📜

(၂၄) ၄။ ကမ္မဝဂ္ဂေါ

၁။ သံခိတ္တသုတ္တဝဏ္ဏနာ

၂၃၂။ စတုတ္ထဿ ပဌမေ ကာဠကန္တိ မလီနံ၊ စိတ္တဿ အပ္ပဘဿရဘာဝကရန္တိ အတ္ထော။ တံ ပနေတ္ထ ကမ္မပထပ္ပတ္တမေဝ အဓိပ္ပေတန္တိ အာဟ ‘‘ဒသအကုသလကမ္မပထ’’န္တိ။ ကဏှာဘိဇာတိဟေတုတော ဝါ ကဏှံ။ တေနာဟ ‘‘ကဏှဝိပါက’’န္တိ။ အပါယူပပတ္တိ မနုဿေသု စ ဒေါဘဂ္ဂိယံ ကဏှဝိပါကော၊ ယံ တဿ တမဘာဝေါ ဝုတ္တော။ နိဗ္ဗတ္တနတောတိ နိဗ္ဗတ္တာပနတော။ ပဏ္ဍရကန္တိ ဩဒါတံ၊ စိတ္တဿ ပဘဿရဘာဝကရန္တိ အတ္ထော။ သုက္ကာဘိဇာတိဟေတုတော ဝါ သုက္ကံ။ တေနာဟ ‘‘သုက္ကဝိပါက’’န္တိ။ သဂ္ဂူပပတ္တိ မနုဿသောဘဂ္ဂိယဉ္စ သုက္ကဝိပါကော၊ ယံ တဿ ဇောတိဘာဝေါ ဝုတ္တော။ ဥက္ကဋ္ဌနိဒ္ဒေသေန ပန ‘‘သဂ္ဂေ နိဗ္ဗတ္တနတော’’တိ ဝုတ္တံ၊ နိဗ္ဗတ္တာပနတောတိ အတ္ထော။ မိဿကကမ္မန္တိ ကာလေန ကဏှံ ကာလေန သုက္ကန္တိ ဧဝံ မိဿကဝသေန ကတကမ္မံ။ သုခဒုက္ခဝိပါကန္တိ ဝတွာ တတ္ထ သုခဒုက္ခာနံ ပဝတ္တိအာကာရံ ဒဿေတုံ ‘‘မိဿကကမ္မံ ဟီ’’တိအာဒိ ဝုတ္တံ။ ကမ္မဿ ကဏှသုက္ကသမညာ ကဏှသုက္ကာဘိဇာတိဟေတုတာယာတိ အပစယဂါမိတာယ တဒုဘယဝိဒ္ဓံသကဿ ကမ္မက္ခယကရကမ္မဿ ဣဓ သုက္ကပရိယာယောပိ ဣစ္ဆိတောတိ အာဟ ‘‘ဥဘယ…ပေ… အယမေတ္ထ အတ္ထော’’တိ။ တတ္ထ ဥဘယဝိပါကဿာတိ ယထာဓိဂတဿ ဥဘယဝိပါကဿ။ သမ္ပတ္တိဘဝပရိယာပန္နော ဟိ ဝိပါကော ဣဓ သုက္ကံ သုက္ကဝိပါကောတိ အဓိပ္ပေတော၊ န အစ္စန္တပရိသုဒ္ဓါ အရိယဖလဝိပါကော။

