📜

၂၈။ ဗုဒ္ဓပကိဏ္ဏကကထာ

၁-၁၈။

‘‘အပရိမေယျိတော ကပ္ပေ၊ စတုရော အာသုံ ဝိနာယကာ’’တိအာဒိကာ အဋ္ဌာရသဂါထာ သင်္ဂီတိကာရကေဟိ ဌပိတာ နိဂမနဂါထာတိ ဝေဒိတဗ္ဗာ။ သေသဂါထာသု သဗ္ဗတ္ထ ပါကဋမေဝါတိ။

ဝေမတ္တကထာ

ဣမသ္မိံ ပန သကလေပိ ဗုဒ္ဓဝံသေ နိဒ္ဒိဋ္ဌာနံ ပဉ္စဝီသတိယာ ဗုဒ္ဓါနံ အဋ္ဌ ဝေမတ္တာနိ ဝေဒိတဗ္ဗာနိ။ ကတမာနိ အဋ္ဌ? အာယုဝေမတ္တံ၊ ပမာဏဝေမတ္တံ၊ ကုလဝေမတ္တံ၊ ပဓာနဝေမတ္တံ၊ ရသ္မိဝေမတ္တံ၊ ယာနဝေမတ္တံ၊ ဗောဓိဝေမတ္တံ၊ ပလ္လင်္ကဝေမတ္တန္တိ။

တတ္ထ အာယုဝေမတ္တံ နာမ ကေစိ ဒီဃာယုကာ ဟောန္တိ ကေစိ အပ္ပာယုကာ။ တထာ ဟိ ဒီပင်္ကရော ကောဏ္ဍညော အနောမဒဿီ ပဒုမော ပဒုမုတ္တရော အတ္ထဒဿီ ဓမ္မဒဿီ သိဒ္ဓတ္ထော တိဿောတိ ဣမေ နဝ ဗုဒ္ဓါ ဝဿသတသဟဿာယုကာ အဟေသုံ။ မင်္ဂလော သုမနော သောဘိတော နာရဒေါ သုမေဓော သုဇာတော ပိယဒဿီ ဖုဿောတိ ဣမေ အဋ္ဌ ဗုဒ္ဓါ နဝုတိဝဿသဟဿာယုကာ အဟေသုံ။ ရေဝတော ဝေဿဘူ စာတိ ဣမေ ဒွေ ဗုဒ္ဓါ သဋ္ဌိဝဿသဟဿာယုကာ အဟေသုံ။ ဝိပဿီ ဘဂဝါ အသီတိဝဿသဟဿာယုကာ အဟောသိ။ သိခီ ကကုသန္ဓော ကောဏာဂမနော ကဿပေါတိ ဣမေ စတ္တာရော ဗုဒ္ဓါ ယထာက္ကမေန သတ္တတိစတ္တာလီသတိံသဝီသဝဿသဟဿာယုကာ အဟေသုံ။ အမှာကံ ပန ဘဂဝတော ဝဿသတံ အာယုပ္ပမာဏံ အဟောသိ။ ဥပစိတပုညသမ္ဘာရာနံ ဒီဃာယုကသံဝတ္တနိယကမ္မသမုပေတာနမ္ပိ ဗုဒ္ဓါနံ ယုဂဝသေန အာယုပ္ပမာဏံ အပ္ပမာဏံ အဟောသိ။ အယံ ပဉ္စဝီသတိယာ ဗုဒ္ဓါနံ အာယုဝေမတ္တံ နာမ။

ပမာဏဝေမတ္တံ နာမ ကေစိ ဒီဃာ ဟောန္တိ ကေစိ ရဿာ။ တထာ ဟိ ဒီပင်္ကရ-ရေဝတ-ပိယဒဿီ-အတ္ထဒဿီ-ဓမ္မဒဿီ-ဝိပဿီဗုဒ္ဓါနံ အသီတိဟတ္ထုဗ္ဗေဓံ သရီရပ္ပမာဏံ အဟောသိ။ ကောဏ္ဍည-မင်္ဂလ-နာရဒ-သုမေဓာနံ အဋ္ဌာသီတိဟတ္ထုဗ္ဗေဓော ကာယော အဟောသိ။ သုမနဿ နဝုတိဟတ္ထုဗ္ဗေဓံ သရီရံ အဟောသိ။ သောဘိတ-အနောမဒဿီ-ပဒုမ-ပဒုမုတ္တရ-ဖုဿဗုဒ္ဓါနံ အဋ္ဌပဏ္ဏာသဟတ္ထုဗ္ဗေဓံ သရီရံ အဟောသိ။ သုဇာတော ပဏ္ဏာသဟတ္ထုဗ္ဗေဓသရီရော အဟောသိ။ သိဒ္ဓတ္ထ-တိဿ-ဝေဿဘုနော သဋ္ဌိဟတ္ထုဗ္ဗေဓာ အဟေသုံ။ သိခီ သတ္တတိဟတ္ထုဗ္ဗေဓော အဟောသိ။ ကကုသန္ဓ-ကောဏာဂမန-ကဿပါ ယထာက္ကမေန စတ္တာလီသတိံသဝီသတိဟတ္ထုဗ္ဗေဓာ အဟေသုံ။ အမှာကံ ဘဂဝါ အဋ္ဌာရသဟတ္ထုဗ္ဗေဓော အဟောသိ။ အယံ ပဉ္စဝီသတိယာ ဗုဒ္ဓါနံ ပမာဏဝေမတ္တံ နာမ။

