📜

၅။ ပဉ္စကနိပါတော

၁။ မဏိကုဏ္ဍလဝဂ္ဂေါ

[၃၅၁] ၁။ မဏိကုဏ္ဍလဇာတကဝဏ္ဏနာ

ဇီနောရထဿံ မဏိကုဏ္ဍလေ စာတိ ဣဒံ သတ္ထာ ဇေတဝနေ ဝိဟရန္တော ကောသလရညော အန္တေပုရေ သဗ္ဗတ္ထသာဓကံ ပဒုဋ္ဌာမစ္စံ အာရဗ္ဘ ကထေသိ။ ဝတ္ထု ဟေဋ္ဌာ ဝိတ္ထာရိတမေဝ။ ဣဓ ပန ဗောဓိသတ္တော ဗာရာဏသိရာဇာ အဟောသိ။ ပဒုဋ္ဌာမစ္စော ကောသလရာဇာနံ အာနေတွာ ကာသိရဇ္ဇံ ဂါဟာပေတွာ ဗာရာဏသိရာဇာနံ ဗန္ဓာပေတွာ ဗန္ဓနာဂါရေ ပက္ခိပါပေသိ။ ရာဇာ ဈာနံ ဥပ္ပာဒေတွာ အာကာသေ ပလ္လင်္ကေန နိသီဒိ၊ စောရရညော သရီရေ ဍာဟော ဥပ္ပဇ္ဇိ။ သော ဗာရာဏသိရာဇာနံ ဥပသင်္ကမိတွာ ပဌမံ ဂါထမာဟ –

၁။

‘‘ဇီနော ရထဿံ မဏိကုဏ္ဍလေ စ၊ ပုတ္တေ စ ဒါရေ စ တထေဝ ဇီနော၊

သဗ္ဗေသု ဘောဂေသု အသေသကေသု၊ ကသ္မာ န သန္တပ္ပသိ သောကကာလေ’’တိ။

တတ္ထ ဇီနော ရထဿံ မဏိကုဏ္ဍလေ စာတိ မဟာရာဇ၊ တွံ ရထဉ္စ အဿဉ္စ မဏိကုဏ္ဍလာနိ စ ဇီနော၊ ‘‘ဇီနော ရထဿေ စ မဏိကုဏ္ဍလေ စာ’’တိပိ ပါဌော။ အသေသကေသူတိ နိဿေသကေသု။

တံ သုတွာ ဗောဓိသတ္တော ဣမာ ဒွေ ဂါထာ အဘာသိ –

၂။

‘‘ပုဗ္ဗေဝ မစ္စံ ဝိဇဟန္တိ ဘောဂါ၊ မစ္စော ဝါ တေ ပုဗ္ဗတရံ ဇဟာတိ၊

အသဿတာ ဘောဂိနော ကာမကာမိ၊ တသ္မာ န သောစာမဟံ သောကကာလေ။

၃။

‘‘ဥဒေတိ အာပူရတိ ဝေတိ စန္ဒော၊ အတ္ထံ တပေတွာန ပလေတိ သူရိယော၊

ဝိဒိတာ မယာ သတ္တုက လောကဓမ္မာ၊ တသ္မာ န သောစာမဟံ သောကကာလေ’’တိ။

တတ္ထ ပုဗ္ဗေဝ မစ္စန္တိ မစ္စံ ဝါ ဘောဂါ ပုဗ္ဗေဝ ပဌမတရညေဝ ဝိဇဟန္တိ၊ မစ္စော ဝါ တေ ဘောဂေ ပုဗ္ဗတရံ ဇဟာတိ။ ကာမကာမီတိ စောရရာဇာနံ အာလပတိ။ အမ္ဘော၊ ကာမေ ကာမယမာန ကာမကာမိ ဘောဂိနော နာမ လောကေ အသဿတာ၊ ဘောဂေသု ဝါ နဋ္ဌေသု ဇီဝမာနာဝ အဘောဂိနော ဟောန္တိ၊ ဘောဂေ ဝါ ပဟာယ သယံ နဿန္တိ၊ တသ္မာ အဟံ မဟာဇနဿ သောကကာလေပိ န သောစာမီတိ အတ္ထော။ ဝိဒိတာ မယာ သတ္တုက လောကဓမ္မာတိ စောရရာဇာနံ အာလပတိ။ အမ္ဘော၊ သတ္တုက၊ မယာ လာဘော အလာဘော ယသော အယသောတိအာဒယော လောကဓမ္မာ ဝိဒိတာ။ ယထေဝ ဟိ စန္ဒော ဥဒေတိ စ ပူရတိ စ ပုန စ ခီယတိ၊ ယထာ စ သူရိယော အန္ဓကာရံ ဝိဓမန္တော မဟန္တံ အာလောကံ တပေတွာန ပုန သာယံ အတ္ထံ ပလေတိ အတ္ထံ ဂစ္ဆတိ န ဒိဿတိ၊ ဧဝမေဝ ဘောဂါ ဥပ္ပဇ္ဇန္တိ စ နဿန္တိ စ၊ တတ္ထ ကိံ သောကေန၊ တသ္မာ န သောစာမီတိ အတ္ထော။

ဧဝံ မဟာသတ္တော စောရရညော ဓမ္မံ ဒေသေတွာ ဣဒါနိ တမေဝ စောရံ ဂရဟန္တော အာဟ –

၄။

‘‘အလသော ဂိဟီ ကာမဘောဂီ န သာဓု၊ အသညတော ပဗ္ဗဇိတော န သာဓု၊

ရာဇာ န သာဓု အနိသမ္မကာရီ၊ ယော ပဏ္ဍိတော ကောဓနော တံ န သာဓု။

၅။

‘‘နိသမ္မ ခတ္တိယော ကယိရာ၊ နာနိသမ္မ ဒိသမ္ပတိ၊

နိသမ္မကာရိနော ရာဇ၊ ယသော ကိတ္တိ စ ဝဍ္ဎတီ’’တိ။

ဣမာ ပန ဒွေ ဂါထာ ဟေဋ္ဌာ ဝိတ္ထာရိတာယေဝ။ စောရရာဇာ ဗောဓိသတ္တံ ခမာပေတွာ ရဇ္ဇံ ပဋိစ္ဆာပေတွာ အတ္တနော ဇနပဒမေဝ ဂတော။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ကောသလရာဇာ အာနန္ဒော အဟောသိ၊ ဗာရာဏသိရာဇာ ပန အဟမေဝ အဟောသိ’’န္တိ။

မဏိကုဏ္ဍလဇာတကဝဏ္ဏနာ ပဌမာ။

[၃၅၂] ၂။ သုဇာတဇာတကဝဏ္ဏနာ

ကိံနု သန္တရမာနောဝါတိ ဣဒံ သတ္ထာ ဇေတဝနေ ဝိဟရန္တော မတပိတိကံ ကုဋုမ္ဗိကံ အာရဗ္ဘ ကထေသိ။ သော ကိရ ပိတရိ မတေ ပရိဒေဝမာနော ဝိစရတိ၊ သောကံ ဝိနောဒေတုံ န သက္ကောတိ။ အထ သတ္ထာ တဿ သောတာပတ္တိဖလူပနိဿယံ ဒိသွာ သာဝတ္ထိံ ပိဏ္ဍာယ စရိတွာ ပစ္ဆာသမဏံ အာဒါယ တဿ ဂေဟံ ဂန္တွာ ပညတ္တာသနေ နိသိန္နော တံ ဝန္ဒိတွာ နိသိန္နံ ‘‘ကိံ၊ ဥပါသက၊ သောစသီ’’တိ ဝတွာ ‘‘အာမ၊ ဘန္တေ’’တိ ဝုတ္တေ ‘‘အာဝုသော၊ ပေါရာဏကပဏ္ဍိတာ ပဏ္ဍိတာနံ ဝစနံ သုတွာ ပိတရိ ကာလကတေ န သောစိံသူ’’တိ ဝတွာ တေန ယာစိတော အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ကုဋုမ္ဗိကဂေဟေ နိဗ္ဗတ္တိ၊ ‘‘သုဇာတကုမာရော’’တိဿ နာမံ ကရိံသု။ တဿ ဝယပ္ပတ္တဿ ပိတာမဟော ကာလမကာသိ။ အထဿ ပိတာ ပိတု ကာလကိရိယတော ပဋ္ဌာယ သောကသမပ္ပိတော အာဠာဟနံ ဂန္တွာ အာဠာဟနတော အဋ္ဌီနိ အာဟရိတွာ အတ္တနော အာရာမေ မတ္တိကာထူပံ ကတွာ တာနိ တတ္ထ နိဒဟိတွာ ဂတဂတဝေလာယ ထူပံ ပုပ္ဖေဟိ ပူဇေတွာ စေတိယံ အာဝိဇ္ဈန္တော ပရိဒေဝတိ၊ နေဝ နှာယတိ န လိမ္ပတိ န ဘုဉ္ဇတိ န ကမ္မန္တေ ဝိစာရေတိ။ တံ ဒိသွာ ဗောဓိသတ္တော ‘‘ပိတာ မေ အယျကဿ မတကာလတော ပဋ္ဌာယ သောကာဘိဘူတော စရတိ၊ ဌပေတွာ ပန မံ အညော ဧတံ သညာပေတုံ န သက္ကောတိ၊ ဧကေန နံ ဥပါယေန နိဿောကံ ကရိဿာမီ’’တိ ဗဟိဂါမေ ဧကံ မတဂေါဏံ ဒိသွာ တိဏဉ္စ ပါနီယဉ္စ အာဟရိတွာ တဿ ပုရတော ဌပေတွာ ‘‘ခါဒ၊ ခါဒ၊ ပိဝ၊ ပိဝါ’’တိ အာဟ။ အာဂတာဂတာ နံ ဒိသွာ ‘‘သမ္မ သုဇာတ၊ ကိံ ဥမ္မတ္တကောသိ၊ မတဂေါဏဿ တိဏောဒကံ ဒေသီ’’တိ ဝဒန္တိ။ သော န ကိဉ္စိ ပဋိဝဒတိ။ အထဿ ပိတု သန္တိကံ ဂန္တွာ ‘‘ပုတ္တော တေ ဥမ္မတ္တကော ဇာတော၊ မတဂေါဏဿ တိဏောဒကံ ဒေတီ’’တိ အာဟံသု။ တံ သုတွာ ကုဋုမ္ဗိကဿ ပိတုသောကော အပဂတော၊ ပုတ္တသောကော ပတိဋ္ဌိတော။ သော ဝေဂေနာဂန္တွာ ‘‘နနု တွံ၊ တာတ သုဇာတ၊ ပဏ္ဍိတောသိ၊ ကိံကာရဏာ မတဂေါဏဿ တိဏောဒကံ ဒေသီ’’တိ ဝတွာ ဒွေ ဂါထာ အဘာသိ –

၆။

‘‘ကိံ နု သန္တရမာနောဝ၊ လာယိတွာ ဟရိတံ တိဏံ၊

ခါဒ ခါဒါတိ လပသိ၊ ဂတသတ္တံ ဇရဂ္ဂဝံ။

၇။

‘‘န ဟိ အန္နေန ပါနေန၊ မတော ဂေါဏော သမုဋ္ဌဟေ၊

တွဉ္စ တုစ္ဆံ ဝိလပသိ၊ ယထာ တံ ဒုမ္မတီ တထာ’’တိ။

တတ္ထ သန္တရမာနောဝါတိ တုရိတော ဝိယ ဟုတွာ။ လာယိတွာတိ လုနိတွာ။ လပသီတိ ဝိလပသိ။ ဂတသတ္တံ ဇရဂ္ဂဝန္တိ ဝိဂတဇီဝိတံ ဇိဏ္ဏဂေါဏံ။ ယထာ တန္တိ ဧတ္ထ တန္တိ နိပါတမတ္တံ၊ ယထာ ဒုမ္မတိ အပ္ပပညော ဝိလပေယျ၊ တထာ တွံ တုစ္ဆံ ဝိလပသီတိ။

တတော ဗောဓိသတ္တော ဒွေ ဂါထာ အဘာသိ –

၈။

‘‘တထေဝ တိဋ္ဌတိ သီသံ၊ ဟတ္ထပါဒါ စ ဝါလဓိ၊

သောတာ တထေဝ တိဋ္ဌန္တိ၊ မညေ ဂေါဏော သမုဋ္ဌဟေ။

၉။

‘‘နေဝယျကဿ သီသဉ္စ၊ ဟတ္ထပါဒါ စ ဒိဿရေ၊

ရုဒံ မတ္တိကထူပသ္မိံ၊ နနု တွညေဝ ဒုမ္မတီ’’တိ။

တတ္ထ တထေဝါတိ ယထာ ပုဗ္ဗေ ဌိတံ၊ တထေဝ တိဋ္ဌတိ။ မညေတိ ဧတေသံ သီသာဒီနံ တထေဝ ဌိတတ္တာ အယံ ဂေါဏော သမုဋ္ဌဟေယျာတိ မညာမိ။ နေဝယျကဿ သီသဉ္စာတိ အယျကဿ ပန သီသဉ္စ ဟတ္ထပါဒါ စ န ဒိဿန္တိ။ ‘‘ပိဋ္ဌိပါဒါ န ဒိဿရေ’’တိပိ ပါဌော။ နနု တွညေဝ ဒုမ္မတီတိ အဟံ တာဝ သီသာဒီနိ ပဿန္တော ဧဝံ ကရောမိ၊ တွံ ပန န ကိဉ္စိ ပဿသိ၊ ဈာပိတဋ္ဌာနတော အဋ္ဌီနိ အာဟရိတွာ မတ္တိကာထူပံ ကတွာ ပရိဒေဝသိ။ ဣတိ မံ ပဋိစ္စ သတဂုဏေန သဟဿဂုဏေန သတသဟဿဂုဏေန နနု တွညေဝ ဒုမ္မတိ။ ဘိဇ္ဇနဓမ္မာ နာမ သင်္ခါရာ ဘိဇ္ဇန္တိ၊ တတ္ထ ကာ ပရိဒေဝနာတိ။

တံ သုတွာ ဗောဓိသတ္တဿ ပိတာ ‘‘မမ ပုတ္တော ပဏ္ဍိတော ဣဓလောကပရလောကကိစ္စံ ဇာနာတိ၊ မမ သညာပနတ္ထာယ ဧတံ ကမ္မံ အကာသီ’’တိ စိန္တေတွာ ‘‘တာတ သုဇာတပဏ္ဍိတ၊ ‘သဗ္ဗေ သင်္ခါရာ အနိစ္စာ’တိ မေ ဉာတာ၊ ဣတော ပဋ္ဌာယ န သောစိဿာမိ၊ ပိတုသောကဟရဏကပုတ္တေန နာမ တာဒိသေန ဘဝိတဗ္ဗ’’န္တိ ဝတွာ ပုတ္တဿ ထုတိံ ကရောန္တော အာဟ –

၁၀။

‘‘အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ၊

ဝါရိနာ ဝိယ ဩသိဉ္စံ၊ သဗ္ဗံ နိဗ္ဗာပယေ ဒရံ။

၁၁။

‘‘အဗ္ဗဟီ ဝတ မေ သလ္လံ၊ ယမာသိ ဟဒယဿိတံ၊

ယော မေ သောကပရေတဿ၊ ပိတုသောကံ အပါနုဒိ။

၁၂။

‘‘သောဟံ အဗ္ဗူဠှသလ္လောသ္မိ၊ ဝီတသောကော အနာဝိလော၊

န သောစာမိ န ရောဒါမိ၊ တဝ သုတွာန မာဏဝ။

၁၃။

‘‘ဧဝံ ကရောန္တိ သပ္ပညာ၊ ယေ ဟောန္တိ အနုကမ္ပကာ၊

ဝိနိဝတ္တေန္တိ သောကမှာ၊ သုဇာတော ပိတရံ ယထာ’’တိ။

တတ္ထ နိဗ္ဗာပယေတိ နိဗ္ဗာပယိ။ ဒရန္တိ သောကဒရထံ။ သုဇာတော ပိတရံ ယထာတိ ယထာ မမ ပုတ္တော သုဇာတော မံ ပိတရံ သမာနံ အတ္တနော သပ္ပညတာယ သောကမှာ ဝိနိဝတ္တယိ၊ ဧဝံ အညေပိ သပ္ပညာ သောကမှာ ဝိနိဝတ္တယန္တီတိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ကုဋုမ္ဗိကော သောတာပတ္တိဖလေ ပတိဋ္ဌဟိ။ တဒါ သုဇာတော အဟမေဝ အဟောသိန္တိ။

သုဇာတဇာတကဝဏ္ဏနာ ဒုတိယာ။

[၃၅၃] ၃။ ဝေနသာခဇာတကဝဏ္ဏနာ

နယိဒံ နိစ္စံ ဘဝိတဗ္ဗန္တိ ဣဒံ သတ္ထာ ဘဂ္ဂေသု သံသုမာရဂိရံ နိဿာယ ဘေသကဠာဝနေ ဝိဟရန္တော ဗောဓိရာဇကုမာရံ အာရဗ္ဘ ကထေသိ။ ဗောဓိရာဇကုမာရော နာမ ဥဒေနဿ ရညော ပုတ္တော တသ္မိံ ကာလေ သံသုမာရဂိရေ ဝသန္တော ဧကံ ပရိယောဒါတသိပ္ပံ ဝဍ္ဎကိံ ပက္ကောသာပေတွာ အညေဟိ ရာဇူဟိ အသဒိသံ ကတွာ ကောကနဒံ နာမ ပါသာဒံ ကာရာပေသိ။ ကာရာပေတွာ စ ပန ‘‘အယံ ဝဍ္ဎကီ အညဿပိ ရညော ဧဝရူပံ ပါသာဒံ ကရေယျာ’’တိ မစ္ဆရာယန္တော တဿ အက္ခီနိ ဥပ္ပာဋာပေသိ။ တေနဿ အက္ခီနံ ဥပ္ပာဋိတဘာဝေါ ဘိက္ခုသင်္ဃေ ပါကဋော ဇာတော။ တသ္မာ ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ ဗောဓိရာဇကုမာရော ကိရ တထာရူပဿ ဝဍ္ဎကိနော အက္ခီနိ ဥပ္ပာဋာပေသိ၊ အဟော ကက္ခဠော ဖရုသော သာဟသိကော’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပေသ ကက္ခဠော ဖရုသော သာဟသိကောဝ။ န ကေဝလဉ္စ ဣဒါနေဝ၊ ပုဗ္ဗေပေသ ခတ္တိယသဟဿာနံ အက္ခီနိ ဥပ္ပာဋာပေတွာ မာရေတွာ တေသံ မံသေန ဗလိကမ္မံ ကာရေသီ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော တက္ကသိလာယံ ဒိသာပါမောက္ခော အာစရိယော အဟောသိ။ ဇမ္ဗုဒီပတလေ ခတ္တိယမာဏဝါ ဗြာဟ္မဏမာဏဝါ စ တဿေဝ သန္တိကေ သိပ္ပံ ဥဂ္ဂဏှိံသု။ ဗာရာဏသိရညော ပုတ္တော ဗြဟ္မဒတ္တကုမာရော နာမ တဿ သန္တိကေ တယော ဝေဒေ ဥဂ္ဂဏှိ။ သော ပန ပကတိယာပိ ကက္ခဠော ဖရုသော သာဟသိကော အဟောသိ။ ဗောဓိသတ္တော အင်္ဂဝိဇ္ဇာဝသေန တဿ ကက္ခဠဖရုသသာဟသိကဘာဝံ ဉတွာ ‘‘တာတ၊ တွံ ကက္ခဠော ဖရုသော သာဟသိကော၊ ဖရုသေန နာမ လဒ္ဓံ ဣဿရိယံ အစိရဋ္ဌိတိကံ ဟောတိ၊ သော ဣဿရိယေ ဝိနဋ္ဌေ ဘိန္နနာဝေါ ဝိယ သမုဒ္ဒေ ပတိဋ္ဌံ န လဘတိ၊ တသ္မာ မာ ဧဝရူပေါ အဟောသီ’’တိ တံ ဩဝဒန္တော ဒွေ ဂါထာ အဘာသိ –

၁၄။

‘‘နယိဒံ နိစ္စံ ဘဝိတဗ္ဗံ ဗြဟ္မဒတ္တ၊ ခေမံ သုဘိက္ခံ သုခတာ စ ကာယေ၊

အတ္ထစ္စယေ မာ အဟု သမ္ပမူဠှော၊ ဘိန္နပ္လဝေါ သာဂရဿေဝ မဇ္ဈေ။

၁၅။

‘‘ယာနိ ကရောတိ ပုရိသော၊ တာနိ အတ္တနိ ပဿတိ၊

ကလျာဏကာရီ ကလျာဏံ၊ ပါပကာရီ စ ပါပကံ၊

ယာဒိသံ ဝပတေ ဗီဇံ၊ တာဒိသံ ဟရတေ ဖလ’’န္တိ။

တတ္ထ သုခတာ စ ကာယေတိ တာတ ဗြဟ္မဒတ္တ၊ ယဒေတံ ခေမံ ဝါ သုဘိက္ခံ ဝါ ယာ ဝါ ဧသာ သုခတာ ကာယေ၊ ဣဒံ သဗ္ဗံ ဣမေသံ သတ္တာနံ နိစ္စံ သဗ္ဗကာလမေဝ န ဘဝတိ၊ ဣဒံ ပန အနိစ္စံ ဟုတွာ အဘာဝဓမ္မံ။ အတ္ထစ္စယေတိ သော တွံ အနိစ္စတာဝသေန ဣဿရိယေ ဝိဂတေ အတ္တနော အတ္ထဿ အစ္စယေ ယထာ နာမ ဘိန္နပ္လဝေါ ဘိန္နနာဝေါ မနုဿော သာဂရမဇ္ဈေ ပတိဋ္ဌံ အလဘန္တော သမ္ပမူဠှော ဟောတိ၊ ဧဝံ မာ အဟု သမ္ပမူဠှော။ တာနိ အတ္တနိ ပဿတီတိ တေသံ ကမ္မာနံ ဝိပါကံ ဝိန္ဒန္တော တာနိ အတ္တနိ ပဿတိ နာမ။

သော အာစရိယံ ဝန္ဒိတွာ ဗာရာဏသိံ ဂန္တွာ ပိတု သိပ္ပံ ဒဿေတွာ ဩပရဇ္ဇေ ပတိဋ္ဌာယ ပိတု အစ္စယေန ရဇ္ဇံ ပါပုဏိ။ တဿ ပိင်္ဂိယော နာမ ပုရောဟိတော အဟောသိ ကက္ခဠော ဖရုသော သာဟသိကော။ သော ယသလောဘေန စိန္တေသိ ‘‘ယံနူနာဟံ ဣမိနာ ရညာ သကလဇမ္ဗုဒီပေ သဗ္ဗေ ရာဇာနော ဂါဟာပေယျံ၊ ဧဝမေသ ဧကရာဇာ ဘဝိဿတိ၊ အဟမ္ပိ ဧကပုရောဟိတော ဘဝိဿာမီ’’တိ။ သော တံ ရာဇာနံ အတ္တနော ကထံ ဂါဟာပေသိ။ ရာဇာ မဟတိယာ သေနာယ နဂရာ နိက္ခမိတွာ ဧကဿ ရညော နဂရံ ရုန္ဓိတွာ တံ ရာဇာနံ ဂဏှိ။ ဧတေနုပါယေန သကလဇမ္ဗုဒီပေ ရဇ္ဇံ ဂဟေတွာ ရာဇသဟဿပရိဝုတော ‘‘တက္ကသိလာယံ ရဇ္ဇံ ဂဏှိဿာမီ’’တိ အဂမာသိ။ ဗောဓိသတ္တော နဂရံ ပဋိသင်္ခရိတွာ ပရေဟိ အပ္ပဓံသိယံ အကာသိ။

ဗာရာဏသိရာဇာ ဂင်္ဂါနဒီတီရေ မဟတော နိဂြောဓရုက္ခဿ မူလေ သာဏိံ ပရိက္ခိပါပေတွာ ဥပရိ ဝိတာနံ ကာရာပေတွာ သယနံ ပညပေတွာ နိဝါသံ ဂဏှိ။ သော ဇမ္ဗုဒီပတလေ သဟဿရာဇာနော ဂဟေတွာ ယုဇ္ဈမာနောပိ တက္ကသိလံ ဂဟေတုံ အသက္ကောန္တော အတ္တနော ပုရောဟိတံ ပုစ္ဆိ ‘‘အာစရိယ၊ မယံ ဧတ္တကေဟိ ရာဇူဟိ သဒ္ဓိံ အာဂန္တွာပိ တက္ကသိလံ ဂဟေတုံ န သက္ကောမ၊ ကိံ နု ခေါ ကာတဗ္ဗ’’န္တိ။ ‘‘မဟာရာဇ၊ သဟဿရာဇူနံ အက္ခီနိ ဥပ္ပာဋေတွာ မာရေတွာ ကုစ္ဆိံ ဖာလေတွာ ပဉ္စမဓုရမံသံ အာဒါယ ဣမသ္မိံ နိဂြောဓေ အဓိဝတ္ထာယ ဒေဝတာယ ဗလိကမ္မံ ကတွာ အန္တဝဋ္ဋီဟိ ရုက္ခံ ပရိက္ခိပိတွာ လောဟိတပဉ္စင်္ဂုလိကာနိ ကရောမ၊ ဧဝံ နော ခိပ္ပမေဝ ဇယော ဘဝိဿတီ’’တိ။ ရာဇာ ‘‘သာဓူ’’တိ ပဋိဿုဏိတွာ အန္တောသာဏိယံ မဟာဗလေ မလ္လေ ဌပေတွာ ဧကမေကံ ရာဇာနံ ပက္ကောသာပေတွာ နိပ္ပီဠနေန ဝိသညံ ကာရေတွာ အက္ခီနိ ဥပ္ပာဋေတွာ မာရေတွာ မံသံ အာဒါယ ကဠေဝရာနိ ဂင်္ဂါယံ ပဝါဟေတွာ ဝုတ္တပ္ပကာရံ ဗလိကမ္မံ ကာရေတွာ ဗလိဘေရိံ အာကောဋာပေတွာ ယုဒ္ဓါယ ဂတော။

အထဿ အဋ္ဋာလကတော ဧကော ယက္ခော အာဂန္တွာ ဒက္ခိဏက္ခိံ ဥပ္ပာဋေတွာ အဂမာသိ၊ အထဿ မဟတီ ဝေဒနာ ဥပ္ပဇ္ဇိ။ သော ဝေဒနာပ္ပတ္တော အာဂန္တွာ နိဂြောဓရုက္ခမူလေ ပညတ္တာသနေ ဥတ္တာနကော နိပဇ္ဇိ။ တသ္မိံ ခဏေ ဧကော ဂိဇ္ဈော ဧကံ တိခိဏကောဋိကံ အဋ္ဌိံ ဂဟေတွာ ရုက္ခဂ္ဂေ နိသိန္နော မံသံ ခါဒိတွာ အဋ္ဌိံ ဝိဿဇ္ဇေသိ၊ အဋ္ဌိကောဋိ အာဂန္တွာ ရညော ဝါမက္ခိမှိ အယသူလံ ဝိယ ပတိတွာ အက္ခိံ ဘိန္ဒိ။ တသ္မိံ ခဏေ ဗောဓိသတ္တဿ ဝစနံ သလ္လက္ခေသိ။ သော ‘‘အမှာကံ အာစရိယော ‘ဣမေ သတ္တာ ဗီဇာနုရူပံ ဖလံ ဝိယ ကမ္မာနုရူပံ ဝိပါကံ အနုဘောန္တီ’တိ ကထေန္တော ဣဒံ ဒိသွာ ကထေသိ မညေ’’တိ ဝတွာ ဝိလပန္တော ဒွေ ဂါထာ အဘာသိ –

၁၆။

‘‘ဣဒံ တဒါစရိယဝစော၊ ပါရာသရိယော ယဒဗြဝိ၊

‘မာ သု တွံ အကရိ ပါပံ၊ ယံ တွံ ပစ္ဆာ ကတံ တပေ’။

၁၇။

‘‘အယမေဝ သော ပိင်္ဂိယ ဝေနသာခေါ၊ ယမှိ ဃာတယိံ ခတ္တိယာနံ သဟဿံ၊

အလင်္ကတေ စန္ဒနသာရာနုလိတ္တေ၊ တမေဝ ဒုက္ခံ ပစ္စာဂတံ မမ’’န္တိ။

တတ္ထ ဣဒံ တဒါစရိယဝစောတိ ဣဒံ တံ အာစရိယဿ ဝစနံ။ ပါရာသရိယောတိ တံ ဂေါတ္တေန ကိတ္တေတိ။ ပစ္ဆာ ကတန္တိ ယံ ပါပံ တယာ ကတံ၊ ပစ္ဆာ တံ တပေယျ ကိလမေယျ၊ တံ မာ ကရီတိ ဩဝါဒံ အဒါသိ၊ အဟံ ပနဿ ဝစနံ န ကရိန္တိ။ အယမေဝါတိ နိဂြောဓရုက္ခံ ဒဿေန္တော ဝိလပတိ။ ဝေနသာခေါတိ ပတ္ထဋသာခေါ။ ယမှိ ဃာတယိန္တိ ယမှိ ရုက္ခေ ခတ္တိယသဟဿံ မာရေသိံ။ အလင်္ကတေ စန္ဒနသာရာနုလိတ္တေတိ ရာဇာလင်္ကာရေဟိ အလင်္ကတေ လောဟိတစန္ဒနသာရာနုလိတ္တေ တေ ခတ္တိယေ ယတ္ထာဟံ ဃာတေသိံ ၊ အယမေဝ သော ရုက္ခော ဣဒါနိ မယှံ ကိဉ္စိ ပရိတ္တာဏံ ကာတုံ န သက္ကောတီတိ ဒီပေတိ။ တမေဝ ဒုက္ခန္တိ ယံ မယာ ပရေသံ အက္ခိဥပ္ပာဋနဒုက္ခံ ကတံ၊ ဣဒံ မေ တထေဝ ပဋိအာဂတံ၊ ဣဒါနိ နော အာစရိယဿ ဝစနံ မတ္ထကံ ပတ္တန္တိ ပရိဒေဝတိ။

သော ဧဝံ ပရိဒေဝမာနော အဂ္ဂမဟေသိံ အနုဿရိတွာ –

၁၈။

‘‘သာမာ စ ခေါ စန္ဒနလိတ္တဂတ္တာ၊ လဋ္ဌီဝ သောဘဉ္ဇနကဿ ဥဂ္ဂတာ၊

အဒိသွာ ကာလံ ကရိဿာမိ ဥဗ္ဗရိံ၊ တံ မေ ဣတော ဒုက္ခတရံ ဘဝိဿတီ’’တိ။ –

ဂါထမာဟ –

တဿတ္ထော – မမ ဘရိယာ သုဝဏ္ဏသာမာ ဥဗ္ဗရီ ယထာ နာမ သိဂ္ဂုရုက္ခဿ ဥဇု ဥဂ္ဂတာ သာခါ မန္ဒမာလုတေရိတာ ကမ္ပမာနာ သောဘတိ၊ ဧဝံ ဣတ္ထိဝိလာသံ ကုရုမာနာ သောဘတိ၊ တမဟံ ဣဒါနိ အက္ခီနံ ဘိန္နတ္တာ ဥဗ္ဗရိံ အဒိသွာဝ ကာလံ ကရိဿာမိ၊ တံ မေ တဿာ အဒဿနံ ဣတော မရဏဒုက္ခတောပိ ဒုက္ခတရံ ဘဝိဿတီတိ။

သော ဧဝံ ဝိလပန္တောဝ မရိတွာ နိရယေ နိဗ္ဗတ္တိ။ န နံ ဣဿရိယလုဒ္ဓါ ပုရောဟိတော ပရိတ္တာဏံ ကာတုံ သက္ခိ၊ န အတ္တနော ဣဿရိယံ။ တသ္မိံ မတမတ္တေယေဝ ဗလကာယော ဘိဇ္ဇိတွာ ပလာယိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဗာရာဏသိရာဇာ ဗောဓိရာဇကုမာရော အဟောသိ၊ ပိင်္ဂိယော ဒေဝဒတ္တော၊ ဒိသာပါမောက္ခာစရိယော ပန အဟမေဝ အဟောသိ’’န္တိ။

ဝေနသာခဇာတကဝဏ္ဏနာ တတိယာ။

[၃၅၄] ၄။ ဥရဂဇာတကဝဏ္ဏနာ

ဥရဂေါဝတစံ ဇိဏ္ဏန္တိ ဣဒံ သတ္ထာ ဇေတဝနေ ဝိဟရန္တော မတပုတ္တကံ ကုဋုမ္ဗိကံ အာရဗ္ဘ ကထေသိ။ ဝတ္ထု ပန မတဘရိယမတပိတိကဝတ္ထုသဒိသမေဝ။ ဣဓာပိ တထေဝ သတ္ထာ တဿ နိဝေသနံ ဂန္တွာ တံ အာဂန္တွာ ဝန္ဒိတွာ နိသိန္နံ ‘‘ကိံ၊ အာဝုသော၊ သောစသီ’’တိ ပုစ္ဆိတွာ ‘‘အာမ၊ ဘန္တေ ၊ ပုတ္တဿ မေ မတကာလတော ပဋ္ဌာယ သောစာမီ’’တိ ဝုတ္တေ ‘‘အာဝုသော၊ ဘိဇ္ဇနဓမ္မံ နာမ ဘိဇ္ဇတိ၊ နဿနဓမ္မံ နာမ နဿတိ၊ တဉ္စ ခေါ န ဧကသ္မိံယေဝ ကုလေ၊ နာပိ ဧကသ္မိညေဝ ဂါမေ၊ အထ ခေါ အပရိမာဏေသု စက္ကဝါဠေသု တီသု ဘဝေသု အမရဏဓမ္မော နာမ နတ္ထိ၊ တဗ္ဘာဝေနေဝ ဌာတုံ သမတ္ထော ဧကသင်္ခါရောပိ သဿတော နာမ နတ္ထိ၊ သဗ္ဗေ သတ္တာ မရဏဓမ္မာ၊ သဗ္ဗေ သင်္ခါရာ ဘိဇ္ဇနဓမ္မာ၊ ပေါရာဏကပဏ္ဍိတာပိ ပုတ္တေ မတေ ‘မရဏဓမ္မံ မတံ၊ နဿနဓမ္မံ နဋ္ဌ’န္တိ န သောစိံသူ’’တိ ဝတွာ တေန ယာစိတော အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဗာရာဏသိယံ ဒွါရဂါမကေ ဗြာဟ္မဏကုလေ နိဗ္ဗတ္တိတွာ ကုဋုမ္ဗံ သဏ္ဌပေတွာ ကသိကမ္မေန ဇီဝိကံ ကပ္ပေသိ။ တဿ ပုတ္တော စ ဓီတာ စာတိ ဒွေ ဒါရကာ အဟေသုံ။ သော ပုတ္တဿ ဝယပ္ပတ္တဿ သမာနကုလတော ကုမာရိကံ အာဟရိတွာ အဒါသိ၊ ဣတိ တေ ဒါသိယာ သဒ္ဓိံ ဆ ဇနာ အဟေသုံ – ဗောဓိသတ္တော၊ ဘရိယာ၊ ပုတ္တော၊ ဓီတာ၊ သုဏိသာ၊ ဒါသီတိ။ တေ သမဂ္ဂါ သမ္မောဒမာနာ ပိယသံဝါသာ အဟေသုံ။ ဗောဓိသတ္တော သေသာနံ ပဉ္စန္နံ ဧဝံ ဩဝါဒံ ဒေတိ ‘‘တုမှေ ယထာလဒ္ဓနိယာမေနေဝ ဒါနံ ဒေထ၊ သီလံ ရက္ခထ၊ ဥပေါသထကမ္မံ ကရောထ၊ မရဏဿတိံ ဘာဝေထ၊ တုမှာကံ မရဏဘာဝံ သလ္လက္ခေထ၊ ဣမေသဉှိ သတ္တာနံ မရဏံ ဓုဝံ၊ ဇီဝိတံ အဒ္ဓုဝံ၊ သဗ္ဗေ သင်္ခါရာ အနိစ္စာ ခယဝယဓမ္မိနောဝ၊ ရတ္တိဉ္စ ဒိဝါ စ အပ္ပမတ္တာ ဟောထာ’’တိ။ တေ ‘‘သာဓူ’’တိ ဩဝါဒံ သမ္ပဋိစ္ဆိတွာ အပ္ပမတ္တာ မရဏဿတိံ ဘာဝေန္တိ။

