📜

၆။ အဗျာကတဝဂ္ဂေါ

၁။ အဗျာကတသုတ္တဝဏ္ဏနာ

၅၄။ ဆဋ္ဌဝဂ္ဂဿ ပဌမေ အဗျာကတဝတ္ထူသူတိ ဧကံသာဒိဝသေန အကထိတဝတ္ထူသု။ တထာဂတောတိ သတ္တော။ ဒိဋ္ဌိဂတမေတန္တိ မိစ္ဆာဒိဋ္ဌိမတ္တကမေတံ၊ န တာယ ဒိဋ္ဌိယာ ဂဟိတသတ္တော နာမ အတ္ထိ။ ပဋိပဒန္တိ အရိယမဂ္ဂံ။ န ဆမ္ဘတီတိ ဒိဋ္ဌိဝသေန န ကမ္ပတိ။ သေသပဒေသုပိ ဧသေဝ နယော။ တဏှာဂတန္တိ ဒိဋ္ဌိတဏှာ။ သညာဂတာဒီသုပိ ဧသေဝ နယော။ ဒိဋ္ဌိသညာ ဧဝ ဟေတ္ထ သညာဂတံ၊ ဒိဋ္ဌိနိဿိတမာနောယေဝ ဒိဋ္ဌိမညိတမေဝ ဝါ မညိတံ၊ ဒိဋ္ဌိပပဉ္စောဝ ပပဉ္စိတံ၊ ဒိဋ္ဌုပါဒါနမေဝ ဥပါဒါနံ၊ ဒိဋ္ဌိယာ ဝိရူပံ ပဋိသရဏဘာဝေါယေဝ ဝိပ္ပဋိသာရော နာမာတိ ဝေဒိတဗ္ဗော။ ဧတ္ထ စ ဒိဋ္ဌိဂ္ဂဟဏေန ဒွါသဋ္ဌိ ဒိဋ္ဌိယော၊ ဒိဋ္ဌိနိရောဓဂါမိနိပဋိပဒါဂဟဏေန သောတာပတ္တိမဂ္ဂေါ ဂဟိတောတိ။

၂။ ပုရိသဂတိသုတ္တဝဏ္ဏနာ

၅၅။ ဒုတိယေ ပုရိသဂတိယောတိ ပုရိသဿ ဉာဏဂတိယော။ အနုပါဒါပရိနိဗ္ဗာနန္တိ အပစ္စယနိဗ္ဗာနံ။ နော စဿာတိ အတီတေ အတ္တဘာဝနိဗ္ဗတ္တကံ ကမ္မံ နော စေ အဘဝိဿ။ နော စ မေ သိယာတိ ဧတရဟိ မေ အယံ အတ္တဘာဝေါ န သိယာ။ န ဘဝိဿတီတိ ဧတရဟိ မေ အနာဂတတ္တဘာဝနိဗ္ဗတ္တကံ ကမ္မံ န ဘဝိဿတိ။ န စ မေ ဘဝိဿတီတိ အနာဂတေ မေ အတ္တဘာဝေါ န ဘဝိဿတိ။ ယဒတ္ထိ ယံ ဘူတန္တိ ယံ အတ္ထိ ယံ ဘူတံ ပစ္စုပ္ပန္နက္ခန္ဓပဉ္စကံ။ တံ ပဇဟာမီတိ ဥပေက္ခံ ပဋိလဘတီတိ တံ တတ္ထ ဆန္ဒရာဂပ္ပဟာနေန ပဇဟာမီတိ ဝိပဿနုပေက္ခံ ပဋိလဘတိ။ ဘဝေ န ရဇ္ဇတီတိ အတီတေ ခန္ဓပဉ္စကေ တဏှာဒိဋ္ဌီဟိ န ရဇ္ဇတိ။ သမ္ဘဝေ န ရဇ္ဇတီတိ အနာဂတေပိ တထေဝ န ရဇ္ဇတိ။ အတ္ထုတ္တရိပဒံ သန္တန္တိ ဥတ္တရိ သန္တံ နိဗ္ဗာနပဒံ နာမ အတ္ထိ။ သမ္မပ္ပညာယ ပဿတီတိ တံ သဟဝိပဿနာယ မဂ္ဂပညာယ သမ္မာ ပဿတိ။ န သဗ္ဗေန သဗ္ဗန္တိ ဧကစ္စာနံ ကိလေသာနံ အပ္ပဟီနတ္တာ သစ္စပဋိစ္ဆာဒကဿ တမဿ သဗ္ဗသော အဝိဒ္ဓံသိတတ္တာ န သဗ္ဗာကာရေန သဗ္ဗံ။ ဟညမာနေတိ သဏ္ဍာသေန ဂဟေတွာ မုဋ္ဌိကာယ ကောဋ္ဋိယမာနေ။ အန္တရာပရိနိဗ္ဗာယီတိ ဥပပတ္တိသမနန္တရတော ပဋ္ဌာယ အာယုနော ဝေမဇ္ဈံ အနတိက္ကမိတွာ ဧတ္ထန္တရေ ကိလေသပရိနိဗ္ဗာနေန ပရိနိဗ္ဗုတော ဟောတိ။ အနုပဟစ္စ တလန္တိ အာကာသတလံ အနုပဟစ္စ အနတိက္ကမိတွာ ၊ ဘူမိံ အပ္ပတွာ အာကာသေယေဝ နိဗ္ဗာယေယျာတိ ဣမာဟိ တီဟိ ဥပမာဟိ တယော အန္တရာပရိနိဗ္ဗာယီ ဒဿိတာ။

