📜

၈။ ကလျာဏမိတ္တတာဒိဝဂ္ဂဝဏ္ဏနာ

၇၁။ အဋ္ဌမဿ ပဌမေ ကလျာဏမိတ္တတာတိ ကလျာဏာ မိတ္တာ အဿာတိ ကလျာဏမိတ္တော၊ တဿ ဘာဝေါ ကလျာဏမိတ္တတာ။ သေသံ ဝုတ္တပဋိပက္ခနယေန ဝေဒိတဗ္ဗံ။

၇၂-၇၃။ ဒုတိယေ အနုယောဂေါတိ ယောဂေါ ပယောဂေါ။ အနနုယောဂေါတိ အယောဂေါ အပ္ပယောဂေါ။ အနုယောဂါတိ အနုယောဂေန။ အနနုယောဂါတိ အနနုယောဂေန။ ကုသလာနံ ဓမ္မာနန္တိ စတုဘူမကကုသလဓမ္မာနံ။ တတိယံ ဥတ္တာနတ္ထမေဝ။

၇၄။ စတုတ္ထေ ဗောဇ္ဈင်္ဂါတိ ဗုဇ္ဈနကသတ္တဿ အင်္ဂဘူတာ သတ္တ ဓမ္မာ။ ယာယ ဝါ ဓမ္မသာမဂ္ဂိယာ သော ဗုဇ္ဈတိ၊ သမ္မောဟနိဒ္ဒါတော ဝါ ဝုဋ္ဌာတိ၊ စတုသစ္စဓမ္မံ ဝါ သစ္ဆိကရောတိ။ တဿာ ဗောဓိယာ အင်္ဂဘူတာတိပိ ဗောဇ္ဈင်္ဂါ။ ‘‘ဗောဇ္ဈင်္ဂါတိ ကေနဋ္ဌေန ဗောဇ္ဈင်္ဂါ? ဗုဇ္ဈန္တီတိ ဗောဇ္ဈင်္ဂါ၊ အနုဗုဇ္ဈန္တီတိ ဗောဇ္ဈင်္ဂါ၊ ပဋိဗုဇ္ဈန္တီတိ ဗောဇ္ဈင်္ဂါ၊ သမ္ဗုဇ္ဈန္တီတိ ဗောဇ္ဈင်္ဂါ၊ ဗောဓာယ သံဝတ္တန္တီတိ ဗောဇ္ဈင်္ဂါ’’တိ (ပဋိ။ မ။ ၂။၁၇)။ ဧဝံ ပနေတံ ပဒံ ဝိဘတ္တမေဝ။

၇၅။ ပဉ္စမေ ဘာဝနာပါရိပူရိံ ဂစ္ဆန္တီတိ ဣမိနာ ပဒေန ဗောဇ္ဈင်္ဂါနံ ယာထာဝသရသဘူမိ နာမ ကထိတာ ။ သာ ပနေသာ စတုဗ္ဗိဓာ ဟောတိ – ဝိပဿနာ၊ ဝိပဿနာပါဒကဇ္ဈာနံ၊ မဂ္ဂေါ၊ ဖလန္တိ။ တတ္ထ ဝိပဿနာယ ဥပ္ပဇ္ဇနကာလေ ဗောဇ္ဈင်္ဂါ ကာမာဝစရာ ဟောန္တိ၊ ဝိပဿနာပါဒကဇ္ဈာနမှိ ဥပ္ပဇ္ဇနကာလေ ရူပါဝစရအရူပါဝစရာ၊ မဂ္ဂဖလေသု ဥပ္ပဇ္ဇနကာလေ လောကုတ္တရာ။ ဣတိ ဣမသ္မိံ သုတ္တေ ဗောဇ္ဈင်္ဂါ စတုဘူမကာ ကထိတာ။

