📜
(၁၃) ၃။ ဂိလာနဝဂ္ဂေါ
၄။ ဒုတိယဥပဋ္ဌာကသုတ္တဝဏ္ဏနာ
၁၂၄။ တတိယဿ စတုတ္ထေ နပ္ပဋိဗလောတိ ကာယဗလေန စ ဉာဏဗလေန စ အသမန္နာဂတော။ အာမိသန္တရောတိ အာမိသဟေတုကော စီဝရာဒီနိ ပစ္စာသီသမာနော။
၅-၆။ အနာယုဿာသုတ္တဒွယဝဏ္ဏနာ
၁၂၅-၁၂၆။ ပဉ္စမေ ¶ အနာယုဿာတိ အာယုပစ္ဆေဒနာ၊ န အာယုဝဍ္ဎနာ။ ဆဋ္ဌေပိ ဧသေဝ နယော။
၇။ ဝပကာသသုတ္တဝဏ္ဏနာ
၁၂၇။ သတ္တမေ နာလံ သင်္ဃမှာ ဝပကာသိတုန္တိ သင်္ဃတော နိက္ခမိတွာ ဧကကော ဝသိတုံ န ယုတ္တော။ ကာမဉ္စေသ သင်္ဃမဇ္ဈေပိ ဝသိတုံ အယုတ္တောဝ အသင်္ဃသောဘနတာယ၊ ဩဝါဒါနုသာသနိပ္ပဋိဗဒ္ဓတ္တာ ပန နိပ္ပရိယာယေနေဝ သင်္ဃမှာ ဝပကာသိတုံ န ယုတ္တော။ အလံ သင်္ဃမှာ ဝပကာသိတုန္တိ စာတုဒ္ဒိသတ္တာ သင်္ဃမှာ နိက္ခမ္မ ဧကကော ဝသိတုံ ယုတ္တော၊ သင်္ဃသောဘနတာယ ပန သင်္ဃေပိ ဝသိတုံ ယုတ္တောယေဝ။ အဋ္ဌမံ ဥတ္တာနတ္ထမေဝ။
၉။ ပရိကုပ္ပသုတ္တဝဏ္ဏနာ
၁၂၉။ နဝမေ အာပါယိကာတိ အပါယဂါမိနော။ နေရယိကာတိ နိရယဂါမိနော။ ပရိကုပ္ပာတိ ¶ ပရိကုပ္ပနသဘာဝါ ပုရာဏဝဏသဒိသာ။ အတေကိစ္ဆာတိ အကတ္တဗ္ဗပရိကမ္မာ။ ဒသမံ ဥတ္တာနတ္ထမေဝါတိ။
ဂိလာနဝဂ္ဂေါ တတိယော။