📜

၁၄။ တိံသနိပါတော

၁။ သုဘာဇီဝကမ္ဗဝနိကာထေရီဂါထာဝဏ္ဏနာ

တိံသနိပါတေ ဇီဝကမ္ဗဝနံ ရမ္မန္တိအာဒိကာ သုဘာယ ဇီဝကမ္ဗဝနိကာယ ထေရိယာ ဂါထာ။ အယမ္ပိ ပုရိမဗုဒ္ဓေသု ကတာဓိကာရာ တတ္ထ တတ္ထ ဘဝေ ဝိဝဋ္ဋူပနိဿယံ ကုသလံ ဥပစိနန္တီ၊ သမ္ဘာဝိတကုသလမူလာ အနုက္ကမေန ပရိဗြူဟိတဝိမောက္ခသမ္ဘာရာ ပရိပက္ကဉာဏာ ဟုတွာ၊ ဣမသ္မိံ ဗုဒ္ဓုပ္ပာဒေ ရာဇဂဟေ ဗြာဟ္မဏမဟာသာလကုလေ နိဗ္ဗတ္တိ၊ သုဘာတိဿာ နာမမဟောသိ။ တဿာ ကိရ သရီရာဝယဝါ သောဘနဝဏ္ဏယုတ္တာ အဟေသုံ၊ တသ္မာ သုဘာတိ အနွတ္ထမေဝ နာမံ ဇာတံ။ သာ သတ္ထု ရာဇဂဟပ္ပဝေသနေ ပဋိလဒ္ဓသဒ္ဓါ ဥပါသိကာ ဟုတွာ အပရဘာဂေ သံသာရေ ဇာတသံဝေဂါ ကာမေသု အာဒီနဝံ ဒိသွာ နေက္ခမ္မဉ္စ ခေမတော သလ္လက္ခန္တီ မဟာပဇာပတိယာ ဂေါတမိယာ သန္တိကေ ပဗ္ဗဇိတွာ ဝိပဿနာယ ကမ္မံ ကရောန္တီ ကတိပါဟေနေဝ အနာဂါမိဖလေ ပတိဋ္ဌာသိ။

အထ နံ ဧကဒိဝသံ အညတရော ရာဇဂဟဝါသီ ဓုတ္တပုရိသော တရုဏော ပဌမယောဗ္ဗနေ ဌိတော ဇီဝကမ္ဗဝနေ ဒိဝါဝိဟာရာယ ဂစ္ဆန္တိံ ဒိသွာ ပဋိဗဒ္ဓစိတ္တော ဟုတွာ မဂ္ဂံ ဩဝရန္တော ကာမေဟိ နိမန္တေသိ။ သာ တဿ နာနပ္ပကာရေဟိ ကာမာနံ အာဒီနဝံ အတ္တနော စ နေက္ခမ္မဇ္ဈာသယံ ပဝေဒေန္တီ ဓမ္မံ ကထေသိ။ သော ဓမ္မကထံ သုတွာပိ န ပဋိက္ကမတိ၊ နိဗန္ဓတိယေဝ။ ထေရီ နံ အတ္တနော ဝစနေ အတိဋ္ဌန္တံ အက္ခိမှိ စ အဘိရတ္တံ ဒိသွာ၊ ‘‘ဟန္ဒ၊ တယာ သမ္ဘာဝိတံ အက္ခိ’’န္တိ အတ္တနော ဧကံ အက္ခိံ ဥပ္ပာဋေတွာ တဿ ဥပနေသိ။ တတော သော ပုရိသော သန္တာသော သံဝေဂဇာတော တတ္ထ ဝိဂတရာဂေါဝ ဟုတွာ ထေရိံ ခမာပေတွာ ဂတော။ ထေရီ သတ္ထု သန္တိကံ အဂမာသိ။ သတ္ထုနော သဟ ဒဿနေနေဝဿာ အက္ခိ ပဋိပါကတိကံ အဟောသိ။ တတော သာ ဗုဒ္ဓဂတာယ ပီတိယာ နိရန္တရံ ဖုဋာ ဟုတွာ အဋ္ဌာသိ။ သတ္ထာ တဿာ စိတ္တာစာရံ ဉတွာ ဓမ္မံ ဒေသေတွာ အဂ္ဂမဂ္ဂတ္ထာယ ကမ္မဋ္ဌာနံ အာစိက္ခိ။ သာ ပီတိံ ဝိက္ခမ္ဘေတွာ တာဝဒေဝ ဝိပဿနံ ဝဍ္ဎေတွာ သဟ ပဋိသမ္ဘိဒါဟိ အရဟတ္တံ ပါပုဏိ။ အရဟတ္တံ ပန ပတွာ ဖလသုခေန နိဗ္ဗာနသုခေန ဝိဟရန္တီ အတ္တနော ပဋိပတ္တိံ ပစ္စဝေက္ခိတွာ အတ္တနာ တေန စ ဓုတ္တပုရိသေန ဝုတ္တဂါထာ ဥဒါနဝသေန –

