📜

၇။ သတ္တကနိပါတော

၁။ ကုက္ကုဝဂ္ဂေါ

[၃၉၆] ၁။ ကုက္ကုဇာတကဝဏ္ဏနာ

ဒိယဍ္ဎကုက္ကူတိ ဣဒံ သတ္ထာ ဇေတဝနေ ဝိဟရန္တော ရာဇောဝါဒံ အာရဗ္ဘ ကထေသိ။ ပစ္စုပ္ပန္နဝတ္ထု တေသကုဏဇာတကေ (ဇာ။ ၂။၁၇။၁ အာဒယော) အာဝိ ဘဝိဿတိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော တဿ အတ္ထဓမ္မာနုသာသကော အမစ္စော အဟောသိ။ ရာဇာ အဂတိဂမနေ ပတိဋ္ဌာယ အဓမ္မေန ရဇ္ဇံ ကာရေသိ၊ ဇနပဒံ ပီဠေတွာ ဓနမေဝ သံဟရိ။ ဗောဓိသတ္တော ရာဇာနံ ဩဝဒိတုကာမော ဧကံ ဥပမံ ဥပဓာရေန္တော ဝိစရတိ၊ ရညော ဥယျာနေ ဝါသာဂါရံ ဝိပ္ပကတံ ဟောတိ အနိဋ္ဌိတစ္ဆဒနံ၊ ဒါရုကဏ္ဏိကံ အာရောပေတွာ ဂေါပါနသိယော ပဝေသိတမတ္တာ ဟောန္တိ။ ရာဇာ ကီဠနတ္ထာယ ဥယျာနံ ဂန္တွာ တတ္ထ ဝိစရိတွာ တံ ဂေဟံ ပဝိသိတွာ ဥလ္လောကေန္တော ကဏ္ဏိကမဏ္ဍလံ ဒိသွာ အတ္တနော ဥပရိပတနဘယေန နိက္ခမိတွာ ဗဟိ ဌိတော ပုန ဩလောကေတွာ ‘‘ကိံ နု ခေါ နိဿာယ ကဏ္ဏိကာ ဌိတာ၊ ကိံ နိဿာယ ဂေါပါနသိယော’’တိ စိန္တေတွာ ဗောဓိသတ္တံ ပုစ္ဆန္တော ပဌမံ ဂါထမာဟ –

၁။

‘‘ဒိယဍ္ဎကုက္ကူ ဥဒယေန ကဏ္ဏိကာ၊ ဝိဒတ္ထိယော အဋ္ဌ ပရိက္ခိပန္တိ နံ၊

သာ သိံသပါ၊ သာရမယာ အဖေဂ္ဂုကာ၊ ကုဟိံ ဌိတာ ဥပ္ပရိတော န ဓံသတီ’’တိ။

တတ္ထ ဒိယဍ္ဎကုက္ကူတိ ဒိယဍ္ဎရတနာ။ ဥဒယေနာတိ ဥစ္စတ္တေန။ ပရိက္ခိပန္တိ နန္တိ တံ ပနေတံ အဋ္ဌ ဝိဒတ္ထိယော ပရိက္ခိပန္တိ၊ ပရိက္ခေပတော အဋ္ဌဝိဒတ္ထိပမာဏာတိ ဝုတ္တံ ဟောတိ။ ကုဟိံ ဌိတာတိ ကတ္ထ ပတိဋ္ဌိတာ ဟုတွာ။ န ဓံသတီတိ န ပတတိ။

တံ သုတွာ ဗောဓိသတ္တော ‘‘လဒ္ဓါ ဒါနိ မေ ရညော ဩဝါဒတ္ထာယ ဥပမာ’’တိ စိန္တေတွာ ဣမာ ဂါထာ အာဟ –

၂။

‘‘ယာ တိံသတိ သာရမယာ အနုဇ္ဇုကာ၊ ပရိကိရိယ ဂေါပါနသိယော သမံ ဌိတာ၊

တာဟိ သုသင်္ဂဟိတာ ဗလသာ ပီဠိတာ၊ သမံ ဌိတာ ဥပ္ပရိတော န ဓံသတိ။

၃။

‘‘ဧဝမ္ပိ မိတ္တေဟိ ဒဠှေဟိ ပဏ္ဍိတော၊ အဘေဇ္ဇရူပေဟိ သုစီဟိ မန္တိဘိ၊

သုသင်္ဂဟီတော သိရိယာ န ဓံသတိ၊ ဂေါပါနသီဘာရဝဟာဝ ကဏ္ဏိကာ’’တိ။

တတ္ထ ယာ တိံသတိ သာရမယာတိ ယာ ဧတာ သာရရုက္ခမယာ တိံသတိ ဂေါပါနသိယော။ ပရိကိရိယာတိ ပရိဝါရေတွာ။ သမံ ဌိတာတိ သမဘာဂေန ဌိတာ။ ဗလသာ ပီဠိတာတိ တာဟိ တာဟိ ဂေါပါနသီဟိ ဗလေန ပီဠိတာ သုဋ္ဌု သင်္ဂဟိတာ ဧကာဗဒ္ဓါ ဟုတွာ။ ပဏ္ဍိတောတိ ဉာဏသမ္ပန္နော ရာဇာ။ သုစီဟီတိ သုစိသမာစာရေဟိ ကလျာဏမိတ္တေဟိ။ မန္တိဘီတိ မန္တကုသလေဟိ။ ဂေါပါနသီဘာရဝဟာဝ ကဏ္ဏိကာတိ ယထာ ဂေါပါနသီနံ ဘာရံ ဝဟမာနာ ကဏ္ဏိကာ န ဓံသတိ န ပတတိ၊ ဧဝံ ရာဇာပိ ဝုတ္တပ္ပကာရေဟိ မန္တီဟိ အဘိဇ္ဇဟဒယေဟိ သုသင်္ဂဟိတော သိရိတော န ဓံသတိ န ပတတိ န ပရိဟာယတိ။

ရာဇာ ဗောဓိသတ္တေ ကထေန္တေယေဝ အတ္တနော ကိရိယံ သလ္လက္ခေတွာ ကဏ္ဏိကာယ အသတိ ဂေါပါနသိယော န တိဋ္ဌန္တိ၊ ဂေါပါနသီဟိ အသင်္ဂဟိတာ ကဏ္ဏိကာ န တိဋ္ဌတိ၊ ဂေါပါနသီသု ဘိဇ္ဇန္တီသု ကဏ္ဏိကာ ပတတိ၊ ဧဝမေဝ အဓမ္မိကော ရာဇာ အတ္တနော မိတ္တာမစ္စေ စ ဗလကာယေ စ ဗြာဟ္မဏဂဟပတိကေ စ အသင်္ဂဏှန္တော တေသု ဘိဇ္ဇန္တေသု တေဟိ အသင်္ဂဟိတော ဣဿရိယာ ဓံသတိ၊ ရညာ နာမ ဓမ္မိကေန ဘဝိတဗ္ဗန္တိ။ အထဿ တသ္မိံ ခဏေ ပဏ္ဏာကာရတ္ထာယ မာတုလုင်္ဂံ အာဟရိံသု။ ရာဇာ ‘‘သဟာယ၊ ဣမံ မာတုလုင်္ဂံ ခါဒါ’’တိ ဗောဓိသတ္တံ အာဟ။ ဗောဓိသတ္တော တံ ဂဟေတွာ ‘‘မဟာရာဇ၊ ဣမံ ခါဒိတုံ အဇာနန္တာ တိတ္တကံ ဝါ ကရောန္တိ အမ္ဗိလံ ဝါ၊ ဇာနန္တာ ပန ပဏ္ဍိတာ တိတ္တကံ ဟာရေတွာ အမ္ဗိလံ အနီဟရိတွာ မာတုလုင်္ဂရသံ အနာသေတွာဝ ခါဒန္တီ’’တိ ရညော ဣမာယ ဥပမာယ ဓနသင်္ဃရဏူပါယံ ဒဿေန္တော ဒွေ ဂါထာ အဘာသိ –

၄။

‘‘ခရတ္တစံ ဗေလ္လံ ယထာပိ သတ္ထဝါ၊ အနာမသန္တောပိ ကရောတိ တိတ္တကံ၊

သမာဟရံ သာဒုံ ကရောတိ ပတ္ထိဝ၊ အသာဒုံ ကယိရာ တနုဗန္ဓမုဒ္ဓရံ။

၅။

‘‘ဧဝမ္ပိ ဂါမနိဂမေသု ပဏ္ဍိတော၊ အသာဟသံ ရာဇဓနာနိ သင်္ဃရံ၊

ဓမ္မာနုဝတ္တီ ပဋိပဇ္ဇမာနော၊ သ ဖာတိ ကယိရာ အဝိဟေဌယံ ပရ’’န္တိ။

တတ္ထ ခရတ္တစန္တိ ထဒ္ဓတစံ။ ဗေလ္လန္တိ မာတုလုင်္ဂံ။ ‘ဗေလ’’န္တိပိ ပါဌော၊ အယမေဝတ္ထော။ သတ္ထဝါတိ သတ္ထကဟတ္ထော။ အနာမသန္တောတိ ဗဟိတစံ တနုကမ္ပိ အတစ္ဆန္တော ဣဒံ ဖလံ တိတ္တကံ ကရောတိ။ သမာဟရန္တိ သမာဟရန္တော ဗဟိတစံ တစ္ဆန္တော အန္တော စ အမ္ဗိလံ အနီဟရန္တော တံ သာဒုံ ကရောတိ။ ပတ္ထိဝါတိ ရာဇာနံ အာလပတိ။ တနုဗန္ဓမုဒ္ဓရန္တိ တနုကံ ပန တစံ ဥဒ္ဓရန္တော သဗ္ဗသော တိတ္တကဿ အနပနီတတ္တာ တံ အသာဒုမေဝ ကယိရာ။ ဧဝန္တိ ဧဝံ ပဏ္ဍိတော ရာဇာပိ အသာဟသံ သာဟသိယာ တဏှာယ ဝသံ အဂစ္ဆန္တော အဂတိဂမနံ ပဟာယ ရဋ္ဌံ အပီဠေတွာ ဥပစိကာနံ ဝမ္မိကဝဍ္ဎနနိယာမေန မဓုကရာနံ ရေဏုံ ဂဟေတွာ မဓုကရဏနိယာမေန စ ဓနံ သင်္ဃရန္တော –

‘‘ဒါနံ သီလံ ပရိစ္စာဂံ၊ အဇ္ဇဝံ မဒ္ဒဝံ တပံ၊

အက္ကောဓံ အဝိဟိံသဉ္စ၊ ခန္တိဉ္စ အဝိရောဓန’’န္တိ။ –

ဣတိ ဣမေသံ ဒသန္နံ ရာဇဓမ္မာနံ အနုဝတ္တနေန ဓမ္မာနုဝတ္တီ ဟုတွာ ပဋိပဇ္ဇမာနော သော အတ္တနော စ ပရေသဉ္စ ဖာတိံ ဝဍ္ဎိံ ကရေယျ ပရံ အဝိဟေဌေန္တောယေဝါတိ။

ရာဇာ ဗောဓိသတ္တေန သဒ္ဓိံ မန္တေန္တော ပေါက္ခရဏီတီရံ ဂန္တွာ သုပုပ္ဖိတံ ဗာလသူရိယဝဏ္ဏံ ဥဒကေန အနုပလိတ္တံ ပဒုမံ ဒိသွာ အာဟ – ‘‘သဟာယ၊ ဣမံ ပဒုမံ ဥဒကေ သဉ္ဇာတမေဝ ဥဒကေန အလိမ္ပမာနံ ဌိတ’’န္တိ။ အထ နံ ဗောဓိသတ္တော ‘‘မဟာရာဇ၊ ရညာ နာမ ဧဝရူပေန ဘဝိတဗ္ဗ’’န္တိ ဩဝဒန္တော ဣမာ ဂါထာ အာဟ –

၆။

‘‘ဩဒါတမူလံ သုစိဝါရိသမ္ဘဝံ၊ ဇာတံ ယထာ ပေါက္ခရဏီသု အမ္ဗုဇံ၊

ပဒုမံ ယထာ အဂ္ဂိနိကာသိဖာလိမံ၊ န ကဒ္ဒမော န ရဇော န ဝါရိ လိမ္ပတိ။

၇။

‘‘ဧဝမ္ပိ ဝေါဟာရသုစိံ အသာဟသံ၊ ဝိသုဒ္ဓကမ္မန္တမပေတပါပကံ၊

န လိမ္ပတိ ကမ္မကိလေသ တာဒိသော၊ ဇာတံ ယထာ ပေါက္ခရဏီသု အမ္ဗုဇ’’န္တိ။

တတ္ထ ဩဒါတမူလန္တိ ပဏ္ဍရမူလံ။ အမ္ဗုဇန္တိ ပဒုမဿေဝ ဝေဝစနံ။ အဂ္ဂိနိကာသိဖာလိမန္တိ အဂ္ဂိနိကာသိနာ သူရိယေန ဖာလိတံ ဝိကသိတန္တိ အတ္ထော။ န ကဒ္ဒမော နရဇော န ဝါရိ လိမ္ပတီတိ နေဝ ကဒ္ဒမော န ရဇော န ဥဒကံ လိမ္ပတိ၊ န မက္ခေတီတိ အတ္ထော။ ‘‘လိပ္ပတိ’’စ္စေဝ ဝါ ပါဌော၊ ဘုမ္မတ္ထေ ဝါ ဧတာနိ ပစ္စတ္တဝစနာနိ၊ ဧတေသု ကဒ္ဒမာဒီသု န လိပ္ပတိ၊ န အလ္လီယတီတိ အတ္ထော။ ဝေါဟာရသုစိန္တိ ပေါရာဏကေဟိ ဓမ္မိကရာဇူဟိ လိခါပေတွာ ဌပိတဝိနိစ္ဆယဝေါဟာရေ သုစိံ၊ အဂတိဂမနံ ပဟာယ ဓမ္မေန ဝိနိစ္ဆယကာရကန္တိ အတ္ထော။ အသာဟသန္တိ ဓမ္မိကဝိနိစ္ဆယေ ဌိတတ္တာယေဝ သာဟသိကကိရိယာယ ဝိရဟိတံ။ ဝိသုဒ္ဓကမ္မန္တန္တိ တေနေဝ အသာဟသိကဋ္ဌေန ဝိသုဒ္ဓကမ္မန္တံ သစ္စဝါဒိံ နိက္ကောဓံ မဇ္ဈတ္တံ တုလာဘူတံ လောကဿ။ အပေတပါပကန္တိ အပဂတပါပကမ္မံ။ န လိမ္ပတိ ကမ္မကိလေသ တာဒိသောတိ တံ ရာဇာနံ ပါဏာတိပါတော အဒိန္နာဒါနံ ကာမေသုမိစ္ဆာစာရော မုသာဝါဒေါတိ အယံ ကမ္မကိလေသော န အလ္လီယတိ။ ကိံကာရဏာ? တာဒိသော ဇာတံ ယထာ ပေါက္ခရဏီသု အမ္ဗုဇံ။ တာဒိသော ဟိ ရာဇာ ယထာ ပေါက္ခရဏီသု ဇာတံ ပဒုမံ အနုပလိတ္တံ၊ ဧဝံ အနုပလိတ္တော နာမ ဟောတိ။

ရာဇာ ဗောဓိသတ္တဿ ဩဝါဒံ သုတွာ တတော ပဋ္ဌာယ ဓမ္မေန ရဇ္ဇံ ကာရေန္တော ဒါနာဒီနိ ပုညာနိ ကတွာ သဂ္ဂပရာယဏော အဟောသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ရာဇာ အာနန္ဒော အဟောသိ၊ ပဏ္ဍိတာမစ္စော ပန အဟမေဝ အဟောသိ’’န္တိ။

ကုက္ကုဇာတကဝဏ္ဏနာ ပဌမာ။

[၃၉၇] ၂။ မနောဇဇာတကဝဏ္ဏနာ

ယထာ စာပေါ နိန္နမတီတိ ဣဒံ သတ္ထာ ဝေဠုဝနေ ဝိဟရန္တော ဝိပက္ခသေဝကံ ဘိက္ခုံ အာရဗ္ဘ ကထေသိ။ ဝတ္ထု ပန ဟေဋ္ဌာ မဟိဠာမုခဇာတကေ (ဇာ။ ၁။၁။၂၆) ဝိတ္ထာရိတမေဝ။ တဒါ ပန သတ္ထာ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပေသ ဝိပက္ခသေဝကောယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော သီဟော ဟုတွာ သီဟိယာ သဒ္ဓိံ သံဝသန္တော ဒွေ ပေါတကေ လဘိ – ပုတ္တဉ္စ ဓီတရဉ္စ။ ပုတ္တဿ မနောဇောတိ နာမံ အဟောသိ၊ သော ဝယပ္ပတ္တော ဧကံ သီဟပေါတိကံ ဂဏှိ။ ဣတိ တေ ပဉ္စ ဇနာ အဟေသုံ။ မနောဇော ဝနမဟိံသာဒယော ဝဓိတွာ မံသံ အာဟရိတွာ မာတာပိတရော စ ဘဂိနိဉ္စ ပဇာပတိဉ္စ ပေါသေတိ။ သော ဧကဒိဝသံ ဂေါစရဘူမိယံ ဂိရိယံ နာမ သိင်္ဂါလံ ပလာယိတုံ အပ္ပဟောန္တံ ဥရေန နိပန္နံ ဒိသွာ ‘‘ကိံ၊ သမ္မာ’’တိ ပုစ္ဆိတွာ ‘‘ဥပဋ္ဌာတုကာမောမှိ၊ သာမီ’’တိ ဝုတ္တေ ‘‘သာဓု၊ ဥပဋ္ဌဟဿူ’’တိ တံ ဂဟေတွာ အတ္တနော ဝသနဂုဟံ အာနေသိ။ ဗောဓိသတ္တော တံ ဒိသွာ ‘‘တာတ မနောဇ၊ သိင်္ဂါလာ နာမ ဒုဿီလာ ပါပဓမ္မာ အကိစ္စေ နိယောဇေန္တိ၊ မာ ဧတံ အတ္တနော သန္တိကေ ကရီ’’တိ ဝါရေတုံ နာသက္ခိ။

အထေကဒိဝသံ သိင်္ဂါလော အဿမံသံ ခါဒိတုကာမော မနောဇံ အာဟ – ‘‘သာမိ၊ အမှေဟိ ဌပေတွာ အဿမံသံ အညံ အခါဒိတပုဗ္ဗံ နာမ နတ္ထိ၊ အဿံ ဂဏှိဿာမာ’’တိ။ ‘‘ကဟံ ပန၊ သမ္မ၊ အဿာ ဟောန္တီ’’တိ? ‘‘ဗာရာဏသိယံ နဒီတီရေ’’တိ။ သော တဿ ဝစနံ ဂဟေတွာ တေန သဒ္ဓိံ အဿာနံ နဒိယာ နှာနဝေလာယံ ဂန္တွာ ဧကံ အဿံ ဂဟေတွာ ပိဋ္ဌိယံ အာရောပေတွာ ဝေဂေန အတ္တနော ဂုဟာဒွါရမေဝ အာဂတော။ အထဿ ပိတာ အဿမံသံ ခါဒိတွာ ‘‘တာတ၊ အဿာ နာမ ရာဇဘောဂါ၊ ရာဇာနော စ နာမ အနေကမာယာ ကုသလေဟိ ဓနုဂ္ဂဟေဟိ ဝိဇ္ဈာပေန္တိ၊ အဿမံသခါဒနသီဟာ နာမ ဒီဃာယုကာ န ဟောန္တိ၊ ဣတော ပဋ္ဌာယ မာ အဿံ ဂဏှီ’’တိ အာဟ။ သော ပိတု ဝစနံ အကတွာ ဂဏှတေဝ။ ‘‘သီဟော အဿေ ဂဏှာတီ’’တိ သုတွာ ရာဇာ အန္တောနဂရေယေဝ အဿာနံ ပေါက္ခရဏိံ ကာရာပေသိ။ တတောပိ အာဂန္တွာ ဂဏှိယေဝ။ ရာဇာ အဿသာလံ ကာရေတွာ အန္တောသာလာယမေဝ တိဏောဒကံ ဒါပေသိ။ သီဟော ပါကာရမတ္ထကေန ဂန္တွာ အန္တောသာလာတောပိ ဂဏှိယေဝ။

ရာဇာ ဧကံ အက္ခဏဝေဓိံ ဓနုဂ္ဂဟံ ပက္ကောသာပေတွာ ‘‘သက္ခိဿသိ တာတ၊ သီဟံ ဝိဇ္ဈိတု’’န္တိ အာဟ။ သော ‘‘သက္ကောမီ’’တိ ဝတွာ ပါကာရံ နိဿာယ သီဟဿ အာဂမနမဂ္ဂေ အဋ္ဋကံ ကာရေတွာ အဋ္ဌာသိ။ သီဟော အာဂန္တွာ ဗဟိသုသာနေ သိင်္ဂါလံ ဌပေတွာ အဿဂဟဏတ္ထာယ နဂရံ ပက္ခန္ဒိ။ ဓနုဂ္ဂဟော အာဂမနကာလေ ‘‘အတိတိခိဏော ဝေဂေါ’’တိ သီဟံ အဝိဇ္ဈိတွာ အဿံ ဂဟေတွာ ဂမနကာလေ ဂရုဘာရတာယ ဩလီနဝေဂံ သီဟံ တိခိဏေန နာရာစေန ပစ္ဆာဘာဂေ ဝိဇ္ဈိ။ နာရာစော ပုရိမကာယေန နိက္ခမိတွာ အာကာသံ ပက္ခန္ဒိ။ သီဟော ‘‘ဝိဒ္ဓါသ္မီ’’တိ ဝိရဝိ။ ဓနုဂ္ဂဟော တံ ဝိဇ္ဈိတွာ အသနိ ဝိယ ဇိယံ ပေါထေသိ။ သိင်္ဂါလော သီဟဿ စ ဇိယာယ စ သဒ္ဒံ သုတွာ ‘‘သဟာယော မေ ဓနုဂ္ဂဟေန ဝိဇ္ဈိတွာ မာရိတော ဘဝိဿတိ၊ မတကေန ဟိ သဒ္ဓိံ ဝိဿာသော နာမ နတ္ထိ၊ ဣဒါနိ မမ ပကတိယာ ဝသနဝနမေဝ ဂမိဿာမီ’’တိ အတ္တနာဝ သဒ္ဓိံ သလ္လပန္တော ဒွေ ဂါထာ အဘာသိ –

၈။

‘‘ယထာ စာပေါ နိန္နမတိ၊ ဇိယာ စာပိ နိကူဇတိ၊

ဟညတေ နူန မနောဇော၊ မိဂရာဇာ သခါ မမ။

၉။

‘‘ဟန္ဒ ဒါနိ ဝနန္တာနိ၊ ပက္ကမာမိ ယထာသုခံ၊

နေတာဒိသာ သခါ ဟောန္တိ၊ လဗ္ဘာ မေ ဇီဝတော သခါ’’တိ။

တတ္ထ ယထာတိ ယေနာကာရေနေဝ စာပေါ နိန္နမတိ။ ဟညတေ နူနာတိ နူန ဟညတိ။ နေတာဒိသာတိ ဧဝရူပါ မတကာ သဟာယာ နာမ န ဟောန္တိ။ လဗ္ဘာ မေတိ ဇီဝတော မမ သဟာယော နာမ သက္ကာ လဒ္ဓုံ။

သီဟောပိ ဧကဝေဂေန ဂန္တွာ အဿံ ဂုဟာဒွါရေ ပါတေတွာ သယမ္ပိ မရိတွာ ပတိ။ အထဿ ဉာတကာ နိက္ခမိတွာ တံ လောဟိတမက္ခိတံ ပဟာရမုခေဟိ ပဂ္ဃရိတလောဟိတံ ပါပဇနသေဝိတာယ ဇီဝိတက္ခယံ ပတ္တံ အဒ္ဒသံသု၊ ဒိသွာ စဿ မာတာ ပိတာ ဘဂိနီ ပဇာပတီတိ ပဋိပါဋိယာ စတဿော ဂါထာ ဘာသိံသု –

၁၀။

‘‘န ပါပဇနသံသေဝီ၊ အစ္စန္တံ သုခမေဓတိ၊

မနောဇံ ပဿ သေမာနံ၊ ဂိရိယဿာနုသာသနီ။

၁၁။

‘‘န ပါပသမ္ပဝင်္ကေန၊ မာတာ ပုတ္တေန နန္ဒတိ၊

မနောဇံ ပဿ သေမာနံ၊ အစ္ဆန္နံ သမှိ လောဟိတေ။

၁၂။

‘‘ဧဝမာပဇ္ဇတေ ပေါသော၊ ပါပိယော စ နိဂစ္ဆတိ၊

ယော ဝေ ဟိတာနံ ဝစနံ၊ န ကရောတိ အတ္ထဒဿိနံ။

၁၃။

‘‘ဧဝဉ္စ သော ဟောတိ တတော စ ပါပိယော၊ ယော ဥတ္တမော အဓမဇနူပသေဝီ၊

ပဿုတ္တမံ အဓမဇနူပသေဝိတံ၊ မိဂါဓိပံ သရဝရဝေဂနိဒ္ဓုတ’’န္တိ။

တတ္ထ အစ္စန္တံ သုခမေဓတီတိ န စိရံ သုခံ လဘတိ။ ဂိရိယဿာနုသာသနီတိ အယံ ဧဝရူပါ ဂိရိယဿာနုသာသနီတိ ဂရဟန္တော အာဟ။ ပါပသမ္ပဝင်္ကေနာတိ ပါပေသု သမ္ပဝင်္ကေန ပါပသဟာယေန။ အစ္ဆန္နန္တိ နိမုဂ္ဂံ။ ပါပိယော စ နိဂစ္ဆတီတိ ပါပဉ္စ ဝိန္ဒတိ။ ဟိတာနန္တိ အတ္ထကာမာနံ။ အတ္ထဒဿိနန္တိ အနာဂတအတ္ထံ ပဿန္တာနံ။ ပါပိယောတိ ပါပတရော။ အဓမဇနူပသေဝီတိ အဓမဇနံ ဥပသေဝီ။ ဥတ္တမန္တိ သရီရဗလေန ဇေဋ္ဌကံ။

ပစ္ဆိမာ အဘိသမ္ဗုဒ္ဓဂါထာ –

၁၄။

‘‘နိဟီယတိ ပုရိသော နိဟီနသေဝီ၊ န စ ဟာယေထ ကဒါစိ တုလျသေဝီ၊

သေဋ္ဌမုပဂမံ ဥဒေတိ ခိပ္ပံ၊ တသ္မာတ္တနာ ဥတ္တရိတရံ ဘဇေထာ’’တိ။

တတ္ထ နိဟီယတီတိ ဘိက္ခဝေ၊ နိဟီနသေဝီ နာမ မနောဇော သီဟော ဝိယ နိဟီယတိ ပရိဟာယတိ ဝိနာသံ ပါပုဏာတိ။ တုလျသေဝီတိ သီလာဒီဟိ အတ္တနာ သဒိသံ သေဝမာနော န ဟာယတိ၊ ဝဍ္ဎိယေဝ ပနဿ ဟောတိ။ သေဋ္ဌမုပဂမန္တိ သီလာဒီဟိ ဥတ္တရိတရံယေဝ ဥပဂစ္ဆန္တော။ ဥဒေတိ ခိပ္ပန္တိ သီဃမေဝ သီလာဒီဟိ ဂုဏေဟိ ဥဒေတိ၊ ဝုဒ္ဓိံ ဥပဂစ္ဆတီတိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ဝိပက္ခသေဝကော သောတာပတ္တိဖလေ ပတိဋ္ဌဟိ။

တဒါ သိင်္ဂါလော ဒေဝဒတ္တော အဟောသိ၊ မနောဇော ဝိပက္ခသေဝကော၊ ဘဂိနီ ဥပ္ပလဝဏ္ဏာ၊ ဘရိယာ ခေမာ ဘိက္ခုနီ၊ မာတာ ရာဟုလမာတာ၊ ပိတာ သီဟရာဇာ ပန အဟမေဝ အဟောသိန္တိ။

မနောဇဇာတကဝဏ္ဏနာ ဒုတိယာ။

[၃၉၈] ၃။ သုတနုဇာတကဝဏ္ဏနာ

ရာဇာ တေ ဘတ္တန္တိ ဣဒံ သတ္ထာ ဇေတဝနေ ဝိဟရန္တော မာတုပေါသကဘိက္ခုံ အာရဗ္ဘ ကထေသိ။ ဝတ္ထု သာမဇာတကေ (ဇာ။ ၂။၂၂။၂၉၆ အာဒယော) အာဝိ ဘဝိဿတိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဒုဂ္ဂတဂဟပတိကုလေ နိဗ္ဗတ္တိ၊ သုတနူတိဿ နာမံ အကံသု။ သော ဝယပ္ပတ္တော ဘတိံ ကတွာ မာတာပိတရော ပေါသေတွာ ပိတရိ ကာလကတေ မာတရံ ပေါသေတိ။ တသ္မိံ ပန ကာလေ ဗာရာဏသိရာဇာ မိဂဝိတ္တကော အဟောသိ။ သော ဧကဒိဝသံ မဟန္တေန ပရိဝါရေန ယောဇနဒွိယောဇနမတ္တံ အရညံ ပဝိသိတွာ ‘‘ယဿ ဌိတဋ္ဌာနေန မိဂေါ ပလာယတိ၊ သော ဣမံ နာမ ဇိတော’’တိ သဗ္ဗေသံ အာရောစာပေသိ။ အမစ္စာ ရညော ဓုဝမဂ္ဂဋ္ဌာနေ ကောဋ္ဌကံ ဆာဒေတွာ အဒံသု။ မနုဿေဟိ မိဂါနံ ဝသနဋ္ဌာနာနိ ပရိဝါရေတွာ ဥန္နာဒေန္တေဟိ ဥဋ္ဌာပိတေသု မိဂေသု ဧကော ဧဏိမိဂေါ ရညော ဌိတဋ္ဌာနံ ပဋိပဇ္ဇိ။ ရာဇာ ‘‘တံ ဝိဇ္ဈိဿာမီ’’တိ သရံ ခိပိ ။ ဥဂ္ဂဟိတမာယော မိဂေါ သရံ မဟာဖာသုကာဘိမုခံ အာဂစ္ဆန္တံ ဉတွာ ပရိဝတ္တိတွာ သရေန ဝိဒ္ဓါ ဝိယ ဟုတွာ ပတိ။ ရာဇာ ‘‘မိဂေါ မေ ဝိဒ္ဓါ’’တိ ဂဟဏတ္ထာယ ဓာဝိ။ မိဂေါ ဥဋ္ဌာယ ဝါတဝေဂေန ပလာယိ၊ အမစ္စာဒယော ရာဇာနံ အဝဟသိံသု။ သော မိဂံ အနုဗန္ဓိတွာ ကိလန္တကာလေ ခဂ္ဂေန ဒွိဓာ ဆိန္ဒိတွာ ဧကသ္မိံ ဒဏ္ဍကေ လဂ္ဂိတွာ ကာဇံ ဝဟန္တော ဝိယ အာဂစ္ဆန္တော ‘‘ထောကံ ဝိဿမိဿာမီ’’တိ မဂ္ဂသမီပေ ဌိတံ ဝဋရုက္ခံ ဥပဂန္တွာ နိပဇ္ဇိတွာ နိဒ္ဒံ ဩက္ကမိ။

တသ္မိံ ပန ဝဋရုက္ခေ နိဗ္ဗတ္တော မဃဒေဝေါ နာမ ယက္ခော တတ္ထ ပဝိဋ္ဌေ ဝေဿဝဏဿ သန္တိကာ ခါဒိတုံ လဘိ။ သော ရာဇာနံ ဥဋ္ဌာယ ဂစ္ဆန္တံ ‘‘တိဋ္ဌ ဘက္ခောသိ မေ’’တိ ဟတ္ထေ ဂဏှိ။ ‘‘တွံ ကောနာမောသီ’’တိ? ‘‘အဟံ ဣဓ နိဗ္ဗတ္တယက္ခော၊ ဣမံ ဌာနံ ပဝိဋ္ဌကေ ခါဒိတုံ လဘာမီ’’တိ။ ရာဇာ သတိံ ဥပဋ္ဌပေတွာ ‘‘ကိံ အဇ္ဇေဝ မံ ခါဒိဿသိ၊ ဥဒါဟု နိဗဒ္ဓံ ခါဒိဿသီ’’တိ ပုစ္ဆိ။ ‘‘လဘန္တော နိဗဒ္ဓံ ခါဒိဿာမီ’’တိ။ ရာဇာ ‘‘ဣမံ အဇ္ဇ မိဂံ ခါဒိတွာ မံ ဝိဿဇ္ဇေဟိ၊ အဟံ တေ သွေ ပဋ္ဌာယ ဧကာယ ဘတ္တပါတိယာ သဒ္ဓိံ ဧကံ မနုဿံ ပေသေဿာမီ’’တိ။ ‘‘တေန ဟိ အပ္ပမတ္တော ဟောဟိ၊ အပေသိတဒိဝသေ တညေဝ ခါဒိဿာမီ’’တိ။ ‘‘အဟံ ဗာရာဏသိရာဇာ၊ မယှံ အဝိဇ္ဇမာနံ နာမ နတ္ထီ’’တိ။ ယက္ခော ပဋိညံ ဂဟေတွာ တံ ဝိဿဇ္ဇေသိ။ သော နဂရံ ပဝိသိတွာ တမတ္ထံ ဧကဿ အတ္ထစရကဿ အမစ္စဿ ကထေတွာ ‘‘ဣဒါနိ ကိံ ကာတဗ္ဗ’’န္တိ ပုစ္ဆိ။ ‘‘ဒိဝသပရိစ္ဆေဒေါ ကတော၊ ဒေဝါ’’တိ? ‘‘န ကတော’’တိ။ ‘‘အယုတ္တံ ဝေါ ကတံ၊ ဧဝံ သန္တေပိ မာ စိန္တယိတ္ထ၊ ဗဟူ ဗန္ဓနာဂါရေ မနုဿာ’’တိ။ ‘‘တေန ဟိ တွံ ဧတံ ကမ္မံ ကရ၊ မယှံ ဇီဝိတံ ဒေဟီ’’တိ။

အမစ္စော ‘‘သာဓူ’’တိ သမ္ပဋိစ္ဆိတွာ ဒေဝသိကံ ဗန္ဓနာဂါရတော မနုဿံ နီဟရိတွာ ဘတ္တပါတိံ ဂဟေတွာ ကဉ္စိ အဇာနာပေတွာဝ ယက္ခဿ ပေသေသိ။ ယက္ခော ဘတ္တံ ဘုဉ္ဇိတွာ မနုဿံ ခါဒတိ။ အပရဘာဂေ ဗန္ဓနာဂါရာနိ နိမ္မနုဿာနိ ဇာတာနိ။ ရာဇာ ဘတ္တဟာရကံ အလဘန္တော မရဏဘယေန ကမ္ပိ။ အထ နံ အမစ္စော အဿာသေတွာ ‘‘ဒေဝ၊ ဇီဝိတာသာတော ဓနာသာဝ ဗလဝတရာ၊ ဟတ္ထိက္ခန္ဓေ သဟဿဘဏ္ဍိကံ ဌပေတွာ ‘ကော ဣမံ ဓနံ ဂဟေတွာ ယက္ခဿ ဘတ္တံ အာဒါယ ဂမိဿတီ’တိ ဘေရိံ စရာပေမာ’’တိ ဝတွာ တထာ ကာရေသိ။ အထ တံ သုတွာ ဗောဓိသတ္တော စိန္တေသိ ‘‘အဟံ ဘတိယာ မာသကဍ္ဎမာသကံ သင်္ဃရိတွာ ကိစ္ဆေန မာတရံ ပေါသေမိ၊ ဣမံ ဓနံ ဂဟေတွာ မာတု ဒတွာ ယက္ခဿ သန္တိကံ ဂမိဿာမိ၊ သစေ ယက္ခံ ဒမေတုံ သက္ခိဿာမိ၊ ဣစ္စေတံ ကုသလံ၊ နော စေ သက္ခိဿာမိ၊ မာတာ မေ သုခံ ဇီဝိဿတီ’’တိ။ သော တမတ္ထံ မာတု အာရောစေတွာ ‘‘အလံ တာတ၊ န မမ အတ္ထော ဓနေနာ’’တိ ဒွေ ဝါရေ ပဋိက္ခိပိတွာ တတိယဝါရေ တံ အနာပုစ္ဆိတွာဝ ‘‘အာဟရထ၊ အယျ၊ သဟဿံ၊ အဟံ ဘတ္တံ ဟရိဿာမီ’’တိ သဟဿံ ဂဟေတွာ မာတု ဒတွာ ‘‘အမ္မ ၊ မာ စိန္တယိ ၊ အဟံ ယက္ခံ ဒမေတွာ မဟာဇနဿ သောတ္ထိံ ကရိဿာမိ၊ အဇ္ဇေဝ တဝ အဿုကိလိန္နမုခံ ဟာသာပေန္တောဝ အာဂစ္ဆိဿာမီ’’တိ မာတရံ ဝန္ဒိတွာ ရာဇပုရိသေဟိ သဒ္ဓိံ ရညော သန္တိကံ ဂန္တွာ ဝန္ဒိတွာ အဋ္ဌာသိ။

တတော ရညာ ‘‘တာတ၊ တွံ ဘတ္တံ ဟရိဿသီ’’တိ ဝုတ္တေ ‘‘အာမ၊ ဒေဝါ’’တိ အာဟ။ ‘‘ကိံ တေ လဒ္ဓုံ ဝဋ္ဋတီ’’တိ? ‘‘တုမှာကံ သုဝဏ္ဏပါဒုကာ၊ ဒေဝါ’’တိ။ ‘‘ကိံကာရဏာ’’တိ? ‘‘ဒေဝ၊ သော ယက္ခော အတ္တနော ရုက္ခမူလေ ဘူမိယံ ဌိတကေ ခါဒိတုံ လဘတိ၊ အဟံ ဧတဿ သန္တကဘူမိယံ အဋ္ဌတွာ ပါဒုကာသု ဌဿာမီ’’တိ။ ‘‘အညံ ကိံ လဒ္ဓုံ ဝဋ္ဋတီ’’တိ? ‘‘တုမှာကံ ဆတ္တံ၊ ဒေဝါ’’တိ။ ‘‘ဣဒံ ကိမတ္ထာယာ’’တိ? ‘‘ဒေဝ၊ ယက္ခော အတ္တနော ရုက္ခစ္ဆာယာယ ဌိတကေ ခါဒိတုံ လဘတိ၊ အဟံ တဿ ရုက္ခစ္ဆာယာယ အဋ္ဌတွာ ဆတ္တစ္ဆာယာယ ဌဿာမီ’’တိ။ ‘‘အညံ ကိံ လဒ္ဓုံ ဝဋ္ဋတီ’’တိ။ ‘‘တုမှာကံ ခဂ္ဂံ၊ ဒေဝါ’’တိ။ ‘‘ဣမိနာ ကော အတ္ထော’’တိ? ‘‘ဒေဝ၊ အမနုဿာပိ အာဝုဓဟတ္ထာနံ ဘာယန္တိယေဝါ’’တိ။ ‘‘အညံ ကိံ လဒ္ဓုံ ဝဋ္ဋတီ’’တိ? ‘‘သုဝဏ္ဏပါတိံ ပူရေတွာ တုမှာကံ ဘုဉ္ဇနကဘတ္တံ ဒေထ၊ ဒေဝါ’’တိ။ ‘‘ကိံကာရဏာ၊ တာတာ’’တိ? ‘‘ဒေဝ၊ မာဒိသဿ နာမ ပဏ္ဍိတဿ ပုရိသဿ မတ္တိကပါတိယာ လူခဘောဇနံ ဟရိတုံ အနနုစ္ဆဝိက’’န္တိ။ ‘‘သာဓု၊ တာတာ’’တိ ရာဇာ သဗ္ဗံ ဒါပေတွာ တဿ ဝေယျာဝစ္စကရေ ပဋိပါဒေသိ။

ဗောဓိသတ္တော ‘‘မဟာရာဇ၊ မာ ဘာယိတ္ထ၊ အဇ္ဇာဟံ ယက္ခံ ဒမေတွာ တုမှာကံ သောတ္ထိံ ကတွာ အာဂမိဿာမီ’’တိ ရာဇာနံ ဝန္ဒိတွာ ဥပကရဏာနိ ဂါဟာပေတွာ တတ္ထ ဂန္တွာ မနုဿေ ရုက္ခဿာဝိဒူရေ ဌပေတွာ သုဝဏ္ဏပါဒုကံ အာရုယှ ခဂ္ဂံ သန္နယှိတွာ သေတစ္ဆတ္တံ မတ္ထကေ ကတွာ ကဉ္စနပါတိယာ ဘတ္တံ ဂဟေတွာ ယက္ခဿ သန္တိကံ ပါယာသိ။ ယက္ခော မဂ္ဂံ ဩလောကေန္တော တံ ဒိသွာ ‘‘အယံ ပုရိသော န အညေသု ဒိဝသေသု အာဂမနနိယာမေန ဧတိ၊ ကိံ နု ခေါ ကာရဏ’’န္တိ စိန္တေသိ။ ဗောဓိသတ္တောပိ ရုက္ခသမီပံ ဂန္တွာ အသိတုဏ္ဍေန ဘတ္တပါတိံ အန္တောဆာယာယ ကရိတွာ ဆာယာယ ပရိယန္တေ ဌိတော ပဌမံ ဂါထမာဟ။

၁၅။

‘‘ရာဇာ တေ ဘတ္တံ ပါဟေသိ၊ သုစိံ မံသူပသေစနံ၊

မဃဒေဝသ္မိံ အဓိဝတ္ထေ၊ ဧဟိ နိက္ခမ္မ ဘုဉ္ဇသူ’’တိ။

တတ္ထ ပါဟေသီတိ ပဟိဏိ။ မဃဒေဝသ္မိံ အဓိဝတ္ထေတိ မဃဒေဝေါတိ ဝဋရုက္ခော ဝုစ္စတိ၊ တသ္မိံ အဓိဝတ္ထေတိ ဒေဝတံ အာလပတိ။

တံ သုတွာ ယက္ခော ‘‘ဣမံ ပုရိသံ ဝဉ္စေတွာ အန္တောဆာယာယ ပဝိဋ္ဌံ ခါဒိဿာမီ’’တိ စိန္တေတွာ ဒုတိယံ ဂါထမာဟ –

၁၆။

‘‘ဧဟိ မာဏဝ ဩရေန၊ ဘိက္ခမာဒါယ သူပိတံ၊

တွဉ္စ မာဏဝ ဘိက္ခာ စ၊ ဥဘော ဘက္ခာ ဘဝိဿထာ’’တိ။

တတ္ထ ဘိက္ခန္တိ မမ နိဗဒ္ဓဘိက္ခံ။ သူပိတန္တိ သူပသမ္ပန္နံ။

တတော ဗောဓိသတ္တော ဒွေ ဂါထာ အဘာသိ –

၁၇။

‘‘အပ္ပကေန တုဝံ ယက္ခ၊ ထုလ္လမတ္ထံ ဇဟိဿသိ၊

ဘိက္ခံ တေ နာဟရိဿန္တိ၊ ဇနာ မရဏသညိနော။

၁၈။

‘‘လဒ္ဓါယ ယက္ခာ တဝ နိစ္စဘိက္ခံ၊ သုစိံ ပဏီတံ ရသသာ ဥပေတံ၊

ဘိက္ခဉ္စ တေ အာဟရိယော နရော ဣဓ၊ သုဒုလ္လဘော ဟေဟိတိ ဘက္ခိတေ မယီ’’တိ။

တတ္ထ ထုလ္လမတ္ထန္တိ အပ္ပကေန ကာရဏေန မဟန္တံ အတ္ထံ ဇဟိဿသီတိ ဒဿေတိ။ နာဟရိဿန္တီတိ ဣတော ပဋ္ဌာယ မရဏသညိနော ဟုတွာ န အာဟရိဿန္တိ၊ အထ တွံ မိလာတသာခေါ ဝိယ ရုက္ခော နိရာဟာရော ဒုဗ္ဗလော ဘဝိဿသီတိ။ လဒ္ဓါယန္တိ လဒ္ဓအယံ လဒ္ဓါဂမနံ။ ဣဒံ ဝုတ္တံ ဟောတိ – သမ္မ ယက္ခ၊ ယံ အဟံ အဇ္ဇ အာဟရိံ၊ ဣဒံ တဝ နိစ္စဘိက္ခံ သုစိံ ပဏီတံ ဥတ္တမံ ရသေန ဥပေတံ လဒ္ဓါဂမနံ ဒေဝသိကံ တေ အာဂစ္ဆိဿတိ။ အာဟရိယောတိ အာဟရဏကော။ ဣဒံ ဝုတ္တံ ဟောတိ – ‘‘သစေ တွံ ဣမံ ဘိက္ခံ ဂဟေတွာ အာဂတံ မံ ဘက္ခသိ၊ အထေဝံ မယိ ဘက္ခိတေ ဘိက္ခဉ္စ တေ အာဟရဏကော အညော နရော ဣဓ သုဒုလ္လဘော ဘဝိဿတိ။ ကိံကာရဏာ? မာဒိသော ဟိ ဗာရာဏသိယံ အညော ပဏ္ဍိတမနုဿော နာမ နတ္ထိ၊ မယိ ပန ခါဒိတေ သုတနုပိ နာမ ယက္ခေန ခါဒိတော၊ အညဿ ကဿ သော လဇ္ဇိဿတီ’’တိ ဘတ္တာဟရဏကံ န လဘိဿသိ၊ အထ တေ ဣတော ပဋ္ဌာယ ဘောဇနံ ဒုလ္လဘံ ဘဝိဿတိ၊ အမှာကမ္ပိ ရာဇာနံ ဂဏှိတုံ န လဘိဿသိ။ ကသ္မာ? ရုက္ခတော ဗဟိဘာဝေန။ သစေ ပနိဒံ ဘတ္တံ ဘုဉ္ဇိတွာ မံ ပဟိဏိဿသိ၊ အဟံ တေ ရညော ကထေတွာ နိဗဒ္ဓံ ဘတ္တံ ပေသေဿာမိ၊ အတ္တာနမ္ပိ စ တေ ခါဒိတုံ န ဒဿာမိ၊ အဟမ္ပိ တဝ သန္တိကေ ဌာနေ န ဌဿာမိ၊ ပါဒုကာသု ဌဿာမိ၊ ရုက္ခစ္ဆာယာယမ္ပိ တေ န ဌဿာမိ၊ အတ္တနော ဆတ္တစ္ဆာယာယမေဝ ဌဿာမိ၊ သစေ ပန မယာ သဒ္ဓိံ ဝိရုဇ္ဈိဿသိ၊ ခဂ္ဂေန တံ ဒွိဓာ ဘိန္ဒိဿာမိ ၊ အဟဉှိ အဇ္ဇ ဧတဒတ္ထမေဝ သဇ္ဇော ဟုတွာ အာဂတောတိ။ ဧဝံ ကိရ နံ မဟာသတ္တော တဇ္ဇေသိ။

ယက္ခော ‘‘ယုတ္တရူပံ မာဏဝေါ ဝဒတီ’’တိ သလ္လက္ခေတွာ ပသန္နစိတ္တော ဒွေ ဂါထာ အဘာသိ –

၁၉။

‘‘မမေဝ သုတနော အတ္ထော၊ ယထာ ဘာသသိ မာဏဝ၊

မယာ တွံ သမနုညာတော၊ သောတ္ထိံ ပဿာဟိ မာတရံ။

၂၀။

‘‘ခဂ္ဂံ ဆတ္တဉ္စ ပါတိဉ္စ၊ ဂစ္ဆမာဒါယ မာဏဝ၊

သောတ္ထိံ ပဿတု တေ မာတာ၊ တွဉ္စ ပဿာဟိ မာတရ’’န္တိ။

တတ္ထ သုတနောတိ ဗောဓိသတ္တံ အာလပတိ။ ယထာ ဘာသသီတိ ယထာ တွံ ဘာသသိ၊ တထာ ယော ဧသ တယာ ဘာသိတော အတ္ထော၊ ဧသော မမေဝတ္ထော၊ မယှမေဝ ဝဍ္ဎီတိ။

ယက္ခဿ ကထံ သုတွာ ဗောဓိသတ္တော ‘‘မမ ကမ္မံ နိပ္ဖန္နံ၊ ဒမိတော မေ ယက္ခော၊ ဗဟုဉ္စ ဓနံ လဒ္ဓံ၊ ရညော စ ဝစနံ ကတ’’န္တိ တုဋ္ဌစိတ္တော ယက္ခဿ အနုမောဒနံ ကရောန္တော ဩသာနဂါထမာဟ –

၂၁။

‘‘ဧဝံ ယက္ခ သုခီ ဟောဟိ၊ သဟ သဗ္ဗေဟိ ဉာတိဘိ၊

ဓနဉ္စ မေ အဓိဂတံ၊ ရညော စ ဝစနံ ကတ’’န္တိ။ –

ဝတွာ စ ပန ယက္ခံ အာမန္တေတွာ ‘‘သမ္မ၊ တွံ ပုဗ္ဗေ အကုသလကမ္မံ ကတွာ ကက္ခဠော ဖရုသော ပရေသံ လောဟိတမံသဘက္ခော ယက္ခော ဟုတွာ နိဗ္ဗတ္တော၊ ဣတော ပဋ္ဌာယ ပါဏာတိပါတာဒီနိ မာ ကရီ’’တိ သီလေ စ အာနိသံသံ၊ ဒုဿီလျေ စ အာဒီနဝံ ကထေတွာ ယက္ခံ ပဉ္စသု သီလေသု ပတိဋ္ဌာပေတွာ ‘‘ကိံ တေ အရညဝါသေန၊ ဧဟိ နဂရဒွါရေ တံ နိသီဒါပေတွာ အဂ္ဂဘတ္တလာဘိံ ကရောမီ’’တိ ယက္ခေန သဒ္ဓိံ နိက္ခမိတွာ ခဂ္ဂါဒီနိ ယက္ခံ ဂါဟာပေတွာ ဗာရာဏသိံ အဂမာသိ။ ‘‘သုတနု မာဏဝေါ ယက္ခံ ဂဟေတွာ ဧတီ’’တိ ရညော အာရောစေသုံ။ ရာဇာ အမစ္စပရိဝုတော ဗောဓိသတ္တဿ ပစ္စုဂ္ဂမနံ ကတွာ ယက္ခံ နဂရဒွါရေ နိသီဒါပေတွာ အဂ္ဂဘတ္တလာဘိနံ ကတွာ နဂရံ ပဝိသိတွာ ဘေရိံ စရာပေတွာ နာဂရေ သန္နိပါတာပေတွာ ဗောဓိသတ္တဿ ဂုဏံ ကထေတွာ သေနာပတိဋ္ဌာနံ အဒါသိ။ အယဉ္စ ဗောဓိသတ္တဿ ဩဝါဒေ ဌတွာ ဒါနာဒီနိ ပုညာနိ ကတွာ သဂ္ဂပရာယဏော အဟောသိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ မာတုပေါသကဘိက္ခု သောတာပတ္တိဖလေ ပတိဋ္ဌဟိ။ တဒါ ယက္ခော အင်္ဂုလိမာလော အဟောသိ၊ ရာဇာ အာနန္ဒော၊ မာဏဝေါ ပန အဟမေဝ အဟောသိန္တိ။

သုတနုဇာတကဝဏ္ဏနာ တတိယာ။

[၃၉၉] ၄။ မာတုပေါသကဂိဇ္ဈဇာတကဝဏ္ဏနာ

တေ ကထံ နု ကရိဿန္တီတိ ဣဒံ သတ္ထာ ဇေတဝနေ ဝိဟရန္တော ဧကံ မာတုပေါသကဘိက္ခုံ အာရဗ္ဘ ကထေသိ။ ဝတ္ထု သာမဇာတကေ (ဇာ။ ၂။၂၂။၂၉၆ အာဒယော) အာဝိ ဘဝိဿတိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဂိဇ္ဈယောနိယံ နိဗ္ဗတ္တိတွာ ဝယပ္ပတ္တော ဝုဒ္ဓေ ပရိဟီနစက္ခုကေ မာတာပိတရော ဂိဇ္ဈဂုဟာယံ ဌပေတွာ ဂေါမံသာဒီနိ အာဟရိတွာ ပေါသေသိ။ တသ္မိံ ကာလေ ဗာရာဏသိယံ သုသာနေ ဧကော နေသာဒေါ အနိယမေတွာ ဂိဇ္ဈာနံ ပါသေ ဩဍ္ဍေသိ။ အထေကဒိဝသံ ဗောဓိသတ္တော ဂေါမံသာဒိံ ပရိယေသန္တော သုသာနံ ပဝိဋ္ဌော ပါဒေန ပါသေ ဗဇ္ဈိတွာ အတ္တနော န စိန္တေသိ၊ ဝုဒ္ဓေ ပရိဟီနစက္ခုကေ မာတာပိတရော အနုဿရိတွာ ‘‘ကထံ နု ခေါ မေ မာတာပိတရော ယာပေဿန္တိ၊ မမ ဗဒ္ဓဘာဝမ္ပိ အဇာနန္တာ အနာထာ နိပ္ပစ္စယာ ပဗ္ဗတဂုဟာယမေဝ သုဿိတွာ မရိဿန္တိ မညေ’’တိ ဝိလပန္တော ပဌမံ ဂါထမာဟ –

၂၂။

‘‘တေ ကထံ နု ကရိဿန္တိ၊ ဝုဒ္ဓါ ဂိရိဒရီသယာ၊

အဟံ ဗဒ္ဓါသ္မိ ပါသေန၊ နိလီယဿ ဝသံ ဂတော’’တိ။

တတ္ထ နိလီယဿာတိ ဧဝံနာမကဿ နေသာဒပုတ္တဿ။

အထ နေသာဒပုတ္တော ဂိဇ္ဈရာဇဿ ပရိဒေဝိတသဒ္ဒံ သုတွာ ဒုတိယံ ဂါထမာဟ –

၂၃။

‘‘ကိံ ဂိဇ္ဈ ပရိဒေဝသိ၊ ကာ နု တေ ပရိဒေဝနာ၊

န မေ သုတော ဝါ ဒိဋ္ဌော ဝါ၊ ဘာသန္တော မာနုသိံ ဒိဇော’’တိ။

ဂိဇ္ဈော အာဟ –

၂၄။

‘‘ဘရာမိ မာတာပိတရော၊ ဝုဒ္ဓေ ဂိရိဒရီသယေ၊

တေ ကထံ နု ကရိဿန္တိ၊ အဟံ ဝသံ ဂတော တဝါ’’တိ။

နေသာဒေါ အာဟ –

၂၅။

‘‘ယံ နု ဂိဇ္ဈော ယောဇနသတံ၊ ကုဏပါနိ အဝေက္ခတိ၊

ကသ္မာ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈသီ’’တိ။

ဂိဇ္ဈရာဇာ အာဟ –

၂၆။

‘‘ယဒါ ပရာဘဝေါ ဟောတိ၊ ပေါသော ဇီဝိတသင်္ခယေ၊

အထ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈတီ’’တိ။

၂၇။

‘‘ဘရဿု မာတာပိတရော၊ ဝုဒ္ဓေ ဂိရိဒရီသယေ၊

မယာ တွံ သမနုညာတော၊ သောတ္ထိံ ပဿာဟိ ဉာတကေ။

၂၈။

‘‘ဧဝံ လုဒ္ဒက နန္ဒဿု၊ သဟ သဗ္ဗေဟိ ဉာတိဘိ၊

ဘရိဿံ မာတာပိတရော၊ ဝုဒ္ဓေ ဂိရိဒရီသယေ’’တိ။ –

နေသာဒပုတ္တေန ဒုတိယာ၊ ဂိဇ္ဈေန တတိယာတိ ဣမာ ဂါထာ ပဋိပါဋိယာ ဝုတ္တာ။

တတ္ထ ယံ နူတိ ယံ နု ဧတံ လောကေ ကထီယတိ။ ဂိဇ္ဈော ယောဇနသတံ၊ ကုဏပါနိ အဝေက္ခတီတိ ယောဇနသတံ အတိက္ကမ္မ ဌိတာနိပိ ကုဏပါနိ ပဿတိ၊ တံ ယဒိ တထံ၊ အထ ကသ္မာ တွံ ဣမံ ဇာလဉ္စ ပါသဉ္စ အာသဇ္ဇာပိ န ဗုဇ္ဈသိ၊ သန္တိကံ အာဂန္တွာပိ န ဇာနာသီတိ။

