မူလ > သုတ္တပိဋက > ခုဒ္ဒကနိကာယ > ထေရဂါထာပါဠိ

THA Vol 0
MMR Vol 0
VRI Vol 0
PTS Vol 0

Misc. Paragraph

၅။ ပဉ္စကနိပါတော

၁။ ရာဇဒတ္တတ္ထေရဂါထာ

၂။ သုဘူတတ္ထေရဂါထာ

၃။ ဂိရိမာနန္ဒတ္ထေရဂါထာ

၁၁။ သောဏကုဋိကဏ္ဏတ္ထေရဂါထာ

၁၂။ ကောသိယတ္ထေရဂါထာ

‘‘ဘိက္ခု ¶ ¶ ¶ ¶ သိဝထိကံ [သီဝထိကံ (သီ။ သျာ။ ပီ။)] ဂန္တွာ၊ အဒ္ဒသ ဣတ္ထိမုဇ္ဈိတံ၊

အပဝိဒ္ဓံ သုသာနသ္မိံ၊ ခဇ္ဇန္တိံ ကိမိဟီ ဖုဋံ။

‘‘ယဉှိ ဧကေ ဇိဂုစ္ဆန္တိ၊ မတံ ဒိသွာန ပါပကံ၊

ကာမရာဂေါ ပါတုရဟု၊ အန္ဓောဝ သဝတီ [ဝသတီ (သီ။)] အဟုံ။

‘‘ဩရံ ဩဒနပါကမှာ၊ တမှာ ဌာနာ အပက္ကမိံ၊

သတိမာ သမ္ပဇာနောဟံ၊ ဧကမန္တံ ဥပါဝိသိံ။

‘‘တတော မေ မနသီကာရော၊ ယောနိသော ဥဒပဇ္ဇထ၊

အာဒီနဝေါ ပါတုရဟု၊ နိဗ္ဗိဒါ သမတိဋ္ဌထ။

‘‘တတော စိတ္တံ ဝိမုစ္စိ မေ၊ ပဿ ဓမ္မသုဓမ္မတံ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသန’’န္တိ။

‘‘အယောဂေ ယုဉ္ဇမတ္တာနံ၊ ပုရိသော ကိစ္စမိစ္ဆကော [ကိစ္စမိစ္ဆတော (သီ။)၊ ကိစ္စမိစ္ဆယံ (ကတ္ထစိ)]၊

စရံ စေ နာဓိဂစ္ဆေယျ၊ ‘တံ မေ ဒုဗ္ဘဂလက္ခဏံ’။

‘‘အဗ္ဗူဠှံ အဃဂတံ ဝိဇိတံ၊ ဧကဉ္စေ ဩဿဇေယျ ကလီဝ သိယာ၊

သဗ္ဗာနိပိ စေ ဩဿဇေယျ အန္ဓောဝ သိယာ၊ သမဝိသမဿ အဒဿနတော။

‘‘ယဉှိ ¶ ကယိရာ တဉှိ ဝဒေ၊ ယံ န ကယိရာ န တံ ဝဒေ၊

အကရောန္တံ ဘာသမာနံ၊ ပရိဇာနန္တိ ပဏ္ဍိတာ။

[ဓ။ ပ။ ၅၁ ဓမ္မပဒေပိ] ‘‘ယထာပိ ရုစိရံ ပုပ္ဖံ၊ ဝဏ္ဏဝန္တံ အဂန္ဓကံ၊

ဧဝံ သုဘာသိတာ ဝါစာ၊ အဖလာ ဟောတိ အကုဗ္ဗတော။

[ဓ။ ပ။ ၅၂] ‘‘ယထာပိ ¶ ရုစိရံ ပုပ္ဖံ၊ ဝဏ္ဏဝန္တံ သုဂန္ဓကံ [သဂန္ဓကံ (သီ။ သျာ။ ပီ။)]၊

ဧဝံ သုဘာသိတာ ဝါစာ၊ သဖလာ ဟောတိ ကုဗ္ဗတော’’တိ [သကုဗ္ဗတော (သီ။ ပီ။)၊ သုကုဗ္ဗတော (သျာ။)]။