၇၆။ ဆဋ္ဌဿ အဋ္ဌုပ္ပတ္တိကော နိက္ခေပေါ။ အဋ္ဌုပ္ပတ္တိယံ ဟေတံ နိက္ခိတ္တံ၊ သမ္ဗဟုလာ ကိရ ဘိက္ခူ ဓမ္မသဘာယံ သန္နိသိန္နာ။ တေသံ အန္တရေ ဗန္ဓုလမလ္လသေနာပတိံ အာရဗ္ဘ အယံ ကထာ ဥဒပါဒိ၊ ‘‘အာဝုသော၊ အသုကံ နာမ ကုလံ ပုဗ္ဗေ ဗဟုဉာတိကံ အဟောသိ ဗဟုပက္ခံ၊ ဣဒါနိ အပ္ပဉာတိကံ အပ္ပပက္ခံ ဇာတ’’န္တိ။ အထ ဘဂဝါ တေသံ စိတ္တာစာရံ ဉတွာ ‘‘မယိ ဂတေ မဟတီ ဒေသနာ ဘဝိဿတီ’’တိ ဉတွာ ဂန္ဓကုဋိတော နိက္ခမ္မ ဓမ္မသဘာယံ ပညတ္တဝရဗုဒ္ဓါသနေ နိသီဒိတွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ အာဟ။ ဘဂဝါ အညာ ဂါမနိဂမာဒိကထာ နတ္ထိ၊ အသုကံ နာမ ကုလံ ပုဗ္ဗေ ဗဟုဉာတိကံ အဟောသိ ဗဟုပက္ခံ၊ ဣဒါနိ အပ္ပဉာတိကံ အပ္ပပက္ခံ ဇာတန္တိ ဝဒန္တာ နိသိန္နမှာတိ။ သတ္ထာ ဣမိဿာ အဋ္ဌုပ္ပတ္တိယာ အပ္ပမတ္တိကာ ဧသာ၊ ဘိက္ခဝေ၊ ပရိဟာနီတိ ဣဒံ သုတ္တံ အာရဘိ။

တတ္ထ အပ္ပမတ္တိကာတိ ပရိတ္တာ ပရိတ္တပ္ပမာဏာ။ ဧတာယ ဟိ ပရိဟာနိယာ သဂ္ဂတော ဝါ မဂ္ဂတော ဝါ ပရိဟာနိ နာမ နတ္ထိ၊ ဒိဋ္ဌဓမ္မိကပရိဟာနိမတ္တမေဝ ဧတန္တိ အာဟ။ ဧတံ ပတိကိဋ္ဌန္တိ ဧတံ ပစ္ဆိမံ ဧတံ လာမကံ။ ယဒိဒံ ပညာပရိဟာနီတိ ယာ ဧသာ မမ သာသနေ ကမ္မဿကတပညာယ ဈာနပညာယ ဝိပဿနာပညာယ မဂ္ဂပညာယ ဖလပညာယ စ ပရိဟာနိ၊ ဧသာ ပစ္ဆိမာ၊ ဧသာ လာမကာ၊ ဧသာ ဆဍ္ဍနီယာတိ အတ္ထော။