အထေကဒိဝသံ ဗောဓိသတ္တော ပုတ္တေန သဒ္ဓိံ ခေတ္တံ ဂန္တွာ ကသတိ။ ပုတ္တော ကစဝရံ သင်္ကဍ္ဎိတွာ ဈာပေတိ။ တဿာဝိဒူရေ ဧကသ္မိံ ဝမ္မိကေ အာသီဝိသော အတ္ထိ။ ဓူမော တဿ အက္ခီနိ ပဟရိ။ သော ကုဒ္ဓါ နိက္ခမိတွာ ‘‘ဣမံ နိဿာယ မယှံ ဘယ’’န္တိ စတဿော ဒါဌာ နိမုဇ္ဇာပေန္တော တံ ဍံသိ၊ သော ပရိဝတ္တိတွာ ပတိတော။ ဗောဓိသတ္တော ပရိဝတ္တိတွာ တံ ပတိတံ ဒိသွာ ဂေါဏေ ဌပေတွာ ဂန္တွာ တဿ မတဘာဝံ ဉတွာ တံ ဥက္ခိပိတွာ ဧကသ္မိံ ရုက္ခမူလေ နိပဇ္ဇာပေတွာ ပါရုပိတွာ နေဝ ရောဒိ န ပရိဒေဝိ – ‘‘ဘိဇ္ဇနဓမ္မံ ပန ဘိန္နံ၊ မရဏဓမ္မံ မတံ၊ သဗ္ဗေ သင်္ခါရာ အနိစ္စာ မရဏနိပ္ဖတ္တိကာ’’တိ အနိစ္စဘာဝမေဝ သလ္လက္ခေတွာ ကသိ။ သော ခေတ္တသမီပေန ဂစ္ဆန္တံ ဧကံ ပဋိဝိဿကံ ပုရိသံ ဒိသွာ ‘‘တာတ၊ ဂေဟံ ဂစ္ဆသီ’’တိ ပုစ္ဆိတွာ ‘‘အာမာ’’တိ ဝုတ္တေ တေန ဟိ အမှာကမ္ပိ ဃရံ ဂန္တွာ ဗြာဟ္မဏိံ ဝဒေယျာသိ ‘‘အဇ္ဇ ကိရ ပုဗ္ဗေ ဝိယ ဒွိန္နံ ဘတ္တံ အနာဟရိတွာ ဧကဿေဝါဟာရံ အာဟရေယျာထ၊ ပုဗ္ဗေ စ ဧကိကာဝ ဒါသီ အာဟာရံ အာဟရတိ၊ အဇ္ဇ ပန စတ္တာရောပိ ဇနာ သုဒ္ဓဝတ္ထနိဝတ္ထာ ဂန္ဓပုပ္ဖဟတ္ထာ အာဂစ္ဆေယျာထာ’’တိ။ သော ‘‘သာဓူ’’တိ ဂန္တွာ ဗြာဟ္မဏိယာ တထေဝ ကထေသိ။ ကေန တေ၊ တာတ၊ ဣမံ သာသနံ ဒိန္နန္တိ။ ဗြာဟ္မဏေန ၊ အယျေတိ။ သာ ‘‘ပုတ္တော မေ မတော’’တိ အညာသိ၊ ကမ္ပနမတ္တမ္ပိဿာ နာဟောသိ။ ဧဝံ သုဘာဝိတစိတ္တာ သုဒ္ဓဝတ္ထနိဝတ္ထာ ဂန္ဓပုပ္ဖဟတ္ထာ ဒါသိံ ပန အာဟာရံ အာဟရာပေတွာ သေသေဟိ သဒ္ဓိံ ခေတ္တံ အဂမာသိ။ ဧကဿပိ ရောဒိတံ ဝါ ပရိဒေဝိတံ ဝါ နာဟောသိ။

ဗောဓိသတ္တော ပုတ္တဿ နိပန္နဆာယာယမေဝ နိသီဒိတွာ ဘုဉ္ဇိ။ ဘုတ္တာဝသာနေ သဗ္ဗေပိ ဒါရူနိ ဥဒ္ဓရိတွာ တံ စိတကံ အာရောပေတွာ ဂန္ဓပုပ္ဖေဟိ ပူဇေတွာ ဈာပေသုံ။ ဧကဿ စ ဧကဗိန္ဒုပိ အဿု နာဟောသိ၊ သဗ္ဗေပိ သုဘာဝိတမရဏဿတိနော ဟောန္တိ။ တေသံ သီလတေဇေန သက္ကဿ အာသနံ ဥဏှာကာရံ ဒဿေသိ။ သော ‘‘ကော နု ခေါ မံ ဌာနာ စာဝေတုကာမော’’တိ ဥပဓာရေန္တော တေသံ ဂုဏတေဇေန ဥဏှဘာဝံ ဉတွာ ပသန္နမာနသော ဟုတွာ ‘‘မယာ ဧတေသံ သန္တိကံ ဂန္တွာ သီဟနာဒံ နဒါပေတွာ သီဟနာဒပရိယောသာနေ ဧတေသံ နိဝေသနံ သတ္တရတနပရိပုဏ္ဏံ ကတွာ အာဂန္တုံ ဝဋ္ဋတီ’’တိ ဝေဂေန တတ္ထ ဂန္တွာ အာဠာဟနပဿေ ဌိတော ‘‘တာတ၊ ကိံ ကရောထာ’’တိ အာဟ။ ‘‘ဧကံ မနုဿံ ဈာပေမ၊ သာမီ’’တိ။ ‘‘န တုမှေ မနုဿံ ဈာပေဿထ၊ ဧကံ ပန မိဂံ မာရေတွာ ပစထ မညေ’’တိ။ ‘‘နတ္ထေတံ သာမိ၊ မနုဿမေဝ ဈာပေမာ’’တိ။ ‘‘တေန ဟိ ဝေရိမနုဿော ဝေါ ဘဝိဿတီ’’တိ။ အထ နံ ဗောဓိသတ္တော ‘‘ဩရသပုတ္တော နော သာမိ၊ န ဝေရိကော’’တိ အာဟ။ ‘‘တေန ဟိ ဝေါ အပ္ပိယပုတ္တော ဘဝိဿတီ’’တိ? ‘‘အတိဝိယ ပိယပုတ္တော၊ သာမီ’’တိ။ ‘‘အထ ကသ္မာ န ရောဒသီ’’တိ? သော အရောဒနကာရဏံ ကထေန္တော ပဌမံ ဂါထမာဟ –

၁၉။

‘‘ဥရဂေါဝ တစံ ဇိဏ္ဏံ၊ ဟိတွာ ဂစ္ဆတိ သံ တနုံ၊

ဧဝံ သရီရေ နိဗ္ဘောဂေ၊ ပေတေ ကာလကတေ သတိ။

၂၀။

‘‘ဍယှမာနော န ဇာနာတိ၊ ဉာတီနံ ပရိဒေဝိတံ၊

တသ္မာ ဧတံ န သောစာမိ၊ ဂတော သော တဿ ယာ ဂတီ’’တိ။

တတ္ထ သံ တနုန္တိ အတ္တနော သရီရံ။ နိဗ္ဘောဂေတိ ဇီဝိတိန္ဒြိယဿ အဘာဝေန ဘောဂရဟိတေ။ ပေတေတိ ပရလောကံ ပဋိဂတေ။ ကာလကတေတိ ကတကာလေ၊ မတေတိ အတ္ထော။ ဣဒံ ဝုတ္တံ ဟောတိ – သာမိ၊ မမ ပုတ္တော ယထာ နာမ ဥရဂေါ ဇိဏ္ဏတစံ နိစ္ဆိန္ဒိတွာ အနောလောကေတွာ အနပေက္ခော ဆဍ္ဍေတွာ ဂစ္ဆေယျ၊ ဧဝံ အတ္တနော သရီရံ ဆဍ္ဍေတွာ ဂစ္ဆတိ၊ တဿ ဇီဝိတိန္ဒြိယရဟိတေ သရီရေ ဧဝံ နိဗ္ဘောဂေ တသ္မိဉ္စ မေ ပုတ္တေ ပေတေ ပုန ပဋိဂတေ မရဏကာလံ ကတွာ ဌိတေ သတိ ကော ကာရုညေန ဝါ ပရိဒေဝေန ဝါ အတ္ထော။ အယဉှိ ယထာ သူလေဟိ ဝိဇ္ဈိတွာ ဍယှမာနော သုခဒုက္ခံ န ဇာနာတိ၊ ဧဝံ ဉာတီနံ ပရိဒေဝိတမ္ပိ န ဇာနာတိ၊ တေန ကာရဏေနာဟံ ဧတံ န သောစာမိ။ ယာ တဿ အတ္တနော ဂတိ၊ တံ သော ဂတောတိ။

သက္ကော ဗောဓိသတ္တဿ ဝစနံ သုတွာ ဗြာဟ္မဏိံ ပုစ္ဆိ ‘‘အမ္မ၊ တုယှံ သော ကိံ ဟောတီ’’တိ? ‘‘ဒသ မာသေ ကုစ္ဆိနာ ပရိဟရိတွာ ထညံ ပါယေတွာ ဟတ္ထပါဒေ သဏ္ဌပေတွာ ဝဍ္ဎိတပုတ္တော မေ၊ သာမီ’’တိ။ ‘‘အမ္မ၊ ပိတာ တာဝ ပုရိသဘာဝေန မာ ရောဒတု၊ မာတု ဟဒယံ ပန မုဒုကံ ဟောတိ၊ တွံ ကသ္မာ န ရောဒသီ’’တိ? သာ အရောဒနကာရဏံ ကထေန္တီ –

၂၁။

‘‘အနဝှိတော တတော အာဂါ၊ အနနုညာတော ဣတော ဂတော၊

ယထာဂတော တထာ ဂတော၊ တတ္ထ ကာ ပရိဒေဝနာ။

၂၂။

‘‘ဍယှမာနော န ဇာနာတိ၊ ဉာတီနံ ပရိဒေဝိတံ၊

တသ္မာ ဧတံ န သောစာမိ၊ ဂတော သော တဿ ယာ ဂတီ’’တိ။ – ဂါထာဒွယမာဟ –

တတ္ထ အနဝှိတောတိ အယံ တာတ မယာ ပရလောကတော အနဝှိတော အယာစိတော။ အာဂါတိ အမှာကံ ဂေဟံ အာဂတော။ ဣတောတိ ဣတော မနုဿလောကတော ဂစ္ဆန္တောပိ မယာ အနနုညာတောဝ ဂတော။ ယထာဂတောတိ အာဂစ္ဆန္တောပိ ယထာ အတ္တနောဝ ရုစိယာ အာဂတော၊ ဂစ္ဆန္တောပိ တထေဝ ဂတော။ တတ္ထာတိ တသ္မိံ တဿ ဣတော ဂမနေ ကာ ပရိဒေဝနာ။ ဍယှမာနောတိ ဂါထာ ဝုတ္တနယေန ဝေဒိတဗ္ဗာ။

သက္ကော ဗြာဟ္မဏိယာ ကထံ သုတွာ တဿ ဘဂိနိံ ပုစ္ဆိ ‘‘အမ္မ၊ တုယှံ သော ကိံ ဟောတီ’’တိ? ‘‘ဘာတာ မေ၊ သာမီ’’တိ။ ‘‘အမ္မ၊ ဘဂိနိယော နာမ ဘာတူသု သိနေဟာ ဟောန္တိ၊ တွံ ကသ္မာ န ရောဒသီ’’တိ? သာ အရောဒနကာရဏံ ကထေန္တီ –

၂၃။

‘‘သစေ ရောဒေ ကိသာ အဿံ၊ တဿာ မေ ကိံ ဖလံ သိယာ၊

ဉာတိမိတ္တသုဟဇ္ဇာနံ၊ ဘိယျော နော အရတီ သိယာ။

၂၄။

ဍယှမာနော န ဇာနာတိ၊ ဉာတီနံ ပရိဒေဝိတံ၊

တသ္မာ ဧတံ န သောစာမိ၊ ဂတော သော တဿ ယာ ဂတီ’’တိ။ – ဂါထာဒွယမာဟ –

တတ္ထ သစေတိ ယဒိ အဟံ ဘာတရိ မတေ ရောဒေယျံ၊ ကိသသရီရာ အဿံ။ ဘာတု ပန မေ တပ္ပစ္စယာ ဝုဍ္ဎိ နာမ နတ္ထီတိ ဒဿေတိ။ တဿာ မေတိ တဿာ မယှံ ရောဒန္တိယာ ကိံ ဖလံ ကော အာနိသံသော ဘဝေယျ။ မယှံ အဝုဒ္ဓိ ပန ပညာယတီတိ ဒီပေတိ။ ဉာတိမိတ္တသုဟဇ္ဇာနန္တိ ဉာတိမိတ္တသုဟဒါနံ ။ အယမေဝ ဝါ ပါဌော။ ဘိယျော နောတိ ယေ အမှာကံ ဉာတီ စ မိတ္တာ စ သုဟဒယာ စ၊ တေသံ အဓိကတရာ အရတိ သိယာ။

သက္ကော ဘဂိနိယာ ကထံ သုတွာ ဘရိယံ ပုစ္ဆိ ‘‘အမ္မ၊ တုယှံ သော ကိံ ဟောတီ’’တိ? ‘‘ပတိ မေ၊ သာမီ’’တိ။ ‘‘ဣတ္ထိယော နာမ ပတိမှိ မတေ ဝိဓဝါ ဟောန္တိ အနာထာ၊ တွံ ကသ္မာ န ရောဒသီ’’တိ။ သာပိဿ အရောဒနကာရဏံ ကထေန္တီ –

၂၅။

‘‘ယထာပိ ဒါရကော စန္ဒံ၊ ဂစ္ဆန္တမနုရောဒတိ၊

ဧဝံသမ္ပဒမေဝေတံ၊ ယော ပေတမနုသောစတိ။

၂၆။

‘‘ဍယှမာနော န ဇာနာတိ၊ ဉာတီနံ ပရိဒေဝိတံ၊

တသ္မာ ဧတံ န သောစာမိ၊ ဂတော သော တဿ ယာ ဂတီ’’တိ။ – ဂါထာဒွယမာဟ –

တဿတ္ထော – ယထာ နာမ ယတ္ထ ကတ္ထစိ ယုတ္တာယုတ္တံ လဗ္ဘနီယာလဗ္ဘနီယံ အဇာနန္တော ဗာလဒါရကော မာတု ဥစ္ဆင်္ဂေ နိသိန္နော ပုဏ္ဏမာသိယံ ပုဏ္ဏံ စန္ဒံ အာကာသေ ဂစ္ဆန္တံ ဒိသွာ ‘‘အမ္မ၊ စန္ဒံ မေ ဒေဟိ၊ အမ္မ၊ စန္ဒံ မေ ဒေဟီ’’တိ ပုနပ္ပုနံ ရောဒတိ၊ ဧဝံသမ္ပဒမေဝေတံ၊ ဧဝံနိပ္ဖတ္တိကမေဝ ဧတံ တဿ ရုဏ္ဏံ ဟောတိ၊ ယော ပေတံ ကာလကတံ အနုသောစတိ။ ဣတောပိ စ ဗာလတရံ။ ကိံကာရဏာ? သော ဟိ ဝိဇ္ဇမာနစန္ဒံ အနုရောဒတိ၊ မယှံ ပန ပတိ မတော ဧတရဟိ အဝိဇ္ဇမာနော သူလေဟိ ဝိဇ္ဈိတွာ ဍယှမာနောပိ န ကိဉ္စိ ဇာနာတီတိ။

သက္ကော ဘရိယာယ ဝစနံ သုတွာ ဒါသိံ ပုစ္ဆိ ‘‘အမ္မ၊ တုယှံ သော ကိံ ဟောတီ’’တိ? ‘‘အယျော မေ၊ သာမီ’’တိ။ ‘‘နနု တွံ ဣမိနာ ပီဠေတွာ ပေါထေတွာ ပရိဘုတ္တာ ဘဝိဿသိ၊ တသ္မာ ‘‘သုမုတ္တာ အဟ’’န္တိ န ရောဒသီ’’တိ။ ‘သာမိ၊ မာ ဧဝံ အဝစ၊ န ဧတံ ဧတဿ အနုစ္ဆဝိကံ၊ ခန္တိမေတ္တာနုဒ္ဒယသမ္ပန္နော မေ အယျပုတ္တော၊ ဥရေ သံဝဍ္ဎိတပုတ္တော ဝိယ အဟောသီ’တိ။ ‘‘အထ ကသ္မာ န ရောဒသီ’’တိ? သာပိဿ အရောဒနကာရဏံ ကထေန္တီ –

၂၇။

‘‘ယထာပိ ဥဒကကုမ္ဘော၊ ဘိန္နော အပ္ပဋိသန္ဓိယော၊

ဧဝံသမ္ပဒမေဝေတံ၊ ယော ပေတမနုသောစတိ။

၂၈။

‘‘ဍယှမာနော န ဇာနာတိ၊ ဉာတီနံ ပရိဒေဝိတံ၊

တသ္မာ ဧတံ န သောစာမိ၊ ဂတော သော တဿ ယာ ဂတီ’’တိ။ – ဂါထာဒွယမာဟ –

တဿတ္ထော – ယထာ နာမ ဥဒကကုမ္ဘော ဥက္ခိပိယမာနော ပတိတွာ သတ္တဓာ ဘိန္နော ပုန တာနိ ကပါလာနိ ပဋိပါဋိယာ ဌပေတွာ သံဝိဒဟိတွာ ပဋိပါကတိကံ ကာတုံ န သက္ကောတိ၊ ယော ပေတမနုသောစတိ၊ တဿပိ ဧတမနုသောစနံ ဧဝံနိပ္ဖတ္တိကမေဝ ဟောတိ၊ မတဿ ပုန ဇီဝါပေတုံ အသက္ကုဏေယျတ္တာ ဣဒ္ဓိမတော ဝါ ဣဒ္ဓါနုဘာဝေန ဘိန္နံ ကုမ္ဘံ သံဝိဒဟိတွာ ဥဒကဿ ပူရေတုံ သက္ကာ ဘဝေယျ၊ ကာလကတော ပန ဣဒ္ဓိဗလေနာပိ န သက္ကာ ပဋိပါကတိတံ ကာတုန္တိ။ ဣတရာ ဂါထာ ဝုတ္တတ္ထာယေဝ။

သက္ကော သဗ္ဗေသံ ဓမ္မကထံ သုတွာ ပသီဒိတွာ ‘‘တုမှေဟိ အပ္ပမတ္တေဟိ မရဏဿတိ ဘာဝိတာ၊ တုမှေ ဣတော ပဋ္ဌာယ သဟတ္ထေန ကမ္မံ မာ ကရိတ္ထ၊ အဟံ၊ သက္ကော ဒေဝရာဇာ၊ အဟံ ဝေါ ဂေဟေ သတ္တ ရတနာနိ အပရိမာဏာနိ ကရိဿာမိ၊ တုမှေ ဒါနံ ဒေထ ၊ သီလံ ရက္ခထ၊ ဥပေါသထကမ္မံ ကရောထ၊ အပ္ပမတ္တာ ဟောထာ’’တိ တေသံ ဩဝါဒံ ဒတွာ ဂေဟံ အပရိမိတဓနံ ကတွာ ပက္ကာမိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ကုဋုမ္ဗိကော သောတာပတ္တိဖလေ ပတိဋ္ဌဟိ။ တဒါ ဒါသီ ခုဇ္ဇုတ္တရာ အဟောသိ၊ ဓီတာ ဥပ္ပလဝဏ္ဏာ၊ ပုတ္တော ရာဟုလော၊ မာတာ ခေမာ၊ ဗြာဟ္မဏော ပန အဟမေဝ အဟောသိန္တိ။

ဥရဂဇာတကဝဏ္ဏနာ စတုတ္ထာ။

[၃၅၅] ၅။ ဃဋဇာတကဝဏ္ဏနာ

အညေသောစန္တိ ရောဒန္တီတိ ဣဒံ သတ္ထာ ဇေတဝနေ ဝိဟရန္တော ကောသလရညော ဧကံ အမစ္စံ အာရဗ္ဘ ကထေသိ။ ဝတ္ထု ဟေဋ္ဌာ ကထိတသဒိသမေဝ။ ဣဓ ပန ရာဇာ အတ္တနော ဥပကာရဿ အမစ္စဿ မဟန္တံ ယသံ ဒတွာ ပရိဘေဒကာနံ ကထံ ဂဟေတွာ တံ ဗန္ဓာပေတွာ ဗန္ဓနာဂါရေ ပဝေသေသိ။ သော တတ္ထ နိသိန္နောဝ သောတာပတ္တိမဂ္ဂံ နိဗ္ဗတ္တေသိ။ ရာဇာ တဿ ဂုဏံ သလ္လက္ခေတွာ မောစာပေသိ။ သော ဂန္ဓမာလံ အာဒါယ သတ္ထု သန္တိကံ ဂန္တွာ ဝန္ဒိတွာ နိသီဒိ။ အထ နံ သတ္ထာ ‘‘အနတ္ထော ကိရ တေ ဥပ္ပန္နော’’တိ ပုစ္ဆိတွာ ‘‘အာမ၊ ဘန္တေ၊ အနတ္ထေန ပန မေ အတ္ထော အာဂတော၊ သောတာပတ္တိမဂ္ဂေါ နိဗ္ဗတ္တော’’တိ ဝုတ္တေ ‘‘န ခေါ၊ ဥပါသက၊ တွညေဝ အနတ္ထေန အတ္ထံ အာဟရိ၊ ပေါရာဏကပဏ္ဍိတာပိ အာဟရိံသူ’’တိ ဝတွာ တေန ယာစိတော အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော တဿ အဂ္ဂမဟေသိယာ ကုစ္ဆိမှိ နိဗ္ဗတ္တိ၊ ‘‘ဃဋကုမာရော’’တိဿ နာမံ ကရိံသု။ သော အပရေန သမယေန တက္ကသိလာယံ ဥဂ္ဂဟိတသိပ္ပော ဓမ္မေန ရဇ္ဇံ ကာရေသိ။ တဿ အန္တေပုရေ ဧကော အမစ္စော ဒုဗ္ဘိ။ သော တံ ပစ္စက္ခတော ဉတွာ ရဋ္ဌာ ပဗ္ဗာဇေသိ။ တဒါ သာဝတ္ထိယံ ဓင်္ကရာဇာ နာမ ရဇ္ဇံ ကာရေသိ။ သော တဿ သန္တိကံ ဂန္တွာ တံ ဥပဋ္ဌဟိတွာ ဟေဋ္ဌာ ဝုတ္တနယေန အတ္တနော ဝစနံ ဂါဟာပေတွာ ဗာရာဏသိရဇ္ဇံ ဂဏှာပေသိ။ သောပိ ရဇ္ဇံ ဂဟေတွာ ဗောဓိသတ္တံ သင်္ခလိကာဟိ ဗန္ဓာပေတွာ ဗန္ဓနာဂါရံ ပဝေသေသိ။ ဗောဓိသတ္တော ဈာနံ နိဗ္ဗတ္တေတွာ အာကာသေ ပလ္လင်္ကေန နိသီဒိ၊ ဓင်္ကဿ သရီရေ ဍာဟော ဥပ္ပဇ္ဇိ။ သော ဂန္တွာ ဗောဓိသတ္တဿ သုဝဏ္ဏာဒါသဖုလ္လပဒုမသဿိရိကံ မုခံ ဒိသွာ ဗောဓိသတ္တံ ပုစ္ဆန္တော ပဌမံ ဂါထမာဟ –

၂၉။

‘‘အညေ သောစန္တိ ရောဒန္တိ၊ အညေ အဿုမုခါ ဇနာ၊

ပသန္နမုခဝဏ္ဏောသိ၊ ကသ္မာ ဃဋ န သောစသီ’’တိ။

တတ္ထ အညေတိ တံ ဌပေတွာ သေသမနုဿာ။

အထဿ ဗောဓိသတ္တော အသောစနကာရဏံ ကထေန္တော စတဿော ဂါထာ အဘာသိ –

၃၀။

‘‘နာဗ္ဘတီတဟရော သောကော၊ နာနာဂတသုခါဝဟော၊

တသ္မာ ဓင်္က န သောစာမိ၊ နတ္ထိ သောကေ ဒုတီယတာ။

၃၁။

‘‘သောစံ ပဏ္ဍု ကိသော ဟောတိ၊ ဘတ္တဉ္စဿ န ရုစ္စတိ၊

အမိတ္တာ သုမနာ ဟောန္တိ၊ သလ္လဝိဒ္ဓဿ ရုပ္ပတော။

၃၂။

‘‘ဂါမေ ဝါ ယဒိ ဝါရညေ၊ နိန္နေ ဝါ ယဒိ ဝါ ထလေ၊

ဌိတံ မံ နာဂမိဿတိ၊ ဧဝံ ဒိဋ္ဌပဒေါ အဟံ။

၃၃။

‘‘ယဿတ္တာ နာလမေကောဝ၊ သဗ္ဗကာမရသာဟရော၊

သဗ္ဗာပိ ပထဝီ တဿ၊ န သုခံ အာဝဟိဿတီ’’တိ။

တတ္ထ နာဗ္ဘတီတဟရောတိ နာဗ္ဘတီတာဟာရော၊ အယမေဝ ဝါ ပါဌော။ သောကော နာမ အဗ္ဘတီတံ အတိက္ကန္တံ နိရုဒ္ဓံ အတ္ထင်္ဂတံ ပုန နာဟရတိ။ ဒုတီယတာတိ သဟာယတာ။ အတီတာဟရဏေန ဝါ အနာဂတာဟရဏေန ဝါ သောကော နာမ ကဿစိ သဟာယော န ဟောတိ၊ တေနာပိ ကာရဏေနာဟံ န သောစာမီတိ ဝဒတိ။ သောစန္တိ သောစန္တော။ သလ္လဝိဒ္ဓဿ ရုပ္ပတောတိ သောကသလ္လေန ဝိဒ္ဓဿ တေနေဝ ဃဋ္ဋိယမာနဿ ‘‘ဒိဋ္ဌာ ဝတ နော ပစ္စာမိတ္တဿ ပိဋ္ဌီ’’တိ အမိတ္တာ သုမနာ ဟောန္တီတိ အတ္ထော။

ဌိတံ မံ နာဂမိဿတီတိ သမ္မ ဓင်္ကရာဇ၊ ဧတေသု ဂါမာဒီသု ယတ္ထ ကတ္ထစိ ဌိတံ မံ ပဏ္ဍုကိသဘာဝါဒိကံ သောကမူလကံ ဗျသနံ န အာဂမိဿတိ။ ဧဝံ ဒိဋ္ဌပဒေါတိ ယထာ တံ ဗျသနံ နာဂစ္ဆတိ၊ ဧဝံ မယာ ဈာနပဒံ ဒိဋ္ဌံ။ ‘‘အဋ္ဌလောကဓမ္မပဒ’’န္တိပိ ဝဒန္တိယေဝ ။ ပါဠိယံ ပန ‘‘န မတ္တံ နာဂမိဿတီ’’တိ လိခိတံ၊ တံ အဋ္ဌကထာယံ နတ္ထိ။ ပရိယောသာနဂါထာယ ဣစ္ဆိတပတ္ထိတတ္ထေန ဈာနသုခသင်္ခါတံ သဗ္ဗကာမရသံ အာဟရတီတိ သဗ္ဗကာမရသာဟရော။ ဣဒံ ဝုတ္တံ ဟောတိ – ယဿ ရညော ပဟာယ အညသဟာယေ အတ္တာဝ ဧကော သဗ္ဗကာမရသာဟရော နာလံ၊ သဗ္ဗံ ဈာနသုခသင်္ခါတံ ကာမရသံ အာဟရိတုံ အသမတ္ထော၊ တဿ ရညော သဗ္ဗာပိ ပထဝီ န သုခံ အာဝဟိဿတိ။ ကာမာတုရဿ ဟိ သုခံ နာမ နတ္ထိ၊ ယော ပန ကိလေသဒရထရဟိတံ ဈာနသုခံ အာဟရိတုံ သမတ္ထော၊ သော ရာဇာ သုခီ ဟောတီတိ။ ယော ပနေတာယ ဂါထာယ ‘‘ယဿတ္ထာ နာလမေကော’’တိပိ ပါဌော၊ တဿတ္ထော န ဒိဿတိ။

ဣတိ ဓင်္ကော ဣမာ စတဿော ဂါထာ သုတွာ ဗောဓိသတ္တံ ခမာပေတွာ ရဇ္ဇံ ပဋိစ္ဆာပေတွာ ပက္ကာမိ။ ဗောဓိသတ္တောပိ ရဇ္ဇံ အမစ္စာနံ ပဋိနိယျာဒေတွာ ဟိမဝန္တပဒေသံ ဂန္တွာ ဣသိပဗ္ဗဇ္ဇံ ပဗ္ဗဇိတွာ အပရိဟီနဇ္ဈာနော ဗြဟ္မလောကပရာယဏော အဟောသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဓင်္ကရာဇာ အာနန္ဒော အဟောသိ၊ ဃဋရာဇာ ပန အဟမေဝ အဟောသိ’’န္တိ။

ဃဋဇာတကဝဏ္ဏနာ ပဉ္စမာ။

[၃၅၆] ၆။ ကောရဏ္ဍိယဇာတကဝဏ္ဏနာ

ဧကော အရညေတိ ဣဒံ သတ္ထာ ဇေတဝနေ ဝိဟရန္တော ဓမ္မသေနာပတိံ အာရဗ္ဘ ကထေသိ။ ထေရော ကိရ အာဂတာဂတာနံ ဒုဿီလာနံ မိဂလုဒ္ဒကမစ္ဆဗန္ဓာဒီနံ ဒိဋ္ဌဒိဋ္ဌာနညေဝ ‘‘သီလံ ဂဏှထ၊ သီလံ ဂဏှထာ’’တိ သီလံ ဒေတိ။ တေ ထေရေ ဂရုဘာဝေန တဿ ကထံ ဘိန္ဒိတုံ အသက္ကောန္တာ သီလံ ဂဏှန္တိ၊ ဂဟေတွာ စ ပန န ရက္ခန္တိ၊ အတ္တနော အတ္တနော ကမ္မမေဝ ကရောန္တိ။ ထေရော သဒ္ဓိဝိဟာရိကေ အာမန္တေတွာ ‘‘အာဝုသော၊ ဣမေ မနုဿာ မမ သန္တိကေ သီလံ ဂဏှိံသု၊ ဂဏှိတွာ စ ပန န ရက္ခန္တီ’’တိ အာဟ။ ‘‘ဘန္တေ၊ တုမှေ ဧတေသံ အရုစိယာ သီလံ ဒေထ၊ ဧတေ တုမှာကံ ကထံ ဘိန္ဒိတုံ အသက္ကောန္တာ ဂဏှန္တိ၊ တုမှေ ဣတော ပဋ္ဌာယ ဧဝရူပါနံ သီလံ မာ အဒတ္ထာ’’တိ။ ထေရော အနတ္တမနော အဟောသိ။ တံ ပဝတ္တိံ သုတွာ ဘိက္ခူ ဓမ္မသဘာယံ ကထံ သမုဋ္ဌာပေသုံ – ‘‘အာဝုသော၊ သာရိပုတ္တတ္ထေရော ကိရ ဒိဋ္ဌဒိဋ္ဌာနညေဝ သီလံ ဒေတီ’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပေသ ဒိဋ္ဌဒိဋ္ဌာနံ အယာစန္တာနညေဝ သီလံ ဒေတီ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဗြာဟ္မဏကုလေ နိဗ္ဗတ္တိတွာ ဝယပ္ပတ္တော တက္ကသိလာယံ ဒိသာပါမောက္ခဿ အာစရိယဿ ဇေဋ္ဌန္တေဝါသိကော ကောရဏ္ဍိယော နာမ အဟောသိ။ တဒါ သော အာစရိယော ဒိဋ္ဌဒိဋ္ဌာနံ ကေဝဋ္ဋာဒီနံ အယာစန္တာနညေဝ ‘‘သီလံ ဂဏှထ၊ သီလံ ဂဏှထာ’’တိ သီလံ ဒေတိ။ တေ ဂဟေတွာပိ န ရက္ခန္တိ အာစရိယော တမတ္ထံ အန္တေဝါသိကာနံ အာရောစေသိ။ အန္တေဝါသိကာ ‘‘ဘန္တေ၊ တုမှေ ဧတေသံ အရုစိယာ သီလံ ဒေထ၊ တသ္မာ ဘိန္ဒန္တိ၊ ဣတော ဒါနိ ပဋ္ဌာယ ယာစန္တာနညေဝ ဒဒေယျာထ၊ မာ အယာစန္တာန’’န္တိ ဝဒိံသု။ သော ဝိပ္ပဋိသာရီ အဟောသိ၊ ဧဝံ သန္တေပိ ဒိဋ္ဌဒိဋ္ဌာနံ သီလံ ဒေတိယေဝ။

အထေကဒိဝသံ ဧကသ္မာ ဂါမာ မနုဿာ အာဂန္တွာ ဗြာဟ္မဏဝါစနကတ္ထာယ အာစရိယံ နိမန္တယိံသု။ သော ကောရဏ္ဍိယမာဏဝံ ပက္ကောသိတွာ ‘‘တာတ၊ အဟံ န ဂစ္ဆာမိ၊ တွံ ဣမေ ပဉ္စသတေ မာဏဝေ ဂဟေတွာ တတ္ထ ဂန္တွာ ဝါစနကာနိ သမ္ပဋိစ္ဆိတွာ အမှာကံ ဒိန္နကောဋ္ဌာသံ အာဟရာ’’တိ ပေသေသိ။ သော ဂန္တွာ ပဋိနိဝတ္တန္တော အန္တရာမဂ္ဂေ ဧကံ ကန္ဒရံ ဒိသွာ စိန္တေသိ ‘‘အမှာကံ အာစရိယော ဒိဋ္ဌဒိဋ္ဌာနံ အယာစန္တာနညေဝ သီလံ ဒေတိ၊ ဣတော ဒါနိ ပဋ္ဌာယ ယထာ ယာစန္တာနညေဝ ဒေတိ၊ တထာ နံ ကရိဿာမီ’’တိ။ သော တေသု မာဏဝေသု သုခနိသိန္နေသု ဥဋ္ဌာယ မဟန္တံ မဟန္တံ သေလံ ဥက္ခိပိတွာ ကန္ဒရာယံ ခိပိ၊ ပုနပ္ပုနံ ခိပိယေဝ။ အထ နံ တေ မာဏဝါ ဥဋ္ဌာယ ‘‘အာစရိယ၊ ကိံ ကရောသီ’’တိ အာဟံသု။ သော န ကိဉ္စိ ကထေသိ၊ တေ ဝေဂေန ဂန္တွာ အာစရိယဿ အာရောစေသုံ။ အာစရိယော အာဂန္တွာ တေန သဒ္ဓိံ သလ္လပန္တော ပဌမံ ဂါထမာဟ –