၃၆၈။

‘‘ဇီဝကမ္ဗဝနံ ရမ္မံ၊ ဂစ္ဆန္တိံ ဘိက္ခုနိံ သုဘံ၊

ဓုတ္တကော သန္နိဝါရေသိ၊ တမေနံ အဗြဝီ သုဘာ။

၃၆၉။

‘‘ကိံ တေ အပရာဓိတံ မယာ၊ ယံ မံ ဩဝရိယာန တိဋ္ဌသိ၊

န ဟိ ပဗ္ဗဇိတာယ အာဝုသော၊ ပုရိသော သမ္ဖုသနာယ ကပ္ပတိ။

၃၇၀။

‘‘ဂရုကေ မမ သတ္ထုသာသနေ၊ ယာ သိက္ခာ သုဂတေန ဒေသိတာ၊

ပရိသုဒ္ဓပဒံ အနင်္ဂဏံ၊ ကိံ မံ ဩဝရိယာန တိဋ္ဌသိ။

၃၇၁။

‘‘အာဝိလစိတ္တော အနာဝိလံ၊ သရဇော ဝီတရဇံ အနင်္ဂဏံ၊

သဗ္ဗတ္ထ ဝိမုတ္တမာနသံ၊ ကိံ မံ ဩဝရိယာန တိဋ္ဌသိ။

၃၇၂။

‘‘ဒဟရာ စ အပါပိကာ စသိ၊ ကိံ တေ ပဗ္ဗဇ္ဇာ ကရိဿတိ၊

နိက္ခိပ ကာသာယစီဝရံ၊ ဧဟိ ရမာမ သုပုပ္ဖိတေ ဝနေ။

၃၇၃။

‘‘မဓုရဉ္စ ပဝန္တိ သဗ္ဗသော၊ ကုသုမရဇေန သမုဋ္ဌိတာ ဒုမာ၊

ပဌမဝသန္တော သုခေါ ဥတု၊ ဧဟိ ရမာမ သုပုပ္ဖိတေ ဝနေ။

၃၇၄။

‘‘ကုသုမိတသိခရာ စ ပါဒပါ၊ အဘိဂဇ္ဇန္တိဝ မာလုတေရိတာ၊

ကာ တုယှံ ရတိ ဘဝိဿတိ၊ ယဒိ ဧကာ ဝနမောဂဟိဿသိ။

၃၇၅။

‘‘ဝါဠမိဂသင်္ဃသေဝိတံ၊ ကုဉ္ဇရမတ္တကရေဏုလောဠိတံ၊

အသဟာယိကာ ဂန္တုမိစ္ဆသိ၊ ရဟိတံ ဘိံသနကံ မဟာဝနံ။

၃၇၆။

‘‘တပနီယကတာဝ ဓီတိကာ၊ ဝိစရသိ စိတ္တလတေဝ အစ္ဆရာ၊

ကာသိကသုခုမေဟိ ဝဂ္ဂုဘိ၊ သောဘသီ သုဝသနေဟိ နူပမေ။

၃၇၇။

‘‘အဟံ တဝ ဝသာနုဂေါ သိယံ၊ ယဒိ ဝိဟရေမသေ ကာနနန္တရေ၊

န ဟိ မတ္ထိ တယာ ပိယတ္တရော၊ ပါဏော ကိန္နရိမန္ဒလောစနေ။

၃၇၈။

‘‘ယဒိ မေ ဝစနံ ကရိဿသိ၊ သုခိတာ ဧဟိ အဂါရမာဝသ၊

ပါသာဒနိဝါတဝါသိနီ၊ ပရိကမ္မံ တေ ကရောန္တု နာရိယော။

၃၇၉။

‘‘ကာသိကသုခုမာနိ ဓာရယ၊ အဘိရောပေဟိ စ မာလဝဏ္ဏကံ၊

ကဉ္စနမဏိမုတ္တကံ ဗဟုံ၊ ဝိဝိဓံ အာဘရဏံ ကရောမိ တေ။

၃၈၀။

‘‘သုဓောတရဇပစ္ဆဒံ သုဘံ၊ ဂေါနကတူလိကသန္ထတံ နဝံ၊

အဘိရုဟ သယနံ မဟာရဟံ၊ စန္ဒနမဏ္ဍိတသာရဂန္ဓိကံ။

၃၈၁။

‘‘ဥပ္ပလံ စုဒကာ သမုဂ္ဂတံ၊ ယထာ တံ အမနုဿသေဝိတံ၊

ဧဝံ တွံ ဗြဟ္မစာရိနီ၊ သကေသင်္ဂေသု ဇရံ ဂမိဿသိ။

၃၈၂။

‘‘ကိံ တေ ဣဓ သာရသမ္မတံ၊ ကုဏပပူရမှိ သုသာနဝဍ္ဎနေ၊

ဘေဒနဓမ္မေ ကဠေဝရေ၊ ယံ ဒိသွာ ဝိမနော ဥဒိက္ခသိ။

၃၈၃။

‘‘အက္ခီနိ စ တူရိယာရိဝ၊ ကိန္နရိယာရိဝ ပဗ္ဗတန္တရေ၊

တဝ မေ နယနာနိ ဒက္ခိယ၊ ဘိယျော ကာမရတီ ပဝဍ္ဎတိ။

၃၈၄။

‘‘ဥပ္ပလသိခရောပမာနိ တေ၊ ဝိမလေ ဟာဋကသန္နိဘေ မုခေ၊

တဝ မေ နယနာနိ ဒက္ခိယ၊ ဘိယျော ကာမဂုဏော ပဝဍ္ဎတိ။

၃၈၅။

‘‘အပိ ဒူရဂတာ သရမှသေ၊ အာယတပမှေ ဝိသုဒ္ဓဒဿနေ၊

န ဟိ မတ္ထိ တယာ ပိယတ္တရော၊ နယနာ ကိန္နရိမန္ဒလောစနေ။

၃၈၆။

‘‘အပထေန ပယာတုမိစ္ဆသိ၊ စန္ဒံ ကီဠနကံ ဂဝေသသိ၊

မေရုံ လင်္ဃေတုမိစ္ဆသိ၊ ယော တွံ ဗုဒ္ဓသုတံ မဂ္ဂယသိ။

၃၈၇။

‘‘နတ္ထိ ဟိ လောကေ သဒေဝကေ၊ ရာဂေါ ယတ္ထပိ ဒါနိ မေ သိယာ၊

နပိ နံ ဇာနာမိ ကီရိသော၊ အထ မဂ္ဂေန ဟတော သမူလကော။

၃၈၈။

‘‘ဣင်္ဂါလကုယာဝ ဥဇ္ဈိတော၊ ဝိသပတ္တောရိဝ အဂ္ဂိတော ကတော၊

နပိ နံ ပဿာမိ ကီရိသော၊ အထ မဂ္ဂေန ဟတော သမူလကော။

၃၈၉။

‘‘ယဿာ သိယာ အပစ္စဝေက္ခိတံ၊ သတ္ထာ ဝါ အနုပါသိတော သိယာ၊

တွံ တာဒိသိကံ ပလောဘယ၊ ဇာနန္တိံ သော ဣမံ ဝိဟညသိ။

၃၉၀။

‘‘မယှဉှိ အက္ကုဋ္ဌဝန္ဒိတေ၊ သုခဒုက္ခေ စ သတီ ဥပဋ္ဌိတာ၊

သင်္ခတမသုဘန္တိ ဇာနိယ၊ သဗ္ဗတ္ထေဝ မနော န လိမ္ပတိ။

၃၉၁။

‘‘သာဟံ သုဂတဿ သာဝိကာ၊ မဂ္ဂဋ္ဌင်္ဂိကယာနယာယိနီ၊

ဥဒ္ဓဋသလ္လာ အနာသဝါ၊ သုညာဂါရဂတာ ရမာမဟံ။

၃၉၂။

‘‘ဒိဋ္ဌာ ဟိ မယာ သုစိတ္တိတာ၊ သောမ္ဘာ ဒါရုကပိလ္လကာနိ ဝါ၊

တန္တီဟိ စ ခီလကေဟိ စ၊ ဝိနိဗဒ္ဓါ ဝိဝိဓံ ပနစ္စကာ။

၃၉၃။

‘‘တမှုဒ္ဓဋေ တန္တိခီလကေ၊ ဝိဿဋ္ဌေ ဝိကလေ ပရိကြိတေ၊

န ဝိန္ဒေယျ ခဏ္ဍသော ကတေ၊ ကိမှိ တတ္ထ မနံ နိဝေသယေ။

၃၉၄။