၇၇။ သတ္တမမ္ပိ အဋ္ဌုပ္ပတ္တိယမေဝ ကထိတံ။ ဓမ္မသဘာယံ ကိရ နိသိန္နေသု ဘိက္ခူသု ဧကစ္စေ ဧဝံ အာဟံသု – ‘‘အသုကံ နာမ ကုလံ ပုဗ္ဗေ အပ္ပဉာတိကံ အပ္ပပက္ခံ အဟောသိ၊ ဣဒါနိ တံ ဗဟုဉာတိကံ ဗဟုပက္ခံ ဇာတ’’န္တိ။ ကံ သန္ဓာယ ဧဝမာဟံသူတိ? ဝိသာခံ ဥပါသိကံ ဝေသာလိကေ စ လိစ္ဆဝီ။ သတ္ထာ တေသံ စိတ္တာစာရံ ဉတွာ ပုရိမနယေနေဝ အာဂန္တွာ ဓမ္မာသနေ နိသိန္နော ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိ။ တေ ယထာဘူတံ ကထယိံသု။ သတ္ထာ ဣမိဿာ အဋ္ဌုပ္ပတ္တိယာ ဣမံ သုတ္တံ အာရဘိ။ တတ္ထ အပ္ပမတ္တိကာတိ တံ သမ္ပတ္တိံ နိဿာယ သဂ္ဂံ ဝါ မဂ္ဂံ ဝါ သမ္ပတ္တာနံ အဘာဝတော ပရိတ္တာ။ ယဒိဒံ ပညာဝုဒ္ဓီတိ ကမ္မဿကတပညာဒီနံ ဝုဒ္ဓိ။ တသ္မာတိ ယသ္မာ ဉာတီနံ ဝုဒ္ဓိ နာမ ဒိဋ္ဌဓမ္မိကမတ္တာ အပ္ပာ ပရိတ္တာ၊ သာ သဂ္ဂံ ဝါ မဂ္ဂံ ဝါ ပါပေတုံ အသမတ္ထာ၊ တသ္မာ။ ပညာဝုဒ္ဓိယာတိ ကမ္မဿကတာဒိပညာယ ဝုဒ္ဓိယာ။

၇၈။ အဋ္ဌမမ္ပိ အဋ္ဌုပ္ပတ္တိယမေဝ ကထိတံ။ သမ္ဗဟုလာ ကိရ ဘိက္ခူ ဓမ္မသဘာယံ သန္နိသိန္နာ မဟာဓနသေဋ္ဌိပုတ္တံ အာရဗ္ဘ ‘‘အသုကံ နာမ ကုလံ ပုဗ္ဗေ မဟာဘောဂံ မဟာဟိရညသုဝဏ္ဏံ အဟောသိ၊ တံ ဣဒါနိ အပ္ပဘောဂံ ဇာတ’’န္တိ ကထယိံသု။ သတ္ထာ ပုရိမနယေနေဝ အာဂန္တွာ တေသံ ဝစနံ သုတွာ ဣမံ သုတ္တံ အာရဘိ။

၇၉။ နဝမမ္ပိ အဋ္ဌုပ္ပတ္တိယမေဝ ဝုတ္တံ။ ဓမ္မသဘာယံ ကိရ သန္နိသိန္နာ ဘိက္ခူ ကာကဝလိယသေဋ္ဌိဉ္စ ပုဏ္ဏသေဋ္ဌိဉ္စ အာရဗ္ဘ ‘‘အသုကံ နာမ ကုလံ ပုဗ္ဗေ အပ္ပဘောဂံ အဟောသိ၊ တံ ဣဒါနိ မဟာဘောဂံ ဇာတ’’န္တိ ကထယိံသု။ သတ္ထာ ပုရိမနယေနေဝ အာဂန္တွာ တေသံ ဝစနံ သုတွာ ဣမံ သုတ္တံ အာရဘိ။ သေသံ ဣမေသု ဒွီသုပိ ဟေဋ္ဌာ ဝုတ္တနယေနေဝ ဝေဒိတဗ္ဗံ။

၈၀။ ဒသမမ္ပိ အဋ္ဌုပ္ပတ္တိယံ ဝုတ္တံ။ ဓမ္မသဘာယံ ကိရ ဘိက္ခူ ကောသလမဟာရာဇာနံ အာရဗ္ဘ ‘‘အသုကံ နာမ ကုလံ ပုဗ္ဗေ မဟာယသံ မဟာပရိဝါရံ အဟောသိ၊ ဣဒါနိ အပ္ပယသံ အပ္ပပရိဝါရံ ဇာတ’’န္တိ ကထယိံသု။ ဘဂဝါ ပုရိမနယေနေဝ အာဂန္တွာ တေသံ ဝစနံ သုတွာ ဣမံ ဓမ္မဒေသနံ အာရဘိ။ သေသံ ဝုတ္တနယေနေဝ ဝေဒိတဗ္ဗန္တိ။

ကလျာဏမိတ္တတာဒိဝဂ္ဂဝဏ္ဏနာ။