၃၄။

‘‘ဧကော အရညေ ဂိရိကန္ဒရာယံ၊ ပဂ္ဂယှ ပဂ္ဂယှ သိလံ ပဝေစ္ဆသိ၊

ပုနပ္ပုနံ သန္တရမာနရူပေါ၊ ကောရဏ္ဍိယ ကော နု တဝ ယိဓတ္ထော’’တိ။

တတ္ထ ကော နု တဝ ယိဓတ္ထောတိ ကော နု တဝ ဣဓ ကန္ဒရာယံ သိလာခိပနေန အတ္ထော။

သော တဿ ဝစနံ သုတွာ အာစရိယံ ပဗောဓေတုကာမော ဒုတိယံ ဂါထမာဟ –

၃၅။

‘‘အဟဉှိမံ သာဂရသေဝိတန္တံ၊ သမံ ကရိဿာမိ ယထာပိ ပါဏိ၊

ဝိကိရိယ သာနူနိ စ ပဗ္ဗတာနိ စ၊ တသ္မာ သိလံ ဒရိယာ ပက္ခိပါမီ’’တိ။

တတ္ထ အဟဉှိမန္တိ အဟဉှိ ဣမံ မဟာပထဝိံ။ သာဂရသေဝိတန္တန္တိ သာဂရေဟိ သေဝိတံ စာတုရန္တံ။ ယထာပိ ပါဏီတိ ဟတ္ထတလံ ဝိယ သမံ ကရိဿာမိ။ ဝိကိရိယာတိ ဝိကိရိတွာ။ သာနူနိ စ ပဗ္ဗတာနိ စာတိ ပံသုပဗ္ဗတေ စ သိလာပဗ္ဗတေ စ။

တံ သုတွာ ဗြာဟ္မဏော တတိယံ ဂါထမာဟ –

၃၆။

‘‘နယိမံ မဟိံ အရဟတိ ပါဏိကပ္ပံ၊ သမံ မနုဿော ကရဏာယ မေကော၊

မညာမိမညေဝ ဒရိံ ဇိဂီသံ၊ ကောရဏ္ဍိယ ဟာဟသိ ဇီဝလောက’’န္တိ။

တတ္ထ ကရဏာယ မေကောတိ ကရဏာယ ဧကော ကာတုံ န သက္ကောတီတိ ဒီပေတိ။ မညာမိမညေဝ ဒရိံ ဇိဂီသန္တိ အဟံ မညာမိ တိဋ္ဌတု ပထဝီ၊ ဣမညေဝ ဧကံ ဒရိံ ဇိဂီသံ ပူရဏတ္ထာယ ဝါယမန္တော သိလာ ပရိယေသန္တော ဥပါယံ ဝိစိနန္တောဝ တွံ ဣမံ ဇီဝလောကံ ဟာဟသိ ဇဟိဿသိ၊ မရိဿသီတိ အတ္ထော။

တံ သုတွာ မာဏဝေါ စတုတ္ထံ ဂါထမာဟ –

၃၇။

‘‘သစေ အယံ ဘူတဓရံ န သက္ကာ၊ သမံ မနုဿော ကရဏာယ မေကော၊

ဧဝမေဝ တွံ ဗြဟ္မေ ဣမေ မနုဿေ၊ နာနာဒိဋ္ဌိကေ နာနယိဿသိ တေ’’တိ။

တဿတ္ထော – သစေ အယံ ဧကော မနုဿော ဣမံ ဘူတဓရံ ပထဝိံ သမံ ကာတုံ န သက္ကာ န သမတ္ထော၊ ဧဝမေဝ တွံ ဣမေ ဒုဿီလမနုဿေ နာနာဒိဋ္ဌိကေ နာနယိဿသိ၊ တေ ဧဝံ ‘‘သီလံ ဂဏှထ၊ သီလံ ဂဏှထာ’’တိ ဝဒန္တော အတ္တနော ဝသံ န အာနယိဿသိ၊ ပဏ္ဍိတပုရိသာယေဝ ဟိ ပါဏာတိပါတံ ‘‘အကုသလ’’န္တိ ဂရဟန္တိ။ သံသာရမောစကာဒယော ပနေတ္ထ ကုသလသညိနော၊ တေ တွံ ကထံ အာနယိဿသိ၊ တသ္မာ ဒိဋ္ဌဒိဋ္ဌာနံ သီလံ အဒတွာ ယာစန္တာနညေဝ ဒေဟီတိ။

တံ သုတွာ အာစရိယော ‘‘ယုတ္တံ ဝဒတိ ကောရဏ္ဍိယော၊ ဣဒါနိ န ဧဝရူပံ ကရိဿာမီ’’တိ အတ္တနော ဝိရဒ္ဓဘာဝံ ဉတွာ ပဉ္စမံ ဂါထမာဟ –

၃၈။

‘‘သံခိတ္တရူပေန ဘဝံ မမတ္ထံ၊ အက္ခာသိ ကောရဏ္ဍိယ ဧဝမေတံ၊

ယထာ န သက္ကာ ပထဝီ သမာယံ၊ ကတ္တုံ မနုဿေန တထာ မနုဿာ’’တိ။

တတ္ထ သမာယန္တိ သမံ အယံ။ ဧဝံ အာစရိယော မာဏဝဿ ထုတိံ အကာသိ၊ သောပိ နံ ဗောဓေတွာ သယံ ဃရံ နေသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဗြာဟ္မဏော သာရိပုတ္တော အဟောသိ၊ ကောရဏ္ဍိယမာဏဝေါ ပန အဟမေဝ အဟောသိ’’န္တိ။

ကောရဏ္ဍိယဇာတကဝဏ္ဏနာ ဆဋ္ဌာ။

[၃၅၇] ၇။ လဋုကိကဇာတကဝဏ္ဏနာ

ဝန္ဒာမိ တံ ကုဉ္ဇရ သဋ္ဌိဟာယနန္တိ ဣဒံ သတ္ထာ ဝေဠုဝနေ ဝိဟရန္တော ဒေဝဒတ္တံ အာရဗ္ဘ ကထေသိ။ ဧကသ္မိဉှိ ဒိဝသေ ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ ဒေဝဒတ္တော ကက္ခဠော ဖရုသော သာဟသိကော၊ သတ္တေသု ကရုဏာမတ္တမ္ပိဿ နတ္ထီ’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပေသ နိက္ကရုဏောယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဟတ္ထိယောနိယံ နိဗ္ဗတ္တိတွာ ဝယပ္ပတ္တော ပါသာဒိကော မဟာကာယော အသီတိသဟဿဝါရဏပရိဝါရော ယူထပတိ ဟုတွာ ဟိမဝန္တပဒေသေ ဝိဟာသိ။ တဒါ ဧကာ လဋုကိကာ သကုဏိကာ ဟတ္ထီနံ ဝိစရဏဋ္ဌာနေ အဏ္ဍာနိ နိက္ခိပိ၊ တာနိ ပရိဏတာနိ ဘိန္ဒိတွာ သကုဏပေါတကာ နိက္ခမိံသု။ တေသု အဝိရုဠှပက္ခေသု ဥပ္ပတိတုံ အသက္ကောန္တေသုယေဝ မဟာသတ္တော အသီတိသဟဿဝါရဏပရိဝုတော ဂေါစရာယ စရန္တော တံ ပဒေသံ ပတ္တော။ တံ ဒိသွာ လဋုကိကာ စိန္တေသိ ‘‘အယံ ဟတ္ထိရာဇာ မမ ပေါတကေ မဒ္ဒိတွာ မာရေဿတိ၊ ဟန္ဒ နံ ပုတ္တကာနံ ပရိတ္တာဏတ္ထာယ ဓမ္မိကာရက္ခံ ယာစာမီ’’တိ။ သာ ဥဘော ပက္ခေ ဧကတော ကတွာ တဿ ပုရတော ဌတွာ ပဌမံ ဂါထမာဟ –

၃၉။

‘‘ဝန္ဒာမိ တံ ကုဉ္ဇရ သဋ္ဌိဟာယနံ၊ အာရညကံ ယူထပတိံ ယသဿိံ၊

ပက္ခေဟိ တံ ပဉ္ဇလိကံ ကရောမိ၊ မာ မေ ဝဓီ ပုတ္တကေ ဒုဗ္ဗလာယာ’’တိ။

တတ္ထ သဋ္ဌိဟာယနန္တိ သဋ္ဌိဝဿကာလေ ဟာယနဗလံ။ ယသဿိန္တိ ပရိဝါရသမ္ပန္နံ။ ပက္ခေဟိ တံ ပဉ္စလိကံ ကရောမီတိ အဟံ ပက္ခေဟိ တံ အဉ္ဇလိကံ ကရောမီတိ အတ္ထော။

မဟာသတ္တော ‘‘မာ စိန္တယိ လဋုကိကေ၊ အဟံ တေ ပုတ္တကေ ရက္ခိဿာမီ’’တိ သကုဏပေါတကာနံ ဥပရိ ဌတွာ အသီတိယာ ဟတ္ထိသဟဿေသု ဂတေသု လဋုကိကံ အာမန္တေတွာ ‘‘လဋုကိကေ အမှာကံ ပစ္ဆတော ဧကော ဧကစာရိကော ဟတ္ထီ အာဂစ္ဆတိ၊ သော အမှာကံ ဝစနံ န ကရိဿတိ၊ တသ္မိံ အာဂတေ တမ္ပိ ယာစိတွာ ပုတ္တကာနံ သောတ္ထိဘာဝံ ကရေယျာသီ’’တိ ဝတွာ ပက္ကာမိ။ သာပိ တဿ ပစ္စုဂ္ဂမနံ ကတွာ ဥဘောဟိ ပက္ခေဟိ အဉ္ဇလိံ ကတွာ ဒုတိယံ ဂါထမာဟ –

၄၀။

‘‘ဝန္ဒာမိ တံ ကုဉ္ဇရ ဧကစာရိံ၊ အာရညကံ ပဗ္ဗတသာနုဂေါစရံ၊

ပက္ခေဟိ တံ ပဉ္ဇလိကံ ကရောမိ၊ မာ မေ ဝဓီ ပုတ္တကေ ဒုဗ္ဗလာယာ’’တိ။

တတ္ထ ပဗ္ဗတသာနုဂေါစရန္တိ ဃနသေလပဗ္ဗတေသု စ ပံသုပဗ္ဗတေသု စ ဂေါစရံ ဂဏှန္တံ။

သော တဿာ ဝစနံ သုတွာ တတိယံ ဂါထမာဟ –

၄၁။

‘‘ဝဓိဿာမိ တေ လဋုကိကေ ပုတ္တကာနိ၊ ကိံ မေ တုဝံ ကာဟသိ ဒုဗ္ဗလာသိ၊

သတံ သဟဿာနိပိ တာဒိသီနံ၊ ဝါမေန ပါဒေန ပပေါထယေယျ’’န္တိ။

တတ္ထ ဝဓိဿာမိ တေတိ တွံ ကသ္မာ မမ ဝိစရဏမဂ္ဂေ ပုတ္တကာနိ ဌပေသိ၊ ယသ္မာ ဌပေသိ၊ တသ္မာ ဝဓိဿာမိ တေ ပုတ္တကာနီတိ ဝဒတိ။ ကိံ မေ တုဝံ ကာဟသီတိ မယှံ မဟာထာမဿ တွံ ဒုဗ္ဗလာ ကိံ ကရိဿသိ။ ပပေါထယေယျန္တိ အဟံ တာဒိသာနံ လဋုကိကာနံ သတသဟဿမ္ပိ ဝါမေန ပါဒေန သဉ္စုဏ္ဏေယျံ၊ ဒက္ခိဏပါဒေန ပန ကထာဝ နတ္ထီတိ။

ဧဝဉ္စ ပန ဝတွာ သော တဿာ ပုတ္တကေ ပါဒေန သဉ္စုဏ္ဏေတွာ မုတ္တေန ပဝါဟေတွာ နဒန္တောဝ ပက္ကာမိ။ လဋုကိကာ ရုက္ခသာခါယ နိလီယိတွာ ‘‘ဣဒါနိ တာဝ ဝါရဏ နဒန္တော ဂစ္ဆသိ၊ ကတိပါဟေနေဝ မေ ကိရိယံ ပဿိဿသိ၊ ကာယဗလတော ဉာဏဗလဿ မဟန္တဘာဝံ န ဇာနာသိ၊ ဟောတု၊ ဇာနာပေဿာမိ န’’န္တိ တံ သန္တဇ္ဇယမာနာဝ စတုတ္ထံ ဂါထမာဟ –

၄၂။

‘‘န ဟေဝ သဗ္ဗတ္ထ ဗလေန ကိစ္စံ၊ ဗလဉှိ ဗာလဿ ဝဓာယ ဟောတိ၊

ကရိဿာမိ တေ နာဂရာဇာ အနတ္ထံ၊ ယော မေ ဝဓီ ပုတ္တကေ ဒုဗ္ဗလာယာ’’တိ။

တတ္ထ ဗလေနာတိ ကာယဗလေန။ အနတ္ထန္တိ အဝုဍ္ဎိံ။ ယော မေတိ ယော တွံ မမ ဒုဗ္ဗလာယ ပုတ္တကေ ဝဓီ ဃာတေသိ။

သာ ဧဝံ ဝတွာ ကတိပါဟံ ဧကံ ကာကံ ဥပဋ္ဌဟိတွာ တေန တုဋ္ဌေန ‘‘ကိံ တေ ကရောမီ’’တိ ဝုတ္တာ ‘‘သာမိ၊ အညံ မေ ကာတဗ္ဗံ နတ္ထိ၊ ဧကဿ ပန ဧကစာရိကဝါရဏဿ တုဏ္ဍေန ပဟရိတွာ တုမှေဟိ အက္ခီနိ ဘိန္နာနိ ပစ္စာသီသာမီ’’တိ အာဟ။ သာ တေန ‘‘သာဓူ’’တိ သမ္ပဋိစ္ဆိတာ ဧကံ နီလမက္ခိကံ ဥပဋ္ဌဟိ။ တာယပိ ‘‘ကိံ တေ၊ ကရောမီ’’တိ ဝုတ္တာ ‘‘ဣမိနာ ကာကေန ဧကစာရိကဝါရဏဿ အက္ခီသု ဘိန္နေသု တုမှေဟိ တတ္ထ အာသာဋိကံ ပါတေတုံ ဣစ္ဆာမီ’’တိ ဝတွာ တာယပိ ‘‘သာဓူ’’တိ ဝုတ္တေ ဧကံ မဏ္ဍူကံ ဥပဋ္ဌဟိတွာ တေန ‘‘ကိံ တေ၊ ကရောမီ’’တိ ဝုတ္တာ ‘‘ယဒါ ဧကစာရိကဝါရဏော အန္ဓော ဟုတွာ ပါနီယံ ပရိယေသတိ၊ တဒါ ပဗ္ဗတမတ္ထကေ ဌိတော သဒ္ဒံ ကတွာ တသ္မိံ ပဗ္ဗတမတ္ထကံ အဘိရုဟန္တေ ဩတရိတွာ ပပါတေ သဒ္ဒံ ကရေယျာထ၊ အဟံ တုမှာကံ သန္တိကာ ဧတ္တကံ ပစ္စာသီသာမီ’’တိ အာဟ။ သောပိ တဿာ ဝစနံ ‘‘သာဓူ’’တိ သမ္ပဋိစ္ဆိ။

အထေကဒိဝသံ ကာကော ဝါရဏဿ ဒွေပိ အက္ခီနိ တုဏ္ဍေန ဘိန္ဒိ၊ နီလမက္ခိကာ အာသာဋိကံ ပါတေသိ။ သော ပုဠဝေဟိ ခဇ္ဇန္တော ဝေဒနာပ္ပတ္တော ပိပါသာဘိဘူတော ပါနီယံ ပရိယေသမာနော ဝိစရိ။ တသ္မိံ ကာလေ မဏ္ဍူကော ပဗ္ဗတမတ္ထကေ ဌတွာ သဒ္ဒမကာသိ။ ဝါရဏော ‘‘ဧတ္ထ ပါနီယံ ဘဝိဿတီ’’တိ ပဗ္ဗတမတ္ထကံ အဘိရုဟိ။ အထ မဏ္ဍူကော ဩတရိတွာ ပပါတေ ဌတွာ သဒ္ဒမကာသိ။ ဝါရဏော ‘‘ဧတ္ထ ပါနီယံ ဘဝိဿတီ’’တိ ပပါတာဘိမုခေါ ဂစ္ဆန္တော ပရိဂဠိတွာ ပဗ္ဗတပါဒေ ပတိတွာ ဇီဝိတက္ခယံ ပါပုဏိ။ လဋုကိကာ တဿ မတဘာဝံ ဉတွာ ‘‘ဒိဋ္ဌာ မေ ပစ္စာမိတ္တဿ ပိဋ္ဌီ’’တိ ဟဋ္ဌတုဋ္ဌာ တဿ ခန္ဓေ စင်္ကမိတွာ ယထာကမ္မံ ဂတာ။

သတ္ထာ ‘‘န၊ ဘိက္ခဝေ၊ ကေနစိ သဒ္ဓိံ ဝေရံ နာမ ကာတဗ္ဗံ၊ ဧဝံ ဗလသမ္ပန္နမ္ပိ ဝါရဏံ ဣမေ စတ္တာရော ဇနာ ဧကတော ဟုတွာ ဝါရဏဿ ဇီဝိတက္ခယံ ပါပေသု’’န္တိ –

၄၃။

‘‘ကာကဉ္စ ပဿ လဋုကိကံ၊ မဏ္ဍူကံ နီလမက္ခိကံ၊

ဧတေ နာဂံ အဃာတေသုံ၊ ပဿ ဝေရဿ ဝေရိနံ၊

တသ္မာ ဟိ ဝေရံ န ကယိရာထ၊ အပ္ပိယေနပိ ကေနစီ’’တိ။ –

ဣမံ အဘိသမ္ဗုဒ္ဓဂါထံ ဝတွာ ဇာတကံ သမောဓာနေသိ။

တတ္ထ ပဿာတိ အနိယာမိတာလပနမေတံ၊ ဘိက္ခူ ပန သန္ဓာယ ဝုတ္တတ္တာ ပဿထ ဘိက္ခဝေတိ ဝုတ္တံ ဟောတိ။ ဧတေတိ ဧတေ စတ္တာရော ဧကတော ဟုတွာ။ အဃာတေသုန္တိ တံ ဝဓိံသု။ ပဿ ဝေရဿ ဝေရိနန္တိ ပဿထ ဝေရိကာနံ ဝေရဿ ဂတိန္တိ အတ္ထော။

တဒါ ဧကစာရိကဟတ္ထီ ဒေဝဒတ္တော အဟောသိ၊ ယူထပတိ ပန အဟမေဝ အဟောသိန္တိ။

လဋုကိကဇာတကဝဏ္ဏနာ သတ္တမာ။

[၃၅၈] ၈။ စူဠဓမ္မပါလဇာတကဝဏ္ဏနာ

အဟမေဝဒူသိယာ ဘူနဟတာတိ ဣဒံ သတ္ထာ ဝေဠုဝနေ ဝိဟရန္တော ဒေဝဒတ္တဿ ဝဓာယ ပရိသက္ကနံ အာရဗ္ဘ ကထေသိ။ အညေသု ဇာတကေသု ဒေဝဒတ္တော ဗောဓိသတ္တဿ တာသမတ္တမ္ပိ ကာတုံ နာသက္ခိ၊ ဣမသ္မိံ ပန စူဠဓမ္မပါလဇာတကေ ဗောဓိသတ္တဿ သတ္တမာသိကကာလေ ဟတ္ထပါဒေ စ သီသဉ္စ ဆေဒါပေတွာ အသိမာလကံ နာမ ကာရေသိ။ ဒဒ္ဒရဇာတကေ (ဇာ။ ၁။၂။၄၃-၄၄) ဂီဝံ ဂဟေတွာ မာရေတွာ ဥဒ္ဓနေ မံသံ ပစိတွာ ခါဒိ။ ခန္တီဝါဒီဇာတကေ (ဇာ။ ၁။၄။၄၉ အာဒယော) ဒွီဟိပိ ကသာဟိ ပဟာရသဟဿေဟိ တာဠာပေတွာ ဟတ္ထပါဒေ စ ကဏ္ဏနာသဉ္စ ဆေဒါပေတွာ ဇဋာသု ဂဟေတွာ ကဍ္ဎာပေတွာ ဥတ္တာနကံ နိပဇ္ဇာပေတွာ ဥရေ ပါဒေန ပဟရိတွာ ဂတော။ ဗောဓိသတ္တော တံ ဒိဝသံယေဝ ဇီဝိတက္ခယံ ပါပုဏိ။ စူဠနန္ဒိယဇာတကေပိ (ဇာ။ ၁။၂။၁၄၃-၁၄၄) မဟာကပိဇာတကေပိ (ဇာ။ ၁။၇။၈၃ အာဒယော) မာရေသိယေဝ။ ဧဝမေဝ သော ဒီဃရတ္တံ ဝဓာယ ပရိသက္ကန္တော ဗုဒ္ဓကာလေပိ ပရိသက္ကိယေဝ။ အထေကဒိဝသံ ဘိက္ခူ ဓမ္မသဘာယံ ကထံ သမုဋ္ဌာပေသုံ – ‘‘အာဝုသော၊ ဒေဝဒတ္တော ဗုဒ္ဓါနံ မာရဏတ္ထမေဝ ဥပါယံ ကရောတိ၊ ‘သမ္မာသမ္ဗုဒ္ဓံ မာရာပေဿာမီ’တိ ဓနုဂ္ဂဟေ ပယောဇေသိ၊ သိလံ ပဝိဇ္ဈိ၊ နာဠာဂိရိံ ဝိဿဇ္ဇာပေသီ’’တိ။ သတ္ထာ အာဂန္တွာ ‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပေသ မယှံ ဝဓာယ ပရိသက္ကိယေဝ၊ ဣဒါနိ ပန တာသမတ္တမ္ပိ ကာတုံ န သက္ကောတိ ၊ ပုဗ္ဗေ မံ စူဠဓမ္မပါလကုမာရကာလေ အတ္တနော ပုတ္တံ သမာနံ ဇီဝတက္ခယံ ပါပေတွာ အသိမာလကံ ကာရေသီ’’တိ ဝတွာ အတီတံ အာဟရိ။

အတီတေ ဗာရာဏသိယံ မဟာပတာပေ နာမ ရဇ္ဇံ ကာရေန္တေ ဗောဓိသတ္တော တဿ အဂ္ဂမဟေသိယာ စန္ဒာဒေဝိယာ ကုစ္ဆိမှိ နိဗ္ဗတ္တိ၊ ‘‘ဓမ္မပါလော’’တိဿ နာမံ ကရိံသု။ တမေနံ သတ္တမာသိကကာလေ မာတာ ဂန္ဓောဒကေန နှာပေတွာ အလင်္ကရိတွာ ကီဠာပယမာနာ နိသီဒိ။ ရာဇာ တဿာ ဝသနဋ္ဌာနံ အဂမာသိ။ သာ ပုတ္တံ ကီဠာပယမာနာ ပုတ္တသိနေဟေန သမပ္ပိတာ ဟုတွာ ရာဇာနံ ပဿိတွာပိ န ဥဋ္ဌဟိ။ သော စိန္တေသိ ‘‘အယံ ဣဒါနေဝ တာဝ ပုတ္တံ နိဿာယ မာနံ ကရောတိ၊ မံ ကိသ္မိဉ္စိ န မညတိ၊ ပုတ္တေ ပန ဝဍ္ဎန္တေ မယိ ‘မနုဿော’တိပိ သညံ န ကရိဿတိ၊ ဣဒါနေဝ နံ ဃာတေဿာမီ’’တိ။ သော နိဝတ္တိတွာ ရာဇာသနေ နိသီဒိတွာ ‘‘အတ္တနော ဝိဓာနေန အာဂစ္ဆတူ’’တိ စောရဃာတကံ ပက္ကောသာပေသိ။ သော ကာသာယဝတ္ထနိဝတ္ထော ရတ္တမာလာဓရော ဖရသုံ အံသေ ဌပေတွာ ဥပဓာနဃဋိကံ ဟတ္ထပါဒဌပနဒဏ္ဍကဉ္စ အာဒါယ အာဂန္တွာ ရာဇာနံ ဝန္ဒိတွာ ‘‘ကိံ ကရောမိ၊ ဒေဝါ’’တိ အဋ္ဌာသိ။ ဒေဝိယာ သိရိဂဗ္ဘံ ဂန္တွာ ဓမ္မပါလံ အာနေဟီတိ။ ဒေဝီပိ ရညော ကုဇ္ဈိတွာ နိဝတ္တနဘာဝံ ဉတွာ ဗောဓိသတ္တံ ဥရေ နိပဇ္ဇာပေတွာ ရောဒမာနာ နိသီဒိ။ စောရဃာတကော ဂန္တွာ တံ ပိဋ္ဌိယံ ဟတ္ထေန ပဟရိတွာ ဟတ္ထတော ကုမာရံ အစ္ဆိန္ဒိတွာ အာဒါယ ရညော သန္တိကံ အာဂန္တွာ ‘‘ကိံ ကရောမိ၊ ဒေဝါ’’တိ အာဟ။ ရာဇာ ဧကံ ဖလကံ အာဟရာပေတွာ ပုရတော နိက္ခိပါပေတွာ ‘‘ဣဓ နံ နိပဇ္ဇာပေဟီ’’တိ အာဟ။ သော တထာ အကာသိ။

စန္ဒာဒေဝီ ပုတ္တဿ ပစ္ဆတောဝ ပရိဒေဝမာနာ အာဂစ္ဆိ။ ပုန စောရဃာတကော ‘‘ကိံ ကရောမီ၊ ဒေဝါ’’တိ အာဟ။ ဓမ္မပါလဿ ဟတ္ထေ ဆိန္ဒာတိ။ စန္ဒာဒေဝီ ‘‘မဟာရာဇ၊ မမ ပုတ္တော သတ္တမာသိကော ဗာလကော န ကိဉ္စိ ဇာနာတိ၊ နတ္ထေတဿ ဒေါသော၊ ဒေါသော ပန ဟောန္တော မယိ ဘဝေယျ၊ တသ္မာ မယှံ ဟတ္ထေ ဆေဒါပေဟီ’’တိ ဣမမတ္ထံ ပကာသေန္တီ ပဌမံ ဂါထမာဟ –

၄၄။

‘‘အဟမေဝ ဒူသိယာ ဘူနဟတာ၊ ရညော မဟာပတာပဿ၊

ဧတံ မုဉ္စတု ဓမ္မပါလံ၊ ဟတ္ထေ မေ ဒေဝ ဆေဒေဟီ’’တိ။

တတ္ထ ဒူသိယာတိ ဒူသိကာ၊ တုမှေ ဒိသွာ အနုဋ္ဌဟမာနာ ဒေါသကာရိကာတိ အတ္ထော။ ‘‘ဒူသိကာ’’တိပိ ပါဌော၊ အယမေဝတ္ထော။ ဘူနဟတာတိ ဟတဘူနာ၊ ဟတဝုဍ္ဎီတိ အတ္ထော။ ရညောတိ ဣဒံ ‘‘ဒူသိယာ’’တိ ပဒေန ယောဇေတဗ္ဗံ။ အဟံ ရညော မဟာပတာပဿ အပရာဓကာရိကာ၊ နာယံ ကုမာရော၊ တသ္မာ နိရပရာဓံ ဧတံ ဗာလကံ မုဉ္စတု ဓမ္မပါလံ၊ သစေပိ ဟတ္ထေ ဆေဒါပေတုကာမော၊ ဒေါသကာရိကာယ ဟတ္ထေ မေ၊ ဒေဝ၊ ဆေဒေဟီတိ အယမေတ္ထ အတ္ထော။

ရာဇာ စောရဃာတကံ ဩလောကေသိ။ ‘‘ကိံ ကရောမိ၊ ဒေဝါ’’တိ? ‘‘ပပဉ္စံ အကတွာ ဟတ္ထေ ဆေဒါ’’တိ။ တသ္မိံ ခဏေ စောရဃာတကော တိခိဏဖရသုံ ဂဟေတွာ ကုမာရဿ တရုဏဝံသကဠီရေ ဝိယ ဒွေ ဟတ္ထေ ဆိန္ဒိ။ သော ဒွီသု ဟတ္ထေသု ဆိဇ္ဇမာနေသု နေဝ ရောဒိ န ပရိဒေဝိ၊ ခန္တိဉ္စ မေတ္တဉ္စ ပုရေစာရိကံ ကတွာ အဓိဝါသေသိ။ စန္ဒာ ပန ဒေဝီ ဆိန္နဟတ္ထကောဋိံ ဂဟေတွာ ဥစ္ဆင်္ဂေ ကတွာ လောဟိတလိတ္တာ ပရိဒေဝမာနာ ဝိစရိ။ ပုန စောရဃာတကော ‘‘ကိံ ကရောမိ၊ ဒေဝါ’’တိ ပုစ္ဆိ။ ‘‘ဒွေပိ ပါဒေ ဆိန္ဒာ’’တိ။ တံ သုတွာ စန္ဒာဒေဝီ ဒုတိယံ ဂါထမာဟ –

၄၅။

‘‘အဟမေဝ ဒူသိယာ ဘူနဟတာ၊ ရညော မဟာပတာပဿ၊

ဧတံ မုဉ္စတု ဓမ္မပါလံ၊ ပါဒေ မေ ဒေဝ ဆေဒေဟီ’’တိ။

တတ္ထ အဓိပ္ပာယော ဝုတ္တနယေနေဝ ဝေဒိတဗ္ဗော။

ရာဇာပိ ပုန စောရဃာတကံ အာဏာပေသိ။ သော ဥဘောပိ ပါဒေ ဆိန္ဒိ။ စန္ဒာဒေဝီ ပါဒကောဋိမ္ပိ ဂဟေတွာ ဥစ္ဆင်္ဂေ ကတွာ လောဟိတလိတ္တာ ပရိဒေဝမာနာ ‘‘သာမိ မဟာပတာပ၊ ဆိန္နဟတ္ထပါဒါ နာမ ဒါရကာ မာတရာ ပေါသေတဗ္ဗာ ဟောန္တိ၊ အဟံ ဘတိံ ကတွာ မမ ပုတ္တကံ ပေါသေဿာမိ၊ ဒေဟိ မေ ဧတ’’န္တိ အာဟ။ စောရဃာတကော ‘‘ကိံ ဒေဝ ကတာ ရာဇာဏာ၊ နိဋ္ဌိတံ မမ ကိစ္စ’’န္တိ ပုစ္ဆိ။ ‘‘န တာဝ နိဋ္ဌိတ’’န္တိ။ ‘‘အထ ကိံ ကရောမိ၊ ဒေဝါ’’တိ? ‘‘သီသမဿ ဆိန္ဒာ’’တိ။ တံ သုတွာ စန္ဒာဒေဝီ တတိယံ ဂါထမာဟ –

၄၆။

‘‘အဟမေဝ ဒူသိယာ ဘူနဟတာ၊ ရညော မဟာပတာပဿ၊

ဧတံ မုဉ္စတု ဓမ္မပါလံ၊ သီသံ မေ ဒေဝ ဆေဒေဟီ’’တိ။

ဝတွာ စ ပန အတ္တနော သီသံ ဥပနေသိ။

ပုန စောရဃာတကော ‘‘ကိံ ကရောမိ၊ ဒေဝါ’’တိ ပုစ္ဆိ။ ‘‘သီသမဿ ဆိန္ဒာ’’တိ။ သော သီသံ ဆိန္ဒိတွာ ‘‘ကတာ၊ ဒေဝ၊ ရာဇာဏာ’’တိ ပုစ္ဆိ။ ‘‘န တာဝ ကတာ’’တိ။ ‘‘အထ ကိံ ကရောမိ၊ ဒေဝါ’’တိ? ‘‘အသိတုဏ္ဍေန နံ သမ္ပဋိစ္ဆိတွာ အသိမာလကံ နာမ ကရောဟီ’’တိ။ သော တဿ ကဠေဝရံ အာကာသေ ခိပိတွာ အသိတုဏ္ဍေန သမ္ပဋိစ္ဆိတွာ အသိမာလကံ နာမ ကတွာ မဟာတလေ ဝိပ္ပကိရိ။ စန္ဒာဒေဝီ ဗောဓိသတ္တဿ မံသေ ဥစ္ဆင်္ဂေ ကတွာ မဟာတလေ ရောဒမာနာ ပရိဒေဝမာနာ ဣမာ ဂါထာ အဘာသိ –

၄၇။

‘‘န ဟိ နူနိမဿ ရညော၊ မိတ္တာမစ္စာ စ ဝိဇ္ဇရေ သုဟဒါ၊

ယေ န ဝဒန္တိ ရာဇာနံ၊ မာ ဃာတယိ ဩရသံ ပုတ္တံ။

၄၈။

‘‘န ဟိ နူနိမဿ ရညော၊ ဉာတီ မိတ္တာ စ ဝိဇ္ဇရေ သုဟဒါ၊

ယေ န ဝဒန္တိ ရာဇာနံ၊ မာ ဃာတယိ အတြဇံ ပုတ္တ’’န္တိ။

တတ္ထ မိတ္တာမစ္စာ စ ဝိဇ္ဇရေ သုဟဒါတိ နူန ဣမဿ ရညော ဒဠှမိတ္တာ ဝါ သဗ္ဗကိစ္စေသု သဟဘာဝိနော အမစ္စာ ဝါ မုဒုဟဒယတာယ သုဟဒါ ဝါ ကေစိ န ဝိဇ္ဇန္တိ။ ယေ န ဝဒန္တီတိ ယေ အဓုနာ အာဂန္တွာ ‘‘အတ္တနော ပိယပုတ္တံ မာ ဃာတယီ’’တိ န ဝဒန္တိ၊ ဣမံ ရာဇာနံ ပဋိသေဓေန္တိ၊ တေ နတ္ထိယေဝါတိ မညေ။ ဒုတိယဂါထာယံ ဉာတီတိ ဉာတကာ။

ဣမာ ပန ဒွေ ဂါထာ ဝတွာ စန္ဒာဒေဝီ ဥဘောဟိ ဟတ္ထေဟိ ဟဒယမံသံ ဓာရယမာနာ တတိယံ ဂါထမာဟ –

၄၉။

‘‘စန္ဒနသာရာနုလိတ္တာ၊ ဗာဟာ ဆိဇ္ဇန္တိ ဓမ္မပါလဿ၊

ဒါယာဒဿ ပထဗျာ၊ ပါဏာ မေ ဒေဝ ရုဇ္ဈန္တီ’’တိ။

တတ္ထ ဒါယာဒဿ ပထဗျာတိ ပိတုသန္တကာယ စာတုရန္တာယ ပထဝိယာ ဒါယာဒဿ လောဟိတစန္ဒနသာရာနုလိတ္တာ ဟတ္ထာ ဆိဇ္ဇန္တိ၊ ပါဒါ ဆိဇ္ဇန္တိ၊ သီသဉ္စ ဆိဇ္ဇတိ၊ အသိမာလကောပိ ကတော၊ တဝ ဝံသံ ပစ္ဆိန္ဒိတွာ ဂတောသိ ဒါနီတိ ဧဝမာဒီနိ ဝိလပန္တိ ဧဝမာဟ။ ပါဏာ မေ ဒေဝ ရုဇ္ဈန္တီတိ ဒေဝ၊ မယှမ္ပိ ဣမံ သောကံ သန္ဓာရေတုံ အသက္ကောန္တိယာ ဇီဝိတံ ရုဇ္ဈတီတိ။

တဿာ ဧဝံ ပရိဒေဝမာနာယ ဧဝ ဍယှမာနေ ဝေဠုဝနေ ဝေဠု ဝိယ ဟဒယံ ဖလိ၊ သာ တတ္ထေဝ ဇီဝိတက္ခယံ ပတ္တာ။ ရာဇာပိ ပလ္လင်္ကေ ဌာတုံ အသက္ကောန္တော မဟာတလေ ပတိ၊ ပဒရတလံ ဒွိဓာ ဘိဇ္ဇိ၊ သော တတောပိ ဘူမိယံ ပတိ။ တတော စတုနဟုတာဓိကဒွိယောဇနသတသဟဿဗဟလာပိ ဃနပထဝီ တဿ အဂုဏံ ဓာရေတုံ အသက္ကောန္တီ ဘိဇ္ဇိတွာ ဝိဝရမဒါသိ၊ အဝီစိတော ဇာလာ ဥဋ္ဌာယ ကုလဒတ္တိကေန ကမ္ဗလေန ပရိက္ခိပန္တီ ဝိယ တံ ဂဟေတွာ အဝီစိမှိ ခိပိ။ စန္ဒာယ စ ဗောဓိသတ္တဿ စ အမစ္စာ သရီရကိစ္စံ ကရိံသု။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ရာဇာ ဒေဝဒတ္တော အဟောသိ၊ စန္ဒာဒေဝီ မဟာပဇာပတိဂေါတမီ၊ ဓမ္မပါလကုမာရော ပန အဟမေဝ အဟောသိ’’န္တိ။