ကုလဝေမတ္တံ နာမ ကေစိ ခတ္တိယကုလေ နိဗ္ဗတ္တိံသု ကေစိ ဗြာဟ္မဏကုလေ။ တထာ ဟိ ကကုသန္ဓကောဏာဂမနကဿပသမ္မာသမ္ဗုဒ္ဓါ ဗြာဟ္မဏကုလေ နိဗ္ဗတ္တိံသု။ ဒီပင်္ကရာဒိဂေါတမဗုဒ္ဓပရိယန္တာ ဒွါဝီသတိ ဗုဒ္ဓါ ခတ္တိယကုလေယေဝ နိဗ္ဗတ္တိံသု။ အယံ ပဉ္စဝီသတိယာ ဗုဒ္ဓါနံ ကုလဝေမတ္တံ နာမ။

ပဓာနဝေမတ္တံ နာမ ဒီပင်္ကရ-ကောဏ္ဍည-သုမန-အနောမဒဿီ-သုဇာတသိဒ္ဓတ္ထ-ကကုသန္ဓာနံ ဒသမာသိကာ ပဓာနစရိယာ။ မင်္ဂလ-သုမေဓတိဿ သိခီနံ အဋ္ဌမာသိကာ။ ရေဝတဿ သတ္တမာသိကာ။ သောဘိတဿ စတ္တာရော မာသာ။ ပဒုမအတ္ထဒဿီ ဝိပဿီနံ အဍ္ဎမာသိကာ။ နာရဒ-ပဒုမုတ္တရ-ဓမ္မဒဿီ-ကဿပါနံ သတ္တာဟာနိ ။ ပိယဒဿီ-ဖုဿ-ဝေဿဘူ ကောဏာဂမနာနံ ဆမာသိကာ။ အမှာကံ ဗုဒ္ဓဿ ဆဗ္ဗဿာနိ ပဓာနစရိယာ အဟောသိ။ အယံ ပဓာနဝေမတ္တံ နာမ။

ရသ္မိဝေမတ္တံ နာမ မင်္ဂလဿ ကိရ သမ္မာသမ္ဗုဒ္ဓဿ သရီရသ္မိ ဒသသဟဿိလောကဓာတုံ ဖရိတွာ အဋ္ဌာသိ။ ပဒုမုတ္တရဗုဒ္ဓဿ ဒွါဒသယောဇနိကာ အဟောသိ။ ဝိပဿိဿ ဘဂဝတော သတ္တယောဇနိကာ အဟောသိ။ သိခိဿ တိယောဇနပ္ပမာဏာ။ ကကုသန္ဓဿ ဒသယောဇနိကာ။ အမှာကံ ဘဂဝတော သမန္တတော ဗျာမပ္ပမာဏာ။ သေသာနံ အနိယတာ အဟောသိ။ အယံ ရသ္မိဝေမတ္တံ နာမ အဇ္ဈာသယပဋိဗဒ္ဓံ၊ ယော ယတ္တကံ ဣစ္ဆတိ၊ တဿ သရီရပ္ပဘာ တတ္တကံ ဖရတိ၊ ပဋိဝိဒ္ဓဂုဏေ ပန ကဿစိ ဝေမတ္တံ နာမ နတ္ထိ။ အယံ ရသ္မိဝေမတ္တံ နာမ။