သံခိတ္တသုတ္တဝဏ္ဏနာ နိဋ္ဌိတာ။

၂။ ဝိတ္ထာရသုတ္တဝဏ္ဏနာ

၂၃၃။ ဒုတိယေ သဗျာဗဇ္ဈန္တိ ဝါ သဒုက္ခံ၊ အတ္တနာ ဥပ္ပာဒေတဗ္ဗေန ဒုက္ခေန သဒုက္ခန္တိ အတ္ထော၊ ဒုက္ခသံဝတ္တနိကန္တိ ဝုတ္တံ ဟောတိ။ ကာယသင်္ခါရာဒီသု ကာယဒွါရေ ဂဟဏာဒိဝသေန စောပနပ္ပတ္တာ ဒွါဒသ အကုသလစေတနာ အဗျာဗဇ္ဈကာယသင်္ခါရော နာမ။ ဝစီဒွါရေ ဟနုသံစောပနဝသေန ဝစီဘေဒပ္ပဝတ္တိကာ တာယေဝ ဒွါဒသ ဝစီသင်္ခါရော နာမ။ ဥဘယစောပနံ အပ္ပတွာ ရဟော စိန္တေန္တဿ မနောဒွါရေ ပဝတ္တာ မနောသင်္ခါရော နာမ။ ဣတိ တီသုပိ ဒွါရေသု ကာယဒုစ္စရိတာဒိဘေဒါ အကုသလာ စေတနာဝ သင်္ခါရာတိ ဝေဒိတဗ္ဗာ။ အဘိသင်္ခရောတီတိ အာယူဟတိ၊ တံ ပန အာယူဟနံ ပစ္စယသမဝါယသိဒ္ဓိတော သင်္ကဍ္ဎိတွာ ပိဏ္ဍနံ ဝိယ ဟောတိ။ သဒုက္ခံ လောကန္တိ အပါယလောကမာဟ။ ဝိပါကဖဿာတိ ဖဿသီသေန တတ္ထ ဝိပါကပ္ပဝတ္တမာဟ။ ဝေမာနိကပေတာတိ ဣဒံ ဗာဟုလ္လတော ဝုတ္တံ၊ ဣတရေသမ္ပိ ဝိနိပါတိကာနံ ကာလေန သုခံ၊ ကာလေန ဒုက္ခံ ဟောတိ။ တဿ ပဟာနာယာတိ တဿ ယထာဝုတ္တဿ ကမ္မဿ အနုပ္ပတ္တိဓမ္မတာပါဒနာယ။ ယာ စေတနာတိ ယာ အပစယဂါမိနိစေတနာ။ တေနေဝါဟ ‘‘ဝိဝဋ္ဋဂါမိနီ မဂ္ဂစေတနာ ဝေဒိတဗ္ဗာ’’တိ။

ဝိတ္ထာရသုတ္တဝဏ္ဏနာ နိဋ္ဌိတာ။

၃-၉။ သောဏကာယနသုတ္တာဒိဝဏ္ဏနာ

၂၃၄-၂၄၀။ တတိယေ ပုရိမာနိ၊ ဘန္တေ၊ ဒိဝသာနိ ပုရိမတရာနီတိ ဧတ္ထ ဟိယျော ဒိဝသံ ပုရိမံ နာမ၊ တတော ပရံ ပုရိမတရန္တိ အာဟ ‘‘အတီတာနန္တရဒိဝသတော ပဋ္ဌာယာ’’တိအာဒိ။ ဣတိ ဣမေသု ဒွီသု ပဝတ္တိတော ယထာက္ကမံ ပုရိမပုရိမတရဘာဝေါ ဒဿိတော။ ဧဝံ သန္တေပိ ယဒေတ္ထ ‘‘ပုရိမတရ’’န္တိ ဝုတ္တံ၊ တတော ပဘုတိ ယံ ယံ ဩရံ၊ တံ တံ ပုရိမံ။ ယံ ယံ ပရံ၊ တံ တံ ပုရိမတရံ ဩရပါရဘာဝဿ ဝိယ ပုရိမတရဘာဝဿ စ အပေက္ခာသိဒ္ဓတ္တာ။ သေသံ ဝုတ္တနယမေဝ။ စတုတ္ထာဒီနိ ဥတ္တာနတ္ထာနေဝ။

