📜
၁၃။ တေရသကနိပါတော
၄၇၄။ အမ္ဗဇာတကံ (၁)
အဟာသိ ¶ ¶ ¶ [အာဟာသိ (?)] မေ အမ္ဗဖလာနိ ပုဗ္ဗေ၊ အဏူနိ ထူလာနိ စ ဗြဟ္မစာရိ၊
တေဟေဝ မန္တေဟိ န ဒါနိ တုယှံ၊ ဒုမပ္ဖလာ ပါတုဘဝန္တိ ဗြဟ္မေ။
နက္ခတ္တယောဂံ ပဋိမာနယာမိ၊ ခဏံ မုဟုတ္တဉ္စ မန္တေ န ပဿံ [ခဏံ မုဟုတ္တံ န မံ တောသယန္တိ (သီ။ ပီ။)]၊
နက္ခတ္တယောဂဉ္စ ခဏဉ္စ လဒ္ဓါ၊ အဒ္ဓါဟရိဿမ္ဗဖလံ [အထာဟရိဿမ္ဗဖလံ (သီ။ ပီ။)] ပဟူတံ။
နက္ခတ္တယောဂံ န ပုရေ အဘာဏိ၊ ခဏံ မုဟုတ္တံ န ပုရေ အသံသိ၊
သယံ ဟရီ [အထာဟရီ (သီ။ သျာ။ ပီ။)] အမ္ဗဖလံ ပဟူတံ၊ ဝဏ္ဏေန ဂန္ဓေန ရသေနုပေတံ။
မန္တာဘိဇပ္ပေန ပုရေ ဟိ [ပုရ’ဿ (သီ။ ပီ။)၊ ပုရေပိ (သျာ။)] တုယှံ၊ ဒုမပ္ဖလာ ပါတုဘဝန္တိ ဗြဟ္မေ၊
သွာဇ္ဇ န ပါရေသိ ဇပ္ပမ္ပိ မန္တံ [ဇပမ္ပိ မန္တေ (သီ။ ပီ။)]၊ အယံ သော ကော နာမ တဝဇ္ဇ ဓမ္မော။
စဏ္ဍာလပုတ္တော ¶ မမ သမ္ပဒါသိ၊ ဓမ္မေန မန္တေ ပကတိဉ္စ သံသိ၊
မာ စဿု မေ ပုစ္ဆိတော နာမဂေါတ္တံ၊ ဂုယှိတ္ထော အတ္ထံ [မာ တံ (သီ။ သျာ။ ပီ။)] ဝိဇဟေယျ မန္တော [ဝိဇဟေယျုမန္တာ (သျာ။)]။
သောဟံ ¶ ဇနိန္ဒေန ဇနမှိ ပုဋ္ဌော၊ မက္ခာဘိဘူတော အလိကံ အဘာဏိံ၊
‘‘မန္တာ ဣမေ ဗြာဟ္မဏဿာ’’တိ မိစ္ဆာ၊ ပဟီနမန္တော ကပဏော ရုဒါမိ။
ဧရဏ္ဍာ ပုစိမန္ဒာ ဝါ၊ အထ ဝါ ပါလိဘဒ္ဒကာ၊
မဓုံ မဓုတ္ထိကော ဝိန္ဒေ၊ သော ဟိ တဿ ဒုမုတ္တမော။
ခတ္တိယာ ဗြာဟ္မဏာ ဝေဿာ၊ သုဒ္ဒါ စဏ္ဍာလပုက္ကုသာ၊
ယမှာ ဓမ္မံ ဝိဇာနေယျ၊ သော ဟိ တဿ နရုတ္တမော။
ဣမဿ ဒဏ္ဍဉ္စ ဝဓဉ္စ ဒတွာ၊ ဂလေ ဂဟေတွာ ခလယာထ [ဗလယာထ (သျာ။)၊ ဂလယာထ (က။)] ဇမ္မံ၊
ယော ဥတ္တမတ္ထံ ကသိရေန လဒ္ဓံ၊ မာနာတိမာနေန ဝိနာသယိတ္ထ။
ယထာ သမံ မညမာနော ပတေယျ၊ သောဗ္ဘံ ဂုဟံ နရကံ ပူတိပါဒံ၊