ဥပဟစ္စပရိနိဗ္ဗာယီတိ အာယုဝေမဇ္ဈံ အတိက္ကမိတွာ ပစ္ဆိမကောဋိံ အပ္ပတွာ ပရိနိဗ္ဗုတော ဟောတိ။ ဥပဟစ္စ တလန္တိ ဇလမာနာ ဂန္တွာ အာကာသတလံ အတိက္ကမိတွာ ပထဝီတလံ ဝါ ဥပဟနိတွာ ပထဝိယံ ပတိတမတ္တာဝ နိဗ္ဗာယေယျ။ အသင်္ခါရေန အပ္ပယောဂေန ကိလေသေ ခေပေတွာ ပရိနိဗ္ဗာယီတိ အသင်္ခါရပရိနိဗ္ဗာယီ။ သသင်္ခါရေန သပ္ပယောဂေန ကိလေသေ ခေပေတွာ ပရိနိဗ္ဗာယီတိ သသင်္ခါရပရိနိဗ္ဗာယီ။ ဂစ္ဆန္တိ နိရာရက္ခံ အရညံ။ ဒါယန္တိ သာရက္ခံ အဘယတ္ထာယ ဒိန္နံ အရညံ။ သေသမေတ္ထ ဥတ္တာနတ္ထမေဝ။ ဣမသ္မိံ သုတ္တေ အရိယပုဂ္ဂလာဝ ကထိတာတိ။

၃။ တိဿဗြဟ္မာသုတ္တဝဏ္ဏနာ

၅၆။ တတိယေ ဘိက္ခုနိယောတိ မဟာပဇာပတိယာ ပရိဝါရာ ပဉ္စသတာ ဘိက္ခုနိယော။ ဝိမုတ္တာတိ ပဉ္စဟိ ဝိမုတ္တီဟိ ဝိမုတ္တာ။ အနုပါဒိသေသာတိ ဥပါဒါနသေသံ အဋ္ဌပေတွာ ပဉ္စဟိ ဝိမုတ္တီဟိ အနဝသေသာဟိပိ ဝိမုတ္တာ။ သဥပါဒိသေသေ ဝါ သဥပါဒိသေသောတိ သဥပါဒါနသေသေ ပုဂ္ဂလေ ‘‘သဥပါဒါနသေသော အယ’’န္တိ။ ဣတရသ္မိမ္ပိ ဧသေဝ နယော။ တိဿောတိ ထေရဿ သဒ္ဓိဝိဟာရိကဗြဟ္မာ။ အနုလောမိကာနီတိ ပဋိပတ္တိယာ အနုလောမာနိ ဝိဝိတ္တာနိ အန္တိမပရိယန္တိမာနိ။ ဣန္ဒြိယာနီတိ သဒ္ဓါဒီနိ ဝိပဿနိန္ဒြိယာနိ။ သမန္နာနယမာနောတိ သမန္နာဟာရေ ဌပယမာနော။ န ဟိ ပန တေတိ ဣဒံ ကသ္မာ အာရဘိ? သတ္တမဿ ပုဂ္ဂလဿ ဒဿနတ္ထံ။ သတ္တမော ဟိ သဒ္ဓါနုသာရိပုဂ္ဂလော န ဒဿိတော။ အထ ဘဂဝါ ဗလဝဝိပဿကဝသေန တံ ဒဿေန္တော ဧဝမာဟ။ တတ္ထ သဗ္ဗနိမိတ္တာနန္တိ သဗ္ဗေသံ နိစ္စနိမိတ္တာဒီနံ။ အနိမိတ္တန္တိ ဗလဝဝိပဿနာသမာဓိံ။

