📜

၅။ ရောဟိတဿဝဂ္ဂေါ

၁။ သမာဓိဘာဝနာသုတ္တဝဏ္ဏနာ

၄၁။ ပဉ္စမဿ ပဌမေ ဉာဏဒဿနပ္ပဋိလာဘာယာတိ ဒိဗ္ဗစက္ခုဉာဏဒဿနဿ ပဋိလာဘာယ။ ဒိဝါသညံ အဓိဋ္ဌာတီတိ ဒိဝါတိ ဧဝံ သညံ အဓိဋ္ဌာတိ။ ယထာ ဒိဝါ တထာ ရတ္တိန္တိ ယထာ ဒိဝါ အာလောကသညာ မနသိ ကတာ၊ တထေဝ တံ ရတ္တိမ္ပိ မနသိ ကရောတိ။ ဒုတိယပဒေပိ ဧသေဝ နယော။ သပ္ပဘာသန္တိ ဒိဗ္ဗစက္ခုဉာဏောဘာသေန သဟောဘာသံ။ ကိဉ္စာပိ အာလောကသဒိသံ ကတံ၊ အတ္ထော ပနေတ္ထ န ဧဝံ သလ္လက္ခေတဗ္ဗော။ ဒိဗ္ဗစက္ခုဉာဏာလောကော ဟိ ဣဓာဓိပ္ပေတော။

ဝိဒိတာတိ ပါကဋာ ဟုတွာ။ ကထံ ပန ဝေဒနာ ဝိဒိတာ ဥပ္ပဇ္ဇန္တိ၊ ဝိဒိတာ အဗ္ဘတ္ထံ ဂစ္ဆန္တီတိ? ဣဓ ဘိက္ခု ဝတ္ထုံ ပရိဂ္ဂဏှာတိ၊ အာရမ္မဏံ ပရိဂ္ဂဏှာတိ။ တဿ ပရိဂ္ဂဟိတဝတ္ထာရမ္မဏတာယ တာ ဝေဒနာ ‘‘ဧဝံ ဥပ္ပဇ္ဇိတွာ ဧဝံ ဌတွာ ဧဝံ နိရုဇ္ဈန္တီ’’တိ ဝိဒိတာ ဥပ္ပဇ္ဇန္တိ၊ ဝိဒိတာ တိဋ္ဌန္တိ၊ ဝိဒိတာ အဗ္ဘတ္ထံ ဂစ္ဆန္တိ နာမ။ သညာဝိတက္ကေသုပိ ဧသေဝ နယော။

ဥဒယဗ္ဗယာနုပဿီတိ ဥဒယဉ္စ ဝယဉ္စ ပဿန္တော။ ဣတိ ရူပန္တိ ဧဝံ ရူပံ ဧတ္တကံ ရူပံ န ဣတော ပရံ ရူပံ အတ္ထီတိ။ ဣတိ ရူပဿ သမုဒယောတိ ဧဝံ ရူပဿ ဥပ္ပာဒေါ။ အတ္ထင်္ဂမောတိ ပန ဘေဒေါ အဓိပ္ပေတော။ ဝေဒနာဒီသုပိ ဧသေဝ နယော။ ဣဒဉ္စ ပန မေတံ၊ ဘိက္ခဝေ၊ သန္ဓာယ ဘာသိတန္တိ၊ ဘိက္ခဝေ၊ ယံ မယာ ဧတံ ပုဏ္ဏကပဉှေ ‘‘သင်္ခါယ လောကသ္မိ’’န္တိအာဒိ ဘာသိတံ၊ တံ ဣဒံ ဖလသမာပတ္တိံ သန္ဓာယ ဘာသိတန္တိ အတ္ထော။

