📜
၈။ အဋ္ဌကနိပါတော
၁။ သီသူပစာလာထေရီဂါထာ
‘‘ဘိက္ခုနီ ¶ ¶ ¶ သီလသမ္ပန္နာ၊ ဣန္ဒြိယေသု သုသံဝုတာ၊
အဓိဂစ္ဆေ ပဒံ သန္တံ၊ အသေစနကမောဇဝံ’’။
‘‘တာဝတိံသာ စ ယာမာ စ၊ တုသိတာ စာပိ ဒေဝတာ၊
နိမ္မာနရတိနော ဒေဝါ၊ ယေ ဒေဝါ ဝသဝတ္တိနော၊
တတ္ထ စိတ္တံ ပဏီဓေဟိ၊ ယတ္ထ တေ ဝုသိတံ ပုရေ’’။
‘‘တာဝတိံသာ စ ယာမာ စ၊ တုသိတာ စာပိ ဒေဝတာ၊
နိမ္မာနရတိနော ဒေဝါ၊ ယေ ဒေဝါ ဝသဝတ္တိနော။
‘‘ကာလံ ကာလံ ဘဝါဘဝံ၊ သက္ကာယသ္မိံ ပုရက္ခတာ၊
အဝီတိဝတ္တာ သက္ကာယံ၊ ဇာတိမရဏသာရိနော။
‘‘သဗ္ဗော အာဒီပိတော လောကော၊ သဗ္ဗော လောကော ပဒီပိတော၊
သဗ္ဗော ပဇ္ဇလိတော လောကော၊ သဗ္ဗော လောကော ပကမ္ပိတော။
‘‘အကမ္ပိယံ အတုလိယံ၊ အပုထုဇ္ဇနသေဝိတံ၊
ဗုဒ္ဓါ ဓမ္မမဒေသေသိ၊ တတ္ထ မေ နိရတော မနော။
‘‘တဿာဟံ ဝစနံ သုတွာ၊ ဝိဟရိံ သာသနေ ရတာ၊
တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။
‘‘သဗ္ဗတ္ထ ဝိဟတာ နန္ဒီ၊ တမောခန္ဓော ပဒါလိတော၊
ဧဝံ ဇာနာဟိ ပါပိမ၊ နိဟတော တွမသိ အန္တက’’။
… သီသူပစာလာ ထေရီ…။
အဋ္ဌကနိပါတော နိဋ္ဌိတော။