📜

၁၅။ စတ္တာလီသနိပါတော

၁။ ဣသိဒါသီထေရီဂါထာဝဏ္ဏနာ

စတ္တာလီသနိပါတေ နဂရမှိ ကုသုမနာမေတိအာဒိကာ ဣသိဒါသိယာ ထေရိယာ ဂါထာ။ အယမ္ပိ ပုရိမဗုဒ္ဓေသု ကတာဓိကာရာ တတ္ထ တတ္ထ ဘဝေ ပုရိသတ္တဘာဝေ ဌတွာ ဝိဝဋ္ဋူပနိဿယံ ကုသလံ ဥပစိနန္တီ စရိမဘဝတော သတ္တမေ ဘဝေ အကလျာဏသန္နိဿယေန ပရဒါရိကကမ္မံ ကတွာ၊ ကာယဿ ဘေဒါ နိရယေ နိဗ္ဗတ္တိတွာ တတ္ထ ဗဟူနိ ဝဿသတာနိ နိရယေ ပစ္စိတွာ၊ တတော စုတာ တီသု ဇာတီသု တိရစ္ဆာနယောနိယံ နိဗ္ဗတ္တိတွာ တတော စုတာ ဒါသိယာ ကုစ္ဆိသ္မိံ နပုံသကော ဟုတွာ နိဗ္ဗတ္တိ။ တတော ပန စုတာ ဧကဿ ဒလိဒ္ဒဿ သာကဋိကဿ ဓီတာ ဟုတွာ နိဗ္ဗတ္တိ။ တံ ဝယပ္ပတ္တံ ဂိရိဒါသော နာမ အညတရဿ သတ္ထဝါဟဿ ပုတ္တော အတ္တနော ဘရိယံ ကတွာ ဂေဟံ အာနေသိ။ တဿ စ ဘရိယာ အတ္ထိ သီလဝတီ ကလျာဏဓမ္မာ။ တဿံ ဣဿာပကတာ သာမိနော တဿာ ဝိဒ္ဒေသနကမ္မံ အကာသိ။ သာ တတ္ထ ယာဝဇီဝံ ဌတွာ ကာယဿ ဘေဒါ ဣမသ္မိံ ဗုဒ္ဓုပ္ပာဒေ ဥဇ္ဇေနိယံ ကုလပဒေသသီလာစာရာဒိဂုဏေဟိ အဘိသမ္မတဿ ဝိဘဝသမ္ပန္နဿ သေဋ္ဌိဿ ဓီတာ ဟုတွာ နိဗ္ဗတ္တိ၊ ဣသိဒါသီတိဿာ နာမံ အဟောသိ။

တံ ဝယပ္ပတ္တကာလေ မာတာပိတရော ကုလရူပဝယဝိဘဝါဒိသဒိသဿ အညတရဿ သေဋ္ဌိပုတ္တဿ အဒံသု။ သာ တဿ ဂေဟေ ပတိဒေဝတာ ဟုတွာ မာသမတ္တံ ဝသိ။ အထဿာ ကမ္မဗလေန သာမိကော ဝိရတ္တရူပေါ ဟုတွာ တံ ဃရတော နီဟရိ။ တံ သဗ္ဗံ ပါဠိတော ဧဝ ဝိညာယတိ။ တေသံ တေသံ ပန သာမိကာနံ အရုစ္စနေယျတာယ သံဝေဂဇာတာ ပိတရံ အနုဇာနာပေတွာ၊ ဇိနဒတ္တာယ ထေရိယာ သန္တိကေ ပဗ္ဗဇိတွာ ဝိပဿနာယ ကမ္မံ ကရောန္တီ နစိရဿေဝ သဟ ပဋိသမ္ဘိဒါဟိ အရဟတ္တံ ပတွာ၊ ဖလသုခေန နိဗ္ဗာနသုခေန စ ဝီတိနာမေန္တီ ဧကဒိဝသံ ပါဋလိပုတ္တနဂရေ ပိဏ္ဍာယ စရိတွာ ပစ္ဆာဘတ္တံ ပိဏ္ဍပါတပဋိက္ကန္တာ မဟာဂင်္ဂါယံ ဝါလုကပုလိနေ နိသီဒိတွာ ဗောဓိတ္ထေရိယာ နာမ အတ္တနော သဟာယတ္ထေရိယာ ပုဗ္ဗပဋိပတ္တိံ ပုစ္ဆိတာ တမတ္ထံ ဂါထာဗန္ဓဝသေန ဝိဿဇ္ဇေသိ ‘‘ဥဇ္ဇေနိယာ ပုရဝရေ’’တိအာဒိနာ။ တေသံ ပန ပုစ္ဆာဝိဿဇ္ဇနာနံ သမ္ဗန္ဓံ ဒဿေတုံ –

