန္တွာ ပဗ္ဘာရံ ပဋိဇဂ္ဂိတွာ မဉ္စပီဌံ ဥဿာပေတွာ ‘‘အရဟတ္တံ အပတွာ မဉ္စေ ပိဋ္ဌိံ န ပသာရေဿာမီ’’တိ မာနသံ ဗန္ဓိတွာ စင်္ကမံ ဩတရိ။ တဿ ‘‘အဇ္ဇ အရဟတ္တံ ဂဏှိဿာမိ အဇ္ဇ အရဟတ္တံ ဂဏှိဿာမီ’’တိ ဃဋေန္တဿေဝ ပဝါရဏာ သမ္ပတ္တာ။ သော ပဝါရဏာယ ဥပကဋ္ဌာယ ‘‘ပုထုဇ္ဇနဘာဝံ ပဟာယ ဝိသုဒ္ဓိပဝါရဏံ ပဝါရေဿာမီ’’တိ စိန္တေန္တော အတိဝိယ ကိလမတိ။ သော တာယ ပဝါရဏာယ မဂ္ဂံ ဝါ ဖလံ ဝါ ဥပ္ပာဒေတုံ အသက္ကောန္တော ‘‘မာဒိသောပိ နာမ အာရဒ္ဓဝိပဿကော န လဘတိ၊ ယာဝ ဒုလ္လဘဉ္စ ဝတိဒံ အရဟတ္တ’’န္တိ ဝတွာ တေနေဝ နိယာမေန ဌာနစင်္ကမဗဟုလော ဟုတွာ တိံသ ဝဿာနိ သမဏဓမ္မံ ကတွာ မဟာပဝါရဏာယ မဇ္ဈေ ဌိတံ ပုဏ္ဏစန္ဒံ ဒိသွာ ‘‘ကိံ နု ခေါ စန္ဒမဏ္ဍလံ ဝိသုဒ္ဓံ၊ ဥဒါဟု မယှံ သီလ’’န္တိ စိန္တေန္တော ‘‘စန္ဒမဏ္ဍလေ သသလက္ခဏံ ပညာယတိ၊ မယှံ ပန ဥပသမ္ပဒတော ပဋ္ဌာယ ယာဝဇ္ဇဒိဝသာ သီလသ္မိံ ကာဠကံ ဝါ တိလကော ဝါ နတ္ထီ’’တိ အာဝဇ္ဇေတွာ သဉ္ဇာတပီတိသောမနဿော ပရိပက္ကဉာဏတ္တာ ပီတိံ ဝိက္ခမ္ဘေတွာ သဟ ပဋိသမ္ဘိဒါဟိ အရဟတ္တံ ပါပုဏိ။ ဧဝရူပဿ ဓုတင်္ဂဝသေန ဝိက္ခမ္ဘိတော ကိလေသော တထာ ဝိက္ခမ္ဘိတောဝ ဟောတိ။

ဧကစ္စဿ ဝုတ္တနယေနေဝ ပဌမဇ္ဈာနာဒိသမာပဇ္ဇနဗဟုလတာယ ကိလေသော ဩကာသံ န လဘတိ၊ သမာပတ္တိဝသေန ဝိက္ခမ္ဘိတောဝ ဟောတိ။ သော တံ တထာ ဝိက္ခမ္ဘိတမေဝ ကတွာ ဝိဝဋ္ဋေတွာ အရဟတ္တံ ဂဏှာတိ မဟာတိဿတ္ထေရော ဝိယ။ ထေရော ကိရ အဝဿိကကာလတော ပဋ္ဌာယ အဋ္ဌသမာပတ္တိလာဘီ။ သော သမာပတ္တိဝိက္ခမ္ဘိတာနံ ကိလေသာနံ အသမုဒါစာရေန ဥဂ္ဂဟပရိပုစ္ဆာဝသေနေဝ အရိယမဂ္ဂသာမန္တံ ကထေတိ၊ သဋ္ဌိဝဿကာလေပိ အတ္တနော ပုထုဇ္ဇနဘာဝံ န ဇာနာတိ။ အထေကဒိဝသံ မဟာဂါမေ တိဿမဟာဝိဟာရတော ဘိက္ခုသင်္ဃော တလင်္ဂရဝါသိဓမ္မဒိန္နတ္ထေရဿ သာသနံ ပေသေသိ ‘‘ထေရော အာဂန္တွာ အမှာကံ ဓမ္မကထံ ကထေတူ’’တိ။ ထေရော အဓိဝါသေတွာ ‘‘မမ သန္တိကေ မဟလ္လကတရော ဘိက္ခု နတ္ထိ၊ မဟာတိဿတ္ထေရော ခေါ ပန မေ ကမ္မဋ္ဌာနာစရိယော၊ တံ သင်္ဃတ္ထေရံ ကတွာ ဂမိဿာမီ’’တိ စိန္တေန္တော ဘိက္ခုသင်္ဃပရိဝုတော ထေရဿ ဝိဟာရံ ဂန္တွာ ဒိဝါဋ္ဌာနေ ထေရဿ ဝတ္တံ ဒဿေတွာ ဧကမန္တံ နိသီဒိ။