၄။ သီဟသေနာပတိသုတ္တဝဏ္ဏနာ

၅၇။ စတုတ္ထေ မစ္ဆရီတိ ပဉ္စမစ္ဆေရယုတ္တော။ ကဒရိယောတိ ထဒ္ဓမစ္ဆရိယော၊ ပရေသံ ဒိယျမာနမ္ပိ ဝါရေတိ။ အနုပ္ပဒါနရတောတိ ပုနပ္ပုနံ ဒါနံ ဒဒမာနောဝ ရမတိ။ အနုကမ္ပန္တာတိ ‘‘ကော အဇ္ဇ အမှေဟိ အနုဂ္ဂဟေတဗ္ဗော၊ ကဿ ဒေယျဓမ္မံ ဝါ ပဋိဂ္ဂဏှေယျာမ၊ ဓမ္မံ ဝါ ဒေသေယျာမာ’’တိ ဧဝံ စိတ္တေန အနုကမ္ပမာနာ။

၅။ အရက္ခေယျသုတ္တဝဏ္ဏနာ

၅၈။ ပဉ္စမေ နိမိတ္တန္တိ ဓမ္မနိမိတ္တမ္ပိ ပုဂ္ဂလနိမိတ္တမ္ပိ။ အယဉှိ အတ္တနာ ဒေသိတဓမ္မေ ဧကပဒမ္ပိ ဒုရက္ခာတံ အနိယျာနိကံ အပဿန္တော ဓမ္မနိမိတ္တံ န သမနုပဿတိ၊ ‘‘ဒုရက္ခာတော တယာ ဓမ္မော န သွာက္ခာတော’’တိ ဥဋ္ဌဟိတွာ ပဋိပ္ဖရန္တံ ဧကံ ပုဂ္ဂလမ္ပိ အပဿန္တော ပုဂ္ဂလနိမိတ္တံ န သမနုပဿတိ နာမ။ သေသဒွယေပိ ဧသေဝ နယော။ ဆဋ္ဌသတ္တမာနိ ဥတ္တာနာနေဝ။

၈။ ပစလာယမာနသုတ္တဝဏ္ဏနာ

၆၁။ အဋ္ဌမေ ပစလာယမာနောတိ တံ ဂါမံ ဥပနိဿာယ ဧကသ္မိံ ဝနသဏ္ဍေ သမဏဓမ္မံ ကရောန္တော သတ္တာဟံ စင်္ကမနဝီရိယေန နိမ္မထိတတ္တာ ကိလန္တဂတ္တော စင်္ကမနကောဋိယံ ပစလာယမာနော နိသိန္နော ဟောတိ။ ပစလာယသိ နောတိ နိဒ္ဒါယသိ နု။ အနုမဇ္ဇိတွာတိ ပရိမဇ္ဇိတွာ။ အာလောကသညန္တိ မိဒ္ဓဝိနောဒနအာလောကသညံ။ ဒိဝါသညန္တိ ဒိဝါတိသညံ။ ယထာ ဒိဝါ တထာ ရတ္တိန္တိ ယထာ ဒိဝါ အာလောကသညာ အဓိဋ္ဌိတာ၊ တထာ နံ ရတ္တိမ္ပိ အဓိဋ္ဌဟေယျာသိ။ ယထာ ရတ္တိံ တထာ ဒိဝါတိ ယထာ စ တေ ရတ္တိံ အာလောကသညာ အဓိဋ္ဌိတာ၊ တထာ နံ ဒိဝါပိ အဓိဋ္ဌဟေယျာသိ။ သပ္ပဘာသန္တိ ဒိဗ္ဗစက္ခုဉာဏတ္ထာယ သဟောဘာသံ။ ပစ္ဆာပုရေသညီတိ ပုရတော စ ပစ္ဆတော စ အဘိဟရဏသညာယ သညာဝါ။ အန္တောဂတေဟိ ဣန္ဒြိယေဟီတိ ဗဟိ အဝိက္ခိတ္တေဟိ အန္တော အနုပဝိဋ္ဌေဟေဝ ပဉ္စဟိ ဣန္ဒြိယေဟိ။ မိဒ္ဓသုခန္တိ နိဒ္ဒါသုခံ။ ဧတ္တကေန ဌာနေန ဘဂဝါ ထေရဿ မိဒ္ဓဝိနောဒနကမ္မဋ္ဌာနံ ကထေသိ။ သောဏ္ဍန္တိ မာနသောဏ္ဍံ။ ကိစ္စကရဏီယာနီတိ ဧတ္ထ အဝဿံ ကတ္တဗ္ဗာနိ ကိစ္စာနိ၊ ဣတရာနိ ကရဏီယာနိ။ မင်္ကုဘာဝေါတိ နိတ္တေဇတာ ဒေါမနဿတာ။ ဧတ္တကေန ဌာနေန သတ္ထာရာ ထေရဿ ဘိက္ခာစာရဝတ္တံ ကထိတံ။

