📜
၄၂။ ဘဒ္ဒါလိဝဂ္ဂေါ
၁။ ဘဒ္ဒါလိတ္ထေရအပဒါနံ
‘‘သုမေဓော ¶ ¶ ¶ နာမ သမ္ဗုဒ္ဓါ၊ အဂ္ဂေါ ကာရုဏိကော မုနိ၊
ဝိဝေကကာမော လောကဂ္ဂေါ၊ ဟိမဝန္တမုပါဂမိ။
‘‘အဇ္ဈောဂါဟေတွာ ဟိမဝံ၊ သုမေဓော လောကနာယကော၊
ပလ္လင်္ကံ အာဘုဇိတွာန၊ နိသီဒိ ပုရိသုတ္တမော။
‘‘သမာဓိံ သော သမာပန္နော၊ သုမေဓော လောကနာယကော၊
သတ္တရတ္တိန္ဒိဝံ ဗုဒ္ဓါ၊ နိသီဒိ ပုရိသုတ္တမော။
‘‘ခါရိဘာရံ [ခါရိကာဇံ (သီ။)] ဂဟေတွာန၊ ဝနမဇ္ဈောဂဟိံ အဟံ၊
တတ္ထဒ္ဒသာသိံ သမ္ဗုဒ္ဓံ၊ ဩဃတိဏ္ဏမနာသဝံ။
‘‘သမ္မဇ္ဇနိံ ဂဟေတွာန၊ သမ္မဇ္ဇိတွာန အဿမံ၊
စတုဒဏ္ဍေ ဌပေတွာန၊ အကာသိံ မဏ္ဍပံ တဒါ။
‘‘သာလပုပ္ဖံ ¶ အာဟရိတွာ၊ မဏ္ဍပံ ဆာဒယိံ အဟံ၊
ပသန္နစိတ္တော သုမနော၊ အဘိဝန္ဒိံ တထာဂတံ။
‘‘ယံ ¶ ဝဒန္တိ သုမေဓောတိ၊ ဘူရိပညံ သုမေဓသံ၊
ဘိက္ခုသင်္ဃေ နိသီဒိတွာ၊ ဣမာ ဂါထာ အဘာသထ။
‘‘‘ဗုဒ္ဓဿ ဂိရမညာယ၊ သဗ္ဗေ ဒေဝါ သမာဂမုံ၊
အသံသယံ ဗုဒ္ဓသေဋ္ဌော၊ ဓမ္မံ ဒေသေတိ စက္ခုမာ။
‘‘‘သုမေဓော နာမ သမ္ဗုဒ္ဓါ၊ အာဟုတီနံ ပဋိဂ္ဂဟော၊
ဒေဝသင်္ဃေ နိသီဒိတွာ၊ ဣမာ ဂါထာ အဘာသထ။
‘‘‘ယော မေ သတ္တာဟံ မဏ္ဍပံ၊ ဓာရယီ သာလဆာဒိတံ၊
တမဟံ ကိတ္တယိဿာမိ၊ သုဏာထ မမ ဘာသတော။
‘‘‘ဒေဝဘူတော မနုဿော ဝါ၊ ဟေမဝဏ္ဏော ဘဝိဿတိ၊
ပဟူတဘောဂေါ ဟုတွာန၊ ကာမဘောဂီ ဘဝိဿတိ။
‘‘‘သဋ္ဌိ ¶ ¶ နာဂသဟဿာနိ၊ သဗ္ဗာလင်္ကာရဘူသိတာ၊
သုဝဏ္ဏကစ္ဆာ မာတင်္ဂါ၊ ဟေမကပ္ပနဝါသသာ။
‘‘‘အာရူဠှာ ဂါမဏီယေဟိ၊ တောမရင်္ကုသပါဏိဘိ၊
သာယံ ပါတော [သာယပါတော (ပီ။)] ဥပဋ္ဌာနံ၊ အာဂမိဿန္တိမံ နရံ၊
တေဟိ နာဂေဟိ ပရိဝုတော၊ ရမိဿတိ အယံ နရော။
‘‘‘သဋ္ဌိ အဿသဟဿာနိ၊ သဗ္ဗာလင်္ကာရဘူသိတာ၊
အာဇာနီယာဝ ဇာတိယာ၊ သိန္ဓဝါ သီဃဝါဟိနော။
‘‘‘အာရူဠှာ ဂါမဏီယေဟိ၊ ဣလ္လိယာစာပဓာရိဘိ၊
ပရိဝါရေဿန္တိမံ နိစ္စံ၊ ဗုဒ္ဓပူဇာယိဒံ ဖလံ။
‘‘‘သဋ္ဌိ ရထသဟဿာနိ၊ သဗ္ဗာလင်္ကာရဘူသိတာ၊
ဒီပါ ¶ အထောပိ ဝေယဂ္ဃာ၊ သန္နဒ္ဓါ ဥဿိတဒ္ဓဇာ။
‘‘‘အာရူဠှာ ဂါမဏီယေဟိ၊ စာပဟတ္ထေဟိ ဝမ္မိဘိ၊
ပရိဝါရေဿန္တိမံ နိစ္စံ၊ ဗုဒ္ဓပူဇာယိဒံ ဖလံ။
‘‘‘သဋ္ဌိ ဂါမသဟဿာနိ၊ ပရိပုဏ္ဏာနိ သဗ္ဗသော၊
ပဟူတဓနဓညာနိ၊ သုသမိဒ္ဓါနိ သဗ္ဗသော၊
သဒါ ပါတုဘဝိဿန္တိ၊ ဗုဒ္ဓပူဇာယိဒံ ဖလံ။
‘‘‘ဟတ္ထီ အဿာ ရထာ ပတ္တီ၊ သေနာ စ စတုရင်္ဂိနီ၊
ပရိဝါရေဿန္တိမံ နိစ္စံ၊ ဗုဒ္ဓပူဇာယိဒံ ဖလံ။
‘‘‘အဋ္ဌာရသေ ကပ္ပသတေ၊ ဒေဝလောကေ ရမိဿတိ၊
သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ။
‘‘‘သတာနံ ¶ တီဏိက္ခတ္တုဉ္စ၊ ဒေဝရဇ္ဇံ ကရိဿတိ၊
ပဒေသရဇ္ဇံ ဝိပုလံ၊ ဂဏနာတော အသင်္ခိယံ။
‘‘‘တိံသကပ္ပသဟဿမှိ၊ ဩက္ကာကကုလသမ္ဘဝေါ၊
ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။
‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊
သဗ္ဗာသဝေ ပရိညာယ၊ ဝိဟရိဿတိနာသဝေါ’။
‘‘တိံသကပ္ပသဟဿမှိ ¶ ၊ အဒ္ဒသံ လောကနာယကံ၊
ဧတ္ထန္တရမုပါဒါယ၊ ဂဝေသိံ အမတံ ပဒံ။