စူဠဓမ္မပါလဇာတကဝဏ္ဏနာ အဋ္ဌမာ။

[၃၅၉] ၉။ သုဝဏ္ဏမိဂဇာတကဝဏ္ဏနာ

ဝိက္ကမရေ ဟရိပါဒါတိ ဣဒံ သတ္ထာ ဇေတဝနေ ဝိဟရန္တော သာဝတ္ထိယံ ဧကံ ကုလဓီတရံ အာရဗ္ဘ ကထေသိ။ သာ ကိရ သာဝတ္ထိယံ ဒွိန္နံ အဂ္ဂသာဝကာနံ ဥပဋ္ဌာကကုလဿ ဓီတာ သဒ္ဓါ ပသန္နာ ဗုဒ္ဓမာမကာ ဓမ္မမာမကာ သင်္ဃမာမကာ အာစာရသမ္ပန္နာ ပဏ္ဍိတာ ဒါနာဒိပုညာဘိရတာ။ တံ အညံ သာဝတ္ထိယမေဝ သမာနဇာတိကံ မိစ္ဆာဒိဋ္ဌိကကုလံ ဝါရေသိ။ အထဿာ မာတာပိတရော ‘‘အမှာကံ ဓီတာ သဒ္ဓါ ပသန္နာ တီဏိ ရတနာနိ မမာယတိ ဒါနာဒိပုညာဘိရတာ၊ တုမှေ မိစ္ဆာဒိဋ္ဌိကာ ဣမိဿာပိ ယထာရုစိယာ ဒါနံ ဝါ ဒါတုံ ဓမ္မံ ဝါ သောတုံ ဝိဟာရံ ဝါ ဂန္တုံ သီလံ ဝါ ရက္ခိတုံ ဥပေါသထကမ္မံ ဝါ ကာတုံ န ဒဿထ၊ န မယံ တုမှာကံ ဒေမ၊ အတ္တနာ သဒိသံ မိစ္ဆာဒိဋ္ဌိကကုလာဝ ကုမာရိကံ ဂဏှထာ’’တိ အာဟံသု။ တေ တေဟိ ပဋိက္ခိတ္တာ ‘‘တုမှာကံ ဓီတာ အမှာကံ ဃရံ ဂန္တွာ ယထာဓိပ္ပာယေန သဗ္ဗမေတံ ကရောတု၊ မယံ န ဝါရေဿာမ၊ ဒေထ နော ဧတ’’န္တိ ဝတွာ ‘‘တေန ဟိ ဂဏှထာ’’တိ ဝုတ္တာ ဘဒ္ဒကေန နက္ခတ္တေန မင်္ဂလံ ကတွာ တံ အတ္တနော ဃရံ နယိံသု။ သာ ဝတ္တာစာရသမ္ပန္နာ ပတိဒေဝတာ အဟောသိ၊ သဿုသသုရသာမိကဝတ္တာနိ ကတာနေဝ ဟောန္တိ။

သာ ဧကဒိဝသံ သာမိကံ အာဟ – ‘‘ဣစ္ဆာမဟံ၊ အယျပုတ္တ၊ အမှာကံ ကုလူပကတ္ထေရာနံ ဒါနံ ဒါတု’’န္တိ။ သာဓု၊ ဘဒ္ဒေ၊ ယထာဇ္ဈာသယေန ဒါနံ ဒေဟီတိ။ သာ ထေရေ နိမန္တာပေတွာ မဟန္တံ သက္ကာရံ ကတွာ ပဏီတဘောဇနံ ဘောဇေတွာ ဧကမန္တံ နိသီဒိတွာ ‘‘ဘန္တေ၊ ဣမံ ကုလံ မိစ္ဆာဒိဋ္ဌိကံ အဿဒ္ဓံ တိဏ္ဏံ ရတနာနံ ဂုဏံ န ဇာနာတိ၊ သာဓု၊ အယျာ၊ ယာဝ ဣမံ ကုလံ တိဏ္ဏံ ရတနာနံ ဂုဏံ ဇာနာတိ၊ တာဝ ဣဓေဝ ဘိက္ခံ ဂဏှထာ’’တိ အာဟ။ ထေရာ အဓိဝါသေတွာ တတ္ထ နိဗဒ္ဓံ ဘုဉ္ဇန္တိ။ ပုန သာမိကံ အာဟ ‘‘အယျပုတ္တ၊ ထေရာ ဣဓ နိဗဒ္ဓံ အာဂစ္ဆန္တိ၊ ကိံကာရဏာ တုမှေ န ပဿထာ’’တိ။ ‘‘သာဓု၊ ပဿိဿာမီ’’တိ။ သာ ပုနဒိဝသေ ထေရာနံ ဘတ္တကိစ္စပရိယောသာနေ တဿ အာရောစေသိ ။ သော ဥပသင်္ကမိတွာ ထေရေဟိ သဒ္ဓိံ ပဋိသန္ထာရံ ကတွာ ဧကမန္တံ နိသီဒိ။ အထဿ ဓမ္မသေနာပတိ ဓမ္မကထံ ကထေသိ။ သော ထေရဿ ဓမ္မကထာယ စ ဣရိယာပထေသု စ ပသီဒိတွာ တတော ပဋ္ဌာယ ထေရာနံ အာသနံ ပညပေတိ၊ ပါနီယံ ပရိဿာဝေတိ၊ အန္တရာဘတ္တေ ဓမ္မကထံ သုဏာတိ၊ တဿ အပရဘာဂေ မိစ္ဆာဒိဋ္ဌိ ဘိဇ္ဇိ။

အထေကဒိဝသံ ထေရော ဒွိန္နမ္ပိ ဓမ္မကထံ ကထေန္တော သစ္စာနိ ပကာသေသိ၊ သစ္စပရိယောသာနေ ဥဘောပိ ဇယမ္ပတိကာ သောတာပတ္တိဖလေ ပတိဋ္ဌဟိံသု။ တတော ပဋ္ဌာယ တဿ မာတာပိတရော အာဒိံ ကတွာ အန္တမသော ဒါသကမ္မကရာပိ သဗ္ဗေ မိစ္ဆာဒိဋ္ဌိံ ဘိန္ဒိတွာ ဗုဒ္ဓဓမ္မသင်္ဃမာမကာယေဝ ဇာတာ။ အထေကဒိဝသံ ဒါရိကာ သာမိကံ အာဟ – ‘‘အယျပုတ္တ၊ ကိံ မေ ဃရာဝါသေန၊ ဣစ္ဆာမဟံ ပဗ္ဗဇိတု’’န္တိ။ သော ‘‘သာဓု ဘဒ္ဒေ၊ အဟမ္ပိ ပဗ္ဗဇိဿာမီ’’တိ မဟန္တေန ပရိဝါရေန တံ ဘိက္ခုနုပဿယံ နေတွာ ပဗ္ဗာဇေတွာ သယမ္ပိ သတ္ထာရံ ဥပသင်္ကမိတွာ ပဗ္ဗဇ္ဇံ ယာစိ။ တံ သတ္ထာ ပဗ္ဗာဇေသိ။ ဥဘောပိ ဝိပဿနံ ဝဍ္ဎေတွာ န စိရဿေဝ အရဟတ္တံ ပါပုဏိံသု။ အထေကဒိဝသံ ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ အသုကာ နာမ ဒဟရဘိက္ခုနီ အတ္တနော စေဝ ပစ္စယာ ဇာတာ သာမိကဿ စ၊ အတ္တနာပိ ပဗ္ဗဇိတွာ အရဟတ္တံ ပတွာ တမ္ပိ ပါပေသီ’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ တာဝ ဧသာ သာမိကံ ရာဂပါသာ မောစေသိ၊ ပုဗ္ဗေပေသာ ပေါရာဏကပဏ္ဍိတေ ပန မရဏပါသာ မောစေသီ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော မိဂယောနိယံ နိဗ္ဗတ္တိတွာ ဝယပ္ပတ္တော အဘိရူပေါ အဟောသိ ပါသာဒိကော ဒဿနီယော သုဝဏ္ဏဝဏ္ဏော လာခါရသပရိကမ္မကတေဟိ ဝိယ ဟတ္ထပါဒေဟိ ရဇတဒါမသဒိသေဟိ ဝိသာဏေဟိ မဏိဂုဠိကပဋိဘာဂေဟိ အက္ခီဟိ ရတ္တကမ္ဗလဂေဏ္ဍုသဒိသေန မုခေန သမန္နာဂတော။ ဘရိယာပိဿ တရုဏမိဂီ အဘိရူပါ အဟောသိ ဒဿနီယာ။ တေ သမဂ္ဂဝါသံ ဝသိံသု၊ အသီတိသဟဿစိတြမိဂါ ဗောဓိသတ္တံ ဥပဋ္ဌဟိံသု။ တဒါ လုဒ္ဒကာ မိဂဝီထီသု ပါသေ ဩဍ္ဍေသုံ။ အထေကဒိဝသံ ဗောဓိသတ္တော မိဂါနံ ပုရတော ဂစ္ဆန္တော ပါဒေ ပါသေန ဗဇ္ဈိတွာ ‘‘ဆိန္ဒိဿာမိ န’’န္တိ အာကဍ္ဎိ၊ စမ္မံ ဆိဇ္ဇိ၊ ပုန အာကဍ္ဎန္တဿ မံသံ ဆိဇ္ဇိ၊ ပုန နှာရု ဆိဇ္ဇိ၊ ပါသော အဋ္ဌိမာဟစ္စ အဋ္ဌာသိ။ သော ပါသံ ဆိန္ဒိတုံ အသက္ကောန္တော မရဏဘယတဇ္ဇိတော ဗဒ္ဓရဝံ ရဝိ။ တံ သုတွာ ဘီတော မိဂဂဏော ပလာယိ။ ဘရိယာ ပနဿ ပလာယိတွာ မိဂါနံ အန္တရေ ဩလောကေန္တီ တံ အဒိသွာ ‘‘ဣဒံ ဘယံ မယှံ ပိယသာမိကဿ ဥပ္ပန္နံ ဘဝိဿတီ’’တိ ဝေဂေန တဿ သန္တိကံ ဂန္တွာ အဿုမုခီ ရောဒမာနာ ‘‘သာမိ ၊ တွံ မဟဗ္ဗလော၊ ကိံ ဧတံ ပါသံ သန္ဓာရေတုံ န သက္ခိဿသိ၊ ဝေဂံ ဇနေတွာ ဆိန္ဒာဟိ န’’န္တိ တဿ ဥဿာဟံ ဇနေန္တီ ပဌမံ ဂါထမာဟ –

၅၀။

‘‘ဝိက္ကမ ရေ ဟရိပါဒ၊ ဝိက္ကမ ရေ မဟာမိဂ၊

ဆိန္ဒ ဝါရတ္တိကံ ပါသံ၊ နာဟံ ဧကာ ဝနေ ရမေ’’တိ။

တတ္ထ ဝိက္ကမာတိ ပရက္ကမ၊ အာကဍ္ဎာတိ အတ္ထော။ ရေတိ အာမန္တနေ နိပါတော။ ဟရိပါဒါတိ သုဝဏ္ဏပါဒ။ သကလသရီရမ္ပိ တဿ သုဝဏ္ဏဝဏ္ဏံ၊ အယံ ပန ဂါရဝေနေဝမာဟ။ နာဟံ ဧကာတိ အဟံ တယာ ဝိနာ ဧကိကာ ဝနေ န ရမိဿာမိ၊ တိဏောဒကံ ပန အဂ္ဂဟေတွာ သုဿိတွာ မရိဿာမီတိ ဒဿေတိ။

တံ သုတွာ မိဂေါ ဒုတိယံ ဂါထမာဟ –

၅၁။

‘‘ဝိက္ကမာမိ န ပါရေမိ၊ ဘူမိံ သုမ္ဘာမိ ဝေဂသာ၊

ဒဠှော ဝါရတ္တိကော ပါသော၊ ပါဒံ မေ ပရိကန္တတီ’’တိ။

တတ္ထ ဝိက္ကမာမီတိ ဘဒ္ဒေ၊ အဟံ ဝီရိယံ ကရောမိ။ န ပါရေမီတိ ပါသံ ဆိန္ဒိတုံ ပန န သက္ကောမီတိ အတ္ထော။ ဘူမိံ သုမ္ဘာမီတိ အပိ နာမ ဆိဇ္ဇေယျာတိ ပါဒေနာပိ ဘူမိံ ပဟရာမိ။ ဝေဂသာတိ ဝေဂေန။ ပရိကန္တတီတိ စမ္မာဒီနိ ဆိန္ဒန္တော သမန္တာ ကန္တတီတိ။

အထ နံ မိဂီ ‘‘မာ ဘာယိ၊ သာမိ၊ အဟံ အတ္တနော ဗလေန လုဒ္ဒကံ ယာစိတွာ တဝ ဇီဝိတံ အာဟရိဿာမိ။ သစေ ယာစနာယ န သက္ခိဿာမိ၊ မမ ဇီဝိတမ္ပိ ဒတွာ တဝ ဇီဝိတံ အာဟရိဿာမီ’’တိ မဟာသတ္တံ အဿာသေတွာ လောဟိတလိတ္တံ ဗောဓိသတ္တံ ပရိဂ္ဂဟေတွာ အဋ္ဌာသိ။ လုဒ္ဒကောပိ အသိဉ္စ သတ္တိဉ္စ ဂဟေတွာ ကပ္ပုဋ္ဌာနဂ္ဂိ ဝိယ အာဂစ္ဆတိ။ သာ တံ ဒိသွာ ‘‘သာမိ၊ လုဒ္ဒကော အာဂစ္ဆတိ၊ အဟံ အတ္တနော ဗလံ ကရိဿာမိ၊ တွံ မာ ဘာယီ’’တိ မိဂံ အဿာသေတွာ လုဒ္ဒကဿ ပဋိပထံ ဂန္တွာ ပဋိက္ကမိတွာ ဧကမန္တံ ဌိတာ တံ ဝန္ဒိတွာ ‘‘သာမိ၊ မမ သာမိကော သုဝဏ္ဏဝဏ္ဏော သီလာစာရသမ္ပန္နော၊ အသီတိသဟဿာနံ မိဂါနံ ရာဇာ’’တိ ဗောဓိသတ္တဿ ဂုဏံ ကထေတွာ မိဂရာဇေ ဌိတေယေဝ အတ္တနော ဝဓံ ယာစန္တီ တတိယံ ဂါထမာဟ –

၅၂။

‘‘အတ္ထရဿု ပလာသာနိ၊ အသိံ နိဗ္ဗာဟ လုဒ္ဒက၊

ပဌမံ မံ ဝဓိတွာန၊ ဟန ပစ္ဆာ မဟာမိဂ’’န္တိ။

တတ္ထ ပလာသာနီတိ မံသဋ္ဌပနတ္ထံ ပလာသပဏ္ဏာနိ အတ္ထရဿု။ အသိံ နိဗ္ဗာဟာတိ အသိံ ကောသတော နီဟရ။

တံ သုတွာ လုဒ္ဒကော ‘‘မနုဿဘူတာ တာဝ သာမိကဿ အတ္ထာယ အတ္တနော ဇီဝိတံ န ပရိစ္စဇန္တိ၊ အယံ တိရစ္ဆာနဂတာ ဇီဝိတံ ပရိစ္စဇတိ၊ မနုဿဘာသာယ စ မဓုရေန သရေန ကထေတိ၊ အဇ္ဇ ဣမိဿာ စ ပတိနော စဿာ ဇီဝိတံ ဒဿာမီ’’တိ ပသန္နစိတ္တော စတုတ္ထံ ဂါထမာဟ –

၅၃။

‘‘န မေ သုတံ ဝါ ဒိဋ္ဌံ ဝါ၊ ဘာသန္တိံ မာနုသိံ မိဂိံ၊

တွဉ္စ ဘဒ္ဒေ သုခီ ဟောဟိ၊ ဧသော စာပိ မဟာမိဂေါ’’တိ။

တတ္ထ သုတံ ဝါ ဒိဋ္ဌံ ဝါတိ မယာ ဣတော ပုဗ္ဗေ ဧဝရူပံ ဒိဋ္ဌံ ဝါ သုတံ ဝါ နတ္ထိ။ ဘာသန္တိံ မာနုသိံ မိဂိန္တိ အဟဉှိ ဣတော ပုဗ္ဗေ မာနုသိံ ဝါစံ ဘာသန္တိံ မိဂိံ နေဝ အဒ္ဒသံ န အဿောသိံ။ ယေသံ ပန ‘‘န မေ သုတာ ဝါ ဒိဋ္ဌာ ဝါ၊ ဘာသန္တီ မာနုသီ မိဂီ’’တိ ပါဠိ၊ တေသံ ယထာပါဠိမေဝ အတ္ထော ဒိဿတိ။ ဘဒ္ဒေတိ ဘဒ္ဒကေ ပဏ္ဍိကေ ဥပါယကုသလေ။ ဣတိ တံ အာလပိတွာ ပုန ‘‘တွဉ္စ ဧသော စာပိ မဟာမိဂေါတိ ဒွေပိ ဇနာ သုခီ နိဒ္ဒုက္ခာ ဟောထာ’’တိ တံ သမဿာသေတွာ လုဒ္ဒကော ဗောဓိသတ္တဿ သန္တိကံ ဂန္တွာ ဝါသိယာ စမ္မပါသံ ဆိန္ဒိတွာ ပါဒေ လဂ္ဂပါသကံ သဏိကံ နီဟရိတွာ နှာရုနာ နှာရုံ၊ မံသေန မံသံ၊ စမ္မေန စမ္မံ ပဋိပါဋေတွာ ပါဒံ ဟတ္ထေန ပရိမဇ္ဇိ။ တင်္ခဏညေဝ မဟာသတ္တဿ ပူရိတပါရမိတာနုဘာဝေန လုဒ္ဒကဿ စ မေတ္တစိတ္တာနုဘာဝေန မိဂိယာ စ မေတ္တဓမ္မာနုဘာဝေန နှာရုမံသစမ္မာနိ နှာရုမံသစမ္မေဟိ ဃဋယိံသု။ ဗောဓိသတ္တော ပန သုခီ နိဒ္ဒုက္ခော အဋ္ဌာသိ။

မိဂီ ဗောဓိသတ္တံ သုခိတံ ဒိသွာ သောမနဿဇာတာ လုဒ္ဒကဿ အနုမောဒနံ ကရောန္တီ ပဉ္စမံ ဂါထမာဟ –

၅၄။

‘‘ဧဝံ လုဒ္ဒက နန္ဒဿု၊ သဟ သဗ္ဗေဟိ ဉာတိဘိ၊

ယထာဟမဇ္ဇ နန္ဒာမိ၊ မုတ္တံ ဒိသွာ မဟာမိဂ’’န္တိ။

တတ္ထ လုဒ္ဒကာတိ ဒါရုဏကမ္မကိရိယာယ လဒ္ဓနာမဝသေန အာလပတိ။

ဗောဓိသတ္တော ‘‘အယံ လုဒ္ဒေါ မယှံ အဝဿယော ဇာတော၊ မယာပိဿ အဝဿယေနေဝ ဘဝိတုံ ဝဋတီ’’တိ ဂေါစရဘူမိယံ ဒိဋ္ဌံ ဧကံ မဏိက္ခန္ဓံ တဿ ဒတွာ ‘‘သမ္မ၊ ဣတော ပဋ္ဌာယ ပါဏာတိပါတာဒီနိ မာ ကရိ၊ ဣမိနာ ကုဋုမ္ဗံ သဏ္ဌပေတွာ ဒါရကေ ပေါသေန္တော ဒါနသီလာဒီနိ ပုညာနိ ကရောဟီ’’တိ တဿောဝါဒံ ဒတွာ အရညံ ပါဝိသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ လုဒ္ဒကော ဆန္နော အဟောသိ၊ မိဂီ ဒဟရဘိက္ခုနီ၊ မိဂရာဇာ ပန အဟမေဝ အဟောသိ’’န္တိ။

သုဝဏ္ဏမိဂဇာတကဝဏ္ဏနာ နဝမာ။

[၃၆၀] ၁၀။ သုယောနန္ဒီဇာတကဝဏ္ဏနာ

ဝါတိ ဂန္ဓော တိမိရာနန္တိ ဣဒံ သတ္ထာ ဇေတဝနေ ဝိဟရန္တော ဥက္ကဏ္ဌိတဘိက္ခုံ အာရဗ္ဘ ကထေသိ။ တဉှိ သတ္ထာ ‘‘သစ္စံ ကိရ တွံ ဘိက္ခု ဥက္ကဏ္ဌိတောသီ’’တိ ပုစ္ဆိတွာ ‘‘သစ္စ’’န္တိ ဝုတ္တေ ‘‘ကိံ ဒိသွာ’’တိ ဝတွာ ‘‘အလင်္ကတမာတုဂါမ’’န္တိ ဝုတ္တေ ‘‘မာတုဂါမော နာမေသ ဘိက္ခု န သက္ကာ ရက္ခိတုံ၊ ပေါရာဏကပဏ္ဍိတာ သုပဏ္ဏဘဝနေ ကတွာ ရက္ခန္တာပိ ရက္ခိတုံ နာသက္ခိံသူ’’တိ ဝတွာ တေန ယာစိတော အတီတံ အာဟရိ။

အတီတေ ဗာရာဏသိယံ တမ္ဗရာဇာ နာမ ရဇ္ဇံ ကာရေသိ။ တဿ သုယောနန္ဒီ နာမ အဂ္ဂမဟေသီ အဟောသိ ဥတ္တမရူပဓရာ။ တဒါ ဗောဓိသတ္တော သုပဏ္ဏယောနိယံ နိဗ္ဗတ္တိ၊ တသ္မိံ ကာလေ နာဂဒီပေါ သေဒုမဒီပေါ နာမ အဟောသိ။ ဗောဓိသတ္တော တသ္မိံ ဒီပေ သုပဏ္ဏဘဝနေ ဝသတိ။ သော ဗာရာဏသိံ ဂန္တွာ တမ္ဗရာဇေန သဒ္ဓိံ မာဏဝကဝေသေန ဇူတံ ကီဠတိ။ တဿ ရူပသမ္ပတ္တိံ ဒိသွာ ပရိစာရိကာ ‘‘အမှာကံ ရညာ သဒ္ဓိံ ဧဝရူပေါ နာမ မာဏဝကော ဇူတံ ကီဠတီ’’တိ သုယောနန္ဒိယာ အာရောစေသုံ။ သာ သုတွာ တံ ဒဋ္ဌုကာမာ ဟုတွာ ဧကဒိဝသံ အလင်္ကရိတွာ ဇူတမဏ္ဍလံ အာဂန္တွာ ပရိစာရိကာနံ အန္တရေ ဌိတာ နံ ဩလောကေသိ။ သောပိ ဒေဝိံ ဩလောကေသိ။ ဒွေပိ အညမညံ ပဋိဗဒ္ဓစိတ္တာ အဟေသုံ။ သုပဏ္ဏရာဇာ အတ္တနော အာနုဘာဝေန နဂရေ ဝါတံ သမုဋ္ဌာပေသိ၊ ဂေဟပတနဘယေန ရာဇနိဝေသနာ မနုဿာ နိက္ခမိံသု။ သော အတ္တနော အာနုဘာဝေန အန္ဓကာရံ ကတွာ ဒေဝိံ ဂဟေတွာ အာကာသေန အာဂန္တွာ နာဂဒီပေ အတ္တနော ဘဝနံ ပါဝိသိ သုယောနန္ဒိယာ ဂတဋ္ဌာနံ ဇာနန္တာ နာမ နာဟေသုံ။ သော တာယ သဒ္ဓိံ အဘိရမမာနော ဂန္တွာ ရညာ သဒ္ဓိံ ဇူတံ ကီဠတိ။

ရညော ပန သဂ္ဂေါ နာမ ဂန္ဓဗ္ဗော အတ္ထိ၊ သော ဒေဝိယာ ဂတဋ္ဌာနံ အဇာနန္တော တံ ဂန္ဓဗ္ဗံ အာမန္တေတွာ ‘‘ဂစ္ဆ၊ တာတ၊ ဂန္ဓဗ္ဗ သဗ္ဗံ ထလဇလပထံ အနုဝိစရိတွာ ဒေဝိယာ ဂတဋ္ဌာနံ ပဿာ’’တိ ဥယျောဇေသိ။ သော ပရိဗ္ဗယံ ဂဟေတွာ ဒွါရဂါမတော ပဋ္ဌာယ ဝိစိနန္တော ကုရုကစ္ဆံ ပါပုဏိ။ တဒါ ကုရုကစ္ဆဝါဏိဇာ နာဝါယ သုဝဏ္ဏဘူမိံ ဂစ္ဆန္တိ။ သော တေ ဥပသင်္ကမိတွာ ‘‘အဟံ ဂန္ဓဗ္ဗော နာဝါယ ဝေတနံ ခဏ္ဍေတွာ တုမှာကံ ဂန္ဓဗ္ဗံ ကရိဿာမိ၊ မမ္ပိ နေထာ’’တိ အာဟ။ တေ ‘‘သာဓူ’’တိ တမ္ပိ အာရောပေတွာ နာဝံ ဝိဿဇ္ဇေသုံ။ တေ သုခပယာတာယ နာဝါယ တံ ပက္ကောသိတွာ ‘‘ဂန္ဓဗ္ဗံ နော ကရောဟီ’’တိ အာဟံသု။ ‘‘အဟံ စေ ဂန္ဓဗ္ဗံ ကရေယျံ၊ မယိ ပန ဂန္ဓဗ္ဗံ ကရောန္တေ မစ္ဆာ စလိဿန္တိ၊ အထ ဝေါ နာဝေါ ဘိဇ္ဇိဿတီ’’တိ။ ‘‘မနုဿမတ္တေ ဂန္ဓဗ္ဗံ ကရောန္တေ မစ္ဆာနံ စလနံ နာမ နတ္ထိ၊ ကရောဟီ’’တိ။ ‘‘တေန ဟိ မာ မယှံ ကုဇ္ဈိတ္ထာ’’တိ ဝီဏံ မုစ္ဆိတွာ တန္တိဿရေန ဂီတဿရံ၊ ဂီတဿရေန တန္တိဿရံ အနတိက္ကမိတွာ ဂန္ဓဗ္ဗံ အကာသိ။ တေန သဒ္ဒေန သမ္မတ္တာ ဟုတွာ မစ္ဆာ စလိံသု။

အထေကော မကရော ဥပ္ပတိတွာ နာဝါယ ပတန္တော နာဝံ ဘိန္ဒိ။ သဂ္ဂေါ ဖလကေ နိပဇ္ဇိတွာ ယထာဝါတံ ဂစ္ဆန္တော နာဂဒီပေ သုပဏ္ဏဘဝနဿ နိဂြောဓရုက္ခဿ သန္တိကံ ပါပုဏိ။ သုယောနန္ဒီပိ ဒေဝီ သုပဏ္ဏရာဇဿ ဇူတံ ကီဠိတုံ ဂတကာလေ ဝိမာနာ ဩတရိတွာ ဝေလန္တေ ဝိစရန္တီ သဂ္ဂံ ဂန္ဓဗ္ဗံ ဒိသွာ သဉ္ဇာနိတွာ ‘‘ကထံ အာဂတောသီ’’တိ ပုစ္ဆိ။ သော သဗ္ဗံ ကထေသိ။ ‘‘တေန ဟိ မာ ဘာယီ’’တိ တံ အဿာသေတွာ ဗာဟာဟိ ပရိဂ္ဂဟေတွာ ဝိမာနံ အာရောပေတွာ သယနပိဋ္ဌေ နိပဇ္ဇာပေတွာ သမဿတ္ထကာလေ ဒိဗ္ဗဘောဇနံ ဒတွာ ဒိဗ္ဗဂန္ဓောဒကေန နှာပေတွာ ဒိဗ္ဗဝတ္ထေဟိ အစ္ဆာဒေတွာ ဒိဗ္ဗဂန္ဓပုပ္ဖေဟိ အလင်္ကရိတွာ ပုန ဒိဗ္ဗသယနေ နိပဇ္ဇာပေသိ။ ဧဝံ ဒိဝသံ ပရိဂ္ဂဟမာနာ သုပဏ္ဏရညော အာဂမနဝေလာယ ပဋိစ္ဆာဒေတွာ ဂတကာလေ တေန သဒ္ဓိံ ကိလေသဝသေန အဘိရမိ။ တတော မာသဒ္ဓမာသစ္စယေန ဗာရာဏသိဝါသိနော ဝါဏိဇာ ဒါရုဒကဂဟဏတ္ထာယ တသ္မိံ ဒီပေ နိဂြောဓရုက္ခမူလံ သမ္ပတ္တာ။ သော တေဟိ သဒ္ဓိံ နာဝံ အဘိရုယှ ဗာရာဏသိံ ဂန္တွာ ရာဇာနံ ဒိသွာဝ တဿ ဇူတကီဠနဝေလာယ ဝီဏံ ဂဟေတွာ ရညော ဂန္ဓဗ္ဗံ ကရောန္တော ပဌမံ ဂါထမာဟ –

၅၅။

‘‘ဝါတိ ဂန္ဓော တိမိရာနံ၊ ကုသမုဒ္ဒေါ စ ဃောသဝါ၊

ဒူရေ ဣတော သုယောနန္ဒီ၊ တမ္ဗ ကာမာ တုဒန္တိ မ’’န္တိ။

တတ္ထ တိမိရာနန္တိ တိမိရရုက္ခပုပ္ဖာနံ။ တံ ကိရ နိဂြောဓံ ပရိဝါရေတွာ တိမိရရုက္ခာ အတ္ထိ၊ တေ သန္ဓာယေဝံ ဝဒတိ။ ကုသမုဒ္ဒေါတိ ခုဒ္ဒကသမုဒ္ဒေါ။ ဃောသဝါတိ မဟာရဝေါ။ တဿေဝ နိဂြောဓဿ သန္တိကေ သမုဒ္ဒံ သန္ဓာယေဝမာဟ။ ဣတောတိ ဣမမှာ နဂရာ။ တမ္ဗာတိ ရာဇာနံ အာလပတိ။ အထ ဝါ တမ္ဗကာမာတိ တမ္ဗေန ကာမိတကာမာ တမ္ဗကာမာ နာမ။ တေ မံ ဟဒယေ ဝိဇ္ဈန္တီတိ ဒီပေတိ။

တံ သုတွာ သုပဏ္ဏော ဒုတိယံ ဂါထမာဟ –

၅၆။

‘‘ကထံ သမုဒ္ဒမတရိ၊ ကထံ အဒ္ဒက္ခိ သေဒုမံ၊

ကထံ တဿာ စ တုယှဉ္စ၊ အဟု သဂ္ဂ သမာဂမော’’တိ။

တတ္ထ သေဒုမန္တိ သေဒုမဒီပံ။

တတော သဂ္ဂေါ တိဿော ဂါထာ အဘာသိ –

၅၇။

‘‘ကုရုကစ္ဆာ ပယာတာနံ၊ ဝါဏိဇာနံ ဓနေသိနံ၊

မကရေဟိ အဘိဒါ နာဝါ၊ ဖလကေနာဟမပ္လဝိံ။

၅၈။

‘‘သာ မံ သဏှေန မုဒုနာ၊ နိစ္စံ စန္ဒနဂန္ဓိနီ၊

အင်္ဂေန ဥဒ္ဓရီ ဘဒ္ဒါ၊ မာတာ ပုတ္တံဝ ဩရသံ။

၅၉။

‘‘သာ မံ အန္နေန ပါနေန၊ ဝတ္ထေန သယနေန စ၊

အတ္တနာပိ စ မန္ဒက္ခီ၊ ဧဝံ တမ္ဗ ဝိဇာနဟီ’’တိ။

တတ္ထ သာ မံ သဏှေန မုဒုနာတိ ဧဝံ ဖလကေန တီရံ ဥတ္တိဏ္ဏံ မံ သမုဒ္ဒတီရေ ဝိစရန္တီ သာ ဒိသွာ ‘‘မာ ဘာယီ’’တိ သဏှေန မုဒုနာ ဝစနေန သမဿာသေတွာတိ အတ္ထော။ အင်္ဂေနာတိ ဗာဟုယုဂဠံ ဣဓ ‘‘အင်္ဂေနာ’’တိ ဝုတ္တံ။ ဘဒ္ဒါတိ ဒဿနီယာ ပါသာဒိကာ။ သာ မံ အန္နေနာတိ သာ မံ ဧတေန အန္နာဒိနာ သန္တပ္ပေသီတိ အတ္ထော။ အတ္တနာပိ စာတိ န ကေဝလံ အန္နာဒီဟေဝ၊ အတ္တနာပိ မံ အဘိရမေန္တီ သန္တပ္ပေသီတိ ဒီပေတိ။ မန္ဒက္ခီတိ မန္ဒဒဿနီ၊ မုဒုနာ အာကာရေန ဩလောကနသီလာတိ ဝုတ္တံ ဟောတိ။ ‘‘မတ္တက္ခီ’’တိပိ ပါဌော၊ မဒမတ္တေဟိ ဝိယ အက္ခီဟိ သမန္နာဂတာတိ အတ္ထော။ ဧဝံ တမ္ဗာတိ ဧဝံ တမ္ဗရာဇ ဇာနာဟီတိ။

သုပဏ္ဏော ဂန္ဓဗ္ဗဿ ကထေန္တဿေဝ ဝိပ္ပဋိသာရီ ဟုတွာ ‘‘အဟံ သုပဏ္ဏဘဝနေ ဝသန္တောပိ ရက္ခိတုံ နာသက္ခိံ၊ ကိံ မေ တာယ ဒုဿီလာယာ’’တိ တံ အာနေတွာ ရညော ပဋိဒတွာ ပက္ကာမိ၊ တတော ပဋ္ဌာယ ပုန နာဂစ္ဆီတိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ဥက္ကဏ္ဌိတဘိက္ခု သောတာပတ္တိဖလေ ပတိဋ္ဌဟိ။ တဒါ ရာဇာ အာနန္ဒော အဟောသိ၊ သုပဏ္ဏရာဇာ ပန အဟမေဝ အဟောသိန္တိ။