ဣဒါနိ ဘဿေ ပရိယန္တကာရိတာယ သမာဒပေတုံ တသ္မာတိဟာတိအာဒိမာဟ။ တတ္ထ ဝိဂ္ဂါဟိကကထန္တိ ‘‘န တွံ ဣမံ ဓမ္မဝိနယံ အာဇာနာသီ’’တိအာဒိနယပ္ပဝတ္တာ ဝိဂ္ဂါဟိကကထာ။ နာဟံ မောဂ္ဂလ္လာနာတိအာဒိ ပါပမိတ္တသံသဂ္ဂဝိဝဇ္ဇနတ္ထံ ဝုတ္တံ။ ကိတ္တာဝတာ နု ခေါတိ ကိတ္တကေန နု ခေါ။ တဏှာသင်္ခယဝိမုတ္တော ဟောတီတိ တဏှာသင်္ခယေ နိဗ္ဗာနေ တံ အာရမ္မဏံ ကတွာ ဝိမုတ္တစိတ္တတာယ တဏှာသင်္ခယဝိမုတ္တော နာမ သံခိတ္တေန ကိတ္တာဝတာ ဟောတိ။ ယာယ ပဋိပတ္တိယာ တဏှာသင်္ခယဝိမုတ္တော ဟောတိ၊ တမေဝ ခီဏာသဝဿ ဘိက္ခုနော ပုဗ္ဗဘာဂပဋိပဒံ သံခိတ္တေန ဒေသေထာတိ ပုစ္ဆတိ။ အစ္စန္တနိဋ္ဌောတိ ခယဝယသင်္ခါတံ အန္တံ အတီတာတိ အစ္စန္တာ၊ အစ္စန္တာ နိဋ္ဌာ အဿာတိ အစ္စန္တနိဋ္ဌော၊ ဧကန္တနိဋ္ဌော သတတနိဋ္ဌောတိ အတ္ထော။ အစ္စန္တယောဂက္ခေမီတိ အစ္စန္တံ ယောဂက္ခေမီ၊ နိစ္စယောဂက္ခေမီတိ အတ္ထော။ အစ္စန္တဗြဟ္မစာရီတိ အစ္စန္တံ ဗြဟ္မစာရီ၊ နိစ္စဗြဟ္မစာရီတိ အတ္ထော။ အစ္စန္တံ ပရိယောသာနမဿာတိ ပုရိမနယေနေဝ အစ္စန္တပရိယောသာနော။ သေဋ္ဌော ဒေဝမနုဿာနန္တိ ဒေဝါနဉ္စ မနုဿာနဉ္စ သေဋ္ဌော ဥတ္တမော။ ဧဝရူပေါ ဘိက္ခု ကိတ္တာဝတာ ဟောတိ၊ သင်္ခေပေနေဝ တဿ ပဋိပတ္တိံ ကထေထာတိ ယာစတိ။

သဗ္ဗေ ဓမ္မာ နာလံ အဘိနိဝေသာယာတိ ဧတ္ထ သဗ္ဗေ ဓမ္မာ နာမ ပဉ္စက္ခန္ဓာ ဒွါဒသာယတနာနိ အဋ္ဌာရသ ဓာတုယော၊ တေ သဗ္ဗေပိ တဏှာဒိဋ္ဌိဝသေန အဘိနိဝေသာယ နာလံ န ပရိယတ္တာ န သမတ္တာ န ယုတ္တာ။ ကသ္မာ? ဂဟိတာကာရေန အတိဋ္ဌနတော။ တေ ဟိ နိစ္စာ သုခါ အတ္တာတိ ဂဟိတာပိ အနိစ္စာ ဒုက္ခာ အနတ္တာဝ သမ္ပဇ္ဇန္တိ။ တသ္မာ နာလံ အဘိနိဝေသာယ။ အဘိဇာနာတီတိ အနိစ္စံ ဒုက္ခံ အနတ္တာတိ ဉာတပရိညာယ အဘိဇာနာတိ။ ပရိဇာနာတီတိ တထေဝ တီရဏပရိညာယ ပရိဇာနာတိ။ ယံကိဉ္စိ ဝေဒနန္တိ အန္တမသော ပဉ္စဝိညာဏသမ္ပယုတ္တံ ယံကိဉ္စိ အပ္ပမတ္တကမ္ပိ ဝေဒနံ အနုဘဝတိ။ ဣမိနာ ဘဂဝါ ထေရဿ ဝေဒနာဝသေန စ ဝိနိဝဋ္ဋေတွာ အရူပပရိဂ္ဂဟံ ဒဿေသိ။