ပရာဘဝေါတိ ဝိနာသော။ ဘရဿူတိ ဣဒံ သော ဗောဓိသတ္တဿ ဓမ္မကထံ သုတွာ ‘‘ပဏ္ဍိတော ဂိဇ္ဈရာဇာ ပရိဒေဝန္တော န အတ္တနော ပရိဒေဝတိ၊ မာတာပိတူနံ ပရိဒေဝတိ၊ နာယံ မာရေတုံ ယုတ္တော’’တိ တုဿိတွာ အာဟ၊ ဝတွာ စ ပန ပိယစိတ္တေန မုဒုစိတ္တေန ပါသံ မောစေသိ။

အထဿ ဗောဓိသတ္တော မရဏမုခါ ပမုတ္တော သုခိတော အနုမောဒနံ ကရောန္တော ဩသာနဂါထံ ဝတွာ မုခပူရံ မံသံ အာဒါယ မာတာပိတူနံ အဒါသိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ မာတုပေါသကဘိက္ခု သောတာပတ္တိဖလေ ပတိဋ္ဌဟိ ။

တဒါ နေသာဒပုတ္တော ဆန္နော အဟောသိ၊ မာတာပိတရော မဟာရာဇကုလာနိ၊ ဂိဇ္ဈရာဇာ ပန အဟမေဝ အဟောသိန္တိ။

မာတုပေါသကဂိဇ္ဈဇာတကဝဏ္ဏနာ စတုတ္ထာ။

[၄၀၀] ၅။ ဒဗ္ဘပုပ္ဖဇာတကဝဏ္ဏနာ

အနုတီရစာရီ ဘဒ္ဒန္တေတိ ဣဒံ သတ္ထာ ဇေတဝနေ ဝိဟရန္တော ဥပနန္ဒံ သကျပုတ္တံ အာရဗ္ဘ ကထေသိ။ သော ဟိ သာသနေ ပဗ္ဗဇိတွာ အပ္ပိစ္ဆတာဒိဂုဏေ ပဟာယ မဟာတဏှော အဟောသိ။ ဝဿူပနာယိကာယ ဒွေ တယော ဝိဟာရေ ပရိဂ္ဂဟေတွာ ဧကသ္မိံ ဆတ္တံ ဝါ ဥပါဟနံ ဝါ ဧကသ္မိံ ကတ္တရယဋ္ဌိံ ဝါ ဥဒကတုမ္ဗံ ဝါ ဌပေတွာ ဧကသ္မိံ သယံ ဝသတိ။ သော ဧကသ္မိံ ဇနပဒဝိဟာရေ ဝဿံ ဥပဂန္တွာ ‘‘ဘိက္ခူဟိ နာမ အပ္ပိစ္ဆေဟိ ဘဝိတဗ္ဗ’’န္တိ အာကာသေ စန္ဒံ ဥဋ္ဌာပေန္တော ဝိယ ဘိက္ခူနံ ပစ္စယသန္တောသဒီပကံ အရိယဝံသပဋိပဒံ ကထေသိ။ တံ သုတွာ ဘိက္ခူ မနာပါနိ ပတ္တစီဝရာနိ ဆဍ္ဍေတွာ မတ္တိကာပတ္တာနိ စေဝ ပံသုကူလစီဝရာနိ စ ဂဏှိံသု။ သော တာနိ အတ္တနော ဝသနဋ္ဌာနေ ဌပေတွာ ဝုတ္ထဝဿော ပဝါရေတွာ ယာနကံ ပူရေတွာ ဇေတဝနံ ဂစ္ဆန္တော အန္တရာမဂ္ဂေ ဧကဿ အရညဝိဟာရဿ ပိဋ္ဌိဘာဂေ ပါဒေ ဝလ္လိယာ ပလိဗုဒ္ဓါ ‘‘အဒ္ဓါ ဧတ္ထ ကိဉ္စိ လဒ္ဓဗ္ဗံ ဘဝိဿတီ’’တိ တံ ဝိဟာရံ ပါဝိသိ။ တတ္ထ ပန ဒွေ မဟလ္လကာ ဘိက္ခူ ဝဿံ ဥပဂစ္ဆိံသု။ တေ ဒွေ စ ထူလသာဋကေ ဧကဉ္စ သုခုမကမ္ဗလံ လဘိတွာ ဘာဇေတုံ အသက္ကောန္တာ တံ ဒိသွာ ‘‘ထေရော နော ဘာဇေတွာ ဒဿတီ’’တိ တုဋ္ဌစိတ္တာ ‘‘မယံ၊ ဘန္တေ၊ ဣမံ ဝဿာဝါသိကံ ဘာဇေတုံ န သက္ကောမ၊ ဣမံ နော နိဿာယ ဝိဝါဒေါ ဟောတိ၊ ဣဒံ အမှာကံ ဘာဇေတွာ ဒေထာ’’တိ အာဟံသု။ သော ‘‘သာဓု ဘာဇေဿာမီ’’တိ ဒွေ ထူလသာဋကေ ဒွိန္နမ္ပိ ဘာဇေတွာ ‘‘အယံ အမှာကံ ဝိနယဓရာနံ ပါပုဏာတီ’’တိ ကမ္ဗလံ ဂဟေတွာ ပက္ကာမိ။

တေပိ ထေရာ ကမ္ဗလေ သာလယာ တေနေဝ သဒ္ဓိံ ဇေတဝနံ ဂန္တွာ ဝိနယဓရာနံ ဘိက္ခူနံ တမတ္ထံ အာရောစေတွာ ‘‘လဗ္ဘတိ နု ခေါ၊ ဘန္တေ၊ ဝိနယဓရာနံ ဧဝံ ဝိလောပံ ခါဒိတု’’န္တိ အာဟံသု။ ဘိက္ခူ ဥပနန္ဒတ္ထေရေန အာဘတံ ပတ္တစီဝရရာသိံ ဒိသွာ ‘‘မဟာပုညောသိ တွံ အာဝုသော၊ ဗဟုံ တေ ပတ္တစီဝရံ လဒ္ဓ’’န္တိ ဝဒိံသု။ သော ‘‘ကုတော မေ အာဝုသော၊ ပုညံ၊ ဣမိနာ မေ ဥပါယေန ဣဒံ လဒ္ဓ’’န္တိ သဗ္ဗံ ကထေသိ။ ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ ဥပနန္ဒော သကျပုတ္တော မဟာတဏှော မဟာလောဘော’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဥပနန္ဒေန ပဋိပဒါယ အနုစ္ဆဝိကံ ကတံ၊ ပရဿ ပဋိပဒံ ကထေန္တေန နာမ ဘိက္ခုနာ ပဌမံ အတ္တနော အနုစ္ဆဝိကံ ကတွာ ပစ္ဆာ ပရော ဩဝဒိတဗ္ဗော’’တိ။

‘‘အတ္တာနမေဝ ပဌမံ၊ ပတိရူပေ နိဝေသယေ၊

အထညမနုသာသေယျ၊ န ကိလိဿေယျ ပဏ္ဍိတော’’တိ။ (ဓ။ ပ။ ၁၅၈) –

ဣမာယ ဓမ္မပဒေ ဂါထာယ ဓမ္မံ ဒေသေတွာ ‘‘န၊ ဘိက္ခဝေ၊ ဥပနန္ဒော ဣဒါနေဝ၊ ပုဗ္ဗေပေသ မဟာတဏှော မဟာလောဘောဝ၊ န စ ပန ဣဒါနေဝ၊ ပုဗ္ဗေပေသ ဣမေသံ သန္တကံ ဝိလုမ္ပိယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော နဒီတီရေ ရုက္ခဒေဝတာ အဟောသိ။ တဒါ ဧကော သိင်္ဂါလော မာယာဝိံ နာမ ဘရိယံ ဂဟေတွာ နဒီတီရေ ဧကသ္မိံ ဌာနေ ဝသိ။ အထေကဒိဝသံ သိင်္ဂါလီ သိင်္ဂါလံ အာဟ ‘‘ဒေါဟဠော မေ သာမိ၊ ဥပ္ပန္နော၊ အလ္လရောဟိတမစ္ဆံ ခါဒိတုံ ဣစ္ဆာမီ’’တိ။ သိင်္ဂါလော ‘‘အပ္ပောဿုက္ကာ ဟောဟိ၊ အာဟရိဿာမိ တေ’’တိ နဒီတီရေ စရန္တော ဝလ္လိယာ ပါဒေ ပလိဗုဇ္ဈိတွာ အနုတီရမေဝ အဂမာသိ။ တသ္မိံ ခဏေ ဂမ္ဘီရစာရီ စ အနုတီရစာရီ စာတိ ဒွေ ဥဒ္ဒါ မစ္ဆေ ပရိယေသန္တာ တီရေ အဋ္ဌံသု။ တေသု ဂမ္ဘီရစာရီ မဟန္တံ ရောဟိတမစ္ဆံ ဒိသွာ ဝေဂေန ဥဒကေ ပဝိသိတွာ တံ နင်္ဂုဋ္ဌေ ဂဏှိ။ ဗလဝါ မစ္ဆော ပရိကဍ္ဎန္တော ယာသိ။ သော ဂမ္ဘီရစာရီ ဥဒ္ဒေါ ‘‘မဟာမစ္ဆော ဥဘိန္နမ္ပိ နော ပဟောဿတိ၊ ဧဟိ မေ သဟာယော ဟောဟီ’’တိ ဣတရေန သဒ္ဓိံ သလ္လပန္တော ပဌမံ ဂါထမာဟ –

၂၉။

‘‘အနုတီရစာရီ ဘဒ္ဒန္တေ၊ သဟာယမနုဓာဝ မံ၊

မဟာ မေ ဂဟိတော မစ္ဆော၊ သော မံ ဟရတိ ဝေဂသာ’’တိ။

တတ္ထ သဟာယမနုဓာဝ မန္တိ သဟာယ အနုဓာဝ မံ၊ သန္ဓိဝသေန မ-ကာရော ဝုတ္တော။ ဣဒံ ဝုတ္တံ ဟောတိ – ယထာဟံ ဣမိနာ မစ္ဆေန န သံဟီရာမိ၊ ဧဝံ မံ နင်္ဂုဋ္ဌခဏ္ဍေ ဂဟေတွာ တွံ အနုဓာဝါတိ။

တံ သုတွာ ဣတရော ဒုတိယံ ဂါထမာဟ –

၃၀။

‘‘ဂမ္ဘီရစာရီ ဘဒ္ဒန္တေ၊ ဒဠှံ ဂဏှာဟိ ထာမသာ၊

အဟံ တံ ဥဒ္ဓရိဿာမိ၊ သုပဏ္ဏော ဥရဂါမိဝါ’’တိ။

တတ္ထ ထာမသာတိ ထာမေန။ ဥဒ္ဓရိဿာမီတိ နီဟရိဿာမိ။ သုပဏ္ဏော ဥရဂါမိဝါတိ ဂရုဠော သပ္ပံ ဝိယ။

အထ ဒွေပိ တေ ဧကတော ဟုတွာ ရောဟိတမစ္ဆံ နီဟရိတွာ ထလေ ဌပေတွာ မာရေတွာ ‘‘တွံ ဘာဇေဟိ၊ တွံ ဘာဇေဟီ’’တိ ကလဟံ ကတွာ ဘာဇေတုံ အသက္ကောန္တာ ဌပေတွာ နိသီဒိံသု။ တသ္မိံ ကာလေ သိင်္ဂါလော တံ ဌာနံ အနုပ္ပတ္တော။ တေ တံ ဒိသွာ ဥဘောပိ ပစ္စုဂ္ဂမနံ ကတွာ ‘‘အယံ၊ သမ္မ၊ ဒဗ္ဘပုပ္ဖမစ္ဆော အမှေဟိ ဧကတော ဟုတွာ ဂဟိတော၊ တံ နော ဘာဇေတုံ အသက္ကောန္တာနံ ဝိဝါဒေါ ဥပ္ပန္နော၊ သမဘာဂံ နော ဘာဇေတွာ ဒေဟီ’’တိ တတိယံ ဂါထမာဟံသု –

၃၁။

‘‘ဝိဝါဒေါ နော သမုပ္ပန္နော၊ ဒဗ္ဘပုပ္ဖ သုဏောဟိ မေ၊

သမေဟိ မေဓဂံ သမ္မာ၊ ဝိဝါဒေါ ဝူပသမ္မတ’’န္တိ။

တတ္ထ ဒဗ္ဘပုပ္ဖာတိ ဒဗ္ဘပုပ္ဖသမာနဝဏ္ဏတာယ တံ အာလပန္တိ။ မေဓဂန္တိ ကလဟံ။

တေသံ ဝစနံ သုတွာ သိင်္ဂါလော အတ္တနော ဗလံ ဒီပေန္တော –

၃၂။

‘‘ဓမ္မဋ္ဌောဟံ ပုရေ အာသိံ၊ ဗဟူ အဍ္ဍာ မေ တီရိတာ၊

သမေမိ မေဓဂံ သမ္မာ၊ ဝိဝါဒေါ ဝူပသမ္မတ’’န္တိ။ –

ဣဒံ ဂါထံ ဝတွာ ဘာဇေန္တော –

၃၃။

‘‘အနုတီရစာရိ နင်္ဂုဋ္ဌံ၊ သီသံ ဂမ္ဘီရစာရိနော၊

အစ္စာယံ မဇ္ဈိမော ခဏ္ဍော၊ ဓမ္မဋ္ဌဿ ဘဝိဿတီ’’တိ။ –

ဣမံ ဂါထမာဟ –

တတ္ထ ပဌမဂါထာယ အယမတ္ထော – အဟံ ပုဗ္ဗေ ရာဇူနံ ဝိနိစ္ဆယာမစ္စော အာသိံ၊ တေန မယာ ဝိနိစ္ဆယေ နိသီဒိတွာ ဗဟူ အဍ္ဍာ တီရိတာ၊ တေသံ တေသံ ဗြာဟ္မဏဂဟပတိကာဒီနံ ဗဟူ အဍ္ဍာ တီရိတာ ဝိနိစ္ဆိတာ၊ သွာဟံ တုမှာဒိသာနံ သမဇာတိကာနံ စတုပ္ပဒါနံ အဍ္ဍံ တီရေတုံ ကိံ န သက္ခိဿာမိ၊ အဟံ ဝေါ သမေမိ မေဓဂံ၊ သမ္မာ မံ နိဿာယ တုမှာကံ ဝိဝါဒေါ ဝူပသမ္မတူတိ ။

ဧဝဉ္စ ပန ဝတွာ မစ္ဆံ တယော ကောဋ္ဌာသေ ကတွာ အနုတီရစာရိ တွံ နင်္ဂုဋ္ဌံ ဂဏှ၊ သီသံ ဂမ္ဘီရစာရိနော ဟောတု။ အစ္စာယံ မဇ္ဈိမော ခဏ္ဍောတိ အပိစ အယံ မဇ္ဈိမော ကောဋ္ဌာသော။ အထ ဝါ အစ္စာတိ အတိစ္စ၊ ဣမေ ဒွေ ကောဋ္ဌာသေ အတိက္ကမိတွာ ဌိတော အယံ မဇ္ဈိမော ခဏ္ဍော ဓမ္မဋ္ဌဿ ဝိနိစ္ဆယသာမိကဿ မယှံ ဘဝိဿတီတိ။

ဧဝံ တံ မစ္ဆံ ဝိဘဇိတွာ ‘‘တုမှေ ကလဟံ အကတွာ နင်္ဂုဋ္ဌဉ္စ သီသဉ္စ ခါဒထာ’’တိ ဝတွာ မဇ္ဈိမခဏ္ဍံ မုခေန ဍံသိတွာ တေသံ ပဿန္တာနံယေဝ ပလာယိ။ တေ သဟဿံ ပရာဇိတာ ဝိယ ဒုမ္မုခါ နိသီဒိတွာ ဂါထမာဟံသု –

၃၄။

‘‘စိရမ္ပိ ဘက္ခော အဘဝိဿ၊ သစေ န ဝိဝဒေမသေ၊

အသီသကံ အနင်္ဂုဋ္ဌံ၊ သိင်္ဂါလော ဟရတိ ရောဟိတ’’န္တိ။

တတ္ထ စိရမ္ပီတိ ဒွေ တယော ဒိဝသေ သန္ဓာယ ဝုတ္တံ။

သိင်္ဂါလောပိ ‘‘အဇ္ဇ ဘရိယံ ရောဟိတမစ္ဆံ ခါဒါပေဿာမီ’’တိ တုဋ္ဌစိတ္တော တဿာ သန္တိကံ အဂမာသိ။ သာ တံ အာဂစ္ဆန္တံ ဒိသွာ အဘိနန္ဒမာနာ –

၃၅။

‘‘ယထာပိ ရာဇာ နန္ဒေယျ၊ ရဇ္ဇံ လဒ္ဓါန ခတ္တိယော၊

ဧဝါဟမဇ္ဇ နန္ဒာမိ၊ ဒိသွာ ပုဏ္ဏမုခံ ပတိ’’န္တိ။ –

ဣမံ ဂါထံ ဝတွာ အဓိဂမူပါယံ ပုစ္ဆန္တီ –

၃၆။

‘‘ကထံ နု ထလဇော သန္တော၊ ဥဒကေ မစ္ဆံ ပရာမသိ၊

ပုဋ္ဌော မေ သမ္မ အက္ခာဟိ၊ ကထံ အဓိဂတံ တယာ’’တိ။ –

ဣမံ ဂါထမာဟ –

တတ္ထ ကထံ နူတိ ‘‘ခါဒ၊ ဘဒ္ဒေ’’တိ မစ္ဆခဏ္ဍေ ပုရတော ဌပိတေ ‘‘ကထံ နု တွံ ထလဇော သမာနော ဥဒကေ မစ္ဆံ ဂဏှီ’’တိ ပုစ္ဆိ။

သိင်္ဂါလော တဿာ အဓိဂမူပါယံ အာစိက္ခန္တော အနန္တရဂါထမာဟ –

၃၇။

‘‘ဝိဝါဒေန ကိသာ ဟောန္တိ၊ ဝိဝါဒေန ဓနက္ခယာ၊

ဇီနာ ဥဒ္ဒါ ဝိဝါဒေန၊ ဘုဉ္ဇ မာယာဝိ ရောဟိတ’’န္တိ။

တတ္ထ ဝိဝါဒေန ကိသာ ဟောန္တီတိ ဘဒ္ဒေ၊ ဣမေ သတ္တာ ဝိဝါဒံ ကရောန္တာ ဝိဝါဒံ နိဿာယ ကိသာ အပ္ပမံသလောဟိတာ ဟောန္တိ။ ဝိဝါဒေန ဓနက္ခယာတိ ဟိရညသုဝဏ္ဏာဒီနံ ဓနာနံ ခယာ ဝိဝါဒေနေဝ ဟောန္တိ။ ဒွီသုပိ ဝိဝဒန္တေသု ဧကော ပရာဇိတော ပရာဇိတတ္တာ ဓနက္ခယံ ပါပုဏာတိ၊ ဣတရော ဇယဘာဂဒါနေန။ ဇီနာ ဥဒ္ဒါတိ ဒွေ ဥဒ္ဒါပိ ဝိဝါဒေနေဝ ဣမံ မစ္ဆံ ဇီနာ၊ တသ္မာ တွံ မယာ အာဘတဿ ဥပ္ပတ္တိံ မာ ပုစ္ဆ၊ ကေဝလံ ဣမံ ဘုဉ္ဇ မာယာဝိ ရောဟိတန္တိ။

ဣတရာ အဘိသမ္ဗုဒ္ဓဂါထာ –

၃၈။

‘‘ဧဝမေဝ မနုဿေသု၊ ဝိဝါဒေါ ယတ္ထ ဇာယတိ၊

ဓမ္မဋ္ဌံ ပဋိဓာဝတိ၊ သော ဟိ နေသံ ဝိနာယကော၊

ဓနာပိ တတ္ထ ဇီယန္တိ၊ ရာဇကောသော ပဝဍ္ဎတီ’’တိ။

တတ္ထ ဧဝမေဝါတိ ဘိက္ခဝေ၊ ယထာ ဧတေ ဥဒ္ဒါ ဇီနာ၊ ဧဝမေဝ မနုဿေသုပိ ယသ္မိံ ဌာနေ ဝိဝါဒေါ ဇာယတိ၊ တတ္ထ တေ မနုဿာ ဓမ္မဋ္ဌံ ပတိဓာဝန္တိ၊ ဝိနိစ္ဆယသာမိကံ ဥပသင်္ကမန္တိ။ ကိံကာရဏာ? သော ဟိ နေသံ ဝိနာယကော၊ သော တေသံ ဝိဝါဒါပန္နာနံ ဝိဝါဒဝူပသမကောတိ အတ္ထော။ ဓနာပိတတ္ထာတိ တတ္ထ တေ ဝိဝါဒါပန္နာ ဓနတောပိ ဇီယန္တိ၊ အတ္တနော သန္တကာ ပရိဟာယန္တိ၊ ဒဏ္ဍေန စေဝ ဇယဘာဂဂ္ဂဟဏေန စ ရာဇကောသော ပဝဍ္ဎတီတိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ သိင်္ဂါလော ဥပနန္ဒော အဟောသိ၊ ဥဒ္ဒါ ဒွေ မဟလ္လကာ၊ တဿ ကာရဏဿ ပစ္စက္ခကာရိကာ ရုက္ခဒေဝတာ ပန အဟမေဝ အဟောသိ’’န္တိ။

ဒဗ္ဘပုပ္ဖဇာတကဝဏ္ဏနာ ပဉ္စမာ။

[၄၀၁] ၆။ ပဏ္ဏကဇာတကဝဏ္ဏနာ

ပဏ္ဏကံတိခိဏဓာရန္တိ ဣဒံ သတ္ထာ ဇေတဝနေ ဝိဟရန္တော ပုရာဏဒုတိယိကာပလောဘနံ အာရဗ္ဘ ကထေသိ။ တဉှိ ဘိက္ခုံ သတ္ထာ ‘‘သစ္စံ ကိရ တွံ ဘိက္ခု ဥက္ကဏ္ဌိတော’’တိ ပုစ္ဆိတွာ ‘‘သစ္စံ၊ ဘန္တေ’’တိ ဝုတ္တေ ‘‘ကေန ဥက္ကဏ္ဌာပိတော’’တိ ဝတွာ ‘‘ပုရာဏဒုတိယိကာယာ’’တိ ဝုတ္တေ ‘‘ဘိက္ခု အယံ ဣတ္ထီ တုယှံ အနတ္ထကာရိကာ၊ ပုဗ္ဗေပိ တွံ ဣမံ နိဿာယ စေတသိကရောဂေန မရန္တော ပဏ္ဍိတေ နိဿာယ ဇီဝိတံ အလတ္ထာ’’တိ ဝတွာ အတီတံ အာဟရိ။

အတီတေ ဗာရာဏသိယံ မဒ္ဒဝမဟာရာဇေ ရဇ္ဇံ ကာရေန္တေ ဗောဓိသတ္တော ဗြာဟ္မဏကုလေ နိဗ္ဗတ္တိ၊ သေနကကုမာရောတိဿ နာမံ အကံသု။ သော ဝယပ္ပတ္တော တက္ကသိလာယံ သဗ္ဗသိပ္ပာနိ ဥဂ္ဂဏှိတွာ ဗာရာဏသိံ ပစ္စာဂန္တွာ မဒ္ဒဝရညော အတ္ထဓမ္မာနုသာသကော အမစ္စော အဟောသိ၊ ‘‘သေနကပဏ္ဍိတော’’တိ ဝုတ္တေ သကလနဂရေ စန္ဒော ဝိယ သူရိယော ဝိယ စ ပညာယိ။ တဒါ ရညော ပုရောဟိတပုတ္တော ရာဇုပဋ္ဌာနံ အာဂတော သဗ္ဗာလင်္ကာရပဋိမဏ္ဍိတံ ဥတ္တမရူပဓရံ ရညော အဂ္ဂမဟေသိံ ဒိသွာ ပဋိဗဒ္ဓစိတ္တော ဟုတွာ ဂေဟံ ဂန္တွာ နိရာဟာရော နိပဇ္ဇိတွာ သဟာယကေဟိ ပုဋ္ဌော တမတ္ထံ အာရောစေသိ။ ရာဇာပိ ‘‘ပုရောဟိတပုတ္တော န ဒိဿတိ၊ ကဟံ နု ခေါ’’တိ ပုစ္ဆိတွာ တမတ္ထံ သုတွာ တံ ပက္ကောသာပေတွာ ‘‘အဟံ တေ ဣမံ သတ္တ ဒိဝသာနိ ဒမ္မိ၊ သတ္တာဟံ ဃရေ ကတွာ အဋ္ဌမေ ဒိဝသေ အာနေယျာသီ’’တိ အာဟ။ သော ‘‘သာဓူ’’တိ သမ္ပဋိစ္ဆိတွာ တံ ဂေဟံ နေတွာ တာယ သဒ္ဓိံ အဘိရမိ။ တေ အညမညံ ပဋိဗဒ္ဓစိတ္တာ ဟုတွာ ကဉ္စိ အဇာနာပေတွာ အဂ္ဂဒွါရေန ပလာယိတွာ အညဿ ရညော ဝိဇိတံ အဂမသုံ၊ ကောစိ ဂတဋ္ဌာနံ န ဇာနိ၊ နာဝါယ ဂတမဂ္ဂေါ ဝိယ အဟောသိ။ ရာဇာ နဂရေ ဘေရိံ စရာပေတွာ နာနပ္ပကာရေန ဝိစိနန္တောပိ တဿ ဂတဋ္ဌာနံ န အညာသိ။ အထဿ တံ နိဿာယ ဗလဝသောကော ဥပ္ပဇ္ဇိ၊ ဟဒယံ ဥဏှံ ဟုတွာ လောဟိတံ ပဂ္ဃရိ။ တတော ပဋ္ဌာယ စဿ ကုစ္ဆိတော လောဟိတံ နိက္ခမိ၊ ဗျာဓိ မဟန္တော အဟောသိ။ မဟန္တာပိ ရာဇဝေဇ္ဇာ တိကိစ္ဆိတုံ နာသက္ခိံသု။

ဗောဓိသတ္တော ‘‘ဣမဿ ရညော ဗျာဓိ နတ္ထိ၊ ဘရိယံ ပန အပဿန္တော စေတသိကရောဂေန ဖုဋ္ဌော၊ ဥပါယေန တံ တိကိစ္ဆိဿာမီ’’တိ အာယုရဉ္စ ပုက္ကုသဉ္စာတိ ဒွေ ရညော ပဏ္ဍိတာမစ္စေ အာမန္တေတွာ ‘‘ရညော ဒေဝိယာ အဒဿနေန စေတသိကံ ရောဂံ ဌပေတွာ အညော ရောဂေါ နတ္ထိ၊ ဗဟူပကာရော စ ခေါ ပန အမှာကံ ရာဇာ၊ တသ္မာ ဥပါယေန နံ တိကိစ္ဆာမ၊ ရာဇင်္ဂဏေ သမဇ္ဇံ ကာရေတွာ အသိံ ဂိလိတုံ ဇာနန္တေန အသိံ ဂိလာပေတွာ ရာဇာနံ သီဟပဉ္ဇရေ ကတွာ သမဇ္ဇံ ဩလောကာပေဿာမ၊ ရာဇာ အသိံ ဂိလန္တံ ဒိသွာ ‘အတ္ထိ နု ခေါ ဣတော အညံ ဒုက္ကရတရ’န္တိ ပဉှံ ပုစ္ဆိဿတိ။ တံ သမ္မ အာယုရ၊ တွံ ‘အသုကံ နာမ ဒဒါမီတိ ဝစနံ ဣတော ဒုက္ကရတရ’န္တိ ဗျာကရေယျာသိ၊ တတော သမ္မ ပုက္ကုသ၊ တံ ပုစ္ဆိဿတိ၊ အထဿ တွံ ‘မဟာရာဇ၊ ဒဒါမီတိ ဝတွာ အဒဒတော သာ ဝါစာ အဖလာ ဟောတိ၊ တထာရူပံ ဝါစံ န ကေစိ ဥပဇီဝန္တိ န ခါဒန္တိ န ပိဝန္တိ၊ ယေ ပန တဿ ဝစနဿာနုစ္ဆဝိကံ ကရောန္တိ၊ ယထာပဋိညာတမတ္ထံ ဒေန္တိယေဝ၊ ဣဒံ တတော ဒုက္ကရတရ’န္တိ ဧဝံ ဗျာကရေယျာသိ၊ ဣတော ပရံ ကတ္တဗ္ဗံ အဟံ ဇာနိဿာမီ’’တိ ဝတွာ သမဇ္ဇံ ကာရေသိ။

အထ တေ တယောပိ ပဏ္ဍိတာ ရညော သန္တိကံ ဂန္တွာ ‘‘မဟာရာဇ၊ ရာဇင်္ဂဏေ သမဇ္ဇော ဝတ္တတိ၊ တံ ဩလောကေန္တာနံ ဒုက္ခမ္ပိ န ဒုက္ခံ ဟောတိ၊ ဧဟိ ဂစ္ဆာမာ’’တိ ရာဇာနံ နေတွာ သီဟပဉ္ဇရံ ဝိဝရိတွာ သမဇ္ဇံ ဩလောကာပေသုံ။ ဗဟူ ဇနာ အတ္တနော အတ္တနော ဇာနနကသိပ္ပံ ဒဿေသုံ။ ဧကော ပန ပုရိသော တေတ္တိံသင်္ဂုလံ တိခိဏဓာရံ အသိရတနံ ဂိလတိ။ ရာဇာ တံ ဒိသွာ ‘‘အယံ ပုရိသော ဧတံ အသိံ ဂိလတိ၊ ‘အတ္ထိ နု ခေါ ဣတော အညံ ဒုက္ကရတရ’န္တိ ဣမေ ပဏ္ဍိတေ ပုစ္ဆိဿာမီ’’တိ စိန္တေတွာ အာယုရံ ပုစ္ဆန္တော ပဌမံ ဂါထမာဟ –

၃၉။

‘‘ပဏ္ဏကံ တိခိဏဓာရံ၊ အသိံ သမ္ပန္နပါယိနံ၊

ပရိသာယံ ပုရိသော ဂိလတိ၊ ကိံ ဒုက္ကရတရံ တတော၊

ယဒညံ ဒုက္ကရံ ဌာနံ၊ တံ မေ အက္ခာဟိ ပုစ္ဆိတော’’တိ။

တတ္ထ ပဏ္ဏကန္တိ ပဏ္ဏကရဋ္ဌေ ဥပ္ပန္နံ။ သမ္ပန္နပါယိနန္တိ သမ္ပန္နံ ပရလောဟိတပါယိနံ။ ပရိသာယန္တိ ပရိသမဇ္ဈေ ဓနလောဘေန အယံ ပုရိသော ဂိလတိ။ ယဒညန္တိ ဣတော အသိဂိလနတော ယံ အညံ ဒုက္ကရတရံ ကာရဏံ၊ တံ မယာ ပုစ္ဆိတော ကထေဟီတိ။

အထဿ သော တံ ကထေန္တော ဒုတိယံ ဂါထမာဟ –

၄၀။

‘‘ဂိလေယျ ပုရိသော လောဘာ၊ အသိံ သမ္ပန္နပါယိနံ၊

ယော စ ဝဇ္ဇာ ဒဒါမီတိ၊ တံ ဒုက္ကရတရံ တတော၊

သဗ္ဗညံ သုကရံ ဌာနံ၊ ဧဝံ ဇာနာဟိ မဒ္ဒဝါ’’တိ။

တတ္ထ ဝဇ္ဇာတိ ဝဒေယျ။ တံ ဒုက္ကရတရန္တိ ‘‘ဒဒါမီ’’တိ ဝစနံ တတော အသိဂိလနတော ဒုက္ကရတရံ။ သဗ္ဗညန္တိ ‘‘အသုကံ နာမ တဝ ဒဿာမီ’’တိ ဝစနံ ဌပေတွာ အညံ သဗ္ဗမ္ပိ ကာရဏံ သုကရံ။ မဒ္ဒဝါတိ ရာဇာနံ ဂေါတ္တေန အာလပတိ။

ရညော အာယုရပဏ္ဍိတဿ ဝစနံ သုတွာ ‘‘အသိဂိလနတော ကိရ ‘ဣဒံ နာမ ဒမ္မီ’တိ ဝစနံ ဒုက္ကရံ၊ အဟဉ္စ ‘ပုရောဟိတပုတ္တဿ ဒေဝိံ ဒမ္မီ’တိ အဝစံ၊ အတိဒုက္ကရံ ဝတ မေ ကတ’’န္တိ ဝီမံသန္တဿေဝ ဟဒယသောကော ထောကံ တနုတ္တံ ဂတော။ သော တတော ‘‘ပရဿ ဣမံ ဒမ္မီတိ ဝစနတော ပန အညံ ဒုက္ကရတရံ အတ္ထိ နု ခေါ’’တိ စိန္တေတွာ ပုက္ကုသပဏ္ဍိတေန သဒ္ဓိံ သလ္လပန္တော တတိယံ ဂါထမာဟ –

၄၁။

‘‘ဗျာကာသိ အာယုရော ပဉှံ၊ အတ္ထံ ဓမ္မဿ ကောဝိဒေါ၊

ပုက္ကုသံ ဒါနိ ပုစ္ဆာမိ၊ ကိံ ဒုက္ကရတရံ တတော၊

ယဒညံ ဒုက္ကရံ ဌာနံ၊ တံ မေ အက္ခာဟိ ပုစ္ဆိတော’’တိ။

တတ္ထ ပဉှံ အတ္ထန္တိ ပဉှဿ အတ္ထံ ဗျာကာသီတိ ဝုတ္တံ ဟောတိ။ ဓမ္မဿ ကောဝိဒေါတိ တဒတ္ထဇောတကေ ဂန္ထေ ကုသလော။ တတောတိ တတော ဝစနတော ကိံ ဒုက္ကရတရန္တိ။

အထဿ ဗျာကရောန္တော ပုက္ကုသပဏ္ဍိတော စတုတ္ထံ ဂါထမာဟ –

၄၂။

‘‘န ဝါစမုပဇီဝန္တိ၊ အဖလံ ဂိရမုဒီရိတံ၊

ယော စ ဒတွာ အဝါကယိရာ၊ တံ ဒုက္ကရတရံ တတော၊

သဗ္ဗညံ သုကရံ ဌာနံ၊ ဧဝံ ဇာနာဟိ မဒ္ဒဝါ’’တိ။

တတ္ထ ဒတွာတိ ‘‘အသုကံ နာမ ဒမ္မီ’’တိ ပဋိညံ ဒတွာ။ အဝါကယိရာတိ တံ ပဋိညာတမတ္ထံ ဒဒန္တော တသ္မိံ လောဘံ အဝါကရေယျ ဆိန္ဒေယျ၊ တံ ဘဏ္ဍံ ဒဒေယျာတိ ဝုတ္တံ ဟောတိ။ တတောတိ တတော အသိဂိလနတော ‘‘အသုကံ နာမ တေ ဒမ္မီ’’တိ ဝစနတော စ တဒေဝ ဒုက္ကရတရံ။

ရညော တံ ဝစနံ သုတွာ ‘‘အဟံ ‘ပုရောဟိတပုတ္တဿ ဒေဝိံ ဒမ္မီ’တိ ပဌမံ ဝတွာ ဝါစာယ အနုစ္ဆဝိကံ ကတွာ တံ အဒါသိံ၊ ဒုက္ကရံ ဝတ မေ ကတ’’န္တိ ပရိဝိတက္ကေန္တဿ သောကော တနုကတရော ဇာတော။ အထဿ ဧတဒဟောသိ ‘‘သေနကပဏ္ဍိတတော အညော ပဏ္ဍိတတရော နာမ နတ္ထိ၊ ဣမံ ပဉှံ ဧတံ ပုစ္ဆိဿာမီ’’တိ။ တတော တံ ပုစ္ဆန္တော ပဉ္စမံ ဂါထမာဟ –

၄၃။

‘‘ဗျာကာသိ ပုက္ကုသော ပဉှံ၊ အတ္ထံ ဓမ္မဿ ကောဝိဒေါ၊

သေနကံ ဒါနိ ပုစ္ဆာမိ၊ ကိံ ဒုက္ကရတရံ တတော၊

ယဒညံ ဒုက္ကရံ ဌာနံ၊ တံ မေ အက္ခာဟိ ပုစ္ဆိတော’’တိ။

အထဿ ဗျာကရောန္တော သေနကော ဆဋ္ဌံ ဂါထမာဟ –

၄၄။

‘‘ဒဒေယျ ပုရိသော ဒါနံ၊ အပ္ပံ ဝါ ယဒိ ဝါ ဗဟုံ၊

ယော စ ဒတွာ နာနုတပ္ပေ၊ တံ ဒုက္ကရတရံ တတော၊

သဗ္ဗညံ သုကရံ ဌာနံ၊ ဧဝံ ဇာနာဟိ မဒ္ဒဝါ’’တိ။

တတ္ထ နာနုတပ္ပေတိ အတ္တနော အတိကန္တံ အတိမနာပံ ပိယဘဏ္ဍံ ပရဿ ဒတွာ ‘‘ကိမတ္ထံ မယာ ဣဒံ ဒိန္န’’န္တိ ဧဝံ တံ ပိယဘဏ္ဍံ အာရဗ္ဘ ယော ပစ္ဆာ န တပ္ပတိ န သောစတိ၊ တံ အသိဂိလနတော စ ‘‘အသုကံ နာမ တေ ဒမ္မီ’’တိ ဝစနတော စ တဿ ဒါနတော စ ဒုက္ကရတရံ။

ဣတိ မဟာသတ္တော ရာဇာနံ သညာပေန္တာ ကထေသိ။ ဒါနဉှိ ဒတွာ အပရစေတနာဝ ဒုဿန္ဓာရိယာ၊ တဿာ သန္ဓာရဏဒုက္ကရတာ ဝေဿန္တရဇာတကေန ဒီပိတာ။ ဝုတ္တဉှေတံ –

‘‘အဒု စာပံ ဂဟေတွာန၊ ခဂ္ဂံ ဗန္ဓိယ ဝါမတော၊

အာနေဿာမိ သကေ ပုတ္တေ၊ ပုတ္တာနဉှိ ဝဓော ဒုခေါ။

‘‘အဋ္ဌာနမေတံ ဒုက္ခရူပံ၊ ယံ ကုမာရာ ဝိဟညရေ၊

သတဉ္စ ဓမ္မမညာယ၊ ကော ဒတွာ အနုတပ္ပတီ’’တိ။ (ဇာ။ ၂။၂၂။၂၁၅၈-၂၁၅၉)၊

ရာဇာပိ ဗောဓိသတ္တဿ ဝစနံ သုတွာ သလ္လက္ခေသိ ‘‘အဟံ အတ္တနော မနေနေဝ ပုရောဟိတပုတ္တဿ ဒေဝိံ ဒတွာ သကမနံ သန္ဓာရေတုံ န သက္ကောမိ၊ သောစာမိ ကိလမာမိ၊ န မေ ဣဒံ အနုစ္ဆဝိကံ၊ သစေ သာ မယိ သသိနေဟာ ဘဝေယျ ၊ ဣမံ ဣဿရိယံ ဆဍ္ဍေတွာ န ပလာယေယျ၊ မယိ ပန သိနေဟံ အကတွာ ပလာတာယ ကိံ တာယ မယှ’’န္တိ။ တဿေဝံ စိန္တေန္တဿ ပဒုမပတ္တေ ဥဒကဗိန္ဒု ဝိယ သဗ္ဗသောကော နိဝတ္တိတွာ ဂတော၊ တင်္ခဏညေဝဿ ကုစ္ဆိ ပရိသဏ္ဌာသိ။ သော နိရောဂေါ သုခိတော ဟုတွာ ဗောဓိသတ္တဿ ထုတိံ ကရောန္တော ဩသာနဂါထမာဟ –

၄၅။

‘‘ဗျာကာသိ အာယုရော ပဉှံ၊ အထော ပုက္ကုသပေါရိသော၊

သဗ္ဗေ ပဉှေ အတိဘောတိ၊ ယထာ ဘာသတိ သေနကော’’တိ။

တတ္ထ ယထာ ဘာသတီတိ ယထာ ပဏ္ဍိတော ဘာသတိ၊ တထေဝေတံ ဒါနံ နာမ ဒတွာ နေဝ အနုတပ္ပိတဗ္ဗန္တိ။ ဣမံ ပနဿ ထုတိံ ကတွာ တုဋ္ဌော ဗဟုံ ဓနမဒါသိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ဥက္ကဏ္ဌိတဘိက္ခု သောတာပတ္တိဖလေ ပတိဋ္ဌဟိ။ တဒါ ရာဇမဟေသီ ပုရာဏဒုတိယိကာ အဟောသိ၊ ရာဇာ ဥက္ကဏ္ဌိတဘိက္ခု၊ အာယုရပဏ္ဍိတော မောဂ္ဂလ္လာနော၊ ပုက္ကုသပဏ္ဍိတော သာရိပုတ္တော၊ သေနကပဏ္ဍိတော အဟမေဝ အဟောသိန္တိ။

ပဏ္ဏကဇာတကဝဏ္ဏနာ ဆဋ္ဌာ။

[၄၀၂] ၇။ သတ္တုဘသ္တဇာတကဝဏ္ဏနာ

ဝိဗ္ဘန္တစိတ္တောတိ ဣဒံ သတ္ထာ ဇေတဝနေ ဝိဟရန္တော အတ္တနော ပညာပါရမိံ အာရဗ္ဘ ကထေသိ။ ပစ္စုပ္ပန္နဝတ္ထု ဥမင်္ဂဇာတကေ (ဇာ။ ၂။၂၂။၅၉၀ အာဒယော) အာဝိ ဘဝိဿတိ။

အတီတေ ဗာရာဏသိယံ ဇနကော နာမ ရာဇာ ရဇ္ဇံ ကာရေသိ။ တဒါ ဗောဓိသတ္တော ဗြာဟ္မဏကုလေ နိဗ္ဗတ္တိ ၊ သေနကကုမာရောတိဿ နာမံ ကရိံသု။ သော ဝယပ္ပတ္တော တက္ကသိလာယံ သဗ္ဗသိပ္ပာနိ ဥဂ္ဂဏှိတွာ ဗာရာဏသိံ ပစ္စာဂန္တွာ ရာဇာနံ ပဿိ၊ ရာဇာ တံ အမစ္စဋ္ဌာနေ ဌပေသိ၊ မဟန္တဉ္စဿ ယသံ အနုပ္ပဒါသိ ။ သော ရညော အတ္ထဉ္စ ဓမ္မဉ္စ အနုသာသိ၊ မဓုရကထော ဓမ္မကထိကော ဟုတွာ ရာဇာနံ ပဉ္စသု သီလေသု ပတိဋ္ဌာပေတွာ ဒါနေ ဥပေါသထကမ္မေ ဒသသု ကုသလကမ္မပထေသူတိ ဣမာယ ကလျာဏပဋိပဒါယ ပတိဋ္ဌာပေသိ ၊ သကလရဋ္ဌေ ဗုဒ္ဓါနံ ဥပ္ပန္နကာလော ဝိယ အဟောသိ။ ပက္ခဒိဝသေသု ရာဇာ စ ဥပရာဇာဒယော စ သဗ္ဗေ သန္နိပတိတွာ ဓမ္မသဘံ သဇ္ဇေန္တိ။ မဟာသတ္တော သဇ္ဇိတဓမ္မသဘာယံ ရတနပလ္လင်္ကဝရဂတော ဗုဒ္ဓလီဠာယ ဓမ္မံ ဒေသေတိ၊ ဗုဒ္ဓါနံ ဓမ္မကထာသဒိသာဝဿ ကထာ ဟောတိ။

အထ အညတရော မဟလ္လကဗြာဟ္မဏော ဓနဘိက္ခံ စရိတွာ ကဟာပဏသဟဿံ လဘိတွာ ဧကသ္မိံ ဗြာဟ္မဏကုလေ နိက္ခိပိတွာ ပုန ‘‘ဘိက္ခံ စရိဿာမီ’’တိ ဂတော။ တဿ ဂတကာလေ တံ ကုလံ ကဟာပဏေ ဝဠဉ္ဇေသိ။ သော အာဂန္တွာ ကဟာပဏေ အာဟရာပေသိ။ ဗြာဟ္မဏော ကဟာပဏေ ဒါတုံ အသက္ကောန္တော အတ္တနော ဓီတရံ တဿ ပါဒပရိစာရိကံ ကတွာ အဒါသိ။ ဗြာဟ္မဏော တံ ဂဟေတွာ ဗာရာဏသိတော အဝိဒူရေ ဧကသ္မိံ ဗြာဟ္မဏဂါမေ ဝါသံ ကပ္ပေသိ။ အထဿ ဘရိယာ ဒဟရတာယ ကာမေသု အတိတ္တာ အညေန တရုဏဗြာဟ္မဏေန သဒ္ဓိံ မိစ္ဆာစာရံ စရိ။ သောဠသ ဟိ အတပ္ပနီယဝတ္ထူနိ နာမ။ ကတမာနိ သောဠသ? သာဂရော သဗ္ဗသဝန္တီဟိ န တပ္ပတိ၊ အဂ္ဂိ ဥပါဒါနေန န တပ္ပတိ၊ ရာဇာ ရဋ္ဌေန န တပ္ပတိ၊ ဗာလော ပါပေဟိ န တပ္ပတိ၊ ဣတ္ထီ မေထုနဓမ္မေန အလင်္ကာရေန ဝိဇာယနေနာတိ ဣမေဟိ တီဟိ န တပ္ပတိ၊ ဗြာဟ္မဏော မန္တေဟိ န တပ္ပတိ၊ ဈာယီ ဝိဟာရသမာပတ္တိယာ န တပ္ပတိ၊ သေက္ခော အပစယေန န တပ္ပတိ၊ အပ္ပိစ္ဆော ဓုတင်္ဂဂုဏေန န တပ္ပတိ၊ အာရဒ္ဓဝီရိယော ဝီရိယာရမ္ဘေန န တပ္ပတိ၊ ဓမ္မကထိကော သာကစ္ဆာယ န တပ္ပတိ၊ ဝိသာရဒေါ ပရိသာယ န တပ္ပတိ၊ သဒ္ဓါ သင်္ဃုပဋ္ဌာနေန န တပ္ပတိ၊ ဒါယကော ပရိစ္စာဂေန န တပ္ပတိ၊ ပဏ္ဍိတော ဓမ္မဿဝနေန န တပ္ပတိ၊ စတဿော ပရိသာ တထာဂတဒဿနေန န တပ္ပန္တီတိ။

သာပိ ဗြာဟ္မဏီ မေထုနဓမ္မေန၊ အတိတ္တာ တံ ဗြာဟ္မဏံ နီဟရိတွာ ဝိဿတ္ထာ ပါပကမ္မံ ကာတုကာမာ ဟုတွာ ဧကဒိဝသံ ဒုမ္မနာ နိပဇ္ဇိတွာ ‘‘ကိံ ဘောတီ’’တိ ဝုတ္တာ ‘‘ဗြာဟ္မဏ၊ အဟံ တဝ ဂေဟေ ကမ္မံ ကာတုံ န သက္ကောမိ၊ ဒါသိဒါသံ အာနေဟီ’’တိ အာဟ။ ‘‘ဘောတိ ဓနံ မေ နတ္ထိ၊ ကိံ ဒတွာ အာနေမီ’’တိ။ ‘‘ဘိက္ခံ စရိတွာ ဓနံ ပရိယေသိတွာ အာနေဟီ’’တိ။ ‘‘တေန ဟိ ဘောတိ ပါထေယျံ မေ သဇ္ဇေဟီ’’တိ။ ‘‘သာ တဿ ဗဒ္ဓသတ္တူနဉ္စ အဗဒ္ဓသတ္တူနဉ္စ စမ္မပသိဗ္ဗကံ ပူရေတွာ အဒါသိ’’။ ဗြာဟ္မဏော ဂါမနိဂမရာဇဓာနီသု စရန္တော သတ္တ ကဟာပဏသတာနိ လဘိတွာ ‘‘အလံ မေ ဧတ္တကံ ဓနံ ဒါသိဒါသမူလာယာ’’တိ နိဝတ္တိတွာ အတ္တနော ဂါမံ အာဂစ္ဆန္တော ဧကသ္မိံ ဥဒကဖာသုကဋ္ဌာနေ ပသိဗ္ဗကံ မုဉ္စိတွာ သတ္တုံ ခါဒိတွာ ပသိဗ္ဗကမုခံ အဗန္ဓိတွာဝ ပါနီယံ ပိဝိတုံ ဩတိဏ္ဏော။ အထေကသ္မိံ ရုက္ခသုသိရေ ဧကော ကဏှသပ္ပော သတ္တုဂန္ဓံ ဃာယိတွာ ပသိဗ္ဗကံ ပဝိသိတွာ ဘောဂံ အာဘုဇိတွာ သတ္တုံ ခါဒန္တော နိပဇ္ဇိ။ ဗြာဟ္မဏော အာဂန္တွာ ပသိဗ္ဗကဿ အဗ္ဘန္တရံ အနောလောကေတွာ ပသိဗ္ဗကံ ဗန္ဓိတွာ အံသေ ကတွာ ပါယာသိ။ အန္တရာမဂ္ဂေ ဧကသ္မိံ ရုက္ခေ နိဗ္ဗတ္တဒေဝတာ ခန္ဓဝိဋပေ ဌတွာ ‘‘ဗြာဟ္မဏ၊ သစေ အန္တရာမဂ္ဂေ ဝသိဿသိ၊ သယံ မရိဿသိ၊ သစေ အဇ္ဇ ဃရံ ဂမိဿသိ၊ ဘရိယာ တေ မရိဿတီ’’တိ ဝတွာ အန္တရဓာယိ။ သော ဩလောကေန္တော ဒေဝတံ အဒိသွာ ဘီတော မရဏဘယတဇ္ဇိတော ရောဒန္တော ပရိဒေဝန္တော ဗာရာဏသိနဂရဒွါရံ သမ္ပာပုဏိ။

တဒါ စ ပန္နရသုပေါသထော ဟောတိ အလင်္ကတဓမ္မာသနေ နိသီဒိတွာ ဗောဓိသတ္တဿ ဓမ္မကထနဒိဝသော။ မဟာဇနော နာနာဂန္ဓပုပ္ဖာဒိဟတ္ထော ဝဂ္ဂဝဂ္ဂေါ ဟုတွာ ဓမ္မိံ ကထံ သောတုံ ဂစ္ဆတိ။ ဗြာဟ္မဏော တံ ဒိသွာ ‘‘ကဟံ ဂစ္ဆထာ’’တိ ပုစ္ဆိတွာ ‘‘ဗြာဟ္မဏ၊ အဇ္ဇ သေနကပဏ္ဍိတော မဓုရဿရေန ဗုဒ္ဓလီဠာယ ဓမ္မံ ဒေသေတိ၊ ကိံ တွမ္ပိ န ဇာနာသီ’’တိ ဝုတ္တေ စိန္တေသိ ‘‘ပဏ္ဍိတော ကိရ ဓမ္မကထိကော၊ အဟဉ္စမှိ မရဏဘယတဇ္ဇိတော၊ ပဏ္ဍိတာ ခေါ ပန မဟန္တမ္ပိ သောကံ ဟရိတုံ သက္ကောန္တိ၊ မယာပိ တတ္ထ ဂန္တွာ ဓမ္မံ သောတုံ ဝဋ္ဋတီ’’တိ။ သော တေဟိ သဒ္ဓိံ တတ္ထ ဂန္တွာ မဟာသတ္တံ ပရိဝါရေတွာ နိသိန္နာယ သရာဇိကာယ ပရိသာယ ပရိယန္တေ သတ္တုပသိဗ္ဗကေန ခန္ဓဂတေန ဓမ္မာသနတော အဝိဒူရေ မရဏဘယတဇ္ဇိတော ရောဒမာနော အဋ္ဌာသိ။ မဟာသတ္တော အာကာသဂင်္ဂံ ဩတရန္တော ဝိယ အမတဝဿံ ဝဿေန္တော ဝိယ စ ဓမ္မံ ဒေသေသိ။ မဟာဇနော သဉ္ဇာတသောမနဿော သာဓုကာရံ ဒတွာ ဓမ္မံ အဿောသိ။

ပဏ္ဍိတာ စ နာမ ဒိသာစက္ခုကာ ဟောန္တိ။ တသ္မိံ ခဏေ မဟာသတ္တော ပသန္နပဉ္စပသာဒါနိ အက္ခီနိ ဥမ္မီလေတွာ သမန္တတော ပရိသံ ဩလောကေန္တော တံ ဗြာဟ္မဏံ ဒိသွာ စိန္တေသိ ‘‘ဧတ္တကာ ပရိသာ သောမနဿဇာတာ သာဓုကာရံ ဒတွာ ဓမ္မံ သုဏန္တိ၊ အယံ ပနေကော ဗြာဟ္မဏော ဒေါမနဿပ္ပတ္တော ရောဒတိ၊ ဧတဿ အဗ္ဘန္တရေ အဿုဇနနသမတ္ထေန သောကေန ဘဝိတဗ္ဗံ၊ တမဿ အမ္ဗိလေန ပဟရိတွာ တမ္ဗမလံ ဝိယ ပဒုမပလာသတော ဥဒကဗိန္ဒုံ ဝိယ ဝိနိဝတ္တေတွာ ဧတ္ထေဝ နံ နိဿောကံ တုဋ္ဌမာနသံ ကတွာ ဓမ္မံ ဒေသေဿာမီ’’တိ။ သော တံ အာမန္တေတွာ ‘‘ဗြာဟ္မဏ၊ သေနကပဏ္ဍိတော နာမာဟံ၊ ဣဒါနေဝ တံ နိဿောကံ ကရိဿာမိ၊ ဝိဿတ္ထော ကထေဟီ’’တိ တေန သဒ္ဓိံ သလ္လပန္တော ပဌမံ ဂါထမာဟ –

၄၆။

‘‘ဝိဗ္ဘန္တစိတ္တော ကုပိတိန္ဒြိယောသိ၊ နေတ္တေဟိ တေ ဝါရိဂဏာ သဝန္တိ၊

ကိံ တေ နဋ္ဌံ ကိံ ပန ပတ္ထယာနော၊ ဣဓာဂမာ ဗြဟ္မေ တဒိင်္ဃ ဗြူဟီ’’တိ။

တတ္ထ ကုပိတိန္ဒြိယောသီတိ စက္ခုန္ဒြိယမေဝ သန္ဓာယ ‘‘ကုပိတိန္ဒြိယောသီ’’တိ အာဟ။ ဝါရိဂဏာတိ အဿုဗိန္ဒူနိ။ ဣင်္ဃာတိ စောဒနတ္ထေ နိပါတော။ တဉှိ မဟာသတ္တော စောဒေန္တော ဧဝမာဟ ‘‘ဗြာဟ္မဏ၊ သတ္တာ နာမ ဒွီဟိ ကာရဏေဟိ သောစန္တိ ပရိဒေဝန္တိ သတ္တသင်္ခါရေသု ကိသ္မိဉ္စိဒေဝ ပိယဇာတိကေ နဋ္ဌေ ဝါ၊ ကိဉ္စိဒေဝ ပိယဇာတိကံ ပတ္ထေတွာ အလဘန္တာ ဝါ။ တတ္ထ ကိံ တေ နဋ္ဌံ၊ ကိံ ဝါ ပန ပတ္ထယန္တော တွံ ဣဓ အာဂတော၊ ဣဒံ မေ ခိပ္ပံ ဗြူဟီ’’တိ။

