📜
၁၁။ ဧကာဒသနိပါတော
၁။ သံကိစ္စတ္ထေရဂါထာ
‘‘ကိံ ¶ ¶ ¶ ¶ တဝတ္ထော ဝနေ တာတ၊ ဥဇ္ဇုဟာနောဝ ပါဝုသေ၊
ဝေရမ္ဘာ ရမဏီယာ တေ၊ ပဝိဝေကော ဟိ ဈာယိနံ။
‘‘ယထာ အဗ္ဘာနိ ဝေရမ္ဘော၊ ဝါတော နုဒတိ ပါဝုသေ၊
သညာ မေ အဘိကိရန္တိ၊ ဝိဝေကပဋိသညုတာ။
‘‘အပဏ္ဍရော အဏ္ဍသမ္ဘဝေါ၊ သီဝထိကာယ နိကေတစာရိကော၊
ဥပ္ပာဒယတေဝ မေ သတိံ၊ သန္ဒေဟသ္မိံ ဝိရာဂနိဿိတံ။
‘‘ယဉ္စ အညေ န ရက္ခန္တိ၊ ယော စ အညေ န ရက္ခတိ၊
သ ဝေ ဘိက္ခု သုခံ သေတိ၊ ကာမေသု အနပေက္ခဝါ။
‘‘အစ္ဆောဒိကာ ပုထုသိလာ၊ ဂေါနင်္ဂုလမိဂါယုတာ၊
အမ္ဗုသေဝါလသဉ္ဆန္နာ၊ တေ သေလာ ရမယန္တိ မံ။
‘‘ဝသိတံ မေ အရညေသု၊ ကန္ဒရာသု ဂုဟာသု စ၊
သေနာသနေသု ပန္တေသု၊ ဝါဠမိဂနိသေဝိတေ။
‘‘‘ဣမေ ဟညန္တု ဝဇ္ဈန္တု၊ ဒုက္ခံ ပပ္ပောန္တု ပါဏိနော’၊
သင်္ကပ္ပံ နာဘိဇာနာမိ၊ အနရိယံ ဒေါသသံဟိတံ။
‘‘ပရိစိဏ္ဏော မယာ သတ္ထာ၊ ကတံ ဗုဒ္ဓဿ သာသနံ၊
ဩဟိတော ဂရုကော ဘာရော၊ ဘဝနေတ္တိ သမူဟတာ။
‘‘ယဿ စတ္ထာယ [ယဿတ္ထာယ (သီ။)] ပဗ္ဗဇိတော၊ အဂါရသ္မာနဂါရိယံ၊
သော မေ အတ္ထော အနုပ္ပတ္တော၊ သဗ္ဗသံယောဇနက္ခယော။
‘‘နာဘိနန္ဒာမိ ¶ မရဏံ၊ နာဘိနန္ဒာမိ ဇီဝိတံ၊
ကာလဉ္စ ပဋိကင်္ခါမိ၊ နိဗ္ဗိသံ ဘတကော ယထာ။
‘‘နာဘိနန္ဒာမိ ¶ ¶ မရဏံ၊ နာဘိနန္ဒာမိ ဇီဝိတံ၊
ကာလဉ္စ ပဋိကင်္ခါမိ၊ သမ္ပဇာနော ပတိဿတော’’တိ။
… သံကိစ္စော ထေရော…။
ဧကာဒသနိပါတော နိဋ္ဌိတော။
တတြုဒ္ဒါနံ –
သံကိစ္စထေရော ဧကောဝ၊ ကတကိစ္စော အနာသဝေါ၊
ဧကာဒသနိပါတမှိ၊ ဂါထာ ဧကာဒသေဝ စာတိ။