📜

(၁၂) ၂။ ပစ္စောရောဟဏိဝဂ္ဂေါ

၁-၂။ အဓမ္မသုတ္တဒွယဝဏ္ဏနာ

၁၁၃-၁၁၄။ ဒုတိယဿ ပဌမေ ပါဋိယေက္ကံ ပုစ္ဆာ စ ဝိဿဇ္ဇနာ စ ကတာ။ ဒုတိယေ ဧကတောဝ။

၃။ တတိယအဓမ္မသုတ္တဝဏ္ဏနာ

၁၁၅။ တတိယေ ဥဒ္ဒေသံ ဥဒ္ဒိသိတွာတိ မာတိကံ နိက္ခိပိတွာ။ သတ္ထုစေဝ သံဝဏ္ဏိတောတိ ပဉ္စသု ဌာနေသု ဧတဒဂ္ဂေ ဌပေန္တေန သတ္ထာရာ သံဝဏ္ဏိတော။ သမ္ဘာဝိတောတိ ဂုဏသမ္ဘာဝနာယ သမ္ဘာဝိတော။ ပဟောတီတိ သက္ကောတိ။ အတိသိတွာတိ အတိက္ကမိတွာ။ ဇာနံ ဇာနာတီတိ ဇာနိတဗ္ဗကံ ဇာနာတိ။ ပဿံ ပဿတီတိ ပဿိတဗ္ဗကံ ပဿတိ။ စက္ခုဘူတောတိ စက္ခု ဝိယ ဘူတော ဇာတော နိဗ္ဗတ္တော။ ဉာဏဘူတောတိ ဉာဏသဘာဝေါ။ ဓမ္မဘူတောတိ ဓမ္မသဘာဝေါ။ ဗြဟ္မဘူတောတိ သေဋ္ဌသဘာဝေါ။ ဝတ္တာတိ ဝတ္တုံ သမတ္ထော။ ပဝတ္တာတိ ပဝတ္တေတုံ သမတ္ထော။ အတ္ထဿ နိန္နေတာတိ အတ္ထံ နီဟရိတွာ ဒဿေတာ။ ယထာ နော ဘဂဝါတိ ယထာ အမှာကံ ဘဂဝါ ဗျာကရေယျ။

၄။ အဇိတသုတ္တဝဏ္ဏနာ

၁၁၆။ စတုတ္ထေ အဇိတောတိ ဧဝံနာမကော။ စိတ္တဋ္ဌာနသတာနီတိ စိတ္တုပ္ပာဒသတာနိ။ ယေဟီတိ ယေဟိ စိတ္တဋ္ဌာနသတေဟိ အနုယုဉ္ဇိယမာနာ။ ဥပါရဒ္ဓါဝ ဇာနန္တိ ဥပါရဒ္ဓသ္မာတိ ဝိရဒ္ဓါ နိဂ္ဂဟိတာ ဧဝံ ဇာနန္တိ ‘‘ဝိရဒ္ဓါ မယံ၊ နိဂ္ဂဟိတာ မယံ၊ အာရောပိတော နော ဒေါသော’’တိ။ ပဏ္ဍိတဝတ္ထူနီတိ ပဏ္ဍိတဘာဝတ္ထာယ ကာရဏာနိ။

၅-၆။ သင်္ဂါရဝသုတ္တာဒိဝဏ္ဏနာ

၁၁၇-၁၁၈။ ပဉ္စမေ ဩရိမံ တီရန္တိ လောကိယံ ဩရိမတီရံ။ ပါရိမံ တီရန္တိ လောကုတ္တရံ ပါရိမတီရံ။ ပါရဂါမိနောတိ နိဗ္ဗာနဂါမိနော။ တီရမေဝါနုဓာဝတီတိ သက္ကာယဒိဋ္ဌိတီရံယေဝ အနုဓာဝတိ။ ဓမ္မေဓမ္မာနုဝတ္တိနောတိ သမ္မာ အက္ခာတေ နဝဝိဓေ လောကုတ္တရဓမ္မေ အနုဓမ္မဝတ္တိနော၊ တဿ ဓမ္မဿာနုစ္ဆဝိကာယ သဟသီလာယ ပုဗ္ဗဘာဂပဋိပတ္တိယာ ပဝတ္တမာနာ။ မစ္စုဓေယျံသုဒုတ္တရန္တိ မစ္စုနော ဌာနဘူတံ တေဘူမကဝဋ္ဋံ သုဒုတ္တရံ တရိတွာ။ ပါရမေဿန္တီတိ နိဗ္ဗာနံ ပါပုဏိဿန္တိ။

ဩကာ အနောကမာဂမ္မာတိ ဝဋ္ဋတော ဝိဝဋ္ဋံ အာဂမ္မ။ ဝိဝေကေ ယတ္ထ ဒူရမန္တိ ယသ္မိံ ကာယစိတ္တဥပဓိဝိဝေကေ ဒုရဘိရမံ၊ တတြာဘိရတိမိစ္ဆေယျ။ ဟိတွာ ကာမေတိ ဒုဝိဓေပိ ကာမေ ပဟာယ။ အကိဉ္စနောတိ နိပ္ပလိဗောဓော။ အာဒါနပဋိနိဿဂေတိ ဂဟဏပဋိနိဿဂ္ဂသင်္ခါတေ နိဗ္ဗာနေ။ အနုပါဒါယ ယေ ရတာတိ စတူဟိ ဥပါဒါနေဟိ ကိဉ္စိပိ အနုပါဒိယိတွာ ယေ အဘိရတာ။ ပရိနိဗ္ဗုတာတိ တေ အပစ္စယပရိနိဗ္ဗာနေန ပရိနိဗ္ဗုတာ နာမာတိ ဝေဒိတဗ္ဗာ။ ဆဋ္ဌံ ဘိက္ခူနံ ဒေသိတံ။

၇-၈။ ပစ္စောရောဟဏီသုတ္တဒွယဝဏ္ဏနာ

၁၁၉-၁၂၀။ သတ္တမေ ပစ္စောရောဟဏီတိ ပါပဿ ပစ္စောရောဟဏံ။ ပတ္ထရိတွာတိ သန္ထရိတွာ။ အန္တရာ စ ဝေလံ အန္တရာ စ အဂျာဂါရန္တိ ဝါလိကာရာသိဿ စ အဂ္ဂိအဂါရဿ စ အန္တရေ။ အဋ္ဌမံ ဘိက္ခုသင်္ဃဿ ဒေသိတံ။ သေသံ သဗ္ဗတ္ထ ဥတ္တာနတ္ထမေဝါတိ။

ပစ္စောရောဟဏိဝဂ္ဂေါ ဒုတိယော။