📜

၁၂။ ဒွါဒသကနိပါတော

[၄၆၄] ၁။ စူဠကုဏာလဇာတကဝဏ္ဏနာ

၁-၁၂။

လုဒ္ဓါနံလဟုစိတ္တာနန္တိ ဣဒံ ဇာတကံ ကုဏာလဇာတကေ (ဇာ။ ၂။၂၁။ကုဏာလဇာတက) အာဝိ ဘဝိဿတိ၊

စူဠကုဏာလဇာတကဝဏ္ဏနာ ပဌမာ။

[၄၆၅] ၂။ ဘဒ္ဒသာလဇာတကဝဏ္ဏနာ

ကာ တွံ သုဒ္ဓေဟိ ဝတ္ထေဟီတိ ဣဒံ သတ္ထာ ဇေတဝနေ ဝိဟရန္တော ဉာတတ္ထစရိယံ အာရဗ္ဘ ကထေသိ။ သာဝတ္ထိယဉှိ အနာထပိဏ္ဍိကဿ နိဝေသနေ ပဉ္စန္နံ ဘိက္ခုသတာနံ နိဗဒ္ဓဘောဇနံ ပဝတ္တတိ၊ တထာ ဝိသာခါယ စ ကောသလရညော စ။ တတ္ထ ပန ကိဉ္စာပိ နာနဂ္ဂရသဘောဇနံ ဒီယတိ၊ ဘိက္ခူနံ ပနေတ္ထ ကောစိ ဝိဿာသိကော နတ္ထိ၊ တသ္မာ ဘိက္ခူ ရာဇနိဝေသနေ န ဘုဉ္ဇန္တိ၊ ဘတ္တံ ဂဟေတွာ အနာထပိဏ္ဍိကဿ ဝါ ဝိသာခါယ ဝါ အညေသံ ဝါ ဝိဿာသိကာနံ ဃရံ ဂန္တွာ ဘုဉ္ဇန္တိ။ ရာဇာ ဧကဒိဝသံ ပဏ္ဏာကာရံ အာဟဋံ ‘‘ဘိက္ခူနံ ဒေထာ’’တိ ဘတ္တဂ္ဂံ ပေသေတွာ ‘‘ဘတ္တဂ္ဂေ ဘိက္ခူ နတ္ထီ’’တိ ဝုတ္တေ ‘‘ကဟံ ဂတာ’’တိ ပုစ္ဆိတွာ ‘‘အတ္တနော ဝိဿာသိကဂေဟေသု နိသီဒိတွာ ဘုဉ္ဇန္တီ’’တိ သုတွာ ဘုတ္တပါတရာသော သတ္ထု သန္တိကံ ဂန္တွာ ‘‘ဘန္တေ၊ ဘောဇနံ နာမ ကိံ ပရမ’’န္တိ ပုစ္ဆိ။ ဝိဿာသပရမံ မဟာရာဇ၊ ကဉ္ဇိကမတ္တကမ္ပိ ဝိဿာသိကေန ဒိန္နံ မဓုရံ ဟောတီတိ။ ဘန္တေ၊ ကေန ပန သဒ္ဓိံ ဘိက္ခူနံ ဝိဿာသော ဟောတီတိ? ‘‘ဉာတီဟိ ဝါ သေက္ခကုလေဟိ ဝါ၊ မဟာရာဇာ’’တိ။ တတော ရာဇာ စိန္တေသိ ‘‘ဧကံ သကျဓီတရံ အာနေတွာ အဂ္ဂမဟေသိံ ကရိဿာမိ၊ ဧဝံ မယာ သဒ္ဓိံ ဘိက္ခူနံ ဉာတကေ ဝိယ ဝိဿာသော ဘဝိဿတီ’’တိ။ သော ဥဋ္ဌာယာသနာ အတ္တနော နိဝေသနံ ဂန္တွာ ကပိလဝတ္ထုံ ဒူတံ ပေသေသိ ‘‘ဓီတရံ မေ ဒေထ၊ အဟံ တုမှေဟိ သဒ္ဓိံ ဉာတိဘာဝံ ဣစ္ဆာမီ’’တိ။

သာကိယာ ဒူတဝစနံ သုတွာ သန္နိပတိတွာ မန္တယိံသု ‘‘မယံ ကောသလရညော အာဏာပဝတ္တိဋ္ဌာနေ ဝသာမ၊ သစေ ဒါရိကံ န ဒဿာမ၊ မဟန္တံ ဝေရံ ဘဝိဿတိ၊ သစေ ဒဿာမ၊ ကုလဝံသော နော ဘိဇ္ဇိဿတိ၊ ကိံ နု ခေါ ကာတဗ္ဗ’’န္တိ။ အထ နေ မဟာနာမော အာဟ – ‘‘မာ စိန္တယိတ္ထ၊ မမ ဓီတာ ဝါသဘခတ္တိယာ နာမ နာဂမုဏ္ဍာယ နာမ ဒါသိယာ ကုစ္ဆိသ္မိံ နိဗ္ဗတ္တိ။ သာ သောဠသဝဿုဒ္ဒေသိကာ ဥတ္တမရူပဓရာ သောဘဂ္ဂပ္ပတ္တာ ပိတု ဝံသေန ခတ္တိယဇာတိကာ၊ တမဿ ‘ခတ္တိယကညာ’တိ ပေသေဿာမာ’’တိ။ သာကိယာ ‘‘သာဓူ’’တိ သမ္ပဋိစ္ဆိတွာ ဒူတေ ပက္ကောသာပေတွာ ‘‘သာဓု၊ ဒါရိကံ ဒဿာမ၊ ဣဒါနေဝ နံ ဂဟေတွာ ဂစ္ဆထာ’’တိ အာဟံသု။ ဒူတာ စိန္တေသုံ ‘‘ဣမေ သာကိယာ နာမ ဇာတိံ နိဿာယ အတိမာနိနော၊ ‘သဒိသီ နော’တိ ဝတွာ အသဒိသိမ္ပိ ဒဒေယျုံ၊ ဧတေဟိ သဒ္ဓိံ ဧကတော ဘုဉ္ဇမာနမေဝ ဂဏှိဿာမာ’’တိ။ တေ ဧဝမာဟံသု ‘‘မယံ ဂဟေတွာ ဂစ္ဆန္တာ ယာ တုမှေဟိ သဒ္ဓိံ ဧကတော ဘုဉ္ဇတိ၊ တံ ဂဟေတွာ ဂမိဿာမာ’’တိ။ သာကိယာ တေသံ နိဝါသဋ္ဌာနံ ဒါပေတွာ ‘‘ကိံ ကရိဿာမာ’’တိ စိန္တယိံသု။ မဟာနာမော အာဟ – ‘‘တုမှေ မာ စိန္တယိတ္ထ၊ အဟံ ဥပါယံ ကရိဿာမိ၊ တုမှေ မမ ဘောဇနကာလေ ဝါသဘခတ္တိယံ အလင်္ကရိတွာ အာနေတွာ မယာ ဧကသ္မိံ ကဗဠေ ဂဟိတမတ္တေ ‘ဒေဝ၊ အသုကရာဇာ ပဏ္ဏံ ပဟိဏိ၊ ဣမံ တာဝ သာသနံ သုဏာထာ’တိ ပဏ္ဏံ ဒဿေယျာထာ’’တိ။ တေ ‘‘သာဓူ’’တိ သမ္ပဋိစ္ဆိတွာ တသ္မိံ ဘုဉ္ဇမာနေ ကုမာရိကံ အလင်္ကရိံသု။

မဟာနာမော ‘‘ဓီတရံ မေ အာနေထ၊ မယာ သဒ္ဓိံ ဘုဉ္ဇတူ’’တိ အာဟ။ အထ နံ အလင်္ကရိတွာ တာဝဒေဝ ထောကံ ပပဉ္စံ ကတွာ အာနယိံသု။ သာ ‘‘ပိတရာ သဒ္ဓိံ ဘုဉ္ဇိဿာမီ’’တိ ဧကပါတိယံ ဟတ္ထံ ဩတာရေသိ။ မဟာနာမောပိ တာယ သဒ္ဓိံ ဧကပိဏ္ဍံ ဂဟေတွာ မုခေ ဌပေသိ။ ဒုတိယပိဏ္ဍာယ ဟတ္ထေ ပသာရိတေ ‘‘ဒေဝ၊ အသုကရညာ ပဏ္ဏံ ပဟိတံ၊ ဣမံ တာဝ သာသနံ သုဏာထာ’’တိ ပဏ္ဏံ ဥပနာမေသုံ။ မဟာနာမော ‘‘အမ္မ၊ တွံ ဘုဉ္ဇာဟီ’’တိ ဒက္ခိဏဟတ္ထံ ပါတိယာယေဝ ကတွာ ဝါမဟတ္ထေန ဂဟေတွာ ပဏ္ဏံ ဩလောကေသိ။ တဿ တံ သာသနံ ဥပဓာရေန္တဿေဝ ဣတရာ ဘုဉ္ဇိ။ သော တဿာ ဘုတ္တကာလေ ဟတ္ထံ ဓောဝိတွာ မုခံ ဝိက္ခာလေသိ။ တံ ဒိသွာ ဒူတာ ‘‘နိစ္ဆယေနေသာ ဧတဿ ဓီတာ’’တိ နိဋ္ဌမကံသု၊ န တံ အန္တရံ ဇာနိတုံ သက္ခိံသု။ မဟာနာမော မဟန္တေန ပရိဝါရေန ဓီတရံ ပေသေသိ။ ဒူတာပိ နံ သာဝတ္ထိံ နေတွာ ‘‘အယံ ကုမာရိကာ ဇာတိသမ္ပန္နာ မဟာနာမဿ ဓီတာ’’တိ ဝဒိံသု။ ရာဇာ တုဿိတွာ သကလနဂရံ အလင်္ကာရာပေတွာ တံ ရတနရာသိမှိ ဌပေတွာ အဂ္ဂမဟေသိဋ္ဌာနေ အဘိသိဉ္စာပေသိ။ သာ ရညော ပိယာ အဟောသိ မနာပါ။

အထဿာ န စိရဿေဝ ဂဗ္ဘော ပတိဋ္ဌဟိ။ ရာဇာ ဂဗ္ဘပရိဟာရမဒါသိ။ သာ ဒသမာသစ္စယေန သုဝဏ္ဏဝဏ္ဏံ ပုတ္တံ ဝိဇာယိ။ အထဿ နာမဂ္ဂဟဏဒိဝသေ ရာဇာ အတ္တနော အယျကဿ သန္တိကံ ပေသေသိ ‘‘သကျရာဇဓီတာ ဝါသဘခတ္တိယာ ပုတ္တံ ဝိဇာယိ၊ ကိမဿ နာမံ ကရောမာ’’တိ။ တံ ပန သာသနံ ဂဟေတွာ ဂတော အမစ္စော ထောကံ ဗဓိရဓာတုကော၊ သော ဂန္တွာ ရညော အယျကဿာရောစေသိ။ သော တံ သုတွာ ‘‘ဝါသဘခတ္တိယာ ပုတ္တံ အဝိဇာယိတွာပိ သဗ္ဗံ ဇနံ အဘိဘဝတိ၊ ဣဒါနိ ပန အတိဝိယ ရညော ဝလ္လဘာ ဘဝိဿတီ’’တိ အာဟ။ သော ဗဓိရအမစ္စော ‘‘ဝလ္လဘာ’’တိ ဝစနံ ဒုဿုတံ သုတွာ ‘‘ဝိဋဋူဘော’’တိ သလ္လက္ခေတွာ ရာဇာနံ ဥပဂန္တွာ ‘‘ဒေဝ၊ ကုမာရဿ ကိရ ‘ဝိဋဋူဘော’တိ နာမံ ကရောထာ’’တိ အာဟ။ ရာဇာ ‘‘ပေါရာဏကံ နော ကုလဒတ္တိကံ နာမံ ဘဝိဿတီ’’တိ စိန္တေတွာ ‘‘ဝိဋဋူဘော’’တိ နာမံ အကာသိ။ တတော ပဋ္ဌာယ ကုမာရော ကုမာရပရိဟာရေန ဝဍ္ဎန္တော သတ္တဝဿိကကာလေ အညေသံ ကုမာရာနံ မာတာမဟကုလတော ဟတ္ထိရူပကအဿရူပကာဒီနိ အာဟရိယမာနာနိ ဒိသွာ မာတရံ ပုစ္ဆိ ‘‘အမ္မ၊ အညေသံ မာတာမဟကုလတော ပဏ္ဏာကာရော အာဟရိယတိ၊ မယှံ ကောစိ ကိဉ္စိ န ပေသေသိ၊ ကိံ တွံ နိမ္မာတာ နိပ္ပိတာသီ’’တိ? အထ နံ သာ ‘‘တာတ၊ သကျရာဇာနော မာတာမဟာ ဒူရေ ပန ဝသန္တိ၊ တေန တေ ကိဉ္စိ န ပေသေန္တီ’’တိ ဝတွာ ဝဉ္စေသိ။

ပုန သောဠသဝဿိကကာလေ ‘‘အမ္မ၊ မာတာမဟကုလံ ပဿိတုကာမောမှီ’’တိ ဝတွာ ‘‘အလံ တာတ၊ ကိံ တတ္ထ ဂန္တွာ ကရိဿသီ’’တိ ဝါရိယမာနောပိ ပုနပ္ပုနံ ယာစိ။ အထဿ မာတာ ‘‘တေန ဟိ ဂစ္ဆာဟီ’’တိ သမ္ပဋိစ္ဆိ။ သော ပိတု အာရောစေတွာ မဟန္တေန ပရိဝါရေန နိက္ခမိ။ ဝါသဘခတ္တိယာ ပုရေတရံ ပဏ္ဏံ ပေသေသိ ‘‘အဟံ ဣဓ သုခံ ဝသာမိ၊ သာမိနော ကိဉ္စိ အန္တရံ မာ ဒဿယိံသူ’’တိ။ သာကိယာ ဝိဋဋူဘဿ အာဂမနံ ဉတွာ ‘‘ဝန္ဒိတုံ န သက္ကာ’’တိ တဿ ဒဟရဒဟရေ ကုမာရကေ ဇနပဒံ ပဟိဏိံသု။ ကုမာရေ ကပိလဝတ္ထုံ သမ္ပတ္တေ သာကိယာ သန္ထာဂါရေ သန္နိပတိံသု။ ကုမာရော သန္ထာဂါရံ ဂန္တွာ အဋ္ဌာသိ။ အထ နံ ‘‘အယံ တေ၊ တာတ၊ မာတာမဟော၊ အယံ မာတုလော’’တိ ဝဒိံသု သော သဗ္ဗေ ဝန္ဒမာနော ဝိစရိ။ သော ယာဝပိဋ္ဌိယာ ရုဇနပ္ပမာဏာ ဝန္ဒိတွာ ဧကမ္ပိ အတ္တာနံ ဝန္ဒမာနံ အဒိသွာ ‘‘ကိံ နု ခေါ မံ ဝန္ဒန္တာ နတ္ထီ’’တိ ပုစ္ဆိ။ သာကိယာ ‘‘တာတ၊ တဝ ကနိဋ္ဌကုမာရာ ဇနပဒံ ဂတာ’’တိ ဝတွာ တဿ မဟန္တံ သက္ကာရံ ကရိံသု။ သော ကတိပါဟံ ဝသိတွာ မဟန္တေန ပရိဝါရေန နိက္ခမိ။ အထေကာ ဒါသီ သန္ထာဂါရေ တေန နိသိန္နဖလကံ ‘‘ဣဒံ ဝါသဘခတ္တိယာယ ဒါသိယာ ပုတ္တဿ နိသိန္နဖလက’’န္တိ အက္ကောသိတွာ ပရိဘာသိတွာ ခီရောဒကေန ဓောဝိ။ ဧကော ပုရိသော အတ္တနော အာဝုဓံ ပမုဿိတွာ နိဝတ္တော တံ ဂဏှန္တော ဝိဋဋူဘကုမာရဿ အက္ကောသနသဒ္ဒံ သုတွာ တံ အန္တရံ ပုစ္ဆိတွာ ‘‘ဝါသဘခတ္တိယာ ဒါသိယာ ကုစ္ဆိသ္မိံ မဟာနာမသက္ကဿ ဇာတာ’’တိ ဉတွာ ဂန္တွာ ဗလကာယဿ ကထေသိ။ ‘‘ဝါသဘခတ္တိယာ ကိရ ဒါသိယာ ဓီတာ’’တိ မဟာကောလာဟလံ အဟောသိ။

ကုမာရော တံ သုတွာ ‘‘ဧတေ တာဝ မမ နိသိန္နဖလကံ ခီရောဒကေန ဓောဝန္တု၊ အဟံ ပန ရဇ္ဇေ ပတိဋ္ဌိတကာလေ ဧတေသံ ဂလလောဟိတံ ဂဟေတွာ မမ နိသိန္နဖလကံ ဓောဝိဿာမီ’’တိ စိတ္တံ ပဋ္ဌပေသိ။ တသ္မိံ သာဝတ္ထိံ ဂတေ အမစ္စာ သဗ္ဗံ ပဝတ္တိံ ရညော အာရောစေသုံ။ ရာဇာ ‘‘သဗ္ဗေ မယှံ ဒါသိဓီတရံ အဒံသူ’’တိ သာကိယာနံ ကုဇ္ဈိတွာ ဝါသဘခတ္တိယာယ စ ပုတ္တဿ စ ဒိန္နပရိဟာရံ အစ္ဆိန္ဒိတွာ ဒါသဒါသီဟိ လဒ္ဓဗ္ဗပရိဟာရမတ္တမေဝ ဒါပေသိ။ တတော ကတိပါဟစ္စယေန သတ္ထာ ရာဇနိဝေသနံ အာဂန္တွာ နိသီဒိ။ ရာဇာ သတ္ထာရံ ဝန္ဒိတွာ ‘‘ဘန္တေ၊ တုမှာကံ ကိရ ဉာတကေဟိ ဒါသိဓီတာ မယှံ ဒိန္နာ၊ တေနဿာ အဟံ သပုတ္တာယ ပရိဟာရံ အစ္ဆိန္ဒိတွာ ဒါသဒါသီဟိ လဒ္ဓဗ္ဗပရိဟာရမတ္တမေဝ ဒါပေသိ’’န္တိ အာဟ။ သတ္ထာ ‘‘အယုတ္တံ၊ မဟာရာဇ၊ သာကိယေဟိ ကတံ၊ ဒဒန္တေဟိ နာမ သမာနဇာတိကာ ဒါတဗ္ဗာ အဿ။ တံ ပန မဟာရာဇ၊ ဝဒါမိ ဝါသဘခတ္တိယာ ခတ္တိယရာဇဓီတာ ခတ္တိယဿ ရညော ဂေဟေ အဘိသေကံ လဘိ၊ ဝိဋဋူဘောပိ ခတ္တိယရာဇာနမေဝ ပဋိစ္စ ဇာတော၊ မာတုဂေါတ္တံ နာမ ကိံ ကရိဿတိ၊ ပိတုဂေါတ္တမေဝ ပမာဏန္တိ ပေါရာဏကပဏ္ဍိတာ ဒလိဒ္ဒိတ္ထိယာ ကဋ္ဌဟာရိကာယပိ အဂ္ဂမဟေသိဋ္ဌာနံ အဒံသု၊ တဿာ စ ကုစ္ဆိမှိ ဇာတကုမာရော ဒွါဒသယောဇနိကာယ ဗာရာဏသိယာ ရဇ္ဇံ ကတွာ ကဋ္ဌဝါဟနရာဇာ နာမ ဇာတော’’တိ ကဋ္ဌဝါဟနဇာတကံ (ဇာ။ ၁။၁။၇) ကထေသိ ။ ရာဇာ သတ္ထု ဓမ္မကထံ သုတွာ ‘‘ပိတုဂေါတ္တမေဝ ကိရ ပမာဏ’’န္တိ သုတွာ တုဿိတွာ မာတာပုတ္တာနံ ပကတိပရိဟာရမေဝ ဒါပေသိ။

ရညော ပန ဗန္ဓုလော နာမ သေနာပတိ မလ္လိကံ နာမ အတ္တနော ဘရိယံ ဝဉ္ဈံ ‘‘တဝ ကုလဃရမေဝ ဂစ္ဆာဟီ’’တိ ကုသိနာရမေဝ ပေသေသိ။ သာ ‘‘သတ္ထာရံ ဒိသွာဝ ဂမိဿာမီ’’တိ ဇေတဝနံ ပဝိသိတွာ တထာဂတံ ဝန္ဒိတွာ ဧကမန္တံ ဌိတာ ‘‘ကဟံ ဂစ္ဆသီ’’တိ စ ပုဋ္ဌာ ‘‘သာမိကော မေ၊ ဘန္တေ၊ ကုလဃရံ ပေသေသီ’’တိ ဝတွာ ‘‘ကသ္မာ’’တိ ဝုတ္တာ ‘‘ဝဉ္ဈာ အပုတ္တိကာ၊ ဘန္တေ’’တိ ဝတွာ သတ္ထာရာ ‘‘ယဒိ ဧဝံ ဂမနကိစ္စံ နတ္ထိ၊ နိဝတ္တာဟီ’’တိ ဝုတ္တာ တုဋ္ဌာ သတ္ထာရံ ဝန္ဒိတွာ နိဝေသနမေဝ ပုန အဂမာသိ။ ‘‘ကသ္မာ နိဝတ္တသီ’’တိ ပုဋ္ဌာ ‘‘ဒသဗလေန နိဝတ္တိတာမှီ’’တိ အာဟ။ သေနာပတိ ‘‘ဒိဋ္ဌံ ဘဝိဿတိ တထာဂတေန ကာရဏ’’န္တိ အာဟ။ သာ န စိရဿေဝ ဂဗ္ဘံ ပဋိလဘိတွာ ဥပ္ပန္နဒေါဟဠာ ‘‘ဒေါဟဠော မေ ဥပ္ပန္နော’’တိ အာရောစေသိ။ ‘‘ကိံ ဒေါဟဠော’’တိ? ‘‘ဝေသာလိယာ နဂရေ လိစ္ဆဝိရာဇာနံ အဘိသေကမင်္ဂလပေါက္ခရဏိံ ဩတရိတွာ နှတွာ ပါနီယံ ပိဝိတုကာမာမှိ၊ သာမီ’’တိ။ သေနာပတိ ‘‘သာဓူ’’တိ ဝတွာ သဟဿထာမဓနုံ ဂဟေတွာ တံ ရထံ အာရောပေတွာ သာဝတ္ထိတော နိက္ခမိတွာ ရထံ ပါဇေန္တော ဝေသာလိံ ပါဝိသိ။

တသ္မိဉ္စ ကာလေ ကောသလရညော ဗန္ဓုလသေနာပတိနာ သဒ္ဓိံ ဧကာစရိယကုလေ ဥဂ္ဂဟိတသိပ္ပော မဟာလိ နာမ လိစ္ဆဝီ အန္ဓော လိစ္ဆဝီနံ အတ္ထဉ္စ ဓမ္မဉ္စ အနုသာသန္တော ဒွါရသမီပေ ဝသတိ။ သော ရထဿ ဥမ္မာရေ ပဋိဃဋ္ဋနသဒ္ဒံ သုတွာ ‘‘ဗန္ဓုလမလ္လဿ ရထပတနသဒ္ဒေါ ဧသော၊ အဇ္ဇ လိစ္ဆဝီနံ ဘယံ ဥပ္ပဇ္ဇိဿတီ’’တိ အာဟ။ ပေါက္ခရဏိယာ အန္တော စ ဗဟိ စ အာရက္ခာ ဗလဝါ၊ ဥပရိ လောဟဇာလံ ပတ္ထဋံ၊ သကုဏာနမ္ပိ ဩကာသော နတ္ထိ။ သေနာပတိ ပန ရထာ ဩတရိတွာ အာရက္ခကေ ခဂ္ဂေန ပဟရန္တော ပလာပေတွာ လောဟဇာလံ ဆိန္ဒိတွာ အန္တောပေါက္ခရဏိယံ ဘရိယံ ဩတာရေတွာ နှာပေတွာ ပါယေတွာ သယမ္ပိ နှတွာ မလ္လိကံ ရထံ အာရောပေတွာ နဂရာ နိက္ခမိတွာ အာဂတမဂ္ဂေနေဝ ပါယာသိ။ အာရက္ခကာ ဂန္တွာ လိစ္ဆဝီနံ အာရောစေသုံ။ လိစ္ဆဝိရာဇာနော ကုဇ္ဈိတွာ ပဉ္စ ရထသတာနိ အာရုယှ ‘‘ဗန္ဓုလမလ္လံ ဂဏှိဿာမာ’’တိ နိက္ခမိံသု။ တံ ပဝတ္တိံ မဟာလိဿ အာရောစေသုံ။ မဟာလိ ‘‘မာ ဂမိတ္ထ၊ သော ဟိ ဝေါ သဗ္ဗေ ဃာတယိဿတီ’’တိ အာဟ။ တေပိ ‘‘မယံ ဂမိဿာမယေဝါ’’တိ ဝဒိံသု။ တေန ဟိ စက္ကဿ ယာဝ နာဘိတော ပထဝိံ ပဝိဋ္ဌဋ္ဌာနံ ဒိသွာ နိဝတ္တေယျာထ၊ တတော အနိဝတ္တန္တာ ပုရတော အသနိသဒ္ဒံ ဝိယ သုဏိဿထ၊ တမှာ ဌာနာ နိဝတ္တေယျာထ၊ တတော အနိဝတ္တန္တာ တုမှာကံ ရထဓုရေသု ဆိဒ္ဒံ ပဿိဿထ၊ တမှာ ဌာနာ နိဝတ္တေယျာထ၊ ပုရတော မာဂမိတ္ထာတိ။ တေ တဿ ဝစနေန အနိဝတ္တိတွာ တံ အနုဗန္ဓိံသုယေဝ။

မလ္လိကာ ဒိသွာ ‘‘ရထာ၊ သာမိ၊ ပညာယန္တီ’’တိ အာဟ။ တေန ဟိ ဧကဿ ရထဿ ဝိယ ပညာယနကာလေ မမ အာရောစေယျာသီတိ။ သာ ယဒါ သဗ္ဗေ ဧကော ဝိယ ဟုတွာ ပညာယိံသု၊ တဒါ ‘‘ဧကမေဝ သာမိ ရထသီသံ ပညာယတီ’’တိ အာဟ။ ဗန္ဓုလော ‘‘တေန ဟိ ဣမာ ရသ္မိယော ဂဏှာဟီ’’တိ တဿာ ရသ္မိယော ဒတွာ ရထေ ဌိတောဝ ဓနုံ အာရောပေတိ၊ ရထစက္ကံ ယာဝ နာဘိတော ပထဝိံ ပါဝိသိ၊ လိစ္ဆဝိနော တံ ဌာနံ ဒိသွာပိ န နိဝတ္တိံသု။ ဣတရော ထောကံ ဂန္တွာ ဇိယံ ပေါထေသိ၊ အသနိသဒ္ဒေါ ဝိယ အဟောသိ။ တေ တတောပိ န နိဝတ္တိံသု၊ အနုဗန္ဓန္တာ ဂစ္ဆန္တေဝ။ ဗန္ဓုလော ရထေ ဌိတကောဝ ဧကံ သရံ ခိပိ။ သော ပဉ္စန္နံ ရထသတာနံ ရထသီသံ ဆိဒ္ဒံ ကတွာ ပဉ္စ ရာဇသတာနိ ပရိကရဗန္ဓနဋ္ဌာနေ ဝိဇ္ဈိတွာ ပထဝိံ ပါဝိသိ။ တေ အတ္တနော ဝိဒ္ဓဘာဝံ အဇာနိတွာ ‘‘တိဋ္ဌ ရေ၊ တိဋ္ဌ ရေ’’တိ ဝဒန္တာ အနုဗန္ဓိံသုယေဝ။ ဗန္ဓုလော ရထံ ဌပေတွာ ‘‘တုမှေ မတကာ၊ မတကေဟိ သဒ္ဓိံ မယှံ ယုဒ္ဓံ နာမ နတ္ထီ’’တိ အာဟ။ တေ ‘‘မတကာ နာမ အမှာဒိသာ နေဝ ဟောန္တီ’’တိ ဝဒိံသု။ ‘‘တေန ဟိ သဗ္ဗပစ္ဆိမဿ ပရိကရံ မောစေထာ’’တိ။ တေ မောစယိံသု။ သော မုတ္တမတ္တေယေဝ မရိတွာ ပတိတော။ အထ နေ ‘‘သဗ္ဗေပိ တုမှေ ဧဝရူပါ၊ အတ္တနော ဃရာနိ ဂန္တွာ သံဝိဓာတဗ္ဗံ သံဝိဒဟိတွာ ပုတ္တဒါရေ အနုသာသိတွာ သန္နာဟံ မောစေထာ’’တိ အာဟ။ တေ တထာ ကတွာ သဗ္ဗေ ဇီဝိတက္ခယံ ပတ္တာ။

