📜

၅။ ဓမ္မိကဝဂ္ဂေါ

၁။ နာဂသုတ္တဝဏ္ဏနာ

၄၃။ ပဉ္စမဿ ပဌမေ အာယသ္မတာ အာနန္ဒေန သဒ္ဓိန္တိ ဣဒံ ‘‘အာယာမာနန္ဒာ’’တိ ထေရံ အာမန္တေတွာ ဂတတ္တာ ဝုတ္တံ၊ သတ္ထာ ပန အနူနေဟိ ပဉ္စဟိ ဘိက္ခုသတေဟိ ပရိဝုတော တတ္ထ အဂမာသီတိ ဝေဒိတဗ္ဗော။ တေနုပသင်္ကမီတိ တေဟေဝ ပဉ္စဟိ ဘိက္ခုသတေဟိ ပရိဝုတော ဥပသင်္ကမိ။ ပရိသိဉ္စိတွာတိ ဝေါဟာရဝစနမေတံ၊ နှာယိတွာတိ အတ္ထော။ ပုဗ္ဗာပယမာနောတိ ရတ္တဒုပဋ္ဋံ နိဝါသေတွာ ဥတ္တရာသင်္ဂစီဝရံ ဒွီဟိ ဟတ္ထေဟိ ဂဟေတွာ ပစ္ဆိမလောကဓာတုံ ပိဋ္ဌိတော ကတွာ ပုရတ္ထိမလောကဓာတုံ အဘိမုခေါ ဝေါဒကဘာဝေန ဂတ္တာနိ ပုဗ္ဗသဒိသာနိ ကုရုမာနော အဋ္ဌာသီတိ အတ္ထော။ ဘိက္ခုသင်္ဃောပိ တေန တေန ဌာနေန ဩတရိတွာ နှတွာ ပစ္စုတ္တရိတွာ သတ္ထာရံယေဝ ပရိဝါရေတွာ အဋ္ဌာသိ။ ဣတိ တသ္မိံ သမယေ အာကာသတော ပတမာနံ ရတ္တသုဝဏ္ဏကုဏ္ဍလံ ဝိယ သူရိယော ပစ္ဆိမလောကဓာတုံ ပဋိပဇ္ဇိ၊ ပရိသုဒ္ဓရဇတမဏ္ဍလော ဝိယ ပါစီနလောကဓာတုတော စန္ဒော အဗ္ဘုဂ္ဂဉ္ဆိ၊ မဇ္ဈဋ္ဌာနေပိ ပဉ္စဘိက္ခုသတပရိဝါရော သမ္မာသမ္ဗုဒ္ဓါ ဆဗ္ဗဏ္ဏဗုဒ္ဓရသ္မိယော ဝိဿဇ္ဇေတွာ ပုဗ္ဗကောဋ္ဌကနဒီတီရေ လောကံ အလင်္ကုရုမာနော အဋ္ဌာသိ။

တေန ခေါ ပန သမယေန…ပေ… သေတော နာမ နာဂေါတိ သေတဝဏ္ဏတာယ ဧဝံ လဒ္ဓနာမော ဟတ္ထိနာဂေါ။ မဟာတူရိယတာဠိတဝါဒိတေနာတိ မဟန္တေန တူရိယတာဠိတဝါဒိတေန။ တတ္ထ ပဌမံ သင်္ဃဋ္ဋနံ တာဠိတံ နာမ ဟောတိ၊ တတော ပရံ ဝါဒိတံ။ ဇနောတိ ဟတ္ထိဒဿနတ္ထံ သန္နိပတိတမဟာဇနော။ ဒိသွာ ဧဝမာဟာတိ အင်္ဂပစ္စင်္ဂါနိ ဃံသိတွာ နှာပေတွာ ဥတ္တာရေတွာ ဗဟိတီရေ ဌပေတွာ ဂတ္တာနိ ဝေါဒကာနိ ကတွာ ဟတ္ထာလင်္ကာရေန အလင်္ကတံ တံ မဟာနာဂံ ဒိသွာ ဣဒံ ‘‘အဘိရူပေါ ဝတ၊ ဘော’’တိ ပသံသာဝစနမာဟ။ ကာယုပပန္နောတိ သရီရသမ္ပတ္တိယာ ဥပပန္နော၊ ပရိပုဏ္ဏင်္ဂပစ္စင်္ဂေါတိ အတ္ထော။ အာယသ္မာ ဥဒါယီတိ ပဋိသမ္ဘိဒါပ္ပတ္တော ကာဠုဒါယိတ္ထေရော။ ဧတဒဝေါစာတိ တံ မဟာဇနံ ဟတ္ထိဿ ဝဏ္ဏံ ဘဏန္တံ ဒိသွာ ‘‘အယံ ဇနော အဟေတုကပဋိသန္ဓိယံ နိဗ္ဗတ္တဟတ္ထိနော ဝဏ္ဏံ ကထေတိ၊ န ဗုဒ္ဓဟတ္ထိဿ။ အဟံ ဒါနိ ဣမိနာ ဟတ္ထိနာဂေန ဥပမံ ကတွာ ဗုဒ္ဓနာဂဿ ဝဏ္ဏံ ကထေဿာမီ’’တိ စိန္တေတွာ ဧတံ ‘‘ဟတ္ထိမေဝ နု ခေါ၊ ဘန္တေ’’တိအာဒိဝစနံ အဝေါစ။ တတ္ထ မဟန္တန္တိ အာရောဟသမ္ပန္နံ။ ဗြဟန္တန္တိ ပရိဏာဟသမ္ပန္နံ။ ဧဝမာဟာတိ ဧဝံ ဝဒတိ။ အထ ဘဂဝါ ယသ္မာ အယံ နာဂသဒ္ဒေါ ဟတ္ထိမှိစေဝ အဿဂေါဏဥရဂရုက္ခမနုဿေသု စာပိ ပဝတ္တတိ၊ တသ္မာ ဟတ္ထိမ္ပိ ခေါတိအာဒိမာဟ။

အာဂုန္တိ ပါပကံ လာမကံ အကုသလဓမ္မံ။ တမဟံ နာဂေါတိ ဗြူမီတိ တံ အဟံ ဣမေဟိ တီဟိ ဒွါရေဟိ ဒသန္နံ အကုသလကမ္မပထာနံ ဒွါဒသန္နဉ္စ အကုသလစိတ္တာနံ အကရဏတော နာဂေါတိ ဝဒါမိ။ အယဉှိ န အာဂုံ ကရောတီတိ ဣမိနာ အတ္ထေန နာဂေါ။ ဣမာဟိ ဂါထာဟိ အနုမောဒါမီတိ ဣမာဟိ စတုသဋ္ဌိပဒါဟိ သောဠသဟိ ဂါထာဟိ အနုမောဒါမိ အဘိနန္ဒာမိ။

မနုဿဘူတန္တိ ဒေဝါဒိဘာဝံ အနုပဂန္တွာ မနုဿမေဝ ဘူတံ။ အတ္တဒန္တန္တိ အတ္တနာယေဝ ဒန္တံ၊ န အညေဟိ ဒမထံ ဥပနီတံ။ ဘဂဝါ ဟိ အတ္တနာ ဥပ္ပာဒိတေနေဝ မဂ္ဂဒမထေန စက္ခုတောပိ ဒန္တော၊ သောတတောပိ၊ ဃာနတောပိ၊ ဇိဝှာတောပိ၊ ကာယတောပိ၊ မနတောပီတိ ဣမေသု ဆသု ဌာနေသု ဒန္တော သန္တော နိဗ္ဗုတော ပရိနိဗ္ဗုတော။ တေနာဟ – ‘‘အတ္တဒန္တ’’န္တိ။ သမာဟိတန္တိ ဒုဝိဓေနာပိ သမာဓိနာ သမာဟိတံ။ ဣရိယမာနန္တိ ဝိဟရမာနံ။ ဗြဟ္မပထေတိ သေဋ္ဌပထေ၊ အမတပထေ၊ နိဗ္ဗာနပထေ။ စိတ္တဿူပသမေ ရတန္တိ ပဌမဇ္ဈာနေန ပဉ္စ နီဝရဏာနိ ဝူပသမေတွာ၊ ဒုတိယဇ္ဈာနေန ဝိတက္ကဝိစာရေ၊ တတိယဇ္ဈာနေန ပီတိံ၊ စတုတ္ထဇ္ဈာနေန သုခဒုက္ခံ ဝူပသမေတွာ တသ္မိံ စိတ္တဿူပသမေ ရတံ အဘိရတံ။

