📜

(၁၆) ၁။ ဣန္ဒြိယဝဂ္ဂေါ

၁-၅။ ဣန္ဒြိယသုတ္တာဒိဝဏ္ဏနာ

၁၅၁-၁၅၅။ စတုတ္ထဿ ပဌမာဒီနိ ဥတ္တာနာနေဝ။

ဣန္ဒြိယသုတ္တာဒိဝဏ္ဏနာ နိဋ္ဌိတာ။

၆-၈။ ကပ္ပသုတ္တာဒိဝဏ္ဏနာ

၁၅၆-၁၅၈။ ဆဋ္ဌေ သံဝဋ္ဋနံ ဝိနဿနံ သံဝဋ္ဋော၊ သံဝဋ္ဋတော ဥဒ္ဓံ တထာ ဌာယီ သံဝဋ္ဋဋ္ဌာယီ။ ဝိဝဋ္ဋနံ နိဗ္ဗတ္တနံ၊ ဝဍ္ဎနံ ဝါ ဝိဝဋ္ဋော။ ‘‘တေဇောသံဝဋ္ဋော၊ အာပေါသံဝဋ္ဋော၊ ဝါယောသံဝဋ္ဋောတိ ဧဝံ သံဝဋ္ဋသီမာနုက္ကမေန သံဝဋ္ဋေသု ဝတ္တဗ္ဗေသု တထာ အဝတွာ အာပေါသံဝဋ္ဋော၊ တေဇောသံဝဋ္ဋော၊ ဝါယောသံဝဋ္ဋောတိ ဝစနံ သံဝဋ္ဋမဟာဘူတဒေသနာနုပုဗ္ဗိယာ’’တိ ကေစိ။ ‘‘ဘာဝီသံဝဋ္ဋာနုပုဗ္ဗိယာ’’တိ အပရေ။ အာပေန သံဝဋ္ဋော အာပေါသံဝဋ္ဋော။ သံဝဋ္ဋသီမာတိ သံဝဋ္ဋနမရိယာဒါ။ သံဝဋ္ဋတီတိ ဝိနဿတိ။ သဒါတိ သဗ္ဗကာလံ၊ တီသုပိ သံဝဋ္ဋကာလေသူတိ အတ္ထော။ ဧကံ ဗုဒ္ဓက္ခေတ္တံ ဝိနဿတီတိ ဧတ္ထ ဗုဒ္ဓက္ခေတ္တံ နာမ တိဝိဓံ ဟောတိ ဇာတိက္ခေတ္တံ၊ အာဏာက္ခေတ္တံ၊ ဝိသယက္ခေတ္တဉ္စ။

တတ္ထ ဇာတိက္ခေတ္တံ ဒသသဟဿစက္ကဝါဠပရိယန္တံ ဟောတိ၊ တထာဂတဿ ပဋိသန္ဓိဂ္ဂဟဏာဒီသု ကမ္ပတိ။ အာဏာက္ခေတ္တံ ကောဋိသတသဟဿစက္ကဝါဠပရိယန္တံ၊ ယတ္ထ ရတနသုတ္တံ (ခု။ ပါ။ ၆။၁ အာဒယော၊ သု။ နိ။ ၂၂၄ အာဒယော) ခန္ဓပရိတ္တံ (အ။ နိ။ ၄။၆၇၊ စူဠဝ။ ၂၅၁) ဓဇဂ္ဂပရိတ္တံ (သံ။ နိ။ ၁။၂၄၉) အာဋာနာဋိယပရိတ္တံ (ဒီ။ နိ။ ၃။၂၇၇-၂၇၈) မောရပရိတ္တန္တိ (ဇာ။ ၁။၂။၁၇-၁၈) ဣမေသံ ပရိတ္တာနံ အာနုဘာဝေါ ဝတ္တတိ။ ဝိသယက္ခေတ္တံ အနန္တာပရိမာဏံ၊ ယံ ‘‘ယာဝတာ ဝါ ပနာကင်္ခေယျာ’’တိ (အ။ နိ။ ၃။၈၁) ဝုတ္တံ။ တတ္ထ ယံ ယံ တထာဂတော အာကင်္ခတိ၊ တံ တံ ဇာနာတိ။ ဧဝမေတေသု တီသု ဗုဒ္ဓက္ခေတ္တေသု ဧကံ အာဏာက္ခေတ္တံ ဝိနဿတိ ၊ တသ္မိံ ပန ဝိနဿန္တေ ဇာတိက္ခေတ္တံ ဝိနဋ္ဌမေဝ ဟောတိ၊ ဝိနဿန္တဉ္စ ဧကတောဝ ဝိနဿတိ၊ သဏ္ဌဟန္တဉ္စ ဧကတောဝ သဏ္ဌဟတိ။ သေသမေတ္ထ ဝိသုဒ္ဓိမဂ္ဂသံဝဏ္ဏနာသု (ဝိသုဒ္ဓိ။ မဟာဋီ။ ၂။၄၀၄) ဝုတ္တနယေနေဝ ဂဟေတဗ္ဗံ။ သတ္တမဋ္ဌမာနိ ဥတ္တာနတ္ထာနေဝ။