ဗန္ဓုလောပိ မလ္လိကံ သာဝတ္ထိံ အာနေသိ။ သာ သောဠသက္ခတ္တုံ ယမကေ ပုတ္တေ ဝိဇာယိ၊ သဗ္ဗေပိ သူရာ ထာမသမ္ပန္နာ အဟေသုံ၊ သဗ္ဗသိပ္ပေ နိပ္ဖတ္တိံ ပါပုဏိံသု။ ဧကေကဿပိ ပုရိသသဟဿပရိဝါရော အဟောသိ ။ ပိတရာ သဒ္ဓိံ ရာဇနိဝေသနံ ဂစ္ဆန္တေဟိ တေဟေဝ ရာဇင်္ဂဏံ ပရိပူရိ။ အထေကဒိဝသံ ဝိနိစ္ဆယေ ကူဋဍ္ဍပရာဇိတာ မနုဿာ ဗန္ဓုလံ အာဂစ္ဆန္တံ ဒိသွာ မဟာရဝံ ဝိရဝန္တာ ဝိနိစ္ဆယအမစ္စာနံ ကူဋဍ္ဍကာရဏံ တဿ အာရောစေသုံ။ သောပိ ဝိနိစ္ဆယံ ဂန္တွာ တံ အဍ္ဍံ တီရေတွာ သာမိကမေဝ သာမိကံ၊ အဿာမိကမေဝ အဿာမိကံ အကာသိ။ မဟာဇနော မဟာသဒ္ဒေန သာဓုကာရံ ပဝတ္တေသိ။ ရာဇာ ‘‘ကိမိဒ’’န္တိ ပုစ္ဆိတွာ တမတ္ထံ သုတွာ တုဿိတွာ သဗ္ဗေပိ တေ အမစ္စေ ဟာရေတွာ ဗန္ဓုလဿေဝ ဝိနိစ္ဆယံ နိယျာဒေသိ။ သော တတော ပဋ္ဌာယ သမ္မာ ဝိနိစ္ဆိနိ။ တတော ပေါရာဏကဝိနိစ္ဆယိကာ လဉ္ဇံ အလဘန္တာ အပ္ပလာဘာ ဟုတွာ ‘‘ဗန္ဓုလော ရဇ္ဇံ ပတ္ထေတီ’’တိ ရာဇကုလေ ပရိဘိန္ဒိံသု။ ရာဇာ တံ ကထံ ဂဟေတွာ စိတ္တံ နိဂ္ဂဟေတုံ နာသက္ခိ၊ ‘‘ဣမသ္မိံ ဣဓေဝ ဃာတိယမာနေ ဂရဟာ မေ ဥပ္ပဇ္ဇိဿတီ’’တိ ပုန စိန္တေတွာ ‘‘ပယုတ္တပုရိသေဟိ ပစ္စန္တံ ပဟရာပေတွာ တေ ပလာပေတွာ နိဝတ္တကာလေ အန္တရာမဂ္ဂေ ပုတ္တေဟိ သဒ္ဓိံ မာရေတုံ ဝဋ္ဋတီ’’တိ ဗန္ဓုလံ ပက္ကောသာပေတွာ ‘‘ပစ္စန္တော ကိရ ကုပိတော၊ တဝ ပုတ္တေဟိ သဒ္ဓိံ ဂန္တွာ စောရေ ဂဏှာဟီ’’တိ ပဟိဏိတွာ ‘‘ဧတ္ထေဝဿ ဒွတ္တိံသာယ ပုတ္တေဟိ သဒ္ဓိံ သီသံ ဆိန္ဒိတွာ အာဟရထာ’’တိ တေဟိ သဒ္ဓိံ အညေပိ သမတ္ထေ မဟာယောဓေ ပေသေသိ။ တသ္မိံ ပစ္စန္တံ ဂစ္ဆန္တေယေဝ ‘‘သေနာပတိ ကိရ အာဂစ္ဆတီ’’တိ သုတွာဝ ပယုတ္တကစောရာ ပလာယိံသု။ သော တံ ပဒေသံ အာဝါသာပေတွာ ဇနပဒံ သဏ္ဌပေတွာ နိဝတ္တိ။

အထဿ နဂရတော အဝိဒူရေ ဌာနေ တေ ယောဓာ ပုတ္တေဟိ သဒ္ဓိံ သီသံ ဆိန္ဒိံသု။ တံ ဒိဝသံ မလ္လိကာယ ပဉ္စဟိ ဘိက္ခုသတေဟိ သဒ္ဓိံ ဒွေ အဂ္ဂသာဝကာ နိမန္တိတာ ဟောန္တိ။ အထဿာ ပုဗ္ဗဏှသမယေ ‘‘သာမိကဿ တေ သဒ္ဓိံ ပုတ္တေဟိ သီသံ ဆိန္ဒိံသူ’’တိ ပဏ္ဏံ အာဟရိတွာ အဒံသု။ သာ တံ ပဝတ္တိံ ဉတွာ ကဿစိ ကိဉ္စိ အဝတွာ ပဏ္ဏံ ဥစ္ဆင်္ဂေ ကတွာ ဘိက္ခုသင်္ဃမေဝ ပရိဝိသိ။ အထဿာ ပရိစာရိကာ ဘိက္ခူနံ ဘတ္တံ ဒတွာ သပ္ပိစာဋိံ အာဟရန္တိယော ထေရာနံ ပုရတော စာဋိံ ဘိန္ဒိံသု။ ဓမ္မသေနာပတိ ‘‘ဥပါသိကေ၊ ဘေဒနဓမ္မံ ဘိန္နံ၊ န စိန္တေတဗ္ဗ’’န္တိ အာဟ။ သာ ဥစ္ဆင်္ဂတော ပဏ္ဏံ နီဟရိတွာ ‘‘ဒွတ္တိံသပုတ္တေဟိ သဒ္ဓိံ ပိတု သီသံ ဆိန္နန္တိ မေ ဣမံ ပဏ္ဏံ အာဟရိံသု၊ အဟံ ဣဒံ သုတွာပိ န စိန္တေမိ၊ သပ္ပိစာဋိယာ ဘိန္နာယ ကိံ စိန္တေမိ၊ ဘန္တေ’’တိ အာဟ။ ဓမ္မသေနာပတိ ‘‘အနိမိတ္တမနညာတ’’န္တိအာဒီနိ (သု။ နိ။ ၅၇၉) ဝတွာ ဓမ္မံ ဒေသေတွာ ဥဋ္ဌာယာသနာ ဝိဟာရံ အဂမာသိ။ သာပိ ဒွတ္တိံသ သုဏိသာယော ပက္ကောသာပေတွာ ‘‘တုမှာကံ သာမိကာ အတ္တနော ပုရိမကမ္မဖလံ လဘိံသု၊ တုမှေ မာ သောစိတ္ထ မာ ပရိဒေဝိတ္ထ၊ ရညော ဥပရိ မနောပဒေါသံ မာ ကရိတ္ထာ’’တိ ဩဝဒိ။

ရညော စရပုရိသာ တံ ကထံ သုတွာ တေသံ နိဒ္ဒေါသဘာဝံ ရညော ကထယိံသု။ ရာဇာ သံဝေဂပ္ပတ္တော တဿာ နိဝေသနံ ဂန္တွာ မလ္လိကဉ္စ သုဏိသာယော စဿာ ခမာပေတွာ မလ္လိကာယ ဝရံ အဒါသိ။ သာ ‘‘ဂဟိတော မေ ဟောတူ’’တိ ဝတွာ တသ္မိံ ဂတေ မတကဘတ္တံ ဒတွာ နှတွာ ရာဇာနံ ဥပသင်္ကမိတွာ ဝန္ဒိတွာ ‘‘ဒေဝ၊ တုမှေဟိ မေ ဝရော ဒိန္နော၊ မယှဉ္စ အညေန အတ္ထော နတ္ထိ၊ ဒွတ္တိံသာယ မေ သုဏိသာနံ မမ စ ကုလဃရဂမနံ အနုဇာနာထာ’’တိ အာဟ။ ရာဇာ သမ္ပဋိစ္ဆိ။ သာ ဒွတ္တိံသာယ သုဏိသာနံ သကကုလံ ပေသေတွာ သယံ ကုသိနာရနဂရေ အတ္တနော ကုလဃရံ အဂမာသိ။ ရာဇာ ဗန္ဓုလသေနာပတိနော ဘာဂိနေယျဿ ဒီဃကာရာယနဿ နာမ သေနာပတိဋ္ဌာနံ အဒါသိ။ သော ပန ‘‘မာတုလော မေ ဣမိနာ မာရိတော’’တိ ရညော ဩတာရံ ဂဝေသန္တော ဝိစရတိ။ ရာဇာပိ နိပ္ပရာဓဿ ဗန္ဓုလဿ မာရိတကာလတော ပဋ္ဌာယ ဝိပ္ပဋိသာရီ စိတ္တဿာဒံ န လဘတိ၊ ရဇ္ဇသုခံ နာနုဘောတိ။

တဒါ သတ္ထာ သာကိယာနံ ဝေဠုံ နာမ နိဂမံ ဥပနိဿာယ ဝိဟရတိ။ ရာဇာ တတ္ထ ဂန္တွာ အာရာမတော အဝိဒူရေ ခန္ဓာဝါရံ နိဝါသေတွာ ‘‘မဟန္တေန ပရိဝါရေန သတ္ထာရံ ဝန္ဒိဿာမာ’’တိ ဝိဟာရံ ဂန္တွာ ပဉ္စ ရာဇကကုဓဘဏ္ဍာနိ ဒီဃကာရာယနဿ ဒတွာ ဧကကောဝ ဂန္ဓကုဋိံ ပါဝိသိ။ သဗ္ဗံ ဓမ္မစေတိယသုတ္တနိယာမေနေဝ (မ။ နိ။ ၂။၃၆၄ အာဒယော) ဝေဒိတဗ္ဗံ။ တသ္မိံ ဂန္ဓကုဋိံ ပဝိဋ္ဌေ ဒီဃကာရာယနော တာနိ ပဉ္စ ရာဇကကုဓဘဏ္ဍာနိ ဂဟေတွာ ဝိဋဋူဘံ ရာဇာနံ ကတွာ ရညော ဧကံ အဿံ ဧကဉ္စ ဥပဋ္ဌာနကာရိကံ မာတုဂါမံ နိဝတ္တေတွာ သာဝတ္ထိံ အဂမာသိ။ ရာဇာ သတ္ထာရာ သဒ္ဓိံ ပိယကထံ ကထေတွာ နိက္ခန္တော သေနံ အဒိသွာ တံ မာတုဂါမံ ပုစ္ဆိတွာ တံ ပဝတ္တိံ သုတွာ ‘‘အဟံ ဘာဂိနေယျံ အဇာတသတ္တုံ အာဒါယ အာဂန္တွာ ဝိဋဋူဘံ ဂဟေဿာမီ’’တိ ရာဇဂဟနဂရံ ဂစ္ဆန္တော ဝိကာလေ ဒွါရေသု ပိဟိတေသု နဂရံ ပဝိသိတုမသက္ကောန္တော ဧကိဿာယ သာလာယ နိပဇ္ဇိတွာ ဝါတာတပေန ကိလန္တော ရတ္တိဘာဂေ တတ္ထေဝ ကာလမကာသိ။ ဝိဘာတာယ ရတ္တိယာ ‘‘ဒေဝ ကောသလနရိန္ဒ၊ ဣဒါနိ အနာထောသိ ဇာတော’’တိ ဝိလပန္တိယာ တဿာ ဣတ္ထိယာ သဒ္ဒံ သုတွာ ရညော အာရောစေသုံ။ သော မာတုလဿ မဟန္တေန သက္ကာရေန သရီရကိစ္စံ ကာရေသိ။

ဝိဋဋူဘောပိ ရဇ္ဇံ လဘိတွာ တံ ဝေရံ သရိတွာ ‘‘သဗ္ဗေပိ သာကိယေ မာရေဿာမီ’’တိ မဟတိယာ သေနာယ နိက္ခမိ။ တံ ဒိဝသံ သတ္ထာ ပစ္စူသသမယေ လောကံ ဝေါလောကေန္တော ဉာတိသင်္ဃဿ ဝိနာသံ ဒိသွာ ‘‘ဉာတိသင်္ဂဟံ ကာတုံ ဝဋ္ဋတီ’’တိ စိန္တေတွာ ပုဗ္ဗဏှသမယေ ပိဏ္ဍာယ စရိတွာ ပိဏ္ဍပါတပဋိက္ကန္တော ဂန္ဓကုဋိယံ သီဟသေယျံ ကပ္ပေတွာ သာယနှသမယေ အာကာသေန ဂန္တွာ ကပိလဝတ္ထုသာမန္တေ ဧကသ္မိံ ကဗရစ္ဆာယေ ရုက္ခမူလေ နိသီဒိ။ တတော အဝိဒူရေ ဝိဋဋူဘဿ ရဇ္ဇသီမာယ အန္တော သန္ဒစ္ဆာယော နိဂြောဓရုက္ခော အတ္ထိ၊ ဝိဋဋူဘော သတ္ထာရံ ဒိသွာ ဥပသင်္ကမိတွာ ဝန္ဒိတွာ ‘‘ဘန္တေ၊ ကိံကာရဏာ ဧဝရူပါယ ဥဏှဝေလာယ ဣမသ္မိံ ကဗရစ္ဆာယေ ရုက္ခမူလေ နိသီဒထ၊ ဧတသ္မိံ သန္ဒစ္ဆာယေ နိဂြောဓရုက္ခမူလေ နိသီဒထ၊ ဘန္တေ’’တိ ဝတွာ ‘‘ဟောတု၊ မဟာရာဇ၊ ဉာတကာနံ ဆာယာ နာမ သီတလာ’’တိ ဝုတ္တေ ‘‘ဉာတကာနံ ရက္ခဏတ္ထာယ သတ္ထာ အာဂတော ဘဝိဿတီ’’တိ စိန္တေတွာ သတ္ထာရံ ဝန္ဒိတွာ သာဝတ္ထိမေဝ ပစ္စာဂမိ။ သတ္ထာပိ ဥပ္ပတိတွာ ဇေတဝနမေဝ ဂတော။

ရာဇာ သာကိယာနံ ဒေါသံ သရိတွာ ဒုတိယံ နိက္ခမိတွာ တထေဝ သတ္ထာရံ ပဿိတွာ ပုန နိဝတ္တိတွာ တတိယဝါရေ နိက္ခမိတွာ တတ္ထေဝ သတ္ထာရံ ပဿိတွာ နိဝတ္တိ။ စတုတ္ထဝါရေ ပန တသ္မိံ နိက္ခန္တေ သတ္ထာ သာကိယာနံ ပုဗ္ဗကမ္မံ ဩလောကေတွာ တေသံ နဒိယံ ဝိသပက္ခိပနပါပကမ္မဿ အပ္ပဋိဗာဟိရဘာဝံ ဉတွာ စတုတ္ထဝါရေ န အဂမာသိ။ ဝိဋဋူဘရာဇာ ခီရပါယကေ ဒါရကေ အာဒိံ ကတွာ သဗ္ဗေ သာကိယေ ဃာတေတွာ ဂလလောဟိတေန နိသိန္နဖလကံ ဓောဝိတွာ ပစ္စာဂမိ။ သတ္ထရိ တတိယဝါရေ ဂမနတော ပစ္စာဂန္တွာ ပုနဒိဝသေ ပိဏ္ဍာယ စရိတွာ နိဋ္ဌာပိတဘတ္တကိစ္စေ ဂန္ဓကုဋိယံ ပဝိသန္တေ ဒိသာဟိ သန္နိပတိတာ ဘိက္ခူ ဓမ္မသဘာယံ နိသီဒိတွာ ‘‘အာဝုသော၊ သတ္ထာ အတ္တာနံ ဒဿေတွာ ရာဇာနံ နိဝတ္တာပေတွာ ဉာတကေ မရဏဘယာ မောစေသိ၊ ဧဝံ ဉာတကာနံ အတ္ထစရော သတ္ထာ’’တိ ဘဂဝတော ဂုဏကထံ ကထယိံသု။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ တထာဂတော ဉာတကာနံ အတ္ထံ စရတိ၊ ပုဗ္ဗေပိ စရိယေဝါ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တော နာမ ရာဇာ ဒသ ရာဇဓမ္မေ အကောပေတွာ ဓမ္မေန ရဇ္ဇံ ကာရေန္တော ဧကဒိဝသံ စိန္တေသိ ‘‘ဇမ္ဗုဒီပတလေ ရာဇာနော ဗဟုထမ္ဘေသု ပါသာဒေသု ဝသန္တိ၊ တသ္မာ ဗဟူဟိ ထမ္ဘေဟိ ပါသာဒကရဏံ နာမ အနစ္ဆရိယံ၊ ယံနူနာဟံ ဧကထမ္ဘကံ ပါသာဒံ ကာရေယျံ၊ ဧဝံ သဗ္ဗရာဇူနံ အဂ္ဂရာဇာ ဘဝိဿာမီ’’တိ။ သော ဝဍ္ဎကီ ပက္ကောသာပေတွာ ‘‘မယှံ သောဘဂ္ဂပ္ပတ္တံ ဧကထမ္ဘကံ ပါသာဒံ ကရောထာ’’တိ အာဟ။ တေ ‘‘သာဓူ’’တိ သမ္ပဋိစ္ဆိတွာ အရညံ ပဝိသိတွာ ဥဇူ မဟန္တေ ဧကထမ္ဘကပါသာဒါရဟေ ဗဟူ ရုက္ခေ ဒိသွာ ‘‘ဣမေ ရုက္ခာ သန္တိ၊ မဂ္ဂေါ ပန ဝိသမော၊ န သက္ကာ ဩတာရေတုံ၊ ရညော အာစိက္ခိဿာမာ’’တိ စိန္တေတွာ တထာ အကံသု။ ရာဇာ ‘‘ကေနစိ ဥပါယေန သဏိကံ ဩတာရေထာ’’တိ ဝတွာ ‘‘ဒေဝ၊ ယေန ကေနစိ ဥပါယေန န သက္ကာ’’တိ ဝုတ္တေ ‘‘တေန ဟိ မမ ဥယျာနေ ဧကံ ရုက္ခံ ဥပဓာရေထာ’’တိ အာဟ။ ဝဍ္ဎကီ ဥယျာနံ ဂန္တွာ ဧကံ သုဇာတံ ဥဇုကံ ဂါမနိဂမပူဇိတံ ရာဇကုလတောပိ လဒ္ဓဗလိကမ္မံ မင်္ဂလသာလရုက္ခံ ဒိသွာ ရညော သန္တိကံ ဂန္တွာ တမတ္ထံ အာရောစေသုံ။ ရာဇာ ‘‘ဥယျာနေ ရုက္ခော နာမ မမ ပဋိဗဒ္ဓါ၊ ဂစ္ဆထ ဘော တံ ဆိန္ဒထာ’’တိ အာဟ။ တေ ‘‘သာဓူ’’တိ သမ္ပဋိစ္ဆိတွာ ဂန္ဓမာလာဒိဟတ္ထာ ဥယျာနံ ဂန္တွာ ရုက္ခေ ဂန္ဓပဉ္စင်္ဂုလိကံ ဒတွာ သုတ္တေန ပရိက္ခိပိတွာ ပုပ္ဖကဏ္ဏိကံ ဗန္ဓိတွာ ဒီပံ ဇာလေတွာ ဗလိကမ္မံ ကတွာ ‘‘ဣတော သတ္တမေ ဒိဝသေ အာဂန္တွာ ရုက္ခံ ဆိန္ဒိဿာမ၊ ရာဇာ ဆိန္ဒာပေတိ၊ ဣမသ္မိံ ရုက္ခေ နိဗ္ဗတ္တဒေဝတာ အညတ္ထ ဂစ္ဆတု၊ အမှာကံ ဒေါသော နတ္ထီ’’တိ သာဝေသုံ။

အထ တသ္မိံ နိဗ္ဗတ္တော ဒေဝပုတ္တော တံ ဝစနံ သုတွာ ‘‘နိဿံသယံ ဣမေ ဝဍ္ဎကီ ဣမံ ရုက္ခံ ဆိန္ဒိဿန္တိ၊ ဝိမာနံ မေ နဿိဿတိ၊ ဝိမာနပရိယန္တိကမေဝ ခေါ ပန မယှံ ဇီဝိတံ၊ ဣမဉ္စ ရက္ခံ ပရိဝါရေတွာ ဌိတေသု တရုဏသာလရုက္ခေသု နိဗ္ဗတ္တာနံ မမ ဉာတိဒေဝတာနမ္ပိ ဗဟူနိ ဝိမာနာနိ နဿိဿန္တိ။ ဝိမာနပရိယန္တိကမေဝ မမ ဉာတီနံ ဒေဝတာနမ္ပိ ဇီဝိတံ၊ န ခေါ ပန မံ တထာ အတ္တနော ဝိနာသော ဗာဓတိ၊ ယထာ ဉာတီနံ၊ တသ္မာ နေသံ မယာ ဇီဝိတံ ဒါတုံ ဝဋ္ဋတီ’’တိ စိန္တေတွာ အဍ္ဎရတ္တသမယေ ဒိဗ္ဗာလင်္ကာရပဋိမဏ္ဍိတော ရညော သိရိဂဗ္ဘံ ပဝိသိတွာ သကလဂဗ္ဘံ ဧကောဘာသံ ကတွာ ဥဿိသကပဿေ ရောဒမာနော အဋ္ဌာသိ။ ရာဇာ တံ ဒိသွာ ဘီတတသိတော တေန သဒ္ဓိံ သလ္လပန္တော ပဌမံ ဂါထမာဟ –

၁၃။

‘‘ကာ တွံ သုဒ္ဓေဟိ ဝတ္ထေဟိ၊ အဃေ ဝေဟာယသံ ဌိတာ၊

ကေန တျာဿူနိ ဝတ္တန္တိ၊ ကုတော တံ ဘယမာဂတ’’န္တိ။

တတ္ထ ကာ တွန္တိ နာဂယက္ခသုပဏ္ဏသက္ကာဒီသု ကာ နာမ တွန္တိ ပုစ္ဆတိ။ ဝတ္ထေဟီတိ ဝစနမတ္တမေဝေတံ၊ သဗ္ဗေပိ ပန ဒိဗ္ဗာလင်္ကာရေ သန္ဓာယေဝမာဟ။ အဃေတိ အပ္ပဋိဃေ အာကာသေ။ ဝေဟာယသန္တိ တဿေဝ ဝေဝစနံ။ ကေန တျာဿူနိ ဝတ္တန္တီတိ ကေန ကာရဏေန တဝ အဿူနိ ဝတ္တန္တိ။ ကုတောတိ ဉာတိဝိယောဂဓနဝိနာသာဒီနံ ကိံ နိဿာယ တံ ဘယမာဂတန္တိ ပုစ္ဆတိ။

တတော ဒေဝရာဇာ ဒွေ ဂါထာ အဘာသိ –

၁၄။

‘‘တဝေဝ ဒေဝ ဝိဇိတေ၊ ဘဒ္ဒသာလောတိ မံ ဝိဒူ၊

သဋ္ဌိ ဝဿသဟဿာနိ၊ တိဋ္ဌတော ပူဇိတဿ မေ။

၁၅။

‘‘ကာရယန္တာ နဂရာနိ၊ အဂါရေ စ ဒိသမ္ပတိ၊

ဝိဝိဓေ စာပိ ပါသာဒေ၊ န မံ တေ အစ္စမညိသုံ၊

ယထေဝ မံ တေ ပူဇေသုံ၊ တထေဝ တွမ္ပိ ပူဇယာ’’တိ။

တတ္ထ တိဋ္ဌတောတိ သကလဗာရာဏသိနဂရေဟိ စေဝ ဂါမနိဂမေဟိ စ တယာ စ ပူဇိတဿ နိစ္စံ ဗလိကမ္မဉ္စ သက္ကာရဉ္စ လဘန္တဿ မယှံ ဣမသ္မိံ ဥယျာနေ တိဋ္ဌန္တဿ ဧတ္တကော ကာလော ဂတောတိ ဒဿေတိ။ နဂရာနီတိ နဂရပဋိသင်္ခရဏကမ္မာနိ။ အဂါရေစာတိ ဘူမိဂေဟာနိ။ ဒိသမ္ပတီတိ ဒိသာနံ ပတိ၊ မဟာရာဇ။ န မံ တေတိ တေ နဂရပဋိသင်္ခရဏာဒီနိ ကရောန္တာ ဣမသ္မိံ နဂရေ ပေါရာဏကရာဇာနော မံ နာတိမညိသုံ နာတိက္ကမိံသု န ဝိဟေဌယိံသု၊ မမ နိဝါသရုက္ခံ ဆိန္ဒိတွာ အတ္တနော ကမ္မံ န ကရိံသု၊ မယှံ ပန သက္ကာရမေဝ ကရိံသူတိ အဝစ။ ယထေဝါတိ တသ္မာ ယထေဝ တေ ပေါရာဏကရာဇာနော မံ ပူဇယိံသု၊ ဧကောပိ ဣမံ ရုက္ခံ န ဆိန္ဒာပေသိ၊ တွဉ္စာပိ မံ တထေဝ ပူဇယ၊ မာ မေ ရုက္ခံ ဆေဒယီတိ။

တတော ရာဇာ ဒွေ ဂါထာ အဘာသိ –

၁၆။

‘‘တံ ဣဝါဟံ န ပဿာမိ၊ ထူလံ ကာယေန တေ ဒုမံ၊

အာရောဟပရိဏာဟေန၊ အဘိရူပေါသိ ဇာတိယာ။

၁၇။

‘‘ပါသာဒံ ကာရယိဿာမိ၊ ဧကတ္ထမ္ဘံ မနောရမံ၊

တတ္ထ တံ ဥပနေဿာမိ၊ စိရံ တေ ယက္ခ ဇီဝိတ’’န္တိ။

တတ္ထ ကာယေနာတိ ပမာဏေန။ ဣဒံ ဝုတ္တံ ဟောတိ – တဝ ပမာဏေန တံ ဝိယ ထူလံ မဟန္တံ အညံ ဒုမံ န ပဿာမိ၊ တွညေဝ ပန အာရောဟပရိဏာဟေန သုဇာတသင်္ခါတာယ သမသဏ္ဌာနဥဇုဘာဝပ္ပကာရာယ ဇာတိယာ စ အဘိရူပေါ သောဘဂ္ဂပ္ပတ္တော ဧကထမ္ဘပါသာဒါရဟောတိ။ ပါသာဒန္တိ တသ္မာ တံ ဆေဒါပေတွာ အဟံ ပါသာဒံ ကာရာပေဿာမေဝ။ တတ္ထ တန္တိ တံ ပနာဟံ သမ္မ ဒေဝရာဇ၊ တတ္ထ ပါသာဒေ ဥပနေဿာမိ၊ သော တွံ မယာ သဒ္ဓိံ ဧကတော ဝသန္တော အဂ္ဂဂန္ဓမာလာဒီနိ လဘန္တော သက္ကာရပ္ပတ္တော သုခံ ဇီဝိဿသိ၊ နိဝါသဋ္ဌာနာဘာဝေန မေ ဝိနာသော ဘဝိဿတီတိ မာ စိန္တယိ၊ စိရံ တေ ယက္ခ ဇီဝိတံ ဘဝိဿတီတိ။

တံ သုတွာ ဒေဝရာဇာ ဒွေ ဂါထာ အဘာသိ –

၁၈။

‘‘ဧဝံ စိတ္တံ ဥဒပါဒိ၊ သရီရေန ဝိနာဘာဝေါ၊

ပုထုသော မံ ဝိကန္တိတွာ၊ ခဏ္ဍသော အဝကန္တထ။

၁၉။

‘‘အဂ္ဂေ စ ဆေတွာ မဇ္ဈေ စ၊ ပစ္ဆာ မူလမှိ ဆိန္ဒထ၊

ဧဝံ မေ ဆိဇ္ဇမာနဿ၊ န ဒုက္ခံ မရဏံ သိယာ’’တိ။

တတ္ထ ဧဝံ စိတ္တံ ဥဒပါဒီတိ ယဒိ ဧဝံ စိတ္တံ တဝ ဥပ္ပန္နံ။ သရီရေန ဝိနာဘာဝေါတိ ယဒိ တေ မမ သရီရေန ဘဒ္ဒသာလရုက္ခေန သဒ္ဓိံ မမ ဝိနာဘာဝေါ ပတ္ထိတော။ ပုထုသောတိ ဗဟုဓာ။ ဝိကန္တိတွာတိ ဆိန္ဒိတွာ။ ခဏ္ဍသောတိ ခဏ္ဍာခဏ္ဍံ ကတွာ အဝကန္တထ။ အဂ္ဂေ စာတိ အဝကန္တန္တာ ပန ပဌမံ အဂ္ဂေ၊ တတော မဇ္ဈေ ဆေတွာ သဗ္ဗပစ္ဆာ မူလေ ဆိန္ဒထ။ ဧဝဉှိ မေ ဆိဇ္ဇမာနဿ န ဒုက္ခံ မရဏံ သိယာ၊ သုခံ နု ခဏ္ဍသော ဘဝေယျာတိ ယာစတိ။

တတော ရာဇာ ဒွေ ဂါထာ အဘာသိ –

၂၀။

‘‘ဟတ္ထပါဒံ ယထာ ဆိန္ဒေ၊ ကဏ္ဏနာသဉ္စ ဇီဝတော၊

တတော ပစ္ဆာ သိရော ဆိန္ဒေ၊ တံ ဒုက္ခံ မရဏံ သိယာ။

၂၁။

‘‘သုခံ နု ခဏ္ဍသော ဆိန္နံ၊ ဘဒ္ဒသာလ ဝနပ္ပတိ၊

ကိံဟေတု ကိံ ဥပါဒါယ၊ ခဏ္ဍသော ဆိန္နမိစ္ဆသီ’’တိ။

တတ္ထ ဟတ္ထပါဒန္တိ ဟတ္ထေ စ ပါဒေ စ။ တံ ဒုက္ခန္တိ ဧဝံ ပဋိပါဋိယာ ဆိဇ္ဇန္တဿ စောရဿ တံ မရဏံ ဒုက္ခံ သိယာ။ သုခံ နူတိ သမ္မ ဘဒ္ဒသာလ၊ ဝဇ္ဈပ္ပတ္တာ စောရာ သုခေန မရိတုကာမာ သီသစ္ဆေဒံ ယာစန္တိ၊ န ခဏ္ဍသော ဆေဒနံ၊ တွံ ပန ဧဝံ ယာစသိ၊ တေန တံ ပုစ္ဆာမိ ‘‘သုခံ နု ခဏ္ဍသော ဆိန္န’’န္တိ။ ကိံဟေတူတိ ခဏ္ဍသော ဆိန္နံ နာမ န သုခံ၊ ကာရဏေန ပနေတ္ထ ဘဝိတဗ္ဗန္တိ တံ ပုစ္ဆန္တော ဧဝမာဟ။

