📜

(၁၆) ၆။ အစေလကဝဂ္ဂဝဏ္ဏနာ

၁၅၇-၁၆၃။ ဣတော ပရေသု ပန သုတ္တပဒေသု ‘‘ဂါဠှာ’’တိ ဝုတ္တမတ္ထံ ဝိဝရန္တော ‘‘ကက္ခဠာ’’တိ အာဟ။ ကက္ခဠစာရော စဿာ န လူခသဘာဝေါ။ အထ ခေါ တဏှာဝသေန ထိရဂ္ဂဟဏန္တိ အာဟ ‘‘လောဘဝသေန ထိရဂ္ဂဟဏာ’’တိ။ အဂါဠှာ ပဋိပဒါတိ ဝါ ကာမာနံ ဩဂါဟနံ ပဋိပတ္တိ၊ ကာမသုခါနုယောဂေါတိ အတ္ထော။ နိဇ္ဈာမာ ပဋိပဒါတိ ကာယဿ နိဇ္ဈာပနဝသေန ခေပနဝသေန ပဝတ္တာ ပဋိပတ္တိ၊ အတ္တကိလမထာနုယောဂေါတိ အတ္ထော။ နိစ္စေလောတိ နိဿဋ္ဌစေလော သဗ္ဗေန သဗ္ဗံ ပဋိက္ခိတ္တစေလော။ နဂ္ဂိယဝတသမာဒါနေန နဂ္ဂေါ။ ဌိတကောဝ ဥစ္စာရံ ကရောတီတိအာဒိ နိဒဿနမတ္တံ ဝမိတွာ မုခဝိက္ခာလနာဒိအာစာရဿပိ တေန ဝိဿဋ္ဌတ္တာ။ ဇိဝှာယ ဟတ္ထံ အပလေခတိ အဝလေခတိ ဥဒကေန အဓောဝနတော။ ဒုတိယဝိကပ္ပေပိ ဧသေဝ နယော။ ‘‘ဧဟိ၊ ဘဒန္တေ’’တိ ဝုတ္တေ ဥပဂမနသင်္ခါတော ဝိဓိ ဧဟိဘဒန္တော၊ တံ စရတီတိ ဧဟိဘဒန္တိကော၊ တပ္ပဋိက္ခေပေန န ဧဟိဘဒန္တိကော။ န ကရောတိ ‘‘သမဏေန နာမ ပရဿ ဝစနကရေန န ဘဝိတဗ္ဗ’’န္တိ အဓိပ္ပာယေန။

ပုရေတရန္တိ တံ ဌာနံ အတ္တနော ဥပဂမနတော ပုရေတရံ။ တံ ကိရ သော ‘‘ဘိက္ခုနာ နာမ ယဒိစ္ဆကာ ဧဝ ဘိက္ခာ ဂဟေတဗ္ဗာ’’တိ အဓိပ္ပာယေန န ဂဏှာတိ။ ဥဒ္ဒိဿ ကတံ မမ နိမိတ္တဘာဝေန ဗဟူ ခုဒ္ဒကာ ပါဏာ သင်္ဃာတံ အာပါဒိတာတိ န ဂဏှာတိ။ နိမန္တနံ န သာဒိယတိ ဧဝံ တေသံ ဝစနံ ကတံ ဘဝိဿတီတိ။ ကုမ္ဘိ အာဒီသုပိ သော သတ္တသညီတိ အာဟ ‘‘ကုမ္ဘိ-ကဠောပိယော’’တိအာဒိ။ ကဗဠန္တရာယော ဟောတီတိ ဥဋ္ဌိတဿ ဒွိန္နမ္ပိ ကဗဠန္တရာယော ဟောတိ။ ဂါမသဘာဂါဒိဝသေန သင်္ဂမ္မ ကိတ္တေန္တိ ဧတိဿာတိ သင်္ကိတ္တိ၊ ယထာသံဟတတဏ္ဍုလာဒိသဉ္စယော။ မာနုသကာနီတိ ဝေယျာဝစ္စကရာ မနုဿာ။

သုရာပါနမေဝါတိ မဇ္ဇလက္ခဏပ္ပတ္တာယ သုရာယ ပါနမေဝ။ သုရာဂဟဏေနေဝေတ္ထ မေရယမ္ပိ သင်္ဂဟိတံ။ ဧကာဂါရမေဝ ဥဉ္ဆတီတိ ဧကာဂါရိကော။ ဧကာလောပေနေဝ ဝတ္တတီတိ ဧကာလောပိကော။ ဒီယတိ ဧတာယာတိ ဒတ္တိ၊ ဒွတ္တိအာလောပမတ္တဂ္ဂါဟိ ခုဒ္ဒကံ ဘိက္ခာဒါနဘာဇနံ။ တေနာဟ ‘‘ခုဒ္ဒကပါတီ’’တိ။ အဘုဉ္ဇနဝသေန ဧကော အဟော ဧတဿ အတ္ထီတိ ဧကာဟိကော၊ အာဟာရော၊ တံ ဧကာဟိကံ။ သော ပန အတ္ထတော ဧကဒိဝသံ လင်္ဃကော ဟောတီတိ အာဟ ‘‘ဧကာဒိဝသန္တရိက’’န္တိ။ ဒွါဟိကန္တိအာဒီသုပိ ဧသေဝ နယော။ ဧကာဟံ အဘုဉ္ဇိတွာ ဧကာဟံ ဘုဉ္ဇနံ ဧကာဟဝါရော၊ တံ ဧကာဟိကမေဝ အတ္ထတော။ ဒွီဟံ အဘုဉ္ဇိတွာ ဒွီဟံ ဘုဉ္ဇနံ ဒွီဟဝါရော။ သေသပဒဒွယေပိ ဧသေဝ နယော။ ဥက္ကဋ္ဌော ပန ပရိယာယဘတ္တဘောဇနိကော ဒွီဟံ အဘုဉ္ဇိတွာ ဧကာဟမေဝ ဘုဉ္ဇတိ။ သေသဒွယေပိ ဧသေဝ နယော။

မိစ္ဆာဝါယာမဝသေနေဝ ဥက္ကုဋိကဝတာနုယောဂေါတိ အာဟ ‘‘ဥက္ကုဋိကဝီရိယမနုယုတ္တော’’တိ။ အတ္တကိလမထာနုယောဂန္တိ အတ္တနော ကိလမထာနုယောဂံ၊ သရီရဒုက္ခကာရဏန္တိ အတ္ထော။ သရီရပရိယာယော ဟိ ဣဓ အတ္တသဒ္ဒေါ ‘‘အတ္တန္တပေါ’’တိအာဒီသု (မ။ နိ။ ၂။၄၁၃) ဝိယ။ ဒွေ အန္တေတိ ဥဘော ကောဋိယော၊ ဥဘော လာမကပဋိပတ္တိယောတိ အတ္ထော။ လာမကမ္ပိ ဟိ အန္တောတိ ဝုစ္စတိ ‘‘အန္တမိဒံ၊ ဘိက္ခဝေ၊ ဇီဝိကာနံ (သံ။ နိ။ ၃။၈၀၊ ဣတိဝု။ ၆၁)၊ ကောဋ္ဌကော အန္တော’’တိ ဧဝမာဒီသု။ မဇ္ဈိမပဋိပဒါယ ဥပ္ပထဘာဝေန အမနီယာ ဂန္တဗ္ဗာ ဉာတဗ္ဗာတိ အန္တာ။ တတော ဧဝ လာမကာ။

အစေလကဝဂ္ဂဝဏ္ဏနာ နိဋ္ဌိတာ။