📜

(၁၀) ၅။ လောဏကပလ္လဝဂ္ဂေါ

၁။ အစ္စာယိကသုတ္တဝဏ္ဏနာ

၉၃။ ပဉ္စမဿ ပဌမေ အစ္စာယိကာနီတိ အတိပါတိကာနိ။ ကရဏီယာနီတိ အဝဿကိစ္စာနိ။ ယဉှိ န အဝဿံ ကာတဗ္ဗံ၊ တံ ကိစ္စန္တိ ဝုစ္စတိ။ အဝဿံ ကာတဗ္ဗံ ကရဏီယံ နာမ။ သီဃံ သီဃန္တိ ဝေဂေန ဝေဂေန။ တဿ ခေါ တန္တိ ဧတ္ထ တန္တိ နိပါတမတ္တံ။ နတ္ထိ သာ ဣဒ္ဓိ ဝါ အာနုဘာဝေါ ဝါတိ သာ ဝါ ဣဒ္ဓိ သော ဝါ အာနုဘာဝေါ နတ္ထိ။ ဥတ္တရသွေတိ တတိယဒိဝသေ။ ဥတုပရိဏာမိနီတိ လဒ္ဓဥတုပရိဏာမာနိ ဟုတွာ။ ဇာယန္တိပီတိ တတိယဒိဝသေ နိက္ခန္တသေတင်္ကုရာနိ ဟောန္တိ၊ သတ္တာဟေ ပတ္တေ နီလင်္ကုရာနိ ဟောန္တိ။ ဂဗ္ဘီနိပိ ဟောန္တီတိ ဒိယဍ္ဎမာသံ ပတွာ ဂဟိတဂဗ္ဘာနိ ဟောန္တိ။ ပစ္စန္တိပီတိ တယော မာသေ ပတွာ ပစ္စန္တိ။ ဣဒါနိ ယသ္မာ ဗုဒ္ဓါနံ ဂဟပတိကေန ဝါ သဿေဟိ ဝါ အတ္ထော နတ္ထိ၊ သာသနေ ပန တပ္ပဋိရူပကံ ပုဂ္ဂလံ ဝါ အတ္ထံ ဝါ ဒဿေတုံ တံ တံ ဩပမ္မံ အာဟရန္တိ။ တသ္မာ ယမတ္ထံ ဒဿေတုကာမေန ဧတံ အာဘတံ၊ တံ ဒဿေန္တော ဧဝမေဝ ခေါတိအာဒိမာဟ။ တံ အတ္ထတော ဥတ္တာနမေဝ။ သိက္ခာ ပန ဣဓာပိ မိဿိကာ ဧဝ ကထိတာ။

၂။ ပဝိဝေကသုတ္တဝဏ္ဏနာ

၉၄။ ဒုတိယေ စီဝရပဝိဝေကန္တိ စီဝရံ နိဿာယ ဥပ္ပဇ္ဇနကကိလေသေဟိ ဝိဝိတ္တဘာဝံ။ သေသဒွယေပိ ဧသေဝ နယော။ သာဏာနီတိ သာဏဝါကစေလာနိ။ မသာဏာနီတိ မိဿကစေလာနိ။ ဆဝဒုဿာနီတိ မတသရီရတော ဆဍ္ဍိတဝတ္ထာနိ၊ ဧရကတိဏာဒီနိ ဝါ ဂန္ထေတွာ ကတနိဝါသနာနိ။ ပံသုကူလာနီတိ ပထဝိယံ ဆဍ္ဍိတနန္တကာနိ။ တိရီဋာနီတိ ရုက္ခတစဝတ္ထာနိ။ အဇိနာနီတိ အဇိနမိဂစမ္မာနိ။ အဇိနက္ခိပန္တိ တဒေဝ မဇ္ဈေ ဖာလိတံ၊ သဟခုရကန္တိပိ ဝဒန္တိ။ ကုသစီရန္တိ ကုသတိဏာနိ ဂန္ထေတွာ ကတစီရံ။ ဝါကစီရဖလကစီရေသုပိ ဧသေဝ နယော။ ကေသကမ္ဗလန္တိ မနုဿကေသေဟိ ကတကမ္ဗလံ။ ဝါလကမ္ဗလန္တိ အဿဝါလာဒီဟိ ကတကမ္ဗလံ။ ဥလူကပက္ခိကန္တိ ဥလူကပတ္တာနိ ဂန္ထေတွာ ကတနိဝါသနံ။

သာကဘက္ခာတိ အလ္လသာကဘက္ခာ။ သာမာကဘက္ခာတိ သာမာကတဏ္ဍုလဘက္ခာ။ နီဝါရာဒီသု နီဝါရာ နာမ အရညေ သယံ ဇာတဝီဟိဇာတိ။ ဒဒ္ဒုလန္တိ စမ္မကာရေဟိ စမ္မံ လိခိတွာ ဆဍ္ဍိတကသဋံ။ ဟဋံ ဝုစ္စတိ သိလေသောပိ သေဝါလောပိ ကဏိကာရာဒိရုက္ခနိယျာသောပိ။ ကဏန္တိ ကုဏ္ဍကံ။ အာစာမောတိ ဘတ္တဥက္ခလိကာယ လဂ္ဂေါ ဈာမဩဒနော။ တံ ဆဍ္ဍိတဋ္ဌာနေ ဂဟေတွာ ခါဒန္တိ၊ ဩဒနကဉ္ဇိယန္တိပိ ဝဒန္တိ။ ပိညာကာဒယော ပါကဋာဝ။ ပဝတ္တဖလဘောဇီတိ ပတိတဖလဘောဇီ။ ဘုသာဂါရန္တိ ခလသာလံ။