အထဿ အာစိက္ခန္တော ဘဒ္ဒသာလော ဒွေ ဂါထာ အဘာသိ –

၂၂။

‘‘ယဉ္စ ဟေတုမုပါဒါယ၊ ဟေတုံ ဓမ္မူပသံဟိတံ၊

ခဏ္ဍသော ဆိန္နမိစ္ဆာမိ၊ မဟာရာဇ သုဏောဟိ မေ။

၂၃။

‘‘ဉာတီ မေ သုခသံဝဒ္ဓါ၊ မမ ပဿေ နိဝါတဇာ၊

တေပိဟံ ဥပဟိံသေယျ၊ ပရေသံ အသုခေါစိတ’’န္တိ။

တတ္ထ ဟေတုံ ဓမ္မူပသံဟိတန္တိ မဟာရာဇ၊ ယံ ဟေတုသဘာဝယုတ္တမေဝ၊ န ဟေတုပတိရူပကံ၊ ဟေတုံ ဥပါဒါယ အာရဗ္ဘ သန္ဓာယာဟံ ခဏ္ဍသော ဆိန္နမိစ္ဆာမိ၊ တံ ဩဟိတသောတော သုဏောဟီတိ အတ္ထော။ ဉာတီမေတိ မမ ဘဒ္ဒသာလရုက္ခဿ ဆာယာယ သုခသံဝဒ္ဓါ မမ ပဿေ တရုဏသာလရုက္ခေသု နိဗ္ဗတ္တာ မယာ ကတဝါတပရိတ္တာဏတ္တာ နိဝါတဇာ မမ ဉာတကာ ဒေဝသင်္ဃာ အတ္ထိ၊ တေ အဟံ ဝိသာလသာခဝိဋပေါ မူလေ ဆိန္ဒိတွာ ပတန္တော ဥပဟိံသေယျံ၊ သံဘဂ္ဂဝိမာနေ ကရောန္တော ဝိနာသေယျန္တိ အတ္ထော။ ပရေသံ အသုခေါစိတန္တိ ဧဝံ သန္တေ မယာ တေသံ ပရေသံ ဉာတိဒေဝသင်္ဃာနံ အသုခံ ဒုက္ခံ ဩစိတံ ဝဍ္ဎိတံ၊ န စာဟံ တေသံ ဒုက္ခကာမော၊ တသ္မာ ဘဒ္ဒသာလံ ခဏ္ဍသော ခဏ္ဍသော ဆိန္ဒာပေမီတိ အယမေတ္ထာဓိပ္ပာယော။

တံ သုတွာ ရာဇာ ‘‘ဓမ္မိကော ဝတာယံ၊ ဒေဝပုတ္တော၊ အတ္တနော ဝိမာနဝိနာသတောပိ ဉာတီနံ ဝိမာနဝိနာသံ န ဣစ္ဆတိ၊ ဉာတီနံ အတ္ထစရိယံ စရတိ၊ အဘယမဿ ဒဿာမီ’’တိ တုဿိတွာ ဩသာနဂါထမာဟ –

၂၄။

‘‘စေတေယျရူပံ စေတေသိ၊ ဘဒ္ဒသာလ ဝနပ္ပတိ၊

ဟိတကာမောသိ ဉာတီနံ၊ အဘယံ သမ္မ ဒမ္မိ တေ’’တိ။

တတ္ထ စေတေယျရူပံ စေတေသီတိ ဉာတီသု မုဒုစိတ္တတာယ စိန္တေန္တော စိန္တေတဗ္ဗယုတ္တကမေဝ စိန္တေသိ။ ဆေဒေယျရူပံ ဆေဒေသီတိပိ ပါဌော။ တဿတ္ထော – ခဏ္ဍသော ဆိန္နမိစ္ဆန္တော ဆေဒေတဗ္ဗယုတ္တကမေဝ ဆေဒေသီတိ။ အဘယန္တိ ဧတသ္မိံ တေ သမ္မ၊ ဂုဏေ ပသီဒိတွာ အဘယံ ဒဒါမိ၊ န မေ ပါသာဒေနတ္ထော၊ နာဟံ တံ ဆေဒါပေဿာမိ၊ ဂစ္ဆ ဉာတိသင်္ဃပရိဝုတော သက္ကတဂရုကတော သုခံ ဇီဝါတိ အာဟ။

ဒေဝရာဇာ ရညော ဓမ္မံ ဒေသေတွာ အဂမာသိ။ ရာဇာ တဿောဝါဒေ ဌတွာ ဒါနာဒီနိ ပုညာနိ ကတွာ သဂ္ဂပုရံ ပူရေသိ။

သတ္ထာ ဣမံ ဓမ္မဒေသနံ အာဟရိတွာ ‘‘ဧဝံ၊ ဘိက္ခဝေ၊ ပုဗ္ဗေပိ တထာဂတော ဉာတတ္ထစရိယံ အစရိယေဝါ’’တိ ဝတွာ ဇာတကံ သမောဓာနေသိ – ‘‘တဒါ ရာဇာ အာနန္ဒော အဟောသိ၊ တရုဏသာလေသု နိဗ္ဗတ္တဒေဝတာ ဗုဒ္ဓပရိသာ၊ ဘဒ္ဒသာလဒေဝရာဇာ ပန အဟမေဝ အဟောသိ’’န္တိ။

ဘဒ္ဒသာလဇာတကဝဏ္ဏနာ ဒုတိယာ။

[၄၆၆] ၃။ သမုဒ္ဒဝါဏိဇဇာတကဝဏ္ဏနာ

ကသန္တိဝပန္တိ တေ ဇနာတိ ဣဒံ သတ္ထာ ဇေတဝနေ ဝိဟရန္တော ဒေဝဒတ္တဿ ပဉ္စ ကုလသတာနိ ဂဟေတွာ နိရယေ ပတိတဘာဝံ အာရဗ္ဘ ကထေသိ။ သော ဟိ အဂ္ဂသာဝကေသု ပရိသံ ဂဟေတွာ ပက္ကန္တေသု သောကံ သန္ဓာရေတုံ အသက္ကောန္တော ဥဏှလောဟိတေ မုခတော နိက္ခန္တေ ဗလဝဝေဒနာပီဠိတော တထာဂတဿ ဂုဏံ အနုဿရိတွာ ‘‘အဟမေဝ နဝ မာသေ တထာဂတဿ အနတ္ထံ စိန္တေသိံ၊ သတ္ထု ပန မယိ ပါပစိတ္တံ နာမ နတ္ထိ၊ အသီတိမဟာထေရာနမ္ပိ မယိ အာဃာတော နာမ နတ္ထိ၊ မယာ ကတကမ္မေန အဟမေဝ ဣဒါနိ အနာထော ဇာတော၊ သတ္ထာရာပိမှိ ဝိဿဋ္ဌော မဟာထေရေဟိပိ ဉာတိသေဋ္ဌေန ရာဟုလတ္ထေရေနပိ သကျရာဇကုလေဟိပိ၊ ဂန္တွာ သတ္ထာရံ ခမာပေဿာမီ’’တိ ပရိသာယ သညံ ဒတွာ အတ္တာနံ ပဉ္စကေန ဂါဟာပေတွာ ရတ္တိံ ရတ္တိံ ဂစ္ဆန္တော ကောသလရဋ္ဌံ သမ္ပာပုဏိ။ အာနန္ဒတ္ထေရော သတ္ထု အာရောစေသိ ‘‘ဒေဝဒတ္တော ကိရ၊ ဘန္တေ၊ တုမှာကံ ခမာပေတုံ အာဂစ္ဆတီ’’တိ။ ‘‘အာနန္ဒ၊ ဒေဝဒတ္တော မမ ဒဿနံ န လဘိဿတီ’’တိ။

အထ တသ္မိံ သာဝတ္ထိနဂရဒွါရံ သမ္ပတ္တေ ပုန ထေရော အာရောစေသိ၊ ဘဂဝါပိ တထေဝ အဝစ။ တဿ ဇေတဝနေ ပေါက္ခရဏိယာ သမီပံ အာဂတဿ ပါပံ မတ္ထကံ ပါပုဏိ၊ သရီရေ ဍာဟော ဥပ္ပဇ္ဇိ၊ နှတွာ ပါနီယံ ပိဝိတုကာမော ဟုတွာ ‘‘မဉ္စကတော မံ အာဝုသော ဩတာရေထ၊ ပါနီယံ ပိဝိဿာမီ’’တိ အာဟ။ တဿ ဩတာရေတွာ ဘူမိယံ ဌပိတမတ္တဿ စိတ္တဿာဒေ အလဒ္ဓေယေဝ မဟာပထဝီ ဝိဝရမဒါသိ။ တာဝဒေဝ တံ အဝီစိတော အဂ္ဂိဇာလာ ဥဋ္ဌာယ ပရိက္ခိပိတွာ ဂဏှိ။ သော ‘‘ပါပကမ္မံ မေ မတ္ထကံ ပတ္တ’’န္တိ တထာဂတဿ ဂုဏေ အနုဿရိတွာ –

‘‘ဣမေဟိ အဋ္ဌီဟိ တမဂ္ဂပုဂ္ဂလံ၊ ဒေဝါတိဒေဝံ နရဒမ္မသာရထိံ၊

သမန္တစက္ခုံ သတပုညလက္ခဏံ၊ ပါဏေဟိ ဗုဒ္ဓံ သရဏံ ဥပေမီ’’တိ။ (မိ။ ပ။ ၄။၁။၃) –

ဣမာယ ဂါထာယ သရဏေ ပတိဋ္ဌဟန္တော အဝီစိပရာယဏော အဟောသိ။ တဿ ပန ပဉ္စ ဥပဋ္ဌာကကုလသတာနိ အဟေသုံ။ တာနိပိ တပ္ပက္ခိကာနိ ဟုတွာ ဒသဗလံ အက္ကောသိတွာ အဝီစိမှိယေဝ နိဗ္ဗတ္တိံသု။ ဧဝံ သော တာနိ ပဉ္စ ကုလသတာနိ ဂဏှိတွာ အဝီစိမှိ ပတိဋ္ဌိတော။

အထေကဒိဝသံ ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ ဒေဝဒတ္တော ပါပေါ လာဘသက္ကာရဂိဒ္ဓတာယ သမ္မာသမ္ဗုဒ္ဓေ အဋ္ဌာနေ ကောပံ ဗန္ဓိတွာ အနာဂတဘယမနောလောကေတွာ ပဉ္စဟိ ကုလသတေဟိ သဒ္ဓိံ အဝီစိပရာယဏော ဇာတော’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န ဘိက္ခဝေ၊ ဣဒါနေဝ ဒေဝဒတ္တော လာဘသက္ကာရဂိဒ္ဓါ ဟုတွာ အနာဂတဘယံ န ဩလောကေသိ၊ ပုဗ္ဗေပိ အနာဂတဘယံ အနောလောကေတွာ ပစ္စုပ္ပန္နသုခဂိဒ္ဓေန သဒ္ဓိံ ပရိသာယ မဟာဝိနာသံ ပတ္တော’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗာရာဏသိတော အဝိဒူရေ ကုလသဟဿနိဝါသော မဟာဝဍ္ဎကီဂါမော အဟောသိ။ တတ္ထ ဝဍ္ဎကီ ‘‘တုမှာကံ မဉ္စံ ကရိဿာမ၊ ပီဌံ ကရိဿာမ၊ ဂေဟံ ကရိဿာမာ’’တိ ဝတွာ မနုဿာနံ ဟတ္ထတော ဗဟုံ ဣဏံ ဂဟေတွာ ကိဉ္စိ ကာတုံ န သက္ခိံသု။ မနုဿာ ဒိဋ္ဌဒိဋ္ဌေ ဝဍ္ဎကီ စောဒေန္တိ ပလိဗုဒ္ဓန္တိ။ တေ ဣဏာယိကေဟိ ဥပဒ္ဒုတာ သုခံ ဝသိတုံ အသက္ကောန္တာ ‘‘ဝိဒေသံ ဂန္တွာ ယတ္ထ ကတ္ထစိ ဝသိဿာမာ’’တိ အရညံ ပဝိသိတွာ ရုက္ခေ ဆိန္ဒိတွာ မဟတိံ နာဝံ ဗန္ဓိတွာ နဒိံ ဩတာရေတွာ အာဟရိတွာ ဂါမတော ဂါဝုတဍ္ဎယောဇနမတ္တေ ဌာနေ ဌပေတွာ အဍ္ဎရတ္တသမယေ ဂါမံ အာဂန္တွာ ပုတ္တဒါရမာဒါယ နာဝဋ္ဌာနံ ဂန္တွာ နာဝံ အာရုယှ အနုက္ကမေန မဟာသမုဒ္ဒံ ပဝိသိတွာ ဝါတဝေဂေန ဝိစရန္တာ သမုဒ္ဒမဇ္ဈေ ဧကံ ဒီပကံ ပါပုဏိံသု။ တသ္မိံ ပန ဒီပကေ သယံဇာတသာလိဥစ္ဆုကဒလိအမ္ဗဇမ္ဗုပနသတာလနာဠိကေရာဒီနိ ဝိဝိဓဖလာနိ အတ္ထိ၊ အညတရော ပဘိန္နနာဝေါ ပုရိသော ပဌမတရံ တံ ဒီပကံ ပတွာ သာလိဘတ္တံ ဘုဉ္ဇမာနော ဥစ္ဆုအာဒီနိ ခါဒမာနော ထူလသရီရော နဂ္ဂေါ ပရူဠှကေသမဿု တသ္မိံ ဒီပကေ ပဋိဝသတိ။

ဝဍ္ဎကီ စိန္တယိံသု ‘‘သစေ အယံ ဒီပကော ရက္ခသပရိဂ္ဂဟိတော ဘဝိဿတိ၊ သဗ္ဗေပိ အမှေ ဝိနာသံ ပါပုဏိဿာမ၊ ပရိဂ္ဂဏှိဿာမ တာဝ န’’န္တိ။ အထ သတ္တဋ္ဌ ပုရိသာ သူရာ ဗလဝန္တော သန္နဒ္ဓပဉ္စာဝုဓာ ဟုတွာ ဩတရိတွာ ဒီပကံ ပရိဂ္ဂဏှိံသု။ တသ္မိံ ခဏေ သော ပုရိသော ဘုတ္တပါတရာသော ဥစ္ဆုရသံ ပိဝိတွာ သုခပ္ပတ္တော ရမဏီယေ ပဒေသေ ရဇတပဋ္ဋသဒိသေ ဝါလုကတလေ သီတစ္ဆာယာယ ဥတ္တာနကော နိပဇ္ဇိတွာ ‘‘ဇမ္ဗုဒီပဝါသိနော ကသန္တာ ဝပန္တာ ဧဝရူပံ သုခံ န လဘန္တိ၊ ဇမ္ဗုဒီပတော မယှံ အယမေဝ ဒီပကော ဝရ’’န္တိ ဂါယမာနော ဥဒါနံ ဥဒါနေသိ။ အထ သတ္ထာ ဘိက္ခူ အာမန္တေတွာ ‘‘သော ဘိက္ခဝေ ပုရိသော ဣမံ ဥဒါနံ ဥဒါနေသီ’’တိ ဒဿေန္တော ပဌမံ ဂါထမာဟ –

၂၅။

‘‘ကသန္တိ ဝပန္တိ တေ ဇနာ၊ မနုဇာ ကမ္မဖလူပဇီဝိနော၊

နယိမဿ ဒီပကဿ ဘာဂိနော၊ ဇမ္ဗုဒီပါ ဣဒမေဝ နော ဝရ’’န္တိ။

တတ္ထ တေ ဇနာတိ တေ ဇမ္ဗုဒီပဝါသိနော ဇနာ။ ကမ္မဖလူပဇီဝိနောတိ နာနာကမ္မာနံ ဖလူပဇီဝိနော သတ္တာ။

အထ တေ ဒီပကံ ပရိဂ္ဂဏှန္တာ ပုရိသာ တဿ ဂီတသဒ္ဒံ သုတွာ ‘‘မနုဿသဒ္ဒေါ ဝိယ သုယျတိ၊ ဇာနိဿာမ န’’န္တိ သဒ္ဒါနုသာရေန ဂန္တွာ တံ ပုရိသံ ဒိသွာ ‘‘ယက္ခော ဘဝိဿတီ’’တိ ဘီတတသိတာ သရေ သန္နဟိံသု။ သောပိ တေ ဒိသွာ အတ္တနော ဝဓဘယေန ‘‘နာဟံ၊ သာမိ၊ ယက္ခော၊ ပုရိသောမှိ၊ ဇီဝိတံ မေ ဒေထာ’’တိ ယာစန္တော ‘‘ပုရိသာ နာမ တုမှာဒိသာ နဂ္ဂါ န ဟောန္တီ’’တိ ဝုတ္တေ ပုနပ္ပုနံ ယာစိတွာ မနုဿဘာဝံ ဝိညာပေသိ။ တေ တံ ပုရိသံ ဥပသင်္ကမိတွာ သမ္မောဒနီယံ ကထံ သုတွာ တဿ တတ္ထ အာဂတနိယာမံ ပုစ္ဆိံသု။ သောပိ သဗ္ဗံ တေသံ ကထေတွာ ‘‘တုမှေ အတ္တနော ပုညသမ္ပတ္တိယာ ဣဓာဂတာ ၊ အယံ ဥတ္တမဒီပေါ၊ န ဧတ္ထ သဟတ္ထေန ကမ္မံ ကတွာ ဇီဝန္တိ၊ သယံဇာတသာလီနဉ္စေဝ ဥစ္ဆုအာဒီနဉ္စေတ္ထ အန္တော နတ္ထီတိ အနုက္ကဏ္ဌန္တာ ဝသထာ’’တိ အာဟ။ ဣဓ ပန ဝသန္တာနံ အမှာကံ အညော ပရိပန္ထော နတ္ထိ၊ အညံ ဘယံ ဧတ္ထ နတ္ထိ၊ အယံ ပန အမနုဿပရိဂ္ဂဟိတော၊ အမနုဿာ တုမှာကံ ဥစ္စာရပဿာဝံ ဒိသွာ ကုဇ္ဈေယျုံ၊ တသ္မာ တံ ကရောန္တာ ဝါလုကံ ဝိယူဟိတွာ ဝါလုကာယ ပဋိစ္ဆာဒေယျာထ၊ ဧတ္တကံ ဣဓ ဘယံ၊ အညံ နတ္ထိ၊ နိစ္စံ အပ္ပမတ္တာ ဘဝေယျာထာတိ။ တေ တတ္ထ ဝါသံ ဥပဂစ္ဆိံသု။ တသ္မိံ ပန ကုလသဟဿေ ပဉ္စန္နံ ပဉ္စန္နံ ကုလသတာနံ ဇေဋ္ဌကာ ဒွေ ဝဍ္ဎကီ အဟေသုံ။ တေသု ဧကော ဗာလော အဟောသိ ရသဂိဒ္ဓါ၊ ဧကော ပဏ္ဍိတော ရသေသု အနလ္လီနော။

အပရဘာဂေ သဗ္ဗေပိ တေ တတ္ထ သုခံ ဝသန္တာ ထူလသရီရာ ဟုတွာ စိန္တယိံသု ‘‘စိရံ ပီတာ နော သုရာ၊ ဥစ္ဆုရသေန မေရယံ ကတွာ ပိဝိဿာမာ’’တိ။ တေ မေရယံ ကာရေတွာ ပိဝိတွာ မဒဝသေန ဂါယန္တာ နစ္စန္တာ ကီဠန္တာ ပမတ္တာ တတ္ထ တတ္ထ ဥစ္စာရပဿာဝံ ကတွာ အပ္ပဋိစ္ဆာဒေတွာ ဒီပကံ ဇေဂုစ္ဆံ ပဋိကူလံ ကရိံသု။ ဒေဝတာ ‘‘ဣမေ အမှာကံ ကီဠာမဏ္ဍလံ ပဋိကူလံ ကရောန္တီ’’တိ ကုဇ္ဈိတွာ ‘‘မဟာသမုဒ္ဒံ ဥတ္တရာပေတွာ ဒီပကဓောဝနံ ကရိဿာမာ’’တိ မန္တေတွာ ‘‘အယံ ကာဠပက္ခော၊ အဇ္ဇ အမှာကံ သမာဂမော စ ဘိန္နော၊ ဣတော ဒါနိ ပန္နရသမေ ဒိဝသေ ပုဏ္ဏမီဥပေါသထဒိဝသေ စန္ဒဿုဂ္ဂမနဝေလာယ သမုဒ္ဒံ ဥဗ္ဗတ္တေတွာ သဗ္ဗေပိမေ ဃာတေဿာမာ’’တိ ဒိဝသံ ဌပယိံသု။ အထ နေသံ အန္တရေ ဧကော ဓမ္မိကော ဒေဝပုတ္တော ‘‘မာ ဣမေ မမ ပဿန္တဿ နဿိံသူ’’တိ အနုကမ္ပာယ တေသု သာယမာသံ ဘုဉ္ဇိတွာ ဃရဒွါရေ သုခကထာယ နိသိန္နေသု သဗ္ဗာလင်္ကာရပဋိမဏ္ဍိတော သကလဒီပံ ဧကောဘာသံ ကတွာ ဥတ္တရာယ ဒိသာယ အာကာသေ ဌတွာ ‘‘အမ္ဘော ဝဍ္ဎကီ၊ ဒေဝတာ တုမှာကံ ကုဒ္ဓါ။ ဣမသ္မိံ ဌာနေ မာ ဝသိတ္ထ၊ ဣတော အဍ္ဎမာသစ္စယေန ဟိ ဒေဝတာ သမုဒ္ဒံ ဥဗ္ဗတ္တေတွာ သဗ္ဗေဝ တုမှေ ဃာတေဿန္တိ၊ ဣတော နိက္ခမိတွာ ပလာယထာ’’တိ ဝတွာ ဒုတိယံ ဂါထမာဟ –

၂၆။

‘‘တိပဉ္စရတ္တူပဂတမှိ စန္ဒေ၊ ဝေဂေါ မဟာ ဟေဟိတိ သာဂရဿ၊

ဥပ္လဝိဿံ ဒီပမိမံ ဥဠာရံ၊ မာ ဝေါ ဝဓီ ဂစ္ဆထ လေဏမည’’န္တိ။

တတ္ထ ဥပ္လဝိဿန္တိ ဣမံ ဒီပကံ ဥပ္လဝန္တော အဇ္ဈောတ္ထရန္တော အဘိဘဝိဿတိ။ မာ ဝေါ ဝဓီတိ သော သာဂရဝေဂေါ တုမှေ မာ ဝဓိ။

ဣတိ သော တေသံ ဩဝါဒံ ဒတွာ အတ္တနော ဌာနမေဝ ဂတော။ တသ္မိံ ဂတေ အပရော သာဟသိကော ကက္ခဠော ဒေဝပုတ္တော ‘‘ဣမေ ဣမဿ ဝစနံ ဂဟေတွာ ပလာယေယျုံ၊ အဟံ နေသံ ဂမနံ နိဝါရေတွာ သဗ္ဗေပိမေ မဟာဝိနာသံ ပါပေဿာမီ’’တိ စိန္တေတွာ ဒိဗ္ဗာလင်္ကာရပဋိမဏ္ဍိတော သကလဒီပံ ဧကောဘာသံ ကရောန္တော အာဂန္တွာ ဒက္ခိဏာယ ဒိသာယ အာကာသေ ဌတွာ ‘‘ဧကော ဒေဝပုတ္တော ဣဓာဂတော၊ နော’’တိ ပုစ္ဆိတွာ ‘‘အာဂတော’’တိ ဝုတ္တေ ‘‘သော ဝေါ ကိံ ကထေသီ’’တိ ဝတွာ ‘‘ဣမံ နာမ၊ သာမီ’’တိ ဝုတ္တေ ‘‘သော တုမှာကံ ဣဓ နိဝါသံ န ဣစ္ဆတိ၊ ဒေါသေန ကထေတိ၊ တုမှေ အညတ္ထ အဂန္တွာ ဣဓေဝ ဝသထာ’’တိ ဝတွာ ဒွေ ဂါထာ အဘာသိ –

၂၇။

‘‘န ဇာတုယံ သာဂရဝါရိဝေဂေါ၊ ဥပ္လဝိဿံ ဒီပမိမံ ဥဠာရံ၊

တံ မေ နိမိတ္တေဟိ ဗဟူဟိ ဒိဋ္ဌံ၊ မာ ဘေထ ကိံ သောစထ မောဒထဝှော။

၂၈။

‘‘ပဟူတဘက္ခံ ဗဟုအန္နပါနံ၊ ပတ္တတ္ထ အာဝါသမိမံ ဥဠာရံ၊

န ဝေါ ဘယံ ပဋိပဿာမိ ကိဉ္စိ၊ အာပုတ္တပုတ္တေဟိ ပမောဒထဝှော’’တိ။

တတ္ထ န ဇာတုယန္တိ န ဇာတု အယံ။ မာ ဘေထာတိ မာ ဘာယိတ္ထ။ မောဒထဝှောတိ ပမောဒိတာ ပီတိသောမနဿဇာတာ ဟောထ။ အာပုတ္တပုတ္တေဟီတိ ယာဝ ပုတ္တာနမ္ပိ ပုတ္တေဟိ ပမောဒထ၊ နတ္ထိ ဝေါ ဣမသ္မိံ ဌာနေ ဘယန္တိ။

ဧဝံ သော ဣမာဟိ ဒွီဟိ ဂါထာဟိ တေ အဿာသေတွာ ပက္ကာမိ။ တဿ ပက္ကန္တကာလေ ဓမ္မိကဒေဝပုတ္တဿ ဝစနံ အနာဒိယန္တော ဗာလဝဍ္ဎကီ ‘‘သုဏန္တု မေ၊ ဘောန္တော၊ ဝစန’’န္တိ သေသဝဍ္ဎကီ အာမန္တေတွာ ပဉ္စမံ ဂါထမာဟ –

၂၉။

‘‘ယော ဒေဝေါယံ ဒက္ခိဏာယံ ဒိသာယံ၊ ခေမန္တိ ပက္ကောသတိ တဿ သစ္စံ၊

န ဥတ္တရော ဝေဒိ ဘယာဘယဿ၊ မာ ဘေထ ကိံ သောစထ မောဒထဝှော’’တိ။

တတ္ထ ဒက္ခိဏာယန္တိ ဒက္ခိဏာယ၊ အယမေဝ ဝါ ပါဌော။

တံ သုတွာ ရသဂိဒ္ဓါ ပဉ္စသတာ ဝဍ္ဎကီ တဿ ဗာလဿ ဝစနံ အာဒိယိံသု။ ဣတရော ပန ပဏ္ဍိတဝဍ္ဎကီ တဿ ဝစနံ အနာဒိယန္တော တေ ဝဍ္ဎကီ အာမန္တေတွာ စတဿော ဂါထာ အဘာသိ –

၃၀။

‘‘ယထာ ဣမေ ဝိပ္ပဝဒန္တိ ယက္ခာ၊ ဧကော ဘယံ သံသတိ ခေမမေကော၊

တဒိင်္ဃ မယှံ ဝစနံ သုဏာထ၊ ခိပ္ပံ လဟုံ မာ ဝိနဿိမှ သဗ္ဗေ။

၃၁။

‘‘သဗ္ဗေ သမာဂမ္မ ကရောမ နာဝံ၊ ဒေါဏိံ ဒဠှံ သဗ္ဗယန္တူပပန္နံ၊

သစေ အယံ ဒက္ခိဏော သစ္စမာဟ၊ မောဃံ ပဋိက္ကောသတိ ဥတ္တရောယံ၊

သာ စေဝ နော ဟေဟိတိ အာပဒတ္ထာ၊ ဣမဉ္စ ဒီပံ န ပရိစ္စဇေမ။

၃၂။

‘‘သစေ စ ခေါ ဥတ္တရော သစ္စမာဟ၊ မောဃံ ပဋိက္ကောသတိ ဒက္ခိဏောယံ၊

တမေဝ နာဝံ အဘိရုယှ သဗ္ဗေ၊ ဧဝံ မယံ သောတ္ထိ တရေမု ပါရံ။

၃၃။

‘‘န ဝေ သုဂဏှံ ပဌမေန သေဋ္ဌံ၊ ကနိဋ္ဌမာပါထဂတံ ဂဟေတွာ၊

ယော စီဓ တစ္ဆံ ပဝိစေယျ ဂဏှတိ၊ သ ဝေ နရော သေဋ္ဌမုပေတိ ဌာန’’န္တိ။

တတ္ထ ဝိပ္ပဝဒန္တီတိ အညမညံ ဝိရုဒ္ဓံ ဝဒန္တိ။ လဟုန္တိ ပုရိမဿ အတ္ထဒီပနံ။ ဒေါဏိန္တိ ဂမ္ဘီရံ မဟာနာဝံ။ သဗ္ဗယန္တူပပန္နန္တိ သဗ္ဗေဟိ ဖိယာရိတ္တာဒီဟိ ယန္တေဟိ ဥပပန္နံ။ သာ စေဝ နော ဟေဟိတိ အာပဒတ္ထာတိ သာ စ နော နာဝါ ပစ္ဆာပိ ဥပ္ပန္နာယ အာပဒါယ အတ္ထာ ဘဝိဿတိ၊ ဣမဉ္စ ဒီပံ န ပရိစ္စဇိဿာမ။ တရေမူတိ တရိဿာမ။ န ဝေ သုဂဏှန္တိ န ဝေ သုခေန ဂဏှိတဗ္ဗံ။ သေဋ္ဌန္တိ ဥတ္တမံ တထံ သစ္စံ။ ကနိဋ္ဌန္တိ ပဌမဝစနံ ဥပါဒါယ ပစ္ဆိမဝစနံ ကနိဋ္ဌံ နာမ။ ဣဓာပိ ‘‘န ဝေ သုဂဏှ’’န္တိ အနုဝတ္တတေဝ။ ဣဒံ ဝုတ္တံ ဟောတိ – အမ္ဘော ဝဍ္ဎကီ၊ ယေန ကေနစိ ပဌမေန ဝုတ္တဝစနံ ‘‘ဣဒမေဝ သေဋ္ဌံ တထံ သစ္စ’’န္တိ သုခံ န ဂဏှိတဗ္ဗမေဝ၊ ယထာ စ တံ၊ ဧဝံ ကနိဋ္ဌံ ဂစ္ဆာ ဝုတ္တဝစနမ္ပိ ‘‘ဣဒမေဝ တထံ သစ္စ’’န္တိ န ဂဏှိတဗ္ဗံ။ ယံ ပန သောတဝိသယံ အာပါထဂတံ ဟောတိ၊ တံ အာပါထဂတံ ဂဟေတွာ ယော ဣဓ ပဏ္ဍိတပုရိသော ပုရိမဝစနဉ္စ ပစ္ဆိမဝစနဉ္စ ပဝိစေယျ ဝိစိနိတွာ တီရေတွာ ဥပပရိက္ခိတွာ တစ္ဆံ ဂဏှာတိ၊ ယံ တထံ သစ္စံ သဘာဝဘူတံ၊ တဒေဝ ပစ္စက္ခံ ကတွာ ဂဏှာတိ။ သ ဝေ နရော သေဋ္ဌမုပေတိ ဌာနန္တိ သော ဥတ္တမံ ဌာနံ ဥပေတိ အဓိဂစ္ဆတိ ဝိန္ဒတိ လဘတီတိ။