‘‘လာဘာ ¶ မယှံ သုလဒ္ဓံ မေ၊ ယမဟညာသိ သာသနံ၊
တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။
‘‘နမော ¶ တေ ပုရိသာဇည၊ နမော တေ ပုရိသုတ္တမ၊
တဝ ဉာဏံ ပကိတ္တေတွာ၊ ပတ္တောမှိ အစလံ ပဒံ။
‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ၊
သဗ္ဗတ္ထ သုခိတော ဟောမိ၊ ဖလံ မေ ဉာဏကိတ္တနေ။
‘‘ဣဒံ ပစ္ဆိမကံ မယှံ၊ စရိမော ဝတ္တတေ ဘဝေါ၊
နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။
‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊
နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။
‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ၊
တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဘဒ္ဒါလိတ္ထေရော ဣမာ ဂါထာယော အဘာသိတ္ထာတိ။
ဘဒ္ဒါလိတ္ထေရဿာပဒါနံ ပဌမံ။
၂။ ဧကဆတ္တိယတ္ထေရအပဒါနံ
‘‘စန္ဒဘာဂါနဒီတီရေ၊ အဿမော သုကတော မမ၊
သုသုဒ္ဓပုလိနာကိဏ္ဏော၊ ပန္နသာလာ သုမာပိတာ။
‘‘ဥတ္တာနကူလာ နဒိကာ၊ သုပတိတ္ထာ မနောရမာ၊
မစ္ဆကစ္ဆပသမ္ပန္နာ [… သဉ္ဆန္နာ (က။)]၊ သုသုမာရနိသေဝိတာ။
‘‘အစ္ဆာ ¶ ¶ ဒီပီ စ မယူရာ၊ ကရဝီကာ စ သာဠိကာ၊
ကူဇန္တိ သဗ္ဗဒါ ဧတေ၊ သောဘယန္တာ မမဿမံ။
‘‘ကောကိလာ မဉ္ဇုဘာဏီ စ၊ ဟံသာ စ မဓုရဿရာ၊
အဘိကူဇန္တိ တေ တတ္ထ၊ သောဘယန္တာ မမဿမံ။
‘‘သီဟာ ဗျဂ္ဃာ ဝရာဟာ စ၊ အစ္ဆ [ဝက (သီ။ ပီ။)၊ ဗကာ (သျာ။)၊ ဝကာ (က။)] ကောကတရစ္ဆကာ၊
ဂိရိဒုဂ္ဂမှိ နာဒေန္တိ၊ သောဘယန္တာ မမဿမံ။
‘‘ဧဏီမိဂါ ¶ ¶ စ သရဘာ၊ ဘေရဏ္ဍာ သူကရာ ဗဟူ၊
ဂိရိဒုဂ္ဂမှိ နာဒေန္တိ၊ သောဘယန္တာ မမဿမံ။
‘‘ဥဒ္ဒါလကာ စမ္ပကာ စ၊ ပါဋလီ သိန္ဒုဝါရကာ၊
အတိမုတ္တာ အသောကာ စ၊ သောဘယန္တိ မမဿမံ [ပုပ္ဖန္တိ မမ အဿမေ (သီ။ ပီ။)]။
‘‘အင်္ကောလာ ယူထိကာ စေဝ၊ သတ္တလီ ဗိမ္ဗိဇာလိကာ၊
ကဏိကာရာ စ ပုပ္ဖန္တိ၊ သောဘယန္တာ မမဿမံ [ကဏိကာကဏိကာရာ စ၊ ပုပ္ဖန္တိ မမ အဿမေ (သီ။ သျာ။ ပီ။)]။
‘‘နာဂါ သာလာ စ သဠလာ၊ ပုဏ္ဍရီကေတ္ထ ပုပ္ဖိတာ၊
ဒိဗ္ဗဂန္ဓံ သမ္ပဝန္တာ၊ သောဘယန္တိ မမဿမံ။
‘‘အဇ္ဇုနာ အသနာ စေတ္ထ၊ မဟာနာမာ စ ပုပ္ဖိတာ၊
သာလာ စ ကင်္ဂုပုပ္ဖာ စ၊ သောဘယန္တိ မမဿမံ။
‘‘အမ္ဗာ ဇမ္ဗူ စ တိလကာ၊ နိမ္ဗာ စ သာလကလျာဏီ၊
ဒိဗ္ဗဂန္ဓံ သမ္ပဝန္တာ၊ သောဘယန္တိ မမဿမံ။
‘‘အသောကာ စ ကပိဋ္ဌာ စ၊ ဂိရိမာလေတ္ထ [ဘဂိနိမာလေတ္ထ (သီ။ ပီ။)၊ ဘဂိနိမာလာ စ (သျာ။)] ပုပ္ဖိတာ၊
ဒိဗ္ဗဂန္ဓံ သမ္ပဝန္တာ၊ သောဘယန္တိ မမဿမံ။
‘‘ကဒမ္ဗာ ¶ ကဒလီ စေဝ၊ ဣသိမုဂ္ဂါ စ ရောပိတာ၊
ဓုဝံ ဖလာနိ ဓာရေန္တိ၊ သောဘယန္တာ မမဿမံ။
‘‘ဟရီတကာ အာမလကာ၊ အမ္ဗဇမ္ဗုဝိဘီတကာ၊
ကောလာ ဘလ္လာတကာ ဗိလ္လာ၊ ဖလိနော မမ အဿမေ။
‘‘အဝိဒူရေ ¶ ပေါက္ခရဏီ၊ သုပတိတ္ထာ မနောရမာ၊
မန္ဒာလကေဟိ သဉ္ဆန္နာ၊ ပဒုမုပ္ပလကေဟိ စ။
‘‘ဂဗ္ဘံ ဂဏှန္တိ ပဒုမာ၊ အညေ ပုပ္ဖန္တိ ကေသရီ၊
ဩပတ္တကဏ္ဏိကာ စေဝ၊ ပုပ္ဖန္တိ မမ အဿမေ။