သီလဝါတိ စတုပါရိသုဒ္ဓိသီလေန သမန္နာဂတော။ ဒုဿီလျဉ္စဿ ပဟီနံ ဟောတီတိ ပဉ္စ ဒုဿီလျာနိ ပဟီနာနိ ဟောန္တိ။ သမ္မာဒိဋ္ဌိကောတိ ယာထာဝဒိဋ္ဌိကော။ မိစ္ဆာဒိဋ္ဌီတိ အယာထာဝဒိဋ္ဌိ။ အာသဝါတိ စတ္တာရော အာသဝါ။ အဂ္ဂပ္ပတ္တောတိ သီလဂ္ဂပ္ပတ္တော။ သာရပ္ပတ္တောတိ သီလသာရံ ပတ္တော။ သုဒ္ဓါတိ ပရိသုဒ္ဓါ။ သာရေ ပတိဋ္ဌိတောတိ သီလသမာဓိပညာသာရေ ပတိဋ္ဌိတော။

သေယျထာပီတိ ယထာ နာမ။ သမ္ပန္နန္တိ ပရိပုဏ္ဏံ ပရိပက္ကသာလိဘရိတံ။ သင်္ဃရာပေယျာတိ သင်္ကဍ္ဎာပေယျ။ ဥဗ္ဗဟာပေယျာတိ ခလဋ္ဌာနံ အာဟရာပေယျ။ ဘုသိကန္တိ ဘုသံ။ ကောဋ္ဋာပေယျာတိ ဥဒုက္ခလေ ပက္ခိပါပေတွာ မုသလေဟိ ပဟရာပေယျ။ အဂ္ဂပ္ပတ္တာနီတိ တဏ္ဍုလဂ္ဂံ ပတ္တာနိ။ သာရပ္ပတ္တာဒီသုပိ ဧသေဝ နယော။ သေသံ ဥတ္တာနမေဝ။ ယံ ပနေတ္ထ ‘‘ဒုဿီလျဉ္စဿ ပဟီနံ မိစ္ဆာဒိဋ္ဌိ စဿ ပဟီနာ’’တိ ဝုတ္တံ၊ တံ သောတာပတ္တိမဂ္ဂေန ပဟီနဘာဝံ သန္ဓာယ ဝုတ္တန္တိ ဝေဒိတဗ္ဗံ။

၃။ သရဒသုတ္တဝဏ္ဏနာ

၉၅။ တတိယေ ဝိဒ္ဓေတိ ဝလာဟကဝိဂမေန ဒူရီဘူတေ။ ဒေဝေတိ အာကာသေ။ အဘိဝိဟစ္စာတိ အဘိဝိဟနိတွာ။ ယတောတိ ယသ္မိံ ကာလေ။ ဝိရဇန္တိ ရာဂရဇာဒိရဟိတံ။ တေသံယေဝ မလာနံ ဝိဂတတ္တာ ဝီတမလံ။ ဓမ္မစက္ခုန္တိ စတုသစ္စဓမ္မပရိဂ္ဂါဟကံ သောတာပတ္တိမဂ္ဂစက္ခုံ။ နတ္ထိ တံ သံယောဇနန္တိ ဒုဝိဓမေဝဿ သံယောဇနံ နတ္ထိ၊ ဣတရမ္ပိ ပန ပုန ဣမံ လောကံ အာနေတုံ အသမတ္ထတာယ နတ္ထီတိ ဝုတ္တံ။ ဣမသ္မိံ သုတ္တေ ဈာနာနာဂါမီ နာမ ကထိတောတိ။