‘‘တထူပမာ ဒေဟကာနိ မံ၊ တေဟိ ဓမ္မေဟိ ဝိနာ န ဝတ္တန္တိ၊

ဓမ္မေဟိ ဝိနာ န ဝတ္တတိ၊ ကိမှိ တတ္ထ မနံ နိဝေသယေ။

၃၉၅။

‘‘ယထာ ဟရိတာလေန မက္ခိတံ၊ အဒ္ဒသ စိတ္တိကံ ဘိတ္တိယာ ကတံ၊

တမှိ တေ ဝိပရီတဒဿနံ၊ သညာ မာနုသိကာ နိရတ္ထိကာ။

၃၉၆။

‘‘မာယံ ဝိယ အဂ္ဂတော ကတံ၊ သုပိနန္တေဝ သုဝဏ္ဏပါဒပံ၊

ဥပဂစ္ဆသိ အန္ဓ ရိတ္တကံ၊ ဇနမဇ္ဈေရိဝ ရုပ္ပရူပကံ။

၃၉၇။

‘‘ဝဋ္ဋနိရိဝ ကောဋရောဟိတာ၊ မဇ္ဈေ ပုဗ္ဗုဠကာ သအဿုကာ၊

ပီဠကောဠိကာ စေတ္ထ ဇာယတိ၊ ဝိဝိဓာ စက္ခုဝိဓာ စ ပိဏ္ဍိတာ။

၃၉၈။

‘‘ဥပ္ပာဋိယ စာရုဒဿနာ၊ န စ ပဇ္ဇိတ္ထ အသင်္ဂမာနသာ၊

ဟန္ဒ တေ စက္ခုံ ဟရဿု တံ၊ တဿ နရဿ အဒါသိ တာဝဒေ။

၃၉၉။

‘‘တဿ စ ဝိရမာသိ တာဝဒေ၊ ရာဂေါ တတ္ထ ခမာပယီ စ နံ၊

သောတ္ထိ သိယာ ဗြဟ္မစာရိနီ၊ န ပုနော ဧဒိသကံ ဘဝိဿတိ။

၄၀၀။

‘‘အာသာဒိယ ဧဒိသံ ဇနံ၊ အဂ္ဂိံ ပဇ္ဇလိတံဝ လိင်္ဂိယ၊

ဂဏှိယ အာသီဝိသံ ဝိယ၊ အပိ နု သောတ္ထိ သိယာ ခမေဟိ နော။

၄၀၁။

‘‘မုတ္တာ စ တတော သာ ဘိက္ခုနီ၊ အဂမီ ဗုဒ္ဓဝရဿ သန္တိကံ၊

ပဿိယ ဝရပုညလက္ခဏံ၊ စက္ခု အာသိ ယထာ ပုရာဏက’’န္တိ။ –

ဣမာ ဂါထာ ပစ္စုဒါဟာသိ။

တတ္ထ ဇီဝကမ္ဗဝနန္တိ ဇီဝကဿ ကောမာရဘစ္စဿ အမ္ဗဝနံ။ ရမ္မန္တိ ရမဏီယံ။ တံ ကိရ ဘူမိဘာဂသမ္ပတ္တိယာ ဆာယူဒကသမ္ပတ္တိယာ စ ရုက္ခာနံ ရောပိတာကာရေန အတိဝိယ မနုညံ မနောရမံ။ ဂစ္ဆန္တိန္တိ အမ္ဗဝနံ ဥဒ္ဒိဿ ဂတံ၊ ဒိဝါဝိဟာရာယ ဥပဂစ္ဆန္တိံ။ သုဘန္တိ ဧဝံနာမိကံ။ ဓုတ္တကောတိ ဣတ္ထိဓုတ္တော။ ရာဇဂဟဝါသီ ကိရေကော မဟာဝိဘဝဿ သုဝဏ္ဏကာရဿ ပုတ္တော ယုဝါ အဘိရူပေါ ဣတ္ထိဓုတ္တော ပုရိသော မတ္တော ဝိစရတိ။ သော တံ ပဋိပထေ ဒိသွာ ပဋိဗဒ္ဓစိတ္တော မဂ္ဂံ ဥပရုန္ဓိတွာ အဋ္ဌာသိ။ တေန ဝုတ္တံ – ‘‘ဓုတ္တကော သန္နိဝါရေသီ’’တိ၊ မမ ဂမနံ နိသေဓေသီတိ အတ္ထော။ တမေနံ အဗြဝီ သုဘာတိ တမေနံ နိဝါရေတွာ ဌိတံ ဓုတ္တံ သုဘာ ဘိက္ခုနီ ကထေသိ။ ဧတ္ထ စ ‘‘ဂစ္ဆန္တိံ ဘိက္ခုနိံ သုဘံ၊ အဗြဝိ သုဘာ’’တိ စ အတ္တာနမေဝ ထေရီ အညံ ဝိယ ကတွာ ဝဒတိ။ ထေရိယာ ဝုတ္တဂါထာနံ သမ္ဗန္ဓဒဿနဝသေန သင်္ဂီတိကာရေဟိ အယံ ဂါထာ ဝုတ္တာ။

‘‘အဗြဝီ သုဘာ’’တိ ဝတွာ တဿာ ဝုတ္တာကာရဒဿနတ္ထံ အာဟ ‘‘ကိံ တေ အပရာဓိတ’’န္တိအာဒိ။ တတ္ထ ကိံ တေ အပရာဓိတံ မယာတိ ကိံ တုယှံ၊ အာဝုသော၊ မယာ အပရဒ္ဓံ။ ယံ မံ ဩဝရိယာန တိဋ္ဌသီတိ ယေန အပရာဓေန မံ ဂစ္ဆန္တိံ ဩဝရိတွာ ဂမနံ နိသေဓေတွာ တိဋ္ဌသိ၊ သော နတ္ထေဝါတိ အဓိပ္ပာယော။ အထ ဣတ္ထီတိသညာယ ဧဝံ ပဋိပဇ္ဇသိ၊ ဧဝမ္ပိ န ယုတ္တန္တိ ဒဿေန္တီ အာဟ – ‘‘န ဟိ ပဗ္ဗဇိတာယ၊ အာဝုသော၊ ပုရိသော သမ္ဖုသနာယ ကပ္ပတီ’’တိ၊ အာဝုသော သုဝဏ္ဏကာရပုတ္တ ၊ လောကိယစာရိတ္တေနပိ ပုရိသဿ ပဗ္ဗဇိတာနံ သမ္ဖုသနာယ န ကပ္ပတိ၊ ပဗ္ဗဇိတာယ ပန ပုရိသော တိရစ္ဆာနဂတောပိ သမ္ဖုသနာယ န ကပ္ပတိ၊ တိဋ္ဌတု တာဝ ပုရိသဖုသနာ၊ ရာဂဝသေနဿာ နိဿဂ္ဂိယေန ပုရိသဿ နိဿဂ္ဂိယဿာပိ ဖုသနာ န ကပ္ပတေဝ။

တေနာဟ ‘‘ဂရုကေ မမ သတ္ထုသာသနေ’’တိအာဒိ။ တဿတ္ထော – ဂရုကေ ပါသာဏစ္ဆတ္တံ ဝိယ ဂရုကာတဗ္ဗေ မယှံ သတ္ထု သာသနေ ယာ သိက္ခာ ဘိက္ခုနိယော ဥဒ္ဒိဿ သုဂတေန သမ္မာသမ္ဗုဒ္ဓေန ဒေသိတာ ပညတ္တာ။ တာဟိ ပရိသုဒ္ဓပဒံ ပရိသုဒ္ဓကုသလကောဋ္ဌာသံ၊ ရာဂါဒိအင်္ဂဏာနံ သဗ္ဗသော အဘာဝေန အနင်္ဂဏံ၊ ဧဝံဘူတံ မံ ဂစ္ဆန္တိံ ကေန ကာရဏေန အာဝရိတွာ တိဋ္ဌသီတိ။

အာဝိလစိတ္တောတိ စိတ္တဿ အာဝိလဘာဝကရာနံ ကာမဝိတက္ကာဒီနံ ဝသေန အာဝိလစိတ္တော၊ တွံ တဒဘာဝတော အနာဝိလံ၊ ရာဂရဇာဒီနံ ဝသေန သရဇော၊ သာင်္ဂဏော တဒဘာဝတော ဝီတရဇံ အနင်္ဂဏံ သဗ္ဗတ္ထ ခန္ဓပဉ္စကေ သမုစ္ဆေဒဝိမုတ္တိယာ ဝိမုတ္တမာနသံ၊ မံ ကသ္မာ ဩဝရိတွာ တိဋ္ဌသီတိ?

