📜

၄။ စတုက္ကနိပါတော

၁။ ဘဒ္ဒါကာပိလာနီထေရီဂါထာဝဏ္ဏနာ

စတုက္ကနိပါတေ ပုတ္တော ဗုဒ္ဓဿ ဒါယာဒေါတိအာဒိကာ ဘဒ္ဒါယ ကာပိလာနိယာ ထေရိယာ ဂါထာ။ သာ ကိရ ပဒုမုတ္တရဿ ဘဂဝတော ကာလေ ဟံသဝတီနဂရေ ကုလဂေဟေ နိဗ္ဗတ္တိတွာ ဝိညုတံ ပတွာ သတ္ထု သန္တိကေ ဓမ္မံ သုဏန္တီ သတ္ထာရံ ဧကံ ဘိက္ခုနိံ ပုဗ္ဗေနိဝါသံ အနုဿရန္တီနံ အဂ္ဂဋ္ဌာနေ ဌပေန္တံ ဒိသွာ အဓိကာရကမ္မံ ကတွာ သယမ္ပိ တံ ဌာနန္တရံ ပတ္ထေတွာ ယာဝဇီဝံ ပုညာနိ ကတွာ တတော စုတာ ဒေဝမနုဿေသု သံသရန္တီ အနုပ္ပန္နေ ဗုဒ္ဓေ ဗာရာဏသိယံ ကုလဂေဟေ နိဗ္ဗတ္တိတွာ ပတိကုလံ ဂန္တွာ၊ ဧကဒိဝသံ အတ္တနော နနန္ဒာယ သဒ္ဓိံ ကလဟံ ကရောန္တီ တာယ ပစ္စေကဗုဒ္ဓဿ ပိဏ္ဍပါတေ ဒိန္နေ ‘‘အယံ ဣမဿ ဒါနံ ဒတွာ ဥဠာရသမ္ပတ္တိံ လဘိဿတီ’’တိ ပစ္စေကဗုဒ္ဓဿ ဟတ္ထတော ပတ္တံ ဂဟေတွာ ဘတ္တံ ဆဍ္ဍေတွာ ကလလဿ ပူရေတွာ အဒါသိ။ မဟာဇနော ဂရဟိ – ‘‘ဗာလေ၊ ပစ္စေကဗုဒ္ဓါ တေ ကိံ အပရဇ္ဈီ’’တိ? သာ တေသံ ဝစနေန လဇ္ဇမာနာ ပုန ပတ္တံ ဂဟေတွာ ကလလံ နီဟရိတွာ ဓောဝိတွာ ဂန္ဓစုဏ္ဏေန ဥဗ္ဗဋ္ဋေတွာ စတုမဓုရဿ ပူရေတွာ ဥပရိ အာသိတ္တေန ပဒုမဂဗ္ဘဝဏ္ဏေန သပ္ပိနာ ဝိဇ္ဇောတမာနံ ပစ္စေကဗုဒ္ဓဿ ဟတ္ထေ ဌပေတွာ ‘‘ယထာ အယံ ပိဏ္ဍပါတော ဩဘာသဇာတော၊ ဧဝံ ဩဘာသဇာတံ မေ သရီရံ ဟောတူ’’တိ ပတ္ထနံ ပဋ္ဌပေသိ။ သာ တတော စဝိတွာ သုဂတီသုယေဝ သံသရန္တီ ကဿပဗုဒ္ဓကာလေ ဗာရာဏသိယံ မဟာဝိဘဝဿ သေဋ္ဌိနော ဓီတာ ဟုတွာ နိဗ္ဗတ္တိ။ ပုဗ္ဗကမ္မဖလေန ဒုဂ္ဂန္ဓသရီရာ မနုဿေဟိ ဇိဂုစ္ဆိတဗ္ဗာ ဟုတွာ သံဝေဂဇာတာ အတ္တနော အာဘရဏေဟိ သုဝဏ္ဏိဋ္ဌကံ ကာရေတွာ ဘဂဝတော စေတိယေ ပတိဋ္ဌပေသိ၊ ဥပ္ပလဟတ္ထေန စ ပူဇံ အကာသိ။ တေနဿာ သရီရံ တသ္မိံယေဝ ဘဝေ သုဂန္ဓံ မနောဟရံ ဇာတံ။ သာ ပတိနော ပိယာ မနာပါ ဟုတွာ ယာဝဇီဝံ ကုသလံ ကတွာ တတော စုတာ သဂ္ဂေ နိဗ္ဗတ္တိ။ တတ္ထာပိ ယာဝဇီဝံ ဒိဗ္ဗသုခံ အနုဘဝိတွာ၊ တတော စုတာ ဗာရာဏသိရညော ဓီတာ ဟုတွာ တတ္ထ ဒေဝသမ္ပတ္တိသဒိသံ သမ္ပတ္တိံ အနုဘဝန္တီ စိရကာလံ ပစ္စေကဗုဒ္ဓေ ဥပဋ္ဌဟိတွာ၊ တေသု ပရိနိဗ္ဗုတေသု သံဝေဂဇာတာ တာပသပဗ္ဗဇ္ဇာယ ပဗ္ဗဇိတွာ ဥယျာနေ ဝသန္တီ ဈာနာနိ ဘာဝေတွာ ဗြဟ္မလောကေ နိဗ္ဗတ္တိတွာ တတော စုတာ သာဂလနဂရေ ကောသိယဂေါတ္တဿ ဗြာဟ္မဏကုလဿ ဂေဟေ နိဗ္ဗတ္တိတွာ မဟတာ ပရိဟာရေန ဝဍ္ဎိတွာ ဝယပ္ပတ္တာ မဟာတိတ္ထဂါမေ ပိပ္ဖလိကုမာရဿ ဂေဟံ နီတာ။ တသ္မိံ ပဗ္ဗဇိတုံ နိက္ခန္တေ မဟန္တံ ဘောဂက္ခန္ဓံ မဟန္တဉ္စ ဉာတိပရိဝဋ္ဋံ ပဟာယ ပဗ္ဗဇ္ဇတ္ထာယ နိက္ခမိတွာ ပဉ္စ ဝဿာနိ တိတ္ထိယာရာမေ ပဝိသိတွာ အပရဘာဂေ မဟာပဇာပတိဂေါတမိယာ သန္တိကေ ပဗ္ဗဇ္ဇံ ဥပသမ္ပဒဉ္စ လဘိတွာ ဝိပဿနံ ပဋ္ဌပေတွာ န စိရဿေဝ အရဟတ္တံ ပါပုဏိ။ တေန ဝုတ္တံ အပဒါနေ (အပ။ ထေရီ ၂။၃။၂၄၄-၃၁၃) –

‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ၊

ဣတော သတသဟဿမှိ၊ ကပ္ပေ ဥပ္ပဇ္ဇိ နာယကော။

‘‘တဒါဟု ဟံသဝတိယံ၊ ဝိဒေဟော နာမ နာမတော၊

သေဋ္ဌီ ပဟူတရတနော၊ တဿ ဇာယာ အဟောသဟံ။

‘‘ကဒါစိ သော နရာဒိစ္စံ၊ ဥပေစ္စ သပရိဇ္ဇနော၊

ဓမ္မမဿောသိ ဗုဒ္ဓဿ၊ သဗ္ဗဒုက္ခဘယပ္ပဟံ။

‘‘သာဝကံ ဓုတဝါဒါနံ၊ အဂ္ဂံ ကိတ္တေသိ နာယကော၊

သုတွာ သတ္တာဟိကံ ဒါနံ၊ ဒတွာ ဗုဒ္ဓဿ တာဒိနော။

‘‘နိပစ္စ သိရသာ ပါဒေ၊ တံ ဌာနမဘိပတ္ထယိံ၊

သ ဟာသယန္တော ပရိသံ၊ တဒါ ဟိ နရပုင်္ဂဝေါ။

‘‘သေဋ္ဌိနော အနုကမ္ပာယ၊ ဣမာ ဂါထာ အဘာသထ၊

လစ္ဆသေ ပတ္ထိတံ ဌာနံ၊ နိဗ္ဗုတော ဟောဟိ ပုတ္တက။

‘‘သတသဟဿိတော ကပ္ပေ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။

‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊

ကဿပေါ နာမ ဂေါတ္တေန၊ ဟေဿတိ သတ္ထု သာဝကော။

‘‘တံ သုတွာ မုဒိတော ဟုတွာ၊ ယာဝဇီဝံ တဒါ ဇိနံ၊

မေတ္တစိတ္တော ပရိစရိ၊ ပစ္စယေဟိ ဝိနာယကံ။

‘‘သာသနံ ဇောတယိတွာန၊ သော မဒ္ဒိတွာ ကုတိတ္ထိယေ၊

ဝေနေယျံ ဝိနယိတွာ စ၊ နိဗ္ဗုတော သော သသာဝကော။

‘‘နိဗ္ဗုတေ တမှိ လောကဂ္ဂေ၊ ပူဇနတ္ထာယ သတ္ထုနော၊

ဉာတိမိတ္တေ သမာနေတွာ၊ သဟ တေဟိ အကာရယိ။

‘‘သတ္တယောဇနိကံ ထူပံ၊ ဥဗ္ဗိဒ္ဓံ ရတနာမယံ၊

ဇလန္တံ သတရံသိံဝ၊ သာလရာဇံဝ ဖုလ္လိတံ။

‘‘သတ္တသတသဟဿာနိ၊ ပါတိယော တတ္ထ ကာရယိ၊

နဠဂ္ဂီ ဝိယ ဇောတန္တီ၊ ရတနေဟေဝ သတ္တဟိ။

‘‘ဂန္ဓတေလေန ပူရေတွာ၊ ဒီပါနုဇ္ဇလယီ တဟိံ၊

ပူဇနတ္ထာယ မဟေသိဿ၊ သဗ္ဗဘူတာနုကမ္ပိနော။

‘‘သတ္တသတသဟဿာနိ၊ ပုဏ္ဏကုမ္ဘာနိ ကာရယိ၊

ရတနေဟေဝ ပုဏ္ဏာနိ၊ ပူဇနတ္ထာယ မဟေသိနော။

‘‘မဇ္ဈေ အဋ္ဌဋ္ဌကုမ္ဘီနံ၊ ဥဿိတာ ကဉ္စနဂ္ဃိယော၊

အတိရောစန္တိ ဝဏ္ဏေန၊ သရဒေဝ ဒိဝါကရော။

‘‘စတုဒွါရေသု သောဘန္တိ၊ တောရဏာ ရတနာမယာ၊

ဥဿိတာ ဖလကာ ရမ္မာ၊ သောဘန္တိ ရတနာမယာ။

‘‘ဝိရောစန္တိ ပရိက္ခိတ္တာ၊ အဝဋံသာ သုနိမ္မိတာ၊