ယာနဝေမတ္တံ နာမ ကေစိ ဟတ္ထိယာနေန ကေစိ အဿယာနေန ကေစိ ရထပဒ-ပါသာဒ-သိဝိကာဒီသု အညတရေန နိက္ခမန္တိ။ တထာ ဟိ ဒီပင်္ကရ-သုမန-သုမေဓ-ဖုဿ-သိခီ-ကောဏာဂမနာ ဟတ္ထိယာနေန နိက္ခမိံသု။ ကောဏ္ဍည-ရေဝတ-ပဒုမ-ပိယဒဿီ-ဝိပဿီ-ကကုသန္ဓာ ရထယာနေန။ မင်္ဂလ-သုဇာတ-အတ္ထဒဿီ-တိဿ-ဂေါတမာ အဿယာနေန။ အနောမဒဿီသိဒ္ဓတ္ထဝေဿဘုနော သိဝိကာယာနေန။ နာရဒေါ ပဒသာ နိက္ခမိ။ သောဘိတ-ပဒုမုတ္တရ-ဓမ္မဒဿီ-ကဿပါ ပါသာဒေန နိက္ခမိံသု။ အယံ ယာနဝေမတ္တံ နာမ။

ဗောဓိဝေမတ္တံ နာမ ဒီပင်္ကရဿ ဘဂဝတော ကပီတနရုက္ခော ဗောဓိ၊ ကောဏ္ဍညဿ ဘဂဝတော သာလကလျာဏိရုက္ခော ၊ မင်္ဂလ-သုမန-ရေဝတ-သောဘိတာနံ နာဂရုက္ခော၊ အနောမဒဿိဿ အဇ္ဇုနရုက္ခော၊ ပဒုမနာရဒါနံ မဟာသောဏရုက္ခော၊ ပဒုမုတ္တရဿ သလလရုက္ခော၊ သုမေဓဿ နီပေါ၊ သုဇာတဿ ဝေဠု၊ ပိယဒဿိနော ကကုဓော၊ အတ္ထဒဿိဿ စမ္ပကရုက္ခော၊ ဓမ္မဒဿိဿ ရတ္တကုရဝကရုက္ခော၊ သိဒ္ဓတ္ထဿ ကဏိကာရရုက္ခော၊ တိဿဿ အသနရုက္ခော၊ ဖုဿဿ အာမလကရုက္ခော၊ ဝိပဿိဿ ပါဋလိရုက္ခော၊ သိခိဿ ပုဏ္ဍရီကရုက္ခော၊ ဝေဿဘုဿ သာလရုက္ခော၊ ကကုသန္ဓဿ သိရီသရုက္ခော၊ ကောဏာဂမနဿ ဥဒုမ္ဗရရုက္ခော၊ ကဿပဿ နိဂြောဓော၊ ဂေါတမဿ အဿတ္ထောတိ အယံ ဗောဓိဝေမတ္တံ နာမ။

ပလ္လင်္ကဝေမတ္တံ နာမ ဒီပင်္ကရ-ရေဝတ-ပိယဒဿီ-အတ္ထဒဿီ-ဓမ္မဒဿီ-ဝိပဿီနံ တေပဏ္ဏာသဟတ္ထပလ္လင်္ကာ အဟေသုံ၊ ကောဏ္ဍည-မင်္ဂလ-နာရဒ-သုမေဓာနံ သတ္တပဏ္ဏာသဟတ္ထာ၊ သုမနဿ သဋ္ဌိဟတ္ထော ပလ္လင်္ကော အဟောသိ၊ သောဘိတ-အနောမဒဿီ-ပဒုမ-ပဒုမုတ္တရ-ဖုဿာနံ အဋ္ဌတ္တိံသဟတ္ထာ၊ သုဇာတဿ ဒွတ္တိံသဟတ္ထော၊ သိဒ္ဓတ္ထ-တိဿ-ဝေဿဘူနံ စတ္တာလီသဟတ္ထာ၊ သိခိဿ ဒွတ္တိံသဟတ္ထော ၊ ကကုသန္ဓဿ ဆဗ္ဗီသတိဟတ္ထော၊ ကောဏာဂမနဿ ဝီသတိဟတ္ထော၊ ကဿပဿ ပန္နရသဟတ္ထော၊ ဂေါတမဿ စုဒ္ဒသဟတ္ထော ပလ္လင်္ကော အဟောသိ။ အယံ ပလ္လင်္ကဝေမတ္တံ နာမ။ ဣမာနိ အဋ္ဌ ဝေမတ္တာနိ နာမ။