ရဇ္ဇူတိ ဝါ အက္ကမေ ကဏှသပ္ပံ၊ အန္ဓော ¶ ယထာ ဇောတိမဓိဋ္ဌဟေယျ၊
ဧဝမ္ပိ မံ တွံ ခလိတံ သပည [သပညာ (ပီ။)]၊ ပဟီနမန္တဿ ပုနပ္ပဒါဟိ [ပုန သမ္ပဒါဟိ (သျာ။)၊ ပုနပ္ပသီဒ (သီ။ ပီ။)]။
ဓမ္မေန မန္တံ [မန္တေ (သီ။ သျာ။ ပီ။)] တဝ သမ္ပဒါသိံ၊ တုဝမ္ပိ ဓမ္မေန [တွမ္ပိ ဓမ္မေနေဝ (က။)] ပရိဂ္ဂဟေသိ၊
ပကတိမ္ပိ တေ အတ္တမနော အသံသိံ၊ ဓမ္မေ ဌိတံ တံ [ပတိဋ္ဌံ (က။)] န ဇဟေယျ မန္တော။
ယော ¶ ဗာလ မန္တံ [ဗလမန္တံ (က။)] ကသိရေန လဒ္ဓံ၊ ယံ ဒုလ္လဘံ အဇ္ဇ မနုဿလောကေ၊
ကိဉ္စာပိ လဒ္ဓါ ဇီဝိတုံ အပ္ပပညော [ကိစ္ဆာ လဒ္ဓံ ဇီဝိကံ အပ္ပပညော (သီ။ သျာ။)၊ ကစ္ဆာပိ လဒ္ဓါ ဇီဝိကံ အပ္ပည (ပီ။)]၊ ဝိနာသယီ အလိကံ ဘာသမာနော။
ဗာလဿ ¶ မူဠှဿ အကတညုနော စ၊ မုသာ ဘဏန္တဿ အသညတဿ၊
မန္တေ မယံ တာဒိသကေ န ဒေမ၊ ကုတော မန္တာ ဂစ္ဆ န မယှ ရုစ္စသီတိ။
အမ္ဗဇာတကံ ပဌမံ။
၄၇၅။ ဖန္ဒနဇာတကံ (၂)
ကုဌာရိဟတ္ထော ¶ [ကုဓာရိဟတ္ထော (က။)] ပုရိသော၊ ဝနမောဂယှ တိဋ္ဌသိ၊
ပုဋ္ဌော မေ သမ္မ အက္ခာဟိ၊ ကိံ ဒါရုံ ဆေတုမိစ္ဆသိ။
ဣဿော [ဣသော (သီ။)၊ ဤသော (သျာ။ ပီ။)] ဝနာနိ စရသိ၊ သမာနိ ဝိသမာနိ စ၊
ပုဋ္ဌော မေ သမ္မ အက္ခာဟိ၊ ကိံ ဒါရုံ နေမိယာ ဒဠှံ။
နေဝ သာလော န ခဒိရော၊ နာဿကဏ္ဏော ကုတော ဓဝေါ၊
ရုက္ခော စ [ရုက္ခောဝ (သီ။ ပီ။)] ဖန္ဒနော နာမ၊ တံ ဒါရုံ နေမိယာ ဒဠှံ။
ကီဒိသာနိဿ ပတ္တာနိ၊ ခန္ဓော ဝါ ပန ကီဒိသော၊
ပုဋ္ဌော မေ သမ္မ အက္ခာဟိ၊ ယထာ ဇာနေမု ဖန္ဒနံ။
ယဿ သာခါ ပလမ္ဗန္တိ၊ နမန္တိ န စ ဘဉ္ဇရေ၊
သော ရုက္ခော ဖန္ဒနော နာမ၊ ယဿ မူလေ အဟံ ဌိတော။
အရာနံ စက္ကနာဘီနံ၊ ဤသာနေမိရထဿ စ၊
သဗ္ဗဿ တေ ကမ္မနိယော၊ အယံ ဟေဿတိ ဖန္ဒနော။