နမဿန္တီတိ ကာယေန နမဿန္တိ၊ ဝါစာယ နမဿန္တိ၊ မနသာ နမဿန္တိ၊ ဓမ္မာနုဓမ္မပဋိပတ္တိယာ နမဿန္တိ၊ သက္ကရောန္တိ ဂရုံ ကရောန္တိ။ သဗ္ဗဓမ္မာနပါရဂုန္တိ သဗ္ဗေသံ ခန္ဓာယတနဓာတုဓမ္မာနံ အဘိညာပါရဂူ၊ ပရိညာပါရဂူ၊ ပဟာနပါရဂူ၊ ဘာဝနာပါရဂူ၊ သစ္ဆိကိရိယာပါရဂူ၊ သမာပတ္တိပါရဂူတိ ဆဗ္ဗိဓေန ပါရဂမနေန ပါရဂတံ ပါရပ္ပတ္တံ မတ္ထကပ္ပတ္တံ။ ဒေဝါပိ တံ နမဿန္တီတိ ဒုက္ခပ္ပတ္တာ သုဗြဟ္မဒေဝပုတ္တာဒယော သုခပ္ပတ္တာ စ သဗ္ဗေဝ ဒသသဟဿစက္ကဝါဠဝါသိနော ဒေဝါပိ တုမှေ နမဿန္တိ။ ဣတိ မေ အရဟတော သုတန္တိ ဣတိ မယာ စတူဟိ ကာရဏေဟိ အရဟာတိ လဒ္ဓဝေါဟာရာနံ တုမှာကံယေဝ သန္တိကေ သုတန္တိ ဒီပေတိ။

သဗ္ဗသံယောဇနာတီတန္တိ သဗ္ဗာနိ ဒသဝိဓသံယောဇနာနိ အတိက္ကန္တံ။ ဝနာ နိဗ္ဗနမာဂတန္တိ ကိလေသဝနတော နိဗ္ဗနံ ကိလေသဝနရဟိတံ နိဗ္ဗာနံ အာဂတံ သမ္ပတ္တံ။ ကာမေဟိ နေက္ခမ္မရတန္တိ ဒုဝိဓေဟိ ကာမေဟိ နိက္ခန္တတ္တာ ပဗ္ဗဇ္ဇာ အဋ္ဌ သမာပတ္တိယော စတ္တာရော စ အရိယမဂ္ဂါ ကာမေဟိ နေက္ခမ္မံ နာမ၊ တတ္ထ ရတံ အဘိရတံ။ မုတ္တံ သေလာဝ ကဉ္စနန္တိ သေလဓာတုတော မုတ္တံ ကဉ္စနသဒိသံ။

သဗ္ဗေ အစ္စရုစီတိ သဗ္ဗသတ္တေ အတိက္ကမိတွာ ပဝတ္တရုစိ။ အဋ္ဌမကဉှိ အတိက္ကမိတွာ ပဝတ္တရုစိတာယ သောတာပန္နော အစ္စရုစိ နာမ၊ သောတာပန္နံ အတိက္ကမိတွာ ပဝတ္တရုစိတာယ သကဒါဂါမီ…ပေ… ခီဏာသဝံ အတိက္ကမိတွာ ပဝတ္တရုစိတာယ ပစ္စေကသမ္ဗုဒ္ဓါ၊ ပစ္စေကသမ္ဗုဒ္ဓံ အတိက္ကမိတွာ ပဝတ္တရုစိတာယ သမ္မာသမ္ဗုဒ္ဓါ အစ္စရုစိ နာမ။ ဟိမဝါဝညေ သိလုစ္စယေတိ ယထာ ဟိမဝါ ပဗ္ဗတရာဇာ အညေ ပဗ္ဗတေ အတိရောစတိ၊ ဧဝံ အတိရောစတီတိ အတ္ထော။ သစ္စနာမောတိ တစ္ဆနာမော ဘူတနာမော အာဂုံ အကရဏေနေဝ နာဂေါတိ ဧဝံ အဝိတထနာမော။

သောရစ္စန္တိ သုစိသီလံ။ အဝိဟိံသာတိ ကရုဏာ စ ကရုဏာပုဗ္ဗဘာဂေါ စ။ ပါဒါ နာဂဿ တေ ဒုဝေတိ တေ ဗုဒ္ဓနာဂဿ ဒုဝေ ပုရိမပါဒါ။

တပေါတိ ဓုတသမာဒါနံ။ ဗြဟ္မစရိယန္တိ အရိယမဂ္ဂသီလံ။ စရဏာ နာဂဿ တျာပရေတိ တေ ဗုဒ္ဓနာဂဿ အပရေ ဒွေ ပစ္ဆိမပါဒါ။ သဒ္ဓါဟတ္ထောတိ သဒ္ဓါမယာယ သောဏ္ဍာယ သမန္နာဂတော။ ဥပေက္ခာသေတဒန္တဝါတိ ဆဠင်္ဂုပေက္ခာမယေဟိ သေတဒန္တေဟိ သမန္နာဂတော။

သတိ ဂီဝါတိ ယထာ နာဂဿ အင်္ဂပစ္စင်္ဂသ္မိံ သိရာဇာလာနံ ဂီဝါ ပတိဋ္ဌာ၊ ဧဝံ ဗုဒ္ဓနာဂဿ သောရစ္စာဒီနံ ဓမ္မာနံ သတိ။ တေန ဝုတ္တံ – ‘‘သတိ ဂီဝါ’’တိ။ သိရော ပညာတိ ယထာ ဟတ္ထိနာဂဿ သိရော ဥတ္တမင်္ဂေါ၊ ဧဝံ ဗုဒ္ဓနာဂဿ သဗ္ဗညုတဉာဏံ။ တေန ဟိ သော သဗ္ဗဓမ္မေ ဇာနာတိ။ တေန ဝုတ္တံ – ‘‘သိရော ပညာ’’တိ။ ဝီမံသာ ဓမ္မစိန္တနာတိ ယထာ ဟတ္ထိနာဂဿ အဂ္ဂသောဏ္ဍော ဝီမံသာ နာမ ဟောတိ။ သော တာယ ထဒ္ဓမုဒုကံ ခါဒိတဗ္ဗာခါဒိတဗ္ဗဉ္စ ဝီမံသတိ၊ တတော ပဟာတဗ္ဗံ ပဇဟတိ၊ အာဒါတဗ္ဗံ အာဒိယတိ၊ ဧဝမေဝ ဗုဒ္ဓနာဂဿ ဓမ္မကောဋ္ဌာသပရိစ္ဆေဒကဉာဏသင်္ခါတာ ဓမ္မစိန္တနာ ဝီမံသာ။ တေန ဟိ ဉာဏေန သော ဘဗ္ဗာဘဗ္ဗေ ဇာနာတိ။ တေန ဝုတ္တံ – ‘‘ဝီမံသာ ဓမ္မစိန္တနာ’’တိ ။ ဓမ္မကုစ္ဆိသမာတပေါတိ ဓမ္မော ဝုစ္စတိ စတုတ္ထဇ္ဈာနသမာဓိ၊ ကုစ္ဆိယေဝ သမာတပေါ ကုစ္ဆိသမာတပေါ။ သမာတပေါ နာမ သမာတပနဋ္ဌာနံ။ ဓမ္မော ကုစ္ဆိသမာတပေါ အဿာတိ ဓမ္မကုစ္ဆိသမာတပေါ။ စတုတ္ထဇ္ဈာနသမာဓိသ္မိံ ဌိတဿ ဟိ တေ တေ ဣဒ္ဓိဝိဓာဒိဓမ္မာ ဣဇ္ဈန္တိ၊ တသ္မာ သော ကုစ္ဆိသမာတပေါတိ ဝုတ္တော။ ဝိဝေကောတိ ကာယစိတ္တဥပဓိဝိဝေကော။ ယထာ နာဂဿ ဝါလဓိ မက္ခိကာ ဝါရေတိ၊ ဧဝံ တထာဂတဿ ဝိဝေကော ဂဟဋ္ဌပဗ္ဗဇိတေ ဝါရေတိ။ တသ္မာ သော ဝါလဓီတိ ဝုတ္တော။