တတ္ထ သင်္ခါယာတိ ဉာဏေန ဇာနိတွာ။ လောကသ္မိန္တိ သတ္တလောကေ။ ပရောပရာနီတိ ဥစ္စာဝစာနိ ဥတ္တမာဓမာနိ။ ဣဉ္ဇိတန္တိ စလိတံ။ နတ္ထိ ကုဟိဉ္စိ လောကေတိ လောကသ္မိံ ကတ္ထစိ ဧကက္ခန္ဓေပိ ဧကာယတနေပိ ဧကဓာတုယာပိ ဧကာရမ္မဏေပိ နတ္ထိ။ သန္တောတိ ပစ္စနီကကိလေသဝူပသမေန သန္တော။ ဝိဓူမောတိ ကောဓဓူမေန ဝိဂတဓူမော။ ဧဝမေတ္ထ သုတ္တန္တေ မဂ္ဂေကဂ္ဂတမ္ပိ ကထေတွာ ဂါထာယ ဖလသမာပတ္တိယေဝ ကထိတာတိ။

၂။ ပဉှဗျာကရဏသုတ္တဝဏ္ဏနာ

၄၂။ ဒုတိယေ ယော စ တေသံ တတ္ထ တတ္ထ၊ ဇာနာတိ အနုဓမ္မတန္တိ ယော ဧတေသံ ပဉှာနံ တသ္မိံ တသ္မိံ ဌာနေ ဗျာကရဏံ ဇာနာတိ။ စတုပဉှဿ ကုသလော၊ အာဟု ဘိက္ခုံ တထာဝိဓန္တိ တထာဝိဓံ ဘိက္ခုံ တေသု စတူသု ပဉှေသု ကုသလောတိ ဧဝံ ဝဒန္တိ။ ဒုရာသဒေါ ဒုပ္ပသဟောတိ ပရေဟိ ဃဋ္ဋေတုံ ဝါ အဘိဘဝိတုံ ဝါ န သက္ကာ။ ဂမ္ဘီရောတိ သတ္တသီဒန္တရမဟာသမုဒ္ဒေါ ဝိယ ဂမ္ဘီရော။ ဒုပ္ပဓံသိယောတိ ဒုမ္မောစာပယော၊ ဂဟိတဂ္ဂဟဏံ ဝိဿဇ္ဇာပေတုံ န သက္ကာတိ အတ္ထော။ အတ္ထေ အနတ္ထေ စာတိ ဝဍ္ဎိယဉ္စ အဝဍ္ဎိယဉ္စ။ အတ္ထာဘိသမယာတိ အတ္ထသမာဂမေန။ ဓီရော ပဏ္ဍိတောတိ ပဝုစ္စတီတိ ဓိတိသမ္ပန္နော ပုဂ္ဂလော ‘‘ပဏ္ဍိတော အယ’’န္တိ ဧဝံ ပဝုစ္စတိ။

၃-၄။ ကောဓဂရုသုတ္တဒွယဝဏ္ဏနာ

၄၃-၄၄။ တတိယေ ကောဓဂရု န သဒ္ဓမ္မဂရူတိ ကောဓံ ဂါရဝေန ဂရုံ ကတွာ ဂဏှာတိ၊ န သဒ္ဓမ္မံ၊ သဒ္ဓမ္မံ ပန အဂါရဝေန လာမကံ ကတွာ ဂဏှာတိ။ သေသပဒေသုပိ ဧသေဝ နယော။

ဝိရူဟန္တီတိ ဝဍ္ဎန္တိ၊ သဉ္ဇာတမူလာယ ဝါ သဒ္ဓါယ ပတိဋ္ဌဟန္တိ အစလာ ဘဝန္တိ။ စတုတ္ထေ ကောဓဂရုတာတိ ကောဓမှိ သဂါရဝတာ။ ဧသ နယော သဗ္ဗတ္ထ။