ဧဝံ ထေရိယာ ဝုတ္တေ ဓုတ္တကော အတ္တနော အဓိပ္ပာယံ ဝိဘာဝေန္တော ‘‘ဒဟရာ စာ’’တိအာဒိနာ ဒသ ဂါထာ အဘာသိ။ တတ္ထ ဒဟရာတိ တရုဏီ ပဌမေ ယောဗ္ဗနေ ဌိတာ။ အပါပိကာ စသီတိ ရူပေန အလာမိကာ စ အသိ ၊ ဥတ္တမရူပဓရာ စာဟောသီတိ အဓိပ္ပာယော။ ကိံ တေ ပဗ္ဗဇ္ဇာ ကရိဿတီတိ တုယှံ ဧဝံ ပဌမဝယေ ဌိတာယ ရူပသမ္ပန္နာယ ပဗ္ဗဇ္ဇာ ကိံ ကရိဿတိ၊ ဝုဍ္ဎာယ ဗီဘစ္ဆရူပါယ ဝါ ပဗ္ဗဇိတဗ္ဗန္တိ အဓိပ္ပာယေန ဝဒတိ။ နိက္ခိပါတိ ဆဍ္ဍေဟိ။ ‘‘ဥက္ခိပါ’’တိ ဝါ ပါဌော၊ အပနေဟီတိ အတ္ထော။

မဓုရန္တိ သုဘံ၊ သုဂန္ဓန္တိ အတ္ထော။ ပဝန္တီတိ ဝါယန္တိ။ သဗ္ဗသောတိ သမန္တတော။ ကုသုမရဇေန သမုဋ္ဌိတာ ဒုမာတိ ဣမေ ရုက္ခာ မန္ဒဝါတေန သမုဋ္ဌဟမာနကုသုမရေဏုဇာတေန အတ္တနော ကုသုမရဇေန သယံ သမုဋ္ဌိတာ ဝိယ ဟုတွာ သမန္တတော သုရဘီ ဝါယန္တိ။ ပဌမဝသန္တော သုခေါဥတူတိ အယံ ပဌမော ဝသန္တမာသော သုခသမ္ဖဿော စ ဥတု ဝတ္တတီတိ အတ္ထော။

ကုသုမိတသိခရာတိ သုပုပ္ဖိတဂ္ဂါ။ အဘိဂဇ္ဇန္တိဝ မာလုတေရိတာတိ ဝါတေန သဉ္စလိတာ အဘိဂဇ္ဇန္တိဝ အဘိတ္ထနိတာ ဝိယ တိဋ္ဌန္တိ။ ယဒိ ဧကာ ဝနမောဂဟိဿသီတိ သစေ တွံ ဧကိကာ ဝနမောဂါဟိဿသိ၊ ကာ နာမ တေ တတ္ထ ရတိ ဘဝိဿတီတိ အတ္တနာ ဗဒ္ဓသုခါဘိရတ္တတ္တာ ဧဝမာဟ။

ဝါဠမိဂသင်္ဃသေဝိတန္တိ သီဟဗျဂ္ဃာဒိဝါဠမိဂသမူဟေဟိ တတ္ထ တတ္ထ ဥပသေဝိတံ။ ကုဉ္ဇရမတ္တကရေဏုလောဠိတန္တိ မတ္တကုဉ္ဇရေဟိ ဟတ္ထိနီဟိ စ မိဂါနံ စိတ္တတာပနေန ရုက္ခဂစ္ဆာဒီနံ သာခါဘဉ္ဇနေန စ အာလောဠိတပဒေသံ။ ကိဉ္စာပိ တသ္မိံ ဝနေ ဤဒိသံ တဒါ နတ္ထိ၊ ဝနံ နာမ ဧဝရူပန္တိ တံ ဘိံသာပေတုကာမော ဧဝမာဟ။ ရဟိတန္တိ ဇနရဟိတံ ဝိဇနံ။ ဘိံသနကန္တိ ဘယဇနကံ။

တပနီယကတာဝ ဓီတိကာတိ ရတ္တသုဝဏ္ဏေန ဝိစရိတာ ဓီတလိကာ ဝိယ သုကုသလေန ယန္တာစရိယေန ယန္တယောဂဝသေန သဇ္ဇိတာ သုဝဏ္ဏပဋိမာ ဝိယ ဝိစရသိ၊ ဣဒါနေဝ ဣတော စိတော စ သဉ္စရသိ။ စိတ္တလတေဝ အစ္ဆရာတိ စိတ္တလတာနာမကေ ဥယျာနေ ဒေဝစ္ဆရာ ဝိယ။ ကာသိကသုခုမေဟီတိ ကာသိရဋ္ဌေ ဥပ္ပန္နေဟိ အတိဝိယ သုခုမေဟိ။ ဝဂ္ဂုဘီတိ သိနိဒ္ဓမဋ္ဌေဟိ။ သောဘသီ သုဝသနေဟိ နူပမေတိ နိဝါသနပါရုပနဝတ္ထေဟိ အနုပမေ ဥပမာရဟိတေ တွံ ဣဒါနိ မေ ဝသာနုဂေါ သောဘသီတိ ဘာဝိနံ အတ္တနော အဓိပ္ပာယဝသေန ဧကန္တိကံ ဝတ္တမာနံ ဝိယ ကတွာ ဝဒတိ။

အဟံ တဝ ဝသာနုဂေါ သိယန္တိ အဟမ္ပိ တုယှံ ဝသာနုဂေါ ကိံကာရပဋိဿာဝီ ဘဝေယျံ။ ယဒိ ဝိဟရေမသေ ကာနနန္တရေတိ ယဒိ မယံ ဥဘောပိ ဝနန္တရေ သဟ ဝသာမ ရမာမ။ န ဟိ မတ္ထိ တယာ ပိယတ္တရောတိ ဝသာနုဂဘာဝဿ ကာရဏမာဟ။ ပါဏောတိ သတ္တော၊ အညော ကောစိပိ သတ္တော တယာ ပိယတရော မယှံ န ဟိ အတ္ထီတိ အတ္ထော။ အထ ဝါ ပါဏောတိ အတ္တနော ဇီဝိတံ သန္ဓာယ ဝဒတိ၊ မယှံ ဇီဝိတံ တယာ ပိယတရံ န ဟိ အတ္ထီတိ အတ္ထော။ ကိန္နရိမန္ဒလောစနေတိ ကိန္နရိယာ ဝိယ မန္ဒပုထုဝိလောစနေ။