‘‘ပါဌီနာ ပါဝုသာ မစ္ဆာ၊ ဗလဇာ မုဉ္ဇရောဟိတာ၊
အစ္ဆောဒကမှိ ဝိစရံ၊ သောဘယန္တိ မမဿမံ။
‘‘နယိတာ အမ္ဗဂန္ဓီ စ၊ အနုကူလေ စ ကေတကာ၊
ဒိဗ္ဗဂန္ဓံ သမ္ပဝန္တာ၊ သောဘယန္တိ မမဿမံ။
‘‘မဓု ဘိသမှာ သဝတိ၊ ခီရသပ္ပိ မုဠာလိဘိ၊
ဒိဗ္ဗဂန္ဓံ သမ္ပဝန္တာ၊ သောဘယန္တိ မမဿမံ။
‘‘ပုလိနာ ¶ သောဘနာ တတ္ထ၊ အာကိဏ္ဏာ ဇလသေဝိတာ၊
ဩပုပ္ဖာ ပုပ္ဖိတာ သေန္တိ၊ သောဘယန္တာ မမဿမံ။
‘‘ဇဋာဘာရေန ¶ ဘရိတာ၊ အဇိနုတ္တရဝါသနာ၊
ဝါကစီရဓရာ သဗ္ဗေ၊ သောဘယန္တိ မမဿမံ။
‘‘ယုဂမတ္တမပေက္ခန္တာ၊ နိပကာ သန္တဝုတ္တိနော၊
ကာမဘောဂေ အနပေက္ခာ၊ ဝသန္တိ မမ အဿမေ။
‘‘ပရူဠှကစ္ဆနခလောမာ ¶ ၊ ပင်္ကဒန္တာ ရဇဿိရာ၊
ရဇောဇလ္လဓရာ သဗ္ဗေ၊ ဝသန္တိ မမ အဿမေ။
‘‘အဘိညာပါရမိပ္ပတ္တာ၊ အန္တလိက္ခစရာ စ တေ၊
ဥဂ္ဂစ္ဆန္တာ နဘံ ဧတေ၊ သောဘယန္တိ မမဿမံ။
‘‘တေဟိ သိဿေဟိ ပရိဝုတော၊ ဝသာမိ ဝိပိနေ တဒါ၊
ရတ္တိန္ဒိဝံ န ဇာနာမိ၊ သဒါ ဈာနသမပ္ပိတော။
‘‘ဘဂဝါ တမှိ သမယေ၊ အတ္ထဒဿီ မဟာမုနိ၊
တမန္ဓကာရံ နာသေန္တော၊ ဥပ္ပဇ္ဇိ လောကနာယကော။
‘‘အထ အညတရော သိဿော၊ အာဂစ္ဆိ မမ သန္တိကံ၊
မန္တေ အဇ္ဈေတုကာမော သော၊ ဆဠင်္ဂံ နာမ လက္ခဏံ။
‘‘ဗုဒ္ဓါ ¶ လောကေ သမုပ္ပန္နော၊ အတ္ထဒဿီ မဟာမုနိ၊
စတုသစ္စံ ပကာသေန္တော၊ ဒေသေတိ အမတံ ပဒံ။
‘‘တုဋ္ဌဟဋ္ဌော ပမုဒိတော၊ ဓမ္မန္တရဂတာသယော၊
အဿမာ အဘိနိက္ခမ္မ၊ ဣဒံ ဝစနမဗြဝိံ။
‘‘‘ဗုဒ္ဓါ လောကေ သမုပ္ပန္နော၊ ဒွတ္တိံသဝရလက္ခဏော၊
ဧထ သဗ္ဗေ ဂမိဿာမ၊ သမ္မာသမ္ဗုဒ္ဓသန္တိကံ’။
‘‘ဩဝါဒပဋိကရာ တေ၊ သဓမ္မေ ပါရမိံ ဂတာ၊
သာဓူတိ သမ္ပဋိစ္ဆိံသု၊ ဥတ္တမတ္ထဂဝေသကာ။
‘‘ဇဋာဘာရဘရိတာ တေ [ဇဋာဘာရေန ဘရိတာ (က။)]၊ အဇိနုတ္တရဝါသနာ၊
ဥတ္တမတ္ထံ ဂဝေသန္တာ၊ နိက္ခမိံသု ဝနာ တဒါ။
‘‘ဘဂဝါ ¶ တမှိ သမယေ၊ အတ္ထဒဿီ မဟာယသော၊
စတုသစ္စံ ပကာသေန္တော၊ ဒေသေတိ အမတံ ပဒံ။
‘‘သေတစ္ဆတ္တံ ¶ ဂဟေတွာန၊ ဗုဒ္ဓသေဋ္ဌဿ ဓာရယိံ၊
ဧကာဟံ ဓာရယိတွာန၊ ဗုဒ္ဓသေဋ္ဌံ အဝန္ဒဟံ။
‘‘အတ္ထဒဿီ တု ဘဂဝါ၊ လောကဇေဋ္ဌော နရာသဘော၊
ဘိက္ခုသင်္ဃေ နိသီဒိတွာ၊ ဣမာ ဂါထာ အဘာသထ။
‘‘‘ယော မေ ဆတ္တံ အဓာရေသိ၊ ပသန္နော သေဟိ ပါဏိဘိ၊
တမဟံ ကိတ္တယိဿာမိ၊ သုဏာထ မမ ဘာသတော။
‘‘‘ဣမဿ ဇာယမာနဿ၊ ဒေဝတ္တေ အထ မာနုသေ၊
ဓာရေဿတိ သဒါ ဆတ္တံ၊ ဆတ္တဒါနဿိဒံ ဖလံ။
‘‘‘သတ္တသတ္တတိကပ္ပာနိ ¶ ၊ ဒေဝလောကေ ရမိဿတိ၊
သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ။
‘‘‘သတ္တသတ္တတိက္ခတ္တုဉ္စ၊ ဒေဝရဇ္ဇံ ကရိဿတိ၊
ပဒေသရဇ္ဇံ ဝိပုလံ၊ ဂဏနာတော အသင်္ခိယံ။
‘‘‘အဋ္ဌာရသေ ကပ္ပသတေ၊ ဂေါတမော သကျပုင်္ဂဝေါ၊
တမန္ဓကာရံ နာသေန္တော၊ ဥပ္ပဇ္ဇိဿတိ စက္ခုမာ။
‘‘‘တဿ ¶ ဓမ္မေသု ဒါယာဒေါ၊ ဩရသော ဓမ္မနိမ္မိတော၊
သဗ္ဗာသဝေ ပရိညာယ၊ ဝိဟရိဿတိနာသဝေါ’။
‘‘ယတော အဟံ ကမ္မမကံ၊ ဆတ္တံ ဗုဒ္ဓဿ ဓာရယံ၊
ဧတ္ထန္တရေ န ဇာနာမိ၊ သေတစ္ဆတ္တံ အဓာရိတံ။
‘‘ဣဒံ ¶ ပစ္ဆိမကံ မယှံ၊ စရိမော ဝတ္တတေ ဘဝေါ၊
