📜

(၂၆) ၆။ ဥပသမ္ပဒါဝဂ္ဂေါ

၁-၃။ ဥပသမ္ပာဒေတဗ္ဗသုတ္တာဒိဝဏ္ဏနာ

၂၅၁-၂၅၃။ ဆဋ္ဌဿ ပဌမေ ဥပသမ္ပာဒေတဗ္ဗန္တိ ဥပဇ္ဈာယေန ဟုတွာ ဥပသမ္ပာဒေတဗ္ဗံ။ ဒုတိယေ နိဿယော ဒါတဗ္ဗောတိ အာစရိယေန ဟုတွာ နိဿယော ဒါတဗ္ဗော။ တတိယေ သာမဏေရော ဥပဋ္ဌာပေတဗ္ဗောတိ ဥပဇ္ဈာယေန ဟုတွာ သာမဏေရော ဂဟေတဗ္ဗော။ ဣတိ ဣမာနိ တီဏိပိ သုတ္တာနိ ပဌမဗောဓိယံ ခီဏာသဝဝသေန ဝုတ္တာနိ။ စတုတ္ထာဒီနိ အနုပဒဝဏ္ဏနာတော ဥတ္တာနတ္ထာနေဝ။

၁။ သမ္မုတိပေယျာလာဒိဝဏ္ဏနာ

၂၇၂။ ဘတ္တုဒ္ဒေသကာဒီနံ ဝိနိစ္ဆယကထာ သမန္တပါသာဒိကာယ ဝိနယဋ္ဌကထာယံ (စူဠဝ။ အဋ္ဌ။ ၃၂၅) ဝုတ္တနယေန ဝေဒိတဗ္ဗာတိ။ သမ္မတော န ပေသေတဗ္ဗောတိ ပကတိယာ သမ္မတော ‘‘ဂစ္ဆ ဘတ္တာနိ ဥဒ္ဒိသာဟီ’’တိ န ပေသေတဗ္ဗော။

၂၇၃-၂၈၅။ သာဋိယဂ္ဂါဟာပကောတိ ဝဿိကသာဋိကာယ ဂါဟာပကော။ ပတ္တဂ္ဂါဟာပကောတိ ‘‘ယော စ တဿာ ဘိက္ခုပရိသာယ ပတ္တပရိယန္တော၊ သော တဿ ဘိက္ခုနော ပဒါတဗ္ဗော’’တိ ဧတ္ထ ဝုတ္တပတ္တဂ္ဂါဟာပကော။

၂၉၃-၃၀၂။ အာဇီဝကောတိ နဂ္ဂပရိဗ္ဗာဇကော။ နိဂဏ္ဌောတိ ပုရိမဘာဂပ္ပဋိစ္ဆန္နော။ မုဏ္ဍသာဝကောတိ နိဂဏ္ဌသာဝကော။ ဇဋိလကောတိ တာပသော။ ပရိဗ္ဗာဇကောတိ ဆန္နပရိဗ္ဗာဇကော။ မာဂဏ္ဍိကာဒယောပိ တိတ္ထိယာ ဧဝ။ ဧတေသံ ပန သီလေသု ပရိပူရကာရိတာယ အဘာဝေန သုက္ကပက္ခော န ဂဟိတော။ သေသမေတ္ထ ဥတ္တာနမေဝါတိ။

မနောရထပူရဏိယာ အင်္ဂုတ္တရနိကာယ-အဋ္ဌကထာယ

ပဉ္စကနိပါတဿ သံဝဏ္ဏနာ နိဋ္ဌိတာ။

နမော တဿ ဘဂဝတော အရဟတော သမ္မာသမ္ဗုဒ္ဓဿ

အင်္ဂုတ္တရနိကာယေ

ဆက္ကနိပါတ-အဋ္ဌကထာ

၁။ ပဌမပဏ္ဏာသကံ