ဈာယီတိ ဒုဝိဓေန ဈာနေန ဈာယီ။ အဿာသရတောတိ နာဂဿ ဟိ အဿာသပဿာသာ ဝိယ ဗုဒ္ဓနာဂဿ ဖလသမာပတ္တိ၊ တတ္ထ ရတော၊ အဿာသပဿာသေဟိ ဝိယ တာယ ဝိနာ န ဝတ္တတီတိ အတ္ထော။ သဗ္ဗတ္ထ သံဝုတောတိ သဗ္ဗဒွါရေသု သံဝုတော။ အနဝဇ္ဇာနီတိ သမ္မာအာဇီဝေန ဥပ္ပန္နဘောဇနာနိ။ သာဝဇ္ဇာနီတိ ပဉ္စဝိဓမိစ္ဆာဇီဝဝသေန ဥပ္ပန္နဘောဇနာနိ။

အဏုံထူလန္တိ ခုဒ္ဒကဉ္စ မဟန္တဉ္စ။ သဗ္ဗံ ဆေတွာန ဗန္ဓနန္တိ သဗ္ဗံ ဒသဝိဓမ္ပိ သံယောဇနံ ဆိန္ဒိတွာန။ နုပလိပ္ပတိ လောကေနာတိ လောကေန သဒ္ဓိံ တဏှာမာနဒိဋ္ဌိလေပေဟိ န လိပ္ပတိ။ မဟာဂိနီတိ မဟာအဂ္ဂိ။ ဝိညူဟိ ဒေသိတာတိ ဣဓ ပဋိသမ္ဘိဒါပ္ပတ္တော ကာဠုဒါယိတ္ထေရောဝ ဝိညူ ပဏ္ဍိတော၊ တေန ဒေသိတာတိ အတ္ထော။ ဝိညဿန္တိ မဟာနာဂါ၊ နာဂံ နာဂေန ဒေသိတန္တိ ဥဒါယိတ္ထေရနာဂေန ဒေသိတံ ဗုဒ္ဓနာဂံ ဣတရေ ခီဏာသဝါ နာဂါ ဝိဇာနိဿန္တိ။

သရီရံဝိဇဟံ နာဂေါ၊ ပရိနိဗ္ဗိဿတီတိ ဗောဓိပလ္လင်္ကေ ကိလေသပရိနိဗ္ဗာနေန ပရိနိဗ္ဗုတော၊ ယမကသာလန္တရေ အနုပါဒိသေသာယ နိဗ္ဗာနဓာတုယာ ပရိနိဗ္ဗာယိဿတိ။ ဧဝံ ပဋိသမ္ဘိဒါပ္ပတ္တော ဥဒါယိတ္ထေရော သောဠသဟိ ဂါထာဟိ စတုသဋ္ဌိယာ ပဒေဟိ ဒသဗလဿ ဝဏ္ဏံ ကထေန္တော ဒေသနံ နိဋ္ဌာပေသိ ။ ဘဂဝါ အနုမောဒိ။ ဒေသနာဝသာနေ စတုရာသီတိပါဏသဟဿာနိ အမတပါနံ ပိဝိံသူတိ။

၂။ မိဂသာလာသုတ္တဝဏ္ဏနာ

၄၄။ ဒုတိယေ ကထံ ကထံ နာမာတိ ကေန ကေန ကာရဏေန။ အညေယျောတိ အာဇာနိတဗ္ဗော။ ယတြ ဟိ နာမာတိ ယသ္မိံ နာမ ဓမ္မေ။ သမသမဂတိကာတိ သမဘာဝေနေဝ သမဂတိကာ။ ဘဝိဿန္တီတိ ဇာတာ။ သကဒါဂါမိပတ္တော တုသိတံ ကာယံ ဥပပန္နောတိ သကဒါဂါမိပုဂ္ဂလော ဟုတွာ တုသိတဘဝနေယေဝ နိဗ္ဗတ္တော။ ကထံ ကထံ နာမာတိ ကေန ကေန နု ခေါ ကာရဏေန၊ ကိံ နု ခေါ ဇာနိတွာ ဒေသိတော၊ ဥဒါဟု အဇာနိတွာတိ။ ထေရော ကာရဏံ အဇာနန္တော ဧဝံ ခေါ ပနေတံ ဘဂိနိ ဘဂဝတာ ဗျာကတန္တိ အာဟ။

အမ္မကာ အမ္မကပညာတိ ဣတ္ထီ ဟုတွာ ဣတ္ထိသညာယ ဧဝ သမန္နာဂတာ။ ကေ စ ပုရိသပုဂ္ဂလပရောပရိယဉာဏေတိ ဧတ္ထ ပုရိသပုဂ္ဂလပရောပရိယဉာဏံ ဝုစ္စတိ ပုရိသပုဂ္ဂလာနံ တိက္ခမုဒုဝသေန ဣန္ဒြိယပရောပရိယဉာဏံ။ တသ္မာ ကာ စ ဗာလာ မိဂသာလာ၊ ကေ စ ပုရိသပုဂ္ဂလာနံ ဣန္ဒြိယပရောပရိယဉာဏေ အပ္ပဋိဟတဝိသယာ သမ္မာသမ္ဗုဒ္ဓါ၊ ဥဘယမေတံ ဒူရေ သုဝိဒူရေတိ အယမေတ္ထ သင်္ခေပေါ။

ဣဒါနိ မိဂသာလာယ အတ္တနော ဒူရဘာဝံ ဒဿေန္တော ဆယိမေ၊ အာနန္ဒာတိအာဒိမာဟ။ သောရတော ဟောတီတိ ပါပတော သုဋ္ဌု ဩရတော ဝိရတော ဟောတိ။ သုရတောတိပိ ပါဌော။ အဘိနန္ဒန္တိ သဗြဟ္မစာရီ ဧကတ္တဝါသေနာတိ တေန သဒ္ဓိံ ဧကတောဝါသေန သဗြဟ္မစာရီ အဘိနန္ဒန္တိ တုဿန္တိ။ ဧကန္တဝါသေနာတိပိ ပါဌော၊ သတတဝါသေနာတိ အတ္ထော။ သဝနေနပိ အကတံ ဟောတီတိ သောတဗ္ဗယုတ္တကံ အသုတံ ဟောတိ။ ဗာဟုသစ္စေနပိ အကတံ ဟောတီတိ ဧတ္ထ ဗာဟုသစ္စံ ဝုစ္စတိ ဝီရိယံ၊ ဝီရိယေန ကတ္တဗ္ဗယုတ္တကံ အကတံ ဟောတီတိ အတ္ထော။ ဒိဋ္ဌိယာပိ အပ္ပဋိဝိဒ္ဓံ ဟောတီတိ ဒိဋ္ဌိယာ ပဋိဝိဇ္ဈိတဗ္ဗံ အပ္ပဋိဝိဒ္ဓံ ဟောတိ။ သာမာယိကမ္ပိ ဝိမုတ္တိံ န လဘတီတိ ကာလာနုကာလံ ဓမ္မဿဝနံ နိဿာယ ပီတိပါမောဇ္ဇံ န လဘတိ။ ဟာနဂါမီယေဝ ဟောတီတိ ပရိဟာနိမေဝ ဂစ္ဆတိ။

