📜

(၉) ၄။ သမဏဝဂ္ဂေါ

၁။ သမဏသုတ္တဝဏ္ဏနာ

၈၂။ စတုတ္ထဿ ပဌမေ သမဏိယာနီတိ သမဏသန္တကာနိ။ သမဏကရဏီယာနီတိ သမဏေန ကတ္တဗ္ဗကိစ္စာနိ။ အဓိသီလသိက္ခာသမာဒါနန္တိအာဒီသု သမာဒါနံ ဝုစ္စတိ ဂဟဏံ၊ အဓိသီလသိက္ခာယ သမာဒါနံ ဂဟဏံ ပူရဏံ အဓိသီလသိက္ခာသမာဒါနံ။ သေသပဒဒွယေပိ ဧသေဝ နယော။ ဧတ္ထ စ သီလံ အဓိသီလံ၊ စိတ္တံ အဓိစိတ္တံ၊ ပညာ အဓိပညာတိ အယံ ဝိဘာဂေါ ဝေဒိတဗ္ဗော။ တတ္ထ ပဉ္စသီလံ သီလံ နာမ၊ တံ ဥပါဒါယ ဒသသီလံ အဓိသီလံ နာမ၊ တမ္ပိ ဥပါဒါယ စတုပါရိသုဒ္ဓိသီလံ အဓိသီလံ နာမ။ အပိစ သဗ္ဗမ္ပိ လောကိယသီလံ သီလံ နာမ၊ လောကုတ္တရသီလံ အဓိသီလံ၊ တဒေဝ သိက္ခိတဗ္ဗတော သိက္ခာတိ ဝုစ္စတိ။ ကာမာဝစရစိတ္တံ ပန စိတ္တံ နာမ၊ တံ ဥပါဒါယ ရူပါဝစရံ အဓိစိတ္တံ နာမ၊ တမ္ပိ ဥပါဒါယ အရူပါဝစရံ အဓိစိတ္တံ နာမ။ အပိစ သဗ္ဗမ္ပိ လောကိယစိတ္တံ စိတ္တမေဝ၊ လောကုတ္တရံ အဓိစိတ္တံ။ ပညာယပိ ဧသေဝ နယော။ တသ္မာတိ ယသ္မာ ဣမာနိ တီဏိ သမဏကရဏီယာနိ၊ တသ္မာ။ တိဗ္ဗောတိ ဗဟလော။ ဆန္ဒောတိ ကတ္တုကမျတာကုသလစ္ဆန္ဒော။ ဣတိ ဣမသ္မိံ သုတ္တန္တေ တိဿော သိက္ခာ လောကိယလောကုတ္တရာ ကထိတာတိ။

၂။ ဂဒြဘသုတ္တဝဏ္ဏနာ

၈၃။ ဒုတိယေ ပိဋ္ဌိတော ပိဋ္ဌိတောတိ ပစ္ဆတော ပစ္ဆတော။ အဟမ္ပိ ဒမ္မော အဟမ္ပိ ဒမ္မောတိ အဟမ္ပိ ‘‘ဒမ္မော ဒမ္မမာနော’’တိ ဝဒမာနော ဂါဝီတိ။ သေယျထာပိ ဂုန္နန္တိ ယထာ ဂါဝီနံ။ ဂါဝေါ ဟိ ကာဠာပိ ရတ္တာပိ သေတာဒိဝဏ္ဏာပိ ဟောန္တိ၊ ဂဒြဘဿ ပန တာဒိသော ဝဏ္ဏော နာမ နတ္ထိ။ ယထာ စ ဝဏ္ဏော၊ ဧဝံ သရောပိ ပဒမ္ပိ အညာဒိသမေဝ။ သေသံ ဥတ္တာနတ္ထမေဝ။ ဣမသ္မိမ္ပိ သုတ္တေ တိဿော သိက္ခာ မိဿိကာဝ ကထိတာတိ။

၃။ ခေတ္တသုတ္တဝဏ္ဏနာ

၈၄။ တတိယေ ပဋိကစ္စေဝါတိ ပဌမမေဝ။ သုကဋ္ဌံ ကရောတီတိ နင်္ဂလေန သုကဋ္ဌံ ကရောတိ။ သုမတိကတန္တိ မတိယာ သုဋ္ဌု သမီကတံ။ ကာလေနာတိ ဝပိတဗ္ဗယုတ္တကာလေန။ သေသံ ဥတ္တာနမေဝ။ ဣဓာပိ တိဿော သိက္ခာ မိဿိကာဝ ကထိတာ။