ထေရော အာဟ – ‘‘ကိံ၊ ဓမ္မဒိန္န၊ စိရဿံ အာဂတောသီ’’တိ? ‘‘အာမ၊ ဘန္တေ၊ တိဿမဟာဝိဟာရတော မေ ဘိက္ခုသင်္ဃော သာသနံ ပေသေသိ၊ အဟံ ဧကကော န ဂမိဿာမိ၊ တုမှေဟိ ပန သဒ္ဓိံ ဂန္တုကာမော ဟုတွာ အာဂတောမှီ’’တိ သာရဏီယကထံ ကထေန္တောဝ ပပဉ္စေတွာ ‘‘ကဒါ၊ ဘန္တေ၊ တုမှေဟိ အယံ ဓမ္မော အဓိဂတော’’တိ ပုစ္ဆိ။ သဋ္ဌိမတ္တာနိ၊ အာဝုသော ဓမ္မဒိန္န၊ ဝဿာနိ ဟောန္တီတိ ။ သမာပတ္တိံ ပန၊ ဘန္တေ၊ ဝဠဉ္ဇေထာတိ။ အာမ၊ အာဝုသောတိ။ ဧကံ ပေါက္ခရဏိံ မာပေတုံ သက္ကုဏေယျာထ၊ ဘန္တေတိ? ‘‘န၊ အာဝုသော၊ ဧတံ ဘာရိယ’’န္တိ ဝတွာ သမ္မုခဋ္ဌာနေ ပေါက္ခရဏိံ မာပေသိ။ ‘‘ဧတ္ထ၊ ဘန္တေ၊ ဧကံ ပဒုမဂစ္ဆံ မာပေထာ’’တိ စ ဝုတ္တော တမ္ပိ မာပေသိ။ ဣဒါနေတ္ထ မဟန္တံ ပုပ္ဖံ ဒဿေထာတိ။ ထေရော တမ္ပိ ဒဿေသိ။ ဧတ္ထ သောဠသဝဿုဒ္ဒေသိကံ ဣတ္ထိရူပံ ဒဿေထာတိ ။ ထေရော သောဠသဝဿုဒ္ဒေသိကံ ဣတ္ထိရူပံ ဒဿေသိ။ တတော နံ အာဟ – ‘‘ဣဒံ၊ ဘန္တေ၊ ပုနပ္ပုနံ သုဘတော မနသိ ကရောထာ’’တိ။ ထေရော အတ္တနာဝ မာပိတံ ဣတ္ထိရူပံ ဩလောကေန္တော လောဘံ ဥပ္ပာဒေသိ။ တဒါ အတ္တနော ပုထုဇ္ဇနဘာဝံ ဉတွာ ‘‘အဝဿယော မေ သပ္ပုရိသ ဟောဟီ’’တိ အန္တေဝါသိကဿ သန္တိကေ ဥက္ကုဋိကံ နိသီဒိ။ ‘‘ဧတဒတ္ထမေဝါဟံ၊ ဘန္တေ၊ အာဂတော’’တိ ထေရဿ အသုဘဝသေန သလ္လဟုကံ ကတွာ ကမ္မဋ္ဌာနံ ကထေတွာ ထေရဿ ဩကာသံ ကာတုံ ဗဟိ နိက္ခန္တော။ သုပရိမဒ္ဒိတသင်္ခါရော ထေရော တသ္မိံ ဒိဝါဋ္ဌာနတော နိက္ခန္တမတ္တေယေဝ သဟ ပဋိသမ္ဘိဒါဟိ အရဟတ္တံ ပါပုဏိ။ အထ နံ သင်္ဃတ္ထေရံ ကတွာ ဓမ္မဒိန္နတ္ထေရော တိဿမဟာဝိဟာရံ ဂန္တွာ သင်္ဃဿ ဓမ္မကထံ ကထေသိ။ ဧဝရူပဿ သမာပတ္တိဝသေန ဝိက္ခမ္ဘိတော ကိလေသော တထာ ဝိက္ခမ္ဘိတောဝ ဟောတိ။

ဧကစ္စဿ ပန ဝုတ္တနယေနေဝ ဝိပဿနာယ ကမ္မံ ကရောန္တဿ ကိလေသော ဩကာသံ န လဘတိ၊ ဝိပဿနာဝသေန ဝိက္ခမ္ဘိတောဝ ဟောတိ။ သော တံ တထာ ဝိက္ခမ္ဘိတမေဝ ကတွာ ဝိဝဋ္ဋေတွာ အရဟတ္တံ ဂဏှာတိ၊ ဗုဒ္ဓကာလေ သဋ္ဌိမတ္တာ အာရဒ္ဓဝိပဿကာ ဘိက္ခူ ဝိယ။ တေ ကိရ သတ္ထု သန္တိကေ ကမ္မဋ္ဌာနံ ဂဟေတွာ ဝိဝိတ္တံ အရညံ ပဝိသိတွာ ဝိပဿနာယ ကမ္မံ ကရောန္တာ ကိလေသာနံ အသမုဒါစာရဝသေန ‘‘ပဋိဝိဒ္ဓမဂ္ဂဖလာ မယ’’န္တိ သညာယ မဂ္ဂဖလတ္ထာယ ဝါယာမံ အကတွာ ‘‘အမှေဟိ ပဋိဝိဒ္ဓဓမ္မံ ဒသဗလဿ အာရောစေဿာမာ’’တိ သတ္ထု သန္တိကံ အာဂစ္ဆန္တိ။

