📜

(၁၁) ၁။ ဝလာဟကဝဂ္ဂေါ

၁-၂။ ဝလာဟကသုတ္တဒွယဝဏ္ဏနာ

၁၀၁-၂။ တတိယပဏ္ဏာသကဿ ပဌမေ ဂဇ္ဇိတာတိ ထနိတာ။ တတ္ထ ဂဇ္ဇိတွာ နောဝဿနဘာဝေါ နာမ ပါပကော။ မနုဿာ ဟိ ယဒါ ဒေဝေါ ဂဇ္ဇတိ၊ တဒါ ‘‘သုဝုဋ္ဌိတာ ဘဝိဿတီ’’တိ ဗီဇာနိ နီဟရိတွာ ဝပန္တိ။ အထ ဒေဝေ အဝဿန္တေ ခေတ္တေ ဗီဇာနိ ခေတ္တေယေဝ နဿန္တိ၊ ဂေဟေ ဗီဇာနိ ဂေဟေယေဝ နဿန္တီတိ ဒုဗ္ဘိက္ခံ ဟောတိ။ နောဂဇ္ဇိတွာ ဝဿနဘာဝေါပိ ပါပကော။ မနုဿာ ဟိ ဣမသ္မိံ ကာလေ ‘‘ဒုဗ္ဗုဋ္ဌိကာ ဘဝိဿတီ’’တိ နိန္နဋ္ဌာနေသုယေဝ ဝပ္ပံ ကရောန္တိ။ အထ ဒေဝေါ ဝဿိတွာ သဗ္ဗဗီဇာနိ မဟာသမုဒ္ဒံ ပါပေတိ၊ ဒုဗ္ဘိက္ခမေဝ ဟောတိ။ ဂဇ္ဇိတွာ ဝဿနဘာဝေါ ပန ဘဒ္ဒကော။ တဒါ ဟိ သုဘိက္ခံ ဟောတိ။ နောဂဇ္ဇိတွာ နောဝဿနဘာဝေါ ဧကန္တပါပကောဝ။ ဘာသိတာ ဟောတိ နော ကတ္တာတိ ‘‘ဣဒါနိ ဂန္ထဓုရံ ပူရေဿာမိ၊ ဝါသဓုရံ ပူရေဿာမီ’’တိ ကထေတိယေဝ၊ န ဥဒ္ဒေသံ ဂဏှာတိ၊ န ကမ္မဋ္ဌာနံ ဘာဝေတိ။

ကတ္တာ ဟောတိ နော ဘာသိတာတိ ‘‘ဂန္ထဓုရံ ပူရေဿာမိ၊ ဝါသဓုရံ ဝါ’’တိ န ဘာသတိ၊ သမ္ပတ္တေ ပန ကာလေ သမတ္တံ သမ္ပာဒေတိ။ ဣမိနာ နယေန ဣတရေပိ ဝေဒိတဗ္ဗာ။ အထ ဝါ သဗ္ဗံ ပနေတံ ပစ္စယဒါယကေဟေဝ ကထိတံ။ ဧကော ဟိ ‘‘အသုကဒိဝသေ နာမ ဒါနံ ဒဿာမီ’’တိ သင်္ဃံ နိမန္တေတိ၊ သမ္ပတ္တေ ကာလေ နော ကရောတိ။ အယံ ပုဂ္ဂလော ပုညေန ပရိဟာယတိ၊ ဘိက္ခုသင်္ဃော ပန လာဘေန ပရိဟာယတိ။ အပရော သင်္ဃံ အနိမန္တေတွာ သက္ကာရံ ကတွာ ‘‘ဘိက္ခူ အာနေဿာမီ’’တိ န လဘိ၊ သဗ္ဗေ အညတ္ထ နိမန္တိတာ ဟောန္တိ။ အယမ္ပိ ပုညေန ပရိဟာယတိ၊ သင်္ဃောပိ လာဘေန ပရိဟာယတိ။ အပရော ပဌမံ သင်္ဃံ နိမန္တေတွာ ပစ္ဆာ သက္ကာရံ ကတွာ ဒါနံ ဒေတိ၊ အယံ ကိစ္စကာရီ ဟောတိ။ အပရော နေဝ သင်္ဃံ နိမန္တေတိ၊ န ဒါနံ ဒေတိ၊ အယံ ပါပပုဂ္ဂလောတိ ဝေဒိတဗ္ဗော။ ဒုတိယံ ဥတ္တာနမေဝ။