သော ဧဝဉ္စ ပန ဝတွာ အာဟ – ‘‘အမ္ဘော၊ မယံ ဒွိန္နမ္ပိ ဒေဝတာနံ ဝစနံ ကရိဿာမ၊ နာဝံ တာဝ သဇ္ဇေယျာမ။ သစေ ပဌမဿ ဝစနံ သစ္စံ ဘဝိဿတိ၊ တံ နာဝံ အဘိရုဟိတွာ ပလာယိဿာမ၊ အထ ဣတရဿ ဝစနံ သစ္စံ ဘဝိဿတိ၊ နာဝံ ဧကမန္တေ ဌပေတွာ ဣဓေဝ ဝသိဿာမာ’’တိ။ ဧဝံ ဝုတ္တေ ဗာလဝဍ္ဎကီ ‘‘အမ္ဘော၊ တွံ ဥဒကပါတိယံ သုသုမာရံ ပဿသိ၊ အတီဝ ဒီဃံ ပဿသိ၊ ပဌမဒေဝပုတ္တော အမှေသု ဒေါသဝသေန ကထေသိ၊ ပစ္ဆိမော သိနေဟေနေဝ၊ ဣမံ ဧဝရူပံ ဝရဒီပံ ပဟာယ ကုဟိံ ဂမိဿာမ၊ သစေ ပန တွံ ဂန္တုကာမော၊ တဝ ပရိသံ ဂဏှိတွာ နာဝံ ကရောဟိ၊ အမှာကံ နာဝါယ ကိစ္စံ နတ္ထီ’’တိ အာဟ။ ပဏ္ဍိတော အတ္တနော ပရိသံ ဂဟေတွာ နာဝံ သဇ္ဇေတွာ နာဝါယ သဗ္ဗူပကရဏာနိ အာရောပေတွာ သပရိသော နာဝါယ အဋ္ဌာသိ။

တတော ပုဏ္ဏမဒိဝသေ စန္ဒဿ ဥဂ္ဂမနဝေလာယ သမုဒ္ဒတော ဦမိ ဥတ္တရိတွာ ဇာဏုကပမာဏာ ဟုတွာ ဒီပကံ ဓောဝိတွာ ဂတာ။ ပဏ္ဍိတော သမုဒ္ဒဿ ဥတ္တရဏဘာဝံ ဉတွာ နာဝံ ဝိဿဇ္ဇေသိ။ ဗာလဝဍ္ဎကိပက္ခိကာနိ ပဉ္စ ကုလသတာနိ ‘‘သမုဒ္ဒတော ဦမိ ဒီပဓောဝနတ္ထာယ အာဂတာ၊ ဧတ္တကမေဝ ဧတ’’န္တိ ကထေန္တာ နိသီဒိံသု။ တတော ပဋိပါဋိယာ ကဋိပ္ပမာဏာ ပုရိသပ္ပမာဏာ တာလပ္ပမာဏာ သတ္တတာလပ္ပမာဏာ သာဂရဦမိ ဒီပကမ္ပိ ဝုယှမာနာ အာဂဉ္ဆိ။ ပဏ္ဍိတော ဥပါယကုသလတာယ ရသေ အလဂ္ဂေါ သောတ္ထိနာ ဂတော၊ ဗာလဝဍ္ဎကီ ရသဂိဒ္ဓေန အနာဂတဘယံ အနောလောကေန္တော ပဉ္စဟိ ကုလသတေဟိ သဒ္ဓိံ ဝိနာသံ ပတ္တော။

ဣတော ပရာ သာနုသာသနီ တမတ္ထံ ဒီပယမာနာ တိဿော အဘိသမ္ဗုဒ္ဓဂါထာ ဟောန္တိ –

၃၄။

‘‘ယထာပိ တေ သာဂရဝါရိမဇ္ဈေ၊ သကမ္မုနာ သောတ္ထိ ဝဟိံသု ဝါဏိဇာ၊

အနာဂတတ္ထံ ပဋိဝိဇ္ဈိယာန၊ အပ္ပမ္ပိ နာစ္စေတိ သ ဘူရိပညော။

၃၅။

‘‘ဗာလာ စ မောဟေန ရသာနုဂိဒ္ဓါ၊ အနာဂတံ အပ္ပဋိဝိဇ္ဈိယတ္ထံ၊

ပစ္စုပ္ပန္နေ သီဒန္တိ အတ္ထဇာတေ၊ သမုဒ္ဒမဇ္ဈေ ယထာ တေ မနုဿာ။

၃၆။

‘‘အနာဂတံ ပဋိကယိရာထ ကိစ္စံ၊ ‘မာ မံ ကိစ္စံ ကိစ္စကာလေ ဗျဓေသိ’၊

တံ တာဒိသံ ပဋိကတကိစ္စကာရိံ၊ န တံ ကိစ္စံ ကိစ္စကာလေ ဗျဓေတီ’’တိ။

တတ္ထ သကမ္မုနာတိ အနာဂတဘယံ ဒိသွာ ပုရေတရံ ကတေန အတ္တနော ကမ္မေန။ သောတ္ထိ ဝဟိံသူတိ ခေမေန ဂမိံသု။ ဝါဏိဇာတိ သမုဒ္ဒေ ဝိစရဏဘာဝေန ဝဍ္ဎကီ ဝုတ္တာ။ ပဋိဝိဇ္ဈိယာနာတိ ဧဝံ၊ ဘိက္ခဝေ ၊ ပဌမတရံ ကတ္တဗ္ဗံ အနာဂတံ အတ္ထံ ပဋိဝိဇ္ဈိတွာ ဣဓလောကေ ဘူရိပညော ကုလပုတ္တော အပ္ပမတ္တကမ္ပိ အတ္တနော အတ္ထံ န အစ္စေတိ နာတိဝတ္တတိ၊ န ဟာပေတီတိ အတ္ထော။ အပ္ပဋိဝိဇ္ဈိယတ္ထန္တိ အပ္ပဋိဝိဇ္ဈိတွာ အတ္ထံ၊ ပဌမမေဝ ကတ္တဗ္ဗံ အကတွာတိ အတ္ထော။ ပစ္စုပ္ပန္နေတိ ယဒါ တံ အနာဂတံ အတ္ထဇာတံ ဥပ္ပဇ္ဇတိ၊ တဒါ တသ္မိံ ပစ္စုပ္ပန္နေ သီဒန္တိ၊ အတ္ထေ ဇာတေ အတ္တနော ပတိဋ္ဌံ န လဘန္တိ၊ သမုဒ္ဒေ တေ ဗာလဝဍ္ဎကီ မနုဿာ ဝိယ ဝိနာသံ ပါပုဏန္တိ။

အနာဂတန္တိ ဘိက္ခဝေ၊ ပဏ္ဍိတပုရိသော အနာဂတံ ပဌမတရံ ကတ္တဗ္ဗကိစ္စံ သမ္ပရာယိကံ ဝါ ဒိဋ္ဌဓမ္မိကံ ဝါ ပဋိကယိရာထ၊ ပုရေတရမေဝ ကရေယျ။ ကိံကာရဏာ? မာ မံ ကိစ္စံ ကိစ္စကာလေ ဗျဓေသိ၊ ပုရေ ကတ္တဗ္ဗဉှိ ပုရေ အကယိရမာနံ ပစ္ဆာ ပစ္စုပ္ပန္နဘာဝပ္ပတ္တံ အတ္တနော ကိစ္စကာလေ ကာယစိတ္တာဗာဓေန ဗျဓေတိ၊ တံ မံ မာ ဗျဓေသီတိ ပဌမမေဝ နံ ပဏ္ဍိတော ကရေယျ။ တံ တာဒိသန္တိ ယထာ ပဏ္ဍိတံ ပုရိသံ။ ပဋိကတကိစ္စကာရိန္တိ ပဋိကစ္စေဝ ကတ္တဗ္ဗကိစ္စကာရိနံ။ တံ ကိစ္စံ ကိစ္စကာလေတိ အနာဂတံ ကိစ္စံ ကယိရမာနံ ပစ္ဆာ ပစ္စုပ္ပန္နဘာဝပ္ပတ္တံ အတ္တနော ကိစ္စကာလေ ကာယစိတ္တာဗာဓကာလေ တာဒိသံ ပုရိမံ န ဗျဓေတိ န ဗာဓတိ။ ကသ္မာ? ပုရေယေဝ ကတတ္တာတိ။

သတ္ထာ ဣမံ ဓမ္မဒေသနံ အာဟရိတွာ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပိ ဒေဝဒတ္တော ပစ္စုပ္ပန္နသုခေ လဂ္ဂေါ အနာဂတဘယံ အနောလောကေတွာ သပရိသော ဝိနာသံ ပတ္တော’’တိ ဝတွာ ဇာတကံ သမောဓာနေသိ – ‘‘တဒါ ဗာလဝဍ္ဎကီ ဒေဝဒတ္တော အဟောသိ၊ ဒက္ခိဏဒိသာယ ဌိတော အဓမ္မိကဒေဝပုတ္တော ကောကာလိကော၊ ဥတ္တရဒိသာယ ဌိတော ဓမ္မိကဒေဝပုတ္တော သာရိပုတ္တော၊ ပဏ္ဍိတဝဍ္ဎကီ ပန အဟမေဝ အဟောသိ’’န္တိ။

သမုဒ္ဒဝါဏိဇဇာတကဝဏ္ဏနာ တတိယာ။

[၄၆၇] ၄။ ကာမဇာတကဝဏ္ဏနာ

ကာမံကာမယမာနဿာတိ ဣဒံ သတ္ထာ ဇေတဝနေ ဝိဟရန္တော အညတရံ ဗြာဟ္မဏံ အာရဗ္ဘ ကထေသိ။ ဧကော ကိရ သာဝတ္ထိဝါသီ ဗြာဟ္မဏော အစိရဝတီတီရေ ခေတ္တကရဏတ္ထာယ အရညံ ကောဋေသိ။ သတ္ထာ တဿ ဥပနိဿယံ ဒိသွာ သာဝတ္ထိံ ပိဏ္ဍာယ ပဝိသန္တော မဂ္ဂါ ဩက္ကမ္မ တေန သဒ္ဓိံ ပဋိသန္ထာရံ ကတွာ ‘‘ကိံ ကရောသိ ဗြာဟ္မဏာ’’တိ ဝတွာ ‘‘ခေတ္တဋ္ဌာနံ ကောဋာပေမိ ဘော၊ ဂေါတမာ’’တိ ဝုတ္တေ ‘‘သာဓု၊ ဗြာဟ္မဏ၊ ကမ္မံ ကရောဟီ’’တိ ဝတွာ အဂမာသိ။ ဧတေနေဝ ဥပါယေန ဆိန္နရုက္ခေ ဟာရေတွာ ခေတ္တဿ သောဓနကာလေ ကသနကာလေ ကေဒါရဗန္ဓနကာလေ ဝပနကာလေတိ ပုနပ္ပုနံ ဂန္တွာ တေန သဒ္ဓိံ ပဋိသန္ထာရမကာသိ။ ဝပနဒိဝသေ ပန သော ဗြာဟ္မဏော ‘‘အဇ္ဇ၊ ဘော ဂေါတမ၊ မယှံ ဝပ္ပမင်္ဂလံ၊ အဟံ ဣမသ္မိံ သဿေ နိပ္ဖန္နေ ဗုဒ္ဓပ္ပမုခဿ ဘိက္ခုသင်္ဃဿ မဟာဒါနံ ဒဿာမီ’’တိ အာဟ။ သတ္ထာ တုဏှီဘာဝေန အဓိဝါသေတွာ ပက္ကာမိ။ ပုနေကဒိဝသံ ဗြာဟ္မဏော သဿံ ဩလောကေန္တော အဋ္ဌာသိ။ သတ္ထာပိ တတ္ထ ဂန္တွာ ‘‘ကိံ ကရောသိ ဗြာဟ္မဏာ’’တိ ပုစ္ဆိတွာ ‘‘သဿံ ဩလောကေမိ ဘော ဂေါတမာ’’တိ ဝုတ္တေ ‘‘သာဓု ဗြာဟ္မဏာ’’တိ ဝတွာ ပက္ကာမိ။ တဒါ ဗြာဟ္မဏော စိန္တေသိ ‘‘သမဏော ဂေါတမော အဘိဏှံ အာဂစ္ဆတိ၊ နိဿံသယံ ဘတ္တေန အတ္ထိကော၊ ဒဿာမဟံ တဿ ဘတ္တ’’န္တိ။ တဿေဝံ စိန္တေတွာ ဂေဟံ ဂတဒိဝသေ သတ္ထာပိ တတ္ထ အဂမာသိ။ အထ ဗြာဟ္မဏဿ အတိဝိယ ဝိဿာသော အဟောသိ။ အပရဘာဂေ ပရိဏတေ သဿေ ‘‘သွေ ခေတ္တံ လာယိဿာမီ’’တိ သန္နိဋ္ဌာနံ ကတွာ နိပန္နေ ဗြာဟ္မဏေ အစိရဝတိယာ ဥပရိ သဗ္ဗရတ္တိံ ကရကဝဿံ ဝဿိ။ မဟောဃော အာဂန္တွာ ဧကနာဠိမတ္တမ္ပိ အနဝသေသံ ကတွာ သဗ္ဗံ သဿံ သမုဒ္ဒံ ပဝေသေသိ။ ဗြာဟ္မဏော ဩဃမှိ ပတိတေ သဿဝိနာသံ ဩလောကေတွာ သကဘာဝေန သဏ္ဌာတုံ နာဟောသိ၊ ဗလဝသောကာဘိဘူတော ဟတ္ထေန ဥရံ ပဟရိတွာ ပရိဒေဝမာနော ရောဒန္တော နိပဇ္ဇိ။

သတ္ထာ ပစ္စူသသမယေ သောကာဘိဘူတံ ဗြာဟ္မဏံ ဒိသွာ ‘‘ဗြာဟ္မဏဿာဝဿယော ဘဝိဿာမီ’’တိ ပုနဒိဝသေ သာဝတ္ထိယံ ပိဏ္ဍာယ စရိတွာ ပိဏ္ဍပါတပဋိက္ကန္တော ဘိက္ခူ ဝိဟာရံ ပေသေတွာ ပစ္ဆာသမဏေန သဒ္ဓိံ တဿ ဂေဟဒွါရံ အဂမာသိ။ ဗြာဟ္မဏော သတ္ထု အာဂတဘာဝံ သုတွာ ‘‘ပဋိသန္ထာရတ္ထာယ မေ သဟာယော အာဂတော ဘဝိဿတီ’’တိ ပဋိလဒ္ဓဿာသော အာသနံ ပညပေသိ။ သတ္ထာ ပဝိသိတွာ ပညတ္တာသနေ နိသီဒိတွာ ‘‘ဗြာဟ္မဏ၊ ကသ္မာ တွံ ဒုမ္မနောသိ၊ ကိံ တေ အဖာသုက’’န္တိ ပုစ္ဆိ။ ဘော ဂေါတမ၊ အစိရဝတီတီရေ မယာ ရုက္ခစ္ဆေဒနတော ပဋ္ဌာယ ကတံ ကမ္မံ တုမှေ ဇာနာထ၊ အဟံ ‘‘ဣမသ္မိံ သဿေ နိပ္ဖန္နေ တုမှာကံ ဒါနံ ဒဿာမီ’’တိ ဝိစရာမိ၊ ဣဒါနိ မေ သဗ္ဗံ တံ သဿံ မဟောဃော သမုဒ္ဒမေဝ ပဝေသေသိ၊ ကိဉ္စိ အဝသိဋ္ဌံ နတ္ထိ၊ သကဋသတမတ္တံ ဓညံ ဝိနဋ္ဌံ၊ တေန မေ မဟာသောကော ဥပ္ပန္နောတိ။ ‘‘ကိံ ပန၊ ဗြာဟ္မဏ၊ သောစန္တဿ နဋ္ဌံ ပုနာဂစ္ဆတီ’’တိ။ ‘‘နော ဟေတံ ဘော ဂေါတမာ’’တိ။ ‘‘ဧဝံ သန္တေ ကသ္မာ သောစသိ၊ ဣမေသံ သတ္တာနံ ဓနဓညံ နာမ ဥပ္ပဇ္ဇနကာလေ ဥပ္ပဇ္ဇတိ၊ နဿနကာလေ နဿတိ၊ ကိဉ္စိ သင်္ခါရဂတံ အနဿနဓမ္မံ နာမ နတ္ထိ၊ မာ စိန္တယီ’’တိ။ ဣတိ နံ သတ္ထာ သမဿာသေတွာ တဿ သပ္ပာယဓမ္မံ ဒေသေန္တော ကာမသုတ္တံ (သု။ နိ။ ၇၇၂ အာဒယော) ကထေသိ။ သုတ္တပရိယောသာနေ သောစန္တော ဗြာဟ္မဏော သောတာပတ္တိဖလေ ပတိဋ္ဌဟိ။ သတ္ထာ တံ နိဿောကံ ကတွာ ဥဋ္ဌာယာသနာ ဝိဟာရံ အဂမာသိ။ ‘‘သတ္ထာ အသုကံ နာမ ဗြာဟ္မဏံ သောကသလ္လသမပ္ပိတံ နိဿောကံ ကတွာ သောတာပတ္တိဖလေ ပတိဋ္ဌာပေသီ’’တိ သကလနဂရံ အညာသိ။ ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ ဒသဗလော ဗြာဟ္မဏေန သဒ္ဓိံ မိတ္တံ ကတွာ ဝိဿာသိကော ဟုတွာ ဥပါယေနေဝ တဿ သောကသလ္လသမပ္ပိတဿ ဓမ္မံ ဒေသေတွာ တံ နိဿောကံ ကတွာ သောတာပတ္တိဖလေ ပတိဋ္ဌာပေသီ’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပါဟံ ဧတံ နိဿောကမကာသိ’’န္တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တဿ ရညော ဒွေ ပုတ္တာ အဟေသုံ။ သော ဇေဋ္ဌကဿ ဥပရဇ္ဇံ အဒါသိ၊ ကနိဋ္ဌဿ သေနာပတိဋ္ဌာနံ။ အပရဘာဂေ ဗြဟ္မဒတ္တေ ကာလကတေ အမစ္စာ ဇေဋ္ဌကဿ အဘိသေကံ ပဋ္ဌပေသုံ။ သော ‘‘န မယှံ ရဇ္ဇေနတ္ထော၊ ကနိဋ္ဌဿ မေ ဒေထာ’’တိ ဝတွာ ပုနပ္ပုနံ ယာစိယမာနောပိ ပဋိက္ခိပိတွာ ကနိဋ္ဌဿ အဘိသေကေ ကတေ ‘‘န မေ ဣဿရိယေနတ္ထော’’တိ ဥပရဇ္ဇာဒီနိပိ န ဣစ္ဆိ။ ‘‘တေန ဟိ သာဒူနိ ဘောဇနာနိ ဘုဉ္ဇန္တော ဣဓေဝ ဝသာဟီ’’တိ ဝုတ္တေပိ ‘‘န မေ ဣမသ္မိံ နဂရေ ကိစ္စံ အတ္ထီ’’တိ ဗာရာဏသိတော နိက္ခမိတွာ ပစ္စန္တံ ဂန္တွာ ဧကံ သေဋ္ဌိကုလံ နိဿာယ သဟတ္ထေန ကမ္မံ ကရောန္တော ဝသိ။ တေ အပရဘာဂေ တဿ ရာဇကုမာရဘာဝံ ဉတွာ ကမ္မံ ကာတုံ နာဒံသု၊ ကုမာရပရိဟာရေနေဝ တံ ပရိဟရိံသု။ အပရဘာဂေ ရာဇကမ္မိကာ ခေတ္တပ္ပမာဏဂ္ဂဟဏတ္ထာယ တံ ဂါမံ အဂမံသု။ သေဋ္ဌိ ရာဇကုမာရံ ဥပသင်္ကမိတွာ ‘‘သာမိ၊ မယံ တုမှေ ပေါသေမ၊ ကနိဋ္ဌဘာတိကဿ ပဏ္ဏံ ပေသေတွာ အမှာကံ ဗလိံ ဟာရေထာ’’တိ အာဟ။ သော ‘‘သာဓူ’’တိ သမ္ပဋိစ္ဆိတွာ ‘‘အဟံ အသုကသေဋ္ဌိကုလံ နာမ ဥပနိဿာယ ဝသာမိ၊ မံ နိဿာယ ဧတေသံ ဗလိံ ဝိဿဇ္ဇေဟီ’’တိ ပဏ္ဏံ ပေသေသိ။ ရာဇာ ‘‘သာဓူ’’တိ ဝတွာ တထာ ကာရေသိ။

အထ နံ သကလဂါမဝါသိနောပိ ဇနပဒဝါသိနောပိ ဥပသင်္ကမိတွာ ‘‘မယံ တုမှာကညေဝ ဗလိံ ဒဿာမ၊ အမှာကမ္ပိ သုင်္ကံ ဝိဿဇ္ဇာပေဟီ’’တိ အာဟံသု။ သော တေသမ္ပိ အတ္ထာယ ပဏ္ဏံ ပေသေတွာ ဝိဿဇ္ဇာပေသိ။ တတော ပဋ္ဌာယ တေ တဿေဝ ဗလိံ အဒံသု။ အထဿ မဟာလာဘသက္ကာရော အဟောသိ၊ တေန သဒ္ဓိညေဝဿ တဏှာပိ မဟတီ ဇာတာ။ သော အပရဘာဂေပိ သဗ္ဗံ ဇနပဒံ ယာစိ၊ ဥပဍ္ဎရဇ္ဇံ ယာစိ၊ ကနိဋ္ဌောပိ တဿ အဒါသိယေဝ။ သော တဏှာယ ဝဍ္ဎမာနာယ ဥပဍ္ဎရဇ္ဇေနပိ အသန္တုဋ္ဌော ‘‘ရဇ္ဇံ ဂဏှိဿာမီ’’တိ ဇနပဒပရိဝုတော တံ နဂရံ ဂန္တွာ ဗဟိနဂရေ ဌတွာ ‘‘ရဇ္ဇံ ဝါ မေ ဒေတု ယုဒ္ဓံ ဝါ’’တိ ကနိဋ္ဌဿ ပဏ္ဏံ ပဟိဏိ။ ကနိဋ္ဌော စိန္တေသိ ‘‘အယံ ဗာလော ပုဗ္ဗေ ရဇ္ဇမ္ပိ ဥပရဇ္ဇာဒီနိပိ ပဋိက္ခိပိတွာ ဣဒါနိ ‘ယုဒ္ဓေန ဂဏှာမီ’တိ ဝဒတိ၊ သစေ ခေါ ပနာဟံ ဣမံ ယုဒ္ဓေန မာရေဿာမိ၊ ဂရဟာ မေ ဘဝိဿတိ၊ ကိံ မေ ရဇ္ဇေနာ’’တိ။ အထဿ ‘‘အလံ ယုဒ္ဓေန၊ ရဇ္ဇံ ဂဏှတူ’’တိ ပေသေသိ။ သော ရဇ္ဇံ ဂဏှိတွာ ကနိဋ္ဌဿ ဥပရဇ္ဇံ ဒတွာ တတော ပဋ္ဌာယ ရဇ္ဇံ ကာရေန္တော တဏှာဝသိကော ဟုတွာ ဧကေန ရဇ္ဇေန အသန္တုဋ္ဌော ဒွေ တီဏိ ရဇ္ဇာနိ ပတ္ထေတွာ တဏှာယ ကောဋိံ နာဒ္ဒသ။

တဒါ သက္ကော ဒေဝရာဇာ ‘‘ကေ နု ခေါ လောကေ မာတာပိတရော ဥပဋ္ဌဟန္တိ၊ ကေ ဒါနာဒီနိ ပုညာနိ ကရောန္တိ၊ ကေ တဏှာဝသိကာ’’တိ ဩလောကေန္တော တဿ တဏှာဝသိကဘာဝံ ဉတွာ ‘‘အယံ ဗာလော ဗာရာဏသိရဇ္ဇေနပိ န တုဿတိ၊ အဟံ သိက္ခာပေဿာမိ န’’န္တိ မာဏဝကဝေသေန ရာဇဒွါရေ ဌတွာ ‘‘ဧကော ဥပါယကုသလော မာဏဝေါ ဒွါရေ ဌိတော’’တိ အာရောစာပေတွာ ‘‘ပဝိသတူ’’တိ ဝုတ္တေ ပဝိသိတွာ ရာဇာနံ ဇယာပေတွာ ‘‘ကိံကာရဏာ အာဂတောသီ’’တိ ဝုတ္တေ ‘‘မဟာရာဇ တုမှာကံ ကိဉ္စိ ဝတ္တဗ္ဗံ အတ္ထိ၊ ရဟော ပစ္စာသီသာမီ’’တိ အာဟ။ သက္ကာနုဘာဝေန တာဝဒေဝ မနုဿာ ပဋိက္ကမိံသု။ အထ နံ မာဏဝေါ ‘‘အဟံ၊ မဟာရာဇ၊ ဖီတာနိ အာကိဏ္ဏမနုဿာနိ သမ္ပန္နဗလဝါဟနာနိ တီဏိ နဂရာနိ ပဿာမိ၊ အဟံ တေ အတ္တနော အာနုဘာဝေန တေသု ရဇ္ဇံ ဂဟေတွာ ဒဿာမိ၊ ပပဉ္စံ အကတွာ သီဃံ ဂန္တုံ ဝဋ္ဋတီ’’တိ အာဟ။ သော တဏှာဝသိကော ရာဇာ ‘‘သာဓူ’’တိ သမ္ပဋိစ္ဆိတွာ သက္ကာနုဘာဝေန ‘‘ကော ဝါ တွံ၊ ကုတော ဝါ အာဂတော၊ ကိံ ဝါ တေ လဒ္ဓုံ ဝဋ္ဋတီ’’တိ န ပုစ္ဆိ။ သောပိ ဧတ္တကံ ဝတွာ တာဝတိံသဘဝနမေဝ အဂမာသိ။

ရာဇာ အမစ္စေ ပက္ကောသာပေတွာ ‘‘ဧကော မာဏဝေါ ‘အမှာကံ တီဏိ ရဇ္ဇာနိ ဂဟေတွာ ဒဿာမီ’တိ အာဟ၊ တံ ပက္ကောသထ၊ နဂရေ ဘေရိံ စရာပေတွာ ဗလကာယံ သန္နိပါတာပေထ၊ ပပဉ္စံ အကတွာ တီဏိ ရဇ္ဇာနိ ဂဏှိဿာမီ’’တိ ဝတွာ ‘‘ကိံ ပန တေ၊ မဟာရာဇ၊ တဿ မာဏဝဿ သက္ကာရော ဝါ ကတော၊ နိဝါသဋ္ဌာနံ ဝါ ပုစ္ဆိတ’’န္တိ ဝုတ္တေ ‘‘နေဝ သက္ကာရံ အကာသိံ၊ န နိဝါသဋ္ဌာနံ ပုစ္ဆိံ၊ ဂစ္ဆထ နံ ဥပဓာရေထာ’’တိ အာဟ။ ဥပဓာရေန္တာ နံ အဒိသွာ ‘‘မဟာရာဇ၊ သကလနဂရေ မာဏဝံ န ပဿာမာ’’တိ အာရောစေသုံ။ တံ သုတွာ ရာဇာ ဒေါမနဿဇာတော ‘‘တီသု နဂရေသု ရဇ္ဇံ နဋ္ဌံ၊ မဟန္တေနမှိ ယသေန ပရိဟီနော၊ ‘နေဝ မေ ပရိဗ္ဗယံ အဒါသိ၊ န စ ပုစ္ဆိ နိဝါသဋ္ဌာန’န္တိ မယှံ ကုဇ္ဈိတွာ မာဏဝေါ အနာဂတော ဘဝိဿတီ’’တိ ပုနပ္ပုနံ စိန္တေသိ။ အထဿ တဏှာဝသိကဿ သရီရေ ဍာဟော ဥပ္ပဇ္ဇိ၊ သရီရေ ပရိဍယှန္တေ ဥဒရံ ခေါဘေတွာ လောဟိတပက္ခန္ဒိကာ ဥဒပါဒိ။ ဧကံ ဘာဇနံ ပဝိသတိ၊ ဧကံ နိက္ခမတိ၊ ဝေဇ္ဇာ တိကိစ္ဆိတုံ န သက္ကောန္တိ၊ ရာဇာ ကိလမတိ။ အထဿ ဗျာဓိတဘာဝေါ သကလနဂရေ ပါကဋော အဟောသိ။

