📜

၇။ ဒေဝတာဝဂ္ဂေါ

၁-၃။ အနာဂါမိဖလသုတ္တာဒိဝဏ္ဏနာ

၆၅-၆၇။ သတ္တမဿ ပဌမေ အဿဒ္ဓိယန္တိ အဿဒ္ဓဘာဝံ။ ဒုပ္ပညတန္တိ နိပ္ပညဘာဝံ။ ဒုတိယေ ပမာဒန္တိ သတိဝိပ္ပဝါသံ။ တတိယေ အာဘိသမာစာရိကန္တိ ဥတ္တမသမာစာရဘူတံ ဝတ္တဝသေန ပဏ္ဏတ္တိသီလံ။ သေခဓမ္မန္တိ သေခပဏ္ဏတ္တိသီလံ။ သီလာနီတိ စတ္တာရိ မဟာသီလာနိ။

၄။ သင်္ဂဏိကာရာမသုတ္တဝဏ္ဏနာ

၆၈။ စတုတ္ထေ သင်္ဂဏိကာရာမောတိ ဂဏသင်္ဂဏိကာရာမော။ သုတ္တန္တိကဂဏာဒီသု ပန ဂဏေသု အတ္တနော ဝါ ပရိသာသင်္ခါတေ ဂဏေ ရမတီတိ ဂဏာရာမော။ ပဝိဝေကေတိ ကာယဝိဝေကေ။ စိတ္တဿ နိမိတ္တန္တိ သမာဓိဝိပဿနာစိတ္တဿ နိမိတ္တံ သမာဓိဝိပဿနာကာရံ။ သမ္မာဒိဋ္ဌိန္တိ ဝိပဿနာသမ္မာဒိဋ္ဌိံ။ သမာဓိန္တိ မဂ္ဂသမာဓိဉ္စေဝ ဖလသမာဓိဉ္စ။ သံယောဇနာနီတိ ဒသ သံယောဇနာနိ။ နိဗ္ဗာနန္တိ အပစ္စယပရိနိဗ္ဗာနံ။

၅။ ဒေဝတာသုတ္တဝဏ္ဏနာ

၆၉။ ပဉ္စမေ သောဝစဿတာတိ သုဗ္ဗစဘာဝေါ။ ကလျာဏမိတ္တတာတိ သုစိမိတ္တတာ။ သတ္ထုဂါရဝေါတိ သတ္ထရိ ဂါရဝယုတ္တော။ ဧသ နယော သဗ္ဗတ္ထ။

၆။ သမာဓိသုတ္တဝဏ္ဏနာ

၇၀။ ဆဋ္ဌေ န သန္တေနာတိ ပစ္စနီကကိလေသေဟိ အဝူပသန္တေန။ န ပဏီတေနာတိ န အတပ္ပကေန။ န ပဋိပ္ပဿဒ္ဓိလဒ္ဓေနာတိ ကိလေသပ္ပဋိပ္ပဿဒ္ဓိယာ အလဒ္ဓေန အပ္ပတ္တေန။ န ဧကောဒိဘာဝါဓိဂတေနာတိ န ဧကဂ္ဂဘာဝံ ဥပဂတေန။

၇။ သက္ခိဘဗ္ဗသုတ္တဝဏ္ဏနာ

၇၁။ သတ္တမေ တတြ တတြာတိ တသ္မိံ တသ္မိံ ဝိသေသေ။ သက္ခိဘဗ္ဗတန္တိ ပစ္စက္ခဘာဝံ။ အာယတနေတိ ကာရဏေ။ ဟာနဘာဂိယာဒယော ဝိသုဒ္ဓိမဂ္ဂေ (ဝိသုဒ္ဓိ။ ၁။၃၉) သံဝဏ္ဏိတာ။ အသက္ကစ္စကာရီတိ န သုကတကာရီ၊ န အာဒရကာရီ။ အသပ္ပာယကာရီတိ န သပ္ပာယကာရီ၊ န ဥပကာရဘူတဓမ္မကာရီ။

၈။ ဗလသုတ္တဝဏ္ဏနာ

၇၂။ အဋ္ဌမေ ဗလတန္တိ ဗလဘာဝံ ထာမဘာဝံ။ အသာတစ္စကာရီတိ န သတတကာရီ။ သေသံ ဟေဋ္ဌာ ဝုတ္တနယမေဝ။

၉-၁၀။ တဇ္ဈာနသုတ္တဒွယဝဏ္ဏနာ

၇၃-၇၄။ နဝမေ န ယထာဘူတံ သမ္မပ္ပညာယ သုဒိဋ္ဌော ဟောတီတိ ဝတ္ထုကာမကိလေသကာမေသု အာဒီနဝေါ န ယထာသဘာဝတော ဈာနပညာယ သုဒိဋ္ဌော ဟောတိ။ ဒသမံ ဥတ္တာနတ္ထမေဝါတိ။

ဒေဝတာဝဂ္ဂေါ သတ္တမော။