၄။ ဝဇ္ဇိပုတ္တသုတ္တဝဏ္ဏနာ

၈၅။ စတုတ္ထေ ဝဇ္ဇိပုတ္တကောတိ ဝဇ္ဇိရာဇကုလဿ ပုတ္တော။ ဒိယဍ္ဎသိက္ခာပဒသတန္တိ ပဏ္ဏာသာဓိကံ သိက္ခာပဒသတံ။ တသ္မိံ သမယေ ပညတ္တာနိ သိက္ခာပဒါနေဝ သန္ဓာယေတံ ဝုတ္တံ။ သော ကိရ ဘိက္ခု အဇ္ဇဝသမ္ပန္နော ဥဇုဇာတိကော အဝင်္ကော အကုဋိလော၊ တသ္မာ ‘‘အဟံ ဧတ္တကာနိ သိက္ခာပဒါနိ ရက္ခိတုံ သက္ကုဏေယျံ ဝါ န ဝါ’’တိ စိန္တေတွာ သတ္ထု အာရောစေသိ။ သက္ကောမဟန္တိ သက္ကောမိ အဟံ။ သော ကိရ ‘‘ဧတ္တကေသု သိက္ခာပဒေသု သိက္ခန္တဿ အဂရု တီသု သိက္ခာသု သိက္ခိတု’’န္တိ မညမာနော ဧဝမာဟ။ အထ ဘဂဝါ ယထာ နာမ ပညာသ တိဏကလာပိယော ဥက္ခိပိတုံ အသက္ကောန္တဿ ကလာပိယသတံ ဗန္ဓိတွာ သီသေ ဌပေယျ၊ ဧဝမေဝ ဧကိဿာပိ သိက္ခာယ သိက္ခိတုံ အသက္ကောန္တဿ အပရာ ဒွေပိ သိက္ခာ ဥပရိ ပက္ခိပန္တော တသ္မာတိဟ တွံ ဘိက္ခူတိအာဒိမာဟ။ သုခုမာလော ကိရ ဥတ္တရော နာမ ဇာနပဒမနုဿော လောဟပါသာဒဝိဟာရေ ဝသတိ။ အထ နံ ဒဟရဘိက္ခူ အာဟံသု – ‘‘ဥတ္တရ၊ အဂ္ဂိသာလာ ဩဝဿတိ၊ တိဏံ ကပ္ပိယံ ကတွာ ဒေဟီ’’တိ။ တံ အာဒါယ အဋဝိံ ဂန္တွာ တေန လာယိတံ တိဏံယေဝ ကရဠေ ဗန္ဓိတွာ ‘‘ပညာသ ကရဠေ ဂဟေတုံ သက္ခိဿသိ ဥတ္တရာ’’တိ အာဟံသု။ သော ‘‘န သက္ခိဿာမီ’’တိ အာဟ။ အသီတိံ ပန သက္ခိဿသီတိ? န သက္ခိဿာမိ၊ ဘန္တေတိ။ ဧကံ ကရဠသတံ သက္ခိဿသီတိ? အာမ၊ ဘန္တေ၊ ဂဏှိဿာမီတိ။ ဒဟရဘိက္ခူ ကရဠသတံ ဗန္ဓိတွာ တဿ သီသေ ဌပယိံသု။ သော ဥက္ခိပိတွာ နိတ္ထုနန္တော ဂန္တွာ အဂ္ဂိသာလာယ သမီပေ ပါတေသိ။ အထ နံ ဘိက္ခူ ‘‘ကိလန္တရူပေါသိ ဥတ္တရာ’’တိ အာဟံသု။ အာမ၊ ဘန္တေ၊ ဒဟရာ ဘိက္ခူ မံ ဝဉ္စေသုံ၊ ဣမံ ဧကမ္ပိ ကရဠသတံ ဥက္ခိပိတုံ အသက္ကောန္တံ မံ ‘‘ပဏ္ဏာသ ကရဠေ ဥက္ခိပါဟီ’’တိ ဝဒိံသု။ အာမ၊ ဥတ္တရ၊ ဝဉ္စယိံသု တန္တိ။ ဧဝံ သမ္ပဒမိဒံ ဝေဒိတဗ္ဗံ။ ဣဓာပိ တိဿော သိက္ခာ မိဿိကာဝ ကထိတာ။