အဝိဇဟိတဋ္ဌာနကထာ

သဗ္ဗဗုဒ္ဓါနံ ပန စတ္တာရိ အဝိဇဟိတဋ္ဌာနာနိ နာမ ဟောန္တိ။ သဗ္ဗဗုဒ္ဓါနဉှိ ဗောဓိပလ္လင်္ကော အဝိဇဟိတော ဧကသ္မိံယေဝ ဌာနေ ဟောတိ။ ဓမ္မစက္ကပ္ပဝတ္တနံ ဣသိပတနေ မိဂဒါယေ အဝိဇဟိတမေဝ ဟောတိ။ ဒေဝေါရောဟဏကာလေ သင်္ကဿနဂရဒွါရေ ပဌမက္ကပါဒဋ္ဌာနံ အဝိဇဟိတမေဝ ဟောတိ။ ဇေတဝနေ ဂန္ဓကုဋိယာ စတ္တာရိ မဉ္စပါဒဋ္ဌာနာနိ အဝိဇဟိတာနေဝ ဟောန္တိ။ ဝိဟာရော ပန ခုဒ္ဒကောပိ မဟန္တောပိ ဟောတိ။ ဝိဟာရော န ဝိဇဟတိယေဝ၊ နဂရံ ပန ဝိဇဟတိ။

သဟဇာတပရိစ္ဆေဒ-နက္ခတ္တပရိစ္ဆေဒကထာ

အပရံ ပန အမှာကံယေဝ ဘဂဝတော သဟဇာတပရိစ္ဆေဒဉ္စ နက္ခတ္တပရိစ္ဆေဒဉ္စ ဒီပေသုံ။ အမှာကံ သဗ္ဗညုဗောဓိသတ္တေန ကိရ သဒ္ဓိံ ရာဟုလမာတာ အာနန္ဒတ္ထေရော ဆန္နော ကဏ္ဍကော အဿရာဇာ နိဓိကုမ္ဘော မဟာဗောဓိ ကာဠုဒါယီတိ ဣမာနိ သတ္တ သဟဇာတာနိ။ အယံ သဟဇာတပရိစ္ဆေဒေါ။ မဟာပုရိသော ပန ဥတ္တရာသာဠှနက္ခတ္တေနေဝ မာတုကုစ္ဆိံ ဩက္ကမိ၊ မဟာဘိနိက္ခမနံ နိက္ခမိ၊ ဓမ္မစက္ကံ ပဝတ္တေသိ၊ ယမကပါဋိဟာရိယံ အကာသိ။ ဝိသာခနက္ခတ္တေန ဇာတော စ အဘိသမ္ဗုဒ္ဓါ စ ပရိနိဗ္ဗုတော စ။ မာဃနက္ခတ္တေန တဿ သာဝကသန္နိပါတော စ အာယုသင်္ခါရဝေါသဇ္ဇနဉ္စ အဟောသိ။ အဿယုဇနက္ခတ္တေန ဒေဝေါရောဟဏံ။ အယံ နက္ခတ္တပရိစ္ဆေဒေါတိ။

