📜

(၆) ၁။ သစိတ္တဝဂ္ဂေါ

၁-၄။ သစိတ္တသုတ္တာဒိဝဏ္ဏနာ

၅၁-၅၄။ ဒုတိယဿ ပဌမေ သစိတ္တပရိယာယကုသလောတိ အတ္တနော စိတ္တဝါရကုသလော။ ရဇန္တိ အာဂန္တုကဥပက္ကိလေသံ။ အင်္ဂဏန္တိ တတ္ထဇာတကအင်္ဂကာဠတိလကာဒိံ။ အာသဝါနံ ခယာယာတိ အရဟတ္တတ္ထာယ။ တတိယေ ပဋိဘာနေနာတိ ဝစနသဏ္ဌာနေန။ စတုတ္ထေ အဓိပညာဓမ္မဝိပဿနာယာတိ သင်္ခါရပရိဂ္ဂါဟကဝိပဿနာယ။

၈။ မူလကသုတ္တဝဏ္ဏနာ

၅၈။ အဋ္ဌမေ အမတောဂဓာတိ ဧတ္ထ သဥပါဒိသေသာ နိဗ္ဗာနဓာတု ကထိတာ၊ နိဗ္ဗာနပရိယောသာနာတိ ဧတ္ထ အနုပါဒိသေသာ။ အနုပါဒိသေသံ ပတ္တဿ ဟိ သဗ္ဗေ ဓမ္မာ ပရိယောသာနပ္ပတ္တာ နာမ ဟောန္တိ။ သေသပဒါနိ ဟေဋ္ဌာ ဝုတ္တတ္ထာနေဝ။

၉။ ပဗ္ဗဇ္ဇာသုတ္တဝဏ္ဏနာ

၅၉။ နဝမေ တသ္မာတိ ယသ္မာ ဧဝံ အပရိစိတစိတ္တဿ သာမညတ္ထော န သမ္ပဇ္ဇတိ၊ တသ္မာ။ ယထာပဗ္ဗဇ္ဇာပရိစိတဉ္စ နော စိတ္တံ ဘဝိဿတီတိ ယထာ ပဗ္ဗဇ္ဇာနုရူပေန ပရိစိတံ။ ယေ ဟိ ကေစိ ပဗ္ဗဇန္တိ နာမ၊ သဗ္ဗေ တေ အရဟတ္တံ ပတ္ထေတွာ။ တသ္မာ ယံ စိတ္တံ အရဟတ္တာဓိဂမတ္ထာယ ပရိစိတံ ဝဍ္ဎိတံ၊ တံ ယထာပဗ္ဗဇ္ဇာပရိစိတံ နာမာတိ ဝေဒိတဗ္ဗံ။ ဧဝရူပံ ပန စိတ္တံ ဘဝိဿတီတိ သိက္ခိတဗ္ဗံ။ လောကဿ သမဉ္စ ဝိသမဉ္စာတိ သတ္တလောကဿ သုစရိတဒုစ္စရိတာနိ။ လောကဿ ဘဝဉ္စ ဝိဘဝဉ္စာတိ တဿ ဝဍ္ဎိဉ္စ ဝိနာသဉ္စ၊ တထာ သမ္ပတ္တိဉ္စ ဝိပတ္တိဉ္စ။ လောကဿသမုဒယဉ္စ အတ္ထင်္ဂမဉ္စာတိ ပန သင်္ခါရလောကံ သန္ဓာယ ဝုတ္တံ၊ ခန္ဓာနံ နိဗ္ဗတ္တိဉ္စ ဘေဒဉ္စာတိ အတ္ထော။

၁၀။ ဂိရိမာနန္ဒသုတ္တဝဏ္ဏနာ

၆၀။ ဒသမေ အနုကမ္ပံ ဥပါဒါယာတိ ဂိရိမာနန္ဒတ္ထေရေ အနုကမ္ပံ ပဋိစ္စ။ စက္ခုရောဂေါတိအာဒယော ဝတ္ထုဝသေန ဝေဒိတဗ္ဗာ။ နိဗ္ဗတ္တိတပ္ပသာဒါနဉှိ ရောဂေါ နာမ နတ္ထိ။ ကဏ္ဏရောဂေါတိ ဗဟိကဏ္ဏေ ရောဂေါ။ ပိနာသောတိ ဗဟိနာသိကာယ ရောဂေါ။ နခသာတိ နခေဟိ ဝိလေခိတဋ္ဌာနေ ရောဂေါ။ ပိတ္တသမုဋ္ဌာနာတိ ပိတ္တသမုဋ္ဌိတာ။ တေ ကိရ ဒွတ္တိံသ ဟောန္တိ။ သေမှသမုဋ္ဌာနာဒီသုပိ ဧသေဝ နယော။ ဥတုပရိဏာမဇာတိ ဥတုပရိဏာမေန အစ္စုဏှာတိသီတေန ဥပ္ပဇ္ဇနကရောဂါ။ ဝိသမပရိဟာရဇာတိ အတိစိရဋ္ဌာနနိသဇ္ဇာဒိနာ ဝိသမပရိဟာရေန ဇာတာ။ ဩပက္ကမိကာတိ ဝဓဗန္ဓနာဒိနာ ဥပက္ကမေန ဇာတာ။ ကမ္မဝိပါကဇာတိ ဗလဝကမ္မဝိပါကသမ္ဘူတာ။ သန္တန္တိ ရာဂါဒိသန္တတာယ သန္တံ။ အတပ္ပကဋ္ဌေန ပဏီတံ။ သေသံ သဗ္ဗတ္ထ ဥတ္တာနတ္ထမေဝါတိ။

သစိတ္တဝဂ္ဂေါ ပဌမော။