📜

၁၂။ သောဠသနိပါတော

၁။ ပုဏ္ဏာထေရီဂါထာဝဏ္ဏနာ

သောဠသနိပါတေ ဥဒဟာရီ အဟံ သီတေတိအာဒိကာ ပုဏ္ဏာယ ထေရိယာ ဂါထာ။ အယမ္ပိ ပုရိမဗုဒ္ဓေသု ကတာဓိကာရာ တတ္ထ တတ္ထ ဘဝေ ဝိဝဋ္ဋူပနိဿယံ ကုသလံ ဥပစိနန္တီ ဝိပဿိဿ ဘဂဝတော ကာလေ ကုလဂေဟေ နိဗ္ဗတ္တိတွာ ဝိညုတံ ပတွာ ဟေတုသမ္ပန္နတာယ သဉ္ဇာတသံဝေဂါ ဘိက္ခုနီနံ သန္တိကံ ဂန္တွာ ဓမ္မံ သုတွာ လဒ္ဓပ္ပသာဒါ ပဗ္ဗဇိတွာ ပရိသုဒ္ဓသီလာ တီဏိ ပိဋကာနိ ဥဂ္ဂဟေတွာ ဗဟုဿုတာ ဓမ္မဓရာ ဓမ္မကထိကာ စ အဟောသိ။ ယထာ စ ဝိပဿိဿ ဘဂဝတော သာသနေ၊ ဧဝံ သိခိဿ ဝေဿဘုဿ ကကုသန္ဓဿ ကောဏာဂမနဿ ကဿပဿ စ ဘဂဝတော သာသနေ ပဗ္ဗဇိတွာ သီလသမ္ပန္နာ ဗဟုဿုတာ ဓမ္မဓရာ ဓမ္မကထိကာ စ အဟောသိ။ မာနဓာတုကတ္တာ ပန ကိလေသေ သမုစ္ဆိန္ဒိတုံ နာသက္ခိ။ မာနောပနိဿယဝသေန ကမ္မဿ ကတတ္တာ ဣမသ္မိံ ဗုဒ္ဓုပ္ပာဒေ အနာထပိဏ္ဍိကဿ သေဋ္ဌိနော ဃရဒါသိယာ ကုစ္ဆိမှိ နိဗ္ဗတ္တိ၊ ပုဏ္ဏာတိဿာ နာမံ အဟောသိ။ သာ သီဟနာဒသုတ္တန္တဒေသနာယ (မ။ နိ။ ၁။၁၄၆ အာဒယော) သောတာပန္နာ ဟုတွာ ပစ္ဆာ ဥဒကသုဒ္ဓိကံ ဗြာဟ္မဏံ ဒမေတွာ သေဋ္ဌိနာ သမ္ဘာဝိတာ ဟုတွာ တေန ဘုဇိဿဘာဝံ ပါပိတာ တံ ပဗ္ဗဇ္ဇံ အနုဇာနာပေတွာ ပဗ္ဗဇိတွာ ဝိပဿနာယ ကမ္မံ ကရောန္တီ န စိရဿေဝ သဟ ပဋိသမ္ဘိဒါဟိ အရဟတ္တံ ပါပုဏိ။ တေန ဝုတ္တံ အပဒါနေ (အပ။ ထေရီ ၂။၄။၁၈၄-၂၀၃) –