အထဿ အတ္တနော သောကကာရဏံ ကထေန္တော ဗြာဟ္မဏော ဒုတိယံ ဂါထမာဟ –

၄၇။

‘‘မိယျေထ ဘရိယာ ဝဇတော မမဇ္ဇ၊ အဂစ္ဆတော မရဏမာဟ ယက္ခော၊

ဧတေန ဒုက္ခေန ပဝေဓိတောသ္မိ၊ အက္ခာဟိ မေ သေနက ဧတမတ္ထ’’န္တိ။

တတ္ထ ဝဇတောတိ ဂေဟံ ဂစ္ဆန္တဿ။ အဂစ္ဆတောတိ အဂစ္ဆန္တဿ။ ယက္ခောတိ အန္တရာမဂ္ဂေ ဧကာ ရုက္ခဒေဝတာ ဧဝမာဟာတိ ဝဒတိ။ သာ ကိရ ဒေဝတာ ‘‘ပသိဗ္ဗကေ တေ ဗြာဟ္မဏ၊ ကဏှသပ္ပော’’တိ အနာစိက္ခန္တီ ဗောဓိသတ္တဿ ဉာဏာနုဘာဝပ္ပကာသနတ္ထံ နာစိက္ခိ။ ဧတေန ဒုက္ခေနာတိ ဂစ္ဆတော ဘရိယာယ မရဏဒုက္ခေန၊ အဂစ္ဆတော အတ္တနော မရဏဒုက္ခေန၊ တေနသ္မိ ပဝေဓိတော ဃဋ္ဋိတော ကမ္ပိတော။ ဧတမတ္ထန္တိ ဧတံ ကာရဏံ။ ယေန မေ ကာရဏေန ဂစ္ဆတော ဘရိယာယ မရဏံ၊ အဂစ္ဆတော အတ္တနော မရဏံ ဟောတိ၊ ဧတံ မေ ကာရဏံ အာစိက္ခာဟီတိ အတ္ထော။

မဟာသတ္တော ဗြာဟ္မဏဿ ဝစနံ သုတွာ သမုဒ္ဒမတ္ထကေ ဇာလံ ခိပန္တော ဝိယ ဉာဏဇာလံ ပတ္ထရိတွာ ‘‘ဣမေသံ သတ္တာနံ ဗဟူနိ မရဏကာရဏာနိ။ သမုဒ္ဒေ နိမုဂ္ဂါပိ မရန္တိ၊ တတ္ထ ဝါဠမစ္ဆေဟိ ဂဟိတာပိ၊ ဂင်္ဂါယ ပတိတာပိ၊ တတ္ထ သုသုမာရေဟိ ဂဟိတာပိ၊ ရုက္ခတော ပတိတာပိ၊ ကဏ္ဋကေန ဝိဒ္ဓါပိ၊ နာနပ္ပကာရေဟိ အာဝုဓေဟိ ပဟဋာပိ၊ ဝိသံ ခါဒိတွာပိ၊ ဥဗ္ဗန္ဓိတွာပိ၊ ပပါတေ ပတိတာပိ၊ အတိသီတာဒီဟိ ဝါ နာနပ္ပကာရေဟိ ဝါ ရောဂေဟိ ဥပဒ္ဒုတာပိ မရန္တိယေဝ၊ ဧဝံ ဗဟူသု မရဏကာရဏေသု ကတရေန နု ခေါ ကာရဏေန အဇ္ဇေသ ဗြာဟ္မဏော အန္တရာမဂ္ဂေ ဝသန္တော သယံ မရိဿတိ၊ ဂေဟမဿ ဝဇတော ဘရိယာ မရိဿတီ’’တိ စိန္တေသိ။ စိန္တေန္တော ဧဝ ဗြာဟ္မဏဿ ခန္ဓေ ပသိဗ္ဗကံ ဒိသွာ ‘‘ဣမသ္မိံ ပသိဗ္ဗကေ ဧကေန သပ္ပေန ပဝိဋ္ဌေန ဘဝိတဗ္ဗံ၊ ပဝိသန္တော စ ပနေသော ဣမသ္မိံ ဗြာဟ္မဏေ ပါတရာသသမယေ သတ္တုံ ခါဒိတွာ ပသိဗ္ဗကမုခံ အဗန္ဓိတွာ ပါနီယံ ပါတုံ ဂတေ သတ္တုဂန္ဓေန သပ္ပော ပဝိဋ္ဌော ဘဝိဿတိ။ ဗြာဟ္မဏောပိ ပါနီယံ ပိဝိတွာ အာဂတော သပ္ပဿ ပဝိဋ္ဌဘာဝံ အဇာနိတွာ ပသိဗ္ဗကံ ဗန္ဓိတွာ အာဒါယ ပက္ကန္တော ဘဝိဿတိ၊ သစာယံ အန္တရာမဂ္ဂေ ဝသန္တော သာယံ ဝသနဋ္ဌာနေ ‘‘သတ္တုံ ခါဒိဿာမီ’’တိ ပသိဗ္ဗကံ မုဉ္စိတွာ ဟတ္ထံ ပဝေသေဿတိ ၊ အထ နံ သပ္ပော ဟတ္ထေ ဍံသိတွာ ဇီဝိတက္ခယံ ပါပေဿတိ၊ ဣဒမဿ အန္တရာမဂ္ဂေ ဝသန္တဿ မရဏကာရဏံ။ သစေ ပန ဂေဟံ ဂစ္ဆေယျ၊ ပသိဗ္ဗကော ဘရိယာယ ဟတ္ထဂတော ဘဝိဿတိ၊ သာ ‘အန္တောဘဏ္ဍံ ဩလောကေဿာမီ’’တိ ပသိဗ္ဗကံ မုဉ္စိတွာ ဟတ္ထံ ပဝေသေဿတိ၊ အထ နံ သပ္ပော ဍံသိတွာ ဇီဝိတက္ခယံ ပါပေဿတိ၊ ဣဒမဿ အဇ္ဇ ဂေဟံ ဂတဿ ဘရိယာယ မရဏကာရဏ’’န္တိ ဥပါယကောသလ္လဉာဏေနေဝ အညာသိ။

အထဿ ဧတဒဟောသိ ‘‘ဣမိနာ ကဏှသပ္ပေန သူရေန နိဗ္ဘယေန ဘဝိတဗ္ဗံ။ အယဉှိ ဗြာဟ္မဏဿ မဟာဖာသုကံ ပဟရန္တောပိ ပသိဗ္ဗကေ အတ္တနော စလနံ ဝါ ဖန္ဒနံ ဝါ န ဒဿေတိ၊ ဧဝရူပါယ ပရိသာယ မဇ္ဈေပိ အတ္တနော အတ္ထိဘာဝံ န ဒဿေတိ၊ တသ္မာ ဣမိနာ ကဏှသပ္ပေန သူရေန နိဗ္ဘယေန ဘဝိတဗ္ဗ’’န္တိ။ ဣဒမ္ပိ သော ဥပါယကောသလ္လဉာဏေနေဝ ဒိဗ္ဗစက္ခုနာ ပဿန္တော ဝိယ အညာသိ။ ဧဝံ သရာဇိကာယ ပရိသာယ မဇ္ဈေ သပ္ပံ ပသိဗ္ဗကံ ပဝိသန္တံ ဒိသွာ ဌိတပုရိသော ဝိယ မဟာသတ္တော ဥပါယကောသလ္လဉာဏေနေဝ ပရိစ္ဆိန္ဒိတွာ ဗြာဟ္မဏဿ ပဉှံ ကထေန္တော တတိယံ ဂါထမာဟ –

၄၈။

‘‘ဗဟူနိ ဌာနာနိ ဝိစိန္တယိတွာ၊ ယမေတ္ထ ဝက္ခာမိ တဒေဝ သစ္စံ၊

မညာမိ တေ ဗြာဟ္မဏ သတ္တုဘသ္တံ၊ အဇာနတော ကဏှသပ္ပော ပဝိဋ္ဌော’’တိ။

တတ္ထ ဗဟူနိ ဌာနာနီတိ ဗဟူနိ ကာရဏာနိ။ ဝိစိန္တယိတွာတိ ပဋိဝိဇ္ဈိတွာ စိန္တာဝသေန ပဝတ္တပဋိဝေဓော ဟုတွာ။ ယမေတ္ထ ဝက္ခာမီတိ ယံ တေ အဟံ ဧတေသု ကာရဏေသု ဧတံ ကာရဏံ ဝက္ခာမိ။ တဒေဝ သစ္စန္တိ တဒေဝ တထံ ဒိဗ္ဗစက္ခုနာ ဒိသွာ ကထိတသဒိသံ ဘဝိဿတီတိ ဒီပေတိ။ မညာမီတိ သလ္လက္ခေမိ။ သတ္တုဘသ္တန္တိ သတ္တုပသိဗ္ဗကံ။ အဇာနတောတိ အဇာနန္တဿေဝ ဧကော ကဏှသပ္ပော ပဝိဋ္ဌောတိ မညာမီတိ။

ဧဝဉ္စ ပန ဝတွာ ‘‘အတ္ထိ တေ ဗြာဟ္မဏ၊ ဧတသ္မိံ ပသိဗ္ဗကေ သတ္တူ’’တိ ပုစ္ဆိ။ ‘‘အတ္ထိ၊ ပဏ္ဍိတာ’’တိ။ ‘‘အဇ္ဇ ပါတရာသဝေလာယ သတ္တုံ ခါဒီ’’တိ? ‘‘အာမ၊ ပဏ္ဍိတာ’’တိ။ ‘‘ကတ္ထ နိသီဒိတွာ’’တိ? ‘‘အရညေ ရုက္ခမူလသ္မိံ၊ ပဏ္ဍိတာ’’တိ။ ‘‘သတ္တုံ ခါဒိတွာ ပါနီယံ ပါတုံ ဂစ္ဆန္တော ပသိဗ္ဗကမုခံ ဗန္ဓိ၊ န ဗန္ဓီ’’တိ? ‘‘န ဗန္ဓိံ၊ ပဏ္ဍိတာ’’တိ။ ‘‘ပါနီယံ ပိဝိတွာ အာဂတော ပသိဗ္ဗကံ ဩလောကေတွာ ဗန္ဓီ’’တိ။ ‘‘အနောလောကေတွာဝ ဗန္ဓိံ၊ ပဏ္ဍိတာ’’တိ။ ‘‘ဗြာဟ္မဏ၊ တဝ ပါနီယံ ပါတုံ ဂတကာလေ အဇာနန္တဿေဝ တေ သတ္တုဂန္ဓေန ပသိဗ္ဗကံ သပ္ပော ပဝိဋ္ဌောတိ မညာမိ၊ ဧဝမေတ္ထ အာဂတော တွံ၊ တသ္မာ ပသိဗ္ဗကံ ဩတာရေတွာ ပရိသမဇ္ဈေ ဌပေတွာ ပသိဗ္ဗကမုခံ မောစေတွာ ပဋိက္ကမ္မ ဌိတော ဧကံ ဒဏ္ဍကံ ဂဟေတွာ ပသိဗ္ဗကံ တာဝ ပဟရ၊ တတော ပတ္ထဋဖဏံ သုသူတိသဒ္ဒံ ကတွာ နိက္ခမန္တံ ကဏှသပ္ပံ ဒိသွာ နိက္ကင်္ခေါ ဘဝိဿတီ’’တိ စတုတ္ထံ ဂါထမာဟ –

၄၉။

‘‘အာဒါယ ဒဏ္ဍံ ပရိသုမ္ဘ ဘသ္တံ၊ ပဿေဠမူဂံ ဥရဂံ ဒုဇိဝှံ၊

ဆိန္ဒဇ္ဇ ကင်္ခံ ဝိစိကိစ္ဆိတာနိ၊ ဘုဇင်္ဂမံ ပဿ ပမုဉ္စ ဘသ္တ’’န္တိ။

တတ္ထ ပရိသုမ္ဘာတိ ပဟရ။ ပဿေဠမူဂန္တိ ဧဠံ ပဂ္ဃရန္တေန မုခေန ဧဠမူဂံ ပသိဗ္ဗကတော နိက္ခမန္တံ ဒုဇိဝှံ ဥရဂံ ပဿ။ ဆန္ဒဇ္ဇ ကင်္ခံ ဝိစိကိစ္ဆိတာနီတိ ‘‘အတ္ထိ နု ခေါ မေ ပသိဗ္ဗကေ သပ္ပော၊ ဥဒါဟု နတ္ထီ’’တိ ကင်္ခမေဝ ပုနပ္ပုနံ ဥပ္ပဇ္ဇမာနာနိ ဝိစိကိစ္ဆိတာနိ စ အဇ္ဇ ဆိန္ဒ၊ မယှံ သဒ္ဒဟ၊ အဝိတထဉှိ မေ ဝေယျာကရဏံ၊ ဣဒါနေဝ နိက္ခမန္တံ ဘုဇင်္ဂမံ ပဿ ပမုဉ္စ ဘသ္တန္တိ။

ဗြာဟ္မဏော မဟာသတ္တဿ ကထံ သုတွာ သံဝိဂ္ဂေါ ဘယပ္ပတ္တော တထာ အကာသိ။ သပ္ပောပိ သတ္တုဘသ္တေ ဒဏ္ဍေန ပဟဋေ ပသိဗ္ဗကမုခါ နိက္ခမိတွာ မဟာဇနံ ဩလောကေန္တော အဋ္ဌာသိ။ တမတ္ထံ ပကာသေန္တော သတ္ထာ ပဉ္စမံ ဂါထမာဟ –

၅၀။

‘‘သံဝိဂ္ဂရူပေါ ပရိသာယ မဇ္ဈေ၊ သော ဗြာဟ္မဏော သတ္တုဘသ္တံ ပမုဉ္စိ၊

အထ နိက္ခမိ ဥရဂေါ ဥဂ္ဂတေဇော၊ အာသီဝိသော သပ္ပော ဖဏံ ကရိတွာ’’တိ။

သပ္ပဿ ဖဏံ ကတွာ နိက္ခန္တကာလေ ‘‘မဟာသတ္တဿ သဗ္ဗညုဗုဒ္ဓဿေဝ ဗျာကရဏံ အဟောသီ’’တိ မဟာဇနော စေလုက္ခေပသဟဿာနိ ပဝတ္တေသိ၊ အင်္ဂုလိဖောဋနသဟဿာနိ ပရိဗ္ဘမိံသု၊ ဃနမေဃဝဿံ ဝိယ သတ္တရတနဝဿံ ဝဿိ၊ သာဓုကာရသဟဿာနိ ပဝတ္တိံသု၊ မဟာပထဝီဘိဇ္ဇနသဒ္ဒေါ ဝိယ အဟောသိ။ ဣဒံ ပန ဗုဒ္ဓလီဠာယ ဧဝရူပဿ ပဉှဿ ကထနံ နာမ နေဝ ဇာတိယာ ဗလံ၊ န ဂေါတ္တကုလပ္ပဒေသာနံ ဗလံ၊ ကဿ ပနေတံ ဗလန္တိ? ပညာယ ဗလံ။ ပညဝါ ဟိ ပုဂ္ဂလော ဝိပဿနံ ဝဍ္ဎေတွာ အရိယမဂ္ဂဒွါရံ ဝိဝရိတွာ အမတမဟာနိဗ္ဗာနံ ပဝိသတိ၊ သာဝကပါရမိမ္ပိ ပစ္စေကဗောဓိမ္ပိ သမ္မာသမ္ဗောဓိမ္ပိ ပဋိဝိဇ္ဈတိ။ အမတမဟာနိဗ္ဗာနသမ္ပာပကေသု ဟိ ဓမ္မေသု ပညာဝ သေဋ္ဌာ၊ အဝသေသာ တဿာ ပရိဝါရာ ဟောန္တိ။ တေနေတံ ဝုတ္တံ –

‘‘ပညာ ဟိ သေဋ္ဌာ ကုသလာ ဝဒန္တိ၊ နက္ခတ္တရာဇာရိဝ တာရကာနံ၊

သီလံ သိရီ စာပိ သတဉ္စ ဓမ္မော၊ အနွာယိကာ ပညဝတော ဘဝန္တီ’’တိ။ (ဇာ။ ၂။၁၇။၈၁)၊

ဧဝံ ကထိတေ စ ပန မဟာသတ္တေန ပဉှေ ဧကော အဟိတုဏ္ဍိကော သပ္ပဿ မုခဗန္ဓနံ ကတွာ သပ္ပံ ဂဟေတွာ အရညေ ဝိဿဇ္ဇေသိ။ ဗြာဟ္မဏော ရာဇာနံ ဥပသင်္ကမိတွာ ဇယာပေတွာ အဉ္ဇလိံ ပဂ္ဂယှ ရညော ထုတိံ ကရောန္တော ဥပဍ္ဎဂါထမာဟ –

၅၁။

‘‘သုလဒ္ဓလာဘာ ဇနကဿ ရညော၊

ယော ပဿတီ သေနကံ သာဓုပည’’န္တိ။

တဿတ္ထော – ယော သာဓုပညံ ဥတ္တမပညံ သေနကပဏ္ဍိတံ အက္ခီနိ ဥမ္မီလေတွာ ဣစ္ဆိတိစ္ဆိတက္ခဏေ ပိယစက္ခူဟိ ပဿိတုံ လဘတိ၊ တဿ ရညော ဇနကဿ ဧတေ ဣစ္ဆိတိစ္ဆိတက္ခဏေ ဒဿနလာဘာ သုလဒ္ဓလာဘာ ဝတ၊ ဧတေန လဒ္ဓေသု သဗ္ဗလာဘေသု ဧတေဝ လာဘာ သုလဒ္ဓလာဘာ နာမာတိ။

ဗြာဟ္မဏောပိ ရညော ထုတိံ ကတွာ ပုန ပသိဗ္ဗကတော သတ္တ ကဟာပဏသတာနိ ဂဟေတွာ မဟာသတ္တဿ ထုတိံ ကတွာ တုဋ္ဌိဒါယံ ဒါတုကာမော ဒိယဍ္ဎဂါထမာဟ –

‘‘ဝိဝဋ္ဋဆဒ္ဒေါ နုသိ သဗ္ဗဒဿီ၊ ဉာဏံ နု တေ ဗြာဟ္မဏ ဘိံသရူပံ။

၅၂။

‘‘ဣမာနိ မေ သတ္တသတာနိ အတ္ထိ၊ ဂဏှာဟိ သဗ္ဗာနိ ဒဒါမိ တုယှံ၊

တယာ ဟိ မေ ဇီဝိတမဇ္ဇ လဒ္ဓံ၊ အထောပိ ဘရိယာယ မကာသိ သောတ္ထိ’’န္တိ။

တတ္ထ ဝိဝဋ္ဋဆဒ္ဒေါ နုသိ သဗ္ဗဒဿီတိ ကိံ နု ခေါ တွံ သဗ္ဗေသု ဓမ္မာကာရေသု ဝိဝဋ္ဋဆဒနော ဝိဝဋ္ဋနေယျဓမ္မော သဗ္ဗညုဗုဒ္ဓါတိ ထုတိဝသေန ပုစ္ဆတိ။ ဉာဏံ နု တေ ဗြာဟ္မဏ ဘိံသရူပန္တိ ဥဒါဟု အသဗ္ဗညုဿပိ သတော တဝ ဉာဏံ အတိဝိယ ဘိံသရူပံ သဗ္ဗညုတညာဏံ ဝိယ ဗလဝန္တိ။ တယာ ဟိ မေတိ တယာ ဟိ ဒိန္နတ္တာ အဇ္ဇ မယာ ဇီဝိတံ လဒ္ဓံ။ အထောပိ ဘရိယာယ မကာသိ သောတ္ထိန္တိ အထောပိ မေ ဘရိယာယ တွမေဝ သောတ္ထိံ အကာသိ။

ဣတိ သော ဝတွာ ‘‘သစေပိ သတသဟဿံ ဘဝေယျ၊ ဒဒေယျမေဝါဟံ၊ ဧတ္တကမေဝ မေ ဓနံ၊ ဣမာနိ မေ သတ္တ သတာနိ ဂဏှာ’’တိ ပုနပ္ပုနံ ဗောဓိသတ္တံ ယာစိ။ တံ သုတွာ ဗောဓိသတ္တော အဋ္ဌမံ ဂါထမာဟ –

၅၃။

‘‘န ပဏ္ဍိတာ ဝေတနမာဒိယန္တိ၊ စိတြာဟိ ဂါထာဟိ သုဘာသိတာဟိ၊

ဣတောပိ တေ ဗြဟ္မေ ဒဒန္တု ဝိတ္တံ၊ အာဒါယ တွံ ဂစ္ဆ သကံ နိကေတ’’န္တိ။

တတ္ထ ဝေတနန္တိ ဝေတ္တနံ၊ အယမေဝ ဝါ ပါဌော။ ဣတောပိ တေ ဗြဟ္မေတိ ဗြာဟ္မဏ၊ ဣတော မမ ပါဒမူလတောပိ တုယှံ ဓနံ ဒဒန္တု။ ဝိတ္တံ အာဒါယ တွံ ဂစ္ဆာတိ ဣတော အညာနိ တီဏိ သတာနိ ဂဟေတွာ သဟဿဘဏ္ဍိကံ အာဒါယ သကနိဝေသနံ ဂစ္ဆ။

ဧဝဉ္စ ပန ဝတွာ မဟာသတ္တော ဗြာဟ္မဏဿ သဟဿံ ပူရာပေန္တော ကဟာပဏေ ဒါပေတွာ ‘‘ဗြာဟ္မဏ၊ ကေန တွံ ဓနဘိက္ခာယ ပေသိတော’’တိ ပုစ္ဆိ။ ‘‘ဘရိယာယ မေ ပဏ္ဍိတာ’’တိ။ ‘‘ဘရိယာ ပန တေ မဟလ္လိကာ၊ ဒဟရာ’’တိ။ ‘‘ဒဟရာ၊ ပဏ္ဍိတာ’’တိ။ ‘‘တေန ဟိ သာ အညေန သဒ္ဓိံ အနာစာရံ ကရောန္တီ ‘နိဗ္ဘယာ ဟုတွာ ကရိဿာမီ’တိ တံ ပေသေသိ၊ သစေ ဣမေ ကဟာပဏေ ဃရံ နေဿသိ၊ သာ တေ ဒုက္ခေန လဒ္ဓကဟာပဏေ အတ္တနော ဇာရဿ ဒဿတိ၊ တသ္မာ တွံ ဥဇုကမေဝ ဂေဟံ အဂန္တွာ ဗဟိဂါမေ ရုက္ခမူလေ ဝါ ယတ္ထ ကတ္ထစိ ဝါ ကဟာပဏေ ဌပေတွာ ပဝိသေယျာသီ’’တိ ဝတွာ တံ ဥယျောဇေသိ။ သော ဂါမသမီပံ ဂန္တွာ ဧကသ္မိံ ရုက္ခမူလေ ကဟာပဏေ ဌပေတွာ သာယံ ဂေဟံ အဂမာသိ။ ဘရိယာပိဿ တသ္မိံ ခဏေ ဇာရေန သဒ္ဓိံ နိသိန္နာ အဟောသိ။ ဗြာဟ္မဏော ဒွါရေ ဌတွာ ‘‘ဘောတီ’’တိ အာဟ။ သာ တဿ သဒ္ဒံ သလ္လက္ခေတွာ ဒီပံ နိဗ္ဗာပေတွာ ဒွါရံ ဝိဝရိတွာ ဗြာဟ္မဏေ အန္တော ပဝိဋ္ဌေ ဣတရံ နီဟရိတွာ ဒွါရမူလေ ဌပေတွာ ဂေဟံ ပဝိသိတွာ ပသိဗ္ဗကေ ကိဉ္စိ အဒိသွာ ‘‘ဗြာဟ္မဏ၊ ကိံ တေ ဘိက္ခံ စရိတွာ လဒ္ဓ’’န္တိ ပုစ္ဆိ။ ‘‘သဟဿံ မေ လဒ္ဓ’’န္တိ။ ‘‘ကဟံ ပန တ’’န္တိ။ ‘‘အသုကဋ္ဌာနေ နာမ ဌပိတံ၊ ပါတောဝ အာဟရိဿာမိ၊ မာ စိန္တယီ’’တိ။ သာ ဂန္တွာ ဇာရဿ အာစိက္ခိ။ သော နိက္ခမိတွာ အတ္တနာ ဌပိတံ ဝိယ ဂဏှိ။

ဗြာဟ္မဏော ပုနဒိဝသေ ဂန္တွာ ကဟာပဏေ အပဿန္တော ဗောဓိသတ္တဿ သန္တိကံ ဂန္တွာ ‘‘ကိံ၊ ဗြာဟ္မဏာ’’တိ ဝုတ္တေ ‘‘ကဟာပဏေ န ပဿာမိ၊ ပဏ္ဍိတာ’’တိ အာဟ။ ‘‘ဘရိယာယ တေ အာစိက္ခီ’’တိ? ‘‘အာမ၊ ပဏ္ဍိတာ’’တိ။ မဟာသတ္တော တာယ ဇာရဿ အာစိက္ခိတဘာဝံ ဉတွာ ‘‘အတ္ထိ ပန တေ ဗြာဟ္မဏ၊ ဘရိယာယ ကုလူပကဗြာဟ္မဏော’’တိ ပုစ္ဆိ။ ‘‘အတ္ထိ၊ ပဏ္ဍိတာ’’တိ။ ‘‘တုယှမ္ပိ အတ္ထီ’’တိ? ‘‘အာမ၊ ပဏ္ဍိတာ’’တိ။ အထဿ မဟာသတ္တော သတ္တန္နံ ဒိဝသာနံ ပရိဗ္ဗယံ ဒါပေတွာ ‘‘ဂစ္ဆ ပဌမဒိဝသေ တဝ သတ္တ၊ ဘရိယာယ တေ သတ္တာတိ စုဒ္ဒသ ဗြာဟ္မဏေ နိမန္တေတွာ ဘောဇေထ၊ ပုနဒိဝသတော ပဋ္ဌာယ ဧကေကံ ဟာပေတွာ သတ္တမေ ဒိဝသေ တဝ ဧကံ၊ ဘရိယာယ တေ ဧကန္တိ ဒွေ ဗြာဟ္မဏေ နိမန္တေတွာ ဘရိယာယ တေ သတ္တ ဒိဝသေ နိမန္တိတဗြာဟ္မဏဿ နိဗဒ္ဓံ အာဂမနဘာဝံ ဉတွာ မယှံ အာရောစေဟီ’’တိ အာဟ။ ဗြာဟ္မဏော တထာ ကတွာ ‘‘သလ္လက္ခိတော မေ ပဏ္ဍိတ၊ နိဗဒ္ဓံ ဘုဉ္ဇနကဗြာဟ္မဏော’’တိ မဟာသတ္တဿ အာရောစေသိ။

ဗောဓိသတ္တော တေန သဒ္ဓိံ ပုရိသေ ပေသေတွာ တံ ဗြာဟ္မဏံ အာဟရာပေတွာ ‘‘အသုကရုက္ခမူလတော တေ ဣမဿ ဗြာဟ္မဏဿ သန္တကံ ကဟာပဏသဟဿံ ဂဟိတ’’န္တိ ပုစ္ဆိ။ ‘‘န ဂဏှာမိ၊ ပဏ္ဍိတာ’’တိ။ ‘‘တွံ မမ သေနကပဏ္ဍိတဘာဝံ န ဇာနာသိ၊ အာဟရာပေဿာမိ တေ ကဟာပဏေ’’တိ။ သော ဘီတော ‘‘ဂဟိတာ မေ’’တိ သမ္ပဋိစ္ဆိ။ ‘‘ကုဟိံ တေ ဌပိတာ’’တိ? ‘‘တတ္ထေဝ၊ ပဏ္ဍိတ၊ ဌပိတာ’’တိ။ ဗောဓိသတ္တော ဗြာဟ္မဏံ ပုစ္ဆိ ‘‘ဗြာဟ္မဏ၊ ကိံ တေ သာယေဝ ဘရိယာ ဟောတု၊ ဥဒါဟု အညံ ဂဏှိဿသီ’’တိ။ ‘‘သာယေဝ မေ ဟောတု၊ ပဏ္ဍိတာ’’တိ။ ဗောဓိသတ္တော မနုဿေ ပေသေတွာ ဗြာဟ္မဏဿ ကဟာပဏေ စ ဗြာဟ္မဏိဉ္စ အာဟရာပေတွာ စောရဗြာဟ္မဏဿ ဟတ္ထတော ကဟာပဏေ ဗြာဟ္မဏဿ ဒါပေတွာ ဣတရဿ ရာဇာဏံ ကာရေတွာ နဂရာ နီဟရာပေတွာ ဗြာဟ္မဏိယာပိ ရာဇာဏံ ကာရေတွာ ဗြာဟ္မဏဿ မဟန္တံ ယသံ ဒတွာ အတ္တနောယေဝ သန္တိကေ ဝသာပေသိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ဗဟူ သောတာပတ္တိဖလာဒီနိ သစ္ဆိကရိံသု။ တဒါ ဗြာဟ္မဏော အာနန္ဒော အဟောသိ၊ ရုက္ခဒေဝတာ သာရိပုတ္တော၊ ပရိသာ ဗုဒ္ဓပရိသာ၊ သေနကပဏ္ဍိတော ပန အဟမေဝ အဟောသိန္တိ။

သတ္တုဘသ္တဇာတကဝဏ္ဏနာ သတ္တမာ။

[၄၀၃] ၈။ အဋ္ဌိသေနဇာတကဝဏ္ဏနာ

ယေမေ အဟံ န ဇာနာမီတိ ဣဒံ သတ္ထာ အာဠဝိံ နိဿာယ အဂ္ဂါဠဝေ စေတိယေ ဝိဟရန္တော ကုဋိကာရသိက္ခာပဒံ အာရဗ္ဘ ကထေသိ။ ပစ္စုပ္ပန္နဝတ္ထု ဟေဋ္ဌာ မဏိကဏ္ဌဇာတကေ (ဇာ။ ၁။၃။၇ အာဒယော) ကထိတမေဝ။ သတ္ထာ ပန တေ ဘိက္ခူ အာမန္တေတွာ ‘‘ဘိက္ခဝေ၊ ပေါရာဏကပဏ္ဍိတာ ပုဗ္ဗေ အနုပ္ပန္နေ ဗုဒ္ဓေ ဗာဟိရကပဗ္ဗဇ္ဇာယ ပဗ္ဗဇိတွာ ရာဇူဟိ ပဝါရိတာပိ ‘ယာစနာ နာမ ပရေသံ အပ္ပိယာ အမနာပါ’တိ န ယာစိံသူ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဧကသ္မိံ နိဂမေ ဗြာဟ္မဏကုလေ နိဗ္ဗတ္တိ၊ အဋ္ဌိသေနကုမာရောတိဿ နာမံ ကရိံသု။ သော ဝယပ္ပတ္တော တက္ကသိလာယံ သဗ္ဗသိပ္ပာနိ ဥဂ္ဂဏှိတွာ အပရဘာဂေ ကာမေသု အာဒီနဝံ ဒိသွာ ဃရာဝါသတော နိက္ခမိတွာ ဣသိပဗ္ဗဇ္ဇံ ပဗ္ဗဇိတွာ ဈာနာဘိညာသမာပတ္တိယော နိဗ္ဗတ္တေတွာ ဟိမဝန္တပဒေသေ စိရံ ဝသိတွာ လောဏမ္ဗိလသေဝနတ္ထာယ မနုဿပထံ ဩတရိတွာ အနုပုဗ္ဗေန ဗာရာဏသိံ ပတွာ ရာဇုယျာနေ ဝသိတွာ ပုနဒိဝသေ ဘိက္ခာယ စရန္တော ရာဇင်္ဂဏံ အဂမာသိ။ ရာဇာ တဿာစာရဝိဟာရေ ပသီဒိတွာ တံ နိမန္တာပေတွာ ပါသာဒတလေ ပလ္လင်္ကေ နိသီဒါပေတွာ သုဘောဇနံ ဘောဇေတွာ ဘောဇနာဝသာနေ အနုမောဒနံ သုတွာ ပသန္နော ပဋိညံ ဂဟေတွာ မဟာသတ္တံ ရာဇုယျာနေ ဝသာပေသိ၊ ဒိဝသဿ စ ဒွေ တယော ဝါရေ ဥပဋ္ဌာနံ အဂမာသိ။ သော ဧကဒိဝသံ ဓမ္မကထာယ ပသန္နော ရဇ္ဇံ အာဒိံ ကတွာ ‘‘ယေန ဝေါ အတ္ထော၊ တံ ဝဒေယျာထာ’’တိ ပဝါရေသိ။ ဗောဓိသတ္တော ‘‘ဣဒံ နာမ မေ ဒေဟီ’’တိ န ဝဒတိ။ အညေ ယာစကာ ‘‘ဣဒံ ဒေဟိ၊ ဣဒံ ဒေဟီ’’တိ ဣစ္ဆိတိစ္ဆိတံ ယာစန္တိ၊ ရာဇာ အသဇ္ဇမာနော ဒေတိယေဝ။ သော ဧကဒိဝသံ စိန္တေသိ ‘‘အညေ ယာစနကဝနိဗ္ဗကာ ‘ဣဒဉ္စိဒဉ္စ အမှာကံ ဒေဟီ’တိ မံ ယာစန္တိ၊ အယျော ပန အဋ္ဌိသေနော ပဝါရိတကာလတော ပဋ္ဌာယ န ကိဉ္စိ ယာစတိ၊ ပညဝါ ခေါ ပနေသ ဥပါယကုသလော၊ ပုစ္ဆိဿာမိ န’’န္တိ။ သော ဧကဒိဝသံ ဘုတ္တပါတရာသော ဂန္တွာ ဝန္ဒိတွာ ဧကမန္တံ နိသိန္နော အညေသံ ယာစနကာရဏံ တဿ စ အယာစနကာရဏံ ပုစ္ဆန္တော ပဌမံ ဂါထမာဟ –

၅၄။

‘‘ယေမေ အဟံ န ဇာနာမိ၊ အဋ္ဌိသေန ဝနိဗ္ဗကေ၊

တေ မံ သင်္ဂမ္မ ယာစန္တိ၊ ကသ္မာ မံ တွံ န ယာစသီ’’တိ။

တတ္ထ ဝနိဗ္ဗကေတိ ယာစနကေ။ သင်္ဂမ္မာတိ သမာဂန္တွာ။ ဣဒံ ဝုတ္တံ ဟောတိ – အယျ၊ အဋ္ဌိသေန၊ ယေမေ ဝနိဗ္ဗကေ အဟံ နာမဂေါတ္တဇာတိကုလပ္ပဒေသေန ‘‘ဣမေ နာမေတေ’’တိပိ န ဇာနာမိ၊ တေ မံ သမာဂန္တွာ ဣစ္ဆိတိစ္ဆိတံ ယာစန္တိ၊ တွံ ပန ကသ္မာ မံ ကိဉ္စိ န ယာစသီတိ။

တံ သုတွာ ဗောဓိသတ္တော ဒုတိယံ ဂါထမာဟ –

၅၅။

‘‘ယာစကော အပ္ပိယော ဟောတိ၊ ယာစံ အဒဒမပ္ပိယော၊

တသ္မာဟံ တံ န ယာစာမိ၊ မာ မေ ဝိဒေဿနာ အဟူ’’တိ။

တတ္ထ ယာစကော အပ္ပိယော ဟောတီတိ ယော ဟိ၊ မဟာရာဇ၊ ပုဂ္ဂလော ‘‘ဣဒံ မေ ဒေဟီ’’တိ ယာစကော၊ သော မာတာပိတူနမ္ပိ မိတ္တာမစ္စာဒီနမ္ပိ အပ္ပိယော ဟောတိ အမနာပေါ။ တဿ အပ္ပိယဘာဝေါ မဏိကဏ္ဌဇာတကေန ဒီပေတဗ္ဗော။ ယာစန္တိ ယာစိတဘဏ္ဍံ။ အဒဒန္တိ အဒဒမာနော။ ဣဒံ ဝုတ္တံ ဟောတိ – ယောပိ ယာစိတံ န ဒေတိ၊ သော မာတာပိတရော အာဒိံ ကတွာ အဒဒမာနော ပုဂ္ဂလော ယာစကဿ အပ္ပိယော ဟောတီတိ။ တသ္မာတိ ယသ္မာ ယာစကောပိ ဒါယကဿ၊ ယာစိတံ ဘဏ္ဍံ အဒဒန္တောပိ ယာစကဿ အပ္ပိယော ဟောတိ၊ တသ္မာ အဟံ တံ န ယာစာမိ။ မာ မေ ဝိဒေဿနာ အဟူတိ သစေ ဟိ အဟံ ယာစေယျမေဝ၊ တဝ ဝိဒေဿော ဘဝေယျ၊ သာ မေ တဝ သန္တိကာ ဥပ္ပန္နာ ဝိဒေဿနာ၊ သစေ ပန တွံ န ဒဒေယျာသိ၊ မမ ဝိဒေဿော ဘဝေယျာသိ၊ သာ စ မမ တယိ ဝိဒေဿနာ၊ ဧဝံ သဗ္ဗထာပိ မာ မေ ဝိဒေဿနာ အဟု၊ မာ နော ဥဘိန္နမ္ပိ မေတ္တာ ဘိဇ္ဇီတိ ဧတမတ္ထံ သမ္ပဿန္တော အဟံ တံ န ကိဉ္စိ ယာစာမီတိ။

အထဿ ဝစနံ သုတွာ ရာဇာ တိဿော ဂါထာ အဘာသိ –

၅၆။

‘‘ယော ဝေ ယာစနဇီဝါနော၊ ကာလေ ယာစံ န ယာစတိ၊

ပရဉ္စ ပုညာ ဓံသေတိ၊ အတ္တနာပိ န ဇီဝတိ။

၅၇။

‘‘ယော စ ယာစနဇီဝါနော၊ ကာလေ ယာစဉှိ ယာစတိ၊

ပရဉ္စ ပုညံ လဗ္ဘေတိ၊ အတ္တနာပိ စ ဇီဝတိ။

၅၈။

‘‘န ဝေဒေဿန္တိ သပ္ပညာ၊ ဒိသွာ ယာစကမာဂတေ၊

ဗြဟ္မစာရိ ပိယော မေသိ၊ ဝဒ တွံ ဘညမိစ္ဆသီ’’တိ။

တတ္ထ ယာစနဇီဝါနောတိ ယာစနဇီဝမာနော၊ အယမေဝ ဝါ ပါဌော။ ဣဒံ ဝုတ္တံ ဟောတိ – အယျ၊ အဋ္ဌိသေန ယော ယာစနေန ဇီဝမာနော ဓမ္မိကော သမဏော ဝါ ဗြာဟ္မဏော ဝါ ယာစိတဗ္ဗယုတ္တပတ္တကာလေ ကိဉ္စိဒေဝ ယာစိတဗ္ဗံ န ယာစတိ၊ သော ပရဉ္စ ဒါယကံ ပုညာ ဓံသေတိ ပရိဟာပေတိ၊ အတ္တနာပိ စ သုခံ န ဇီဝတိ။ ပုညံ လဗ္ဘေတီတိ ကာလေ ပန ယာစိတဗ္ဗံ ယာစန္တော ပရဉ္စ ပုညံ အဓိဂမေတိ၊ အတ္တနာပိ စ သုခံ ဇီဝတိ။ န ဝေဒေဿန္တီတိ ယံ တွံ ဝဒေသိ ‘‘မာ မေ ဝိဒေဿနာ အဟူ’’တိ၊ တံ ကသ္မာ ဝဒသိ။ သပ္ပညာ ဟိ ဒါနဉ္စ ဒါနဖလဉ္စ ဇာနန္တာ ပဏ္ဍိတာ ယာစကေ အာဂတေ ဒိသွာ န ဒေဿန္တိ န ကုဇ္ဈန္တိ၊ အညဒတ္ထု ပန ပမုဒိတာဝ ဟောန္တီတိ ဒီပေတိ။ ယာစကမာဂတေတိ မ-ကာရော ဗျဉ္ဇနသန္ဓိဝသေန ဝုတ္တော၊ ယာစကေ အာဂတေတိ အတ္ထော။ ဗြဟ္မစာရိ ပိယော မေသီတိ အယျ အဋ္ဌိသေန၊ ပရိသုဒ္ဓစာရိ မဟာပုည၊ တွံ မယှံ အတိဝိယ ပိယော၊ တသ္မာ ဝရံ တွံ မံ ဝဒေဟိ ယာစာဟိယေဝ။ ဘညမိစ္ဆသီတိ ယံကိဉ္စိ ဝတ္တဗ္ဗံ ဣစ္ဆသိ၊ သဗ္ဗံ ဝဒ၊ ရဇ္ဇမ္ပိ တေ ဒဿာမိယေဝါတိ။

ဧဝံ ဗောဓိသတ္တော ရညာ ရဇ္ဇေနာပိ ပဝါရိတော နေဝ ကိဉ္စိ ယာစိ။ ရညော ပန ဧဝံ အတ္တနော အဇ္ဈာသယေ ကထိတေ မဟာသတ္တောပိ ပဗ္ဗဇိတပဋိပတ္တိံ ဒဿေတုံ ‘‘မဟာရာဇ၊ ယာစနာ ဟိ နာမေသာ ကာမဘောဂီနံ ဂိဟီနံ အာစိဏ္ဏာ၊ န ပဗ္ဗဇိတာနံ၊ ပဗ္ဗဇိတေန ပန ပဗ္ဗဇိတကာလတော ပဋ္ဌာယ ဂိဟီဟိ အသမာနပရိသုဒ္ဓါဇီဝေန ဘဝိတဗ္ဗ’’န္တိ ပဗ္ဗဇိတပဋိပဒံ ဒဿေန္တော ဆဋ္ဌံ ဂါထမာဟ –

၅၉။

‘‘န ဝေ ယာစန္တိ သပ္ပညာ၊ ဓီရော စ ဝေဒိတုမရဟတိ၊

ဥဒ္ဒိဿ အရိယာ တိဋ္ဌန္တိ၊ ဧသာ အရိယာန ယာစနာ’’တိ။

တတ္ထ သပ္ပညာတိ ဗုဒ္ဓါ စ ဗုဒ္ဒသာဝကာ စ ဗောဓိယာ ပဋိပန္နာ ဣသိပဗ္ဗဇ္ဇံ ပဗ္ဗဇိတာ ဗောဓိသတ္တာ စ သဗ္ဗေပိ သပ္ပညာ စ သုသီလာ စ၊ ဧတေ ဧဝရူပါ သပ္ပညာ ‘‘အမှာကံ ဣဒဉ္စိဒဉ္စ ဒေထာ’’တိ န ယာစန္တိ။ ဓီရော စ ဝေဒိတုမရဟတီတိ ဥပဋ္ဌာကော ပန ဓီရော ပဏ္ဍိတော ဂိလာနကာလေ စ အဂိလာနကာလေ စ ယေန ယေနတ္ထော၊ တံ သဗ္ဗံ သယမေဝ ဝေဒိတုံ ဇာနိတုံ အရဟတိ။ ဥဒ္ဒိဿ အရိယာ တိဋ္ဌန္တီတိ အရိယာ ပန ဝါစံ အဘိန္ဒိတွာ ယေနတ္ထိကာ ဟောန္တိ၊ တံ ဥဒ္ဒိဿ ကေဝလံ ဘိက္ခာစာရဝတ္တေန တိဋ္ဌန္တိ၊ နေဝ ကာယင်္ဂံ ဝါ ဝါစင်္ဂံ ဝါ ကောပေန္တိ။ ကာယဝိကာရံ ဒဿေတွာ နိမိတ္တံ ကရောန္တော ဟိ ကာယင်္ဂံ ကောပေတိ နာမ၊ ဝစီဘေဒံ ကရောန္တော ဝါစင်္ဂံ ကောပေတိ နာမ၊ တဒုဘယံ အကတွာ ဗုဒ္ဓါဒယော အရိယာ တိဋ္ဌန္တိ။ ဧသာ အရိယာန ယာစနာတိ ဧသာ ကာယင်္ဂဝါစင်္ဂံ အကောပေတွာ ဘိက္ခာယ တိဋ္ဌမာနာ အရိယာနံ ယာစနာ နာမ။

ရာဇာ ဗောဓိသတ္တဿ ဝစနံ သုတွာ ‘‘ဘန္တေ၊ ယဒိ သပ္ပညော ဥပဋ္ဌာကော အတ္တနာဝ ဉတွာ ကုလူပကဿ ဒါတဗ္ဗံ ဒေတိ၊ အဟမ္ပိ တုမှာကံ ဣဒဉ္စိဒဉ္စ ဒမ္မီ’’တိ ဝဒန္တော သတ္တမံ ဂါထမာဟ –

၆၀။

‘‘ဒဒါမိ တေ ဗြာဟ္မဏ ရောဟိဏီနံ၊ ဂဝံ သဟဿံ သဟ ပုင်္ဂဝေန၊

အရိယော ဟိ အရိယဿ ကထံ န ဒဇ္ဇာ၊ သုတွာန ဂါထာ တဝ ဓမ္မယုတ္တာ’’တိ။

တတ္ထ ရောဟိဏီနန္တိ ရတ္တဝဏ္ဏာနံ။ ဂဝံ သဟဿန္တိ ခီရဒဓိအာဒိမဓုရရသပရိဘောဂတ္ထာယ ဧဝရူပါနံ ဂုန္နံ သဟဿံ တုယှံ ဒမ္မိ၊ တံ မေ ပဋိဂ္ဂဏှ။ အရိယောတိ အာစာရအရိယော။ အရိယဿာတိ အာစာရအရိယဿ။ ကထံ န ဒဇ္ဇာတိ ကေန ကာရဏေန န ဒဒေယျ။

ဧဝံ ဝုတ္တေ ဗောဓိသတ္တော ‘‘အဟံ မဟာရာဇ၊ အကိဉ္စနော ပဗ္ဗဇိတော၊ န မေ ဂါဝီဟိ အတ္ထော’’တိ ပဋိက္ခိပိ။ ရာဇာ တဿောဝါဒေ ဌတွာ ဒါနာဒီနိ ပုညာနိ ကတွာ သဂ္ဂပရာယဏော အဟောသိ။ သောပိ အပရိဟီနဇ္ဈာနော ဗြဟ္မလောကေ ဥပ္ပဇ္ဇိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ဗဟူ သောတာပတ္တိဖလာဒီသု ပတိဋ္ဌိတာ။ တဒါ ရာဇာ အာနန္ဒော အဟောသိ၊ အဋ္ဌိသေနော ပန အဟမေဝ အဟောသိန္တိ။

အဋ္ဌိသေနဇာတကဝဏ္ဏနာ အဋ္ဌမာ။

[၄၀၄] ၉။ ကပိဇာတကဝဏ္ဏနာ

ယတ္ထ ဝေရီ နိဝသတီတိ ဣဒံ သတ္ထာ ဇေတဝနေ ဝိဟရန္တော ဒေဝဒတ္တဿ ပထဝိပဝေသနံ အာရဗ္ဘ ကထေသိ။ တသ္မိဉှိ ပထဝိံ ပဝိဋ္ဌေ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ ဒေဝဒတ္တော သဟ ပရိသာယ နဋ္ဌော’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ ဒေဝဒတ္တော သဟ ပရိသာယ နဋ္ဌော၊ ပုဗ္ဗေပိ နဿိယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ကပိယောနိယံ နိဗ္ဗတ္တိတွာ ပဉ္စသတကပိပရိဝါရော ရာဇုယျာနေ ဝသိ။ ဒေဝဒတ္တောပိ ကပိယောနိယံ နိဗ္ဗတ္တိတွာ ပဉ္စသတကပိပရိဝါရော တတ္ထေဝ ဝသိ။ အထေကဒိဝသံ ပုရောဟိတေ ဥယျာနံ ဂန္တွာ နှတွာ အလင်္ကရိတွာ နိက္ခမန္တေ ဧကော လောလကပိ ပုရေတရံ ဂန္တွာ ရာဇုယျာနဒွါရေ တောရဏမတ္ထကေ နိသီဒိတွာ တဿ မတ္ထကေ ဝစ္စပိဏ္ဍံ ပါတေတွာ ပုန ဥဒ္ဓံ ဩလောကေန္တဿ မုခေ ပါတေသိ။ သော နိဝတ္တိတွာ ‘‘ဟောတု၊ ဇာနိဿာမိ တုမှာကံ ကတ္တဗ္ဗ’’န္တိ မက္ကဋေ သန္တဇ္ဇေတွာ ပုန နှတွာ ပက္ကာမိ။ တေန ဝေရံ ဂဟေတွာ မက္ကဋာနံ သန္တဇ္ဇိတဘာဝံ ဗောဓိသတ္တဿ အာရောစေသုံ။ သော ‘‘ဝေရီနံ နိဝသနဋ္ဌာနေ နာမ ဝသိတုံ န ဝဋ္ဋတိ၊ သဗ္ဗောပိ ကပိဂဏော ပလာယိတွာ အညတ္ထ ဂစ္ဆတူ’’တိ ကပိသဟဿဿပိ အာရောစာပေသိ။ ဒုဗ္ဗစကပိ အတ္တနော ပရိဝါရမက္ကဋေ ဂဟေတွာ ‘‘ပစ္ဆာ ဇာနိဿာမီ’’တိ တတ္ထေဝ နိသီဒိ။ ဗောဓိသတ္တော အတ္တနော ပရိဝါရံ ဂဟေတွာ အရညံ ပါဝိသိ။ အထေကဒိဝသံ ဧကိဿာ ဝီဟိကောဋ္ဋိကာယ ဒါသိယာ အာတပေ ပသာရိတဝီဟိံ ခါဒန္တော ဧကော ဧဠကော ဥမ္မုက္ကေန ပဟာရံ လဘိတွာ အာဒိတ္တသရီရော ပလာယန္တော ဧကိဿာ ဟတ္ထိသာလံ နိဿာယ တိဏကုဋိယာ ကုဋ္ဋေ သရီရံ ဃံသိ ။ သော အဂ္ဂိ တိဏကုဋိကံ ဂဏှိ၊ တတော ဥဋ္ဌာယ ဟတ္ထိသာလံ ဂဏှိ၊ ဟတ္ထိသာလာယ ဟတ္ထီနံ ပိဋ္ဌိ ဈာယိ၊ ဟတ္ထိဝေဇ္ဇာ ဟတ္ထီနံ ပဋိဇဂ္ဂန္တိ။

ပုရောဟိတောပိ မက္ကဋာနံ ဂဟဏူပါယံ ဥပဓာရေန္တော ဝိစရတိ။ အထ နံ ရာဇုပဋ္ဌာနံ အာဂန္တွာ နိသိန္နံ ရာဇာ အာဟ ‘‘အာစရိယ၊ ဗဟူ နော ဟတ္ထီ ဝဏိတာ ဇာတာ၊ ဟတ္ထိဝေဇ္ဇာ ပဋိဇဂ္ဂိတုံ န ဇာနန္တိ၊ ဇာနာသိ နု ခေါ ကိဉ္စိ ဘေသဇ္ဇ’’န္တိ? ‘‘ဇာနာမိ၊ မဟာရာဇာ’’တိ။ ‘‘ကိံ နာမာ’’တိ? ‘‘မက္ကဋဝသာ၊ မဟာရာဇာ’’တိ။ ‘‘ကဟံ လဘိဿာမာ’’တိ? ‘‘နနု ဥယျာနေ ဗဟူ မက္ကဋာ’’တိ? ရာဇာ ‘‘ဥယျာနေ မက္ကဋေ မာရေတွာ ဝသံ အာနေထာ’’တိ အာဟ။ ဓနုဂ္ဂဟာ ဂန္တွာ ပဉ္စသတေပိ မက္ကဋေ ဝိဇ္ဈိတွာ မာရေသုံ။ ဧကော ပန ဇေဋ္ဌကမက္ကဋော ပလာယန္တော သရပဟာရံ လဘိတွာပိ တတ္ထေဝ အပတိတွာ ဗောဓိသတ္တဿ ဝသနဋ္ဌာနံ ပတွာ ပတိ။ ဝါနရာ ‘‘အမှာကံ ဝသနဋ္ဌာနံ ပတွာ မတော’’တိ တဿ ပဟာရံ လဒ္ဓါ မတဘာဝံ ဗောဓိသတ္တဿ အာရောစေသုံ။ သော ဂန္တွာ ကပိဂဏမဇ္ဈေ နိသိန္နော ‘‘ပဏ္ဍိတာနံ ဩဝါဒံ အကတွာ ဝေရိဋ္ဌာနေ ဝသန္တာ နာမ ဧဝံ ဝိနဿန္တီ’’တိ ကပိဂဏဿ ဩဝါဒဝသေန ဣမာ ဂါထာ အဘာသိ –

၆၁။

‘‘ယတ္ထ ဝေရီ နိဝသတိ၊ န ဝသေ တတ္ထ ပဏ္ဍိတော၊

ဧကရတ္တံ ဒွိရတ္တံ ဝါ၊ ဒုက္ခံ ဝသတိ ဝေရိသု။

၆၂။

‘‘ဒိသော ဝေ လဟုစိတ္တဿ၊ ပေါသဿာနုဝိဓီယတော၊

ဧကဿ ကပိနော ဟေတု၊ ယူထဿ အနယော ကတော။

၆၃။

‘‘ဗာလောဝ ပဏ္ဍိတမာနီ၊ ယူထဿ ပရိဟာရကော၊

သစိတ္တဿ ဝသံ ဂန္တွာ၊ သယေထာယံ ယထာ ကပိ။

၆၄။

‘‘န သာဓု ဗလဝါ ဗာလော၊ ယူထဿ ပရိဟာရကော၊

အဟိတော ဘဝတိ ဉာတီနံ၊ သကုဏာနံဝ စေတကော။

၆၅။

‘‘ဓီရောဝ ဗလဝါ သာဓု၊ ယူထဿ ပရိဟာရကော၊

ဟိတော ဘဝတိ ဉာတီနံ၊ တိဒသာနံဝ ဝါသဝေါ။

၆၆။

‘‘ယော စ သီလဉ္စ ပညဉ္စ၊ သုတဉ္စတ္တနိ ပဿတိ၊

ဥဘိန္နမတ္ထံ စရတိ၊ အတ္တနော စ ပရဿ စ။

၆၇။

‘‘တသ္မာ တုလေယျ မတ္တာနံ၊ သီလပညာသုတာမိဝ၊

ဂဏံ ဝါ ပရိဟရေ ဓီရော၊ ဧကော ဝါပိ ပရိဗ္ဗဇေ’’တိ။

တတ္ထ လဟုစိတ္တဿာတိ လဟုစိတ္တော အဿ။ ဣဒံ ဝုတ္တံ ဟောတိ – ယော ပေါသော လဟုစိတ္တဿ မိတ္တဿ ဝါ ဉာတိနော ဝါ အနုဝိဓီယတိ အနုဝတ္တတိ၊ တဿ ပေါသဿ အနုဝိဓီယတော သော လဟုစိတ္တော ဒိသော ဟောတိ၊ ဝေရိကိစ္စံ ကရောတိ။ ဧကဿ ကပိနောတိ ပဿထ ဧကဿ လဟုစိတ္တဿ အန္ဓဗာလဿ ကပိနော ဟေတု အယံ သကလဿ ယူထဿ အနယော အဝုဍ္ဎိ မဟာဝိနာသော ကတောတိ။ ပဏ္ဍိတမာနီတိ ယော သယံ ဗာလော ဟုတွာ ‘‘အဟံ ပဏ္ဍိတော’’တိ အတ္တာနံ မညမာနော ပဏ္ဍိတာနံ ဩဝါဒံ အကတွာ သကဿ စိတ္တဿ ဝသံ ဂစ္ဆတိ၊ သော သစိတ္တဿ ဝသံ ဂန္တွာ ယထာယံ ဒုဗ္ဗစကပိ မတသယနံ သယိတော၊ ဧဝံ သယေထာတိ အတ္ထော။