၄၀၂။

‘‘နဂရမှိ ကုသုမနာမေ၊ ပါဋလိပုတ္တမှိ ပထဝိယာ မဏ္ဍေ၊

သကျကုလကုလီနာယော၊ ဒွေ ဘိက္ခုနိယော ဟိ ဂုဏဝတိယော။

၄၀၃။

‘‘ဣသိဒါသီ တတ္ထ ဧကာ၊ ဒုတိယာ ဗောဓီတိ သီလသမ္ပန္နာ စ၊

ဈာနဇ္ဈာယနရတာယော၊ ဗဟုဿုတာယော ဓုတကိလေသာယော။

၄၀၄။

‘‘တာ ပိဏ္ဍာယ စရိတွာ၊ ဘတ္တတ္ထံ ကရိယ ဓောတပတ္တာယော၊

ရဟိတမှိ သုခနိသိန္နာ၊ ဣမာ ဂိရာ အဗ္ဘုဒီရေသု’’န္တိ။ –

ဣမာ တိဿော ဂါထာ သင်္ဂီတိကာရေဟိ ဌပိတာ။

၄၀၅။

‘‘ပါသာဒိကာသိ အယျေ၊ ဣသိဒါသိ ဝယောပိ တေ အပရိဟီနော၊

ကိံ ဒိသွာန ဗျာလိကံ၊ အထာသိ နေက္ခမ္မမနုယုတ္တာ။

၄၀၆။

‘‘ဧဝမနုယုဉ္ဇိယမာနာ သာ၊ ရဟိတေ ဓမ္မဒေသနာကုသလာ၊

ဣသိဒါသီ ဝစနမဗြဝိ၊ သုဏ ဗောဓိ ယထာမှိ ပဗ္ဗဇိတာ။

ဣတော ပရံ ဝိဿဇ္ဇနဂါထာ။

၄၀၇။

‘‘ဥဇ္ဇေနိယာ ပုရဝရေ၊ မယှံ ပိတာ သီလသံဝုတော သေဋ္ဌိ၊

တဿမှိ ဧကဓီတာ၊ ပိယာ မနာပါ စ ဒယိတာ စ။

၄၀၈။

‘‘အထ မေ သာကေတတော ဝရကာ၊ အာဂစ္ဆုမုတ္တမကုလီနာ၊

သေဋ္ဌီ ပဟူတရတနော၊ တဿ မမံ သုဏုမဒါသိ တာတော။

၄၀၉။

‘‘သဿုယာ သသုရဿ စ၊ သာယံ ပါတံ ပဏာမမုပဂမ္မ၊

သိရသာ ကရောမိ ပါဒေ၊ ဝန္ဒာမိ ယထာမှိ အနုသိဋ္ဌာ။

၄၁၀။

‘‘ယာ မယှံ သာမိကဿ၊ ဘဂိနိယော ဘာတုနော ပရိဇနော ဝါ၊

တမေကဝရကမ္ပိ ဒိသွာ၊ ဥဗ္ဗိဂ္ဂါ အာသနံ ဒေမိ။

၄၁၁။

‘‘အန္နေန စ ပါနေန စ၊ ခဇ္ဇေန စ ယဉ္စ တတ္ထ သန္နိဟိတံ၊

ဆာဒေမိ ဥပနယာမိ စ၊ ဒေမိ စ ယံ ယဿ ပတိရူပံ။

၄၁၂။

‘‘ကာလေန ဥပဋ္ဌဟိတွာ၊ ဃရံ သမုပဂမာမိ ဥမ္မာရေ၊

ဓောဝန္တီ ဟတ္ထပါဒေ၊ ပဉ္ဇလိကာ သာမိကမုပေမိ။

၄၁၃။

‘‘ကောစ္ဆံ ပသာဒံ အဉ္ဇနိဉ္စ၊ အာဒါသကဉ္စ ဂဏှိတွာ၊

ပရိကမ္မကာရိကာ ဝိယ၊ သယမေဝ ပတိံ ဝိဘူသေမိ။

၄၁၄။

‘‘သယမေဝ ဩဒနံ သာဓယာမိ၊ သယမေဝ ဘာဇနံ ဓောဝန္တီ၊

မာတာဝ ဧကပုတ္တကံ၊ တထာ ဘတ္တာရံ ပရိစရာမိ။

၄၁၅။

‘‘ဧဝံ မံ ဘတ္တိကတံ၊ အနုရတ္တံ ကာရိကံ နိဟတမာနံ၊

ဥဋ္ဌာယိကံ အနလသံ၊ သီလဝတိံ ဒုဿတေ ဘတ္တာ။

၄၁၆။

‘‘သော မာတရဉ္စ ပိတရဉ္စ၊ ဘဏတိ အာပုစ္ဆဟံ ဂမိဿာမိ၊

ဣသိဒါသိယာ န သဟ ဝစ္ဆံ၊ ဧကာဂါရေဟံ သဟ ဝတ္ထုံ။

၄၁၇။

‘‘မာ ဧဝံ ပုတ္တ အဝစ၊ ဣသိဒါသီ ပဏ္ဍိတာ ပရိဗျတ္တာ၊

ဥဋ္ဌာယိကာ အနလသာ၊ ကိံ တုယှံ န ရောစတေ ပုတ္တ။

၄၁၈။

‘‘န စ မေ ဟိံသတိ ကိဉ္စိ၊ န စဟံ ဣသိဒါသိယာ သဟ ဝစ္ဆံ၊

ဒေဿာဝ မေ အလံ မေ၊ အပုစ္ဆာဟံ ဂမိဿာမိ။

၄၁၉။

‘‘တဿ ဝစနံ သုဏိတွာ၊ သဿု သသုရော စ မံ အပုစ္ဆိံသု၊

ကိဿ တယာ အပရဒ္ဓံ၊ ဘဏ ဝိဿဋ္ဌာ ယထာဘူတံ။

