📜

၁။ ကောဓပေယျာလံ

၁၈၁။ ဣတော ပရေသု ကုဇ္ဈနလက္ခဏော ကောဓော။ ဥပနန္ဓနလက္ခဏော ဥပနာဟော။ သုကတကရဏမက္ခနလက္ခဏော မက္ခော။ ယုဂဂ္ဂါဟလက္ခဏော ပလာသော။ ဥသူယနလက္ခဏာ ဣဿာ။ ပဉ္စမစ္ဆေရဘာဝေါ မစ္ဆရိယံ။ တံ သဗ္ဗမ္ပိ မစ္ဆရာယနလက္ခဏံ။ ကတပဋိစ္ဆာဒနလက္ခဏာ မာယာ။ ကေရာဋိကလက္ခဏံ သာဌေယျံ။ အလဇ္ဇနာကာရော အဟိရိကံ။ ဥပဝါဒတော အဘာယနာကာရော အနောတ္တပ္ပံ။ အက္ကောဓာဒယော တေသံ ပဋိပက္ခဝသေန ဝေဒိတဗ္ဗာ။

၁၈၅။ သေက္ခဿ ဘိက္ခုနောတိ သတ္တဝိဓဿာပိ သေက္ခဿ ဥပရိဥပရိဂုဏေဟိ ပရိဟာနာယ သံဝတ္တန္တိ၊ ပုထုဇ္ဇနဿ ပန ပဌမတရံယေဝ ပရိဟာနာယ သံဝတ္တန္တီတိ ဝေဒိတဗ္ဗာ။ အပရိဟာနာယာတိ ဥပရိဥပရိဂုဏေဟိ အပရိဟာနတ္ထာယ။

၁၈၇။ ယထာဘတံ နိက္ခိတ္တောတိ ယထာ အာနေတွာ နိက္ခိတ္တော၊ ဧဝံ နိရယေ ပတိဋ္ဌိတော ဝါတိ ဝေဒိတဗ္ဗော။

၁၉၀။ ဧကစ္စောတိ ယဿေတေ ကောဓာဒယော အတ္ထိ၊ သော ဧကစ္စော နာမ။

ကောဓပေယျာလံ နိဋ္ဌိတံ။