ဝလာဟကသုတ္တဒွယဝဏ္ဏနာ နိဋ္ဌိတာ။

၃။ ကုမ္ဘသုတ္တဝဏ္ဏနာ

၁၀၃။ တတိယေ ရိတ္တကောတိ အန္တော ရိတ္တော။ ပိဟိတမုခေါတိ ပိဒဟိတွာ ဌပိတော။ အပါရုတမုခေါတိ ဝိဝရိတွာ ဌပိတော၊ ဥပမိတပုဂ္ဂလေသု ပနေတ္ထ အန္တောဂုဏသာရဝိရဟိတော စ တုစ္ဆော၊ ဗာဟိရသောဘနတာယ ပိဟိတော ပုဂ္ဂလောတိ ဝေဒိတဗ္ဗော။ သေသေသုပိ ဧသေဝ နယော။

ကုမ္ဘသုတ္တဝဏ္ဏနာ နိဋ္ဌိတာ။

၄။ ဥဒကရဟဒသုတ္တဝဏ္ဏနာ

၁၀၄။ စတုတ္ထေ ဥဒကရဟဒေါ ဇဏ္ဏုကမတ္တေပိ ဥဒကေ သတိ ပဏ္ဏရသသမ္ဘိန္နဝဏ္ဏတ္တာ ဝါ ဗဟလတ္တာ ဝါ ဥဒကဿ အပညာယမာနတလော ဥတ္တာနော ဂမ္ဘီရောဘာသော နာမ ဟောတီတိ အာဟ ‘‘ပုရာဏပဏ္ဏရသ…ပေ… ဂမ္ဘီရောဘာသော နာမာ’’တိ။ တိပေါရိသစတုပေါရိသေ ပန ဥဒကေ သတိ အစ္ဆတ္တာ ဥဒကဿ ပညာယမာနတလော ဂမ္ဘီရော ဥတ္တာနောဘာသော နာမ ဟောတီတိ အာဟ ‘‘အစ္ဆဝိပ္ပသန္နမဏိဝဏ္ဏဥဒကော ဥတ္တာနောဘာသော နာမာ’’တိ။ ဥဘယကာရဏသမ္ဘဝတော ပန ဣတရေ ဒွေ ဝေဒိတဗ္ဗာ။ ပုဂ္ဂလေပိ ကိလေသုဿဒဘာဝတော ဂုဏဂမ္ဘီရတာယ စ အဘာဝတော ဂုဏဂမ္ဘီရာနံ သဒိသေဟိ အဘိက္ကမနာဒီဟိ ယုတ္တော ဥတ္တာနော ဂမ္ဘီရောဘာသော နာမ။ ဣမိနာ နယေန သေသာ ဝေဒိတဗ္ဗာ။

ဥဒကရဟဒသုတ္တဝဏ္ဏနာ နိဋ္ဌိတာ။

၅-၆။ အမ္ဗသုတ္တာဒိဝဏ္ဏနာ

၁၀၅-၆။ ပဉ္စမေ အာမကံ ဟုတွာတိ အန္တော အာမံ ဟုတွာ။ ပက္ကံ အာမဝဏ္ဏီတိ အန္တော ပက္ကံ ဗဟိ အာမသဒိသံ။ တတ္ထ ယထာ အမ္ဗေ အပက္ကဘာဝေါ အာမတာ ဟောတိ၊ ဧဝံ ပုဂ္ဂလေပိ ပုထုဇ္ဇနတာ။ ယထာ စ တတ္ထ ပက္ကသဒိသတာ ပက္ကဝဏ္ဏိတာ၊ ဧဝံ ပုဂ္ဂလေပိ အရိယာနံ အဘိက္ကမနာဒိသဒိသတာ ပက္ကဝဏ္ဏိတာတိ ဣမိနာ နယေန သေသာ ဝေဒိတဗ္ဗာ။ ဆဋ္ဌံ ဥတ္တာနမေဝ။