‘‘ဝဿတိ ¶ ¶ ဒေဝေါ ယထာ သုဂီတံ၊ ဆန္နာ မေ ကုဋိကာ သုခါ နိဝါတာ၊

တဿံ ဝိဟရာမိ ဝူပသန္တော၊ အထ စေ ပတ္ထယသီ ပဝဿ ဒေဝ။

‘‘ဝဿတိ ဒေဝေါ ယထာ သုဂီတံ၊ ဆန္နာ မေ ကုဋိကာ သုခါ နိဝါတာ၊

တဿံ ဝိဟရာမိ သန္တစိတ္တော၊ အထ စေ ပတ္ထယသီ ပဝဿ ဒေဝ။

‘‘ဝဿတိ ဒေဝေါ…ပေ… တဿံ ဝိဟရာမိ ဝီတရာဂေါ…ပေ…။

‘‘ဝဿတိ ဒေဝေါ…ပေ… တဿံ ဝိဟရာမိ ဝီတဒေါသော…ပေ…။

‘‘ဝဿတိ ဒေဝေါ…ပေ… တဿံ ¶ ဝိဟရာမိ ဝီတမောဟော၊

‘‘ယံ ပတ္ထယာနော ဓမ္မေသု၊ ဥပဇ္ဈာယော အနုဂ္ဂဟိ၊

အမတံ အဘိကင်္ခန္တံ၊ ကတံ ကတ္တဗ္ဗကံ မယာ။

‘‘အနုပ္ပတ္တော သစ္ဆိကတော၊ သယံ ဓမ္မော အနီတိဟော၊

ဝိသုဒ္ဓိဉာဏော နိက္ကင်္ခေါ၊ ဗျာကရောမိ တဝန္တိကေ။

‘‘ပုဗ္ဗေနိဝါသံ ဇာနာမိ၊ ဒိဗ္ဗစက္ခု ဝိသောဓိတံ၊

သဒတ္ထော မေ အနုပ္ပတ္တော၊ ကတံ ဗုဒ္ဓဿ သာသနံ။

‘‘အပ္ပမတ္တဿ မေ သိက္ခာ၊ သုဿုတာ တဝ သာသနေ၊

သဗ္ဗေ မေ အာသဝါ ခီဏာ၊ နတ္ထိ ဒါနိ ပုနဗ္ဘဝေါ။

‘‘အနုသာသိ ¶ မံ အရိယဝတာ၊ အနုကမ္ပိ အနုဂ္ဂဟိ၊

အမောဃော တုယှမောဝါဒေါ၊ အန္တေဝါသိမှိ သိက္ခိတော’’တိ။

‘‘သာဓူ ဟိ ကိရ မေ မာတာ၊ ပတောဒံ ဥပဒံသယိ၊

ယဿာဟံ ဝစနံ သုတွာ၊ အနုသိဋ္ဌော ဇနေတ္တိယာ၊

အာရဒ္ဓဝီရိယော ပဟိတတ္တော၊ ပတ္တော သမ္ဗောဓိမုတ္တမံ။

‘‘အရဟာ ¶ ဒက္ခိဏေယျောမှိ၊ တေဝိဇ္ဇော အမတဒ္ဒသော၊

ဇေတွာ နမုစိနော သေနံ၊ ဝိဟရာမိ အနာသဝေါ။

‘‘အဇ္ဈတ္တဉ္စ ¶ ဗဟိဒ္ဓါ စ၊ ယေ မေ ဝိဇ္ဇိံသု အာသဝါ၊

သဗ္ဗေ အသေသာ ဥစ္ဆိန္နာ၊ န စ ဥပ္ပဇ္ဇရေ ပုန။

‘‘ဝိသာရဒါ ခေါ ဘဂိနီ၊ ဧတမတ္ထံ အဘာသယိ၊

‘အပိဟာ နူန မယိပိ၊ ဝနထော တေ န ဝိဇ္ဇတိ’။

‘‘ပရိယန္တကတံ ဒုက္ခံ၊ အန္တိမောယံ သမုဿယော၊

ဇာတိမရဏသံသာရော၊ နတ္ထိ ဒါနိ ပုနဗ္ဘဝေါ’’တိ။

‘‘အတ္ထာယ ဝတ မေ ဗုဒ္ဓါ၊ နဒိံ နေရဉ္ဇရံ အဂါ၊