တဒါ ဗောဓိသတ္တော တက္ကသိလတော သဗ္ဗသိပ္ပာနိ ဥဂ္ဂဏှိတွာ ဗာရာဏသိနဂရေ မာတာပိတူနံ သန္တိကံ အာဂတော တံ ရညော ပဝတ္တိံ သုတွာ ‘‘အဟံ တိကိစ္ဆိဿာမီ’’တိ ရာဇဒွါရံ ဂန္တွာ ‘‘ဧကော ကိရ တရုဏမာဏဝေါ တုမှေ တိကိစ္ဆိတုံ အာဂတော’’တိ အာရောစာပေသိ။ ရာဇာ ‘‘မဟန္တမဟန္တာ ဒိသာပါမောက္ခဝေဇ္ဇာပိ မံ တိကိစ္ဆိတုံ န သက္ကောန္တိ၊ ကိံ တရုဏမာဏဝေါ သက္ခိဿတိ၊ ပရိဗ္ဗယံ ဒတွာ ဝိဿဇ္ဇေထ န’’န္တိ အာဟ။ တံ သုတွာ မာဏဝေါ ‘‘မယှံ ဝေဇ္ဇကမ္မေန ဝေတနံ နတ္ထိ၊ အဟံ တိကိစ္ဆာမိ၊ ကေဝလံ ဘေသဇ္ဇမူလမတ္တံ ဒေတူ’’တိ အာဟ။ တံ သုတွာ ရာဇာ ‘‘သာဓူ’’တိ ပက္ကောသာပေသိ။ မာဏဝေါ ရာဇာနံ ဝန္ဒိတွာ ‘‘မာ ဘာယိ၊ မဟာရာဇ၊ အဟံ တေ တိကိစ္ဆာမိ၊ အပိစ ခေါ ပန မေ ရောဂဿ သမုဋ္ဌာနံ အာစိက္ခာဟီ’’တိ အာဟ။ ရာဇာ ဟရာယမာနော ‘‘ကိံ တေ သမုဋ္ဌာနေန၊ ဘေသဇ္ဇံ ဧဝ ကရောဟီ’’တိ အာဟ။ မဟာရာဇ၊ ဝေဇ္ဇာ နာမ ‘‘အယံ ဗျာဓိ ဣမံ နိဿာယ သမုဋ္ဌိတော’’တိ ဉတွာ အနုစ္ဆဝိကံ ဘေသဇ္ဇံ ကရောန္တီတိ။ ရာဇာ ‘‘သာဓု တာတာ’’တိ သမုဋ္ဌာနံ ကထေန္တော ‘‘ဧကေန မာဏဝေန အာဂန္တွာ တီသု နဂရေသု ရဇ္ဇံ ဂဟေတွာ ဒဿာမီ’’တိအာဒိံ ကတွာ သဗ္ဗံ ကထေတွာ ‘‘ဣတိ မေ တာတ၊ တဏှံ နိဿာယ ဗျာဓိ ဥပ္ပန္နော၊ သစေ တိကိစ္ဆိတုံ သက္ကောသိ၊ တိကိစ္ဆာဟီ’’တိ အာဟ။ ကိံ ပန မဟာရာဇ၊ သောစနာယ တာနိ နဂရာနိ သက္ကာ လဒ္ဓုန္တိ? ‘‘န သက္ကာ တာတာ’’တိ။ ‘‘ဧဝံ သန္တေ ကသ္မာ သောစသိ၊ မဟာရာဇ၊ သဗ္ဗမေဝ ဟိ သဝိညာဏကာဝိညာဏကဝတ္ထုံ အတ္တနော ကာယံ အာဒိံ ကတွာ ပဟာယ ဂမနီယံ ၊ စတူသု နဂရေသု ရဇ္ဇံ ဂဟေတွာပိ တွံ ဧကပ္ပဟာရေနေဝ န စတဿော ဘတ္တပါတိယော ဘုဉ္ဇိဿသိ၊ န စတူသု သယနေသု သယိဿသိ၊ န စတ္တာရိ ဝတ္ထယုဂါနိ အစ္ဆာဒေဿသိ၊ တဏှာဝသိကေန နာမ ဘဝိတုံ န ဝဋ္ဋတိ၊ အယဉှိ တဏှာ နာမ ဝဍ္ဎမာနာ စတူဟိ အပါယေဟိ မုစ္စိတုံ န ဒေတီတိ။

ဣတိ နံ မဟာသတ္တော ဩဝဒိတွာ အထဿ ဓမ္မံ ဒေသေန္တော ဣမာ ဂါထာ အဘာသိ –

၃၇။

‘‘ကာမံ ကာမယမာနဿ၊ တဿ စေ တံ သမိဇ္ဈတိ၊

အဒ္ဓါ ပီတိမနော ဟောတိ၊ လဒ္ဓါ မစ္စော ယဒိစ္ဆတိ။

၃၈။

‘‘ကာမံ ကာမယမာနဿ၊ တဿ စေ တံ သမိဇ္ဈတိ၊

တတော နံ အပရံ ကာမေ၊ ဃမ္မေ တဏှံဝ ဝိန္ဒတိ။

၃၉။

‘‘ဂဝံဝ သိင်္ဂိနော သိင်္ဂံ၊ ဝဍ္ဎမာနဿ ဝဍ္ဎတိ၊

ဧဝံ မန္ဒဿ ပေါသဿ၊ ဗာလဿ အဝိဇာနတော၊

ဘိယျော တဏှာ ပိပါသာ စ၊ ဝဍ္ဎမာနဿ ဝဍ္ဎတိ။

၄၀။

‘‘ပထဗျာ သာလိယဝကံ၊ ဂဝါဿံ ဒါသပေါရိသံ၊

ဒတွာ စ နာလမေကဿ၊ ဣတိ ဝိဒွါ သမံ စရေ။

၄၁။

‘‘ရာဇာ ပသယှ ပထဝိံ ဝိဇိတွာ၊ သသာဂရန္တံ မဟိမာဝသန္တော၊

ဩရံ သမုဒ္ဒဿ အတိတ္တရူပေါ၊ ပါရံ သမုဒ္ဒဿပိ ပတ္ထယေထ။

၄၂။

‘‘ယာဝ အနုဿရံ ကာမေ၊ မနသာ တိတ္တိ နာဇ္ဈဂါ၊

တတော နိဝတ္တာ ပဋိက္ကမ္မ ဒိသွာ၊ တေ ဝေ သုတိတ္တာ ယေ ပညာယ တိတ္တာ။

၄၃။

‘‘ပညာယ တိတ္တိနံ သေဋ္ဌံ၊ န သော ကာမေဟိ တပ္ပတိ၊

ပညာယ တိတ္တံ ပုရိသံ၊ တဏှာ န ကုရုတေ ဝသံ။

၄၄။

‘‘အပစိနေထေဝ ကာမာနံ၊ အပ္ပိစ္ဆဿ အလောလုပေါ၊

သမုဒ္ဒမတ္တော ပုရိသော၊ န သော ကာမေဟိ တပ္ပတိ။

၄၅။

‘‘ရထကာရောဝ စမ္မဿ၊ ပရိကန္တံ ဥပါဟနံ၊

ယံ ယံ စဇတိ ကာမာနံ၊ တံ တံ သမ္ပဇ္ဇတေ သုခံ၊

သဗ္ဗဉ္စေ သုခမိစ္ဆေယျ၊ သဗ္ဗေ ကာမေ ပရိစ္စဇေ’’တိ။

တတ္ထ ကာမန္တိ ဝတ္ထုကာမမ္ပိ ကိလေသကာမမ္ပိ။ ကာမယမာနဿာတိ ပတ္ထယမာနဿ။ တဿ စေ တံ သမိဇ္ဈတီတိ တဿ ပုဂ္ဂလဿ တံ ကာမိတဝတ္ထု သမိဇ္ဈတိ စေ၊ နိပ္ဖဇ္ဇတိ စေတိ အတ္ထော။ တတော နံ အပရံ ကာမေတိ ဧတ္ထ နန္တိ နိပါတမတ္တံ။ အပရန္တိ ပရဘာဂဒီပနံ။ ကာမေတိ ဥပယောဂဗဟုဝစနံ။ ဣဒံ ဝုတ္တံ ဟောတိ – သစေ ကာမံ ကာမယမာနဿ တံ ကာမိတဝတ္ထု သမိဇ္ဈတိ၊ တသ္မိံ သမိဒ္ဓေ တတော ပရံ သော ပုဂ္ဂလော ကာမယမာနော ယထာ နာမ ဃမ္မေ ဂိမှကာလေ ဝါတာတပေန ကိလန္တော တဏှံ ဝိန္ဒတိ၊ ပါနီယပိပါသံ ပဋိလဘတိ၊ ဧဝံ ဘိယျော ကာမတဏှာသင်္ခါတေ ကာမေ ဝိန္ဒတိ ပဋိလဘတိ၊ ရူပတဏှာဒိကာ တဏှာ စဿ ဝဍ္ဎတိယေဝါတိ။ ဂဝံဝါတိ ဂေါရူပဿ ဝိယ။ သိင်္ဂိနောတိ မတ္ထကံ ပဒါလေတွာ ဥဋ္ဌိတသိင်္ဂဿ။ မန္ဒဿာတိ မန္ဒပညဿ။ ဗာလဿာတိ ဗာလဓမ္မေ ယုတ္တဿ။ ဣဒံ ဝုတ္တံ ဟောတိ – ယထာ ဝစ္ဆကဿ ဝဍ္ဎန္တဿ သရီရေနေဝ သဒ္ဓိံ သိင်္ဂံ ဝဍ္ဎတိ၊ ဧဝံ အန္ဓဗာလဿပိ အပ္ပတ္တကာမတဏှာ စ ပတ္တကာမပိပါသာ စ အပရာပရံ ဝဍ္ဎတီတိ။

သာလိယဝကန္တိ သာလိခေတ္တယဝခေတ္တံ။ ဧတေန သာလိယဝါဒိကံ သဗ္ဗံ ဓညံ ဒဿေတိ၊ ဒုတိယပဒေန သဗ္ဗံ ဒွိပဒစတုပ္ပဒံ ဒဿေတိ။ ပဌမပဒေန ဝါ သဗ္ဗံ အဝိညာဏကံ၊ ဣတရေန သဝိညာဏကံ။ ဒတွာ စာတိ ဒတွာပိ။ ဣဒံ ဝုတ္တံ ဟောတိ – တိဋ္ဌန္တု တီဏိ ရဇ္ဇာနိ၊ သစေ သော မာဏဝေါ အညံ ဝါ သကလမ္ပိ ပထဝိံ သဝိညာဏကာဝိညာဏကရတနပူရံ ကဿစိ ဒတွာ ဂစ္ဆေယျ၊ ဣဒမ္ပိ ဧတ္တကံ ဝတ္ထု ဧကဿေဝ အပရိယန္တံ၊ ဧဝံ ဒုပ္ပူရာ ဧသာ တဏှာ နာမ။ ဣတိ ဝိဒွါ သမံ စရေတိ ဧဝံ ဇာနန္တော ပုရိသော တဏှာဝသိကော အဟုတွာ ကာယသမာစာရာဒီနိ ပူရေန္တော စရေယျ။

ဩရန္တိ ဩရိမကောဋ္ဌာသံ ပတွာ တေန အတိတ္တရူပေါ ပုန သမုဒ္ဒပါရမ္ပိ ပတ္ထယေထ။ ဧဝံ တဏှာဝသိကသတ္တာ နာမ ဒုပ္ပူရာတိ ဒဿေတိ။ ယာဝါတိ အနိယာမိတပရိစ္ဆေဒေါ။ အနုဿရန္တိ အနုဿရန္တော။ နာဇ္ဈဂါတိ န ဝိန္ဒတိ။ ဣဒံ ဝုတ္တံ ဟောတိ – မဟာရာဇ၊ ပုရိသော အပရိယန္တေပိ ကာမေ မနသာ အနုဿရန္တော တိတ္တိံ န ဝိန္ဒတိ၊ ပတ္တုကာမောဝ ဟောတိ၊ ဧဝံ ကာမေသု သတ္တာနံ တဏှာ ဝဍ္ဎတေဝ။ တတော နိဝတ္တာတိ တတော ပန ဝတ္ထုကာမကိလေသကာမတော စိတ္တေန နိဝတ္တိတွာ ကာယေန ပဋိက္ကမ္မ ဉာဏေန အာဒီနဝံ ဒိသွာ ယေ ပညာယ တိတ္တာ ပရိပုဏ္ဏာ၊ တေ တိတ္တာ နာမ။

ပညာယ တိတ္တိနံ သေဋ္ဌန္တိ ပညာယ တိတ္တီနံ အယံ ပရိပုဏ္ဏသေဋ္ဌော၊ အယမေဝ ဝါ ပါဌော။ န သော ကာမေဟိ တပ္ပတီတိ ‘‘န ဟီ’’တိပိ ပါဌော။ ယသ္မာ ပညာယ တိတ္တော ပုရိသော ကာမေဟိ န ပရိဍယှတီတိ အတ္ထော။ န ကုရုတေ ဝသန္တိ တာဒိသဉှိ ပုရိသံ တဏှာ ဝသေ ဝတ္တေတုံ န သက္ကောတိ၊ သွေဝ ပန တဏှာယ အာဒီနဝံ ဒိသွာ သရဘင်္ဂမာဏဝေါ ဝိယ စ အဍ္ဎမာသကရာဇာ ဝိယ စ တဏှာဝသေ န ပဝတ္တတီတိ အတ္ထော။ အပစိနေထေဝါတိ ဝိဒ္ဓံသေထေဝ။ သမုဒ္ဒမတ္တောတိ မဟတိယာ ပညာယ သမန္နာဂတတ္တာ သမုဒ္ဒပ္ပမာဏော။ သော မဟန္တေန အဂ္ဂိနာပိ သမုဒ္ဒေါ ဝိယ ကိလေသကာမေဟိ န တပ္ပတိ န ဍယှတိ။

ရထကာရောတိ စမ္မကာရော။ ပရိကန္တန္တိ ပရိကန္တန္တော။ ဣဒံ ဝုတ္တံ ဟောတိ – ယထာ စမ္မကာရော ဥပါဟနံ ပရိကန္တန္တော ယံ ယံ စမ္မဿ အဂယှူပဂဋ္ဌာနံ ဟောတိ၊ တံ တံ စဇိတွာ ဥပါဟနံ ကတွာ ဥပါဟနမူလံ လဘိတွာ သုခိတော ဟောတိ၊ ဧဝမေဝ ပဏ္ဍိတော စမ္မကာရသတ္ထသဒိသာယ ပညာယ ကန္တန္တော ယံ ယံ ဩဓိံ ကာမာနံ စဇတိ၊ တေန တေနဿ ကာမောဓိနာ ရဟိတံ တံ တံ ကာယကမ္မံ ဝစီကမ္မံ မနောကမ္မဉ္စ သုခံ သမ္ပဇ္ဇတိ ဝိဂတဒရထံ၊ သစေ ပန သဗ္ဗမ္ပိ ကာယကမ္မာဒိသုခံ ဝိဂတပရိဠာဟမေဝ ဣစ္ဆေယျ၊ ကသိဏံ ဘာဝေတွာ ဈာနံ နိဗ္ဗတ္တေတွာ သဗ္ဗေ ကာမေ ပရိစ္စဇေတိ။

ဗောဓိသတ္တဿ ပန ဣမံ ဂါထံ ကထေန္တဿ ရညော သေတစ္ဆတ္တံ အာရမ္မဏံ ကတွာ ဩဒါတကသိဏဇ္ဈာနံ ဥဒပါဒိ၊ ရာဇာပိ အရောဂေါ အဟောသိ။ သော တုဋ္ဌော သယနာ ဝုဋ္ဌဟိတွာ ‘‘ဧတ္တကာ ဝေဇ္ဇာ မံ တိကိစ္ဆိတုံ နာသက္ခိံသု၊ ပဏ္ဍိတမာဏဝေါ ပန အတ္တနော ဉာဏောသဓေန မံ နိရောဂံ အကာသီ’’တိ တေန သဒ္ဓိံ သလ္လပန္တော ဒသမံ ဂါထမာဟ –

၄၆။

‘‘အဋ္ဌ တေ ဘာသိတာ ဂါထာ၊ သဗ္ဗာ ဟောန္တိ သဟဿိယာ၊

ပဋိဂဏှ မဟာဗြဟ္မေ၊ သာဓေတံ တဝ ဘာသိတ’’န္တိ။

တတ္ထ အဋ္ဌာတိ ဒုတိယဂါထံ အာဒိံ ကတွာ ကာမာဒီနဝသံယုတ္တာ အဋ္ဌ။ သဟဿိယာတိ သဟဿာရဟာ။ ပဋိဂဏှာတိ အဋ္ဌ သဟဿာနိ ဂဏှ။ သာဓေတံ တဝ ဘာသိတန္တိ သာဓု ဧတံ တဝ ဝစနံ။

တံ သုတွာ မဟာသတ္တော ဧကာဒသမံ ဂါထမာဟ –

၄၇။

‘‘န မေ အတ္ထော သဟဿေဟိ၊ သတေဟိ နဟုတေဟိ ဝါ၊

ပစ္ဆိမံ ဘာသတော ဂါထံ၊ ကာမေ မေ န ရတော မနော’’တိ။

တတ္ထ ပစ္ဆိမန္တိ ‘‘ရထကာရောဝ စမ္မဿာ’’တိ ဂါထံ။ ကာမေ မေ န ရတော မနောတိ ဣမံ ဂါထံ ဘာသမာနဿေဝ မမ ဝတ္ထုကာမေပိ ကိလေသကာမေပိ မနော နာဘိရမာမိ။ အဟဉှိ ဣမံ ဂါထံ ဘာသမာနော အတ္တနောဝ ဓမ္မဒေသနာယ ဈာနံ နိဗ္ဗတ္တေသိံ၊ မဟာရာဇာတိ။

ရာဇာ ဘိယျောသောမတ္တာယ တုဿိတွာ မဟာသတ္တံ ဝဏ္ဏေန္တော ဩသာနဂါထမာဟ –

၄၈။

‘‘ဘဒြကော ဝတာယံ မာဏဝကော၊ သဗ္ဗလောကဝိဒူ မုနိ၊

ယော ဣမံ တဏှံ ဒုက္ခဇနနိံ၊ ပရိဇာနာတိ ပဏ္ဍိတော’’တိ။

တတ္ထ ဒုက္ခဇနနိန္တိ သကလဝဋ္ဋဒုက္ခဇနနိံ။ ပရိဇာနာတီတိ ပရိဇာနိ ပရိစ္ဆိန္ဒိ၊ လုဉ္စိတွာ နီဟရီတိ ဗောဓိသတ္တံ ဝဏ္ဏေန္တော ဧဝမာဟ။

ဗောဓိသတ္တောပိ ‘‘မဟာရာဇ၊ အပ္ပမတ္တော ဟုတွာ ဓမ္မံ စရာ’’တိ ရာဇာနံ ဩဝဒိတွာ အာကာသေန ဟိမဝန္တံ ဂန္တွာ ဣသိပဗ္ဗဇ္ဇံ ပဗ္ဗဇိတွာ ယာဝတာယုကံ ဌတွာ ဗြဟ္မဝိဟာရေ ဘာဝေတွာ အပရိဟီနဇ္ဈာနော ဟုတွာ ဗြဟ္မလောကူပဂေါ အဟောသိ။

သတ္ထာ ဣမံ ဓမ္မဒေသနံ အာဟရိတွာ ‘‘ဧဝံ၊ ဘိက္ခဝေ၊ ပုဗ္ဗေပါဟံ ဧတံ ဗြာဟ္မဏံ နိဿောကမကာသိ’’န္တိ ဝတွာ ဇာတကံ သမောဓာနေသိ – ‘‘တဒါ ရာဇာ ဧသ ဗြာဟ္မဏော အဟောသိ၊ ပဏ္ဍိတမာဏဝေါ ပန အဟမေဝ အဟောသိ’’န္တိ။

ကာမဇာတကဝဏ္ဏနာ စတုတ္ထာ။

[၄၆၈] ၅။ ဇနသန္ဓဇာတကဝဏ္ဏနာ

ဒသခလူတိ ဣဒံ သတ္ထာ ဇေတဝနေ ဝိဟရန္တော ကောသလရညော ဩဝါဒတ္ထာယ ကထေသိ။ ဧကသ္မိဉှိ ကာလေ ရာဇာ ဣဿရိယမဒမတ္တော ကိလေသသုခနိဿိတော ဝိနိစ္ဆယမ္ပိ န ပဋ္ဌပေသိ၊ ဗုဒ္ဓုပဋ္ဌာနမ္ပိ ပမဇ္ဇိ။ သော ဧကဒိဝသေ ဒသဗလံ အနုဿရိတွာ ‘‘သတ္ထာရံ ဝန္ဒိဿာမီ’’တိ ဘုတ္တပါတရာသော ရထဝရမာရုယှ ဝိဟာရံ ဂန္တွာ သတ္ထာရံ ဝန္ဒိတွာ နိသီဒိ။ အထ နံ သတ္ထာ ‘‘ကိံ မဟာရာဇ စိရံ န ပညာယသီ’’တိ ဝတွာ ‘‘ဗဟုကိစ္စတာယ နော ဘန္တေ ဗုဒ္ဓုပဋ္ဌာနဿ ဩကာသော န ဇာတော’’တိ ဝုတ္တေ ‘‘မဟာရာဇ၊ မာဒိသေ နာမ ဩဝါဒဒါယကေ သဗ္ဗညုဗုဒ္ဓေ ဓုရဝိဟာရေ ဝိဟရန္တေ အယုတ္တံ တဝ ပမဇ္ဇိတုံ၊ ရညာ နာမ ရာဇကိစ္စေသု အပ္ပမတ္တေန ဘဝိတဗ္ဗံ၊ ရဋ္ဌဝါသီနံ မာတာပိတုသမေန အဂတိဂမနံ ပဟာယ ဒသ ရာဇဓမ္မေ အကောပေန္တေန ရဇ္ဇံ ကာရေတုံ ဝဋ္ဋတိ၊ ရညော ဟိ ဓမ္မိကဘာဝေ သတိ ပရိသာပိဿ ဓမ္မိကာ ဟောန္တိ၊ အနစ္ဆရိယံ ခေါ ပနေတံ၊ ယံ မယိ အနုသာသန္တေ တွံ ဓမ္မေန ရဇ္ဇံ ကာရေယျာသိ၊ ပေါရာဏကပဏ္ဍိတာ အနုသာသကအာစရိယေ အဝိဇ္ဇမာနေပိ အတ္တနော မတိယာဝ တိဝိဓသုစရိတဓမ္မေ ပတိဋ္ဌာယ မဟာဇနဿ ဓမ္မံ ဒေသေတွာ သဂ္ဂပထံ ပူရယမာနာ အဂမံသူ’’တိ ဝတွာ တေန ယာစိတော အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော တဿ အဂ္ဂမဟေသိယာ ကုစ္ဆိမှိ နိဗ္ဗတ္တိ၊ ‘‘ဇနသန္ဓကုမာရော’’တိဿ နာမံ ကရိံသု။ အထဿ ဝယပ္ပတ္တဿ တက္ကသိလတော သဗ္ဗသိပ္ပာနိ ဥဂ္ဂဏှိတွာ အာဂတကာလေ ရာဇာ သဗ္ဗာနိ ဗန္ဓနာဂါရာနိ သောဓာပေတွာ ဥပရဇ္ဇံ အဒါသိ။ သော အပရဘာဂေ ပိတု အစ္စယေန ရဇ္ဇေ ပတိဋ္ဌာယ စတူသု နဂရဒွါရေသု နဂရမဇ္ဈေ ရာဇဒွါရေ စာတိ ဆ ဒါနသာလာယော ကာရာပေတွာ ဒိဝသေ ဒိဝသေ ဆ သတသဟဿာနိ ပရိစ္စဇိတွာ သကလဇမ္ဗုဒီပံ သင်္ခေါဘေတွာ မဟာဒါနံ ပဝတ္တေန္တော ဗန္ဓနာဂါရာနိ နိစ္စံ ဝိဝဋာနိ ကာရာပေတွာ ဓမ္မဘဏ္ဍိကံ သောဓာပေတွာ စတူဟိ သင်္ဂဟဝတ္ထူဟိ လောကံ သင်္ဂဏှန္တော ပဉ္စ သီလာနိ ရက္ခန္တော ဥပေါသထဝါသံ ဝသန္တော ဓမ္မေန ရဇ္ဇံ ကာရေသိ။ အန္တရန္တရာ စ ရဋ္ဌဝါသိနော သန္နိပါတာပေတွာ ‘‘ဒါနံ ဒေထ၊ သီလံ သမာဒိယထ၊ ဘာဝနံ ဘာဝေထ၊ ဓမ္မေန ကမ္မန္တေ စ ဝေါဟာရေ စ ပယောဇေထ၊ ဒဟရကာလေယေဝ သိပ္ပာနိ ဥဂ္ဂဏှထ၊ ဓနံ ဥပ္ပာဒေထ၊ ဂါမကူဋကမ္မံ ဝါ ပိသုဏဝါစာကမ္မံ ဝါ မာ ကရိတ္ထ၊ စဏ္ဍာ ဖရုသာ မာ အဟုဝတ္ထ၊ မာတုပဋ္ဌာနံ ပိတုပဋ္ဌာနံ ပူရေထ၊ ကုလေ ဇေဋ္ဌာပစာယိနော ဘဝထာ’’တိ ဓမ္မံ ဒေသေတွာ မဟာဇနေ သုစရိတဓမ္မေ ပတိဋ္ဌာပေသိ။ သော ဧကဒိဝသံ ပန္နရသီဥပေါသထေ သမာဒိန္နုပေါသထော ‘‘မဟာဇနဿ ဘိယျော ဟိတသုခတ္ထာယ အပ္ပမာဒဝိဟာရတ္ထာယ ဓမ္မံ ဒေသေဿာမီ’’တိ စိန္တေတွာ နဂရေ ဘေရိံ စရာပေတွာ အတ္တနော ဩရောဓေ အာဒိံ ကတွာ သဗ္ဗနဂရဇနံ သန္နိပါတာပေတွာ ရာဇင်္ဂဏေ အလင်္ကရိတွာ အလင်္ကတရတနမဏ္ဍပမဇ္ဈေ သုပညတ္တဝရပလ္လင်္ကေ နိသီဒိတွာ ‘‘အမ္ဘော၊ နဂရဝါသိနော တုမှာကံ တပနီယေ စ အတပနီယေ စ ဓမ္မေ ဒေသေဿာမိ၊ အပ္ပမတ္တာ ဟုတွာ ဩဟိတသောတာ သက္ကစ္စံ သုဏာထာ’’တိ ဝတွာ ဓမ္မံ ဒေသေသိ။

သတ္ထာ သစ္စပရိဘာဝိတံ မုခရတနံ ဝိဝရိတွာ တံ ဓမ္မဒေသနံ မဓုရေန သရေန ကောသလရညော အာဝိ ကရောန္တော –

၄၉။

‘‘ဒသ ခလု ဣမာနိ ဌာနာနိ၊ ယာနိ ပုဗ္ဗေ အကရိတွာ၊

သ ပစ္ဆာ မနုတပ္ပတိ၊ ဣစ္စေဝါဟ ဇနသန္ဓော။

၅၀။

‘‘အလဒ္ဓါ ဝိတ္တံ တပ္ပတိ၊ ပုဗ္ဗေ အသမုဒါနိတံ၊

န ပုဗ္ဗေ ဓနမေသိဿံ၊ ဣတိ ပစ္ဆာနုတပ္ပတိ။

၅၁။

‘‘သကျရူပံ ပုရေ သန္တံ၊ မယာ သိပ္ပံ န သိက္ခိတံ၊

ကိစ္ဆာ ဝုတ္တိ အသိပ္ပဿ၊ ဣတိ ပစ္ဆာနုတပ္ပတိ။

၅၂။

‘‘ကူဋဝေဒီ ပုရေ အာသိံ၊ ပိသုဏော ပိဋ္ဌိမံသိကော၊

စဏ္ဍော စ ဖရုသော စာပိ၊ ဣတိ ပစ္ဆာနုတပ္ပတိ။

၅၃။

‘‘ပါဏာတိပါတီ ပုရေ အာသိံ၊ လုဒ္ဒေါ စာပိ အနာရိယော၊

ဘူတာနံ နာပစာယိဿံ၊ ဣတိ ပစ္ဆာနုတပ္ပတိ။

၅၄။

‘‘ဗဟူသု ဝတ သန္တီသု၊ အနာပါဒါသု ဣတ္ထိသု၊

ပရဒါရံ အသေဝိဿံ၊ ဣတိ ပစ္ဆာနုတပ္ပတိ။

၅၅။

‘‘ဗဟုမှိ ဝတ သန္တမှိ၊ အန္နပါနေ ဥပဋ္ဌိတေ၊

န ပုဗ္ဗေ အဒဒံ ဒါနံ၊ ဣတိ ပစ္ဆာနုတပ္ပတိ။

၅၆။

‘‘မာတရံ ပိတရံ စာပိ၊ ဇိဏ္ဏကံ ဂတယောဗ္ဗနံ၊

ပဟု သန္တော န ပေါသိဿံ၊ ဣတိ ပစ္ဆာနုတပ္ပတိ။

၅၇။

‘‘အာစရိယမနုသတ္ထာရံ ၊ သဗ္ဗကာမရသာဟရံ၊

ပိတရံ အတိမညိဿံ၊ ဣတိ ပစ္ဆာနုတပ္ပတိ။

၅၈။

‘‘သမဏေ ဗြာဟ္မဏေ စာပိ၊ သီလဝန္တေ ဗဟုဿုတေ၊

န ပုဗ္ဗေ ပယိရုပါသိဿံ၊ ဣတိ ပစ္ဆာနုတပ္ပတိ။

၅၉။

‘‘သာဓု ဟောတိ တပေါ စိဏ္ဏော၊ သန္တော စ ပယိရုပါသိတော၊

န စ ပုဗ္ဗေ တပေါ စိဏ္ဏော၊ ဣတိ ပစ္ဆာနုတပ္ပတိ။

၆၀။

‘‘ယော စ ဧတာနိ ဌာနာနိ၊ ယောနိသော ပဋိပဇ္ဇတိ၊

ကရံ ပုရိသကိစ္စာနိ၊ သ ပစ္ဆာ နာနုတပ္ပတီ’’တိ။ – ဣမာ ဂါထာ အာဟ၊

တတ္ထ ဌာနာနီတိ ကာရဏာနိ။ ပုဗ္ဗေတိ ပဌမမေဝ အကရိတွာ။ သ ပစ္ဆာ မနုတပ္ပတီတိ သော ပဌမံ ကတ္တဗ္ဗာနံ အကာရကော ပုဂ္ဂလော ပစ္ဆာ ဣဓလောကေပိ ပရလောကေပိ တပ္ပတိ ကိလမတိ။ ‘‘ပစ္ဆာ ဝါ အနုတပ္ပတီ’’တိပိ ပါဌော။ ဣစ္စေဝါဟာတိ ဣတိ ဧဝံ အာဟာတိ ပဒစ္ဆေဒေါ၊ ဣတိ ဧဝံ ရာဇာ ဇနသန္ဓော အဝေါစ။ ဣစ္စဿုဟာတိပိ ပါဌော။ တတ္ထ အဿု-ကာရော နိပါတမတ္တံ ဣတိ အဿု အာဟာတိ ပဒစ္ဆေဒေါ။ ဣဒါနိ တာနိ ဒသ တပနီယကာရဏာနိ ပကာသေတုံ ဗောဓိသတ္တဿ ဓမ္မကထာ ဟောတိ။ တတ္ထ ပုဗ္ဗေတိ ပဌမမေဝ တရုဏကာလေ ပရက္ကမံ ကတွာ အသမုဒါနိတံ အသမ္ဘတံ ဓနံ မဟလ္လကကာလေ အလဘိတွာ တပ္ပတိ သောစတိ၊ ပရေ စ သုခိတေ ဒိသွာ သယံ ဒုက္ခံ ဇီဝန္တော ‘‘ပုဗ္ဗေ ဓနံ န ပရိယေသိဿ’’န္တိ ဧဝံ ပစ္ဆာ အနုတပ္ပတိ၊ တသ္မာ မဟလ္လကကာလေ သုခံ ဇီဝိတုကာမာ ဒဟရကာလေယေဝ ဓမ္မိကာနိ ကသိကမ္မာဒီနိ ကတွာ ဓနံ ပရိယေသထာတိ ဒဿေတိ။