သောဏကာယနသုတ္တာဒိဝဏ္ဏနာ နိဋ္ဌိတာ။

၁၀-၁၁။ သမဏသုတ္တာဒိဝဏ္ဏနာ

၂၄၁-၂။ ဒသမေ သေသပဒေသုပီတိ ‘‘ဣဓ ဒုတိယော သမဏော’’တိအာဒီသု သေသပဒေသုပိ။ ယထာ ဟိ ‘‘ဝိဝိစ္စေဝ ကာမေဟီ’’တိ (ဒီ။ နိ။ ၁။၂၂၆၊ မ။ နိ။ ၁။၂၇၁၊ ၂၈၇၊ ၂၉၇၊ သံ။ နိ။ ၂။၁၅၂၊ အ။ နိ။ ၄။၁၂၃) ဧတ္ထ ကတော နိယမော ‘‘ဝိဝိစ္စ အကုသလေဟီ’’တိ ဧတ္ထာပိ ကတောယေဝ ဟောတိ သာဝဓာရဏအတ္ထဿ ဣစ္ဆိတဗ္ဗတ္တာ၊ ဧဝမိဓာပီတိ။ တေနာဟ ‘‘ဒုတိယာဒယောပိ ဟီ’’တိအာဒိ။ သာမညဖလာဓိဂမဝသေန နိပ္ပရိယာယတော သမဏဘာဝေါတိ တေသံ ဝသေနေတ္ထ စတ္တာရော သမဏာ ဒေသိတာ။ ဣမသ္မိဉှိ ဌာနေ စတ္တာရော ဖလဋ္ဌကသမဏာဝ အဓိပ္ပေတာ သမိတပါပသမဏဂ္ဂဟဏတော။ ကသ္မာ ပနေတ္ထ မဟာပရိနိဗ္ဗာနေ ဝိယ မဂ္ဂဋ္ဌာ တဒတ္ထာယ ပဋိပန္နာပိ န ဂဟိတာတိ? ဝေနေယျဇ္ဈာသယတော။ တတ္ထ ဟိ မဂ္ဂါဓိဂမတ္ထာယ ဝိပဿနာပိ ဣတော ဗဟိဒ္ဓါ နတ္ထိ၊ ကုတော မဂ္ဂဖလာနီတိ ဒဿေန္တေန ဘဂဝတာ ‘‘ဉာယဿ ဓမ္မဿ ပဒေသဝတ္တီ၊ ဣတော ဗဟိဒ္ဓါ သမဏောပိ နတ္ထီ’’တိ (ဒီ။ နိ။ ၂။၂၁၄) ဝုတ္တံ။ ဣဓ ပန နိဋ္ဌာနပ္ပတ္တမေဝ တံတံသမဏဘာဝံ ဂဏှန္တေန ဖလဋ္ဌကသမဏာဝ ဂဟိတာ၊ မဂ္ဂဋ္ဌတော ဖလဋ္ဌော သဝိသေသံ ဒက္ခိဏေယျောတိ။ သွာယမတ္ထော ဒွီသု သုတ္တေသု ဒေသနာဘေဒေနေဝ ဝိညာယတီတိ။ ရိတ္တာတိ ဝိဝိတ္တာ။ တုစ္ဆာတိ နိဿာရာ ပဋိပန္နကသာရာဘာဝတော။

ပဝဒန္တိ ဧတေဟီတိ ပဝါဒါ။ ဒိဋ္ဌိဂတိကာနံ နာနာဒိဋ္ဌိဒီပကသမယာတိ အာဟ ‘‘စတ္တာရော သဿတဝါဒါ’’တိအာဒိ။ တတ္ထ စတ္တာရော သဿတဝါဒါတိ လာဘိဝသေန တယော၊ တက္ကိဝသေန ဧကောတိ ဧဝံ စတ္တာရော သဿတဝါဒါ။ ပုဗ္ဗေနိဝါသဉာဏလာဘီ တိတ္ထိယော မန္ဒပညော အနေကဇာတိသတသဟဿမတ္တံ အနုဿရတိ၊ မဇ္ဈပညော ဒသ သံဝဋ္ဋဝိဝဋ္ဋကပ္ပာနိ၊ တိက္ခပညော စတ္တာလီသ သံဝဋ္ဋဝိဝဋ္ဋကပ္ပာနိ၊ န တတော ပရံ။ သော ဧဝံ အနုဿရန္တော ‘‘သဿတော အတ္တာ စ လောကော စာ’’တိ အဘိဝဒတိ၊ တက္ကီ ပန တက္ကပရိယာဟတံ ဝီမံသာနုစရိတံ သယံပဋိဘာနံ ‘‘သဿတော အတ္တာ စ လောကော စာ’’တိ အဘိဝဒတိ။ တေန ဝုတ္တံ ‘‘လာဘိဝသေန တယော၊ တက္ကိဝသေန ဧကောတိ ဧဝံ စတ္တာရော သဿတဝါဒါ’’တိ။