န သာဓူတိ ဗာလော နာမ ဗလသမ္ပန္နော ယူထဿ ပရိဟာရကော န သာဓု န လဒ္ဓကော။ ကိံကာရဏာ? သော ဟိ အဟိတော ဘဝတိ ဉာတီနံ၊ ဝိနာသမေဝ ဝဟတိ။ သကုဏာနံဝ စေတကောတိ ယထာ ဟိ တိတ္တိရသကုဏာနံ ဒီပကတိတ္တိရော ဒိဝသမ္ပိ ဝဿန္တော အညေ သကုဏေ န မာရေတိ၊ ဉာတကေဝ မာရေတိ၊ တေသညေဝ အဟိတော ဟောတိ၊ ဧဝန္တိ အတ္ထော။ ဟိတော ဘဝတီတိ ကာယေနပိ ဝါစာယပိ မနသာပိ ဟိတကာရကောယေဝ။ ဥဘိန္နမတ္ထံ စရတီတိ ယော ဣဓ ပုဂ္ဂလော ဧတေ သီလာဒယော ဂုဏေ အတ္တနိ ပဿတိ၊ သော ‘‘မယှံ အာစာရသီလမ္ပိ အတ္ထိ၊ ပညာပိ သုတပရိယတ္တိပိ အတ္ထီ’’တိ တထတော ဇာနိတွာ ဂဏံ ပရိဟရန္တော အတ္တနော စ ပရေသဉ္စ အတ္တာနံ ပရိဝါရေတွာ စရန္တာနန္တိ ဥဘိန္နမ္ပိ အတ္ထမေဝ စရတိ။

တုလေယျ မတ္တာနန္တိ တုလေယျ အတ္တာနံ။ တုလေယျာတိ တုလေတွာ။ သီလပညာသုတာမိဝါတိ ဧတာနိ သီလာဒီနိ ဝိယ။ ဣဒံ ဝုတ္တံ ဟောတိ – ယသ္မာ သီလာဒီနိ အတ္တနိ သမနုပဿန္တော ဥဘိန္နမတ္ထံ စရတိ၊ တသ္မာ ပဏ္ဍိတော ဧတာနိ သီလာဒီနိ ဝိယ အတ္တာနမ္ပိ တေသု တုလေတွာ ‘‘ပတိဋ္ဌိတော နု ခေါမှိ သီလေ ပညာယ သုတေ’’တိ တီရေတွာ ပတိဋ္ဌိတဘာဝံ ပစ္စက္ခံ ကတွာ ဓီရော ဂဏံ ဝါ ပရိဟရေယျ၊ စတူသု ဣရိယာပထေသု ဧကော ဝါ ဟုတွာ ပရိဗ္ဗဇေယျ ဝတ္တေယျ၊ ပရိသုပဋ္ဌာကေနပိ ဝိဝေကစာရိနာပိ ဣမေဟိ တီဟိ ဓမ္မေဟိ သမန္နာဂတေနေဝ ဘဝိတဗ္ဗန္တိ။ ဧဝံ မဟာသတ္တော ကပိရာဇာ ဟုတွာပိ ဝိနယပရိယတ္တိကိစ္စံ ကထေသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဒုဗ္ဗစကပိ ဒေဝဒတ္တော အဟောသိ၊ ပရိသာပိဿ ဒေဝဒတ္တပရိသာ၊ ပဏ္ဍိတကပိရာဇာ ပန အဟမေဝ အဟောသိ’’န္တိ။

ကပိဇာတကဝဏ္ဏနာ နဝမာ။

[၄၀၅] ၁၀။ ဗကဇာတကဝဏ္ဏနာ

ဒွါသတ္တတီတိ ဣဒံ သတ္ထာ ဇေတဝနေ ဝိဟရန္တော ဗကဗြဟ္မာနံ အာရဗ္ဘ ကထေသိ။ တဿ ဟိ ‘‘ဣဒံ နိစ္စံ ဓုဝံ သဿတံ အစဝနဓမ္မံ၊ ဣတော အညံ လောကနိဿရဏံ နိဗ္ဗာနံ နာမ နတ္ထီ’’တိ ဧဝံ ဒိဋ္ဌိ ဥပ္ပဇ္ဇိ။ ဟေဋ္ဌူပပတ္တိကော ကိရေသ ဗြဟ္မာ ပုဗ္ဗေ ဈာနံ ဘာဝေတွာ ဝေဟပ္ဖလေသု နိဗ္ဗတ္တော၊ တတ္ထ ပဉ္စကပ္ပသတပရိမာဏံ အာယုံ ခေပေတွာ သုဘကိဏှေသု နိဗ္ဗတ္တိတွာ စတုသဋ္ဌိကပ္ပံ ခေပေတွာ တတော စုတော အဋ္ဌကပ္ပာယုကေသု အာဘဿရေသု နိဗ္ဗတ္တိ၊ တတြဿ ဧသာ ဒိဋ္ဌိ ဥပ္ပဇ္ဇိ။ သော ဟိ နေဝ ဥပရိဗြဟ္မလောကတော စုတိံ၊ န တတ္ထ ဥပပတ္တိံ အနုဿရိ၊ တဒုဘယမ္ပိ အပဿန္တော ဧဝံ ဒိဋ္ဌိံ ဂဏှိ။ ဘဂဝါ တဿ စေတသာ စေတောပရိဝိတက္ကမညာယ သေယျထာပိ နာမ ဗလဝါ ပုရိသော သမိဉ္ဇိတံ ဝါ ဗာဟံ ပသာရေယျ၊ ပသာရိတံ ဝါ ဗာဟံ သမိဉ္ဇေယျ၊ ဧဝမေဝ ဇေတဝနေ အန္တရဟိတော တသ္မိံ ဗြဟ္မလောကေ ပါတုရဟောသိ။ အထ ဗြဟ္မာ ဘဂဝန္တံ ဒိသွာ ‘‘ဧဟိ ခေါ၊ မာရိသ၊ သွာဂတံ မာရိသ၊ စိရဿံ ခေါ၊ မာရိသ၊ ဣမံ ပရိယာယမကာသိ၊ ယဒိဒံ ဣဓာဂမနာယ။ ဣဒဉှိ မာရိသ၊ နိစ္စံ ဣဒံ ဓုဝံ ဣဒံ သဿတံ ဣဒံ ကေဝလံ ဣဒံ အစဝနဓမ္မံ၊ ဣဒဉှိ န စ ဇာယတိ န ဇီယတိ န မီယတိ န စဝတိ န ဥပပဇ္ဇတိ၊ ဣတော စ ပနညံ ဥတ္တရိ နိဿရဏံ နတ္ထီ’’တိ အာဟ။

ဧဝံ ဝုတ္တေ ဘဂဝါ ဗကံ ဗြဟ္မာနံ ဧတဒဝေါစ ‘‘အဝိဇ္ဇာဂတော ဝတ ဘော ဗကော ဗြဟ္မာ၊ အဝိဇ္ဇာဂတော ဝတ ဘော ဗကော ဗြဟ္မာ၊ ယတြ ဟိ နာမ အနိစ္စညေဝ သမာနံ နိစ္စန္တိ ဝက္ခတိ…ပေ… သန္တဉ္စ ပနညံ ဥတ္တရိ နိဿရဏံ၊ နတ္ထညံ ဥတ္တရိ နိဿရဏန္တိ ဝက္ခတီ’’တိ (သံ။ နိ။ ၁။၁၇၅)။ တံ သုတွာ ဗြဟ္မာ ‘‘တွံ ဧဝံ ကထေသိ၊ တွံ ဧဝံ ကထေသိ၊ ဣတိ မံ ဧသ အနုယုဉ္ဇန္တော အနုဗန္ဓတီ’’တိ စိန္တေတွာ ယထာ နာမ ဒုဗ္ဗလော စောရော ကတိပယေ ပဟာရေ လဘိတွာ ‘‘ကိံ အဟမေဝ စောရော၊ အသုကောပိ စောရော အသုကောပိ စောရော’’တိ သဗ္ဗေပိ သဟာယကေ အာစိက္ခတိ၊ တထေဝ ဘဂဝတော အနုယောဂဘယေန ဘီတော အညေပိ အတ္တနော သဟာယကေ အာစိက္ခန္တော ပဌမံ ဂါထမာဟ –

၆၈။

‘‘ဒွါသတ္တတိ ဂေါတမ ပုညကမ္မာ၊ ဝသဝတ္တိနော ဇာတိဇရံ အတီတာ၊

အယမန္တိမာ ဝေဒဂူ ဗြဟ္မပတ္တိ၊ အသ္မာဘိဇပ္ပန္တိ ဇနာ အနေကာ’’တိ။ (သံ။ နိ။ ၁။၁၇၅)၊

တတ္ထ ဒွါသတ္တတီတိ န ကေဝလံ ဘော ဂေါတမ၊ အဟမေဝ၊ အထ ခေါ ဣမသ္မိံ ဗြဟ္မလောကေ မယံ ဒွါသတ္တတိ ဇနာ ပုညကမ္မာ အညေသံ ဥပရိ အတ္ထနော ဝသံ ဝတ္တနေန ဝသဝတ္တိနော ဇာတိဉ္စ ဇရဉ္စ အတီတာ၊ အယံ နော ဝေဒေဟိ ဂတတ္တာ ဝေဒဂူ၊ အယံ ဘော ဂေါတမ အန္တိမာ ဗြဟ္မပတ္တိ၊ ပစ္ဆိမကောဋိပ္ပတ္တိ သေဋ္ဌဘာဝပ္ပတ္တိ။ အသ္မာဘိဇပ္ပန္တိ ဇနာ အနေကာတိ အမှေ အညေ ဗဟူ ဇနာ ပဉ္ဇလိကာ ဟုတွာ – ‘‘အယံ ခေါ ဘဝံ ဗြဟ္မာ မဟာဗြဟ္မာ’’တိအာဒီနိ ဝဒန္တာ နမဿန္တိ ပတ္ထေန္တိ ပိဟယန္တိ၊ ‘‘အဟော ဝတ မယမ္ပိ ဧဝရူပါ ဘဝေယျာမာ’’တိ ဣစ္ဆန္တီတိ အတ္ထော။

တဿ ဝစနံ သုတွာ သတ္ထာ ဒုတိယံ ဂါထမာဟ –

၆၉။

‘‘အပ္ပံ ဟိ ဧတံ န ဟိ ဒီဃမာယု၊ ယံ တွံ ဗက မညသိ ဒီဃမာယုံ၊

သတံ သဟဿာနိ နိရဗ္ဗုဒါနံ၊ အာယုံ ပဇာနာမိ တဝါဟ ဗြဟ္မေ’’တိ။ (သံ။ နိ။ ၁။၁၇၅)၊

တတ္ထ သတံ သဟဿာနိ နိရဗ္ဗုဒါနန္တိ နိရဗ္ဗုဒသင်္ခါတာနံ ဂဏနာနံ သတသဟဿာနိ။ ဝဿာနဉှိ ဒသဒသကံ သတံ၊ ဒသ သတာနံ သဟဿံ၊ သတံ သဟဿာနံ သတသဟဿံ၊ သတံ သတသဟဿာနံ ကောဋိ နာမ၊ သတံ ကောဋိသတသဟဿာနံ ပကောဋိ နာမ၊ သတံ ပကောဋိသတသဟဿာနံ ကောဋိပကောဋိ နာမ၊ သတံ ကောဋိပကောဋိသတသဟဿာနံ ဧကံ နဟုတံ နာမ၊ သတံ နဟုတသတသဟဿာနံ ဧကံ နိန္နဟုတံ နာမ။ ဆေကော ဂဏကော ဧတ္တကံ ဂဏေတုံ သက္ကောတိ၊ တတော ပရံ ဂဏနာ နာမ ဗုဒ္ဓါနမေဝ ဝိသယော။ တတ္ထ သတံ နိန္နဟုတသတသဟဿာနံ ဧကံ အဗ္ဗုဒံ၊ ဝီသတိ အဗ္ဗုဒါနိ ဧကံ နိရဗ္ဗုဒံ၊ တေသံ နိရဗ္ဗုဒသတသဟဿာနံ ဧကံ အဟဟံ နာမ၊ ဧတ္တကံ ဗကဿ ဗြဟ္မုနော တသ္မိံ ဘဝေ အဝသိဋ္ဌံ အာယု၊ တံ သန္ဓာယ ဘဂဝါ ဧဝမာဟ။

တံ သုတွာ ဗကော တတိယံ ဂါထမာဟ –

၇၀။

‘‘အနန္တဒဿီ ဘဂဝါဟမသ္မိ၊ ဇာတိဇ္ဇရံ သောကမုပါတိဝတ္တော၊

ကိံ မေ ပုရာဏံ ဝတသီလဝတ္တံ၊ အာစိက္ခ မေ တံ ယမဟံ ဝိဇည’’န္တိ။ (သံ။ နိ။ ၁။၁၇၅)၊

တတ္ထ ဘဂဝါတိ ဘဂဝါ တုမှေ ‘‘အာယုံ ပဇာနာမိ တဝါဟ’’န္တိ ဝဒန္တာ ‘‘အဟံ အနန္တဒဿီ ဇာတိဇရဉ္စ သောကဉ္စ ဥပါတိဝတ္တောသ္မီ’’တိ ဝဒထ။ ဝတသီလဝတ္တန္တိ ဝတသမာဒါနဉ္စ သီလဝတ္တဉ္စ။ ဣဒံ ဝုတ္တံ ဟောတိ – ယဒိ တုမှေ သဗ္ဗညုဗုဒ္ဓါ၊ ဧဝံ သန္တေ ကိံ မယှံ ပုရာဏံ ဝတဉ္စ သီလဝတ္တဉ္စ၊ အာစိက္ခ မေ တံ၊ ယမဟံ တယာ အာစိက္ခိတံ ယာထာဝသရသတော ဝိဇာနေယျန္တိ။

အထဿ ဘဂဝါ အတီတာနိ ဝတ္ထူနိ အာဟရိတွာ အာစိက္ခန္တော စတဿော ဂါထာ အဘာသိ –

၇၁။

‘‘ယံ တွံ အပါယေသိ ဗဟူ မနုဿေ၊ ပိပါသိတေ ဃမ္မနိ သမ္ပရေတေ၊

တံ တေ ပုရာဏံ ဝတသီလဝတ္တံ၊ သုတ္တပ္ပဗုဒ္ဓါဝ အနုဿရာမိ။

၇၂။

‘‘ယံ ဧဏိကူလသ္မိ ဇနံ ဂဟီတံ၊ အမောစယီ ဂယှက နီယမာနံ၊

တံ တေ ပုရာဏံ ဝတသီလဝတ္တံ၊ သုတ္တပ္ပဗုဒ္ဓါဝ အနုဿရာမိ။

၇၃။

‘‘ဂင်္ဂါယ သောတသ္မိံ ဂဟီတနာဝံ၊ လုဒ္ဒေန နာဂေန မနုဿကပ္ပာ၊

အမောစယိ တွံ ဗလသာ ပသယှ၊ တံ တေ ပုရာဏံ ဝတသီလဝတ္တံ၊

သုတ္တပ္ပဗုဒ္ဓါဝ အနုဿရာမိ။

၇၄။

‘‘ကပ္ပော စ တေ ဗဒ္ဓစရော အဟောသိံ၊ သမ္ဗုဒ္ဓိမန္တံ ဝတိနံ အမညံ၊

တံ တေ ပုရာဏံ ဝတသီလဝတ္တံ၊ သုတ္တပ္ပဗုဒ္ဓါဝ အနုဿရာမီ’’တိ။ (သံ။ နိ။ ၁။၁၇၅)၊

တတ္ထ အပါယေသီတိ ပါယေသိ။ ဃမ္မနိ သမ္ပရေတေတိ ဃမ္မေန သမ္ပရေတေ အတိဝိယ ဖုဋ္ဌေ ဃမ္မကိလန္တေ။ သုတ္တပ္ပဗုဒ္ဓါဝါတိ ပစ္စူသကာလေ သုပန္တော သုပိနံ ပဿိတွာ တံ သုပိနကံ ဝိယ အနုဿရာမိ။ သော ကိရ ဗကဗြဟ္မာ ဧကသ္မိံ ကပ္ပေ တာပသော ဟုတွာ မရုကန္တာရေ ဝသန္တော ဗဟူနံ ကန္တာရပဋိပန္နာနံ ပါနီယံ အာဟရိတွာ အဒါသိ။ အထေကဒိဝသံ ဧကော သတ္ထဝါဟော ပဉ္စဟိ သကဋသတေဟိ မရုကန္တာရံ ပဋိပဇ္ဇိ။ မနုဿာ ဒိသာ ဝဝတ္ထပေတုံ အသက္ကောန္တာ သတ္တ ဒိဝသာနိ အာဟိဏ္ဍိတွာ ခီဏဒါရုဒကာ နိရာဟာရာ ဥဏှာဘိဘူတာ ‘‘ဣဒါနိ နော ဇီဝိတံ နတ္ထီ’’တိ သကဋေ ပရိဝတ္တေတွာ ဂေါဏေ မောစေတွာ ဟေဋ္ဌာသကဋေသု နိပဇ္ဇိံသု။ တဒါ တာပသော အာဝဇ္ဇေန္တော တေ ဒိသွာ ‘‘မယိ ပဿန္တေ မာ နဿိံသူ’’တိ စိန္တေတွာ အတ္တနော ဣဒ္ဓါနုဘာဝေန ဂင်္ဂါသောတံ ဥဗ္ဗတ္တေတွာ သတ္ထဝါဟာဘိမုခံ အကာသိ၊ အဝိဒူရေ စ ဧကံ ဝနသဏ္ဍံ မာပေသိ။ မနုဿာ ပါနီယံ ပိဝိတွာ နှတွာ ဂေါဏေ သန္တပ္ပေတွာ ဝနသဏ္ဍတော တိဏံ လာယိတွာ ဒါရူနိ ဂဟေတွာ ဒိသံ သလ္လက္ခေတွာ အရောဂါ ကန္တာရံ အတိက္ကမိံသု၊ တံ သန္ဓာယေတံ ဝုတ္တံ။

ဧဏိကူလသ္မိန္တိ ဧဏိယာ နာမ နဒိယာ ကူလေ။ ဂယှက နီယမာနန္တိ ကရမရဂါဟံ ဂဟေတွာ နီယမာနံ။ သော ကိရ တာပသော အပရသ္မိံ ကာလေ ဧကံ ပစ္စန္တဂါမံ နိဿာယ နဒီတီရေ ဝနသဏ္ဍေ ဝိဟာသိ။ အထေကသ္မိံ ဒိဝသေ ပဗ္ဗတတော စောရာ ဩတရိတွာ တံ ဂါမံ ပဟရိတွာ မဟာဇနံ ဂဟေတွာ ပဗ္ဗတံ အာရောပေတွာ အန္တရာမဂ္ဂေ စာရကမနုဿေ ဌပေတွာ ပဗ္ဗတဗိလံ ပဝိသိတွာ အာဟာရံ ပစာပေန္တာ နိသီဒိံသု။ တာပသော ဂေါမဟိံသာဒီနဉ္စေဝ ဒါရကဒါရိကာဒီနဉ္စ မဟန္တံ အဋ္ဋဿရံ သုတွာ ‘‘မယိ ပဿန္တေ မာ နဿိံသူ’’တိ ဣဒ္ဓါနုဘာဝေန အတ္တဘာဝံ ဇဟိတွာ စတုရင်္ဂိနိယာ သေနာယ ပရိဝုတော ရာဇာ ဟုတွာ ယုဒ္ဓဘေရိံ အာကောဋာပေန္တော တံ ဌာနံ အဂမာသိ။ စာရကမနုဿာ တံ ဒိသွာ စောရာနံ အာရောစေသုံ။ စောရာ ‘‘ရညာ သဒ္ဓိံ ဝိဂ္ဂဟော နာမ န ယုတ္တော’’တိ သဗ္ဗံ ဂဟိတဂဟိတံ ဘဏ္ဍကံ ဆဍ္ဍေတွာ ဘတ္တံ အဘုဉ္ဇိတွာဝ ပလာယိံသု။ တာပသော တေ သဗ္ဗေ အာနေတွာ သကဂါမေယေဝ ပတိဋ္ဌာပေသိ၊ တံ သန္ဓာယေတံ ဝုတ္တံ။

ဂဟီတနာဝန္တိ နိဂ္ဂဟိတနာဝံ။ လုဒ္ဒေနာတိ ကက္ခဠေန။ မနုဿကပ္ပာတိ မနုဿေ ဝိနာသေတုကာမတာယ။ ဗလသာတိ ဗလေန။ ပသယှာတိ အဘိဘဝိတွာ။ အပရသ္မိံ ကာလေ သော တာပသော ဂင်္ဂါတီရေ ဝိဟာသိ။ တဒါ မနုဿာ ဒွေ တယော နာဝါသင်္ဃာဋေ ဗန္ဓိတွာ သင်္ဃာဋမတ္ထကေ ပုပ္ဖမဏ္ဍပံ ကာရေတွာ သင်္ဃာဋေ နိသီဒိတွာ ခါဒန္တာ ပိဝန္တာ သမ္ဗန္ဓကုလံ ဂစ္ဆန္တိ။ တေ ပီတာဝသေသံ သုရံ ဘုတ္တခါဒိတာဝသေသာနိ ဘတ္တမစ္ဆမံသတမ္ဗုလာဒီနိ ဂင်္ဂါယမေဝ ပါတေန္တိ။ ဂင်္ဂေယျော နာဂရာဇာ ‘‘ဣမေ ဥစ္ဆိဋ္ဌကံ မမ ဥပရိ ခိပန္တီ’’တိ ကုဇ္ဈိတွာ ‘‘သဗ္ဗေ တေ ဇနေ ဂဟေတွာ ဂင်္ဂါယ ဩသီဒါပေဿာမီ’’တိ မဟန္တံ ဧကဒေါဏိကနာဝပ္ပမာဏံ အတ္တဘာဝံ မာပေတွာ ဥဒကံ ဘိန္ဒိတွာ ဖဏံ ဓာရယမာနော တေသံ အဘိမုခေါ ပါယာသိ။ တေ နာဂရာဇာနံ ဒိသွာ မရဏဘယတဇ္ဇိတာ ဧကပ္ပဟာရေနေဝ မဟာသဒ္ဒံ ကရိံသု။ တာပသော တေသံ ပရိဒေဝိတသဒ္ဒံ သုတွာ နာဂရာဇဿ စ ကုဒ္ဓဘာဝံ ဉတွာ ‘‘မယိ ပဿန္တေ မာ နဿိံသူ’’တိ ခိပ္ပနိသန္တိယာ အတ္တနော အာနုဘာဝေန ခိပ္ပံ သုပဏ္ဏဝဏ္ဏံ အတ္တာနံ မာပေတွာ အဂမာသိ ။ နာဂရာဇာ တံ ဒိသွာ မရဏဘယတဇ္ဇိတော ဥဒကေ နိမုဇ္ဇိ။ မနုဿာ သောတ္ထိဘာဝံ ပတွာ အဂမံသု၊ တံ သန္ဓာယေတံ ဝုတ္တံ။

ဗဒ္ဓစရောတိ အန္တေဝါသိကော။ သမ္ဗုဒ္ဓိမန္တံ ဝတိနံ အမညန္တိ ဗုဒ္ဓိသမ္ပန္နော စေဝ ဝတသမ္ပန္နော စ တာပသောတိ တံ မညမာနော။ ဣမိနာ ကိံ ဒဿေတိ? မဟာဗြဟ္မေ အဟံ အတီတေ တဝ ကေသဝတာပသကာလေ ကပ္ပော နာမ အန္တေဝါသိကော ဝေယျာဝစ္စကရော ဟုတွာ တုယှံ နာရဒေန နာမ အမစ္စေန ဗာရာဏသိတော ဟိမဝန္တံ အာနီတဿ ရောဂံ ဝူပသမေသိံ။ အထ နံ နာရဒေါ ဒုတိယဝါရေ အာဂန္တွာ နိရောဂံ ဒိသွာ ဣမံ ဂါထံ အဘာသိ –

‘‘မနုဿိန္ဒံ ဇဟိတွာန၊ သဗ္ဗကာမသမိဒ္ဓိနံ၊

ကထံ နု ဘဂဝါ ကေသိ၊ ကပ္ပဿ ရမတိ အဿမေ’’တိ။ (ဇာ။ ၁။၄။၁၈၁)၊

တမေနံ တွံ ဧတဒဝေါစ –

‘‘သာဒူနိ ရမဏီယာနိ၊ သန္တိ ဝက္ခာ မနောရမာ၊

သုဘာသိတာနိ ကပ္ပဿ၊ နာရဒ ရမယန္တိ မ’’န္တိ။ (ဇာ။ ၁။၄။၁၈၂)၊

ဣတိဿ ဘဂဝါ ဣမံ အတ္တနာ အန္တေဝါသိကေန ဟုတွာ ရောဂဿ ဝူပသမိတဘာဝံ ဒီပေန္တော ဧဝမာဟ။ တဉ္စ ပန ဗြဟ္မုနာ မနုဿလောကေ ကတကမ္မံ သဗ္ဗံ မဟာဗြဟ္မာနံ သလ္လက္ခာပေန္တောဝ ကထေသိ။

သော သတ္ထု ဝစနေန အတ္တနာ ကတကမ္မံ သရိတွာ တထာဂတဿ ထုတိံ ကရောန္တော ဩသာနဂါထမာဟ –

၇၅။

‘‘အဒ္ဓါ ပဇာနာသိ မမေတမာယုံ၊ အညမ္ပိ ဇာနာသိ တထာ ဟိ ဗုဒ္ဓါ၊

တထာ ဟိ တာယံ ဇလိတာနုဘာဝေါ၊ ဩဘာသယံ တိဋ္ဌတိ ဗြဟ္မလောက’’န္တိ။

တတ္ထ တထာ ဟိ ဗုဒ္ဓါတိ တထာ ဟိ တွံ ဗုဒ္ဓါ။ ဗုဒ္ဓါနဉှိ အညာတံ နာမ နတ္ထိ၊ သဗ္ဗဓမ္မာနံ ဗုဒ္ဓတ္တာယေဝ ဟိ တေ ဗုဒ္ဓါ နာမာတိ ဒဿေတိ။ တထာ ဟိ တာယန္တိ ဗုဒ္ဓတ္တာယေဝ စ ပန တဝ အယံ ဇလိတော သရီရပ္ပဘာနုဘာဝေါ။ ဩဘာသယံ တိဋ္ဌတီတိ ဣမံ သကလမ္ပိ ဗြဟ္မလောကံ ဩဘာသေန္တော တိဋ္ဌတိ။

ဧဝံ သတ္ထာ အတ္တနော ဗုဒ္ဓဂုဏံ ဇာနာပေန္တော ဓမ္မံ ဒေသေတွာ သစ္စာနိ ပကာသေသိ၊ သစ္စပရိယောသာနေ သမ္ပတ္တာနံ ဒသမတ္တာနံ ဗြဟ္မသဟဿာနံ အနုပါဒါယ အာသဝေဟိ စိတ္တာနိ ဝိမုစ္စိံသု။ ဣတိ ဘဂဝါ ဗဟူနံ ဗြဟ္မာနံ အဝဿယော ဟုတွာ ဗြဟ္မလောကာ ဇေတဝနံ အာဂန္တွာ တတ္ထ ကထိတနိယာမေနေဝ တံ ဓမ္မဒေသနံ ဘိက္ခူနံ ကထေတွာ ဇာတကံ သမောဓာနေသိ – ‘‘တဒါ ကေသဝတာပသော ဗကဗြဟ္မာ အဟောသိ၊ ကပ္ပမာဏဝေါ ပန အဟမေဝ အဟောသိ’’န္တိ။

ဗကဇာတကဝဏ္ဏနာ ဒသမာ။

ကုက္ကုဝဂ္ဂေါ ပဌမော။

၂။ ဂန္ဓာရဝဂ္ဂေါ

[၄၀၆] ၁။ ဂန္ဓာရဇာတကဝဏ္ဏနာ

ဟိတွာဂါမသဟဿာနီတိ ဣဒံ သတ္ထာ ဇေတဝနေ ဝိဟရန္တော ဘေသဇ္ဇသန္နိဓိကာရသိက္ခာပဒံ အာရဗ္ဘ ကထေသိ။ ဝတ္ထု ပန ရာဇဂဟေ သမုဋ္ဌိတံ။ အာယသ္မတာ ဟိ ပိလိန္ဒဝစ္ဆေန အာရာမိကကုလံ မောစေတုံ ရာဇနိဝေသနံ ဂန္တွာ ရညော ပါသာဒေ ဣဒ္ဓိဗလေန သောဝဏ္ဏမယေ ကတေ မနုဿာ ပသီဒိတွာ ထေရဿ ပဉ္စ ဘေသဇ္ဇာနိ ပဟိဏိံသု။ သော တာနိ ပရိသာယ ဝိဿဇ္ဇေသိ။ ပရိသာ ပနဿ ဗာဟုလ္လိကာ အဟောသိ၊ လဒ္ဓံ လဒ္ဓံ ကောဠမ္ဗေပိ ဃဋေပိ ပတ္တတ္ထဝိကာယောပိ ပူရေတွာ ပဋိသာမေသိ။ မနုဿာ ဒိသွာ ‘‘မဟိစ္ဆာ ဣမေ သမဏာ အန္တောကောဋ္ဌာဂါရိကာ’’တိ ဥဇ္ဈာယိံသု။ သတ္ထာ တံ ပဝတ္တိံ သုတွာ ‘‘ယာနိ ခေါ ပန တာနိ ဂိလာနာနံ ဘိက္ခူန’’န္တိ (ပါရာ။ ၆၂၂-၆၂၃) သိက္ခာပဒံ ပညပေတွာ ‘‘ဘိက္ခဝေ၊ ပေါရာဏကပဏ္ဍိတာ အနုပ္ပန္နေ ဗုဒ္ဓေ ဗာဟိရကပဗ္ဗဇ္ဇံ ပဗ္ဗဇိတွာ ပဉ္စသီလမတ္တကံ ရက္ခန္တာပိ လောဏသက္ခရမတ္တကံ ပုနဒိဝသတ္ထာယ နိဒဟန္တေ ဂရဟိံသု၊ တုမှေ ပန ဧဝရူပေ နိယျာနိကသာသနေ ပဗ္ဗဇိတွာ ဒုတိယတတိယဒိဝသတ္ထာယ သန္နိဓိံ ကရောန္တာ အယုတ္တံ ကရောထာ’’တိ ဝတွာ အတီတံ အာဟရိ။

အတီတေ ဂန္ဓာရရဋ္ဌေ ဗောဓိသတ္တော ဂန္ဓာရရညော ပုတ္တော ဟုတွာ ပိတု အစ္စယေန ရဇ္ဇေ ပတိဋ္ဌာယ ဓမ္မေန ရဇ္ဇံ ကာရေသိ။ မဇ္ဈိမပဒေသေပိ ဝိဒေဟရဋ္ဌေ ဝိဒေဟော နာမ ရာဇာ ရဇ္ဇံ ကာရေသိ။ တေ ဒွေပိ ရာဇာနော အဒိဋ္ဌသဟာယာ ဟုတွာ အညမညံ ထိရဝိဿာသာ အဟေသုံ။ တဒါ မနုဿာ ဒီဃာယုကာ ဟောန္တိ၊ တိံသ ဝဿသဟဿာနိ ဇီဝန္တိ။ အထေကဒါ ဂန္ဓာရရာဇာ ပုဏ္ဏမုပေါသထဒိဝသေ သမာဒိန္နသီလော မဟာတလေ ပညတ္တဝရပလ္လင်္ကမဇ္ဈဂတော ဝိဝဋေန သီဟပဉ္ဇရေန ပါစီနလောကဓာတုံ ဩလောကေန္တော အမစ္စာနံ ဓမ္မတ္ထယုတ္တကထံ ကထေန္တော နိသီဒိ။ တသ္မိံ ခဏေ ဂဂနတလံ အတိလင်္ဃန္တမိဝ ပရိပုဏ္ဏံ စန္ဒမဏ္ဍလံ ရာဟု အဝတ္ထရိ၊ စန္ဒပ္ပဘာ အန္တရဓာယိ။ အမစ္စာ စန္ဒာလောကံ အပဿန္တာ စန္ဒဿ ရာဟုနာ ဂဟိတဘာဝံ ရညော အာရောစေသုံ။ ရာဇာ စန္ဒံ ဩလောကေတွာ ‘‘အယံ စန္ဒော အာဂန္တုကဥပက္ကိလေသေန ဥပက္ကိလိဋ္ဌော နိပ္ပဘော ဇာတော၊ မယှမ္ပေသ ရာဇပရိဝါရော ဥပက္ကိလေသော၊ န ခေါ ပန မေတံ ပတိရူပံ၊ ယာဟံ ရာဟုနာ ဂဟိတစန္ဒော ဝိယ နိပ္ပဘော ဘဝေယျံ၊ ဝိသုဒ္ဓေ ဂဂနတရေ ဝိရောစန္တံ စန္ဒမဏ္ဍလံ ဝိယ ရဇ္ဇံ ပဟာယ ပဗ္ဗဇိဿာမိ၊ ကိံ မေ ပရေန ဩဝဒိတေန ၊ ကုလေ စ ဂဏေ စ အလဂ္ဂေါ ဟုတွာ အတ္တာနမေဝ ဩဝဒန္တော ဝိစရိဿာမိ၊ ဣဒံ မေ ပတိရူပ’’န္တိ စိန္တေတွာ ‘‘ယံ ဣစ္ဆထ၊ တံ ရာဇာနံ ကရောထာ’’တိ ရဇ္ဇံ အမစ္စာနံ နိယျာဒေသိ။ သော ရဇ္ဇံ ဆဍ္ဍေတွာ ဣသိပဗ္ဗဇ္ဇံ ပဗ္ဗဇိတွာ ဈာနာဘိညာယော နိဗ္ဗတ္တေတွာ ဈာနရတိသမပ္ပိတော ဟိမဝန္တပဒေသေ ဝါသံ ကပ္ပေသိ။

ဝိဒေဟရာဇာပိ ‘‘သုခံ မေ သဟာယဿာ’’တိ ဝါဏိဇေ ပုစ္ဆိတွာ တဿ ပဗ္ဗဇိတဘာဝံ သုတွာ ‘‘မမ သဟာယေ ပဗ္ဗဇိတေ အဟံ ရဇ္ဇေန ကိံ ကရိဿာမီ’’တိ သတ္တယောဇနိကေ မိထိလနဂရေ တိယောဇနသတိကေ ဝိဒေဟရဋ္ဌေ သောဠသသု ဂါမသဟဿေသု ပူရိတာနိ ကောဋ္ဌာဂါရာနိ၊ သောဠသသဟဿာ စ နာဋကိတ္ထိယော ဆဍ္ဍေတွာ ပုတ္တဓီတရော အမနသိကတွာ ဟိမဝန္တပဒေသံ ပဝိသိတွာ ပဗ္ဗဇိတွာ ပဝတ္တဖလဘောဇနော ဟုတွာ သမပ္ပဝတ္တဝါသံ ဝသန္တော ဝိစရိ။ တေ ဥဘောပိ သမဝတ္တစာရံ စရန္တာ အပရဘာဂေ သမာဂစ္ဆိံသု၊ န ပန အညမညံ သဉ္ဇာနိံသု၊ သမ္မောဒမာနာ ဧကတောဝ သမပ္ပဝတ္တဝါသံ ဝသိံသု။ တဒါ ဝိဒေဟတာပသော ဂန္ဓာရတာပသဿ ဥပဋ္ဌာနံ ကရောတိ။ တေသံ ဧကသ္မိံ ပုဏ္ဏမဒိဝသေ အညတရသ္မိံ ရုက္ခမူလေ နိသီဒိတွာ ဓမ္မတ္ထယုတ္တကထံ ကထေန္တာနံ ဂဂနတလေ ဝိရောစမာနံ စန္ဒမဏ္ဍလံ ရာဟု အဝတ္ထရိ။ ဝိဒေဟတာပသော ‘‘ကိံ နု ခေါ စန္ဒဿ ပဘာ နဋ္ဌာ’’တိ ဩလောကေတွာ ရာဟုနာ ဂဟိတံ စန္ဒံ ဒိသွာ ‘‘ကော နု ခေါ ဧသ အာစရိယ၊ စန္ဒံ အဝတ္ထရိတွာ နိပ္ပဘမကာသီ’’တိ ပုစ္ဆိ။ အန္တေဝါသိက အယံ ရာဟု နာမ စန္ဒဿေကော ဥပက္ကိလေသော၊ ဝိရောစိတုံ န ဒေတိ၊ အဟမ္ပိ ရာဟုဂဟိတံ စန္ဒမဏ္ဍလံ ဒိသွာ ‘‘ဣဒံ ပရိသုဒ္ဓဿ စန္ဒမဏ္ဍလဿ အာဂန္တုကေန ဥပက္ကိလေသေန နိပ္ပဘံ ဇာတံ၊ မယှမ္ပိ ဣဒံ ရဇ္ဇံ ဥပက္ကိလေသော၊ ယာဝ စန္ဒမဏ္ဍလံ ရာဟု ဝိယ ဣဒံ နိပ္ပဘံ န ကရောတိ၊ တာဝ ပဗ္ဗဇိဿာမီ’’တိ စိန္တေတွာ တဒေဝ ရာဟုဂဟိတံ စန္ဒမဏ္ဍလံ အာရမ္မဏံ ကတွာ မဟာရဇ္ဇံ ဆဍ္ဍေတွာ ပဗ္ဗဇိတောတိ။ ‘‘အာစရိယ၊ တွံ ဂန္ဓာရရာဇာ’’တိ ? ‘‘အာမ၊ အဟ’’န္တိ။ ‘‘အာစရိယ၊ အဟမ္ပိ ဝိဒေဟရဋ္ဌေ မိထိလနဂရေ ဝိဒေဟရာဇာ နာမ၊ နနု မယံ အညမညံ အဒိဋ္ဌသဟာယာ’’တိ။ ‘‘ကိံ ပန တေ အာရမ္မဏံ အဟောသီ’’တိ? အဟံ ‘‘တုမှေ ပဗ္ဗဇိတာ’’တိ သုတွာ ‘‘အဒ္ဓါ ပဗ္ဗဇ္ဇာယ မဟန္တံ ဂုဏံ အဒ္ဒသာ’’တိ တုမှေယေဝ အာရမ္မဏံ ကတွာ ရဇ္ဇံ ပဟာယ ပဗ္ဗဇိတောတိ။ တေ တတော ပဋ္ဌာယ အတိဝိယ သမဂ္ဂါ သမ္မောဒမာနာ ပဝတ္တဖလဘောဇနာ ဟုတွာ ဝိဟရိံသု။ တတ္ထ ဒီဃရတ္တံ ဝသိတွာ စ ပန လောဏမ္ဗိလသေဝနတ္ထာယ ဟိမဝန္တတော ဩတရိတွာ ဧကံ ပစ္စန္တဂါမံ သမ္ပာပုဏိံသု။

မနုဿာ တေသံ ဣရိယာပထေ ပသီဒိတွာ ဘိက္ခံ ဒတွာ ပဋိညံ ဂဟေတွာ အရညေ ရတ္တိဒိဝဋ္ဌာနာဒီနိ မာပေတွာ ဝသာပေသုံ။ အန္တရာမဂ္ဂေပိ နေသံ ဘတ္တကိစ္စကရဏတ္ထာယ ဥဒကဖာသုကဋ္ဌာနေ ပဏ္ဏသာလံ ကာရေသုံ။ တေ ပစ္စန္တဂါမေ ဘိက္ခံ စရိတွာ တာယ ပဏ္ဏသာလာယ နိသီဒိတွာ ပရိဘုဉ္ဇိတွာ အတ္တနော ဝသနဋ္ဌာနံ ဂစ္ဆန္တိ။ တေပိ မနုဿာ တေသံ အာဟာရံ ဒဒမာနာ ဧကဒါ လောဏံ ပတ္တေ ပက္ခိပိတွာ ဒေန္တိ၊ ဧကဒါ ပဏ္ဏပုဋေ ဗန္ဓိတွာ ဒေန္တိ၊ ဧကဒါ အလောဏကာဟာရမေဝ ဒေန္တိ။ တေ ဧကဒိဝသံ ပဏ္ဏပုဋေ ဗဟုတရံ လောဏံ အဒံသု။ ဝိဒေဟတာပသော လောဏံ အာဒါယ ဂန္တွာ ဗောဓိသတ္တဿ ဘတ္တကိစ္စကာလေ ပဟောနကံ ဒတွာ အတ္တနောပိ ပမာဏယုတ္တံ ဂဟေတွာ အတိရေကံ ပဏ္ဏပုဋေ ဗန္ဓိတွာ ‘‘အလောဏကဒိဝသေ ဘဝိဿတီ’’တိ တိဏဝဋ္ဋိကအန္တရေ ဌပေသိ။ အထေကဒိဝသံ အလောဏကေ အာဟာရေ လဒ္ဓေ ဝိဒေဟော ဂန္ဓာရဿ ဘိက္ခာဘာဇနံ ဒတွာ တိဏဝဋ္ဋိကအန္တရတော လောဏံ အာဟရိတွာ ‘‘အာစရိယ၊ လောဏံ ဂဏှထာ’’တိ အာဟ။ ‘‘အဇ္ဇ မနုဿေဟိ လောဏံ န ဒိန္နံ၊ တွံ ကုတော လဘသီ’’တိ? ‘‘အာစရိယ၊ ပုရိမဒိဝသေ မနုဿာ ဗဟုံ လောဏမဒံသု၊ အထာဟံ ‘အလောဏကဒိဝသေ ဘဝိဿတီ’တိ အတိရေကံ လောဏံ ဌပေသိ’’န္တိ။ အထ နံ ဗောဓိသတ္တော ‘‘မောဃပုရိသ၊ တိယောဇနသတိကံ ဝိဒေဟရဋ္ဌံ ပဟာယ ပဗ္ဗဇိတွာ အကိဉ္စနဘာဝံ ပတွာ ဣဒါနိ လောဏသက္ခရာယ တဏှံ ဇနေသီ’’တိ တဇ္ဇေတွာ ဩဝဒန္တော ပဌမံ ဂါထမာဟ –

၇၆။

‘‘ဟိတွာ ဂါမသဟဿာနိ၊ ပရိပုဏ္ဏာနိ သောဠသ၊

ကောဋ္ဌာဂါရာနိ ဖီတာနိ၊ သန္နိဓိံ ဒါနိ ကုဗ္ဗသီ’’တိ။

တတ္ထ ကောဋ္ဌာဂါရာနီတိ သုဝဏ္ဏရဇတမဏိမုတ္တာဒိရတနကောဋ္ဌာဂါရာနိ စေဝ ဒုဿကောဋ္ဌာဂါရာနိ စ ဓညကောဋ္ဌာဂါရာနိ စ။ ဖီတာနီတိ ပူရာနိ။ သန္နိဓိံ ဒါနိ ကုဗ္ဗသီတိ ဣဒါနိ ‘‘သွေ ဘဝိဿတိ၊ တတိယဒိဝသေ ဘဝိဿတီ’’တိ လောဏမတ္တံ သန္နိဓိံ ကရောသီတိ။

ဝိဒေဟော ဧဝံ ဂရဟိယမာနော ဂရဟံ အသဟန္တော ပဋိပက္ခော ဟုတွာ ‘‘အာစရိယ၊ တုမှေ အတ္တနော ဒေါသံ အဒိသွာ မယှမေဝ ဒေါသံ ပဿထ၊ နနု တုမှေ ‘ကိံ မေ ပရေန ဩဝဒိတေန၊ အတ္တာနမေဝ ဩဝဒိဿာမီ’တိ ရဇ္ဇံ ဆဍ္ဍေတွာ ပဗ္ဗဇိတာ၊ တုမှေ ဣဒါနိ မံ ကသ္မာ ဩဝဒထာ’’တိ စောဒေန္တော ဒုတိယံ ဂါထမာဟ –

၇၇။

‘‘ဟိတွာ ဂန္ဓာရဝိသယံ၊ ပဟူတဓနဓာရိယံ၊

ပသာသနတော နိက္ခန္တော၊ ဣဓ ဒါနိ ပသာသသီ’’တိ။

တတ္ထ ပသာသနတောတိ ဩဝါဒါနုသာသနီဒါနတော။ ဣဓ ဒါနီတိ ဣဒါနိ ဣဓ အရညေ ကသ္မာ မံ ဩဝဒထာတိ။

တံ သုတွာ ဗောဓိသတ္တော တတိယံ ဂါထမာဟ –

၇၈။

‘‘ဓမ္မံ ဘဏာမိ ဝေဒေဟ၊ အဓမ္မော မေ န ရုစ္စတိ၊

ဓမ္မံ မေ ဘဏမာနဿ၊ န ပါပမုပလိမ္ပတီ’’တိ။

တတ္ထ ဓမ္မန္တိ သဘာဝံ၊ ဗုဒ္ဓါဒီဟိ ဝဏ္ဏိတံ ပသတ္ထံ ကာရဏမေဝ။ အဓမ္မော မေ န ရုစ္စတီတိ အဓမ္မော နာမ အသဘာဝေါ မယှံ ကဒါစိပိ န ရုစ္စတိ။ န ပါပမုပလိမ္ပတီတိ မမ သဘာဝမေဝ ကာရဏမေဝ ဘဏန္တဿ ပါပံ နာမ ဟဒယေ န လိမ္ပတိ န အလ္လီယတိ။ ဩဝါဒဒါနံ နာမေတံ ဗုဒ္ဓပစ္စေကဗုဒ္ဓသာဝကဗောဓိသတ္တာနံ ပဝေဏီ။ တေဟိ ဒိန္နောဝါဒံ ဗာလာ န ဂဏှန္တိ၊ ဩဝါဒဒါယကဿ ပန ပါပံ နာမ နတ္ထိ။

‘‘နိဓီနံဝ ပဝတ္တာရံ၊ ယံ ပဿေ ဝဇ္ဇဒဿိနံ၊

နိဂ္ဂယှဝါဒိံ မေဓာဝိံ၊ တာဒိသံ ပဏ္ဍိတံ ဘဇေ၊

တာဒိသံ ဘဇမာနဿ၊ သေယျော ဟောတိ န ပါပိယော။

‘‘ဩဝဒေယျာနုသာသေယျ၊ အသဗ္ဘာ စ နိဝါရယေ၊

သတဉှိ သော ပိယော ဟောတိ၊ အသတံ ဟောတိ အပ္ပိယော’’တိ။ (ဓ။ ပ။ ၇၆-၇၇)၊

ဝိဒေဟတာပသော ဗောဓိသတ္တဿ ကထံ သုတွာ ‘‘အာစရိယ၊ အတ္ထနိဿိတံ ကထေန္တေနပိ ပရံ ဃဋ္ဋေတွာ ရောသေတွာ ကထေတုံ န ဝဋ္ဋတိ၊ တွံ မံ ကုဏ္ဌသတ္ထကေန မုဏ္ဍေန္တော ဝိယ အတိဖရုသံ ကထေသီ’’တိ ဝတွာ စတုတ္ထံ ဂါထမာဟ –

၇၉။

‘‘ယေန ကေနစိ ဝဏ္ဏေန၊ ပရော လဘတိ ရုပ္ပနံ၊

မဟတ္ထိယမ္ပိ စေ ဝါစံ၊ န တံ ဘာသေယျ ပဏ္ဍိတော’’တိ။

တတ္ထ ယေန ကေနစီတိ ဓမ္မယုတ္တေနာပိ ကာရဏေန။ လဘတိ ရုပ္ပနန္တိ ဃဋ္ဋနံ ဒုဿနံ ကုပ္ပနံ လဘတိယေဝ။ န တံ ဘာသေယျာတိ တသ္မာ တံ ပရပုဂ္ဂလံ ယာယ သော ဝါစာယ ဒုဿတိ၊ တံ မဟတ္ထိယံ မဟန္တံ အတ္ထနိဿိတမ္ပိ ဝါစံ န ဘာသေယျာတိ အတ္ထော။

အထဿ ဗောဓိသတ္တော ပဉ္စမံ ဂါထမာဟ –

၈၀။

‘‘ကာမံ ရုပ္ပတု ဝါ မာ ဝါ၊ ဘုသံဝ ဝိကိရီယတု၊

ဓမ္မံ မေ ဘဏမာနဿ၊ န ပါပမုပလိမ္ပတီ’’တိ။

တတ္ထ ကာမန္တိ ဧကံသေန။ ဣဒံ ဝုတ္တံ ဟောတိ – အယုတ္တကာရကော ပုဂ္ဂလော ‘‘အယုတ္တံ တေ ကတ’’န္တိ ဩဝဒိယမာနော ဧကံသေနေဝ ကုဇ္ဈတု ဝါ မာ ဝါ ကုဇ္ဈတု၊ အထ ဝါ ဘုသမုဋ္ဌိ ဝိယ ဝိကိရီယတု၊ မယှံ ပန ဓမ္မံ ဘဏန္တဿ ပါပံ နာမ နတ္ထီတိ။

ဧဝဉ္စ ပန ဝတွာ ‘‘န ဝေါ အဟံ၊ အာနန္ဒ၊ တထာ ပရက္ကမိဿာမိ၊ ယထာ ကုမ္ဘကာရော အာမကေ အာမကမတ္တေ။ နိဂ္ဂယှ နိဂ္ဂယှာဟံ အာနန္ဒ၊ ဝက္ခာမိ၊ ယော သာရော သော ဌဿတီ’’တိ (မ။ နိ။ ၃။၁၉၆) ဣမဿ သုဂတောဝါဒဿ အနုရူပါယ ပဋိပတ္တိယာ ဌတွာ ‘‘ယထာ ကုမ္ဘကာရော ဘာဇနေသု ပုနပ္ပုနံ အာကောဋေတွာ အာကောဋေတွာ အာမကံ အဂ္ဂဟေတွာ သုပက္ကမေဝ ဘာဇနံ ဂဏှာတိ၊ ဧဝံ ပုနပ္ပုနံ ဩဝဒိတွာ နိဂ္ဂဏှိတွာ ပက္ကဘာဇနသဒိသော ပုဂ္ဂလော ဂဟေတဗ္ဗော’’တိ ဒဿေတုံ ပုန တံ ဩဝဒန္တော –

၈၁။

‘‘နော စေ အဿ သကာ ဗုဒ္ဓိ၊ ဝိနယော ဝါ သုသိက္ခိတော၊

ဝနေ အန္ဓမဟိံသောဝ၊ စရေယျ ဗဟုကော ဇနော။

၈၂။

‘‘ယသ္မာ စ ပနိဓေကစ္စေ၊ အာစေရမှိ သုသိက္ခိတာ၊

တသ္မာ ဝိနီတဝိနယာ၊ စရန္တိ သုသမာဟိတာ’’တိ။ – ဣဒံ ဂါထာဒွယမာဟ၊

တဿတ္ထော – သမ္မ ဝေဒေဟ၊ ဣမေသဉှိ သတ္တာနံ သစေ အတ္တနော ဗုဒ္ဓိ ဝါ ပဏ္ဍိတေ ဩဝါဒဒါယကေ နိဿာယ အာစာရပဏ္ဏတ္တိဝိနယော ဝါ သုသိက္ခိတော န ဘဝေယျ၊ ဧဝံ သန္တေ ယထာ တိဏလတာဒိဂဟနေ ဝနေ အန္ဓမဟိံသော ဂေါစရာဂေါစရံ သာသင်္ကနိရာသင်္ကဉ္စ ဌာနံ အဇာနန္တော စရတိ၊ တထာ တုမှာဒိသော ဗဟုကော ဇနော စရေယျ။ ယသ္မာ ပန ဣဓ ဧကစ္စေ သကာယ ဗုဒ္ဓိယာ ရဟိတာ သတ္တာ အာစရိယသန္တိကေ အာစာရပဏ္ဏတ္တိသုသိက္ခိတာ၊ တသ္မာ အာစရိယေဟိ အတ္တနော အတ္တနော အနုရူပေန ဝိနယေန ဝိနီတတ္တာ ဝိနီတဝိနယာ သုသမာဟိတာ ဧကဂ္ဂစိတ္တာ ဟုတွာ စရန္တီတိ။

ဣမိနာ ဣဒံ ဒဿေတိ – ဣမိနာ ဟိ သတ္တေန ဂိဟိနာ ဟုတွာ အတ္တနော ကုလာနုရူပါ၊ ပဗ္ဗဇိတေန ပဗ္ဗဇိတာနုရူပါ သိက္ခာ သိက္ခိတဗ္ဗာ။ ဂိဟိနောပိ ဟိ အတ္တနော ကုလာနုရူပေသု ကသိဂေါရက္ခာဒီသု သိက္ခိတာဝ သမ္ပန္နာဇီဝါ ဟုတွာ သုသမာဟိတာ စရန္တိ၊ ပဗ္ဗဇိတာပိ ပဗ္ဗဇိတာနုရူပေသု ပါသာဒိကေသု အဘိက္ကန္တပဋိက္ကန္တာဒီသု အဓိသီလအဓိစိတ္တအဓိပညာသိက္ခာသု သိက္ခိတာဝ ဝိဂတဝိက္ခေပါ သုသမာဟိတာ စရန္တိ။ လောကသ္မိဉှိ –

‘‘ဗာဟုသစ္စဉ္စ သိပ္ပဉ္စ၊ ဝိနယော စ သုသိက္ခိတော၊

သုဘာသိတာ စ ယာ ဝါစာ၊ ဧတံ မင်္ဂလမုတ္တမ’’န္တိ။ (ခု။ ပါ။ ၅။၅၊ သု။ နိ။ ၂၆၄)၊

တံ သုတွာ ဝေဒေဟတာပသော ‘‘အာစရိယ၊ ဣတော ပဋ္ဌာယ မံ ဩဝဒထ အနုသာသထ၊ အဟံ အနဓိဝါသနဇာတိကတာယ တုမှေဟိ သဒ္ဓိံ ကထေသိံ၊ တံ မေ ခမထာ’’တိ ဝန္ဒိတွာ မဟာသတ္တံ ခမာပေသိ။ တေ သမဂ္ဂဝါသံ ဝသိတွာ ပုန ဟိမဝန္တမေဝ အဂမံသု။ တတြ ဗောဓိသတ္တော ဝေဒေဟတာပသဿ ကသိဏပရိကမ္မံ ကထေသိ။ သော တံ ကတွာ အဘိညာ စ သမာပတ္တိယော စ နိဗ္ဗတ္တေသိ။ ဣတိ တေ ဥဘောပိ အပရိဟီနဇ္ဈာနာ ဗြဟ္မလောကပရာယဏာ အဟေသုံ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဝေဒေဟော အာနန္ဒော အဟောသိ၊ ဂန္ဓာရရာဇာ ပန အဟမေဝ အဟောသီ’’န္တိ။