ပမာဏိကာတိ ပုဂ္ဂလေသု ပမာဏဂ္ဂါဟကာ။ ပမိနန္တီတိ ပမေတုံ တုလေတုံ အာရဘန္တိ။ ဧကော ဟီနောတိ ဧကော ဂုဏေဟိ ဟီနော။ ဧကော ပဏီတောတိ ဧကော ဂုဏေဟိ ပဏီတော။ တံ ဟီတိ တံ ပမာဏကရဏံ။

အဘိက္ကန္တတရောတိ သုန္ဒရတရော။ ပဏီတတရောတိ ဥတ္တမတရော။ ဓမ္မသောတော နိဗ္ဗဟတီတိ သူရံ ဟုတွာ ပဝတ္တမာနဝိပဿနာဉာဏံ နိဗ္ဗဟတိ၊ အရိယဘူမိံ သမ္ပာပေတိ။ တဒန္တရံ ကော ဇာနေယျာတိ တံ အန္တရံ တံ ကာရဏံ အညတြ တထာဂတေန ကော ဇာနေယျာတိ အတ္ထော။

ကောဓမာနောတိ ကောဓော စ မာနော စ။ လောဘဓမ္မာတိ လောဘောယေဝ။ ဝစီသင်္ခါရာတိ အာလာပသလ္လာပဝသေန ဝစနာနေဝ။ ယော ဝါ ပနဿ မာဒိသောတိ ယော ဝါ ပန အညောပိ မယာ သဒိသော သမ္မာသမ္ဗုဒ္ဓါယေဝ အဿ၊ သော ပုဂ္ဂလေသု ပမာဏံ ဂဏှေယျာတိ အတ္ထော။ ခညတီတိ ဂုဏခဏနံ ပါပုဏာတိ။ ဣမေ ခေါ၊ အာနန္ဒ၊ ဆ ပုဂ္ဂလာတိ ဒွေ သောရတာ၊ ဒွေ အဓိဂတကောဓမာနလောဘဓမ္မာ၊ ဒွေ အဓိဂတကောဓမာနဝစီသင်္ခါရာတိ ဣမေ ဆ ပုဂ္ဂလာ။ ဂတိန္တိ ဉာဏဂတိံ။ ဧကင်္ဂဟီနာတိ ဧကေကေန ဂုဏင်္ဂေန ဟီနာ။ ပူရဏော သီလေန ဝိသေသီ အဟောသိ၊ ဣသိဒတ္တော ပညာယ။ ပူရဏဿ သီလံ ဣသိဒတ္တဿ ပညာဌာနေ ဌိတံ၊ ဣသိဒတ္တဿ ပညာ ပူရဏဿ သီလဋ္ဌာနေ ဌိတာတိ။

၃။ ဣဏသုတ္တဝဏ္ဏနာ

၄၅။ တတိယေ ဒါလိဒ္ဒိယန္တိ ဒလိဒ္ဒဘာဝေါ။ ကာမဘောဂိနောတိ ကာမေ ဘုဉ္ဇနကသတ္တဿ။ အဿကောတိ အတ္တနော သန္တကေန ရဟိတော။ အနာဠှိကောတိ န အဍ္ဎော။ ဣဏံ အာဒိယတီတိ ဇီဝိတုံ အသက္ကောန္တော ဣဏံ အာဒိယတိ။ ဝဍ္ဎိံ ပဋိဿုဏာတီတိ ဒါတုံ အသက္ကောန္တော ဝဍ္ဎိံ ဒဿာမီတိ ပဋိဇာနာတိ။ အနုစရန္တိပိ နန္တိ ပရိသမဇ္ဈဂဏမဇ္ဈာဒီသု အာတပဌပနပံသုဩကိရဏာဒီဟိ ဝိပ္ပကာရံ ပါပေန္တော ပစ္ဆတော ပစ္ဆတော အနုဗန္ဓန္တိ။ သဒ္ဓါ နတ္ထီတိ ဩကပ္ပနကသဒ္ဓါမတ္တကမ္ပိ နတ္ထိ။ ဟိရီ နတ္ထီတိ ဟိရီယနာကာရမတ္တကမ္ပိ နတ္ထိ။ ဩတ္တပ္ပံနတ္ထီတိ ဘာယနာကာရမတ္တကမ္ပိ နတ္ထိ။ ဝီရိယံ နတ္ထီတိ ကာယိကဝီရိယမတ္တကမ္ပိ နတ္ထိ။ ပညာ နတ္ထီတိ ကမ္မဿကတပညာမတ္တကမ္ပိ နတ္ထိ။ ဣဏာဒါနသ္မိံ ဝဒါမီတိ ဣဏဂ္ဂဟဏံ ဝဒါမိ။ မာ မံ ဇညူတိ မာ မံ ဇာနာတု။

ဒါလိဒ္ဒိယံ ဒုက္ခန္တိ ဓနဒလိဒ္ဒဘာဝေါ ဒုက္ခံ။ ကာမလာဘာဘိဇပ္ပိနန္တိ ကာမလာဘံ ပတ္ထေန္တာနံ။ ပါပကမ္မဝိနိဗ္ဗယောတိ ပါပကမ္မဝဍ္ဎကော။ သံသပ္ပတီတိ ပရိပ္ဖန္ဒတိ။ ဇာနန္တိ ဇာနန္တော။ ယဿ ဝိပ္ပဋိသာရဇာတိ ယေ အဿ ဝိပ္ပဋိသာရတော ဇာတာ။ ယောနိမညတရန္တိ ဧကံ တိရစ္ဆာနယောနိံ။ ဒဒံ စိတ္တံ ပသာဒယန္တိ စိတ္တံ ပသာဒေန္တော ဒဒမာနော။

ကဋဂ္ဂါဟောတိ ဇယဂ္ဂါဟော၊ အနပရာဓဂ္ဂါဟော ဟောတိ။ ဃရမေသိနောတိ ဃရာဝါသံ ပရိယေသန္တဿ ဝသမာနဿ ဝါ။ စာဂေါ ပုညံ ပဝဍ္ဎတီတိ စာဂေါတိ သင်္ခံ ဂတံ ပုညံ ဝဍ္ဎတိ။ စာဂါ ပုညန္တိ ဝါ ပါဌော။ ပတိဋ္ဌိတာတိ ပတိဋ္ဌိတသဒ္ဓါ နာမ သောတာပန္နဿ သဒ္ဓါ။ ဟိရိမနောတိ ဟိရိသမ္ပယုတ္တစိတ္တော။ နိရာမိသံ သုခန္တိ တီဏိ ဈာနာနိ နိဿာယ ဥပ္ပဇ္ဇနကသုခံ။ ဥပေက္ခန္တိ စတုတ္ထဇ္ဈာနုပေက္ခံ။ အာရဒ္ဓဝီရိယောတိ ပရိပုဏ္ဏပဂ္ဂဟိတဝီရိယော။ ဈာနာနိဥပသမ္ပဇ္ဇာတိ စတ္တာရိ ဈာနာနိ ပတွာ။ ဧကောဒိ နိပကော သတောတိ ဧကဂ္ဂစိတ္တော ကမ္မဿကတဉာဏသတီဟိ စ သမန္နာဂတော။