ဥဿိတာနိ ပဋာကာနိ၊ ရတနာနိ ဝိရောစရေ။

‘‘သုရတ္တံ သုကတံ စိတ္တံ၊ စေတိယံ ရတနာမယံ၊

အတိရောစတိ ဝဏ္ဏေန၊ သသဉ္ဈောဝ ဒိဝါကရော။

‘‘ထူပဿ ဝေဒိယော တိဿော၊ ဟရိတာလေန ပူရယိ၊

ဧကံ မနောသိလာယေကံ၊ အဉ္ဇနေန စ ဧကိကံ။

‘‘ပူဇံ ဧတာဒိသံ ရမ္မံ၊ ကာရေတွာ ဝရဝါဒိနော၊

အဒါသိ ဒါနံ သင်္ဃဿ၊ ယာဝဇီဝံ ယထာဗလံ။

‘‘သဟာဝ သေဋ္ဌိနာ တေန၊ တာနိ ပုညာနိ သဗ္ဗသော၊

ယာဝဇီဝံ ကရိတွာန၊ သဟာဝ သုဂတိံ ဂတာ။

‘‘သမ္ပတ္တိယောနုဘောတွာန၊ ဒေဝတ္တေ အထ မာနုသေ၊

ဆာယာ ဝိယ သရီရေန၊ သဟ တေနေဝ သံသရိံ။

‘‘ဧကနဝုတိတော ကပ္ပေ၊ ဝိပဿီ နာမ နာယကော၊

ဥပ္ပဇ္ဇိ စာရုဒဿနော၊ သဗ္ဗဓမ္မဝိပဿကော။

‘‘တဒါယံ ဗန္ဓုပတိယံ၊ ဗြာဟ္မဏော သာဓုသမ္မတော၊

အဍ္ဎော သန္တော ဂုဏေနာပိ၊ ဓနေန စ သုဒုဂ္ဂတော။

‘‘တဒါပိ တဿာဟံ အာသိံ၊ ဗြာဟ္မဏီ သမစေတသာ၊

ကဒါစိ သော ဒိဇဝရော၊ သင်္ဂမေသိ မဟာမုနိံ။

‘‘နိသိန္နံ ဇနကာယမှိ၊ ဒေသေန္တံ အမတံ ပဒံ၊

သုတွာ ဓမ္မံ ပမုဒိတော၊ အဒါသိ ဧကသာဋကံ။

‘‘ဃရမေကေန ဝတ္ထေန၊ ဂန္တွာနေတံ သ မဗြဝိ၊

အနုမောဒ မဟာပုညံ၊ ဒိန္နံ ဗုဒ္ဓဿ သာဋကံ။

‘‘တဒါဟံ အဉ္ဇလိံ ကတွာ၊ အနုမောဒိံ သုပီဏိတာ၊

သုဒိန္နော သာဋကော သာမိ၊ ဗုဒ္ဓသေဋ္ဌဿ တာဒိနော။

‘‘သုခိတော သဇ္ဇိတော ဟုတွာ၊ သံသရန္တော ဘဝါဘဝေ၊

ဗာရာဏသိပုရေ ရမ္မေ၊ ရာဇာ အာသိ မဟီပတိ။

‘‘တဒါ တဿ မဟေသီဟံ၊ ဣတ္ထိဂုမ္ဗဿ ဥတ္တမာ၊

တဿာတိ ဒယိတာ အာသိံ၊ ပုဗ္ဗသ္နေဟေန ဘတ္တုနော။

‘‘ပိဏ္ဍာယ ဝိစရန္တေ တေ၊ အဋ္ဌ ပစ္စေကနာယကေ၊

ဒိသွာ ပမုဒိတော ဟုတွာ၊ ဒတွာ ပိဏ္ဍံ မဟာရဟံ။

‘‘ပုနော နိမန္တယိတွာန၊ ကတွာ ရတနမဏ္ဍပံ၊

ကမ္မာရေဟိ ကတံ ပတ္တံ၊ သောဝဏ္ဏံ ဝတ တတ္တကံ။

‘‘သမာနေတွာန တေ သဗ္ဗေ၊ တေသံ ဒါနမဒါသိ သော၊

သောဏ္ဏာသနေ ပဝိဋ္ဌာနံ၊ ပသန္နော သေဟိ ပါဏိဘိ။

‘‘တမ္ပိ ဒါနံ သဟာဒါသိံ၊ ကာသိရာဇေနဟံ တဒါ၊

ပုနာဟံ ဗာရာဏသိယံ၊ ဇာတာ ကာသိကဂါမကေ။

‘‘ကုဋုမ္ဗိကကုလေ ဖီတေ၊ သုခိတော သော သဘာတုကော၊