သတ္ထာ တေသံ ပုရေ အာဂမနတောဝ အာနန္ဒတ္ထေရံ အာဟ – ‘‘အာနန္ဒ၊ ပဓာနကမ္မိကာ ဘိက္ခူ အဇ္ဇ မံ ပဿိတုံ အာဂမိဿန္တိ၊ တေသံ မမ ဒဿနာယ ဩကာသံ အကတွာ ‘အာမကသုသာနံ ဂန္တွာ အလ္လအသုဘဘာဝနံ ကရောထာ’တိ ပဟိဏေယျာသီ’’တိ။ ထေရော တေသံ အာဂတာနံ သတ္ထာရာ ကထိတသာသနံ အာရောစေသိ။ တေ ‘‘တထာဂတော အဇာနိတွာ န ကထေဿတိ၊ အဒ္ဓါ ဧတ္ထ ကာရဏံ ဘဝိဿတီ’’တိ အာမကသုသာနံ ဂန္တွာ အလ္လအသုဘံ ဩလောကေန္တာ လောဘံ ဥပ္ပာဒေတွာ ‘‘ဣဒံ နူန သမ္မာသမ္ဗုဒ္ဓေန ဒိဋ္ဌံ ဘဝိဿတီ’’တိ ဇာတသံဝေဂါ လဒ္ဓမဂ္ဂံ ကမ္မဋ္ဌာနံ အာဒိတော ပဋ္ဌာယ အာရဘိံသု။ သတ္ထာ တေသံ ဝိပဿနာယ အာရဒ္ဓဘာဝံ ဉတွာ ဂန္ဓကုဋိယံ နိသိန္နောဝ ဣမံ ဩဘာသဂါထမာဟ –

‘‘ယာနိမာနိ အပတ္တာနိ၊ အလာဗူနေဝ သာရဒေ၊

ကာပေါတကာနိ အဋ္ဌီနိ၊ တာနိ ဒိသွာန ကာ ရတီ’’တိ။ (ဓ။ ပ။ ၁၄၉)၊

ဂါထာပရိယောသာနေ အရဟတ္တဖလေ ပတိဋ္ဌဟိံသု။ ဧဝရူပါနံ ဝိပဿနာဝသေန ဝိက္ခမ္ဘိတာ ကိလေသာ တထာ ဝိက္ခမ္ဘိတာဝ ဟောန္တိ။

ဧကစ္စဿ ဝုတ္တနယေနေဝ နဝကမ္မံ ကရောန္တဿ ကိလေသော ဩကာသံ န လဘတိ၊ နဝကမ္မဝသေန ဝိက္ခမ္ဘိတောဝ ဟောတိ။ သော တံ တထာ ဝိက္ခမ္ဘိတမေဝ ကတွာ ဝိဝဋ္ဋေတွာ အရဟတ္တံ ဂဏှာတိ စိတ္တလပဗ္ဗတေ တိဿတ္ထေရော ဝိယ။ တဿ ကိရ အဋ္ဌဝဿိကကာလေ အနဘိရတိ ဥပ္ပဇ္ဇိ၊ သော တံ ဝိနောဒေတုံ အသက္ကောန္တော အတ္တနော စီဝရံ ဓောဝိတွာ ရဇိတွာ ပတ္တံ ပစိတွာ ကေသေ ဩဟာရေတွာ ဥပဇ္ဈာယံ ဝန္ဒိတွာ အဋ္ဌာသိ။ အထ နံ ထေရော အာဟ – ‘‘ကိံ၊ အာဝုသော မဟာတိဿ၊ အတုဋ္ဌဿ ဝိယ တေ အာကာရော’’တိ? အာမ၊ ဘန္တေ၊ အနဘိရတိ မေ ဥပ္ပန္နာ၊ တံ ဝိနောဒေတုံ န သက္ကောမီတိ။ ထေရော တဿာသယံ ဩလောကေန္တော အရဟတ္တဿ ဥပနိဿယံ ဒိသွာ အနုကမ္ပာဝသေန အာဟ – ‘‘အာဝုသော တိဿ၊ မယံ မဟလ္လကာ၊ ဧကံ နော ဝသနဋ္ဌာနံ ကရောဟီ’’တိ ။ ဒုတိယကထံ အကထိတပုဗ္ဗော ဘိက္ခု ‘‘သာဓု၊ ဘန္တေ’’တိ သမ္ပဋိစ္ဆိ။