ဧဝံ ဉတွာ ယထာဘူတန္တိ ဧဝံ ဧတ္တကံ ကာရဏံ ယထာသဘာဝံ ဇာနိတွာ။ သဗ္ဗသံယောဇနက္ခယေတိ နိဗ္ဗာနေ။ သဗ္ဗသောတိ သဗ္ဗာကာရေန။ အနုပါဒါယာတိ အဂ္ဂဟေတွာ။ သမ္မာ စိတ္တံ ဝိမုစ္စတီတိ ဣဒံ ဝုတ္တံ ဟောတိ – သဗ္ဗသံယောဇနက္ခယသင်္ခါတေ နိဗ္ဗာနေ သဗ္ဗသော အနုပါဒိယိတွာ သမ္မာ ဟေတုနာ နယေန မဂ္ဂစိတ္တံ ဝိမုစ္စတိ။ ‘‘ဧတံ ဉတွာ ယထာဘူတံ၊ သဗ္ဗသံယောဇနက္ခယ’’န္တိပိ ပါဠိယံ လိခိတံ၊ တဿ ဧတံ သဗ္ဗသံယောဇနက္ခယသင်္ခါတံ နိဗ္ဗာနံ ယထာဘူတံ ဉတွာတိ အတ္ထော။ ပုရိမပစ္ဆိမေဟိ ပန သဒ္ဓိံ န ဃဋီယတိ။

တဿ သမ္မာ ဝိမုတ္တဿာတိ တဿ သမ္မာ ဝိမုတ္တဿ ခီဏာသဝဿ။ ဉာဏံ ဟောတီတိ ပစ္စဝေက္ခဏဉာဏံ ဟောတိ။ တာဒိနောတိ တံသဏ္ဌိတဿ။ အကုပ္ပာတိ အကုပ္ပာရမ္မဏတ္တာ ကုပ္ပကာရဏာနံ ကိလေသာနဉ္စ အဘာဝေန အကုပ္ပာ။ ဝိမုတ္တီတိ မဂ္ဂဝိမုတ္တိပိ ဖလဝိမုတ္တိပိ။ ဘဝသံယောဇနက္ခယေတိ ဘဝသံယောဇနက္ခယသင်္ခါတေ နိဗ္ဗာနေ ဘဝသံယောဇနာနဉ္စ ခယန္တေ ဥပ္ပန္နာ။ ဧတံ ခေါ ပရမံ ဉာဏန္တိ ဧတံ မဂ္ဂဖလဉာဏံ ပရမဉာဏံ နာမ။ သုခမနုတ္တရန္တိ ဧတဒေဝ မဂ္ဂဖလသုခံ အနုတ္တရံ သုခံ နာမ။ အာဏဏျမုတ္တမန္တိ သဗ္ဗေသံ အဏဏာနံ ခီဏာသဝေါ ဥတ္တမအဏဏော ၊ တသ္မာ အရဟတ္တဖလံ အာဏဏျမုတ္တမန္တိ အရဟတ္တဖလေန ဒေသနာယ ကူဋံ ဂဏှိ။ ဣမသ္မိဉ္စ သုတ္တေ ဝဋ္ဋမေဝ ကထေတွာ ဂါထာသု ဝဋ္ဋဝိဝဋ္ဋံ ကထိတန္တိ။

၄။ မဟာစုန္ဒသုတ္တဝဏ္ဏနာ

၄၆။ စတုတ္ထေ စေတီသူတိ စေတိရဋ္ဌေ။ သယံဇာတိယန္တိ ဧဝံနာမကေ နိဂမေ။ မဟာစုန္ဒောတိ ဓမ္မသေနာပတိဿ ကနိဋ္ဌဘာတိကော။ ဓမ္မေ ယောဂေါ အနုယောဂေါ ဧတေသန္တိ ဓမ္မယောဂါ။ ဓမ္မကထိကာနံ ဧတံ နာမံ။ ဈာယန္တီတိ ဈာယီ။ အပသာဒေန္တီတိ ဃဋ္ဋေန္တိ ဟိံသန္တိ။ ဈာယန္တီတိ စိန္တေန္တိ။ ပဇ္ဈာယန္တီတိအာဒီနိ ဥပသဂ္ဂဝသေန ဝဍ္ဎိတာနိ။ ကိမိမေ ဈာယန္တီတိ ကိံ နာမ ဣမေ ဈာယန္တိ။ ကိန္တိမေ ဈာယန္တီတိ ကိမတ္ထံ ဣမေ ဈာယန္တိ။ ကထံ ဣမေ ဈာယန္တီတိ ကေန ကာရဏေန ဣမေ ဈာယန္တိ။ အမတံ ဓာတုံ ကာယေန ဖုသိတွာ ဝိဟရန္တီတိ မရဏဝိရဟိတံ နိဗ္ဗာနဓာတုံ သန္ဓာယ ကမ္မဋ္ဌာနံ ဂဟေတွာ ဝိဟရန္တာ အနုက္ကမေန တံ နာမကာယေန ဖုသိတွာ ဝိဟရန္တိ။ ဂမ္ဘီရံ အတ္ထပဒန္တိ ဂုဠှံ ပဋိစ္ဆန္နံ ခန္ဓဓာတုအာယတနာဒိအတ္ထံ။ ပညာယအတိဝိဇ္ဈ ပဿန္တီတိ သဟဝိပဿနာယ မဂ္ဂပညာယ ပဋိဝိဇ္ဈိတွာ ပဿန္တိ။ ဣမသ္မိံ ပနတ္ထေ သမ္မသနပဋိဝေဓပညာပိ ဥဂ္ဂဟပရိပုစ္ဆာပညာပိ ဝဋ္ဋတိယေဝါတိ။

၅-၆။ သန္ဒိဋ္ဌိကသုတ္တဒွယဝဏ္ဏနာ

၄၇-၄၈။ ပဉ္စမေ သန္တံ ဝါ အဇ္ဈတ္တန္တိ နိယကဇ္ဈတ္တေ ဝိဇ္ဇမာနံ။ လောဘောတိအာဒီဟိ တီဏိ အကုသလမူလာနိ ဒဿိတာနိ။ လောဘဓမ္မာတိအာဒီဟိ တံသမ္ပယုတ္တကာ ဓမ္မာ။ ဆဋ္ဌေ ကာယသန္ဒောသန္တိ ကာယဒွါရဿ ဒုဿနာကာရံ။ သေသဒွယေပိ ဧသေဝ နယော။ ဣမေသု ဒွီသု သုတ္တေသု ပစ္စဝေက္ခဏာဝ ကထိတာ။

၇။ ခေမသုတ္တဝဏ္ဏနာ

၄၉။ သတ္တမေ ဝုသိတဝါတိ ဝုတ္ထဗြဟ္မစရိယဝါသော။ ကတကရဏီယောတိ စတူဟိ မဂ္ဂေဟိ ကတ္တဗ္ဗံ ကတွာ ဌိတော။ ဩဟိတဘာရောတိ ခန္ဓဘာရံ ကိလေသဘာရံ အဘိသင်္ခါရဘာရဉ္စ ဩတာရေတွာ ဌိတော။ အနုပ္ပတ္တသဒတ္ထောတိ သဒတ္ထော ဝုစ္စတိ အရဟတ္တံ၊ တံ ပတ္တောတိ အတ္ထော။ ပရိက္ခီဏဘဝသံယောဇနောတိ ခီဏဘဝဗန္ဓနော။ သမ္မဒညာ ဝိမုတ္တောတိ သမ္မာ ဟေတုနာ ကာရဏေန ဇာနိတွာ ဝိမုတ္တော။ တဿ န ဧဝံ ဟောတိ အတ္ထိ မေ သေယျောတိ ဝါတိအာဒီဟိ သေယျဿ သေယျောဟမသ္မီတိ မာနာဒယော တယော မာနာ ပဋိက္ခိတ္တာ။ န ဟိ ခီဏာသဝဿ ‘‘အတ္ထိ မယှံ သေယျော၊ အတ္ထိ သဒိသော၊ အတ္ထိ ဟီနော’’တိ မာနော ဟောတိ။ နတ္ထိ မေ သေယျောတိအာဒီဟိပိ တေယေဝ ပဋိက္ခိတ္တာ။ န ဟိ ခီဏာသဝဿ ‘‘အဟမေဝ သေယျော၊ အဟံ သဒိသော၊ အဟံ ဟီနော၊ အညေ သေယျာဒယော နတ္ထီ’’တိ ဧဝံ မာနော ဟောတိ။

