📜
၃။ စိတ္တဝဂ္ဂေါ
ဖန္ဒနံ ¶ စပလံ စိတ္တံ၊ ဒူရက္ခံ [ဒုရက္ခံ (သဗ္ဗတ္ထ)] ဒုန္နိဝါရယံ၊
ဥဇုံ ကရောတိ မေဓာဝီ၊ ဥသုကာရောဝ တေဇနံ။
ဝါရိဇောဝ ထလေ ခိတ္တော၊ ဩကမောကတဥဗ္ဘတော၊
ပရိဖန္ဒတိဒံ စိတ္တံ၊ မာရဓေယျံ ပဟာတဝေ။
ဒုန္နိဂ္ဂဟဿ လဟုနော၊ ယတ္ထကာမနိပါတိနော၊
စိတ္တဿ ဒမထော သာဓု၊ စိတ္တံ ဒန္တံ သုခါဝဟံ။
သုဒုဒ္ဒသံ ¶ ¶ သုနိပုဏံ၊ ယတ္ထကာမနိပါတိနံ၊
စိတ္တံ ရက္ခေထ မေဓာဝီ၊ စိတ္တံ ဂုတ္တံ သုခါဝဟံ။
ဒူရင်္ဂမံ ဧကစရံ [ဧကစာရံ (က။)]၊ အသရီရံ ဂုဟာသယံ၊
ယေ ¶ စိတ္တံ သံယမေဿန္တိ၊ မောက္ခန္တိ မာရဗန္ဓနာ။
အနဝဋ္ဌိတစိတ္တဿ၊ သဒ္ဓမ္မံ အဝိဇာနတော၊
ပရိပ္လဝပသာဒဿ၊ ပညာ န ပရိပူရတိ။
အနဝဿုတစိတ္တဿ၊ အနနွာဟတစေတသော၊
ပုညပါပပဟီနဿ၊ နတ္ထိ ဇာဂရတော ဘယံ။
ကုမ္ဘူပမံ ကာယမိမံ ဝိဒိတွာ၊ နဂရူပမံ စိတ္တမိဒံ ဌပေတွာ၊
ယောဓေထ မာရံ ပညာဝုဓေန၊ ဇိတဉ္စ ရက္ခေ အနိဝေသနော သိယာ။
အစိရံ ¶ ဝတယံ ကာယော၊ ပထဝိံ အဓိသေဿတိ၊
ဆုဒ္ဓါ အပေတဝိညာဏော၊ နိရတ္ထံဝ ကလိင်္ဂရံ။
ဒိသော ဒိသံ ယံ တံ ကယိရာ၊ ဝေရီ ဝါ ပန ဝေရိနံ၊
မိစ္ဆာပဏိဟိတံ စိတ္တံ၊ ပါပိယော [ပါပိယံ (?)] နံ တတော ကရေ။
န တံ မာတာ ပိတာ ကယိရာ၊ အညေ ဝါပိ စ ဉာတကာ၊
သမ္မာပဏိဟိတံ စိတ္တံ၊ သေယျသော နံ တတော ကရေ။
စိတ္တဝဂ္ဂေါ တတိယော နိဋ္ဌိတော။