ဂန္ဓာရဇာတကဝဏ္ဏနာ ပဌမာ။

[၄၀၇] ၂။ မဟာကပိဇာတကဝဏ္ဏနာ

အတ္တာနံ သင်္ကမံ ကတွာတိ ဣဒံ သတ္ထာ ဇေတဝနေ ဝိဟရန္တော ဉာတတ္ထစရိယံ အာရဗ္ဘ ကထေသိ။ ဝတ္ထု ဘဒ္ဒသာလဇာတကေ (ဇာ။ ၁။၁၂။၁၃ အာဒယော) အာဝိ ဘဝိဿတိ။ တဒါ ပန ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ သမ္မာသမ္ဗုဒ္ဓါ ဉာတကာနံ အတ္ထံ စရတီ’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပိ တထာဂတော ဉာတီနံ အတ္ထံ စရိယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ကပိယောနိယံ နိဗ္ဗတ္တိတွာ ဝယပ္ပတ္တော အာရောဟပရိဏာဟသမ္ပန္နော ထာမဗလူပေတော ပဉ္စဟတ္ထိဗလပရိမာဏော အသီတိသဟဿကပိဂဏပရိဝုတော ဟိမဝန္တပဒေသေ ဝသတိ။ တတ္ထ ဂင်္ဂါတီရံ နိဿာယ သာခါဝိဋပသမ္ပန္နော သန္ဒစ္ဆာယော ဗဟလပတ္တော ပဗ္ဗတကူဋံ ဝိယ သမုဂ္ဂတော အမ္ဗရုက္ခော အဟောသိ ‘‘နိဂြောဓရုက္ခော’’တိပိ ဝဒန္တိ။ တဿ မဓုရာနိ ဖလာနိ ဒိဗ္ဗဂန္ဓရသာနိ မဟန္တာနိ မဟန္တကုမ္ဘပ္ပမာဏာနိ။ တဿ ဧကိဿာ သာခါယ ဖလာနိ ထလေ ပတန္တိ၊ ဧကိဿာ သာခါယ ဂင်္ဂါဇလေ၊ ဒွိန္နံ သာခါနံ ဖလာနိ မဇ္ဈေ ရုက္ခမူလေ ပတန္တိ။ ဗောဓိသတ္တော ကပိဂဏံ အာဒါယ တတ္ထ ဖလာနိ ခါဒန္တော ‘‘ဧကသ္မိံ ကာလေ ဣမဿ ရုက္ခဿ ဥဒကေ ပတိတံ ဖလံ နိဿာယ အမှာကံ ဘယံ ဥပ္ပဇ္ဇိဿတီ’’တိ ဥဒကမတ္ထကေ သာခါယ ဧကဖလမ္ပိ အနဝသေသေတွာ ပုပ္ဖကာလေ ကဠာယမတ္တကာလတော ပဋ္ဌာယ ခါဒါပေတိ စေဝ ပါတာပေတိ စ။ ဧဝံ သန္တေပိ အသီတိဝါနရသဟဿေဟိ အဒိဋ္ဌံ ကိပိလ္လိကပုဋပဋိစ္ဆန္နံ ဧကံ ပက္ကဖလံ နဒိယံ ပတိတွာ ဥဒ္ဓဉ္စ အဓော စ ဇာလံ ဗန္ဓာပေတွာ ဥဒကကီဠံ ကီဠန္တဿ ဗာရာဏသိရညော ဥဒ္ဓံဇာလေ လဂ္ဂိ။ ရညော ဒိဝသံ ကီဠိတွာ သာယံ ဂမနသမယေ ကေဝဋ္ဋာ ဇာလံ ဥက္ခိပန္တာ တံ ဒိသွာ ‘‘အသုကဖလံ နာမာ’’တိ အဇာနန္တာ ရညော ဒဿေသုံ။

ရာဇာ ‘‘ကိံဖလံ နာမေတ’’န္တိ ပုစ္ဆိ။ ‘‘န ဇာနာမ၊ ဒေဝါ’’တိ။ ‘‘ကေ ဇာနိဿန္တီ’’တိ? ‘‘ဝနစရကာ၊ ဒေဝါ’’တိ။ သော ဝနစရကေ ပက္ကောသာပေတွာ တေသံ သန္တိကာ ‘‘အမ္ဗပက္က’’န္တိ သုတွာ ဆုရိကာယ ဆိန္ဒိတွာ ပဌမံ ဝနစရကေ ခါဒါပေတွာ ပစ္ဆာ အတ္တနာပိ ခါဒိ၊ ဣတ္ထာဂါရဿာပိ အမစ္စာနမ္ပိ ဒါပေသိ။ ရညော အမ္ဗပက္ကရသော သကလသရီရံ ဖရိတွာ အဋ္ဌာသိ။ သော ရသတဏှာယ ဗဇ္ဈိတွာ တဿ ရုက္ခဿ ဌိတဋ္ဌာနံ ဝနစရကေ ပုစ္ဆိတွာ တေဟိ ‘‘ဟိမဝန္တပဒေသေ နဒီတီရေ’’တိ ဝုတ္တေ ဗဟူ နာဝါသင်္ဃာဋေ ဗန္ဓာပေတွာ ဝနစရကေဟိ ဒေသိတမဂ္ဂေန ဥဒ္ဓံသောတံ အဂမာသိ။ ‘‘ဧတ္တကာနိ ဒိဝသာနီ’’တိ ပရိစ္ဆေဒေါ န ကထိတော၊ အနုပုဗ္ဗေန ပန တံ ဌာနံ ပတွာ ‘‘ဧသော ဒေဝ၊ ရုက္ခော’’တိ ဝနစရကာ ရညော အာစိက္ခိံသု။ ရာဇာ နာဝံ ဌပေတွာ မဟာဇနပရိဝုတော ပဒသာ တတ္ထ ဂန္တွာ ရုက္ခမူလေ သယနံ ပညပါပေတွာ အမ္ဗပက္ကာနိ ခါဒိတွာ နာနဂ္ဂရသဘောဇနံ ဘုဉ္ဇိတွာ နိပဇ္ဇိ၊ သဗ္ဗဒိသာသု အာရက္ခံ ဌပေတွာ အဂ္ဂိံ ကရိံသု။

မဟာသတ္တော မနုဿေသု နိဒ္ဒံ ဩက္ကန္တေသု အဍ္ဎရတ္တသမယေ ပရိသာယ သဒ္ဓိံ အဂမာသိ။ အသီတိသဟဿဝါနရာ သာခါယ သာခံ စရန္တာ အမ္ဗာနိ ခါဒန္တိ။ ရာဇာ ပဗုဇ္ဈိတွာ ကပိဂဏံ ဒိသွာ မနုဿေ ဥဋ္ဌာပေတွာ ဓနုဂ္ဂဟေ ပက္ကောသာပေတွာ ‘‘ယထာ ဧတေ ဖလခါဒကာ ဝါနရာ န ပလာယန္တိ၊ တထာ တေ ပရိက္ခိပိတွာ ဝိဇ္ဈထ၊ သွေ အမ္ဗာနိ စေဝ ဝါနရမံသဉ္စ ခါဒိဿာမီ’’တိ အာဟ။ ဓနုဂ္ဂဟာ ‘‘သာဓူ’’တိ သမ္ပဋိစ္ဆိတွာ ရုက္ခံ ပရိဝါရေတွာ သရေ သန္နယှိတွာ အဋ္ဌံသု။ တေ ဒိသွာ ဝါနရာ မရဏဘယဘီတာ ပလာယိတုံ အသက္ကောန္တာ မဟာသတ္တံ ဥပသင်္ကမိတွာ ‘‘ဒေဝ၊ ‘ပလာယနမက္ကဋေ ဝိဇ္ဈိဿာမာ’တိ ရုက္ခံ ပရိဝါရေတွာ ဓနုဂ္ဂဟာ ဌိတာ၊ ကိံ ကရောမာ’’တိ ပုစ္ဆိတွာ ကမ္ပမာနာ အဋ္ဌံသု။ ဗောဓိသတ္တော ‘‘မာ ဘာယိတ္ထ၊ အဟံ ဝေါ ဇီဝိတံ ဒဿာမီ’’တိ ဝါနရဂဏံ သမဿာသေတွာ ဥဇုကံ ဥဂ္ဂတသာခံ အာရုယှ ဂင်္ဂါဘိမုခံ ဂတသာခံ ဂန္တွာ တဿာ ပရိယန္တတော ပက္ခန္ဒိတွာ ဓနုသတမတ္တံ ဌာနံ အတိက္ကမ္မ ဂင်္ဂါတီရေ ဧကသ္မိံ ဂုမ္ဗမတ္ထကေ ပတိတွာ တတော ဩရုယှ ‘‘မမာဂတဋ္ဌာနံ ဧတ္တကံ ဘဝိဿတီ’’တိ အာကာသံ ပရိစ္ဆိန္ဒိတွာ ဧကံ ဝေတ္တလတံ မူလေ ဆိန္ဒိတွာ သောဓေတွာ ‘‘ဧတ္တကံ ဌာနံ ရုက္ခေ ဗဇ္ဈိဿတိ၊ ဧတ္တကံ အာကာသဋ္ဌံ ဘဝိဿတီ’’တိ ဣမာနိ ဒွေ ဌာနာနိ ဝဝတ္ထပေတွာ အတ္တနော ကဋိယံ ဗန္ဓနဋ္ဌာနံ န သလ္လက္ခေသိ။

သော တံ လတံ အာဒါယ ဧကံ ကောဋိံ ဂင်္ဂါတီရေ ပတိဋ္ဌိတရုက္ခေ ဗန္ဓိတွာ ဧကံ အတ္တနော ကဋိယံ ဗန္ဓိတွာ ဝါတစ္ဆိန္နဝလာဟကော ဝိယ ဝေဂေန ဓနုသတမတ္တံ ဌာနံ လင်္ဃိတွာ ကဋိယံ ဗန္ဓနဋ္ဌာနဿ အသလ္လက္ခိတတ္တာ ရုက္ခံ ပါပုဏိတုံ အသက္ကောန္တော ဥဘောဟိ ဟတ္ထေဟိ အမ္ဗသာခံ ဒဠှံ ဂဏှိတွာ ဝါနရဂဏဿ သညမဒါသိ ‘‘သီဃံ မမ ပိဋ္ဌိံ မဒ္ဒမာနာ ဝေတ္တလတာယ သောတ္ထိဂမနံ ဂစ္ဆထာ’’တိ။ အသီတိသဟဿဝါနရာ မဟာသတ္တံ ဝန္ဒိတွာ ခမာပေတွာ တထာ အဂမံသု။ တဒါ ဒေဝဒတ္တောပိ မက္ကဋော ဟုတွာ တေသံ အဗ္ဘန္တရေ ဟောတိ။ သော ‘‘အယံ မေ ပစ္စာမိတ္တဿ ပိဋ္ဌိံ ပဿိတုံ ကာလော’’တိ ဥစ္စံ သာခံ အာရုယှ ဝေဂံ ဇနေတွာ တဿ ပိဋ္ဌိယံ ပတိ။ မဟာသတ္တဿ ဟဒယံ ဘိဇ္ဇိ၊ ဗလဝဝေဒနာ ဥပ္ပဇ္ဇိ။ သောပိ တံ ဝေဒနာပ္ပတ္တံ ကတွာ ပက္ကာမိ။ မဟာသတ္တော ဧကကောဝ အဟောသိ။ ရာဇာ အနိဒ္ဒါယန္တော ဝါနရေဟိ စ မဟာသတ္တေန စ ကတကိရိယံ သဗ္ဗံ ဒိသွာ ‘‘အယံ တိရစ္ဆာနော ဟုတွာ အတ္တနော ဇီဝိတံ အဂဏေတွာ ပရိသာယ သောတ္ထိဘာဝမေဝ အကာသီ’’တိ စိန္တေန္တော နိပဇ္ဇိ။

သော ပဘာတာယ ရတ္တိယာ မဟာသတ္တဿ တုဿိတွာ ‘‘န ယုတ္တံ ဣမံ ကပိရာဇာနံ နာသေတုံ၊ ဥပါယေန နံ ဩတာရေတွာ ပဋိဇဂ္ဂိဿာမီ’’တိ အန္တောဂင်္ဂါယ နာဝါသင်္ဃာဋံ ဌပေတွာ တတ္ထ အဋ္ဋကံ ဗန္ဓာပေတွာ သဏိကံ မဟာသတ္တံ ဩတာရာပေတွာ ပိဋ္ဌိယံ ကာသာဝဝတ္ထံ ပတ္ထရာပေတွာ ဂင်္ဂေါဒကေန နှာပေတွာ ဖာဏိတောဒကံ ပါယေတွာ ပရိသုဒ္ဓသရီရံ သဟဿပါကတေလေန အဗ္ဘဉ္ဇာပေတွာ သယနပိဋ္ဌေ ဧဠကစမ္မံ သန္ထရာပေတွာ သဏိကံ တတ္ထ နိပဇ္ဇာပေတွာ အတ္တနာ နီစေ အာသနေ နိသီဒိတွာ ပဌမံ ဂါထမာဟ –

၈၃။

‘‘အတ္တာနံ သင်္ကမံ ကတွာ၊ ယော သောတ္ထိံ သမတာရယိ၊

ကိံ တွံ တေသံ ကိမေ တုယှံ၊ ဟောန္တိ ဧတေ မဟာကပီ’’တိ။

တဿတ္ထော – အမ္ဘော မဟာကပိ၊ ယော တွံ အတ္တာနံ သင်္ကမံ ကတွာ တုလံ အာရောပေတွာ ဇီဝိတံ ပရိစ္စဇိတွာ ဣမေ ဝါနရေ သောတ္ထိံ သမတာရယိ၊ ခေမေန သန္တာရေသိ၊ ကိံ တွံ တေသံ ဟောသိ၊ ကိမေ တုယှံ ဝါ ကိံသု ဧတေ ဟောန္တီတိ?

တံ သုတွာ ဗောဓိသတ္တော ရာဇာနံ ဩဝဒန္တော သေသဂါထာ အဘာသိ –

၈၄။

‘‘ရာဇာဟံ ဣဿရော တေသံ၊ ယူထဿ ပရိဟာရကော၊

တေသံ သောကပရေတာနံ၊ ဘီတာနံ တေ အရိန္ဒမ။

၈၅။

‘‘ဥလ္လင်္ဃယိတွာ အတ္တာနံ၊ ဝိဿဋ္ဌဓနုနော သတံ၊

တတော အပရပါဒေသု၊ ဒဠှံ ဗန္ဓံ လတာဂုဏံ။

၈၆။

‘‘ဆိန္နဗ္ဘမိဝ ဝါတေန၊ နုဏ္ဏော ရုက္ခံ ဥပါဂမိံ၊

သောဟံ အပ္ပဘဝံ တတ္ထ၊ သာခံ ဟတ္ထေဟိ အဂ္ဂဟိံ။

၈၇။

‘‘တံ မံ ဝိယာယတံ သန္တံ၊ သာခါယ စ လတာယ စ၊

သမနုက္ကမန္တာ ပါဒေဟိ၊ သောတ္ထိံ သာခါမိဂါ ဂတာ။

၈၈။

‘‘တံ မံ န တပတေ ဗန္ဓော၊ မတော မေ န တပေဿတိ၊

သုခမာဟရိတံ တေသံ၊ ယေသံ ရဇ္ဇမကာရယိံ။

၈၉။

‘‘ဧသာ တေ ဥပမာ ရာဇ၊ တံ သုဏောဟိ အရိန္ဒမ၊

ရညာ ရဋ္ဌဿ ယောဂ္ဂဿ၊ ဗလဿ နိဂမဿ စ၊

သဗ္ဗေသံ သုခမေဋ္ဌဗ္ဗံ၊ ခတ္တိယေန ပဇာနတာ’’တိ။

တတ္ထ တေသန္တိ တေသံ အသီတိသဟဿာနံ ဝါနရာနံ။ ဘီတာနံ တေတိ တဝ ဝိဇ္ဈနတ္ထာယ အာဏာပေတွာ ဌိတဿ ဘီတာနံ။ အရိန္ဒမာတိ ရာဇာနံ အာလပတိ။ ရာဇာ ဟိ စောရာဒီနံ အရီနံ ဒမနတော ‘‘အရိန္ဒမော’’တိ ဝုစ္စတိ။ ဝိဿဋ္ဌဓနုနော သတန္တိ အနာရောပိတဓနုသတပ္ပမာဏံ ဌာနံ အတ္တာနံ အာကာသေ ဥလ္လင်္ဃယိတွာ ဝိဿဇ္ဇေတွာ တတော ဣမမှာ ရုက္ခာ လင်္ဃယိတွာ ဂတဋ္ဌာနတော။ အပရပါဒေသူတိ ပစ္ဆာပါဒေသု။ ဣဒံ ကဋိဘာဂံ သန္ဓာယ ဝုတ္တံ။ ဗောဓိသတ္တော ဟိ ကဋိဘာဂေ တံ လတာဂုဏံ ဒဠှံ ဗန္ဓိတွာ ပစ္ဆိမပါဒေဟိ ဘူမိယံ အက္ကမိတွာ ဝိဿဇ္ဇေတွာ ဝါတဝေဂေန အာကာသံ ပက္ခန္ဒိ။ နုဏ္ဏောရုက္ခံ ဥပါဂမိန္တိ ဝါတစ္ဆိန္နံ အဗ္ဘမိဝ အတ္တနော ဝေဂဇနိတေန ဝါတေန နုဏ္ဏော။ ယထာ ဝါတစ္ဆိန္နဗ္ဘံ ဝါတေန၊ ဧဝံ အတ္တနော ဝေဂေန နုဏ္ဏော ဟုတွာ ဣမံ အမ္ဗရုက္ခံ ဥပါဂမိံ ။ အပ္ပဘဝန္တိ သော အဟံ တတ္ထ အာကာသပ္ပဒေသေ ရုက္ခံ ပါပုဏိတုံ အပ္ပဟောန္တော တဿ ရုက္ခဿ သာခံ ဟတ္ထေဟိ အဂ္ဂဟေသိန္တိ အတ္ထော။

ဝိယာယတန္တိ ရုက္ခသာခါယ စ ဝေတ္တလတာယ စ ဝီဏာယ ဘမရတန္တိ ဝိယ ဝိတတံ အာကဍ္ဎိတသရီရံ။ သမနုက္ကမန္တာတိ မယာ အနုညာတာ မံ ဝန္ဒိတွာ ပါဒေဟိ အနုက္ကမန္တာ နိရန္တရမေဝ အက္ကမန္တာ သောတ္ထိံ ဂတာ။ တံ မံ န တပတေ ဗန္ဓောတိ တံ မံ နာပိ သော ဝလ္လိယာ ဗန္ဓော တပတိ၊ နာပိ ဣဒါနိ မရဏံ တပေဿတိ။ ကိံကာရဏာ? သုခမာဟရိတံ တေသန္တိ ယသ္မာ ယေသံ အဟံ ရဇ္ဇမကာရယိံ၊ တေသံ မယာ သုခမာဟရိတံ။ ဧတေ ဟိ ‘‘မဟာရာဇ၊ အယံ နော ဥပ္ပန္နံ ဒုက္ခံ ဟရိတွာ သုခံ အာဟရိဿတီ’’တိ မံ ရာဇာနံ အကံသု။ အဟမ္ပိ ‘‘တုမှာကံ ဥပ္ပန္နံ ဒုက္ခံ ဟရိဿာမိ’’စ္စေဝ ဧတေသံ ရာဇာ ဇာတော။ တံ အဇ္ဇ မယာ ဧတေသံ မရဏဒုက္ခံ ဟရိတွာ ဇီဝိတသုခံ အာဟဋံ၊ တေန မံ နာပိ ဗန္ဓော တပတိ၊ န မရဏဝဓော တပေဿတိ။

ဧသာ တေ ဥပမာတိ ဧသာ တေ မဟာရာဇ၊ မယာ ကတကိရိယာယ ဥပမာ။ တံ သုဏောဟီတိ တသ္မာ ဣမာယ ဥပမာယ သံသန္ဒေတွာ အတ္တနော ဒိယျမာနံ ဩဝါဒံ သုဏာဟိ။ ရညာ ရဋ္ဌဿာတိ မဟာရာဇ၊ ရညာ နာမ ဥစ္ဆုယန္တေ ဥစ္ဆုံ ဝိယ ရဋ္ဌံ အပီဠေတွာ စတုဗ္ဗိဓံ အဂတိဂမနံ ပဟာယ စတူဟိ သင်္ဂဟဝတ္ထူဟိ သင်္ဂဏှန္တေန ဒသသု ရာဇဓမ္မေသု ပတိဋ္ဌာယ မယာ ဝိယ အတ္တနော ဇီဝိတံ ပရိစ္စဇိတွာ ‘‘ကိန္တိမေ ရဋ္ဌဝါသိနော ဝိဂတဘယာ ဂိမှကာလေ ဝိဝဋဒွါရေ ဉာတီဟိ စ ပရိဝါရကေဟိ စ ပရိဝါရိတာ ဥရေ ပုတ္တေ နစ္စေန္တာ သီတေန ဝါတေန ဗီဇိယမာနာ ယထာရုစိ အတ္တနော အတ္တနော သန္တကံ ပရိဘုဉ္ဇန္တာ ကာယိကစေတသိကသုခသမင်္ဂိနော ဘဝေယျု’’န္တိ သကလရဋ္ဌဿ စ ရထသကဋာဒိယုတ္တဝါဟနဿ ယောဂ္ဂဿ စ ပတ္တိသင်္ခါတဿ ဗလဿ စ နိဂမဇနပဒသင်္ခါတဿ နိဂမဿ စ သဗ္ဗေသံ သုခမေဝ ဧသိတဗ္ဗံ ဂဝေသိတဗ္ဗန္တိ အတ္ထော။ ခတ္တိယေန ပဇာနတာတိ ခေတ္တာနံ အဓိပတိဘာဝေန ‘‘ခတ္တိယော’’တိ လဒ္ဓနာမေန ပန ဧတေန အဝသေသသတ္တေ အတိက္ကမ္မ ပဇာနတာ ဉာဏသမ္ပန္နေန ဘဝိတဗ္ဗန္တိ။

ဧဝံ မဟာသတ္တော ရာဇာနံ ဩဝဒန္တော အနုသာသန္တောဝ ကာလမကာသိ။ ရာဇာ အမစ္စေ ပက္ကောသာပေတွာ ‘‘ဣမဿ ကပိရာဇဿ ရာဇူနံ ဝိယ သရီရကိစ္စံ ကရောထာ’’တိ ဝတွာ ဣတ္ထာဂါရမ္ပိ အာဏာပေသိ ‘‘တုမှေ ရတ္တဝတ္ထနိဝတ္ထာ ဝိကိဏ္ဏကေသာ ဒဏ္ဍဒီပိကဟတ္ထာ ကပိရာဇာနံ ပရိဝါရေတွာ အာဠာဟနံ ဂစ္ဆထာ’’တိ။ အမစ္စာ ဒါရူနံ သကဋသတမတ္တေန စိတကံ ကရိတွာ ရာဇူနံ ကရဏနိယာမေနေဝ မဟာသတ္တဿ သရီရကိစ္စံ ကတွာ သီသကပါလံ ဂဟေတွာ ရညော သန္တိကံ အဂမံသု။ ရာဇာ မဟာသတ္တဿ အာဠာဟနေ စေတိယံ ကာရေတွာ ဒီပေ ဇာလာပေတွာ ဂန္ဓမာလာဒီဟိ ပူဇေတွာ သီသကပါလံ သုဝဏ္ဏခစိတံ ကာရေတွာ ကုန္တဂ္ဂေ ဌပေတွာ ပုရတော ကတွာ ဂန္ဓမာလာဒီဟိ ပူဇေန္တော ဗာရာဏသိံ ဂန္တွာ အန္တောရာဇဒွါရေ ဌပေတွာ သကလနဂရံ သဇ္ဇာပေတွာ သတ္တာဟံ ဓာတုပူဇံ ကာရေသိ။ အထ နံ ဓာတုံ ဂဟေတွာ စေတိယံ ကာရေတွာ ယာဝဇီဝံ ဂန္ဓမာလာဒီဟိ ပူဇေတွာ ဗောဓိသတ္တဿ ဩဝါဒေ ပတိဋ္ဌာယ ဒါနာဒီနိ ပုညာနိ ကရောန္တော ဓမ္မေန ရဇ္ဇံ ကာရေတွာ သဂ္ဂပရာယဏော အဟောသိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ – ‘‘တဒါ ရာဇာ အာနန္ဒော အဟောသိ၊ ဒုဋ္ဌကပိ ဒေဝဒတ္တော၊ ပရိသာ ဗုဒ္ဓပရိသာ၊ ကပိရာဇာ ပန အဟမေဝ အဟောသိ’’န္တိ။

မဟာကပိဇာတကဝဏ္ဏနာ ဒုတိယာ။

[၄၀၈] ၃။ ကုမ္ဘကာရဇာတကဝဏ္ဏနာ

အမ္ဗာဟမဒ္ဒံ ဝနမန္တရသ္မိန္တိ ဣဒံ သတ္ထာ ဇေတဝနေ ဝိဟရန္တော ကိလေသနိဂ္ဂဟံ အာရဗ္ဘ ကထေသိ။ ဝတ္ထု ပါနီယဇာတကေ (ဇာ။ ၁။၁၁။၅၉ အာဒယော) အာဝိ ဘဝိဿတိ။ တဒါ ပန သာဝတ္ထိယံ ပဉ္စသတာ သဟာယကာ ပဗ္ဗဇိတွာ အန္တောကောဋိသန္ထာရေ ဝသမာနာ အဍ္ဎရတ္တသမယေ ကာမဝိတက္ကံ ဝိတက္ကယိံသု။ သတ္ထာ အတ္တနော သာဝကေ ရတ္တိယာ တယော ဝါရေ၊ ဒိဝသဿ တယော ဝါရေတိ ရတ္တိန္ဒိဝံ ဆ ဝါရေ ဩလောကေန္တော ကိကီ အဏ္ဍံ ဝိယ၊ စမရီ ဝါလဓိံ ဝိယ၊ မာတာ ပိယပုတ္တံ ဝိယ၊ ဧကစက္ခုကော ပုရိသော စက္ခုံ ဝိယ ရက္ခတိ၊ တသ္မိံ တသ္မိံယေဝ ခဏေ ဥပ္ပန္နကိလေသံ နိဂ္ဂဏှာတိ။ သော တံ ဒိဝသံ အဍ္ဎရတ္တသမယေ ဇေတဝနံ ပရိဂ္ဂဏှန္တော တေသံ ဘိက္ခူနံ ဝိတက္ကသမုဒါစာရံ ဉတွာ ‘‘ဣမေသံ ဘိက္ခူနံ အဗ္ဘန္တရေ အယံ ကိလေသော ဝဍ္ဎန္တော အရဟတ္တဿ ဟေတုံ ဘိန္ဒိဿတိ၊ ဣဒါနေဝ နေသံ ကိလေသံ နိဂ္ဂဏှိတွာ အရဟတ္တံ ဒဿာမီ’’တိ ဂန္ဓကုဋိတော နိက္ခမိတွာ အာနန္ဒတ္ထေရံ ပက္ကောသာပေတွာ ‘‘အာနန္ဒ၊ အန္တောကောဋိသန္ထာရေ ဝသနကဘိက္ခူ သဗ္ဗေ သန္နိပါတေဟီ’’တိ သန္နိပါတာပေတွာ ပညတ္တဝရဗုဒ္ဓါသနေ နိသီဒိတွာ ‘‘န၊ ဘိက္ခဝေ၊ အန္တောပဝတ္တကိလေသာနံ ဝသေ ဝတ္တိတုံ ဝဋ္ဋတိ၊ ကိလေသော ဟိ ဝဍ္ဎမာနော ပစ္စာမိတ္တော ဝိယ မဟာဝိနာသံ ပါပေတိ၊ ဘိက္ခုနာ နာမ အပ္ပမတ္တကမ္ပိ ကိလေသံ နိဂ္ဂဏှိတုံ ဝဋ္ဋတိ၊ ပေါရာဏကပဏ္ဍိတာ အပ္ပမတ္တကံ အာရမ္မဏံ ဒိသွာ အဗ္ဘန္တရေ ပဝတ္တကိလေသံ နိဂ္ဂဏှိတွာ ပစ္စေကဗောဓိဉာဏံ နိဗ္ဗတ္တေသု’’န္တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဗာရာဏသိနဂရဿ ဒွါရဂါမေ ကုမ္ဘကာရကုလေ နိဗ္ဗတ္တိတွာ ဝယပ္ပတ္တော ကုဋုမ္ဗံ သဏ္ဌပေတွာ ဧကံ ပုတ္တဉ္စ ဓီတရဉ္စ လဘိတွာ ကုမ္ဘကာရကမ္မံ နိဿာယ ပုတ္တဒါရံ ပေါသေသိ။ တဒါ ကလိင်္ဂရဋ္ဌေ ဒန္တပုရနဂရေ ကရဏ္ဍကော နာမ ရာဇာ မဟန္တေန ပရိဝါရေန ဥယျာနံ ဂစ္ဆန္တော ဥယျာနဒွါရေ ဖလဘာရဘရိတံ မဓုရဖလံ အမ္ဗရုက္ခံ ဒိသွာ ဟတ္ထိက္ခန္ဓဝရဂတောယေဝ ဟတ္ထံ ပသာရေတွာ ဧကံ အမ္ဗပိဏ္ဍံ ဂဟေတွာ ဥယျာနံ ပဝိသိတွာ မင်္ဂလသိလာယ နိသိန္နော ဒါတဗ္ဗယုတ္တကာနံ ဒတွာ အမ္ဗံ ပရိဘုဉ္ဇိ။ ‘‘ရညာ ဂဟိတကာလတော ပဋ္ဌာယ သေသေဟိ နာမ ဂဟေတဗ္ဗမေဝါ’’တိ အမစ္စာပိ ဗြာဟ္မဏဂဟပတိကာဒယောပိ အမ္ဗာနိ ပါတေတွာ ခါဒိံသု။ ပစ္ဆာ အာဂတာ ရုက္ခံ အာရုယှ မုဂ္ဂရေဟိ ပေါထေတွာ ဩဘဂ္ဂဝိဘဂ္ဂသာခံ ကတွာ အာမကဖလမ္ပိ အသေသေတွာ ခါဒိံသု။

ရာဇာ ဒိဝသံ ဥယျာနေ ကီဠိတွာ သာယနှသမယေ အလင်္ကတဟတ္ထိက္ခန္ဓဝရေ နိသီဒိတွာ ဂစ္ဆန္တော တံ ရုက္ခံ ဒိသွာ ဟတ္ထိတော ဩတရိတွာ ရုက္ခမူလံ ဂန္တွာ ရုက္ခံ ဩလောကေတွာ ‘‘အယံ ပါတောဝ ပဿန္တာနံ အတိတ္တိကရော ဖလဘာရဘရိတော သောဘမာနော အဋ္ဌာသိ၊ ဣဒါနိ ဂဟိတဖလော ဩဘဂ္ဂဝိဘဂ္ဂေါ အသောဘမာနော ဌိတော’’တိ စိန္တေတွာ ပုန အညတော ဩလောကေန္တော အပရံ နိပ္ဖလံ အမ္ဗရုက္ခံ ဒိသွာ ‘‘ဧသ ရုက္ခော အတ္တနော နိပ္ဖလဘာဝေန မုဏ္ဍမဏိပဗ္ဗတော ဝိယ သောဘမာနော ဌိတော၊ အယံ ပန သဖလဘာဝေန ဣမံ ဗျသနံ ပတ္တော၊ ဣဒံ အဂါရမဇ္ဈမ္ပိ ဖလိတရုက္ခသဒိသံ၊ ပဗ္ဗဇ္ဇာ နိပ္ဖလရုက္ခသဒိသာ၊ သဓနဿေဝ ဘယံ အတ္ထိ၊ နိဒ္ဓနဿ ဘယံ နတ္ထိ၊ မယာပိ နိပ္ဖလရုက္ခေန ဝိယ ဘဝိတဗ္ဗ’’န္တိ ဖလရုက္ခံ အာရမ္မဏံ ကတွာ ရုက္ခမူလေ ဌိတကောဝ တီဏိ လက္ခဏာနိ သလ္လက္ခေတွာ ဝိပဿနံ ဝဍ္ဎေတွာ ပစ္စေကဗောဓိဉာဏံ နိဗ္ဗတ္တေတွာ ‘‘ဝိဒ္ဓံသိတာ ဒါနိ မေ မာတုကုစ္ဆိကုဋိကာ၊ ဆိန္နာ တီသု ဘဝေသု ပဋိသန္ဓိ၊ သောဓိတာ သံသာရဥက္ကာရဘူမိ၊ သောသိတော မယာ အဿုသမုဒ္ဒေါ၊ ဘိန္နော အဋ္ဌိပါကာရော၊ နတ္ထိ မေ ပုန ပဋိသန္ဓီ’’တိ အာဝဇ္ဇေန္တော သဗ္ဗာလင်္ကာရပဋိမဏ္ဍိတောဝ အဋ္ဌာသိ။

အထ နံ အမစ္စာ အာဟံသု ‘‘အတိဗဟုံ ဌိတတ္ထ၊ မဟာရာဇာ’’တိ။ ‘‘န မယံ မဟာရာဇာနော၊ ပစ္စေကဗုဒ္ဓါ နာမ မယ’’န္တိ။ ‘‘ပစ္စေကဗုဒ္ဓါ နာမ တုမှာဒိသာ န ဟောန္တိ၊ ဒေဝါ’’တိ။ ‘‘အထ ကီဒိသာ ဟောန္တီ’’တိ? ‘‘ဩရောပိတကေသမဿုကာသာဝဝတ္ထပဋိစ္ဆန္နာ ကုလေ ဝါ ဂဏေ ဝါ အလဂ္ဂါ ဝါတစ္ဆိန္နဝလာဟကရာဟုမုတ္တစန္ဒမဏ္ဍလပဋိဘာဂါ ဟိမဝန္တေ နန္ဒမူလကပဗ္ဘာရေ ဝသန္တိ၊ ဧဝရူပါ ဒေဝ၊ ပစ္စေကဗုဒ္ဓါ’’တိ။ တသ္မိံ ခဏေ ရာဇာ ဟတ္ထံ ဥက္ခိပိတွာ သီသံ ပရာမသိ၊ တာဝဒေဝဿ ဂိဟိလိင်္ဂံ အန္တရဓာယိ၊ သမဏလိင်္ဂံ ပါတုရဟောသိ။

‘‘တိစီဝရဉ္စ ပတ္တော စ၊ ဝါသိ သူစိ စ ဗန္ဓနံ၊

ပရိဿာဝနေန အဋ္ဌေတေ၊ ယုတ္တယောဂဿ ဘိက္ခုနော’’တိ။ –

ဧဝံ ဝုတ္တာ သမဏပရိက္ခာရာ ကာယပဋိဗဒ္ဓါဝ အဟေသုံ။ သော အာကာသေ ဌတွာ မဟာဇနဿ ဩဝါဒံ ဒတွာ အနိလပထေန ဥတ္တရဟိမဝန္တေ နန္ဒမူလကပဗ္ဘာရမေဝ အဂမာသိ။

ဂန္ဓာရရဋ္ဌေပိ တက္ကသိလနဂရေ နဂ္ဂဇိ နာမ ရာဇာ ဥပရိပါသာဒေ ပလ္လင်္ကမဇ္ဈဂတော ဧကံ ဣတ္ထိံ ဧကေကဟတ္ထေ ဧကေကံ မဏိဝလယံ ပိဠန္ဓိတွာ အဝိဒူရေ နိသီဒိတွာ ဂန္ဓံ ပိသမာနံ ဒိသွာ ‘‘ဧတာနိ ဝလယာနိ ဧကေကဘာဝေန န ဃဋ္ဋေန္တိ န ဝိရဝန္တီ’’တိ ဩလောကေန္တော နိသီဒိ။ အထ သာ ဒက္ခိဏဟတ္ထတော ဝလယံ ဝါမဟတ္ထေယေဝ ပိဠန္ဓိတွာ ဒက္ခိဏဟတ္ထေန ဂန္ဓံ သင်္ကဍ္ဎိတွာ ပိသိတုံ အာရဘိ၊ ဝါမဟတ္ထေ ဝလယံ ဒုတိယံ အာဂမ္မ ဃဋ္ဋိယမာနံ သဒ္ဒမကာသိ။ ရာဇာ တာနိ ဒွေ ဝလယာနိ အညမညံ ဃဋ္ဋေန္တာနိ ဝိရဝန္တာနိ ဒိသွာ စိန္တေသိ ‘‘ဣဒံ ဝလယံ ဧကေကကာလေ န ဃဋ္ဋေသိ၊ ဒုတိယံ အာဂမ္မ ဃဋ္ဋေတိ၊ သဒ္ဒံ ကရောတိ၊ ဧဝမေဝ ဣမေ သတ္တာပိ ဧကေကာ န ဃဋ္ဋေန္တိ န ဝိဝဒန္တိ၊ ဒွေ တယော ဟုတွာ အညမညံ ဃဋ္ဋေန္တိ၊ ကလဟံ ကရောန္တိ။ အဟံ ပန ကသ္မီရဂန္ဓာရေသု ဒွီသု ရဇ္ဇေသု ရဋ္ဌဝါသိနော ဝိစာရေမိ၊ မယာပိ ဧကဝလယသဒိသေန ဟုတွာ ပရံ အဝိစာရေတွာ အတ္တာနမေဝ ဝိစာရေန္တေန ဝသိတုံ ဝဋ္ဋတီ’’တိ သင်္ဃဋ္ဋနဝလယံ အာရမ္မဏံ ကတွာ ယထာနိသိန္နောဝ တီဏိ လက္ခဏာနိ သလ္လက္ခေတွာ ဝိပဿနံ ဝဍ္ဎေတွာ ပစ္စေကဗောဓိဉာဏံ နိဗ္ဗတ္တေသိ။ သေသံ ပုရိမသဒိသမေဝ။

ဝိဒေဟရဋ္ဌေ မိထိလနဂရေ နိမိ နာမ ရာဇာ ဘုတ္တပါတရာသော အမစ္စဂဏပရိဝုတော ဝိဝဋသီဟပဉ္ဇရေန အန္တရဝီထိံ ပေက္ခမာနော အဋ္ဌာသိ။ အထေကော သေနော သူနာပဏတော မံသပေသိံ ဂဟေတွာ အာကာသံ ပက္ခန္ဒိ။ တမေနံ ဣတော စိတော စ ဂိဇ္ဈာဒယော သကုဏာ သမ္ပရိဝါရေတွာ အာဟာရဟေတု တုဏ္ဍေန ဝိဇ္ဈန္တာ ပက္ခေဟိ ပဟရန္တာ ပါဒေဟိ မဒ္ဒန္တာ အဂမံသု။ သော အတ္တနော ဝဓံ အသဟမာနော တံ မံသံ ဆဍ္ဍေသိ။ အညော ဂဏှိ၊ သကုဏာ ဣမံ မုဉ္စိတွာ တံ အနုဗန္ဓိံသု။ တေနပိ ဝိဿဋ္ဌံ အညော အဂ္ဂဟေသိ၊ တမ္ပိ တထေဝ ဝိဟေဌေသုံ။ ရာဇာ တေ သကုဏေ ဒိသွာ စိန္တေသိ ‘‘ယော ယော မံသပေသိံ ဂဏှိ၊ တဿ တဿေဝ ဒုက္ခံ၊ ယော ယော တံ ဝိဿဇ္ဇေသိ၊ တဿ တဿေဝ သုခံ၊ ဣမေပိ ပဉ္စ ကာမဂုဏေ ယော ယော ဂဏှာတိ၊ တဿ တဿေဝ ဒုက္ခံ၊ ဣတရဿ သုခံ၊ ဣမေ ဟိ ဗဟူနံ သာဓာရဏာ၊ မယှံ ခေါ ပန သောဠသ ဣတ္ထိသဟဿာနိ၊ မယာ ဝိဿဋ္ဌမံသပိဏ္ဍေန ဝိယ သေနေန ပဉ္စ ကာမဂုဏေ ပဟာယ သုခိတေန ဘဝိတုံ ဝဋ္ဋတီ’’တိ။ သော ယောနိသော မနသိ ကရောန္တော ယထာဌိတောဝ တီဏိ လက္ခဏာနိ သလ္လက္ခေတွာ ဝိပဿနံ ဝဍ္ဎေတွာ ပစ္စေကဗောဓိဉာဏံ နိဗ္ဗတ္တေသိ။ သေသံ ပုရိမသဒိသမေဝ။

ဥတ္တရပဉ္စာလရဋ္ဌေ ကပိလနဂရေ ဒုမ္မုခေါ နာမ ရာဇာ ဘုတ္တပါတရာသော သဗ္ဗာလင်္ကာရပဋိမဏ္ဍိတော အမစ္စဂဏပရိဝုတော ဝိဝဋသီဟပဉ္ဇရေ ရာဇင်္ဂဏံ ဩလောကေန္တော အဋ္ဌာသိ။ တသ္မိံ ခဏေ ဂေါပါလကာ ဝဇဒွါရံ ဝိဝရိံသု၊ ဥသဘာ ဝဇတော နိက္ခမိတွာ ကိလေသဝသေန ဧကံ ဂါဝိံ အနုဗန္ဓိံသု။ တတ္ထေကော တိခိဏသိင်္ဂေါ မဟာဥသဘော အညံ ဥသဘံ အာဂစ္ဆန္တံ ဒိသွာ ကိလေသမစ္ဆေရာဘိဘူတော တိခိဏေန သိင်္ဂေန အန္တရသတ္ထိမှိ ပဟရိ။ တဿ ပဟာရမုခေန အန္တာနိ နိက္ခမိံသု၊ သော တတ္ထေဝ ဇီဝိတက္ခယံ ပါပုဏိ။ ရာဇာ တံ ဒိသွာ စိန္တေသိ ‘‘ဣမေ သတ္တာ တိရစ္ဆာနဂတေ အာဒိံ ကတွာ ကိလေသဝသေန ဒုက္ခံ ပါပုဏန္တိ၊ အယံ ဥသဘော ကိလေသံ နိဿာယ ဇီဝိတက္ခယံ ပတ္တော၊ အညေပိ သတ္တာ ကိလေသေဟေဝ ကမ္ပန္တိ၊ မယာ ဣမေသံ သတ္တာနံ ကမ္ပနကိလေသေ ပဟာတုံ ဝဋ္ဋတီ’’တိ။ သော ဌိတကောဝ တီဏိ လက္ခဏာနိ သလ္လက္ခေတွာ ဝိပဿနံ ဝဍ္ဎေတွာ ပစ္စေကဗောဓိဉာဏံ နိဗ္ဗတ္တေသိ။ သေသံ ပုရိမသဒိသမေဝ။

အထေကဒိဝသံ စတ္တာရော ပစ္စေကဗုဒ္ဓါ ဘိက္ခာစာရဝေလံ သလ္လက္ခေတွာ နန္ဒမူလကပဗ္ဘာရာ နိက္ခမ္မ အနောတတ္တဒဟေ နာဂလတာဒန္တကဋ္ဌံ ခါဒိတွာ ကတသရီရပဋိဇဂ္ဂနာ မနောသိလာတလေ ဌတွာ နိဝါသေတွာ ပတ္တစီဝရမာဒါယ ဣဒ္ဓိယာ အာကာသေ ဥပ္ပတိတွာ ပဉ္စဝဏ္ဏဝလာဟကေ မဒ္ဒမာနာ ဂန္တွာ ဗာရာဏသိနဂရဒွါရဂါမကဿ အဝိဒူရေ ဩတရိတွာ ဧကသ္မိံ ဖာသုကဋ္ဌာနေ စီဝရံ ပါရုပိတွာ ပတ္တံ ဂဟေတွာ ဒွါရဂါမံ ပဝိသိတွာ ပိဏ္ဍာယ စရန္တာ ဗောဓိသတ္တဿ ဂေဟဒွါရံ သမ္ပာပုဏိံသု။ ဗောဓိသတ္တော တေ ဒိသွာ တုဋ္ဌစိတ္တော ဟုတွာ ဂေဟံ ပဝေသေတွာ ပညတ္တာသနေ နိသီဒါပေတွာ ဒက္ခိဏောဒကံ ဒတွာ ပဏီတေန ခါဒနီယေန ဘောဇနီယေန ပရိဝိသိတွာ ဧကမန္တံ နိသီဒိတွာ သင်္ဃတ္ထေရံ ဝန္ဒိတွာ ‘‘ဘန္တေ၊ တုမှာကံ ပဗ္ဗဇ္ဇာ အတိဝိယ သောဘတိ၊ ဝိပ္ပသန္နာနိ ဝေါ ဣန္ဒြိယာနိ၊ ပရိသုဒ္ဓါ ဆဝိဝဏ္ဏော၊ ကိံ နု ခေါ အာရမ္မဏံ ဒိသွာ တုမှေ ဣမံ ဘိက္ခာစရိယပဗ္ဗဇ္ဇံ ဥပဂတာ’’တိ ပုစ္ဆိ။ ယထာ စ သင်္ဃတ္ထေရံ၊ ဧဝံ သေသေပိ ဥပသင်္ကမိတွာ ပုစ္ဆိ။ အထဿ တေ စတ္တာရောပိ ဇနာ ‘‘အဟံ အသုကနဂရေ အသုကရဋ္ဌေ အသုကရာဇာ နာမ ဟုတွာ’’တိအာဒိနာ နယေန အတ္တနော အတ္တနော အဘိနိက္ခမနဝတ္ထူနိ ကထေတွာ ပဋိပါဋိယာ ဧကေကံ ဂါထမာဟံသု –

၉၀။

‘‘အမ္ဗာဟမဒ္ဒံ ဝနမန္တရသ္မိံ၊ နိလောဘာသံ ဖလိတံ သံဝိရူဠှံ၊

တမဒ္ဒသံ ဖလဟေတု ဝိဘဂ္ဂံ၊ တံ ဒိသွာ ဘိက္ခာစရိယံ စရာမိ။

၉၁။

‘‘သေလံ သုမဋ္ဌံ နရဝီရနိဋ္ဌိတံ၊ နာရီ ယုဂံ ဓာရယိ အပ္ပသဒ္ဒံ၊

ဒုတိယဉ္စ အာဂမ္မ အဟောသိ သဒ္ဒေါ၊ တံ ဒိသွာ ဘိက္ခာစရိယံ စရာမိ။

၉၂။

‘‘ဒိဇာ ဒိဇံ ကုဏပမာဟရန္တံ၊ ဧကံ သမာနံ ဗဟုကာ သမေစ္စ၊

အာဟာရဟေတူ ပရိပါတယိံသု၊ တံ ဒိသွာ ဘိက္ခာစရိယံ စရာမိ။

၉၃။

‘‘ဥသဘာဟမဒ္ဒံ ယူထဿ မဇ္ဈေ၊ စလက္ကကုံ ဝဏ္ဏဗလူပပန္နံ၊

တမဒ္ဒသံ ကာမဟေတု ဝိတုန္နံ၊ တံ ဒိသွာ ဘိက္ခာစရိယံ စရာမီ’’တိ။

တတ္ထ အမ္ဗာဟမဒ္ဒန္တိ အမ္ဗရုက္ခံ အဟံ အဒ္ဒသံ။ ဝနမန္တရသ္မိန္တိ ဝနအန္တရေ၊ အမ္ဗဝနမဇ္ဈေတိ အတ္ထော။ သံဝိရူဠှန္တိ သုဝဍ္ဎိတံ။ တမဒ္ဒသန္တိ တံ ဥယျာနတော နိက္ခန္တော ဖလဟေတု ဝိဘဂ္ဂံ ပုန အဒ္ဒသံ။ တံ ဒိသွာတိ တံ ဖလဟေတု ဝိဘဂ္ဂံ ဒိသွာ ပဋိလဒ္ဓသံဝေဂေါ ပစ္စေကဗောဓိဉာဏံ နိဗ္ဗတ္တေတွာ ဣမံ ဘိက္ခာစရိယပဗ္ဗဇ္ဇံ ဥပဂတောသ္မိ၊ တသ္မာ ဘိက္ခာစရိယံ စရာမီတိ။ ဣဒံ သော ဖလဟေတု ဝိဘဂ္ဂံ အမ္ဗရုက္ခံ ဒဿနတော ပဋ္ဌာယ သဗ္ဗံ စိတ္တာစာရံ ကထေသိ။ သေသာနံ ဝိဿဇ္ဇနေသုပိ ဧသေဝ နယော။ အယံ ပနေတ္ထ အနုတ္တာနပဒဝဏ္ဏနာ – သေလန္တိ မဏိဝလယံ။ နရဝီရနိဋ္ဌိတန္တိ ဝီရနရေဟိ နိဋ္ဌိတံ၊ ပဏ္ဍိတပုရိသေဟိ ကတန္တိ အတ္ထော။ ယုဂန္တိ ဧကေကသ္မိံ ဧကေကံ ကတွာ ဧကံ ဝလယယုဂဠံ။ ဒိဇာ ဒိဇန္တိ ဂဟိတမံသပိဏ္ဍံ ဒိဇံ အဝသေသဒိဇာ။ ကုဏပမာဟရန္တန္တိ မံသပိဏ္ဍံ အာဒါယ အာဟရန္တံ။ သမေစ္စာတိ သမာဂန္တွာ သန္နိပတိတွာ။ ပရိပါတယိံသူတိ ကောဋ္ဋေန္တာ အနုဗန္ဓိံသု။ ဥသဘာဟမဒ္ဒန္တိ ဥသဘံ အဟံ အဒ္ဒသံ။ စလက္ကကုန္တိ စလက္ကကုဓံ။

ဗောဓိသတ္တော ဧကေကံ ဂါထံ သုတွာ ‘‘သာဓု၊ ဘန္တေ၊ တုမှာကမေဝ တံ အာရမ္မဏံ အနုရူပ’’န္တိ ဧကေကဿ ပစ္စေကဗုဒ္ဓဿ ထုတိံ အကာသိ။ တဉ္စ ပန စတူဟိ ဇနေဟိ ဒေသိတံ ဓမ္မကထံ သုတွာ ဃရာဝါသေ အနပေက္ခော ဟုတွာ ပက္ကန္တေသု ပစ္စေကဗုဒ္ဓေသု ဘုတ္တပါတရာသော သုခနိသိန္နော ဘရိယံ အာမန္တေတွာ ‘‘ဘဒ္ဒေ၊ ဧတေ စတ္တာရော ပစ္စေကဗုဒ္ဓါ ရဇ္ဇံ ပဟာယ ပဗ္ဗဇိတွာ အကိဉ္စနာ အပလိဗောဓာ ပဗ္ဗဇ္ဇာသုခေန ဝီတိနာမေန္တိ၊ အဟံ ပန ဘတိယာ ဇီဝိကံ ကပ္ပေမိ၊ ကိံ မေ ဃရာဝါသေန၊ တွံ ပုတ္တကေ သင်္ဂဏှန္တီ ဂေဟေ ဝသာ’’တိ ဝတွာ ဒွေ ဂါထာ အဘာသိ –

၉၄။

‘‘ကရဏ္ဍကော ကလိင်္ဂါနံ၊ ဂန္ဓာရာနဉ္စ နဂ္ဂဇိ၊

နိမိရာဇာ ဝိဒေဟာနံ၊ ပဉ္စာလာနဉ္စ ဒုမ္မုခေါ၊

ဧတေ ရဋ္ဌာနိ ဟိတွာန၊ ပဗ္ဗဇိံသု အကိဉ္စနာ။

၉၅။

‘‘သဗ္ဗေပိမေ ဒေဝသမာ သမာဂတာ၊ အဂ္ဂီ ယထာ ပဇ္ဇလိတော တထေဝိမေ၊

အဟမ္ပိ ဧကော စရိဿာမိ ဘဂ္ဂဝိ၊ ဟိတွာန ကာမာနိ ယထောဓိကာနီ’’တိ။

တာသံ အတ္ထော – ဘဒ္ဒေ၊ ဧသ သင်္ဃတ္ထေရော ပစ္စေကဗုဒ္ဓါ ဒန္တပုရေ နာမ နဂရေ ကရဏ္ဍကော နာမ ကလိင်္ဂါနံ ဇနပဒဿ ရာဇာ၊ ဒုတိယော တက္ကသိလနဂရေ နဂ္ဂဇိ နာမ ဂန္ဓာရာနံ ဇနပဒဿ ရာဇာ၊ တတိယော မိထိလနဂရေ နိမိ နာမ ဝိဒေဟာနံ ဇနပဒဿ ရာဇာ၊ စတုတ္ထော ကပိလနဂရေ ဒုမ္မုခေါ နာမ ဥတ္တရပဉ္စာလာနံ ဇနပဒဿ ရာဇာ၊ ဧတေ ဧဝရူပါနိ ရဋ္ဌာနိ ဟိတွာ အကိဉ္စနာ ဟုတွာ ပဗ္ဗဇိံသု။ သဗ္ဗေပိမေတိ ဣမေ ပန သဗ္ဗေပိ ဝိသုဒ္ဓိဒေဝေဟိ ပုရိမပစ္စေကဗုဒ္ဓေဟိ သမာနာ ဧကတော သမာဂတာ။ အဂ္ဂီ ယထာတိ ယထာ ဟိ အဂ္ဂိ ပဇ္ဇလိတော ဩဘာသတိ။ တထေဝိမေတိ ဣမေပိ တထေဝ သီလာဒီဟိ ပဉ္စဟိ ဂုဏေဟိ ဩဘာသန္တိ။ ယထာ ဧတေ၊ တထာ အဟမ္ပိ ပဗ္ဗဇိတွာ ဧကော စရိဿာမီတိ အတ္ထော။ ဘဂ္ဂဝီတိ ဘရိယံ အာလပတိ။ ဟိတွာန ကာမာနီတိ ရူပါဒယော ဝတ္ထုကာမေ ဟိတွာ။ ယထောဓိကာနီတိ အတ္တနော ဩဓိဝသေန ဌိတာနိ။ ဣဒံ ဝုတ္တံ ဟောတိ – ရူပါဒိဩဓိဝသေန ယထာဌိတေ ကာမေ ပဟာယ အဟမ္ပိ ပဗ္ဗဇိတွာ ဧကော စရိဿာမီတိ။ ‘‘ယတောဓိကာနီ’’တိပိ ပါဌော၊ တဿတ္ထော – ယတော ဥပရတော ဩဓိ ဧတေသန္တိ ယတောဓိကာနိ၊ ဥပရတကောဋ္ဌာသာနိ။ ပဗ္ဗဇိဿာမီတိ စိန္တိတကာလတော ပဋ္ဌာယ ဟိ ကိလေသကာမာနံ ဧကော ကောဋ္ဌာသော ဥပရတော နာမ ဟောတိ နိရုဒ္ဓါ၊ တဿ ဝတ္ထုဘူတော ကာမကောဋ္ဌာသောပိ ဥပရတောဝ ဟောတီတိ။

သာ တဿ ကထံ သုတွာ ‘‘မယှမ္ပိ ခေါ သာမိ၊ ပစ္စေကဗုဒ္ဓါနံ ဓမ္မကထံ သုတကာလတော ပဋ္ဌာယ အဂါရေ စိတ္တံ န သဏ္ဌာတီ’’တိ ဝတွာ ဣမံ ဂါထမာဟ –

၉၆။

‘‘အယမေဝ ကာလော န ဟိ အညော အတ္ထိ၊ အနုသာသိတာ မေ န ဘဝေယျ ပစ္ဆာ၊

အဟမ္ပိ ဧကာ စရိဿာမိ ဘဂ္ဂဝ၊ သကုဏီဝ မုတ္တာ ပုရိသဿ ဟတ္ထာ’’တိ။

တတ္ထ အနုသာသိတာ မေ န ဘဝေယျ ပစ္ဆာတိ အနုသာသကော ဩဝါဒကော န ဘဝေယျ ဒုလ္လဘတ္တာ ဩဝါဒကာနံ၊ တသ္မာ အယမေဝ ပဗ္ဗဇိတုံ ကာလော၊ န ဟိ အညော အတ္ထီတိ ဒဿေတိ။ သကုဏီဝ မုတ္တာတိ ယထာ သာကုဏိကေန ဂဟေတွာ သကုဏပစ္ဆိယံ ခိတ္တာသု သကုဏီသု တဿ ဟတ္ထတော မုတ္တာ ဧကာ သကုဏီ အနိလပထံ လင်္ဃယိတွာ ယထာရုစိတဋ္ဌာနံ ဂန္တွာ ဧကိကာဝ စရေယျ၊ တထာ အဟမ္ပိ တဝ ဟတ္ထတော မုတ္တာ ဧကိကာ စရိဿာမီတိ သယမ္ပိ ပဗ္ဗဇိတုကာမာ ဟုတွာ ဧဝမာဟ။