‘‘ဝိပဿိနော ဘဂဝတော၊ သိခိနော ဝေဿဘုဿ စ၊

ကကုသန္ဓဿ မုနိနော၊ ကောဏာဂမနတာဒိနော။

‘‘ကဿပဿ စ ဗုဒ္ဓဿ၊ ပဗ္ဗဇိတွာန သာသနေ၊

ဘိက္ခုနီ သီလသမ္ပန္နာ၊ နိပကာ သံဝုတိန္ဒြိယာ။

‘‘ဗဟုဿုတာ ဓမ္မဓရာ၊ ဓမ္မတ္ထပဋိပုစ္ဆိကာ၊

ဥဂ္ဂဟေတာ စ ဓမ္မာနံ၊ သောတာ ပယိရုပါသိတာ။

‘‘ဒေသေန္တီ ဇနမဇ္ဈေဟံ၊ အဟောသိံ ဇိနသာသနေ၊

ဗာဟုသစ္စေန တေနာဟံ၊ ပေသလာ အဘိမညိသံ။

‘‘ပစ္ဆိမေ စ ဘဝေ ဒါနိ၊ သာဝတ္ထိယံ ပုရုတ္တမေ၊

အနာထပိဏ္ဍိနော ဂေဟေ၊ ဇာတာဟံ ကုမ္ဘဒါသိယာ။

‘‘ဂတာ ဥဒကဟာရိယံ၊ သောတ္ထိယံ ဒိဇမဒ္ဒသံ၊

သီတဋ္ဋံ တောယမဇ္ဈမှိ၊ တံ ဒိသွာ ဣဒမဗြဝိံ။

‘‘ဥဒဟာရီ အဟံ သီတေ၊ သဒါ ဥဒကမောတရိံ၊

အယျာနံ ဒဏ္ဍဘယဘီတာ၊ ဝါစာဒေါသဘယဋ္ဋိတာ။

‘‘ကဿ ဗြာဟ္မဏ တွံ ဘီတော၊ သဒါ ဥဒကမောတရိ၊

ဝေဓမာနေဟိ ဂတ္တေဟိ၊ သီတံ ဝေဒယသေ ဘုသံ။

‘‘ဇာနန္တီ ဝတ မံ ဘောတိ၊ ပုဏ္ဏိကေ ပရိပုစ္ဆသိ၊

ကရောန္တံ ကုသလံ ကမ္မံ၊ ရုန္ဓန္တံ ကတပါပကံ။

‘‘ယော စ ဝုဍ္ဎော ဒဟရော ဝါ၊ ပါပကမ္မံ ပကုဗ္ဗတိ၊

ဒကာဘိသေစနာ သောပိ၊ ပါပကမ္မာ ပမုစ္စတိ။

‘‘ဥတ္တရန္တဿ အက္ခာသိံ၊ ဓမ္မတ္ထသံဟိတံ ပဒံ၊

တဉ္စ သုတွာ သ သံဝိဂ္ဂေါ၊ ပဗ္ဗဇိတွာရဟာ အဟု။

‘‘ပူရေန္တီ ဦနကသတံ၊ ဇာတာ ဒါသိကုလေ ယတော၊

တတော ပုဏ္ဏာတိ နာမံ မေ၊ ဘုဇိဿံ မံ အကံသု တေ။

‘‘သေဋ္ဌိံ တတောနုဇာနေတွာ၊ ပဗ္ဗဇိံ အနဂါရိယံ၊

န စိရေနေဝ ကာလေန၊ အရဟတ္တမပါပုဏိံ။

‘‘ဣဒ္ဓီသု စ ဝသီ ဟောမိ၊ ဒိဗ္ဗာယ သောတဓာတုယာ၊

စေတောပရိယဉာဏဿ၊ ဝသီ ဟောမိ မဟာမုနေ။

‘‘ပုဗ္ဗေနိဝါသံ ဇာနာမိ၊ ဒိဗ္ဗစက္ခု ဝိသောဓိတံ၊

သဗ္ဗာသဝပရိက္ခီဏာ၊ နတ္ထိ ဒါနိ ပုနဗ္ဘဝေါ။

‘‘အတ္ထဓမ္မနိရုတ္တီသု၊ ပဋိဘာနေ တထေဝ စ၊

ဉာဏံ မေ ဝိမလံ သုဒ္ဓံ၊ ဗုဒ္ဓသေဋ္ဌဿ ဝါဟသာ။

‘‘ဘာဝနာယ မဟာပညာ၊ သုတေနေဝ သုတာဝိနီ၊

မာနေန နီစကုလဇာ၊ န ဟိ ကမ္မံ ဝိနဿတိ။

‘‘ကိလေသာ ဈာပိတာ မယှံ…ပေ… ကတံ ဗုဒ္ဓဿ သာသန’’န္တိ။