အစိရပက္ကန္တေသူတိ အရဟတ္တံ ဗျာကရိတွာ အစိရံယေဝ ပက္ကန္တေသု။ အညံ ဗျာကရောန္တီတိ အရဟတ္တံ ကထေန္တိ။ ဟသမာနကာ မညေ အညံ ဗျာကရောန္တီတိ ဟသမာနာ ဝိယ ကထေန္တိ။ ဝိဃာတံ အာပဇ္ဇန္တီတိ ဒုက္ခံ အာပဇ္ဇန္တိ။

န ဥဿေသု န ဩမေသု၊ သမတ္တေ နောပနီယရေတိ ဧတ္ထ ဥဿာတိ ဥဿိတတာ သေယျပုဂ္ဂလာ။ ဩမာတိ ဟီနာ။ သမတ္တောတိ သဒိသော။ ဣတိ ဣမေသု တီသုပိ သေယျဟီနသဒိသေသု ခီဏာသဝါ မာနေန န ဥပနီယရေ၊ န ဥပနေန္တိ၊ န ဥပဂစ္ဆန္တီတိ အတ္ထော။ ခီဏာ ဇာတီတိ ခီဏာ တေသံ ဇာတိ။ ဝုသိတံ ဗြဟ္မစရိယန္တိ ဝုတ္ထံ မဂ္ဂဗြဟ္မစရိယံ။ စရန္တိ သံယောဇနဝိပ္ပမုတ္တာတိ သဗ္ဗသံယောဇနေဟိ ဝိမုတ္တာ ဟုတွာ စရန္တိ။ သုတ္တေပိ ဂါထာယမ္ပိ ခီဏာသဝေါ ကထိတော။

၈။ ဣန္ဒြိယသံဝရသုတ္တဝဏ္ဏနာ

၅၀။ အဋ္ဌမေ ဟတူပနိသံ ဟောတီတိ ဟတူပနိဿယံ ဟောတိ။ သီလဝိပန္နဿာတိ ဝိပန္နသီလဿ။ ယထာဘူတဉာဏဒဿနန္တိ တရုဏဝိပဿနာဉာဏံ။ နိဗ္ဗိဒါဝိရာဂေါတိ ဧတ္ထ နိဗ္ဗိဒါ ဗလဝဝိပဿနာ၊ ဝိရာဂေါ အရိယမဂ္ဂေါ။ ဝိမုတ္တိဉာဏဒဿနန္တိ ဧတ္ထ ဝိမုတ္တီတိ အရဟတ္တဖလံ၊ ဉာဏဒဿနန္တိ ပစ္စဝေက္ခဏဉာဏံ။ ဥပနိဿယသမ္ပန္နံ ဟောတီတိ သမ္ပန္နဥပနိဿယံ ဟောတိ။ ဣမသ္မိံ သုတ္တေ သီလာနုရက္ခဏဣန္ဒြိယသံဝရော ကထိတော။

၉။ အာနန္ဒသုတ္တဝဏ္ဏနာ

၅၁။ နဝမေ ကိတ္တာဝတာတိ ကိတ္တကေန။ အဿုတဉ္စေဝါတိ အညသ္မိံ ကာလေ အဿုတပုဗ္ဗံ။ န သမ္မောသံ ဂစ္ဆန္တီတိ ဝိနာသံ န ဂစ္ဆန္တိ။ စေတသော သမ္ဖုဋ္ဌပုဗ္ဗာတိ စိတ္တေန ဖုသိတပုဗ္ဗာ။ သမုဒါစရန္တီတိ မနောဒွါရေ စရန္တိ။ အဝိညာတဉ္စ ဝိဇာနာတီတိ အညသ္မိံ ကာလေ အဝိညာတကာရဏံ ဇာနာတိ။ ပရိယာပုဏာတီတိ ဝဠဉ္ဇေတိ ကထေတိ။ ဒေသေတီတိ ပကာသေတိ။ ပရံ ဝါစေတီတိ ပရံ ဥဂ္ဂဏှာပေတိ။

အာဂတာဂမာတိ ဒီဃာဒီသု ယော ကောစိ အာဂမော အာဂတော ဧတေသန္တိ အာဂတာဂမာ။ ဓမ္မဓရာတိ သုတ္တန္တပိဋကဓရာ။ ဝိနယဓရာတိ ဝိနယပိဋကဓရာ။ မာတိကာဓရာတိ ဒွေပါတိမောက္ခဓရာ။ ပရိပုစ္ဆတီတိ အနုသန္ဓိပုဗ္ဗာပရံ ပုစ္ဆတိ။ ပရိပဉှတီတိ ဣဒဉ္စိဒဉ္စ ပုစ္ဆိဿာမီတိ ပရိတုလတိ ပရိစ္ဆိန္ဒတိ။ ဣဒံ၊ ဘန္တေ၊ ကထန္တိ၊ ဘန္တေ၊ ဣဒံ အနုသန္ဓိပုဗ္ဗာပရံ ကထံ ဟောတီတိ ပုစ္ဆတိ။ ဣမဿ ကွတ္ထောတိ ဣမဿ ဘာသိတဿ ကော အတ္ထောတိ ပုစ္ဆတိ။ အဝိဝဋန္တိ အဝိဝရိတံ။ ဝိဝရန္တီတိ ပါကဋံ ကရောန္တိ။ ကင်္ခါဌာနိယေသူတိ ကင်္ခါယ ကာရဏဘူတေသု။ တတ္ထ ယသ္မိံ ဓမ္မေ ကင်္ခါ ဥပ္ပဇ္ဇတိ၊ သွေဝ ကင်္ခါဌာနိယော နာမာတိ ဝေဒိတဗ္ဗော။

၁၀။ ခတ္တိယသုတ္တဝဏ္ဏနာ

၅၂။ ဒသမေ ဘောဂါဓိပ္ပာယာတိ ဘောဂသံဟရဏတ္ထံ ဌပိတာဓိပ္ပာယာ ပဝတ္တအဇ္ဈာသယာ။ ပညူပဝိစာရာတိ ပညဝန္တော ဘဝေယျာမာတိ ဧဝံ ပညတ္ထာယ ပဝတ္တူပဝိစာရာ။ အယမေဝ နေသံ ဝိစာရော စိတ္တေ ဥပဝိစရတိ။ ဗလာဓိဋ္ဌာနာတိ ဗလကာယာဓိဋ္ဌာနာ။ ဗလကာယဉှိ လဒ္ဓါ တေ လဒ္ဓပတိဋ္ဌာ နာမ ဟောန္တိ။ ပထဝိဘိနိဝေသာတိ ပထဝိသာမိနော ဘဝိဿာမာတိ ဧဝံ ပထဝိအတ္ထာယ ကတစိတ္တာဘိနိဝေသာ။ ဣဿရိယပရိယောသာနာတိ ရဇ္ဇာဘိသေကပရိယောသာနာ။ အဘိသေကဉှိ ပတွာ တေ ပရိယောသာနပ္ပတ္တာ နာမ ဟောန္တိ။ ဣမိနာ နယေန သဗ္ဗတ္ထ အတ္ထော ဝေဒိတဗ္ဗော။