ယဒိ မေ ဝစနံ ကရိဿသိ၊ သုခိတာ ဧဟိ အဂါရမာဝသာတိ သစေ တွံ မမ ဝစနံ ကရိဿသိ၊ ဧကာသနံ ဧကသေယျံ ဗြဟ္မစရိယဒုက္ခံ ပဟာယ ဧဟိ ကာမဘောဂေဟိ သုခိတာ ဟုတွာ အဂါရံ အဇ္ဈာဝသ။ ‘‘သုခိတာ ဟေတိ အဂါရမာဝသန္တီ’’တိ ကေစိ ပဌန္တိ၊ တေသံ သုခိတာ ဘဝိဿတိ၊ အဂါရံ အဇ္ဈာဝသန္တီတိ အတ္ထော။ ပါသာဒနိဝါတဝါသိနီတိ နိဝါတေသု ပါသာဒေသု ဝါသိနီ။ ‘‘ပါသာဒဝိမာနဝါသိနီ’’တိ စ ပါဌော၊ ဝိမာနသဒိသေသု ပါသာဒေသု ဝါသိနီတိ အတ္ထော။ ပရိကမ္မန္တိ ဝေယျာဝစ္စံ။

ဓာရယာတိ ပရိဒဟ၊ နိဝါသေဟိ စေဝ ဥတ္တရိယဉ္စ ကရောဟိ။ အဘိရောပေဟီတိ မဏ္ဍနဝိဘူသနဝသေန ဝါ သရီရံ အာရောပယ၊ အလင်္ကရောဟီတိ အတ္ထော။ မာလဝဏ္ဏကန္တိ မာလဉ္စေဝ ဂန္ဓဝိလေပနဉ္စ။ ကဉ္စနမဏိမုတ္တကန္တိ ကဉ္စနေန မဏိမုတ္တာဟိ စ ယုတ္တံ၊ သုဝဏ္ဏမယမဏိမုတ္တာဟိ ခစိတန္တိ အတ္ထော။ ဗဟုန္တိ ဟတ္ထူပဂါဒိဘေဒတော ဗဟုပ္ပကာရံ။ ဝိဝိဓန္တိ ကရဏဝိကတိယာ နာနာဝိဓံ။

သုဓောတရဇပစ္ဆဒန္တိ သုဓောတတာယ ပဝါဟိတရဇံ ဥတ္တရစ္ဆဒံ။ သုဘန္တိ သောဘနံ။ ဂေါနကတူလိကသန္ထတန္တိ ဒီဃလောမကာဠကောဇဝေန စေဝ ဟံသလောမာဒိပုဏ္ဏာယ တူလိကာယ စ သန္ထတံ။ နဝန္တိ အဘိနဝံ။ မဟာရဟန္တိ မဟဂ္ဃံ။ စန္ဒနမဏ္ဍိတသာရဂန္ဓိကန္တိ ဂေါသီသကာဒိသာရစန္ဒနေန မဏ္ဍိတတာယ သုရဘိဂန္ဓိကံ၊ ဧဝရူပံ သယနမာရုဟ၊ တံ အာရုဟိတွာ ယထာသုခံ သယာဟိ စေဝ နိသီဒ စာတိ အတ္ထော။

ဥပ္ပလံ စုဒကာ သမုဂ္ဂတန္တိ စ-ကာရော နိပါတမတ္တံ၊ ဥဒကတော ဥဂ္ဂတံ ဥဋ္ဌိတံ အစ္စုဂ္ဂမ္မ ဌိတံ သုဖုလ္လမုပ္ပလံ။ ယထာ တံ အမနုဿသေဝိတန္တိ တဉ္စ ရက္ခသပရိဂ္ဂဟိတာယ ပေါက္ခရဏိယာ ဇာတတ္တာ နိမ္မနုဿေဟိ သေဝိတံ ကေနစိ အပရိဘုတ္တမေဝ ဘဝေယျ။ ဧဝံ တွံ ဗြဟ္မစာရိနီတိ ဧဝမေဝ တံ သုဋ္ဌု ဖုလ္လမုပ္ပလံ ဝိယ တုဝံ ဗြဟ္မစာရိနီ။ သကေသင်္ဂေသု အတ္တနော သရီရာဝယဝေသု ကေနစိ အပရိဘုတ္တေသုယေဝ ဇရံ ဂမိဿသိ၊ မုဓာယေဝ ဇရာဇိဏ္ဏာ ဘဝိဿသိ။

ဧဝံ ဓုတ္တကေန အတ္တနော အဓိပ္ပာယေ ပကာသိတေ ထေရီ သရီရသဘာဝဝိဘာဝနေန တံ တတ္ထ ဝိစ္ဆိန္ဒေန္တီ ‘‘ကိံ တေ ဣဓာ’’တိ ဂါထမာဟ။ တဿတ္ထော – အာဝုသော သုဝဏ္ဏကာရပုတ္တ၊ ကေသာဒိကုဏပပူရေ ဧကန္တေန ဘေဒနဓမ္မေ သုသာနဝဍ္ဎနေ၊ ဣဓ ဣမသ္မိံ ကာယသညိတေ အသုစိကဠေဝရေ ကိံ နာမ တဝ သာရန္တိ သမ္မတံ သမ္ဘာဝိတံ၊ ယံ ဒိသွာ ဝိမနော အညတရသ္မိံ အာရမ္မဏေ ဝိဂတမနသင်္ကပ္ပော၊ ဧတ္ထေဝ ဝါ အဝိမနော သောမနဿိကော ဟုတွာ ဥဒိက္ခသိ၊ တံ မယှံ ကထေဟီတိ။

တံ သုတွာ ဓုတ္တကော ကိဉ္စာပိ တဿာ ရူပံ စာတုရိယသောဘိတံ၊ ပဌမဒဿနတော ပန ပဋ္ဌာယ ယသ္မိံ ဒိဋ္ဌိပါတေ ပဋိဗဒ္ဓစိတ္တော၊ တမေဝ အပဒိသန္တော ‘‘အက္ခီနိ စ တူရိယာရိဝါ’’တိအာဒိမာဟ။ ကာမဉ္စာယံ ထေရီ သုဋ္ဌု သံယတတာယ သန္တိန္ဒြိယာ၊ တာယ ထိရဝိပ္ပသန္နသောမ္မသန္တနယနနိပါတေသု ကမ္မာနုဘာဝနိပ္ဖန္နေသု ပသန္နပဉ္စပ္ပသာဒပဋိမဏ္ဍိတေသု နယနေသု လဗ္ဘမာနေ ပဘာဝိသိဋ္ဌစာတုရိယေ ဒိဋ္ဌိပါတေ၊ ယသ္မာ သယံ စရိတဟာဝဘာဝဝိလာသာဒိပရိကပ္ပဝဉ္စိတော သော ဓုတ္တော ဇာတော၊ တသ္မာဿ ဒိဋ္ဌိရာဂေါ သဝိသေသံ ဝေပုလ္လံ အဂမာသိ။ တတ္ထ အက္ခီနိ စ တူရိယာရိဝါတိ တူရိ ဝုစ္စတိ မိဂီ၊ စ-သဒ္ဒေါ နိပါတမတ္တံ၊ မိဂစ္ဆာပါယ ဝိယ တေ အက္ခီနီတိ အတ္ထော။ ‘‘ကောရိယာရိဝါ’’တိ ဝါ ပါဠိ၊ ကုဉ္စကာရကုက္ကုဋိယာတိ ဝုတ္တံ ဟောတိ။ ကိန္နရိယာရိဝ ပဗ္ဗတန္တရေတိ ပဗ္ဗတကုစ္ဆိယံ ဝိစရမာနာယ ကိန္နရိဝနိတာယ ဝိယ စ တေ အက္ခီနီတိ အတ္ထော။ တဝ မေ နယနာနိ ဒက္ခိယာတိ တဝ ဝုတ္တဂုဏဝိသေသာနိ နယနာနိ ဒိသွာ၊ ဘိယျော ဥပရူပရိ မေ ကာမာဘိရတိ ပဝဍ္ဎတိ။