၄။ ပရိသာသုတ္တဝဏ္ဏနာ

၉၆။ စတုတ္ထေ န ဗာဟုလိကာ ဟောန္တီတိ ပစ္စယဗာဟုလ္လိကာ န ဟောန္တိ။ န သာထလိကာတိ တိဿော သိက္ခာ သိထိလံ ကတွာ န ဂဏှန္တိ။ ဩက္ကမနေ နိက္ခိတ္တဓုရာတိ ဩက္ကမနံ ဝုစ္စတိ အဝဂမနဋ္ဌေန ပဉ္စ နီဝရဏာနိ၊ တေသု နိက္ခိတ္တဓုရာ။ ပဝိဝေကေ ပုဗ္ဗင်္ဂမာတိ ကာယစိတ္တဥပဓိဝိဝေကသင်္ခါတေ တိဝိဓေပိ ဝိဝေကေ ပုဗ္ဗင်္ဂမာ။ ဝီရိယံ အာရဘန္တီတိ ဒုဝိဓမ္ပိ ဝီရိယံ ပဂ္ဂဏှန္တိ။ အပ္ပတ္တဿာတိ ဈာနဝိပဿနာမဂ္ဂဖလသင်္ခါတဿ အပ္ပတ္တဝိသေသဿ။ သေသပဒဒွယေပိ ဧသေဝ နယော။ ပစ္ဆိမာဇနတာတိ သဒ္ဓိဝိဟာရိကအန္တေဝါသိကာဒယော။ ဒိဋ္ဌာနုဂတိံ အာပဇ္ဇတီတိ အာစရိယုပဇ္ဈာယေဟိ ကတံ အနုကရောတိ။ ယံ တာယ ဇနတာယ အာစရိယုပဇ္ဈာယေသု ဒိဋ္ဌံ၊ တဿ အနုဂတိံ အာပဇ္ဇတိ နာမ။ အယံ ဝုစ္စတိ၊ ဘိက္ခဝေ၊ အဂ္ဂဝတီ ပရိသာတိ၊ ဘိက္ခဝေ၊ အယံ ပရိသာ အဂ္ဂပုဂ္ဂလဝတီ နာမ ဝုစ္စတိ။

ဘဏ္ဍနဇာတာတိ ဇာတဘဏ္ဍနာ။ ကလဟဇာတာတိ ဇာတကလဟာ။ ဘဏ္ဍနန္တိ စေတ္ထ ကလဟဿ ပုဗ္ဗဘာဂေါ၊ ဟတ္ထပရာမာသာဒိဝသေန ဝီတိက္ကမော ကလဟော နာမ။ ဝိဝါဒါပန္နာတိ ဝိရုဒ္ဓဝါဒံ အာပန္နာ။ မုခသတ္တီဟီတိ ဂုဏဝိဇ္ဈနဋ္ဌေန ဖရုသာ ဝါစာ ‘‘မုခသတ္တိယော’’တိ ဝုစ္စန္တိ၊ တာဟိ မုခသတ္တီဟိ။ ဝိတုဒန္တာ ဝိဟရန္တီတိ ဝိဇ္ဈန္တာ ဝိစရန္တိ။

သမဂ္ဂါတိ သဟိတာ။ သမ္မောဒမာနာတိ သမပ္ပဝတ္တမောဒါ။ ခီရောဒကီဘူတာတိ ခီရောဒကံ ဝိယ ဘူတာ။ ပိယစက္ခူဟီတိ ဥပသန္တေဟိ မေတ္တစက္ခူဟိ။ ပီတိ ဇာယတီတိ ပဉ္စဝဏ္ဏာ ပီတိ ဥပ္ပဇ္ဇတိ။ ကာယော ပဿမ္ဘတီတိ နာမကာယောပိ ရူပကာယောပိ ဝိဂတဒရထော ဟောတိ။ ပဿဒ္ဓကာယောတိ အသာရဒ္ဓကာယော။ သုခံ ဝေဒိယတီတိ ကာယိကစေတသိကသုခံ ဝေဒိယတိ။ သမာဓိယတီတိ အာရမ္မဏေ သမ္မာ ဌပီယတိ။

ထုလ္လဖုသိတကေတိ မဟာဖုသိတကေ။ ပဗ္ဗတကန္ဒရပဒရသာခါတိ ဧတ္ထ ကန္ဒရော နာမ ‘‘က’’န္တိ လဒ္ဓနာမေန ဥဒကေန ဒါရိတော ဥဒကဘိန္နော ပဗ္ဗတပ္ပဒေသော၊ ယော ‘‘နိတမ္ဘော’’တိပိ ‘‘နဒိကုဉ္ဇော’’တိပိ ဝုစ္စတိ။ ပဒရံ နာမ အဋ္ဌ မာသေ ဒေဝေ အဝဿန္တေ ဖလိတော ဘူမိပ္ပဒေသော။ သာခါတိ ကုသောဗ္ဘဂါမိနိယော ခုဒ္ဒကမာတိကာယော။ ကုသောဗ္ဘာတိ ခုဒ္ဒကအာဝါဋာ။ မဟာသောဗ္ဘာတိ မဟာအာဝါဋာ။ ကုန္နဒိယောတိ ခုဒ္ဒကနဒိယော။ မဟာနဒိယောတိ ဂင်္ဂါယမုနာဒိကာ မဟာသရိတာ။

