📜
၃။ သုဘူတိဝဂ္ဂေါ
၁။ သုဘူတိတ္ထေရအပဒါနံ
‘‘ဟိမဝန္တဿာဝိဒူရေ ¶ ¶ ¶ ၊ နိသဘော နာမ ပဗ္ဗတော၊
အဿမော သုကတော မယှံ၊ ပဏ္ဏသာလာ သုမာပိတာ။
‘‘ကောသိယော နာမ နာမေန၊ ဇဋိလော ဥဂ္ဂတာပနော၊
ဧကာကိယော [ဧကာကိကော (က။)] အဒုတိယော၊ ဝသာမိ နိသဘေ တဒါ။
‘‘ဖလံ မူလဉ္စ ပဏ္ဏဉ္စ၊ န ဘုဉ္ဇာမိ အဟံ တဒါ၊
ပဝတ္တံဝ သုပါတာဟံ [ပဝတ္တပဏ္ဍုပတ္တာနိ (သီ။)]၊ ဥပဇီဝါမိ တာဝဒေ။
‘‘နာဟံ ¶ ကောပေမိ အာဇီဝံ၊ စဇမာနောပိ ဇီဝိတံ၊
အာရာဓေမိ သကံ စိတ္တံ၊ ဝိဝဇ္ဇေမိ အနေသနံ။
‘‘ရာဂူပသံဟိတံ စိတ္တံ၊ ယဒါ ဥပ္ပဇ္ဇတေ မမ၊
သယံဝ ပစ္စဝေက္ခာမိ၊ ဧကဂ္ဂေါ တံ ဒမေမဟံ။
‘‘‘ရဇ္ဇသေ ရဇ္ဇနီယေ စ၊ ဒုဿနီယေ စ ဒုဿသေ၊
မုယှသေ မောဟနီယေ စ၊ နိက္ခမဿု ဝနာ တုဝံ။
‘‘‘ဝိသုဒ္ဓါနံ အယံ ဝါသော၊ နိမ္မလာနံ တပဿိနံ၊
မာ ခေါ ဝိသုဒ္ဓံ ဒူသေသိ၊ နိက္ခမဿု ဝနာ တုဝံ။
‘‘‘အဂါရိကော ဘဝိတွာန၊ ယဒါ ပုတ္တံ [သဒါယုတ္တံ (သီ။)၊ ယဒါယုတ္တံ (သျာ။)]၊ လဘိဿသိ၊
ဥဘောပိ မာ ဝိရာဓေသိ၊ နိက္ခမဿု ဝနာ တုဝံ။
‘‘‘ဆဝါလာတံ ယထာ ကဋ္ဌံ၊ န ကွစိ ကိစ္စကာရကံ၊
နေဝ ဂါမေ အရညေ ဝါ၊ န ဟိ တံ ကဋ္ဌသမ္မတံ။
‘‘‘ဆဝါလာတူပမော တွံသိ၊ န ဂိဟီ နာပိ သညတော၊
ဥဘတော မုတ္တကော အဇ္ဇ၊ နိက္ခမဿု ဝနာ တုဝံ။
‘‘‘သိယာ နု ခေါ တဝ ဧတံ၊ ကော ပဇာနာတိ တေ ဣဒံ၊
သဒ္ဓါဓုရံ ဝဟိသိ [သဒ္ဓါဓုရံ ဇဟသိ (သီ။)၊ သီဃံ ဓုရံ ဝဟိသိ (သျာ။)] မေ၊ ကောသဇ္ဇဗဟုလာယ စ။
‘‘‘ဇိဂုစ္ဆိဿန္တိ ¶ ¶ တံ ဝိညူ၊ အသုစိံ နာဂရိကော ယထာ၊
အာကဍ္ဎိတွာန ဣသယော၊ စောဒယိဿန္တိ တံ သဒါ။
‘‘‘တံ ဝိညူ ပဝဒိဿန္တိ၊ သမတိက္ကန္တသာသနံ၊
သံဝါသံ အလဘန္တော ဟိ၊ ကထံ ဇီဝိဟိသိ [ဇီဝိဿသိ (သီ။)] တုဝံ။
‘‘‘တိဓာပဘိန္နံ ¶ ¶ မာတင်္ဂံ၊ ကုဉ္ဇရံ သဋ္ဌိဟာယနံ၊
ဗလီ နာဂေါ ဥပဂန္တွာ၊ ယူထာ နီဟရတေ ဂဇံ။
‘‘‘ယူထာ ဝိနိဿဋော သန္တော၊ သုခံ သာတံ န ဝိန္ဒတိ၊
ဒုက္ခိတော ဝိမနော ဟောတိ၊ ပဇ္ဈာယန္တော ပဝေဓတိ။
‘‘‘တထေဝ ဇဋိလာ တမ္ပိ၊ နီဟရိဿန္တိ ဒုမ္မတိံ၊
တေဟိ တွံ နိဿဋော သန္တော၊ သုခံ သာတံ န လစ္ဆသိ။
‘‘‘ဒိဝါ ဝါ ယဒိ ဝါ ရတ္တိံ၊ သောကသလ္လသမပ္ပိတော၊
ဍယှသိ ပရိဠာဟေန၊ ဂဇော ယူထာဝ နိဿဋော။
‘‘‘ဇာတရူပံ ယထာ ကူဋံ၊ နေဝ ဈာယတိ [ယာယတိ (သျာ။)] ကတ္ထစိ၊
တထာ သီလဝိဟီနော တွံ၊ န ဈာယိဿသိ [ယာရိဿတိ (သျာ။)] ကတ္ထစိ။
‘‘‘အဂါရံ ဝသမာနောပိ၊ ကထံ ဇီဝိဟိသိ တုဝံ၊
မတ္တိကံ ပေတ္တိကဉ္စာပိ၊ နတ္ထိ တေ နိဟိတံ ဓနံ။
‘‘‘သယံ ကမ္မံ ကရိတွာန၊ ဂတ္တေ သေဒံ ပမောစယံ၊
ဧဝံ ဇီဝိဟိသိ ဂေဟေ၊ သာဓု တေ တံ န ရုစ္စတိ။
‘‘‘ဧဝါဟံ တတ္ထ ဝါရေမိ၊ သံကိလေသဂတံ မနံ၊
နာနာဓမ္မကထံ ကတွာ၊ ပါပါ စိတ္တံ နိဝါရယိံ’။
‘‘ဧဝံ မေ ဝိဟရန္တဿ၊ အပ္ပမာဒဝိဟာရိနော၊
တိံသဝဿသဟဿာနိ၊ ဝိပိနေ မေ အတိက္ကမုံ။
‘‘အပ္ပမာဒရတံ ဒိသွာ၊ ဥတ္တမတ္ထံ ဂဝေသကံ၊
ပဒုမုတ္တရသမ္ဗုဒ္ဓါ၊ အာဂစ္ဆိ မမ သန္တိကံ။
‘‘တိမ္ဗရူသကဝဏ္ဏာဘော ¶ ၊ အပ္ပမေယျော အနူပမော၊
ရူပေနာသဒိသော ဗုဒ္ဓါ၊ အာကာသေ စင်္ကမီ တဒါ။
‘‘သုဖုလ္လော ¶ သာလရာဇာဝ၊ ဝိဇ္ဇူဝဗ္ဘဃနန္တရေ၊
ဉာဏေနာသဒိသော ဗုဒ္ဓါ၊ အာကာသေ စင်္ကမီ တဒါ။
‘‘သီဟရာဇာ ¶ ဝသမ္ဘီတော [ဆမ္ဘိတော (က။)]၊
ဂဇရာဇာဝ ဒပ္ပိတော [ဒမ္မိတော (က။)]။
လာသိတော [အဘီတော (သျာ။)] ဗျဂ္ဃရာဇာဝ၊ အာကာသေ စင်္ကမီ တဒါ။
‘‘သိင်္ဂီနိက္ခသဝဏ္ဏာဘော၊ ခဒိရင်္ဂါရသန္နိဘော၊
မဏိ ယထာ ဇောတိရသော၊ အာကာသေ စင်္ကမီ တဒါ။
‘‘ဝိသုဒ္ဓကေလာသနိဘော ¶ ၊ ပုဏ္ဏမာယေဝ စန္ဒိမာ၊
မဇ္ဈနှိကေဝ [မဇ္ဈန္တိကေဝ (သဗ္ဗတ္ထ)] သူရိယော၊ အာကာသေ စင်္ကမီ တဒါ။
‘‘ဒိသွာ နဘေ စင်္ကမန္တံ၊ ဧဝံ စိန္တေသဟံ တဒါ၊
‘ဒေဝေါ နု ခေါ အယံ သတ္တော၊ ဥဒါဟု မနုဇော အယံ။
‘‘‘န မေ သုတော ဝါ ဒိဋ္ဌော ဝါ၊ မဟိယာ ဧဒိသော နရော၊
အပိ မန္တပဒံ အတ္ထိ၊ အယံ သတ္ထာ ဘဝိဿတိ’။
‘‘ဧဝါဟံ စိန္တယိတွာန၊ သကံ စိတ္တံ ပသာဒယိံ၊
နာနာပုပ္ဖဉ္စ ဂန္ဓဉ္စ၊ သန္နိပါတေသဟံ [သန္နိပါတေတွာဟံ (သီ။)] တဒါ။
‘‘ပုပ္ဖာသနံ ပညပေတွာ၊ သာဓုစိတ္တံ မနောရမံ၊
နရသာရထိနံ အဂ္ဂံ၊ ဣဒံ ဝစနမဗြဝိံ။
‘‘‘ဣဒံ မေ အာသနံ ဝီရ၊ ပညတ္တံ တဝနုစ္ဆဝံ၊
ဟာသယန္တော မမံ စိတ္တံ၊ နိသီဒ ကုသုမာသနေ’။
‘‘နိသီဒိ ¶ တတ္ထ ဘဂဝါ၊ အသမ္ဘီတောဝ [အဆမ္ဘိတောဝ (က။)] ကေသရီ၊
သတ္တရတ္တိန္ဒိဝံ ဗုဒ္ဓါ၊ ပဝရေ ကုသုမာသနေ။
‘‘နမဿမာနော အဋ္ဌာသိံ၊ သတ္တရတ္တိန္ဒိဝံ အဟံ၊
ဝုဋ္ဌဟိတွာ သမာဓိမှာ၊ သတ္ထာ လောကေ အနုတ္တရော၊
မမ ကမ္မံ ပကိတ္တေန္တော၊ ဣဒံ ဝစနမဗြဝိ။
‘‘‘ဘာဝေဟိ ဗုဒ္ဓါနုဿတိံ၊ ဘာဝနာနမနုတ္တရံ၊
ဣမံ သတိံ ဘာဝယိတွာ၊ ပူရယိဿသိ မာနသံ။
‘‘‘တိံသကပ္ပသဟဿာနိ၊ ဒေဝလောကေ ရမိဿသိ၊
အသီတိက္ခတ္တုံ ဒေဝိန္ဒော၊ ဒေဝရဇ္ဇံ ကရိဿသိ၊
သဟဿက္ခတ္တုံ စက္ကဝတ္တီ၊ ရာဇာ ရဋ္ဌေ ဘဝိဿသိ။
‘‘‘ပဒေသရဇ္ဇံ ¶ ဝိပုလံ၊ ဂဏနာတော အသင်္ခိယံ၊
အနုဘောဿသိ တံ သဗ္ဗံ၊ ဗုဒ္ဓါနုဿတိယာ ဖလံ။
‘‘‘ဘဝါဘဝေ ¶ သံသရန္တော၊ မဟာဘောဂံ လဘိဿသိ၊
ဘောဂေ တေ ဦနတာ နတ္ထိ၊ ဗုဒ္ဓါနုဿတိယာ ဖလံ။
‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ၊
ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။
‘‘‘အသီတိကောဋိံ ဆဍ္ဍေတွာ၊ ဒါသေ ကမ္မကရေ ဗဟူ၊
ဂေါတမဿ ဘဂဝတော၊ သာသနေ ပဗ္ဗဇိဿသိ။
‘‘‘အာရာဓယိတွာ သမ္ဗုဒ္ဓံ၊ ဂေါတမံ သကျပုင်္ဂဝံ၊
သုဘူတိ နာမ နာမေန၊ ဟေဿတိ သတ္ထု သာဝကော။
‘‘‘ဘိက္ခုသင်္ဃေ ¶ ¶ နိသီဒိတွာ၊ ဒက္ခိဏေယျဂုဏမှိ တံ၊
တထာရဏဝိဟာရေ စ၊ ဒွီသု အဂ္ဂေ ဌပေဿတိ’။
‘‘ဣဒံ ဝတွာန သမ္ဗုဒ္ဓါ၊ ဇလဇုတ္တမနာမကော၊
နဘံ အဗ္ဘုဂ္ဂမီ ဝီရော၊ ဟံသရာဇာဝ အမ္ဗရေ။
‘‘သာသိတော လောကနာထေန၊ နမဿိတွာ တထာဂတံ၊
သဒါ ဘာဝေမိ မုဒိတော၊ ဗုဒ္ဓါနုဿတိမုတ္တမံ။
‘‘တေန ကမ္မေန သုကတေန၊ စေတနာပဏိဓီဟိ စ၊
ဇဟိတွာ မာနုသံ ဒေဟံ၊ တာဝတိံသံ အဂစ္ဆဟံ။
‘‘အသီတိက္ခတ္တုံ ဒေဝိန္ဒော၊ ဒေဝရဇ္ဇမကာရယိံ၊
သဟဿက္ခတ္တုံ ရာဇာ စ၊ စက္ကဝတ္တီ အဟောသဟံ။
‘‘ပဒေသရဇ္ဇံ ဝိပုလံ၊ ဂဏနာတော အသင်္ခိယံ၊
အနုဘောမိ သုသမ္ပတ္တိံ၊ ဗုဒ္ဓါနုဿတိယာ ဖလံ။
‘‘ဘဝါဘဝေ သံသရန္တော၊ မဟာဘောဂံ လဘာမဟံ၊