၄၂၀။

‘‘နပိဟံ အပရဇ္ဈံ ကိဉ္စိ၊ နပိ ဟိံသေမိ န ဘဏာမိ ဒုဗ္ဗစနံ၊

ကိံ သက္ကာ ကာတုယျေ၊ ယံ မံ ဝိဒ္ဒေဿတေ ဘတ္တာ။

၄၂၁။

‘‘တေ မံ ပိတုဃရံ ပဋိနယိံသု၊ ဝိမနာ ဒုခေန အဓိဘူတာ၊

ပုတ္တမနုရက္ခမာနာ၊ ဇိတာမှသေ ရူပိနိံ လက္ခိံ။

၄၂၂။

‘‘အထ မံ အဒါသိ တာတော၊ အဍ္ဎဿ ဃရမှိ ဒုတိယကုလိကဿ၊

တတော ဥပဍ္ဎသုင်္ကေန၊ ယေန မံ ဝိန္ဒထ သေဋ္ဌိ။

၄၂၃။

‘‘တဿပိ ဃရမှိ မာသံ၊ အဝသိံ အထ သောပိ မံ ပဋိစ္ဆရယိ၊

ဒါသီဝ ဥပဋ္ဌဟန္တိံ၊ အဒူသိကံ သီလသမ္ပန္နံ။

၄၂၄။

‘‘ဘိက္ခာယ စ ဝိစရန္တံ၊ ဒမကံ ဒန္တံ မေ ပိတာ ဘဏတိ၊

ဟောဟိသိ မေ ဇာမာတာ၊ နိက္ခိပ ပေါဋ္ဌိဉ္စ ဃဋိကဉ္စ။

၄၂၅။

‘‘သောပိ ဝသိတွာ ပက္ခံ၊ အထ တာတံ ဘဏတိ ‘ဒေဟိ မေ ပေါဋ္ဌိံ၊

ဃဋိကဉ္စ မလ္လကဉ္စ၊ ပုနပိ ဘိက္ခံ စရိဿာမိ’။

၄၂၆။

‘‘အထ နံ ဘဏတီ တာတော၊ အမ္မာ သဗ္ဗော စ မေ ဉာတိဂဏဝဂ္ဂေါ၊

ကိံ တေ န ကီရတိ ဣဓ၊ ဘဏ ခိပ္ပံ တံ တေ ကရိဟိတိ။

၄၂၇။

‘‘ဧဝံ ဘဏိတော ဘဏတိ၊ ယဒိ မေ အတ္တာ သက္ကောတိ အလံ မယှံ၊

ဣသိဒါသိယာ န သဟ ဝစ္ဆံ၊ ဧကဃရေဟံ သဟ ဝတ္ထုံ။

၄၂၈။

‘‘ဝိဿဇ္ဇိတော ဂတော သော၊ အဟမ္ပိ ဧကာကိနီ ဝိစိန္တေမိ၊

အာပုစ္ဆိတူန ဂစ္ဆံ၊ မရိတုယေ ဝါ ပဗ္ဗဇိဿံ ဝါ။

၄၂၉။

‘‘အထ အယျာ ဇိနဒတ္တာ၊ အာဂစ္ဆီ ဂေါစရာယ စရမာနာ၊

တာတ ကုလံ ဝိနယဓရီ၊ ဗဟုဿုတာ သီလသမ္ပန္နာ။

၄၃၀။

‘‘တံ ဒိသွာန အမှာကံ၊ ဥဋ္ဌာယာသနံ တဿာ ပညာပယိံ၊

နိသိန္နာယ စ ပါဒေ၊ ဝန္ဒိတွာ ဘောဇနမဒါသိံ။

၄၃၁။

‘‘အန္နေန စ ပါနေန စ၊ ခဇ္ဇေန စ ယဉ္စ တတ္ထ သန္နိဟိတံ၊

သန္တပ္ပယိတွာ အဝစံ၊ အယျေ ဣစ္ဆာမိ ပဗ္ဗဇိတုံ။

၄၃၂။

‘‘အထ မံ ဘဏတီ တာတော၊ ဣဓေဝ ပုတ္တက စရာဟိ တွံ ဓမ္မံ၊

အန္နေန စ ပါနေန စ၊ တပ္ပယ သမဏေ ဒွိဇာတီ စ။

၄၃၃။

‘‘အထဟံ ဘဏာမိ တာတံ၊ ရောဒန္တီ အဉ္ဇလိံ ပဏာမေတွာ၊

ပါပဉှိ မယာ ပကတံ၊ ကမ္မံ တံ နိဇ္ဇရေဿာမိ။

၄၃၄။

‘‘အထ မံ ဘဏတီ တာတော၊ ပါပုဏ ဗောဓိဉ္စ အဂ္ဂဓမ္မဉ္စ၊

နိဗ္ဗာနဉ္စ လဘဿု၊ ယံ သစ္ဆိကရီ ဒွိပဒသေဋ္ဌော။

၄၃၅။

‘‘မာတာပိတူ အဘိဝါဒ၊ ယိတွာ သဗ္ဗဉ္စ ဉာတိဂဏဝဂ္ဂံ၊

သတ္တာဟံ ပဗ္ဗဇိတာ၊ တိဿော ဝိဇ္ဇာ အဖဿယိံ။

၄၃၆။

‘‘ဇာနာမိ အတ္တနော သတ္တ၊ ဇာတိယော ယဿယံ ဖလဝိပါကော၊

တံ တဝ အာစိက္ခိဿံ၊ တံ ဧကမနာ နိသာမေဟိ။

၄၃၇။

‘‘နဂရမှိ ဧရကစ္ဆေ၊ သုဝဏ္ဏကာရော အဟံ ပဟူတဓနော၊

ယောဗ္ဗနမဒေန မတ္တော၊ သော ပရဒါရံ အသေဝိဟံ။

၄၃၈။