ဆတ္တဓာရဏမဇ္ဇာပိ၊ ဝတ္တတေ နိစ္စကာလိကံ။
‘‘အဟော မေ သုကတံ ကမ္မံ၊ အတ္ထဒဿိဿ တာဒိနော၊
သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ။
‘‘ကိလေသာ ဈာပိတာ မယှံ…ပေ… ဝိဟရာမိ အနာသဝေါ။
‘‘သွာဂတံ ဝတ မေ အာသိ…ပေ… ကတံ ဗုဒ္ဓဿ သာသနံ။
‘‘ပဋိသမ္ဘိဒါ စတဿော…ပေ… ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဧကဆတ္တိယော ထေရော ဣမာ ဂါထာယော အဘာသိတ္ထာတိ၊
ဧကဆတ္တိယတ္ထေရဿာပဒါနံ ဒုတိယံ။
၃။ တိဏသူလကဆာဒနိယတ္ထေရအပဒါနံ
‘‘ဇာတိံ ¶ ဇရဉ္စ မရဏံ၊ ပစ္စဝေက္ခိံ အဟံ တဒါ၊
ဧကကော အဘိနိက္ခမ္မ၊ ပဗ္ဗဇိံ အနဂါရိယံ။
‘‘စရမာနောနုပုဗ္ဗေန၊ ဂင်္ဂါတီရံ ဥပါဂမိံ၊
တတ္ထဒ္ဒသာသိံ ပထဝိံ၊ ဂင်္ဂါတီရေ သမုန္နတံ။
‘‘အဿမံ တတ္ထ မာပေတွာ၊ ဝသာမိ အဿမေ အဟံ၊
သုကတော စင်္ကမော မယှံ၊ နာနာဒိဇဂဏာယုတော။
‘‘မမုပေန္တိ စ ဝိဿတ္ထာ၊ ကူဇန္တိ စ မနောဟရံ၊
ရမမာနော သဟ တေဟိ၊ ဝသာမိ အဿမေ အဟံ။
‘‘မမ ¶ အဿမသာမန္တာ၊ မိဂရာဇာ စတုက္ကမော၊
အာသယာ အဘိနိက္ခမ္မ၊ ဂဇ္ဇိ သော အသနီ ဝိယ။
‘‘နဒိတေ ¶ ¶ မိဂရာဇေ စ၊ ဟာသော မေ ဥဒပဇ္ဇထ၊
မိဂရာဇံ ဂဝေသန္တော၊ အဒ္ဒသံ လောကနာယကံ။
‘‘ဒိသွာနာဟံ ဒေဝဒေဝံ၊ တိဿံ လောကဂ္ဂနာယကံ၊
ဟဋ္ဌော ဟဋ္ဌေန စိတ္တေန၊ ပူဇယိံ နာဂကေသရံ။
‘‘ဥဂ္ဂစ္ဆန္တံဝ သူရိယံ၊ သာလရာဇံဝ ပုပ္ဖိတံ၊
ဩသဓိံဝ ဝိရောစန္တံ၊ သန္ထဝိံ လောကနာယကံ။
‘‘‘တဝ ဉာဏေန သဗ္ဗညု၊ မောစေသိမံ သဒေဝကံ၊
တဝံ အာရာဓယိတွာန၊ ဇာတိယာ ပရိမုစ္စရေ။
‘‘‘အဒဿနေန သဗ္ဗညု၊ ဗုဒ္ဓါနံ သဗ္ဗဒဿိနံ၊
ပတန္တိဝီစိနိရယံ၊ ရာဂဒေါသေဟိ ဩဖုဋာ [ဩတ္ထဋာ (သျာ။)]။
‘‘‘တဝ ဒဿနမာဂမ္မ၊ သဗ္ဗညု လောကနာယက၊
ပမုစ္စန္တိ ဘဝါ သဗ္ဗာ၊ ဖုသန္တိ အမတံ ပဒံ။
‘‘‘ယဒါ ဗုဒ္ဓါ စက္ခုမန္တော၊ ဥပ္ပဇ္ဇန္တိ ပဘင်္ကရာ၊
ကိလေသေ ဈာပယိတွာန၊ အာလောကံ ဒဿယန္တိ တေ’။
‘‘ကိတ္တယိတွာန သမ္ဗုဒ္ဓံ၊ တိဿံ လောကဂ္ဂနာယကံ၊
ဟဋ္ဌော ဟဋ္ဌေန စိတ္တေန၊ တိဏသူလံ အပူဇယိံ။
‘‘မမ ¶ ¶ သင်္ကပ္ပမညာယ၊ တိဿော လောကဂ္ဂနာယကော၊
သကာသနေ နိသီဒိတွာ၊ ဣမာ ဂါထာ အဘာသထ။
‘‘‘ယော မံ ပုပ္ဖေဟိ ဆာဒေသိ၊ ပသန္နော သေဟိ ပါဏိဘိ၊
တမဟံ ကိတ္တယိဿာမိ၊ သုဏာထ မမ ဘာသတော။
‘‘‘ပဉ္စဝီသတိက္ခတ္တုံ သော၊ ဒေဝရဇ္ဇံ ကရိဿတိ၊
ပဉ္စသတ္တတိက္ခတ္တုဉ္စ၊ စက္ကဝတ္တီ ဘဝိဿတိ။
‘‘‘ပဒေသရဇ္ဇံ ဝိပုလံ၊ ဂဏနာတော အသင်္ခိယံ၊
တဿ ကမ္မနိဿန္ဒေန [ကမ္မဿ နိဿန္ဒော (သီ။ သျာ။ ပီ။)]၊ ပုပ္ဖာနံ ပူဇနာယ စ [သော (သျာ။ ပီ။)]။
‘‘‘သီသံနှာတော စယံ ပေါသော၊ ပုပ္ဖမာကင်္ခတေ ယဒိ [သာယံ ပါတော စယံ ပေါသော၊ ပုပ္ဖေဟိ မံ အဆာဒယိ (သျာ။)]၊
ပုညကမ္မေန သံယုတ္တံ [သံယုတ္တော (သီ။ သျာ။ ပီ။)]၊ ပုရတော ပါတုဘဝိဿတိ။
‘‘‘ယံ ¶ ယံ ဣစ္ဆတိ ကာမေဟိ၊ တံ တံ ပါတုဘဝိဿတိ၊
သင်္ကပ္ပံ ပရိပူရေတွာ၊ နိဗ္ဗာယိဿတိနာသဝေါ’။
အဋ္ဌာရသမံ ဘာဏဝါရံ။
‘‘ကိလေသေ ဈာပယိတွာန၊ သမ္ပဇာနော ပတိဿတော၊
ဧကာသနေ နိသီဒိတွာ၊ အရဟတ္တမပါပုဏိံ။