ယဿာဟံ ဓမ္မံ သုတွာန၊ မိစ္ဆာဒိဋ္ဌိံ ဝိဝဇ္ဇယိံ။

‘‘ယဇိံ ¶ ဥစ္စာဝစေ ယညေ၊ အဂ္ဂိဟုတ္တံ ဇုဟိံ အဟံ၊

‘ဧသာ သုဒ္ဓီ’တိ မညန္တော၊ အန္ဓဘူတော [အန္ဓီဘူတော (က။)] ပုထုဇ္ဇနော။

‘‘ဒိဋ္ဌိဂဟနပက္ခန္ဒော [ပက္ခန္တော (သီ။)၊ ပက္ခန္နော (သျာ။ ပီ။)]၊ ပရာမာသေန မောဟိတော၊

အသုဒ္ဓိံ မညိသံ သုဒ္ဓိံ၊ အန္ဓဘူတော အဝိဒ္ဒသု။

‘‘မိစ္ဆာဒိဋ္ဌိ ပဟီနာ မေ၊ ဘဝါ သဗ္ဗေ ပဒါလိတာ [ဝိဒါလိတာ (က။)]၊

ဇုဟာမိ ဒက္ခိဏေယျဂ္ဂိံ၊ နမဿာမိ တထာဂတံ။

‘‘မောဟာ ¶ သဗ္ဗေ ပဟီနာ မေ၊ ဘဝတဏှာ ပဒါလိတာ၊

ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါ’’တိ။

‘‘ပါတော မဇ္ဈနှိကံ သာယံ၊ တိက္ခတ္တုံ ဒိဝသဿဟံ၊

ဩတရိံ ဥဒကံ သောဟံ၊ ဂယာယ ဂယဖဂ္ဂုယာ။

‘‘‘ယံ ¶ မယာ ပကတံ ပါပံ၊ ပုဗ္ဗေ အညာသု ဇာတိသု၊

တံ ဒါနီဓ ပဝါဟေမိ’၊ ဧဝံဒိဋ္ဌိ ပုရေ အဟုံ။

‘‘သုတွာ ¶ သုဘာသိတံ ဝါစံ၊ ဓမ္မတ္ထသဟိတံ ပဒံ၊

တထံ ယာထာဝကံ အတ္ထံ၊ ယောနိသော ပစ္စဝေက္ခိသံ၊

‘‘နိနှာတသဗ္ဗပါပေါမှိ၊ နိမ္မလော ပယတော သုစိ၊

သုဒ္ဓါ သုဒ္ဓဿ ဒါယာဒေါ၊ ပုတ္တော ဗုဒ္ဓဿ ဩရသော။

‘‘ဩဂယှဋ္ဌင်္ဂိကံ သောတံ၊ သဗ္ဗပါပံ ပဝါဟယိံ၊

တိဿော ဝိဇ္ဇာ အဇ္ဈဂမိံ၊ ကတံ ဗုဒ္ဓဿ သာသန’’န္တိ။

‘‘ဝါတရောဂါဘိနီတော တွံ၊ ဝိဟရံ ကာနနေ ဝနေ၊

ပဝိဋ္ဌဂေါစရေ လူခေ၊ ကထံ ဘိက္ခု ကရိဿသိ။

‘‘ပီတိသုခေန ဝိပုလေန၊ ဖရမာနော သမုဿယံ၊

လူခမ္ပိ အဘိသမ္ဘောန္တော၊ ဝိဟရိဿာမိ ကာနနေ။

‘‘ဘာဝေန္တော သတိပဋ္ဌာနေ၊ ဣန္ဒြိယာနိ ဗလာနိ စ၊

ဗောဇ္ဈင်္ဂါနိ စ ဘာဝေန္တော၊ ဝိဟရိဿာမိ ကာနနေ။

‘‘အာရဒ္ဓဝီရိယေ ပဟိတတ္တေ၊ နိစ္စံ ဒဠှပရက္ကမေ [အာရဒ္ဓဝီရိယော ပဟိတတ္တော၊ နိစ္စံ ဒဠှပရက္ကမော (သီ။)]၊