ဘောဂေ မေ ဦနတာ နတ္ထိ၊ ဗုဒ္ဓါနုဿတိယာ ဖလံ။
‘‘သတသဟဿိတော ကပ္ပေ၊ ယံ ကမ္မမကရိံ တဒါ၊
ဒုဂ္ဂတိံ နာဘိဇာနာမိ၊ ဗုဒ္ဓါနုဿတိယာ ဖလံ။
‘‘ပဋိသမ္ဘိဒါ ¶ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ သုဘူတိ ထေရော ဣမာ ဂါထာယော အဘာသိတ္ထာတိ။
သုဘူတိတ္ထေရဿာပဒါနံ ပဌမံ။
၂။ ဥပဝါနတ္ထေရအပဒါနံ
‘‘ပဒုမုတ္တရော ¶ ¶ နာမ ဇိနော၊ သဗ္ဗဓမ္မာန ပါရဂူ၊
ဇလိတွာ အဂ္ဂိက္ခန္ဓောဝ၊ သမ္ဗုဒ္ဓါ ပရိနိဗ္ဗုတော။
‘‘မဟာဇနာ သမာဂမ္မ၊ ပူဇယိတွာ တထာဂတံ၊
စိတံ ကတွာန သုကတံ၊ သရီရံ အဘိရောပယုံ။
‘‘သရီရကိစ္စံ ကတွာန၊ ဓာတုံ တတ္ထ သမာနယုံ၊
သဒေဝမာနုသာ သဗ္ဗေ၊ ဗုဒ္ဓထူပံ အကံသု တေ။
‘‘ပဌမာ ¶ ကဉ္စနမယာ၊ ဒုတိယာသိ မဏီမယာ၊
တတိယာ ရူပိယမယာ၊ စတုတ္ထီ ဖလိကာမယာ။
‘‘တထာ [တတ္ထ (သျာ။ က။)] ပဉ္စမိယာ ဘူမိ [နေမိ (သီ။)]၊ လောဟိတင်္ဂမယာ အဟု၊
ဆဋ္ဌာ မသာရဂလ္လဿ၊ သဗ္ဗရတနမယူပရိ။
‘‘ဇင်္ဃာ မဏိမယာ အာသိ၊ ဝေဒိကာ ရတနမယာ၊
သဗ္ဗသောဏ္ဏမယော ထူပေါ၊ ဥဒ္ဓံ ယောဇနမုဂ္ဂတော။
‘‘ဒေဝါ တတ္ထ သမာဂန္တွာ၊ ဧကတော မန္တယုံ တဒါ၊
မယမ္ပိ ထူပံ ကဿာမ၊ လောကနာထဿ တာဒိနော။
‘‘ဓာတု အာဝေဏိကာ နတ္ထိ၊ သရီရံ ဧကပိဏ္ဍိတံ၊
ဣမမှိ ဗုဒ္ဓထူပမှိ၊ ကဿာမ ကဉ္စုကံ မယံ။
‘‘ဒေဝါ သတ္တဟိ ရတ္နေဟိ [သတ္တရတနေဟိ (သီ။)]၊ အညံ ဝဍ္ဎေသု ယောဇနံ၊
ထူပေါ ဒွိယောဇနုဗ္ဗေဓော၊ တိမိရံ ဗျပဟန္တိ သော။
‘‘နာဂါ ¶ တတ္ထ သမာဂန္တွာ၊ ဧကတော မန္တယုံ တဒါ၊
မနုဿာ စေဝ ဒေဝါ စ၊ ဗုဒ္ဓထူပံ အကံသု တေ။
‘‘မာ ¶ နော ပမတ္တာ အဿုမှ [အဿုမှာ (သီ။ သျာ။)၊ အာသိမှာ (?)]၊ အပ္ပမတ္တာ သဒေဝကာ၊
မယမ္ပိ ထူပံ ကဿာမ၊ လောကနာထဿ တာဒိနော။
‘‘ဣန္ဒနီလံ မဟာနီလံ၊ အထော ဇောတိရသံ မဏိံ၊
ဧကတော သန္နိပါတေတွာ၊ ဗုဒ္ဓထူပံ အဆာဒယုံ။
‘‘သဗ္ဗံ မဏိမယံ အာသိ၊ တာဝတာ ဗုဒ္ဓစေတိယံ၊
တိယောဇနသမုဗ္ဗိဒ္ဓံ [တီဏိ ယောဇနမုဗ္ဗိဒ္ဓံ (သီ။ က။)]၊ အာလောကကရဏံ တဒါ။
‘‘ဂရုဠာ ¶ စ သမာဂန္တွာ၊ ဧကတော မန္တယုံ တဒါ၊
မနုဿာ ဒေဝါ နာဂါ စ၊ ဗုဒ္ဓထူပံ အကံသု တေ။
‘‘‘မာ နော ပမတ္တာ အဿုမှ၊ အပ္ပမတ္တာ သဒေဝကာ၊
မယမ္ပိ ထူပံ ကဿာမ၊ လောကနာထဿ တာဒိနော’။
‘‘သဗ္ဗံ မဏိမယံ ထူပံ၊ အကရုံ တေ စ ကဉ္စုကံ [သဗ္ဗမဏိမယံ ထူပေ၊ အကရုတ္တရကဉ္စုကံ (သီ။)]၊
ယောဇနံ တေပိ ဝဍ္ဎေသုံ၊ အာယတံ ဗုဒ္ဓစေတိယံ။
‘‘စတုယောဇနမုဗ္ဗိဒ္ဓါ၊ ဗုဒ္ဓထူပေါ ဝိရောစတိ၊
ဩဘာသေတိ ဒိသာ သဗ္ဗာ၊ သတရံသီဝ ဥဂ္ဂတော။
‘‘ကုမ္ဘဏ္ဍာ စ သမာဂန္တွာ၊ ဧကတော မန္တယုံ တဒါ၊
မနုဿာ စေဝ ဒေဝါ စ၊ နာဂါ စ ဂရုဠာ တထာ။
ပစ္စေကံ ဗုဒ္ဓသေဋ္ဌဿ၊ အကံသု ထူပမုတ္တမံ။
‘‘‘မာ နော ပမတ္တာ အဿုမှ၊ အပ္ပမတ္တာ သဒေဝကာ၊
မယမ္ပိ ထူပံ ကဿာမ၊ လောကနာထဿ တာဒိနော၊
ရတနေဟိ ဆာဒေဿာမ၊ အာယတံ ဗုဒ္ဓစေတိယံ’။
‘‘ယောဇနံ တေပိ ဝဍ္ဎေသုံ၊ အာယတံ ဗုဒ္ဓစေတိယံ၊
ပဉ္စယောဇနမုဗ္ဗိဒ္ဓါ၊ ထူပေါ ဩဘာသတေ တဒါ။
‘‘ယက္ခာ ¶ တတ္ထ သမာဂန္တွာ၊ ဧကတော မန္တယုံ တဒါ၊
မနုဿာ ဒေဝါ နာဂါ စ၊ ဂရုဠာ ကုမ္ဘအဏ္ဍကာ။