သတ္တေသု သင်္ခါရေသု စ ဧကစ္စံ သဿတန္တိ ပဝတ္တော ဝါဒေါ ဧကစ္စသဿတဝါဒေါ။ သော ပန ဗြဟ္မကာယိကခိဍ္ဍာပဒေါသိကမနောပဒေါသိကတ္တဘာဝတော စဝိတွာ ဣဓာဂတာနံ တက္ကိနော စ ဥပ္ပဇ္ဇနဝသေန စတုဗ္ဗိဓောတိ အာဟ ‘‘စတ္တာရော ဧကစ္စသဿတဝါဒါ’’တိ။

စတ္တာရော အန္တာနန္တိကာတိ ဧတ္ထ အမတိ ဂစ္ဆတိ ဧတ္ထ ဝေါသာနန္တိ အန္တော၊ မရိယာဒါ။ တပ္ပဋိသေဓေန အနန္တော။ အန္တော စ အနန္တော စ အန္တာနန္တော သာမညနိဒ္ဒေသေန၊ ဧကသေသေန ဝါ ‘‘နာမရူပပစ္စယာ သဠာယတန’’န္တိအာဒီသု (မ။ နိ။ ၃။၁၂၆၊ ဥဒါ။ ၁) ဝိယ။ အန္တာနန္တသဟစရိတော ဝါဒေါ အန္တာနန္တော ယထာ ‘‘ကုန္တာ စရန္တီ’’တိ။ အန္တာနန္တသန္နိဿယော ဝါ ယထာ ‘‘မဉ္စာ ဃောသန္တီ’’တိ။ သော ဧတေသံ အတ္ထီတိ အန္တာနန္တိကာ။ ‘‘အန္တဝါ အတ္တာ စ လောကော စ၊ အနန္တဝါ အတ္တာ စ လောကော စ၊ အန္တဝါ စ အနန္တဝါ စ အတ္တာ စ လောကော စ၊ နေဝန္တဝါ နာနန္တဝါ’’တိ ဧဝံ ပဝတ္တဝါဒါ စတ္တာရော။ အဝဍ္ဎိတကသိဏဿ တံ ကသိဏံ အတ္တာတိ စ လောကောတိ စ ဂဏှန္တဿ ဝသေန ပဌမော ဝုတ္တော၊ ဒုတိယော ဝဍ္ဎိတကသိဏဿ ဝသေန ဝုတ္တော၊ တတိယော တိရိယံ ဝဍ္ဎေတွာ ဥဒ္ဓမဓော အဝဍ္ဎိတကသိဏဿ၊ စတုတ္ထော တက္ကိဝသေန ဝုတ္တော။ ဧတ္ထ စ ယုတ္တံ တာဝ ပုရိမာနံ တိဏ္ဏံ ဝါဒါနံ အန္တဉ္စ အနန္တဉ္စ အန္တာနန္တဉ္စ အာရဗ္ဘ ပဝတ္တဝါဒတ္တာ အန္တာနန္တိကတ္တံ၊ ပစ္ဆိမဿ ပန တဒုဘယနိသေဓနဝသေန ပဝတ္တဝါဒတ္တာ ကထမန္တာနန္တိကတ္တန္တိ? တဒုဘယပ္ပဋိသေဓနဝသေန ပဝတ္တဝါဒတ္တာ ဧဝ။ အန္တာနန္တိကပ္ပဋိသေဓဝါဒေါပိ ဟိ အန္တာနန္တဝိသယော ဧဝ တံ အာရဗ္ဘ ပဝတ္တတ္တာ။