၅-၇။ ပဌမအာဇာနီယသုတ္တာဒိဝဏ္ဏနာ

၉၇-၉၉။ ပဉ္စမေ အင်္ဂေဟီတိ ဂုဏင်္ဂေဟိ။ ရာဇာရဟောတိ ရညော အရဟော အနုစ္ဆဝိကော။ ရာဇဘောဂ္ဂေါတိ ရညော ဥပဘောဂဘူတော။ ရညော အင်္ဂန္တိ ရညော ဟတ္ထပါဒါဒိအင်္ဂသမတာယ အင်္ဂန္တေဝ သင်္ခံ ဂစ္ဆတိ။ ဝဏ္ဏသမ္ပန္နောတိ သရီရဝဏ္ဏေန သမ္ပန္နော။ ဗလသမ္ပန္နောတိ ကာယဗလေန သမ္ပန္နော။ အာဟုနေယျောတိ အာဟုတိသင်္ခါတံ ပိဏ္ဍပါတံ ပဋိဂ္ဂဟေတုံ ယုတ္တော။ ပါဟုနေယျောတိ ပါဟုနကဘတ္တဿ အနုစ္ဆဝိကော။ ဒက္ခိဏေယျောတိ ဒသဝိဓဒါနဝတ္ထုပရိစ္စာဂဝသေန သဒ္ဓါဒါနသင်္ခါတာယ ဒက္ခိဏာယ အနုစ္ဆဝိကော။ အဉ္ဇလိကရဏီယောတိ အဉ္ဇလိပဂ္ဂဟဏဿ အနုစ္ဆဝိကော။ အနုတ္တရံ ပုညက္ခေတ္တံ လောကဿာတိ သဗ္ဗလောကဿ အသဒိသံ ပုညဝိရုဟနဋ္ဌာနံ။

ဝဏ္ဏသမ္ပန္နောတိ ဂုဏဝဏ္ဏေန သမ္ပန္နော။ ဗလသမ္ပန္နောတိ ဝီရိယဗလေန သမ္ပန္နော။ ဇဝသမ္ပန္နောတိ ဉာဏဇဝေန သမ္ပန္နော။ ထာမဝါတိ ဉာဏထာမေန သမန္နာဂတော။ ဒဠှပရက္ကမောတိ ထိရပရက္ကမော။ အနိက္ခိတ္တဓုရောတိ အဋ္ဌပိတဓုရော ပဂ္ဂဟိတဓုရော၊ အဂ္ဂဖလံ အရဟတ္တံ အပ္ပတွာ ဝီရိယဓုရံ န နိက္ခိပိဿာမီတိ ဧဝံ ပဋိပန္နော။ ဣမသ္မိံ သုတ္တေ စတုသစ္စဝသေန သောတာပတ္တိမဂ္ဂေါ၊ သောတာပတ္တိမဂ္ဂေန စ ဉာဏဇဝသမ္ပန္နတာ ကထိတာတိ။ ဆဋ္ဌေ တီဏိ စ မဂ္ဂါနိ တီဏိ စ ဖလာနိ၊ တီဟိ မဂ္ဂဖလေဟိ စ ဉာဏဇဝသမ္ပန္နတာ ကထိတာ။ သတ္တမေ အရဟတ္တဖလံ၊ အရဟတ္တဖလေနေဝ စ မဂ္ဂကိစ္စံ ကထိတံ။ ဖလံ ပန ဇဝိတဇဝေန ဥပ္ပဇ္ဇနတော ဇဝေါတိ စ ဝတ္တုံ ဝဋ္ဋတိ။

၈။ ပေါတ္ထကသုတ္တဝဏ္ဏနာ

၁၀၀။ အဋ္ဌမေ နဝေါတိ ကရဏံ ဥပါဒါယ ဝုစ္စတိ။ ပေါတ္ထကောတိ ဝါကမယဝတ္ထံ။ မဇ္ဈိမောတိ ပရိဘောဂမဇ္ဈိမော။ ဇိဏ္ဏောတိ ပရိဘောဂဇိဏ္ဏော။ ဥက္ခလိပရိမဇ္ဇနန္တိ ဥက္ခလိပရိပုဉ္ဆနံ ဒုဿီလောတိ နိဿီလော။ ဒုဗ္ဗဏ္ဏတာယာတိ ဂုဏဝဏ္ဏာဘာဝေန ဒုဗ္ဗဏ္ဏတာယ။ ဒိဋ္ဌာနုဂတိံ အာပဇ္ဇန္တီတိ တေန ကတံ အနုကရောန္တိ။ န မဟပ္ဖလံ ဟောတီတိ ဝိပါကဖလေန မဟပ္ဖလံ န ဟောတိ။ န မဟာနိသံသန္တိ ဝိပါကာနိသံသေနေဝ န မဟာနိသံသံ။ အပ္ပဂ္ဃတာယာတိ ဝိပါကဂ္ဃေန အပ္ပဂ္ဃတာယ။ ကာသိကံ ဝတ္ထန္တိ တီဟိ ကပ္ပာသအံသူဟိ သုတ္တံ ကန္တိတွာ ကတဝတ္ထံ၊ တဉ္စ ခေါ ကာသိရဋ္ဌေယေဝ ဥဋ္ဌိတံ။ သေသံ ဥတ္တာနမေဝ။ သီလံ ပနေတ္ထ မိဿကံ ကထိတန္တိ။