‘‘ပစ္စေကံ ဗုဒ္ဓသေဋ္ဌဿ၊ အကံသု ထူပမုတ္တမံ၊
‘မာ နော ပမတ္တာ အဿုမှ၊ အပ္ပမတ္တာ သဒေဝကာ။
‘‘‘မယမ္ပိ ¶ ¶ ထူပံ ကဿာမ၊ လောကနာထဿ တာဒိနော၊
ဖလိကာဟိ ဆာဒေဿာမ၊ အာယတံ ဗုဒ္ဓစေတိယံ’။
‘‘ယောဇနံ တေပိ ဝဍ္ဎေသုံ၊ အာယတံ ဗုဒ္ဓစေတိယံ၊
ဆ ယောဇနာနိ ဥဗ္ဗိဒ္ဓါ၊ ထူပေါ ဩဘာသတေ တဒါ။
‘‘ဂန္ဓဗ္ဗာ စ သမာဂန္တွာ၊ ဧကတော မန္တယုံ တဒါ၊
‘မနုဇာ ဒေဝတာ နာဂါ၊ ဂရုဠာ ကုမ္ဘယက္ခကာ။
‘‘‘သဗ္ဗေကံသု ဗုဒ္ဓထူပံ၊ မယမေတ္ထ အကာရကာ၊
မယမ္ပိ ထူပံ ကဿာမ၊ လောကနာထဿ တာဒိနော’။
‘‘ဝေဒိယော ¶ သတ္တ ကတွာန၊ ဆတ္တမာရောပယိံသု တေ၊
သဗ္ဗသောဏ္ဏမယံ ထူပံ၊ ဂန္ဓဗ္ဗာ ကာရယုံ တဒါ။
‘‘သတ္တယောဇနမုဗ္ဗိဒ္ဓါ၊ ထူပေါ ဩဘာသတေ တဒါ၊
ရတ္တိန္ဒိဝါ န ဉာယန္တိ၊ အာလောကော ဟောတိ [အာလောကာ ဟောန္တိ (သျာ။ က။)] သဗ္ဗဒါ။
‘‘အဘိဘောန္တိ ¶ န တဿာဘာ၊ စန္ဒသူရာ သတာရကာ၊
သမန္တာ ယောဇနသတေ၊ ပဒီပေါပိ န ပဇ္ဇလိ။
‘‘တေန ကာလေန ယေ ကေစိ၊ ထူပံ ပူဇေန္တိ မာနုသာ၊
န တေ ထူပမာရုဟန္တိ၊ အမ္ဗရေ ဥက္ခိပန္တိ တေ။
‘‘ဒေဝေဟိ ဌပိတော ယက္ခော၊ အဘိသမ္မတနာမကော၊
ဓဇံ ဝါ ပုပ္ဖဒါမံ ဝါ၊ အဘိရောပေတိ ဥတ္တရိ။
‘‘န တေ ပဿန္တိ တံ ယက္ခံ၊ ဒါမံ ပဿန္တိ ဂစ္ဆတော၊
ဧဝံ ပဿိတွာ ဂစ္ဆန္တာ၊ သဗ္ဗေ ဂစ္ဆန္တိ သုဂ္ဂတိံ။
‘‘ဝိရုဒ္ဓါ [ဝိသဒ္ဓါ (သီ။)] ယေ ပါဝစနေ၊ ပသန္နာ ယေ စ သာသနေ၊
ပါဋိဟေရံ ဒဋ္ဌုကာမာ၊ ထူပံ ပူဇေန္တိ မာနုသာ။
‘‘နဂရေ ဟံသဝတိယာ၊ အဟောသိံ ဘတကော [ဝရကော (သျာ။ က။)] တဒါ၊
အာမောဒိတံ ဇနံ ဒိသွာ၊ ဧဝံ စိန္တေသဟံ တဒါ။
‘‘‘ဥဠာရော ဘဂဝါ ဟေသော၊ ယဿ ဓာတုဓရေဒိသံ၊
ဣမာ စ ဇနတာ တုဋ္ဌာ၊ ကာရံ ကုဗ္ဗံ န တပ္ပရေ [ကုဗ္ဗန္တနပ္ပကံ (သီ။)]။
‘‘‘အဟမ္ပိ ¶ ကာရံ ကဿာမိ၊ လောကနာထဿ တာဒိနော၊
တဿ ဓမ္မေသု ဒါယာဒေါ၊ ဘဝိဿာမိ အနာဂတေ’။
‘‘သုဓောတံ ¶ ရဇကေနာဟံ၊ ဥတ္တရေယျပဋံ မမ၊
ဝေဠဂ္ဂေ အာလဂေတွာန၊ ဓဇံ ဥက္ခိပိမမ္ဗရေ။
‘‘အဘိသမ္မတကော ဂယှ၊ အမ္ဗရေဟာသိ မေ ဓဇံ၊
ဝါတေရိတံ ဓဇံ ဒိသွာ၊ ဘိယျော ဟာသံ ဇနေသဟံ။
‘‘တတ္ထ ¶ စိတ္တံ ပသာဒေတွာ၊ သမဏံ ဥပသင်္ကမိံ၊
တံ ဘိက္ခုံ အဘိဝါဒေတွာ၊ ဝိပါကံ ပုစ္ဆဟံ ဓဇေ။
‘‘သော မေ ကထေသိ အာနန္ဒ၊ ပီတိသဉ္ဇနနံ မမ၊
‘တဿ ဓဇဿ ဝိပါကံ၊ အနုဘောဿသိ သဗ္ဗဒါ။
‘‘‘ဟတ္ထီ ¶ အဿာ ရထာ ပတ္တီ၊ သေနာ စ စတုရင်္ဂိနီ၊
ပရိဝါရေဿန္တိ တံ နိစ္စံ၊ ဓဇဒါနဿိဒံ ဖလံ။
‘‘‘သဋ္ဌိတူရိယသဟဿာနိ၊ ဘေရိယော သမလင်္ကတာ၊
ပရိဝါရေဿန္တိ တံ နိစ္စံ၊ ဓဇဒါနဿိဒံ ဖလံ။
‘‘‘ဆဠာသီတိသဟဿာနိ၊ နာရိယော သမလင်္ကတာ၊
ဝိစိတ္တဝတ္ထာဘရဏာ၊ အာမုတ္တမဏိကုဏ္ဍလာ။
‘‘‘အဠာရပမှာ ဟသုလာ၊ သုသညာ တနုမဇ္ဈိမာ၊
ပရိဝါရေဿန္တိ တံ နိစ္စံ၊ ဓဇဒါနဿိဒံ ဖလံ။
‘‘‘တိံသကပ္ပသဟဿာနိ၊ ဒေဝလောကေ ရမိဿသိ၊
အသီတိက္ခတ္တုံ ဒေဝိန္ဒော၊ ဒေဝရဇ္ဇံ ကရိဿသိ။
‘‘‘သဟဿက္ခတ္တုံ ရာဇာ စ၊ စက္ကဝတ္တီ ဘဝိဿသိ၊
ပဒေသရဇ္ဇံ ဝိပုလံ၊ ဂဏနာတော အသင်္ခိယံ။
‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ၊
ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။
‘‘‘ဒေဝလောကာ စဝိတွာန၊ သုက္ကမူလေန စောဒိတော၊
ပုညကမ္မေန သံယုတ္တော၊ ဗြဟ္မဗန္ဓု ဘဝိဿသိ။
‘‘‘အသီတိကောဋိံ ¶ ဆဍ္ဍေတွာ၊ ဒါသေ ကမ္မကရေ ဗဟူ၊
ဂေါတမဿ ဘဂဝတော၊ သာသနေ ပဗ္ဗဇိဿသိ။
‘‘‘အာရာဓယိတွာ ¶ သမ္ဗုဒ္ဓံ၊ ဂေါတမံ သကျပုင်္ဂဝံ၊
ဥပဝါနောတိ နာမေန၊ ဟေဿသိ သတ္ထု သာဝကော’။
‘‘သတသဟဿေ ကတံ ကမ္မံ၊ ဖလံ ဒဿေသိ မေ ဣဓ၊
သုမုတ္တော သရဝေဂေါဝ ကိလေသေ ဈာပယီ မမ။
‘‘စက္ကဝတ္တိဿ သန္တဿ၊ စတုဒီပိဿရဿ မေ၊
တိယောဇနာနိ သမန္တာ၊ ဥဿီသန္တိ ဓဇာ သဒါ။
‘‘သတသဟဿိတော ¶ ကပ္ပေ၊ ယံ ကမ္မမကရိံ တဒါ၊
ဒုဂ္ဂတိံ နာဘိဇာနာမိ၊ ဓဇဒါနဿိဒံ ဖလံ။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ ¶ သုဒံ အာယသ္မာ ဥပဝါနော ထေရော ဣမာ ဂါထာယော အဘာသိတ္ထာတိ။
ဥပဝါနတ္ထေရဿာပဒါနံ ဒုတိယံ။
၃။ တိသရဏဂမနိယတ္ထေရအပဒါနံ
‘‘နဂရေ စန္ဒဝတိယာ [ဗန္ဓုမတိယာ (အဋ္ဌ။)]၊ မာတုဥပဋ္ဌာကော [မာတုပဋ္ဌာယကော (သီ။)၊ မာတုပဋ္ဌာနကော (သျာ။)] အဟုံ၊
အန္ဓာ မာတာ ပိတာ မယှံ၊ တေ ပေါသေမိ အဟံ တဒါ။
‘‘ရဟောဂတော ¶ နိသီဒိတွာ၊ ဧဝံ စိန္တေသဟံ တဒါ၊
ပေါသေန္တော မာတာပိတရော၊ ပဗ္ဗဇ္ဇံ န လဘာမဟံ။
‘‘မဟန္ဓကာရပိဟိတာ [တမန္ဓကာရပိဟိတာ (သျာ။)]၊ တိဝိဓဂ္ဂီဟိ ဍယှရေ၊
ဧတာဒိသေ ဘဝေ [ဘယေ (သီ။)] ဇာတေ၊ နတ္ထိ ကောစိ ဝိနာယကော။
‘‘ဗုဒ္ဓါ လောကေ သမုပ္ပန္နော၊ ဒိပ္ပတိ [ဒိဗ္ဗတိ (က။)][ဇိနသာသနံ (သီ။)] ဒါနိ သာသနံ၊
သက္ကာ ဥဒ္ဓရိတုံ အတ္တာ၊ ပုညကာမေန ဇန္တုနာ။
‘‘ဥဂ္ဂယှ တီဏိ သရဏေ၊ ပရိပုဏ္ဏာနိ ဂေါပယိံ၊
တေန ကမ္မေန သုကတေန၊ ပဋိမောက္ခာမိ ဒုဂ္ဂတိံ။
‘‘နိသဘော ¶ နာမ သမဏော၊ ဗုဒ္ဓဿ အဂ္ဂသာဝကော၊
တမဟံ ဥပဂန္တွာန၊ သရဏဂမနံ ဂဟိံ။
‘‘ဝဿသတသဟဿာနိ၊ အာယု ဝိဇ္ဇတိ တာဝဒေ၊
တာဝတာ သရဏဂမနံ၊ ပရိပုဏ္ဏံ အဂေါပယိံ။
‘‘စရိမေ ဝတ္တမာနမှိ၊ သရဏံ တံ အနုဿရိံ၊
တေန ကမ္မေန သုကတေန၊ တာဝတိံသံ အဂစ္ဆဟံ။
‘‘ဒေဝလောကဂတော သန္တော၊ ပုညကမ္မသမာဟိတော၊
ယံ ဒေသံ [ယံ ယံ ဒေသံ (သျာ။)] ဥပပဇ္ဇာမိ [ဥပဂစ္ဆာမိ (သီ။)]၊ အဋ္ဌ ဟေတူ လဘာမဟံ။
‘‘ဒိသာသု ¶ ပူဇိတော ဟောမိ၊ တိက္ခပညော ဘဝါမဟံ၊
သဗ္ဗေ ဒေဝါနုဝတ္တန္တိ၊ အမိတဘောဂံ လဘာမဟံ။
‘‘သုဝဏ္ဏဝဏ္ဏော သဗ္ဗတ္ထ၊ ပဋိကန္တော ဘဝါမဟံ၊
မိတ္တာနံ အစလော ဟောမိ၊ ယသော အဗ္ဘုဂ္ဂတော မမံ။
‘‘အသီတိက္ခတ္တု ¶ ဒေဝိန္ဒော၊ ဒေဝရဇ္ဇမကာရယိံ၊
ဒိဗ္ဗသုခံ အနုဘဝိံ၊ အစ္ဆရာဟိ ပုရက္ခတော။
‘‘ပဉ္စသတ္တတိက္ခတ္တုဉ္စ ¶ ၊ စက္ကဝတ္တီ အဟောသဟံ၊
ပဒေသရဇ္ဇံ ဝိပုလံ၊ ဂဏနာတော အသင်္ခိယံ။
‘‘ပစ္ဆိမေ ဘဝေ သမ္ပတ္တေ၊ ပုညကမ္မသမာဟိတော၊
ပုရေ သာဝတ္ထိယံ ဇာတော၊ မဟာသာလေ သုအဍ္ဎကေ။
‘‘နဂရာ နိက္ခမိတွာန၊ ဒါရကေဟိ ပုရက္ခတော၊
ဟသခိဍ္ဍသမင်္ဂီဟံ [သာဟံ ခိဍ္ဍသမင်္ဂီ (သျာ။)]၊ သင်္ဃာရာမံ ဥပါဂမိံ။
‘‘တတ္ထဒ္ဒသာသိံ [တတ္ထဒ္ဒသာဟံ (က။)] သမဏံ၊ ဝိပ္ပမုတ္တံ နိရူပဓိံ၊
သော မေ ဓမ္မမဒေသေသိ၊ သရဏဉ္စ အဒါသိ မေ။