ဗောဓိသတ္တော တဿာ ကထံ သုတွာ တုဏှီ အဟောသိ။ သာ ပန ဗောဓိသတ္တံ ဝဉ္စေတွာ ပုရေတရံ ပဗ္ဗဇိတုကာမာ ‘‘သာမိ၊ ပါနီယတိတ္ထံ ဂမိဿာမိ၊ ဒါရကေ ဩလောကေဟီ’’တိ ဃဋံ အာဒါယ ဂစ္ဆန္တီ ဝိယ ပလာယိတွာ နဂရသာမန္တေ တာပသာနံ သန္တိကေ ဂန္တွာ ပဗ္ဗဇိ။ ဗောဓိသတ္တော တဿာ အနာဂမနံ ဉတွာ သယံ ဒါရကေ ပေါသေသိ။ အပရဘာဂေ တေသု ထောကံ ဝဍ္ဎိတွာ အတ္တနော အယာနယဇာနနသမတ္ထတံ သမ္ပတ္တေသု တေသံ ဝီမံသနတ္ထံ ဧကဒိဝသံ ဘတ္တံ ပစန္တော ထောကံ ဥတ္တဏ္ဍုလံ ပစိ၊ ဧကဒိဝသံ ထောကံ ကိလိန္နံ၊ ဧကဒိဝသံ သုပက္ကံ၊ ဧကဒိဝသံ အတိကိလိန္နံ၊ ဧကဒိဝသံ အလောဏကံ၊ ဧကဒိဝသံ အတိလောဏကံ။ ဒါရကာ ‘‘တာတ၊ အဇ္ဇ ဘတ္တံ ဥတ္တဏ္ဍုလံ၊ အဇ္ဇ ကိလိန္နံ၊ အဇ္ဇ သုပက္ကံ၊ အဇ္ဇ အတိကိလိန္နံ၊ အဇ္ဇ အလောဏကံ၊ အဇ္ဇ အတိလောဏက’’န္တိ အာဟံသု။ တံ သုတွာ ဗောဓိသတ္တော ‘‘အာမ၊ တာတာ’’တိ ဝတွာ စိန္တေသိ ‘‘ဣမေ ဒါရကာ ဣဒါနိ အာမပက္ကလောဏိကအတိလောဏိကာနိ ဇာနန္တိ၊ အတ္တနော ဓမ္မတာယ ဇီဝိတုံ သက္ခိဿန္တိ၊ မယာ ပဗ္ဗဇိတုံ ဝဋ္ဋတီ’’တိ။ အထ တေ ဒါရကေ ဉာတကာနံ ဒတွာ ပဋိစ္ဆာပေတွာ ‘‘အမ္မတာတာ၊ ဣမေ ဒါရကေ သာဓုကံ ပေါသေထာ’’တိ ဝတွာ သော ဉာတကာနံ ပရိဒေဝန္တာနညေဝ နဂရာ နိက္ခမိတွာ ဣသိပဗ္ဗဇ္ဇံ ပဗ္ဗဇိတွာ နဂရဿ သာမန္တေယေဝ ဝသိ။

အထ နံ ဧကဒိဝသံ ဗာရာဏသိယံ ဘိက္ခာယ စရန္တံ ပရိဗ္ဗာဇိကာ ဒိသွာ ဝန္ဒိတွာ ‘‘အယျ၊ ဒါရကာ တေ နာသိတာ မညေ’’တိ အာဟ။ မဟာသတ္တော ‘‘နာဟံ ဒါရကေ နာသေမိ၊ တေသံ အတ္တနော အယာနယဇာနနကာလေ ပဗ္ဗဇိတောမှိ ၊ တွံ တေသံ အစိန္တေတွာ ပဗ္ဗဇ္ဇာယ အဘိရမာ’’တိ ဝတွာ ဩသာနဂါထမာဟ –

၉၇။

‘‘အာမံ ပက္ကဉ္စ ဇာနန္တိ၊ အထော လောဏံ အလောဏကံ၊

တမဟံ ဒိသွာန ပဗ္ဗဇိံ၊ စရေဝ တွံ စရာမဟ’’န္တိ။

တတ္ထ တမဟန္တိ တံ အဟံ ဒါရကာနံ ကိရိယံ ဒိသွာ ပဗ္ဗဇိတော။ စရေဝ တွံ စရာမဟန္တိ တွမ္ပိ ဘိက္ခာစရိယမေဝ စရ၊ အဟမ္ပိ ဘိက္ခာစရိယမေဝ စရိဿာမီတိ။

ဣတိ သော ပရိဗ္ဗာဇိကံ ဩဝဒိတွာ ဥယျောဇေသိ။ သာပိ ဩဝါဒံ ဂဟေတွာ မဟာသတ္တံ ဝန္ဒိတွာ ယထာရုစိတံ ဌာနံ ဂတာ။ ဌပေတွာ ကိရ တံ ဒိဝသံ န တေ ပုန အညမညံ အဒ္ဒသံသု။ ဗောဓိသတ္တော စ ဈာနာဘိညံ နိဗ္ဗတ္တေတွာ ဗြဟ္မလောကူပဂေါ အဟောသိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ တေ ပဉ္စသတာ ဘိက္ခူ အရဟတ္တေ ပတိဋ္ဌဟိံသု။ တဒါ ဓီတာ ဥပ္ပလဝဏ္ဏာ အဟောသိ၊ ပုတ္တော ရာဟုလကုမာရော၊ ပရိဗ္ဗာဇိကာ ရာဟုလမာတာ၊ ပရိဗ္ဗာဇကော ပန အဟမေဝ အဟောသိန္တိ။

ကုမ္ဘကာရဇာတကဝဏ္ဏနာ တတိယာ။

[၄၀၉] ၄။ ဒဠှဓမ္မဇာတကဝဏ္ဏနာ

အဟံ စေဒဠှဓမ္မဿာတိ ဣဒံ သတ္ထာ ကောသမ္ဗိံ နိဿာယ ဃောသိတာရာမေ ဝိဟရန္တော ဥဒေနဿ ရညော ဘဒ္ဒဝတိကံ ဟတ္ထိနိံ အာရဗ္ဘ ကထေသိ။ တဿာ ပန ဟတ္ထိနိယာ လဒ္ဓဝိဓာနဉ္စ ဥဒေနဿ ရာဇဝံသော စ မာတင်္ဂဇာတကေ (ဇာ။ ၁။၁၅။၁ အာဒယော) အာဝိ ဘဝိဿတိ။ ဧကဒိဝသံ ပန သာ ဟတ္ထိနီ နဂရာ နိက္ခမန္တီ ဘဂဝန္တံ ပါတောဝ အရိယဂဏပရိဝုတံ အနောမာယ ဗုဒ္ဓသိရိယာ နဂရံ ပိဏ္ဍာယ ပဝိသန္တံ ဒိသွာ တထာဂတဿ ပါဒမူလေ နိပဇ္ဇိတွာ ‘‘ဘဂဝါ သဗ္ဗညု သဗ္ဗလောကနိတ္ထရဏ ဥဒေနော ဝံသရာဇာ မံ တရုဏကာလေ ကမ္မံ နိတ္ထရိတုံ သမတ္ထကာလေ ‘ဣမံ နိဿာယ မယာ ဇီဝိတဉ္စ ရဇ္ဇဉ္စ ဒေဝီ စ လဒ္ဓါ’တိ ပိယာယိတွာ မဟန္တံ ပရိဟာရံ အဒါသိ၊ သဗ္ဗာလင်္ကာရေဟိ အလင်္ကရိတွာ ဌိတဋ္ဌာနံ ဂန္ဓေန ပရိဘဏ္ဍံ ကာရေတွာ မတ္ထကေ သုဝဏ္ဏတာရကခစိတဝိတာနံ ဗန္ဓာပေတွာ သမန္တာ စိတြသာဏိံ ပရိက္ခိပါပေတွာ ဂန္ဓတေလေန ဒီပံ ဇာလာပေတွာ ဓူမတဋ္ဋကံ ဌပါပေတွာ ကရီသဆဍ္ဍနဋ္ဌာနေ သုဝဏ္ဏကဋာဟံ ပတိဋ္ဌပါပေတွာ မံ စိတ္တတ္ထရဏပိဋ္ဌေ ဌပေသိ၊ ရာဇာရဟဉ္စ မေ နာနဂ္ဂရသဘောဇနံ ဒါပေသိ။ ဣဒါနိ ပန မေ မဟလ္လကကာလေ ကမ္မံ နိတ္ထရိတုံ အသမတ္ထကာလေ သဗ္ဗံ တံ ပရိဟာရံ အစ္ဆိန္ဒိ၊ အနာထာ နိပ္ပစ္စယာ ဟုတွာ အရညေ ကေတကာနိ ခါဒန္တီ ဇီဝါမိ၊ အညံ မယှံ ပဋိသရဏံ နတ္ထိ၊ ဥဒေနံ မမ ဂုဏံ သလ္လက္ခာပေတွာ ပေါရာဏကပရိဟာရံ မေ ပဋိပါကတိကံ ကာရေထ ဘဂဝါ’’တိ ပရိဒေဝမာနာ တထာဂတံ ယာစိ။

သတ္ထာ ‘‘ဂစ္ဆ တွံ၊ အဟံ တေ ရညော ကထေတွာ ယသံ ပဋိပါကတိကံ ကာရေဿာမီ’’တိ ဝတွာ ရညော နိဝေသနဒွါရံ အဂမာသိ။ ရာဇာ တထာဂတံ အန္တောနိဝေသနံ ပဝေသေတွာ ဗုဒ္ဓပ္ပမုခဿ သင်္ဃဿ မဟာဒါနံ ပဝတ္တေသိ။ သတ္ထာ ဘတ္တကိစ္စပရိယောသာနေ အနုမောဒနံ ကရောန္တော ‘‘မဟာရာဇ၊ ဘဒ္ဒဝတိကာ ကဟ’’န္တိ ပုစ္ဆိ။ ‘‘န ဇာနာမိ၊ ဘန္တေ’’တိ။ ‘‘မဟာရာဇ၊ ဥပကာရကာနံ ယသံ ဒတွာ မဟလ္လကကာလေ ဂဟေတုံ နာမ န ဝဋ္ဋတိ၊ ကတညုနာ ကတဝေဒိနာ ဘဝိတုံ ဝဋ္ဋတိ။ ဘဒ္ဒဝတိကာ ဣဒါနိ မဟလ္လိကာ ဇရာဇိဏ္ဏာ အနာထာ ဟုတွာ အရညေ ကေတကာနိ ခါဒန္တီ ဇီဝတိ၊ တံ ဇိဏ္ဏကာလေ အနာထံ ကာတုံ တုမှာကံ အယုတ္တ’’န္တိ ဘဒ္ဒဝတိကာယ ဂုဏံ ကထေတွာ ‘‘သဗ္ဗံ ပေါရာဏကပရိဟာရံ ပဋိပါကတိကံ ကရောဟီ’’တိ ဝတွာ ပက္ကာမိ။ ရာဇာ တထာ အကာသိ။ ‘‘တထာဂတေန ကိရ ဘဒ္ဒဝတိကာယ ဂုဏံ ကထေတွာ ပေါရာဏကယသော ပဋိပါကတိကော ကာရိတော’’တိ သကလနဂရံ ပတ္ထရိ၊ ဘိက္ခုသင်္ဃေပိ သာ ပဝတ္တိ ပါကဋာ ဇာတာ။ အထ ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ သတ္ထာရာ ကိရ ဘဒ္ဒဝတိကာယ ဂုဏံ ကထေတွာ ပေါရာဏကယသော ပဋိပါကတိကော ကာရိတော’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပိ တထာဂတော ဧတိဿာ ဂုဏံ ကထေတွာ နဋ္ဌယသံ ပဋိပါကတိကံ ကာရေသိယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဒဠှဓမ္မော နာမ ရာဇာ ရဇ္ဇံ ကာရေသိ။ တဒါ ဗောဓိသတ္တော အမစ္စကုလေ နိဗ္ဗတ္တိတွာ ဝယပ္ပတ္တော တံ ရာဇာနံ ဥပဋ္ဌဟိ။ သော တဿ သန္တိကာ မဟန္တံ ယသံ လဘိတွာ အမစ္စရတနဋ္ဌာနေ အဋ္ဌာသိ။ တဒါ တဿ ရညော ဧကာ ဩဋ္ဌိဗျာဓိ ဟတ္ထိနီ ထာမဗလသမ္ပန္နာ မဟဗ္ဗလာ အဟောသိ။ သာ ဧကဒိဝသံ ယောဇနသတံ ဂစ္ဆတိ၊ ရညော ဒူတေယျဟရဏကိစ္စံ ကရောတိ၊ သင်္ဂါမေ ယုဒ္ဓံ ကတွာ သတ္တု မဒ္ဒနံ ကရောတိ။ ရာဇာ ‘‘အယံ မေ ဗဟူပကာရာ’’တိ တဿာ သဗ္ဗာလင်္ကာရံ ဒတွာ ဥဒေနေန ဘဒ္ဒဝတိကာယ ဒိန္နသဒိသံ သဗ္ဗံ ပရိဟာရံ ဒါပေသိ။ အထဿာ ဇိဏ္ဏဒုဗ္ဗလကာလေ ရာဇာ သဗ္ဗံ ယသံ ဂဏှိ။ သာ တတော ပဋ္ဌာယ အနာထာ ဟုတွာ အရညေ တိဏပဏ္ဏာနိ ခါဒန္တီ ဇီဝတိ။ အထေကဒိဝသံ ရာဇကုလေ ဘာဇနေသု အပ္ပဟောန္တေသု ရာဇာ ကုမ္ဘကာရံ ပက္ကောသာပေတွာ ‘‘ဘာဇနာနိ ကိရ နပ္ပဟောန္တီ’’တိ အာဟ။ ‘‘ဂေါမယာဟရဏယာနကေ ယောဇေတုံ ဂေါဏေ န လဘာမိ၊ ဒေဝါ’’တိ။ ရာဇာ တဿ ကထံ သုတွာ ‘‘အမှာကံ ဩဋ္ဌိဗျာဓိ ကဟ’’န္တိ ပုစ္ဆိ။ ‘‘အတ္တနော ဓမ္မတာယ စရတိ၊ ဒေဝါ’’တိ။ ရာဇာ ‘‘ဣတော ပဋ္ဌာယ တံ ယောဇေတွာ ဂေါမယံ အာဟရာ’’တိ တံ ကုမ္ဘကာရဿ အဒါသိ။ ကုမ္ဘကာရော ‘‘သာဓု၊ ဒေဝါ’’တိ တထာ အကာသိ။

အထေကဒိဝသံ သာ နဂရာ နိက္ခမမာနာ နဂရံ ပဝိသန္တံ ဗောဓိသတ္တံ ဒိသွာ ဝန္ဒိတွာ တဿ ပါဒမူလေ နိပဇ္ဇိတွာ ပရိဒေဝမာနာ ‘‘သာမိ၊ ရာဇာ မံ ‘တရုဏကာလေ ဗဟူပကာရာ’တိ သလ္လက္ခေတွာ မဟန္တံ ယသံ ဒတွာ ဣဒါနိ မဟလ္လကကာလေ သဗ္ဗံ အစ္ဆိန္ဒိတွာ မယိ စိတ္တမ္ပိ န ကရောတိ၊ အဟံ ပန အနာထာ အရညေ တိဏပဏ္ဏာနိ ခါဒန္တီ ဇီဝါမိ၊ ဧဝံ ဒုက္ခပ္ပတ္တံ မံ ဣဒါနိ ယာနကေ ယောဇေတုံ ကုမ္ဘကာရဿ အဒါသိ၊ ဌပေတွာ တုမှေ အညံ မယှံ ပဋိသရဏံ နတ္ထိ၊ မယာ ရညော ကတူပကာရံ တုမှေ ဇာနာထ၊ သာဓု ဣဒါနိ မေ နဋ္ဌံ ယသံ ပဋိပါကတိကံ ကရောထာ’’တိ ဝတွာ တိဿော ဂါထာ အဘာသိ –

၉၈။

‘‘အဟံ စေ ဒဠှဓမ္မဿ၊ ဝဟန္တီ နာဘိရာဓယိံ၊

ဓရန္တီ ဥရသိ သလ္လံ၊ ယုဒ္ဓေ ဝိက္ကန္တစာရိနီ။

၉၉။

‘‘နူန ရာဇာ န ဇာနာတိ၊ မမ ဝိက္ကမပေါရိသံ၊

သင်္ဂါမေ သုကတန္တာနိ၊ ဒူတဝိပ္ပဟိတာနိ စ။

၁၀၀။

‘‘သာ နူနာဟံ မရိဿာမိ၊ အဗန္ဓု အပရာယိနီ၊

တဒါ ဟိ ကုမ္ဘကာရဿ၊ ဒိန္နာ ဆကဏဟာရိကာ’’တိ။

တတ္ထ ဝဟန္တီတိ ဒူတေယျဟရဏံ သင်္ဂါမေ ဗလကောဋ္ဌကဘိန္ဒနံ တံ တံ ကိစ္စံ ဝဟန္တီ နိတ္ထရန္တီ။ ဓရန္တီ ဥရသိ သလ္လန္တိ ဥရသ္မိံ ဗဒ္ဓံ ကဏ္ဍံ ဝါ အသိံ ဝါ သတ္တိံ ဝါ ယုဒ္ဓကာလေ သတ္တူနံ ဥပရိ အဘိဟရန္တီ။ ဝိက္ကန္တစာရိနီတိ ဝိက္ကမံ ပရက္ကမံ ကတွာ ပရဗလဝိဇယေန ယုဒ္ဓေ ဝိက္ကန္တဂါမိနီ။ ဣဒံ ဝုတ္တံ ဟောတိ – သစေ သာမိ၊ အဟံ ဣမာနိ ကိစ္စာနိ ကရောန္တီ ရညော ဒဠှဓမ္မဿ စိတ္တံ နာရာဓယိံ န ပရိတောသေသိံ၊ ကော ဒါနိ အညော တဿ စိတ္တံ အာရာဓယိဿတီတိ။

မမ ဝိက္ကမပေါရိသန္တိ မယာ ကတံ ပုရိသပရက္ကမံ။ သုကတန္တာနီတိ သုကတာနိ။ ယထာ ဟိ ကမ္မာနေဝ ကမ္မန္တာနိ၊ ဝနာနေဝ ဝနန္တာနိ၊ ဧဝမိဓ သုကတာနေဝ ‘‘သုကတန္တာနီ’’တိ ဝုတ္တာနိ။ ဒူတဝိပ္ပဟိတာနိ စာတိ ဂလေ ပဏ္ဏံ ဗန္ဓိတွာ ‘‘အသုကရညော နာမ ဒေဟီ’’တိ ပဟိတာယ မယာ ဧကဒိဝသေနေဝ ယောဇနသတံ ဂန္တွာ ကတာနိ ဒူတပေသနာနိ စ။ နူန ရာဇာ န ဇာနာတီတိ နူန တုမှာကံ ဧသ ရာဇာ ဧတာနိ မယာ ကတာနိ ကိစ္စာနိ န ဇာနာတိ။ အပရာယိနီတိ အပ္ပတိဋ္ဌာ အပ္ပဋိသရဏာ။ တဒါ ဟီတိ တထာ ဟိ၊ အယမေဝ ဝါ ပါဌော။ ဒိန္နာတိ အဟံ ရညာ ဆကဏဟာရိကာ ကတွာ ကုမ္ဘကာရဿ ဒိန္နာတိ။

ဗောဓိသတ္တော တဿာ ကထံ သုတွာ ‘‘တွံ မာ သောစိ၊ အဟံ ရညော ကထေတွာ တဝ ယသံ ပဋိပါကတိကံ ကရိဿာမီ’’တိ တံ သမဿာသေတွာ နဂရံ ပဝိသိတွာ ဘုတ္တပါတရာသော ရညော သန္တိကံ ဂန္တွာ ကထံ သမုဋ္ဌာပေတွာ ‘‘မဟာရာဇ၊ နနု တုမှာကံ အသုကာ နာမ ဩဋ္ဌိဗျာဓိ အသုကဋ္ဌာနေ စ အသုကဋ္ဌာနေ စ ဥရေ သလ္လံ ဗန္ဓိတွာ သင်္ဂါမံ နိတ္ထရိ၊ အသုကဒိဝသံ နာမ ဂီဝါယ ပဏ္ဏံ ဗန္ဓိတွာ ပေသိတာ ယောဇနသတံ အဂမာသိ၊ တုမှေပိဿာ မဟန္တံ ယသံ အဒတ္ထ၊ သာ ဣဒါနိ ကဟ’’န္တိ ပုစ္ဆိ။ ‘‘တမဟံ ကုမ္ဘကာရဿ ဂေါမယဟရဏတ္ထာယ အဒါသိ’’န္တိ။ အထ နံ ဗောဓိသတ္တော ‘‘အယုတ္တံ ခေါ၊ မဟာရာဇ၊ တုမှာကံ တံ ကုမ္ဘကာရဿ ယာနကေ ယောဇနတ္ထာယ ဒါတု’’န္တိ ဝတွာ ရညော ဩဝါဒဝသေန စတဿော ဂါထာ အဘာသိ –

၁၀၁။

‘‘ယာဝတာသီသတီ ပေါသော၊ တာဝဒေဝ ပဝီဏတိ၊

အတ္ထာပါယေ ဇဟန္တိ နံ၊ ဩဋ္ဌိဗျာဓိံဝ ခတ္တိယော။

၁၀၂။

‘‘ယော ပုဗ္ဗေ ကတကလျာဏော၊ ကတတ္ထော နာဝဗုဇ္ဈတိ၊

အတ္ထာ တဿ ပလုဇ္ဇန္တိ၊ ယေ ဟောန္တိ အဘိပတ္ထိတာ။

၁၀၃။

‘‘ယော ပုဗ္ဗေ ကတကလျာဏော၊ ကတတ္ထော မနုဗုဇ္ဈတိ၊

အတ္ထာ တဿ ပဝဍ္ဎန္တိ၊ ယေ ဟောန္တိ အဘိပတ္ထိကာ။

၁၀၄။

‘‘တံ ဝေါ ဝဒါမိ ဘဒ္ဒန္တေ၊ ယာဝန္တေတ္ထ သမာဂတာ၊

သဗ္ဗေ ကတညုနော ဟောထ၊ စိရံ သဂ္ဂမှိ ဌဿထာ’’တိ။

တတ္ထ ပဌမဂါထာယ တာဝ အတ္ထော – ဣဓေကစ္စော အညာဏဇာတိကော ပေါသော ယာဝတာသီသတီ၊ ယာဝ ‘‘ဣဒံ နာမ မေ အယံ ကာတုံ သက္ခိဿတီ’’တိ ပစ္စာသီသတိ၊ တာဝဒေဝ တံ ပုရိသံ ပဝီဏတိ ဘဇတိ သေဝတိ၊ တဿ ပန အတ္ထာပါယေ ဝဍ္ဎိယာ အပဂမနေ ပရိဟီနကာလေ တံ နာနာကိစ္စေသု ပတ္ထိတံ ပေါသံ ဧကစ္စေ ဗာလာ ဣမံ ဩဋ္ဌိဗျာဓိံ အယံ ခတ္တိယော ဝိယ ဇဟန္တိ။

ကတကလျာဏောတိ ပရေန အတ္တနော ကတကလျာဏကမ္မော။ ကတတ္ထောတိ နိပ္ဖာဒိတကိစ္စော။ နာဝဗုဇ္ဈတီတိ ပစ္ဆာပိ တံ ပရေန ကတံ ဥပကာရံ တဿ ဇရာဇိဏ္ဏကာလေ အသမတ္ထကာလေ န သရတိ၊ အတ္တနာ ဒိန္နမ္ပိ ယသံ ပုန ဂဏှာတိ။ ပလုဇ္ဇန္တီတိ ဘိဇ္ဇန္တိ နဿန္တိ။ ယေ ဟောန္တိ အဘိပတ္ထိတာတိ ယေ ကေစိ အတ္ထာ ဣစ္ဆိတာ နာမ ဟောန္တိ၊ သဗ္ဗေ နဿန္တီတိ ဒီပေတိ။ မိတ္တဒုဗ္ဘိပုဂ္ဂလဿ ဟိ ပတ္ထိတပတ္ထိတံ အဂ္ဂိမှိ ပက္ခိတ္တဗီဇံ ဝိယ နဿတိ။ ကတတ္ထော မနုဗုဇ္ဈတီတိ ကတတ္ထော အနုဗုဇ္ဈတိ၊ မ-ကာရော ဗျဉ္ဇနသန္ဓိဝသေန ဂဟိတော။ တံ ဝေါ ဝဒါမီတိ တေန ကာရဏေန တုမှေ ဝဒါမိ။ ဌဿထာတိ ကတညုနော ဟုတွာ စိရကာလံ သဂ္ဂမှိ ဒိဗ္ဗသမ္ပတ္တိံ အနုဘဝန္တာ ပတိဋ္ဌဟိဿထ။

ဧဝံ မဟာသတ္တော ရာဇာနံ အာဒိံ ကတွာ သန္နိပတိတာနံ သဗ္ဗေသံ ဩဝါဒံ အဒါသိ။ တံ သုတွာ ရာဇာ ဩဋ္ဌိဗျာဓိယာ ယသံ ပဋိပါကတိကံ အကာသိ။ ဗောဓိသတ္တဿ စ ဩဝါဒေ ဌတွာ ဒါနာဒီနိ ပုညာနိ ကတွာ သဂ္ဂပရာယဏော အဟောသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဩဋ္ဌိဗျာဓိ ဘဒ္ဒဝတိကာ အဟောသိ၊ ရာဇာ အာနန္ဒော၊ အမစ္စော ပန အဟမေဝ အဟောသိ’’န္တိ။

ဒဠှဓမ္မဇာတကဝဏ္ဏနာ စတုတ္ထာ။

[၄၁၀] ၅။ သောမဒတ္တဇာတကဝဏ္ဏနာ

ယောမံ ပုရေ ပစ္စုဍ္ဍေတီတိ ဣဒံ သတ္ထာ ဇေတဝနေ ဝိဟရန္တော အညတရံ မဟလ္လကံ အာရဗ္ဘ ကထေသိ။ သော ကိရေကံ သာမဏေရံ ပဗ္ဗာဇေသိ၊ သာမဏေရော တဿ ဥပကာရကော ဟုတွာ တထာရူပေန ရောဂေန ကာလမကာသိ။ မဟလ္လကော တသ္မိံ ကာလကတေ ရောဒန္တော ပရိဒေဝန္တော ဝိစရတိ။ တံ ဒိသွာ ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ အသုကမဟလ္လကော သာမဏေရဿ ကာလကိရိယာယ ရောဒန္တော ပရိဒေဝန္တော ဝိစရတိ၊ မရဏဿတိကမ္မဋ္ဌာနရဟိတော မညေ’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပေသ ဣမသ္မိံ မတေ ရောဒိယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော တာဝတိံသဘဝနေ သက္ကတ္တံ ကာရေသိ။ အထေကော ကာသိဂါမဝါသီ ဗြာဟ္မဏမဟာသာလော ကာမေ ပဟာယ ဟိမဝန္တံ ပဝိသိတွာ ဣသိပဗ္ဗဇ္ဇံ ပဗ္ဗဇိတွာ ဥဉ္ဆာစရိယာယ ဝနမူလဖလာဖလေဟိ ယာပေန္တော ဝါသံ ကပ္ပေသိ။ ဧကဒိဝသံ ဖလာဖလတ္ထာယ ဂတော ဧကံ ဟတ္ထိဆာပံ ဒိသွာ အတ္တနော အဿမံ အာနေတွာ ပုတ္တဋ္ဌာနေ ဌပေတွာ သောမဒတ္တောတိဿ နာမံ ကတွာ တိဏပဏ္ဏာနိ ခါဒါပေန္တော ပဋိဇဂ္ဂိ။ သော ဝယပ္ပတ္တော မဟာသရီရော ဟုတွာ ဧကဒိဝသံ ဗဟုံ ဘောဇနံ ဂဟေတွာ အဇီရကေန ဒုဗ္ဗလော အဟောသိ။ တာပသော တံ အဿမပဒေ ကတွာ ဖလာဖလတ္ထာယ ဂတော၊ တသ္မိံ အနာဂတေယေဝ ဟတ္ထိပေါတကော ကာလမကာသိ။ တာပသော ဖလာဖလံ ဂဟေတွာ အာဂစ္ဆန္တော ‘‘အညေသု ဒိဝသေသု မေ ပုတ္တော ပစ္စုဂ္ဂမနံ ကရောတိ၊ အဇ္ဇ န ဒိဿတိ၊ ကဟံ နု ခေါ ဂတော’’တိ ပရိဒေဝန္တော ပဌမံ ဂါထမာဟ –

၁၀၅။

‘‘ယော မံ ပုရေ ပစ္စုဍ္ဍေတိ၊ အရညေ ဒူရမာယတော၊

သော န ဒိဿတိ မာတင်္ဂေါ၊ သောမဒတ္တော ကုဟိံ ဂတော’’တိ။

တတ္ထ ပုရေတိ ဣတော ပုရေ။ ပစ္စုဍ္ဍေတီတိ ပစ္စုဂ္ဂစ္ဆတိ။ အရညေ ဒူရန္တိ ဣမသ္မိံ နိမ္မနုဿေ အရညေ မံ ဒူရံ ပစ္စုဍ္ဍေတိ။ အာယတောတိ အာယာမသမ္ပန္နော။

ဧဝံ ပရိဒေဝမာနော အာဂန္တွာ တံ စင်္ကမနကောဋိယံ ပတိတံ ဒိသွာ ဂလေ ဂဟေတွာ ပရိဒေဝမာနော ဒုတိယံ ဂါထမာဟ –

၁၀၆။

‘‘အယံ ဝါ သော မတော သေတိ၊ အလ္လသိင်္ဂံဝ ဝစ္ဆိတော၊

ဘူမျာ နိပတိတော သေတိ၊ အမရာ ဝတ ကုဉ္ဇရော’’တိ။

တတ္ထ အယံ ဝါတိ ဝိဘာဝနတ္ထေ ဝါ-သဒ္ဒေါ။ အယမေဝ သော၊ န အညောတိ တံ ဝိဘာဝေန္တော ဧဝမာဟ။ အလ္လသိင်္ဂန္တိ မာလုဝလတာယ အဂ္ဂပဝါလံ။ ဝစ္ဆိတောတိ ဆိန္နော၊ ဂိမှကာလေ မဇ္ဈနှိကသမယေ တတ္တဝါလိကာပုလိနေ နခေန ဆိန္ဒိတွာ ပါတိတော မာလုဝလတာယ အင်္ကုရော ဝိယာတိ ဝုတ္တံ ဟောတိ။ ဘူမျာတိ ဘူမိယံ။ အမရာ ဝတာတိ မတော ဝတ၊ ‘‘အမရီ’’တိပိ ပါဌော။

တသ္မိံ ခဏေ သက္ကော လောကံ ဩလောကေန္တော တံ ဒိသွာ ‘‘အယံ တာပသော ပုတ္တဒါရံ ပဟာယ ပဗ္ဗဇိတော၊ ဣဒါနိ ဟတ္ထိပေါတကေ ပုတ္တသညံ ကတွာ ပရိဒေဝတိ၊ သံဝေဇေတွာ နံ သတိံ ပဋိလဘာပေဿာမီ’’တိ တဿ အဿမပဒံ အာဂန္တွာ အာကာသေ ဌိတောဝ တတိယံ ဂါထမာဟ –

၁၀၇။

‘‘အနဂါရိယုပေတဿ ၊ ဝိပ္ပမုတ္တဿ တေ သတော၊

သမဏဿ န တံ သာဓု၊ ယံ ပေတမနုသောစသီ’’တိ။

အထဿ ဝစနံ သုတွာ တာပသော စတုတ္ထံ ဂါထမာဟ –

၁၀၈။

‘‘သံဝါသေန ဟဝေ သက္က၊ မနုဿဿ မိဂဿ ဝါ၊

ဟဒယေ ဇာယတေ ပေမံ၊ တံ န သက္ကာ အသောစိတု’’န္တိ။

တတ္ထ မိဂဿ ဝါတိ ဣမသ္မိံ ဌာနေ သဗ္ဗေပိ တိရစ္ဆာနာ ‘‘မိဂါ’’တိ ဝုတ္တာ။ တန္တိ ပိယာယိတံ သတ္တံ။

အထ နံ ဩဝဒန္တော သက္ကော ဒွေ ဂါထာ အဘာသိ –

၁၀၉။

‘‘မတံ မရိဿံ ရောဒန္တိ၊ ယေ ရုဒန္တိ လပန္တိ စ၊

တသ္မာ တွံ ဣသိ မာ ရောဒိ၊ ရောဒိတံ မောဃမာဟု သန္တော။

၁၁၀။

‘‘ကန္ဒိတေန ဟဝေ ဗြဟ္မေ၊ မတော ပေတော သမုဋ္ဌဟေ၊

သဗ္ဗေ သင်္ဂမ္မ ရောဒါမ၊ အညမညဿ ဉာတကေ’’တိ။

တတ္ထ ယေ ရုဒန္တိ လပန္တိ စာတိ ဗြဟ္မေ ယေ သတ္တာ ရောဒန္တိ ပရိဒေဝန္တိ စ၊ သဗ္ဗေ တေ မတံ၊ ယော စ မရိဿတိ၊ တံ ရောဒန္တိ၊ တေသံယေဝ ဧဝံ ရောဒန္တာနံ အဿုသုက္ခနကာလော နတ္ထိ၊ တသ္မာ တွံ ဣသိ မာ ရောဒိ။ ကိံကာရဏာ? ရောဒိတံ မောဃမာဟု သန္တော၊ ပဏ္ဍိတာ ဟိ ‘‘ရောဒိတံ နိပ္ဖလ’’န္တိ ဝဒန္တိ။ မတော ပေတောတိ ယဒိ ဧသ ပေတောတိ သင်္ချံ ဂတော မတော ရောဒိတေန သမုဋ္ဌဟေယျ၊ ဧဝံ သန္တေ သဗ္ဗေပိ မယံ သမာဂန္တွာ အညမညဿ ဉာတကေ ရောဒါမ၊ ကိံ နိက္ကမ္မာ အစ္ဆာမာတိ။

တာပသော သက္ကဿ ဝစနံ သုတွာ သတိံ ပဋိလဘိတွာ ဝိဂတသောကော အဿူနိ ပုဉ္ဆိတွာ သက္ကဿ ထုတိဝသေန သေသဂါထာ အာဟ –

၁၁၁။

‘‘အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ၊

ဝါရိနာ ဝိယ ဩသိဉ္စံ၊ သဗ္ဗံ နိဗ္ဗာပယေ ဒရံ။

၁၁၂။

‘‘အဗ္ဗဟီ ဝတ မေ သလ္လံ၊ ယမာသိ ဟဒယဿိတံ၊

ယော မေ သောကပရေတဿ၊ ပုတ္တသောကံ အပါနုဒိ။

၁၁၃။

‘‘သောဟံ အဗ္ဗူဠှသလ္လောသ္မိ၊ ဝီတသောကော အနာဝိလော၊

န သောစာမိ န ရောဒါမိ၊ တဝ သုတွာန ဝါသဝါ’’တိ။

တာ ဟေဋ္ဌာ ဝုတ္တတ္ထာယေဝ။ ဧဝံ သက္ကော တာပသဿ ဩဝါဒံ ဒတွာ သကဋ္ဌာနမေဝ ဂတော။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဟတ္ထိပေါတကော သာမဏေရော အဟောသိ၊ တာပသော မဟလ္လကော၊ သက္ကော ပန အဟမေဝ အဟောသိ’’န္တိ။

သောမဒတ္တဇာတကဝဏ္ဏနာ ပဉ္စမာ။

[၄၁၁] ၆။ သုသီမဇာတကဝဏ္ဏနာ

ကာဠာနိ ကေသာနိ ပုရေ အဟေသုန္တိ ဣဒံ သတ္ထာ ဇေတဝနေ ဝိဟရန္တော မဟာဘိနိက္ခမနံ အာရဗ္ဘ ကထေသိ။ တသ္မိဉှိ သမယေ ဘိက္ခူ ဓမ္မသဘာယံ နိသီဒိတွာ ဒသဗလဿ နိက္ခမနံ ဝဏ္ဏယိံသု။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘အနစ္ဆရိယံ၊ ဘိက္ခဝေ၊ မယာ ဒါနိ အနေကာနိ ကပ္ပကောဋိသတသဟဿာနိ ပူရိတပါရမိနာ မဟာဘိနိက္ခမနံ၊ ပုဗ္ဗေပါဟံ တိယောဇနသတိကေ ကာသိရဋ္ဌေ ရဇ္ဇံ ဆဍ္ဍေတွာ နိက္ခန္တောယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော တဿ ပုရောဟိတဿ အဂ္ဂမဟေသိယာ ကုစ္ဆိမှိ နိဗ္ဗတ္တိ၊ တဿ ဇာတဒိဝသေယေဝ ဗာရာဏသိရညောပိ ပုတ္တော ဇာယိ။ တေသံ နာမဂ္ဂဟဏဒိဝသေ မဟာသတ္တဿ သုသီမကုမာရောတိ နာမံ အကံသု၊ ရာဇပုတ္တဿ ဗြဟ္မဒတ္တကုမာရောတိ။ ဗာရာဏသိရာဇာ ‘‘ပုတ္တေန မေ သဒ္ဓိံ ဧကဒိဝသေ ဇာတော’’တိ ဗောဓိသတ္တံ အာဏာပေတွာ ဓာတိယော ဒတွာ တေန သဒ္ဓိံ ဧကတော ဝဍ္ဎေသိ။ တေ ဥဘောပိ ဝယပ္ပတ္တာ အဘိရူပါ ဒေဝကုမာရဝဏ္ဏိနော ဟုတွာ တက္ကသိလာယံ သဗ္ဗသိပ္ပာနိ ဥဂ္ဂဏှိတွာ ပစ္စာဂမိံသု။ ရာဇပုတ္တော ဥပရာဇာ ဟုတွာ ဗောဓိသတ္တေန သဒ္ဓိံ ဧကတော ခါဒန္တော ပိဝန္တော နိသီဒန္တော သယန္တော ပိတု အစ္စယေန ရဇ္ဇံ ပတွာ မဟာသတ္တဿ မဟန္တံ ယသံ ဒတွာ ပုရောဟိတဋ္ဌာနေ တံ ဌပေတွာ ဧကဒိဝသံ နဂရံ သဇ္ဇာပေတွာ သက္ကော ဒေဝရာဇာ ဝိယ အလင်္ကတော အလင်္ကတဧရာဝဏပဋိဘာဂဿ မတ္တဝရဝါရဏဿ ခန္ဓေ နိသီဒိတွာ ဗောဓိသတ္တံ ပစ္ဆာသနေ ဟတ္ထိပိဋ္ဌေ နိသီဒါပေတွာ နဂရံ ပဒက္ခိဏံ အကာသိ။ မာတာပိဿ ‘‘ပုတ္တံ ဩလောကေဿာမီ’’တိ သီဟပဉ္ဇရေ ဌတွာ တဿ နဂရံ ပဒက္ခိဏံ ကတွာ အာဂစ္ဆန္တဿ ပစ္ဆတော နိသိန္နံ ပုရောဟိတံ ဒိသွာ ပဋိဗဒ္ဓစိတ္တာ ဟုတွာ သယနဂဗ္ဘံ ပဝိသိတွာ ‘‘ဣမံ အလဘန္တီ ဧတ္ထေဝ မရိဿာမီ’’တိ အာဟာရံ ပစ္ဆိန္ဒိတွာ နိပဇ္ဇိ။

ရာဇာ မာတရံ အပဿန္တော ‘‘ကုဟိံ မေ မာတာ’’တိ ပုစ္ဆိတွာ ‘‘ဂိလာနာ’’တိ သုတွာ တဿာ သန္တိကံ ဂန္တွာ ဝန္ဒိတွာ ‘‘ကိံ အမ္မ၊ အဖာသုက’’န္တိ ပုစ္ဆိ။ သာ လဇ္ဇာယ န ကထေသိ။ သော ဂန္တွာ ရာဇပလ္လင်္ကေ နိသီဒိတွာ အတ္တနော အဂ္ဂမဟေသိံ ပက္ကောသိတွာ ‘‘ဂစ္ဆ အမ္မာယ အဖာသုကံ ဇာနာဟီ’’တိ ပေသေသိ။ သာ ဂန္တွာ ပိဋ္ဌိံ ပရိမဇ္ဇန္တီ ပုစ္ဆိ၊ ဣတ္ထိယော နာမ ဣတ္ထီနံ ရဟဿံ န နိဂုဟန္တိ၊ သာ တဿာ တမတ္ထံ အာရောစေသိ။ ဣတရာပိ တံ သုတွာ ဂန္တွာ ရညော အာရောစေသိ။ ရာဇာ ‘‘ဟောတု၊ ဂစ္ဆ နံ သမဿာသေဟိ၊ ပုရောဟိတံ ရာဇာနံ ကတွာ တဿ တံ အဂ္ဂမဟေသိံ ကရိဿာမီ’’တိ အာဟ။ သာ အာဂန္တွာ တံ သမဿာသေသိ။ ရာဇာပိ ပုရောဟိတံ ပက္ကောသာပေတွာ ဧတမတ္ထံ အာရောစေတွာ ‘‘သမ္မ၊ မာတု မေ ဇီဝိတံ ဒေဟိ၊ တွံ ရာဇာ ဘဝိဿသိ၊ သာ အဂ္ဂမဟေသီ၊ အဟံ ဥပရာဇာ’’တိ အာဟ။ သော ‘‘န သက္ကာ ဧဝံ ကာတု’’န္တိ ပဋိက္ခိပိတွာ တေန ပုနပ္ပုနံ ယာစိယမာနော သမ္ပဋိစ္ဆိ။ ရာဇာ ပုရောဟိတံ ရာဇာနံ၊ မာတရံ အဂ္ဂမဟေသိံ ကာရေတွာ သယံ ဥပရာဇာ အဟောသိ။

တေသံ သမဂ္ဂဝါသံ ဝသန္တာနံ အပရဘာဂေ ဗောဓိသတ္တော အဂါရမဇ္ဈေ ဥက္ကဏ္ဌိတော ကာမေ ပဟာယ ပဗ္ဗဇ္ဇာယ နိန္နစိတ္တော ကိလေသရတိံ အနလ္လီယန္တော ဧကကောဝ တိဋ္ဌတိ၊ ဧကကောဝ နိသီဒတိ၊ ဧကကောဝ သယတိ၊ ဗန္ဓနာဂါရေ ဗဒ္ဓါ ဝိယ ပဉ္ဇရေ ပက္ခိတ္တကုက္ကုဋော ဝိယ စ အဟောသိ။ အထဿ အဂ္ဂမဟေသီ ‘‘အယံ ရာဇာ မယာ သဒ္ဓိံ နာဘိရမတိ၊ ဧကကောဝ တိဋ္ဌတိ နိသီဒတိ သေယျံ ကပ္ပေတိ၊ အယံ ခေါ ပန ဒဟရော တရုဏော၊ အဟံ မဟလ္လိကာ၊ သီသေ မေ ပလိတာနိ ပညာယန္တိ၊ ယံနူနာဟံ ‘သီသေ တေ ဒေဝ၊ ဧကံ ပလိတံ ပညာယတီ’တိ မုသာဝါဒံ ကတွာ ဧကေနုပါယေန ရာဇာနံ ပတ္တိယာပေတွာ မယာ သဒ္ဓိံ အဘိရမာပေယျ’’န္တိ စိန္တေတွာ ဧကဒိဝသံ ရညော သီသေ ဦကာ ဝိစိနန္တီ ဝိယ ဟုတွာ ‘‘ဒေဝ၊ မဟလ္လကောသိ ဇာတော၊ သီသေ တေ ဧကံ ပလိတံ ပညာယတီ’’တိ အာဟ။ ‘‘တေန ဟိ ဘဒ္ဒေ၊ ဧတံ ပလိတံ လုဉ္ဇိတွာ မယှံ ဟတ္ထေ ဌပေဟီ’’တိ။ သာ တဿ သီသတော ဧကံ ကေသံ လုဉ္ဇိတွာ အတ္တနော သီသေ ပလိတံ ဂဟေတွာ ‘‘ဣဒံ တေ၊ ဒေဝ၊ ပလိတ’’န္တိ တဿ ဟတ္ထေ ဌပေသိ။ ဗောဓိသတ္တဿ တံ ဒိသွာဝ ဘီတတသိတဿ ကဉ္စနပဋ္ဋသဒိသာ နလာဋာ သေဒါ မုစ္စိံသု။

သော အတ္တာနံ ဩဝဒန္တော ‘‘သုသီမ၊ တွံ ဒဟရော ဟုတွာ မဟလ္လကော ဇာတော၊ ဧတ္တကံ ကာလံ ဂူထကလလေ နိမုဂ္ဂေါ ဂါမသူကရော ဝိယ ကာမကလလေ နိမုဇ္ဇိတွာ တံ ကလလံ ဇဟိတုံ န သက္ကောသိ၊ နနု ကာမေ ပဟာယ ဟိမဝန္တံ ပဝိသိတွာ ပဗ္ဗဇိတွာ ဗြဟ္မစရိယဝါသဿ တေ ကာလော’’တိ စိန္တေတွာ ပဌမံ ဂါထမာဟ –

၁၁၄။

‘‘ကာဠာနိ ကေသာနိ ပုရေ အဟေသုံ၊ ဇာတာနိ သီသမှိ ယထာပဒေသေ၊

တာနဇ္ဇ သေတာနိ သုသီမ ဒိသွာ၊ ဓမ္မံ စရ ဗြဟ္မစရိယဿ ကာလော’’တိ။

တတ္ထ ယထာပဒေသေတိ တဝ သီသေ တသ္မိံ တသ္မိံ ကေသာနံ အနုရူပေ ပဒေသေ ဣတော ပုဗ္ဗေ ကာဠာနိ ဘမရပတ္တဝဏ္ဏာနိ ကေသာနိ ဇာတာနိ အဟေသုန္တိ ဝဒတိ။ ဓမ္မံ စရာတိ ဒသကုသလကမ္မပထဓမ္မံ စရာတိ အတ္တာနမေဝ အာဏာပေတိ။ ဗြဟ္မစရိယဿာတိ မေထုနဝိရတိယာ တေ ကာလောတိ အတ္ထော။

ဧဝံ ဗောဓိသတ္တေန ဗြဟ္မစရိယဝါသဿ ဂုဏေ ဝဏ္ဏိတေ ဣတရာ ‘‘အဟံ ‘ဣမဿ လဂ္ဂနံ ကရိဿာမီ’တိ ဝိဿဇ္ဇနမေဝ ကရိ’’န္တိ ဘီတတသိတာ ‘‘ဣဒါနိဿ အပဗ္ဗဇ္ဇနတ္ထာယ သရီရဝဏ္ဏံ ဝဏ္ဏယိဿာမီ’’တိ စိန္တေတွာ ဒွေ ဂါထာ အဘာသိ –

၁၁၅။

‘‘မမေဝ ဒေဝ ပလိတံ န တုယှံ၊ မမေဝ သီသံ မမ ဥတ္တမင်္ဂံ၊

‘အတ္ထံ ကရိဿ’န္တိ မုသာ အဘာဏိံ၊ ဧကာပရာဓံ ခမ ရာဇသေဋ္ဌ။

၁၁၆။

‘‘ဒဟရော တုဝံ ဒဿနိယောသိ ရာဇ၊ ပဌမုဂ္ဂတော ဟောတိ ယထာ ကဠီရော၊

ရဇ္ဇဉ္စ ကာရေဟိ မမဉ္စ ပဿ၊ မာ ကာလိကံ အနုဓာဝီ ဇနိန္ဒာ’’တိ။

တတ္ထ မမေဝ သီသန္တိ မမေဝ သီသေ သဉ္ဇာတံ ပလိတန္တိ ဒီပေတိ။ ဣတရံ တဿေဝ ဝေဝစနံ။ အတ္ထန္တိ အတ္တနော ဝုဍ္ဎိံ ကရိဿာမီတိ မုသာ ကထေသိံ။ ဧကာပရာဓန္တိ။ ဣမံ မယှံ ဧကံ အပရာဓံ။ ပဌမုဂ္ဂတောတိ ပဌမဝယေန ဥဂ္ဂတော။ ဟောဟီတိ ဟောသိ၊ ပဌမဝယေ ပတိဋ္ဌိတောသီတိ အတ္ထော။ ‘‘ဟောသီ’’တိယေဝ ဝါ ပါဌော။ ယထာ ကဠီရောတိ ယထာ သိနိဒ္ဓဆဝိတရုဏကဠီရော မန္ဒဝါတေရိတော အတိဝိယ သောဘတိ၊ ဧဝရူပေါသိ တွန္တိ ဒဿေတိ။ ‘‘ပဌမုဂ္ဂတော ဟောတီ’’တိပိ ပါဌော၊ တဿတ္ထော – ယထာ ပဌမုဂ္ဂတော တရုဏကဠီရော ဒဿနီယော ဟောတိ၊ ဧဝံ တွမ္ပိ ဒဿနီယောတိ။ မမဉ္စ ပဿာတိ မမဉ္စ ဩလောကေဟိ၊ မာ မံ အနာထံ ဝိဓဝံ ကရောဟီတိ အတ္ထော။ ကာလိကန္တိ ဗြဟ္မစရိယစရဏံ နာမ ဒုတိယေ ဝါ တတိယေ ဝါ အတ္တဘာဝေ ဝိပါကဒါနတော ကာလိကံ နာမ၊ ရဇ္ဇံ ပန ဣမသ္မိံယေဝ အတ္တဘာဝေ ကာမဂုဏသုခုပ္ပာဒနတော အကာလိကံ၊ သော တွံ ဣမံ အကာလိကံ ပဟာယ မာ ကာလိကံ အနုဓာဝီတိ ဝဒတိ။

ဗောဓိသတ္တော တဿာ ဝစနံ သုတွာ ‘‘ဘဒ္ဒေ၊ တွံ ဘဝိတဗ္ဗမေဝေတံ ကထံ ကထေသိ၊ ပရိဏမန္တေ ဟိ မမ ဝယေ ဣမေဟိ ကာဠကေသေဟိ ပရိဝတ္တေတွာ သာဏဝါကသဒိသေဟိ ပဏ္ဍရေဟိ ဘဝိတဗ္ဗံ။ အဟဉှိ နီလုပ္ပလာဒိကုသုမဒါမသဒိသကုမာရာနံ ကဉ္စနရူပပဋိဘာဂါနံ ဥတ္တမယောဗ္ဗနဝိလာသသမ္ပတ္တာနံ ခတ္တိယကညာဒီနံ ဝယေ ပရိဏမန္တေ ဇရံ ပတ္တာနံ ဝေဝဏ္ဏိယဉ္စေဝ သရီရဘင်္ဂဉ္စ ပဿာမိ။ ဧဝံ ဝိပတ္တိပရိယောသာနောဝေသ ဘဒ္ဒေ၊ ဇီဝလောကော’’တိ ဝတွာ ဥပရိ ဗုဒ္ဓလီဠာယ ဓမ္မံ ဒေသေန္တော ဂါထာဒွယမာဟ –

၁၁၇။

‘‘ပဿာမိ ဝေါဟံ ဒဟရိံ ကုမာရိံ၊ သာမဋ္ဌပဿံ သုတနုံ သုမဇ္ဈံ၊

ကာဠပ္ပဝါဠာဝ ပဝေလ္လမာနာ၊ ပလောဘယန္တီဝ နရေသု ဂစ္ဆတိ။

၁၁၈။

‘‘တမေန ပဿာမိပရေန နာရိံ၊ အာသီတိကံ နာဝုတိကံဝ ဇစ္စာ၊

ဒဏ္ဍံ ဂဟေတွာန ပဝေဓမာနံ၊ ဂေါပါနသီဘောဂ္ဂသမံ စရန္တိ’’န္တိ။

တတ္ထ ဝေါတိ နိပါတမတ္တံ။ သာမဋ္ဌပဿန္တိ သမ္မဋ္ဌပဿံ။ အယမေဝ ဝါ ပါဌော၊ သဗ္ဗပဿေသု မဋ္ဌဆဝိဝဏ္ဏန္တိ အတ္ထော။ သုတနုန္တိ သုန္ဒရသရီရံ။ သုမဇ္ဈန္တိ သုသဏ္ဌိတမဇ္ဈံ။ ကာဠပ္ပဝါဠာဝ ပဝေလ္လမာနာတိ ယထာ နာမ တရုဏကာလေ သုသမုဂ္ဂတာ ကာဠဝလ္လီ ပဝါဠာ ဝါ ဟုတွာ မန္ဒဝါတေရိတာ ဣတော စိတော စ ပဝေလ္လတိ၊ ဧဝံ ပဝေလ္လမာနာ ဣတ္ထိဝိလာသံ ဒဿယမာနာ ကုမာရိကာ ပလောဘယန္တီဝ နရေသု ဂစ္ဆတိ။ သမီပတ္ထေ ဘုမ္မဝစနံ၊ ပုရိသာနံ သန္တိကေ တေ ပုရိသေ ကိလေသဝသေန ပလောဘယန္တီ ဝိယ ဂစ္ဆတိ။

တမေန ပဿာမိပရေန နာရိန္တိ တမေနံ နာရိံ အပရေန သမယေန ဇရံ ပတ္တံ အန္တရဟိတရူပသောဘဂ္ဂပ္ပတ္တံ ပဿာမိ။ ဗောဓိသတ္တော ဟိ ပဌမဂါထာယ ရူပေ အဿာဒံ ကထေတွာ ဣဒါနိ အာဒီနဝံ ဒဿေန္တော ဧဝမာဟ။ အာသီတိကံ နာဝုတိကံဝ ဇစ္စာတိ အသီတိသံဝစ္ဆရံ ဝါ နဝုတိသံဝစ္ဆရံ ဝါ ဇာတိယာ။ ဂေါပါနသီဘောဂ္ဂသမန္တိ ဂေါပါနသီသမံ ဘောဂ္ဂံ၊ ဂေါပါနသီအာကာရေန ဘဂ္ဂသရီရံ ဩနမိတွာ နဋ္ဌကာကဏိကံ ပရိယေသန္တိံ ဝိယ စရမာနန္တိ အတ္ထော။ ကာမဉ္စ ဗောဓိသတ္တေန ဒဟရကာလေ ဒိသွာ ပုန နာဝုတိကကာလေ ဒိဋ္ဌပုဗ္ဗာ နာမ နတ္ထိ၊ ဉာဏေန ဒိဋ္ဌဘာဝံ သန္ဓာယ ပနေတံ ဝုတ္တံ။

ဣတိ မဟာသတ္တော ဣမာယ ဂါထာယ ရူပဿ အာဒီနဝံ ဒဿေတွာ ဣဒါနိ အဂါရမဇ္ဈေ အတ္တနော အနဘိရတိံ ပကာသေန္တော ဂါထာဒွယမာဟ –

၁၁၉။

‘‘သောဟံ တမေဝါနုဝိစိန္တယန္တော၊ ဧကော သယာမိ သယနဿ မဇ္ဈေ၊

‘အဟမ္ပိ ဧဝံ’ ဣတိ ပေက္ခမာနော၊ န ဂဟေ ရမေ ဗြဟ္မစရိယဿ ကာလော။

၁၂၀။

‘‘ရဇ္ဇုဝါလမ္ဗနီ စေသာ၊ ယာ ဂေဟေ ဝသတော ရတိ၊

ဧတမ္ပိ ဆေတွာန ဝဇန္တိ ဓီရာ၊ အနပေက္ခိနော ကာမသုခံ ပဟာယာ’’တိ။

တတ္ထ သောဟန္တိ သော အဟံ။ တမေဝါနုဝိစိန္တယန္တောတိ တမေဝ ရူပါနံ အဿာဒဉ္စ အာဒီနဝဉ္စ စိန္တေန္တော။ ဧဝံ ဣတိ ပေက္ခမာနောတိ ‘‘ယထာ ဧသာ ပရိဏတာ၊ အဟမ္ပိ ဇရံ ပတ္တော ဘဂ္ဂသရီရော ဘဝိဿာမီ’’တိ ပေက္ခမာနော။ န ဂဟေ ရမေတိ ဂေဟေ န ရမာမိ။ ဗြဟ္မစရိယဿ ကာလောတိ ဘဒ္ဒေ၊ ဗြဟ္မစရိယဿ မေ ကာလော၊ တသ္မာ ပဗ္ဗဇိဿာမီတိ ဒီပေတိ။