၅။ ရောဟိတဿသုတ္တဝဏ္ဏနာ

၄၅။ ပဉ္စမေ ယတ္ထာတိ စက္ကဝါဠလောကဿ ဧကောကာသေ ဘုမ္မံ။ န စဝတိ န ဥပပဇ္ဇတီတိ ဣဒံ အပရာပရံ စုတိပဋိသန္ဓိဝသေန ဂဟိတံ။ ဂမနေနာတိ ပဒဂမနေန။ လောကဿ အန္တန္တိ သတ္ထာ သင်္ခါရလောကဿ အန္တံ သန္ဓာယ ဝဒတိ။ ဉာတေယျန္တိအာဒီသု ဉာတဗ္ဗံ ဒဋ္ဌဗ္ဗံ ပတ္တဗ္ဗန္တိ အတ္ထော။ ဣတိ ဒေဝပုတ္တေန စက္ကဝါဠလောကဿ အန္တော ပုစ္ဆိတော၊ သတ္ထာရာ သင်္ခါရလောကဿ ကထိတော ။ သော ပန ‘‘အတ္တနော ပဉှေန သဒ္ဓိံ သတ္ထု ဗျာကရဏံ သမေတီ’’တိ သညာယ သမ္ပဟံသန္တော အစ္ဆရိယန္တိအာဒိမာဟ။

ဒဠှဓမ္မာတိ ဒဠှဓနု ဥတ္တမပ္ပမာဏေန ဓနုနာ သမန္နာဂတော။ ဓနုဂ္ဂဟောတိ ဓနုအာစရိယော။ သိက္ခိတောတိ ဒွါဒသ ဝဿာနိ ဓနုသိပ္ပံ သိက္ခိတော။ ကတဟတ္ထောတိ ဥသဘပ္ပမာဏေပိ ဝါလဂ္ဂံ ဝိဇ္ဈိတုံ သမတ္ထဘာဝေန ကတဟတ္ထော။ ကတူပါသနောတိ ကတသရက္ခေပေါ ဒဿိတသိပ္ပော။ အသနေနာတိ ကဏ္ဍေန။ အတိပါတေယျာတိ အတိက္ကမေယျ။ ယာဝတာ သော တာလစ္ဆာဒိံ အတိက္ကမေယျ၊ တာဝတာ ကာလေန ဧကံ စက္ကဝါဠံ အတိက္ကမာမီတိ အတ္တနော ဇဝသမ္ပတ္တိံ ဒဿေတိ။

ပုရတ္ထိမာ သမုဒ္ဒါ ပစ္ဆိမောတိ ယထာ ပုရတ္ထိမာ သမုဒ္ဒါ ပစ္ဆိမသမုဒ္ဒေါ ဒူရေ၊ ဧဝံ မေ ဒူရေ ပဒဝီတိဟာရော အဟောသီတိ ဝဒတိ။ သော ကိရ ပါစီနစက္ကဝါဠမုခဝဋ္ဋိယံ ဌိတော ပါဒံ ပသာရေတွာ ပစ္ဆိမစက္ကဝါဠမုခဝဋ္ဋိံ အတိက္ကမတိ၊ ပုန ဒုတိယပါဒံ ပသာရေတွာ ပရစက္ကဝါဠမုခဝဋ္ဋိံ အတိက္ကမတိ။ ဣစ္ဆာဂတန္တိ ဣစ္ဆာ ဧဝ။ အညတြေဝါတိ နိပ္ပပဉ္စတံ ဒဿေတိ။ ဘိက္ခာစာရကာလေ ကိရေသ နာဂလတာဒန္တကဋ္ဌံ ခါဒိတွာ အနောတတ္တေ မုခံ ဓောဝိတွာ ကာလေ သမ္ပတ္တေ ဥတ္တရကုရုမှိ ပိဏ္ဍာယ စရိတွာ စက္ကဝါဠမုခဝဋ္ဋိယံ နိသိန္နော ဘတ္တကိစ္စံ ကရောတိ၊ တတ္ထ မုဟုတ္တံ ဝိဿမိတွာ ပုန ဇဝတိ။ ဝဿသတာယုကောတိ တဒါ ဒီဃာယုကကာလော ဟောတိ၊ အယံ ပန ဝဿသတာဝသိဋ္ဌေ အာယုမှိ ဂမနံ အာရဘိ။ ဝဿသတဇီဝီတိ တံ ဝဿသတံ အနန္တရာယေန ဇီဝန္တော။ အန္တရာယေဝ ကာလင်္ကတောတိ စက္ကဝါဠလောကဿ အန္တံ အပ္ပတွာ အန္တရာဝ မတော။ သော ပန တတ္ထ ကာလံ ကတွာပိ အာဂန္တွာ ဣမသ္မိံယေဝ စက္ကဝါဠေ နိဗ္ဗတ္တိ။