‘‘သောဟံ သုတွာန သရဏံ၊ သရဏံ မေ အနုဿရိံ၊
ဧကာသနေ နိသီဒိတွာ၊ အရဟတ္တမပါပုဏိံ။
‘‘ဇာတိယာ သတ္တမေ ဝဿေ၊ အရဟတ္တမပါပုဏိံ၊
ဥပသမ္ပာဒယိ ဗုဒ္ဓါ၊ ဂုဏမညာယ စက္ခုမာ။
‘‘အပရိမေယျေ ¶ ဣတော ကပ္ပေ၊ သရဏာနိ အဂစ္ဆဟံ၊
တတော မေ သုကတံ ကမ္မံ၊ ဖလံ ဒဿေသိ မေ ဣဓ။
‘‘သုဂေါပိတံ မေ သရဏံ၊ မာနသံ သုပ္ပဏီဟိတံ၊
အနုဘောတွာ ယသံ သဗ္ဗံ၊ ပတ္တောမှိ အစလံ ပဒံ။
‘‘ယေသံ သောတာဝဓာနတ္ထိ၊ သုဏောထ မမ ဘာသတော၊
အဟံ [အတ္ထံ (သျာ။)] ဝေါ ကထယိဿာမိ၊ သာမံ ဒိဋ္ဌံ ပဒံ မမ။
‘‘‘ဗုဒ္ဓါ ¶ လောကေ သမုပ္ပန္နော၊ ဝတ္တတေ ဇိနသာသနံ၊
အမတာ ဝါဒိတာ ဘေရီ၊ သောကသလ္လဝိနောဒနာ။
‘‘‘ယထာသကေန ထာမေန၊ ပုညက္ခေတ္တေ အနုတ္တရေ၊
အဓိကာရံ ကရေယျာထ၊ ပဿယိဿထ နိဗ္ဗုတိံ။
‘‘‘ပဂ္ဂယှ တီဏိ သရဏေ၊ ပဉ္စသီလာနိ ဂေါပိယ၊
ဗုဒ္ဓေ စိတ္တံ ပသာဒေတွာ၊ ဒုက္ခဿန္တံ ကရိဿထ။
‘‘‘သမ္မာ ဓမ္မံ ဘာဝေတွာန [မမောပမံ ကရိတွာန (သီ။ သျာ။)]၊ သီလာနိ ¶ ပရိဂေါပိယ၊
အစိရံ အရဟတ္တံ ဝေါ၊ သဗ္ဗေပိ ပါပုဏိဿထ။
‘‘‘တေဝိဇ္ဇော ဣဒ္ဓိပတ္တောမှိ၊ စေတောပရိယကောဝိဒေါ၊
သာဝကော တေ မဟာဝီရ၊ သရဏော [စရဏေ (သီ။ သျာ။)] ဝန္ဒတိ သတ္ထုနော’။
‘‘အပရိမေယျေ ¶ ဣတော ကပ္ပေ၊ သရဏံ ဗုဒ္ဓဿ ဂစ္ဆဟံ၊
ဒုဂ္ဂတိံ နာဘိဇာနာမိ၊ သရဏံ ဂမနေ ဖလံ။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ တိသရဏဂမနိယော ထေရော ဣမာ ဂါထာယော အဘာသိတ္ထာတိ။
တိသရဏဂမနိယတ္ထေရဿာပဒါနံ တတိယံ။
၄။ ပဉ္စသီလသမာဒါနိယတ္ထေရအပဒါနံ
‘‘နဂရေ စန္ဒဝတိယာ၊ ဘတကော အာသဟံ တဒါ၊
ပရကမ္မာယနေ ယုတ္တော၊ ပဗ္ဗဇ္ဇံ န လဘာမဟံ။
‘‘မဟန္ဓကာရပိဟိတာ ¶ ¶ ၊ တိဝိဓဂ္ဂီဟိ ဍယှရေ၊
ကေန နု ခေါ ဥပါယေန၊ ဝိသံယုတ္တော ဘဝေ အဟံ။
‘‘ဒေယျဓမ္မော စ မေ နတ္ထိ၊ ဝရာကော ဘတကော အဟံ၊
ယံနူနာဟံ ပဉ္စသီလံ၊ ရက္ခေယျံ ပရိပူရယံ။
‘‘အနောမဒဿိဿ မုနိနော၊ နိသဘော နာမ သာဝကော၊
တမဟံ ဥပသင်္ကမ္မ၊ ပဉ္စသိက္ခာပဒဂ္ဂဟိံ။
‘‘ဝဿသတသဟဿာနိ၊ အာယု ဝိဇ္ဇတိ တာဝဒေ၊
တာဝတာ ပဉ္စသီလာနိ၊ ပရိပုဏ္ဏာနိ ဂေါပယိံ။
‘‘မစ္စုကာလေ စ သမ္ပတ္တေ၊ ဒေဝါ အဿာသယန္တိ မံ၊
‘ရထော သဟဿယုတ္တော တေ၊ မာရိသာယံ [မာရိသဿ (က။)] ဥပဋ္ဌိတော’။
‘‘ဝတ္တန္တေ စရိမေ စိတ္တေ၊ မမ သီလံ အနုဿရိံ၊
တေန ကမ္မေန သုကတေန၊ တာဝတိံသံ အဂစ္ဆဟံ။
‘‘တိံသက္ခတ္တုဉ္စ ¶ ဒေဝိန္ဒော၊ ဒေဝရဇ္ဇမကာရယိံ၊
ဒိဗ္ဗသုခံ [ဒိဗ္ဗံ သုခံ (သီ။)] အနုဘဝိံ၊ အစ္ဆရာဟိ ပုရက္ခတော။
‘‘ပဉ္စသတ္တတိက္ခတ္တုဉ္စ၊ စက္ကဝတ္တီ အဟောသဟံ၊
ပဒေသရဇ္ဇံ ဝိပုလံ၊ ဂဏနာတော အသင်္ခိယံ။
‘‘ဒေဝလောကာ စဝိတွာန၊ သုက္ကမူလေန စောဒိတော၊
ပုရေ ဝေသာလိယံ ဇာတော၊ မဟာသာလေ သုအဍ္ဎကေ။
‘‘ဝဿူပနာယိကေ ¶ ကာလေ၊ ဒိပ္ပန္တေ [ဒိဗ္ဗန္တိ (က။)] ဇိနသာသနေ၊
မာတာ စ မေ ပိတာ စေဝ၊ ပဉ္စသိက္ခာပဒဂ္ဂဟုံ။
‘‘သဟ ¶ သုတွာနဟံ သီလံ၊ မမ သီလံ အနုဿရိံ၊
ဧကာသနေ နိသီဒိတွာ၊ အရဟတ္တမပါပုဏိံ။
‘‘ဇာတိယာ ပဉ္စဝဿေန၊ အရဟတ္တမပါပုဏိံ၊
ဥပသမ္ပာဒယိ ဗုဒ္ဓါ၊ ဂုဏမညာယ စက္ခုမာ။
