📜

၉။ သီတိဝဂ္ဂေါ

၁။ သီတိဘာဝသုတ္တဝဏ္ဏနာ

၈၅။ နဝမဿ ပဌမေ သီတိဘာဝန္တိ သီတလဘာဝံ။ ယသ္မိံ သမယေ စိတ္တံ နိဂ္ဂဏှိတဗ္ဗန္တိအာဒီသု ဥဒ္ဓစ္စသမယေ စိတ္တံ သမာဓိနာ နိဂ္ဂဟေတဗ္ဗံ နာမ၊ ကောသဇ္ဇာနုပတိတကာလေ ဝီရိယေန ပဂ္ဂဟေတဗ္ဗံ နာမ၊ နိရဿာဒဂတကာလေ သမာဓိနာ သမ္ပဟံသိတဗ္ဗံ နာမ၊ သမပ္ပဝတ္တကာလေ ဗောဇ္ဈင်္ဂုပေက္ခာယ အဇ္ဈုပေက္ခိတဗ္ဗံ နာမ။

၂။ အာဝရဏသုတ္တဝဏ္ဏနာ

၈၆။ ဒုတိယေ ကမ္မာဝရဏတာယာတိ ပဉ္စာနန္တရိယကမ္မေဟိ။ ကိလေသာဝရဏတာယာတိ နိယတမိစ္ဆာဒိဋ္ဌိယာ။ ဝိပါကာဝရဏတာယာတိ အကုသလဝိပါကပဋိသန္ဓိယာ ဝါ ကုသလဝိပါကေဟိ အဟေတုကပဋိသန္ဓိယာ ဝါတိ။

၄-၅။ သုဿူသတိသုတ္တာဒိဝဏ္ဏနာ

၈၈-၈၉။ စတုတ္ထေ အနတ္ထန္တိ အဝဍ္ဎိံ။ အတ္ထံ ရိဉ္စတီတိ ဝဍ္ဎိအတ္ထံ ဆဍ္ဍေတိ။ အနနုလောမိကာယာတိ သာသနဿ အနနုလောမိကာယ။ ပဉ္စမေ ဒိဋ္ဌိသမ္ပဒန္တိ သောတာပတ္တိမဂ္ဂံ။

၈-၁၁။ အဘဗ္ဗဋ္ဌာနသုတ္တစတုက္ကဝဏ္ဏနာ

၉၂-၉၅။ အဋ္ဌမေ အနာဂမနီယံ ဝတ္ထုန္တိ အနုပဂန္တဗ္ဗံ ကာရဏံ၊ ပဉ္စန္နံ ဝေရာနံ ဒွါသဋ္ဌိယာ စ ဒိဋ္ဌိဂတာနမေတံ အဓိဝစနံ။ အဋ္ဌမံ ဘဝန္တိ ကာမာဝစရေ အဋ္ဌမံ ပဋိသန္ဓိံ။ နဝမေ ကောတူဟလမင်္ဂလေနာတိ ဒိဋ္ဌသုတမုတမင်္ဂလေန ။ ဒသမေ သယံကတန္တိအာဒီနိ အတ္တဒိဋ္ဌိဝသေန ဝုတ္တာနိ။ အဓိစ္စသမုပ္ပန္နန္တိ အဟေတုနိဗ္ဗတ္တံ။ သေသံ သဗ္ဗတ္ထ ဥတ္တာနမေဝါတိ။

သီတိဝဂ္ဂေါ နဝမော။