အထ နံ ထေရော အာဟ – ‘‘အာဝုသော၊ နဝကမ္မံ ကရောန္တော ဥဒ္ဒေသမဂ္ဂဉ္စ မာ ဝိဿဇ္ဇိ၊ ကမ္မဋ္ဌာနဉ္စ မနသိ ကရောဟိ၊ ကာလေန စ ကာလံ ကသိဏပရိကမ္မံ ကရောဟီ’’တိ။ ‘‘ဧဝံ ကရိဿာမိ၊ ဘန္တေ’’တိ ထေရံ ဝန္ဒိတွာ တထာရူပံ သပ္ပာယဋ္ဌာနံ ဩလောကေတွာ ‘‘ဧတ္ထ ကာတုံ သက္ကာ’’တိ ဒါရူဟိ ပူရေတွာ ဈာပေတွာ သောဓေတွာ ဣဋ္ဌကာဟိ ပရိက္ခိပိတွာ ဒွါရဝါတပါနာဒီနိ ယောဇေတွာ သဒ္ဓိံ စင်္ကမနဘူမိဘိတ္တိပရိကမ္မာဒီဟိ လေဏံ နိဋ္ဌာပေတွာ မဉ္စပီဌံ သန္ထရိတွာ ထေရဿ သန္တိကံ ဂန္တွာ ဝန္ဒိတွာ၊ ‘‘ဘန္တေ၊ နိဋ္ဌိတံ လေဏေ ပရိကမ္မံ၊ ဝသထာ’’တိ အာဟ။ အာဝုသော၊ ဒုက္ခေန တယာ ဧတံ ကမ္မံ ကတံ၊ အဇ္ဇ ဧကဒိဝသံ တွညေဝေတ္ထ ဝသာဟီတိ။ သော ‘‘သာဓု၊ ဘန္တေ’’တိ ဝန္ဒိတွာ ပါဒေ ဓောဝိတွာ လေဏံ ပဝိသိတွာ ပလ္လင်္ကံ အာဘုဇိတွာ နိသိန္နော အတ္တနာ ကတကမ္မံ အာဝဇ္ဇိ။ တဿ ‘‘မနာပံ မယာ ဥပဇ္ဈာယဿ ကာယဝေယျာဝစ္စံ ကတ’’န္တိ စိန္တေန္တဿ အဗ္ဘန္တရေ ပီတိ ဥပ္ပန္နာ။ သော တံ ဝိက္ခမ္ဘေတွာ ဝိပဿနံ ပဋ္ဌပေတွာ အဂ္ဂဖလံ အရဟတ္တံ ပါပုဏိ။ ဧဝရူပဿ နဝကမ္မဝသေန ဝိက္ခမ္ဘိတော ကိလေသော တထာ ဝိက္ခမ္ဘိတောဝ ဟောတိ။

ဧကစ္စော ပန ဗြဟ္မလောကတော အာဂတော သုဒ္ဓသတ္တော ဟောတိ။ တဿ အနာသေဝနတာယ ကိလေသော န သမုဒါစရတိ၊ ဘဝဝသေန ဝိက္ခမ္ဘိတော ဟောတိ။ သော တံ တထာ ဝိက္ခမ္ဘိတမေဝ ကတွာ ဝိဝဋ္ဋေတွာ အရဟတ္တံ ဂဏှာတိ အာယသ္မာ မဟာကဿပေါ ဝိယ။ သော ဟိ အာယသ္မာ အဂါရမဇ္ဈေပိ ကာမေ အပရိဘုဉ္ဇိတွာ မဟာသမ္ပတ္တိံ ပဟာယ ပဗ္ဗဇိတွာ နိက္ခန္တော အန္တရာမဂ္ဂေ ပစ္စုဂ္ဂမနတ္ထာယ အာဂတံ သတ္ထာရံ ဒိသွာ ဝန္ဒိတွာ တီဟိ ဩဝါဒေဟိ ဥပသမ္ပဒံ လဘိတွာ အဋ္ဌမေ အရုဏေ သဟ ပဋိသမ္ဘိဒါဟိ အရဟတ္တံ ပါပုဏိ။ ဧဝရူပဿ ဘဝဝသေန ဝိက္ခမ္ဘိတော ကိလေသော တထာ ဝိက္ခမ္ဘိတောဝ ဟောတိ။

ယော ပန အနနုဘူတပုဗ္ဗံ ရူပါဒိအာရမ္မဏံ လဘိတွာ တတ္ထေဝ ဝိပဿနံ ပဋ္ဌပေတွာ ဝိဝဋ္ဋေတွာ အရဟတ္တံ ဂဏှာတိ၊ ဧဝရူပဿ အနနုဘူတာရမ္မဏဝသေန ကာမစ္ဆန္ဒော အနုပ္ပန္နောဝ နုပ္ပဇ္ဇတိ နာမ။

ဥပ္ပန္နော ဝါ ကာမစ္ဆန္ဒော ပဟီယတီတိ ဧတ္ထ ဥပ္ပန္နောတိ ဇာတော ဘူတော သမုဒါဂတော။ ပဟီယတီတိ တဒင်္ဂပ္ပဟာနံ၊ ဝိက္ခမ္ဘနပ္ပဟာနံ၊ သမုစ္ဆေဒပ္ပဟာနံ၊ ပဋိပဿဒ္ဓိပ္ပဟာနံ၊ နိဿရဏပ္ပဟာနန္တိ ဣမေဟိ ပဉ္စဟိ ပဟာနေဟိ ပဟီယတိ၊ န ပုန ဥပ္ပဇ္ဇတီတိ အတ္ထော။ တတ္ထ ဝိပဿနာယ ကိလေသာ တဒင်္ဂဝသေန ပဟီယန္တီတိ ဝိပဿနာ တဒင်္ဂပ္ပဟာနန္တိ ဝေဒိတဗ္ဗာ။ သမာပတ္တိ ပန ကိလေသေ ဝိက္ခမ္ဘေတီတိ သာ ဝိက္ခမ္ဘနပ္ပဟာနန္တိ ဝေဒိတဗ္ဗာ။ မဂ္ဂေါ သမုစ္ဆိန္ဒန္တော ဥပ္ပဇ္ဇတိ၊ ဖလံ ပဋိပ္ပဿမ္ဘယမာနံ၊ နိဗ္ဗာနံ သဗ္ဗကိလေသေဟိ နိဿဋန္တိ ဣမာနိ တီဏိ သမုစ္ဆေဒပဋိပဿဒ္ဓိနိဿရဏပ္ပဟာနာနီတိ ဝုစ္စန္တိ။ ဣမေဟိ လောကိယလောကုတ္တရေဟိ ပဉ္စဟိ ပဟာနေဟိ ပဟီယတီတိ အတ္ထော။