‘‘စင်္ကမန္တော ¶ နိပဇ္ဇန္တော၊ နိသိန္နော ဥဒ ဝါ ဌိတော၊
ဗုဒ္ဓသေဋ္ဌံ သရိတွာန၊ ဝိဟရာမိ အဟံ သဒါ။
‘‘စီဝရေ ပိဏ္ဍပါတေ စ၊ ပစ္စယေ သယနာသနေ၊
တတ္ထ မေ ဦနတာ နတ္ထိ၊ ဗုဒ္ဓပူဇာယိဒံ ဖလံ။
‘‘သော ဒါနိ ပတ္တော အမတံ၊ သန္တံ ပဒမနုတ္တရံ၊
သဗ္ဗာသဝေ ပရိညာယ၊ ဝိဟရာမိ အနာသဝေါ။
‘‘ဒွေနဝုတေ ¶ ဣတော ကပ္ပေ၊ ယံ ပုပ္ဖမဘိပူဇယိံ၊
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
‘‘ကိလေသာ ဈာပိတာ မယှံ…ပေ… ဝိဟရာမိ အနာသဝေါ။
‘‘သွာဂတံ ဝတ မေ အာသိ…ပေ… ကတံ ဗုဒ္ဓဿ သာသနံ။
‘‘ပဋိသမ္ဘိဒါ စတဿော…ပေ… ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ တိဏသူလကဆာဒနိယော [တိဏသူလိကဆာဒနိယော (က။)] ထေရော ဣမာ ဂါထာယော အဘာသိတ္ထာတိ။
တိဏသူလကဆာဒနိယတ္ထေရဿာပဒါနံ တတိယံ။
၄။ မဓုမံသဒါယကတ္ထေရအပဒါနံ
‘‘နဂရေ ¶ ဗန္ဓုမတိယာ၊ သူကရိကော အဟောသဟံ၊
ဥက္ကောဋံ ရန္ဓယိတွာန [ဥက္ကောဋကံ ရန္ဓယိတွာ (သီ။ သျာ။)]၊ မဓုမံသမှိ [မဓုသပ္ပိမှိ (ပီ။)၊ မဓုံ မံသမှိ (က။)] ဩကိရိံ။
‘‘သန္နိပါတံ ¶ အဟံ ဂန္တွာ၊ ဧကံ ပတ္တံ ဂဟေသဟံ၊
ပူရယိတွာန တံ ပတ္တံ၊ ဘိက္ခုသင်္ဃဿဒါသဟံ။
‘‘ယောတ္ထ ထေရတရော ဘိက္ခု၊ နိယျာဒေသိ မမံ တဒါ၊
ဣမိနာ ပတ္တပူရေန၊ လဘဿု ဝိပုလံ သုခံ။
‘‘ဒုဝေ သမ္ပတ္တိယော ဘုတွာ၊ သုက္ကမူလေန စောဒိတော၊
ပစ္ဆိမေ ဝတ္တမာနမှိ၊ ကိလေသေ ဈာပယိဿတိ။
‘‘တတ္ထ ¶ စိတ္တံ ပသာဒေတွာ၊ တာဝတိံသမဂစ္ဆဟံ၊
တတ္ထ ဘုတွာ ပိဝိတွာ စ၊ လဘာမိ ဝိပုလံ သုခံ။
‘‘မဏ္ဍပေ ရုက္ခမူလေ ဝါ၊ ပုဗ္ဗကမ္မံ အနုဿရိံ၊
အန္နပါနာဘိဝဿော မေ၊ အဘိဝဿတိ တာဝဒေ။
‘‘ဣဒံ ပစ္ဆိမကံ မယှံ၊ စရိမော ဝတ္တတေ ဘဝေါ၊
ဣဓာပိ အန္နပါနံ မေ၊ ဝဿတေ သဗ္ဗကာလိကံ။
‘‘တေနေဝ မဓုဒါနေန [မံသဒါနေန (သီ။ ပီ။)]၊ သန္ဓာဝိတွာ ဘဝေ အဟံ၊
သဗ္ဗာသဝေ ပရိညာယ၊ ဝိဟရာမိ အနာသဝေါ။
‘‘ဧကနဝုတိတော ¶ ကပ္ပေ၊ ယံ ဒါနမဒဒိံ တဒါ၊
ဒုဂ္ဂတိံ နာဘိဇာနာမိ၊ မဓုဒါနဿိဒံ ဖလံ။
‘‘ကိလေသာ ဈာပိတာ မယှံ…ပေ… ဝိဟရာမိ အနာသဝေါ။
‘‘သွာဂတံ ဝတ မေ အာသိ…ပေ… ကတံ ဗုဒ္ဓဿ သာသနံ။
‘‘ပဋိသမ္ဘိဒါ စတဿော…ပေ… ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ မဓုမံသဒါယကော ထေရော ဣမာ ဂါထာယော အဘာသိတ္ထာတိ။
မဓုမံသဒါယကတ္ထေရဿာပဒါနံ စတုတ္ထံ။
၅။ နာဂပလ္လဝတ္ထေရအပဒါနံ
‘‘နဂရေ ¶ ¶ ဗန္ဓုမတိယာ၊ ရာဇုယျာနေ ဝသာမဟံ၊
မမ အဿမသာမန္တာ၊ နိသီဒိ လောကနာယကော။
‘‘နာဂပလ္လဝမာဒါယ ¶ ၊ ဗုဒ္ဓဿ အဘိရောပယိံ၊
ပသန္နစိတ္တော သုမနော၊ သုဂတံ အဘိဝါဒယိံ။
‘‘ဧကနဝုတိတော ကပ္ပေ၊ ယံ ပလ္လဝမပူဇယိံ၊
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
‘‘ကိလေသာ ဈာပိတာ မယှံ…ပေ… ဝိဟရာမိ အနာသဝေါ။
‘‘သွာဂတံ ဝတ မေ အာသိ…ပေ… ကတံ ဗုဒ္ဓဿ သာသနံ။
‘‘ပဋိသမ္ဘိဒါ စတဿော…ပေ… ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ နာဂပလ္လဝေါ ထေရော ဣမာ ဂါထာယော အဘာသိတ္ထာတိ။
နာဂပလ္လဝတ္ထေရဿာပဒါနံ ပဉ္စမံ။