ဥပ္ပလသိခရောပမာနိတေတိ ရတ္တုပ္ပလအဂ္ဂသဒိသာနိ ပမှာနိ တဝ။ ဝိမလေတိ နိမ္မလေ။ ဟာဋကသန္နိဘေတိ ကဉ္စနရူပကဿ မုခသဒိသေ တေ မုခေ၊ နယနာနိ ဒက္ခိယာတိ ယောဇနာ။

အပိ ဒူရဂတာတိ ဒူရံ ဌာနံ ဂတာပိ။ သရမှသေတိ အညံ ကိဉ္စိ အစိန္တေတွာ တဝ နယနာနိ ဧဝ အနုဿရာမိ။ အာယတပမှေတိ ဒီဃပခုမေ။ ဝိသုဒ္ဓဒဿနေတိ နိမ္မလလောစနေ။ န ဟိ မတ္ထိ တယာ ပိယတ္တရော နယနာတိ တဝ နယနတော အညော ကောစိ မယှံ ပိယတရော နတ္ထိ။ တယာတိ ဟိ သာမိအတ္ထေ ဧဝ ကရဏဝစနံ။

ဧဝံ စက္ခုသမ္ပတ္တိယာ ဥမ္မာဒိတဿ ဝိယ တံ တံ ဝိပ္ပလပတော တဿ ပုရိသဿ မနောရထံ ဝိပရိဝတ္တေန္တီ ထေရီ ‘‘အပထေနာ’’တိအာဒိနာ ဒွါဒသ ဂါထာ အဘာသိ။ တတ္ထ အပထေန ပယာတုမိစ္ဆသီတိ၊ အာဝုသော သုဝဏ္ဏကာရပုတ္တ၊ သန္တေ အညသ္မိံ ဣတ္ထိဇနေ ယော တွံ ဗုဒ္ဓသုတံ ဗုဒ္ဓဿ ဘဂဝတော ဩရသဓီတရံ မံ မဂ္ဂယသိ ပတ္ထေသိ၊ သော တွံ သန္တေ ခေမေ ဥဇုမဂ္ဂေ အပထေန ကဏ္ဋကနိဝုတေန သဘယေန ကုမ္မဂ္ဂေန ပယာတုမိစ္ဆသိ ပဋိပဇ္ဇိတုကာမောသိ၊ စန္ဒံ ကီဠနကံ ဂဝေသသိ စန္ဒမဏ္ဍလံ ကီဠာဂေါဠကံ ကာတုကာမောသိ၊ မေရုံ လင်္ဃေတုမိစ္ဆသိ စတုရာသီတိယောဇနသဟဿုဗ္ဗေဓံ သိနေရုပဗ္ဗတရာဇံ လင်္ဃယိတွာ အပရဘာဂေ ဌာတုကာမောသိ၊ သော တွံ မံ ဗုဒ္ဓသုတံ မဂ္ဂယသီတိ ယောဇနာ။

ဣဒါနိ တဿ အတ္တနော အဝိသယဘာဝံ ပတ္ထနာယ စ ဝိဃာတာဝဟတံ ဒဿေတုံ ‘‘နတ္ထီ’’တိအာဒိ ဝုတ္တံ။ တတ္ထ ရာဂေါ ယတ္ထပိ ဒါနိ မေ သိယာတိ ယတ္ထ ဣဒါနိ မေ ရာဂေါ သိယာ ဘဝေယျ၊ တံ အာရမ္မဏံ သဒေဝကေ လောကေ နတ္ထိ ဧဝ။ နပိ နံ ဇာနာမိ ကီရိသောတိ နံ ရာဂံ ကီရိသောတိပိ န ဇာနာမိ။ အထ မဂ္ဂေန ဟတော သမူလကောတိ အထာတိ နိပါတမတ္တံ။ အယောနိသောမနသိကာရသင်္ခါတေန မူလေန သမူလကော ရာဂေါ အရိယမဂ္ဂေန ဟတော သမုဂ္ဃာတိတော။

ဣင်္ဂါလကုယာတိ အင်္ဂါရကာသုယာ။ ဥဇ္ဈိတောတိ ဝါတုက္ခိတ္တော ဝိယ ယော ကောစိ၊ ဒဟနိယာ ဣန္ဓနံ ဝိယာတိ အတ္ထော။ ဝိသပတ္တောရိဝါတိ ဝိသဂတဘာဇနံ ဝိယ။ အဂ္ဂိတော ကတောတိ အဂ္ဂိတော အင်္ဂါရတော အပဂတော ကတော၊ ဝိသဿ လေသမ္ပိ အသေသေတွာ အပနီတော ဝိနာသိတောတိ အတ္ထော။

ယဿာ သိယာ အပစ္စဝေက္ခိတန္တိ ယဿာ ဣတ္ထိယာ ဣဒံ ခန္ဓပဉ္စကံ ဉာဏေန အပ္ပဋိဝေက္ခိတံ အပရိညာတံ သိယာ။ သတ္တာ ဝါ အနုသာသိတော သိယာတိ သတ္တာ ဝါ ဓမ္မသရီရဿ အဒဿနေန ယဿာ ဣတ္ထိယာ အနနုသာသိတော သိယာ။ တွံ တာဒိသိကံ ပလောဘယာတိ၊ အာဝုသော၊ တွံ တထာရူပံ အပရိမဒ္ဒိတသင်္ခါရံ အပစ္စဝေက္ခိတလောကုတ္တရဓမ္မံ ကာမေဟိ ပလောဘယ ဥပဂစ္ဆ။ ဇာနန္တိံ သော ဣမံ ဝိဟညသီတိ သော တွံ ပဝတ္တိံ နိဝတ္တိဉ္စ ယာထာဝတော ဇာနန္တိံ ပဋိဝိဒ္ဓသစ္စံ ဣမံ သုဘံ ဘိက္ခုနိံ အာဂမ္မ ဝိဟညသိ၊ သမ္ပတိ အာယတိဉ္စ ဝိဃာတံ ဒုက္ခံ အာပဇ္ဇသိ။

ဣဒါနိဿ ဝိဃာတာပတ္တိတံ ကာရဏဝိဘာဝနေန ဒဿေန္တီ ‘‘မယှံ ဟီ’’တိအာဒိမာဟ။ တတ္ထ ဟီတိ ဟေတုအတ္ထေ နိပါတော။ အက္ကုဋ္ဌဝန္ဒိတေတိ အက္ကောသေ ဝန္ဒနာယ စ။ သုခဒုက္ခေတိ သုခေ စ ဒုက္ခေ စ၊ ဣဋ္ဌာနိဋ္ဌဝိသယသမာယောဂေ ဝါ။ သတီ ဥပဋ္ဌိတာတိ ပစ္စဝေက္ခဏယုတ္တာ သတိ သဗ္ဗကာလံ ဥပဋ္ဌိတာ။ သင်္ခတမသုဘန္တိ ဇာနိယာတိ တေဘူမကံ သင်္ခါရဂတံ ကိလေသာသုစိပဂ္ဃရဏေန အသုဘန္တိ ဉတွာ။ သဗ္ဗတ္ထေဝါတိ သဗ္ဗသ္မိံယေဝ ဘဝတ္တယေ မယှံ မနော တဏှာလေပါဒိနာ န ဥပလိမ္ပတိ။