‘‘သောဟံ တတော စဝိတွာ၊ နိရယမှိ အပစ္စိသံ စိရံ၊

ပက္ကော တတော စ ဥဋ္ဌဟိတွာ၊ မက္ကဋိယာ ကုစ္ဆိမောက္ကမိံ။

၄၃၉။

‘‘သတ္တာဟဇာတကံ မံ၊ မဟာကပိ ယူထပေါ နိလ္လစ္ဆေသိ၊

တဿေတံ ကမ္မဖလံ၊ ယထာပိ ဂန္တွာန ပရဒါရံ။

၄၄၀။

‘‘သောဟံ တတော စဝိတွာ၊ ကာလံ ကရိတွာ သိန္ဓဝါရညေ၊

ကာဏာယ စ ခဉ္ဇာယ စ၊ ဧဠကိယာ ကုစ္ဆိမောက္ကမိံ။

၄၄၁။

‘‘ဒွါဒသ ဝဿာနိ အဟံ၊ နိလ္လစ္ဆိတော ဒါရကေ ပရိဝဟိတွာ၊

ကိမိနာဝဋ္ဋော အကလ္လော၊ ယထာပိ ဂန္တွာန ပရဒါရံ။

၄၄၂။

‘‘သောဟံ တတော စဝိတွာ၊ ဂေါဝါဏိဇကဿ ဂါဝိယာ ဇာတော၊

ဝစ္ဆော လာခါတမ္ဗော၊ နိလ္လစ္ဆိတော ဒွါဒသေ မာသေ။

၄၄၃။

‘‘ဝေါဎူန နင်္ဂလမဟံ၊ သကဋဉ္စ ဓာရယာမိ၊

အန္ဓောဝဋ္ဋော အကလ္လော၊ ယထာပိ ဂန္တွာန ပရဒါရံ။

၄၄၄။

‘‘သောဟံ တတော စဝိတွာ၊ ဝီထိယာ ဒါသိယာ ဃရေ ဇာတော၊

နေဝ မဟိလာ န ပုရိသော၊ ယထာပိ ဂန္တွာန ပရဒါရံ။

၄၄၅။

‘‘တိံသတိဝဿမှိ မတော၊ သာကဋိကကုလမှိ ဒါရိကာ ဇာတာ၊

ကပဏမှိ အပ္ပဘောဂေ၊ ဓနိကပုရိသပါတဗဟုလမှိ။

၄၄၆။

‘‘တံ မံ တတော သတ္ထဝါဟော၊ ဥဿန္နာယ ဝိပုလာယ ဝဍ္ဎိယာ၊

ဩကဍ္ဎတိ ဝိလပန္တိံ၊ အစ္ဆိန္ဒိတွာ ကုလဃရသ္မာ။

၄၄၇။

‘‘အထ သောဠသမေ ဝဿေ၊ ဒိသွာ မံ ပတ္တယောဗ္ဗနံ ကညံ၊

ဩရုန္ဓတဿ ပုတ္တော၊ ဂိရိဒါသော နာမ နာမေန။

၄၄၈။

‘‘တဿပိ အညာ ဘရိယာ၊ သီလဝတီ ဂုဏဝတီ ယသဝတီ စ၊

အနုရတ္တာ ဘတ္တာရံ၊ တဿာဟံ ဝိဒ္ဒေသနမကာသိံ။

၄၄၉။

‘‘တဿေတံ ကမ္မဖလံ၊ ယံ မံ အပကီရိတူန ဂစ္ဆန္တိ၊

ဒါသီဝ ဥပဋ္ဌဟန္တိံ၊ တဿပိ အန္တော ကတော မယာ’’တိ။

တတ္ထ နဂရမှိ ကုသုမနာမေတိ ‘‘ကုသုမပုရ’’န္တိ ဧဝံ ကုသုမသဒ္ဒေန ဂဟိတနာမကေ နဂရေ၊ ဣဒါနိ တံ နဂရံ ပါဋလိပုတ္တမှီတိ သရူပတော ဒဿေတိ။ ပထဝိယာ မဏ္ဍေတိ သကလာယ ပထဝိယာ မဏ္ဍဘူတေ။ သကျကုလကုလီနာယောတိ သကျကုလေ ကုလဓီတရော၊ သကျပုတ္တဿ ဘဂဝတော သာသနေ ပဗ္ဗဇိတတာယ ဧဝံ ဝုတ္တံ။

တတ္ထာတိ တာသု ဒွီသု ဘိက္ခုနီသု။ ဗောဓီတိ ဧဝံနာမိကာ ထေရီ။ ဈာနဇ္ဈာယနရတာယောတိ လောကိယလောကုတ္တရဿ ဈာနဿ ဈာယနေ အဘိရတာ။ ဗဟုဿုတာယောတိ ပရိယတ္တိဗာဟုသစ္စေန ဗဟုဿုတာ။ ဓုတကိလေသာယောတိ အဂ္ဂမဂ္ဂေန သဗ္ဗသော သမုဂ္ဃာတိတကိလေသာ။ ဘတ္တတ္ထံ ကရိယာတိ ဘတ္တကိစ္စံ နိဋ္ဌာပေတွာ။ ရဟိတမှီတိ ဇနရဟိတမှိ ဝိဝိတ္တဋ္ဌာနေ။ သုခနိသိန္နာတိ ပဗ္ဗဇ္ဇာသုခေန ဝိဝေကသုခေန စ သုခနိသိန္နာ။ ဣမာ ဂိရာတိ ဣဒါနိ ဝုစ္စမာနာ သုခါ လာပနာ။ အဗ္ဘုဒီရေသုန္တိ ပုစ္ဆာဝိဿဇ္ဇနဝသေန ကထယိံသု။

