📜

၁။ နိဿယဝဂ္ဂေါ

၁-၁၀။ ကိမတ္ထိယသုတ္တာဒိဝဏ္ဏနာ

၁-၁၀။ ဧကာဒသကနိပါတဿ ပဌမာဒီနိ ဥတ္တာနတ္ထာနေဝ။ ဒသမေ ဇနိတသ္မိန္တိ ကမ္မကိလေသေဟိ နိဗ္ဗတ္တေ၊ ဇနေ ဧတသ္မိန္တိ ဝါ ဇနေတသ္မိံ၊ မနုဿေသူတိ အတ္ထော။ တေနာဟ ‘‘ယေ ဂေါတ္တပဋိသာရိနော’’တိ။ ဇနိတသ္မိံ-သဒ္ဒေါ ဧဝ ဝါ ဣ-ကာရဿ ဧ-ကာရံ ကတွာ ‘‘ဇနေတသ္မိ’’န္တိ ဝုတ္တော။ ဇနိတသ္မိန္တိ စ ဇနသ္မိန္တိ အတ္ထော ဝေဒိတဗ္ဗော။ ဇနိတသ္မိန္တိ သာမညဂ္ဂဟဏေပိ ယတ္ထ စတုဝဏ္ဏသမညာ၊ တတ္ထေဝ မနုဿလောကေ။ ခတ္တိယော သေဋ္ဌောတိ အယံ လောကသမညာပိ မနုဿလောကေယေဝ၊ န ဒေဝကာယေ ဗြဟ္မကာယေ ဝါတိ ဒဿေတုံ ‘‘ယေ ဂေါတ္တပဋိသာရိနော’’တိ ဝုတ္တံ။ ပဋိသရန္တီတိ ‘‘အဟံ ဂေါတမော၊ အဟံ ကဿပေါ’’တိ ပဋိ ပဋိ အတ္တနော ဂေါတ္တံ အနုဿရန္တိ ပဋိဇာနန္တိ ဝါတိ အတ္ထော။

ကိမတ္ထိယသုတ္တာဒိဝဏ္ဏနာ နိဋ္ဌိတာ။

နိဿယဝဂ္ဂဝဏ္ဏနာ နိဋ္ဌိတာ။