📜
(၁၂) ၂။ ကေသိဝဂ္ဂေါ
၁-၇။ ကေသိသုတ္တာဒိဝဏ္ဏနာ
၁၁၁-၁၁၇။ ဒုတိယဿ ¶ ပဌမေ အဿဒမ္မေတိ ဒမ္မနယောဂ္ဂေ အဿေ။ သာရေတီတိ သိက္ခာပေတိ ပဝတ္တေတိ။ သေသမေတ္ထ ဥတ္တာနမေဝ။ ဒုတိယာဒီနိ ဥတ္တာနတ္ထာနေဝ။
ကေသိသုတ္တာဒိဝဏ္ဏနာ နိဋ္ဌိတာ။
၈-၁၀။ သံဝေဇနီယသုတ္တာဒိဝဏ္ဏနာ
၁၁၈-၁၂၀။ အဋ္ဌမေ ¶ သဒ္ဓဿာတိ ဗုဒ္ဓါဒီသု ပသန္နစိတ္တဿ ဝတ္တသမ္ပန္နဿ၊ ယဿ ပါတော ဝုဋ္ဌာယ စေတိယင်္ဂဏဝတ္တာဒီနိ သဗ္ဗဝတ္တာနိ ကတာနေဝ ပညာယန္တိ။ ဒဿနီယာနီတိ ဒဿနာရဟာနိ။ သံဝေဂေါ နာမ သဟောတ္တပ္ပံ ဉာဏံ။ အဘိဇာတိဋ္ဌာနာဒီနိပိ တဿ ဥပ္ပတ္တိဟေတူနိ ဘဝန္တီတိ သိက္ခာပေန္တော အာဟ ‘‘သံဝေဂဇနကာနီ’’တိ။ ဌာနာနီတိ ကာရဏာနိ၊ ပဒေသဋ္ဌာနာနိ ဝါ။ နဝမဒသမာနိ သုဝိညေယျာနိ။
သံဝေဇနီယသုတ္တာဒိဝဏ္ဏနာ နိဋ္ဌိတာ။
ကေသိဝဂ္ဂဝဏ္ဏနာ နိဋ္ဌိတာ။