📜

(၁၃) ၃။ ဒါနဝဂ္ဂဝဏ္ဏနာ

၁၄၂။ တတိယဿ ပဌမေ ဒါနာနီတိ ဒိယျနကဝသေန ဒါနာနိ၊ ဒေယျဓမ္မဿေတံ နာမံ။ သဝတ္ထုကာ ဝါ စေတနာ ဒါနံ၊ သမ္ပတ္တိပရိစ္စာဂဿေတံ နာမံ။ အာမိသဒါနန္တိ စတ္တာရော ပစ္စယာ ဒိယျနကဝသေန အာမိသဒါနံ နာမ။ ဓမ္မဒါနန္တိ ဣဓေကစ္စော အမတပတ္တိပဋိပဒံ ကထေတွာ ဒေတိ၊ ဣဒံ ဓမ္မဒါနံ နာမ။

၁၄၃။ ဒုတိယေ စတ္တာရော ပစ္စယာ ယဇနကဝသေန ယာဂေါ နာမ ဓမ္မောပိ ယဇနကဝသေန ယာဂေါတိ ဝေဒိတဗ္ဗော။

၁၄၄။ တတိယေ အာမိသဿ စဇနံ အာမိသစာဂေါ၊ ဓမ္မဿ စဇနံ ဓမ္မစာဂေါ။ စတုတ္ထေ ဥပသဂ္ဂမတ္တံ ဝိသေသော။

၁၄၆။ ပဉ္စမေ စတုန္နံ ပစ္စယာနံ ဘုဉ္ဇနံ အာမိသဘောဂေါ၊ ဓမ္မဿ ဘုဉ္ဇနံ ဓမ္မဘောဂေါ။ ဆဋ္ဌေ ဥပသဂ္ဂမတ္တံ ဝိသေသော။

၁၄၈။ သတ္တမေ စတုန္နံ ပစ္စယာနံ သံဝိဘဇနံ အာမိသသံဝိဘာဂေါ၊ ဓမ္မဿ သံဝိဘဇနံ ဓမ္မသံဝိဘာဂေါ။

၁၄၉။ အဋ္ဌမေ စတူဟိ ပစ္စယေဟိ သင်္ဂဟော အာမိသသင်္ဂဟော၊ ဓမ္မေန သင်္ဂဟော ဓမ္မသင်္ဂဟော။

၁၅၀။ နဝမေ စတူဟိ ပစ္စယေဟိ အနုဂ္ဂဏှနံ အာမိသာနုဂ္ဂဟော၊ ဓမ္မေန အနုဂ္ဂဏှနံ ဓမ္မာနုဂ္ဂဟော။

၁၅၁။ ဒသမေ စတူဟိ ပစ္စယေဟိ အနုကမ္ပနံ အာမိသာနုကမ္ပာ၊ ဓမ္မေန အနုကမ္ပနံ ဓမ္မာနုကမ္ပာတိ။

ဒါနဝဂ္ဂေါ တတိယော။