အသုဘနိမိတ္တန္တိ ဒသသု အသုဘေသု ဥပ္ပန္နံ သာရမ္မဏံ ပဌမဇ္ဈာနံ။ တေနာဟု ပေါရာဏာ – ‘‘အသုဘမ္ပိ အသုဘနိမိတ္တံ၊ အသုဘာရမ္မဏာ ဓမ္မာပိ အသုဘနိမိတ္တ’’န္တိ။ ယောနိသောမနသိကရောတောတိ။ ‘‘တတ္ထ ကတမော ယောနိသောမနသိကာရော? အနိစ္စေ အနိစ္စ’’န္တိအာဒိနာ နယေန ဝုတ္တဿ ဥပါယမနသိကာရဿ ဝသေန မနသိကရောတော။ အနုပ္ပန္နော စေဝ ကာမစ္ဆန္ဒော နုပ္ပဇ္ဇတီတိ အသမုဒါဂတော န သမုဒါဂစ္ဆတိ။ ဥပ္ပန္နော စ ကာမစ္ဆန္ဒော ပဟီယတီတိ သမုဒါဂတော စ ကာမစ္ဆန္ဒော ပဉ္စဝိဓေန ပဟာနေန ပဟီယတိ။

အပိစ ဆ ဓမ္မာ ကာမစ္ဆန္ဒဿ ပဟာနာယ သံဝတ္တန္တိ – အသုဘနိမိတ္တဿ ဥဂ္ဂဟော၊ အသုဘဘာဝနာနုယောဂေါ၊ ဣန္ဒြိယေသု ဂုတ္တဒွါရတာ၊ ဘောဇနေ မတ္တညုတာ၊ ကလျာဏမိတ္တတာ သပ္ပာယကထာတိ။ ဒသဝိဓဉှိ အသုဘနိမိတ္တံ ဥဂ္ဂဏှန္တဿာပိ ကာမစ္ဆန္ဒော ပဟီယတိ၊ ဘာဝေန္တဿာပိ၊ ဣန္ဒြိယေသု ပိဟိတဒွါရဿာပိ၊ စတုန္နံ ပဉ္စန္နံ အာလောပါနံ ဩကာသေ သတိ ဥဒကံ ပိဝိတွာ ယာပနသီလတာယ ဘောဇနေ မတ္တညုနောပိ။ တေနေတံ ဝုတ္တံ –

‘‘စတ္တာရော ပဉ္စ အာလောပေ၊ အဘုတွာ ဥဒကံ ပိဝေ၊

အလံ ဖာသုဝိဟာရာယ၊ ပဟိတတ္တဿ ဘိက္ခုနော’’တိ။ (ထေရဂါ။ ၉၈၃)၊

အသုဘကမ္မိကတိဿတ္ထေရသဒိသေ အသုဘဘာဝနာရတေ ကလျာဏမိတ္တေ သေဝန္တဿာပိ ကာမစ္ဆန္ဒော ပဟီယတိ၊ ဌာနနိသဇ္ဇာဒီသု ဒသအသုဘနိဿိတသပ္ပာယကထာယပိ ပဟီယတိ။ တေန ဝုတ္တံ – ‘‘ဆ ဓမ္မာ ကာမစ္ဆန္ဒဿ ပဟာနာယ သံဝတ္တန္တီ’’တိ။

၁၇။ သတ္တမေ မေတ္တာ စေတောဝိမုတ္တီတိ သဗ္ဗသတ္တေသု ဟိတဖရဏကာ မေတ္တာ။ ယသ္မာ ပန တံသမ္ပယုတ္တစိတ္တံ နီဝရဏာဒီဟိ ပစ္စနီကဓမ္မေဟိ ဝိမုစ္စတိ၊ တသ္မာ သာ ‘‘စေတောဝိမုတ္တီ’’တိ ဝုစ္စတိ။ ဝိသေသတော ဝါ သဗ္ဗဗျာပါဒပရိယုဋ္ဌာနေန ဝိမုတ္တတ္တာ သာ စေတောဝိမုတ္တီတိ ဝေဒိတဗ္ဗာ။ တတ္ထ ‘‘မေတ္တာ’’တိ ဧတ္တာဝတာ ပုဗ္ဗဘာဂေါပိ ဝဋ္ဋတိ၊ ‘‘စေတောဝိမုတ္တီ’’တိ ဝုတ္တတ္တာ ပန ဣဓ တိကစတုက္ကဇ္ဈာနဝသေန အပ္ပနာဝ အဓိပ္ပေတာ။ ယောနိသောမနသိကရောတောတိ တံ မေတ္တံ စေတောဝိမုတ္တိံ ဝုတ္တလက္ခဏေန ဥပါယမနသိကာရေန မနသိကရောန္တဿ။