ပုရေ သန္တန္တိ ပုရေ ဒဟရကာလေ အာစရိယေ ပယိရုပါသိတွာ မယာ ကာတုံ သကျရူပံ သမာနံ ဟတ္ထိသိပ္ပာဒိကံ ကိဉ္စိ သိပ္ပံ န သိက္ခိတံ။ ကိစ္ဆာတိ မဟလ္လကကာလေ အသိပ္ပဿ ဒုက္ခာ ဇီဝိတဝုတ္တိ၊ နေဝ သက္ကာ တဒါ သိပ္ပံ သိက္ခိတုံ၊ တသ္မာ မဟလ္လကကာလေ သုခံ ဇီဝိတုကာမာ တရုဏကာလေယေဝ သိပ္ပံ သိက္ခထာတိ ဒဿေတိ။ ကုဋဝေဒီတိ ကူဋဇာနနကော ဂါမကူဋကော ဝါ လောကဿ အနတ္ထကာရကော ဝါ တုလာကူဋာဒိကာရကော ဝါ ကူဋဋ္ဋကာရကော ဝါတိ အတ္ထော။ အာသိန္တိ ဧဝရူပေါ အဟံ ပုဗ္ဗေ အဟောသိံ။ ပိသုဏောတိ ပေသုညကာရဏော။ ပိဋ္ဌိမံသိကောတိ လဉ္ဇံ ဂဟေတွာ အသာမိကေ သာမိကေ ကရောန္တော ပရေသံ ပိဋ္ဌိမံသခါဒကော။ ဣတိ ပစ္ဆာတိ ဧဝံ မရဏမဉ္စေ နိပန္နော အနုတပ္ပတိ ၊ တသ္မာ သစေ နိရယေ န ဝသိတုကာမာတ္ထ၊ မာ ဧဝရူပံ ပါပကမ္မံ ကရိတ္ထာတိ ဩဝဒတိ။

လုဒ္ဒေါတိ ဒါရုဏော။ အနာရိယောတိ န အရိယော နီစသမာစာရော။ နာပစာယိဿန္တိ ခန္တိမေတ္တာနုဒ္ဒယဝသေန နီစဝုတ္တိကော နာဟောသိံ။ သေသံ ပုရိမနယေနေဝ ယောဇေတဗ္ဗံ။ အနာပါဒါသူတိ အာပါဒါနံ အာပါဒေါ၊ ပရိဂ္ဂဟောတိ အတ္ထော။ နတ္ထိ အာပါဒေါ ယာသံ တာ အနာပါဒါ၊ အညေဟိ အကတပရိဂ္ဂဟာသူတိ အတ္ထော။ ဥပဋ္ဌိတေတိ ပစ္စုပဋ္ဌိတေ။ န ပုဗ္ဗေတိ ဣတော ပုဗ္ဗေ ဒါနံ န အဒဒံ။ ပဟု သန္တောတိ ဓနဗလေနာပိ ကာယဗလေနာပိ ပေါသိတုံ သမတ္ထော ပဋိဗလော သမာနော။ အာစရိယန္တိ အာစာရေ သိက္ခာပနတော ဣဓ ပိတာ ‘‘အာစရိယော’’တိ အဓိပ္ပေတော။ အနုသတ္ထာရန္တိ အနုသာသကံ။ သဗ္ဗကာမရသာဟရန္တိ သဗ္ဗေ ဝတ္ထုကာမရသေ အာဟရိတွာ ပေါသိတာရံ။ အတိမညိဿန္တိ တဿ ဩဝါဒံ အဂဏှန္တော အတိက္ကမိတွာ မညိဿံ။

န ပုဗ္ဗေတိ ဣတော ပုဗ္ဗေ ဓမ္မိကသမဏဗြာဟ္မဏေပိ ဂိလာနာဂိလာနေပိ စီဝရာဒီနိ ဒတွာ အပ္ပဋိဇဂ္ဂနေန န ပယိရုပါသိဿံ။ တပေါတိ သုစရိတတပေါ။ သန္တောတိ တီဟိ ဒွါရေဟိ ဥပသန္တော သီလဝါ။ ဣဒံ ဝုတ္တံ ဟောတိ – တိဝိဓသုစရိတသင်္ခါတော တပေါ စိဏ္ဏော ဧဝရူပေါ စ ဥပသန္တော ပယိရုပါသိတော နာမ သာဓု သုန္ဒရော။ န ပုဗ္ဗေတိ မယာ ဒဟရကာလေ ဧဝရူပေါ တပေါ န စိဏ္ဏော၊ ဣတိ ပစ္ဆာ ဇရာဇိဏ္ဏော မရဏဘယတဇ္ဇိတော အနုတပ္ပတိ သောစတိ။ သစေ တုမှေ ဧဝံ န သောစိတုကာမာ၊ တပေါကမ္မံ ကရောထာတိ ဝဒတိ။ ယော စ ဧတာနီတိ ယော ပန ဧတာနိ ဒသ ကာရဏာနိ ပဌမမေဝ ဥပါယေန ပဋိပဇ္ဇတိ သမာဒါယ ဝတ္တတိ၊ ပုရိသေဟိ ကတ္တဗ္ဗာနိ ဓမ္မိကကိစ္စာနိ ကရောန္တော သော အပ္ပမာဒဝိဟာရီ ပုရိသော ပစ္ဆာ နာနုတပ္ပတိ၊ သောမနဿပ္ပတ္တောဝ ဟောတီတိ။

ဣတိ မဟာသတ္တော အနွဒ္ဓမာသံ ဣမိနာ နိယာမေန မဟာဇနဿ ဓမ္မံ ဒေသေသိ။ မဟာဇနောပိဿ ဩဝါဒေ ဌတွာ တာနိ ဒသ ဌာနာနိ ပူရေတွာ သဂ္ဂပရာယဏောဝ အဟောသိ။

သတ္ထာ ဣမံ ဓမ္မဒေသနံ အာဟရိတွာ ‘‘ဧဝံ၊ မဟာရာဇ၊ ပေါရာဏကပဏ္ဍိတာ အနာစရိယကာပိ အတ္တနော မတိယာဝ ဓမ္မံ ဒေသေတွာ မဟာဇနံ သဂ္ဂပထေ ပတိဋ္ဌာပေသု’’န္တိ ဝတွာ ဇာတကံ သမောဓာနေသိ – ‘‘တဒါ ပရိသာ ဗုဒ္ဓပရိသာ အဟေသုံ၊ ဇနသန္ဓရာဇာ ပန အဟမေဝ အဟောသိ’’န္တိ။

ဇနသန္ဓဇာတကဝဏ္ဏနာ ပဉ္စမာ။

[၄၆၉] ၆။ မဟာကဏှဇာတကဝဏ္ဏနာ

ကဏှောကဏှော စာတိ ဣဒံ သတ္ထာ ဇေတဝနေ ဝိဟရန္တော လောကတ္ထစရိယံ အာရဗ္ဘ ကထေသိ။ ဧကဒိဝသဉှိ ဘိက္ခူ ဓမ္မသဘာယံ နိသီဒိတွာ ‘‘ယာဝဉ္စိဒံ၊ အာဝုသော၊ သတ္ထာ ဗဟုဇနဟိတာယ ပဋိပန္နော အတ္တနော ဖာသုဝိဟာရံ ပဟာယ လောကဿေဝ အတ္ထံ စရတိ၊ ပရမာဘိသမ္ဗောဓိံ ပတွာ သယံ ပတ္တစီဝရမာဒါယ အဋ္ဌာရသယောဇနမဂ္ဂံ ဂန္တွာ ပဉ္စဝဂ္ဂိယတ္ထေရာနံ ဓမ္မစက္ကံ (သံ။ နိ။ ၅။၁၀၈၁၊ မဟာဝ။ ၁၃ အာဒယော၊ ပဋိ။ မ။ ၂။၃၀) ပဝတ္တေတွာ ပဉ္စမိယာ ပက္ခဿ အနတ္တလက္ခဏသုတ္တံ (သံ။ နိ။ ၃။၅၉၊ မဟာဝ။ ၂၀ အာဒယော) ကထေတွာ သဗ္ဗေသံ အရဟတ္တံ အဒါသိ။ ဥရုဝေလံ ဂန္တွာ တေဘာတိကဇဋိလာနံ အဍ္ဎုဍ္ဎာနိ ပါဋိဟာရိယသဟဿာနိ ဒဿေတွာ ပဗ္ဗာဇေတွာ ဂယာသီသေ အာဒိတ္တပရိယာယံ (သံ။ နိ။ ၄။၂၃၅၊ မဟာဝ။ ၅၄) ကထေတွာ ဇဋိလသဟဿာနံ အရဟတ္တံ အဒါသိ၊ မဟာကဿပဿ တီဏိ ဂါဝုတာနိ ပစ္စုဂ္ဂမနံ ဂန္တွာ တီဟိ ဩဝါဒေဟိ ဥပသမ္ပဒံ အဒါသိ။ ဧကော ပစ္ဆာဘတ္တံ ပဉ္စစတ္တာလီသယောဇနမဂ္ဂံ ဂန္တွာ ပုက္ကုသာတိကုလပုတ္တံ အနာဂါမိဖလေ ပတိဋ္ဌာပေသိ၊ မဟာကပ္ပိနဿ ဝီသယောဇနသတံ ပစ္စုဂ္ဂမနံ ကတွာ အရဟတ္တံ အဒါသိ၊ ဧကော ပစ္ဆာဘတ္တံ တိံသယောဇနမဂ္ဂံ ဂန္တွာ တာဝ ကက္ခဠံ ဖရုသံ အင်္ဂုလိမာလံ အရဟတ္တေ ပတိဋ္ဌာပေသိ၊ တိံသယောဇနမဂ္ဂံ ဂန္တွာ အာဠဝကံ ယက္ခံ သောတာပတ္တိဖလေ ပတိဋ္ဌာပေတွာ ကုမာရဿ သောတ္ထိံ အကာသိ။ တာဝတိံသဘဝနေ တေမာသံ ဝသန္တော အသီတိယာ ဒေဝတာကောဋီနံ ဓမ္မာဘိသမယံ သမ္ပာဒေသိ၊ ဗြဟ္မလောကံ ဂန္တွာ ဗကဗြဟ္မုနော ဒိဋ္ဌိံ ဘိန္ဒိတွာ ဒသန္နံ ဗြဟ္မသဟဿာနံ အရဟတ္တံ အဒါသိ၊ အနုသံဝစ္ဆရံ တီသု မဏ္ဍလေသု စာရိကံ စရမာနော ဥပနိဿယသမ္ပန္နာနံ မနုဿာနံ သရဏာနိ စေဝ သီလာနိစ မဂ္ဂဖလာနိ စ ဒေတိ၊ နာဂသုပဏ္ဏာဒီနမ္ပိ နာနပ္ပကာရံ အတ္ထံ စရတီ’’တိ ဒသဗလဿ လောကတ္ထစရိယဂုဏံ ကထယိံသု။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘အနစ္ဆရိယံ၊ ဘိက္ခဝေ၊ သောဟံ ဣဒါနိ အဘိသမ္ဗောဓိံ ပတွာ လောကဿ အတ္ထံ စရေယျံ၊ ပုဗ္ဗေ သရာဂကာလေပိ လောကဿ အတ္ထံ အစရိ’’န္တိ ဝတွာ အတီတံ အာဟရိ။

အတီတေ ကဿပသမ္မာသမ္ဗုဒ္ဓကာလေ ဗာရာဏသိယံ ဥသီနကော နာမ ရာဇာ ရဇ္ဇံ ကာရေသိ။ ကဿပသမ္မာသမ္ဗုဒ္ဓေ စတုသစ္စဒေသနာယ မဟာဇနံ ကိလေသဗန္ဓနာ မောစေတွာ နိဗ္ဗာနနဂရံ ပူရေတွာ ပရိနိဗ္ဗုတေ ဒီဃဿ အဒ္ဓုနော အစ္စယေန သာသနံ ဩသက္ကိ။ ဘိက္ခူ ဧကဝီသတိယာ အနေသနာဟိ ဇီဝိကံ ကပ္ပေန္တိ၊ ဘိက္ခူ ဂိဟိသံသဂ္ဂံ ကရောန္တိ၊ ပုတ္တဓီတာဒီဟိ ဝဍ္ဎန္တိ။ ဘိက္ခုနိယောပိ ဂိဟိသံသဂ္ဂံ ကရောန္တိ၊ ပုတ္တဓီတာဒီဟိ ဝဍ္ဎန္တိ။ ဘိက္ခူ ဘိက္ခုဓမ္မံ၊ ဘိက္ခုနိယော ဘိက္ခုနိဓမ္မံ၊ ဥပေါသကာ ဥပါသကဓမ္မံ၊ ဥပါသိကာ ဥပါသိကဓမ္မံ၊ ဗြာဟ္မဏာ ဗြာဟ္မဏဓမ္မံ ဝိဿဇ္ဇေသုံ။ ယေဘုယျေန မနုဿာ ဒသ အကုသလကမ္မပထေ သမာဒါယ ဝတ္တိံသု၊ မတမတာ အပါယေသု ပရိပူရေသုံ။ တဒါ သက္ကော ဒေဝရာဇာ နဝေ နဝေ ဒေဝေ အပဿန္တော မနုဿလောကံ ဩလောကေတွာ မနုဿာနံ အပါယေသု နိဗ္ဗတ္တိတဘာဝံ ဉတွာ သတ္ထု သာသနံ ဩသက္ကိတံ ဒိသွာ ‘‘ကိံ နု ကရိဿာမီ’’တိ စိန္တေတွာ ‘‘အတ္ထေကော ဥပါယော၊ မဟာဇနံ တာသေတွာ ဘီတဘာဝံ ဉတွာ ပစ္ဆာ အဿာသေတွာ ဓမ္မံ ဒေသေတွာ ဩသက္ကိတံ သာသနံ ပဂ္ဂယှ အပရမ္ပိ ဝဿသဟဿံ ပဝတ္တနကာရဏံ ကရိဿာမီ’’တိ သန္နိဋ္ဌာနံ ကတွာ မာတလိဒေဝပုတ္တံ မောစပ္ပမာဏဒါဌံ စတူဟိ ဒါဌာဟိ ဝိနိဂ္ဂတရသ္မိယာ ဘယာနကံ ကတွာ ဂဗ္ဘိနီနံ ဒဿနေနေဝ ဂဗ္ဘပါတနသမတ္ထံ ဃောရရူပံ အာဇာနေယျပ္ပမာဏံ ကာဠဝဏ္ဏံ မဟာကဏှသုနခံ မာပေတွာ ပဉ္စဗန္ဓနေန ဗန္ဓိတွာ ရတ္တမာလံ ကဏ္ဌေ ပိဠန္ဓိတွာ ရဇ္ဇုကောဋိကံ အာဒါယ သယံ ဒွေ ကာသာယာနိ နိဝါသေတွာ ပစ္ဆာမုခေ ပဉ္စဓာ ကေသေ ဗန္ဓိတွာ ရတ္တမာလံ ပိဠန္ဓိတွာ အာရောပိတပဝါဠဝဏ္ဏဇိယံ မဟာဓနုံ ဂဟေတွာ ဝဇိရဂ္ဂနာရာစံ နခေန ပရိဝဋ္ဋေန္တော ဝနစရကဝေသံ ဂဟေတွာ နဂရတော ယောဇနမတ္တေ ဌာနေ ဩတရိတွာ ‘‘နဿတိ လောကော၊ နဿတိ လောကော’’တိ တိက္ခတ္တုံ သဒ္ဒံ အနုသာဝေတွာ မနုဿေ ဥတ္တာသေတွာ နဂရူပစာရံ ပတွာ ပုန သဒ္ဒမကာသိ။

မနုဿာ သုနခံ ဒိသွာ ဥတြသ္တာ နဂရံ ပဝိသိတွာ တံ ပဝတ္တိံ ရညော အာရောစေသုံ။ ရာဇာ သီဃံ နဂရဒွါရာနိ ပိဒဟာပေသိ။ သက္ကောပိ အဋ္ဌာရသဟတ္ထံ ပါကာရံ ဥလ္လင်္ဃိတွာ သုနခေန သဒ္ဓိံ အန္တောနဂရေ ပတိဋ္ဌဟိ။ မနုဿာ ဘီတတသိတာ ပလာယိတွာ ဂေဟာနိ ပဝိသိတွာ နိလီယိံသု။ မဟာကဏှောပိ ဒိဋ္ဌဒိဋ္ဌေ မနုဿေ ဥပဓာဝိတွာ သန္တာသေန္တော ရာဇနိဝေသနံ အဂမာသိ။ ရာဇင်္ဂဏေ မနုဿာ ဘယေန ပလာယိတွာ ရာဇနိဝေသနံ ပဝိသိတွာ ဒွါရံ ပိဒဟိံသု။ ဥသီနကရာဇာပိ ဩရောဓေ ဂဟေတွာ ပါသာဒံ အဘိရုဟိ။ မဟာကဏှော သုနခေါ ပုရိမပါဒေ ဥက္ခိပိတွာ ဝါတပါနေ ဌတွာ မဟာဘုဿိတံ ဘုဿိ။ တဿ သဒ္ဒေါ ဟေဋ္ဌာ အဝီစိံ၊ ဥပရိ ဘဝဂ္ဂံ ပတွာ သကလစက္ကဝါဠံ ဧကနိန္နာဒံ အဟောသိ။ ဝိဓုရဇာတကေ (ဇာ။ ၂။၂၂။၁၃၄၆ အာဒယော) ဟိ ပုဏ္ဏကယက္ခရညော၊ ကုသဇာတကေ (ဇာ။ ၂။၂၀။၁ အာဒယော) ကုသရညော၊ ဘူရိဒတ္တဇာတကေ (ဇာ။ ၂။၂၂။၇၈၄ အာဒယော) သုဒဿနနာဂရညော၊ ဣမသ္မိံ မဟာကဏှဇာတကေ အယံ သဒ္ဒေါတိ ဣမေ စတ္တာရော သဒ္ဒါ ဇမ္ဗုဒိပေ မဟာသဒ္ဒါ နာမ အဟေသုံ။

နဂရဝါသိနော ဘီတတသိတာ ဟုတွာ ဧကပုရိသောပိ သက္ကေန သဒ္ဓိံ ကထေတုံ နာသက္ခိ၊ ရာဇာယေဝ သတိံ ဥပဋ္ဌာပေတွာ ဝါတပါနံ နိဿာယ သက္ကံ အာမန္တေတွာ ‘‘အမ္ဘော လုဒ္ဒက၊ ကသ္မာ တေ သုနခေါ ဘုဿတီ’’တိ အာဟ။ ‘‘ဆာတဘာဝေန၊ မဟာရာဇာ’’တိ။ ‘‘တေန ဟိ တဿ ဘတ္တံ ဒါပေဿာမီ’’တိ အန္တောဇနဿ စ အတ္တနော စ ပက္ကဘတ္တံ သဗ္ဗံ ဒါပေသိ။ တံ သဗ္ဗံ သုနခေါ ဧကကဗဠံ ဝိယ ကတွာ ပုန သဒ္ဒမကာသိ။ ပုန ရာဇာ ပုစ္ဆိတွာ ‘‘ဣဒါနိပိ မေ သုနခေါ ဆာတောယေဝါ’’တိ သုတွာ ဟတ္ထိအဿာဒီနံ ပက္ကဘတ္တံ သဗ္ဗံ အာဟရာပေတွာ ဒါပေသိ။ တသ္မိံ ဧကပ္ပဟာရေနေဝ နိဋ္ဌာပိတေ သကလနဂရဿ ပက္ကဘတ္တံ ဒါပေသိ။ တမ္ပိ သော တထေဝ ဘုဉ္ဇိတွာ ပုန သဒ္ဒမကာသိ။ ရာဇာ ‘‘န ဧသ သုနခေါ၊ နိဿံသယံ ဧသ ယက္ခော ဘဝိဿတိ၊ အာဂမနကာရဏံ ပုစ္ဆိဿာမီ’’တိ ဘီတတသိတော ဟုတွာ ပုစ္ဆန္တော ပဌမံ ဂါထမာဟ –

၆၁။

‘‘ကဏှော ကဏှော စ ဃောရော စ၊ သုက္ကဒါဌော ပဘာသဝါ၊

ဗဒ္ဓါ ပဉ္စဟိ ရဇ္ဇူဟိ၊ ကိံ ရဝိ သုနခေါ တဝါ’’တိ။

တတ္ထ ကဏှော ကဏှောတိ ဘယဝသေန ဒဠှီဝသေန ဝါ အာမေဍိတံ။ ဃောရောတိ ပဿန္တာနံ ဘယဇနကော။ ပဘာသဝါတိ ဒါဌာ နိက္ခန္တရံသိပဘာသေန ပဘာသဝါ။ ကိံ ရဝီတိ ကိံ ဝိရဝိ။ တဝေသ ဧဝရူပေါ ကက္ခဠော သုနခေါ ကိံ ကရောတိ၊ ကိံ မိဂေ ဂဏှာတိ၊ ဥဒါဟု တေ အမိတ္တေ၊ ကိံ တေ ဣမိနာ၊ ဝိဿဇ္ဇေဟိ နန္တိ အဓိပ္ပာယေနေဝမာဟ။

တံ သုတွာ သက္ကော ဒုတိယံ ဂါထမာဟ –

၆၂။

‘‘နာယံ မိဂါနမတ္ထာယ၊ ဥသီနက ဘဝိဿတိ၊

မနုဿာနံ အနယော ဟုတွာ၊ တဒါ ကဏှော ပမောက္ခတီ’’တိ။

တဿတ္ထော – အယဉှိ ‘‘မိဂမံသံ ခါဒိဿာမီ’’တိ ဣဓ နာဂတော၊ တသ္မာ မိဂါနံ အတ္ထော န ဘဝိဿတိ၊ မနုဿမံသံ ပန ခါဒိတုံ အာဂတော၊ တသ္မာ တေသံ အနယော မဟာဝိနာသကာရကော ဟုတွာ ယဒါ အနေန မနုဿာ ဝိနာသံ ပါပိတာ ဘဝိဿန္တိ၊ တဒါ အယံ ကဏှော ပမောက္ခတိ၊ မမ ဟတ္ထတော မုစ္စိဿတီတိ။

အထ နံ ရာဇာ ‘‘ကိံ ပန တေ ဘော လုဒ္ဒက-သုနခေါ သဗ္ဗေသံယေဝ မနုဿာနံ မံသံ ခါဒိဿတိ၊ ဥဒါဟု တဝ အမိတ္တာနညေဝါ’’တိ ပုစ္ဆိတွာ ‘‘အမိတ္တာနညေဝ မေ၊ မဟာရာဇာ’’တိ ဝုတ္တေ ‘‘ကေ ပန ဣဓ တေ အမိတ္တာ’’တိ ပုစ္ဆိတွာ ‘‘အဓမ္မာဘိရတာ ဝိသမစာရိနော၊ မဟာရာဇာ’’တိ ဝုတ္တေ ‘‘ကထေဟိ တာဝ နေ အမှာက’’န္တိ ပုစ္ဆိ။ အထဿ ကထေန္တော ဒေဝရာဇာ ဒသ ဂါထာ အဘာသိ –

၆၃။

‘‘ပတ္တဟတ္ထာ သမဏကာ၊ မုဏ္ဍာ သင်္ဃာဋိပါရုတာ၊

နင်္ဂလေဟိ ကသိဿန္တိ၊ တဒါ ကဏှော ပမောက္ခတိ။

၆၄။

‘‘တပဿိနိယော ပဗ္ဗဇိတာ၊ မုဏ္ဍာ သင်္ဃာဋိပါရုတာ၊

ယဒါ လောကေ ဂမိဿန္တိ၊ တဒါ ကဏှော ပမောက္ခတိ။

၆၅။

‘‘ဒီဃောတ္တရောဋ္ဌာ ဇဋိလာ၊ ပင်္ကဒန္တာ ရဇဿိရာ၊

ဣဏံ စောဒါယ ဂစ္ဆန္တိ၊ တဒါ ကဏှော ပမောက္ခတိ။

၆၆။

‘‘အဓိစ္စ ဝေဒေ သာဝိတ္တိံ၊ ယညတန္တဉ္စ ဗြာဟ္မဏာ၊

ဘတိကာယ ယဇိဿန္တိ၊ တဒါ ကဏှော ပမောက္ခတိ။

၆၇။

‘‘မာတရံ ပိတရံ စာပိ၊ ဇိဏ္ဏကံ ဂတယောဗ္ဗနံ၊

ပဟူ သန္တော န ဘရန္တိ၊ တဒါ ကဏှော ပမောက္ခတိ။

၆၈။

‘‘မာတရံ ပိတရံ စာပိ၊ ဇိဏ္ဏကံ ဂတယောဗ္ဗနံ၊

ဗာလာ တုမှေတိ ဝက္ခန္တိ၊ တဒါ ကဏှော ပမောက္ခတိ။

၆၉။

‘‘အာစရိယဘရိယံ သခိံ၊ မာတုလာနိံ ပိတုစ္ဆကိံ၊

ယဒါ လောကေ ဂမိဿန္တိ၊ တဒါ ကဏှော ပမောက္ခတိ။

၇၀။

‘‘အသိစမ္မံ ဂဟေတွာန၊ ခဂ္ဂံ ပဂ္ဂယှ ဗြာဟ္မဏာ၊

ပန္ထဃာတံ ကရိဿန္တိ၊ တဒါ ကဏှော ပမောက္ခတိ။

၇၁။

‘‘သုက္ကစ္ဆဝီ ဝေဓဝေရာ၊ ထူလဗာဟူ အပါတုဘာ၊

မိတ္တဘေဒံ ကရိဿန္တိ၊ တဒါ ကဏှော ပမောက္ခတိ။

၇၂။

‘‘မာယာဝိနော နေကတိကာ၊ အသပ္ပုရိသစိန္တကာ၊

ယဒါ လောကေ ဘဝိဿန္တိ၊ တဒါ ကဏှော ပမောက္ခတီ’’တိ။

တတ္ထ သမဏကာတိ ‘‘မယံ သမဏာမှာ’’တိ ပဋိညာမတ္တကေန ဟီဠိတဝေါဟာရေနေဝမာဟ။ ကသိဿန္တီတိ တေ တဒါပိ ကသန္တိယေဝ။ အယံ ပန အဇာနန္တော ဝိယ ဧဝမာဟ။ အယဉှိဿ အဓိပ္ပာယော – ဧတေ ဧဝရူပါ ဒုဿီလာ မမ အမိတ္တာ၊ ယဒါ မမ သုနခေန ဧတေ မာရေတွာ မံသံ ခါဒိတံ ဘဝိဿတိ၊ တဒါ ဧသ ကဏှော ဣတော ပဉ္စရဇ္ဇုဗန္ဓနာ ပမောက္ခတီတိ။ ဣမိနာ ဥပါယေန သဗ္ဗဂါထာသု အဓိပ္ပာယယောဇနာ ဝေဒိတဗ္ဗာ။

ပဗ္ဗဇိတာတိ ဗုဒ္ဓသာသနေ ပဗ္ဗဇိတာ။ ဂမိဿန္တီတိ အဂါရမဇ္ဈေ ပဉ္စ ကာမဂုဏေ ပရိဘုဉ္ဇန္တိယော ဝိစရိဿန္တိ။ ဒီဃောတ္တရောဋ္ဌာတိ ဒါဌိကာနံ ဝဍ္ဎိတတ္တာ ဒီဃုတ္တရောဋ္ဌာ။ ပင်္ကဒန္တာတိ ပင်္ကေန မလေန သမန္နာဂတဒန္တာ။ ဣဏံ စောဒါယာတိ ဘိက္ခာစရိယာယ ဓနံ သံဟရိတွာ ဝဍ္ဎိယာ ဣဏံ ပယောဇေတွာ တံ စောဒေတွာ တတော လဒ္ဓေန ဇီဝိကံ ကပ္ပေန္တာ ယဒါ ဂစ္ဆန္တီတိ အတ္ထော။

သာဝိတ္တိန္တိ သာဝိတ္တိဉ္စ အဓိယိတွာ။ ယညတန္တဉ္စာတိ ယညဝိဓာယကတန္တံ၊ ယညံ အဓိယိတွာတိ အတ္ထော။ ဘတိကာယာတိ တေ တေ ရာဇရာဇမဟာမတ္တေ ဥပသင်္ကမိတွာ ‘‘တုမှာကံ ယညံ ယဇိဿာမ၊ ဓနံ ဒေထာ’’တိ ဧဝံ ဘတိအတ္ထာယ ယဒါ ယညံ ယဇိဿန္တိ။ ပဟူ သန္တောတိ ဘရိတုံ ပေါသေတုံ သမတ္ထာ သမာနာ။ ဗာလာ တုမှေတိ တုမှေ ဗာလာ န ကိဉ္စိ ဇာနာထာတိ ယဒါ ဝက္ခန္တိ။ ဂမိဿန္တီတိ လောကဓမ္မသေဝနဝသေန ဂမိဿန္တိ။ ပန္ထဃာတန္တိ ပန္ထေ ဌတွာ မနုဿေ မာရေတွာ တေသံ ဘဏ္ဍဂ္ဂဟဏံ။