အရဟတ္တံ ပန ပတွာ အတ္တနော ပဋိပတ္တိံ ပစ္စဝေက္ခိတွာ ဥဒါနဝသေန –

၂၃၆။

‘‘ဥဒဟာရီ အဟံ သီတေ၊ သဒါ ဥဒကမောတရိံ၊

အယျာနံ ဒဏ္ဍဘယဘီတာ၊ ဝါစာဒေါသဘယဋ္ဋိတာ။

၂၃၇။

‘‘ကဿ ဗြာဟ္မဏ တွံ ဘီတော၊ သဒါ ဥဒကမောတရိ၊

ဝေဓမာနေဟိ ဂတ္တေဟိ၊ သီတံ ဝေဒယသေ ဘုသံ။

၂၃၈။

‘‘ဇာနန္တီ ဝတ မံ ဘောတိ၊ ပုဏ္ဏိကေ ပရိပုစ္ဆသိ၊

ကရောန္တံ ကုသလံ ကမ္မံ၊ ရုန္ဓန္တံ ကတပါပကံ။

၂၃၉။

‘‘ယော စ ဝုဍ္ဎော ဒဟရော ဝါ၊ ပါပကမ္မံ ပကုဗ္ဗတိ၊

ဒကာဘိသေစနာ သောပိ၊ ပါပကမ္မာ ပမုစ္စတိ။

၂၄၀။

‘‘ကော နု တေ ဣဒမက္ခာသိ၊ အဇာနန္တဿ အဇာနကော၊

‘ဒကာဘိသေစနာ နာမ၊ ပါပကမ္မာ ပမုစ္စတိ’။

၂၄၁။

‘‘သဂ္ဂံ နူန ဂမိဿန္တိ၊ သဗ္ဗေ မဏ္ဍူကကစ္ဆပါ၊

နာဂါ စ သုသုမာရာ စ၊ ယေ စညေ ဥဒကေ စရာ။

၂၄၂။

‘‘ဩရဗ္ဘိကာ သူကရိကာ၊ မစ္ဆိကာ မိဂဗန္ဓကာ၊

စောရာ စ ဝဇ္ဈဃာတာ စ၊ ယေ စညေ ပါပကမ္မိနော၊

ဒကာဘိသေစနာ တေပိ၊ ပါပကမ္မာ ပမုစ္စရေ။

၂၄၃။

‘‘သစေ ဣမာ နဒိယော တေ၊ ပါပံ ပုဗ္ဗေ ကတံ ဝဟုံ၊

ပုညမ္ပိ မာ ဝဟေယျုံ တေ၊ တေန တွံ ပရိဗာဟိရော။

၂၄၄။

‘‘ယဿ ဗြာဟ္မဏ တွံ ဘီတော၊ သဒါ ဥဒကမောတရိ၊

တမေဝ ဗြဟ္မေ မာကာသိ၊ မာ တေ သီတံ ဆဝိံ ဟနေ။

၂၄၅။

‘‘ကုမ္မဂ္ဂပဋိပန္နံ မံ၊ အရိယမဂ္ဂံ သမာနယိ၊

ဒကာဘိသေစနာ ဘောတိ၊ ဣမံ သာဋံ ဒဒါမိ တေ။

၂၄၆။

‘‘တုယှေဝ သာဋကော ဟောတု၊ နာဟမိစ္ဆာမိ သာဋကံ၊

သစေ ဘာယသိ ဒုက္ခဿ၊ သစေ တေ ဒုက္ခမပ္ပိယံ။

၂၄၇။

‘‘မာကာသိ ပါပကံ ကမ္မံ၊ အာဝိ ဝါ ယဒိ ဝါ ရဟော၊

သစေ စ ပါပကံ ကမ္မံ၊ ကရိဿသိ ကရောသိ ဝါ။

၂၄၈။

‘‘န တေ ဒုက္ခာ ပမုတျတ္ထိ၊ ဥပေစ္စာပိ ပလာယတော၊

သစေ ဘာယသိ ဒုက္ခဿ၊ သစေ တေ ဒုက္ခမပ္ပိယံ။

၂၄၉။

‘‘ဥပေဟိ သရဏံ ဗုဒ္ဓံ၊ ဓမ္မံ သင်္ဃဉ္စ တာဒိနံ၊

သမာဒိယာဟိ သီလာနိ၊ တံ တေ အတ္ထာယ ဟေဟိတိ။

၂၅၀။

‘‘ဥပေမိ သရဏံ ဗုဒ္ဓံ၊ ဓမ္မံ သင်္ဃဉ္စ တာဒိနံ၊

သမာဒိယာမိ သီလာနိ၊ တံ မေ အတ္ထာယ ဟေဟိတိ။

၂၅၁။

