📜

၈။ ဝိနယဝဂ္ဂေါ

၁။ ပဌမဝိနယဓရသုတ္တဝဏ္ဏနာ

၇၅။ အဋ္ဌမဿ ပဌမေ အာပတ္တိံ ဇာနာတီတိ အာပတ္တိံယေဝ အာပတ္တီတိ ဇာနာတိ။ သေသပဒေသုပိ ဧသေဝ နယော။

၂။ ဒုတိယဝိနယဓရသုတ္တဝဏ္ဏနာ

၇၆။ ဒုတိယေ သွာဂတာနီတိ သုအာဂတာနိ သုပ္ပဂုဏာနိ။ သုဝိဘတ္တာနီတိ ကောဋ္ဌာသတော သုဋ္ဌု ဝိဘတ္တာနိ ။ သုပ္ပဝတ္တီနီတိ အာဝဇ္ဇိတာဝဇ္ဇိတဋ္ဌာနေ သုဋ္ဌု ပဝတ္တာနိ ဒဠှပ္ပဂုဏာနိ။ သုဝိနိစ္ဆိတာနီတိ သုဋ္ဌု ဝိနိစ္ဆိတာနိ။ သုတ္တသောတိ ဝိဘင်္ဂတော။ အနုဗျဉ္ဇနသောတိ ခန္ဓကပရိဝါရတော။

၃။ တတိယဝိနယဓရသုတ္တဝဏ္ဏနာ

၇၇။ တတိယေ ဝိနယေ ခေါ ပန ဌိတော ဟောတီတိ ဝိနယလက္ခဏေ ပတိဋ္ဌိတော ဟောတိ။ အသံဟီရောတိ န သက္ကာ ဟောတိ ဂဟိတဂ္ဂဟဏံ ဝိဿဇ္ဇာပေတုံ။

၉။ သတ္ထုသာသနသုတ္တဝဏ္ဏနာ

၈၃။ နဝမေ ဧကောတိ အဒုတိယော။ ဝူပကဋ္ဌောတိ ကာယေန ဂဏတော၊ စိတ္တေန ကိလေသေဟိ ဝူပကဋ္ဌော ဝိဝေကဋ္ဌော ဒူရီဘူတော။ အပ္ပမတ္တောတိ သတိအဝိပ္ပဝါသေ ဌိတော။ ပဟိတတ္တောတိ ပေသိတတ္တော။ နိဗ္ဗိဒါယာတိ ဝဋ္ဋေ ဥက္ကဏ္ဌနတ္ထာယ။ ဝိရာဂါယာတိ ရာဂါဒီနံ ဝိရဇ္ဇနတ္ထာယ။ နိရောဓာယာတိ အပ္ပဝတ္တိကရဏတ္ထာယ။ ဝူပသမာယာတိ ကိလေသဝူပသမာယ အပ္ပဝတ္တိယာ။ အဘိညာယာတိ တိလက္ခဏံ အာရောပေတွာ အဘိဇာနနတ္ထာယ။ သမ္ဗောဓာယာတိ မဂ္ဂသင်္ခါတဿ သမ္ဗောဓဿ အတ္ထာယ။ နိဗ္ဗာနာယာတိ နိဗ္ဗာနဿ သစ္ဆိကရဏတ္ထာယ။

၁၀။ အဓိကရဏသမထသုတ္တဝဏ္ဏနာ

၈၄။ ဒသမေ အဓိကရဏာနိ သမေန္တိ ဝူပသမေန္တီတိ အဓိကရဏသမထာ။ ဥပ္ပန္နုပ္ပန္နာနန္တိ ဥပ္ပန္နာနံ ဥပ္ပန္နာနံ။ အဓိကရဏာနန္တိ ဝိဝါဒါဓိကရဏံ အနုဝါဒါဓိကရဏံ အာပတ္တာဓိကရဏံ ကိစ္စာဓိကရဏန္တိ ဣမေသံ စတုန္နံ။ သမထာယ ဝူပသမာယာတိ သမထတ္ထဉ္စေဝ ဝူပသမနတ္ထဉ္စ။ သမ္မုခါဝိနယော ဒါတဗ္ဗော…ပေ… တိဏဝတ္ထာရကောတိ ဣမေ သတ္တ သမထာ ဒါတဗ္ဗာ။ တေသံ ဝိနိစ္ဆယော ဝိနယသံဝဏ္ဏနတော (စူဠဝ။ အဋ္ဌ။ ၁၈၆-၁၈၇ အာဒယော) ဂဟေတဗ္ဗော။ အပိစ ဒီဃနိကာယေ သင်္ဂီတိသုတ္တဝဏ္ဏနာယမ္ပိ (ဒီ။ နိ။ အဋ္ဌ။ ၃။၃၃၁ အဓိကရဏသမထသတ္တကဝဏ္ဏနာ) ဝိတ္ထာရိတောယေဝ၊ တထာ မဇ္ဈိမနိကာယေ သာမဂါမသုတ္တဝဏ္ဏနာယာတိ (မ။ နိ။ အဋ္ဌ။ ၃။၄၆)။

ဝိနယဝဂ္ဂေါ အဋ္ဌမော။

ဣတော ပရာနိ သတ္တ သုတ္တာနိ ဥတ္တာနတ္ထာနေဝ။ န ဟေတ္ထ ကိဉ္စိ ဟေဋ္ဌာ အဝုတ္တနယံ နာမ အတ္ထီတိ။

မနောရထပူရဏိယာ အင်္ဂုတ္တရနိကာယ-အဋ္ဌကထာယ

သတ္တကနိပါတဿ သံဝဏ္ဏနာ နိဋ္ဌိတာ။