သုက္ကစ္ဆဝီတိ ကသာဝစုဏ္ဏာဒိဃံသနေန သမုဋ္ဌာပိတသုက္ကစ္ဆဝိဝဏ္ဏာ။ ဝေဓဝေရာတိ ဝိဓဝါ အပတိကာ၊ တာဟိ ဝိဓဝါဟိ ဝေရံ စရန္တီတိ ဝေဓဝေရာ။ ထူလဗာဟူတိ ပါဒပရိမဒ္ဒနာဒီဟိ သမုဋ္ဌာပိတမံသတာယ မဟာဗာဟူ။ အပါတုဘာတိ အပါတုဘာဝါ၊ ဓနုပ္ပာဒရဟိတာတိ အတ္ထော။ မိတ္တဘေဒန္တိ မိထုဘေဒံ၊ အယမေဝ ဝါ ပါဌော။ ဣဒံ ဝုတ္တံ ဟောတိ – ယဒါ ဧဝရူပါ ဣတ္ထိဓုတ္တာ ‘‘ဣမာ အမှေ န ဇဟိဿန္တီ’’တိ သဟိရညာ ဝိဓဝါ ဥပဂန္တွာ သံဝါသံ ကပ္ပေတွာ တာသံ သန္တကံ ခါဒိတွာ တာဟိ သဒ္ဓိံ မိတ္တဘေဒံ ကရိဿန္တိ ၊ ဝိဿာသံ ဘိန္ဒိတွာ အညံ သဟိရညံ ဂမိဿန္တိ၊ တဒါ ဧသ တေ စောရေ သဗ္ဗေဝ ခါဒိတွာ မုစ္စိဿတိ။ အသပ္ပုရိသစိန္တကာတိ အသပ္ပုရိသစိတ္တေဟိ ပရဒုက္ခစိန္တနသီလာ။ တဒါတိ တဒါ သဗ္ဗေပိမေ ဃာတေတွာ ခါဒိတမံသော ကဏှော ပမောက္ခတီတိ။

ဧဝဉ္စ ပန ဝတွာ ‘‘ဣမေ မယှံ၊ မဟာရာဇ၊ အမိတ္တာ’’တိ တေ တေ အဓမ္မကာရကေ ပက္ခန္ဒိတွာ ခါဒိတုကာမတံ ဝိယ ကတွာ ဒဿေတိ။ သော တတော မဟာဇနဿ ဥတြသ္တကာလေ သုနခံ ရဇ္ဇုယာ အာကဍ္ဎိတွာ ဌပိတံ ဝိယ ကတွာ လုဒ္ဒကဝေသံ ဝိဇဟိတွာ အတ္တနော အာနုဘာဝေန အာကာသေ ဇလမာနော ဌတွာ ‘‘မဟာရာဇ၊ အဟံ သက္ကော ဒေဝရာဇာ၊ ‘အယံ လောကော ဝိနဿတီ’တိ အာဂတော၊ ပမတ္တာ ဟိ မဟာဇနာ၊ အဓမ္မံ ဝတ္တိတွာ မတမတာ သမ္ပတိ အပါယေ ပူရေန္တိ၊ ဒေဝလောကော တုစ္ဆော ဝိယ ဝိတော၊ ဣတော ပဋ္ဌာယ အဓမ္မိကေသု ကတ္တဗ္ဗံ အဟံ ဇာနိဿာမိ၊ တွံ အပ္ပမတ္တော ဟောဟိ၊ မဟာရာဇာ’’တိ စတူဟိ သတာရဟဂါထာဟိ ဓမ္မံ ဒေသေတွာ မနုဿာနံ ဒါနသီလေသု ပတိဋ္ဌာပေတွာ ဩသက္ကိတသာသနံ အညံ ဝဿသဟဿံ ပဝတ္တနသမတ္ထံ ကတွာ မာတလိံ အာဒါယ သကဋ္ဌာနမေဝ ဂတော။ မဟာဇနာ ဒါနသီလာဒီနိ ပုညာနိ ကတွာ ဒေဝလောကေ နိဗ္ဗတ္တိံသု။

သတ္ထာ ဣမံ ဓမ္မဒေသနံ အာဟရိတွာ ‘‘ဧဝံ ဘိက္ခဝေ ပုဗ္ဗေပါဟံ လောကဿ အတ္ထမေဝ စရာမီ’’တိ ဝတွာ ဇာတကံ သမောဓာနေသိ – ‘‘တဒါ မာတလိ အာနန္ဒော အဟောသိ၊ သက္ကော ပန အဟမေဝ အဟောသိ’’န္တိ။

မဟာကဏှဇာတကဝဏ္ဏနာ ဆဋ္ဌာ။

[၄၇၀] ၇။ ကောသိယဇာတကဝဏ္ဏနာ

၇၃-၉၃။ ကောသိယဇာတကံ သုဓာဘောဇနဇာတကေ (ဇာ။ ၂။၂၁။၁၉၂ အာဒယော) အာဝိ ဘဝိဿတိ။

ကောသိယဇာတကဝဏ္ဏနာ သတ္တမာ။

[၄၇၁] ၈။ မေဏ္ဍကပဉှဇာတကဝဏ္ဏနာ

၉၄-၁၀၅။ မေဏ္ဍကပဉှဇာတကံ ဥမင်္ဂဇာတကေ (ဇာ။ ၂။၂၂။၅၉၀ အာဒယော) အာဝိ ဘဝိဿတိ။

မေဏ္ဍကပဉှဇာတကဝဏ္ဏနာ အဋ္ဌမာ။

[၄၇၂] ၉။ မဟာပဒုမဇာတကဝဏ္ဏနာ

နာဒဋ္ဌာပရတော ဒေါသန္တိ ဣဒံ သတ္ထာ ဇေတဝနေ ဝိဟရန္တော စိဉ္စမာဏဝိကံ အာရဗ္ဘ ကထေသိ။ ပဌမဗောဓိယဉှိ ဒသဗလဿ ပုထုဘူတေသု သာဝကေသု အပရိမာဏေသု ဒေဝမနုဿေသု အရိယဘူမိံ ဩက္ကန္တေသု ပတ္ထဋေသု ဂုဏသမုဒယေသု မဟာလာဘသက္ကာရော ဥဒပါဒိ။ တိတ္ထိယာ သူရိယုဂ္ဂမနေ ခဇ္ဇောပနကသဒိသာ အဟေသုံ ဟတလာဘသက္ကာရာ။ တေ အန္တရဝီထိယံ ဌတွာ ‘‘ကိံ သမဏော ဂေါတမောဝ ဗုဒ္ဓါ၊ မယမ္ပိ ဗုဒ္ဓါ၊ ကိံ တဿေဝ ဒိန္နံ မဟပ္ဖလံ၊ အမှာကမ္ပိ ဒိန္နံ မဟပ္ဖလမေဝ၊ အမှာကမ္ပိ ဒေထ ကရောထာ’’တိ ဧဝံ မနုဿေ ဝိညာပေန္တာပိ လာဘသက္ကာရံ အလဘန္တာ ရဟော သန္နိပတိတွာ ‘‘ကေန နု ခေါ ဥပါယေန သမဏဿ ဂေါတမဿ မနုဿာနံ အန္တရေ အဝဏ္ဏံ ဥပ္ပာဒေတွာ လာဘသက္ကာရံ နာသေယျာမာ’’တိ မန္တယိံသု။ တဒါ သာဝတ္ထိယံ စိဉ္စမာဏဝိကာ နာမေကာ ပရိဗ္ဗာဇိကာ ဥတ္တမရူပဓရာ သောဘဂ္ဂပ္ပတ္တာ ဒေဝစ္ဆရာ ဝိယ။ တဿာ သရီရတော ရသ္မိယော နိစ္ဆရန္တိ။ အထေကော ခရမန္တီ ဧဝမာဟ – ‘‘စိဉ္စမာဏဝိကံ ပဋိစ္စ သမဏဿ ဂေါတမဿ အဝဏ္ဏံ ဥပ္ပာဒေတွာ လာဘသက္ကာရံ နာသေဿာမာ’’တိ။ တေ ‘‘အတ္ထေသော ဥပါယော’’တိ သမ္ပဋိစ္ဆိံသု။ အထ သာ တိတ္ထိယာရာမံ ဂန္တွာ ဝန္ဒိတွာ အဋ္ဌာသိ၊ တိတ္ထိယာ တာယ သဒ္ဓိံ န ကထေသုံ။ သာ ‘‘ကော နု ခေါ မေ ဒေါသော’’တိ ယာဝတတိယံ ‘‘ဝန္ဒာမိ အယျာ’’တိ ဝတွာ ‘‘အယျာ၊ ကော နု ခေါ မေ ဒေါသော၊ ကိံ မယာ သဒ္ဓိံ န ကထေထာ’’တိ အာဟ။ ‘‘ဘဂိနိ၊ သမဏံ ဂေါတမံ အမှေ ဝိဟေဌေန္တံ ဟတလာဘသက္ကာရေ ကတွာ ဝိစရန္တံ န ဇာနာသီ’’တိ။ ‘‘နာဟံ ဇာနာမိ အယျာ၊ မယာ ကိံ ပနေတ္ထ ကတ္တဗ္ဗန္တိ။ သစေ တွံ ဘဂိနိ၊ အမှာကံ သုခမိစ္ဆသိ၊ အတ္တာနံ ပဋိစ္စ သမဏဿ ဂေါတမဿ အဝဏ္ဏံ ဥပ္ပာဒေတွာ လာဘသက္ကာရံ နာသေဟီ’’တိ။

သာ ‘‘သာဓု အယျာ၊ မယှမေဝေသော ဘာရော၊ မာ စိန္တယိတ္ထာ’’တိ ဝတွာ ပက္ကမိတွာ ဣတ္ထိမာယာသု ကုသလတာယ တတော ပဋ္ဌာယ သာဝတ္ထိဝါသီနံ ဓမ္မကထံ သုတွာ ဇေတဝနာ နိက္ခမနသမယေ ဣန္ဒဂေါပကဝဏ္ဏံ ပဋံ ပါရုပိတွာ ဂန္ဓမာလာဒိဟတ္ထာ ဇေတဝနာဘိမုခီ ဂစ္ဆန္တီ ‘‘ဣမာယ ဝေလာယ ကုဟိံ ဂစ္ဆသီ’’တိ ဝုတ္တေ ‘‘ကိံ တုမှာကံ မမ ဂမနဋ္ဌာနေနာ’’တိ ဝတွာ ဇေတဝနသမီပေ တိတ္ထိယာရာမေ ဝသိတွာ ပါတောဝ ‘‘အဂ္ဂဝန္ဒနံ ဝန္ဒိဿာမာ’’တိ နဂရာ နိက္ခမန္တေ ဥပါသကဇနေ ဇေတဝနေ ဝုတ္ထာ ဝိယ ဟုတွာ နဂရံ ပဝိသတိ။ ‘‘ကုဟိံ ဝုတ္ထာသီ’’တိ ဝုတ္တေ ‘‘ကိံ တုမှာကံ မမ ဝုတ္ထဋ္ဌာနေနာ’’တိ ဝတွာ မာသဍ္ဎမာသစ္စယေန ပုစ္ဆိယမာနာ ‘‘ဇေတဝနေ သမဏေန ဂေါတမေန သဒ္ဓိံ ဧကဂန္ဓကုဋိယာ ဝုတ္ထာမှီ’’တိ အာဟ။ ပုထုဇ္ဇနာနံ ‘‘သစ္စံ နု ခေါ ဧတံ၊ နော’’တိ ကင်္ခံ ဥပ္ပာဒေတွာ တေမာသစတုမာသစ္စယေန ပိလောတိကာဟိ ဥဒရံ ဝေဌေတွာ ဂဗ္ဘိနိဝဏ္ဏံ ဒဿေတွာ ဥပရိ ရတ္တပဋံ ပါရုပိတွာ ‘‘သမဏံ ဂေါတမံ ပဋိစ္စ ဂဗ္ဘော မေ လဒ္ဓါ’’တိ အန္ဓဗာလေ ဂါဟာပေတွာ အဋ္ဌနဝမာသစ္စယေန ဥဒရေ ဒါရုမဏ္ဍလိကံ ဗန္ဓိတွာ ဥပရိ ရတ္တပဋံ ပါရုပိတွာ ဟတ္ထပါဒပိဋ္ဌိယော ဂေါဟနုကေန ကောဋ္ဋာပေတွာ ဥဿဒေ ဒဿေတွာ ကိလန္တိန္ဒြိယာ ဟုတွာ သာယနှသမယေ တထာဂတေ အလင်္ကတဓမ္မာသနေ နိသီဒိတွာ ဓမ္မံ ဒေသေန္တေ ဓမ္မသဘံ ဂန္တွာ တထာဂတဿ ပုရတော ဌတွာ ‘‘မဟာသမဏ၊ မဟာဇနဿ တာဝ ဓမ္မံ ဒေသေသိ၊ မဓုရော တေ သဒ္ဒေါ၊ သုဖုသိတံ ဒန္တာဝရဏံ၊ အဟံ ပန တံ ပဋိစ္စ ဂဗ္ဘံ လဘိတွာ ပရိပုဏ္ဏဂဗ္ဘာ ဇာတာ၊ နေဝ မေ သူတိဃရံ ဇာနာသိ၊ န သပ္ပိတေလာဒီနိ၊ သယံ အကရောန္တော ဥပဋ္ဌာကာနမ္ပိ အညတရံ ကောသလရာဇာနံ ဝါ အနာထပိဏ္ဍိကံ ဝါ ဝိသာခံ ဥပါသိကံ ဝါ ‘‘ဣမိဿာ စိဉ္စမာဏဝိကာယ ကတ္တဗ္ဗယုတ္တံ ကရောဟီ’တိ န ဝဒသိ၊ အဘိရမိတုံယေဝ ဇာနာသိ၊ ဂဗ္ဘပရိဟာရံ န ဇာနာသီ’’တိ ဂူထပိဏ္ဍံ ဂဟေတွာ စန္ဒမဏ္ဍလံ ဒူသေတုံ ဝါယမန္တီ ဝိယ ပရိသမဇ္ဈေ တထာဂတံ အက္ကောသိ။ တထာဂတော ဓမ္မကထံ ဌပေတွာ သီဟော ဝိယ အဘိနဒန္တော ‘‘ဘဂိနိ၊ တယာ ကထိတဿ တထဘာဝံ ဝါ အတထဘာဝံ ဝါ အဟဉ္စေဝ တွဉ္စ ဇာနာမာ’’တိ အာဟ။ အာမ၊ သမဏ၊ တယာ စ မယာ စ ဉာတဘာဝေနေတံ ဇာတန္တိ။

တသ္မိံ ခဏေ သက္ကဿ ဘဝနံ ဥဏှာကာရံ ဒဿေသိ။ သော အာဝဇ္ဇမာနော ‘‘စိဉ္စမာဏဝိကာ တထာဂတံ အဘူတေန အက္ကောသတီ’’တိ ဉတွာ ‘‘ဣမံ ဝတ္ထုံ သောဓေဿာမီ’’တိ စတူဟိ ဒေဝပုတ္တေဟိ သဒ္ဓိံ အာဂမိ။ ဒေဝပုတ္တာ မူသိကပေါတကာ ဟုတွာ ဒါရုမဏ္ဍလိကဿ ဗန္ဓနရဇ္ဇုကေ ဧကပ္ပဟာရေနေဝ ဆိန္ဒိံသု၊ ပါရုတပဋံ ဝါတော ဥက္ခိပိ၊ ဒါရုမဏ္ဍလိကံ ပတမာနံ တဿာ ပါဒပိဋ္ဌိယံ ပတိ၊ ဥဘော အဂ္ဂပါဒါ ဆိဇ္ဇိံသု။ မနုဿာ ဥဋ္ဌာယ ‘‘ကာဠကဏ္ဏိ၊ သမ္မာသမ္ဗုဒ္ဓံ အက္ကောသသီ’’တိ သီသေ ခေဠံ ပါတေတွာ လေဍ္ဍုဒဏ္ဍာဒိဟတ္ထာ ဇေတဝနာ နီဟရိံသု။ အထဿာ တထာဂတဿ စက္ခုပထံ အတိက္ကန္တကာလေ မဟာပထဝီ ဘိဇ္ဇိတွာ ဝိဝရမဒါသိ၊ အဝီစိတော အဂ္ဂိဇာလာ ဥဋ္ဌဟိ။ သာ ကုလဒတ္တိယံ ကမ္ဗလံ ပါရုပမာနာ ဝိယ ဂန္တွာ အဝီစိမှိ နိဗ္ဗတ္တိ။ အညတိတ္ထိယာနံ လာဘသက္ကာရော ပရိဟာယိ၊ ဒသဗလဿ ဘိယျောသောမတ္တာယ ဝဍ္ဎိ။ ပုနဒိဝသေ ဓမ္မသဘာယံ ကထံ သမုဋ္ဌာပေသုံ ‘‘အာဝုသော၊ စိဉ္စမာဏဝိကာ ဧဝံ ဥဠာရဂုဏံ အဂ္ဂဒက္ခိဏေယျံ သမ္မာသမ္ဗုဒ္ဓံ အဘူတေန အက္ကောသိတွာ မဟာဝိနာသံ ပတ္တာ’’တိ။ သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပိ ဧသာ မံ အဘူတေန အက္ကောသိတွာ မဟာဝိနာသံ ပတ္တာ’’တိ ဝတွာ အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော တဿ အဂ္ဂမဟေသိယာ ကုစ္ဆိမှိ နိဗ္ဗတ္တိ၊ ဖုလ္လပဒုမသဿိရိကမုခတ္တာ ပနဿ ‘‘ပဒုမကုမာရော’’တွေဝ နာမံ ကရိံသု။ သော ဝယပ္ပတ္တော တက္ကသိလာယံ ဂန္တွာ သဗ္ဗသိပ္ပာနိ ဥဂ္ဂဏှိတွာ အာဂမိ။ အထဿ မာတာ ကာလမကာသိ။ ရာဇာ အညံ အဂ္ဂမဟေသိံ ကတွာ ပုတ္တဿ ဥပရဇ္ဇံ အဒါသိ။ အပရဘာဂေ ရာဇာ ပစ္စန္တံ ကုပိတံ ဝူပသမေတုံ အဂ္ဂမဟေသိံ အာဟ ‘‘ဘဒ္ဒေ၊ ဣဓေဝ ဝသ၊ အဟံ ပစ္စန္တံ ကုပိတံ ဝူပသမေတုံ ဂစ္ဆာမီ’’တိ ဝတွာ ‘‘နာဟံ ဣဓေဝ ဝသိဿာမိ၊ အဟမ္ပိ ဂမိဿာမီ’’တိ ဝုတ္တေ ယုဒ္ဓဘူမိယာ အာဒီနဝံ ဒဿေတွာ ‘‘ယာဝ မမာဂမနာ အနုက္ကဏ္ဌမာနာ ဝသ၊ အဟံ ပဒုမကုမာရံ ယထာ တဝ ကတ္တဗ္ဗကိစ္စေသု အပ္ပမတ္တော ဟောတိ၊ ဧဝံ အာဏာပေတွာ ဂမိဿာမီ’’တိ ဝတွာ တထာ ကတွာ ဂန္တွာ ပစ္စာမိတ္တေ ပလာပေတွာ ဇနပဒံ သန္တပ္ပေတွာ ပစ္စာဂန္တွာ ဗဟိနဂရေ ခန္ဓာဝါရံ နိဝါသေသိ ။ ဗောဓိသတ္တော ပိတု အာဂတဘာဝံ ဉတွာ နဂရံ အလင်္ကာရာပေတွာ ရာဇဂေဟံ ပဋိဇဂ္ဂါပေတွာ ဧကကောဝ တဿာ သန္တိကံ အဂမာသိ။

သာ တဿ ရူပသမ္ပတ္တိံ ဒိသွာ ပဋိဗဒ္ဓစိတ္တာ အဟောသိ။ ဗောဓိသတ္တော တံ ဝန္ဒိတွာ ‘‘အမ္မ၊ ကိံ အမှာကံ ကတ္တဗ္ဗ’’န္တိ ပုစ္ဆိ။ အထ နံ ‘‘အမ္မာတိ မံ ဝဒသီ’’တိ ဥဋ္ဌာယ ဟတ္ထေ ဂဟေတွာ ‘‘သယနံ အဘိရုဟာ’’တိ အာဟ။ ‘‘ကိံကာရဏာ’’တိ? ‘‘ယာဝ ရာဇာ န အာဂစ္ဆတိ၊ တာဝ ဥဘောပိ ကိလေသရတိယာ ရမိဿာမာ’’တိ။ ‘‘အမ္မ၊ တွံ မမ မာတာ စ သသာမိကာ စ၊ မယာ သပရိဂ္ဂဟော မာတုဂါမော နာမ ကိလေသဝသေန ဣန္ဒြိယာနိ ဘိန္ဒိတွာ န ဩလောကိတပုဗ္ဗော၊ ကထံ တယာ သဒ္ဓိံ ဧဝရူပံ ကိလိဋ္ဌကမ္မံ ကရိဿာမီ’’တိ။ သာ ဒွေ တယော ဝါရေ ကထေတွာ တသ္မိံ အနိစ္ဆမာနေ ‘‘မမ ဝစနံ န ကရောသီ’’တိ အာဟ။ ‘‘အာမ၊ န ကရောမီ’’တိ။ ‘‘တေန ဟိ ရညော ကထေတွာ သီသံ တေ ဆိန္ဒာပေဿာမီ’’တိ။ မဟာသတ္တော ‘‘တဝ ရုစိံ ကရောဟီ’’တိ ဝတွာ တံ လဇ္ဇာပေတွာ ပက္ကာမိ။

သာ ဘီတတသိတာ စိန္တေသိ ‘‘သစေ အယံ ပဌမံ ပိတု အာရောစေဿတိ၊ ဇီဝိတံ မေ နတ္ထိ၊ အဟမေဝ ပုရေတရံ ကထေဿာမီ’’တိ ဘတ္တံ အဘုဉ္ဇိတွာ ကိလိဋ္ဌလောမဝတ္ထံ နိဝါသေတွာ သရီရေ နခရာဇိယော ဒဿေတွာ ‘‘ကုဟိံ ဒေဝီတိ ရညော ပုစ္ဆနကာလေ ‘‘ဂိလာနာ’တိ ကထေယျာထာ’’တိ ပရိစာရိကာနံ သညံ ဒတွာ ဂိလာနာလယံ ကတွာ နိပဇ္ဇိ။ ရာဇာပိ နဂရံ ပဒက္ခိဏံ ကတွာ နိဝေသနံ အာရုယှ တံ အပဿန္တော ‘‘ကုဟိံ ဒေဝီ’’တိ ပုစ္ဆိတွာ ‘‘ဂိလာနာ’’တိ သုတွာ သိရိဂဗ္ဘံ ပဝိသိတွာ ‘‘ကိံ တေ ဒေဝိ၊ အဖာသုက’’န္တိ ပုစ္ဆိ။ သာ တဿ ဝစနံ အသုဏန္တီ ဝိယ ဟုတွာ ဒွေ တယော ဝါရေ ပုစ္ဆိတာ ‘‘မဟာရာဇ၊ ကသ္မာ ကထေသိ၊ တုဏှီ ဟောဟိ၊ သသာမိကဣတ္ထိယော နာမ မာဒိသာ န ဟောန္တီ’’တိ ဝတွာ ‘‘ကေန တွံ ဝိဟေဌိတာသိ၊ သီဃံ မေ ကထေဟိ ၊ သီသမဿ ဆိန္ဒိဿာမီ’’တိ ဝုတ္တေ ‘‘ကံသိ တွံ၊ မဟာရာဇ၊ နဂရေ ဌပေတွာ ဂတော’’တိ ဝတွာ ‘‘ပဒုမကုမာရ’’န္တိ ဝုတ္တေ ‘‘သော မယှံ ဝသနဋ္ဌာနံ အာဂန္တွာ ‘တာတ၊ မာ ဧဝံ ကရောဟိ၊ အဟံ တဝ မာတာ’တိ ဝုစ္စမာနောပိ ‘ဌပေတွာ မံ အညော ရာဇာ နတ္ထိ၊ အဟံ တံ ဂေဟေ ကရိတွာ ကိလေသရတိယာ ရမိဿာမီ’တိ မံ ကေသေသု ဂဟေတွာ အပရာပရံ လုဉ္စိတွာ အတ္တနော ဝစနံ အကရောန္တိံ မံ ပါတေတွာ ကောဋ္ဋေတွာ ဂတော’’တိ အာဟ။

ရာဇာ အနုပပရိက္ခိတွာဝ အာသီဝိသော ဝိယ ကုဒ္ဓါ ပုရိသေ အာဏာပေသိ ‘‘ဂစ္ဆထ၊ ဘဏေ၊ ပဒုမကုမာရံ ဗန္ဓိတွာ အာနေထာ’’တိ။ တေ နဂရံ အဝတ္ထရန္တာ ဝိယ တဿ ဂေဟံ ဂန္တွာ တံ ဗန္ဓိတွာ ပဟရိတွာ ပစ္ဆာဗာဟံ ဂါဠှဗန္ဓနံ ဗန္ဓိတွာ ရတ္တကဏဝေရမာလံ ဂီဝါယံ ပဋိမုဉ္စိတွာ ဝဇ္ဈံ ကတွာ အာနယိံသု ။ သော ‘‘ဒေဝိယာ ဣဒံ ကမ္မ’’န္တိ ဉတွာ ‘‘ဘော ပုရိသာ၊ နာဟံ ရညော ဒေါသကာရကော၊ နိပ္ပရာဓောဟမသ္မီ’’တိ ဝိလပန္တော အာဂစ္ဆတိ။ သကလနဂရံ သံခုဗ္ဘိတွာ ‘‘ရာဇာ ကိရ မာတုဂါမဿ ဝစနံ ဂဟေတွာ မဟာပဒုမကုမာရံ ဃာတာပေသီ’’တိ သန္နိပတိတွာ ရာဇကုမာရဿ ပါဒမူလေ နိပတိတွာ ‘‘ဣဒံ တေ သာမိ၊ အနနုစ္ဆဝိက’’န္တိ မဟာသဒ္ဒေန ပရိဒေဝိ။ အထ နံ နေတွာ ရညော ဒဿေသုံ။ ရာဇာ ဒိသွာဝ စိတ္တံ နိဂ္ဂဏှိတုံ အသက္ကောန္တော ‘‘အယံ အရာဇာဝ ရာဇလီဠံ ကရောတိ၊ မမ ပုတ္တော ဟုတွာ အဂ္ဂမဟေသိယာ အပရဇ္ဈတိ၊ ဂစ္ဆထ နံ စောရပပါတေ ပါတေတွာ ဝိနာသံ ပါပေထာ’’တိ အာဟ။ မဟာသတ္တော ‘‘န မယှံ၊ တာတ၊ ဧဝရူပေါ အပရာဓော အတ္ထိ၊ မာတုဂါမဿ ဝစနံ ဂဟေတွာ မာ မံ နာသေဟီ’’တိ ပိတရံ ယာစိ။ သော တဿ ကထံ န ဂဏှိ။

တတော သောဠသသဟဿာ အန္တေပုရိကာ ‘‘တာတ မဟာပဒုမကုမာရ၊ အတ္တနော အနနုစ္ဆဝိကံ ဣဒံ လဒ္ဓ’’န္တိ မဟာဝိရဝံ ဝိရဝိံသု။ သဗ္ဗေ ခတ္တိယမဟာသာလာဒယောပိ အမစ္စပရိဇနာပိ ‘‘ဒေဝ၊ ကုမာရော သီလာစာရဂုဏသမ္ပန္နော ဝံသာနုရက္ခိတော ရဇ္ဇဒါယာဒေါ၊ မာ နံ မာတုဂါမဿ ဝစနံ ဂဟေတွာ အနုပပရိက္ခိတွာဝ ဝိနာသေဟိ၊ ရညာ နာမ နိသမ္မကာရိနာ ဘဝိတဗ္ဗ’’န္တိ ဝတွာ သတ္တ ဂါထာ အဘာသိံသု –

၁၀၆။

‘‘နာဒဋ္ဌာ ပရတော ဒေါသံ၊ အဏုံ ထူလာနိ သဗ္ဗသော၊

ဣဿရော ပဏယေ ဒဏ္ဍံ၊ သာမံ အပ္ပဋိဝေက္ခိယ။

၁၀၇။

‘‘ယော စ အပ္ပဋိဝေက္ခိတွာ၊ ဒဏ္ဍံ ကုဗ္ဗတိ ခတ္တိယော၊

သကဏ္ဋကံ သော ဂိလတိ၊ ဇစ္စန္ဓောဝ သမက္ခိကံ။

၁၀၈။

‘‘အဒဏ္ဍိယံ ဒဏ္ဍယတိ၊ ဒဏ္ဍိယဉ္စ အဒဏ္ဍိယံ၊

အန္ဓောဝ ဝိသမံ မဂ္ဂံ၊ န ဇာနာတိ သမာသမံ။

၁၀၉။

‘‘ယော စ ဧတာနိ ဌာနာနိ၊ အဏုံ ထူလာနိ သဗ္ဗသော၊

သုဒိဋ္ဌမနုသာသေယျ၊ သ ဝေ ဝေါဟရိတု မရဟတိ။

၁၁၀။

‘‘နေကန္တမုဒုနာ သက္ကာ၊ ဧကန္တတိခိဏေန ဝါ၊

အတ္တံ မဟန္တေ ဌပေတုံ၊ တသ္မာ ဥဘယမာစရေ။

၁၁၁။

‘‘ပရိဘူတော မုဒု ဟောတိ၊ အတိတိက္ခော စ ဝေရဝါ၊

ဧတဉ္စ ဥဘယံ ဉတွာ၊ အနုမဇ္ဈံ သမာစရေ။

၁၁၂။

‘‘ဗဟုမ္ပိ ရတ္တော ဘာသေယျ၊ ဒုဋ္ဌောပိ ဗဟု ဘာသတိ၊

န ဣတ္ထိကာရဏာ ရာဇ၊ ပုတ္တံ ဃာတေတုမရဟသီ’’တိ။

တတ္ထ နာဒဋ္ဌာတိ န အဒိသွာ။ ပရတောတိ ပရဿ။ သဗ္ဗသောတိ သဗ္ဗာနိ။ အဏုံထူလာနီတိ ခုဒ္ဒကမဟန္တာနိ ဝဇ္ဇာနိ။ သာမံ အပ္ပဋိဝေက္ခိယာတိ ပရဿ ဝစနံ ဂဟေတွာ အတ္တနော ပစ္စက္ခံ အကတွာ ပထဝိဿရော ရာဇာ ဒဏ္ဍံ န ပဏယေ န ပဋ္ဌပေယျ။ မဟာသမ္မတရာဇကာလသ္မိဉှိ သတတော ဥတ္တရိ ဒဏ္ဍော နာမ နတ္ထိ၊ တာဠနဂရဟဏပဗ္ဗာဇနတော ဥဒ္ဓံ ဟတ္ထပါဒစ္ဆေဒနဃာတနံ နာမ နတ္ထိ၊ ပစ္ဆာ ကက္ခဠရာဇူနံယေဝ ကာလေ ဧတံ ဥပ္ပန္နံ၊ တံ သန္ဓာယ တေ အမစ္စာ ‘‘ဧကန္တေနေဝ ပရဿ ဒေါသံ သာမံ အဒိသွာ ကာတုံ န ယုတ္တ’’န္တိ ကထေန္တာ ဧဝမာဟံသု။