န မရတီတိ အမရာ။ ကာ သာ? ‘‘ဧဝန္တိပိ မေ နော’’တိအာဒိနာ (ဒီ။ နိ။ ၁။၆၂) နယေန ပရိယန္တရဟိတာ ဒိဋ္ဌိဂတိကဿ ဒိဋ္ဌိ စေဝ ဝါစာ စ။ ဝိဝိဓော ခေပေါတိ ဝိက္ခေပေါ၊ အမရာယ ဒိဋ္ဌိယာ၊ ဝါစာယ ဝါ ဝိက္ခေပေါတိ အမရာဝိက္ခေပေါ၊ သော ဧတဿ အတ္ထီတိ အမရာဝိက္ခေပိကော။ အထ ဝါ အမရာ နာမ မစ္ဆဇာတိ၊ သာ ဥမ္မုဇ္ဇနာဒိဝသေန ဥဒကေ သန္ဓာဝမာနာ ဂါဟံ န ဂစ္ဆတိ၊ ဧဝမေဝံ အယမ္ပိ ဝါဒေါ ဣတော စိတော စ သန္ဓာဝတိ၊ ဂါဟံ န ဥပဂစ္ဆတီတိ အမရာဝိက္ခေပေါတိ ဝုစ္စတိ၊ သော ဧတေသံ အတ္ထီတိ အမရာဝိက္ခေပိကာ။ သွာယံ ဝါဒေါ မုသာဝါဒါနုယောဂဆန္ဒရာဂဘယမောဟဘာဝဟေတုကတာယ စတုဓာ ပဝတ္တောတိ အာဟ ‘‘စတ္တာရော အမရာဝိက္ခေပိကာ’’တိ။

အဓိစ္စ ယထိစ္ဆကံ ယံ ကိဉ္စိ ကာရဏံ ကဿစိ ဗုဒ္ဓိပုဗ္ဗံ ဝါ ဝိနာ သမုပ္ပန္နောတိ အတ္တလောကသညိတာနံ ခန္ဓာနံ အဓိစ္စ ပဝတ္တိအာကာရာရမ္မဏံ ဒဿနံ တဒါကာရသန္နိဿယေန ပဝတ္တိတော တဒါကာရသဟစရိတတာယ စ ‘‘အဓိစ္စသမုပ္ပန္န’’န္တိ ဝုစ္စတိ ယထာ ‘‘မဉ္စာ ဃောသန္တိ’’၊ ‘‘ကုန္တာ စရန္တီ’’တိ စ။ တံ ဧတေသံ အတ္ထီတိ အဓိစ္စသမုပ္ပန္နိကာ။ လာဘိဝသေန တက္ကိဝသေန စ ‘‘ဒွေ အဓိစ္စသမုပ္ပန္နိကာ’’တိ ဝုတ္တံ။

သညီတိ ပဝတ္တော ဝါဒေါ သညိဝါဒေါ၊ သော ဧတေသံ အတ္ထီတိ သညိဝါဒါ။ ရူပိစတုက္ကံ ဧကန္တသုခစတုက္ကန္တိ ဣမေသံ စတုန္နံ စတုက္ကာနံ ဝသေန သောဠသ သညိဝါဒါ။ ဣမေသုယေဝ ပုရိမာနံ ဒွိန္နံ စတုက္ကာနံ ဝသေန အဋ္ဌ သညိဝါဒါ၊ အဋ္ဌ နေဝသညိနာသညိဝါဒါ ဝေဒိတဗ္ဗာ။ ကေဝလဉှိ တတ္ထ ‘‘သညီ အတ္တာ’’တိ ဂဏှန္တာနံ တာ ဒိဋ္ဌိယော၊ ဣဓ အသညီတိ စ နေဝသညီနာသညီတိ စ။

သတ္တ ဥစ္ဆေဒဝါဒါတိ မနုဿတ္တဘာဝေ ကာမာဝစရဒေဝတ္တဘာဝေ ရူပါဝစရတ္တဘာဝေ စတုဗ္ဗိဓာရူပတ္တဘာဝေ စ ဌတွာ သတ္တဿ ဥစ္ဆေဒပညာပနဝသေန သတ္တ ဥစ္ဆေဒဝါဒါ။

ပဉ္စ ဒိဋ္ဌဓမ္မနိဗ္ဗာနဝါဒါတိ ပဉ္စကာမဂုဏဥပဘောဂဝသေန စတုဗ္ဗိဓရူပဇ္ဈာနသုခပရိဘောဂဝသေန စ ဒိဋ္ဌဓမ္မေ နိဗ္ဗူတိပညာပနဝါဒါ။ ဒိဋ္ဌဓမ္မောတိ ပစ္စက္ခဓမ္မော ဝုစ္စတိ၊ တတ္ထ တတ္ထ ပဋိလဒ္ဓတ္တဘာဝဿေတံ အဓိဝစနံ။ ဒိဋ္ဌဓမ္မေ နိဗ္ဗာနံ ဒိဋ္ဌဓမ္မနိဗ္ဗာနံ၊ ဣမသ္မိံယေဝ အတ္တဘာဝေ ဒုက္ခဝူပသမန္တိ အတ္ထော။ တံ ဝဒန္တီတိ ဒိဋ္ဌဓမ္မနိဗ္ဗာနဝါဒါ။