ဇေဋ္ဌဿ ဘာတုနော ဇာယာ၊ အဟောသိံ သုပတိဗ္ဗတာ။

‘‘ပစ္စေကဗုဒ္ဓံ ဒိသွာန၊ ကနိယဿ မမ ဘတ္တုနော၊

ဘာဂန္နံ တဿ ဒတွာန၊ အာဂတေ တမှိ ပါဝဒိံ။

‘‘နာဘိနန္ဒိတ္ထ သော ဒါနံ၊ တတော တဿ အဒါသဟံ၊

ဥခါ အာနိယ တံ အန္နံ၊ ပုနော တဿေဝ သော အဒါ။

‘‘တဒန္နံ ဆဍ္ဍယိတွာန၊ ဒုဋ္ဌာ ဗုဒ္ဓဿဟံ တဒါ၊

ပတ္တံ ကလလပုဏ္ဏံ တံ၊ အဒါသိံ တဿ တာဒိနော။

‘‘ဒါနေ စ ဂဟဏေ စေဝ၊ အပစေ ပဒုသေပိ စ၊

သမစိတ္တမုခံ ဒိသွာ၊ တဒါဟံ သံဝိဇိံ ဘုသံ။

‘‘ပုနော ပတ္တံ ဂဟေတွာန၊ သောဓယိတွာ သုဂန္ဓိနာ၊

ပသန္နစိတ္တာ ပူရေတွာ၊ သဃတံ သက္ကရံ အဒံ။

‘‘ယတ္ထ ယတ္ထူပပဇ္ဇာမိ၊ သုရူပါ ဟောမိ ဒါနတော၊

ဗုဒ္ဓဿ အပကာရေန၊ ဒုဂ္ဂန္ဓာ ဝဒနေန စ။

‘‘ပုန ကဿပဝီရဿ၊ နိဓာယန္တမှိ စေတိယေ၊

သောဝဏ္ဏံ ဣဋ္ဌကံ ဝရံ၊ အဒါသိံ မုဒိတာ အဟံ။

‘‘စတုဇ္ဇာတေန ဂန္ဓေန၊ နိစယိတွာ တမိဋ္ဌကံ၊

မုတ္တာ ဒုဂ္ဂန္ဓဒေါသမှာ၊ သဗ္ဗင်္ဂသုသမာဂတာ။

‘‘သတ္တ ပါတိသဟဿာနိ၊ ရတနေဟေဝ သတ္တဟိ၊

ကာရေတွာ ဃတပူရာနိ၊ ဝဋ္ဋီနိ စ သဟဿသော။

‘‘ပက္ခိပိတွာ ပဒီပေတွာ၊ ဌပယိံ သတ္တပန္တိယော၊

ပူဇနတ္ထံ လောကနာထဿ၊ ဝိပ္ပသန္နေန စေတသာ။

‘‘တဒါပိ တမှိ ပုညမှိ၊ ဘာဂိနီယိ ဝိသေသတော၊

ပုန ကာသီသု သဉ္ဇာတော၊ သုမိတ္တာ ဣတိ ဝိဿုတော။

‘‘တဿာဟံ ဘရိယာ အာသိံ၊ သုခိတာ သဇ္ဇိတာ ပိယာ၊

တဒါ ပစ္စေကမုနိနော၊ အဒါသိံ ဃနဝေဌနံ။

‘‘တဿာပိ ဘာဂိနီ အာသိံ၊ မောဒိတွာ ဒါနမုတ္တမံ၊

ပုနာပိ ကာသိရဋ္ဌမှိ၊ ဇာတော ကောလိယဇာတိယာ။

‘‘တဒါ ကောလိယပုတ္တာနံ၊ သတေဟိ သဟ ပဉ္စဟိ၊

ပဉ္စ ပစ္စေကဗုဒ္ဓါနံ၊ သတာနိ သမုပဋ္ဌဟိ။

‘‘တေမာသံ တပ္ပယိတွာန၊ အဒါသိ စ တိစီဝရေ၊

ဇာယာ တဿ တဒါ အာသိံ၊ ပုညကမ္မပထာနုဂါ။

‘‘တတော စုတော အဟု ရာဇာ၊ နန္ဒော နာမ မဟာယသော၊

တဿာပိ မဟေသီ အာသိံ၊ သဗ္ဗကာမသမိဒ္ဓိနီ။

‘‘တဒါ ရာဇာ ဘဝိတွာန၊ ဗြဟ္မဒတ္တော မဟီပတိ၊

ပဒုမဝတီပုတ္တာနံ၊ ပစ္စေကမုနိနံ တဒါ။

‘‘သတာနိ ပဉ္စနူနာနိ၊ ယာဝဇီဝံ ဥပဋ္ဌဟိံ၊

ရာဇုယျာနေ နိဝါသေတွာ၊ နိဗ္ဗုတာနိ စ ပူဇယိံ။