အပ္ပတွာတိ သင်္ခါရလောကဿ အန္တံ အပ္ပတွာ။ ဒုက္ခဿာတိ ဝဋ္ဋဒုက္ခဿ။ အန္တကိရိယန္တိ ပရိယန္တကရဏံ။ ကဠေဝရေတိ အတ္တဘာဝေ။ သသညိမှိ သမနကေတိ သသညေ သစိတ္တကေ။ လောကန္တိ ဒုက္ခသစ္စံ။ လောကသမုဒယန္တိ သမုဒယသစ္စံ။ လောကနိရောဓန္တိ နိရောဓသစ္စံ။ ပဋိပဒန္တိ မဂ္ဂသစ္စံ။ ဣတိ ‘‘နာဟံ၊ အာဝုသော၊ ဣမာနိ စတ္တာရိ သစ္စာနိ တိဏကဋ္ဌာဒီသု ပညပေမိ၊ ဣမသ္မိံ ပန စတုမဟာဘူတိကေ ကာယသ္မိံယေဝ ပညပေမီ’’တိ ဒဿေတိ။ သမိတာဝီတိ သမိတပါပေါ။ နာသီသတီတိ န ပတ္ထေတိ။ ဆဋ္ဌံ ဥတ္တာနတ္ထမေဝါတိ။

၇။ သုဝိဒူရသုတ္တဝဏ္ဏနာ

၄၇။ သတ္တမေ သုဝိဒူရဝိဒူရာနီတိ ကေနစိ ပရိယာယေန အနာသန္နာနိ ဟုတွာ သုဝိဒူရာနေဝ ဝိဒူရာနိ။ နဘဉ္စ၊ ဘိက္ခဝေ၊ ပထဝီ စာတိ အာကာသဉ္စ မဟာပထဝီ စ။ တတ္ထ ကိဉ္စာပိ ပထဝိတော အာကာသံ နာမ န ဒူရေ၊ ဒွင်္ဂုလမတ္တေပိ ဟောတိ။ အညမညံ အလဂ္ဂနဋ္ဌေန ပန ‘‘သုဝိဒူရဝိဒူရေ’’တိ ဝုတ္တံ။ ဝေရောစနောတိ သူရိယော။ သတဉ္စ၊ ဘိက္ခဝေ၊ ဓမ္မောတိ စတုသတိပဋ္ဌာနာဒိဘေဒေါ သတ္တတိံသဗောဓိပက္ခိယဓမ္မော။ အသတဉ္စ ဓမ္မောတိ ဒွါသဋ္ဌိဒိဋ္ဌိဂတဘေဒေါ အဿဒ္ဓမ္မော။

ပဘင်္ကရောတိ အာလောကကရော။ အဗျာယိကော ဟောတီတိ အဝိဂစ္ဆနသဘာဝေါ ဟောတိ။ သတံ သမာဂမောတိ ပဏ္ဍိတာနံ မိတ္တသန္ထဝဝသေန သမာဂမော။ ယာဝါပိတိဋ္ဌေယျာတိ ယတ္တကံ အဒ္ဓါနံ တိဋ္ဌေယျ။ တထေဝ ဟောတီတိ တာဒိသောဝ ဟောတိ၊ ပကတိံ န ဇဟတိ။ ခိပ္ပံ ဟိ ဝေတီတိ သီဃံ ဝိဂစ္ဆတိ။