‘‘ဗြဟ္မဗန္ဓု ပုရေ အာသိံ၊ အဇ္ဇမှိ သစ္စဗြာဟ္မဏော၊

တေဝိဇ္ဇော ဝေဒသမ္ပန္နော၊ သောတ္တိယော စမှိ နှာတကော’’တိ။ –

ဣမာ ဂါထာ အဘာသိ။

တတ္ထ ဥဒဟာရီတိ ဃဋေန ဥဒကံ ဝါဟိကာ။ သီတေ တဒါ ဥဒကမောတရိန္တိ သီတကာလေပိ သဗ္ဗဒါ ရတ္တိန္ဒိဝံ ဥဒကံ ဩတရိံ။ ယဒါ ယဒါ အယျကာနံ ဥဒကေန အတ္ထော၊ တဒါ တဒါ ဥဒကံ ပါဝိသိံ၊ ဥဒကမောတရိတွာ ဥဒကံ ဥပနေသိန္တိ အဓိပ္ပာယော။ အယျာနံ ဒဏ္ဍဘယဘီတာတိ အယျကာနံ ဒဏ္ဍဘယေန ဘီတာ။ ဝါစာဒေါသဘယဋ္ဋိတာတိ ဝစီဒဏ္ဍဘယေန စေဝ ဒေါသဘယေန စ အဋ္ဋိတာ ပီဠိတာ၊ သီတေပိ ဥဒကမောတရိန္တိ ယောဇနာ။

အထေကဒိဝသံ ပုဏ္ဏာ ဒါသီ ဃဋေန ဥဒကံ အာနေတုံ ဥဒကတိတ္ထံ ဂတာ။ တတ္ထ အဒ္ဒသ အညတရံ ဗြာဟ္မဏံ ဥဒကသုဒ္ဓိကံ ဟိမပါတသမယေ မဟတိ သီတေ ဝတ္တမာနေ ပါတောဝ ဥဒကံ ဩတရိတွာ သသီသံ နိမုဇ္ဇိတွာ မန္တေ ဇပ္ပိတွာ ဥဒကတော ဥဋ္ဌဟိတွာ အလ္လဝတ္ထံ အလ္လကေသံ ပဝေဓန္တံ ဒန္တဝီဏံ ဝါဒယမာနံ။ တံ ဒိသွာ ကရုဏာယ သဉ္စောဒိတမာနသာ တတော နံ ဒိဋ္ဌိဂတာ ဝိဝေစေတုကာမာ ‘‘ကဿ၊ ဗြာဟ္မဏ၊ တွံ ဘီတော’’တိ ဂါထမာဟ။ တတ္ထ ကဿ၊ ဗြာဟ္မဏ၊ တွံ ကုတော စ နာမ ဘယဟေတုတော ဘီတော ဟုတွာ သဒါဥဒကမောတရိ သဗ္ဗကာလံ သာယံ ပါတံ ဥဒကံ ဩတရိ။ ဩတရိတွာ စ ဝေဓမာနေဟိ ကမ္ပမာနေဟိ ဂတ္တေဟိ သရီရာဝယဝေဟိ သီတံ ဝေဒယသေ ဘုသံ သီတဒုက္ခံ အတိဝိယ ဒုဿဟံ ပဋိသံဝေဒယသိ ပစ္စနုဘဝသိ။

ဇာနန္တီ ဝတ မံ ဘောတီတိ၊ ဘောတိ ပုဏ္ဏိကေ၊ တွံ တံ ဥပစိတံ ပါပကမ္မံ ရုန္ဓန္တံ နိဝါရဏသမတ္ထံ ကုသလံ ကမ္မံ ဣမိနာ ဥဒကောရောဟနေန ကရောန္တံ မံ ဇာနန္တီ ဝတ ပရိပုစ္ဆသိ။

နနု အယမတ္ထော လောကေ ပါကဋော ဧဝ။ ကထာပိ မယံ တုယှံ ဝဒါမာတိ ဒဿေန္တော ‘‘ယော စ ဝုဍ္ဎော’’တိ ဂါထမာဟ။ တဿတ္ထော – ဝုဍ္ဎော ဝါ ဒဟရော ဝါ မဇ္ဈိမော ဝါ ယော ကောစိ ဟိံသာဒိဘေဒံ ပါပကမ္မံပကုဗ္ဗတိ အတိဝိယ ကရောတိ၊ သောပိ ဘုသံ ပါပကမ္မနိရတော ဒကာဘိသေစနာ သိနာနေန တတော ပါပကမ္မာ ပမုစ္စတိ အစ္စန္တမေဝ ဝိမုစ္စတီတိ။