မဂ္ဂဋ္ဌင်္ဂိကယာနယာယိနီတိ အဋ္ဌင်္ဂိကမဂ္ဂသင်္ခါတေန အရိယယာနေန နိဗ္ဗာနပုရံ ယာယိနီ ဥပဂတာ။ ဥဒ္ဓဋသလ္လာတိ အတ္တနော သန္တာနတော သမုဒ္ဓဋရာဂါဒိသလ္လာ။

သုစိတ္တိတာတိ ဟတ္ထပါဒမုခါဒိအာကာရေန သုဋ္ဌု စိတ္တိတာ ဝိရစိတာ။ သောမ္ဘာတိ သုမ္ဘကာ။ ဒါရုကပိလ္လကာနိ ဝါတိ ဒါရုဒဏ္ဍာဒီဟိ ဥပရစိတရူပကာနိ။ တန္တီဟီတိ နှာရုသုတ္တကေဟိ။ ခီလကေဟီတိ ဟတ္ထပါဒပိဋ္ဌိကဏ္ဏာဒိအတ္ထာယ ဌပိတဒဏ္ဍေဟိ။ ဝိနိဗဒ္ဓါတိ ဝိဝိဓေနာကာရေန ဗဒ္ဓါ။ ဝိဝိဓံ ပနစ္စကာတိ ယန္တသုတ္တာဒီနံ အဉ္ဆနဝိဿဇ္ဇနာဒိနာ ပဋ္ဌပိတနစ္စကာ၊ ပနစ္စန္တာ ဝိယ ဒိဋ္ဌာတိ ယောဇနာ။

တမှုဒ္ဓဋေ တန္တိခီလကေတိ သန္နိဝေသဝိသိဋ္ဌရစနာဝိသေသယုတ္တံ ဥပါဒါယ ရူပကသမညာ တမှိ တန္တိမှိ ခီလကေ စ ဌာနတော ဥဒ္ဓဋေ ဗန္ဓန္တော ဝိဿဋ္ဌေ၊ ဝိသုံ ကရဏေန အညမညံ ဝိကလေ၊ တဟိံ တဟိံ ခိပနေန ပရိကြိတေ ဝိကိရိတေ။ န ဝိန္ဒေယျ ခဏ္ဍသော ကတေတိ ပေါတ္ထကရူပဿ အဝယဝေ ခဏ္ဍာခဏ္ဍိတေ ကတေ ပေါတ္ထကရူပံ န ဝိန္ဒေယျ၊ န ဥပလဘေယျ။ ဧဝံ သန္တေ ကိမှိ တတ္ထ မနံ နိဝေသယေ တသ္မိံ ပေါတ္ထကရူပါဝယဝေ ကိမှိ ကိံ ခါဏုကေ၊ ဥဒါဟု ရဇ္ဇုကေ၊ မတ္တိကာပိဏ္ဍာဒိကေ ဝါ မနံ မနသညံ နိဝေသေယျ၊ ဝိသင်္ခါရေ အဝယဝေ သာ သညာ ကဒါစိပိ နပတေယျာတိ အတ္ထော။

တထူပမာတိ တံသဒိသာ တေန ပေါတ္ထကရူပေန သဒိသာ။ ကိန္တိ စေ အာဟ ‘‘ဒေဟကာနီ’’တိအာဒိ။ တတ္ထ ဒေဟကာနီတိ ဟတ္ထပါဒမုခါဒိဒေဟာဝယဝါ။ မန္တိ မေ ပဋိဗဒ္ဓါ ဥပဋ္ဌဟန္တိ။ တေဟိ ဓမ္မေဟီတိ တေဟိ ပထဝိအာဒီဟိ စ စက္ခာဒီဟိ စ ဓမ္မေဟိ။ ဝိနာ န ဝတ္တန္တီတိ န ဟိ တထာ တထာ သန္နိဝိဋ္ဌေ ပထဝိအာဒိဓမ္မေ မုဉ္စိတွာ ဒေဟာ နာမ သန္တိ။ ဓမ္မေဟိ ဝိနာ န ဝတ္တတီတိ ဒေဟော အဝယဝေဟိ အဝယဝဓမ္မေဟိ ဝိနာ န ဝတ္တတိ န ဥပလဗ္ဘတိ။ ဧဝံ သန္တေ ကိမှိ တတ္ထ မနံ နိဝေသယေတိ ကိမှိ ကိံ ပထဝိယံ၊ ဥဒါဟု အာပါဒိကေ ဒေဟောတိ ဝါ ဟတ္ထပါဒါဒီနီတိ ဝါ မနံ မနသညံ နိဝေသေယျ။ ယသ္မာ ပထဝိအာဒိပသာဒဓမ္မမတ္တေ ဧသာ သမညာ၊ ယဒိဒံ ဒေဟောတိ ဝါ ဟတ္ထပါဒါဒီနီတိ ဝါ သတ္တောတိ ဝါ ဣတ္ထီတိ ဝါ ပုရိသောတိ ဝါ၊ တသ္မာ န ဧတ္ထ ဇာနတော ကောစိ အဘိနိဝေသော ဟောတီတိ။

ယထာ ဟရိတာလေန မက္ခိတံ၊ အဒ္ဒသ စိတ္တိကံ ဘိတ္တိယာ ကတန္တိ ယထာ ကုသလေန စိတ္တကာရေန ဘိတ္တိယံ ဟရိတာလေန မက္ခိတံ လိတ္တံ တေန လေပံ ဒတွာ ကတံ အာလိခိတံ စိတ္တိကံ ဣတ္ထိရူပံ အဒ္ဒသ ပဿေယျ။ တတ္ထ ယာ ဥပထမ္ဘနခေပနာဒိကိရိယာသမ္ပတ္တိယာ မာနုသိကာ နု ခေါ အယံ ဘိတ္တိ အပဿာယ ဌိတာတိ သညာ၊ သာ နိရတ္ထကာ မနုဿဘာဝသင်္ခါတဿ အတ္ထဿ တတ္ထ အဘာဝတော၊ မာနုသီတိ ပန ကေဝလံ တဟိံ တဿ စ ဝိပရီတဒဿနံ၊ ယာထာဝတော ဂဟဏံ န ဟောတိ၊ ဓမ္မပုဉ္ဇမတ္တေ ဣတ္ထိပုရိသာဒိဂဟဏမ္ပိ ဧဝံ သမ္ပဒမိဒံ ဒဋ္ဌဗ္ဗန္တိ အဓိပ္ပာယော။