‘‘ပါသာဒိကာသီ’’တိ ဂါထာ ဗောဓိတ္ထေရိယာ ပုစ္ဆာဝသေန ဝုတ္တာ။ ‘‘ဧဝမနုယုဉ္ဇိယမာနာ’’တိ ဂါထာ သင်္ဂီတိကာရေဟေဝ ဝုတ္တာ။ ‘‘ဥဇ္ဇေနိယာ’’တိအာဒိကာ ဟိ သဗ္ဗာပိ ဣသိဒါသိယာဝ ဝုတ္တာ။ တတ္ထ ပါသာဒိကာသီတိ ရူပသမ္ပတ္တိယာ ပဿန္တာနံ ပသာဒါဝဟာ အသိ။ ဝယောပိ တေ အပရိဟီနောတိ တုယှံ ဝယောပိ န ပရိဟီနော၊ ပဌမဝယေ ဌိတာသီတိ အတ္ထော။ ကိံ ဒိသွာန ဗျာလိကန္တိ ကီဒိသံ ဗျာလိကံ ဒေါသံ ဃရာဝါသေ အာဒီနဝံ ဒိသွာ။ အထာသိ နေက္ခမ္မမနုယုတ္တာတိ အထာတိ နိပါတမတ္တံ၊ နေက္ခမ္မံ ပဗ္ဗဇ္ဇံ အနုယုတ္တာ အသိ။

အနုယုဉ္ဇိယမာနာတိ ပုစ္ဆိယမာနာ၊ သာ ဣသိဒါသီတိ ယောဇနာ။ ရဟိတေတိ သုညဋ္ဌာနေ။ သုဏ ဗောဓိ ယထာမှိ ပဗ္ဗဇိတာတိ ဗောဓိတ္ထေရိ အဟံ ယထာ ပဗ္ဗဇိတာ အမှိ၊ တံ တံ ပုရာဏံ သုဏ သုဏာဟိ။

ဥဇ္ဇေနိယာ ပုရဝရေတိ ဥဇ္ဇေနီနာမကေ အဝန္တိရဋ္ဌေ ဥတ္တမနဂရေ။ ပိယာတိ ဧကဓီတုဘာဝေန ပိယာယိတဗ္ဗာ။ မနာပါတိ သီလာစာရဂုဏေန မနဝဍ္ဎနကာ။ ဒယိတာတိ အနုကမ္ပိတဗ္ဗာ။

အထာတိ ပစ္ဆာ မမ ဝယပ္ပတ္တကာလေ။ မေ သာကေတတော ဝရကာတိ သာကေတနဂရတော မမ ဝရကာ မံ ဝါရေန္တာ အာဂစ္ဆုံ။ ဥတ္တမကုလီနာတိ တသ္မိံ နဂရေ အဂ္ဂကုလိကာ၊ ယေန တေ ပေသိတာ၊ သော သေဋ္ဌိ ပဟူတရတနော။ တဿ မမံ သုဏှမဒါသိ တာတောတိ တဿ သာကေတသေဋ္ဌိနော သုဏိသံ ပုတ္တဿ ဘရိယံ ကတွာ မယှံ ပိတာ မံ အဒါသိ။

သာယံ ပါတန္တိ သာယနှေ ပုဗ္ဗဏှေ စ။ ပဏာမမုပဂမ္မ သိရသာ ကရောမီတိ သဿုယာ သသုရဿ စ သန္တိကံ ဥပဂန္တွာ သိရသာ ပဏာမံ ကရောမိ၊ တေသံ ပါဒေ ဝန္ဒာမိ။ ယထာမှိ အနုသိဋ္ဌာတိ တေဟိ ယထာ အနုသိဋ္ဌာ အမှိ၊ တထာ ကရောမိ၊ တေသံ အနုသိဋ္ဌိံ န အတိက္ကမာမိ။

တမေကဝရကမ္ပီတိ ဧကဝလ္လဘမ္ပိ။ ဥဗ္ဗိဂ္ဂါတိ တသန္တာ။ အာသနံ ဒေမီတိ ယဿ ပုဂ္ဂလဿ ယံ အနုစ္ဆဝိကံ၊ တံ တဿ ဒေမိ။

တတ္ထာတိ ပရိဝေသနဋ္ဌာနေ။ သန္နိဟိတန္တိ သဇ္ဇိတံ ဟုတွာ ဝိဇ္ဇမာနံ။ ဆာဒေမီတိ ဥပစ္ဆာဒေမိ၊ ဥပစ္ဆာဒေတွာ ဥပနယာမိ စ၊ ဥပနေတွာ ဒေမိ၊ ဒေန္တီပိ ယံ ယဿ ပတိရူပံ၊ တဒေဝ ဒေမီတိ အတ္ထော။

ဥမ္မာရေတိ ဒွါရေ။ ဓောဝန္တီ ဟတ္ထပါဒေတိ ဟတ္ထပါဒေ ဓောဝိနီ အာသိံ၊ ဓောဝိတွာ ဃရံ သမုပဂမာမီတိ ယောဇနာ။

ကောစ္ဆန္တိ မဿူနံ ကေသာနဉ္စ ဥလ္လိခနကောစ္ဆံ။ ပသာဒန္တိ ဂန္ဓစုဏ္ဏာဒိမုခဝိလေပနံ။ ‘‘ပသာဓန’’န္တိပိ ပါဌော၊ ပသာဓနဘဏ္ဍံ။ အဉ္ဇနိန္တိ အဉ္ဇနနာဠိံ။ ပရိကမ္မကာရိကာ ဝိယာတိ အဂ္ဂကုလိကာ ဝိဘဝသမ္ပန္နာပိ ပတိပရိစာရိကာ စေဋိကာ ဝိယ။