တံ သုတွာ ပုဏ္ဏိကာ တဿ ပဋိဝစနံ ဒေန္တီ ‘‘ကော နု တေ’’တိအာဒိမာဟ။ တတ္ထ ကော နု တေ ဣဒမက္ခာသိ၊ အဇာနန္တဿအဇာနကောတိ ကမ္မဝိပါကံ အဇာနန္တဿ တေ သဗ္ဗေန သဗ္ဗံ ကမ္မဝိပါကံ အဇာနတော အဇာနကော အဝိဒ္ဒသု ဗာလော ဥဒကာဘိသေစနဟေတု ပါပကမ္မတော ပမုစ္စတီတိ၊ ဣဒံ အတ္ထဇာတံ ကော နု နာမ အက္ခာသိ၊ န သော သဒ္ဓေယျဝစနော၊ နာပိ စေတံ ယုတ္တန္တိ အဓိပ္ပာယော။

ဣဒါနိဿ တမေဝ ယုတ္တိအဘာဝံ ဝိဘာဝေန္တီ ‘‘သဂ္ဂံ နူန ဂမိဿန္တီ’’တိအာဒိမာဟ။ တတ္ထ နာဂါတိ ဝိဇ္ဈသာ။ သုသုမာရာတိ ကုမ္ဘီလာ။ ယေ စညေ ဥဒကေ စရာတိ ယေ စညေပိ ဝါရိဂေါစရာ မစ္ဆမကရနန္ဒိယာဝတ္တာဒယော စ၊ တေပိ သဂ္ဂံ နူန ဂမိဿန္တိ ဒေဝလောကံ ဥပပဇ္ဇိဿန္တိ မညေ၊ ဥဒကာဘိသေစနာ ပါပကမ္မတော မုတ္တိ ဟောတိ စေတိ အတ္ထော။

ဩရဗ္ဘိကာတိ ဥရဗ္ဘဃာတကာ။ သူကရိကာတိ သူကရဃာတကာ။ မစ္ဆိကာတိ ကေဝဋ္ဋာ။ မိဂဗန္ဓကာတိ မာဂဝိကာ။ ဝဇ္ဈဃာတာတိ ဝဇ္ဈဃာတကမ္မေ နိယုတ္တာ။

ပုညမ္ပိ မာ ဝဟေယျုန္တိ ဣမာ အစိရဝတိအာဒယော နဒိယော ယထာ တယာ ပုဗ္ဗေ ကတံ ပါပံ တတ္ထ ဥဒကာဘိသေစနေန သစေ ဝဟုံ နီဟရေယျုံ၊ တထာ တယာ ကတံ ပုညမ္ပိ ဣမာ နဒိယော ဝဟေယျုံ ပဝါဟေယျုံ။ တေန တွံပရိဗာဟိရောအဿ တထာ သတိ တေန ပုညကမ္မေန တွံ ပရိဗာဟိရော ဝိရဟိတောဝ ဘဝေယျာတိ န စေတံ ယုတ္တန္တိ အဓိပ္ပာယော။ ယထာ ဝါ ဥဒကေန ဥဒကောရောဟကဿ ပုညပဝါဟနံ န ဟောတိ၊ ဧဝံ ပါပပဝါဟနမ္ပိ န ဟောတိ ဧဝ။ ကသ္မာ? နှာနဿ ပါပဟေတူနံ အပ္ပဋိပက္ခဘာဝတော။ ယော ယံ ဝိနာသေတိ၊ သော တဿ ပဋိပက္ခော။ ယထာ အာလောကော အန္ဓကာရဿ၊ ဝိဇ္ဇာ စ အဝိဇ္ဇာယ၊ န ဧဝံ နှာနံ ပါပဿ။ တသ္မာ နိဋ္ဌမေတ္ထ ဂန္တဗ္ဗံ ‘‘န ဥဒကာဘိသေစနာ ပါပတော ပရိမုတ္တီ’’တိ။ တေနာဟ ဘဂဝါ –