ဉာယတိ ကမတိ ပဋိဝိဇ္ဈတီတိ ဉာယော၊ သော ဧဝ နိဗ္ဗာနသမ္ပာပကဟေတုတာယ ဓမ္မောတိ အာဟ ‘‘ဉာယဿ ဓမ္မဿာ’’တိ။ ဣတော ဗဟိဒ္ဓါ သမဏောပိ နတ္ထီတိအာဒီသု ကသ္မာ ပနေတေ အညတ္ထ နတ္ထီတိ? အက္ခေတ္တတာယ။ ယထာ ဟိ န အာရဂ္ဂေ သာသပေါ တိဋ္ဌတိ၊ န ဥဒကပိဋ္ဌေ အဂ္ဂိ ဇလတိ၊ န ပိဋ္ဌိပါသာဏေ ဗီဇာနိ ဝိရုဟန္တိ၊ ဧဝမေဝံ ဗာဟိရေသု တိတ္ထာယတနေသု န ဣမေ သမဏာ ဥပ္ပဇ္ဇန္တိ၊ ဣမသ္မိံယေဝ သာသနေ ဥပ္ပဇ္ဇန္တိ။ ကသ္မာ? သုက္ခေတ္တတာယ။ သာ ပန နေသံ အက္ခေတ္တတာ သုက္ခေတ္တတာ စ အရိယမဂ္ဂဿ အဘာဝတော ဘာဝတော စ ဝေဒိတဗ္ဗာ။ တေနာဟ ဘဂဝါ –

‘‘ယသ္မိံ ခေါ၊ သုဘဒ္ဒ၊ ဓမ္မဝိနယေ အရိယော အဋ္ဌင်္ဂိကော မဂ္ဂေါ န ဥပလဗ္ဘတိ၊ သမဏောပိ တတ္ထ န ဥပလဗ္ဘတိ၊ ဒုတိယောပိ တတ္ထ သမဏော န ဥပလဗ္ဘတိ၊ တတိယောပိ တတ္ထ သမဏော န ဥပလဗ္ဘတိ၊ စတုတ္ထောပိ တတ္ထ သမဏော န ဥပလဗ္ဘတိ။ ယသ္မိဉ္စ ခေါ၊ သုဘဒ္ဒ၊ ဓမ္မဝိနယေ အရိယော အဋ္ဌင်္ဂိကော မဂ္ဂေါ ဥပလဗ္ဘတိ၊ သမဏောပိ တတ္ထ ဥပလဗ္ဘတိ၊ ဒုတိယောပိ တတ္ထ… တတိယောပိ တတ္ထ… စတုတ္ထောပိ တတ္ထ သမဏော ဥပလဗ္ဘတိ။ ဣမသ္မိံ ခေါ၊ သုဘဒ္ဒ၊ ဓမ္မဝိနယေ အရိယော အဋ္ဌင်္ဂိကော မဂ္ဂေါ ဥပလဗ္ဘတိ။ ဣဓေဝ၊ သုဘဒ္ဒ၊ သမဏော၊ ဣဓ ဒုတိယော သမဏော၊ ဣဓ တတိယော သမဏော၊ ဣဓ စတုတ္ထော သမဏော၊ သုညာ ပရပ္ပဝါဒါ သမဏေဘိ အညေဟီ’’တိ (ဒီ။ နိ။ ၂။၂၁၄)။