အပိစ ဆ ဓမ္မာ ဗျာပါဒဿ ပဟာနာယ သံဝတ္တန္တိ – မေတ္တာနိမိတ္တဿ ဥဂ္ဂဟော၊ မေတ္တာဘာဝနာနုယောဂေါ၊ ကမ္မဿကတာပစ္စဝေက္ခဏာ၊ ပဋိသင်္ခါနဗဟုလတာ၊ ကလျာဏမိတ္တတာ၊ သပ္ပာယကထာတိ။ ဩဒိဿကအနောဒိဿကဒိသာဖရဏာနဉှိ အညတရဝသေန မေတ္တံ ဥဂ္ဂဏှန္တဿာပိ ဗျာပါဒေါ ပဟီယတိ၊ ဩဓိသော အနောဓိသော ဒိသာဖရဏဝသေန မေတ္တံ ဘာဝေန္တဿာပိ။ ‘‘တွံ ဧတဿ ကုဒ္ဓါ ကိံ ကရိဿသိ၊ ကိမဿ သီလာဒီနိ နာသေတုံ သက္ခိဿသိ၊ နနု တွံ အတ္တနော ကမ္မေန အာဂန္တွာ အတ္တနော ကမ္မေနေဝ ဂမိဿသိ? ပရဿ ကုဇ္ဈနံ နာမ ဝီတစ္စိတင်္ဂါရတတ္တအယသလာကဂူထာဒီနိ ဂဟေတွာ ပရံ ပဟရိတုကာမတာသဒိသံ ဟောတိ။ ဧသောပိ တဝ ကုဒ္ဓါ ကိံ ကရိဿတိ၊ ကိံ တေ သီလာဒီနိ နာသေတုံ သက္ခိဿတိ? ဧသ အတ္တနော ကမ္မေန အာဂန္တွာ အတ္တနော ကမ္မေနေဝ ဂမိဿတိ၊ အပ္ပဋိစ္ဆိတပဟေဏကံ ဝိယ ပဋိဝါတံ ခိတ္တရဇောမုဋ္ဌိ ဝိယ စ ဧတဿေဝေသ ကောဓော မတ္ထကေ ပတိဿတီ’’တိ ဧဝံ အတ္တနော စ ပရဿ စ ကမ္မဿကတံ ပစ္စဝေက္ခတောပိ၊ ဥဘယကမ္မဿကတံ ပစ္စဝေက္ခိတွာ ပဋိသင်္ခါနေ ဌိတဿာပိ၊ အဿဂုတ္တတ္ထေရသဒိသေ မေတ္တာဘာဝနာရတေ ကလျာဏမိတ္တေ သေဝန္တဿာပိ ဗျာပါဒေါ ပဟီယတိ၊ ဌာနနိသဇ္ဇာဒီသု မေတ္တာနိဿိတသပ္ပာယကထာယပိ ပဟီယတိ။ တေန ဝုတ္တံ – ‘‘ဆ ဓမ္မာ ဗျာပါဒဿ ပဟာနာယ သံဝတ္တန္တီ’’တိ။ သေသမိဓ ဣတော ပရေသု စ ဝုတ္တနယေနေဝ ဝေဒိတဗ္ဗံ၊ ဝိသေသမတ္တမေဝ ပန ဝက္ခာမာတိ။

၁၈။ အဋ္ဌမေ အာရမ္ဘဓာတူအာဒီသု အာရမ္ဘဓာတု နာမ ပဌမာရမ္ဘဝီရိယံ။ နိက္ကမဓာတု နာမ ကောသဇ္ဇတော နိက္ခန္တတ္တာ တတော ဗလဝတရံ။ ပရက္ကမဓာတု နာမ ပရံ ပရံ ဌာနံ အက္ကမနတော တတောပိ ဗလဝတရံ။ အဋ္ဌကထာယံ ပန ‘‘အာရမ္ဘော စေတသော ကာမာနံ ပနူဒနာယ၊ နိက္ကမော စေတသော ပလိဃုဂ္ဃာဋနာယ၊ ပရက္ကမော စေတသော ဗန္ဓနစ္ဆေဒနာယာ’’တိ ဝတွာ ‘‘တီဟိ ပေတေဟိ အဓိမတ္တဝီရိယမေဝ ကထိတ’’န္တိ ဝုတ္တံ။