ဣတိ ဖန္ဒနရုက္ခောပိ၊ တာဝဒေ အဇ္ဈဘာသထ၊
မယှမ္ပိ ဝစနံ အတ္ထိ၊ ဘာရဒွါဇ သုဏောဟိ မေ။
ဣဿဿ [ဣမဿ (က။ သီ။ က။)] ဥပက္ခန္ဓမှာ [ဥပခန္ဓမှာ (က။ သီ။ ပီ။ က။)]၊ ဥက္ကစ္စ စတုရင်္ဂုလံ၊
တေန နေမိံ ပသာရေသိ [ပရိဟရေသိ (သီ။ ပီ။)]၊ ဧဝံ ဒဠှတရံ သိယာ။
ဣတိ ဖန္ဒနရုက္ခောပိ၊ ဝေရံ အပ္ပေသိ တာဝဒေ၊
ဇာတာနဉ္စ အဇာတာနံ၊ ဣဿာနံ ဒုက္ခမာဝဟိ။
ဣစ္စေဝံ ¶ [ဣစ္စေဝ (သီ။ ပီ။)] ဖန္ဒနော ဣဿံ၊ ဣဿော စ ပန ဖန္ဒနံ၊
အညမညံ ¶ ဝိဝါဒေန၊ အညမညမဃာတယုံ။
ဧဝမေဝ မနုဿာနံ၊ ဝိဝါဒေါ ယတ္ထ ဇာယတိ၊
မယူရနစ္စံ နစ္စန္တိ၊ ယထာ တေ ဣဿဖန္ဒနာ။
တံ ¶ ဝေါ ဝဒါမိ ဘဒ္ဒံ ဝေါ [ဘဒ္ဒန္တေ (က။)]၊ ယာဝန္တေတ္ထ သမာဂတာ၊
သမ္မောဒထ မာ ဝိဝဒထ [မာဝိဝဒိတ္ထ (သီ။ သျာ။ ပီ။)]၊ မာ ဟောထ ဣဿဖန္ဒနာ။
သာမဂ္ဂိမေဝ [သာမဂျမေဝ (သျာ။ က။)] သိက္ခေထ၊ ဗုဒ္ဓေဟေတံ ပသံသိတံ၊
သာမဂ္ဂိရတော ဓမ္မဋ္ဌော၊ ယောဂက္ခေမာ န ဓံသတီတိ။
ဖန္ဒနဇာတကံ ဒုတိယံ။
၄၇၆။ ဇဝနဟံသဇာတကံ (၃)
ဣဓေဝ ဟံသ နိပတ၊ ပိယံ မေ တဝ ဒဿနံ၊
ဣဿရောသိ အနုပ္ပတ္တော၊ ယမိဓတ္ထိ ပဝေဒယ။
သဝနေန ဧကဿ ပိယာ ဘဝန္တိ၊ ဒိသွာ ပနေကဿ ဝိယေတိ [ဝိနေတိ (သျာ။)၊ ဝိဟေတိ (ပီ။)၊ ဝိဂေတိ (က။ အဋ္ဌ။)] ဆန္ဒော၊
ဒိသွာ စ သုတွာ စ ပိယာ ဘဝန္တိ၊ ကစ္စိန္နု မေ ပီယသိ [ပိယျသိ (သီ။ ပီ။)] ဒဿနေန။
သဝနေန ပိယော မေသိ၊ ဘိယျော စာဂမ္မ ဒဿနံ၊
ဧဝံ ပိယဒဿနော မေ [ဧဝံ ပိယဒဿနော သမာနော (သီ။ သျာ။ ပီ။)]၊ ဝသ ဟံသ မမန္တိကေ [မမ သန္တိကေ (သီ။ သျာ။ ပီ။)]။
ဝသေယျာမ တဝါဂါရေ၊ နိစ္စံ သက္ကတပူဇိတာ၊
မတ္တော စ ဧကဒါ ဝဇ္ဇေ [ဝဇ္ဇာ (သီ။ ပီ။)]၊ ‘‘ဟံသရာဇံ ပစန္တု မေ’’။
ဓိရတ္ထု ¶ တံ မဇ္ဇပါနံ၊ ယံ မေ ပိယတရံ တယာ၊