အမ္ဗသုတ္တာဒိဝဏ္ဏနာ နိဋ္ဌိတာ။

၇။ မူသိကသုတ္တဝဏ္ဏနာ

၁၀၇။ သတ္တမေ အာဝါဋံ ခနတီတိ အတ္တနော အာသယံ ဗိလကူပံ ခနတိ။ န စ တတ္ထ ဝသတီတိ တတ္ထ အဝသိတွာ ကိသ္မိဉ္စိဒေဝ ဌာနေ ဝသတိ၊ ဧဝံ ဗိဠာရာဒိအမိတ္တဝသံ ဂစ္ဆတိ။ ဝသိတာ နော ဂါဓံ ကတ္တာတိ သယံ န ခနတိ၊ ပရေန ကတေ ဗိလေ ဝသတိ၊ ဧဝံ ဇီဝိတံ ရက္ခတိ။ တတိယာ ဒွေပိ ကရောန္တီ ဇီဝိတံ ရက္ခတိ။ စတုတ္ထီ ဒွေပိ အကရောန္တီ အမိတ္တဝသံ ဂစ္ဆတိ။ ဣမာယ ပန ဥပမာယ ဥပမိတေသု ပုဂ္ဂလေသု ပဌမော ယထာ သာ မူသိကာ ဂါဓံ ခနတိ၊ ဧဝံ နဝင်္ဂံ သတ္ထုသာသနံ ဥဂ္ဂဏှာတိ။ ယထာ ပန သာ တတ္ထ န ဝသတိ၊ ကိသ္မိဉ္စိဒေဝ ဌာနေ ဝသန္တီ အမိတ္တဝသံ ဂစ္ဆတိ၊ တထာ အယမ္ပိ ပရိယတ္တိဝသေန ဉာဏံ ပေသေတွာ စတုသစ္စဓမ္မံ န ပဋိဝိဇ္ဈတိ၊ လောကာမိသဋ္ဌာနေသု ဝိစရန္တော မစ္စုမာရကိလေသမာရဒေဝပုတ္တမာရသင်္ခါတာနံ ဝသံ ဂစ္ဆတိ။ ဒုတိယော ယထာ မူသိကာ ဂါဓံ န ခနတိ၊ ဧဝံ နဝင်္ဂံ သတ္ထုသာသနံ န ဥဂ္ဂဏှာတိ။ ယထာ ပန ပရေန ခနိတေ ဗိလေ ဝသန္တီ ဇီဝိတံ ရက္ခတိ၊ ဧဝံ ပရဿ ကထံ သုတွာ စတုသစ္စဓမ္မံ ပဋိဝိဇ္ဈိတွာ တိဏ္ဏံ မာရာနံ ဝသံ အတိက္ကမတိ။ ဣမိနာ နယေန တတိယစတုတ္ထေသုပိ ဩပမ္မသံသန္ဒနံ ဝေဒိတဗ္ဗံ။

မူသိကသုတ္တဝဏ္ဏနာ နိဋ္ဌိတာ။

၈။ ဗလီဗဒ္ဒသုတ္တဝဏ္ဏနာ

၁၀၈။ အဋ္ဌမေ ဗလီဗဒ္ဒေါ တာဝ ယော အတ္တနော ဂေါဂဏံ ဃဋ္ဋေတိ ဥဗ္ဗေဇေတိ၊ ပရဂေါဏေ ပန သူရတော သုခသီလော ဟောတိ၊ အယံ သဂဝစဏ္ဍော နော ပရဂဝစဏ္ဍော နာမ။ ပုဂ္ဂလောပိ အတ္တနော ပရိသံ ဃဋ္ဋေန္တော ဝိဇ္ဈန္တော ဖရုသေ သမုဒါစရန္တော၊ ပရပရိသာယ ပန သောရစ္စံ နိဝါတဝုတ္တိတံ အာပဇ္ဇန္တော သဂဝစဏ္ဍော နာမာတိ ဣမိနာ နယေန သေသာပိ ဝေဒိတဗ္ဗာ။

