📜

၃။ ဝိနယပေယျာလံ

၂၀၁။ ဒွေမေ၊ ဘိက္ခဝေ၊ အတ္ထဝသေ ပဋိစ္စာတိ၊ ဘိက္ခဝေ၊ ဒွေ အတ္ထေ နိဿာယ ဒွေ ကာရဏာနိ သန္ဓာယ။ သိက္ခာပဒံ ပညတ္တန္တိ သိက္ခာကောဋ္ဌာသော ဌပိတော။ သင်္ဃသုဋ္ဌုတာယာတိ သင်္ဃဿ သုဋ္ဌုဘာဝါယ၊ ‘‘သုဋ္ဌု၊ ဘန္တေ’’တိ ဝတွာ သမ္ပဋိစ္ဆနတ္ထာယာတိ အတ္ထော။ သင်္ဃဖာသုတာယာတိ သင်္ဃဿ ဖာသုဝိဟာရတ္ထာယ။ ဒုမ္မင်္ကူနန္တိ ဒုဿီလာနံ။ ပေသလာနန္တိ ပီယသီလာနံ။ ဒိဋ္ဌဓမ္မိကာနံ အာသဝါနန္တိ ဒိဋ္ဌဓမ္မေ ဣမသ္မိံယေဝ အတ္တဘာဝေ ဝီတိက္ကမပစ္စယာ ပဋိလဒ္ဓဗ္ဗာနံ ဝဓဗန္ဓနာဒိဒုက္ခဓမ္မသင်္ခါတာနံ အာသဝါနံ။ သံဝရာယာတိ ပိဒဟနတ္ထာယ။ သမ္ပရာယိကာနန္တိ တထာရူပါနံယေဝ အပါယဒုက္ခသင်္ခါတာနံ သမ္ပရာယေ ဥပ္ပဇ္ဇနကအာသဝါနံ။ ပဋိဃာတာယာတိ ပဋိသေဓနတ္ထာယ။ ဝေရာနန္တိ အကုသလဝေရာနမ္ပိ ပုဂ္ဂလဝေရာနမ္ပိ။ ဝဇ္ဇာနန္တိ ဒေါသာနံ။ တေ ဧဝ ဝါ ဒုက္ခဓမ္မာ ဝဇ္ဇနီယတ္တာ ဣဓ ဝဇ္ဇာတိ အဓိပ္ပေတာ။ ဘယာနန္တိ စိတ္တုတြာသဘယာနမ္ပိ ဘယဟေတူနံ တေသံယေဝ ဒုက္ခဓမ္မာနမ္ပိ။ အကုသလာနန္တိ အက္ခမဋ္ဌေန အကုသလသင်္ခါတာနံ ဒုက္ခဓမ္မာနံ။ ဂိဟီနံ အနုကမ္ပာယာတိ ဂိဟီသု ဥဇ္ဈာယန္တေသု ပညတ္တသိက္ခာပဒံ ဂိဟီနံ အနုကမ္ပာယ ပညတ္တံ နာမ။ ပါပိစ္ဆာနံ ပက္ခုပစ္ဆေဒါယာတိ ပါပိစ္ဆာ ပက္ခံ နိဿာယ သင်္ဃံ ဘိန္ဒေယျုန္တိ တေသံ ပက္ခုပစ္ဆေဒနတ္ထာယ။ အပ္ပသန္နာနံ ပသာဒါယာတိ ပုဗ္ဗေ အပ္ပသန္နာနမ္ပိ ပဏ္ဍိတမနုဿာနံ သိက္ခာပဒပညတ္တိသမ္ပဒံ ဒိသွာ ပသာဒုပ္ပတ္တိအတ္ထာယ။ ပသန္နာနံ ဘိယျောဘာဝါယာတိ ပသန္နာနံ ဥပရူပရိပသာဒဘာဝါယ။ သဒ္ဓမ္မဋ္ဌိတိယာတိ သဒ္ဓမ္မဿ စိရဋ္ဌိတတ္ထံ။ ဝိနယာနုဂ္ဂဟာယာတိ ပဉ္စဝိဓဿာပိ ဝိနယဿ အနုဂ္ဂဏှနတ္ထာယ။