န စာပိ မဇ္ဇံ ပိဿာမိ [ပိဝိဿာမိ (သျာ။)၊ ပါယာမိ (သီ။ ပီ။)]၊ ယာဝ မေ ဝစ္ဆသီ ဃရေ။
သုဝိဇာနံ ¶ သိင်္ဂါလာနံ၊ သကုဏာနဉ္စ [သကုန္တာနဉ္စ (သီ။ သျာ။ ပီ။)] ဝဿိတံ၊
မနုဿဝဿိတံ ရာဇ၊ ဒုဗ္ဗိဇာနတရံ တတော။
အပိ စေ မညတီ ပေါသော၊ ဉာတိ မိတ္တော သခါတိ ဝါ၊
ယော ပုဗ္ဗေ သုမနော ဟုတွာ၊ ပစ္ဆာ သမ္ပဇ္ဇတေ ဒိသော။
ယသ္မိံ မနော နိဝိသတိ၊ အဝိဒူရေ သဟာပိ သော၊
သန္တိကေပိ ဟိ သော ဒူရေ၊ ယသ္မိံ နာဝိသတေ [ယသ္မာ ဝိဝသတေ (သီ။ သျာ။ ပီ။)] မနော။
အန္တောပိ သော ဟောတိ ပသန္နစိတ္တော၊ ပါရံ သမုဒ္ဒဿ ပသန္နစိတ္တော၊
အန္တောပိ သော ဟောတိ ပဒုဋ္ဌစိတ္တော၊ ပါရံ သမုဒ္ဒဿ ပဒုဋ္ဌစိတ္တော။
သံဝသန္တာ ဝိဝသန္တိ၊ ယေ ဒိသာ တေ ရထေသဘ၊
အာရာ သန္တော သံဝသန္တိ၊ မနသာ ရဋ္ဌဝဍ္ဎန။
အတိစိရံ နိဝါသေန၊ ပိယော ဘဝတိ အပ္ပိယော၊
အာမန္တ ခေါ တံ ဂစ္ဆာမ [ဂစ္ဆာမိ (သျာ။)]၊ ပုရာ တေ ဟောမ အပ္ပိယာ [ဟောမိ အပ္ပိယော (သျာ။)]။
ဧဝံ ¶ စေ ယာစမာနာနံ၊ အဉ္ဇလိံ နာဝဗုဇ္ဈသိ၊
ပရိစာရကာနံ သတံ [သန္တာနံ (သီ။ သျာ။)၊ သတ္တာနံ (ပီ။)]၊ ဝစနံ န ကရောသိ နော၊
ဧဝံ တံ အဘိယာစာမ၊ ပုန ကယိရာသိ ပရိယာယံ။
ဧဝံ စေ နော ဝိဟရတံ၊ အန္တရာယော န ဟေဿတိ၊
တုယှဉ္စာပိ ¶ [ဝါပိ (သျာ။ ပီ။ က။)] မဟာရာဇ၊ မယှဉ္စ [ဝါ (ဗဟူသု)] ရဋ္ဌဝဍ္ဎန၊
အပ္ပေဝ နာမ ပဿေမု [ပဿေမ (သီ။ သျာ။ ပီ။)]၊ အဟောရတာနမစ္စယေတိ။
ဇဝနဟံသဇာတကံ တတိယံ။
၄၇၇။ စူဠနာရဒဇာတကံ (၄)
န တေ ကဋ္ဌာနိ ဘိန္နာနိ၊ န တေ ဥဒကမာဘတံ၊
အဂ္ဂီပိ တေ န ဟာပိတော [ဟာသိတော (သီ။ သျာ။)]၊ ကိံ နု မန္ဒောဝ ဈာယသိ။
န ¶ ဥဿဟေ ဝနေ ဝတ္ထုံ၊ ကဿပါမန္တယာမိ တံ၊
ဒုက္ခော ဝါသော အရညသ္မိံ၊ ရဋ္ဌံ ဣစ္ဆာမိ ဂန္တဝေ။