၈။ ဝိသာခသုတ္တဝဏ္ဏနာ

၄၈။ အဋ္ဌမေ ပဉ္စာလပုတ္တောတိ ပဉ္စာလဗြာဟ္မဏိယာ ပုတ္တော။ ပေါရိယာ ဝါစာယာတိ ပရိပုဏ္ဏဝါစာယ။ ဝိဿဋ္ဌာယာတိ အပလိဗုဒ္ဓါယ။ အနေလဂလာယာတိ နိဒ္ဒေါသာယ စေဝ အဂဠိတာယ စ အပတိတပဒဗျဉ္ဇနာယ။ ပရိယာပန္နာယာတိ ဝိဝဋ္ဋပရိယာပန္နာယ။ အနိဿိတာယာတိ ဝဋ္ဋံ အနိဿိတာယ။ ဝိဝဋ္ဋနိဿိတမေဝ ကတွာ ကထေတိ၊ ဝဋ္ဋနိဿိတံ ကတွာ န ကထေတီတိ အယမေတ္ထ အဓိပ္ပာယော။

နာဘာသမာနန္တိ န အကထေန္တံ။ အမတံ ပဒန္တိ နိဗ္ဗာနပဒံ။ ဘာသယေတိ ဩဘာသေယျ။ ဇောတယေတိ တဿေဝ ဝေဝစနံ။ ပဂ္ဂဏှေ ဣသိနံ ဓဇန္တိ အဗ္ဘုဂ္ဂတဋ္ဌေန နဝလောကုတ္တရဓမ္မော ဣသီနံ ဓဇော နာမ ဝုစ္စတိ၊ တမေဝ ပဂ္ဂဏှေယျ ဥက္ခိပေယျ၊ ဥစ္စံ ကတွာ ကထေယျာတိ အတ္ထော။ နဝလောကုတ္တရဓမ္မဒီပကံ သုဘာသိတံ ဓဇော ဧတေသန္တိ သုဘာသိတဓဇာ။ ဣသယောတိ ဗုဒ္ဓါဒယော အရိယာ။ ဓမ္မော ဟိ ဣသိနံ ဓဇောတိ ဟေဋ္ဌာ ဝုတ္တနယေနေဝ လောကုတ္တရဓမ္မော ဣသီနံ ဓဇော နာမာတိ။

၉။ ဝိပလ္လာသသုတ္တဝဏ္ဏနာ

၄၉။ နဝမေ သညာဝိပလ္လာသာတိ သညာယ ဝိပလ္လတ္ထဘာဝါ၊ စတဿော ဝိပရီတသညာယောတိ အတ္ထော။ သေသပဒဒွယေပိ ဧသေဝ နယော။ အနိစ္စေ၊ ဘိက္ခဝေ၊ နိစ္စန္တိ သညာဝိပလ္လာသောတိ အနိစ္စေ ဝတ္ထုသ္မိံ ‘‘နိစ္စံ ဣဒ’’န္တိ ဧဝံ ဂဟေတွာ ဥပ္ပဇ္ဇနကသညာ၊ သညာဝိပလ္လာသောတိ အတ္ထော။ ဣမိနာ နယေန သဗ္ဗပဒေသု အတ္ထော ဝေဒိတဗ္ဗော။