အနိစ္စာနုပဿီတိ အနိစ္စတော အနုပဿန္တော။ ဝိရာဂါနုပဿီတိ ဧတ္ထ ဒွေ ဝိရာဂါ ခယဝိရာဂေါ စ အစ္စန္တဝိရာဂေါ စ။ တတ္ထ သင်္ခါရာနံ ခယံ ခယတော ပဿနာ ဝိပဿနာပိ၊ အစ္စန္တဝိရာဂံ နိဗ္ဗာနံ ဝိရာဂတော ဒဿနမဂ္ဂဉာဏမ္ပိ ဝိရာဂါနုပဿနာ။ တဒုဘယသမင်္ဂိပုဂ္ဂလော ဝိရာဂါနုပဿီ နာမ။ တံ သန္ဓာယ ဝုတ္တံ – ‘‘ဝိရာဂါနုပဿီ’’တိ၊ ဝိရာဂတော အနုပဿန္တောတိ အတ္ထော။ နိရောဓာနုပဿိမှိပိ ဧသေဝ နယော။ နိရောဓောပိ ဟိ ခယနိရောဓော အစ္စန္တနိရောဓောတိ ဒုဝိဓောယေဝ။ ပဋိနိဿဂ္ဂါနုပဿီတိ ဧတ္ထ ပဋိနိဿဂ္ဂေါ ဝုစ္စတိ ဝေါဿဂ္ဂေါ။ သော စ ပရိစ္စာဂဝေါဿဂ္ဂေါ ပက္ခန္ဒနဝေါဿဂ္ဂေါတိ ဒုဝိဓော ဟောတိ။ တတ္ထ ပရိစ္စာဂဝေါဿဂ္ဂေါတိ ဝိပဿနာ။ သာ ဟိ တဒင်္ဂဝသေန ကိလေသေ စ ခန္ဓေ စ ဝေါဿဇတိ။ ပက္ခန္ဒနဝေါဿဂ္ဂေါတိ မဂ္ဂေါ။ သော ဟိ နိဗ္ဗာနံ အာရမ္မဏတော ပက္ခန္ဒတိ။ ဒွီဟိပိ ဝါ ကာရဏေဟိ သော ဝေါဿဂ္ဂေါယေဝ၊ သမုစ္ဆေဒဝသေန ခန္ဓာနံ ကိလေသာနဉ္စ ဝေါဿဇနတော နိဗ္ဗာနေ စ ပက္ခန္ဒနတော။ တသ္မာ ကိလေသေ စ ခန္ဓေ စ ပရိစ္စဇတီတိ ပရိစ္စာဂဝေါဿဂ္ဂေါ။ နိရောဓာယ နိဗ္ဗာနဓာတုယာ စိတ္တံ ပက္ခန္ဒတီတိ ပက္ခန္ဒနဝေါဿဂ္ဂေါတိ ဥဘယမ္ပေတံ မဂ္ဂေ သမေတိ။ တဒုဘယသမင်္ဂီ ပုဂ္ဂလော ဣမာယ ပဋိနိဿဂ္ဂါနုပဿနာယ သမန္နာဂတတ္တာ ပဋိနိဿဂ္ဂါနုပဿီ နာမ ဟောတိ။ တံ သန္ဓာယေတံ ဝုတ္တံ။ န ကိဉ္စိ လောကေ ဥပါဒိယတီတိ ကိဉ္စိ ဧကမ္ပိ သင်္ခါရဂတံ တဏှာဝသေန န ဥပါဒိယတိ န ဂဏှာတိ န ပရာမသတိ။ အနုပါဒိယံ န ပရိတဿတီတိ အဂ္ဂဏှန္တော တဏှာပရိတဿနာယ န ပရိတဿတိ။ ပစ္စတ္တံယေဝ ပရိနိဗ္ဗာယတီတိ သယမေဝ ကိလေသပရိနိဗ္ဗာနေန ပရိနိဗ္ဗာယတိ။ ခီဏာ ဇာတီတိအာဒိနာ ပနဿ ပစ္စဝေက္ခဏာ ဒဿိတာ။ ဣတိ ဘဂဝါ သံခိတ္တေန ခီဏာသဝဿ ပုဗ္ဗဘာဂပ္ပဋိပဒံ ပုစ္ဆိတော သံခိတ္တေနေဝ ကထေသိ။ ဣဒံ ပန သုတ္တံ ထေရဿ ဩဝါဒေါပိ အဟောသိ ဝိပဿနာပိ။ သော ဣမသ္မိံယေဝ သုတ္တေ ဝိပဿနံ ဝဍ္ဎေတွာ အရဟတ္တံ ပတ္တောတိ။