ရဇ္ဇုဝါလမ္ဗနီ စေသာတိ စ-ကာရော နိပါတမတ္တော၊ အာလမ္ဗနရဇ္ဇု ဝိယ ဧသာတိ အတ္ထော။ ကတရာ? ယာ ဂေဟေ ဝသတော ရတိ၊ ယာ ဂေဟေ ဝသန္တဿ ရူပါဒီသု အာရမ္မဏေသု ကာမရတီတိ အတ္ထော။ ဣမိနာ ကာမာနံ အပ္ပဿာဒတံ ဒဿေတိ။ အယံ ဧတ္ထာဓိပ္ပာယော – ယထာ ဂိလာနဿ မနုဿဿ အတ္တနော ဗလေန ပရိဝတ္တိတုံ အသက္ကောန္တဿ ‘‘ဣမံ အာလမ္ဗိတွာ ပရိဝတ္တေယျာသီ’’တိ အာလမ္ဗနရဇ္ဇုံ ဗန္ဓေယျုံ၊ တဿ တံ အာလမ္ဗိတွာ ပရိဝတ္တန္တဿ အပ္ပမတ္တကံ ကာယိကစေတသိကသုခံ ဘဝေယျ၊ ဧဝံ ကိလေသာတုရာနံ သတ္တာနံ ဝိဝေကသုခဝသေန ပရိဝတ္တိတုံ အသက္ကောန္တာနံ အဂါရမဇ္ဈေ ဌပိတာနိ ကာမရတိဒါယကာနိ ရူပါဒီနိ အာရမ္မဏာနိ တေသံ ကိလေသပရိဠာဟကာလေ မေထုနဓမ္မပဋိသေဝနဝသေန တာနိ အာရဗ္ဘ ပရိဝတ္တမာနာနံ ကာယိကစေတသိကသုခသင်္ခါတာ ကာမရတိ နာမ တံ မုဟုတ္တံ ဥပ္ပဇ္ဇမာနာ အပ္ပမတ္တိကာ ဟောတိ၊ ဧဝံ အပ္ပဿာဒါ ကာမာတိ။ ဧတမ္ပိ ဆေတွာနာတိ ယသ္မာ ပန ဗဟုဒုက္ခာ ကာမာ ဗဟုပါယာသာ၊ အာဒီနဝေါ ဧတ္ထ ဘိယျော၊ တသ္မာ တံ အာဒီနဝံ သမ္ပဿမာနာ ပဏ္ဍိတာ ဧတမ္ပိ ရဇ္ဇုံ ဆေတွာ ဂူထကူပေ နိမုဂ္ဂပုရိသော တံ ပဇဟန္တော ဝိယ အနပေက္ခိနော ဧတံ အပ္ပမတ္တကံ ဗဟုဒုက္ခံ ကာမသုခံ ပဟာယ ဝဇန္တိ၊ နိက္ခမိတွာ မနောရမံ ပဗ္ဗဇ္ဇံ ပဗ္ဗဇန္တီတိ။

ဧဝံ မဟာသတ္တော ကာမေသု အဿာဒဉ္စ အာဒီနဝဉ္စ ဒဿေန္တော ဗုဒ္ဓလီဠာယ ဓမ္မံ ဒေသေတွာ သဟာယံ ပက္ကောသာပေတွာ ရဇ္ဇံ ပဋိစ္ဆာပေတွာ ဉာတိမိတ္တသုဟဇ္ဇာနံ ရောဒန္တာနံ ပရိဒေဝန္တာနမေဝ သိရိဝိဘဝံ ဆဍ္ဍေတွာ ဟိမဝန္တံ ပဝိသိတွာ ဣသိပဗ္ဗဇ္ဇံ ပဗ္ဗဇိတွာ ဈာနာဘိညံ နိဗ္ဗတ္တေတွာ ဗြဟ္မလောကပရာယဏော အဟောသိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဗဟူ ဇနေ အမတပါနံ ပါယေတွာ ဇာတကံ သမောဓာနေသိ – ‘‘တဒါ အဂ္ဂမဟေသီ ရာဟုလမာတာ အဟောသိ၊ သဟာယရာဇာ အာနန္ဒော၊ သုသီမရာဇာ ပန အဟမေဝ အဟောသိ’’န္တိ။

သုသီမဇာတကဝဏ္ဏနာ ဆဋ္ဌာ။

[၄၁၂] ၇။ ကောဋသိမ္ဗလိဇာတကဝဏ္ဏနာ

အဟံ ဒသသတံဗျာမန္တိ ဣဒံ သတ္ထာ ဇေတဝနေ ဝိဟရန္တော ကိလေသနိဂ္ဂဟံ အာရဗ္ဘ ကထေသိ။ ဝတ္ထု ပန ပါနီယဇာတကေ (ဇာ။ ၁။၁၁။၅၉ အာဒယော) အာဝိ ဘဝိဿတိ။ ဣဓာပိ သတ္ထာ အန္တောကောဋိသန္ထာရေ ကာမဝိတက္ကာဘိဘူတေ ပဉ္စသတေ ဘိက္ခူ ဒိသွာ ဘိက္ခုသင်္ဃံ သန္နိပါတာပေတွာ ‘‘ဘိက္ခဝေ၊ အာသင်္ကိတဗ္ဗယုတ္တကံ နာမ အာသင်္ကိတုံ ဝဋ္ဋတိ၊ ကိလေသာ နာမ ဝဍ္ဎန္တာ ဝနေ နိဂြောဓာဒယော ဝိယ ရုက္ခံ၊ ပုရိသံ ဘဉ္ဇန္တိ၊ တေနေဝ ပုဗ္ဗေပိ ကောဋသိမ္ဗလိယံ နိဗ္ဗတ္တဒေဝတာ ဧကံ သကုဏံ နိဂြောဓဗီဇာနိ ခါဒိတွာ အတ္တနော ရုက္ခဿ သာခန္တရေ ဝစ္စံ ပါတေန္တံ ဒိသွာ ‘ဣတော မေ ဝိမာနဿ ဝိနာသော ဘဝိဿတီ’တိ ဘယပ္ပတ္တာ အဟောသီ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ကောဋသိမ္ဗလိယံ ရုက္ခဒေဝတာ ဟုတွာ နိဗ္ဗတ္တိ။ အထေကော သုပဏ္ဏရာဇာ ဒိယဍ္ဎယောဇနသတိကံ အတ္တဘာဝံ မာပေတွာ ပက္ခဝါတေဟိ မဟာသမုဒ္ဒေ ဥဒကံ ဒွိဓာ ကတွာ ဧကံ ဗျာမသဟဿာယာမံ နာဂရာဇာနံ နင်္ဂုဋ္ဌေ ဂဟေတွာ မုခေနဿ ဂဟိတဂေါစရံ ဆဍ္ဍာပေတွာ ကောဋသိမ္ဗလိံ သန္ဓာယ ဝနမတ္ထကေန ပါယာသိ။ နာဂရာဇာ ‘‘ဩလမ္ဗေန္တော အတ္တာနံ မောစေဿာမီ’’တိ နိဂြောဓရုက္ခေ ဘောဂံ ပဝေသေတွာ နိဂြောဓံ ဝေဌေတွာ ဂဏှိ။ သုပဏ္ဏရညော မဟာဗလတာယ နာဂရာဇဿ စ မဟာသရီရတာယ နိဂြောဓရုက္ခော သမုဂ္ဃာဋံ အဂမာသိ။ နာဂရာဇာ နေဝ ရုက္ခံ ဝိဿဇ္ဇေသိ၊ သုပဏ္ဏရာဇာ သဒ္ဓိံ နိဂြောဓရုက္ခေန နာဂရာဇာနံ ဂဟေတွာ ကောဋသိမ္ဗလိံ ပတွာ နာဂရာဇာနံ ခန္ဓပိဋ္ဌေ နိပဇ္ဇာပေတွာ ဥဒရမဿ ဖာလေတွာ နာဂမေဒံ ခါဒိတွာ သေသကဠေဝရံ သမုဒ္ဒေ ဝိဿဇ္ဇေသိ။ တသ္မိံ ပန နိဂြောဓေ ဧကာ သကုဏိကာ အတ္ထိ၊ သာ နိဂြောဓရုက္ခေ ဝိဿဋ္ဌေ ဥပ္ပတိတွာ ကောဋသိမ္ဗလိယာ သာခန္တရေ နိသီဒိ။ ရုက္ခဒေဝတာ တံ ဒိသွာ ‘‘အယံ သကုဏိကာ မမ ရုက္ခက္ခန္ဓေ ဝစ္စံ ပါတေဿတိ၊ တတော နိဂြောဓဂစ္ဆော ဝါ ပိလက္ခဂစ္ဆော ဝါ ဥဋ္ဌဟိတွာ သကလရုက္ခံ ဩတ္ထရိတွာ ဂစ္ဆိဿတိ၊ အထ မေ ဝိမာနံ နဿိဿတီ’’တိ ဘီတတသိတာ ပဝေဓိ။ တဿာ ပဝေဓန္တိယာ ကောဋသိမ္ဗလီပိ ယာဝ မူလာ ပဝေဓိ။ သုပဏ္ဏရာဇာ တံ ပဝေဓမာနံ ဒိသွာ ကာရဏံ ပုစ္ဆန္တော ဒွေ ဂါထာ အဘာသိ –

၁၂၁။

‘‘အဟံ ဒသသတံဗျာမံ၊ ဥရဂမာဒါယ အာဂတော၊

တဉ္စ မဉ္စ မဟာကာယံ၊ ဓာရယံ နပ္ပဝေဓသိ။

၁၂၂။

‘‘အထိမံ ခုဒ္ဒကံ ပက္ခိံ၊ အပ္ပမံသတရံ မယာ၊

ဓာရယံ ဗျထသိ ဘီတာ၊ ကမတ္ထံ ကောဋသိမ္ဗလီ’’တိ။

တတ္ထ ဒသသတံဗျာမန္တိ သဟဿဗျာမမတ္တာယာမံ။ ဥရဂမာဒါယ အာဂတောတိ ဧဝံ မဟန္တံ ဥရဂံ အာဒါယ ဣဓ အာဂတော။ တဉ္စ မဉ္စာတိ တဉ္စ ဥရဂံ မဉ္စ။ ဓာရယန္တိ ဓာရယမာနာ။ ဗျထသီတိ ကမ္ပသိ။ ကမတ္ထန္တိ ကိံ အတ္ထံ၊ ကေန ကာရဏေနာတိ ပုစ္ဆတိ၊ ကံ ဝါ အတ္ထံ သမ္ပဿမာနာတိပိ အတ္ထော။ ကောဋသိမ္ဗလီတိ ရုက္ခနာမေန ဒေဝပုတ္တံ အာလပတိ။ သော ဟိ သိမ္ဗလိရုက္ခော ခန္ဓသာခမဟန္တတာယ ကောဋသိမ္ဗလိနာမံ လဘတိ၊ တသ္မိံ အဓိဝတ္ထဒေဝပုတ္တဿပိ တဒေဝ နာမံ။

အထဿ ကာရဏံ ကထေန္တော ဒေဝပုတ္တော စတဿော ဂါထာ အဘာသိ –

၁၂၃။

‘‘မံသဘက္ခော တုဝံ ရာဇ၊ ဖလဘက္ခော အယံ ဒိဇော၊

အယံ နိဂြောဓဗီဇာနိ၊ ပိလက္ခုဒုမ္ဗရာနိ စ၊

အဿတ္ထာနိ စ ဘက္ခိတွာ၊ ခန္ဓေ မေ ဩဟဒိဿတိ။

၁၂၄။

‘‘တေ ရုက္ခာ သံဝိရူဟန္တိ၊ မမ ပဿေ နိဝါတဇာ၊

တေ မံ ပရိယောနန္ဓိဿန္တိ၊ အရုက္ခံ မံ ကရိဿရေ။

၁၂၅။

‘‘သန္တိ အညေပိ ရုက္ခာ သေ၊ မူလိနော ခန္ဓိနော ဒုမာ၊

ဣမိနာ သကုဏဇာတေန၊ ဗီဇမာဟရိတာ ဟတာ။

၁၂၆။

‘‘အဇ္ဈာရူဟာဘိဝဍ္ဎန္တိ၊ ဗြဟန္တမ္ပိ ဝနပ္ပတိံ၊

တသ္မာ ရာဇ ပဝေဓာမိ၊ သမ္ပဿံနာဂတံ ဘယ’’န္တိ။

တတ္ထ ဩဟဒိဿတီတိ ဝစ္စံ ပါတေဿတိ။ တေ ရုက္ခာတိ တေဟိ ဗီဇေဟိ ဇာတာ နိဂြောဓာဒယော ရုက္ခာ။ သံဝိရူဟန္တီတိ သံဝိရုဟိဿန္တိ ဝဍ္ဎိဿန္တိ။ မမ ပဿေတိ မမ သာခန္တရာဒီသု။ နိဝါတဇာတိ မမ သာခါဟိ ဝါတဿ နိဝါရိတတ္တာ နိဝါတေ ဇာတာ။ တေ မံ ပရိယောနန္ဓိဿန္တီတိ ဧတေ ဧဝံ ဝဍ္ဎိတာ မံ ပရိယောနန္ဓိဿန္တီတိ အယမေတ္ထာဓိပ္ပာယော။ ကရိဿရေတိ အထေဝံ ပရိယောနန္ဓိတွာ မံ အရုက္ခမေဝ ကရိဿန္တိ သဗ္ဗသော ဘဉ္ဇိဿန္တိ။ ရုက္ခာ သေတိ ရုက္ခာ။ မူလိနော ခန္ဓိနောတိ မူလသမ္ပန္နာ စေဝ ခန္ဓသမ္ပန္နာ စ။ ဒုမာတိ ရုက္ခဝေဝစနမေဝ။ ဗီဇမာဟရိတာတိ ဗီဇံ အာဟရိတွာ။ ဟတာတိ အညေပိ ဣမသ္မိံ ဝနေ ရုက္ခာ ဝိနာသိတာ သန္တိ။ အဇ္ဈာရူဟာဘိဝဍ္ဎန္တီတိ နိဂြောဓာဒယော ရုက္ခာ အဇ္ဈာရူဟာ ဟုတွာ မဟန္တမ္ပိ အညံ ဝနပ္ပတိံ အတိက္ကမ္မ ဝဍ္ဎန္တီတိ ဒဿေတိ။ ဧတ္ထ ပန ဝနေ ပတိ၊ ဝနဿ ပတိ၊ ဝနပ္ပတီတိ တယောပိ ပါဌာယေဝ။ ရာဇာတိ သုပဏ္ဏံ အာလပတိ။

ရုက္ခဒေဝတာယ ဝစနံ သုတွာ သုပဏ္ဏော ဩသာနဂါထမာဟ –

၁၂၇။

‘‘သင်္ကေယျ သင်္ကိတဗ္ဗာနိ၊ ရက္ခေယျာနာဂတံ ဘယံ၊

အနာဂတဘယာ ဓီရော၊ ဥဘော လောကေ အဝေက္ခတီ’’တိ။

တတ္ထ အနာဂတံ ဘယန္တိ ပါဏာတိပါတာဒီဟိ ဝိရမန္တော ဒိဋ္ဌဓမ္မိကမ္ပိ သမ္ပရာယိကမ္ပိ အနာဂတံ ဘယံ ရက္ခတိ နာမ၊ ပါပမိတ္တေ ဝေရိပုဂ္ဂလေ စ အနုပသင်္ကမန္တော အနာဂတဘယံ ရက္ခတိ နာမ။ ဧဝံ အနာဂတံ ဘယံ ရက္ခေယျ။ အနာဂတဘယာတိ အနာဂတဘယကာရဏာ တံ ဘယံ ပဿန္တော ဓီရော ဣဓလောကဉ္စ ပရလောကဉ္စ အဝေက္ခတိ ဩလောကေတိ နာမ။

ဧဝဉ္စ ပန ဝတွာ သုပဏ္ဏော အတ္တနော အာနုဘာဝေန တံ ပက္ခိံ တမှာ ရုက္ခာ ပလာပေသိ။

သတ္ထာ ဣမံ ဓမ္မဒေသနံ အာဟရိတွာ ‘‘အာသင်္ကိတဗ္ဗယုတ္တကံ အာသင်္ကိတုံ ဝဋ္ဋတီ’’တိ ဝတွာ သစ္စာနိ ပကာသေတွာ ဇာတကံ သမောဓာနေသိ၊ သစ္စပရိယောသာနေ ပဉ္စသတာ ဘိက္ခူ အရဟတ္တဖလေ ပတိဋ္ဌဟိံသု။

တဒါ သုပဏ္ဏရာဇာ သာရိပုတ္တော အဟောသိ၊ ရုက္ခဒေဝတာ ပန အဟမေဝ အဟောသိန္တိ။

ကောဋသိမ္ဗလိဇာတကဝဏ္ဏနာ သတ္တမာ။

[၄၁၃] ၈။ ဓူမကာရိဇာတကဝဏ္ဏနာ

ရာဇာအပုစ္ဆိ ဝိဓုရန္တိ ဣဒံ သတ္ထာ ဇေတဝနေ ဝိဟရန္တော ကောသလရညော အာဂန္တုကသင်္ဂဟံ အာရဗ္ဘ ကထေသိ။ သော ကိရ ဧကသ္မိံ သမယေ ပဝေဏိအာဂတာနံ ပေါရာဏကယောဓာနံ သင်္ဂဟံ အကတွာ အဘိနဝါဂတာနံ အာဂန္တုကာနညေဝ သက္ကာရသမ္မာနံ အကာသိ။ အထဿ ပစ္စန္တေ ကုပိတေ ယုဇ္ဈနတ္ထာယ ဂတဿ ‘‘အာဂန္တုကာ လဒ္ဓသက္ကာရာ ယုဇ္ဈိဿန္တီ’’တိ ပေါရာဏကယောဓာ န ယုဇ္ဈိံသု၊ ‘‘ပေါရာဏကယောဓာ ယုဇ္ဈိဿန္တီ’’တိ အာဂန္တုကာပိ န ယုဇ္ဈိံသု။ စောရာ ရာဇာနံ ဇိနိံသု။ ရာဇာ ပရာဇိတော အာဂန္တုကသင်္ဂဟဒေါသေန အတ္တနော ပရာဇိတဘာဝံ ဉတွာ သာဝတ္ထိံ ပစ္စာဂန္တွာ ‘‘ကိံ နု ခေါ အဟမေဝ ဧဝံ ကရောန္တော ပရာဇိတော၊ ဥဒါဟု အညေပိ ရာဇာနော ပရာဇိတပုဗ္ဗာတိ ဒသဗလံ ပုစ္ဆိဿာမီ’’တိ ဘုတ္တပါတရာသော ဇေတဝနံ ဂန္တွာ သက္ကာရံ ကတွာ သတ္ထာရံ ဝန္ဒိတွာ တမတ္ထံ ပုစ္ဆိ။ သတ္ထာ ‘‘န ခေါ၊ မဟာရာဇ၊ တွမေဝေကော၊ ပေါရာဏကရာဇာနောပိ အာဂန္တုကသင်္ဂဟံ ကတွာ ပရာဇိတာ’’တိ ဝတွာ တေန ယာစိတော အတီတံ အာဟရိ။

အတီတေ ကုရုရဋ္ဌေ ဣန္ဒပတ္ထနဂရေ ယုဓိဋ္ဌိလဂေါတ္တော ဓနဉ္စယော နာမ ကောရဗျရာဇာ ရဇ္ဇံ ကာရေသိ။ တဒါ ဗောဓိသတ္တော တဿ ပုရောဟိတကုလေ နိဗ္ဗတ္တိတွာ ဝယပ္ပတ္တော တက္ကသိလာယံ သဗ္ဗသိပ္ပာနိ ဥဂ္ဂဏှိတွာ ဣန္ဒပတ္ထံ ပစ္စာဂန္တွာ ပိတု အစ္စယေန ပုရောဟိတဋ္ဌာနံ လဘိတွာ ရညော အတ္ထဓမ္မာနုသာသကော အဟောသိ၊ ဝိဓုရပဏ္ဍိတောတိဿ နာမံ ကရိံသု။ တဒါ ဓနဉ္စယရာဇာ ပေါရာဏကယောဓေ အဂဏေတွာ အာဂန္တုကာနညေဝ သင်္ဂဟံ အကာသိ။ တဿ ပစ္စန္တေ ကုပိတေ ယုဇ္ဈနတ္ထာယ ဂတဿ ‘‘အာဂန္တုကာ ဇာနိဿန္တီ’’တိ နေဝ ပေါရာဏကာ ယုဇ္ဈိံသု၊ ‘‘ပေါရာဏကာ ယုဇ္ဈိဿန္တီ’’တိ န အာဂန္တုကာ ယုဇ္ဈိံသု။ ရာဇာ ပရာဇိတော ဣန္ဒပတ္ထမေဝ ပစ္စာဂန္တွာ ‘‘အာဂန္တုကသင်္ဂဟဿ ကတဘာဝေန ပရာဇိတောမှီ’’တိ စိန္တေသိ။ သော ဧကဒိဝသံ ‘‘ကိံ နု ခေါ အဟမေဝ အာဂန္တုကသင်္ဂဟံ ကတွာ ပရာဇိတော၊ ဥဒါဟု အညေပိ ရာဇာနော ပရာဇိတပုဗ္ဗာ အတ္ထီတိ ဝိဓုရပဏ္ဍိတံ ပုစ္ဆိဿာမီ’’တိ စိန္တေတွာ တံ ရာဇုပဋ္ဌာနံ အာဂန္တွာ နိသိန္နံ တမတ္ထံ ပုစ္ဆိ။ အထဿ တံ ပုစ္ဆနာကာရံ အာဝိကရောန္တော သတ္ထာ ဥပဍ္ဎံ ဂါထမာဟ –

၁၂၈။

‘‘ရာဇာ အပုစ္ဆိ ဝိဓုရံ၊ ဓမ္မကာမော ယုဓိဋ္ဌိလော’’တိ။

တတ္ထ ဓမ္မကာမောတိ သုစရိတဓမ္မပ္ပိယော။

‘‘အပိ ဗြာဟ္မဏ ဇာနာသိ၊ ကော ဧကော ဗဟု သောစတီ’’တိ –

သေသဥပဍ္ဎဂါထာယ ပန အယမတ္ထော – အပိ နာမ၊ ဗြာဟ္မဏ၊ တွံ ဇာနာသိ ‘‘ကော ဣမသ္မိံ လောကေ

ဧကော ဗဟု သောစတိ၊ နာနာကာရဏေန သောစတီ’’တိ။

တံ သုတွာ ဗောဓိသတ္တော ‘‘မဟာရာဇ၊ ကိံ သောကော နာမ တုမှာကံ သောကော၊ ပုဗ္ဗေ ဓူမကာရီ နာမေကော အဇပါလဗြာဟ္မဏော မဟန္တံ အဇယူထံ ဂဟေတွာ အရညေ ဝဇံ ကတွာ တတ္ထ အဇာ ဌပေတွာ အဂ္ဂိဉ္စ ဓူမဉ္စ ကတွာ အဇယူထံ ပဋိဇဂ္ဂန္တော ခီရာဒီနိ ပရိဘုဉ္ဇန္တော ဝသိ။ သော တတ္ထ အာဂတေ သုဝဏ္ဏဝဏ္ဏေ သရဘေ ဒိသွာ တေသု သိနေဟံ ကတွာ အဇာ အဂဏေတွာ အဇာနံ သက္ကာရံ သရဘာနံ ကတွာ သရဒကာလေ သရဘေသု ပလာယိတွာ ဟိမဝန္တံ ဂတေသု အဇာသုပိ နဋ္ဌာသု သရဘေ အပဿန္တော သောကေန ပဏ္ဍုရောဂီ ဟုတွာ ဇီဝိတက္ခယံ ပတ္တော၊ အယံ အာဂန္တုကသင်္ဂဟံ ကတွာ တုမှေဟိ သတဂုဏေန သဟဿဂုဏေန သောစိတွာ ကိလမိတွာ ဝိနာသံ ပတ္တော’’တိ ဣဒံ ဥဒါဟရဏံ အာနေတွာ ဒဿေန္တော ဣမာ ဂါထာ အာဟ –

၁၂၉။

‘‘ဗြာဟ္မဏော အဇယူထေန၊ ပဟူတေဇော ဝနေ ဝသံ၊

ဓူမံ အကာသိ ဝါသေဋ္ဌော၊ ရတ္တိန္ဒိဝမတန္ဒိတော။

၁၃၀။

‘‘တဿ တံဓူမဂန္ဓေန၊ သရဘာ မကသဍ္ဍိတာ၊

ဝဿာဝါသံ ဥပဂစ္ဆုံ၊ ဓူမကာရိဿ သန္တိကေ။

၁၃၁။

‘‘သရဘေသု မနံ ကတွာ၊ အဇာ သော နာဝဗုဇ္ဈထ၊

အာဂစ္ဆန္တီ ဝဇန္တီ ဝါ၊ တဿ တာ ဝိနသုံ အဇာ။

၁၃၂။

‘‘သရဘာ သရဒေ ကာလေ၊ ပဟီနမကသေ ဝနေ၊

ပါဝိသုံ ဂိရိဒုဂ္ဂါနိ၊ နဒီနံ ပဘဝါနိ စ။

၁၃၃။

‘‘သရဘေ စ ဂတေ ဒိသွာ၊ အဇာ စ ဝိဘဝံ ဂတာ၊

ကိသော စ ဝိဝဏ္ဏော စာသိ၊ ပဏ္ဍုရောဂီ စ ဗြာဟ္မဏော။

၁၃၄။

‘‘ဧဝံ ယော သံ နိရံကတွာ၊ အာဂန္တုံ ကုရုတေ ပိယံ၊

သော ဧကော ဗဟု သောစတိ၊ ဓူမကာရီဝ ဗြာဟ္မဏော’’တိ။

တတ္ထ ပဟူတေဇောတိ ပဟူတဣန္ဓနော။ ဓူမံ အကာသီတိ မက္ခိကပရိပန္ထဟရဏတ္ထာယ အဂ္ဂိဉ္စ ဓူမဉ္စ အကာသိ။ ဝါသေဋ္ဌောတိ တဿ ဂေါတ္တံ။ အတန္ဒိတောတိ အနလသော ဟုတွာ။ တံဓူမဂန္ဓေနာတိ တေန ဓူမဂန္ဓေန။ သရဘာတိ သရဘမိဂါ။ မကသဍ္ဍိတာတိ မကသေဟိ ဥပဒ္ဒုတာ ပီဠိတာ။ သေသမက္ခိကာပိ မကသဂ္ဂဟဏေနေဝ ဂဟိတာ။ ဝဿာဝါသန္တိ ဝဿာရတ္တဝါသံ ဝသိံသု။ မနံ ကတွာတိ သိနေဟံ ဥပ္ပာဒေတွာ။ နာဝဗုဇ္ဈထာတိ အရညတော စရိတွာ ဝဇံ အာဂစ္ဆန္တီ စေဝ ဝဇတော အရညံ ဂစ္ဆန္တီ စ ‘‘ဧတ္တကာ အာဂတာ၊ ဧတ္တကာ အနာဂတာ’’တိ န ဇာနာတိ။ တဿ တာ ဝိနသုန္တိ တဿ တာ ဧဝံ အပစ္စဝေက္ခန္တဿ သီဟပရိပန္ထာဒိတော အရက္ခိယမာနာ အဇာ သီဟပရိပန္ထာဒီဟိ ဝိနဿိံသု၊ သဗ္ဗာဝ ဝိနဋ္ဌာ။

နဒီနံ ပဘဝါနိ စာတိ ပဗ္ဗတေယျာနံ နဒီနံ ပဘဝဋ္ဌာနာနိ စ ပဝိဋ္ဌာ။ ဝိဘဝန္တိ အဘာဝံ။ အဇာ စ ဝိနာသံ ပတ္တာ ဒိသွာ ဇာနိတွာ။ ကိသော စ ဝိဝဏ္ဏောတိ ခီရာဒိဒါယိကာ အဇာ ပဟာယ သရဘေ သင်္ဂဏှိတွာ တေပိ အပဿန္တော ဥဘတော ပရိဟီနော သောကာဘိဘူတော ကိသော စေဝ ဒုဗ္ဗဏ္ဏော စ အဟောသိ။ ဧဝံ ယော သံ နိရံကတွာတိ ဧဝံ မဟာရာဇ၊ ယော သကံ ပေါရာဏံ အဇ္ဈတ္တိကံ ဇနံ နီဟရိတွာ ပဟာယ ကိသ္မိဉ္စိ အဂဏေတွာ အာဂန္တုကံ ပိယံ ကရောတိ၊ သော တုမှာဒိသော ဧကော ဗဟု သောစတိ၊ အယံ တေ မယာ ဒဿိတော ဓူမကာရီ ဗြာဟ္မဏော ဝိယ ဗဟု သောစတီတိ။

ဧဝံ မဟာသတ္တော ရာဇာနံ သညာပေန္တော ကထေသိ။ သောပိ သညတ္တံ ဂန္တွာ တဿ ပသီဒိတွာ ဗဟုံ ဓနံ အဒါသိ။ တတော ပဋ္ဌာယ စ အဇ္ဈတ္တိကသင်္ဂဟမေဝ ကရောန္တော ဒါနာဒီနိ ပုညာနိ ကတွာ သဂ္ဂပရာယဏော အဟောသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ကောရဗျရာဇာ အာနန္ဒော အဟောသိ၊ ဓူမကာရီ ပသေနဒိကောသလော၊ ဝိဓုရပဏ္ဍိတော ပန အဟမေဝ အဟောသိ’’န္တိ။

ဓူမကာရိဇာတကဝဏ္ဏနာ အဋ္ဌမာ။

[၄၁၄] ၉။ ဇာဂရဇာတကဝဏ္ဏနာ

ကောဓဇာဂရတံ သုတ္တောတိ ဣဒံ သတ္ထာ ဇေတဝနေ ဝိဟရန္တော အညတရံ ဥပါသကံ အာရဗ္ဘ ကထေသိ။ သော ဟိ သောတာပန္နော အရိယသာဝကော သာဝတ္ထိတော သကဋသတ္ထေန သဒ္ဓိံ ကန္တာရမဂ္ဂံ ပဋိပဇ္ဇိ။ သတ္ထဝါဟော တတ္ထ ဧကသ္မိံ ဥဒကဖာသုကဋ္ဌာနေ ပဉ္စ သကဋသတာနိ မောစေတွာ ခါဒနီယဘောဇနီယံ သံဝိဒဟိတွာ ဝါသံ ဥပဂစ္ဆိ။ တေ မနုဿာ တတ္ထ တတ္ထ နိပဇ္ဇိတွာ သုပိံသု၊ ဥပါသကော ပန သတ္ထဝါဟဿ သန္တိကေ ဧကသ္မိံ ရုက္ခမူလေ စင်္ကမံ အဓိဋ္ဌာသိ။ အထ နံ သတ္ထံ ဝိလုမ္ပိတုကာမာ ပဉ္စသတာ စောရာ နာနာဝုဓာနိ ဂဟေတွာ သတ္ထံ ပရိဝါရေတွာ အဋ္ဌံသု။ တေ တံ ဥပါသကံ စင်္ကမန္တံ ဒိသွာ ‘‘ဣမဿ နိဒ္ဒါယနကာလေ ဝိလုမ္ပိဿာမာ’’တိ တတ္ထ တတ္ထ အဋ္ဌံသု၊ သောပိ တိယာမရတ္တိံ စင်္ကမိယေဝ။ စောရာ ပစ္စူသသမယေ ဂဟိတဂဟိတာ ပါသာဏမုဂ္ဂရာဒယော ဆဍ္ဍေတွာ ‘‘ဘော သတ္ထဝါဟ၊ ဣမံ အပ္ပမာဒေန ဇဂ္ဂန္တံ ပုရိသံ နိဿာယ ဇီဝိတံ လဘိတွာ တဝ သန္တကဿ သာမိကော ဇာတော၊ ဧတဿ သက္ကာရံ ကရေယျာသီ’’တိ ဝတွာ ပက္ကမိံသု။ မနုဿာ ကာလဿေဝ ဝုဋ္ဌာယ တေဟိ ဆဍ္ဍိတပါသာဏမုဂ္ဂရာဒယော ဒိသွာ ‘‘ဣမံ နိဿာယ အမှေဟိ ဇီဝိတံ လဒ္ဓ’’န္တိ ဥပါသကဿ သက္ကာရံ အကံသု။ ဥပါသကောပိ ဣစ္ဆိတဋ္ဌာနံ ဂန္တွာ ကတကိစ္စော ပုန သာဝတ္ထိံ အာဂန္တွာ ဇေတဝနံ ဂန္တွာ တထာဂတံ ပူဇေတွာ ဝန္ဒိတွာ နိသိန္နော ‘‘ကိံ၊ ဥပါသက၊ န ပညာယသီ’’တိ ဝုတ္တေ တမတ္ထံ အာရောစေသိ။ သတ္ထာ ‘‘န ခေါ၊ ဥပါသက၊ တွံယေဝ အနိဒ္ဒါယိတွာ ဇဂ္ဂန္တော ဝိသေသံ လဘိ၊ ပေါရာဏကပဏ္ဍိတာပိ ဇဂ္ဂန္တာ ဝိသေသံ ဂုဏံ လဘိံသူ’’တိ ဝတွာ တေန ယာစိတော အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဗြာဟ္မဏကုလေ နိဗ္ဗတ္တိတွာ ဝယပ္ပတ္တော တက္ကသိလာယံ သဗ္ဗသိပ္ပာနိ ဥဂ္ဂဏှိတွာ ပစ္စာဂန္တွာ အဂါရမဇ္ဈေ ဝသန္တော အပရဘာဂေ နိက္ခမိတွာ ဣသိပဗ္ဗဇ္ဇံ ပဗ္ဗဇိတွာ န စိရဿေဝ ဈာနာဘိညံ နိဗ္ဗတ္တေတွာ ဟိမဝန္တပဒေသေ ဌာနစင်္ကမိရိယာပထော ဟုတွာ ဝသန္တော နိဒ္ဒံ အနုပဂန္တွာ သဗ္ဗရတ္တိံ စင်္ကမတိ။ အထဿ စင်္ကမနကောဋိယံ နိဗ္ဗတ္တရုက္ခဒေဝတာ တုဿိတွာ ရုက္ခဝိဋပေ ဌတွာ ပဉှံ ပုစ္ဆန္တီ ပဌမံ ဂါထမာဟ –

၁၃၅။

‘‘ကောဓ ဇာဂရတံ သုတ္တော၊ ကောဓ သုတ္တေသု ဇာဂရော၊

ကော မမေတံ ဝိဇာနာတိ၊ ကော တံ ပဋိဘဏာတိ မေ’’တိ။

တတ္ထ ကောဓာတိ ကော ဣဓ။ ကော မမေတန္တိ ကော မမ ဧတံ ပဉှံ ဝိဇာနာတိ။ ကော တံ ပဋိဘဏာတိ မေတိ ဧတံ မယာ ပုဋ္ဌံ ပဉှံ မယှံ ကော ပဋိဘဏာတိ၊ ကော ဗျာကရိတုံ သက္ခိဿတီတိ ပုစ္ဆတိ။

ဗောဓိသတ္တော တဿာ ဝစနံ သုတွာ –

၁၃၆။

‘‘အဟံ ဇာဂရတံ သုတ္တော၊ အဟံ သုတ္တေသု ဇာဂရော၊

အဟမေတံ ဝိဇာနာမိ၊ အဟံ ပဋိဘဏာမိ တေ’’တိ။ –

ဣမံ ဂါထံ ဝတွာ ပုန တာယ –

၁၃၇။

‘‘ကထံ ဇာဂရတံ သုတ္တော၊ ကထံ သုတ္တေသု ဇာဂရော၊

ကထံ ဧတံ ဝိဇာနာသိ၊ ကထံ ပဋိဘဏာသိ မေ’’တိ။ –

ဣမံ ဂါထံ ပုဋ္ဌော တမတ္ထံ ဗျာကရောန္တော –

၁၃၈။

‘‘ယေ ဓမ္မံ နပ္ပဇာနန္တိ၊ သံယမောတိ ဒမောတိ စ၊

တေသု သုပ္ပမာနေသု၊ အဟံ ဇဂ္ဂါမိ ဒေဝတေ။

၁၃၉။

‘‘ယေသံ ရာဂေါ စ ဒေါသော စ၊ အဝိဇ္ဇာ စ ဝိရာဇိတာ၊

တေသု ဇာဂရမာနေသု၊ အဟံ သုတ္တောသ္မိ ဒေဝတေ။

၁၄၀။

‘‘ဧဝံ ဇာဂရတံ သုတ္တော၊ ဧဝံ သုတ္တေသု ဇာဂရော၊

ဧဝမေတံ ဝိဇာနာမိ၊ ဧဝံ ပဋိဘဏာမိ တေ’’တိ။ – ဣမာ ဂါထာ အာဟ၊

တတ္ထ ကထံ ဇာဂရတံ သုတ္တောတိ ကထံ တွံ ဇာဂရတံ သတ္တာနံ အန္တရေ သုတ္တော နာမ ဟောသိ။ ဧသ နယော သဗ္ဗတ္ထ။ ယေ ဓမ္မန္တိ ယေ သတ္တာ နဝဝိဓံ လောကုတ္တရဓမ္မံ န ပဇာနန္တိ။ သံယမောတိ ဒမောတိ စာတိ ‘‘အယံ သံယမော၊ အယံ ဒမော’’တိ ဧဝဉ္စ ယေ မဂ္ဂေန အာဂတံ သီလဉ္စေဝ ဣန္ဒြိယသံဝရဉ္စ န ဇာနန္တိ။ ဣန္ဒြိယသံဝရော ဟိ မနစ္ဆဋ္ဌာနံ ဣန္ဒြိယာနံ ဒမနတော ‘‘ဒမော’’တိ ဝုစ္စတိ။ တေသု သုပ္ပမာနေသူတိ တေသု ကိလေသနိဒ္ဒါဝသေန သုပန္တေသု သတ္တေသု အဟံ အပ္ပမာဒဝသေန ဇဂ္ဂါမိ။

‘‘ယေသံ ရာဂေါ စာ’’တိ ဂါထာယ ယေသံ မဟာခီဏာသဝါနံ ပဒသတေန နိဒ္ဒိဋ္ဌဒိယဍ္ဎသဟဿတဏှာလောဘသင်္ခါတော ရာဂေါ စ နဝအာဃာတဝတ္ထုသမုဋ္ဌာနော ဒေါသော စ ဒုက္ခာဒီသု အဋ္ဌသု ဝတ္ထူသု အညာဏဘူတာ အဝိဇ္ဇာ စာတိ ဣမေ ကိလေသာ ဝိရာဇိတာ ပဟီနာ၊ တေသု အရိယေသု သဗ္ဗာကာရေန ဇာဂရမာနေသု တေ ဥပါဒါယ အဟံ သုတ္တော နာမ ဒေဝတေတိ အတ္ထော။ ဧဝံ ဇာဂရတန္တိ ဧဝံ ဒေဝတေ အဟံ ဣမိနာ ကာရဏေန ဇာဂရတံ သုတ္တော နာမာတိ။ ဧသ နယော သဗ္ဗပဒေသု။

ဧဝံ မဟာသတ္တေန ပဉှေ ကထိတေ တုဋ္ဌာ ဒေဝတာ တဿ ထုတိံ ကရောန္တီ ဩသာနဂါထမာဟ –

၁၄၁။

‘‘သာဓု ဇာဂရတံ သုတ္တော၊ သာဓု သုတ္တေသု ဇာဂရော၊

သာဓု မေတံ ဝိဇာနာသိ၊ သာဓု ပဋိဘဏာသိ မေ’’တိ။

တတ္ထ သာဓူတိ ဘဒ္ဒကံ ကတွာ တွံ ဣမံ ပဉှံ ကထေသိ၊ မယမ္ပိ နံ ဧဝမေဝ ကထေမာတိ။ ဧဝံ သာ ဗောဓိသတ္တဿ ထုတိံ ကတွာ အတ္တနော ဝိမာနမေဝ ပါဝိသိ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဒေဝဓီတာ ဥပ္ပလဝဏ္ဏာ အဟောသိ၊ တာပသော ပန အဟမေဝ အဟောသိ’’န္တိ။

ဇာဂရဇာတကဝဏ္ဏနာ နဝမာ။

[၄၁၅] ၁၀။ ကုမ္မာသပိဏ္ဍိဇာတကဝဏ္ဏနာ

န ကိရတ္ထီတိ ဣဒံ သတ္ထာ ဇေတဝနေ ဝိဟရန္တော မလ္လိကံ ဒေဝိံ အာရဗ္ဘ ကထေသိ။ သာ ဟိ သာဝတ္ထိယံ ဧကဿ မာလာကာရဇေဋ္ဌကဿ ဓီတာ ဥတ္တမရူပဓရာ မဟာပုညာ သောဠသဝဿိကကာလေ ဧကဒိဝသံ ကုမာရိကာဟိ သဒ္ဓိံ ပုပ္ဖာရာမံ ဂစ္ဆန္တီ တယော ကုမ္မာသပိဏ္ဍေ ဂဟေတွာ ပုပ္ဖပစ္ဆိယံ ဌပေတွာ ဂစ္ဆတိ။ သာ နဂရတော နိက္ခမနကာလေ ဘဂဝန္တံ သရီရပ္ပဘံ ဝိဿဇ္ဇေတွာ ဘိက္ခုသင်္ဃပရိဝုတံ နဂရံ ပဝိသန္တံ ဒိသွာ တယော ကုမ္မာသပိဏ္ဍေ ဥပနာမေသိ။ သတ္ထာ စတုမဟာရာဇဒတ္တိယံ ပတ္တံ ဥပနေတွာ ပဋိဂ္ဂဟေသိ။ သာပိ တထာဂတဿ ပါဒေ သိရသာ ဝန္ဒိတွာ ဗုဒ္ဓါရမ္မဏံ ပီတိံ ဂဟေတွာ ဧကမန္တံ အဋ္ဌာသိ။ သတ္ထာ တံ ဩလောကေတွာ သိတံ ပါတွာကာသိ။ အာယသ္မာ အာနန္ဒော ‘‘ကော နု ခေါ၊ ဘန္တေ၊ ဟေတု ကော ပစ္စယော တထာဂတဿ သိတကရဏေ’’တိ ဘဂဝန္တံ ပုစ္ဆိ။ အထဿ သတ္ထာ ‘‘အာနန္ဒ၊ အယံ ကုမာရိကာ ဣမေသံ ကုမ္မာသပိဏ္ဍာနံ ဖလေန အဇ္ဇေဝ ကောသလရညော အဂ္ဂမဟေသီ ဘဝိဿတီ’’တိ သိတကာရဏံ ကထေသိ။

ကုမာရိကာပိ ပုပ္ဖာရာမံ ဂတာ ။ တံ ဒိဝသမေဝ ကောသလရာဇာ အဇာတသတ္တုနာ သဒ္ဓိံ ယုဇ္ဈန္တော ယုဒ္ဓပရာဇိတော ပလာယိတွာ အဿံ အဘိရုယှ အာဂစ္ဆန္တော တဿာ ဂီတသဒ္ဒံ သုတွာ ပဋိဗဒ္ဓစိတ္တော အဿံ တံ အာရာမာဘိမုခံ ပေသေသိ။ ပုညသမ္ပန္နာ ကုမာရိကာ ရာဇာနံ ဒိသွာ အပလာယိတွာဝ အာဂန္တွာ အဿဿ နာသရဇ္ဇုယာ ဂဏှိ၊ ရာဇာ အဿပိဋ္ဌိယံ နိသိန္နောဝ ‘‘သသာမိကာသိ၊ အသာမိကာသီ’’တိ ပုစ္ဆိတွာ အသာမိကဘာဝံ ဉတွာ အဿာ ဩရုယှ ဝါတာတပကိလန္တော တဿာ အင်္ကေ နိပန္နော မုဟုတ္တံ ဝိဿမိတွာ တံ အဿပိဋ္ဌိယံ နိသီဒါပေတွာ ဗလကာယပရိဝုတော နဂရံ ပဝိသိတွာ အတ္တနော ကုလဃရံ ပေသေတွာ သာယနှသမယေ ယာနံ ပဟိဏိတွာ မဟန္တေန သက္ကာရသမ္မာနေန ကုလဃရတော အာဟရာပေတွာ ရတနရာသိမှိ ဌပေတွာ အဘိသေကံ ဒတွာ အဂ္ဂမဟေသိံ အကာသိ။ တတော ပဋ္ဌာယ စ သာ ရညော ပိယာ အဟောသိ မနာပါ၊ ပုဗ္ဗုဋ္ဌာယိကာဒီဟိ ပဉ္စဟိ ကလျာဏဓမ္မေဟိ သမန္နာဂတာ ပတိဒေဝတာ၊ ဗုဒ္ဓါနမ္ပိ ဝလ္လဘာ အဟောသိ။ တဿာ သတ္ထု တယော ကုမ္မာသပိဏ္ဍေ ဒတွာ တံ သမ္ပတ္တိံ အဓိဂတဘာဝေါ သကလနဂရံ ပတ္ထရိတွာ ဂတော။

အထေကဒိဝသံ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ မလ္လိကာ ဒေဝီ ဗုဒ္ဓါနံ တယော ကုမ္မာသပိဏ္ဍေ ဒတွာ တေသံ ဖလေန တံ ဒိဝသညေဝ အဘိသေကံ ပတ္တာ၊ အဟော ဗုဒ္ဓါနံ မဟာဂုဏတာ’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘အနစ္ဆရိယံ၊ ဘိက္ခဝေ၊ မလ္လိကာယ ဧကဿ သဗ္ဗညုဗုဒ္ဓဿ တယော ကုမ္မာသပိဏ္ဍေ ဒတွာ ကောသလရညော အဂ္ဂမဟေသိဘာဝါဓိဂမော။ ကသ္မာ? ဗုဒ္ဓါနံ ဂုဏမဟန္တတာယ။ ပေါရာဏကပဏ္ဍိတာ ပန ပစ္စေကဗုဒ္ဓါနံ အလောဏကံ အသ္နေဟံ အဖာဏိတံ ကုမ္မာသံ ဒတွာ တဿ ဖလေန ဒုတိယေ အတ္တဘာဝေ တိယောဇနသတိကေ ကာသိရဋ္ဌေ ရဇ္ဇသိရိံ ပါပုဏိံသူ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော ဧကသ္မိံ ဒလိဒ္ဒကုလေ နိဗ္ဗတ္တိတွာ ဝယပ္ပတ္တော ဧကံ သေဋ္ဌိံ နိဿာယ ဘတိယာ ကမ္မံ ကရောန္တော ဇီဝိကံ ကပ္ပေသိ။ သော ဧကဒိဝသံ ‘‘ပါတရာသတ္ထာယ မေ ဘဝိဿတီ’’တိ အန္တရာပဏတော စတ္တာရော ကုမ္မာသပိဏ္ဍေ ဂဟေတွာ ကမ္မန္တံ ဂစ္ဆန္တော စတ္တာရော ပစ္စေကဗုဒ္ဓေ ဘိက္ခာစာရတ္ထာယ ဗာရာဏသိနဂရာဘိမုခေ အာဂစ္ဆန္တေ ဒိသွာ ‘‘ဣမေ ဘိက္ခံ သန္ဓာယ ဗာရာဏသိံ ဂစ္ဆန္တိ ၊ မယှမ္ပိမေ စတ္တာရော ကုမ္မာသပိဏ္ဍာ အတ္ထိ၊ ယံနူနာဟံ ဣမေ ဣမေသံ ဒဒေယျ’’န္တိ စိန္တေတွာ တေ ဥပသံကမိတွာ ဝန္ဒိတွာ ‘‘ဘန္တေ၊ ဣမေ မေ ဟတ္ထေ စတ္တာရော ကုမ္မာသပိဏ္ဍာ၊ အဟံ ဣမေ တုမှာကံ ဒဒါမိ၊ သာဓု မေ၊ ဘန္တေ၊ ပဋိဂ္ဂဏှထ၊ ဧဝမိဒံ ပုညံ မယှံ ဘဝိဿတိ ဒီဃရတ္တံ ဟိတာယ သုခါယာ’’တိ ဝတွာ တေသံ အဓိဝါသနံ ဝိဒိတွာ ဝါလိကံ ဥဿာပေတွာ စတ္တာရိ အာသနာနိ ပညပေတွာ တေသံ ဥပရိ သာခါဘင်္ဂံ အတ္ထရိတွာ ပစ္စေကဗုဒ္ဓေ ပဋိပါဋိယာ နိသီဒါပေတွာ ပဏ္ဏပုဋေန ဥဒကံ အာဟရိတွာ ဒက္ခိဏောဒကံ ပါတေတွာ စတူသု ပတ္တေသု စတ္တာရော ကုမ္မာသပိဏ္ဍေ ပတိဋ္ဌာပေတွာ ဝန္ဒိတွာ ‘‘ဘန္တေ၊ ဧတေသံ နိဿန္ဒေန ဒလိဒ္ဒဂေဟေ နိဗ္ဗတ္တိ နာမ မာ ဟောတု၊ သဗ္ဗညုတညာဏပ္ပဋိဝေဓဿ ပစ္စယော ဟောတူ’’တိ အာဟ။ ပစ္စေကဗုဒ္ဓါ ပရိဘုဉ္ဇိံသု၊ ပရိဘောဂါဝသာနေ အနုမောဒနံ ကတွာ ဥပ္ပတိတွာ နန္ဒမူလကပဗ္ဘာရမေဝ အဂမံသု။

ဗောဓိသတ္တော အဉ္ဇလိံ ပဂ္ဂယှ ပစ္စေကဗုဒ္ဓဂတံ ပီတိံ ဂဟေတွာ တေသု စက္ခုပထံ အတီတေသု အတ္တနော ကမ္မန္တံ ဂန္တွာ ယာဝတာယုကံ ဒါနံ အနုဿရိတွာ ကာလံ ကတွာ တဿ ဖလေန ဗာရာဏသိရညော အဂ္ဂမဟေသိယာ ကုစ္ဆိမှိ နိဗ္ဗတ္တိ၊ ဗြဟ္မဒတ္တကုမာရောတိဿ နာမံ အကံသု။ သော အတ္တနော ပဒသာ ဂမနကာလတော ပဋ္ဌာယ ‘‘အဟံ ဣမသ္မိံယေဝ နဂရေ ဘတကော ဟုတွာ ကမ္မန္တံ ဂစ္ဆန္တော ပစ္စေကဗုဒ္ဓါနံ စတ္တာရော ကုမ္မာသပိဏ္ဍေ ဒတွာ တဿ ဒါနဿ ဖလေန ဣဓ နိဗ္ဗတ္တော’’တိ ပသန္နာဒါသေ မုခနိမိတ္တံ ဝိယ သဗ္ဗံ ပုရိမဇာတိကိရိယံ ဇာတိဿရဉာဏေန ပါကဋံ ကတွာ ပဿိ။ သော ဝယပ္ပတ္တော တက္ကသိလာယံ ဂန္တွာ သဗ္ဗသိပ္ပာနိ ဥဂ္ဂဏှိတွာ ပစ္စာဂန္တွာ သိက္ခိတသိပ္ပံ ပိတု ဒဿေတွာ တုဋ္ဌေန ပိတရာ ဩပရဇ္ဇေ ပတိဋ္ဌာပိတော၊ အပရဘာဂေ ပိတု အစ္စယေန ရဇ္ဇေ ပတိဋ္ဌာသိ။ အထဿ ဥတ္တမရူပဓရံ ကောသလရညော ဓီတရံ အာနေတွာ အဂ္ဂမဟေသိံ အကံသု၊ ဆတ္တမင်္ဂလဒိဝသေ ပနဿ သကလနဂရံ ဒေဝနဂရံ ဝိယ အလင်္ကရိံသု။

သော နဂရံ ပဒက္ခိဏံ ကတွာ အလင်္ကတပါသာဒံ အဘိရုဟိတွာ မဟာတလမဇ္ဈေ သမုဿိတသေတစ္ဆတ္တံ ပလ္လင်္ကံ အဘိရုယှ နိသိန္နော ပရိဝါရေတွာ ဌိတေ ဧကတော အမစ္စေ၊ ဧကတော ဗြာဟ္မဏဂဟပတိအာဒယော နာနာဝိဘဝေ သိရိဝိလာသသမုဇ္ဇလေ၊ ဧကတော နာနာဝိဓပဏ္ဏာကာရဟတ္ထေ နာဂရမနုဿေ၊ ဧကတော အလင်္ကတဒေဝစ္ဆရသင်္ဃံ ဝိယ သောဠသသဟဿသင်္ခံ နာဋကိတ္ထိဂဏန္တိ ဣမံ အတိမနောရမံ သိရိဝိဘဝံ ဩလောကေန္တော အတ္တနော ပုဗ္ဗကမ္မံ အနုဿရိတွာ ‘‘ဣဒံ သုဝဏ္ဏပိဏ္ဍိကံ ကဉ္စနမာလံ သေတစ္ဆတ္တံ၊ ဣမာနိ စ အနေကသဟဿာနိ ဟတ္ထိဝါဟနအဿဝါဟနရထဝါဟနာနိ၊ မဏိမုတ္တာဒိပူရိတာ သာရဂဗ္ဘာ၊ နာနာဝိဓဓညပူရိတာ မဟာပထဝီ၊ ဒေဝစ္ဆရပဋိဘာဂါ နာရိယော စာတိ သဗ္ဗောပေသ မယှံ သိရိဝိဘဝေါ န အညဿ သန္တကော၊ စတုန္နံ ပစ္စေကဗုဒ္ဓါနံ ဒိန္နဿ စတုကုမ္မာသပိဏ္ဍဒါနဿေဝ သန္တကော၊ တေ နိဿာယ မယာ ဧသ လဒ္ဓါ’’တိ ပစ္စေကဗုဒ္ဓါနံ ဂုဏံ အနုဿရိတွာ အတ္တနော ကမ္မံ ပါကဋံ အကာသိ။ တဿ တံ အနုဿရန္တဿ သကလသရီရံ ပီတိယာ ပူရိ။ သော ပီတိယာ တေမိတဟဒယော မဟာဇနဿ မဇ္ဈေ ဥဒါနဂီတံ ဂါယန္တော ဒွေ ဂါထာ အဘာသိ –

၁၄၂။

‘‘န ကိရတ္ထိ အနောမဒဿိသု၊ ပါရိစရိယာ ဗုဒ္ဓေသု အပ္ပိကာ၊

သုက္ခာယ အလောဏိကာယ စ၊ ပဿ ဖလံ ကုမ္မာသပိဏ္ဍိယာ။

၁၄၃။

‘‘ဟတ္ထိဂဝါဿာ စိမေ ဗဟူ၊ ဓနဓညံ ပထဝီ စ ကေဝလာ၊

နာရိယော စိမာ အစ္ဆရူပမာ၊ ပဿ ဖလံ ကုမ္မာသပိဏ္ဍိယာ’’တိ။

တတ္ထ အနောမဒဿိသူတိ အနောမဿ အလာမကဿ ပစ္စေကဗောဓိဉာဏဿ ဒိဋ္ဌတ္တာ ပစ္စေကဗုဒ္ဓါ အနောမဒဿိနော နာမ။ ပါရိစရိယာတိ အဘိဝါဒနပစ္စုဋ္ဌာနဉ္ဇလိကမ္မာဒိဘေဒါ သာမီစိကိရိယာပိ၊ သမ္ပတ္တေ ဒိသွာ အတ္တနော သန္တကံ အပ္ပံ ဝါ ဗဟုံ ဝါ လူခံ ဝါ ပဏီတံ ဝါ ဒေယျဓမ္မံ စိတ္တံ ပသာဒေတွာ ဂုဏံ သလ္လက္ခေတွာ တိဿော စေတနာ ဝိသောဓေတွာ ဖလံ သဒ္ဒဟိတွာ ပရိစ္စဇနကိရိယာပိ ။ ဗုဒ္ဓေသူတိ ပစ္စေကဗုဒ္ဓေသု။ အပ္ပိကာတိ မန္ဒာ ပရိတ္တာ နာမ နတ္ထိ ကိရ။ သုက္ခာယာတိ နိသ္နေဟာယ။ အလောဏိကာယာတိ ဖာဏိတဝိရဟိတာယ။ နိပ္ဖာဏိတတ္တာ ဟိ သာ ‘‘အလောဏိကာ’’တိ ဝုတ္တာ။ ကုမ္မာသပိဏ္ဍိယာတိ စတ္တာရော ကုမ္မာသပိဏ္ဍေ ဧကတော ကတွာ ဂဟိတံ ကုမ္မာသံ သန္ဓာယ ဧဝမာဟ။ ဂုဏဝန္တာနံ သမဏဗြာဟ္မဏာနံ ဂုဏံ သလ္လက္ခေတွာ စိတ္တံ ပသာဒေတွာ ဖလုပ္ပတ္တိံ ပါဋိကင်္ခမာနာနံ တိဿော စေတနာ ဝိသောဓေတွာ ဒိန္နပဒက္ခိဏာ အပ္ပိကာ နာမ နတ္ထိ၊ နိဗ္ဗတ္တနိဗ္ဗတ္တဋ္ဌာနေ မဟာသမ္ပတ္တိမေဝ ဒေတီတိ ဝုတ္တံ ဟောတိ။ ဟောတိ စေတ္ထ –

