📜

၈။ အရဟတ္တဝဂ္ဂေါ

၁-၃။ ဒုက္ခသုတ္တာဒိဝဏ္ဏနာ

၇၅-၇၇။ အဋ္ဌမဿ ပဌမာဒီသု နတ္ထိ ဝတ္တဗ္ဗံ။ တတိယေ တိဝိဓံ ကုဟနဝတ္ထုန္တိ ပစ္စယပ္ပဋိသေဝနသာမန္တဇပ္ပနဣရိယာပထပ္ပဝတ္တနသင်္ခါတံ တိဝိဓံ ကုဟနဝတ္ထုံ။ ဥက္ခိပိတွာတိ ‘‘မဟာကုဋုမ္ဗိကော မဟာနာဝိကော မဟာဒါနပတီ’’တိအာဒိနာ ပဂ္ဂဏှိတွာ လပနံ။ အဝက္ခိပိတွာတိ ‘‘ကိံ ဣမဿ ဇီဝိတံ၊ ဗီဇဘောဇနော နာမာယ’’န္တိ ဟီဠေတွာ လပနံ။

ဒုက္ခသုတ္တာဒိဝဏ္ဏနာ နိဋ္ဌိတာ။

၄။ သုခသောမနဿသုတ္တဝဏ္ဏနာ

၇၈။ စတုတ္ထေ ယထာဝုတ္တဓမ္မာဒီသု တဿ ကိလေသနိမိတ္တံ ဒုက္ခံ အနဝဿနန္တိ ‘‘သုခသောမနဿဗဟုလော ဝိဟရတီ’’တိ ဝုတ္တံ။ ကာယိကသုခဉ္စေဝ စေတသိကသောမနဿဉ္စ ဗဟုလံ အဿာတိ သုခသောမနဿဗဟုလော။ ယဝတိ တေန ဖလံ မိဿိတံ ဝိယ ဟောတီတိ ယောနိ၊ ဧကန္တိကံ ကာရဏံ။ အဿာတိ ယထာဝုတ္တဿ ဘိက္ခုနော။ ပရိပုဏ္ဏန္တိ အဝိကလံ အနဝသေသံ။

သုခသောမနဿသုတ္တဝဏ္ဏနာ နိဋ္ဌိတာ။

၅။ အဓိဂမသုတ္တဝဏ္ဏနာ

၇၉။ ပဉ္စမေ အာဂစ္ဆန္တိ ဧတေန ကုသလာ ဝါ အကုသလာ ဝါတိ အာဂမနံ၊ ကုသလာကုသလာနံ ဥပ္ပတ္တိကာရဏံ။ တတ္ထ ကုသလောတိ အာဂမနကုသလော။ ဧဝံ ဓမ္မေ မနသိကရောတော ကုသလာ ဝါ အကုသလာ ဝါ ဓမ္မာ အဘိဝဍ္ဎန္တီတိ ဧဝံ ဇာနန္တော။ အပဂစ္ဆန္တိ ကုသလာ ဝါ အကုသလာ ဝါ ဧတေနာတိ အပဂမနံ။ တေသံ ဧဝ အနုပ္ပတ္တိကာရဏံ၊ တတ္ထ ကုသလောတိ အပဂမနကုသလော။ ဧဝံ ဓမ္မေ မနသိကရောတော ကုသလာ ဝါ အကုသလာ ဝါ ဓမ္မာ နာဘိဝဍ္ဎန္တီတိ ဧဝံ ဇာနန္တော။ ဥပါယကုသလောတိ ဌာနုပ္ပတ္တိကပညာသမန္နာဂတော။ ဣဒဉ္စ အစ္စာယိကကိစ္စေ ဝါ ဘယေ ဝါ ဥပ္ပန္နေ တဿ တိကိစ္ဆနတ္ထံ ဌာနုပ္ပတ္တိယာ ကာရဏဇာနနဝသေန ဝေဒိတဗ္ဗံ။

အဓိဂမသုတ္တဝဏ္ဏနာ နိဋ္ဌိတာ။

၆-၇။ မဟန္တတ္တသုတ္တာဒိဝဏ္ဏနာ

၈၀-၈၁။ ဆဋ္ဌေ သမ္ပတ္တေတိ ကိလေသေ သမ္ပတ္တေ။ သတ္တမံ ဥတ္တာနမေဝ။

မဟန္တတ္တသုတ္တာဒိဝဏ္ဏနာ နိဋ္ဌိတာ။

၈-၁၀။ ဒုတိယနိရယသုတ္တာဒိဝဏ္ဏနာ

၈၂-၈၄။ အဋ္ဌမေ ကာယပါဂဗ္ဘိယာဒီဟီတိ အာဒိ-သဒ္ဒေန ဝစီပါဂဗ္ဘိယံ မနောပါဂဗ္ဘိယဉ္စ သင်္ဂဏှာတိ။ နဝမာဒီနိ ဥတ္တာနတ္ထာနေဝ။

ဒုတိယနိရယသုတ္တာဒိဝဏ္ဏနာ နိဋ္ဌိတာ။

အရဟတ္တဝဂ္ဂဝဏ္ဏနာ နိဋ္ဌိတာ။