၉။ မေတ္တသုတ္တဝဏ္ဏနာ

၆၂။ နဝမေ မာ၊ ဘိက္ခဝေ၊ ပုညာနံ ဘာယိတ္ထာတိ ပုညာနိ ကရောန္တာ တေသံ မာ ဘာယိတ္ထ။ မေတ္တစိတ္တံ ဘာဝေသိန္တိ တိကစတုက္ကဇ္ဈာနိကာယ မေတ္တာယ သမ္ပယုတ္တံ ပဏီတံ ကတွာ စိတ္တံ ဘာဝေသိန္တိ ဒဿေတိ။ သံဝဋ္ဋမာနေ သုဒါဟန္တိ သံဝဋ္ဋမာနေ သုဒံ အဟံ။ သံဝဋ္ဋမာနေတိ ဈာယမာနေ ဝိပဇ္ဇမာနေ။ ဓမ္မိကောတိ ဒသကုသလဓမ္မသမန္နာဂတော။ ဓမ္မရာဇာတိ တဿေဝ ဝေဝစနံ။ ဓမ္မေန ဝါ လဒ္ဓရဇ္ဇတ္တာ ဓမ္မရာဇာ။ စာတုရန္တောတိ ပုရတ္ထိမသမုဒ္ဒါဒီနံ စတုန္နံ သမုဒ္ဒါနံ ဝသေန စာတုရန္တာယ ပထဝိယာ ဣဿရော။ ဝိဇိတာဝီတိ ဝိဇိတသင်္ဂါမော။ ဇနပဒေါ တသ္မိံ ထာဝရိယံ ထိရဘာဝံ ပတ္တောတိ ဇနပဒတ္ထာဝရိယပ္ပတ္တော။ ပရောသဟဿန္တိ အတိရေကသဟဿံ။ သူရာတိ အဘီရုနော။ ဝီရင်္ဂရူပါတိ ဝီရာနံ အင်္ဂံ ဝီရင်္ဂံ၊ ဝီရိယဿေတံ နာမံ။ ဝီရင်္ဂရူပမေတေသန္တိ ဝီရင်္ဂရူပါ။ ဝီရိယဇာတိကာ ဝီရိယသဘာဝါ ဝီရိယမယာ ဝိယ အကိလာသုနော ဒိဝသမ္ပိ ယုဇ္ဈန္တာ န ကိလမန္တီတိ ဝုတ္တံ ဟောတိ။ သာဂရပရိယန္တန္တိ စက္ကဝါဠပဗ္ဗတံ သီမံ ကတွာ ဌိတသမုဒ္ဒပရိယန္တံ။ အဒဏ္ဍေနာတိ ဓနဒဏ္ဍေနပိ ဆေဇ္ဇဘေဇ္ဇာနုသာသနေန သတ္ထဒဏ္ဍေနပိ ဝိနာယေဝ။ အသတ္ထေနာတိ ဧကတောဓာရာဒိနာ ပရဝိဟေဌနသတ္ထေနပိ ဝိနာယေဝ။ ဓမ္မေန အဘိဝိဇိယာတိ ဧဟိ ခေါ၊ မဟာရာဇာတိ ဧဝံ ပဋိရာဇူဟိ သမ္ပဋိစ္ဆိတာဂမနော ‘‘ပါဏော န ဟန္တဗ္ဗော’’တိအာဒိနာ ဓမ္မေနေဝ ဝုတ္တပ္ပကာရံ ပထဝိံ အဘိဝိဇိနိတွာ။

သုခေသိနောတိ သုခပရိယေသကေ သတ္တေ အာမန္တေတိ။ သုညဗြဟ္မူပဂေါတိ သုညဗြဟ္မဝိမာနူပဂေါ။ ပထဝိံ ဣမန္တိ ဣမံ သာဂရပရိယန္တံ မဟာပထဝိံ။ အသာဟသေနာတိ န သာဟသိကကမ္မေန။ သမေန မနုသာသိတန္တိ သမေန ကမ္မေန အနုသာသိံ။ တေဟိ ဧတံ သုဒေသိတန္တိ တေဟိ သင်္ဂါဟကေဟိ မဟာကာရုဏိကေဟိ ဗုဒ္ဓေဟိ ဧတံ ဧတ္တကံ ဌာနံ သုဒေသိတံ သုကထိတံ။ ပထဗျောတိ ပုထဝိသာမိကော။