‘‘နတ္ထိ စိတ္တေ ပသန္နမှိ၊ အပ္ပိကာ နာမ ဒက္ခိဏာ၊

တထာဂတေ ဝါ သမ္ဗုဒ္ဓေ၊ အထ ဝါ တဿ သာဝကေ။

‘‘တိဋ္ဌန္တေ နိဗ္ဗုတေ စာပိ၊ သမေ စိတ္တေ သမံ ဖလံ၊

စေတောပဏိဓိဟေတု ဟိ၊ သတ္တာ ဂစ္ဆန္တိ သုဂ္ဂတိ’’န္တိ။ (ဝိ။ ဝ။ ၈၀၄၊ ၈၀၆)၊

ဣမဿ ပနတ္ထဿ ဒီပနတ္ထာယ –

‘‘ခီရောဒနံ အဟမဒါသိံ၊ ဘိက္ခုနော ပိဏ္ဍာယ စရန္တဿ၊ (ဝိ။ ဝ။ ၄၁၃)၊

တဿာ မေ ပဿ ဝိမာနံ၊ အစ္ဆရာ ကာမဝဏ္ဏိနီဟမသ္မိ။ (ဝိ။ ဝ။ ၃၃၄)၊

‘‘အစ္ဆရာသဟဿဿာဟံ ၊ ပဝရာ ပဿ ပုညာနံ ဝိပါကံ၊

တေန မေတာဒိသော ဝဏ္ဏော၊ တေန မေ ဣဓ မိဇ္ဈတိ။

‘‘ဥပ္ပဇ္ဇန္တိ စ မေ ဘောဂါ၊ ယေ ကေစိ မနသော ပိယာ၊

တေနမှိ ဧဝံ ဇလိတာနုဘာဝါ၊ ဝဏ္ဏော စ မေ သဗ္ဗဒိသာ ပဘာသတီ’’တိ။ (ဝိ။ ဝ။ ၃၃၄-၃၃၆) –

ဧဝမာဒီနိ ဝိမာနဝတ္ထူနိ အာဟရိတဗ္ဗာနိ။

ဓနဓညန္တိ မုတ္တာဒိဓနဉ္စ သတ္တ ဓညာနိ စ။ ပထဝီ စ ကေဝလာတိ သကလာ စေသာ မဟာပထဝီတိ သကလပထဝိံ ဟတ္ထဂတံ မညမာနော ဝဒတိ။ ပဿ ဖလံ ကုမ္မာသပိဏ္ဍိယာတိ အတ္တနော ဒါနဖလံ အတ္တနာဝ ဒဿေန္တော ဧဝမာဟ။ ဒါနဖလံ ကိရ ဗောဓိသတ္တာ စ သဗ္ဗညုဗုဒ္ဓါယေဝ စ ဇာနန္တိ။ တေနေဝ သတ္ထာ ဣတိဝုတ္တကေ သုတ္တန္တံ ကထေန္တော –

‘‘ဧဝဉ္စေ၊ ဘိက္ခဝေ၊ သတ္တာ ဇာနေယျုံ ဒါနသံဝိဘာဂဿ ဝိပါကံ၊ ယထာဟံ ဇာနာမိ၊ န အဒတွာ ဘုဉ္ဇေယျုံ၊ န စ နေသံ မစ္ဆေရမလံ စိတ္တံ ပရိယာဒါယ တိဋ္ဌေယျ။ ယောပိ နေသံ အဿ စရိမော အာလောပေါ စရိမံ ကဗဠံ၊ တတောပိ န အသံဝိဘဇိတွာ ဘုဉ္ဇေယျုံ၊ သစေ နေသံ ပဋိဂ္ဂါဟကာ အဿု။ ယသ္မာ စ ခေါ၊ ဘိက္ခဝေ၊ သတ္တာ န ဧဝံ ဇာနန္တိ ဒါနသံဝိဘာဂဿ ဝိပါကံ၊ ယထာဟံ ဇာနာမိ၊ တသ္မာ အဒတွာ ဘုဉ္ဇန္တိ၊ မစ္ဆေရမလဉ္စ နေသံ စိတ္တံ ပရိယာဒါယ တိဋ္ဌတီ’’တိ (ဣတိဝု။ ၂၆)။

ဗောဓိသတ္တောပိ အတ္တနော ဆတ္တမင်္ဂလဒိဝသေ သဉ္ဇာတပီတိပါမောဇ္ဇော ဣမာဟိ ဒွီဟိ ဂါထာဟိ ဥဒါနဂီတံ ဂါယိ။ တတော ပဋ္ဌာယ ‘‘ရညော ပိယဂီတ’’န္တိ ဗောဓိသတ္တဿ နာဋကိတ္ထိယော စ သေသနာဋကဂန္ဓဗ္ဗာဒယောပိ စ အန္တေပုရဇနောပိ အန္တောနဂရဝါသိနောပိ ဗဟိနဂရဝါသိနောပိ ပါနာဂါရေသုပိ အမစ္စမဏ္ဍလေသုပိ ‘‘အမှာကံ ရညော ပိယဂီတ’’န္တိ တဒေဝ ဂီတံ ဂါယန္တိ။ ဧဝံ အဒ္ဓါနေ ဂတေ အဂ္ဂမဟေသီ တဿ ဂီတဿ အတ္ထံ ဇာနိတုကာမာ အဟောသိ၊ မဟာသတ္တံ ပန ပုစ္ဆိတုံ န ဝိသဟတိ။ အထဿာ ဧကသ္မိံ ဂုဏေ ပသီဒိတွာ ဧကဒိဝသံ ရာဇာ ‘‘ဘဒ္ဒေ၊ ဝရံ တေ ဒဿာမိ၊ ဝရံ ဂဏှာဟီ’’တိ အာဟ။ ‘‘သာဓု၊ ဒေဝ၊ ဂဏှာမီ’’တိ။ ‘‘ဟတ္ထိအဿာဒီသု တေ ကိံ ဒမ္မီ’’တိ? ‘‘ဒေဝ၊ တုမှေ နိဿာယ မယှံ န ကိဉ္စိ နတ္ထိ၊ န မေ ဧတေဟိ အတ္ထော၊ သစေ ပန ဒါတုကာမာတ္ထ၊ တုမှာကံ ဂီတဿ အတ္ထံ ကထေတွာ ဒေထာ’’တိ။ ‘‘ဘဒ္ဒေ၊ ကော တေ ဣမိနာ ဝရေန အတ္ထော၊ အညံ ဂဏှာဟီ’’တိ။ ‘‘ဒေဝ၊ အညေန မေ အတ္ထော နတ္ထိ၊ ဧတဒေဝ ဂဏှာမီ’’တိ။ ‘‘သာဓု ဘဒ္ဒေ၊ ကထေဿာမိ၊ တုယှံ ပန ဧကိကာယ ရဟော န ကထေဿာမိ၊ ဒွါဒသယောဇနိကာယ ဗာရာဏသိယာ ဘေရိံ စရာပေတွာ ရာဇဒွါရေ ရတနမဏ္ဍပံ ကာရေတွာ ရတနပလ္လင်္ကံ ပညာပေတွာ အမစ္စဗြာဟ္မဏာဒီဟိ စ နာဂရေဟိ စေဝ သောဠသဟိ ဣတ္ထိသဟဿေဟိ စ ပရိဝုတော တေသံ မဇ္ဈေ ရတနပလ္လင်္ကေ နိသီဒိတွာ ကထေဿာမီ’’တိ။ သာ ‘‘သာဓု၊ ဒေဝါ’’တိ သမ္ပဋိစ္ဆိ။

ရာဇာ တထာ ကာရေတွာ အမရဂဏပရိဝုတော သက္ကော ဒေဝရာဇာ ဝိယ မဟာဇနကာယပရိဝုတော ရတနပလ္လင်္ကေ နိသီဒိ။ ဒေဝီပိ သဗ္ဗာလင်္ကာရပဋိမဏ္ဍိတာ ကဉ္စနဘဒ္ဒပီဌံ အတ္ထရိတွာ ဧကမန္တေ အက္ခိကောဋိယာ ဩလောကေတွာ တထာရူပေ ဌာနေ နိသီဒိတွာ ‘‘ဒေဝ၊ တုမှာကံ တုဿိတွာ ဂါယနမင်္ဂလဂီတဿ တာဝ မေ အတ္ထံ ဂဂနတလေ ပုဏ္ဏစန္ဒံ ဥဋ္ဌာပေန္တော ဝိယ ပါကဋံ ကတွာ ကထေထာ’’တိ ဝတွာ တတိယံ ဂါထမာဟ –

၁၄၄။

‘‘အဘိက္ခဏံ ရာဇကုဉ္ဇရ၊ ဂါထာ ဘာသသိ ကောသလာဓိပ၊

ပုစ္ဆာမိ တံ ရဋ္ဌဝဍ္ဎန၊ ဗာဠှံ ပီတိမနော ပဘာသသီ’’တိ။

တတ္ထ ကောသလာဓိပါတိ န သော ကောသလရဋ္ဌာဓိပေါ၊ ကုသလေ ပန ဓမ္မေ အဓိပတိံ ကတွာ ဝိဟရတိ၊ တေန နံ အာလပန္တီ ဧဝမာဟ၊ ကုသလာဓိပ ကုသလဇ္ဈာသယာတိ အတ္ထော။ ဗာဠှံ ပီတိမနော ပဘာသသီတိ အတိဝိယ ပီတိယုတ္တစိတ္တော ဟုတွာ ဘာသသိ၊ တသ္မာ ကထေထ တာဝ မေ ဧတာသံ ဂါထာနံ အတ္ထန္တိ။

အထဿ ဂါထာနမတ္ထံ အာဝိ ကရောန္တော မဟာသတ္တော စတဿော ဂါထာ အဘာသိ –

၁၄၅။

‘‘ဣမသ္မိံယေဝ နဂရေ၊ ကုလေ အညတရေ အဟုံ၊

ပရကမ္မကရော အာသိံ၊ ဘတကော သီလသံဝုတော။

၁၄၆။

‘‘ကမ္မာယ နိက္ခမန္တောဟံ၊ စတုရော သမဏေဒ္ဒသံ၊

အာစာရသီလသမ္ပန္နေ၊ သီတိဘူတေ အနာသဝေ။

၁၄၇။

‘‘တေသု စိတ္တံ ပသာဒေတွာ၊ နိသီဒေတွာ ပဏ္ဏသန္ထတေ၊

အဒံ ဗုဒ္ဓါနံ ကုမ္မာသံ၊ ပသန္နော သေဟိ ပါဏိဘိ။

၁၄၈။

‘‘တဿ ကမ္မဿ ကုသလဿ၊ ဣဒံ မေ ဧဒိသံ ဖလံ၊

အနုဘောမိ ဣဒံ ရဇ္ဇံ၊ ဖီတံ ဓရဏိမုတ္တမ’’န္တိ။

တတ္ထ ကုလေ အညတရေတိ နာမေန ဝါ ဂေါတ္တေန ဝါ အပါကဋေ ဧကသ္မိံယေဝ ကုလေ။ အဟုန္တိ နိဗ္ဗတ္တိံ။ ပရကမ္မကရော အာသိန္တိ တသ္မိံ ကုလေ ဇာတောဝါဟံ ဒလိဒ္ဒတာယ ပရဿ ကမ္မံ ကတွာ ဇီဝိကံ ကပ္ပေန္တော ပရကမ္မကရော အာသိံ။ ဘတကောတိ ပရဝေတနဘတော။ သီလသံဝုတောတိ ပဉ္စသီလသံဝရေ ဌိတော၊ ဘတိယာ ဇီဝန္တောပိ ဒုဿီလျံ ပဟာယ သီလသမ္ပန္နောဝ အဟောသိန္တိ ဒီပေတိ။ ကမ္မာယ နိက္ခမန္တောဟန္တိ တံ ဒိဝသံ ကတ္တဗ္ဗကိစ္စဿ ကရဏတ္ထာယ နိက္ခန္တော အဟံ။ စတုရော သမဏေဒ္ဒသန္တိ ဘဒ္ဒေ၊ အဟံ နဂရာ နိက္ခမ္မ မဟာမဂ္ဂံ အာရုယှ အတ္တနော ကမ္မဘူမိံ ဂစ္ဆန္တော ဘိက္ခာယ ဗာရာဏသိနဂရံ ပဝိသန္တေ သမိတပါပေ စတ္တာရော ပဗ္ဗဇိတေ အဒ္ဒသံ။ အာစာရသီလသမ္ပန္နေတိ ဧကဝီသတိယာ အနေသနာဟိ ဇီဝိကကပ္ပနံ အနာစာရော နာမ၊ တဿ ပဋိပက္ခေန အာစာရေန စေဝ မဂ္ဂဖလေဟိ အာဂတေန သီလေန စ သမန္နာဂတေ။ သီတိဘူတေတိ ရာဂါဒိပရိဠာဟဝူပသမေန စေဝ ဧကာဒသအဂ္ဂိနိဗ္ဗာပနေန စ သီတိဘာဝပ္ပတ္တေ။ အနာသဝေတိ ကာမာသဝါဒိဝိရဟိတေ။ နိသီဒေတွာတိ ဝါလိကာသနာနံ ဥပရိ သန္ထတေ ပဏ္ဏသန္ထရေ နိသီဒါပေတွာ။ သန္ထရော ဟိ ဣဓ သန္ထတောတိ ဝုတ္တော။ အဒန္တိ နေသံ ဥဒကံ ဒတွာ သက္ကစ္စံ သကေဟိ ဟတ္ထေဟိ ကုမ္မာသံ အဒါသိံ။ ကုသလဿာတိ အာရောဂျာနဝဇ္ဇဋ္ဌေန ကုသလဿ။ ဖလန္တိ တဿ နိဿန္ဒဖလံ။ ဖီတန္တိ သဗ္ဗသမ္ပတ္တိဖုလ္လိတံ။

ဧဝဉ္စ မဟာသတ္တဿ အတ္တနော ကမ္မဖလံ ဝိတ္ထာရေတွာ ကထေန္တဿ သုတွာ ဒေဝီ ပသန္နမနာ ‘‘သစေ၊ မဟာရာဇ၊ ဧဝံ ပစ္စက္ခတော ဒါနဖလံ ဇာနာထ၊ ဣတော ဒါနိ ပဋ္ဌာယ ဧကံ ဘတ္တပိဏ္ဍံ လဘိတွာ ဓမ္မိကသမဏဗြာဟ္မဏာနံ ဒတွာဝ ပရိဘုဉ္ဇေယျာထာ’’တိ ဗောဓိသတ္တဿ ထုတိံ ကရောန္တီ –

၁၄၉။

‘‘ဒဒံ ဘုဉ္ဇ မာ စ ပမာဒေါ၊ စက္ကံ ဝတ္တယ ကောသလာဓိပ၊

မာ ရာဇ အဓမ္မိကော အဟု၊ ဓမ္မံ ပါလယ ကောသလာဓိပါ’’တိ။ – ဣမံ ဂါထမာဟ၊

တတ္ထ ဒဒံ ဘုဉ္ဇာတိ အညေသံ ဒတွာဝ အတ္တနာ ဘုဉ္ဇ။ မာ စ ပမာဒေါတိ ဒါနာဒီသု ပုညေသု မာ ပမဇ္ဇိ။ စက္ကံ ဝတ္တယ ကောသလာဓိပါတိ ကုသလဇ္ဈာသယ၊ မဟာရာဇ၊ ပတိရူပဒေသဝါသာဒိကံ စတုဗ္ဗိဓံ ဓမ္မစက္ကံ ပဝတ္တေဟိ။ ပကတိရထော ဟိ ဒွီဟိ စက္ကေဟိ ဂစ္ဆတိ၊ အယံ ပန ကာယော ဣမေဟိ စတူဟိ စက္ကေဟိ ဒေဝလောကံ ဂစ္ဆတိ၊ တေန တေ ‘‘ဓမ္မစက္က’’န္တိ သင်္ချံ ဂတာ၊ တံ တွံ စက္ကံ ပဝတ္တေဟိ။ အဓမ္မိကောတိ ယထာ အညေ ဆန္ဒာဂတိံ ဂစ္ဆန္တာ လောကံ ဥစ္ဆုယန္တေ ပီဠေတွာ ဝိယ ဓနမေဝ သံကဍ္ဎန္တာ အဓမ္မိကာ ဟောန္တိ၊ တထာ တွံ မာ အဓမ္မိကော အဟု။ ဓမ္မံ ပါလယာတိ –

‘‘ဒါနံ သီလံ ပရိစ္စာဂံ၊ အဇ္ဇဝံ မဒ္ဒဝံ တပံ၊

အက္ကောဓံ အဝိဟိံသဉ္စ၊ ခန္တိဉ္စ အဝိရောဓန’’န္တိ။ (ဇာ။ ၂။၂၁။၁၇၆) –

ဣမံ ပန ဒသဝိဓံ ရာဇဓမ္မမေဝ ပါလယ ရက္ခ၊ မာ ပရိစ္စဇိ။

မဟာသတ္တော တဿာ ဝစနံ သမ္ပဋိစ္ဆန္တော –

၁၅၀။

‘‘သောဟံ တဒေဝ ပုနပ္ပုနံ၊ ဝဋုမံ အာစရိဿာမိ သောဘနေ၊

အရိယာစရိတံ သုကောသလေ၊ အရဟန္တော မေ မနာပါဝ ပဿိတု’’န္တိ။ – ဂါထမာဟ၊

တတ္ထ ဝဋုမန္တိ မဂ္ဂံ။ အရိယာစရိတန္တိ အရိယေဟိ ဗုဒ္ဓါဒီဟိ အာစိဏ္ဏံ။ သုကောသလေတိ သောဘနေ ကောသလရညော ဓီတေတိ အတ္ထော။ အရဟန္တောတိ ကိလေသေဟိ အာရကတ္တာ၊ အရာနဉ္စ အရီနဉ္စ ဟတတ္တာ၊ ပစ္စယာနံ အရဟတ္တာ ဧဝံလဒ္ဓနာမာ ပစ္စေကဗုဒ္ဓါ။ ဣဒံ ဝုတ္တံ ဟောတိ – ဘဒ္ဒေ၊ ကောသလရာဇဓီတေ သော အဟံ ‘‘ဒါနံ မေ ဒိန္န’’န္တိ တိတ္တိံ အကတွာ ပုနပ္ပုနံ တဒေဝ အရိယာစရိတံ ဒါနမဂ္ဂံ အာစရိဿာမိ။ မယှဉှိ အဂ္ဂဒက္ခိဏေယျတ္တာ အရဟန္တော မနာပဒဿနာ၊ စီဝရာဒီနိ ဒါတုကာမတာယ တေယေဝ ပဿိတုံ ဣစ္ဆာမီတိ။

ဧဝဉ္စ ပန ဝတွာ ရာဇာ ဒေဝိယာ သမ္ပတ္တိံ ဩလောကေတွာ ‘‘ဘဒ္ဒေ၊ မယာ တာဝ ပုရိမဘဝေ အတ္တနော ကုသလကမ္မံ ဝိတ္ထာရေတွာ ကထိတံ၊ ဣမာသံ ပန နာရီနံ မဇ္ဈေ ရူပေန ဝါ လီဠာဝိလာသေန ဝါ တယာ သဒိသီ ဧကာပိ နတ္ထိ၊ သာ တွံ ကိံ ကမ္မံ ကတွာ ဣမံ သမ္ပတ္တိံ ပဋိလဘီ’’တိ ပုစ္ဆန္တော ပုန ဂါထမာဟ –

၁၅၁။

‘‘ဒေဝီ ဝိယ အစ္ဆရူပမာ၊ မဇ္ဈေ နာရိဂဏဿ သောဘသိ၊

ကိံ ကမ္မမကာသိ ဘဒ္ဒကံ၊ ကေနာသိ ဝဏ္ဏဝတီ သုကောသလေ’’တိ။

တဿတ္ထော – ဘဒ္ဒေ သုကောသလေ ကောသလရညော သုဓီတေ တွံ ရူပသမ္ပတ္တိယာ အစ္ဆရူပမာ တိဒသပုရေ သက္ကဿ ဒေဝရညော အညတရာ ဒေဝဓီတာ ဝိယ ဣမဿ နာရီဂဏဿ မဇ္ဈေ သောဘသိ၊ ပုဗ္ဗေ ကိံ နာမ ဘဒ္ဒကံ ကလျာဏကမ္မံ အကာသိ၊ ကေနာသိ ကာရဏေန ဧဝံ ဝဏ္ဏဝတီ ဇာတာတိ။

အထဿ သာ ပုရိမဘဝေ ကလျာဏကမ္မံ ကထေန္တီ သေသဂါထာဒွယမာဟ –

၁၅၂။

‘‘အမ္ဗဋ္ဌကုလဿ ခတ္တိယ၊ ဒါသျာဟံ ပရပေသိယာ အဟုံ၊

သညတာ စ ဓမ္မဇီဝိနီ၊ သီလဝတီ စ အပါပဒဿနာ။

၁၅၃။

‘‘ဥဒ္ဓဋဘတ္တံ အဟံ တဒါ၊ စရမာနဿ အဒါသိံ ဘိက္ခုနော၊

ဝိတ္တာ သုမနာ သယံ အဟံ၊ တဿ ကမ္မဿ ဖလံ မမေဒိသ’’န္တိ။

သာပိ ကိရ ဇာတိဿရာဝ အဟောသိ၊ တသ္မာ အတ္တနော ဇာတိဿရဉာဏေန ပရိစ္ဆိန္ဒိတွာဝ ကထေသိ။

တတ္ထ အမ္ဗဋ္ဌကုလဿာတိ ကုဋုမ္ဗိယကုလဿ။ ဒါသျာဟန္တိ ဒါသီ အဟံ၊ ‘‘ဒါသာဟ’’န္တိပိ ပါဌော။ ပရပေသိယာတိ ပရေဟိ တဿ တဿ ကိစ္စဿ ကရဏတ္ထာယ ပေသိတဗ္ဗာ ပေသနကာရိကာ။ သညတာတိ ဒါသိယော နာမ ဒုဿီလာ ဟောန္တိ၊ အဟံ ပန တီဟိ ဒွါရေဟိ သညတာ သီလသမ္ပန္နာ။ ဓမ္မဇီဝိနီတိ ပရဝဉ္စနာဒီနိ အကတွာ ဓမ္မေန သမေန ပဝတ္တိတဇီဝိကာ။ သီလဝတီတိ အာစာရသမ္ပန္နာ ဂုဏဝတီ။ အပါပဒဿနာတိ ကလျာဏဒဿနာ ပိယဓမ္မာ။

ဥဒ္ဓဋဘတ္တန္တိ အတ္တနော ပတ္တကောဋ္ဌာသဝသေန ဥဒ္ဓရိတွာ လဒ္ဓဘာဂဘတ္တံ။ ဘိက္ခုနောတိ ဘိန္နကိလေသဿ ပစ္စေကဗုဒ္ဓဿ။ ဝိတ္တာ သုမနာတိ တုဋ္ဌာ သောမနဿဇာတာ ကမ္မဖလံ သဒ္ဒဟန္တီ။ တဿ ကမ္မဿာတိ တဿ ဧကဘိက္ခာဒါနကမ္မဿ။ ဣဒံ ဝုတ္တံ ဟောတိ – အဟံ၊ မဟာရာဇ၊ ပုဗ္ဗေ သာဝတ္ထိယံ အညတရဿ ကုဋုမ္ဗိယကုလဿ ဒါသီ ဟုတွာ အတ္တနော လဒ္ဓဘာဂဘတ္တံ အာဒါယ နိက္ခမန္တီ ဧကံ ပစ္စေကဗုဒ္ဓံ ပိဏ္ဍာယ စရန္တံ ဒိသွာ အတ္တနော တဏှံ မိလာပေတွာ သညတာဒိဂုဏသမ္ပန္နာ ကမ္မဖလံ သဒ္ဒဟန္တီ တဿ တံ ဘတ္တံ အဒါသိံ၊ သာဟံ ယာဝတာယုကံ ဌတွာ ကာလံ ကတွာ တတ္ထ သာဝတ္ထိယံ ကောသလရညော အဂ္ဂမဟေသိယာ ကုစ္ဆိမှိ နိဗ္ဗတ္တိတွာ ဣဒါနိ တဝ ပါဒေ ပရိစရမာနာ ဧဝရူပံ သမ္ပတ္တိံ အနုဘဝါမိ၊ တဿ မမ ကမ္မဿ ဣဒမီဒိသံ ဖလန္တိ။ တတ္ထ ဂုဏသမ္ပန္နာနံ ဒိန္နဒါနဿ မဟပ္ဖလဘာဝဒဿနတ္ထံ –

‘‘အဂ္ဂတော ဝေ ပသန္နာန’’န္တိ (ဣတိဝု။ ၉၀) စ။

‘‘ဧသ ဒေဝမနုဿာနံ၊ သဗ္ဗကာမဒဒေါ နိဓီ’’တိ (ခု။ ပါ။ ၈။၁၀) စ။ –

အာဒိဂါထာ ဝိတ္ထာရေတဗ္ဗာ။

ဣတိ တေ ဥဘောပိ အတ္တနော ပုရိမကမ္မံ ဝိတ္ထာရတော ကထေတွာ တတော ပဋ္ဌာယ စတူသု နဂရဒွါရေသု နဂရမဇ္ဈေ နိဝေသနဒွါရေတိ ဆ ဒါနသာလာယော ကာရေတွာ သကလဇမ္ဗုဒီပံ ဥန္နင်္ဂလံ ကတွာ မဟာဒါနံ ပဝတ္တေတွာ သီလံ ရက္ခိတွာ ဥပေါသထကမ္မံ ကတွာ ဇီဝိတပရိယောသာနေ သဂ္ဂပရာယဏာ အဟေသုံ။

သတ္ထာ ဣမံ ဓမ္မဒေသနံ အာဟရိတွာ ဇာတကံ သမောဓာနေသိ – ‘‘တဒါ ဒေဝီ ရာဟုလမာတာ အဟောသိ၊ ရာဇာ ပန အဟမေဝ အဟောသိ’’န္တိ။

ကုမ္မာသပိဏ္ဍိဇာတကဝဏ္ဏနာ ဒသမာ။

[၄၁၆] ၁၁။ ပရန္တပဇာတကဝဏ္ဏနာ

အာဂမိဿတိမေ ပါပန္တိ ဣဒံ သတ္ထာ ဝေဠုဝနေ ဝိဟရန္တော ဒေဝဒတ္တဿ ဝဓာယ ပရိသက္ကနံ အာရဗ္ဘ ကထေသိ။ တဒါ ဟိ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ ဒေဝဒတ္တော တထာဂတဿ မာရဏတ္ထမေဝ ပရိသက္ကတိ၊ ဓနုဂ္ဂဟေ ပယောဇေသိ၊ သိလံ ပဝိဇ္ဈိ၊ နာဠာဂိရိံ ဝိဿဇ္ဇာပေသိ၊ တထာဂတဿ ဝိနာသတ္ထမေဝ ဥပါယံ ကရောတီ’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပေသ မမ ဝဓာယ ပရိသက္ကိ၊ တာသမတ္တမ္ပိ ပန ကာတုံ အသက္ကောန္တော အတ္တနာဝ ဒုက္ခံ အနုဘောသီ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော တဿ အဂ္ဂမဟေသိယာ ကုစ္ဆိမှိ နိဗ္ဗတ္တိတွာ ဝယပ္ပတ္တော တက္ကသိလာယံ သဗ္ဗသိပ္ပာနိ သိက္ခိ၊ သဗ္ဗရုတဇာနနမန္တံ ဥဂ္ဂဏှိ။ သော အာစရိယဿ အနုယောဂံ ဒတွာ ဗာရာဏသိံ ပစ္စာဂစ္ဆိ၊ ပိတာ တံ ဩပရဇ္ဇေ ဌပေသိ။ ကိဉ္စာပိ ဩပရဇ္ဇေ ဌပေတိ၊ မာရာပေတုကာမော ပန နံ ဟုတွာ ဒဋ္ဌုမ္ပိ န ဣစ္ဆိ။ အထေကာ သိင်္ဂါလီ ဒွေ ပေါတကေ ဂဟေတွာ ရတ္တိံ မနုဿေသု ပဋိသလ္လီနေသု နိဒ္ဓမနေန နဂရံ ပါဝိသိ။ ဗောဓိသတ္တဿ စ ပါသာဒေ သယနဂဗ္ဘဿ အဝိဒူရေ ဧကာ သာလာ အတ္ထိ၊ တတ္ထေကော အဒ္ဓိကမနုဿော ဥပါဟနာ ဩမုဉ္စိတွာ ပါဒမူလေ ဘူမိယံ ဌပေတွာ ဧကသ္မိံ ဖလကေ နိပဇ္ဇိ၊ န တာဝ နိဒ္ဒါယတိ။ တဒါ သိင်္ဂါလိယာ ပေါတကာ ဆာတာ ဝိရဝိံသု။ အထ တေသံ မာတာ ‘‘တာတာ၊ မာ သဒ္ဒံ ကရိတ္ထ၊ ဧတိဿာ သာလာယ ဧကော မနုဿော ဥပါဟနာ ဩမုဉ္စိတွာ ဘူမိယံ ဌပေတွာ ဖလကေ နိပန္နော န တာဝ နိဒ္ဒါယတိ၊ ဧတဿ နိဒ္ဒါယနကာလေ ဧတာ ဥပါဟနာ အာဟရိတွာ တုမှေ ခါဒါပေဿာမီ’’တိ အတ္တနော ဘာသာယ အာဟ။ ဗောဓိသတ္တော မန္တာနုဘာဝေန တဿာ ဘာသံ ဇာနိတွာ သယနဂဗ္ဘာ နိက္ခမ္မ ဝါတပါနံ ဝိဝရိတွာ ‘‘ကော ဧတ္ထာ’’တိ အာဟ။ ‘‘အဟံ၊ ဒေဝ၊ အဒ္ဓိကမနုဿော’’တိ။ ‘‘ဥပါဟနာ တေ ကုဟိ’’န္တိ? ‘‘ဘူမိယံ၊ ဒေဝါ’’တိ။ ‘‘ဥက္ခိတွာ ဩလမ္ဗေတွာ ဌပေဟီ’’တိ။ တံ သုတွာ သိင်္ဂါလီ ဗောဓိသတ္တဿ ကုဇ္ဈိ။

ပုန ဧကဒိဝသံ သာ တထေဝ နဂရံ ပါဝိသိ။ တဒါ စေကော မတ္တမနုဿော ‘‘ပါနီယံ ပိဝိဿာမီ’’တိ ပေါက္ခရဏိံ ဩတရန္တော ပတိတွာ နိမုဂ္ဂေါ နိရဿာသော မရိ။ နိဝတ္ထာ ပနဿ ဒွေ သာဋကာ နိဝါသနန္တရေ ကဟာပဏသဟဿံ အင်္ဂုလိယာ စ မုဒ္ဒိကာ အတ္ထိ။ တဒါပိ သာ ပုတ္တကေ ‘‘ဆာတမှာ၊ အမ္မာ’’တိ ဝိရဝန္တေ ‘‘တာတာ၊ မာ သဒ္ဒံ ကရိတ္ထ၊ ဧတိဿာ ပေါက္ခရဏိယာ မနုဿော မတော၊ တဿ ဣဒဉ္စိဒဉ္စ အတ္ထိ၊ သော ပန မရိတွာ သောပါနေယေဝ နိပန္နော၊ တုမှေ ဧတံ မနုဿံ ခါဒါပေဿာမီ’’တိ အာဟ။ ဗောဓိသတ္တော တံ သုတွာ ဝါတပါနံ ဝိဝရိတွာ ‘‘သာလာယ ကော အတ္ထီ’’တိ ဝတွာ ဧကေနုဋ္ဌာယ ‘‘အဟံ၊ ဒေဝါ’’တိ ဝုတ္တေ ‘‘ဂစ္ဆ ဧတိဿာ ပေါက္ခရဏိယာ မတမနုဿဿ သာဋကေ စ ကဟာပဏသဟဿဉ္စ အင်္ဂုလိမုဒ္ဒိကဉ္စ ဂဟေတွာ သရီရမဿ ယထာ န ဥဋ္ဌဟတိ၊ ဧဝံ ဥဒကေ ဩသီဒါပေဟီ’’တိ အာဟ။ သော တထာ အကာသိ။ သာ ပုနပိ ကုဇ္ဈိတွာ ‘‘ပုရိမဒိဝသေ တာဝ မေ ပုတ္တကာနံ ဥပါဟနာ ခါဒိတုံ န အဒါသိ၊ အဇ္ဇ မတမနုဿံ ခါဒိတုံ န ဒေတိ၊ ဟောတု၊ ဣတော ဒါနိ တတိယဒိဝသေ ဧကော သပတ္တရာဇာ အာဂန္တွာ နဂရံ ပရိက္ခိပိဿတိ။ အထ နံ ပိတာ ယုဒ္ဓတ္ထာယ ပေသေဿတိ၊ တတြ တေ သီသံ ဆိန္ဒိဿန္တိ၊ အထ တေ ဂလလောဟိတံ ပိဝိတွာ ဝေရံ မုဉ္စိဿာမိ။ တွံ မယာ သဒ္ဓိံ ဝေရံ ဗန္ဓသိ၊ ဇာနိဿာမီ’’တိ ဝိရဝိတွာ ဗောဓိသတ္တံ တဇ္ဇေတွာ ပုတ္တကေ ဂဟေတွာ နိက္ခမတိ။

တတိယဒိဝသေ ဧကော သပတ္တရာဇာ အာဂန္တွာ နဂရံ ပရိဝါရေသိ။ ရာဇာ ဗောဓိသတ္တံ ‘‘ဂစ္ဆ၊ တာတ၊ တေန သဒ္ဓိံ ယုဇ္ဈာ’’တိ အာဟ။ ‘‘မယာ၊ ဒေဝ၊ ဧကံ ဒိဋ္ဌံ အတ္ထိ၊ ဂန္တုံ န ဝိသဟာမိ၊ ဇီဝိတန္တရာယံ ဘာယာမီ’’တိ။ ‘‘မယှံ တယိ မတေ ဝါ အမတေ ဝါ ကိံ၊ ဂစ္ဆာဟေဝ တွ’’န္တိ? သော ‘‘သာဓု၊ ဒေဝါ’’တိ မဟာသတ္တော ပရိသံ ဂဟေတွာ သပတ္တရညော ဌိတဒွါရေန အနိက္ခမိတွာ အညံ ဒွါရံ ဝိဝရိတွာ နိက္ခမိ။ တသ္မိံ ဂစ္ဆန္တေ သကလနဂရံ တုစ္ဆံ ဝိယ အဟောသိ။ သဗ္ဗေ တေနေဝ သဒ္ဓိံ နိက္ခမိံသု။ သော ဧကသ္မိံ သဘာဂဋ္ဌာနေ ခန္ဓာဝါရံ နိဝါသေတွာ အစ္ဆိ။ ရာဇာ စိန္တေသိ ‘‘ဥပရာဇာ နဂရံ တုစ္ဆံ ကတွာ ဗလံ ဂဟေတွာ ပလာယိ၊ သပတ္တရာဇာပိ နဂရံ ပရိဝါရေတွာ ဌိတော၊ ဣဒါနိ မယှံ ဇီဝိတံ နတ္ထီ’’တိ။ သော ‘‘ဇီဝိတံ ရက္ခိဿာမီ’’တိ ဒေဝိဉ္စ ပုရောဟိတဉ္စ ပရန္တပံ နာမေကံ ပါဒမူလိကဉ္စ ဒါသံ ဂဟေတွာ ရတ္တိဘာဂေ အညာတကဝေသေန ပလာယိတွာ အရညံ ပါဝိသိ။ ဗောဓိသတ္တော တဿ ပလာတဘာဝံ ဉတွာ နဂရံ ပဝိသိတွာ ယုဒ္ဓံ ကတွာ သပတ္တံ ပလာပေတွာ ရဇ္ဇံ ဂဏှိ။ ပိတာပိဿ ဧကသ္မိံ နဒီတီရေ ပဏ္ဏသာလံ ကာရေတွာ ဖလာဖလေန ယာပေန္တော ဝသိ။ ရာဇာ စ ပုရောဟိတော စ ဖလာဖလတ္ထာယ ဂစ္ဆန္တိ။ ပရန္တပဒါသော ဒေဝိယာ သဒ္ဓိံ ပဏ္ဏသာလာယမေဝ ဟောတိ။ တတြာပိ ရာဇာနံ ပဋိစ္စ ဒေဝိယာ ကုစ္ဆိသ္မိံ ဂဗ္ဘော ပတိဋ္ဌာသိ။ သာ အဘိဏှသံသဂ္ဂဝသေန ပရန္တပေန သဒ္ဓိံ အတိစရိ။ သာ ဧကဒိဝသံ ပရန္တပံ အာဟ ‘‘ရညာ ဉာတေ နေဝ တဝ၊ န မယှံ ဇီဝိတံ အတ္ထိ၊ တသ္မာ မာရေဟိ န’’န္တိ။ ‘‘ကထံ မာရေမီ’’တိ? ဧသ တံ ခဂ္ဂဉ္စ နှာနသာဋကဉ္စ ဂါဟာပေတွာ နှာယိတုံ ဂစ္ဆတိ၊ တတြဿ နှာနဋ္ဌာနေ ပမာဒံ ဉတွာ ခဂ္ဂေန သီသံ ဆိန္ဒိတွာ သရီရံ ခဏ္ဍာခဏ္ဍိကံ ကတွာ ဘူမိယံ နိခဏာဟီတိ။ သော ‘‘သာဓူ’’တိ သမ္ပဋိစ္ဆိ။

အထေကဒိဝသံ ပုရောဟိတောယေဝ ဖလာဖလတ္ထာယ ဂန္တွာ အဝိဒူရေ ရညော နှာနတိတ္ထသာမန္တေ ဧကံ ရုက္ခံ အာရုယှ ဖလာဖလံ ဂဏှာတိ။ ရာဇာ ‘‘နှာယိဿာမီ’’တိ ပရန္တပံ ခဂ္ဂဉ္စ နှာနသာဋကဉ္စ ဂါဟာပေတွာ နဒီတီရံ အဂမာသိ။ တတ္ထ နံ နှာနကာလေ ပမာဒမာပန္နံ ‘‘မာရေဿာမီ’’တိ ပရန္တပေါ ဂီဝါယ ဂဟေတွာ ခဂ္ဂံ ဥက္ခိပိ။ သော မရဏဘယေန ဝိရဝိ။ ပုရောဟိတော တံ သဒ္ဒံ သုတွာ ဩလောကေန္တော ပရန္တပံ ရာဇာနံ မာရေန္တံ ဒိသွာ ဘီတတသိတော သာခံ ဝိဿဇ္ဇေတွာ ရုက္ခတော ဩရုယှ ဧကံ ဂုမ္ဗံ ပဝိသိတွာ နိလီယိ။ ပရန္တပေါ တဿ သာခါဝိဿဇ္ဇနသဒ္ဒံ သုတွာ ရာဇာနံ မာရေတွာ ဘူမိယံ ခဏိတွာ ‘‘ဣမသ္မိံ ဌာနေ သာခါဝိဿဇ္ဇနသဒ္ဒေါ အဟောသိ၊ ကော နု ခေါ ဧတ္ထာ’’တိ ဝိစိနန္တော ကဉ္စိ အဒိသွာ နှတွာ ဂတော။ တဿ ဂတကာလေ ပုရောဟိတော နိသိန္နဋ္ဌာနာ နိက္ခမိတွာ ရညော သရီရံ ခဏ္ဍာခဏ္ဍိကံ ဆိန္ဒိတွာ အာဝါဋေ နိခါတဘာဝံ ဉတွာ နှတွာ အတ္တနော ဝဓဘယေန အန္ဓဝေသံ ဂဟေတွာ ပဏ္ဏသာလံ အဂမာသိ။ တံ ဒိသွာ ပရန္တပေါ ‘‘ကိံ တေ၊ ဗြာဟ္မဏ၊ ကတ’’န္တိ အာဟ။ သော အဇာနန္တော ဝိယ ‘‘ဒေဝ၊ အက္ခီနိ မေ နာသေတွာ အာဂတောမှိ၊ ဥဿန္နာသီဝိသေ အရညေ ဧကသ္မိံ ဝမ္မိကပဿေ အဋ္ဌာသိံ၊ တတြေကေန အာသီဝိသေန နာသဝါတော ဝိဿဋ္ဌော မေ ဘဝိဿတီ’’တိ အာဟ။ ပရန္တပေါ ‘‘န မံ သဉ္ဇာနာတိ၊ ‘ဒေဝါ’တိ ဝဒတိ၊ သမဿာသေဿာမိ န’’န္တိ စိန္တေတွာ ‘‘ဗြာဟ္မဏ၊ မာ စိန္တယိ၊ အဟံ တံ ပဋိဇဂ္ဂိဿာမီ’’တိ အဿာသေတွာ ဖလာဖလံ ဒတွာ သန္တပ္ပေသိ။ တတော ပဋ္ဌာယ ပရန္တပဒါသော ဖလာဖလံ အာဟရိ၊ ဒေဝီပိ ပုတ္တံ ဝိဇာယိ။ သာ ပုတ္တေ ဝဍ္ဎန္တေ ဧကဒိဝသံ ပစ္စူသသမယေ သုခနိသိန္နာ သဏိကံ ပရန္တပဒါသံ ဧတဒဝေါစ ‘‘တွံ ရာဇာနံ မာရေန္တော ကေနစိ ဒိဋ္ဌော’’တိ။ ‘‘န မံ ကောစိ အဒ္ဒသ၊ သာခါဝိဿဇ္ဇနသဒ္ဒံ ပန အဿောသိံ၊ တဿာ သာခါယ မနုဿေန ဝါ တိရစ္ဆာနေန ဝါ ဝိဿဋ္ဌဘာဝံ န ဇာနာမိ၊ ယဒါ ကဒါစိ ပန မေ ဘယံ အာဂစ္ဆန္တံ သာခါဝိဿဋ္ဌဋ္ဌာနတော အာဂမိဿတီ’’တိ တာယ သဒ္ဓိံ သလ္လပန္တော ပဌမံ ဂါထမာဟ –

၁၅၄။

‘‘အာဂမိဿတိ မေ ပါပံ၊ အာဂမိဿတိ မေ ဘယံ၊

တဒါ ဟိ စလိတာ သာခါ၊ မနုဿေန မိဂေန ဝါ’’တိ။

တတ္ထ ပါပန္တိ လာမကံ အနိဋ္ဌံ အကန္တံ။ ဘယန္တိ စိတ္တုတြာသဘယမ္ပိ မေ အာဂမိဿတိ၊ န သက္ကာ နာဂန္တုံ။ ကိံကာရဏာ? တဒါ ဟိ စလိတာ သာခါ မနုဿေန မိဂေန ဝါတိ န ပညာယတိ၊ တသ္မာ တတော မံ ဘယံ အာဂမိဿတိ။

တေ ‘‘ပုရောဟိတော နိဒ္ဒါယတီ’’တိ မညိံသု။ သော ပန အနိဒ္ဒါယမာနောဝ တေသံ ကထံ အဿောသိ။ အထေကဒိဝသံ ပုရောဟိတော ပရန္တပဒါသေ ဖလာဖလတ္ထာယ ဂတေ အတ္တနော ဗြာဟ္မဏိံ သရိတွာ ဝိလပန္တော ဒုတိယံ ဂါထမာဟ –

၁၅၅။

‘‘ဘီရုယာ နူန မေ ကာမော၊ အဝိဒူရေ ဝသန္တိယာ၊

ကရိဿတိ ကိသံ ပဏ္ဍုံ၊ သာဝ သာခါ ပရန္တပ’’န္တိ။

တတ္ထ ဘီရုယာတိ ဣတ္ထီ စ နာမ အပ္ပမတ္တကေနာပိ ဘာယတိ၊ တသ္မာ ‘‘ဘီရူ’’တိ ဝုစ္စတိ။ အဝိဒူရေတိ နာတိဒူရေ ဣတော ကတိပယယောဇနမတ္ထကေ ဝသန္တိယာ ဘီရုယာ မယှံ ဗြာဟ္မဏိယာ ယော မမ ကာမော ဥပ္ပန္နော၊ သော နူန မံ ကိသဉ္စ ပဏ္ဍုဉ္စ ကရိဿတီတိ ဒဿေတိ။ ‘‘သာဝ သာခါ’’တိ ဣမိနာ ပန ဩပမ္မံ ဒဿေတိ၊ ယထာ သာခါ ပရန္တပံ ကိသံ ပဏ္ဍုံ ကရောတိ၊ ဧဝန္တိ အတ္ထော။

ဣတိ ဗြာဟ္မဏော ဂါထမေဝ ဝဒတိ၊ အတ္ထံ ပန န ကထေတိ၊ တသ္မာ ဣမာယ ဂါထာယ ကိစ္စံ ဒေဝိယာ အပါကဋံ။ အထ နံ ‘‘ကိံ ကထေသိ ဗြာဟ္မဏာ’’တိ အာဟ။ သောပိ ‘‘သလ္လက္ခိတံ မေ’’တိ ဝတွာ ပုန ဧကဒိဝသံ တတိယံ ဂါထမာဟ –

၁၅၆။

‘‘သောစယိဿတိ မံ ကန္တာ၊ ဂါမေ ဝသမနိန္ဒိတာ၊

ကရိဿတိ ကိသံ ပဏ္ဍုံ၊ သာဝ သာခါ ပရန္တပ’’န္တိ။

တတ္ထ သောစယိဿတီတိ သောကုပ္ပာဒနေန သုက္ခာပေဿတိ။ ကန္တာတိ ဣဋ္ဌဘရိယာ။ ဂါမေ ဝသန္တိ ဗာရာဏသိယံ ဝသန္တီတိ အဓိပ္ပာယော။ အနိန္ဒိတာတိ အဂရဟိတာ ဥတ္တမရူပဓရာ။

ပုနေကဒိဝသံ စတုတ္ထံ ဂါထမာဟ –

၁၅၇။

‘‘တယာ မံ အသိတာပင်္ဂိ၊ သိတာနိ ဘဏိတာနိ စ၊

ကိသံ ပဏ္ဍုံ ကရိဿန္တိ၊ သာဝ သာခါ ပရန္တပ’’န္တိ။

တတ္ထ တယာ မံ အသိတာပင်္ဂီတိ တယာ မံ အသိတာ အပင်္ဂိ။ ဣဒံ ဝုတ္တံ ဟောတိ – ဘဒ္ဒေ၊ အက္ခိကောဋိတော အဉ္ဇနသလာကာယ နီဟရိတွာ အဘိသင်္ခတအသိတာပင်္ဂိ တယာ ပဝတ္တိတာနိ မန္ဒဟသိတာနိ စ မဓုရဘာသိတာနိ စ မံ သာ ဝိဿဋ္ဌသာခါ ဝိရဝမာနာ ပရန္တပံ ဝိယ ကိသံ ပဏ္ဍုံ ကရိဿတီတိ။ ပ-ကာရဿ ဝ-ကာရံ ကတွာ ‘‘ဝင်္ဂီ’’တိပိ ပါဌောယေဝ။

အပရဘာဂေ ကုမာရော ဝယပ္ပတ္တော အဟောသိ သောဠသဝဿုဒ္ဒေသိကော။ အထ နံ ဗြာဟ္မဏော ယဋ္ဌိကောဋိံ ဂါဟာပေတွာ နှာနတိတ္ထံ ဂန္တွာ အက္ခီနိ ဥမ္မီလေတွာ ဩလောကေသိ။ ကုမာရော ‘‘နနု တွံ ဗြာဟ္မဏ၊ အန္ဓော’’တိ အာဟ။ သော ‘‘နာဟံ အန္ဓော၊ ဣမိနာ မေ ဥပါယေန ဇီဝိတံ ရက္ခာမီ’’တိ ဝတွာ ‘‘တဝ ပိတရံ ဇာနာသီ’’တိ အာဟ။ ‘‘အယံ မေ ပိတာ’’တိ ဝုတ္တေ ‘‘နာယံ တဝ ပိတာ၊ ပိတာ ပန တေ ဗာရာဏသိရာဇာ၊ အယံ တုမှာကံ ဒါသော၊ သော မာတရိ တေ ဝိပ္ပဋိပဇ္ဇိတွာ ဣမသ္မိံ ဌာနေ တဝ ပိတရံ မာရေတွာ နိခဏီ’’တိ အဋ္ဌီနိ နီဟရိတွာ ဒဿေသိ။ ကုမာရဿ ဗလဝကောဓော ဥပ္ပဇ္ဇိ။ အထ နံ ‘‘ဣဒါနိ ကိံ ကရောမီ’’တိ ပုစ္ဆိ။ ‘‘ယံ တေ ဣသ္မိံယေဝ တိတ္ထေ ပိတု တေန ကတံ၊ တံ ကရောဟီ’’တိ သဗ္ဗံ ပဝတ္တိံ အာစိက္ခိတွာ ကုမာရံ ကတိပါဟံ ထရုဂဏှနံ သိက္ခာပေသိ။ အထေကဒိဝသံ ကုမာရော ခဂ္ဂဉ္စ နှာနသာဋကဉ္စ ဂဟေတွာ ‘‘နှာယိတုံ ဂစ္ဆာမ၊ တာတာ’’တိ အာဟ။ ပရန္တပေါ ‘‘သာဓူ’’တိ တေန သဒ္ဓိံ ဂတော။ အထဿ နှာယိတုံ ဩတိဏ္ဏကာလေ ဒက္ခိဏဟတ္ထေန အသိံ၊ ဝါမဟတ္ထေန စူဠံ ဂဟေတွာ ‘‘တွံ ကိရ ဣမသ္မိံယေဝ တိတ္ထေ မမ ပိတရံ စူဠာယ ဂဟေတွာ ဝိရဝန္တံ မာရေသိ၊ အဟမ္ပိ တံ တထေဝ ကရိဿာမီ’’တိ အာဟ။ သော မရဏဘယဘီတော ပရိဒေဝမာနော ဒွေ ဂါထာ အဘာသိ –

၁၅၈။

‘‘အာဂမာ နူန သော သဒ္ဒေါ၊ အသံသိ နူန သော တဝ၊

အက္ခာတံ နူန တံ တေန၊ ယော တံ သာခမကမ္ပယိ။

၁၅၉။

‘‘ဣဒံ ခေါ တံ သမာဂမ္မ၊ မမ ဗာလဿ စိန္တိတံ၊

တဒါ ဟိ စလိတာ သာခါ၊ မနုဿေန မိဂေန ဝါ’’တိ။

တတ္ထ အာဂမာတိ သော သာခသဒ္ဒေါ နူန တံ အာဂတော သမ္ပတ္တော။ အသံသိ နူန သော တဝါတိ သော သဒ္ဒေါ တဝ အာရောစေသိ မညေ။ အက္ခာတံ နူန တံ တေနာတိ ယော သတ္တော တဒါ တံ သာခံ အကမ္ပယိ၊ တေန ‘‘ဧဝံ တေ ပိတာ မာရိတော’’တိ နူန တံ ကာရဏံ အက္ခာတံ။ သမာဂမ္မာတိ သင်္ဂမ္မ၊ သမာဂတန္တိ အတ္ထော။ ယံ မမ ဗာလဿ ‘‘တဒါ စလိတာ သာခါ မနုဿေန မိဂေန ဝါ၊ တတော မေ ဘယံ ဥပ္ပဇ္ဇိဿတီ’’တိ စိန္တိတံ ပရိဝိတက္ကိတံ အဟောသိ၊ ဣဒံ တယာ သဒ္ဓိံ သမာဂတန္တိ ဝုတ္တံ ဟောတိ။

တတော ကုမာရော ဩသာနဂါထမာဟ –

၁၆၀။

‘‘တထေဝ တွံ အဝေဒေသိ၊ အဝဉ္စိ ပိတရံ မမ၊

ဟန္တွာ သာခါဟိ ဆာဒေန္တော၊ အာဂမိဿတိ မေ ဘယ’’န္တိ။

တတ္ထ တထေဝ တွံ အဝေဒေသီတိ တထေဝ တွံ အညာသိ။ အဝဉ္စိ ပိတရံ မမာတိ တွံ မမ ပိတရံ ‘‘နှာယိတုံ ဂစ္ဆာမာ’’တိ ဝိဿာသေတွာ နှာယန္တံ မာရေတွာ ခဏ္ဍာခဏ္ဍိကံ ဆိန္ဒိတွာ နိခဏိတွာ ‘‘သစေ ကောစိ ဇာနိဿတိ၊ မယှမ္ပိ ဧဝရူပံ ဘယံ အာဂစ္ဆိဿတီ’’တိ ဝဉ္စေသိ၊ ဣဒံ ခေါ ပန မရဏဘယံ ဣဒါနိ တဝါဂတန္တိ။

ဣတိ တံ ဝတွာ တတ္ထေဝ ဇီဝိတက္ခယံ ပါပေတွာ နိခဏိတွာ သာခါဟိ ပဋိစ္ဆာဒေတွာ ခဂ္ဂံ ဓောဝိတွာ နှတွာ ပဏ္ဏသာလံ ဂန္တွာ တဿ မာရိတဘာဝံ ပုရောဟိတဿ ကထေတွာ မာတရံ ပရိဘာသိတွာ ‘‘ဣဓ ကိံ ကရိဿာမာ’’တိ တယော ဇနာ ဗာရာဏသိမေဝ အဂမံသု။ ဗောဓိသတ္တော ကနိဋ္ဌဿ ဩပရဇ္ဇံ ဒတွာ ဒါနာဒီနိ ပုညာနိ ကတွာ သဂ္ဂပဒံ ပူရေသိ။

သတ္ထာ ဣမံ ဓမ္မဒေသနံ အာဟရိတွာ သစ္စာနိ ပကာသေတွာ ဇာတကံ သမောဓာနေသိ – ‘‘တဒါ ပိတုရာဇာ ဒေဝဒတ္တော အဟောသိ၊ ပုရောဟိတော အာနန္ဒော၊ ပုတ္တရာဇာ ပန အဟမေဝ အဟောသိ’’န္တိ။

ပရန္တပဇာတကဝဏ္ဏနာ ဧကာဒသမာ။

ဂန္ဓာရဝဂ္ဂေါ ဒုတိယော။

ဇာတကုဒ္ဒါနံ –

ကုက္ကု မနောဇ သုတနော၊ ဂိဇ္ဈ ဒဗ္ဘပုပ္ဖ ပဏ္ဏကော၊

သတ္တုဘသ္တ အဋ္ဌိသေနော၊ ကပိ ဗကဗြဟ္မာ ဒသ။

ဂန္ဓာရော မဟာကပိ စ၊ ကုမ္ဘကာရော ဒဠှဓမ္မော၊

သောမဒတ္တော သုသီမော စ၊ ကောဋသိမ္ဗလိ ဓူမကာရီ၊

ဇာဂရော ကုမ္မာသပိဏ္ဍော၊ ပရန္တပါ ဧကာဒသ။

သတ္တကနိပါတဝဏ္ဏနာ နိဋ္ဌိတာ။