‘‘စေတိယာနိ စ ကာရေတွာ၊ ပဗ္ဗဇိတွာ ဥဘော မယံ၊

ဘာဝေတွာ အပ္ပမညာယော၊ ဗြဟ္မလောကံ အဂမှသေ။

‘‘တတော စုတော မဟာတိတ္ထေ၊ သုဇာတော ပိပ္ဖလာယနော၊

မာတာ သုမနဒေဝီတိ၊ ကောသိဂေါတ္တော ဒိဇော ပိတာ။

‘‘အဟံ မဒ္ဒေ ဇနပဒေ၊ သာကလာယ ပုရုတ္တမေ၊

ကပ္ပိလဿ ဒိဇဿာသိံ၊ ဓီတာ မာတာ သုစီမတိ။

‘‘ဃရကဉ္စနဗိမ္ဗေန၊ နိမ္မိနိတွာန မံ ပိတာ၊

အဒါ ကဿပဓီရဿ၊ ကာမေဟိ ဝဇ္ဇိတဿမံ။

‘‘ကဒါစိ သော ကာရုဏိကော၊ ဂန္တွာ ကမ္မန္တပေက္ခကော၊

ကာကာဒိကေဟိ ခဇ္ဇန္တေ၊ ပါဏေ ဒိသွာန သံဝိဇိ။

‘‘ဃရေဝါဟံ တိလေ ဇာတေ၊ ဒိသွာနာတပတာပနေ၊

ကိမီ ကာကေဟိ ခဇ္ဇန္တေ၊ သံဝေဂမလဘိံ တဒါ။

‘‘တဒါ သော ပဗ္ဗဇီ ဓီရော၊ အဟံ တမနုပဗ္ဗဇိံ၊

ပဉ္စ ဝဿာနိ နိဝသိံ၊ ပရိဗ္ဗာဇဝတေ အဟံ။

‘‘ယဒါ ပဗ္ဗဇိတာ အာသိ၊ ဂေါတမီ ဇိနပေါသိကာ၊

တဒါဟံ တမုပဂန္တွာ၊ ဗုဒ္ဓေန အနုသာသိတာ။

‘‘န စိရေနေဝ ကာလေန၊ အရဟတ္တမပါပုဏိံ၊

အဟော ကလျာဏမိတ္တတ္တံ၊ ကဿပဿ သိရီမတော။

‘‘သုတော ဗုဒ္ဓဿ ဒါယာဒေါ၊ ကဿပေါ သုသမာဟိတော၊

ပုဗ္ဗေနိဝါသံ ယော ဝေဒိ၊ သဂ္ဂါပါယဉ္စ ပဿတိ။

‘‘အထော ဇာတိက္ခယံ ပတ္တော၊ အဘိညာဝေါသိတော မုနိ၊

ဧတာဟိ တီဟိ ဝိဇ္ဇာဟိ၊ တေဝိဇ္ဇော ဟောတိ ဗြာဟ္မဏော။

‘‘တထေဝ ဘဒ္ဒါကာပိလာနီ၊ တေဝိဇ္ဇာ မစ္စုဟာယိနီ၊

ဓာရေတိ အန္တိမံ ဒေဟံ၊ ဇိတွာ မာရံ သဝါဟနံ။

‘‘ဒိသွာ အာဒီနဝံ လောကေ၊ ဥဘော ပဗ္ဗဇိတာ မယံ၊

တျမှ ခီဏာသဝါ ဒန္တာ၊ သီတိဘူတာမှ နိဗ္ဗုတာ။

‘‘ကိလေသာ ဈာပိတာ မယှံ…ပေ… ကတံ ဗုဒ္ဓဿ သာသန’’န္တိ။ (အပ။ ထေရီ ၂။၃။၂၄၄-၃၁၃)၊

အရဟတ္တံ ပန ပတွာ ပုဗ္ဗေနိဝါသဉာဏေ စိဏ္ဏဝသီ အဟောသိ။ တတ္ထ သာတိသယံ ကတာဓိကာရတ္တာ အပရဘာဂေ တံ သတ္ထာ ဇေတဝနေ အရိယဂဏမဇ္ဈေ နိသိန္နော ဘိက္ခုနိယော ပဋိပါဋိယာ ဌာနန္တရေသု ဌပေန္တော ပုဗ္ဗေနိဝါသံ အနုဿရန္တီနံ အဂ္ဂဋ္ဌာနေ ဌပေသိ။ သာ ဧကဒိဝသံ မဟာကဿပတ္ထေရဿ ဂုဏာဘိတ္ထဝနပုဗ္ဗကံ အတ္တနော ကတကိစ္စတာဒိဝိဘာဝနမုခေန ဥဒါနံ ဥဒါနေန္တီ –