အနတ္တနိ စ အတ္တာတိ အနတ္တနိ ‘‘အတ္တာ’’တိ ဧဝံသညိနောတိ အတ္ထော။ မိစ္ဆာဒိဋ္ဌိဟတာတိ န ကေဝလံ သညိနောဝ၊ သညာယ ဝိယ ဥပ္ပဇ္ဇမာနာယ မိစ္ဆာဒိဋ္ဌိယာပိ ဟတာ။ ခိတ္တစိတ္တာတိ တေ သညာဒိဋ္ဌိယော ဝိယ ဥပ္ပဇ္ဇမာနေန ခိတ္တေန စိတ္တေန သမန္နာဂတာ။ ဝိသညိနောတိ ဒေသနာမတ္တမေတံ၊ ဝိပရီတသညာစိတ္တဒိဋ္ဌိနောတိ အတ္ထော။ တေ ယောဂယုတ္တာ မာရဿာတိ တေ မာရဿ ယောဂေ ယုတ္တာ နာမ ဟောန္တိ။ အယောဂက္ခေမိနောတိ စတူဟိ ယောဂေဟိ ခေမံ နိဗ္ဗာနံ အပ္ပတ္တာ။ သတ္တာတိ ပုဂ္ဂလာ။ ဗုဒ္ဓါတိ စတုသစ္စဗုဒ္ဓါ။ ဣမံ ဓမ္မန္တိ စတုသစ္စဓမ္မံ။ သစိတ္တံ ပစ္စလဒ္ဓါတိ သကံ စိတ္တံ ပဋိလဘိတွာ။ အနိစ္စတော ဒက္ခုန္တိ အနိစ္စဘာဝေန အဒ္ဒသံသု။ အသုဘတဒ္ဒသုန္တိ အသုဘံ အသုဘတောယေဝ အဒ္ဒသံသု။ သမ္မာဒိဋ္ဌိသမာဒါနာတိ ဂဟိတသမ္မာဒဿနာ။ သဗ္ဗံ ဒုက္ခံ ဥပစ္စဂုန္တိ သကလံ ဝဋ္ဋဒုက္ခံ သမတိက္ကန္တာ။

၁၀။ ဥပက္ကိလေသသုတ္တဝဏ္ဏနာ

၅၀။ ဒသမေ ဥပက္ကိလေသာတိ ဝိရောစိတုံ အဒတွာ ဥပက္ကိလိဋ္ဌဘာဝကရဏေန ဥပက္ကိလေသာ။ မဟိကာတိ ဟိမံ။ ဓူမော ရဇောတိ ဓူမော စ ရဇော စ။ ရာဟူတိ ပုရိမာ တယော အသမ္ပတ္တဥပက္ကိလေသာ၊ ရာဟု ပန သမ္ပတ္တဥပက္ကိလေသဝသေန ကထိတောတိ ဝေဒိတဗ္ဗော။ သမဏဗြာဟ္မဏာ န တပန္တိ န ဘာသန္တိ န ဝိရောစန္တီတိ ဂုဏပ္ပတာပေန န တပန္တိ၊ ဂုဏောဘာသေန န ဘာသန္တိ၊ ဂုဏဝိရောစနေန န ဝိရောစန္တိ။ သုရာမေရယပါနာ အပ္ပဋိဝိရတာတိ ပဉ္စဝိဓာယ သုရာယ စတုဗ္ဗိဓဿ မေရယဿ စ ပါနတော အဝိရတာ။

အဝိဇ္ဇာနိဝုတာတိ အဝိဇ္ဇာယ နိဝါရိတာ ပိဟိတာ။ ပိယရူပါဘိနန္ဒိနောတိ ပိယရူပံ သာတရူပံ အဘိနန္ဒမာနာ တုဿမာနာ။ သာဒိယန္တီတိ ဂဏှန္တိ။ အဝိဒ္ဒသူတိ အန္ဓဗာလာ။ သနေတ္တိကာတိ တဏှာယောတ္တေနေဝ သယောတ္တာ။ ကဋသိန္တိ အတ္တဘာဝံ။ ဃောရန္တိ ကက္ခဠံ။ ဣမသ္မိံ သုတ္တေပိ ဂါထာသုပိ ဝဋ္ဋမေဝ ကထိတန္တိ။

ရောဟိတဿဝဂ္ဂေါ ပဉ္စမော။

ပဌမပဏ္ဏာသကံ နိဋ္ဌိတံ။

၂။ ဒုတိယပဏ္ဏာသကံ