သုယောနန္ဒီဇာတကဝဏ္ဏနာ ဒသမာ။

မဏိကုဏ္ဍလဝဂ္ဂေါ ပဌမော။

၂။ ဝဏ္ဏာရောဟဝဂ္ဂေါ

[၃၆၁] ၁။ ဝဏ္ဏာရောဟဇာတကဝဏ္ဏနာ

ဝဏ္ဏာရောဟေနာတိ ဣဒံ သတ္ထာ ဇေတဝနေ ဝိဟရန္တော ဒွေ အဂ္ဂသာဝကေ အာရဗ္ဘ ကထေသိ။ ဧကသ္မိဉှိ သမယေ ဥဘောပိ မဟာထေရာ ‘‘ဣမံ အန္တောဝဿံ သုညာဂါရံ အနုဗြူဟေဿာမာ’’တိ သတ္ထာရံ အာပုစ္ဆိတွာ ဂဏံ ပဟာယ သယမေဝ ပတ္တစီဝရံ အာဒါယ ဇေတဝနာ နိက္ခမိတွာ ဧကံ ပစ္စန္တဂါမံ နိဿာယ အရညေ ဝိဟရိံသု။ အညတရောပိ ဝိဃာသာဒပုရိသော ထေရာနံ ဥပဋ္ဌာနံ ကရောန္တော တတ္ထေဝ ဧကမန္တေ ဝသိ။ သော ထေရာနံ သမဂ္ဂဝါသံ ဒိသွာ ‘‘ဣမေ အတိဝိယ သမဂ္ဂါ ဝသန္တိ၊ သက္ကာ နု ခေါ ဧတေ အညမညံ ဘိန္ဒိတု’’န္တိ စိန္တေတွာ သာရိပုတ္တတ္ထေရံ ဥပသင်္ကမိတွာ ‘‘ကိံ နု ခေါ၊ ဘန္တေ၊ အယျေန မဟာမောဂ္ဂလ္လာနတ္ထေရေန သဒ္ဓိံ တုမှာကံ ကိဉ္စိ ဝေရံ အတ္ထီ’’တိ ပုစ္ဆိ။ ‘‘ကိံ ပနာဝုသော’’တိ။ ဧသ၊ ဘန္တေ၊ မမ အာဂတကာလေ ‘‘သာရိပုတ္တော နာမ ဇာတိဂေါတ္တကုလပဒေသေဟိ ဝါ သုတဂန္ထပဋိဝေဓဣဒ္ဓီဟိ ဝါ မယာ သဒ္ဓိံ ကိံ ပဟောတီ’’တိ တုမှာကံ အဂုဏမေဝ ကထေသီတိ။ ထေရော သိတံ ကတွာ ‘‘ဂစ္ဆ တွံ အာဝုသော’’တိ အာဟ။

သော အပရသ္မိမ္ပိ ဒိဝသေ မဟာမောဂ္ဂလ္လာနတ္ထေရမ္ပိ ဥပသင်္ကမိတွာ တထေဝ ကထေသိ။ သောပိ နံ သိတံ ကတွာ ‘‘ဂစ္ဆ၊ တွံ၊ အာဝုသော’’တိ ဝတွာ သာရိပုတ္တတ္ထေရံ ဥပသင်္ကမိတွာ ‘‘အာဝုသော၊ ဧသော ဝိဃာသာဒေါ တုမှာကံ သန္တိကေ ကိဉ္စိ ကထေသီ’’တိ ပုစ္ဆိ။ ‘‘အာမာဝုသော၊ မယှမ္ပိ သန္တိကေ ကထေသိ၊ ဣမံ နီဟရိတုံ ဝဋ္ဋတီ’’တိ။ ‘‘သာဓု၊ အာဝုသော၊ နီဟရာ’’တိ ဝုတ္တေ ထေရော ‘‘မာ ဣဓ ဝသီ’’တိ အစ္ဆရံ ပဟရိတွာ တံ နီဟရိ။ တေ ဥဘောပိ သမဂ္ဂဝါသံ ဝသိတွာ သတ္ထု သန္တိကံ ဂန္တွာ ဝန္ဒိတွာ နိသီဒိံသု။ သတ္ထာ ပဋိသန္ထာရံ ကတွာ ‘‘သုခေန ဝဿံ ဝသိတ္ထာ’’တိ ပုစ္ဆိတွာ ‘‘ဘန္တေ၊ ဧကော ဝိဃာသာဒေါ အမှေ ဘိန္ဒိတုကာမော ဟုတွာ ဘိန္ဒိတုံ အသက္ကောန္တော ပလာယီ’’တိ ဝုတ္တေ ‘‘န ခေါ သော၊ သာရိပုတ္တ၊ ဣဒါနေဝ၊ ပုဗ္ဗေပေသ တုမှေ ‘ဘိန္ဒိဿာမီ’တိ ဘိန္ဒိတုံ အသက္ကောန္တော ပလာယီ’’တိ ဝတွာ တေဟိ ယာစိတော အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော အရညေ ရုက္ခဒေဝတာ အဟောသိ။ တဒါ သီဟော စ ဗျဂ္ဃော စ အရညေ ပဗ္ဗတဂုဟာယံ ဝသန္တိ။ ဧကော သိင်္ဂါလော တေ ဥပဋ္ဌဟန္တော တေသံ ဝိဃာသံ ခါဒိတွာ မဟာကာယော ဟုတွာ ဧကဒိဝသံ စိန္တေသိ ‘‘မယာ သီဟဗျဂ္ဃာနံ မံသံ န ခါဒိတပုဗ္ဗံ၊ မယာ ဣမေ ဒွေ ဇနေ ဘိန္ဒိတုံ ဝဋ္ဋတိ၊ တတော နေသံ ကလဟံ ကတွာ မတာနံ မံသံ ခါဒိဿာမီ’’တိ။ သော သီဟံ ဥပသင်္ကမိတွာ ‘‘ကိံ၊ သာမိ၊ တုမှာကံ ဗျဂ္ဃေန သဒ္ဓိံ ကိဉ္စိ ဝေရံ အတ္ထီ’’တိ ပုစ္ဆိ။ ‘‘ကိံ ပန၊ သမ္မာ’’တိ? ဧသ၊ ဘန္တေ၊ မမာဂတကာလေ ‘‘သီဟော နာမ သရီရဝဏ္ဏေန ဝါ အာရောဟပရိဏာဟေန ဝါ ဇာတိဗလဝီရိယေဟိ ဝါ မမ ကလဘာဂမ္ပိ န ပါပုဏာတီ’’တိ တုမှာကံ အဂုဏမေဝ ကထေသီတိ။ အထ နံ သီဟော ‘‘ဂစ္ဆ တွံ၊ န သော ဧဝံ ကထေဿတီ’’တိ အာဟ။ ဗျဂ္ဃမ္ပိ ဥပသင်္ကမိတွာ ဧတေနေဝ ဥပါယေန ကထေသိ။ တံ သုတွာ ဗျဂ္ဃောပိ သီဟံ ဥပသင်္ကမိတွာ ‘‘သမ္မ၊ တွံ ကိရ ဣဒဉ္စိဒဉ္စ ဝဒေသီ’’တိ ပုစ္ဆန္တော ပဌမံ ဂါထမာဟ –

၆၀။

‘‘ဝဏ္ဏာရောဟေန ဇာတိယာ၊ ဗလနိက္ကမနေန စ၊

သုဗာဟု န မယာ သေယျော၊ သုဒါဌ ဣတိ ဘာသသီ’’တိ။

တတ္ထ ဗလနိက္ကမနေန စာတိ ကာယဗလေန စေဝ ဝီရိယဗလေန စ။ သုဗာဟု န မယာ သေယျောတိ အယံ သုဗာဟု နာမ ဗျဂ္ဃော ဧတေဟိ ကာရဏေဟိ မယာ နေဝ သဒိသော န ဥတ္တရိတရောတိ သစ္စံ ကိရ တွံ သောဘနာဟိ ဒါဌာဟိ သမန္နာဂတ သုဒါဌ မိဂရာဇ၊ ဧဝံ ဝဒေသီတိ။

တံ သုတွာ သုဒါဌော သေသာ စတဿော ဂါထာ အဘာသိ –

၆၁။

‘‘ဝဏ္ဏာရောဟေန ဇာတိယာ၊ ဗလနိက္ကမနေန စ၊

သုဒါဌော န မယာ သေယျော၊ သုဗာဟု ဣတိ ဘာသသိ။

၆၂။

‘‘ဧဝံ စေ မံ ဝိဟရန္တံ၊ သုဗာဟု သမ္မ ဒုဗ္ဘသိ၊

န ဒါနာဟံ တယာ သဒ္ဓိံ၊ သံဝါသမဘိရောစယေ။

၆၃။

‘‘ယော ပရေသံ ဝစနာနိ၊ သဒ္ဒဟေယျ ယထာတထံ၊

ခိပ္ပံ ဘိဇ္ဇေထ မိတ္တသ္မိံ၊ ဝေရဉ္စ ပသဝေ ဗဟုံ။

၆၄။

‘‘န သော မိတ္တော ယော သဒါ အပ္ပမတ္တော၊ ဘေဒါသင်္ကီ ရန္ဓမေဝါနုပဿီ၊

ယသ္မိဉ္စ သေတီ ဥရသီဝ ပုတ္တော၊ သ ဝေ မိတ္တော ယော အဘေဇ္ဇော ပရေဟီ’’တိ။

တတ္ထ သမ္မာတိ ဝယဿ။ ဒုဗ္ဘသီတိ ယဒိ ဧဝံ တယာ သဒ္ဓိံ သမဂ္ဂဝါသံ ဝသန္တံ မံ သိင်္ဂါလဿ ကထံ ဂဟေတွာ တွံ ဒုဗ္ဘသိ ဟနိတုံ ဣစ္ဆသိ၊ ဣတော ဒါနိ ပဋ္ဌာယ အဟံ တယာ သဒ္ဓိံ သံဝါသံ န အဘိရောစယေ။ ယထာတထန္တိ တထတော ယထာတထံ ယထာတစ္ဆံ အဝိသံဝါဒကေန အရိယေန ဝုတ္တဝစနံ သဒ္ဓါတဗ္ဗံ။ ဧဝံ ယော ယေသံ ကေသဉ္စိ ပရေသံ ဝစနာနိ သဒ္ဒဟေထာတိ အတ္ထော။ ယော သဒါ အပ္ပမတ္တောတိ ယော နိစ္စံ အပ္ပမတ္တော ဟုတွာ မိတ္တဿ ဝိဿာသံ န ဒေတိ၊ သော မိတ္တော နာမ န ဟောတီတိ အတ္ထော။ ဘေဒါသင်္ကီတိ ‘‘အဇ္ဇ ဘိဇ္ဇိဿတိ၊ သွေ ဘိဇ္ဇိဿတီ’’တိ ဧဝံ မိတ္တဿ ဘေဒမေဝ အာသင်္ကတိ။ ရန္ဓမေဝါနုပဿီတိ ဆိဒ္ဒံ ဝိဝရမေဝ ပဿန္တော။ ဥရသီဝ ပုတ္တောတိ ယသ္မိံ မိတ္တေ မာတု ဟဒယေ ပုတ္တော ဝိယ နိရာသင်္ကော နိဗ္ဘယော သေတိ။

ဣတိ ဣမာဟိ စတူဟိ ဂါထာဟိ သီဟေန မိတ္တဂုဏေ ကထိတေ ဗျဂ္ဃော ‘‘မယှံ ဒေါသော’’တိ သီဟံ ခမာပေသိ။ တေ တတ္ထေဝ သမဂ္ဂဝါသံ ဝသိံသု။ သိင်္ဂါလော ပန ပလာယိတွာ အညတ္ထ ဂတော။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ သိင်္ဂါလော ဝိဃာသာဒေါ အဟောသိ၊ သီဟော သာရိပုတ္တော၊ ဗျဂ္ဃော မောဂ္ဂလ္လာနော၊ တံ ကာရဏံ ပစ္စက္ခတော ဒိဋ္ဌာ တသ္မိံ ဝနေ နိဝုတ္ထရုက္ခဒေဝတာ ပန အဟမေဝ အဟောသိ’’န္တိ။

ဝဏ္ဏာရောဟဇာတကဝဏ္ဏနာ ပဌမာ။

[၃၆၂] ၂။ သီလဝီမံသဇာတကဝဏ္ဏနာ

သီလံ သေယျောတိ ဣဒံ သတ္ထာ ဇေတဝနေ ဝိဟရန္တော ဧကံ သီလဝီမံသကဗြာဟ္မဏံ အာရဗ္ဘ ကထေသိ။ တံ ကိရ ရာဇာ ‘‘ဧသ သီလသမ္ပန္နော’’တိ အညေဟိ ဗြာဟ္မဏေဟိ အတိရေကံ ကတွာ ပဿတိ။ သော စိန္တေသိ ‘‘ကိံ နု ခေါ မံ ရာဇာ ‘သီလသမ္ပန္နော’တိ အညေဟိ အတိရေကံ ကတွာ ပဿတိ၊ ဥဒါဟု ‘သုတဓရယုတ္တော’တိ၊ ဝီမံသိဿာမိ တာဝ သီလဿ ဝါ သုတဿ ဝါ မဟန္တဘာဝ’’န္တိ။ သော ဧကဒိဝသံ ဟေရညိကဖလကတော ကဟာပဏံ ဂဏှိ။ ဟေရညိကော ဂရုဘာဝေန န ကိဉ္စိ အာဟ၊ ဒုတိယဝါရေပိ န ကိဉ္စိ အာဟ။ တတိယဝါရေ ပန တံ ‘‘ဝိလောပခါဒကော’’တိ ဂါဟာပေတွာ ရညော ဒဿေတွာ ‘‘ကိံ ဣမိနာ ကတ’’န္တိ ဝုတ္တေ ‘‘ကုဋုမ္ဗံ ဝိလုမ္ပတီ’’တိ အာဟ။ ‘‘သစ္စံ ကိရ ၊ ဗြာဟ္မဏာ’’တိ? ‘‘န၊ မဟာရာဇ၊ ကုဋုမ္ဗံ ဝိလုမ္ပာမိ၊ မယှံ ပန ‘သီလံ နု ခေါ မဟန္တံ၊ သုတံ နု ခေါ’တိ ကုက္ကုစ္စံ အဟောသိ၊ သွာဟံ ‘ဧတေသု ကတရံ နု ခေါ မဟန္တ’န္တိ ဝီမံသန္တော တယော ဝါရေ ကဟာပဏံ ဂဏှိံ၊ တံ မံ ဧသ ဗန္ဓာပေတွာ တုမှာကံ ဒဿေတိ။ ဣဒါနိ မေ သုတတော သီလဿ မဟန္တဘာဝေါ ဉာတော၊ န မေ ဃရာဝါသေနတ္ထော၊ ပဗ္ဗဇိဿာမဟ’’န္တိ ပဗ္ဗဇ္ဇံ အနုဇာနာပေတွာ ဃရဒွါရံ အနောလောကေတွာဝ ဇေတဝနံ ဂန္တွာ သတ္ထာရံ ပဗ္ဗဇ္ဇံ ယာစိ။ တဿ သတ္ထာ ပဗ္ဗဇ္ဇဉ္စ ဥပသမ္ပဒဉ္စ ဒါပေသိ။ သော အစိရူပသမ္ပန္နော ဝိပဿနံ ဝိပဿိတွာ အဂ္ဂဖလေ ပတိဋ္ဌဟိ။ ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ အသုကဗြာဟ္မဏော အတ္တနော သီလံ ဝီမံသိတွာ ပဗ္ဗဇိတော ဝိပဿိတွာ အရဟတ္တံ ပတ္တော’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနိ အယမေဝ၊ ပုဗ္ဗေ ပဏ္ဍိတာပိ သီလံ ဝီမံသိတွာ ပဗ္ဗဇိတွာ အတ္တနော ပတိဋ္ဌံ ကရိံသုယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဗြာဟ္မဏကုလေ နိဗ္ဗတ္တိတွာ ဝယပ္ပတ္တော တက္ကသိလာယံ သဗ္ဗသိပ္ပာနိ ဥဂ္ဂဏှိတွာ ဗာရာဏသိံ အာဂန္တွာ ရာဇာနံ ပဿိ။ ရာဇာ တဿ ပုရောဟိတဋ္ဌာနံ အဒါသိ။ သော ပဉ္စ သီလာနိ ရက္ခတိ။ ရာဇာပိ နံ ‘‘သီလဝါ’’တိ ဂရုံ ကတွာ ပဿိ။ သော စိန္တေသိ ‘‘ကိံ နု ခေါ ရာဇာ ‘သီလဝါ’တိ မံ ဂရုံ ကတွာ ပဿတိ၊ ဥဒါဟု ‘သုတဓရယုတ္တော’’’တိ။ သဗ္ဗံ ပစ္စုပ္ပန္နဝတ္ထုသဒိသမေဝ။ ဣဓ ပန သော ဗြာဟ္မဏော ‘‘ဣဒါနိ မေ သုတတော သီလဿ မဟန္တဘာဝေါ ဉာတော’’တိ ဝတွာ ဣမာ ပဉ္စ ဂါထာ အဘာသိ –

၆၅။

‘‘သီလံ သေယျော သုတံ သေယျော၊ ဣတိ မေ သံသယော အဟု၊

သီလမေဝ သုတာ သေယျော၊ ဣတိ မေ နတ္ထိ သံသယော။

၆၆။

‘‘မောဃာ ဇာတိ စ ဝဏ္ဏော စ၊ သီလမေဝ ကိရုတ္တမံ၊

သီလေန အနုပေတဿ၊ သုတေနတ္ထော န ဝိဇ္ဇတိ။

၆၇။

‘‘ခတ္တိယော စ အဓမ္မဋ္ဌော၊ ဝေဿော စာဓမ္မနိဿိတော၊

တေ ပရိစ္စဇ္ဇုဘော လောကေ၊ ဥပပဇ္ဇန္တိ ဒုဂ္ဂတိံ။

၆၈။

‘‘ခတ္တိယာ ဗြာဟ္မဏာ ဝေဿာ၊ သုဒ္ဒါ စဏ္ဍာလပုက္ကုသာ၊

ဣဓ ဓမ္မံ စရိတွာန၊ ဘဝန္တိ တိဒိဝေ သမာ။

၆၉။

‘‘န ဝေဒါ သမ္ပရာယာယ၊ န ဇာတိ နာပိ ဗန္ဓဝါ၊

သကဉ္စ သီလံ သံသုဒ္ဓံ၊ သမ္ပရာယာယ သုခါယ စာ’’တိ။

တတ္ထ သီလမေဝ သုတာ သေယျောတိ သုတပရိယတ္တိတော သတဂုဏေန သဟဿဂုဏေန သီလမေဝ ဥတ္တရိတရန္တိ။ ဧဝဉ္စ ပန ဝတွာ သီလံ နာမေတံ ဧကဝိဓံ သံဝရဝသေန၊ ဒုဝိဓံ စာရိတ္တဝါရိတ္တဝသေန၊ တိဝိဓံ ကာယိကဝါစသိကမာနသိကဝသေန၊ စတုဗ္ဗိဓံ ပါတိမောက္ခသံဝရဣန္ဒြိယသံဝရအာဇီဝပါရိသုဒ္ဓိပစ္စယသန္နိဿိတဝသေနာတိ မာတိကံ ဌပေတွာ ဝိတ္ထာရေန္တော သီလဿ ဝဏ္ဏံ အဘာသိ။

မောဃာတိ အဖလာ တုစ္ဆာ။ ဇာတီတိ ခတ္တိယကုလာဒီသု နိဗ္ဗတ္တိ။ ဝဏ္ဏောတိ သရီရဝဏ္ဏော အဘိရူပဘာဝေါ။ ယာ ဟိ ယသ္မာ သီလရဟိတဿ ဇာတိသမ္ပဒါ ဝါ ဝဏ္ဏသမ္ပဒါ ဝါ သဂ္ဂသုခံ ဒါတုံ န သက္ကောတိ၊ တသ္မာ ဥဘယမ္ပိ တံ ‘‘မောဃ’’န္တိ အာဟ။ သီလမေဝ ကိရာတိ အနုဿဝဝသေန ဝဒတိ၊ န ပန သယံ ဇာနာတိ။ အနုပေတဿာတိ အနုပဂတဿ။ သုတေနတ္ထော န ဝိဇ္ဇတီတိ သီလရဟိတဿ သုတပရိယတ္တိမတ္တေန ဣဓလောကေ ဝါ ပရလောကေ ဝါ ကာစိ ဝဍ္ဎိ နာမ နတ္ထိ။

တတော ပရာ ဒွေ ဂါထာ ဇာတိယာ မောဃဘာဝဒဿနတ္ထံ ဝုတ္တာ။ တတ္ထ တေ ပရိစ္စဇ္ဇုဘော လောကေတိ တေ ဒုဿီလာ ဒေဝလောကဉ္စ မနုဿလောကဉ္စာတိ ဥဘောပိ လောကေ ပရိစ္စဇိတွာ ဒုဂ္ဂတိံ ဥပပဇ္ဇန္တိ။ စဏ္ဍာလပုက္ကုသာတိ ဆဝဆဍ္ဍကစဏ္ဍာလာ စ ပုပ္ဖဆဍ္ဍကပုက္ကုသာ စ။ ဘဝန္တိ တိဒိဝေ သမာတိ ဧတေ သဗ္ဗေပိ သီလာနုဘာဝေန ဒေဝလောကေ နိဗ္ဗတ္တာ သမာ ဟောန္တိ နိဗ္ဗိသေသာ၊ ဒေဝါတွေဝ သင်္ချံ ဂစ္ဆန္တိ။

ပဉ္စမဂါထာ သဗ္ဗေသမ္ပိ သုတာဒီနံ မောဃဘာဝဒဿနတ္ထံ ဝုတ္တာ။ တဿတ္ထော – မဟာရာဇ၊ ဧတေ ဝေဒါဒယော ဌပေတွာ ဣဓလောကေ ယသမတ္တဒါနံ သမ္ပရာယေ ဒုတိယေ ဝါ တတိယေ ဝါ ဘဝေ ယသံ ဝါ သုခံ ဝါ ဒါတုံ နာမ န သက္ကောန္တိ၊ ပရိသုဒ္ဓံ ပန အတ္တနော သီလမေဝ တံ ဒါတုံ သက္ကောတီတိ။

ဧဝံ မဟာသတ္တော သီလဂုဏေ ထောမေတွာ ရာဇာနံ ပဗ္ဗဇ္ဇံ အနုဇာနာပေတွာ တံ ဒိဝသမေဝ ဟိမဝန္တံ ပဝိသိတွာ ဣသိပဗ္ဗဇ္ဇံ ပဗ္ဗဇိတွာ အဘိညာ စ သမာပတ္တိယော စ နိဗ္ဗတ္တေတွာ အပရိဟီနဇ္ဈာနော ဗြဟ္မလောကပရာယဏော အဟောသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ သီလံ ဝီမံသိတွာ ဣသိပဗ္ဗဇ္ဇံ ပဗ္ဗဇိတော အဟမေဝ အဟောသိ’’န္တိ။

သီလဝီမံသဇာတကဝဏ္ဏနာ ဒုတိယာ။

[၃၆၃] ၃။ ဟိရိဇာတကဝဏ္ဏနာ

ဟိရိံတရန္တန္တိ ဣဒံ သတ္ထာ ဇေတဝနေ ဝိဟရန္တော အနာထပိဏ္ဍိကဿ သဟာယံ ပစ္စန္တဝါသိသေဋ္ဌိံ အာရဗ္ဘ ကထေသိ။ ဒွေပိ ဝတ္ထူနိ ဧကကနိပါတေ နဝမဝဂ္ဂဿ ပရိယောသာနဇာတကေ ဝိတ္ထာရိတာနေဝ။ ဣဓ ပန ‘‘ပစ္စန္တဝါသိသေဋ္ဌိနော မနုဿာ အစ္ဆိန္နသဗ္ဗသာပတေယျာ အတ္တနော သန္တကဿ အဿာမိနော ဟုတွာ ပလာတာ’’တိ ဗာရာဏသိသေဋ္ဌိဿ အာရောစိတေ ဗာရာဏသိသေဋ္ဌိ ‘‘အတ္တနော သန္တိကံ အာဂတာနံ ကတ္တဗ္ဗံ အကရောန္တာ နာမ ပဋိကာရကေ န လဘန္တိယေဝါ’’တိ ဝတွာ ဣမာ ဂါထာ အဘာသိ –

၇၀။

‘‘ဟိရိံ တရန္တံ ဝိဇိဂုစ္ဆမာနံ၊ တဝါဟမသ္မီ ဣတိ ဘာသမာနံ၊

သေယျာနိ ကမ္မာနိ အနာဒိယန္တံ၊ နေသော မမန္တိ ဣတိ နံ ဝိဇညာ။

၇၁။

‘‘ယဉှိ ကယိရာ တဉှိ ဝဒေ၊ ယံ န ကယိရာ န တံ ဝဒေ၊

အကရောန္တံ ဘာသမာနံ၊ ပရိဇာနန္တိ ပဏ္ဍိတာ။

၇၂။

‘‘န သော မိတ္တော ယော သဒါ အပ္ပမတ္တော၊ ဘေဒါသင်္ကီ ရန္ဓမေဝါနုပဿီ၊

ယသ္မိဉ္စ သေတီ ဥရသီဝ ပုတ္တော၊ သ ဝေ မိတ္တော ယော အဘေဇ္ဇော ပရေဟိ။

၇၃။

‘‘ပါမောဇ္ဇကရဏံ ဌာနံ၊ ပသံသာဝဟနံ သုခံ၊

ဖလာနိသံသော ဘာဝေတိ၊ ဝဟန္တော ပေါရိသံ ဓုရံ။

၇၄။

‘‘ပဝိဝေကရသံ ပိတွာ၊ ရသံ ဥပသမဿ စ၊

နိဒ္ဒရော ဟောတိ နိပ္ပာပေါ၊ ဓမ္မပ္ပီတိရသံ ပိဝ’’န္တိ။

တတ္ထ ဟိရိံ တရန္တန္တိ လဇ္ဇံ အတိက္ကန္တံ။ ဝိဇိဂုစ္ဆမာနန္တိ မိတ္တဘာဝေန ဇိဂုစ္ဆယမာနံ။ တဝါဟမသ္မီတိ ‘‘တဝ အဟံ မိတ္တော’’တိ ကေဝလံ ဝစနမတ္တေနေဝ ဘာသမာနံ။ သေယျာနိ ကမ္မာနိတိ ‘‘ဒဿာမိ ကရိဿာမီ’’တိ ဝစနဿ အနုရူပါနိ ဥတ္တမကမ္မာနိ။ အနာဒိယန္တန္တိ အကရောန္တံ။ နေသော မမန္တိ ဧဝရူပံ ပုဂ္ဂလံ ‘‘န ဧသော မမ မိတ္တော’’တိ ဝိဇညာ။

ပါမောဇ္ဇကရဏံဌာနန္တိ ဒါနမ္ပိ သီလမ္ပိ ဘာဝနာပိ ပဏ္ဍိတေဟိ ကလျာဏမိတ္တေဟိ သဒ္ဓိံ မိတ္တဘာဝေါပိ။ ဣဓ ပန ဝုတ္တပ္ပကာရံ မိတ္တဘာဝမေဝ သန္ဓာယေဝမာဟ။ ပဏ္ဍိတေန ဟိ ကလျာဏမိတ္တေန သဒ္ဓိံ မိတ္တဘာဝေါ ပါမောဇ္ဇမ္ပိ ကရောတိ၊ ပသံသမ္ပိ ဝဟတိ။ ဣဓလောကပရလောကေသု ကာယိကစေတသိကသုခဟေတုတော ‘‘သုခ’’န္တိပိ ဝုစ္စတိ၊ တသ္မာ ဧတံ ဖလဉ္စ အာနိသံသဉ္စ သမ္ပဿမာနော ဖလာနိသံသော ကုလပုတ္တော ပုရိသေဟိ ဝဟိတဗ္ဗံ ဒါနသီလဘာဝနာမိတ္တဘာဝသင်္ခါတံ စတုဗ္ဗိဓမ္ပိ ပေါရိသံ ဓုရံ ဝဟန္တော ဧတံ မိတ္တဘာဝသင်္ခါတံ ပါမောဇ္ဇကရဏံ ဌာနံ ပသံသာဝဟနံ သုခံ ဘာဝေတိ ဝဍ္ဎေတိ၊ န ပဏ္ဍိတေဟိ မိတ္တဘာဝံ ဘိန္ဒတီတိ ဒီပေတိ။

ပဝိဝေကရသန္တိ ကာယစိတ္တဥပဓိဝိဝေကာနံ ရသံ တေ ဝိဝေကေ နိဿာယ ဥပ္ပန္နံ သောမနဿရသံ။ ဥပသမဿ စာတိ ကိလေသူပသမေန လဒ္ဓသောမနဿဿ။ နိဒ္ဒရော ဟောတိ နိပ္ပာပေါတိ သဗ္ဗကိလေသဒရထာဘာဝေန နိဒ္ဒရော၊ ကိလေသာဘာဝေန နိပ္ပာပေါ ဟောတိ။ ဓမ္မပ္ပီတိရသန္တိ ဓမ္မပီတိသင်္ခါတံ ရသံ၊ ဝိမုတ္တိပီတိံ ပိဝန္တောတိ အတ္ထော။

ဣတိ မဟာသတ္တော ပါပမိတ္တသံသဂ္ဂတော ဥဗ္ဗိဂ္ဂေါ ပဝိဝေကရသေန အမတမဟာနိဗ္ဗာနံ ပါပေတွာ ဒေသနာယ ကူဋံ ဂဏှိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ပစ္စန္တဝါသီ ဣဒါနိ ပစ္စန္တဝါသီယေဝ၊ တဒါ ဗာရာဏသိသေဋ္ဌိ အဟမေဝ အဟောသိ’’န္တိ။

ဟိရိဇာတကဝဏ္ဏနာ တတိယာ။

[၃၆၄] ၄။ ခဇ္ဇောပနကဇာတကဝဏ္ဏနာ

၇၅-၇၉။

ကော နု သန္တမှိ ပဇ္ဇောတေတိ အယံ ခဇ္ဇောပနကပဉှော မဟာဥမင်္ဂေ ဝိတ္ထာရတော အာဝိ ဘဝိဿတိ။

ခဇ္ဇောပနကဇာတကဝဏ္ဏနာ စတုတ္ထာ။

[၃၆၅] ၅။ အဟိတုဏ္ဍိကဇာတကဝဏ္ဏနာ

ဓုတ္တောမှီတိ ဣဒံ သတ္ထာ ဇေတဝနေ ဝိဟရန္တော ဧကံ မဟလ္လကဘိက္ခုံ အာရဗ္ဘ ကထေသိ။ ဝတ္ထု ဟေဋ္ဌာ သာလူကဇာတကေ (ဇာ။ ၁။၃။၁၀၆ အာဒယော) ဝိတ္ထာရိတံ။ ဣဓာပိ သော မဟလ္လကော ဧကံ ဂါမဒါရကံ ပဗ္ဗာဇေတွာ အက္ကောသတိ ပဟရတိ။ ဒါရကော ပလာယိတွာ ဝိဗ္ဘမိ။ ဒုတိယမ္ပိ နံ ပဗ္ဗာဇေတွာ တထေဝါကာသိ။ ဒုတိယမ္ပိ ဝိဗ္ဘမိတွာ ပုန ယာစိယမာနော ဩလောကေတုမ္ပိ န ဣစ္ဆိ။ ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ အသုကော နာမ မဟလ္လကော အတ္တနော သာမဏေရေန သဟာပိ ဝိနာပိ ဝတ္တိတုံ န သက္ကောတိ၊ ဣတရော တဿ ဒေါသံ ဒိသွာ ပုန ဩလောကေတုမ္ပိ န ဣစ္ဆိ၊ သုဟဒယော ကုမာရကော’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပေသ သာမဏေရော သုဟဒယောဝ၊ သကိံ ဒေါသံ ဒိသွာ ပုန ဩလောကေတုမ္ပိ န ဣစ္ဆီ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဓညဝါဏိဇကုလေ နိဗ္ဗတ္တိတွာ ဝယပ္ပတ္တော ဓညဝိက္ကယေန ဇီဝိကံ ကပ္ပေသိ။ အထေကော အဟိတုဏ္ဍိကော မက္ကဋံ ဂဟေတွာ သိက္ခာပေတွာ အဟိံ ကီဠာပေန္တော ဗာရာဏသိယံ ဥဿဝေ ဃုဋ္ဌေ တံ မက္ကဋံ ဓညဝါဏိဇကဿ သန္တိကေ ဌပေတွာ အဟိံ ကီဠာပေန္တော သတ္တ ဒိဝသာနိ ဝိစရိ။ သောပိ ဝါဏိဇော မက္ကဋဿ ခါဒနီယံ ဘောဇနီယံ အဒါသိ။ အဟိတုဏ္ဍိကော သတ္တမေ ဒိဝသေ ဥဿဝကီဠနတော အာဂန္တွာ တံ မက္ကဋံ ဝေဠုပေသိကာယ တိက္ခတ္တုံ ပဟရိတွာ တံ အာဒါယ ဥယျာနံ ဂန္တွာ ဗန္ဓိတွာ နိဒ္ဒံ ဩက္ကမိ။ မက္ကဋော ဗန္ဓနံ မောစေတွာ အမ္ဗရုက္ခံ အာရုယှ အမ္ဗာနိ ခါဒန္တော နိသီဒိ။ သော ပဗုဒ္ဓါ ရုက္ခေ မက္ကဋံ ဒိသွာ ‘‘ဧတံ မယာ ဥပလာပေတွာ ဂဟေတုံ ဝဋ္ဋတီ’’တိ တေန သဒ္ဓိံ သလ္လပန္တော ပဌမံ ဂါထမာဟ –

၈၀။

‘‘ဓုတ္တောမှိ သမ္မ သုမုခ၊ ဇူတေ အက္ခပရာဇိတော၊

ဟရေဟိ အမ္ဗပက္ကာနိ၊ ဝီရိယံ တေ ဘက္ခယာမသေ’’တိ။

တတ္ထ အက္ခပရာဇိတောတိ အက္ခေဟိ ပရာဇိတော။ ဟရေဟီတိ ပါတေဟိ။ အယမေဝ ဝါ ပါဌော။

တံ သုတွာ မက္ကဋော သေသဂါထာ အဘာသိ –

၈၁။

‘‘အလိကံ ဝတ မံ သမ္မ၊ အဘူတေန ပသံသသိ၊

ကော တေ သုတော ဝါ ဒိဋ္ဌော ဝါ၊ သုမုခေါ နာမ မက္ကဋော။

၈၂။

‘‘အဇ္ဇာပိ မေ တံ မနသိ၊ ယံ မံ တွံ အဟိတုဏ္ဍိက၊

ဓညာပဏံ ပဝိသိတွာ၊ မတ္တော ဆာတံ ဟနာသိ မံ။

၈၃။

‘‘တာဟံ သရံ ဒုက္ခသေယျံ၊ အပိ ရဇ္ဇမ္ပိ ကာရယေ၊

နေဝါဟံ ယာစိတော ဒဇ္ဇံ၊ တထာ ဟိ ဘယတဇ္ဇိတော။

၈၄။

‘‘ယဉ္စ ဇညာ ကုလေ ဇာတံ၊ ဂဗ္ဘေ တိတ္တံ အမစ္ဆရိံ၊

တေန သခိဉ္စ မိတ္တဉ္စ၊ ဓီရော သန္ဓာတုမရဟတီ’’တိ။

တတ္ထ အလိကံ ဝတာတိ မုသာ ဝတ။ အဘူတေနာတိ အဝိဇ္ဇမာနေန။ ကော တေတိ ကွ တယာ။ သုမုခေါတိ သုန္ဒရမုခေါ။ အဟိတုဏ္ဍိကာတိ တံ အာလပတိ။ ‘‘အဟိကောဏ္ဍိကာ’’တိပိ ပါဌော။ ဆာတန္တိ ဇိဃစ္ဆာဘိဘူတံ ဒုဗ္ဗလံ ကပဏံ။ ဟနာသီတိ ဝေဠုပေသိကာယ တိက္ခတ္တုံ ပဟရသိ။ တာဟန္တိ တံ အဟံ။ သရန္တိ သရန္တော။ ဒုက္ခသေယျန္တိ တသ္မိံ အာပဏေ ဒုက္ခသယနံ။ အပိ ရဇ္ဇမ္ပိ ကာရယေတိ သစေပိ ဗာရာဏသိရဇ္ဇံ ဂဟေတွာ မယှံ ဒတွာ မံ ရဇ္ဇံ ကာရေယျာသိ၊ ဧဝမ္ပိ တံ နေဝါဟံ ယာစိတော ဒဇ္ဇံ၊ တံ ဧကမ္ပိ အမ္ဗပက္ကံ အဟံ တယာ ယာစိတော န ဒဒေယျံ။ ကိံကာရဏာ? တထာ ဟိ ဘယတဇ္ဇိတောတိ၊ တထာ ဟိ အဟံ တယာ ဘယေန တဇ္ဇိတောတိ အတ္ထော။