သဓမ္မတာကထာ

ဣဒါနိ ပန သဗ္ဗေသံ ဗုဒ္ဓါနံ သာဓာရဏဓမ္မတံ ပကာသယိဿာမ။ သဗ္ဗဗုဒ္ဓါနံ သမတ္တိံသဝိဓာ ဓမ္မတာ။ သေယျထိဒံ – ပစ္ဆိမဘဝိကဗောဓိသတ္တဿ သမ္ပဇာနဿ မာတုကုစ္ဆိဩက္ကမနံ၊ မာတုကုစ္ဆိယံ ပလ္လင်္ကေန နိသီဒိတွာ ဗဟိမုခေါလောကနံ၊ ဌိတာယ ဗောဓိသတ္တမာတုယာ ဝိဇာယနံ၊ အရညေယေဝ မာတုကုစ္ဆိတော နိက္ခမနံ၊ ကဉ္စနပဋ္ဋေသု ပတိဋ္ဌိတပါဒါနံ ဥတ္တရာဘိမုခါနံ သတ္တပဒဝီတိဟာရာနံ ဂန္တွာ စတုဒ္ဒိသံ ဩလောကေတွာ သီဟနာဒနဒနံ၊ စတ္တာရိ နိမိတ္တာနိ ဒိသွာ ဇာတမတ္တပုတ္တာနံ မဟာသတ္တာနံ မဟာဘိနိက္ခမနံ၊ အရဟဒ္ဓဇမာဒါယ ပဗ္ဗဇိတွာ သဗ္ဗဟေဋ္ဌိမေန ပရိစ္ဆေဒေန သတ္တာဟံ ပဓာနစရိယာ၊ သမ္ဗောဓိံ ပါပုဏနဒိဝသေ ပါယာသဘောဇနံ၊ တိဏသန္ထရေ နိသီဒိတွာ သဗ္ဗညုတညာဏာဓိဂမော၊ အာနာပါနဿတိကမ္မဋ္ဌာနပရိကမ္မံ၊ မာရဗလဝိဒ္ဓံသနံ၊ ဗောဓိပလ္လင်္ကေယေဝ တိဿော ဝိဇ္ဇာ အာဒိံ ကတွာ အသာဓာရဏဉာဏာဒိဂုဏပဋိလာဘော၊ သတ္တသတ္တာဟံ ဗောဓိသမီပေယေဝ ဝီတိနာမနံ၊ မဟာဗြဟ္မုနော ဓမ္မဒေသနတ္ထာယ အာယာစနံ၊ ဣသိပတနေ မိဂဒါယေ ဓမ္မစက္ကပ္ပဝတ္တနံ၊ မာဃပုဏ္ဏမာယ စတုရင်္ဂိကသန္နိပါတေ ပါတိမောက္ခုဒ္ဒေသော၊ ဇေတဝနဋ္ဌာနေ နိဗဒ္ဓဝါသော၊ သာဝတ္ထိနဂရဒွါရေ ယမကပါဋိဟာရိယကရဏံ၊ တာဝတိံသဘဝနေ အဘိဓမ္မဒေသနာ၊ သင်္ကဿနဂရဒွါရေ ဒေဝလောကတော ဩတရဏံ သတတံ ဖလသမာပတ္တိသမာပဇ္ဇနံ၊ ဒွီသု ဝါရေသု ဝေနေယျဇနာဝလောကနံ၊ ဥပ္ပန္နေ ဝတ္ထုမှိ သိက္ခာပဒပညာပနံ ဥပ္ပန္နာယ အဋ္ဌုပ္ပတ္တိယာ ဇာတကကထနံ၊ ဉာတိသမာဂမေ ဗုဒ္ဓဝံသကထနံ၊ အာဂန္တုကေဟိ ဘိက္ခူဟိ ပဋိသန္ထာရကရဏံ၊ နိမန္တိတာနံ ဝုဋ္ဌဝဿာနံ အနာပုစ္ဆာ အဂမနံ၊ ဒိဝသေ ဒိဝသေ ပုရေဘတ္တပစ္ဆာဘတ္တပဌမမဇ္ဈိမပစ္ဆိမယာမကိစ္စကရဏံ၊ ပရိနိဗ္ဗာနဒိဝသေ မံသရသဘောဇနံ၊ စတုဝီသတိကောဋိသတသဟဿသမာပတ္တိယော သမာပဇ္ဇိတွာ ပရိနိဗ္ဗာနန္တိ ဣမာ သမတ္တိံသ သဗ္ဗဗုဒ္ဓါနံ ဓမ္မတာတိ။

အနန္တရာယိကဓမ္မကထာ

သဗ္ဗဗုဒ္ဓါနံ စတ္တာရော အနန္တရာယိကာ ဓမ္မာ။ ကတမေ စတ္တာရော? ဗုဒ္ဓါနံ ဥဒ္ဒိဿ အဘိဟဋာနံ စတုန္နံ ပစ္စယာနံ န သက္ကာ ကေနစိ အန္တရာယော ကာတုံ။ ဗုဒ္ဓါနံ အာယုနော န သက္ကာ ကေနစိ အန္တရာယော ကာတုံ။ ဝုတ္တဉှေတံ – ‘‘အဋ္ဌာနမေတံ အနဝကာသော၊ ယံ ပရူပက္ကမေန တထာဂတံ ဇီဝိတာ ဝေါရောပေယျာ’’တိ (စူဠဝ။ ၃၄၂)။ ဗုဒ္ဓါနံ ဒွတ္တိံသမဟာပုရိသလက္ခဏာနံ အသီတိယာ အနုဗျဉ္ဇနာနဉ္စ န သက္ကာ ကေနစိ အန္တရာယော ကာတုံ။ ဗုဒ္ဓရံသီနံ န သက္ကာ ကေနစိ အန္တရာယော ကာတုန္တိ။ ဣမေ စတ္တာရော အနန္တရာယိကာ ဓမ္မာ နာမာတိ။