၅။ သေက္ခသုတ္တဝဏ္ဏနာ

၈၆။ ပဉ္စမေ ဥဇုမဂ္ဂါနုသာရိနောတိ ဥဇုမဂ္ဂေါ ဝုစ္စတိ အရိယမဂ္ဂေါ၊ တံ အနုဿရန္တဿ ပဋိပန္နကဿာတိ အတ္ထော။ ခယသ္မိံ ပဌမံ ဉာဏန္တိ ပဌမမေဝ မဂ္ဂဉာဏံ ဥပ္ပဇ္ဇတိ။ မဂ္ဂေါ ဟိ ကိလေသာနံ ခေပနတော ခယော နာမ၊ တံသမ္ပယုတ္တံ ဉာဏံ ခယသ္မိံ ဉာဏံ နာမ။ တတောအညာ အနန္တရာတိ တတော စတုတ္ထမဂ္ဂဉာဏတော အနန္တရာ အညာ ဥပ္ပဇ္ဇတိ၊ အရဟတ္တဖလံ ဥပ္ပဇ္ဇတီတိ အတ္ထော။ အညာဝိမုတ္တဿာတိ အရဟတ္တဖလဝိမုတ္တိယာ ဝိမုတ္တဿ။ ဉာဏံ ဝေ ဟောတီတိ ပစ္စဝေက္ခဏဉာဏံ ဟောတိ။ ဣတိ သုတ္တေပိ ဂါထာသုပိ သတ္တ သေခါ ကထိတာ။ အဝသာနေ ပန ခီဏာသဝေါ ဒဿိတောတိ။