၆။ ဧကဒီပိယတ္ထေရအပဒါနံ
‘‘ပရိနိဗ္ဗုတေ သုဂတေ၊ သိဒ္ဓတ္ထေ လောကနာယကေ၊
သဒေဝမာနုသာ သဗ္ဗေ၊ ပူဇေန္တိ ဒွိပဒုတ္တမံ။
‘‘အာရောပိတေ ¶ စ စိတကေ၊ သိဒ္ဓတ္ထေ လောကနာယကေ၊
ယထာသကေန ထာမေန၊ စိတံ ပူဇေန္တိ သတ္ထုနော။
‘‘အဝိဒူရေ စိတကဿ၊ ဒီပံ ဥဇ္ဇာလယိံ အဟံ၊
ယာဝ ဥဒေတိ သူရိယော၊ ဒီပံ မေ တာဝ ဥဇ္ဇလိ။
‘‘တေန ကမ္မေန သုကတေန၊ စေတနာပဏိဓီဟိ စ၊
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။
‘‘တတ္ထ မေ သုကတံ ဗျမှံ၊ ဧကဒီပီတိ ဉာယတိ၊
ဒီပသတသဟဿာနိ၊ ဗျမှေ ပဇ္ဇလရေ မမ။
‘‘ဥဒယန္တောဝ ¶ သူရိယော၊ ဒေဟော မေ ဇောတတေ သဒါ၊
သပ္ပဘာဟိ သရီရဿ၊ အာလောကော ဟောတိ မေ သဒါ။
‘‘တိရောကုဋ္ဋံ ¶ [တိရောကုဍ္ဍံ (သီ။ သျာ။ က။)] တိရောသေလံ၊ သမတိဂ္ဂယှ [သဗ္ဗတ္ထပိ ဧဝမေဝ ဒိဿတိ] ပဗ္ဗတံ၊
သမန္တာ ယောဇနသတံ၊ ပဿာမိ စက္ခုနာ အဟံ။
‘‘သတ္တသတ္တတိက္ခတ္တုဉ္စ ¶ ၊ ဒေဝလောကေ ရမိံ အဟံ၊
ဧကတိံသတိက္ခတ္တုဉ္စ၊ ဒေဝရဇ္ဇမကာရယိံ။
‘‘အဋ္ဌဝီသတိက္ခတ္တုဉ္စ၊ စက္ကဝတ္တီ အဟောသဟံ၊
ပဒေသရဇ္ဇံ ဝိပုလံ၊ ဂဏနာတော အသင်္ခိယံ။
‘‘ဒေဝလောကာ စဝိတွာန၊ နိဗ္ဗတ္တိံ မာတုကုစ္ဆိယံ၊
မာတုကုစ္ဆိဂတဿာပိ၊ အက္ခိ မေ န နိမီလတိ။
‘‘ဇာတိယာ စတုဝဿောဟံ၊ ပဗ္ဗဇိံ အနဂါရိယံ၊
အဍ္ဎမာသေ အသမ္ပတ္တေ၊ အရဟတ္တမပါပုဏိံ။
‘‘ဒိဗ္ဗစက္ခုံ ¶ ဝိသောဓေသိံ၊ ဘဝါ သဗ္ဗေ သမူဟတာ၊
သဗ္ဗေ ကိလေသာ သဉ္ဆိန္နာ၊ ဧကဒီပဿိဒံ ဖလံ။
‘‘တိရောကုဋ္ဋံ တိရောသေလံ၊ ပဗ္ဗတဉ္စာပိ ကေဝလံ၊
သမတိက္ကမ္မ [သဗ္ဗတ္ထပီ ဧဝမေဝ ဒိဿတိ] ပဿာမိ၊ ဧကဒီပဿိဒံ ဖလံ။
‘‘ဝိသမာ မေ သမာ ဟောန္တိ၊ အန္ဓကာရော န ဝိဇ္ဇတိ၊
နာဟံ ပဿာမိ တိမိရံ၊ ဧကဒီပဿိဒံ ဖလံ။
‘‘စတုန္နဝုတိတော ကပ္ပေ၊ ယံ ဒီပမဒဒိံ တဒါ၊
ဒုဂ္ဂတိံ နာဘိဇာနာမိ၊ ဧကဒီပဿိဒံ ဖလံ။
‘‘ကိလေသာ ဈာပိတာ မယှံ…ပေ… ဝိဟရာမိ အနာသဝေါ။
‘‘သွာဂတံ ဝတ မေ အာသိ…ပေ… ကတံ ဗုဒ္ဓဿ သာသနံ။
‘‘ပဋိသမ္ဘိဒါ စတဿော…ပေ… ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဧကဒီပိယော ထေရော ဣမာ ဂါထာယော အဘာသိတ္ထာတိ။
ဧကဒီပိယတ္ထေရဿာပဒါနံ ဆဋ္ဌံ။
၇။ ဥစ္ဆင်္ဂပုပ္ဖိယတ္ထေရအပဒါနံ
‘‘နဂရေ ဗန္ဓုမတိယာ၊ အဟောသိံ မာလိကော တဒါ၊
ဥစ္ဆင်္ဂံ ပူရယိတွာန၊ အဂမံ အန္တရာပဏံ။
‘‘ဘဂဝါ ¶ ¶ ¶ တမှိ သမယေ၊ ဘိက္ခုသင်္ဃပုရက္ခတော၊
မဟတာ အာနုဘာဝေန၊ နိယျာတိ လောကနာယကော။
‘‘ဒိသွာန ¶ လောကပဇ္ဇောတံ၊ ဝိပဿိံ လောကတာရဏံ၊
ပုပ္ဖံ ပဂ္ဂယှ ဥစ္ဆင်္ဂါ၊ ဗုဒ္ဓသေဋ္ဌံ အပူဇယိံ။
‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ၊
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
‘‘ကိလေသာ ဈာပိတာ မယှံ…ပေ… ဝိဟရာမိ အနာသဝေါ။
‘‘သွာဂတံ ဝတ မေ အာသိ…ပေ… ကတံ ဗုဒ္ဓဿ သာသနံ။
‘‘ပဋိသမ္ဘိဒါ စတဿော…ပေ… ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဥစ္ဆင်္ဂပုပ္ဖိယော ထေရော ဣမာ ဂါထာယော အဘာသိတ္ထာတိ။