သာဓယာမီတိ ပစာမိ။ ဘာဇနန္တိ လောဟဘာဇနဉ္စ။ ဓောဝန္တီ ပရိစရာမီတိ ယောဇနာ။

ဘတ္တိကတန္တိ ကတသာမိဘတိကံ။ အနုရတ္တန္တိ အနုရတ္တဝန္တိံ။ ကာရိကန္တိ တဿ တဿေဝ ဣတိ ကတ္တဗ္ဗဿ ကာရိကံ။ နိဟတမာနန္တိ အပနီတမာနံ။ ဥဋ္ဌာယိကန္တိ ဥဋ္ဌာနဝီရိယသမ္ပန္နံ။ အနလသန္တိ တတော ဧဝ အကုသီတံ။ သီလဝတိန္တိ သီလာစာရသမ္ပန္နံ။ ဒုဿတေတိ ဒုဿတိ၊ ကုဇ္ဈိတွာ ဘဏတိ။

ဘဏတိ အာပုစ္ဆဟံ ဂမိဿာမီတိ ‘‘အဟံ တုမှေ အာပုစ္ဆိတွာ ယတ္ထ ကတ္ထစိ ဂမိဿာမီ’’တိ သော မမ သာမိကော အတ္တနော မာတရဉ္စ ပိတရဉ္စ ဘဏတိ။ ကိံ ဘဏတီတိ စေ အာဟ – ‘‘ဣသိဒါသိယာ န သဟ ဝစ္ဆံ၊ ဧကာဂါရေဟံ သဟ ဝတ္ထု’’န္တိ။ တတ္ထ ဝစ္ဆန္တိ ဝသိဿံ။

ဒေဿာတိ အပ္ပိယာ။ အလံ မေတိ ပယောဇနံ မေ တာယ ဣတ္ထီတိ အတ္ထော ။ အပုစ္ဆာဟံ ဂမိဿာမီတိ ယဒိ မေ တုမှေ တာယ သဒ္ဓိံ သံဝါသံ ဣစ္ဆထ၊ အဟံ တုမှေ အပုစ္ဆိတွာ ဝိဒေသံ ပက္ကမိဿာမိ။

တဿာတိ မမ ဘတ္တုနော။ ကိဿာတိ ကိံ အဿ တဝ သာမိကဿ။ တယာ အပရဒ္ဓံ ဗျာလိကံ ကတံ။

နပိဟံ အပရဇ္ဈန္တိ နပိ အဟံ တဿ ကိဉ္စိ အပရဇ္ဈိံ။ အယမေဝ ဝါ ပါဌော။ နပိ ဟိံသေမီတိ နပိ ဗာဓေမိ။ ဒုဗ္ဗစနန္တိ ဒုရုတ္တဝစနံ။ ကိံ သက္ကာ ကာတုယျေတိ ကိံ မယာ ကာတုံ အယျေ သက္ကာ။ ယံ မံ ဝိဒ္ဒေဿတေ ဘတ္တာတိ ယသ္မာ အကာရဏေနေဝ ဘတ္တာ မယှံ ဝိဒ္ဒေဿတေ ဝိဒ္ဒေဿံ စိတ္တပ္ပကောပံ ကရောတိ။

ဝိမနာတိ ဒေါမနဿိကာ။ ပုတ္တမနုရက္ခမာနာတိ အတ္တနော ပုတ္တံ မယှံ သာမိကံ စိတ္တမနုရက္ခဏေန အနုရက္ခန္တာ။ ဇိတာမှသေ ရူပိနိံ လက္ခိန္တိ ဇိတာ အမှသေ ဇိတာ ဝတာမှ ရူပဝတိံ သိရိံ၊ မနုဿဝေသေန စရန္တိယာ သိရိဒေဝတာယ ပရိဟီနာ ဝတာတိ အတ္ထော။

အဍ္ဎဿ ဃရမှိ ဒုတိယကုလိကဿာတိ ပဌမသာမိကံ ဥပါဒါယ ဒုတိယဿ အဍ္ဎဿ ကုလပုတ္တဿ ဃရမှိ မံ အဒါသိ၊ ဒေန္တော စ တတော ပဌမသုင်္ကတော ဥပဍ္ဎသုင်္ကေန အဒါသိ။ ယေန မံ ဝိန္ဒထ သေဋ္ဌီတိ ယေန သုင်္ကေန မံ ပဌမံ သေဋ္ဌိ ဝိန္ဒထ ပဋိလဘိ၊ တတော ဥပဍ္ဎသုင်္ကေနာတိ ယောဇနာ။

သောပီတိ ဒုတိယသာမိကောပိ။ မံ ပဋိစ္ဆရယီတိ မံ နီဟရိ၊ သော မံ ဂေဟတော နိက္ကဍ္ဎိ။ ဥပဋ္ဌဟန္တိန္တိ ဒါသီ ဝိယ ဥပဋ္ဌဟန္တိံ ဥပဋ္ဌာနံ ကရောန္တိံ။ အဒူသိကန္တိ အဒုဗ္ဘနကံ။

ဒမကန္တိ ကာရုညာဓိဋ္ဌာနတာယ ပရေသံ စိတ္တဿ ဒမကံ။ ယထာ ပရေ ကိဉ္စိ ဒဿန္တိ၊ ဧဝံ အတ္တနော ကာယံ ဝါစဉ္စ ဒန္တံ ဝူပသန္တံ ကတွာ ပရဒတ္တဘိက္ခာယ ဝိစရဏကံ။ ဇာမာတာတိ ဒုဟိတုပတိ။ နိက္ခိပ ပေါဋ္ဌိဉ္စ ဃဋိကဉ္စာတိ တယာ ပရိဒဟိတံ ပိလောတိကာခဏ္ဍဉ္စ ဘိက္ခာကပါလဉ္စ ဆဍ္ဍေဟိ။