၆။ ပဌမသိက္ခာသုတ္တဝဏ္ဏနာ

၈၇။ ဆဋ္ဌေ အတ္တကာမာတိ အတ္တနော ဟိတကာမာ။ ယတ္ထေတံ သဗ္ဗံ သမောဓာနံ ဂစ္ဆတီတိ ယာသု သိက္ခာသု သဗ္ဗမေတံ ဒိယဍ္ဎသိက္ခာပဒသတံ သင်္ဂဟံ ဂစ္ဆတိ။ ပရိပူရကာရီ ဟောတီတိ သမတ္တကာရီ ဟောတိ။ မတ္တသော ကာရီတိ ပမာဏေန ကာရကော၊ သဗ္ဗေန သဗ္ဗံ ကာတုံ န သက္ကောတီတိ အတ္ထော။ ခုဒ္ဒါနုခုဒ္ဒကာနီတိ စတ္တာရိ ပါရာဇိကာနိ ဌပေတွာ သေသသိက္ခာပဒါနိ။ တတြာပိ သင်္ဃာဒိသေသံ ခုဒ္ဒကံ၊ ထုလ္လစ္စယံ အနုခုဒ္ဒကံ နာမ။ ထုလ္လစ္စယဉ္စ ခုဒ္ဒကံ၊ ပါစိတ္တိယံ အနုခုဒ္ဒကံ နာမ၊ ပါစိတ္တိယဉ္စ ခုဒ္ဒကံ၊ ပါဋိဒေသနိယဒုက္ကဋဒုဗ္ဘာသိတာနိ အနုခုဒ္ဒကာနိ နာမ။ ဣမေ ပန အင်္ဂုတ္တရမဟာနိကာယဝဠဉ္ဇနကအာစရိယာ ‘‘စတ္တာရိ ပါရာဇိကာနိ ဌပေတွာ သေသာနိ သဗ္ဗာနိပိ ခုဒ္ဒါနုခုဒ္ဒကာနီ’’တိ ဝဒန္တိ။ တာနိ အာပဇ္ဇတိပိ ဝုဋ္ဌာတိပီတိ ဧတ္ထ ပန ခီဏာသဝေါ တာဝ လောကဝဇ္ဇံ နာပဇ္ဇတိ၊ ပဏ္ဏတ္တိဝဇ္ဇမေဝ အာပဇ္ဇတိ။ အာပဇ္ဇန္တော စ ကာယေနပိ ဝါစာယပိ စိတ္တေနပိ အာပဇ္ဇတိ။ ကာယေန အာပဇ္ဇန္တော ကုဋိကာရသဟသေယျာဒီနိ အာပဇ္ဇတိ၊ ဝါစာယ အာပဇ္ဇန္တော သဉ္စရိတ္တပဒသောဓမ္မာဒီနိ၊ စိတ္တေန အာပဇ္ဇန္တော ရူပိယပဋိဂ္ဂဟဏံ အာပဇ္ဇတိ။ သေက္ခေသုပိ ဧသေဝ နယော။ န ဟိ မေတ္ထ၊ ဘိက္ခဝေ၊ အဘဗ္ဗတာ ဝုတ္တာတိ၊ ဘိက္ခဝေ၊ န ဟိ မယာ ဧတ္ထ ဧဝရူပံ အာပတ္တိံ အာပဇ္ဇနေ စ ဝုဋ္ဌာနေ စ အရိယပုဂ္ဂလဿ အဘဗ္ဗတာ ကထိတာ။ အာဒိဗြဟ္မစရိယကာနီတိ မဂ္ဂဗြဟ္မစရိယဿ အာဒိဘူတာနိ စတ္တာရိ မဟာသီလသိက္ခာပဒါနိ။ ဗြဟ္မစရိယသာရုပ္ပာနီတိ တာနိယေဝ စတုမဂ္ဂဗြဟ္မစရိယဿ သာရုပ္ပာနိ အနုစ္ဆဝိကာနိ။ တတ္ထာတိ တေသု သိက္ခာပဒေသု။ ဓုဝသီလောတိ နိဗဒ္ဓသီလော။ ဌိတသီလောတိ ပတိဋ္ဌိတသီလော။ သောတာပန္နောတိ သောတသင်္ခါတေန မဂ္ဂေန ဖလံ အာပန္နော။ အဝိနိပါတဓမ္မောတိ စတူသု အပါယေသု အပတနသဘာဝေါ။ နိယတောတိ သောတာပတ္တိမဂ္ဂနိယာမေန နိယတော။ သမ္ဗောဓိပရာယဏောတိ ဥပရိမဂ္ဂတ္တယသမ္ဗောဓိပရာယဏော။

တနုတ္တာတိ တနုဘာဝေါ။ သကဒါဂါမိနော ဟိ ရာဂါဒယော အဗ္ဘပဋလံ ဝိယ မစ္ဆိကာပတ္တံ ဝိယ စ တနုကာ ဟောန္တိ၊ န ဗဟလာ။ ဩရမ္ဘာဂိယာနန္တိ ဟေဋ္ဌာဘာဂိယာနံ။ သံယောဇနာနန္တိ ဗန္ဓနာနံ။ ပရိက္ခယာတိ ပရိက္ခယေန။ ဩပပါတိကော ဟောတီတိ ဥပ္ပန္နကော ဟောတိ။ တတ္ထ ပရိနိဗ္ဗာယီတိ ဟေဋ္ဌာ အနောတရိတွာ ဥပရိယေဝ ပရိနိဗ္ဗာနဓမ္မော။ အနာဝတ္တိဓမ္မောတိ ယောနိဂတိဝသေန အနာဂမနဓမ္မော။

ပဒေသံ ပဒေသကာရီတိအာဒီသု ပဒေသကာရီ ပုဂ္ဂလော နာမ သောတာပန္နော စ သကဒါဂါမီ စ အနာဂါမီ စ၊ သော ပဒေသမေဝ သမ္ပာဒေတိ။ ပရိပူရကာရီ နာမ အရဟာ၊ သော ပရိပူရမေဝ သမ္ပာဒေတိ။ အဝဉ္ဈာနီတိ အတုစ္ဆာနိ သဖလာနိ သဥဒြယာနီတိ အတ္ထော။ ဣဓာပိ တိဿော သိက္ခာ မိဿကာဝ ကထိတာ။