‘‘န ဥဒကေန သုစီ ဟောတိ၊ ဗဟွေတ္ထ နှာယတီ ဇနော၊

ယမှိ သစ္စဉ္စ ဓမ္မော စ၊ သော သုစီ သော စ ဗြာဟ္မဏော’’တိ။ (ဥဒါ။ ၉၊ နေတ္တိ။ ၁၀၄)၊

ဣဒါနိ ယဒိ ပါပံ ပဝါဟေတုကာမောသိ၊ သဗ္ဗေန သဗ္ဗံ ပါပံ မာ ကရောဟီတိ ဒဿေတုံ ‘‘ယဿ၊ ဗြာဟ္မဏာ’’တိ ဂါထမာဟ။ တတ္ထ တမေဝ ဗြဟ္မေ မာကာသီတိ ယတော ပါပတော တွံ ဘီတော၊ တမေဝ ပါပံ ဗြဟ္မေ၊ ဗြာဟ္မဏ၊ တွံ မာ အကာသိ။ ဥဒကောရောဟနံ ပန ဤဒိသေ သီတကာလေ ကေဝလံ သရီရမေဝ ဗာဓတိ ။ တေနာဟ – ‘‘မာ တေ သီတံ ဆဝိံ ဟနေ’’တိ၊ ဤဒိသေ သီတကာလေ ဥဒကာဘိသေစနေန ဇာတသီတံ တဝ သရီရစ္ဆဝိံ မာ ဟနေယျ မာ ဗာဓေသီတိ အတ္ထော။

ကုမ္မဂ္ဂပဋိပန္နံ မန္တိ ‘‘ဥဒကာဘိသေစနေန သုဒ္ဓိ ဟောတီ’’တိ ဣမံ ကုမ္မဂ္ဂံ မိစ္ဆာဂါဟံ ပဋိပန္နံ ပဂ္ဂယှ ဌိတံ မံ။ အရိယမဂ္ဂံ သမာနယီတိ ‘‘သဗ္ဗပါပဿ အကရဏံ၊ ကုသလဿ ဥပသမ္ပဒါ’’တိ (ဒီ။ နိ။ ၂။၉၀၊ ဓ။ ပ။ ၁၈၃၊ နေတ္တိ။ ၃၀၊ ၁၁၆၊ ၁၂၄၊ ပေဋကော။ ၂၉) ဣမံ ဗုဒ္ဓါဒီဟိ အရိယေဟိ ဂတမဂ္ဂံ သမာနယိ၊ သမ္မဒေဝ ဥပနေသိ၊ တသ္မာ ဘောတိ ဣမံ သာဋကံ တုဋ္ဌိဒါနံ အာစရိယဘာဂံ တုယှံ ဒဒါမိ၊ တံ ပဋိဂ္ဂဏှာတိ အတ္ထော။