၉။ လောဏကပလ္လသုတ္တဝဏ္ဏနာ

၁၀၁။ နဝမေ ယထာ ယထာယန္တိ ယထာ ယထာ အယံ။ တထာ တထာ တန္တိ တထာ တထာ တံ ကမ္မံ။ ဣဒံ ဝုတ္တံ ဟောတိ – ယော ဧဝံ ဝဒေယျ – ‘‘ယထာ ယထာ ကမ္မံ ကရောတိ၊ တထာ တထာဿ ဝိပါကံ ပဋိသံဝေဒိယတေဝ။ န ဟိ သက္ကာ ကတဿ ကမ္မဿ ဝိပါကံ ပဋိသေဓေတုံ။ တသ္မာ ယတ္တကံ ကမ္မံ ကရောတိ၊ တတ္တကဿ ဝိပါကံ ပဋိသံဝေဒိယတေဝါ’’တိ။ ဧဝံ သန္တန္တိ ဧဝံ သန္တေ။ ဗြဟ္မစရိယဝါသော န ဟောတီတိ ယံ မဂ္ဂဘာဝနတော ပုဗ္ဗေ ဥပပဇ္ဇဝေဒနီယံ ကမ္မံ ကတံ၊ တဿ အဝဿံ ပဋိသံဝေဒနီယတ္တာ ဗြဟ္မစရိယံ ဝုတ္ထမ္ပိ အဝုတ္ထမေဝ ဟောတိ။ ဩကာသော န ပညာယတိ သမ္မာ ဒုက္ခဿ အန္တကိရိယာယာတိ ယသ္မာ စ ဧဝံ သန္တေ တေန ကမ္မာယူဟနဉ္စေဝ ဝိပါကာနုဘဝနာ စ ဟောတိ၊ တသ္မာ ဟေတုနာ နယေန ဝဋ္ဋဒုက္ခဿ အန္တကိရိယာယ ဩကာသော န ပညာယတိ နာမ။

ယထာ ယထာ ဝေဒနီယန္တိ ယေန ယေနာကာရေန ဝေဒိတဗ္ဗံ။ တထာတထာဿ ဝိပါကံ ပဋိသံဝေဒိယတီတိ တေန တေနာကာရေန အဿ ဝိပါကံ ပစ္စနုဘောတိ။ ဣဒံ ဝုတ္တံ ဟောတိ – ယဒေတံ သတ္တသု ဇဝနေသု ပဌမဇဝနကမ္မံ သတိ ပစ္စယေ ဝိပါကဝါရံ လဘန္တမေဝ ဒိဋ္ဌဓမ္မဝေဒနီယံ ဟောတိ၊ အသတိ အဟောသိကမ္မံ နာမ။ ယဉ္စ သတ္တမဇဝနကမ္မံ သတိ ပစ္စယေ ဥပပဇ္ဇဝေဒနီယံ ဟောတိ၊ အသတိ အဟောသိကမ္မံ နာမ။ ယဉ္စ မဇ္ဈေ ပဉ္စဇဝနကမ္မံ ယာဝ သံသာရပ္ပဝတ္တိ၊ တာဝ အပရပရိယာယဝေဒနီယံ နာမ ဟောတိ။ ဧတေသု အာကာရေသု ယေန ယေနာကာရေန ဝေဒိတဗ္ဗံ ကမ္မံ အယံ ပုရိသော ကရောတိ၊ တေန တေနေဝဿ ဝိပါကံ ပဋိသံဝေဒိယတိ နာမ။ အဋ္ဌကထာယဉှိ လဒ္ဓဝိပါကဝါရမေဝ ကမ္မံ ယထာဝေဒနီယံ ကမ္မံ နာမာတိ ဝုတ္တံ။ ဧဝံ သန္တံ၊ ဘိက္ခဝေ၊ ဗြဟ္မစရိယဝါသော ဟောတီတိ ကမ္မက္ခယကရဿ ဗြဟ္မစရိယဿ ခေပေတဗ္ဗကမ္မသမ္ဘဝတော ဝါသော နာမ ဟောတိ၊ ဝုတ္ထံ သုဝုတ္ထမေဝ ဟောတီတိ အတ္ထော။ ဩကာသော ပညာယတိ သမ္မာ ဒုက္ခဿ အန္တကိရိယာယာတိ ယသ္မာ ဧဝံ သန္တေ တေန တေန မဂ္ဂေန အဘိသင်္ခါရဝိညာဏဿ နိရောဓေန တေသု တေသု ဘဝေသု အာယတိံ ဝဋ္ဋဒုက္ခံ န ဥပ္ပဇ္ဇတိ၊ တသ္မာ ဩကာသော ပညာယတိ သမ္မာ ဒုက္ခဿ အန္တကိရိယာယ။