၂၀၂-၂၃၀။ ပါတိမောက္ခံ ပညတ္တန္တိ ဘိက္ခုပါတိမောက္ခံ ဘိက္ခုနိပါတိမောက္ခန္တိ ဒုဝိဓံ ပါတိမောက္ခံ ပညတ္တံ။ ပါတိမောက္ခုဒ္ဒေသောတိ ဘိက္ခူနံ ပဉ္စ၊ ဘိက္ခုနီနံ စတ္တာရောတိ နဝ ပါတိမောက္ခုဒ္ဒေသာ ပညတ္တာ။ ပါတိမောက္ခဋ္ဌပနန္တိ ဥပေါသထဋ္ဌပနံ။ ပဝါရဏာ ပညတ္တာတိ စာတုဒ္ဒသိကာ ပန္နရသိကာတိ ဒွေ ပဝါရဏာ ပညတ္တာ။ ပဝါရဏဋ္ဌပနံ ပညတ္တန္တိ သာပတ္တိကဿ ဘိက္ခုနော ပဝါရဏာ ဥတ္တိယာ ဝတ္တမာနာယ ပဝါရဏဋ္ဌပနံ ပညတ္တံ။ တဇ္ဇနီယကမ္မာဒီသု ဘိက္ခူ ဝါစာသတ္တီဟိ ဝိတုဒန္တာနံ ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ (စူဠဝ။ ၁ အာဒယော) ပညတ္တံ။ ဗာလဿ အဗျတ္တဿ သေယျသကဿ ဘိက္ခုနော နိယဿကမ္မံ ပညတ္တံ။ ကုလဒူသကေ အဿဇိပုနဗ္ဗသုကေ ဘိက္ခူ အာရဗ္ဘ ပဗ္ဗာဇနီယကမ္မံ (စူဠဝ။ ၂၁ အာဒယော) ပညတ္တံ။ ဂိဟီနံ အက္ကောသကဿ သုဓမ္မတ္ထေရဿ ပဋိသာရဏီယကမ္မံ (စူဠဝ။ ၃၃ အာဒယော) ပညတ္တံ။ အာပတ္တိယာ အဒဿနာဒီသု ဥက္ခေပနီယကမ္မံ ပညတ္တံ။ ဂရုကာပတ္တိံ အာပန္နဿ ပဋိစ္ဆန္နာယ အာပတ္တိယာ ပရိဝါသဒါနံ ပညတ္တံ။ ပရိဝါသေ အန္တရာပတ္တိံ အာပန္နဿ မူလာယ ပဋိကဿနံ ပညတ္တံ။ ပဋိစ္ဆန္နာယပိ အပ္ပဋိစ္ဆန္နာယပိ အာပတ္တိယာ မာနတ္တဒါနံ ပညတ္တံ။ စိဏ္ဏမာနတ္တဿ အဗ္ဘာနံ ပညတ္တံ။ သမ္မာ ဝတ္တန္တဿ ဩသာရဏီယံ ပညတ္တံ။ အသမ္မာဝတ္တနာဒီသု နိဿာရဏီယံ ပညတ္တံ။

ဧဟိဘိက္ခူပသမ္ပဒါ သရဏဂမနူပသမ္ပဒါ ဩဝါဒူပသမ္ပဒါ ပဉှာဗျာကရဏူပသမ္ပဒါ ဉတ္တိစတုတ္ထကမ္မူပသမ္ပဒါ ဂရုဓမ္မူပသမ္ပဒါ ဥဘတောသင်္ဃေ ဥပသမ္ပဒါ ဒူတေန ဥပသမ္ပဒါတိ အဋ္ဌဝိဓာ ဥပသမ္ပဒါ ပညတ္တာ။ ဉတ္တိကမ္မံ နဝ ဌာနာနိ ဂစ္ဆတီတိ ဧဝံ နဝဋ္ဌာနိကံ ဉတ္တိကမ္မံ ပညတ္တံ။ ဉတ္တိဒုတိယကမ္မံ သတ္တ ဌာနာနိ ဂစ္ဆတီတိ ဧဝံ သတ္တဋ္ဌာနိကမေဝ ဉတ္တိဒုတိယကမ္မံ ပညတ္တံ။ ဉတ္တိစတုတ္ထကမ္မံ သတ္တ ဌာနာနိ ဂစ္ဆတီတိ ဧဝံ သတ္တဋ္ဌာနိကမေဝ ဉတ္တိစတုတ္ထကမ္မံ ပညတ္တံ။ ပဌမပါရာဇိကာဒီနံ ပဌမပညတ္တိ အပညတ္တေ ပညတ္တံ။ တေသံယေဝ အနုပညတ္တိ ပညတ္တေ အနုပညတ္တံ။ ဓမ္မသမ္မုခတာ ဝိနယသမ္မုခတာ သင်္ဃသမ္မုခတာ ပုဂ္ဂလသမ္မုခတာတိ ဣမဿ စတုဗ္ဗိဓဿ သမ္မုခီဘာဝဿ ဝသေန သမ္မုခါဝိနယော ပညတ္တော။ သတိဝေပုလ္လပ္ပတ္တဿ ခီဏာသဝဿ အစောဒနတ္ထာယ သတိဝိနယော ပညတ္တော။ ဥမ္မတ္တကဿ ဘိက္ခုနော အမူဠှဝိနယော ပညတ္တော။ အပ္ပဋိညာယ စုဒိတကဿ အာပတ္တိယာ အတရဏတ္ထံ ပဋိညာတကရဏံ ပညတ္တံ။ ဗဟုတရာနံ ဓမ္မဝါဒီနံ လဒ္ဓိံ ဂဟေတွာ အဓိကရဏဝူပသမနတ္ထံ။ ယေဘုယျသိကာ ပညတ္တာ။ ပါပုဿန္နဿ ပုဂ္ဂလဿ နိဂ္ဂဏှနတ္ထံ တဿပါပိယသိကာ ပညတ္တာ။ ဘဏ္ဍနာဒိဝသေန ဗဟုံ အဿာမဏကံ ကတွာ အာပတ္တိံ အာပန္နာနံ ဘိက္ခူနံ ဌပေတွာ ထုလ္လဝဇ္ဇံ ဌပေတွာ ဂိဟိပဋိသံယုတ္တဉ္စ အဝသေသာပတ္တီနံ ဝူပသမနတ္ထာယ တိဏဝတ္ထာရကော ပညတ္တော။

ဝိနယပေယျာလံ နိဋ္ဌိတံ။