သမဂ္ဂေ သဟိတေ ဒိသွာ၊ ဝိဟရိဿာမိ ကာနနေ။

‘‘အနုဿရန္တော သမ္ဗုဒ္ဓံ၊ အဂ္ဂံ ဒန္တံ သမာဟိတံ၊

အတန္ဒိတော ¶ ရတ္တိန္ဒိဝံ၊ ဝိဟရိဿာမိ ကာနနေ’’တိ။

‘‘ဩလဂ္ဂေဿာမိ ¶ တေ စိတ္တ၊ အာဏိဒွါရေဝ ဟတ္ထိနံ၊

န တံ ပါပေ နိယောဇေဿံ၊ ကာမဇာလ [ကာမဇာလံ (သျာ။)] သရီရဇ [သရီရဇံ (သျာ။ က။)]။

‘‘တွံ ¶ ဩလဂ္ဂေါ န ဂစ္ဆသိ [န ဂဉ္ဆိသိ (ပီ)]၊ ဒွါရဝိဝရံ ဂဇောဝ အလဘန္တော၊

န စ စိတ္တကလိ ပုနပ္ပုနံ၊ ပသက္က [ပသဟံ (သီ။ သျာ။ ပီ။)] ပါပရတော စရိဿသိ။

‘‘ယထာ ကုဉ္ဇရံ အဒန္တံ၊ နဝဂ္ဂဟမင်္ကုသဂ္ဂဟော၊

ဗလဝါ အာဝတ္တေတိ အကာမံ၊ ဧဝံ အာဝတ္တယိဿံ တံ။

‘‘ယထာ ဝရဟယဒမကုသလော၊ သာရထိ ပဝရော ဒမေတိ အာဇညံ၊

ဧဝံ ဒမယိဿံ တံ၊ ပတိဋ္ဌိတော ပဉ္စသု ဗလေသု။

‘‘သတိယာ ¶ တံ နိဗန္ဓိဿံ၊ ပယုတ္တော တေ ဒမေဿာမိ [ပယတတ္တော ဝေါဒပေဿာမိ (သီ။)]၊

ဝီရိယဓုရနိဂ္ဂဟိတော၊ န ယိတော ဒူရံ ¶ ဂမိဿသေ စိတ္တာ’’တိ။

‘‘ဥပါရမ္ဘစိတ္တော ဒုမ္မေဓော၊ သုဏာတိ ဇိနသာသနံ၊

အာရကာ ဟောတိ သဒ္ဓမ္မာ၊ နဘသော ပထဝီ ယထာ။

‘‘ဥပါရမ္ဘစိတ္တော ဒုမ္မေဓော၊ သုဏာတိ ဇိနသာသနံ၊

ပရိဟာယတိ သဒ္ဓမ္မာ၊ ကာဠပက္ခေဝ စန္ဒိမာ။

‘‘ဥပါရမ္ဘစိတ္တော ဒုမ္မေဓော၊ သုဏာတိ ဇိနသာသနံ၊

ပရိသုဿတိ သဒ္ဓမ္မေ၊ မစ္ဆော အပ္ပောဒကေ ယထာ။

‘‘ဥပါရမ္ဘစိတ္တော ဒုမ္မေဓော၊ သုဏာတိ ဇိနသာသနံ၊

န ဝိရူဟတိ သဒ္ဓမ္မေ၊ ခေတ္တေ ဗီဇံဝ ပူတိကံ။

‘‘ယော စ တုဋ္ဌေန စိတ္တေန၊ သုဏာတိ ဇိနသာသနံ၊

ခေပေတွာ အာသဝေ သဗ္ဗေ၊ သစ္ဆိကတွာ အကုပ္ပတံ၊

ပပ္ပုယျ ပရမံ သန္တိံ၊ ပရိနိဗ္ဗာတိနာသဝေါ’’တိ။