အရိယမဂ္ဂဿ စ အဘာဝေါ ဘာဝေါ စ သုပရိသုဒ္ဓဿ သီလဿ သုပရိသုဒ္ဓါယ သမထဝိပဿနာဘာဝနာယ အဘာဝတော ဘာဝတော စ ဝေဒိတဗ္ဗော။ တဒုဘယဉ္စ ဒုရက္ခာတသွာက္ခာတဘာဝဟေတုကံ ။ သော စ အသမ္မာသမ္ဗုဒ္ဓပ္ပဝေဒိတတ္တာ။ ယသ္မာ တိတ္ထာယတနံ အက္ခေတ္တံ၊ သာသနံ ခေတ္တံ၊ တသ္မာ ယထာ သုရတ္တဟတ္ထပါဒေါ ဘာသုရကေသရဘာရော သီဟော မိဂရာဇာ န သုသာနေ ဝါ သင်္ကာရကူဋေ ဝါ ပဋိဝသတိ၊ တိယောဇနသဟဿဝိတ္ထတံ ပန ဟိမဝန္တံ အဇ္ဈောဂါဟေတွာ မဏိဂုဟာယမေဝ ဝသတိ၊ ယထာ စ ဆဒ္ဒန္တော နာဂရာဇာ န ဂေါစရိယဟတ္ထိကုလာဒီသု နဝသု ကုလေသု ဥပ္ပဇ္ဇတိ၊ ယထာ စ ဝလာဟကော အဿရာဇာ န ဂဒြဘကုလေ ဝါ ဃောဋကကုလေ ဝါ ဥပ္ပဇ္ဇတိ၊ သိန္ဓုတီရေ ပန သိန္ဓဝကုလေယေဝ ဥပ္ပဇ္ဇတိ၊ ယထာ စ သဗ္ဗကာမဒဒံ မနောဟရံ မဏိရတနံ န သင်္ကာရကူဋေ ဝါ ပံသုပဗ္ဗတာဒီသု ဝါ ဥပ္ပဇ္ဇတိ၊ ဝိပုလပဗ္ဗတဗ္ဘန္တရေယေဝ ဥပ္ပဇ္ဇတိ၊ ယထာ စ တိမိရပိင်္ဂလော မစ္ဆရာဇာ န ခုဒ္ဒကပေါက္ခရဏီသု ဥပ္ပဇ္ဇတိ၊ စတုရာသီတိယောဇနသဟဿဂမ္ဘီရေ မဟာသမုဒ္ဒေယေဝ ဥပ္ပဇ္ဇတိ၊ ယထာ စ ဒိယဍ္ဎယောဇနသတိကော သုပဏ္ဏရာဇာ န ဂါမဒွါရေ ဧရဏ္ဍဝနာဒီသု ပဋိဝသတိ၊ မဟာသမုဒ္ဒံ ပန အဇ္ဈောဂါဟေတွာ သိမ္ဗလိဒဟဝနေယေဝ ပဋိဝသတိ၊ ယထာ စ ဓတရဋ္ဌော သုဝဏ္ဏဟံသော န ဂါမဒွါရေ အာဝါဋကာဒီသု ပဋိဝသတိ၊ နဝုတိဟံသသဟဿပရိဝါရော ပန ဟုတွာ စိတ္တကူဋေယေဝ ပဋိဝသတိ၊ ယထာ စ စတုဒ္ဒီပိဿရော စက္ကဝတ္တိရာဇာ န နီစကုလေ ဥပ္ပဇ္ဇတိ၊ အသမ္ဘိန္နဇာတိယခတ္တိယကုလေယေဝ ပန ဥပ္ပဇ္ဇတိ၊ ဧဝမေဝံ ဣမေသု သမဏေသု ဧကသမဏောပိ န အညတ္ထ တိတ္ထာယတနေ ဥပ္ပဇ္ဇတိ၊ အရိယမဂ္ဂပရိက္ခတေ ပန ဗုဒ္ဓသာသနေယေဝ ဥပ္ပဇ္ဇတိ။ တေနာဟ ဘဂဝါ – ‘‘ဣဓေဝ၊ ဘိက္ခဝေ၊ သမဏော…ပေ… သုညာ ပရပ္ပဝါဒါ သမဏေဘိ အညေဟီ’’တိ (မ။ နိ။ ၁။၁၃၉-၁၄၀၊ အ။ နိ။ ၄။၂၄၁)။ ဧကာဒသမေ နတ္ထိ ဝတ္တဗ္ဗံ။

သမဏသုတ္တာဒိဝဏ္ဏနာ နိဋ္ဌိတာ။

ကမ္မဝဂ္ဂဝဏ္ဏနာ နိဋ္ဌိတာ။