၇။ ဒုတိယသိက္ခာသုတ္တဝဏ္ဏနာ

၈၈။ သတ္တမေ ကောလံကောလောတိ ကုလာ ကုလံ ဂမနကော။ ကုလန္တိ စေတ္ထ ဘဝေါ အဓိပ္ပေတော၊ တသ္မာ ‘‘ဒွေ ဝါ တီဏိ ဝါ ကုလာနီ’’တိ ဧတ္ထပိ ဒွေ ဝါ တယော ဝါ ဘဝေတိ အတ္ထော ဝေဒိတဗ္ဗော။ အယဉှိ ဒွေ ဝါ ဘဝေ သန္ဓာဝတိ တယော ဝါ၊ ဥတ္တမကောဋိယာ ဆ ဝါ။ တသ္မာ ဒွေ ဝါ တီဏိ ဝါ စတ္တာရိ ဝါ ပဉ္စ ဝါ ဆ ဝါတိ ဧဝမေတ္ထ ဝိကပ္ပော ဒဋ္ဌဗ္ဗော။ ဧကဗီဇီတိ ဧကဿေဝ ဘဝဿ ဗီဇံ ဧတဿ အတ္ထီတိ ဧကဗီဇီ။ ဥဒ္ဓံသောတောတိအာဒီသု အတ္ထိ ဥဒ္ဓံသောတော အကနိဋ္ဌဂါမီ၊ အတ္ထိ ဥဒ္ဓံသောတော န အကနိဋ္ဌဂါမီ၊ အတ္ထိ န ဥဒ္ဓံသောတော အကနိဋ္ဌဂါမီ၊ အတ္ထိ န ဥဒ္ဓံသောတော န အကနိဋ္ဌဂါမီ။ တတ္ထ ယော ဣဓ အနာဂါမိဖလံ ပတွာ အဝိဟာဒီသု နိဗ္ဗတ္တော တတ္ထ ယာဝတာယုကံ ဌတွာ ဥပရူပရိ နိဗ္ဗတ္တိတွာ အကနိဋ္ဌံ ပါပုဏာတိ၊ အယံ ဥဒ္ဓံသောတော အကနိဋ္ဌဂါမီ နာမ။ ယော ပန အဝိဟာဒီသု နိဗ္ဗတ္တော တတ္ထေဝ အပရိနိဗ္ဗာယိတွာ အကနိဋ္ဌမ္ပိ အပ္ပတွာ ဥပရိမဗြဟ္မလောကေ ပရိနိဗ္ဗာယတိ၊ အယံ ဥဒ္ဓံသောတော န အကနိဋ္ဌဂါမီ နာမ။ ယော ဣတော စဝိတွာ အကနိဋ္ဌေယေဝ နိဗ္ဗတ္တတိ၊ အယံ န ဥဒ္ဓံသောတော အကနိဋ္ဌဂါမီ နာမ။ ယော ပန အဝိဟာဒီသု စတူသု အညတရသ္မိံ နိဗ္ဗတ္တိတွာ တတ္ထေဝ ပရိနိဗ္ဗာယတိ၊ အယံ န ဥဒ္ဓံသောတော န အကနိဋ္ဌဂါမီ နာမ။

ယတ္ထ ကတ္ထစိ ဥပ္ပန္နော ပန သသင်္ခါရေန သပ္ပယောဂေန အရဟတ္တံ ပတ္တော သသင်္ခါရပရိနိဗ္ဗာယီ နာမ။ အသင်္ခါရေန အပ္ပယောဂေန ပတ္တော အသင်္ခါရပရိနိဗ္ဗာယီ နာမ။ ယော ပန ကပ္ပသဟဿာယုကေသု အဝိဟေသု နိဗ္ဗတ္တိတွာ ပဉ္စမံ ကပ္ပသတံ အတိက္ကမိတွာ အရဟတ္တံ ပတ္တော၊ အယံ ဥပဟစ္စပရိနိဗ္ဗာယီ နာမ။ အတပ္ပာဒီသုပိ ဧသေဝ နယော။ အန္တရာပရိနိဗ္ဗာယီတိ ယော အာယုဝေမဇ္ဈံ အနတိက္ကမိတွာ ပရိနိဗ္ဗာယတိ၊ သော တိဝိဓော ဟောတိ။ ကပ္ပသဟဿာယုကေသု တာဝ အဝိဟေသု နိဗ္ဗတ္တိတွာ ဧကော နိဗ္ဗတ္တဒိဝသေယေဝ အရဟတ္တံ ပါပုဏာတိ။ နော စေ နိဗ္ဗတ္တဒိဝသေ ပါပုဏာတိ၊ ပဌမဿ ပန ကပ္ပသတဿ မတ္ထကေ ပါပုဏာတိ၊ အယံ ပဌမော အန္တရာပရိနိဗ္ဗာယီ။ အပရော ဧဝံ အသက္ကောန္တော ဒွိန္နံ ကပ္ပသတာနံ မတ္ထကေ ပါပုဏာတိ၊ အယံ ဒုတိယော။ အပရော ဧဝမ္ပိ အသက္ကောန္တော စတုန္နံ ကပ္ပသတာနံ မတ္ထကေ ပါပုဏာတိ၊ အယံ တတိယော အန္တရာပရိနိဗ္ဗာယီ။ သေသံ ဝုတ္တနယမေဝ။

