📜

၈။ အရဟတ္တဝဂ္ဂေါ

၁။ ဒုက္ခသုတ္တဝဏ္ဏနာ

၇၅။ အဋ္ဌမဿ ပဌမေ သဝိဃာတန္တိ သဥပဃာတံ သောပဒ္ဒဝံ။ သပရိဠာဟန္တိ ကာယိကစေတသိကေန ပရိဠာဟေန သပရိဠာဟံ။ ပါဋိကင်္ခါတိ ဣစ္ဆိတဗ္ဗာ အဝဿံဘာဝိနီ။

၂။ အရဟတ္တသုတ္တဝဏ္ဏနာ

၇၆။ ဒုတိယေ မာနန္တိ ဇာတိအာဒီဟိ မညနံ။ ဩမာနန္တိ ဟီနောဟမသ္မီတိ မာနံ။ အတိမာနန္တိ အတိက္ကမိတွာ ပဝတ္တံ အစ္စုဏ္ဏတိမာနံ။ အဓိမာနန္တိ အဓိဂတမာနံ။ ထမ္ဘန္တိ ကောဓမာနေဟိ ထဒ္ဓဘာဝံ။ အတိနိပါတန္တိ ဟီနဿ ဟီနောဟမသ္မီတိ မာနံ။

၃။ ဥတ္တရိမနုဿဓမ္မသုတ္တဝဏ္ဏနာ

၇၇။ တတိယေ ဥတ္တရိမနုဿဓမ္မာတိ မနုဿဓမ္မတော ဥတ္တရိ။ အလမရိယဉာဏဒဿနဝိသေသန္တိ အရိယဘာဝံ ကာတုံ သမတ္ထံ ဉာဏဒဿနဝိသေသံ၊ စတ္တာရော မဂ္ဂေ စတ္တာရိ စ ဖလာနီတိ အတ္ထော။ ကုဟနန္တိ တိဝိဓံ ကုဟနဝတ္ထုံ။ လပနန္တိ လာဘတ္ထိကတာယ ဥက္ခိပိတွာ အဝက္ခိပိတွာ ဝါ လပနံ။

၄။ သုခသောမနဿသုတ္တဝဏ္ဏနာ

၇၈။ စတုတ္ထေ ယောနိ စဿ အာရဒ္ဓါ ဟောတီတိ ကာရဏဉ္စဿ ပရိပုဏ္ဏံ ပဂ္ဂဟိတံ ဟောတိ။ ဓမ္မာရာမောတိ ဓမ္မေ ရတိံ ဝိန္ဒတိ။ ဘာဝနာယ ရမတိ၊ ဘာဝေန္တော ဝါ ရမတီတိ ဘာဝနာရာမော။ ပဟာနေ ရမတိ၊ ပဇဟန္တော ဝါ ရမတီတိ ပဟာနာရာမော။ တိဝိဓေ ပဝိဝေကေ ရမတီတိ ပဝိဝေကာရာမော။ အဗျာပဇ္ဈေ နိဒ္ဒုက္ခဘာဝေ ရမတီတိ အဗျာပဇ္ဈာရာမော။ နိပ္ပပဉ္စသင်္ခါတေ နိဗ္ဗာနေ ရမတီတိ နိပ္ပပဉ္စာရာမော။

၅။ အဓိဂမသုတ္တဝဏ္ဏနာ

၇၉။ ပဉ္စမေ န အာယကုသလောတိ န အာဂမနကုသလော။ န အပါယကုသလောတိ န အပဂမနကုသလော။ ဆန္ဒန္တိ ကတ္တုကမျတာဆန္ဒံ။ န အာရက္ခတီတိ န ရက္ခတိ။

၆။ မဟန္တတ္တသုတ္တဝဏ္ဏနာ

၈၀။ ဆဋ္ဌေ အာလောကဗဟုလောတိ ဉာဏာလောကဗဟုလော။ ယောဂဗဟုလောတိ ယောဂေ ဗဟုလံ ကရောတိ။ ဝေဒဗဟုလောတိ ပီတိပါမောဇ္ဇဗဟုလော။ အသန္တုဋ္ဌိဗဟုလောတိ ကုသလဓမ္မေသု အသန္တုဋ္ဌော။ အနိက္ခိတ္တဓုရောတိ အဋ္ဌပိတဓုရော ပဂ္ဂဟိတဝီရိယော။ ဥတ္တရိ စ ပတာရေတီတိ သမ္ပတိ စ ဥတ္တရိဉ္စ ဝီရိယံ ကရောတေဝ။ သတ္တမံ ဥတ္တာနမေဝ။

၈-၁၀။ ဒုတိယနိရယသုတ္တာဒိဝဏ္ဏနာ

၈၂-၈၄။ အဋ္ဌမေ ပဂဗ္ဘောတိ ကာယပါဂဗ္ဘိယာဒီဟိ သမန္နာဂတော။ နဝမံ ဥတ္တာနတ္ထမေဝ။ ဒသမေ ဝိဃာတဝါတိ မဟိစ္ဆတံ နိဿာယ ဥပ္ပန္နေန လောဘဒုက္ခေန ဒုက္ခိတော။ သေသံ သဗ္ဗတ္ထ ဥတ္တာနမေဝါတိ။

အရဟတ္တဝဂ္ဂေါ အဋ္ဌမော။