‘‘ဥပသမ္ပဒါ ¶ စ မေ လဒ္ဓါ၊ ဝိမုတ္တော စမှိ အနာသဝေါ၊

သော စ မေ ဘဂဝါ ဒိဋ္ဌော၊ ဝိဟာရေ စ သဟာဝသိံ။

‘‘ဗဟုဒေဝ ရတ္တိံ ဘဂဝါ၊ အဗ္ဘောကာသေတိနာမယိ၊

ဝိဟာရကုသလော သတ္ထာ၊ ဝိဟာရံ ပါဝိသီ တဒါ။

‘‘သန္ထရိတွာန သင်္ဃာဋိံ၊ သေယျံ ကပ္ပေသိ ဂေါတမော၊

သီဟော ¶ သေလဂုဟာယံဝ၊ ပဟီနဘယဘေရဝေါ။

‘‘တတော ကလျာဏဝါက္ကရဏော၊ သမ္မာသမ္ဗုဒ္ဓသာဝကော၊

သောဏော အဘာသိ သဒ္ဓမ္မံ၊ ဗုဒ္ဓသေဋ္ဌဿ သမ္မုခါ။

‘‘ပဉ္စက္ခန္ဓေ ပရိညာယ၊ ဘာဝယိတွာန အဉ္ဇသံ၊

ပပ္ပုယျ ပရမံ သန္တိံ၊ ပရိနိဗ္ဗိဿတျနာသဝေါ’’တိ။

‘‘ယော ¶ ¶ ဝေ ဂရူနံ ဝစနညု ဓီရော၊ ဝသေ စ တမှိ ဇနယေထ ပေမံ၊

သော ဘတ္တိမာ နာမ စ ဟောတိ ပဏ္ဍိတော၊ ဉတွာ စ ဓမ္မေသု ဝိသေသိ အဿ။

‘‘ယံ အာပဒါ ဥပ္ပတိတာ ဥဠာရာ၊ နက္ခမ္ဘယန္တေ ပဋိသင်္ခယန္တံ၊

သော ထာမဝါ နာမ စ ဟောတိ ပဏ္ဍိတော၊ ဉတွာ စ ဓမ္မေသု ဝိသေသိ အဿ။

‘‘ယော ဝေ သမုဒ္ဒေါဝ ဌိတော အနေဇော၊ ဂမ္ဘီရပညော နိပုဏတ္ထဒဿီ၊

အသံဟာရိယော နာမ စ ဟောတိ ပဏ္ဍိတော၊ ဉတွာ စ ဓမ္မေသု ဝိသေသိ အဿ။

‘‘ဗဟုဿုတော ဓမ္မဓရော စ ဟောတိ၊ ဓမ္မဿ ¶ ဟောတိ အနုဓမ္မစာရီ၊

သော တာဒိသော နာမ စ ဟောတိ ပဏ္ဍိတော၊ ဉတွာ စ ဓမ္မေသု ဝိသေသိ အဿ။

‘‘အတ္ထဉ္စ ¶ ယော ဇာနာတိ ဘာသိတဿ၊ အတ္ထဉ္စ ဉတွာန တထာ ကရောတိ၊

အတ္ထန္တရော နာမ သ ဟောတိ ပဏ္ဍိတော၊ ဉတွာ စ ဓမ္မေသု ဝိသေသိ အဿာ’’တိ။

ရာဇဒတ္တော သုဘူတော စ၊ ဂိရိမာနန္ဒသုမနာ၊

ဝဍ္ဎော စ ကဿပေါ ထေရော၊ ဂယာကဿပဝက္ကလီ။

ဝိဇိတော ယသဒတ္တော စ၊ သောဏော ကောသိယသဝှယော၊

သဋ္ဌိ စ ပဉ္စ ဂါထာယော၊ ထေရာ စ ဧတ္ထ ဒွါဒသာတိ။