သောပိ ဝသိတွာ ပက္ခန္တိ သောပိ ဘိက္ခကော ပုရိသော မယာ သဒ္ဓိံ အဒ္ဓမာသမတ္တံ ဝသိတွာ ပက္ကာမိ။

အထ နံ ဘဏတီ တာတောတိ တံ ဘိက္ခကံ မမ ပိတာ မာတာ သဗ္ဗော စ မေ ဉာတိဂဏော ဝဂ္ဂဝဂ္ဂေါ ဟုတွာ ဘဏတိ။ ကထံ? ကိံ တေ န ကီရတိ ဣဓ တုယှံ ကိံ နာမ န ကိရတိ န သာဓိယတိ၊ ဘဏ ခိပ္ပံ။ တံ တေ ကရိဟိတီတိ တံ တုယှံ ကရိဿတိ။

ယဒိ မေ အတ္တာ သက္ကောတီတိ ယဒိ မယှံ အတ္တာ အတ္တာဓီနော ဘုဇိဿော စ ဟောတိ၊ အလံ မယှံ ဣသိဒါသိယာ တာယ ပယောဇနံ နတ္ထိ၊ တသ္မာ န သဟ ဝစ္ဆံ န သဟ ဝသိဿံ၊ ဧကဃရေ အဟံ တာယ သဟ ဝတ္ထုန္တိ ယောဇနာ။

ဝိဿဇ္ဇိတော ဂတော သောတိ သော ဘိက္ခကော ပိတရာ ဝိဿဇ္ဇိတော ယထာရုစိ ဂတော။ ဧကာကိနီတိ ဧကိကာဝ။ အာပုစ္ဆိတူန ဂစ္ဆန္တိ မယှံ ပိတရံ ဝိဿဇ္ဇေတွာ ဂစ္ဆာမိ။ မရိတုယေတိ မရိတုံ။ ဝါတိ ဝိကပ္ပတ္ထေ နိပါတော။

ဂေါစရာယာတိ ဘိက္ခာယ၊ တာတ-ကုလံ အာဂစ္ဆီတိ ယောဇနာ။

တန္တိ တံ ဇိနဒတ္တတ္ထေရိံ။ ဥဋ္ဌာယာသနံ တဿာ ပညာပယိန္တိ ဥဋ္ဌဟိတွာ အာသနံ တဿာ ထေရိယာ ပညာပေသိံ။

ဣဓေဝါတိ ဣမသ္မိံ ဧဝ ဂေဟေ ဌိတာ။ ပုတ္တကာတိ သာမညဝေါဟာရေန ဓီတရံ အနုကမ္ပေန္တော အာလပတိ။ စရာဟိ တွံ ဓမ္မန္တိ တွံ ပဗ္ဗဇိတွာ စရိတဗ္ဗံ ဗြဟ္မစရိယာဒိဓမ္မံ စရ။ ဒွိဇာတီတိ ဗြာဟ္မဏဇာတီ။

နိဇ္ဇရေဿာမီတိ ဇီရာပေဿာမိ ဝိနာသေဿာမိ။

ဗောဓိန္တိ သစ္စာဘိသမ္ဗောဓိံ၊ မဂ္ဂဉာဏန္တိ အတ္ထော။ အဂ္ဂဓမ္မန္တိ ဖလဓမ္မံ၊ အရဟတ္တံ။ ယံ သစ္ဆိကရီဒွိပဒသေဋ္ဌောတိ ယံ မဂ္ဂဖလနိဗ္ဗာနသညိတံ လောကုတ္တရဓမ္မံ ဒွိပဒါနံ သေဋ္ဌော သမ္မာသမ္ဗုဒ္ဓါ သစ္ဆိ အကာသိ၊ တံ လဘဿူတိ ယောဇနာ။

သတ္တာဟံ ပဗ္ဗဇိတာတိ ပဗ္ဗဇိတာ ဟုတွာ သတ္တာဟေန။ အဖဿယိန္တိ ဖုသိံ သစ္ဆာကာသိံ။

ယဿယံ ဖလဝိပါကောတိ ယဿ ပါပကမ္မဿ၊ အယံ သာမိကဿ အမနာပဘာဝသင်္ခါတော နိဿန္ဒဖလဘူတော ဝိပါကော။ တံ တဝ အာစိက္ခိဿန္တိ တံ ကမ္မံ တဝ ကထေဿာမိ။ တန္တိ အာစိက္ခိယမာနံ တမေဝ ကမ္မံ၊ တံ ဝါ မမ ဝစနံ။ ဧကမနာတိ ဧကဂ္ဂမနာ။ အယမေဝ ဝါ ပါဌော။

နဂရမှိ ဧရကစ္ဆေတိ ဧဝံနာမကေ နဂရေ။ သော ပရဒါရံ အသေဝိဟန္တိ သော အဟံ ပရဿ ဒါရံ အသေဝိံ။

စိရံ ပက္ကောတိ ဗဟူနိ ဝဿသတသဟဿာနိ နိရယဂ္ဂိနာ ဒဍ္ဎော။ တတော စ ဥဋ္ဌဟိတွာတိ တတော နိရယတော ဝုဋ္ဌိတော စုတော။ မက္ကဋိယာ ကုစ္ဆိမောက္ကမိန္တိ ဝါနရိယာ ကုစ္ဆိမှိ ပဋိသန္ဓိံ ဂဏှိံ။