ဂဗ္ဘေ တိတ္တန္တိ သုဘောဇနရသေန မာတုကုစ္ဆိယံယေဝ အလင်္ကတပဋိယတ္တေ သယနဂဗ္ဘေယေဝ ဝါ တိတ္တံ ဘောဂါသာယ အကပဏံ။ သခိဉ္စ မိတ္တဉ္စာတိ သခိဘာဝဉ္စ မိတ္တဘာဝဉ္စ တထာရူပေန ကုလဇာတေန တိတ္တေန အကပဏေန အမစ္ဆရိနာ သဒ္ဓိံ ပဏ္ဍိတော သန္ဓာတုံ ပုန ဃဋေတုံ အရဟတိ၊ တယာ ပန ကပဏေန အဟိတုဏ္ဍိကေန သဒ္ဓိံ ကော မိတ္တဘာဝံ ပုန ဃဋေတုန္တိ အတ္ထော။ ဧဝဉ္စ ပန ဝတွာ ဝါနရော ဝနံ သဟသာ ပါဝိသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ အဟိတုဏ္ဍိကော မဟလ္လကော အဟောသိ၊ မက္ကဋော သာမဏေရော၊ ဓညဝါဏိဇော ပန အဟမေဝ အဟောသိ’’န္တိ။

အဟိတုဏ္ဍိကဇာတကဝဏ္ဏနာ ပဉ္စမာ။

[၃၆၆] ၆။ ဂုမ္ဗိယဇာတကဝဏ္ဏနာ

မဓုဝဏ္ဏံမဓုရသန္တိ ဣဒံ သတ္ထာ ဇေတဝနေ ဝိဟရန္တော ဥက္ကဏ္ဌိတဘိက္ခုံ အာရဗ္ဘ ကထေသိ။ တဉှိ သတ္ထာ ‘‘သစ္စံ ကိရ တွံ ဘိက္ခု ဥက္ကဏ္ဌိတောသီ’’တိ ပုစ္ဆိတွာ ‘‘သစ္စံ၊ ဘန္တေ’’တိ ဝုတ္တေ ‘‘ကိံ ဒိသွာ’’တိ ဝတွာ ‘‘အလင်္ကတမာတုဂါမ’’န္တိ ဝုတ္တေ ‘‘ဘိက္ခု ဣမေ ပဉ္စ ကာမဂုဏာ နာမ ဧကေန ဂုမ္ဗိယေန ယက္ခေန ဟလာဟလဝိသံ ပက္ခိပိတွာ မဂ္ဂေ ဌပိတမဓုသဒိသာ’’တိ ဝတွာ တေန ယာစိတော အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော သတ္ထဝါဟကုလေ နိဗ္ဗတ္တိတွာ ဝယပ္ပတ္တော ဗာရာဏသိတော ပဉ္စဟိ သကဋသတေဟိ ဘဏ္ဍံ အာဒါယ ဝေါဟာရတ္ထာယ ဂစ္ဆန္တော မဟာဝတ္တနိအဋဝိဒွါရံ ပတွာ သတ္ထကေ သန္နိပါတာပေတွာ ‘‘အမ္ဘော၊ ဣမသ္မိံ မဂ္ဂေ ဝိသပဏ္ဏပုပ္ဖဖလာဒီနိ အတ္ထိ၊ တုမှေ ကိဉ္စိ အခါဒိတပုဗ္ဗံ ခါဒန္တာ မံ အပုစ္ဆိတွာ မာ ခါဒိတ္ထ၊ အမနုဿာပိ ဝိသံ ပက္ခိပိတွာ ဘတ္တပုဋမဓုကဖလာနိ မဂ္ဂေ ဌပေန္တိ၊ တာနိပိ မံ အနာပုစ္ဆိတွာ မာ ခါဒိတ္ထာ’’တိ ဩဝါဒံ ဒတွာ မဂ္ဂံ ပဋိပဇ္ဇိ။ အထေကော ဂုမ္ဗိယော နာမ ယက္ခော အဋဝိယာ မဇ္ဈဋ္ဌာနေ မဂ္ဂေ ပဏ္ဏာနိ အတ္ထရိတွာ ဟလာဟလဝိသသံယုတ္တာနိ မဓုပိဏ္ဍာနိ ဌပေတွာ သယံ မဂ္ဂသာမန္တေ မဓုံ ဂဏှန္တော ဝိယ ရုက္ခေ ကောဋ္ဋေန္တော ဝိစရတိ။ အဇာနန္တာ ‘‘ပုညတ္ထာယ ဌပိတာနိ ဘဝိဿန္တီ’’တိ ခါဒိတွာ ဇီဝိတက္ခယံ ပါပုဏန္တိ။ အမနုဿာ အာဂန္တွာ တေ ခါဒန္တိ။ ဗောဓိသတ္တဿ သတ္ထကမနုဿာပိ တာနိ ဒိသွာ ဧကစ္စေ လောလဇာတိကာ အဓိဝါသေတုံ အသက္ကောန္တာ ခါဒိံသု၊ ပဏ္ဍိတဇာတိကာ ‘‘ပုစ္ဆိတွာ ခါဒိဿာမာ’’တိ ဂဟေတွာ အဋ္ဌံသု။ ဗောဓိသတ္တော တေ ဒိသွာ ဟတ္ထဂတာနိ ဆဍ္ဍာပေသိ၊ ယေဟိ ပဌမတရံ ခါဒိတာနိ၊ တေ မရိံသု။ ယေဟိ အဍ္ဎခါဒိတာနိ၊ တေသံ ဝမနဝိရေစနံ ဒတွာ ဝန္တကာလေ စတုမဓုရံ အဒါသိ။ ဣတိ တေ တဿ အာနုဘာဝေန ဇီဝိတံ ပဋိလဘိံသု။ ဗောဓိသတ္တော သောတ္ထိနာ ဣစ္ဆိတဋ္ဌာနံ ဂန္တွာ ဘဏ္ဍံ ဝိဿဇ္ဇေတွာ အတ္တနော ဂေဟမေဝ အဂမာသိ။ တမတ္ထံ ကထေန္တော သတ္ထာ ဣမာ အဘိသမ္ဗုဒ္ဓဂါထာ အဘာသိ –

၈၅။

‘‘မဓုဝဏ္ဏံ မဓုရသံ၊ မဓုဂန္ဓံ ဝိသံ အဟု၊

ဂုမ္ဗိယော ဃာသမေသာနော၊ အရညေ ဩဒဟီ ဝိသံ။

၈၆။

‘‘မဓု ဣတိ မညမာနာ၊ ယေ တံ ဝိသမခါဒိသုံ၊

တေသံ တံ ကဋုကံ အာသိ၊ မရဏံ တေနုပါဂမုံ။

၈၇။

‘‘ယေ စ ခေါ ပဋိသင်္ခါယ၊ ဝိသံ တံ ပရိဝဇ္ဇယုံ၊

တေ အာတုရေသု သုခိတာ၊ ဍယှမာနေသု နိဗ္ဗုတာ။

၈၈။

‘‘ဧဝမေဝ မနုဿေသု၊ ဝိသံ ကာမာ သမောဟိတာ၊

အာမိသံ ဗန္ဓနဉ္စေတံ၊ မစ္စုဝေသော ဂုဟာသယော။

၈၉။

‘‘ဧဝမေဝ ဣမေ ကာမေ၊ အာတုရာ ပရိစာရိကေ၊

ယေ သဒါ ပရိဝဇ္ဇေန္တိ၊ သင်္ဂံ လောကေ ဥပစ္စဂု’’န္တိ။

တတ္ထ ဂုမ္ဗိယောတိ တသ္မိံ ဝနဂုမ္ဗေ ဝိစရဏေန ဧဝံလဒ္ဓနာမော ယက္ခော။ ဃာသမေသာနောတိ ‘‘တံ ဝိသံ ခါဒိတွာ မတေ ခါဒိဿာမီ’’တိ ဧဝံ အတ္တနော ဃာသံ ပရိယေသန္တော။ ဩဒဟီတိ တံ မဓုနာ သမာနဝဏ္ဏဂန္ဓရသံ ဝိသံ နိက္ခိပိ။ ကဋုကံ အာသီတိ တိခိဏံ အဟောသိ။ မရဏံ တေနုပါဂမုန္တိ တေန ဝိသေန တေ သတ္တာ မရဏံ ဥပဂတာ။

အာတုရေသူတိ ဝိသဝေဂေန အာသန္နမရဏေသု။ ဍယှမာနေသူတိ ဝိသတေဇေနေဝ ဍယှမာနေသု။ ဝိသံ ကာမာ သမောဟိတာတိ ယထာ တသ္မိံ ဝတ္တနိမဟာမဂ္ဂေ ဝိသံ သမောဟိတံ နိက္ခိတ္တံ၊ ဧဝံ မနုဿေသုပိ ယေ ဧတေ ရူပါဒယော ပဉ္စ ဝတ္ထုကာမာ တတ္ထ တတ္ထ သမောဟိတာ နိက္ခိတ္တာ၊ တေ ‘‘ဝိသ’’န္တိ ဝေဒိတဗ္ဗာ။ အာမိသံ ဗန္ဓနဉ္စေတန္တိ ဧတေ ပဉ္စ ကာမဂုဏာ နာမ ဧဝံ ဣမဿ မစ္ဆဘူတဿ လောကဿ မာရဗာလိသိကေန ပက္ခိတ္တံ အာမိသဉ္စေဝ ၊ ဘဝါဘဝတော နိက္ခမိတုံ အပ္ပဒါနေန အန္ဒုအာဒိပ္ပဘေဒံ နာနပ္ပကာရံ ဗန္ဓနဉ္စ။ မစ္စုဝေသော ဂုဟာသယောတိ သရီရဂုဟာယ ဝသနကော မရဏမစ္စုဝေသော။

ဧဝမေဝ ဣမေ ကာမေတိ ယထာ ဝတ္တနိမဟာမဂ္ဂေ ဝိသံ နိက္ခိတ္တံ၊ ဧဝံ တတ္ထ တတ္ထ နိက္ခိတ္တေ ဣမေ ကာမေ။ အာတုရာတိ ဧကန္တမရဏဓမ္မတာယ အာတုရာ အာသန္နမရဏာ ပဏ္ဍိတမနုဿာ။ ပရိစာရိကေတိ ကိလေသပရိစာရိကေ ကိလေသဗန္ဓကေ။ ယေ သဒါ ပရိဝဇ္ဇေန္တီတိ ယေ ဝုတ္တပ္ပကာရာ ပဏ္ဍိတပုရိသာ နိစ္စံ ဧဝရူပေ ကာမေ ဝဇ္ဇေန္တိ။ သင်္ဂံ လောကေတိ လောကေ သင်္ဂနဋ္ဌေန ‘‘သင်္ဂ’’န္တိ လဒ္ဓနာမံ ရာဂါဒိဘေဒံ ကိလေသဇာတံ။ ဥပစ္စဂုန္တိ အတီတာ နာမာတိ ဝေဒိတဗ္ဗာ၊ အတိက္ကမန္တီတိ ဝါ အတ္ထော။

သတ္ထာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ဥက္ကဏ္ဌိတဘိက္ခု သောတာပတ္တိဖလေ ပတိဋ္ဌဟိ။ တဒါ သတ္ထဝါဟော အဟမေဝ အဟောသိန္တိ။

ဂုမ္ဗိယဇာတကဝဏ္ဏနာ ဆဋ္ဌာ။

[၃၆၇] ၇။ သာဠိယဇာတကဝဏ္ဏနာ

ယွာယံ သာဠိယဆာပေါတီတိ ဣဒံ သတ္ထာ ဝေဠုဝနေ ဝိဟရန္တော ‘‘အာဝုသော၊ ဒေဝဒတ္တော တာသကာရကောပိ ဘဝိတုံ နာသက္ခီ’’တိ ဝစနံ အာရဗ္ဘ ကထေသိ။ တဒါ ဟိ သတ္ထာ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပေသ မမ တာသကာရကောပိ ဘဝိတုံ နာသက္ခီ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဂါမကေ ကုဋုမ္ဗိကကုလေ နိဗ္ဗတ္တိတွာ တရုဏကာလေ ပံသုကီဠကေဟိ ဒါရကေဟိ သဒ္ဓိံ ဂါမဒွါရေ နိဂြောဓရုက္ခမူလေ ကီဠတိ။ တဒါ ဧကော ဒုဗ္ဗလဝေဇ္ဇော ဂါမေ ကိဉ္စိ အလဘိတွာ နိက္ခမန္တော တံ ဌာနံ ပတွာ ဧကံ သပ္ပံ ဝိဋပဗ္ဘန္တရေန သီသံ နီဟရိတွာ နိဒ္ဒါယန္တံ ဒိသွာ ‘‘မယာ ဂါမေ ကိဉ္စိ န လဒ္ဓံ၊ ဣမေ ဒါရကေ ဝဉ္စေတွာ သပ္ပေန ဍံသာပေတွာ တိကိစ္ဆိတွာ ကိဉ္စိဒေဝ ဂဏှိဿာမီ’’တိ စိန္တေတွာ ဗောဓိသတ္တံ အာဟ ‘‘သစေ သာဠိယဆာပံ ပဿေယျာသိ၊ ဂဏှေယျာသီ’’တိ။ ‘‘အာမ၊ ဂဏှေယျ’’န္တိ ။ ‘‘ပဿေသော ဝိဋပဗ္ဘန္တရေ သယိတော’’တိ။ သော တဿ သပ္ပဘာဝံ အဇာနန္တော ရုက္ခံ အာရုယှ တံ ဂီဝါယံ ဂဟေတွာ ‘‘သပ္ပော’’တိ ဉတွာ နိဝတ္တိတုံ အဒေန္တော သုဂ္ဂဟိတံ ဂဟေတွာ ဝေဂေန ခိပိ။ သော ဂန္တွာ ဝေဇ္ဇဿ ဂီဝါယံ ပတိတော ဂီဝံ ပလိဝေဌေတွာ ‘‘ကရ ကရာ’’တိ ဍံသိတွာ တတ္ထေဝ နံ ပါတေတွာ ပလာယိ။ မနုဿာ ပရိဝါရယိံသု။

မဟာသတ္တော သမ္ပတ္တပရိသာယ ဓမ္မံ ဒေသေန္တော ဣမာ ဂါထာ အဘာသိ –

၉၀။

‘‘ယွာယံ သာဠိယဆာပေါတိ၊ ကဏှသပ္ပံ အဂါဟယိ၊

တေန သပ္ပေနယံ ဒဋ္ဌော၊ ဟတော ပါပါနုသာသကော။

၉၁။

‘‘အဟန္တာရမဟန္တာရံ၊ ယော နရော ဟန္တုမိစ္ဆတိ၊

ဧဝံ သော နိဟတော သေတိ၊ ယထာယံ ပုရိသော ဟတော။

၉၂။

‘‘အဟန္တာရမဃာတေန္တံ ၊ ယော နရော ဟန္တုမိစ္ဆတိ၊

ဧဝံ သော နိဟတော သေတိ၊ ယထာယံ ပုရိသော ဟတော။

၉၃။

‘‘ယထာ ပံသုမုဋ္ဌိံ ပုရိသော၊ ပဋိဝါတံ ပဋိက္ခိပေ၊

တမေဝ သော ရဇော ဟန္တိ၊ တထာယံ ပုရိသော ဟတော။

၉၄။

‘‘ယော အပ္ပဒုဋ္ဌဿ နရဿ ဒုဿတိ၊ သုဒ္ဓဿ ပေါသဿ အနင်္ဂဏဿ၊

တမေဝ ဗာလံ ပစ္စေတိ ပါပံ၊ သုခုမော ရဇော ပဋိဝါတံဝ ခိတ္တော’’တိ။

တတ္ထ ယွာယန္တိ ယော အယံ၊ အယမေဝ ဝါ ပါဌော။ သပ္ပေနယန္တိ သော အယံ တေန သပ္ပေန ဒဋ္ဌော။ ပါပါနုသာသကောတိ ပါပကံ အနုသာသကော။

အဟန္တာရန္တိ အပဟရန္တံ။ အဟန္တာရန္တိ အမာရေန္တံ။ သေတီတိ မတသယနံ သယတိ။ အဃာတေန္တန္တိ အမာရေန္တံ။ သုဒ္ဓဿာတိ နိရပရာဓဿ။ ပေါသဿာတိ သတ္တဿ။ အနင်္ဂဏဿာတိ ဣဒမ္ပိ နိရပရာဓဘာဝညေဝ သန္ဓာယ ဝုတ္တံ။ ပစ္စေတီတိ ကမ္မသရိက္ခကံ ဟုတွာ ပတိဧတိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဒုဗ္ဗလဝေဇ္ဇော ဒေဝဒတ္တော အဟောသိ၊ ပဏ္ဍိတဒါရကော ပန အဟမေဝ အဟောသိ’’န္တိ။

သာဠိယဇာတကဝဏ္ဏနာ သတ္တမာ။

[၃၆၈] ၈။ တစသာရဇာတကဝဏ္ဏနာ

အမိတ္တဟတ္ထတ္ထဂတာတိ ဣဒံ သတ္ထာ ဇေတဝနေ ဝိဟရန္တော ပညာပါရမိံ အာရဗ္ဘ ကထေသိ။ တဒါ ဟိ သတ္ထာ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပိ တထာဂတော ပညဝါ ဥပါယကုသလောယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဂါမကေ ကုဋုမ္ဗိကကုလေ နိဗ္ဗတ္တိတွာတိ သဗ္ဗံ ပုရိမဇာတကနိယာမေနေဝ ကထေတဗ္ဗံ။ ဣဓ ပန ဝေဇ္ဇေ မတေ ဂါမဝါသိနော မနုဿာ ‘‘မနုဿမာရကာ’’တိ တေ ဒါရကေ ကုဒဏ္ဍကေဟိ ဗန္ဓိတွာ ‘‘ရညော ဒဿေဿာမာ’’တိ ဗာရာဏသိံ နယိံသု။ ဗောဓိသတ္တော အန္တရာမဂ္ဂေယေဝ သေသဒါရကာနံ ဩဝါဒံ အဒါသိ ‘‘တုမှေ မာ ဘာယထ၊ ရာဇာနံ ဒိသွာပိ အဘီတာ တုဋ္ဌိန္ဒြိယာ ဘဝေယျာထ၊ ရာဇာ အမှေဟိ သဒ္ဓိံ ပဌမတရံ ကထေဿတိ၊ တတော ပဋ္ဌာယ အဟံ ဇာနိဿာမီ’’တိ။ တေ ‘‘သာဓူ’’တိ သမ္ပဋိစ္ဆိတွာ တထာ ကရိံသု။ ရာဇာ တေ အဘီတေ တုဋ္ဌိန္ဒြိယေ ဒိသွာ ‘‘ဣမေ ‘မနုဿမာရကာ’တိ ကုဒဏ္ဍကဗဒ္ဓါ အာနီတာ၊ ဧဝရူပံ ဒုက္ခံ ပတ္တာပိ န ဘာယန္တိ၊ တုဋ္ဌိန္ဒြိယာယေဝ၊ ကိံ နု ခေါ ဧတေသံ အသောစနကာရဏံ၊ ပုစ္ဆိဿာမိ နေ’’တိ ပုစ္ဆန္တော ပဌမံ ဂါထမာဟ –

၉၅။

‘‘အမိတ္တဟတ္ထတ္ထဂတာ၊ တစသာရသမပ္ပိတာ၊

ပသန္နမုခဝဏ္ဏာတ္ထ၊ ကသ္မာ တုမှေ န သောစထာ’’တိ။

တတ္ထ အမိတ္တဟတ္ထတ္ထဂတာတိ ကုဒဏ္ဍကေဟိ ဂီဝါယံ ဗန္ဓိတွာ အာနေန္တာနံ အမိတ္တာနံ ဟတ္ထဂတာ။ တစသာရသမပ္ပိတာတိ ဝေဠုဒဏ္ဍကေဟိ ဗဒ္ဓတ္တာ ဧဝမာဟ။ ကသ္မာတိ ‘‘ဧဝရူပံ ဗျသနံ ပတ္တာပိ တုမှေ ကိံကာရဏာ န သောစထာ’’တိ ပုစ္ဆတိ။

တံ သုတွာ ဗောဓိသတ္တော သေသဂါထာ အဘာသိ –

၉၆။

‘‘န သောစနာယ ပရိဒေဝနာယ၊ အတ္ထောဝ လဗ္ဘော အပိ အပ္ပကောပိ၊

သောစန္တမေနံ ဒုခိတံ ဝိဒိတွာ၊ ပစ္စတ္ထိကာ အတ္တမနာ ဘဝန္တိ။

၉၇။

‘‘ယတော စ ခေါ ပဏ္ဍိတော အာပဒါသု၊ န ဝေဓတီ အတ္ထဝိနိစ္ဆယညူ၊

ပစ္စတ္ထိကာဿ ဒုခိတာ ဘဝန္တိ၊ ဒိသွာ မုခံ အဝိကာရံ ပုရာဏံ။

၉၈။

‘‘ဇပ္ပေန မန္တေန သုဘာသိတေန၊ အနုပ္ပဒါနေန ပဝေဏိယာ ဝါ၊

ယထာ ယထာ ယတ္ထ လဘေထ အတ္ထံ၊ တထာ တထာ တတ္ထ ပရက္ကမေယျ။

၉၉။

‘‘ယတော စ ဇာနေယျ အလဗ္ဘနေယျော၊ မယာဝ အညေန ဝါ ဧသ အတ္ထော၊

အသောစမာနော အဓိဝါသယေယျ၊ ကမ္မံ ဒဠှံ ကိန္တိ ကရောမိ ဒါနီ’’တိ။

တတ္ထ အတ္ထောတိ ဝုဍ္ဎိ။ ပစ္စတ္ထိကာ အတ္တမနာတိ ဧတံ ပုရိသံ သောစန္တံ ဒုက္ခိတံ ဝိဒိတွာ ပစ္စာမိတ္တာ တုဋ္ဌစိတ္တာ ဟောန္တိ။ တေသံ တုဿနကာရဏံ နာမ ပဏ္ဍိတေန ကာတုံ န ဝဋ္ဋတီတိ ဒီပေတိ ။ ယတောတိ ယဒါ။ န ဝေဓတီတိ စိတ္တုတြာသဘယေန န ကမ္ပတိ။ အတ္ထဝိနိစ္ဆယညူတိ တဿ တဿ အတ္ထဿ ဝိနိစ္ဆယကုသလော။

ဇပ္ပေနာတိ မန္တပရိဇပ္ပနေန။ မန္တေနာတိ ပဏ္ဍိတေဟိ သဒ္ဓိံ မန္တဂ္ဂဟဏေန။ သုဘာသိတေနာတိ ပိယဝစနေန။ အနုပ္ပဒါနေနာတိ လဉ္ဇဒါနေန။ ပဝေဏိယာတိ ကုလဝံသေန။ ဣဒံ ဝုတ္တံ ဟောတိ – မဟာရာဇ၊ ပဏ္ဍိတေန နာမ အာပဒါသု ဥပ္ပန္နာသု န သောစိတဗ္ဗံ န ကိလမိတဗ္ဗံ၊ ဣမေသု ပန ပဉ္စသု ကာရဏေသု အညတရဝသေန ပစ္စာမိတ္တာ ဇိနိတဗ္ဗာ။ သစေ ဟိ သက္ကောတိ၊ မန္တံ ပရိဇပ္ပိတွာ မုခဗန္ဓနံ ကတွာပိ တေ ဇိနိတဗ္ဗာ၊ တထာ အသက္ကောန္တေန ပဏ္ဍိတေဟိ သဒ္ဓိံ မန္တေတွာ ဧကံ ဥပါယံ သလ္လက္ခေတွာ ဇိနိတဗ္ဗာ၊ ပိယဝစနံ ဝတ္တုံ သက္ကောန္တေန ပိယံ ဝတွာပိ တေ ဇိနိတဗ္ဗာ၊ တထာ အသက္ကောန္တေန ဝိနိစ္ဆယာမစ္စာနံ လဉ္ဇံ ဒတွာပိ ဇိနိတဗ္ဗာ၊ တထာ အသက္ကောန္တေန ကုလဝံသံ ကထေတွာ ‘‘မယံ အသုကပဝေဏိယာ အာဂတာ၊ တုမှာကဉ္စ အမှာကဉ္စ ဧကောဝ ပုဗ္ဗပုရိသော’’တိ ဧဝံ ဝိဇ္ဇမာနဉာတိကောဋိံ ဃဋေတွာပိ ဇိနိတဗ္ဗာ ဧဝါတိ။ ယထာ ယထာတိ ဧတေသု ပဉ္စသု ကာရဏေသု ယေန ယေန ကာရဏေန ယတ္ထ ယတ္ထ အတ္တနော ဝုဍ္ဎိံ လဘေယျ။ တထာ တထာတိ တေန တေန ကာရဏေန တတ္ထ တတ္ထ ပရက္ကမေယျ၊ ပရက္ကမံ ကတွာ ပစ္စတ္ထိကေ ဇိနေယျာတိ အဓိပ္ပာယော။

ယတော စ ဇာနေယျာတိ ယဒါ ပန ဇာနေယျ၊ မယာ ဝါ အညေန ဝါ ဧသ အတ္ထော အလဗ္ဘနေယျော နာနပ္ပကာရေန ဝါယမိတွာပိ န သက္ကာ လဒ္ဓုံ၊ တဒါ ပဏ္ဍိတော ပုရိသော အသောစမာနော အကိလမမာနော ‘‘မယာ ပုဗ္ဗေ ကတကမ္မံ ဒဠှံ ထိရံ န သက္ကာ ပဋိဗာဟိတုံ၊ ဣဒါနိ ကိံ သက္ကာ ကာတု’’န္တိ အဓိဝါသယေယျာတိ။

ရာဇာ ဗောဓိသတ္တဿ ဓမ္မကထံ သုတွာ ကမ္မံ သောဓေတွာ နိဒ္ဒေါသဘာဝံ ဉတွာ ကုဒဏ္ဍကေ ဟရာပေတွာ မဟာသတ္တဿ မဟန္တံ ယသံ ဒတွာ အတ္တနော အတ္ထဓမ္မအနုသာသကံ အမစ္စရတနံ အကာသိ၊ သေသဒါရကာနမ္ပိ ယသံ ဒတွာ ဌာနန္တရာနိ အဒါသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ ‘‘တဒါ ဗာရာဏသိရာဇာ အာနန္ဒော အဟောသိ၊ ဒါရကာ ထေရာနုထေရာ၊ ပဏ္ဍိတဒါရကော ပန အဟမေဝ အဟောသိ’’န္တိ။

တစသာရဇာတကဝဏ္ဏနာ အဋ္ဌမာ။

[၃၆၉] ၉။ မိတ္တဝိန္ဒကဇာတကဝဏ္ဏနာ

ကျာဟံဒေဝါနမကရန္တိ ဣဒံ သတ္ထာ ဇေတဝနေ ဝိဟရန္တော ဧကံ ဒုဗ္ဗစဘိက္ခုံ အာရဗ္ဘ ကထေသိ။ ဝတ္ထု မဟာမိတ္တဝိန္ဒကဇာတကေ (ဇာ။ ၁။၅။၁၀၀ အာဒယော) အာဝိ ဘဝိဿတိ။ အယံ ပန မိတ္တဝိန္ဒကော သမုဒ္ဒေ ခိတ္တော အတြိစ္ဆော ဟုတွာ ပုရတော ဂန္တွာ နေရယိကသတ္တာနံ ပစ္စနဋ္ဌာနံ ဥဿဒနိရယံ ဒိသွာ ‘‘ဧကံ နဂရ’’န္တိ သညာယ ပဝိသိတွာ ခုရစက္ကံ အဿာဒေသိ။ တဒါ ဗောဓိသတ္တော ဒေဝပုတ္တော ဟုတွာ ဥဿဒနိရယစာရိကံ စရတိ။ သော တံ ဒိသွာ ပုစ္ဆန္တော ပဌမံ ဂါထမာဟ –

၁၀၀။

‘‘ကျာဟံ ဒေဝါနမကရံ၊ ကိံ ပါပံ ပကတံ မယာ၊

ယံ မေ သိရသ္မိံ ဩဟစ္စ၊ စက္ကံ ဘမတိ မတ္ထကေ’’တိ။

တတ္ထ ကျာဟံ ဒေဝါနမကရန္တိ သာမိ ဒေဝပုတ္တ၊ ကိံ နာမ အဟံ ဒေဝါနံ အကရိံ၊ ကိံ မံ ဒေဝါ ပေါထေန္တီတိ။ ကိံ ပါပံ ပကတံ မယာတိ ဒုက္ခမဟန္တတာယ ဝေဒနာပ္ပတ္တော အတ္တနာ ကတံ ပါပံ အသလ္လက္ခေန္တော ဧဝမာဟ။ ယံ မေတိ ယေန ပါပေန မမ သိရသ္မိံ ဩဟစ္စ ဩဟနိတွာ ဣဒံ ခုရစက္ကံ မမ မတ္ထကေ ဘမတိ၊ တံ ကိံ နာမာတိ?

တံ သုတွာ ဗောဓိသတ္တော ဒုတိယံ ဂါထမာဟ –

၁၀၁။

‘‘အတိက္ကမ္မ ရမဏကံ၊ သဒါမတ္တဉ္စ ဒူဘကံ၊

ဗြဟ္မတ္တရဉ္စ ပါသာဒံ၊ ကေနတ္ထေန ဣဓာဂတော’’တိ။

တတ္ထ ရမဏကန္တိ ဖလိကပါသာဒံ။ သဒါမတ္တန္တိ ရဇတပါသာဒံ။ ဒူဘကန္တိ မဏိပါသာဒံ။ ဗြဟ္မတ္တရဉ္စ ပါသာဒန္တိ သုဝဏ္ဏပါသာဒဉ္စ။ ကေနတ္ထေနာတိ တွံ ဧတေသု ရမဏကာဒီသု စတဿော အဋ္ဌ သောဠသ ဒွတ္တိံသာတိ ဧတာ ဒေဝဓီတရော ပဟာယ တေ ပါသာဒေ အတိက္ကမိတွာ ကေန ကာရဏေန ဣဓ အာဂတောတိ။

တတော မိတ္တဝိန္ဒကော တတိယံ ဂါထမာဟ –

၁၀၂။

‘‘ဣတော ဗဟုတရာ ဘောဂါ၊ အတြ မညေ ဘဝိဿရေ၊

ဣတိ ဧတာယ သညာယ၊ ပဿ မံ ဗျသနံ ဂတ’’န္တိ။

တတ္ထ ဣတော ဗဟုတရာတိ ဣမေသု စတူသု ပါသာဒေသု ဘောဂေဟိ အတိရေကတရာ ဘဝိဿန္တိ။

တတော ဗောဓိသတ္တော သေသဂါထာ အဘာသိ –

၁၀၃။

‘‘စတုဗ္ဘိ အဋ္ဌဇ္ဈဂမာ၊ အဋ္ဌာဟိပိ စ သောဠသ၊

သောဠသာဟိ စ ဗာတ္တိံသ၊ အတြိစ္ဆံ စက္ကမာသဒေါ၊

ဣစ္ဆာဟတဿ ပေါသဿ၊ စက္ကံ ဘမတိ မတ္ထကေ။

၁၀၄။

‘‘ဥပရိဝိသာလာ ဒုပ္ပူရာ၊ ဣစ္ဆာ ဝိသဋဂါမိနီ၊

ယေ စ တံ အနုဂိဇ္ဈန္တိ၊ တေ ဟောန္တိ စက္ကဓာရိနော’’တိ။

တတ္ထ ဥပရိဝိသာလာတိ မိတ္တဝိန္ဒက တဏှာ နာမေသာ အာသေဝိယမာနာ ဥပရိဝိသာလာ ဟောတိ ပတ္ထဋာ၊ မဟာသမုဒ္ဒေါ ဝိယ ဒုပ္ပူရာ၊ ရူပါဒီသု အာရမ္မဏေသု တံ တံ အာရမ္မဏံ ဣစ္ဆမာနာယ ဣစ္ဆာယ ပတ္ထဋာယ ဝိသဋဂါမိနီ၊ တသ္မာ ယေ ပုရိသာ တံ ဧဝရူပံ တဏှံ အနုဂိဇ္ဈန္တိ၊ ပုနပ္ပုနံ ဂိဒ္ဓါ ဟုတွာ ဂဏှန္တိ။ တေ ဟောန္တိ စက္ကဓာရိနောတိ တေ ဧတံ ခုရစက္ကံ ဓာရေန္တီတိ ဝဒတိ။

မိတ္တဝိန္ဒကံ ပန ကထေန္တမေဝ နိပိသမာနံ တံ ခုရစက္ကံ ဘဿိ၊ တေန သော ပုန ကထေတုံ နာသက္ခိ။ ဒေဝပုတ္တော အတ္တနော ဒေဝဋ္ဌာနမေဝ ဂတော။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ မိတ္တဝိန္ဒကော ဒုဗ္ဗစဘိက္ခု အဟောသိ၊ ဒေဝပုတ္တော ပန အဟမေဝ အဟောသိ’’န္တိ။

မိတ္တဝိန္ဒကဇာတကဝဏ္ဏနာ နဝမာ။

[၃၇၀] ၁၀။ ပလာသဇာတကဝဏ္ဏနာ

ဟံသော ပလာသမဝစာတိ ဣဒံ သတ္ထာ ဇေတဝနေ ဝိဟရန္တော ကိလေသနိဂ္ဂဟံ အာရဗ္ဘ ကထေသိ။ ဝတ္ထု ပညာသဇာတကေ အာဝိ ဘဝိဿတိ။ ဣဓ ပန သတ္ထာ ဘိက္ခူ အာမန္တေတွာ ‘‘ဘိက္ခဝေ၊ ကိလေသော နာမ အာသင်္ကိတဗ္ဗောဝ၊ အပ္ပမတ္တကော သမာနောပိ နိဂြောဓဂစ္ဆော ဝိယ ဝိနာသံ ပါပေတိ၊ ပေါရာဏကပဏ္ဍိတာပိ အာသင်္ကိတဗ္ဗံ အာသင်္ကိံသုယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော သုဝဏ္ဏဟံသယောနိယံ နိဗ္ဗတ္တိတွာ ဝယပ္ပတ္တော စိတ္တကူဋပဗ္ဗတေ သုဝဏ္ဏဂုဟာယံ ဝသန္တော ဟိမဝန္တပဒေသေ ဇာတဿရေ သယံဇာတသာလိံ ခါဒိတွာ အာဂစ္ဆတိ။ တဿ ဂမနာဂမနမဂ္ဂေ မဟာပလာသရုက္ခော အဟောသိ။ သော ဂစ္ဆန္တောပိ တတ္ထ ဝိဿမိတွာ ဂစ္ဆတိ၊ အာဂစ္ဆန္တောပိ တတ္ထ ဝိဿမိတွာ အာဂစ္ဆတိ ။ အထဿ တသ္မိံ ရုက္ခေ နိဗ္ဗတ္တဒေဝတာယ သဒ္ဓိံ ဝိဿာသော အဟောသိ။ အပရဘာဂေ ဧကာ သကုဏိကာ ဧကသ္မိံ နိဂြောဓရုက္ခေ နိဂြောဓပက္ကံ ခါဒိတွာ အာဂန္တွာ တသ္မိံ ပလာသရုက္ခေ နိသီဒိတွာ ဝိဋပန္တရေ ဝစ္စံ ပါတေသိ။ တတ္ထ နိဂြောဓဂစ္ဆော ဇာတော၊ သော စတုရင်္ဂုလမတ္တကာလေ ရတ္တင်္ကုရပလာသတာယ သောဘတိ။ ဟံသရာဇာ တံ ဒိသွာ ရုက္ခဒေဝတံ အာမန္တေတွာ ‘‘သမ္မ ပလာသ၊ နိဂြောဓော နာမ ယမှိ ရုက္ခေ ဇာယတိ၊ ဝဍ္ဎန္တော တံ နာသေတိ၊ ဣမဿ ဝဍ္ဎိတုံ မာ ဒေတိ၊ ဝိမာနံ တေ နာသေဿတိ၊ ပဋိကစ္စေဝ နံ ဥဒ္ဓရိတွာ ဆဍ္ဍေဟိ၊ အာသင်္ကိတဗ္ဗယုတ္တကံ နာမ အာသင်္ကိတုံ ဝဋ္ဋတီ’’တိ ပလာသဒေဝတာယ သဒ္ဓိံ မန္တေန္တော ပဌမံ ဂါထမာဟ –