ဗလီဗဒ္ဒသုတ္တဝဏ္ဏနာ နိဋ္ဌိတာ။

၉။ ရုက္ခသုတ္တဝဏ္ဏနာ

၁၀၉။ နဝမေ ရုက္ခော တာဝ ဖေဂ္ဂု သာရပရိဝါရောတိ ဝနဇေဋ္ဌကရုက္ခော သယံ ဖေဂ္ဂု ဟောတိ၊ ပရိဝါရရုက္ခာ ပနဿ သာရာ ဟောန္တိ။ ဣမိနာ နယေန သေသာ ဝေဒိတဗ္ဗာ။ ပုဂ္ဂလေသု ပန သီလသာရဝိရဟိတတော ဖေဂ္ဂုတာ၊ သီလာစာရသမန္နာဂမေန စ သာရတာ ဝေဒိတဗ္ဗာ။

ရုက္ခသုတ္တဝဏ္ဏနာ နိဋ္ဌိတာ။

၁၀။ အာသီဝိသသုတ္တဝဏ္ဏနာ

၁၁၀။ ဒသမေ ယဿ ဝိသံ ပဇ္ဇလိတတိဏုက္ကာယ အဂ္ဂိ ဝိယ သီဃံ အဘိရုဟိတွာ အက္ခီနိ ဂဟေတွာ ခန္ဓံ ဂဟေတွာ သီသံ ဂဟေတွာ ဌိတန္တိ ဝတ္တဗ္ဗတံ အာပဇ္ဇတိ မဏိသပ္ပာဒီနံ ဝိသံ ဝိယ၊ မန္တံ ပန ပရိဝတ္တေတွာ ကဏ္ဏဝါတံ ဒတွာ ဒဏ္ဍကေန ပဟဋမတ္တေ ဩတရိတွာ ဒဋ္ဌဋ္ဌာနေယေဝ တိဋ္ဌတိ၊ အယံ အာဂတဝိသော န ဃောရဝိသော နာမ။ ယဿ ပန ဝိသံ သဏိကံ အဘိရုဟတိ၊ အာရုဠှာရုဠှဋ္ဌာနေ ပန အာသိတ္တဥဒကံ ဝိယ ဟောတိ ဥဒကသပ္ပာဒီနံ ဝိယ၊ ဒွါဒသဝဿစ္စယေနပိ ကဏ္ဏဝိဒ္ဓခန္ဓပိဋ္ဌိကာဒီသု ပညာယတိ၊ မန္တပရိဝတ္တနာဒီသု စ ကရိယမာနေသု သီဃံ န ဩတရတိ၊ အယံ ဃောရဝိသော န အာဂတဝိသော နာမ။ ယဿ ပန ဝိသံ သီဃံ အဘိရုဟတိ၊ န သီဃံ ဩတရတိ အနေဠကသပ္ပာဒီနံ ဝိသံ ဝိယ၊ အယံ အာဂတဝိသော စ ဃောရဝိသော စ။ အနေဠကသပ္ပော နာမ မဟာအာသီဝိသော။ ယဿ ဝိသံ မန္ဒံ ဟောတိ၊ ဩဟာရိယမာနမ္ပိ သုခေနေဝ ဩတရတိ နီလသပ္ပဓမနိသပ္ပာဒီနံ ဝိသံ ဝိယ၊ အယံ နေဝ အာဂတဝိသော န ဃောရဝိသော။ နီလသပ္ပော နာမ သာခဝဏ္ဏော ရုက္ခဂ္ဂါဒီသု ဝိစရဏသပ္ပော။

အာသီဝိသသုတ္တဝဏ္ဏနာ နိဋ္ဌိတာ။

ဝလာဟကဝဂ္ဂဝဏ္ဏနာ နိဋ္ဌိတာ။