ယော စ အပ္ပဋိဝေက္ခိတွာတိ မဟာရာဇ၊ ဧဝံ အပ္ပဋိဝေက္ခိတွာ ဒေါသာနုစ္ဆဝိကေ ဒဏ္ဍေ ပဏေတဗ္ဗေ ယော ရာဇာ အဂတိဂမနေ ဌိတော တံ ဒေါသံ အပ္ပဋိဝေက္ခိတွာ ဟတ္ထစ္ဆေဒါဒိဒဏ္ဍံ ကရောတိ၊ သော အတ္တနော ဒုက္ခကာရဏံ ကရောန္တော သကဏ္ဋကံ ဘောဇနံ ဂိလတိ နာမ၊ ဇစ္စန္ဓော ဝိယ စ သမက္ခိကံ ဘုဉ္ဇတိ နာမ။ အဒဏ္ဍိယန္တိ ယော အဒဏ္ဍိယံ အဒဏ္ဍပဏေတဗ္ဗဉ္စ ဒဏ္ဍေတွာ ဒဏ္ဍိယဉ္စ ဒဏ္ဍပဏေတဗ္ဗံ အဒဏ္ဍေတွာ အတ္တနော ရုစိမေဝ ကရောတိ၊ သော အန္ဓော ဝိယ ဝိသမံ မဂ္ဂံ ပဋိပန္နော၊ န ဇာနာတိ သမာသမံ၊ တတော ပါသာဏာဒီသု ပက္ခလန္တော အန္ဓော ဝိယ စတူသု အပါယေသု မဟာဒုက္ခံ ပါပုဏာတီတိ အတ္ထော။ ဧတာနိ ဌာနာနီတိ ဧတာနိ ဒဏ္ဍိယာဒဏ္ဍိယကာရဏာနိ စေဝ ဒဏ္ဍိယကာရဏေသုပိ အဏုံထူလာနိ စ သဗ္ဗာနိ သုဒိဋ္ဌံ ဒိသွာ အနုသာသေယျ၊ သ ဝေ ဝေါဟရိတုံ ရဇ္ဇမနုသာသိတုံ အရဟတီတိ အတ္ထော။

အတ္တံ မဟန္တေ ဌပေတုန္တိ ဧဝရူပေါ အနုပ္ပန္နေ ဘောဂေ ဥပ္ပာဒေတွာ ဥပ္ပန္နေ ထာဝရေ ကတွာ အတ္တာနံ မဟန္တေ ဥဠာရေ ဣဿရိယေ ဌပေတုံ န သက္ကောတီတိ အတ္ထော။ မုဒူတိ မုဒုရာဇာ ရဋ္ဌဝါသီနံ ပရိဘူတော ဟောတိ အဝညာတော၊ သော ရဇ္ဇံ နိစ္စောရံ ကာတုံ န သက္ကောတိ။ ဝေရဝါတိ အတိတိက္ခဿ ပန သဗ္ဗေပိ ရဋ္ဌဝါသိနော ဝေရိနော ဟောန္တီတိ သော ဝေရဝါ နာမ ဟောတိ။ အနုမဇ္ဈန္တိ အနုဘူတံ မုဒုတိခိဏဘာဝါနံ မဇ္ဈံ သမာစရေ၊ အမုဒု အတိက္ခော ဟုတွာ ရဇ္ဇံ ကာရေယျာတိ အတ္ထော။ န ဣတ္ထိကာရဏာတိ ပါပံ လာမကံ မာတုဂါမံ နိဿာယ ဝံသာနုရက္ခကံ ဆတ္တဒါယာဒံ ပုတ္တံ ဃာတေတုံ နာရဟသိ၊ မဟာရာဇာတိ။

ဧဝံ နာနာကာရဏေဟိ ကထေန္တာပိ အမစ္စာ အတ္တနော ကထံ ဂါဟာပေတုံ နာသက္ခိံသု။ ဗောဓိသတ္တောပိ ယာစန္တော အတ္တနော ကထံ ဂါဟာပေတုံ နာသက္ခိ။ အန္ဓဗာလော ပန ရာဇာ ‘‘ဂစ္ဆထ နံ စောရပပါတေ ခိပထာ’’တိ အာဏာပေန္တော အဋ္ဌမံ ဂါထမာဟ –

၁၁၃။

‘‘သဗ္ဗောဝ လောကော ဧကတော၊ ဣတ္ထီ စ အယမေကိကာ၊

တေနာဟံ ပဋိပဇ္ဇိဿံ၊ ဂစ္ဆထ ပက္ခိပထေဝ တ’’န္တိ။

တတ္ထ တေနာဟန္တိ ယေန ကာရဏေန သဗ္ဗော လောကော ဧကတော ကုမာရဿေဝ ပက္ခော ဟုတွာ ဌိတော၊ အယဉ္စ ဣတ္ထီ ဧကိကာဝ၊ တေန ကာရဏေန အဟံ ဣမိဿာ ဝစနံ ပဋိပဇ္ဇိဿံ၊ ဂစ္ဆထ တံ ပဗ္ဗတံ အာရောပေတွာ ပပါတေ ခိပထေဝါတိ။

ဧဝံ ဝုတ္တေ သောဠသသဟဿာသု ရာဇဣတ္ထီသု ဧကာပိ သကဘာဝေန သဏ္ဌာတုံ နာသက္ခိ၊ သကလနဂရဝါသိနော ဗာဟာ ပဂ္ဂယှ ကန္ဒိတွာ ကေသေ ဝိကိရယမာနာ ဝိလပိံသု။ ရာဇာ ‘‘ဣမေ ဣမဿ ပပါတေ ခိပနံ ပဋိဗာဟေယျု’’န္တိ သပရိဝါရော ဂန္တွာ မဟာဇနဿ ပရိဒေဝန္တဿေဝ နံ ဥဒ္ဓံပါဒံ အဝံသိရံ ကတွာ ဂါဟာပေတွာ ပပါတေ ခိပါပေသိ။ အထဿ မေတ္တာနုဘာဝေန ပဗ္ဗတေ အဓိဝတ္ထာ ဒေဝတာ ‘‘မာ ဘာယိ မဟာပဒုမာ’’တိ တံ သမဿာသေတွာ ဥဘောဟိ ဟတ္ထေဟိ ဂဟေတွာ ဟဒယေ ဌပေတွာ ဒိဗ္ဗသမ္ဖဿံ ဖရာပေတွာ ဩတရိတွာ ပဗ္ဗတပါဒေ ပတိဋ္ဌိတနာဂရာဇဿ ဖဏဂဗ္ဘေ ဌပေသိ။ နာဂရာဇာ ဗောဓိသတ္တံ နာဂဘဝနံ နေတွာ အတ္တနော ယသံ မဇ္ဈေ ဘိန္ဒိတွာ အဒါသိ။ သော တတ္ထ ဧကသံဝစ္ဆရံ ဝသိတွာ ‘‘မနုဿပထံ ဂမိဿာမီ’’တိ ဝတွာ ‘‘ကတရံ ဌာန’’န္တိ ဝုတ္တေ ‘‘ဟိမဝန္တံ ဂန္တွာ ပဗ္ဗဇိဿာမီ’’တိ အာဟ။ နာဂရာဇာ ‘‘သာဓူ’’တိ တံ ဂဟေတွာ မနုဿပထေ ပတိဋ္ဌာပေတွာ ပဗ္ဗဇိတပရိက္ခာရေ ဒတွာ သကဋ္ဌာနမေဝ ဂတော။ သောပိ ဟိမဝန္တံ ပဝိသိတွာ ဣသိပဗ္ဗဇ္ဇံ ပဗ္ဗဇိတွာ ဈာနာဘိညံ နိဗ္ဗတ္တေတွာ ဝနမူလဖလာဟာရော တတ္ထ ပဋိဝသတိ။

အထေကော ဗာရာဏသိဝါသီ ဝနစရကော တံ ဌာနံ ပတ္တော မဟာသတ္တံ သဉ္ဇာနိတွာ ‘‘နနု တွံ ဒေဝ၊ မဟာပဒုမကုမာရော’’တိ ဝတွာ ‘‘အာမ၊ သမ္မာ’’တိ ဝုတ္တေ တံ ဝန္ဒိတွာ ကတိပါဟံ တတ္ထ ဝသိတွာ ဗာရာဏသိံ ဂန္တွာ ရညော အာရောစေသိ ‘‘ဒေဝ၊ ပုတ္တော တေ ဟိမဝန္တပဒေသေ ဣသိပဗ္ဗဇ္ဇံ ပဗ္ဗဇိတွာ ပဏ္ဏသာလာယံ ဝသတိ၊ အဟံ တဿ သန္တိကေ ဝသိတွာ အာဂတော’’တိ။ ‘‘ပစ္စက္ခတော တေ ဒိဋ္ဌော’’တိ? ‘‘အာမ ဒေဝါ’’တိ။ ရာဇာ မဟာဗလကာယပရိဝုတော တတ္ထ ဂန္တွာ ဝနပရိယန္တေ ခန္ဓာဝါရံ ဗန္ဓိတွာ အမစ္စဂဏပရိဝုတော ပဏ္ဏသာလံ ဂန္တွာ ကဉ္စနရူပသဒိသံ ပဏ္ဏသာလဒွါရေ နိသိန္နံ မဟာသတ္တံ ဒိသွာ ဝန္ဒိတွာ ဧကမန္တံ နိသီဒိ။ အမစ္စာပိ ဝန္ဒိတွာ ပဋိသန္ထာရံ ကတွာ နိသီဒိံသု။ ဗောဓိသတ္တောပိ ရာဇာနံ ပဋိပုစ္ဆိတွာ ပဋိသန္ထာရမကာသိ။ အထ နံ ရာဇာ ‘‘တာတ၊ မယာ တွံ ဂမ္ဘီရေ ပပါတေ ခိပါပိတော၊ ကထံ သဇီဝိတောသီ’’တိ ပုစ္ဆန္တော နဝမံ ဂါထမာဟ –

၁၁၄။

‘‘အနေကတာလေ နရကေ၊ ဂမ္ဘီရေ စ သုဒုတ္တရေ၊

ပါတိတော ဂိရိဒုဂ္ဂသ္မိံ၊ ကေန တွံ တတ္ထ နာမရီ’’တိ။

တတ္ထ အနေကတာလေတိ အနေကတာလပ္ပမာဏေ။ နာမရီတိ န အမရိ။

တတောပရံ –

၁၁၅။

‘‘နာဂေါ ဇာတဖဏော တတ္ထ၊ ထာမဝါ ဂိရိသာနုဇော၊

ပစ္စဂ္ဂဟိ မံ ဘောဂေဟိ၊ တေနာဟံ တတ္ထ နာမရိံ။

၁၁၆။

‘‘ဧဟိ တံ ပဋိနေဿာမိ၊ ရာဇပုတ္တ သကံ ဃရံ၊

ရဇ္ဇံ ကာရေဟိ ဘဒ္ဒန္တေ၊ ကိံ အရညေ ကရိဿသိ။

၁၁၇။

‘‘ယထာ ဂိလိတွာ ဗဠိသံ၊ ဥဒ္ဓရေယျ သလောဟိတံ၊

ဥဒ္ဓရိတွာ သုခီ အဿ၊ ဧဝံ ပဿာမိ အတ္တနံ။

၁၁၈။

‘‘ကိံ နု တွံ ဗဠိသံ ဗြူသိ၊ ကိံ တွံ ဗြူသိ သလောဟိတံ၊

ကိံ နု တွံ ဥဗ္ဘတံ ဗြူသိ၊ တံ မေ အက္ခာဟိ ပုစ္ဆိတော။

၁၁၉။

‘‘ကာမာဟံ ဗဠိသံ ဗြူမိ၊ ဟတ္ထိအဿံ သလောဟိတံ၊

စတ္တာဟံ ဥဗ္ဘတံ ဗြူမိ၊ ဧဝံ ဇာနာဟိ ခတ္တိယာ’’တိ။ –

ဣမာသု ပဉ္စသု ဧကန္တရိကာ တိဿော ဂါထာ ဗောဓိသတ္တဿ၊ ဒွေ ရညော။

တတ္ထ ပစ္စဂ္ဂဟိ မန္တိ ပဗ္ဗတပတနကာလေ ဒေဝတာယ ပရိဂ္ဂဟေတွာ ဒိဗ္ဗသမ္ဖဿေန သမဿာသေတွာ ဥပနီတံ မံ ပဋိဂ္ဂဏှိ၊ ဂဟေတွာ စ ပန နာဂဘဝနံ အာနေတွာ မဟန္တံ ယသံ ဒတွာ ‘‘မနုဿပထံ မံ နေဟီ’’တိ ဝုတ္တော မံ မနုဿပထံ အာနေသိ။ အဟံ ဣဓာဂန္တွာ ပဗ္ဗဇိတော၊ ဣတိ တေန ဒေဝတာယ စ နာဂရာဇဿ စ အာနုဘာဝေန အဟံ တတ္ထ နာမရိန္တိ သဗ္ဗံ အာရောစေသိ။

ဧဟီတိ ရာဇာ တဿ ဝစနံ သုတွာ သောမနဿပ္ပတ္တော ဟုတွာ ‘‘တာတ၊ အဟံ ဗာလဘာဝေန ဣတ္ထိယာ ဝစနံ ဂဟေတွာ ဧဝံ သီလာစာရသမ္ပန္နေ တယိ အပရဇ္ဈိံ၊ ခမာဟိ မေ ဒေါသ’’န္တိ ပါဒေသု နိပတိတွာ ‘‘ဥဋ္ဌေဟိ၊ မဟာရာဇ၊ ခမာမ တေ ဒေါသံ၊ ဣတော ပရံ ပုန မာ ဧဝံ အနိသမ္မကာရီ ဘဝေယျာသီ’’တိ ဝုတ္တေ ‘‘တာတ၊ တွံ အတ္တနော ကုလသန္တကံ သေတစ္ဆတ္တံ ဥဿာပေတွာ ရဇ္ဇံ အနုသာသန္တော မယှံ ခမသိ နာမာ’’တိ ဧဝမာဟ။

ဥဒ္ဓရိတွာတိ ဟဒယဝက္ကာဒီနိ အသမ္ပတ္တမေဝ တံ ဥဒ္ဓရိတွာ သုခီ အဿ။ ဧဝံ ပဿာမိ အတ္တနန္တိ အတ္တာနံ မဟာရာဇ၊ ဧဝံ အဟမ္ပိ ပုန သောတ္ထိဘာဝပ္ပတ္တံ ဂိလိတဗဠိသံ ပုရိသမိဝ အတ္တာနံ ပဿာမီတိ။ ‘‘ကိံ နု တွ’’န္တိ ဣဒံ ရာဇာ တမတ္ထံ ဝိတ္ထာရတော သောတုံ ပုစ္ဆတိ။ ကာမာဟန္တိ ပဉ္စ ကာမဂုဏေ အဟံ။ ဟတ္ထိအဿံ သလောဟိတန္တိ ဧဝံ ဟတ္ထိအဿရထဝါဟနံ သတ္တရတနာဒိဝိဘဝံ ‘‘သလောဟိတ’’န္တိ ဗြူမိ။ စတ္တာဟန္တိ စတ္တံ အဟံ၊ ယဒါ တံ သဗ္ဗမ္ပိ စတ္တံ ဟောတိ ပရိစ္စတ္တံ၊ တံ ဒါနာဟံ ‘‘ဥဗ္ဘတ’’န္တိ ဗြူမိ။

‘‘ဣတိ ခေါ၊ မဟာရာဇ၊ မယှံ ရဇ္ဇေန ကိစ္စံ နတ္ထိ၊ တွံ ပန ဒသ ရာဇဓမ္မေ အကောပေတွာ အဂတိဂမနံ ပဟာယ ဓမ္မေန ရဇ္ဇံ ကာရေဟီ’’တိ မဟာသတ္တော ပိတု ဩဝါဒံ အဒါသိ။ သော ရာဇာ ရောဒိတွာ ပရိဒေဝိတွာ နဂရံ ဂစ္ဆန္တော အန္တရာမဂ္ဂေ အမစ္စေ ပုစ္ဆိ။ ‘‘အဟံ ကံ နိဿာယ ဧဝရူပေန အာစာရဂုဏသမ္ပန္နေန ပုတ္တေန ဝိယောဂံ ပတ္တော’’တိ? ‘‘အဂ္ဂမဟေသိံ၊ ဒေဝါ’’တိ။ ရာဇာ တံ ဥဒ္ဓံပါဒံ ဂါဟာပေတွာ စောရပပါတေ ခိပါပေတွာ နဂရံ ပဝိသိတွာ ဓမ္မေန ရဇ္ဇံ ကာရေသိ။

သတ္ထာ ဣမံ ဓမ္မဒေသနံ အာဟရိတွာ ‘‘ဧဝံ၊ ဘိက္ခဝေ၊ ပုဗ္ဗေပေသာ မံ အက္ကောသိတွာ မဟာဝိနာသံ ပတ္တာ’’တိ ဝတွာ –

၁၂၀။

‘‘စိဉ္စမာဏဝိကာ မာတာ၊ ဒေဝဒတ္တော စ မေ ပိတာ၊

အာနန္ဒော ပဏ္ဍိတော နာဂေါ၊ သာရိပုတ္တော စ ဒေဝတာ၊

ရာဇပုတ္တော အဟံ အာသိံ၊ ဧဝံ ဓာရေထ ဇာတက’’န္တိ။ –

ဩသာနဂါထာယ ဇာတကံ သမောဓာနေသိ။

မဟာပဒုမဇာတကဝဏ္ဏနာ နဝမာ။

[၄၇၃] ၁၀။ မိတ္တာမိတ္တဇာတကဝဏ္ဏနာ

ကာနိ ကမ္မာနီတိ ဣဒံ သတ္ထာ ဇေတဝနေ ဝိဟရန္တော ကောသလရညော အတ္ထစရကံ အမစ္စံ အာရဗ္ဘ ကထေသိ။ သော ကိရ ရညော ဗဟူပကာရော အဟောသိ။ အထဿ ရာဇာ အတိရေကသမ္မာနံ ကာရေသိ။ အဝသေသာ နံ အသဟမာနာ ‘‘ဒေဝ၊ အသုကော နာမ အမစ္စော တုမှာကံ အနတ္ထကာရကော’’တိ ပရိဘိန္ဒိံသု။ ရာဇာ တံ ပရိဂ္ဂဏှန္တော ကိဉ္စိ ဒေါသံ အဒိသွာ ‘‘အဟံ ဣမဿ ကိဉ္စိ ဒေါသံ န ပဿာမိ၊ ကထံ နု ခေါ သက္ကာ မယာ ဣမဿ မိတ္တဘာဝံ ဝါ အမိတ္တဘာဝံ ဝါ ဇာနိတု’’န္တိ စိန္တေတွာ ‘‘ဣမံ ပဉှံ ဌပေတွာ တထာဂတံ အညော ဇာနိတုံ န သက္ခိဿတိ၊ ဂန္တွာ ပုစ္ဆိဿာမီ’’တိ ဘုတ္တပါတရာသော သတ္ထာရံ ဥပသင်္ကမိတွာ ‘‘ဘန္တေ၊ ကထံ နု ခေါ သက္ကာ ပုရိသေန အတ္တနော မိတ္တဘာဝံ ဝါ အမိတ္တဘာဝံ ဝါ ဇာနိတု’’န္တိ ပုစ္ဆိ။ အထ နံ သတ္ထာ ‘‘ပုဗ္ဗေပိ မဟာရာဇ၊ ပဏ္ဍိတာ ဣမံ ပဉှံ စိန္တေတွာ ပဏ္ဍိတေ ပုစ္ဆိတွာ တေဟိ ကထိတဝသေန ဉတွာ အမိတ္တေ ဝဇ္ဇေတွာ မိတ္တေ သေဝိံသူ’’တိ ဝတွာ တေန ယာစိတော အတီတံ အာဟရိ။

အတီတေ ဗာရာဏသိယံ ဗြဟ္မဒတ္တေ ရဇ္ဇံ ကာရေန္တေ ဗောဓိသတ္တော တဿ အတ္ထဓမ္မာနုသာသကော အမစ္စော အဟောသိ။ တဒါ ဗာရာဏသိရညော ဧကံ အတ္ထစရကံ အမစ္စံ သေသာ ပရိဘိန္ဒိံသု။ ရာဇာ တဿ ဒေါသံ အပဿန္တော ‘‘ကထံ နု ခေါ သက္ကာ မိတ္တံ ဝါ အမိတ္တံ ဝါ ဉာတု’’န္တိ မဟာသတ္တံ ပုစ္ဆန္တော ပဌမံ ဂါထမာဟ –

၁၂၁။

‘‘ကာနိ ကမ္မာနိ ကုဗ္ဗာနံ၊ ကထံ ဝိညူ ပရက္ကမေ၊

အမိတ္တံ ဇာနေယျ မေဓာဝီ၊ ဒိသွာ သုတွာ စ ပဏ္ဍိတော’’တိ။

တဿတ္ထော – ကာနိ ကမ္မာနိ ကရောန္တံ မေဓာဝီ ပဏ္ဍိတော ပုရိသော စက္ခုနာ ဒိသွာ ဝါ သောတေန သုတွာ ဝါ ‘‘အယံ မယှံ အမိတ္တော’’တိ ဇာနေယျ၊ တဿ ဇာနနတ္ထာယ ကထံ ဝိညူ ပရက္ကမေယျာတိ။

အထဿ အမိတ္တလက္ခဏံ ကထေန္တော အာဟ –

၁၂၂။

‘‘န နံ ဥမှယတေ ဒိသွာ၊ န စ နံ ပဋိနန္ဒတိ၊

စက္ခူနိ စဿ န ဒဒါတိ၊ ပဋိလောမဉ္စ ဝတ္တတိ။

၁၂၃။

‘‘အမိတ္တေ တဿ ဘဇတိ၊ မိတ္တေ တဿ န သေဝတိ၊

ဝဏ္ဏကာမေ နိဝါရေတိ၊ အက္ကောသန္တေ ပသံသတိ။

၁၂၄။

‘‘ဂုယှဉ္စ တဿ နက္ခာတိ၊ တဿ ဂုယှံ န ဂူဟတိ၊

ကမ္မံ တဿ န ဝဏ္ဏေတိ၊ ပညဿ နပ္ပသံသတိ။

၁၂၅။

‘‘အဘဝေ နန္ဒတိ တဿ၊ ဘဝေ တဿ န နန္ဒတိ၊

အစ္ဆေရံ ဘောဇနံ လဒ္ဓါ၊ တဿ နုပ္ပဇ္ဇတေ သတိ၊

တတော နံ နာနုကမ္ပတိ၊ အဟော သောပိ လဘေယျိတော။

၁၂၆။

‘‘ဣစ္စေတေ သောဠသာကာရာ၊ အမိတ္တသ္မိံ ပတိဋ္ဌိတာ၊

ယေဟိ အမိတ္တံ ဇာနေယျ၊ ဒိသွာ သုတွာ စ ပဏ္ဍိတော’’တိ။

မဟာသတ္တော ဣမာ ပဉ္စ ဂါထာ ဝတွာန ပုန –

၁၂၇။

‘‘ကာနိ ကမ္မာနိ ကုဗ္ဗာနံ၊ ကထံ ဝိညူ ပရက္ကမေ၊

မိတ္တံ ဇာနေယျ မေဓာဝီ၊ ဒိသွာ သုတွာ စ ပဏ္ဍိတော’’တိ။ –

ဣမာယ ဂါထာယ မိတ္တလက္ခဏံ ပုဋ္ဌော သေသဂါထာ အဘာသိ –

၁၂၈။

‘‘ပဝုတ္ထံ တဿ သရတိ၊ အာဂတံ အဘိနန္ဒတိ၊

တတော ကေလာယိတော ဟောတိ၊ ဝါစာယ ပဋိနန္ဒတိ။

၁၂၉။

‘‘မိတ္တေ တဿေဝ ဘဇတိ၊ အမိတ္တေ တဿ န သေဝတိ၊

အက္ကောသန္တေ နိဝါရေတိ၊ ဝဏ္ဏကာမေ ပသံသတိ။

၁၃၀။

‘‘ဂုယှဉ္စ တဿ အက္ခာတိ၊ တဿ ဂုယှဉ္စ ဂူဟတိ၊

ကမ္မဉ္စ တဿ ဝဏ္ဏေတိ၊ ပညံ တဿ ပသံသတိ။

၁၃၁။

‘‘ဘဝေ စ နန္ဒတိ တဿ၊ အဘဝေ တဿ န နန္ဒတိ၊

အစ္ဆေရံ ဘောဇနံ လဒ္ဓါ၊ တဿ ဥပ္ပဇ္ဇတေ သတိ၊

တတော နံ အနုကမ္ပတိ၊ အဟော သောပိ လဘေယျိတော။

၁၃၂။

‘‘ဣစ္စေတေ သောဠသာကာရာ၊ မိတ္တသ္မိံ သုပ္ပတိဋ္ဌိတာ၊

ယေဟိ မိတ္တဉ္စ ဇာနေယျ၊ ဒိသွာ သုတွာ စ ပဏ္ဍိတော’’တိ။

တတ္ထ န နံ ဥမှယတေ ဒိသွာတိ တံ မိတ္တံ မိတ္တပတိရူပကော ဒိသွာ သိတံ န ကရောတိ၊ ပဟဋ္ဌာကာရံ န ဒဿေတိ။ န စ နံ ပဋိနန္ဒတီတိ တဿ ကထံ ပဂ္ဂဏှန္တော န ပဋိနန္ဒတိ န တုဿတိ။ စက္ခူနိ စဿ န ဒဒါတီတိ ဩလောကေန္တံ န ဩလောကေတိ။ ပဋိလောမဉ္စာတိ တဿ ကထံ ပဋိပ္ဖရတိ ပဋိသတ္တု ဟောတိ။ ဝဏ္ဏကာမေတိ တဿ ဝဏ္ဏံ ဘဏန္တေ။ နက္ခာတီတိ အတ္တနော ဂုယှံ တဿ န အာစိက္ခတိ။ ကမ္မံ တဿာတိ တေန ကတကမ္မံ န ဝဏ္ဏယတိ။ ပညဿာတိ အဿ ပညံ နပ္ပသံသတိ၊ ဉာဏသမ္ပဒံ န ပသံသတိ။ အဘဝေတိ အဝဍ္ဎိယံ။ တဿ နုပ္ပဇ္ဇတေ သတီတိ တဿ မိတ္တပတိရူပကဿ ‘‘မမ မိတ္တဿပိ ဣတော ဒဿာမီ’’တိ သတိ န ဥပ္ပဇ္ဇတိ။ နာနုကမ္ပတီတိ မုဒုစိတ္တေန န စိန္တေတိ။ လဘေယျိတောတိ လဘေယျ ဣတော။ အာကာရာတိ ကာရဏာနိ။ ပဝုတ္ထန္တိ ဝိဒေသဂတံ ။ ကေလာယိတောတိ ကေလာယတိ မမာယတိ ပတ္ထေတိ ပိဟေတိ ဣစ္ဆတီတိ အတ္ထော။ ဝါစာယာတိ မဓုရဝစနေန တံ သမုဒါစရန္တော ပဋိနန္ဒတိ တုဿတိ။ သေသံ ဝုတ္တပဋိပက္ခနယေန ဝေဒိတဗ္ဗံ။ ရာဇာ မဟာသတ္တဿ ကထာယ အတ္တမနော ဟုတွာ တဿ မဟန္တံ ယသံ အဒါသိ။

သတ္ထာ ဣမံ ဓမ္မဒေသနံ အာဟရိတွာ ‘‘ဧဝံ၊ မဟာရာဇ၊ ပုဗ္ဗေပေသ ပဉှော သမုဋ္ဌဟိ၊ ပဏ္ဍိတာဝ နံ ကထယိံသု၊ ဣမေဟိ ဒွတ္တိံသာယ အာကာရေဟိ မိတ္တာမိတ္တော ဇာနိတဗ္ဗော’’တိ ဝတွာ ဇာတကံ သမောဓာနေသိ – ‘‘တဒါ ရာဇာ အာနန္ဒော အဟောသိ၊ ပဏ္ဍိတာမစ္စော ပန အဟမေဝ အဟောသိ’’န္တိ။

မိတ္တာမိတ္တဇာတကဝဏ္ဏနာ ဒသမာ။

ဇာတကုဒ္ဒါနံ –

ကုဏာလံ ဘဒ္ဒသာလဉ္စ၊ သမုဒ္ဒဝါဏိဇ ပဏ္ဍိတံ၊

ဇနသန္ဓံ မဟာကဏှံ၊ ကောသိယံ သိရိမန္တကံ။

ပဒုမံ မိတ္တာမိတ္တဉ္စ၊ ဣစ္စေတေ ဒသ ဇာတကေ၊

သင်္ဂါယိံသု မဟာထေရာ၊ ဒွါဒသမှိ နိပါတကေ။

ဒွါဒသကနိပါတဝဏ္ဏနာ နိဋ္ဌိတာ။