၁၀။ ဘရိယာသုတ္တဝဏ္ဏနာ

၆၃။ ဒသမေ ကေဝဋ္ဋာ မညေ မစ္ဆဝိလောပေတိ ကေဝဋ္ဋာနံ မစ္ဆပစ္ဆိံ ဩတာရေတွာ ဌိတဋ္ဌာနေ ဇာလေ ဝါ ဥဒကတော ဥက္ခိတ္တမတ္တေ မစ္ဆဂ္ဂါဟကာနံ မဟာသဒ္ဒေါ ဟောတိ၊ တံ သန္ဓာယေတံ ဝုတ္တံ။ သုဇာတာတိ ဝိသာခါယ ကနိဋ္ဌာ။ သာ နေဝ သဿုံ အာဒိယတီတိ သဿုယာ ကတ္တဗ္ဗဝတ္တံ နာမ အတ္ထိ၊ တံ န ကရောတိ၊ သဿူတိပိ နံ န ဂဏေတိ။ န သသုရံ အာဒိယတီတိ ဝစနံ န ဂဏှာတိ။ ဧဝံ အနာဒရတာယပိ အဂ္ဂဟဏေနပိ န အာဒိယတိ နာမ။ သေသေသုပိ ဧသေဝ နယော။ ဧဝံ အနာထပိဏ္ဍိကော သုဏိသာယ အာစာရံ ဂဟေတွာ သတ္ထု ပုရတော နိသီဒိ။ သာပိ သုဇာတာ ‘‘ကိံ နု ခေါ အယံ သေဋ္ဌိ ဒသဗလဿ သန္တိကေ မယှံ ဂုဏံ ကထေဿတိ ဥဒါဟု အဂုဏ’’န္တိ ဂန္တွာ အဝိဒူရေ သဒ္ဒံ သုဏန္တီ အဋ္ဌာသိ။ အထ နံ သတ္ထာ ဧဟိ သုဇာတေတိ အာမန္တေသိ။

အဟိတာနုကမ္ပိနီတိ န ဟိတာနုကမ္ပိနီ။ အညေသူတိ ပရပုရိသေသု။ အတိမညတေတိ ဩမာနာတိ မာနဝသေန အတိမညတိ။ ဓနေန ကီတဿာတိ ဓနေန ကီတာ အဿ။ ဝဓာယ ဥဿုကာ ဝဓိတုံ ဥဿုက္ကမာပန္နာ။ ယံ ဣတ္ထိယာ ဝိန္ဒတိ သာမိကော ဓနန္တိ ဣတ္ထိယာ သာမိကော ယံ ဓနံ လဘတိ။ အပ္ပမ္ပိ တဿ အပဟာတုမိစ္ဆတီတိ ထောကတောပိ အဿ ဟရိတုံ ဣစ္ဆတိ၊ ဥဒ္ဓနေ အာရောပိတဥက္ခလိယံ ပက္ခိပိတဗ္ဗတဏ္ဍုလတောပိ ထောကံ ဟရိတုမေဝ ဝါယမတိ။ အလသာတိ နိသိန္နဋ္ဌာနေ နိသိန္နာဝ ဌိတဋ္ဌာနေ ဌိတာဝ ဟောတိ။ ဖရုသာတိ ခရာ။ ဒုရုတ္တဝါဒိနီတိ ဒုဗ္ဘာသိတဘာသိနီ၊ ကက္ခဠံ ဝါဠကထမေဝ ကထေတိ။ ဥဋ္ဌာယကာနံ အဘိဘုယျ ဝတ္တတီတိ ဧတ္ထ ဥဋ္ဌာယကာနန္တိ ဗဟုဝစနဝသေန ဝိရိယုဋ္ဌာနသမ္ပန္နော သာမိကော ဝုတ္တော၊ တဿ တံ ဥဋ္ဌာနသမ္ပတ္တိံ အဘိဘဝိတွာ ဟေဋ္ဌာ ကတွာ ဝတ္တတိ။ ပမောဒတီတိ အာမောဒိတပမောဒိတာ ဟောတိ ။ ကောလေယျကာတိ ကုလသမ္ပန္နာ။ ပတိဗ္ဗတာတိ ပတိဒေဝတာ။ ဝဓဒဏ္ဍတဇ္ဇိတာတိ ဒဏ္ဍကံ ဂဟေတွာ ဝဓေန တဇ္ဇိတာ၊ ‘‘ဃာတေဿာမိ န’’န္တိ ဝုတ္တာ။ ဒါသီသမန္တိ သာမိကဿ ဝတ္တပူရိကာ ဒါသီတိ မံ ဘဂဝါ ဓာရေတူတိ ဝတွာ သရဏေသု ပတိဋ္ဌာသိ။

၁၁။ ကောဓနသုတ္တဝဏ္ဏနာ

၆၄။ ဧကာဒသမေ သပတ္တကန္တာတိ သပတ္တာနံ ဝေရီနံ ကန္တာ ပိယာ တေဟိ ဣစ္ဆိတပတ္ထိတာ။ သပတ္တကရဏာတိ သပတ္တာနံ ဝေရီနံ အတ္ထကရဏာ။ ကောဓပရေတောတိ ကောဓာနုဂတော။ ပစုရတ္ထတာယာတိ ဗဟုအတ္ထတာယ ဗဟုဟိတတာယ။ အနတ္ထမ္ပီတိ အဝုဒ္ဓိမ္ပိ။ အတ္ထော မေ ဂဟိတောတိ ဝုဍ္ဎိ မေ ဂဟိတာ။