အာရဒ္ဓဝီရိယဿာတိ ပရိပုဏ္ဏဝီရိယဿ စေဝ ပဂ္ဂဟိတဝီရိယဿ စ။ တတ္ထ စတုဒေါသာပဂတံ ဝီရိယံ အာရဒ္ဓန္တိ ဝေဒိတဗ္ဗံ။ န စ အတိလီနံ ဟောတိ၊ န စ အတိပဂ္ဂဟိတံ၊ န စ အဇ္ဈတ္တံ သံခိတ္တံ၊ န စ ဗဟိဒ္ဓါ ဝိက္ခိတ္တံ။ တဒေတံ ဒုဝိဓံ ဟောတိ – ကာယိကံ၊ စေတသိကဉ္စ။ တတ္ထ ‘‘ဣဓ ဘိက္ခု ဒိဝသံ စင်္ကမေန နိသဇ္ဇာယ အာဝရဏီယေဟိ ဓမ္မေဟိ စိတ္တံ ပရိသောဓေတီ’’တိ (ဝိဘ။ ၅၁၉) ဧဝံ ရတ္တိဒိဝသဿ ပဉ္စ ကောဋ္ဌာသေ ကာယေန ဃဋေန္တဿ ဝါယမန္တဿ ကာယိကဝီရိယံ ဝေဒိတဗ္ဗံ။ ‘‘န တာဝါဟံ ဣတော လေဏာ နိက္ခမိဿာမိ၊ ယာဝ မေ န အနုပါဒါယ အာသဝေဟိ စိတ္တံ ဝိမုစ္စတီ’’တိ ဧဝံ ဩကာသပရိစ္ဆေဒေန ဝါ၊ ‘‘န တာဝါဟံ ဣမံ ပလ္လင်္ကံ ဘိန္ဒိဿာမီ’’တိ ဧဝံ နိသဇ္ဇာဒိပရိစ္ဆေဒေန ဝါ မာနသံ ဗန္ဓိတွာ ဃဋေန္တဿ ဝါယမန္တဿ စေတသိကဝီရိယံ ဝေဒိတဗ္ဗံ။ တဒုဘယမ္ပိ ဣဓ ဝဋ္ဋတိ။ ဒုဝိဓေနာပိ ဟိ ဣမိနာ ဝီရိယေန အာရဒ္ဓဝီရိယဿ အနုပ္ပန္နဉ္စေဝ ထိနမိဒ္ဓံ နုပ္ပဇ္ဇတိ၊ ဥပ္ပန္နဉ္စ ထိနမိဒ္ဓံ ပဟီယတိ မိလက္ခတိဿတ္ထေရဿ ဝိယ၊ ဂါမန္တပဗ္ဘာရဝါသိမဟာသီဝတ္ထေရဿ ဝိယ၊ ပီတိမလ္လကတ္ထေရဿ ဝိယ၊ ကုဋုမ္ဗိယပုတ္တတိဿတ္ထေရဿ ဝိယ စ။ ဧတေသု ဟိ ပုရိမာ တယော အညေ စ ဧဝရူပါ ကာယိကဝီရိယေန အာရဒ္ဓဝီရိယာ၊ ကုဋုမ္ဗိယပုတ္တတိဿတ္ထေရော အညေ စ ဧဝရူပါ စေတသိကဝီရိယေန အာရဒ္ဓဝီရိယာ၊ ဥစ္စာဝါလုကဝါသီ မဟာနာဂတ္ထေရော ပန ဒွီဟိပိ ဝီရိယေဟိ အာရဒ္ဓဝီရိယောဝ။ ထေရော ကိရ ဧကံ သတ္တာဟံ စင်္ကမတိ၊ ဧကံ တိဋ္ဌတိ၊ ဧကံ နိသီဒတိ၊ ဧကံ နိပဇ္ဇတိ။ မဟာထေရဿ ဧကဣရိယာပထောပိ အသပ္ပာယော နာမ နတ္ထိ၊ စတုတ္ထေ သတ္တာဟေ ဝိပဿနံ ဝဍ္ဎေတွာ အရဟတ္တေ ပတိဋ္ဌာသိ။

အပိစ ဆ ဓမ္မာ ထိနမိဒ္ဓဿ ပဟာနာယ သံဝတ္တန္တိ – အတိဘောဇနေ နိမိတ္တဂ္ဂါဟော၊ ဣရိယာပထသမ္ပရိဝတ္တနတာ၊ အာလောကသညာမနသိကာရော၊ အဗ္ဘောကာသဝါသော၊ ကလျာဏမိတ္တတာ၊ သပ္ပာယကထာတိ။ အာဟရဟတ္ထက-ဘုတ္တဝမိတက-တတြဝဋ္ဋက-အလံသာဋက-ကာကမာသက-ဗြာဟ္မဏာဒယော ဝိယ ဘောဇနံ ဘုဉ္ဇိတွာ ရတ္တိဋ္ဌာနဒိဝါဋ္ဌာနေ နိသိန္နဿ ဟိ သမဏဓမ္မံ ကရောတော ထိနမိဒ္ဓံ မဟာဟတ္ထီ ဝိယ ဩတ္ထရန္တံ အာဂစ္ဆတိ၊ စတုပဉ္စအာလောပဩကာသံ ပန ဌပေတွာ ပါနီယံ ပိဝိတွာ ယာပနသီလဿ ဘိက္ခုနော တံ န ဟောတီတိ ဧဝံ အတိဘောဇနေ နိမိတ္တံ ဂဏှန္တဿာပိ ထိနမိဒ္ဓံ ပဟီယတိ။ ယသ္မိံ ဣရိယာပထေ ထိနမိဒ္ဓံ ဩက္ကမတိ၊ တတော အညံ ပရိဝတ္တေန္တဿာပိ၊ ရတ္တိံ စန္ဒာလောကဒီပါလောကဥက္ကာလောကေ ဒိဝါ သူရိယာလောကံ မနသိကရောန္တဿာပိ ၊ အဗ္ဘောကာသေ ဝသန္တဿာပိ၊ မဟာကဿပတ္ထေရသဒိသေ ပဟီနထိနမိဒ္ဓေ ကလျာဏမိတ္တေ သေဝန္တဿာပိ ထိနမိဒ္ဓံ ပဟီယတိ၊ ဌာနနိသဇ္ဇာဒီသု ဓုတင်္ဂနိဿိတသပ္ပာယကထာယပိ ပဟီယတိ။ တေန ဝုတ္တံ – ‘‘ဆ ဓမ္မာ ထိနမိဒ္ဓဿ ပဟာနာယ သံဝတ္တန္တီ’’တိ။