၆၃။

‘‘ပုတ္တော ဗုဒ္ဓဿ ဒါယာဒေါ၊ ကဿပေါ သုသမာဟိတော၊

ပုဗ္ဗေနိဝါသံ ယောဝေဒိ၊ သဂ္ဂါပါယဉ္စ ပဿတိ။

၆၄။

‘‘အထော ဇာတိက္ခယံ ပတ္တော၊ အဘိညာဝေါသိတော မုနိ၊

ဧတာဟိ တီဟိ ဝိဇ္ဇာဟိ၊ တေဝိဇ္ဇော ဟောတိ ဗြာဟ္မဏော။

၆၅။

‘‘တထေဝ ဘဒ္ဒါကာပိလာနီ၊ တေဝိဇ္ဇာ မစ္စုဟာယိနီ၊

ဓာရေတိ အန္တိမံ ဒေဟံ၊ ဇေတွာ မာရံ သဝါဟနံ။

၆၆။

‘‘ဒိသွာ အာဒီနဝံ လောကေ၊ ဥဘော ပဗ္ဗဇိတာ မယံ၊

တျမှ ခီဏာသဝါ ဒန္တာ၊ သီတိဘူတာမှ နိဗ္ဗုတာ’’တိ။ –

ဣမာ ဂါထာ အဘာသိ။

တတ္ထ ပုတ္တော ဗုဒ္ဓဿ ဒါယာဒေါတိ ဗုဒ္ဓါနုဗုဒ္ဓဘာဝတော သမ္မာသမ္ဗုဒ္ဓဿ အနုဇာတသုတော တတော ဧဝ တဿ ဒါယဘူတဿ နဝလောကုတ္တရဓမ္မဿ အာဒါနေန ဒါယာဒေါ ကဿပေါ လောကိယလောကုတ္တရေဟိ သမာဓီဟိ သုဋ္ဌု သမာဟိတစိတ္တတာယ သုသမာဟိတော။ ပုဗ္ဗေနိဝါသံ ယောဝေဒီတိ ယော မဟာကဿပတ္ထေရော ပုဗ္ဗေနိဝါသံ အတ္တနော ပရေသဉ္စ နိဝုတ္ထက္ခန္ဓသန္တာနံ ပုဗ္ဗေနိဝါသာနုဿတိဉာဏေန ပါကဋံ ကတွာ အဝေဒိ အညာသိ ပဋိဝိဇ္ဈိ။ သဂ္ဂါပါယဉ္စ ပဿတီတိ ဆဗ္ဗီသတိဒေဝလောကဘေဒံ သဂ္ဂံ စတုဗ္ဗိဓံ အပါယဉ္စ ဒိဗ္ဗစက္ခုနာ ဟတ္ထတလေ အာမလကံ ဝိယ ပဿတိ။

အထော ဇာတိက္ခယံ ပတ္တောတိ တတော ပရံ ဇာတိက္ခယသင်္ခါတံ အရဟတ္တံ ပတ္တော။ အဘိညာယ အဘိဝိသိဋ္ဌေန ဉာဏေန အဘိညေယျံ ဓမ္မံ အဘိဇာနိတွာ ပရိညေယျံ ပရိဇာနိတွာ ၊ ပဟာတဗ္ဗံ ပဟာယ ၊ သစ္ဆိကာတဗ္ဗံ သစ္ဆိကတွာ ဝေါသိတော နိဋ္ဌံ ပတ္တော ကတကိစ္စော။ အာသဝက္ခယပညာသင်္ခါတံ မောနံ ပတ္တတ္တာ မုနိ။

တထေဝ ဘဒ္ဒါကာပိလာနီတိ ယထာ မဟာကဿပေါ ဧတာဟိ ယထာဝုတ္တာဟိ တီဟိ ဝိဇ္ဇာဟိ တေဝိဇ္ဇော မစ္စုဟာယီ စ၊ တထေဝ ဘဒ္ဒါကာပိလာနီ တေဝိဇ္ဇာ မစ္စုဟာယိနီတိ။ တတော ဧဝ ဓာရေတိ အန္တိမံ ဒေဟံ၊ ဇေတွာ မာရံ သဝါဟနန္တိ အတ္တာနမေဝ ပရံ ဝိယ ကတွာ ဒဿေတိ။

ဣဒါနိ ယထာ ထေရဿ ပဋိပတ္တိ အာဒိမဇ္ဈပရိယောသာနကလျာဏာ၊ ဧဝံ မမပီတိ ဒဿေန္တီ ‘‘ဒိသွာ အာဒီနဝ’’န္တိ ဩသာနဂါထမာဟ။ တတ္ထ တျမှ ခီဏာသဝါ ဒန္တာတိ တေ မယံ မဟာကဿပတ္ထေရော အဟဉ္စ ဥတ္တမေန ဒမေန ဒန္တာ သဗ္ဗသော ခီဏာသဝါ စ အမှ။ သီတိဘူတာမှ နိဗ္ဗုတာတိ တတော ဧဝ ကိလေသပရိဠာဟာဘာဝတော သီတိဘူတာ သဥပါဒိသေသာယ နိဗ္ဗာနဓာတုယာ နိဗ္ဗုတာ စ အမှ ဘဝါမာတိ အတ္ထော။

ဘဒ္ဒါကာပိလာနီထေရီဂါထာဝဏ္ဏနာ နိဋ္ဌိတာ။

စတုက္ကနိပါတဝဏ္ဏနာ နိဋ္ဌိတာ။