မာယံ ဝိယ အဂ္ဂတော ကတန္တိ မာယာကာရေန ပုရတော ဥပဋ္ဌာပိတံ မာယာသဒိသံ။ သုပိနန္တေဝ သုဝဏ္ဏပါဒပန္တိ သုပိနမေဝ သုပိနန္တံ၊ တတ္ထ ဥပဋ္ဌိတသုဝဏ္ဏမယရုက္ခံ ဝိယ။ ဥပဂစ္ဆသိ အန္ဓ ရိတ္တကန္တိ အန္ဓဗာလ ရိတ္တကံ တုစ္ဆကံ အန္တောသာရရဟိတံ ဣမံ အတ္တဘာဝံ ‘‘ဧတံ မမာ’’တိ သာရဝန္တံ ဝိယ ဥပဂစ္ဆသိ အဘိနိဝိသသိ။ ဇနမဇ္ဈေရိဝ ရုပ္ပရူပကန္တိ မာယာကာရေန မဟာဇနမဇ္ဈေ ဒဿိတံ ရူပိယရူပသဒိသံ သာရံ ဝိယ ဥပဋ္ဌဟန္တံ၊ အသာရန္တိ အတ္ထော။

ဝဋ္ဋနိရိဝါတိ လာခါယ ဂုဠိကာ ဝိယ။ ကောဋရောဟိတာတိ ကောဋရေ ရုက္ခသုသိရေ ဌပိတာ။ မဇ္ဈေ ပုဗ္ဗုဠကာတိ အက္ခိဒလမဇ္ဈေ ဌိတဇလပုဗ္ဗုဠသဒိသာ။ သအဿုကာတိ အဿုဇလသဟိတာ။ ပီဠကောဠိကာတိ အက္ခိဂူထကော။ ဧတ္ထ ဇာယတီတိ ဧတသ္မိံ အက္ခိမဏ္ဍလေ ဥဘောသု ကောဋီသု ဝိသဂန္ဓံ ဝါယန္တော နိဗ္ဗတ္တတိ။ ပီဠကောဠိကာတိ ဝါ အက္ခိဒလေသု နိဗ္ဗတ္တနကာ ပီဠကာ ဝုစ္စတိ။ ဝိဝိဓာတိ သေတနီလမဏ္ဍလာနဉ္စေဝ ရတ္တပီတာဒီနံ သတ္တန္နံ ပဋလာနဉ္စ ဝသေန အနေကဝိဓာ။ စက္ခုဝိဓာတိ စက္ခုဘာဂါ စက္ခုပ္ပကာရာ ဝါ တဿ အနေကကလာပဂတဘာဝတော။ ပိဏ္ဍိတာတိ သမုဒိတာ။

ဧဝံ စက္ခုသ္မိံ သာရဇ္ဇန္တဿ စက္ခုနော အသုဘတံ အနဝဋ္ဌိတတာယ အနိစ္စတဉ္စ ဝိဘာဝေသိ ။ ဝိဘာဝေတွာ စ ယထာ နာမ ကောစိ လောဘနီယံ ဘဏ္ဍံ ဂဟေတွာ စောရကန္တာရံ ပဋိပဇ္ဇန္တော စောရေဟိ ပလိဗုဒ္ဓါ တံ လောဘနီယဘဏ္ဍံ ဒတွာ ဂစ္ဆတိ၊ ဧဝမေဝ စက္ခုမှိ သာရတ္တေန တေန ပုရိသေန ပလိဗုဒ္ဓါ ထေရီ အတ္တနော စက္ခုံ ဥပ္ပာဋေတွာ တဿ အဒါသိ။ တေန ဝုတ္တံ ‘‘ဥပ္ပာဋိယ စာရုဒဿနာ’’တိအာဒိ။ တတ္ထ ဥပ္ပာဋိယာတိ ဥပ္ပာဋေတွာ စက္ခုကူပတော နီဟရိတွာ။ စာရုဒဿနာတိ ပိယဒဿနာ မနောဟရဒဿနာ။ န စ ပဇ္ဇိတ္ထာတိ တသ္မိံ စက္ခုသ္မိံ သင်္ဂံ နာပဇ္ဇိ။ အသင်္ဂမာနသာတိ ကတ္ထစိပိ အာရမ္မဏေ အနာသတ္တစိတ္တာ။ ဟန္ဒ တေ စက္ခုန္တိ တယာ ကာမိတံ တတော ဧဝ မယာ ဒိန္နတ္တာ တေ စက္ခုသညိတံ အသုစိပိဏ္ဍံ ဂဏှ၊ ဂဟေတွာ ဟရဿု ပသာဒယုတ္တံ ဣစ္ဆိတံ ဌာနံ နေဟိ။

တဿ စ ဝိရမာသိ တာဝဒေတိ တဿ ဓုတ္တပုရိသဿ တာဝဒေဝ အက္ခိမှိ ဥပ္ပာဋိတက္ခဏေ ဧဝ ရာဂေါ ဝိဂစ္ဆိ။ တတ္ထာတိ အက္ခိမှိ၊ တဿံ ဝါ ထေရိယံ။ အထ ဝါ တတ္ထာတိ တသ္မိံယေဝ ဌာနေ။ ခမာပယီတိ ခမာပေသိ။ သောတ္ထိ သိယာ ဗြဟ္မစာရိနီတိ သေဋ္ဌစာရိနိ မဟေသိကေ တုယှံ အာရောဂျမေဝ ဘဝေယျ။ န ပုနော ဧဒိသကံဘဝိဿတီတိ ဣတော ပရံ ဧဝရူပံ အနာစာရစရဏံ န ဘဝိဿတိ၊ န ကရိဿာမီတိ အတ္ထော။

အာသာဒိယာတိ ဃဋ္ဋေတွာ။ ဧဒိသန္တိ ဧဝရူပံ သဗ္ဗတ္ထ ဝီတရာဂံ။ အဂ္ဂိံ ပဇ္ဇလိတံဝ လိင်္ဂိယာတိ ပဇ္ဇလိတံ အဂ္ဂိံ အာလိင်္ဂေတွာ ဝိယ။

တတောတိ တသ္မာ ဓုတ္တပုရိသာ။ သာ ဘိက္ခုနီတိ သာ သုဘာ ဘိက္ခုနီ။ အဂမီ ဗုဒ္ဓဝရဿ သန္တိကန္တိ သမ္မာသမ္ဗုဒ္ဓဿ သန္တိကံ ဥပဂစ္ဆိ ဥပသင်္ကမိ။ ပဿိယ ဝရပုညလက္ခဏန္တိ ဥတ္တမေဟိ ပုညသမ္ဘာရေဟိ နိဗ္ဗတ္တမဟာပုရိသလက္ခဏံ ဒိသွာ။ ယထာ ပုရာဏကန္တိ ပေါရာဏံ ဝိယ ဥပ္ပာဋနတော ပုဗ္ဗေ ဝိယ စက္ခု ပဋိပါကတိကံ အဟောသိ။ ယမေတ္ထ အန္တရန္တရာ န ဝုတ္တံ၊ တံ ဝုတ္တနယတ္တာ သုဝိညေယျမေဝ။

သုဘာဇီဝကမ္ဗဝနိကာထေရီဂါထာဝဏ္ဏနာ နိဋ္ဌိတာ။

တိံသနိပါတဝဏ္ဏနာ နိဋ္ဌိတာ။