ဥစ္ဆင်္ဂပုပ္ဖိယတ္ထေရဿာပဒါနံ သတ္တမံ။
၈။ ယာဂုဒါယကတ္ထေရအပဒါနံ
‘‘အတိထိံ [အတီတံ (က။)] မေ ဂဟေတွာန၊ အဂစ္ဆိံ ဂါမကံ တဒါ၊
သမ္ပုဏ္ဏနဒိကံ ဒိသွာ၊ သင်္ဃာရာမံ ဥပါဂမိံ။
‘‘အာရညကာ ဓုတဓရာ၊ ဈာယိနော လူခစီဝရာ၊
ဝိဝေကာဘိရတာ ဓီရာ၊ သင်္ဃာရာမေ ဝသန္တိ တေ။
‘‘ဂတိ ¶ တေသံ ဥပစ္ဆိန္နာ၊ သုဝိမုတ္တာန တာဒိနံ၊
ပိဏ္ဍာယ တေ န ဂစ္ဆန္တိ၊ ဩရုဒ္ဓနဒိတာယ ဟိ [ဩရုဒ္ဓနဒိကာယတိံ (သျာ။)]။
‘‘ပသန္နစိတ္တော သုမနော၊ ဝေဒဇာတော ကတဉ္ဇလီ၊
တဏ္ဍုလံ မေ ဂဟေတွာန၊ ယာဂုဒါနံ အဒါသဟံ။
‘‘ပဉ္စန္နံ ယာဂုံ ဒတွာန၊ ပသန္နော သေဟိ ပါဏိဘိ၊
သကကမ္မာဘိရဒ္ဓါဟံ၊ တာဝတိံသမဂစ္ဆဟံ။
‘‘မဏိမယဉ္စ ¶ မေ ဗျမှံ၊ နိဗ္ဗတ္တိ တိဒသေ ဂဏေ၊
နာရီဂဏေဟိ သဟိတော၊ မောဒါမိ ဗျမှမုတ္တမေ။
‘‘တေတ္တိံသက္ခတ္တုံ ဒေဝိန္ဒော၊ ဒေဝရဇ္ဇမကာရယိံ၊
တိံသက္ခတ္တုံ စက္ကဝတ္တီ၊ မဟာရဇ္ဇမကာရယိံ။
‘‘ပဒေသရဇ္ဇံ ¶ ဝိပုလံ၊ ဂဏနာတော အသင်္ခိယံ၊
ဒေဝလောကေ မနုဿေ ဝါ၊ အနုဘောတွာ သယံ [ယသံ (သျာ။)] အဟံ။
‘‘ပစ္ဆိမေ ဘဝေ သမ္ပတ္တေ၊ ပဗ္ဗဇိံ အနဂါရိယံ၊
သဟ ဩရောပိတေ ကေသေ၊ သဗ္ဗံ သမ္ပဋိဝိဇ္ဈဟံ။
‘‘ခယတော ဝယတော စာပိ၊ သမ္မသန္တော ကဠေဝရံ၊
ပုရေ သိက္ခာပဒါဒါနာ၊ အရဟတ္တမပါပုဏိံ။
‘‘သုဒိန္နံ ¶ မေ ဒါနဝရံ၊ ဝါဏိဇ္ဇံ သမ္ပယောဇိတံ၊
တေနေဝ ယာဂုဒါနေန၊ ပတ္တောမှိ အစလံ ပဒံ။
‘‘သောကံ ပရိဒ္ဒဝံ ဗျာဓိံ၊ ဒရထံ စိတ္တတာပနံ၊
နာဘိဇာနာမိ ဥပ္ပန္နံ၊ ယာဂုဒါနဿိဒံ ဖလံ။
‘‘ယာဂုံ ¶ သင်္ဃဿ ဒတွာန၊ ပုညက္ခေတ္တေ အနုတ္တရေ၊
ပဉ္စာနိသံသေ အနုဘောမိ၊ အဟော ယာဂုသုယိဋ္ဌတာ။
‘‘အဗျာဓိတာ ရူပဝတာ၊ ခိပ္ပံ ဓမ္မနိသန္တိတာ [နိဗုဇ္ဈိတာ (သျာ။)]၊
လာဘိတာ အန္နပါနဿ၊ အာယု ပဉ္စမကံ မမ။
‘‘ယော ကောစိ ဝေဒံ ဇနယံ၊ သင်္ဃေ ယာဂုံ ဒဒေယျ သော၊
ဣမာနိ ပဉ္စ ဌာနာနိ၊ ပဋိဂဏှေယျ ပဏ္ဍိတော။
‘‘ကရဏီယံ ကတံ သဗ္ဗံ၊ ဘဝါ ဥဂ္ဃာဋိတာ မယာ၊
သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ။
‘‘သော အဟံ ဝိစရိဿာမိ၊ ဂါမာ ဂါမံ ပုရာ ပုရံ၊
နမဿမာနော သမ္ဗုဒ္ဓံ၊ ဓမ္မဿ စ သုဓမ္မတံ။
‘‘တိံသကပ္ပသဟဿမှိ၊ ယံ ဒါနမဒဒိံ တဒါ၊
ဒုဂ္ဂတိံ နာဘိဇာနာမိ၊ ယာဂုဒါနဿိဒံ ဖလံ။
‘‘ကိလေသာ ¶ ဈာပိတာ မယှံ…ပေ… ဝိဟရာမိ အနာသဝေါ။
‘‘သွာဂတံ ဝတ မေ အာသိ…ပေ… ကတံ ဗုဒ္ဓဿ သာသနံ။
‘‘ပဋိသမ္ဘိဒါ စတဿော…ပေ… ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ယာဂုဒါယကော ထေရော ဣမာ ဂါထာယော အဘာသိတ္ထာတိ။
ယာဂုဒါယကတ္ထေရဿာပဒါနံ အဋ္ဌမံ။
၉။ ပတ္ထောဒနဒါယကတ္ထေရအပဒါနံ
‘‘ဝနစာရီ ¶ ¶ ပုရေ အာသိံ၊ သတတံ ဝနကမ္မိကော၊
ပတ္ထောဒနံ ဂဟေတွာန၊ ကမ္မန္တံ အဂမာသဟံ။
‘‘တတ္ထဒ္ဒသာသိံ သမ္ဗုဒ္ဓံ၊ သယမ္ဘုံ အပရာဇိတံ၊
ဝနာ ပိဏ္ဍာယ နိက္ခန္တံ၊ ဒိသွာ စိတ္တံ ပသာဒယိံ။
‘‘ပရကမ္မာယနေ [ဝယကမ္မာယနေ (က။)] ယုတ္တော၊ ပုညဉ္စ မေ န ဝိဇ္ဇတိ၊
အယံ ပတ္ထောဒနော အတ္ထိ၊ ဘောဇယိဿာမဟံ [ဘောဇယိဿာမိ မံ (သျာ။)] မုနိံ။