ဣမသ္မိံ ပန ဌာနေ ဌတွာ စတုဝီသတိ သောတာပန္နာ၊ ဒွါဒသ သကဒါဂါမိနော၊ အဋ္ဌစတ္တာလီသ အနာဂါမိနော၊ ဒွါဒသ စ အရဟန္တော ကထေတဗ္ဗာ။ ဣမသ္မိံ ဟိ သာသနေ သဒ္ဓါဓုရံ ပညာဓုရန္တိ ဒွေ ဓုရာနိ၊ ဒုက္ခပဋိပဒါဒန္ဓာဘိညာဒယော စတဿော ပဋိပဒါ။ တတ္ထေကော သဒ္ဓါဓုရေန အဘိနိဝိသိတွာ သောတာပတ္တိဖလံ ပတွာ ဧကမေဝ ဘဝံ နိဗ္ဗတ္တိတွာ ဒုက္ခဿန္တံ ကရောတိ၊ အယမေကော ဧကဗီဇီ။ သော ပဋိပဒါဝသေန စတုဗ္ဗိဓော ဟောတိ။ ယထာ စေသ၊ ဧဝံ ပညာဓုရေန အဘိနိဝိဋ္ဌောပီတိ အဋ္ဌ ဧကဗီဇိနော။ တထာ ကောလံကောလာ သတ္တက္ခတ္တုပရမာ စာတိ ဣမေ စတုဝီသတိ သောတာပန္နာ နာမ။ တီသု ပန ဝိမောက္ခေသု သုညတဝိမောက္ခေန သကဒါဂါမိဘူမိံ ပတ္တာ စတုန္နံ ပဋိပဒါနံ ဝသေန စတ္တာရော သကဒါဂါမိနော၊ တထာ အနိမိတ္တဝိမောက္ခေန ပတ္တာ စတ္တာရော၊ အပ္ပဏိဟိတဝိမောက္ခေန ပတ္တာ စတ္တာရောတိ ဣမေ ဒွါဒသ သကဒါဂါမိနော။ အဝိဟေသု ပန တယော အန္တရာပရိနိဗ္ဗာယိနော၊ ဧကော ဥပဟစ္စပရိနိဗ္ဗာယီ၊ ဧကော ဥဒ္ဓံသောတော အကနိဋ္ဌဂါမီတိ ပဉ္စ အနာဂါမိနော၊ တေ အသင်္ခါရပရိနိဗ္ဗာယိနော ပဉ္စ၊ သသင်္ခါရပရိနိဗ္ဗာယိနော ပဉ္စာတိ ဒသ ဟောန္တိ၊ တထာ အတပ္ပာဒီသု။ အကနိဋ္ဌေသု ပန ဥဒ္ဓံသောတော နတ္ထိ ၊ တသ္မာ တတ္ထ စတ္တာရော သသင်္ခါရပရိနိဗ္ဗာယီ၊ စတ္တာရော အသင်္ခါရပရိနိဗ္ဗာယီတိ အဋ္ဌ၊ ဣမေ အဋ္ဌစတ္တာလီသ အနာဂါမိနော။ ယထာ ပန သကဒါဂါမိနော၊ တထေဝ အရဟန္တောပိ ဒွါဒသ ဝေဒိတဗ္ဗာ။ ဣဓာပိ တိဿော သိက္ခာ မိဿိကာဝ ကထိတာ။

