📜

(၂၆) ၆။ အဘိညာဝဂ္ဂေါ

၁-၃။ အဘိညာသုတ္တာဒိဝဏ္ဏနာ

၂၅၄-၂၅၆။ ဆဋ္ဌဿ ပဌမေ ပစ္စနီကသမနတော သမထော၊ သမာဓီတိ အာဟ ‘‘စိတ္တေကဂ္ဂတာ’’တိ။ အနိစ္စာဒိနာ ဝိဝိဓေနာကာရေန ဒဿနတော ဝိပဿနာ၊ သင်္ခါရပရိဂ္ဂါဟကဉာဏံ။ တေနာဟ ‘‘သင်္ခါရပရိဂ္ဂဟဝိပဿနာဉာဏ’’န္တိ။

ဒုတိယေ အနရိယေဟိ ပရိယေသိတဗ္ဗတ္တာ အနရိယာနံ ပရိယေသနာတိ အနရိယပရိယေသနာ။ သယံ လာမကတာယ အနရိယာနံ ပရိယေသနာတိ ဝါ အနရိယပရိယေသနာ။ ဇရာသဘာဝန္တိ ဇီရဏပကတိကံ။ တတိယံ ဥတ္တာနမေဝ။

အဘိညာသုတ္တာဒိဝဏ္ဏနာ နိဋ္ဌိတာ။

၄-၁၀။ မာလုကျပုတ္တသုတ္တာဒိဝဏ္ဏနာ

၂၅၇-၂၆၃။ စတုတ္ထေ အပသာဒေတီတိ နိဂ္ဂဏှာတိ။ ဥဿာဒေတီတိ ပဂ္ဂဏှာတိ။ အပသာဒနာကာရံ ဥဿာဒနာကာရဉ္စ ဝိဘာဝေတုံ ‘‘ကထ’’န္တိအာဒိ အာရဒ္ဓံ။ ပဉ္စမာဒီနိ ဥတ္တာနာနေဝ။ သေသံ သုဝိညေယျမေဝ။

မာလုကျပုတ္တသုတ္တာဒိဝဏ္ဏနာ နိဋ္ဌိတာ။

အဘိညာဝဂ္ဂဝဏ္ဏနာ နိဋ္ဌိတာ။

ဣတိ မနောရထပူရဏိယာ အင်္ဂုတ္တရနိကာယ-အဋ္ဌကထာယ

စတုက္ကနိပါတဝဏ္ဏနာယ အနုတ္တာနတ္ထဒီပနာ သမတ္တာ။

ဒုတိယော ဘာဂေါ နိဋ္ဌိတော။