‘‘ပတ္ထောဒနံ ဂဟေတွာန၊ သယမ္ဘုဿ အဒါသဟံ၊
မမ နိဇ္ဈာယမာနဿ၊ ပရိဘုဉ္ဇိ တဒါ မုနိ။
‘‘တေန ကမ္မေန သုကတေန၊ စေတနာပဏိဓီဟိ စ၊
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။
‘‘ဆတ္တိံသက္ခတ္တုံ ¶ ဒေဝိန္ဒော၊ ဒေဝရဇ္ဇမကာရယိံ၊
တေတ္တိံသက္ခတ္တုံ ရာဇာ စ၊ စက္ကဝတ္တီ အဟောသဟံ။
‘‘ပဒေသရဇ္ဇံ ဝိပုလံ၊ ဂဏနာတော အသင်္ခိယံ၊
သုခိတော ယသဝါ ဟောမိ၊ ပတ္ထောဒနဿိဒံ ဖလံ။
‘‘ဘဝါဘဝေ သံသရန္တော၊ လဘာမိ အမိတံ ဓနံ၊
ဘောဂေ မေ ဦနတာ နတ္ထိ၊ ပတ္ထောဒနဿိဒံ ဖလံ။
‘‘နဒီသောတပဋိဘာဂါ ¶ ၊ ဘောဂါ နိဗ္ဗတ္တရေ မမ၊
ပရိမေတုံ န သက္ကောမိ၊ ပတ္ထောဒနဿိဒံ ဖလံ။
‘‘ဣမံ ¶ ခါဒ ဣမံ ဘုဉ္ဇ၊ ဣမမှိ သယနေ သယ၊
တေနာဟံ သုခိတော ဟောမိ၊ ပတ္ထောဒနဿိဒံ ဖလံ။
‘‘စတုန္နဝုတိတော ကပ္ပေ၊ ယံ ဒါနမဒဒိံ တဒါ၊
ဒုဂ္ဂတိံ နာဘိဇာနာမိ၊ ပတ္ထောဒနဿိဒံ ဖလံ။
‘‘ကိလေသာ ¶ ဈာပိတာ မယှံ…ပေ… ဝိဟရာမိ အနာသဝေါ။
‘‘သွာဂတံ ဝတ မေ အာသိ…ပေ… ကတံ ဗုဒ္ဓဿ သာသနံ။
‘‘ပဋိသမ္ဘိဒါ စတဿော…ပေ… ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပတ္ထောဒနဒါယကော ထေရော ဣမာ ဂါထာယော အဘာသိတ္ထာတိ။
ပတ္ထောဒနဒါယကတ္ထေရဿာပဒါနံ နဝမံ။
၁၀။ မဉ္စဒါယကတ္ထေရအပဒါနံ
‘‘ပရိနိဗ္ဗုတေ ကာရုဏိကေ၊ သိဒ္ဓတ္ထေ လောကနာယကေ၊
ဝိတ္ထာရိကေ ပါဝစနေ၊ ဒေဝမာနုသသက္ကတေ။
‘‘စဏ္ဍာလော အာသဟံ တတ္ထ၊ အာသန္ဒိပီဌကာရကော၊
တေန ကမ္မေန ဇီဝါမိ၊ တေန ပေါသေမိ ဒါရကေ။
‘‘အာသန္ဒိံ သုကတံ ကတွာ၊ ပသန္နော သေဟိ ပါဏိဘိ၊
သယမေဝုပဂန္တွာန၊ ဘိက္ခုသင်္ဃဿဒါသဟံ။
‘‘တေန ¶ ကမ္မေန သုကတေန၊ စေတနာပဏိဓီဟိ စ၊
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။
‘‘ဒေဝလောကဂတော သန္တော၊ မောဒါမိ တိဒသေ ဂဏေ၊
သယနာနိ မဟဂ္ဃာနိ၊ နိဗ္ဗတ္တန္တိ ယဒိစ္ဆကံ။
‘‘ပညာသက္ခတ္တုံ ဒေဝိန္ဒော၊ ဒေဝရဇ္ဇမကာရယိံ၊
အသီတိက္ခတ္တုံ ရာဇာ စ၊ စက္ကဝတ္တီ အဟောသဟံ။
‘‘ပဒေသရဇ္ဇံ ¶ ¶ ဝိပုလံ၊ ဂဏနာတော အသင်္ခိယံ၊
သုခိတော ယသဝါ ဟောမိ၊ မဉ္စဒါနဿိဒံ ဖလံ။
‘‘ဒေဝလောကာ စဝိတွာန၊ ဧမိ စေ မာနုသံ ဘဝံ၊
မဟာရဟာ သုသယနာ၊ သယမေဝ ဘဝန္တိ မေ။
‘‘အယံ ပစ္ဆိမကော မယှံ၊ စရိမော ဝတ္တတေ ဘဝေါ၊
အဇ္ဇာပိ သယနေ ကာလေ [သယနကာလေ (သျာ။)]၊ သယနံ ဥပတိဋ္ဌတိ။
‘‘စတုန္နဝုတိတော ကပ္ပေ၊ ယံ ဒါနမဒဒိံ တဒါ၊
ဒုဂ္ဂတိံ နာဘိဇာနာမိ၊ မဉ္စဒါနဿိဒံ ဖလံ။
‘‘ကိလေသာ ¶ ဈာပိတာ မယှံ…ပေ… ဝိဟရာမိ အနာသဝေါ။
‘‘သွာဂတံ ဝတ မေ အာသိ…ပေ… ကတံ ဗုဒ္ဓဿ သာသနံ။
‘‘ပဋိသမ္ဘိဒါ စတဿော…ပေ… ကတံ ဗုဒ္ဓဿ သာသနံ’’။
ဣတ္ထံ ¶ သုဒံ အာယသ္မာ မဉ္စဒါယကော ထေရော ဣမာ ဂါထာယော
အဘာသိတ္ထာတိ။
မဉ္စဒါယကတ္ထေရဿာပဒါနံ ဒသမံ။
ဘဒ္ဒါလိဝဂ္ဂေါ ဗာစတ္တာလီသမော။
တဿုဒ္ဒါနံ –
ဘဒ္ဒါလီ ဧကဆတ္တော စ၊ တိဏသူလော စ မံသဒေါ၊
နာဂပလ္လဝိကော ဒီပီ၊ ဥစ္ဆင်္ဂိ ယာဂုဒါယကော။
ပတ္ထောဒနီ မဉ္စဒဒေါ၊ ဂါထာယော ဂဏိတာ စိဟ၊
ဒွေသတာနိ စ ဂါထာနံ၊ ဂါထာ စေကာ တဒုတ္တရိ။