၈။ တတိယသိက္ခာသုတ္တဝဏ္ဏနာ

၈၉။ အဋ္ဌမေ တံ ဝါ ပန အနဘိသမ္ဘဝံ အပ္ပဋိဝိဇ္ဈန္တိ တံ အရဟတ္တံ အပါပုဏန္တော အပ္ပဋိဝိဇ္ဈန္တော။ ဣမိနာ နယေန သဗ္ဗဋ္ဌာနေသု အတ္ထော ဝေဒိတဗ္ဗော။ ဣဓာပိ တိဿော သိက္ခာ မိဿိကာဝ ကထိတာ။ နဝမံ ဥတ္တာနတ္ထမေဝ။ ဣဓာပိ တိဿော သိက္ခာ မိဿိကာဝ ကထိတာ။

၁၀။ ဒုတိယသိက္ခတ္တယသုတ္တဝဏ္ဏနာ

၉၁။ ဒသမေ အာသဝါနံ ခယာတိ ဧတ္ထ အရဟတ္တမဂ္ဂေါ အဓိပညာသိက္ခာ နာမ။ ဖလံ ပန သိက္ခိတသိက္ခဿ ဥပ္ပဇ္ဇနတော သိက္ခာတိ န ဝတ္တဗ္ဗံ။

ယထာပုရေ တထာ ပစ္ဆာတိ ယထာ ပဌမံ တီသု သိက္ခာသု သိက္ခတိ၊ ပစ္ဆာ တထေဝ သိက္ခတီတိ အတ္ထော။ ဒုတိယပဒေပိ ဧသေဝ နယော။ ယထာ အဓော တထာ ဥဒ္ဓန္တိ ယထာ ဟေဋ္ဌိမကာယံ အသုဘဝသေန ပဿတိ၊ ဥပရိမကာယမ္ပိ တထေဝ ဖရတိ။ ဒုတိယပဒေပိ ဧသေဝ နယော။ ယထာ ဒိဝါ တထာ ရတ္တိန္တိ ယထာ ဒိဝါ တိဿော သိက္ခာ သိက္ခတိ၊ ရတ္တိမ္ပိ တထေဝ သိက္ခတီတိ အတ္ထော။ အဘိဘုယျ ဒိသာ သဗ္ဗာတိ သဗ္ဗာ ဒိသာ အာရမ္မဏဝသေန အဘိဘဝိတွာ။ အပ္ပမာဏသမာဓိနာတိ အရဟတ္တမဂ္ဂသမာဓိနာ။

သေက္ခန္တိ သိက္ခမာနံ သကရဏီယံ။ ပဋိပဒန္တိ ပဋိပန္နကံ။ သံသုဒ္ဓစာရိယန္တိ သံသုဒ္ဓစရဏံ ပရိသုဒ္ဓသီလံ။ သမ္ဗုဒ္ဓန္တိ စတုသစ္စဗုဒ္ဓံ။ ဓီရံ ပဋိပဒန္တဂုန္တိ ခန္ဓဓီရအာယတနဓီရဝသေန ဓီရံ ဓိတိသမ္ပန္နံ ပဋိပတ္တိယာ အန္တံ ဂတံ။ ဝိညာဏဿာတိ စရိမကဝိညာဏဿ။ တဏှာက္ခယဝိမုတ္တိနောတိ တဏှာက္ခယဝိမုတ္တိသင်္ခါတာယ အရဟတ္တဖလဝိမုတ္တိယာ သမန္နာဂတဿ။ ပဇ္ဇောတဿေဝ နိဗ္ဗာနန္တိ ပဒီပနိဗ္ဗာနံ ဝိယ။ ဝိမောက္ခော ဟောတိ စေတသောတိ စိတ္တဿ ဝိမုတ္တိ ဝိမုစ္စနာ အပ္ပဝတ္တိဘာဝေါ ဟောတိ။ တဏှာက္ခယဝိမုတ္တိနော ဟိ ခီဏာသဝဿ စရိမကဝိညာဏနိရောဓေန ပရိနိဗ္ဗာနံ ဝိယ စေတသော ဝိမောက္ခော ဟောတိ၊ န ဂတဋ္ဌာနံ ပညာယတိ၊ အပဏ္ဏတ္တိကဘာဝူပဂမောယေဝ ဟောတီတိ အတ္ထော။