၁၉။ နဝမေ ဝူပသန္တစိတ္တဿာတိ ဈာနေန ဝါ ဝိပဿနာယ ဝါ ဝူပသမိတစိတ္တဿ။

အပိစ ဆ ဓမ္မာ ဥဒ္ဓစ္စကုက္ကုစ္စဿ ပဟာနာယ သံဝတ္တန္တိ – ဗဟုဿုတတာ၊ ပရိပုစ္ဆကတာ၊ ဝိနယေ ပကတညုတာ၊ ဝုဒ္ဓသေဝိတာ၊ ကလျာဏမိတ္တတာ၊ သပ္ပာယကထာတိ။ ဗာဟုသစ္စေနာပိ ဟိ ဧကံ ဝါ ဒွေ ဝါ တယော ဝါ စတ္တာရော ဝါ ပဉ္စ ဝါ နိကာယေ ပါဠိဝသေန စ အတ္ထဝသေန စ ဥဂ္ဂဏှန္တဿာပိ ဥဒ္ဓစ္စကုက္ကုစ္စံ ပဟီယတိ၊ ကပ္ပိယာကပ္ပိယပရိပုစ္ဆာဗဟုလဿာပိ၊ ဝိနယပညတ္တိယံ စိဏ္ဏဝသီဘာဝတာယ ပကတညုနောပိ၊ ဝုဍ္ဎေ မဟလ္လကတ္ထေရေ ဥပသင်္ကမန္တဿာပိ၊ ဥပါလိတ္ထေရသဒိသေ ဝိနယဓရေ ကလျာဏမိတ္တေ သေဝန္တဿာပိ ဥဒ္ဓစ္စကုက္ကုစ္စံ ပဟီယတိ၊ ဌာနနိသဇ္ဇာဒီသု ကပ္ပိယာကပ္ပိယနိဿိတသပ္ပာယကထာယပိ ပဟီယတိ။ တေန ဝုတ္တံ – ‘‘ဆ ဓမ္မာ ဥဒ္ဓစ္စကုက္ကုစ္စဿ ပဟာနာယ သံဝတ္တန္တီ’’တိ။

၂၀။ ဒသမေ ယောနိသော၊ ဘိက္ခဝေ၊ မနသိကရောတောတိ ဝုတ္တနယေနေဝ ဥပါယတော မနသိကရောန္တဿ။

အပိစ ဆ ဓမ္မာ ဝိစိကိစ္ဆာယ ပဟာနာယ သံဝတ္တန္တိ – ဗဟုဿုတတာ၊ ပရိပုစ္ဆကတာ၊ ဝိနယေ ပကတညုတာ၊ အဓိမောက္ခဗဟုလတာ၊ ကလျာဏမိတ္တတာ၊ သပ္ပာယကထာတိ။ ဗဟုသစ္စေနာပိ ဟိ ဧကံ ဝါ…ပေ… ပဉ္စ ဝါ နိကာယေ ပါဠိဝသေန စ အတ္ထဝသေန စ ဥဂ္ဂဏှန္တဿာပိ ဝိစိကိစ္ဆာ ပဟီယတိ၊ တီဏိ ရတနာနိ အာရဗ္ဘ ပရိပုစ္ဆာဗဟုလဿာပိ၊ ဝိနယေ စိဏ္ဏဝသီဘာဝဿာပိ၊ တီသု ရတနေသု ဩကပ္ပနိယသဒ္ဓါသင်္ခါတအဓိမောက္ခဗဟုလဿာပိ၊ သဒ္ဓါဓိမုတ္တေ ဝက္ကလိတ္ထေရသဒိသေ ကလျာဏမိတ္တေ သေဝန္တဿာပိ ဝိစိကိစ္ဆာ ပဟီယတိ၊ ဌာနနိသဇ္ဇာဒီသု တိဏ္ဏံ ရတနာနံ ဂုဏနိဿိတသပ္ပာယကထာယပိ ပဟီယတိ။ တေန ဝုတ္တံ – ‘‘ဆ ဓမ္မာ ဝိစိကိစ္ဆာယ ပဟာနာယ သံဝတ္တန္တီ’’တိ။ ဣမသ္မိံ နီဝရဏပ္ပဟာနဝဂ္ဂေ ဝဋ္ဋဝိဝဋ္ဋံ ကထိတန္တိ။

နီဝရဏပ္ပဟာနဝဂ္ဂဝဏ္ဏနာ။