ကပ္ပသုတ္တာဒိဝဏ္ဏနာ နိဋ္ဌိတာ။

၉။ ဘိက္ခုနီသုတ္တဝဏ္ဏနာ

၁၅၉။ နဝမေ ဧဝံ ပဝတ္တံ ပစ္စုပ္ပန္နတဏှံ နိဿာယာတိ ‘‘ကုဒါဿု နာမာဟမ္ပိ အာသဝါနံ ခယာ’’တိအာဒိနာ နယေန အနုတ္တရေ ဝိမောက္ခေ ပိဟံ ဥပ္ပာဒေန္တဿ ဥပ္ပန္နတဏှံ နိဿာယ။ ကထံ ပန လောကုတ္တရဓမ္မေ အာရဗ္ဘ အာသာ ဥပ္ပဇ္ဇတီတိ? န ခေါ ပနေတံ ဧဝံ ဒဋ္ဌဗ္ဗံ၊ န အာရမ္မဏကရဏဝသေန တတ္ထ ပိဟာ ပဝတ္တတိ အဝိသယတ္တာ ပုဂ္ဂလဿ စ အနဓိဂတဘာဝတော။ အနုဿဝူပလဒ္ဓေ ပန အနုတ္တရဝိမောက္ခေ ဥဒ္ဒိဿ ပိဟံ ဥပ္ပာဒေန္တော တတ္ထ ပိဟံ ဥပ္ပာဒေတိ နာမ။ နာကဍ္ဎတီတိ ကမ္မပထဘာဝံ အပ္ပတ္တတာယ ပဋိသန္ဓိံ န ဒေတိ။ သေသံ သုဝိညေယျမေဝ။

ဘိက္ခုနီသုတ္တဝဏ္ဏနာ နိဋ္ဌိတာ။

၁၀။ သုဂတဝိနယသုတ္တဝဏ္ဏနာ

၁၆၀။ ဒသမေ ဝဠဉ္ဇေန္တီတိ သဇ္ဈာယန္တိ စေဝ ဝါစုဂ္ဂတံ ကရောန္တာ ဓာရေန္တိ စ။ အဝိဂတတဏှတာယ တံ တံ ပရိက္ခာရဇာတံ ဗဟုမ္ပိ အာဒိယန္တီတိ ဗဟုလာ၊ တေ ဧဝ ဗာဟုလိကာ ယထာ ‘‘ဝေနယိကော’’တိ (မ။ နိ။ ၁။၂၄၆၊ အ။ နိ။ ၈။၁၁၊ ပါရာ။ ၈)။ တေ ပန ယသ္မာ ပစ္စယဗဟုလဘာဝါ ယုတ္တပ္ပယုတ္တာ နာမ ဟောန္တိ၊ တသ္မာ အာဟ ‘‘ပစ္စယဗာဟုလ္လာယ ပဋိပန္နာ’’တိ။ သိထိလံ ဂဏှန္တီတိ သာထလိကာ၊ သိက္ခာယ အာဒရဂါရဝါဘာဝေန သိထိလံ အဒဠှံ ဂဏှန္တီတိ အတ္ထော။ သိထိလန္တိ စ ဘာဝနပုံသကနိဒ္ဒေသော၊ သိထိလ-သဒ္ဒေန ဝါ သမာနတ္ထဿ သာထလသဒ္ဒဿ ဝသေန သာထလိကာတိ ပဒသိဒ္ဓိ ဝေဒိတဗ္ဗာ။ အဝဂမနတောတိ အဓောဂမနတော၊ ဩရမ္ဘာဂိယဘာဝတောတိ အတ္ထော။ နိဗ္ဗီရိယာတိ ဥဇ္ဈိတုဿာဟာ တဒဓိဂမာယ အာရမ္ဘမ္ပိ အကုရုမာနာ။

သုဂတဝိနယသုတ္တဝဏ္ဏနာ နိဋ္ဌိတာ။

ဣန္ဒြိယဝဂ္ဂဝဏ္ဏနာ နိဋ္ဌိတာ။