သာ တံ ပဋိက္ခိပိတွာ ဓမ္မံ ကထေတွာ သရဏေသု သီလေသု စ ပတိဋ္ဌာပေတုံ ‘‘တုယှေဝ သာဋကော ဟောတု၊ နာဟမိစ္ဆာမိ သာဋက’’န္တိ ဝတွာ ‘‘သစေ ဘာယသိ ဒုက္ခဿာ’’တိအာဒိမာဟ။ တဿတ္ထော – ယဒိ တုဝံ သကလာပါယိကေ သုဂတိယဉ္စ အဖာသုကတာဒေါဘဂ္ဂတာဒိဘေဒါ ဒုက္ခာ ဘာယသိ။ ယဒိ တေ တံ အပ္ပိယံ န ဣဋ္ဌံ။ အာဝိ ဝါ ပရေသံ ပါကဋဘာဝေန အပ္ပဋိစ္ဆန္နံ ကတွာ ကာယေန ဝါစာယ ပါဏာတိပါတာဒိဝသေန ဝါ ယဒိ ဝါ ရဟော အပါကဋဘာဝေန ပဋိစ္ဆန္နံ ကတွာ မနောဒွါရေယေဝ အဘိဇ္ဈာဒိဝသေန ဝါ အဏုမတ္တမ္ပိ ပါပကံ လာမကံ ကမ္မံ မာကာသိ မာ ကရိ။ အထ ပန တံ ပါပကမ္မံ အာယတိံ ကရိဿသိ၊ ဧတရဟိ ကရောသိ ဝါ၊ ‘‘နိရယာဒီသု စတူသု အပါယေသု မနုဿေသု စ တဿ ဖလဘူတံ ဒုက္ခံ ဣတော ဧတ္တော ဝါ ပလာယန္တေ မယိ နာနုဗန္ဓိဿတီ’’တိ အဓိပ္ပာယေန ဥပေစ္စ သဉ္စိစ္စ ပလာယတောပိ တေ တတော ပါပတော မုတ္တိ မောက္ခာ နတ္ထိ၊ ဂတိကာလာဒိပစ္စယန္တရသမဝါယေ သတိ ဝိပစ္စတေ ဧဝါတိ အတ္ထော။ ‘‘ဥပ္ပစ္စာ’’တိ ဝါ ပါဌော၊ ဥပ္ပတိတွာတိ အတ္ထော။ ဧဝံ ပါပဿ အကရဏေန ဒုက္ခာဘာဝံ ဒဿေတွာ ဣဒါနိ ပုညဿ ကရဏေနပိ တံ ဒဿေတုံ ‘‘သစေ ဘာယသီ’’တိအာဒိ ဝုတ္တံ။ တတ္ထ တာဒိနန္တိ ဒိဋ္ဌာဒီသု တာဒိဘာဝပ္ပတ္တံ။ ယထာ ဝါ ပုရိမကာ သမ္မာသမ္ဗုဒ္ဓါ ပဿိတဗ္ဗာ၊ တထာ ပဿိတဗ္ဗတော တာဒိ၊ တံ ဗုဒ္ဓံ သရဏံ ဥပေဟီတိ ယောဇနာ။ ဓမ္မသင်္ဃေသုပိ ဧသေဝ နယော။ တာဒီနံ ဝရဗုဒ္ဓါနံ ဓမ္မံ၊ အဋ္ဌန္နံ အရိယပုဂ္ဂလာနံ သင်္ဃံ သမူဟန္တိ ယောဇနာ။ တန္တိ သရဏဂမနံ သီလာနံ သမာဒါနဉ္စ။ ဟေဟိတီတိ ဘဝိဿတိ။

သော ဗြာဟ္မဏော သရဏေသု သီလေသု စ ပတိဋ္ဌာယ အပရဘာဂေ သတ္ထု သန္တိကေ ဓမ္မံ သုတွာ ပဋိလဒ္ဓသဒ္ဓါ ပဗ္ဗဇိတွာ ဃဋေန္တော ဝါယမန္တော န စိရဿေဝ တေဝိဇ္ဇော ဟုတွာ အတ္တနော ပဋိပတ္တိံ ပစ္စဝေက္ခိတွာ ဥဒါနေန္တော ‘‘ဗြဟ္မဗန္ဓူ’’တိ ဂါထမာဟ။

တဿတ္ထော – အဟံ ပုဗ္ဗေ ဗြာဟ္မဏကုလေ ဥပ္ပတ္တိမတ္တေန ဗြဟ္မဗန္ဓု နာမာသိံ။ တထာ ဣရုဗ္ဗေဒါဒီနံ အဇ္ဈေနာဒိမတ္တေန တေဝိဇ္ဇော ဝေဒသမ္ပန္နော သောတ္တိယော နှာတကော စ နာမာသိံ။ ဣဒါနိ သဗ္ဗသော ဗာဟိတပါပတာယ သစ္စဗြာဟ္မဏော ပရမတ္ထဗြာဟ္မဏော၊ ဝိဇ္ဇတ္တယာဓိဂမေန တေဝိဇ္ဇော၊ မဂ္ဂဉာဏသင်္ခါတေန ဝေဒေန သမန္နာဂတတ္တာ ဝေဒသမ္ပန္နော၊ နိတ္ထရသဗ္ဗပါပတာယ နှာတကော စ အမှီတိ။ ဧတ္ထ စ ဗြာဟ္မဏေန ဝုတ္တဂါထာပိ အတ္တနာ ဝုတ္တဂါထာပိ ပစ္ဆာ ထေရိယာ ပစ္စေကံ ဘာသိတာတိ သဗ္ဗာ ထေရိယာ ဂါထာ ဧဝ ဇာတာတိ။

ပုဏ္ဏာထေရီဂါထာဝဏ္ဏနာ နိဋ္ဌိတာ။

သောဠသနိပါတဝဏ္ဏနာ နိဋ္ဌိတာ။