ဣဒါနိ တံ ယထာဝေဒနီယကမ္မသဘာဝံ ဒဿေန္တော ဣဓ၊ ဘိက္ခဝေ၊ ဧကစ္စဿာတိအာဒိမာဟ။ တတ္ထ အပ္ပမတ္တကန္တိ ပရိတ္တံ ထောကံ မန္ဒံ လာမကံ။ တာဒိသံယေဝါတိ တံသရိက္ခကမေဝ။ ဒိဋ္ဌဓမ္မဝေဒနီယန္တိ တသ္မိံ ကမ္မေယေဝ ဒိဋ္ဌဓမ္မေ ဝိပစ္စိတဗ္ဗံ ဝိပါကဝါရံ လဘန္တံ ဒိဋ္ဌဓမ္မဝေဒနီယံ ဟောတိ။ နာဏုပိ ခါယတီတိ ဒုတိယေ အတ္တဘာဝေ အဏုပိ န ခါယတိ၊ အဏုမတ္တမ္ပိ ဒုတိယေ အတ္တဘာဝေ ဝိပါကံ န ဒေတီတိ အတ္ထော။ ဗဟုဒေဝါတိ ဗဟုကံ ပန ဝိပါကံ ကိမေဝ ဒဿတီတိ အဓိပ္ပာယော။ အဘာဝိတကာယောတိအာဒီဟိ ကာယဘာဝနာရဟိတော ဝဋ္ဋဂါမီ ပုထုဇ္ဇနော ဒဿိတော။ ပရိတ္တောတိ ပရိတ္တဂုဏော။ အပ္ပာတုမောတိ အာတုမာ ဝုစ္စတိ အတ္တဘာဝေါ၊ တသ္မိံ မဟန္တေပိ ဂုဏပရိတ္တတာယ အပ္ပာတုမောယေဝ။ အပ္ပဒုက္ခဝိဟာရီတိ အပ္ပကေနပိ ပါပေန ဒုက္ခဝိဟာရီ။ ဘာဝိတကာယောတိအာဒီဟိ ခီဏာသဝေါ ဒဿိတော။ သော ဟိ ကာယာနုပဿနာသင်္ခါတာယ ကာယဘာဝနာယ ဘာဝိတကာယော နာမ။ ကာယဿ ဝါ ဝဍ္ဎိတတ္တာ ဘာဝိတကာယော။ ဘာဝိတသီလောတိ ဝဍ္ဎိတသီလော။ သေသပဒဒွယေပိ ဧသေဝ နယော။ ပဉ္စဒွါရဘာဝနာယ ဝါ ဘာဝိတကာယော။ ဧတေန ဣန္ဒြိယသံဝရသီလံ ဝုတ္တံ၊ ဘာဝိတသီလောတိ ဣမိနာ သေသာနိ တီဏိ သီလာနိ။ အပရိတ္တောတိ န ပရိတ္တဂုဏော။ မဟတ္တောတိ အတ္တဘာဝေ ပရိတ္တေပိ ဂုဏမဟန္တတာယ မဟတ္တော။ အပ္ပမာဏဝိဟာရီတိ ခီဏာသဝဿေတံ နာမမေဝ။ သော ဟိ ပမာဏကရာနံ ရာဂါဒီနံ အဘာဝေန အပ္ပမာဏဝိဟာရီ နာမ။

ပရိတ္တေတိ ခုဒ္ဒကေ။ ဥဒကမလ္လကေတိ ဥဒကသရာဝေ။ ဩရဗ္ဘိကောတိ ဥရဗ္ဘသာမိကော။ ဥရဗ္ဘဃာတကောတိ သူနကာရော။ ဇာပေတုံ ဝါတိ ဓနဇာနိယာ ဇာပေတုံ။ ဈာပေတုန္တိပိ ပါဌော၊ အယမေဝတ္ထော။ ယထာပစ္စယံ ဝါ ကာတုန္တိ ယထာ ဣစ္ဆတိ၊ တထာ ကာတုံ။ ဥရဗ္ဘဓနန္တိ ဧဠကအဂ္ဃနကမူလံ။ သော ပနဿ သစေ ဣစ္ဆတိ၊ ဒေတိ။ နော စေ ဣစ္ဆတိ၊ ဂီဝါယံ ဂဟေတွာ နိက္ကဍ္ဎာပေတိ။ သေသံ ဝုတ္တနယေနေဝ ဝေဒိတဗ္ဗံ။ ဣမသ္မိံ ပန သုတ္တေ ဝဋ္ဋဝိဝဋ္ဋံ ကထိတန္တိ။

၁၀။ ပံသုဓောဝကသုတ္တဝဏ္ဏနာ

၁၀၂။ ဒသမေ ဓောဝတီတိ ဝိက္ခာလေတိ။ သန္ဓောဝတီတိ သုဋ္ဌု ဓောဝတိ၊ ပုနပ္ပုနံ ဓောဝတိ။ နိဒ္ဓါဝတီတိ နိဂ္ဂဏှိတွာ ဓောဝတိ။ အနိဒ္ဓန္တကသာဝန္တိ အနီဟတဒေါသံ အနပနီတကသာဝံ။ ပဘင်္ဂူတိ ပဘိဇ္ဇနသဘာဝံ၊ အဓိကရဏီယံ ဌပေတွာ မုဋ္ဌိကာယ ပဟဋမတ္တံ ဘိဇ္ဇတိ။ ပဋ္ဋိကာယာတိ သုဝဏ္ဏပဋ္ဋကာယ။ ဂီဝေယျကေတိ ဂီဝါလင်္ကာရေ။