သေသပဒေသု ပနေတ္ထ အယမဓိပ္ပာယော – ဗြာဟ္မဏာ တာဝ မန္တေ လဘိတွာ လဒ္ဓပတိဋ္ဌာ နာမ ဟောန္တိ၊ ဂဟပတိကာ ယံကိဉ္စိ သိပ္ပံ၊ ဣတ္ထီ ကုလဒါယဇ္ဇသာမိကံ ပုတ္တံ၊ စောရာ ယံကိဉ္စိ အာဝုဓသတ္ထံ ၊ သမဏာ သီလပရိပုဏ္ဏာ လဒ္ဓပတိဋ္ဌာ နာမ ဟောန္တိ။ တသ္မာ မန္တာဓိဋ္ဌာနာတိအာဒီနိ ဝုတ္တာနိ။

ဗြာဟ္မဏာနဉ္စ ‘‘ယညံ ယဇိဿာမာ’’တိ စိတ္တံ အဘိနိဝိသတိ၊ ဗြဟ္မလောကေ ပတ္တေ ပရိယောသာနပ္ပတ္တာ နာမ ဟောန္တိ။ တသ္မာ တေ ယညာဘိနိဝေသာ ဗြဟ္မလောကပရိယောသာနာတိ ဝုတ္တာ။ ကမ္မန္တကရဏတ္ထာယ မနော ဧတေသံ အဘိနိဝိသတီတိ ကမ္မန္တာဘိနိဝေသာ။ ကမ္မေ နိဋ္ဌိတေ ပရိယောသာနပ္ပတ္တာ နာမ ဟောန္တီတိ နိဋ္ဌိတကမ္မန္တပရိယောသာနာ။

ပုရိသာဓိပ္ပာယာတိ ပုရိသေသု ပဝတ္တအဇ္ဈာသယာ။ အလင်္ကာရတ္ထာယ မနော ဥပဝိစရတိ ဧတိဿာတိ အလင်္ကာရူပဝိစာရာ။ အသပတ္တီ ဟုတွာ ဧကိကာဝ ဃရေ ဝသေယျန္တိ ဧဝမဿာ စိတ္တံ အဘိနိဝိသတီတိ အသပတ္တီဘိနိဝေသာ။ ဃရာဝါသိဿရိယေ လဒ္ဓေ ပရိယောသာနပ္ပတ္တာ နာမ ဟောန္တီတိ ဣဿရိယပရိယောသာနာ။

ပရဘဏ္ဍဿ အာဒါနေ အဓိပ္ပာယော ဧတေသန္တိ အာဒါနာဓိပ္ပာယာ။ ဂဟနေ နိလီယနဋ္ဌာနေ ဧတေသံ မနော ဥပဝိစရတီတိ ဂဟနူပဝိစာရာ။ အန္ဓကာရတ္ထာယ ဧတေသံ စိတ္တံ အဘိနိဝိသတီတိ အန္ဓကာရာဘိနိဝေသာ။ အဒဿနပ္ပတ္တာ ပရိယောသာနပ္ပတ္တာ ဟောန္တီတိ အဒဿနပရိယောသာနာ။

အဓိဝါသနက္ခန္တိယဉ္စ သုစိဘာဝသီလေ စ အဓိပ္ပာယော ဧတေသန္တိ ခန္တိသောရစ္စာဓိပ္ပာယာ။ အကိဉ္စနဘာဝေ နိဂ္ဂဟဏဘာဝေ စိတ္တံ ဧတေသံ အဘိနိဝိသတီတိ အာကိဉ္စညာဘိနိဝေသာ။ နိဗ္ဗာနပ္ပတ္တာ ပရိယောသာနပ္ပတ္တာ ဟောန္တီတိ နိဗ္ဗာနပရိယောသာနာ။

၁၁။ အပ္ပမာဒသုတ္တဝဏ္ဏနာ

၅၃။ ဧကာဒသမေ သမဓိဂ္ဂယှာတိ သုဋ္ဌု ဂဏှိတွာ။ ဇင်္ဂလာနံ ပါဏာနန္တိ ပထဝီတလစာရီနံ သပါဒကပါဏာနံ။ ပဒဇာတာနီတိ ပဒါနိ။ သမောဓာနံ ဂစ္ဆန္တီတိ ဩဓာနံ ဥပနိက္ခေပံ ဂစ္ဆန္တိ။ အဂ္ဂမက္ခာယတီတိ သေဋ္ဌံ အက္ခာယတိ။ ပဗ္ဗဇလာယကောတိ ပဗ္ဗဇတိဏစ္ဆေဒကော။ ဩဓုနာတီတိ ဟေဋ္ဌာ မုခံ ဓုနာတိ။ နိဓုနာတီတိ ဥဘောဟိ ပဿေဟိ ဓုနာတိ။ နိစ္ဆာဒေတီတိ ဗာဟာယ ဝါ ပဟရတိ၊ ရုက္ခေ ဝါ ပဟရတိ။ အမ္ဗပိဏ္ဍိယာတိ အမ္ဗဖလပိဏ္ဍိယာ။ ဝဏ္ဋူပနိဗန္ဓနာနီတိ ဝဏ္ဋေ ဥပနိဗန္ဓနာနိ ၊ ဝဏ္ဋေ ဝါ ပတိဋ္ဌိတာနိ။ တဒနွယာနိ ဘဝန္တီတိ ဝဏ္ဋာနုဝတ္တကာနိ ဘဝန္တိ၊ အမ္ဗပိဏ္ဍိဒဏ္ဍကာနုဝတ္တကာနိ ဘဝန္တီတိပိ အတ္ထော။ ခုဒ္ဒရာဇာနောတိ ခုဒ္ဒကရာဇာနော၊ ပကတိရာဇာနော ဝါ။

၁၂။ ဓမ္မိကသုတ္တဝဏ္ဏနာ

၅၄။ ဒွါဒသမေ သဗ္ဗသောတိ သဗ္ဗေသု။ သတ္တသု ဝိဟာရေသူတိ သတ္တသု ပရိဝေဏေသု။ ပရိဘာသတီတိ ပရိဘဝတိ ဘယံ ဥပဒံသေတိ။ ဝိဟိံသတီတိ ဝိဟေဌေတိ။ ဝိတုဒတီတိ ဝိဇ္ဈတိ။ ရောသေတိ ဝါစာယာတိ ဝါစာယ ဃဋ္ဋေတိ။ ပက္ကမန္တီတိ ဒိသာ ပက္ကမန္တိ။ န သဏ္ဌဟန္တီတိ နပ္ပတိဋ္ဌဟန္တိ။ ရိဉ္စန္တီတိ ဆဍ္ဍေန္တိ ဝိဿဇ္ဇေန္တိ။ ပဗ္ဗာဇေယျာမာတိ နီဟရေယျာမ။ ဟန္ဒာတိ ဝဝဿဂ္ဂတ္ထေ နိပါတော။ အလန္တိ ယုတ္တမေတံ၊ ယံ တံ ပဗ္ဗာဇေယျုန္တိ အတ္ထော။ ကိံ တေ ဣမိနာတိ ကိံ တဝ ဣမိနာ ဇာတိဘူမိယံ ဝါသေန။ တီရဒဿိံ သကုဏန္တိ ဒိသာကာကံ။ မုဉ္စန္တီတိ ဒိသာဒဿနတ္ထံ ဝိဿဇ္ဇေန္တိ။ သာမန္တာတိ အဝိဒူရေ။ သမန္တာတိပိ ပါဌော၊ သမန္တတောတိ အတ္ထော။ အဘိနိဝေသောတိ ပတ္ထရိတွာ ဌိတသာခါနံ နိဝေသော။ မူလသန္တာနကာနန္တိ မူလာနံ နိဝေသော။