‘‘ပရိပုဏ္ဏာနိ ဂေါပေတွာ၊ ပဉ္စသိက္ခာပဒါနဟံ၊
အပရိမေယျေ ဣတော ကပ္ပေ၊ ဝိနိပါတံ န ဂစ္ဆဟံ။
‘‘သွာဟံ ¶ ယသမနုဘဝိံ၊ တေသံ သီလာန ဝါဟသာ၊
ကပ္ပကောဋိမ္ပိ ကိတ္တေန္တော၊ ကိတ္တယေ ဧကဒေသကံ။
‘‘ပဉ္စသီလာနိ ဂေါပေတွာ၊ တယော ဟေတူ လဘာမဟံ၊
ဒီဃာယုကော မဟာဘောဂေါ၊ တိက္ခပညော ဘဝါမဟံ။
‘‘သံကိတ္တေန္တော စ [ပကိတ္တေန္တောဝ (သီ။)၊ ပကိတ္တေန္တေ စ (သျာ။)] သဗ္ဗေသံ၊ အဘိမတ္တဉ္စ ပေါရိသံ၊
ဘဝါဘဝေ သံသရိတွာ၊ ဧတေ ဌာနေ လဘာမဟံ။
‘‘အပရိမေယျသီလေသု၊ ဝတ္တန္တာ ဇိနသာဝကာ၊
ဘဝေသု ယဒိ ရဇ္ဇေယျုံ၊ ဝိပါကော ကီဒိသော ဘဝေ။
‘‘သုစိဏ္ဏံ မေ ပဉ္စသီလံ၊ ဘတကေန တပဿိနာ [ဝိပဿိနာ (သီ။)]၊
တေန သီလေနဟံ အဇ္ဇ၊ မောစယိံ သဗ္ဗဗန္ဓနာ။
‘‘အပရိမေယျေ ဣတော ကပ္ပေ၊ ပဉ္စသီလာနိ ဂေါပယိံ၊
ဒုဂ္ဂတိံ နာဘိဇာနာမိ၊ ပဉ္စသီလာနိဒံ ဖလံ။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ ¶ သုဒံ အာယသ္မာ ပဉ္စသီလသမာဒါနိယော ထေရော ဣမာ ဂါထာယော အဘာသိတ္ထာတိ။
ပဉ္စသီလသမာဒါနိယတ္ထေရဿာပဒါနံ စတုတ္ထံ။
၅။ အန္နသံသာဝကတ္ထေရအပဒါနံ
‘‘သုဝဏ္ဏဝဏ္ဏံ ¶ သမ္ဗုဒ္ဓံ၊ ဂစ္ဆန္တံ အန္တရာပဏေ၊
ကဉ္စနဂ္ဃိယသံကာသံ၊ ဗာတ္တိံသဝရလက္ခဏံ။
‘‘သိဒ္ဓတ္ထံ ¶ လောကပဇ္ဇောတံ၊ အပ္ပမေယျံ အနောပမံ၊
အလတ္ထံ ပရမံ ပီတိံ၊ ဒိသွာ ဒန္တံ ဇုတိန္ဓရံ။
‘‘သမ္ဗုဒ္ဓံ အဘိနာမေတွာ၊ ဘောဇယိံ တံ မဟာမုနိံ၊
မဟာကာရုဏိကော လောကေ [နာထော (သီ။)]၊ အနုမောဒိ မမံ တဒါ။
‘‘တသ္မိံ ¶ မဟာကာရုဏိကေ၊ ပရမဿာသကာရကေ၊
ဗုဒ္ဓေ စိတ္တံ ပသာဒေတွာ၊ ကပ္ပံ သဂ္ဂမှိ မောဒဟံ။
‘‘စတုန္နဝုတိတော ကပ္ပေ၊ ယံ ဒါနမဒဒိံ တဒါ၊
ဒုဂ္ဂတိံ နာဘိဇာနာမိ၊ ဘိက္ခာဒါနဿိဒံ ဖလံ။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ အန္နသံသာဝကော ထေရော ဣမာ ဂါထာယော အဘာသိတ္ထာတိ။
အန္နသံသာဝကတ္ထေရဿာပဒါနံ ပဉ္စမံ။
၆။ ဓူပဒါယကတ္ထေရအပဒါနံ
‘‘သိဒ္ဓတ္ထဿ ¶ ဘဂဝတော၊ လောကဇေဋ္ဌဿ တာဒိနော၊
ကုဋိဓူပံ မယာ ဒိန္နံ၊ ဝိပ္ပသန္နေန စေတသာ။
ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ၊
သဗ္ဗေသမ္ပိ ပိယော ဟောမိ၊ ဓူပဒါနဿိဒံ ဖလံ။
‘‘စတုန္နဝုတိတော ကပ္ပေ၊ ယံ ဓူပမဒဒိံ တဒါ [ယံ ဓူပနမဒါသဟံ (က။)]၊
ဒုဂ္ဂတိံ နာဘိဇာနာမိ၊ ဓူပဒါနဿိဒံ ဖလံ။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဓူပဒါယကော ထေရော ဣမာ ဂါထာယော အဘာသိတ္ထာတိ။
ဓူပဒါယကတ္ထေရဿာပဒါနံ ဆဋ္ဌံ။
၇။ ပုလိနပူဇကတ္ထေရအပဒါနံ
‘‘ဝိပဿိဿ ¶ ¶ ဘဂဝတော၊ ဗောဓိယာ ပါဒပုတ္တမေ၊
ပုရာဏပုလိနံ ဟိတွာ [ဆဍ္ဍေတွာ (သီ။ သျာ။)]၊ သုဒ္ဓပုလိနမာကိရိံ။
‘‘ဧကနဝုတိတော ¶ ကပ္ပေ၊ ယံ ပုလိနမဒါသဟံ၊
ဒုဂ္ဂတိံ နာဘိဇာနာမိ၊ ပုလိနဒါနဿိဒံ ဖလံ။
‘‘တိံသတိမေ ¶ [တိပညာသေ (သီ။ သျာ။)] ဣတော ကပ္ပေ၊ ရာဇာ အာသိံ ဇနာဓိဘူ၊
မဟာပုလိနနာမေန၊ စက္ကဝတ္တီ မဟဗ္ဗလော။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပုလိနပူဇကော ထေရော ဣမာ ဂါထာယော အဘာသိတ္ထာတိ။