၁၀၅။

‘‘ဟံသော ပလာသမဝစ၊ နိဂြောဓော သမ္မ ဇာယတိ၊

အင်္ကသ္မိံ တေ နိသိန္နောဝ၊ သော တေ မမ္မာနိ ဆေစ္ဆတီ’’တိ။

ပဌမပါဒေါ ပနေတ္ထ အဘိသမ္ဗုဒ္ဓေန ဟုတွာ သတ္ထာရာ ဝုတ္တော။ ပလာသန္တိ ပလာသဒေဝတံ။ သမ္မာတိ ဝယဿ။ အင်္ကသ္မိန္တိ ဝိဋဘိယံ။ သော တေ မမ္မာနိ ဆေစ္ဆတီတိ သော တေ အင်္ကေ သံဝဍ္ဎော သပတ္တော ဝိယ ဇီဝိတံ ဆိန္ဒိဿတီတိ အတ္ထော။ ဇီဝိတသင်္ခါရာ ဟိ ဣဓ ‘‘မမ္မာနီ’’တိ ဝုတ္တာ။

တံ သုတွာ တဿ ဝစနံ အဂဏှန္တီ ပလာသဒေဝတာ ဒုတိယံ ဂါထမာဟ –

၁၀၆။

‘‘ဝဍ္ဎတာမေဝ နိဂြောဓော၊ ပတိဋ္ဌဿ ဘဝါမဟံ၊

ယထာ ပိတာ စ မာတာ စ၊ ဧဝံ မေ သော ဘဝိဿတီ’’တိ။

တဿတ္ထော – သမ္မ၊ န တွံ ဇာနာသိ ဝဍ္ဎတမေဝ ဧသ၊ အဟမဿ ယထာ ဗာလကာလေ ပုတ္တာနံ မာတာပိတရော ပတိဋ္ဌာ ဟောန္တိ၊ တထာ ဘဝိဿာမိ၊ ယထာ ပန သံဝဍ္ဎာ ပုတ္တာ ပစ္ဆာ မဟလ္လကကာလေ မာတာပိတူနံ ပတိဋ္ဌာ ဟောန္တိ၊ မယှမ္ပိ ပစ္ဆာ မဟလ္လကကာလေ ဧဝမေဝ သော ပတိဋ္ဌော ဘဝိဿတီတိ။

တတော ဟံသော တတိယံ ဂါထမာဟ –

၁၀၇။

‘‘ယံ တွံ အင်္ကသ္မိံ ဝဍ္ဎေသိ၊ ခီရရုက္ခံ ဘယာနကံ၊

အာမန္တ ခေါ တံ ဂစ္ဆာမ၊ ဝုဍ္ဎိ မဿ န ရုစ္စတီ’’တိ။

တတ္ထ ယံ တွန္တိ ယသ္မာ တွံ ဧတဉ္စ ဘယဒါယကတ္တေန ဘယာနကံ ခီရရုက္ခံ သပတ္တံ ဝိယ အင်္ကေ ဝဍ္ဎေသိ။ အာမန္တ ခေါ တန္တိ တသ္မာ မယံ တံ အာမန္တေတွာ ဇာနာပေတွာ ဂစ္ဆာမ။ ဝုဍ္ဎိ မဿာတိ အဿ ဝုဍ္ဎိ မယှံ န ရုစ္စတီတိ။

ဧဝဉ္စ ပန ဝတွာ ဟံသရာဇာ ပက္ခေ ပသာရေတွာ စိတ္တကူဋပဗ္ဗတမေဝ ဂတော။ တတော ပဋ္ဌာယ ပုန နာဂစ္ဆိ။ အပရဘာဂေ နိဂြောဓော ဝဍ္ဎိံ၊ တသ္မိံ ဧကာ ရုက္ခဒေဝတာပိ နိဗ္ဗတ္တိ။ သော ဝဍ္ဎန္တော ပလာသံ ဘဉ္ဇိ၊ သာခါဟိ သဒ္ဓိံယေဝ ဒေဝတာယ ဝိမာနံ ပတိ။ သာ တသ္မိံ ကာလေ ဟံသရညော ဝစနံ သလ္လက္ခေတွာ ‘‘ဣဒံ အနာဂတဘယံ ဒိသွာ ဟံသရာဇာ ကထေသိ ၊ အဟံ ပနဿ ဝစနံ နာကာသိ’’န္တိ ပရိဒေဝမာနာ စတုတ္ထံ ဂါထမာဟ –

၁၀၈။

‘‘ဣဒါနိ ခေါ မံ ဘာယေတိ၊ မဟာနေရုနိဒဿနံ၊

ဟံသဿ အနဘိညာယ၊ မဟာ မေ ဘယမာဂတ’’န္တိ။

တတ္ထ ဣဒါနိ ခေါ မံ ဘာယေတီတိ အယံ နိဂြောဓော တရုဏကာလေ တောသေတွာ ဣဒါနိ မံ ဘာယာပေတိ သန္တာသေတိ။ မဟာနေရုနိဒဿနန္တိ သိနေရုပဗ္ဗတသဒိသံ မဟန္တံ ဟံသရာဇဿ ဝစနံ သုတွာ အဇာနိတွာ တရုဏကာလေယေဝ ဧတဿ အနုဒ္ဓဋတ္တာ။ မဟာ မေ ဘယမာဂတန္တိ ဣဒါနိ မယှံ မဟန္တံ ဘယံ အာဂတန္တိ ပရိဒေဝိ။

နိဂြောဓောပိ ဝဍ္ဎန္တော သဗ္ဗံ ပလာသံ ဘဉ္ဇိတွာ ခါဏုကမတ္တမေဝ အကာသိ။ ဒေဝတာယ ဝိမာနံ သဗ္ဗံ အန္တရဓာယိ။

၁၀၉။

‘‘န တဿ ဝုဍ္ဎိ ကုသလပ္ပသတ္ထာ၊ ယော ဝဍ္ဎမာနော ဃသတေ ပတိဋ္ဌံ၊

တဿူပရောဓံ ပရိသင်္ကမာနော၊ ပတာရယီ မူလဝဓာယ ဓီရော’’တိ။ –

ပဉ္စမာ အဘိသမ္ဗုဒ္ဓဂါထာ။

တတ္ထ ကုသလပ္ပသတ္ထာတိ ကုသလေဟိ ပသတ္ထာ။ ဃသတေတိ ခါဒတိ၊ ဝိနာသေတီတိ အတ္ထော။ ပတာရယီတိ ပတရတိ ဝါယမတိ။ ဣဒံ ဝုတ္တံ ဟောတိ – ဘိက္ခဝေ၊ ယော ဝဍ္ဎမာနော အတ္တနော ပတိဋ္ဌံ နာသေတိ၊ တဿ ဝုဍ္ဎိ ပဏ္ဍိတေဟိ န ပသတ္ထာ၊ တဿ ပန အဗ္ဘန္တရဿ ဝါ ဗာဟိရဿ ဝါ ပရိဿယဿ ‘‘ဣတော မေ ဥပရောဓော ဘဝိဿတီ’’တိ ဧဝံ ဥပရောဓံ ဝိနာသံ ပရိသင်္ကမာနော ဝီရော ဉာဏသမ္ပန္နော မူလဝဓာယ ပရက္ကမတီတိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ပဉ္စသတာ ဘိက္ခူ အရဟတ္တံ ပါပုဏိံသု။ တဒါ သုဝဏ္ဏဟံသော အဟမေဝ အဟောသိန္တိ။

ပလာသဇာတကဝဏ္ဏနာ ဒသမာ။

ဝဏ္ဏာရောဟဝဂ္ဂေါ ဒုတိယော။

၃။ အဍ္ဎဝဂ္ဂေါ

[၃၇၁] ၁။ ဒီဃီတိကောသလဇာတကဝဏ္ဏနာ

ဧဝံဘူတဿတေ ရာဇာတိ ဣဒံ သတ္ထာ ဇေတဝနေ ဝိဟရန္တော ကောသမ္ဗကေ ဘဏ္ဍနကာရကေ အာရဗ္ဘ ကထေသိ။ တေသဉှိ ဇေတဝနံ အာဂန္တွာ ခမာပနကာလေ သတ္ထာ တေ အာမန္တေတွာ ‘‘ဘိက္ခဝေ၊ တုမှေ မယှံ ဩရသာ မုခတော ဇာတာ ပုတ္တာ နာမ၊ ပုတ္တေဟိ စ ပိတရာ ဒိန္နံ ဩဝါဒံ ဘိန္ဒိတုံ န ဝဋ္ဋတိ၊ တုမှေ ပန မမ ဩဝါဒံ န ကရိတ္ထ၊ ပေါရာဏကပဏ္ဍိတာ အတ္တနော မာတာပိတရော ဃာတေတွာ ရဇ္ဇံ ဂဟေတွာ ဌိတစောရေပိ အရညေ ဟတ္ထပထံ အာဂတေ မာတာပိတူဟိ ဒိန္နံ ဩဝါဒံ န ဘိန္ဒိဿာမာတိ န မာရယိံသူ’’တိ ဝတွာ အတီတံ အာဟရိ။

ဣမသ္မိံ ပန ဇာတကေ ဒွေပိ ဝတ္ထူနိ။ သင်္ဃဘေဒကက္ခန္ဓကေ ဝိတ္ထာရတော အာဝိ ဘဝိဿန္တိ။ သော ပန ဒီဃာဝုကုမာရော အရညေ အတ္တနော အင်္ကေ နိပန္နံ ဗာရာဏသိရာဇာနံ စူဠာယ ဂဟေတွာ ‘‘ဣဒါနိ မယှံ မာတာပိတုဃာတကံ စောရံ ခဏ္ဍာခဏ္ဍံ ကတွာ ဆိန္ဒိဿာမီ’’တိ အသိံ ဥက္ခိပန္တော တသ္မိံ ခဏေ မာတာပိတူဟိ ဒိန္နံ ဩဝါဒံ သရိတွာ ‘‘ဇီဝိတံ စဇန္တောပိ တေသံ ဩဝါဒံ န ဘိန္ဒိဿာမိ၊ ကေဝလံ ဣမံ တဇ္ဇေဿာမီ’’တိ စိန္တေတွာ ပဌမံ ဂါထမာဟ –

၁၁၀။

‘‘ဧဝံဘူတဿ တေ ရာဇ၊ အာဂတဿ ဝသေ မမ၊

အတ္ထိ နု ကောစိ ပရိယာယော၊ ယော တံ ဒုက္ခာ ပမောစယေ’’တိ။

တတ္ထ ဝသေ မမာတိ မမ ဝသံ အာဂတဿ။ ပရိယာယောတိ ကာရဏံ။

တတော ရာဇာ ဒုတိယံ ဂါထမာဟ –

၁၁၁။

‘‘ဧဝံဘူတဿ မေ တာတ၊ အာဂတဿ ဝသေ တဝ၊

နတ္ထိ နော ကောစိ ပရိယာယော၊ ယော မံ ဒုက္ခာ ပမောစယေ’’တိ။

တတ္ထ နောတိ နိပါတမတ္ထံ၊ နတ္ထိ ကောစိ ပရိယာယော၊ ယော မံ ဧတသ္မာ ဒုက္ခာ ပမောစယေတိ အတ္ထော။

တတော ဗောဓိသတ္တော အဝသေသဂါထာ အဘာသိ –

၁၁၂။

‘‘နာညံ သုစရိတံ ရာဇ၊ နာညံ ရာဇ သုဘာသိတံ၊

တာယတေ မရဏကာလေ၊ ဧဝမေဝိတရံ ဓနံ။

၁၁၃။

‘‘အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ၊

ယေ စ တံ ဥပနယှန္တိ၊ ဝေရံ တေသံ န သမ္မတိ။

၁၁၄။

‘‘အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ၊

ယေ စ တံ နုပနယှန္တိ၊ ဝေရံ တေသူပသမ္မတိ။

၁၁၅။

‘‘န ဟိ ဝေရေန ဝေရာနိ၊ သမ္မန္တီဓ ကုဒါစနံ၊

အဝေရေန စ သမ္မန္တိ၊ ဧသ ဓမ္မော သနန္တနော’’န္တိ။

တတ္ထ နာညံ သုစရိတန္တိ နာညံ သုစရိတာ၊ အယမေဝ ဝါ ပါဌော၊ ဌပေတွာ သုစရိတံ အညံ န ပဿာမီတိ အတ္ထော။ ဣဓ ‘‘သုစရိတ’’န္တိပိ ‘‘သုဘာသိတ’’န္တိပိ မာတာပိတူဟိ ဒိန္နံ ဩဝါဒံယေဝ သန္ဓာယာဟ။ ဧဝမေဝါတိ နိရတ္ထကမေဝ။ ဣဒံ ဝုတ္တံ ဟောတိ – မဟာရာဇ၊ အညတြ ဩဝါဒါနုသိဋ္ဌိသင်္ခါတာ သုစရိတသုဘာသိတာ မရဏကာလေ တာယိတုံ ရက္ခိတုံ သမတ္ထော နာမ အညော နတ္ထိ၊ ယံ ဧတံ ဣတရံ ဓနံ၊ တံ ဧဝမေဝ နိရတ္ထကမေဝ ဟောတိ၊ တွဉှိ ဣဒါနိ မယှံ ကောဋိသတသဟဿမတ္တမ္ပိ ဓနံ ဒဒန္တော ဇီဝိတံ န လဘေယျာသိ၊ တသ္မာ ဝေဒိတဗ္ဗမေတံ ‘‘ဓနတော သုစရိတသုဘာသိတမေဝ ဥတ္တရိတရ’’န္တိ။

သေသဂါထာသုပိ အယံ သင်္ခေပတ္ထော – မဟာရာဇ၊ ယေ ပုရိသာ ‘‘အယံ မံ အက္ကောသိ၊ အယံ မံ ပဟရိ၊ အယံ မံ အဇိနိ၊ အယံ မမ သန္တကံ အဟာသီ’’တိ ဧဝံ ဝေရံ ဥပနယှန္တိ ဗန္ဓိတွာ ဝိယ ဟဒယေ ဌပေန္တိ၊ တေသံ ဝေရံ န ဥပသမ္မတိ။ ယေ စ ပနေတံ န ဥပနယှန္တိ ဟဒယေ န ဌပေန္တိ၊ တေသံ ဝူပသမ္မတိ။ ဝေရာနိ ဟိ န ကဒါစိ ဝေရေန သမ္မန္တိ၊ အဝေရေနေဝ ပန သမ္မန္တိ။ ဧသ ဓမ္မော သနန္တနောတိ ဧသော ပေါရာဏကော ဓမ္မော စိရကာလပ္ပဝတ္တော သဘာဝေါတိ။

ဧဝဉ္စ ပန ဝတွာ ဗောဓိသတ္တော ‘‘အဟံ၊ မဟာရာဇ၊ တယိ န ဒုဗ္ဘာမိ၊ တွံ ပန မံ မာရေဟီ’’တိ တဿ ဟတ္ထေ အသိံ ဌပေသိ။ ရာဇာပိ ‘‘နာဟံ တယိ ဒုဗ္ဘာမီ’’တိ သပထံ ကတွာ တေန သဒ္ဓိံ နဂရံ ဂန္တွာ တံ အမစ္စာနံ ဒဿေတွာ ‘‘အယံ၊ ဘဏေ၊ ကောသလရညော ပုတ္တော ဒီဃာဝုကုမာရော နာမ၊ ဣမိနာ မယှံ ဇီဝိတံ ဒိန္နံ၊ န လဗ္ဘာ ဣမံ ကိဉ္စိ ကာတု’’န္တိ ဝတွာ အတ္တနော ဓီတရံ ဒတွာ ပိတု သန္တကေ ရဇ္ဇေ ပတိဋ္ဌာပေသိ။ တတော ပဋ္ဌာယ ဥဘောပိ သမဂ္ဂါ သမ္မောဒမာနာ ရဇ္ဇံ ကာရေသုံ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ မာတာပိတရော မဟာရာဇကုလာနိ အဟေသုံ၊ ဒီဃာဝုကုမာရော ပန အဟမေဝ အဟောသိ’’န္တိ။

ဒီဃီတိကောသလဇာတကဝဏ္ဏနာ ပဌမာ။

[၃၇၂] ၂။ မိဂပေါတကဇာတကဝဏ္ဏနာ

အဂါရာ ပစ္စုပေတဿာတိ ဣဒံ သတ္ထာ ဇေတဝနေ ဝိဟရန္တော ဧကံ မဟလ္လကံ အာရဗ္ဘ ကထေသိ။ သော ကိရေကံ ဒါရကံ ပဗ္ဗာဇေသိ။ သာမဏေရော တံ သက္ကစ္စံ ဥပဋ္ဌဟိတွာ အပရဘာဂေ အဖာသုကေန ကာလမကာသိ။ တဿ ကာလကိရိယာယ မဟလ္လကော သောကာဘိဘူတော မဟန္တေန သဒ္ဒေန ပရိဒေဝန္တော ဝိစရိ။ ဘိက္ခူ သညာပေတုံ အသက္ကောန္တာ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ အသုကော နာမ မဟလ္လကော သာမဏေရဿ ကာလကိရိယာယ ပရိဒေဝန္တော ဝိစရတိ၊ မရဏဿတိဘာဝနာယ ပရိဗာဟိရော ဧသော ဘဝိဿတီ’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပေသ ဧတသ္မိံ မတေ ပရိဒေဝန္တော ဝိစရီ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော သက္ကတ္တံ ကာရေသိ။ တဒါ ဧကော ကာသိရဋ္ဌဝါသီ ဗြာဟ္မဏော ဟိမဝန္တံ ပဝိသိတွာ ဣသိပဗ္ဗဇ္ဇံ ပဗ္ဗဇိတွာ ဖလာဖလေဟိ ယာပေသိ။ သော ဧကဒိဝသံ အရညေ ဧကံ မတမာတိကံ မိဂပေါတကံ ဒိသွာ အဿမံ အာနေတွာ ဂေါစရံ ဒတွာ ပေါသေသိ။ မိဂပေါတကော ဝဍ္ဎန္တော အဘိရူပေါ အဟောသိ သောဘဂ္ဂပ္ပတ္တော။ တာပသော တံ အတ္တနော ပုတ္တကံ ကတွာ ပရိဟရတိ။ ဧကဒိဝသံ မိဂပေါတကော ဗဟုံ တိဏံ ခါဒိတွာ အဇီရကေန ကာလမကာသိ။ တာပသော ‘‘ပုတ္တော မေ မတော’’တိ ပရိဒေဝန္တော ဝိစရတိ။ တဒါ သက္ကော ဒေဝရာဇာ လောကံ ပရိဂ္ဂဏှန္တော တံ တာပသံ ဒိသွာ ‘‘သံဝေဇေဿာမိ န’’န္တိ အာဂန္တွာ အာကာသေ ဌိတော ပဌမံ ဂါထမာဟ –

၁၁၆။

‘‘အဂါရာ ပစ္စုပေတဿ၊ အနဂါရဿ တေ သတော၊

သမဏဿ န တံ သာဓု၊ ယံ ပေတမနုသောစသီ’’တိ။

တံ သုတွာ တာပသော ဒုတိယံ ဂါထမာဟ –

၁၁၇။

‘‘သံဝါသေန ဟဝေ သက္က၊ မနုဿဿ မိဂဿ ဝါ၊

ဟဒယေ ဇာယတေ ပေမံ၊ န တံ သက္ကာ အသောစိတု’’န္တိ။

တတ္ထ န တံ သက္ကာတိ တံ မနုဿံ ဝါ တိရစ္ဆာနံ ဝါ န သက္ကာ အသောစိတုံ၊ သောစာမိယေဝါဟန္တိ။

တတော သက္ကော ဒွေ ဂါထာ အဘာသိ –

၁၁၈။

‘‘မတံ မရိဿံ ရောဒန္တိ၊ ယေ ရုဒန္တိ လပန္တိ စ၊

တသ္မာ တွံ ဣသိ မာ ရောဒိ၊ ရောဒိတံ မောဃမာဟု သန္တော။

၁၁၉။

‘‘ရောဒိတေန ဟဝေ ဗြဟ္မေ၊ မတော ပေတော သမုဋ္ဌဟေ၊

သဗ္ဗေ သင်္ဂမ္မ ရောဒါမ၊ အညမညဿ ဉာတကေ’’တိ။

တတ္ထ မရိဿန္တိ ယော ဣဒါနိ မရိဿတိ၊ တံ။ လပန္တိ စာတိ ဝိလပန္တိ စ။ ဣဒံ ဝုတ္တံ ဟောတိ – ယေ လောကေ မတဉ္စ မရိဿန္တဉ္စ ရောဒန္တိ၊ တေ ရုဒန္တိ စေဝ ဝိလပန္တိ စ၊ တေသံ အဿုပစ္ဆိဇ္ဇနဒိဝသော နာမ နတ္ထိ။ ကိံကာရဏာ? သဒါပိ မတာနဉ္စ မရိဿန္တာနဉ္စ အတ္ထိတာယ။ တသ္မာ တွံ ဣသိ မာ ရောဒိ။ ကိံကာရဏာ ? ရောဒိတံ မောဃမာဟု သန္တောတိ၊ ဗုဒ္ဓါဒယော ပန ပဏ္ဍိတာ ရောဒိတံ ‘‘မောဃ’’န္တိ ဝဒန္တိ။ မတော ပေတောတိ ယော ဧသ မတော ပေတောတိ ဝုစ္စတိ၊ ယဒိ သော ရောဒိတေန သမုဋ္ဌဟေယျ၊ ဧဝံ သန္တေ ကိံ နိက္ကမ္မာ အစ္ဆာမ၊ သဗ္ဗေဝ သမာဂမ္မ အညမညဿ ဉာတကေ ရောဒါမ။ ယသ္မာ ပန တေ ရောဒိတကာရဏာ န ဥဋ္ဌဟန္တိ၊ တသ္မာ ရောဒိတဿ မောဃဘာဝံ သာဓေတိ။

ဧဝံ သက္ကဿ ကထေန္တဿ တာပသော ‘‘နိရတ္ထကံ ရောဒိတ’’န္တိ သလ္လက္ခေတွာ သက္ကဿ ထုတိံ ကရောန္တော တိဿော ဂါထာ အဘာသိ –

၁၂၀။

‘‘အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ၊

ဝါရိနာ ဝိယ ဩသိဉ္စံ၊ သဗ္ဗံ နိဗ္ဗာပယေ ဒရံ။

၁၂၁။

‘‘အဗ္ဗဟိ ဝတ မေ သလ္လံ၊ ယမာသိ ဟဒယဿိတံ၊

ယော မေ သောကပရေတဿ၊ ပုတ္တသောကံ အပါနုဒိ။

၁၂၂။

‘‘သောဟံ အဗ္ဗူဠှသလ္လောသ္မိ၊ ဝီတသောကော အနာဝိလော၊

န သောစာမိ န ရောဒါမိ၊ တဝ သုတွာန ဝါသဝါ’’တိ။

တတ္ထ ယမာသီတိ ယံ မေ အာသိ။ ဟဒယဿိတန္တိ ဟဒယေ နိဿိတံ။ အပါနုဒီတိ နီဟရိ။ သက္ကော တာပသဿ ဩဝါဒံ ဒတွာ သကဋ္ဌာနမေဝ ဂတော။

သတ္ထာ ဣဓံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ တာပသော မဟလ္လကော အဟောသိ၊ မိဂေါ သာမဏေရော၊ သက္ကော ပန အဟမေဝ အဟောသိ’’န္တိ။

မိဂပေါတကဇာတကဝဏ္ဏနာ ဒုတိယာ။

[၃၇၃] ၃။ မူသိကဇာတကဝဏ္ဏနာ

ကုဟိံ ဂတာ ကတ္ထ ဂတာတိ ဣဒံ သတ္ထာ ဝေဠုဝနေ ဝိဟရန္တော အဇာတသတ္တုံ အာရဗ္ဘ ကထေသိ။ ဝတ္ထု ဟေဋ္ဌာ ထုသဇာတကေ (ဇာ။ ၁။၄။၁၄၉ အာဒယော) ဝိတ္ထာရိတမေဝ။ ဣဓာပိ သတ္ထာ တထေဝ ရာဇာနံ သကိံ ပုတ္တေန သဒ္ဓိံ ကီဠမာနံ သကိံ ဓမ္မံ သုဏန္တံ ဒိသွာ ‘‘တံ နိဿာယ ရညော ဘယံ ဥပ္ပဇ္ဇိဿတီ’’တိ ဉတွာ ‘‘မဟာရာဇ၊ ပေါရာဏကရာဇာနော အာသင်္ကိတဗ္ဗံ အာသင်္ကိတွာ အတ္တနော ပုတ္တံ ‘အမှာကံ ဓူမကာလေ ရဇ္ဇံ ကာရေတူ’တိ ဧကမန္တေ အကံသူ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော တက္ကသိလာယံ ဗြာဟ္မဏကုလေ နိဗ္ဗတ္တိတွာ ဒိသာပါမောက္ခာစရိယော အဟောသိ။ တဿ သန္တိကေ ဗာရာဏသိရညော ပုတ္တော ယဝကုမာရော နာမ သဗ္ဗသိပ္ပာနိ ဥဂ္ဂဏှိတွာ အနုယောဂံ ဒတွာ ဂန္တုကာမော တံ အာပုစ္ဆိ။ အာစရိယော ‘‘ပုတ္တံ နိဿာယ တဿ အန္တရာယော ဘဝိဿတီ’’တိ အင်္ဂဝိဇ္ဇာဝသေန ဉတွာ ‘‘ဧတမဿ ဟရိဿာမီ’’တိ ဧကံ ဥပမံ ဥပဓာရေတုံ အာရဘိ။ တဒါ ပနဿ ဧကော အဿော အဟောသိ၊ တဿ ပါဒေ ဝဏော ဥဋ္ဌဟိ၊ တံ ဝဏာနုရက္ခဏတ္ထံ ဂေဟေယေဝ ကရိံသု။ တဿာဝိဒူရေ ဧကော ဥဒပါနော အတ္ထိ။ အထေကာ မူသိကာ ဂေဟာ နိက္ခမိတွာ အဿဿ ပါဒေ ဝဏံ ခါဒတိ၊ အဿော ဝါရေတုံ န သက္ကောတိ။ သော ဧကဒိဝသံ ဝေဒနံ အဓိဝါသေတုံ အသက္ကောန္တော မူသိကံ ခါဒိတုံ အာဂတံ ပါဒေန ပဟရိတွာ မာရေတွာ ဥဒပါနေ ပါတေသိ။ အဿဂေါပကာ မူသိကံ အပဿန္တာ ‘‘အညေသု ဒိဝသေသု မူသိကာ အာဂန္တွာ ဝဏံ ခါဒတိ၊ ဣဒါနိ န ပညာယတိ၊ ကဟံ နု ခေါ ဂတာ’’တိ ဝဒိံသု။

ဗောဓိသတ္တော တံ ကာရဏံ ပစ္စက္ခံ ကတွာ ‘‘အညေ အဇာနန္တာ ‘ကဟံ မူသိကာ ဂတာ’တိ ဝဒန္တိ၊ မူသိကာယ ပန မာရေတွာ ဥဒပါနေ ခိတ္တဘာဝံ အဟမေဝ ဇာနာမီ’’တိ ဣဒမေဝ ကာရဏံ ဥပမံ ကတွာ ပဌမံ ဂါထံ ဗန္ဓိတွာ ရာဇကုမာရဿ အဒါသိ။ သော အပရံ ဥပမံ ဥပဓာရေန္တော တမေဝ အဿံ ပရုဠှဝဏံ နိက္ခမိတွာ ဧကံ ယဝဝတ္ထုံ ဂန္တွာ ‘‘ယဝံ ခါဒိဿာမီ’’တိ ဝတိစ္ဆိဒ္ဒေန မုခံ ပဝေသေန္တံ ဒိသွာ တမေဝ ကာရဏံ ဥပမံ ကတွာ ဒုတိယံ ဂါထံ ဗန္ဓိတွာ တဿ အဒါသိ။ တတိယဂါထံ ပန အတ္တနော ပညာဗလေနေဝ ဗန္ဓိတွာ တမ္ပိ တဿ ဒတွာ ‘‘တာတ၊ တွံ ရဇ္ဇေ ပတိဋ္ဌာယ သာယံ နှာနပေါက္ခရဏိံ ဂစ္ဆန္တော ယာဝ ဓုရသောပါနာ ပဌမံ ဂါထံ သဇ္ဈာယန္တော ဂစ္ဆေယျာသိ၊ တဝ နိဝသနပါသာဒံ ပဝိသန္တော ယာဝ သောပါနပါဒမူလာ ဒုတိယံ ဂါထံ သဇ္ဈာယန္တော ဂစ္ဆေယျာသိ၊ တတော ယာဝ သောပါနမတ္ထကာ တတိယံ ဂါထံ သဇ္ဈာယန္တော ဂစ္ဆေယျာသီ’’တိ ဝတွာ ပေသေသိ။

သော ကုမာရော ဂန္တွာ ဥပရာဇာ ဟုတွာ ပိတု အစ္စယေန ရဇ္ဇံ ကာရေသိ၊ တဿေကော ပုတ္တော ဇာယိ။ သော သောဠသဝဿကာလေ ရဇ္ဇလောဘေန ‘‘ပိတရံ မာရေဿာမီ’’တိ စိန္တေတွာ ဥပဋ္ဌာကေ အာဟ ‘‘မယှံ ပိတာ တရုဏော၊ အဟံ ဧတဿ ဓူမကာလံ ဩလောကေန္တော မဟလ္လကော ဘဝိဿာမိ ဇရာဇိဏ္ဏော၊ တာဒိသေ ကာလေ လဒ္ဓေနပိ ရဇ္ဇေန ကော အတ္ထော’’တိ။ တေ အာဟံသု ‘‘ဒေဝ၊ န သက္ကာ ပစ္စန္တံ ဂန္တွာ စောရတ္တံ ကာတုံ၊ တဝ ပိတရံ ကေနစိ ဥပါယေန မာရေတွာ ရဇ္ဇံ ဂဏှာ’’တိ ။ သော ‘‘သာဓူ’’တိ အန္တောနိဝေသနေ ရညော သာယံ နှာနပေါက္ခရဏီသမီပံ ဂန္တွာ ‘‘ဧတ္ထ နံ မာရေဿာမီ’’တိ ခဂ္ဂံ ဂဟေတွာ အဋ္ဌာသိ။ ရာဇာ သာယံ မူသိကံ နာမ ဒါသိံ ‘‘ဂန္တွာ ပေါက္ခရဏီပိဋ္ဌိံ သောဓေတွာ ဧဟိ၊ နှာယိဿာမီ’’တိ ပေသေသိ။ သာ ဂန္တွာ ပေါက္ခရဏီပိဋ္ဌိံ သောဓေန္တီ ကုမာရံ ပဿိ။ ကုမာရော အတ္တနော ကမ္မဿ ပါကဋဘာဝဘယေန တံ ဒွိဓာ ဆိန္ဒိတွာ ပေါက္ခရဏိယံ ပါတေသိ။ ရာဇာ နှာယိတုံ အဂမာသိ ။ သေသဇနော ‘‘အဇ္ဇာပိ မူသိကာ ဒါသီ န ပုနာဂစ္ဆတိ၊ ကုဟိံ ဂတာ ကတ္ထ ဂတာ’’တိ အာဟ။ ရာဇာ –

၁၂၃။

‘‘ကုဟိံ ဂတာ ကတ္ထ ဂတာ၊ ဣတိ လာလပ္ပတီ ဇနော၊

အဟမေဝေကော ဇာနာမိ၊ ဥဒပါနေ မူသိကာ ဟတာ’’တိ။ –

ပဌမံ ဂါထံ ဘဏန္တော ပေါက္ခရဏီတီရံ အဂမာသိ။

တတ္ထ ကုဟိံ ဂတာ ကတ္ထ ဂတာတိ အညမညဝေဝစနာနိ။ ဣတိ လာလပ္ပတီတိ ဧဝံ ဝိပ္ပလပတိ။ ဣတိ အယံ ဂါထာ ‘‘အဇာနန္တော ဇနော မူသိကာ ဒါသီ ကုဟိံ ဂတာတိ ဝိပ္ပလပတိ၊ ရာဇကုမာရေန ဒွိဓာ ဆိန္ဒိတွာ မူသိကာယ ပေါက္ခရဏိယံ ပါတိတဘာဝံ အဟမေဝ ဧကော ဇာနာမီ’’တိ ရညော အဇာနန္တဿေဝ ဣမမတ္ထံ ဒီပေတိ။

ကုမာရော ‘‘မယာ ကတကမ္မံ မယှံ ပိတရာ ဉာတ’’န္တိ ဘီတော ပလာယိတွာ တမတ္ထံ ဥပဋ္ဌာကာနံ အာရောစေသိ။ တေ သတ္တဋ္ဌဒိဝသစ္စယေန ပုန တံ အာဟံသု ‘‘ဒေဝ၊ သစေ ရာဇာ ဇာနေယျ၊ န တုဏှီ ဘဝေယျ၊ တက္ကဂါဟေန ပန တေန တံ ဝုတ္တံ ဘဝိဿတိ၊ မာရေဟိ န’’န္တိ။ သော ပုနေကဒိဝသံ ခဂ္ဂဟတ္ထော သောပါနပါဒမူလေ ဌတွာ ရညော အာဂမနကာလေ ဣတော စိတော စ ပဟရဏောကာသံ ဩလောကေသိ။ ရာဇာ –

၁၂၄။

‘‘ယဉ္စေတံ ဣတိ စီတိ စ၊ ဂဒြဘောဝ နိဝတ္တသိ၊

ဥဒပါနေ မူသိကံ ဟန္တွာ၊ ယဝံ ဘက္ခေတုမိစ္ဆသီ’’တိ။ –

ဒုတိယံ ဂါထံ သဇ္ဈာယန္တော အဂမာသိ။ အယမ္ပိ ဂါထာ ‘‘ယသ္မာ တွံ ဣတိ စီတိ စ ဣတော စိတော စ ပဟရဏောကာသံ ဩလောကေန္တော ဂဒြဘောဝ နိဝတ္တသိ၊ တသ္မာ တံ ဇာနာမိ ‘ပုရိမဒိဝသေ ပေါက္ခရဏိယံ မူသိကံ ဒါသိံ ဟန္တွာ အဇ္ဇ မံ ယဝရာဇာနံ ဘက္ခေတုံ မာရေတုံ ဣစ္ဆသီ’’’တိ ရညော အဇာနန္တဿေဝ ဣမမတ္ထံ ဒီပေတိ။

ကုမာရော ‘‘ဒိဋ္ဌောမှိ ပိတရာ’’တိ ဥတြသ္တော ပလာယိ။ သော ပုန အဍ္ဎမာသမတ္တံ အတိက္ကမိတွာ ‘‘ရာဇာနံ ဒဗ္ဗိယာ ပဟရိတွာ မာရေဿာမီ’’တိ ဧကံ ဒီဃဒဏ္ဍကံ ဒဗ္ဗိပဟရဏံ ဂဟေတွာ ဩလုမ္ဗိတွာ အဋ္ဌာသိ။ ရာဇာ –