ယူထပေါတိ ယူထပတိ။ နိလ္လစ္ဆေသီတိ ပုရိသဘာဝဿ လက္ခဏဘူတာနိ ဗီဇကာနိ နိလ္လစ္ဆေသိ နီဟရိ။ တဿေတံ ကမ္မဖလန္တိ တဿ မယှံ ဧတံ အတီတေ ကတဿ ကမ္မဿ ဖလံ။ ယထာပိ ဂန္တွာန ပရဒါရန္တိ ယထာ တံ ပရဒါရံ အတိက္ကမိတွာ။

တတောတိ မက္ကဋယောနိတော။ သိန္ဓဝါရညေတိ သိန္ဓဝရဋ္ဌေ အရညဋ္ဌာနေ။ ဧဠကိယာတိ အဇိယာ။

ဒါရကေ ပရိဝဟိတွာတိ ပိဋ္ဌိံ အာရုယှ ကုမာရကေ ဝဟိတွာ။ ကိမိနာဝဋ္ဋောတိ အဘိဇာတဋ္ဌာနေ ကိမိပရိဂတောဝ ဟုတွာ အဋ္ဋော အဋ္ဋိတော။ အကလ္လောတိ ဂိလာနော၊ အဟောသီတိ ဝစနသေသော။

ဂေါဝါဏိဇကဿာတိ ဂါဝိယော ဝိက္ကိဏိတွာ ဇီဝကဿ။ လာခါတမ္ဗောတိ လာခါရသရတ္တေဟိ ဝိယ တမ္ဗေဟိ လောမေဟိ သမန္နာဂတော။

ဝေါဎူနာတိ ဝဟိတွာ။ နင်္ဂလန္တိ သီရံ၊ သကဋဉ္စ ဓာရယာမီတိ အတ္ထော ။ အန္ဓောဝဋ္ဋောတိ ကာဏောဝ ဟုတွာ အဋ္ဋော ပီဠိတော။

ဝီထိယာတိ နဂရဝီထိယံ။ ဒါသိယာ ဃရေ ဇာတောတိ ဃရဒါသိယာ ကုစ္ဆိမှိ ဇာတော။ ‘‘ဝဏ္ဏဒါသိယာ’’တိပိ ဝဒန္တိ။ နေဝ မဟိလာ န ပုရိသောတိ ဣတ္ထီပိ ပုရိသောပိ န ဟောမိ၊ ဇာတိနပုံသကောတိ အတ္ထော။

တိံသတိဝဿမှိမတောတိ နပုံသကော ဟုတွာ တိံသဝဿကာလေ မတော။ သာကဋိကကုလမှီတိ သူတကကုလေ။ ဓနိကပုရိသပါတဗဟုလမှီတိ ဣဏာယိကာနံ ပုရိသာနံ အဓိပတနဗဟုလေ ဗဟူဟိ ဣဏာယိကေဟိ အဘိဘဝိတဗ္ဗေ။

ဥဿန္နာယာတိ ဥပစိတာယ။ ဝိပုလာယာတိ မဟတိယာ။ ဝဍ္ဎိယာတိ ဣဏဝဍ္ဎိယာ။ ဩကဍ္ဎတီတိ အဝကဍ္ဎတိ။ ကုလဃရသ္မာတိ မမ ဇာတကုလဂေဟတော။

ဩရုန္ဓတဿ ပုတ္တောတိ အဿ သတ္ထဝါဟဿ ပုတ္တော၊ မယိ ပဋိဗဒ္ဓစိတ္တော နာမေန ဂိရိဒါသော နာမ အဝရုန္ဓတိ အတ္တနော ပရိဂ္ဂဟဘာဝေန ဂေဟေ ကရောတိ။

အနုရတ္တာ ဘတ္တာရန္တိ ဘတ္တာရံ အနုဝတ္တိကာ။ တဿာဟံ ဝိဒ္ဒေသနမကာသိန္တိ တဿ ဘတ္တုနော တံ ဘရိယံ သပတ္တိံ ဝိဒ္ဒေသနကမ္မံ အကာသိံ။ ယထာ တံ သော ကုဇ္ဈတိ၊ ဧဝံ ပဋိပဇ္ဇိံ။

ယံမံ အပကီရိတူန ဂစ္ဆန္တီတိ ယံ ဒါသီ ဝိယ သက္ကစ္စံ ဥပဋ္ဌဟန္တိံ မံ တတ္ထ တတ္ထ ပတိနော အပကိရိတွာ ဆဍ္ဍေတွာ အနပေက္ခာ အပဂစ္ဆန္တိ။ ဧတံ တဿာ မယှံ တဒါ ကတဿ ပရဒါရိကကမ္မဿ သပတ္တိံ ဝိဒ္ဒေသနကမ္မဿ စ နိဿန္ဒဖလံ။ တဿပိ အန္တော ကတော မယာတိ တဿပိ တထာ အနုနယပါပကကမ္မဿ ဒါရုဏဿ ပရိယန္တော ဣဒါနိ မယာ အဂ္ဂမဂ္ဂံ အဓိဂစ္ဆန္တိယာ ကတော၊ ဣတော ပရံ ကိဉ္စိ ဒုက္ခံ နတ္ထီတိ။ ယံ ပနေတ္ထ အန္တရန္တရာ န ဝိဘတ္တံ၊ တံ ဝုတ္တနယတ္တာ ဥတ္တာနတ္ထမေဝ။

ဣသိဒါသီထေရီဂါထာဝဏ္ဏနာ နိဋ္ဌိတာ။

စတ္တာလီသနိပါတဝဏ္ဏနာ နိဋ္ဌိတာ။