📜

၄။ ကုမာရပဉှာ

၁။ ‘‘ဧကံ နာမ ကိံ’’? ‘‘သဗ္ဗေ သတ္တာ အာဟာရဋ္ဌိတိကာ’’။

၂။ ‘‘ဒွေ နာမ ကိံ’’? ‘‘နာမဉ္စ ရူပဉ္စ’’။

၃။ ‘‘တီဏိ နာမ ကိံ’’? ‘‘တိဿော ဝေဒနာ’’။

၄။ ‘‘စတ္တာရိ နာမ ကိံ’’? ‘‘စတ္တာရိ အရိယသစ္စာနိ’’။

၅။ ‘‘ပဉ္စ နာမ ကိံ’’? ‘‘ပဉ္စုပါဒါနက္ခန္ဓာ’’။

၆။ ‘‘ဆ နာမ ကိံ’’? ‘‘ဆ အဇ္ဈတ္တိကာနိ အာယတနာနိ’’။

၇။ ‘‘သတ္တ နာမ ကိံ’’? ‘‘သတ္တ ဗောဇ္ဈင်္ဂါ’’။

၈။ ‘‘အဋ္ဌ နာမ ကိံ’’? ‘‘အရိယော အဋ္ဌင်္ဂိကော မဂ္ဂေါ’’။

၉။ ‘‘နဝ နာမ ကိံ’’? ‘‘နဝ သတ္တာဝါသာ’’။

၁၀။ ‘‘ဒသ နာမ ကိံ’’? ‘‘ဒသဟင်္ဂေဟိ သမန္နာဂတော ‘အရဟာ’တိ ဝုစ္စတီ’’တိ။

ကုမာရပဉှာ နိဋ္ဌိတာ။