📜
၁၀။ အာနိသံသဝဂ္ဂေါ
၁-၂။ ပါတုဘာဝသုတ္တာဒိဝဏ္ဏနာ
၉၆-၉၇။ ဒသမဿ ပဌမေ အရိယာယတနေတိ မဇ္ဈိမဒေသေ။ ဣန္ဒြိယာနန္တိ မနစ္ဆဋ္ဌာနံ။ ဒုတိယေ သဒ္ဓမ္မနိယတောတိ သာသနသဒ္ဓမ္မေ နိယတော။ အသာဓာရဏေနာတိ ပုထုဇ္ဇနေဟိ အသာဓာရဏေန။
၇။ အနဝတ္ထိတသုတ္တဝဏ္ဏနာ
၁၀၂။ သတ္တမေ အနောဓိံ ကရိတွာတိ ‘‘ဧတ္တကာဝ သင်္ခါရာ အနိစ္စာ၊ န ဣတော ပရေ’’တိ ဧဝံ သီမံ မရိယာဒံ အကတွာ။ အနဝတ္ထိတာတိ အဝတ္ထိတာယ ရဟိတာ၊ ဘိဇ္ဇမာနာဝ ဟုတွာ ဥပဋ္ဌဟိဿန္တီတိ ¶ အတ္ထော။ သဗ္ဗလောကေတိ သကလေ တေဓာတုကေ။ သာမညေနာတိ ¶ သမဏဘာဝေန၊ အရိယမဂ္ဂေနာတိ အတ္ထော။
၈။ ဥက္ခိတ္တာသိကသုတ္တဝဏ္ဏနာ
၁၀၃။ အဋ္ဌမေ မေတ္တာဝတာယာတိ မေတ္တာယုတ္တာယ ပါရိစရိယာယ။ သတ္တ ဟိ သေခါ တထာဂတံ မေတ္တာဝတာယ ပရိစရန္တိ၊ ခီဏာသဝေါ ပရိစိဏ္ဏသတ္ထုကော။
၉။ အတမ္မယသုတ္တဝဏ္ဏနာ
၁၀၄။ နဝမေ အတမ္မယောတိ တမ္မယာ ဝုစ္စန္တိ တဏှာဒိဋ္ဌိယော၊ တာဟိ ရဟိတော။ အဟံကာရာတိ အဟံကာရဒိဋ္ဌိ။ မမံကာရာတိ မမံကာရတဏှာ။ သေသံ သဗ္ဗတ္ထ ဥတ္တာနမေဝါတိ။
အာနိသံသဝဂ္ဂေါ ဒသမော။
ဒုတိယပဏ္ဏာသကံ နိဋ္ဌိတံ။