နိဂမနကထာ

ဧတ္တာဝတာ ဂတာ သိဒ္ဓိံ၊ ဗုဒ္ဓဝံသဿ ဝဏ္ဏနာ၊

သုဝဏ္ဏပဒဝိညာတဝိစိတ္တနယသောဘိတာ။

ပေါရာဏဋ္ဌကထာမဂ္ဂံ၊ ပါဠိအတ္ထပ္ပကာသကံ၊

အာဒါယေဝ ကတာ ဗုဒ္ဓ-ဝံသဿဋ္ဌကထာ မယာ။

ပပဉ္စတ္ထံ ဝိဝဇ္ဇေတွာ၊ မဓုရတ္ထဿ သဗ္ဗသော၊

သမ္ပကာသနတော တသ္မာ၊ မဓုရတ္ထပ္ပကာသိနီ။

ကာဝီရဇလသမ္ပာတ-ပရိပူတမဟီတလေ၊

ကာဝီရပဋ္ဋနေ ရမ္မေ၊ နာနာနာရိနရာကုလေ။

ကာရိတေ ကဏှဒါသေန၊ သဏှဝါစေန သာဓုနာ၊

ဝိဟာရေ ဝိဝိဓာကာရ-စာရုပါကာရဂေါပုရေ။

ဆာယာသလိလသမ္ပန္နေ၊ ဒဿနီယေ မနောရမေ၊

ဟတဒုဇ္ဇနသမ္ဗာဓေ၊ ပဝိဝေကသုခေ သိဝေ။

တတ္ထ ပါစီနပါသာဒ-တလေ ပရမသီတလေ၊

ဝသတာ ဗုဒ္ဓဝံသဿ၊ မယာ သံဝဏ္ဏနာ ကတာ။

ယထာ ဗုဒ္ဓဝံသဿ သံဝဏ္ဏနာယံ၊ ဂတာ သာဓု သိဒ္ဓိံ ဝိနာ အန္တရာယံ၊

တထာ ဓမ္မယုတ္တာ ဇနာနံ ဝိတက္ကာ၊ ဝိနာဝန္တရာယေန သိဒ္ဓိံ ဝဇန္တု။

ဣမံ ဗုဒ္ဓဝံသဿ သံဝဏ္ဏနံ မေ၊ ကရောန္တေန ယံ ပတ္ထိတံ ပုညဇာတံ၊

သဒါ တဿ ဒေဝါနုဘာဝေန လောကော၊ ဓုဝံ သန္တမစ္စန္တမတ္ထံ ပယာတံ။

ဝိနဿန္တု ရောဂါ မနုဿေသု သဗ္ဗေ၊ ပဝဿန္တု ဒေဝါပိ ဝဿန္တကာလေ၊

သုခံ ဟောတု နိစ္စံ ဝရံ နာရကာပိ၊ ပိသာစာပယာတာ ပိပါသာ ဘဝန္တု။

သုရာ အစ္ဆရာနံ ဂဏာဒီဟိ သဒ္ဓိံ၊ စိရံ ဒေဝလောကေ သုခံ စာနုဘောန္တု၊

စိရံ ဌာတု ဓမ္မော မုနိန္ဒဿ လောကေ၊ သုခံ လောကပါလာ မဟိံ ပါလယန္တု။

ဂရူဟိ ဂီတနာမေန၊ ဗုဒ္ဓဒတ္တောတိ ဝိဿုတော၊

ထေရော ကတွာ အဋ္ဌကထံ၊ မဓုရတ္ထဝိလာသိနိံ။

ပေါတ္ထကံ ဌပယိတွေမံ၊ ပရမ္ပရေ ဟိတာဝဟံ၊

အစိရဋ္ဌိတဘာဝေန၊ အဟော မစ္စုဝသံ ဂတော။

ဣတိ ဘာဏဝါရဝသေန ဆဗ္ဗီသတိဘာဏဝါရာ၊ ဂန္ထဝသေန ပဉ္စသတာဓိကဆသဟဿဂန္ထာ၊ အက္ခရဝသေန တိသဟဿာဓိကာနိ ဒွေသတသဟဿက္ခရာနိ။

အန္တရာယံ ဝိနာ ဧသာ၊ ယထာ နိဋ္ဌံ ဥပါဂတာ၊

တထာ သိဇ္ဈန္တု သင်္ကပ္ပာ၊ သတ္တာနံ ဓမ္မနိဿိတာတိ။

ဣတိ မဓုရတ္ထဝိလာသိနီ နာမ

ဗုဒ္ဓဝံသ-အဋ္ဌကထာ နိဋ္ဌိတာ။