အာဠှကထာလိကာတိ တဏ္ဍုလာဠှကဿ ဘတ္တပစနထာလိကာ။ ခုဒ္ဒံ မဓုန္တိ ခုဒ္ဒမက္ခိကာဟိ ကတံ ဒဏ္ဍကမဓုံ။ အနေလကန္တိ နိဒ္ဒေါသံ။ န စ သုဒံ အညမညဿ ဖလာနိ ဟိံသန္တီတိ အညမညဿ ကောဋ္ဌာသေ ဖလာနိ န ဟိံသန္တိ။ အတ္တနော ကောဋ္ဌာသေဟိ မူလံ ဝါ တစံ ဝါ ပတ္တံ ဝါ ဆိန္ဒန္တော နာမ နတ္ထိ၊ အတ္တနော အတ္တနော သာခါယ ဟေဋ္ဌာ ပတိတာနေဝ ပရိဘုဉ္ဇန္တိ။ အညဿ ကောဋ္ဌာသတော အညသ ကောဋ္ဌာသံ ပရိဝတ္တိတွာ ဂတမ္ပိ ‘‘န အမှာကံ သာခါယ ဖလ’’န္တိ ဉတွာ နော ခါဒန္တိ။ ယာဝဒတ္ထံ ဘက္ခိတွာတိ ကဏ္ဌပ္ပမာဏေန ခါဒိတွာ။ သာခံ ဘဉ္ဇိတွာတိ ဆတ္တပ္ပမာဏမတ္တံ ဆိန္ဒိတွာ ဆာယံ ကတွာ ပက္ကာမိ။ ယတြ ဟိ နာမာတိ ယော ဟိ နာမ။ ပက္ကမိဿတီတိ ပက္ကန္တော။ နာဒါသီတိ ဒေဝတာယ အာနုဘာဝေန ဖလမေဝ န ဂဏှိ။ ဧဝဉှိ သာ အဓိဋ္ဌာသိ။

တေနုပသင်္ကမီတိ ဇနပဒဝါသီဟိ ဂန္တွာ၊ ‘‘မဟာရာဇ၊ ရုက္ခော ဖလံ န ဂဏှိ၊ အမှာကံ နု ခေါ ဒေါသော တုမှာက’’န္တိ ဝုတ္တေ ‘‘နေဝ မယှံ ဒေါသော အတ္ထိ၊ န ဇာနပဒါနံ၊ အမှာကံ ဝိဇိတေ အဓမ္မော နာမ န ဝတ္တတိ၊ ကေန နု ခေါ ကာရဏေန ရုက္ခော န ဖလိတော၊ သက္ကံ ဥပသင်္ကမိတွာ ပုစ္ဆိဿာမီ’’တိ စိန္တေတွာ ယေန သက္ကော ဒေဝါနမိန္ဒော တေနုပသင်္ကမိ။ ပဝတ္တေသီတိ ပရိဝတ္တေသိ။ ဥမ္မူလမကာသီတိ ဥဒ္ဓံမူလံ အကာသိ။ အပိ နု တွန္တိ အပိ နု တဝ။ အဋ္ဌိတာယေဝါတိ အဋ္ဌိတာယ ဧဝ။ သစ္ဆဝီနီတိ သမာနစ္ဆဝီနိ ပကတိဋ္ဌာနေ ဌိတာနိ။ န ပစ္စက္ကောသတီတိ နပ္ပဋိက္ကောသတိ။ ရောသန္တန္တိ ဃဋ္ဋေန္တံ။ ဘဏ္ဍန္တန္တိ ပဟရန္တံ။

သုနေတ္တောတိ နေတ္တာ ဝုစ္စန္တိ အက္ခီနိ၊ တေသံ သုန္ဒရတာယ သုနေတ္တော။ တိတ္ထကရောတိ သုဂတိဩဂါဟနတိတ္ထဿ ကာရကော။ ဝီတရာဂေါတိ ဝိက္ခမ္ဘနဝသေန ဝိဂတရာဂေါ။ ပသဝတီတိ ပဋိလဘတိ။ ဒိဋ္ဌိသမ္ပန္နန္တိ ဒဿနသမ္ပန္နံ၊ သောတာပန္နန္တိ အတ္ထော။ ခန္တိန္တိ အတ္တနော ဂုဏခဏနံ။ ယထာမံ သဗြဟ္မစာရီသူတိ ယထာ ဣမံ သဗြဟ္မစာရီသု အက္ကောသနပရိဘာသနံ၊ အညံ ဧဝရူပံ ဂုဏခန္တိံ န ဝဒါမီတိ အတ္ထော။ န နော သမသဗြဟ္မစာရီသူတိ ဧတ္ထ သမဇနော နာမ သကဇနော ဝုစ္စတိ။ တသ္မာ န နော သကေသု သမာနဗြဟ္မစာရီသု စိတ္တာနိ ပဒုဋ္ဌာနိ ဘဝိဿန္တီတိ အယမေတ္ထ အတ္ထော။

ဇောတိပါလော စ ဂေါဝိန္ဒောတိ နာမေန ဇောတိပါလော ဌာနေန မဟာဂေါဝိန္ဒော။ သတ္တပုရောဟိတောတိ ရေဏုအာဒီနံ သတ္တန္နံ ရာဇူနံ ပုရောဟိတော။ အဟိံသကာ အတီတံသေတိ ဧတေ ဆ သတ္ထာရော အတီတံသေ အဟိံသကာ အဟေသုံ။ နိရာမဂန္ဓာတိ ကောဓာမဂန္ဓေန နိရာမဂန္ဓာ။ ကရုဏေဝိမုတ္တာတိ ကရုဏဇ္ဈာနေ အဓိမုတ္တာ၊ ကရုဏာယ စ ကရုဏာပုဗ္ဗဘာဂေ စ ဌိတာ။ ယေတေတိ ဧတေ၊ အယမေဝ ဝါ ပါဌော။ န သာဓုရူပံ အာသီဒေတိ သာဓုသဘာဝံ န ဃဋ္ဋေယျ။ ဒိဋ္ဌိဋ္ဌာနပ္ပဟာယိနန္တိ ဒွါသဋ္ဌိဒိဋ္ဌိဂတပ္ပဟာယိနံ။ သတ္တမောတိ အရဟတ္တတော ပဋ္ဌာယ သတ္တမော။ အဝီတရာဂေါတိ အဝိဂတရာဂေါ။ ဧတေန အနာဂါမိဘာဝံ ပဋိက္ခိပတိ။ ပဉ္စိန္ဒြိယာ မုဒူတိ ပဉ္စ ဝိပဿနိန္ဒြိယာနိ မုဒူနိ။ တဿ ဟိ တာနိ သကဒါဂါမိံ ဥပါဒါယ မုဒူနိ နာမ ဟောန္တိ။ ဝိပဿနာတိ သင်္ခါရပရိဂ္ဂဟဉာဏံ။ ပုဗ္ဗေဝ ဥပဟညတီတိ ပဌမတရညေဝ ဥပဟညတိ။ အက္ခတောတိ ဂုဏခဏနေန အက္ခတော အနုပဟတော ဟုတွာ။ သေသံ သဗ္ဗတ္ထ ဥတ္တာနမေဝါတိ။

ဓမ္မိကဝဂ္ဂေါ ပဉ္စမော။

ပဌမပဏ္ဏာသကံ နိဋ္ဌိတံ။

၂။ ဒုတိယပဏ္ဏာသကံ