အထော အတ္ထံ ဂဟေတွာနာတိ အထော ဝုဒ္ဓိံ ဂဟေတွာ။ အနတ္ထံ အဓိပဇ္ဇတီတိ အနတ္ထော မေ ဂဟိတောတိ သလ္လက္ခေတိ။ ဝဓံ ကတွာနာတိ ပါဏာတိပါတကမ္မံ ကတွာ။ ကောဓသမ္မဒသမ္မတ္တောတိ ကောဓမဒေန မတ္တော၊ အာဒိန္နဂဟိတပရာမဋ္ဌောတိ အတ္ထော။ အာယသကျန္တိ အယသဘာဝံ၊ အယသော နိယသော ဟောတီတိ အတ္ထော။ အန္တရတော ဇာတန္တိ အဗ္ဘန္တရေ ဥပ္ပန္နံ။ အတ္ထံ န ဇာနာတီတိ ဝုဒ္ဓိအတ္ထံ န ဇာနာတိ။ ဓမ္မံ န ပဿတီတိ သမထဝိပဿနာဓမ္မံ န ပဿတိ။ အန္ဓတမန္တိ အန္ဓဘာဝကရံ တမံ ဗဟလတမံ။ သဟတေတိ အဘိဘဝတိ။

ဒုမ္မင်္ကုယန္တိ ဒုမ္မင်္ကုဘာဝံ နိတ္တေဇတံ ဒုဗ္ဗဏ္ဏမုခတံ။ ယတော ပတာယတီတိ ယဒါ နိဗ္ဗတ္တတိ။ န ဝါစော ဟောတိ ဂါရဝေါတိ ဝစနဿပိ ဂရုဘာဝေါ န ဟောတိ။ န ဒီပံ ဟောတိ ကိဉ္စနန္တိ ကာစိ ပတိဋ္ဌာ နာမ န ဟောတိ။ တပနီယာနီတိ တာပဇနကာနိ။ ဓမ္မေဟီတိ သမထဝိပဿနာဓမ္မေဟိ။ အာရကာတိ ဒူရေ။ ဗြာဟ္မဏန္တိ ခီဏာသဝဗြာဟ္မဏံ။ ယာယ မာတု ဘတောတိ ယာယ မာတရာ ဘတော ပေါသိတော။ ပါဏဒဒိံ သန္တိန္တိ ဇီဝိတဒါယိကံ သမာနံ။ ဟန္တိ ကုဒ္ဓါ ပုထုတ္တာနန္တိ ကုဒ္ဓါ ပုဂ္ဂလော ပုထု နာနာကာရဏေဟိ အတ္တာနံ ဟန္တိ။ နာနာရူပေသု မုစ္ဆိတောတိ နာနာရမ္မဏေသု အဓိမုစ္ဆိတော ဟုတွာ။ ရဇ္ဇုယာ ဗဇ္ဈ မီယန္တီတိ ရဇ္ဇုယာ ဗန္ဓိတွာ မရန္တိ။ ပဗ္ဗတာမပိ ကန္ဒရေတိ ပဗ္ဗတကန္ဒရေပိ ပတိတွာ မရန္တိ။

ဘူနဟစ္စာနီတိ ဟတဝုဒ္ဓီနိ။ ဣတာယန္တိ ဣတိ အယံ။ တံ ဒမေန သမုစ္ဆိန္ဒေတိ တံ ကောဓံ ဒမေန ဆိန္ဒေယျ။ ကတရေန ဒမေနာတိ? ပညာဝီရိယေန ဒိဋ္ဌိယာတိ ဝိပဿနာပညာယ စေဝ ဝိပဿနာသမ္ပယုတ္တေန ကာယိကစေတသိကဝီရိယေန စ မဂ္ဂသမ္မာဒိဋ္ဌိယာ စ။ တထေဝ ဓမ္မေ သိက္ခေထာတိ ယထာ အကုသလံ သမုစ္ဆိန္ဒေယျ၊ သမထဝိပဿနာဓမ္မေပိ တထေဝ သိက္ခေယျ။ မာ နော ဒုမ္မင်္ကုယံ အဟူတိ မာ အမှာကံ ဒုမ္မင်္ကုဘာဝေါ အဟောသီတိ ဣမမတ္ထံ ပတ္ထယမာနာ။ အနာယာသာတိ အနုပါယာသာ။ အနုဿုကာတိ ကတ္ထစိ ဥဿုက္ကံ အနာပန္နာ။ သေသံ သဗ္ဗတ္ထ ဥတ္တာနမေဝါတိ။

အဗျာကတဝဂ္ဂေါ ဆဋ္ဌော။