၁၁။ သင်္ကဝါသုတ္တဝဏ္ဏနာ

၉၂။ ဧကာဒသမေ သင်္ကဝါ နာမ ကောသလာနံ နိဂမောတိ သင်္ကဝါတိ ဧဝံနာမကော ကောသလရဋ္ဌေ နိဂမော။ အာဝါသိကောတိ ဘာရဟာရော နဝေ အာဝါသေ သမုဋ္ဌာပေတိ၊ ပုရာဏေ ပဋိဇဂ္ဂတိ။ သိက္ခာပဒပဋိသံယုတ္တာယာတိ သိက္ခာသင်္ခါတေဟိ ပဒေဟိ ပဋိသံယုတ္တာယ၊ တီဟိ သိက္ခာဟိ သမန္နာဂတာယာတိ အတ္ထော။ သန္ဒဿေတီတိ သမ္မုခေ ဝိယ ကတွာ ဒဿေတိ။ သမာဒပေတီတိ ဂဏှာပေတိ။ သမုတ္တေဇေတီတိ သမုဿာဟေတိ။ သမ္ပဟံသေတီတိ ပဋိလဒ္ဓဂုဏေဟိ ဝဏ္ဏံ ကထေန္တော ဝေါဒါပေတိ။ အဓိသလ္လိခတေတိ အတိဝိယ သလ္လိခတိ၊ အတိဝိယ သလ္လိခိတံ ကတွာ သဏှံ သဏှံ ကထေတီတိ အတ္ထော။

အစ္စယောတိ အပရာဓော။ မံ အစ္စဂမာတိ မံ အတိက္ကမ္မ အဓိဘဝိတွာ ပဝတ္တော။ အဟုဒေဝ အက္ခန္တီတိ အဟောသိယေဝ အနဓိဝါသနာ။ အဟု အပ္ပစ္စယောတိ အဟောသိ အတုဋ္ဌာကာရော။ ပဋိဂ္ဂဏှာတူတိ ခမတု။ အာယတိံ သံဝရာယာတိ အနာဂတေ သံဝရတ္ထာယ၊ ပုန ဧဝရူပဿ အပရာဓဿ ဒေါသဿ ခလိတဿ ဝါ အကရဏတ္ထာယာတိ အတ္ထော။ တဂ္ဃာတိ ဧကံသေန။ ယထာဓမ္မံ ပဋိကရောသီတိ ယထာ ဓမ္မော ဌိတော၊ တထာ ကရောသိ၊ ခမာပေသီတိ ဝုတ္တံ ဟောတိ။ တံ တေ မယံ ပဋိဂ္ဂဏှာမာတိ တံ တဝ အပရာဓံ မယံ ခမာမ။ ဝုဒ္ဓိဟေသာ၊ ကဿပ၊ အရိယဿ ဝိနယေတိ ဧသာ ကဿပ ဗုဒ္ဓဿ ဘဂဝတော သာသနေ ဝုဒ္ဓိ နာမ။ ကတမာ? ယာယံ အစ္စယံ အစ္စယတော ဒိသွာ ယထာဓမ္မံ ပဋိကရိတွာ အာယတိံ သံဝရာပဇ္ဇနာ။ ဒေသနံ ပန ပုဂ္ဂလာဓိဋ္ဌာနံ ကရောန္တော ‘‘ယော အစ္စယံ အစ္စယတော ဒိသွာ ယထာဓမ္မံ ပဋိကရောတိ၊ အာယတိံ သံဝရံ အာပဇ္ဇတီ’’တိ အာဟ။ န သိက္ခာကာမောတိ တိဿော သိက္ခာ န ကာမေတိ န ပတ္ထေတိ န ပိဟေတိ။ သိက္ခာသမာဒါနဿာတိ သိက္ခာပရိပူရဏဿ။ န ဝဏ္ဏဝါဒီတိ ဂုဏံ န ကထေတိ။ ကာလေနာတိ ယုတ္တပ္ပယုတ္တကာလေန။ သေသမေတ္ထ ဥတ္တာနတ္ထမေဝါတိ။

သမဏဝဂ္ဂေါ စတုတ္ထော။