📜

(၁၁) ၁။ သမဏသညာဝဂ္ဂေါ

၁။ သမဏသညာသုတ္တဝဏ္ဏနာ

၁၀၁။ တတိယဿ ပဌမေ သမဏသညာတိ သမဏာနံ ဥပ္ပဇ္ဇနကသညာ။ သန္တတကာရီတိ နိရန္တရကာရီ။ အဗျာပဇ္ဈောတိ နိဒ္ဒုက္ခော။ ဣဒမတ္ထံတိဿ ဟောတီတိ ဣဒမတ္ထံ ဣမေ ပစ္စယာတိ ဧဝမဿ ဇီဝိတပရိက္ခာရေသု ဟောတိ၊ ပစ္စဝေက္ခိတပရိဘောဂံ ပရိဘုဉ္ဇတီတိ အတ္ထော။ ဒုတိယံ ဥတ္တာနတ္ထမေဝ။

၃။ မိစ္ဆတ္တသုတ္တဝဏ္ဏနာ

၁၀၃။ တတိယေ ဝိရာဓနာ ဟောတီတိ သဂ္ဂတော မဂ္ဂတော စ ဝိရဇ္ဈနံ ဟောတိ။ နော အာရာဓနာတိ န သမ္ပာဒနာ န ပရိပူရကာရိတာ ဟောတိ။ ပဟောတီတိ ပဝတ္တတိ။

၄-၅။ ဗီဇသုတ္တာဒိဝဏ္ဏနာ

၁၀၄-၁၀၅။ စတုတ္ထေ ယထာဒိဋ္ဌိ သမတ္တံ သမာဒိန္နန္တိ ဒိဋ္ဌာနုရူပေန ပရိပုဏ္ဏံ သမာဒိန္နံ သကလံ ဂဟိတံ။ စေတနာတိ တီသု ဒွါရေသု နိဗ္ဗတ္တိတစေတနာဝ ဂဟိတာ။ ပတ္ထနာတိ ‘‘ဧဝရူပေါ သိယ’’န္တိ ဧဝံ ပတ္ထနာ။ ပဏိဓီတိ ‘‘ဒေဝေါ ဝါ ဘဝိဿာမိ ဒေဝညတရော ဝါ’’တိ စိတ္တဋ္ဌပနာ။ သင်္ခါရာတိ သမ္ပယုတ္တကသင်္ခါရာ။ ပဉ္စမေ ပုရေစာရိကဋ္ဌေန ပုဗ္ဗင်္ဂမာ။ အနွဒေဝါတိ တံ အနုဗန္ဓမာနမေဝ။

၆။ နိဇ္ဇရသုတ္တဝဏ္ဏနာ

၁၀၆။ ဆဋ္ဌေ နိဇ္ဇရဝတ္ထူနီတိ နိဇ္ဇရကာရဏာနိ။ မိစ္ဆာဒိဋ္ဌိ နိဇ္ဇိဏ္ဏာ ဟောတီတိ အယံ ဟေဋ္ဌာ ဝိပဿနာယပိ နိဇ္ဇိဏ္ဏာ ဧဝ ပဟီနာ။ ကသ္မာ ပုန ဂဟိတာတိ? အသမုစ္ဆိန္နတ္တာ။ ဝိပဿနာယ ဟိ ကိဉ္စာပိ နိဇ္ဇိဏ္ဏာ၊ န ပန သမုစ္ဆိန္နာ။ မဂ္ဂေါ ပန ဥပ္ပဇ္ဇိတွာ တံ သမုစ္ဆိန္ဒတိ၊ န ပုန ဝုဋ္ဌာတုံ ဒေတိ။ တသ္မာ ပုန ဂဟိတာ။ ဧဝံ သဗ္ဗပဒေသု ယောဇေတဗ္ဗော။ ဧတ္ထ စ သမ္မာဝိမုတ္တိပစ္စယာ စတုသဋ္ဌိ ဓမ္မာ ဘာဝနာပါရိပူရိံ ဂစ္ဆန္တိ။ ကတမေ စတုသဋ္ဌိ? သောတာပတ္တိမဂ္ဂက္ခဏေ အဓိမောက္ခဋ္ဌေန သဒ္ဓိန္ဒြိယံ ပရိပူရတိ၊ ပဂ္ဂဟဋ္ဌေန ဝီရိယိန္ဒြိယံ၊ ဥပဋ္ဌာနဋ္ဌေန သတိန္ဒြိယံ၊ အဝိက္ခေပဋ္ဌေန သမာဓိန္ဒြိယံ၊ ဒဿနဋ္ဌေန ပညိန္ဒြိယံ ပရိပူရေတိ၊ ဝိဇာနနဋ္ဌေန မနိန္ဒြိယံ၊ အဘိနန္ဒနဋ္ဌေန သောမနဿိန္ဒြိယံ၊ ပဝတ္တသန္တတိအာဓိပတေယျဋ္ဌေန ဇီဝိတိန္ဒြိယံ ပရိပူရတိ…ပေ… အရဟတ္တဖလက္ခဏေ အဓိမောက္ခဋ္ဌေန သဒ္ဓိန္ဒြိယံ…ပေ… ပဝတ္တသန္တတိအာဓိပတေယျဋ္ဌေန ဇီဝိတိန္ဒြိယံ ပရိပူရတီတိ ဧဝံ စတူသု စ မဂ္ဂေသု စတူသု စ ဖလေသု အဋ္ဌဋ္ဌ ဟုတွာ စတုသဋ္ဌိ ဓမ္မာ ပါရိပူရိံ ဂစ္ဆန္တိ။