အဓိစိတ္တန္တိ သမထဝိပဿနာစိတ္တံ။ အနုယုတ္တဿာတိ ဘာဝေန္တဿ။ သစေတသောတိ စိတ္တသမ္ပန္နော။ ဒဗ္ဗဇာတိကောတိ ပဏ္ဍိတဇာတိကော။ ကာမဝိတက္ကာဒီသု ကာမေ အာရဗ္ဘ ဥပ္ပန္နော ဝိတက္ကော ကာမဝိတက္ကော။ ဗျာပါဒဝိဟိံသသမ္ပယုတ္တာ ဝိတက္ကာ ဗျာပါဒဝိဟိံသဝိတက္ကာ နာမ။ ဉာတိဝိတက္ကာဒီသု ‘‘အမှာကံ ဉာတကာ ဗဟူ ပုညဝန္တာ’’တိအာဒိနာ နယေန ဉာတကေ အာရဗ္ဘ ဥပ္ပန္နော ဝိတက္ကော ဉာတိဝိတက္ကော။ ‘‘အသုကော ဇနပဒေါ ခေမော သုဘိက္ခော’’တိအာဒိနာ နယေန ဇနပဒမာရဗ္ဘ ဥပ္ပန္နော ဝိတက္ကော ဇနပဒဝိတက္ကော။ ‘‘အဟော ဝတ မံ ပရေ န အဝဇာနေယျု’’န္တိ ဧဝံ ဥပ္ပန္နော ဝိတက္ကော အနဝညတ္တိပဋိသံယုတ္တော ဝိတက္ကော နာမ။ ဓမ္မဝိတက္ကာဝသိဿန္တီတိ ဓမ္မဝိတက္ကာ နာမ ဒသဝိပဿနုပက္ကိလေသဝိတက္ကာ။ သော ဟောတိ သမာဓိ န စေဝ သန္တောတိ သော အဝသိဋ္ဌဓမ္မဝိတက္ကော ဝိပဿနာသမာဓိ အဝူပသန္တကိလေသတ္တာ သန္တော န ဟောတိ။ န ပဏီတောတိ န အတပ္ပကော။ နပ္ပဋိပ္ပဿဒ္ဓိလဒ္ဓါတိ န ကိလေသပဋိပ္ပဿဒ္ဓိယာ လဒ္ဓါ။ န ဧကောဒိဘာဝါဓိဂတောတိ န ဧကဂ္ဂဘာဝပ္ပတ္တော။ သသင်္ခါရနိဂ္ဂယှဝါရိတဂတောတိ သသင်္ခါရေန သပ္ပယောဂေန ကိလေသေ နိဂ္ဂဏှိတွာ ဝါရေတွာ ဝါရိတော၊ န ကိလေသာနံ ဆိန္နန္တေ ဥပ္ပန္နော၊ ကိလေသေ ပန ဝါရေတွာ ဥပ္ပန္နော။

ဟောတိသော၊ ဘိက္ခဝေ၊ သမယောတိ ဧတ္ထ သမယော နာမ ဥတုသပ္ပာယံ အာဟာရသပ္ပာယံ သေနာသနသပ္ပာယံ ပုဂ္ဂလသပ္ပာယံ ဓမ္မဿဝနသပ္ပာယန္တိ ဣမေသံ ပဉ္စန္နံ သပ္ပာယာနံ ပဋိလာဘကာလော။ ယံ တံ စိတ္တန္တိ ယသ္မိံ သမယေ တံ ဝိပဿနာစိတ္တံ။ အဇ္ဈတ္တံယေဝ သန္တိဋ္ဌတီတိ အတ္တနိယေဝ တိဋ္ဌတိ။ နိယကဇ္ဈတ္တဉှိ ဣဓ အဇ္ဈတ္တံ နာမ။ ဂေါစရဇ္ဈတ္တမ္ပိ ဝဋ္ဋတိ။ ပုထုတ္တာရမ္မဏံ ပဟာယ ဧကသ္မိံ နိဗ္ဗာနဂေါစရေယေဝ တိဋ္ဌတီတိ ဝုတ္တံ ဟောတိ။ သန္နိသီဒတီတိ သုဋ္ဌု နိသီဒတိ။ ဧကောဒိ ဟောတီတိ ဧကဂ္ဂံ ဟောတိ။ သမာဓိယတီတိ သမ္မာ အာဓိယတိ။ သန္တောတိအာဒီသု ပစ္စနီကကိလေသဝူပသမေန သန္တော။ အတပ္ပကဋ္ဌေန ပဏီတော။ ကိလေသပဋိပ္ပဿဒ္ဓိယာ လဒ္ဓတ္တာ ပဋိပ္ပဿဒ္ဓလဒ္ဓါ။ ဧကဂ္ဂဘာဝံ ဂတတ္တာ ဧကောဒိဘာဝါဓိဂတော။ ကိလေသာနံ ဆိန္နန္တေ ဥပ္ပန္နတ္တာ န သပ္ပယောဂေန ကိလေသေ နိဂ္ဂဏှိတွာ ဝါရေတွာ ဝါရိတောတိ န သသင်္ခါရနိဂ္ဂယှဝါရိတဂတော။ ဧတ္တာဝတာ အယံ ဘိက္ခု ဝိဝဋ္ဋေတွာ အရဟတ္တံ ပတ္တော နာမ ဟောတိ။