ပုလိနပူဇကတ္ထေရဿာပဒါနံ သတ္တမံ။
၈။ ဥတ္တိယတ္ထေရအပဒါနံ
‘‘စန္ဒဘာဂါနဒီတီရေ၊ သုသုမာရော အဟံ တဒါ၊
သဂေါစရပ္ပသုတောဟံ [သဘောဇနပသုတာဟံ (သျာ။ က။)]၊ နဒီတိတ္ထံ အဂစ္ဆဟံ။
‘‘သိဒ္ဓတ္ထော တမှိ သမယေ၊ သယမ္ဘူ အဂ္ဂပုဂ္ဂလော၊
နဒိံ တရိတုကာမော သော၊ နဒီတိတ္ထံ ဥပါဂမိ။
‘‘ဥပါဂတေ စ [ဥပါဂတမှိ (သျာ။ က။)] သမ္ဗုဒ္ဓေ၊ အဟမ္ပိ တတ္ထုပါဂမိံ၊
ဥပဂန္တွာန သမ္ဗုဒ္ဓံ၊ ဣမံ ဝါစံ ဥဒီရယိံ။
‘‘‘အဘိရူဟ မဟာဝီရ၊ တာရေဿာမိ အဟံ တုဝံ၊
ပေတ္တိကံ ဝိသယံ မယှံ၊ အနုကမ္ပ မဟာမုနိ’။
‘‘မမ ဥဂ္ဂဇ္ဇနံ သုတွာ၊ အဘိရူဟိ မဟာမုနိ၊
ဟဋ္ဌော ဟဋ္ဌေန စိတ္တေန၊ တာရေသိံ လောကနာယကံ။
‘‘နဒိယာ ¶ ပါရိမေ တီရေ၊ သိဒ္ဓတ္ထော လောကနာယကော၊
အဿာသေသိ မမံ တတ္ထ၊ အမတံ ပါပုဏိဿသိ။
‘‘တမှာ ¶ ကာယာ စဝိတွာန၊ ဒေဝလောကံ အာဂစ္ဆဟံ၊
ဒိဗ္ဗသုခံ အနုဘဝိံ၊ အစ္ဆရာဟိ ပုရက္ခတော။
‘‘သတ္တက္ခတ္တုဉ္စ ¶ ဒေဝိန္ဒော၊ ဒေဝရဇ္ဇမကာသဟံ၊
တီဏိက္ခတ္တုံ စက္ကဝတ္တီ၊ မဟိယာ ဣဿရော အဟုံ။
‘‘ဝိဝေကမနုယုတ္တောဟံ ¶ ၊ နိပကော စ သုသံဝုတော၊
ဓာရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။
‘‘စတုန္နဝုတိတော ကပ္ပေ၊ တာရေသိံ ယံ နရာသဘံ၊
ဒုဂ္ဂတိံ နာဘိဇာနာမိ၊ တရဏာယ ဣဒံ ဖလံ။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဥတ္တိယော [ဥတ္တိရိယော (သီ။)] ထေရော ဣမာ ဂါထာယော အဘာသိတ္ထာတိ။
ဥတ္တိယတ္ထေရဿာပဒါနံ အဋ္ဌမံ။
၉။ ဧကဉ္ဇလိကတ္ထေရအပဒါနံ
‘‘သုဝဏ္ဏဝဏ္ဏံ သမ္ဗုဒ္ဓံ၊ ဂစ္ဆန္တံ အန္တရာပဏေ၊
ဝိပဿိံ သတ္ထဝါဟဂ္ဂံ၊ နရဝရံ ဝိနာယကံ။
‘‘အဒန္တဒမနံ ¶ တာဒိံ၊ မဟာဝါဒိံ မဟာမတိံ၊
ဒိသွာ ပသန္နော သုမနော၊ ဧကဉ္ဇလိမကာသဟံ။
‘‘ဧကနဝုတိတော ကပ္ပေ၊ ယမဉ္ဇလိံ ကရိံ [ယံ အဉ္ဇလိမကရိံ (သျာ။)၊ အဉ္ဇလိမကရိံ (က။)] တဒါ၊
ဒုဂ္ဂတိံ နာဘိဇာနာမိ၊ အဉ္ဇလိဿ ဣဒံ ဖလံ။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဧကဉ္ဇလိကော ထေရော ဣမာ ဂါထာယော အဘာသိတ္ထာတိ။
ဧကဉ္ဇလိကတ္ထေရဿာပဒါနံ နဝမံ။
၁၀။ ခေါမဒါယကတ္ထေရအပဒါနံ
‘‘နဂရေ ¶ ¶ ဗန္ဓုမတိယာ၊ အဟောသိံ ဝါဏိဇော တဒါ၊
တေနေဝ ဒါရံ ပေါသေမိ၊ ရောပေမိ ဗီဇသမ္ပဒံ။
‘‘ရထိယံ ပဋိပန္နဿ၊ ဝိပဿိဿ မဟေသိနော၊
ဧကံ ခေါမံ မယာ ဒိန္နံ၊ ကုသလတ္ထာယ သတ္ထုနော။
‘‘ဧကနဝုတိတော ¶ ကပ္ပေ၊ ယံ ခေါမမဒဒိံ တဒါ၊
ဒုဂ္ဂတိံ နာဘိဇာနာမိ၊ ခေါမဒါနဿိဒံ ဖလံ။
‘‘သတ္တရသေ [သတ္တဝီသေ (သီ။ သျာ။)] ဣတော ကပ္ပေ၊ ဧကော သိန္ဓဝသန္ဓနော၊
သတ္တရတနသမ္ပန္နော၊ စတုဒီပမှိ ဣဿရော။
‘‘ပဋိသမ္ဘိဒါ ¶ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ခေါမဒါယကော ထေရော ဣမာ ဂါထာယော အဘာသိတ္ထာတိ။
ခေါမဒါယကတ္ထေရဿာပဒါနံ ဒသမံ။
တဿုဒ္ဒါနံ –
သုသူတိ ဥပဝါနော စ၊ သရဏော သီလဂါဟကော၊
အန္နသံသာဝကော ခေါမဒါယီ စ၊ ဒသေဝ တတိယေ ဂဏေ၊
အဉ္ဇလီ ခေါမဒါယီ စ၊ ဒသေဝ တတိယေ ဂဏေ၊
ပဉ္စာလီသီတိသတံ ဝုတ္တာ၊ ဂါထာယော သဗ္ဗပိဏ္ဍိတာ။
သုဘူတိဝဂ္ဂေါ တတိယော။
စတုတ္ထဘာဏဝါရံ။