📜

(၂၆) ၆။ အဘိညာဝဂ္ဂေါ

၁-၃။ အဘိညာသုတ္တာဒိဝဏ္ဏနာ

၂၅၄-၂၅၆။ ဆဋ္ဌဿ ပဌမေ အဘိညာယာတိ ဇာနိတွာ။ သမထော စ ဝိပဿနာ စာတိ စိတ္တေကဂ္ဂတာ စ သင်္ခါရပရိဂ္ဂဟဝိပဿနာဉာဏဉ္စ။ ဝိဇ္ဇာ စ ဝိမုတ္တိ စာတိ မဂ္ဂဉာဏဝိဇ္ဇာ စ သေသာ သမ္ပယုတ္တကဓမ္မာ စ။ ဒုတိယေ အနရိယပရိယေသနာတိ အနရိယာနံ ဧသနာ ဂဝေသနာ။ ဇရာဓမ္မန္တိ ဇရာသဘာဝံ။ သေသေသုပိ ဧသေဝ နယော။ တတိယံ ဥတ္တာနမေဝ။

၄။ မာလုကျပုတ္တသုတ္တဝဏ္ဏနာ

၂၅၇။ စတုတ္ထေ မာလုကျပုတ္တောတိ မာလုကျဗြာဟ္မဏိယာ ပုတ္တော။ ဧတ္ထာတိ ဧတသ္မိံ တဝ ဩဝါဒယာစနေ။ ဣမိနာ ထေရံ အပသာဒေတိပိ ဥဿာဒေတိပိ။ ကထံ? အယံ ကိရ ဒဟရကာလေ ပစ္စယေသု လဂ္ဂေါ ဟုတွာ ပစ္ဆာ မဟလ္လကကာလေ အရညဝါသံ ပတ္ထေန္တော ကမ္မဋ္ဌာနံ ယာစတိ။ အထ ဘဂဝါ ‘‘ဧတ္ထ ဒဟရေ ကိံ ဝက္ခာမ၊ မာလုကျပုတ္တော ဝိယ တုမှေပိ တရုဏကာလေ ပစ္စယေသု လဂ္ဂိတွာ မဟလ္လကကာလေ အရညံ ပဝိသိတွာ သမဏဓမ္မံ ကရေယျာထာ’’တိ ဣမိနာ အဓိပ္ပာယေန ဘဏန္တော ထေရံ အပသာဒေတိ နာမ။ ယသ္မာ ပန ထေရော မဟလ္လကကာလေဝ အရညံ ပဝိသိတွာ သမဏဓမ္မံ ကာတုကာမော၊ တသ္မာ ဘဂဝါ ‘‘ဧတ္ထ ဒဟရေ ကိံ ဝက္ခာမ၊ အယံ အမှာကံ မာလုကျပုတ္တော မဟလ္လကကာလေပိ အရညံ ပဝိသိတွာ သမဏဓမ္မံ ကာတုကာမော ကမ္မဋ္ဌာနံ ယာစတိ။ တုမှေ တာဝ တရုဏကာလေပိ ဝီရိယံ န ကရောထာ’’တိ ဣမိနာ အဓိပ္ပာယေန ဘဏန္တော ထေရံ ဥဿာဒေတိ နာမာတိ ယောဇနာ။

၅-၁၀။ ကုလသုတ္တာဒိဝဏ္ဏနာ

၂၅၈-၂၆၃။ ပဉ္စမေ အာဓိပစ္စေ ဌပေန္တီတိ ဘဏ္ဍာဂါရိကဋ္ဌာနေ ဌပေန္တိ။ ဆဋ္ဌေ ဝဏ္ဏသမ္ပန္နောတိ သရီရဝဏ္ဏေန သမန္နာဂတော။ ဗလသမ္ပန္နောတိ ကာယဗလေန သမန္နာဂတော။ ဘိက္ခုဝါရေ ဝဏ္ဏသမ္ပန္နောတိ ဂုဏဝဏ္ဏေန သမန္နာဂတော။ ဗလသမ္ပန္နောတိ ဝီရိယဗလေန သမန္နာဂတော။ ဇဝသမ္ပန္နောတိ ဉာဏဇဝေန သမန္နာဂတော။ သတ္တမေပိ ဧသေဝ နယော။ သေသမေတ္ထ ဥတ္တာနမေဝါတိ။

အဘိညာဝဂ္ဂေါ ဆဋ္ဌော။