ဣဒါနိ ခီဏာသဝဿ သတော အဘိညာပဋိပဒံ ဒဿေန္တော ယဿ ယဿ စာတိအာဒိမာဟ။ တတ္ထ အဘိညာ သစ္ဆိကရဏီယဿာတိ အဘိဇာနိတွာ ပစ္စက္ခံ ကာတဗ္ဗဿ။ သတိ သတိအာယတနေတိ ပုဗ္ဗဟေတုသင်္ခါတေ စေဝ ဣဒါနိ စ ပဋိလဒ္ဓဗ္ဗေ အဘိညာပါဒကဇ္ဈာနာဒိဘေဒေ စ သတိ သတိကာရဏေ။ ဝိတ္ထာရတော ပန အယံ အဘိညာကထာ ဝိသုဒ္ဓိမဂ္ဂေ (ဝိသုဒ္ဓိ။ ၂။၃၆၅ အာဒယော) ဝုတ္တနယေနေဝ ဝေဒိတဗ္ဗာ။ အာသဝါနံ ခယာတိအာဒိ စေတ္ထ ဖလသမာပတ္တိဝသေန ဝုတ္တန္တိ ဝေဒိတဗ္ဗံ။

၁၁။ နိမိတ္တသုတ္တဝဏ္ဏနာ

၁၀၃။ ဧကာဒသမေပိ အဓိစိတ္တံ သမထဝိပဿနာစိတ္တမေဝ။ တီဏိ နိမိတ္တာနီတိ တီဏိ ကာရဏာနိ။ ကာလေန ကာလန္တိ ကာလေ ကာလေ၊ ယုတ္တကာလေတိ အတ္ထော။ ကာလေန ကာလံ သမာဓိနိမိတ္တံ မနသိကာတဗ္ဗန္တိအာဒီသု တံ တံ ကာလံ သလ္လက္ခေတွာ ဧကဂ္ဂတာယ ယုတ္တကာလေ ဧကဂ္ဂတာ မနသိကာတဗ္ဗာ။ ဧကဂ္ဂတာ ဟိ ဣဓ သမာဓိနိမိတ္တန္တိ ဝုတ္တာ။ တတြ ဝစနတ္ထော – သမာဓိယေဝ နိမိတ္တံ သမာဓိနိမိတ္တံ။ သေသပဒဒွယေပိ ဧသေဝ နယော။ ပဂ္ဂဟောတိ ပန ဝီရိယဿ နာမံ၊ ဥပေက္ခာတိ မဇ္ဈတ္တဘာဝဿ။ တသ္မာ ဝီရိယဿ ယုတ္တကာလေ ဝီရိယံ မနသိကာတဗ္ဗံ၊ မဇ္ဈတ္တဘာဝဿ ယုတ္တကာလေ မဇ္ဈတ္တဘာဝေ ဌာတဗ္ဗန္တိ။ ဌာနံ တံ စိတ္တံ ကောသဇ္ဇာယ သံဝတ္တေယျာတိ ကာရဏံ ဝိဇ္ဇတိ ယေန တံ စိတ္တံ ကောသဇ္ဇဘာဝေ တိဋ္ဌေယျ။ ဣတရေသုပိ ဧသေဝ နယော။ ဥပေက္ခာနိမိတ္တံယေဝ မနသိ ကရေယျာတိ ဧတ္ထ စ ဉာဏဇဝံ ဥပေက္ခေယျာတိ အယမတ္ထော။ အာသဝါနံ ခယာယာတိ အရဟတ္တဖလတ္ထာယ။

ဥက္ကံ ဗန္ဓေယျာတိ အင်္ဂါရကပလ္လံ သဇ္ဇေယျ။ အာလိမ္ပေယျာတိ တတ္ထ အင်္ဂါရေ ပက္ခိပိတွာ အဂ္ဂိံ ဒတွာ နာဠိကာယ ဓမန္တော အဂ္ဂိံ ဂါဟာပေယျ။ ဥက္ကာမုခေ ပက္ခိပေယျာတိ အင်္ဂါရေ ဝိယူဟိတွာ အင်္ဂါရမတ္ထကေ ဝါ ဌပေယျ၊ မူသာယ ဝါ ပက္ခိပေယျ။ အဇ္ဈုပေက္ခတီတိ ပက္ကာပက္ကဘာဝံ ဥပဓာရေတိ။

သမ္မာ သမာဓိယတိ အာသဝါနံ ခယာယာတိ အရဟတ္တဖလတ္ထာယ သမ္မာ ဌပီယတိ။ ဧတ္တာဝတာ ဟိ ဝိပဿနံ ဝဍ္ဎေတွာ အရဟတ္တပ္ပတ္တော ဘိက္ခု ဒဿိတော။ ဣဒါနိ တဿ ခီဏာသဝဿ အဘိညာယ ပဋိပဒံ ဒဿေန္တော ယဿ ယဿ စာတိအာဒိမာဟ။ တံ ဟေဋ္ဌာ ဝုတ္တနယေနေဝ ဝေဒိတဗ္ဗံ။

လောဏကပလ္လဝဂ္ဂေါ ပဉ္စမော။

ဒုတိယပဏ္ဏာသကံ နိဋ္ဌိတံ။

၃။ တတိယပဏ္ဏာသကံ