၇။ ဓောဝနာသုတ္တဝဏ္ဏနာ

၁၀၇။ သတ္တမေ ဓောဝနန္တိ အဋ္ဌိဓောဝနံ။ တသ္မိဉှိ ဇနပဒေ မနုဿာ ဉာတကေ မတေ န ဈာပေန္တိ၊ အာဝါဋံ ပန ခဏိတွာ ဘူမိယံ နိဒဟန္တိ။ အထ နေသံ ပူတိဘူတာနံ အဋ္ဌီနိ နီဟရိတွာ ဓောဝိတွာ ပဋိပါဋိယာ ဥဿာပေတွာ ဂန္ဓမာလေဟိ ပူဇေတွာ ဌပေန္တိ။ နက္ခတ္တေ ပတ္တေ တာနိ အဋ္ဌီနိ ဂဟေတွာ ရောဒန္တိ ပရိဒေဝန္တိ၊ တတော နက္ခတ္တံ ကီဠန္တိ။

၈-၁၀။ တိကိစ္ဆကသုတ္တာဒိဝဏ္ဏနာ

၁၀၈-၁၁၀။ အဋ္ဌမေ ဝိရေစနန္တိ ဒေါသနီဟရဏဘေသဇ္ဇံ။ ဝိရိတ္တာ ဟောတီတိ နီဟဋာ ဟောတိ ပနုဒိတာ။ နဝမေ ဝမနန္တိ ဝမနကရဏဘေသဇ္ဇံ။ ဒသမေ နိဒ္ဓမနီယာတိ နိဒ္ဓမိတဗ္ဗာ။ နိဒ္ဓန္တာတိ နိဒ္ဓမိတာ။

၁၁။ ပဌမအသေခသုတ္တဝဏ္ဏနာ

၁၁၁။ ဧကာဒသမေ အင်္ဂပရိပူရဏတ္ထံ သမ္မာဒိဋ္ဌိယေဝ သမ္မာဉာဏန္တိ ဝုတ္တာ။ ဧဝမေတေ သဗ္ဗေပိ အရဟတ္တဖလဓမ္မာ အသေခါ၊ အသေခဿ ပဝတ္တတ္တာ ပစ္စဝေက္ခဏဉာဏမ္ပိ အသေခန္တိ ဝုတ္တံ။

၁၂။ ဒုတိယအသေခသုတ္တဝဏ္ဏနာ

၁၁၂။ ဒွါဒသမေ အသေခိယာတိ အသေခါယေဝ၊ အသေခသန္တကာ ဝါ။ ဣမိနာ သုတ္တေန ခီဏာသဝေါဝ ကထိတောတိ။

သမဏသညာဝဂ္ဂေါ ပဌမော။