၁၂၅။

‘‘ဒဟရော စာသိ ဒုမ္မေဓ၊ ပဌမုပ္ပတ္တိကော သုသု၊

ဒီဃဉ္စေတံ သမာသဇ္ဇ၊ န တေ ဒဿာမိ ဇီဝိတ’’န္တိ။ –

တတိယံ ဂါထံ သဇ္ဈာယန္တော သောပါနပါဒမတ္ထကံ အဘိရုဟိ။

တတ္ထ ပဌမုပ္ပတ္တိကောတိ ပဌမဝယေန ဥပ္ပတ္တိတော ဥပေတော၊ ပဌမဝယေ ဌိတောတိ အတ္ထော။ သုသူတိ တရုဏော။ ဒီဃန္တိ ဒီဃဒဏ္ဍကံ ဒဗ္ဗိပဟရဏံ။ သမာသဇ္ဇာတိ ဂဟေတွာ၊ ဩလုမ္ဗိတွာ ဌိတောသီတိ အတ္ထော။ အယမ္ပိ ဂါထာ ‘‘ဒုမ္မေဓ၊ အတ္တနော ဝယံ ပရိဘုဉ္ဇိတုံ န လဘိဿသိ၊ န တေ ဒါနိ နိလ္လဇ္ဇဿ ဇီဝိတံ ဒဿာမိ၊ မာရေတွာ ခဏ္ဍာခဏ္ဍံ ဆိန္ဒိတွာ သူလေယေဝ အာဝုဏာပေဿာမီ’’တိ ရညော အဇာနန္တဿေဝ ကုမာရံ သန္တဇ္ဇယမာနာ ဣမမတ္ထံ ဒီပေတိ။

သော တံ ဒိဝသံ ပလာယိတုံ အသက္ကောန္တော ‘‘ဇီဝိတံ မေ ဒေဟိ၊ ဒေဝါ’’တိ ရညော ပါဒမူလေ နိပဇ္ဇိ။ ရာဇာ တံ တဇ္ဇေတွာ သင်္ခလိကာဟိ ဗန္ဓာပေတွာ ဗန္ဓနာဂါရေ ကာရေတွာ သေတစ္ဆတ္တဿ ဟေဋ္ဌာ အလင်္ကတရာဇာသနေ နိသီဒိတွာ ‘‘အမှာကံ အာစရိယော ဒိသာပါမောက္ခော ဗြာဟ္မဏော ဣမံ မယှံ အန္တရာယံ ဒိသွာ ဣမာ တိဿော ဂါထာ အဘာသီ’’တိ ဟဋ္ဌတုဋ္ဌော ဥဒါနံ ဥဒါနေန္တော သေသဂါထာ အဘာသိ –

၁၂၆။

‘‘နာန္တလိက္ခဘဝနေန၊ နာင်္ဂပုတ္တပိနေန ဝါ၊

ပုတ္တေန ဟိ ပတ္ထယိတော၊ သိလောကေဟိ ပမောစိတော။

၁၂၇။

‘‘သဗ္ဗံ သုတမဓီယေထ၊ ဟီနမုက္ကဋ္ဌမဇ္ဈိမံ၊

သဗ္ဗဿ အတ္ထံ ဇာနေယျ၊ န စ သဗ္ဗံ ပယောဇယေ၊

ဟောတိ တာဒိသကော ကာလော၊ ယတ္ထ အတ္ထာဝဟံ သုတ’’န္တိ။

တတ္ထ နာန္တလိက္ခဘဝနေနာတိ အန္တလိက္ခဘဝနံ ဝုစ္စတိ ဒိဗ္ဗဝိမာနံ၊ အဟံ အဇ္ဇ အန္တလိက္ခဘဝနမ္ပိ န အာရုဠှော၊ တသ္မာ အန္တလိက္ခဘဝနေနာပိ အဇ္ဇ မရဏတော န ပမောစိတောမှိ။ နာင်္ဂပုတ္တပိနေန ဝါတိ အင်္ဂသရိက္ခကေန ဝါ ပုတ္တပိနေနပိ န ပမောစိတော။ ပုတ္တေန ဟိ ပတ္ထယိတောတိ အဟံ ပန အတ္တနော ပုတ္တေနေဝ အဇ္ဇ မာရေတုံ ပတ္ထိတော။ သိလောကေဟိ ပမောစိတောတိ သောဟံ အာစရိယေန ဗန္ဓိတွာ ဒိန္နာဟိ ဂါထာဟိ ပမောစိတော။

သုတန္တိ ပရိယတ္တိံ။ အဓီယေထာတိ ဂဏှေယျ သိက္ခေယျ။ ဟီနမုက္ကဋ္ဌမဇ္ဈိမန္တိ ဟီနံ ဝါ ဟောတု ဥတ္တမံ ဝါ မဇ္ဈိမံ ဝါ၊ သဗ္ဗံ အဓီယိတဗ္ဗမေဝါတိ ဒီပေတိ။ န စ သဗ္ဗံ ပယောဇယေတိ ဟီနံ မန္တံ ဝါ သိပ္ပံ ဝါ မဇ္ဈိမံ ဝါ န ပယောဇယေ၊ ဥတ္တမမေဝ ပယောဇယေယျာတိ အတ္ထော။ ယတ္ထ အတ္ထာဝဟံ သုတန္တိ ယသ္မိံ ကာလေ မဟောသဓပဏ္ဍိတဿ ကုမ္ဘကာရကမ္မကရဏံ ဝိယ ယံကိဉ္စိ သိက္ခိတသိပ္ပံ အတ္ထာဝဟံ ဟောတိ၊ တာဒိသောပိ ကာလော ဟောတိယေဝါတိ အတ္ထော။ အပရဘာဂေ ရညော အစ္စယေန ကုမာရော ရဇ္ဇေ ပတိဋ္ဌာသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဒိသာပါမောက္ခော အာစရိယော အဟမေဝ အဟောသိ’’န္တိ။

မူသိကဇာတကဝဏ္ဏနာ တတိယာ။

[၃၇၄] ၄။ စူဠဓနုဂ္ဂဟဇာတကဝဏ္ဏနာ

သဗ္ဗံ ဘဏ္ဍန္တိ ဣဒံ သတ္ထာ ဇေတဝနေ ဝိဟရန္တော ပုရာဏဒုတိယိကာပလောဘနံ အာရဗ္ဘ ကထေသိ။ တေန ဘိက္ခုနာ ‘‘ပုရာဏဒုတိယိကာ မံ၊ ဘန္တေ၊ ဥက္ကဏ္ဌာပေတီ’’တိ ဝုတ္တေ သတ္ထာ ‘‘ဧသာ ဘိက္ခု၊ ဣတ္ထီ န ဣဒါနေဝ တုယှံ အနတ္ထကာရိကာ၊ ပုဗ္ဗေပိ တေ ဧတံ နိဿာယ အသိနာ သီသံ ဆိန္န’’န္တိ ဝတွာ ဘိက္ခူဟိ ယာစိတော အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော သက္ကတ္တံ ကာရေသိ။ တဒါ ဧကော ဗာရာဏသိဝါသီ ဗြာဟ္မဏမာဏဝေါ တက္ကသိလာယံ သဗ္ဗသိပ္ပာနိ ဥဂ္ဂဏှိတွာ ဓနုကမ္မေ နိပ္ဖတ္တိံ ပတ္တော စူဠဓနုဂ္ဂဟပဏ္ဍိတော နာမ အဟောသိ။ အထဿ အာစရိယော ‘‘အယံ မယာ သဒိသံ သိပ္ပံ ဥဂ္ဂဏှီ’’တိ အတ္တနော ဓီတရံ အဒါသိ။ သော တံ ဂဟေတွာ ‘‘ဗာရာဏသိံ ဂမိဿာမီ’’တိ မဂ္ဂံ ပဋိပဇ္ဇိ။ အန္တရာမဂ္ဂေ ဧကော ဝါရဏော ဧကံ ပဒေသံ သုညမကာသိ၊ တံ ဌာနံ အဘိရုဟိတုံ န ကောစိ ဥဿဟိ။ စူဠဓနုဂ္ဂဟပဏ္ဍိတော မနုဿာနံ ဝါရေန္တာနညေဝ ဘရိယံ ဂဟေတွာ အဋဝိမုခံ အဘိရုဟိ။ အထဿ အဋဝိမဇ္ဈေ ဝါရဏော ဥဋ္ဌဟိ၊ သော တံ ကုမ္ဘေ သရေန ဝိဇ္ဈိ။ သရော ဝိနိဝိဇ္ဈိတွာ ပစ္ဆာဘာဂေန နိက္ခမိ။ ဝါရဏော တတ္ထေဝ ပတိ၊ ဓနုဂ္ဂဟပဏ္ဍိတော တံ ဌာနံ ခေမံ ကတွာ ပုရတော အညံ အဋဝိံ ပါပုဏိ။ တတ္ထာပိ ပညာသ စောရာ မဂ္ဂံ ဟနန္တိ။ တမ္ပိ သော မနုဿေဟိ ဝါရိယမာနော အဘိရုယှ တေသံ စောရာနံ မိဂေ ဝဓိတွာ မဂ္ဂသမီပေ မံသံ ပစိတွာ ခါဒန္တာနံ ဌိတဋ္ဌာနံ ပါပုဏိ။

တဒါ တံ စောရာ အလင်္ကတပဋိယတ္တာယ ဘရိယာယ သဒ္ဓိံ အာဂစ္ဆန္တံ ဒိသွာ ‘‘ဂဏှိဿာမ န’’န္တိ ဥဿာဟံ ကရိံသု။ စောရဇေဋ္ဌကော ပုရိသလက္ခဏကုသလော၊ သော တံ ဩလောကေတွာဝ ‘‘ဥတ္တမပုရိသော အယ’’န္တိ ဉတွာ ဧကဿပိ ဥဋ္ဌဟိတုံ နာဒါသိ။ ဓနုဂ္ဂဟပဏ္ဍိတော ‘‘ဂစ္ဆ ‘အမှာကမ္ပိ ဧကံ မံသသူလံ ဒေထာ’တိ ဝတွာ မံသံ အာဟရာ’’တိ တေသံ သန္တိကံ ဘရိယံ ပေသေသိ။ သာ ဂန္တွာ ‘‘ဧကံ ကိရ မံသသူလံ ဒေထာ’’တိ အာဟ။ စောရဇေဋ္ဌကော ‘‘အနဂ္ဃော ပုရိသော’’တိ မံသသူလံ ဒါပေသိ။ စောရာ ‘‘အမှေဟိ ကိရ ပက္ကံ ခါဒိတ’’န္တိ အပက္ကမံသသူလံ အဒံသု။ ဓနုဂ္ဂဟော အတ္တာနံ သမ္ဘာဝေတွာ ‘‘မယှံ အပက္ကမံသသူလံ ဒဒန္တီ’’တိ စောရာနံ ကုဇ္ဈိ။ စောရာ ‘‘ကိံ အယမေဝေကော ပုရိသော၊ မယံ ဣတ္ထိယော’’တိ ကုဇ္ဈိတွာ ဥဋ္ဌဟိံသု။ ဓနုဂ္ဂဟော ဧကူနပညာသ ဇနေ ဧကူနပညာသကဏ္ဍေဟိ ဝိဇ္ဈိတွာ ပါတေသိ။ စောရဇေဋ္ဌကံ ဝိဇ္ဈိတုံ ကဏ္ဍံ နာဟောသိ။ တဿ ကိရ ကဏ္ဍနာဠိယံ သမပဏ္ဏာသယေဝ ကဏ္ဍာနိ။ တေသု ဧကေန ဝါရဏံ ဝိဇ္ဈိ၊ ဧကူနပညာသကဏ္ဍေဟိ စောရေ ဝိဇ္ဈိတွာ စောရဇေဋ္ဌကံ ပါတေတွာ တဿ ဥရေ နိသိန္နော ‘‘သီသမဿ ဆိန္ဒိဿာမီ’’တိ ဘရိယာယ ဟတ္ထတော အသိံ အာဟရာပေသိ။ သာ တင်္ခဏညေဝ စောရဇေဋ္ဌကေ လောဘံ ကတွာ စောရဿ ဟတ္ထေ ထရုံ၊ သာမိကဿ ဟတ္ထေ ဓာရံ ဌပေသိ။ စောရော ထရုဒဏ္ဍံ ပရာမသိတွာ အသိံ နီဟရိတွာ ဓနုဂ္ဂဟဿ သီသံ ဆိန္ဒိ။

သော တံ ဃာတေတွာ ဣတ္ထိံ အာဒါယ ဂစ္ဆန္တော ဇာတိဂေါတ္တံ ပုစ္ဆိ။ သာ ‘‘တက္ကသိလာယံ ဒိသာပါမောက္ခာစရိယဿ ဓီတာမှီ’’တိ အာဟ။ ‘‘ကထံ တွံ ဣမိနာ လဒ္ဓါ’’တိ။ မယှံ ပိတာ ‘‘အယံ မယာ သဒိသံ ကတွာ သိပ္ပံ သိက္ခီ’’တိ တုဿိတွာ ဣမဿ မံ အဒါသိ၊ သာဟံ တယိ သိနေဟံ ကတွာ အတ္တနော ကုလဒတ္တိယံ သာမိကံ မာရာပေသိန္တိ။ စောရဇေဋ္ဌကော ‘‘ကုလဒတ္တိယံ တာဝေသာ သာမိကံ မာရေသိ၊ အညံ ပနေကံ ဒိသွာ မမ္ပိ ဧဝမေဝံ ကရိဿတိ၊ ဣမံ ဆဍ္ဍေတုံ ဝဋ္ဋတီ’’တိ စိန္တေတွာ ဂစ္ဆန္တော အန္တရာမဂ္ဂေ ဧကံ ကုန္နဒိံ ဥတ္တာနတလံ တင်္ခဏောဒကပူရံ ဒိသွာ ‘‘ဘဒ္ဒေ၊ ဣမိဿံ နဒိယံ သုသုမာရာ ကက္ခဠာ၊ ကိံ ကရောမာ’’တိ အာဟ။ ‘‘သာမိ၊ သဗ္ဗံ အာဘရဏဘဏ္ဍံ မမ ဥတ္တရာသင်္ဂေန ဘဏ္ဍိကံ ကတွာ ပရတီရံ နေတွာ ပုန အာဂန္တွာ မံ ဂဟေတွာ ဂစ္ဆာ’’တိ။ သော ‘‘သာဓူ’’တိ သဗ္ဗံ အာဘရဏဘဏ္ဍံ အာဒါယ နဒိံ ဩတရိတွာ တရန္တော ဝိယ ပရတီရံ ပတွာ တံ ဆဍ္ဍေတွာ ပါယာသိ။ သာ တံ ဒိသွာ ‘‘သာမိ၊ ကိံ မံ ဆဍ္ဍေတွာ ဝိယ ဂစ္ဆသိ၊ ကသ္မာ ဧဝံ ကရောသိ၊ ဧဟိ မမ္ပိ အာဒါယ ဂစ္ဆာ’’တိ တေန သဒ္ဓိံ သလ္လပန္တီ ပဌမံ ဂါထမာဟ –

၁၂၈။

‘‘သဗ္ဗံ ဘဏ္ဍံ သမာဒါယ၊ ပါရံ တိဏ္ဏောသိ ဗြာဟ္မဏ၊

ပစ္စာဂစ္ဆ လဟုံ ခိပ္ပံ၊ မမ္ပိ တာရေဟိ ဒါနိတော’’တိ။

တတ္ထ လဟုံ ခိပ္ပန္တိ လဟုံ ပစ္စာဂစ္ဆ၊ ခိပ္ပံ မမ္ပိ တာရေဟိ ဒါနိ ဣတောတိ အတ္ထော။

စောရော တံ သုတွာ ပရတီရေ ဌိတောယေဝ ဒုတိယံ ဂါထမာဟ –

၁၂၉။

‘‘အသန္ထုတံ မံ စိရသန္ထုတေန၊ နိမီနိ ဘောတီ အဓုဝံ ဓုဝေန၊

မယာပိ ဘောတီ နိမိနေယျ အညံ၊ ဣတော အဟံ ဒူရတရံ ဂမိဿ’’န္တိ။

သာ ဟေဋ္ဌာ ဝုတ္တတ္ထာယေဝ –

စောရော ပန ‘‘ဣတော အဟံ ဒူရတရံ ဂမိဿံ၊ တိဋ္ဌ တွ’’န္တိ ဝတွာ တဿာ ဝိရဝန္တိယာဝ အာဘရဏဘဏ္ဍိကံ အာဒါယ ပလာတော။ တတော သာ ဗာလာ အတြိစ္ဆတာယ ဧဝရူပံ ဗျသနံ ပတ္တာ အနာထာ ဟုတွာ အဝိဒူရေ ဧကံ ဧဠဂလာဂုမ္ဗံ ဥပဂန္တွာ ရောဒမာနာ နိသီဒိ။ တသ္မိံ ခဏေ သက္ကော ဒေဝရာဇာ လောကံ ဩလောကေန္တော တံ အတြိစ္ဆတာဟတံ သာမိကာ စ ဇာရာ စ ပရိဟီနံ ရောဒမာနံ ဒိသွာ ‘‘ဧတံ နိဂ္ဂဏှိတွာ လဇ္ဇာပေတွာ အာဂမိဿာမီ’’တိ မာတလိဉ္စ ပဉ္စသိခဉ္စ အာဒါယ တတ္ထ ဂန္တွာ နဒီတီရေ ဌတွာ ‘‘မာတလိ၊ တွံ မစ္ဆော ဘဝ၊ ပဉ္စသိခ တွံ သကုဏော ဘဝ၊ အဟံ ပန သိင်္ဂါလော ဟုတွာ မုခေန မံသပိဏ္ဍံ ဂဟေတွာ ဧတိဿာ သမ္မုခဋ္ဌာနံ ဂမိဿာမိ၊ တွံ မယိ တတ္ထ ဂတေ ဥဒကတော ဥလ္လင်္ဃိတွာ မမ ပုရတော ပတ၊ အထာဟံ မုခေန ဂဟိတမံသပိဏ္ဍံ ဆဍ္ဍေတွာ မစ္ဆံ ဂဟေတုံ ပက္ခန္ဒိဿာမိ၊ တသ္မိံ ခဏေ တွံ၊ ပဉ္စသိခ၊ တံ မံသပိဏ္ဍံ ဂဟေတွာ အာကာသေ ဥပ္ပတ၊ တွံ မာတလိ၊ ဥဒကေ ပတာ’’တိ အာဏာပေသိ။ ‘‘သာဓု၊ ဒေဝါ’’တိ၊ မာတလိ၊ မစ္ဆော အဟောသိ၊ ပဉ္စသိခေါ သကုဏော အဟောသိ။ သက္ကော သိင်္ဂါလော ဟုတွာ မံသပိဏ္ဍံ မုခေနာဒါယ တဿာ သမ္မုခဋ္ဌာနံ အဂမာသိ။ မစ္ဆော ဥဒကာ ဥပ္ပတိတွာ သိင်္ဂါလဿ ပုရတော ပတိ။ သော မုခေန ဂဟိတမံသပိဏ္ဍံ ဆဍ္ဍေတွာ မစ္ဆဿတ္ထာယ ပက္ခန္ဒိ။ မစ္ဆော ဥပ္ပတိတွာ ဥဒကေ ပတိ၊ သကုဏော မံသပိဏ္ဍံ ဂဟေတွာ အာကာသေ ဥပ္ပတိ၊ သိင်္ဂါလော ဥဘောပိ အလဘိတွာ ဧဠဂလာဂုမ္ဗံ ဩလောကေန္တော ဒုမ္မုခေါ နိသီဒိ။ သာ တံ ဒိသွာ ‘‘အယံ အတြိစ္ဆတာဟတော နေဝ မံသံ၊ န မစ္ဆံ လဘီ’’တိ ကုဋံ ဘိန္ဒန္တီ ဝိယ မဟာဟသိတံ ဟသိ။ တံ သုတွာ သိင်္ဂါလော တတိယံ ဂါထမာဟ –

၁၃၀။

‘‘ကာယံ ဧဠဂလာဂုမ္ဗေ၊ ကရောတိ အဟုဟာသိယံ၊

နယီဓ နစ္စဂီတံ ဝါ၊ တာဠံ ဝါ သုသမာဟိတံ၊

အနမှိကာလေ သုသောဏိ၊ ကိန္နု ဇဂ္ဃသိ သောဘနေ’’တိ။

တတ္ထ ကာယန္တိ ကာ အယံ။ ဧဠဂလာဂုမ္ဗေတိ ကမ္ဗောဇိဂုမ္ဗေ။ အဟုဟာသိယန္တိ ဒန္တဝိဒံသကံ မဟာဟသိတံ ဝုစ္စတိ၊ တံ ကာ ဧသာ ဧတသ္မိံ ဂုမ္ဗေ ကရောတီတိ ပုစ္ဆတိ။ နယီဓ နစ္စဂီတံ ဝါတိ ဣမသ္မိံ ဌာနေ ကဿစိ နစ္စန္တဿ နစ္စံ ဝါ ဂါယန္တဿ ဂီတံ ဝါ ဟတ္ထေ သုသမာဟိတေ ကတွာ ဝါဒေန္တဿ သုသမာဟိတံ ဟတ္ထတာဠံ ဝါ နတ္ထိ၊ ကံ ဒိသွာ တွံ ဟသေယျာသီတိ ဒီပေတိ။ အနမှိကာလေတိ ရောဒနကာလေ။ သုသောဏီတိ သုန္ဒရသောဏိ။ ကိံ နု ဇဂ္ဃသီတိ ကေန ကာရဏေန တွံ ရောဒိတုံ ယုတ္တကာလေ အရောဒမာနာဝ မဟာဟသိတံ ဟသသိ။ သောဘနေတိ တံ ပသံသန္တော အာလပတိ။

တံ သုတွာ သာ စတုတ္ထံ ဂါထမာဟ –

၁၃၁။

‘‘သိင်္ဂါလ ဗာလ ဒုမ္မေဓ၊ အပ္ပပညောသိ ဇမ္ဗုက၊

ဇီနော မစ္ဆဉ္စ ပေသိဉ္စ၊ ကပဏော ဝိယ ဈာယသီ’’တိ။

တတ္ထ ဇီနောတိ ဇာနိပ္ပတ္တော ဟုတွာ။ ပေသိန္တိ မံသပေသိံ။ ကပဏော ဝိယ ဈာယသီတိ သဟဿဘဏ္ဍိကံ ပရာဇိတော ကပဏော ဝိယ ဈာယသိ သောစသိ စိန္တေသိ။

တတော သိင်္ဂါလော ပဉ္စမံ ဂါထမာဟ –

၁၃၂။

‘‘သုဒဿံ ဝဇ္ဇမညေသံ၊ အတ္တနော ပန ဒုဒ္ဒသံ၊

ဇီနာ ပတိဉ္စ ဇာရဉ္စ၊ မညေ တွညေဝ ဈာယသီ’’တိ။

တတ္ထ တွညေဝ ဈာယသီတိ ပါပဓမ္မေ ဒုဿီလေ အဟံ တာဝ မမ ဂေါစရံ န လဘိဿာမိ၊ တွံ ပန အတြိစ္ဆတာယ ဟတာ တံမုဟုတ္တဒိဋ္ဌကေ စောရေ ပဋိဗဒ္ဓစိတ္တာ ဟုတွာ တဉ္စ ဇာရံ ကုလဒတ္တိယဉ္စ ပတိံ ဇီနာ၊ မံ ဥပါဒါယ သတဂုဏေန သဟဿဂုဏေန ကပဏတရာ ဟုတွာ ဈာယသိ ရောဒသိ ပရိဒေဝသီတိ လဇ္ဇာပေတွာ ဝိပ္ပကာရံ ပါပေန္တော မဟာသတ္တော ဧဝမာဟ။

သာ တဿ ဝစနံ သုတွာ ဂါထမာဟ –

၁၃၃။

‘‘ဧဝမေတံ မိဂရာဇ၊ ယထာ ဘာသသိ ဇမ္ဗုက၊

သာ နူနာဟံ ဣတော ဂန္တွာ၊ ဘတ္တု ဟေဿံ ဝသာနုဂါ’’တိ။

တတ္ထ နူနာတိ ဧကံသတ္ထေ နိပါတော။ သာ အဟံ ဣတော ဂန္တွာ ပုန အညံ ဘတ္တာရံ လဘိတွာ ဧကံသေနေဝ တဿ ဘတ္တု ဝသာနုဂါ ဝသဝတ္တိနီ ဘဝိဿာမီတိ။

အထဿာ အနာစာရာယ ဒုဿီလာယ ဝစနံ သုတွာ သက္ကော ဒေဝရာဇာ ဩသာနဂါထမာဟ –

၁၃၄။

‘‘ယော ဟရေ မတ္တိကံ ထာလံ၊ ကံသထာလမ္ပိ သော ဟရေ၊

ကတံယေဝ တယာ ပါပံ၊ ပုနပေဝံ ကရိဿသီ’’တိ။

တဿတ္ထော – အနာစာရေ ကိံ ကထေသိ၊ ယော မတ္တိကံ ထာလံ ဟရတိ၊ သုဝဏ္ဏထာလရဇတထာလာဒိပ္ပဘေဒံ ကံသထာလမ္ပိ သော ဟရတေဝ၊ ဣဒဉ္စ တယာ ပါပံ ကတမေဝ၊ န သက္ကာ တဝ သဒ္ဓါတုံ၊ သာ တွံ ပုနပိ ဧဝံ ကရိဿသိယေဝါတိ။ ဧဝံ သော တံ လဇ္ဇာပေတွာ ဝိပ္ပကာရံ ပါပေတွာ သကဋ္ဌာနမေဝ အဂမာသိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ဥက္ကဏ္ဌိတဘိက္ခု သောတာပတ္တိဖလေ ပတိဋ္ဌဟိ။

တဒါ ဓနုဂ္ဂဟော ဥက္ကဏ္ဌိတဘိက္ခု အဟောသိ၊ သာ ဣတ္ထီ ပုရာဏဒုတိယိကာ၊ သက္ကော ဒေဝရာဇာ ပန အဟမေဝ အဟောသိန္တိ။

စူဠဓနုဂ္ဂဟဇာတကဝဏ္ဏနာ စတုတ္ထာ။

[၃၇၅] ၅။ ကပေါတဇာတကဝဏ္ဏနာ

ဣဒါနိ ခေါမှီတိ ဣဒံ သတ္ထာ ဇေတဝနေ ဝိဟရန္တော ဧကံ လောလဘိက္ခုံ အာရဗ္ဘ ကထေသိ။ လောလဝတ္ထု အနေကသော ဝိတ္ထာရိတမေဝ။ တံ ပန သတ္ထာ ‘‘သစ္စံ ကိရ တွံ ဘိက္ခု၊ လောလော’’တိ ပုစ္ဆိတွာ ‘‘အာမ၊ ဘန္တေ’’တိ ဝုတ္တေ ‘‘န ခေါ ဘိက္ခု ဣဒါနေဝ၊ ပုဗ္ဗေပိ တွံ လောလောသိ၊ လောလတာယ ပန ဇီဝိတက္ခယံ ပတ္တော’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ပါရာဝတယောနိယံ နိဗ္ဗတ္တိတွာ ဗာရာဏသိသေဋ္ဌိနော မဟာနသေ နီဠပစ္ဆိယံ ဝသတိ။ အထေကော ကာကော မစ္ဆမံသလုဒ္ဓါ တေန သဒ္ဓိံ မေတ္တိံ ကတွာ တတ္ထေဝ ဝသိ။ သော ဧကဒိဝသံ ဗဟုံ မစ္ဆမံသံ ဒိသွာ ‘‘ဣမံ ခါဒိဿာမီ’’တိ နိတ္ထုနန္တော နီဠပစ္ဆိယံယေဝ နိပဇ္ဇိတွာ ပါရာဝတေန ‘‘ဧဟိ၊ သမ္မ၊ ဂေါစရာယ ဂမိဿာမာ’’တိ ဝုစ္စမာနောပိ ‘‘အဇီရကေန နိပန္နောမှိ၊ ဂစ္ဆ တွ’’န္တိ ဝတွာ တသ္မိံ ဂတေ ‘‘ဂတော မေ ပစ္စာမိတ္တကဏ္ဋကော၊ ဣဒါနိ ယထာရုစိ မစ္ဆမံသံ ခါဒိဿာမီ’’တိ စိန္တေန္တော ပဌမံ ဂါထမာဟ –

၁၃၅။

‘‘ဣဒါနိ ခေါမှိ သုခိတော အရောဂေါ၊ နိက္ကဏ္ဋကော နိပ္ပတိတော ကပေါတော၊

ကာဟာမိ ဒါနီ ဟဒယဿ တုဋ္ဌိံ၊ တထာ ဟိ မံ မံသသာကံ ဗလေတီ’’တိ။

တတ္ထ နိပ္ပတိတောတိ နိဂ္ဂတော။ ကပေါတောတိ ပါရာဝတော။ ကာဟာမိ ဒါနီတိ ကရိဿာမိ ဒါနိ။ တထာ ဟိ မံ မံသသာကံ ဗလေတီတိ တထာ ဟိ မံသဉ္စ အဝသေသံ သာကဉ္စ မယှံ ဗလံ ကရောတိ၊ ဥဋ္ဌေဟိ ခါဒါတိ ဝဒမာနံ ဝိယ ဥဿာဟံ မမံ ကရောတီတိ အတ္ထော။

သော ဘတ္တကာရကေ မစ္ဆမံသံ ပစိတွာ မဟာနသာ နိက္ခမ္မ သရီရတော သေဒံ ပဝါဟေန္တေ ပစ္ဆိတော နိက္ခမိတွာ ရသကရောဋိယံ နိလီယိတွာ ‘‘ကိရိ ကိရီ’’တိ သဒ္ဒမကာသိ။ ဘတ္တကာရကော ဝေဂေနာဂန္တွာ ကာကံ ဂဟေတွာ သဗ္ဗပတ္တာနိ လုဉ္ဇိတွာ အလ္လသိင်္ဂီဝေရဉ္စ သိဒ္ဓတ္ထကေ စ ပိသိတွာ လသုဏံ ပူတိတက္ကေန မဒ္ဒိတွာ သကလသရီရံ မက္ခေတွာ ဧကံ ကဌလံ ဃံသိတွာ ဝိဇ္ဈိတွာ သုတ္တကေန တဿ ဂီဝါယံ ဗန္ဓိတွာ နီဠပစ္ဆိယံယေဝ တံ ပက္ခိပိတွာ အဂမာသိ။ ပါရာဝတော အာဂန္တွာ တံ ဒိသွာ ‘‘ကာ ဧသာ ဗလာကာ မမ သဟာယဿ ပစ္ဆိယံ နိပန္နာ၊ စဏ္ဍော ဟိ သော အာဂန္တွာ ဃာတေယျာပိ န’’န္တိ ပရိဟာသံ ကရောန္တော ဒုတိယံ ဂါထမာဟ –

၁၃၆။

‘‘ကာယံ ဗလာကာ သိခိနီ၊ စောရီ လင်္ဃိပိတာမဟာ၊

ဩရံ ဗလာကေ အာဂစ္ဆ၊ စဏ္ဍော မေ ဝါယသော သခါ’’တိ။

သာ ဟေဋ္ဌာ (ဇာ။ အဋ္ဌ။ ၂။၃။၇၀) ဝုတ္တတ္ထာယေဝ။

တံ သုတွာ ကာကော တတိယံ ဂါထမာဟ –

၁၃၇။

‘‘အလဉှိ တေ ဇဂ္ဃိတာယေ၊ မမံ ဒိသွာန ဧဒိသံ၊

ဝိလူနံ သူဒပုတ္တေန၊ ပိဋ္ဌမဏ္ဍေန မက္ခိတ’’န္တိ။

တတ္ထ အလန္တိ ပဋိသေဓတ္ထေ နိပါတော။ ဇဂ္ဃိတာယေတိ ဟသိတုံ။ ဣဒံ ဝုတ္တံ ဟောတိ – ဣဒါနိ မံ ဧဒိသံ ဧဝံ ဒုက္ခပ္ပတ္တံ ဒိသွာ တဝ အလံ ဟသိတုံ၊ မာ ဧဒိသေ ကာလေ ပရိဟာသကေဠိံ ကရောဟီတိ။

သော ပရိဟာသကေဠိံ ကရောန္တောဝ ပုန စတုတ္ထံ ဂါထမာဟ –

၁၃၈။

‘‘သုနှာတော သုဝိလိတ္တောသိ၊ အန္နပါနေန တပ္ပိတော၊

ကဏ္ဌေ စ တေ ဝေဠုရိယော၊ အဂမာ နု ကဇင်္ဂလ’’န္တိ။

တတ္ထ ကဏ္ဌေ စ တေ ဝေဠုရိယောတိ အယံ တေ ဝေဠုရိယမဏိပိ ကဏ္ဌေ ပိဠန္ဓော၊ တွံ ဧတ္တကံ ကာလံ အမှာကံ ဧတံ န ဒဿေသီတိ ကပါလံ သန္ဓာယေဝမာဟ။ ကဇင်္ဂလန္တိ ဣဓ ဗာရာဏသီယေဝ ‘‘ကဇင်္ဂလာ’’တိ အဓိပ္ပေတာ။ ဣတော နိက္ခမိတွာ ကစ္စိ အန္တောနဂရံ ဂတောသီတိ ပုစ္ဆတိ။

တတော ကာကော ပဉ္စမံ ဂါထမာဟ –

၁၃၉။

‘‘မာ တေ မိတ္တော အမိတ္တော ဝါ၊ အဂမာသိ ကဇင်္ဂလံ၊

ပိဉ္ဆာနိ တတ္ထ လာယိတွာ၊ ကဏ္ဌေ ဗန္ဓန္တိ ဝဋ္ဋန’’န္တိ။

တတ္ထ ပိဉ္ဆာနီတိ ပတ္တာနိ။ တတ္ထ လာယိတွာတိ တသ္မိံ ဗာရာဏသိနဂရေ လုဉ္စိတွာ။ ဝဋ္ဋနန္တိ ကဌလိကံ။

တံ သုတွာ ပါရာဝတော ဩသာနဂါထမာဟ –

၁၄၀။

‘‘ပုနပါပဇ္ဇသီ သမ္မ၊ သီလဉှိ တဝ တာဒိသံ၊

န ဟိ မာနုသကာ ဘောဂါ၊ သုဘုဉ္ဇာ ဟောန္တိ ပက္ခိနာ’’တိ။

တတ္ထ ပုနပါပဇ္ဇသီတိ ပုနပိ ဧဝရူပံ အာပဇ္ဇိဿသိ။ ဧဝရူပဉှိ တေ သီလန္တိ။

ဣတိ နံ သော ဩဝဒိတွာ တတ္ထ အဝသိတွာ ပက္ခေ ပသာရေတွာ အညတ္ထ အဂမာသိ။ ကာကောပိ တတ္ထေဝ ဇီဝိတက္ခယံ ပါပုဏိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ လောလဘိက္ခု အနာဂါမိဖလေ ပတိဋ္ဌဟိ။ တဒါ ကာကော လောလဘိက္ခု အဟောသိ၊ ကပေါတော ပန အဟမေဝ အဟောသိန္တိ။

ကပေါတဇာတကဝဏ္ဏနာ ပဉ္စမာ။

အဍ္ဎဝဂ္ဂေါ တတိယော။

ဇာတကုဒ္ဒါနံ –

မဏိကုဏ္ဍလ သုဇာတာ၊ ဝေနသာခဉ္စ ဩရဂံ၊

ဃဋံ ကောရဏ္ဍိ လဋုကိ၊ ဓမ္မပါလံ မိဂံ တထာ။

သုယောနန္ဒီ ဝဏ္ဏာရောဟ၊ သီလံ ဟိရီ ခဇ္ဇောပနံ၊

အဟိ ဂုမ္ဗိယ သာဠိယံ၊ တစသာရံ မိတ္တဝိန္ဒံ။

ပလာသဉ္စေဝ ဒီဃိတိ၊ မိဂပေါတက မူသိကံ၊

ဓနုဂ္ဂဟော ကပေါတဉ္စ၊ ဇာတကာ ပဉ္စဝီသတိ။

ပဉ္စကနိပါတဝဏ္ဏနာ နိဋ္ဌိတာ။