ယထာ အဟံ ဣတော ဂန္တွာ၊ ယသ္မိံ ဇနပဒေ ဝသံ၊
အာစာရံ ဗြဟ္မေ [ဗြဟ္မံ (က။)] သိက္ခေယျံ၊ တံ ဓမ္မံ အနုသာသ မံ။
သစေ အရညံ ဟိတွာန၊ ဝနမူလဖလာနိ စ၊
ရဋ္ဌေ ရောစယသေ ဝါသံ၊ တံ ဓမ္မံ နိသာမေဟိ မေ။
ဝိသံ မာ ပဋိသေဝိတ္ထော [ပဋိသေဝိတ္ထ (သျာ။ က။)]၊ ပပါတံ ပရိဝဇ္ဇယ၊
ပင်္ကေ စ မာ ဝိသီဒိတ္ထော [ပင်္ကော စ မာ ဝိသိယိတ္ထော (က။)]၊ ယတ္တော စာသီဝိသေ စရေ။
ကိံ နု ဝိသံ ပပါတော ဝါ၊ ပင်္ကော ဝါ ဗြဟ္မစာရိနံ၊
ကံ တွံ အာသီဝိသံ ဗြူသိ၊ တံ မေ အက္ခာဟိ ပုစ္ဆိတော၊
အာသဝေါ တာတ လောကသ္မိံ၊ သုရာ နာမ ပဝုစ္စတိ၊
မနုညော [မနုညာ (သီ။ သျာ။ ပီ။)] သုရဘီ ဝဂ္ဂု၊ သာဒု [မဓု (သီ။ သျာ။)] ခုဒ္ဒရသူပမော [ရသူပမာ (သီ။ သျာ။ ပီ။)]၊
ဝိသံ တဒါဟု အရိယာ သေ၊ ဗြဟ္မစရိယဿ နာရဒ။
ဣတ္ထိယော ¶ တာတ လောကသ္မိံ၊ ပမတ္တံ ပမထေန္တိ တာ၊
ဟရန္တိ ယုဝိနော စိတ္တံ၊ တူလံ ဘဋ္ဌံဝ မာလုတော၊
ပပါတော ဧသော အက္ခာတော၊ ဗြဟ္မစရိယဿ နာရဒ။
လာဘော သိလောကော သက္ကာရော၊ ပူဇာ ပရကုလေသု စ၊
ပင်္ကော ဧသော စ [ဧသောဝ (သီ။ သျာ။ ပီ။)] အက္ခာတော၊ ဗြဟ္မစရိယဿ နာရဒ။
သသတ္ထာ ¶ [မဟန္တာ (သျာ။ က။)] တာတ ရာဇာနော၊ အာဝသန္တိ မဟိံ ဣမံ၊
တေ တာဒိသေ မနုဿိန္ဒေ၊ မဟန္တေ တာတ နာရဒ။
ဣဿရာနံ အဓိပတီနံ၊ န တေသံ ပါဒတော စရေ၊
အာသီဝိသောတိ [အာသီဝိသော သော (သီ။ ပီ။)] အက္ခာတော၊ ဗြဟ္မစရိယဿ နာရဒ။
ဘတ္တတ္ထော ဘတ္တကာလေ စ [ယံ (သီ။ ပီ။)]၊ ယံ ဂေဟမုပသင်္ကမေ၊
ယဒေတ္ထ ကုသလံ ဇညာ၊ တတ္ထ ဃာသေသနံ စရေ။
ပဝိသိတွာ ¶ ပရကုလံ၊ ပါနတ္ထံ [ပါနတ္ထော (သျာ။ ပီ။)] ဘောဇနာယ ဝါ၊
မိတံ ခါဒေ မိတံ ဘုဉ္ဇေ၊ န စ ရူပေ မနံ ကရေ။
ဂေါဋ္ဌံ မဇ္ဇံ ကိရာဋဉ္စ [ကိရာသဉ္စ (သီ။ သျာ။)၊ ကိရာသံ ဝါ (ပီ။)]၊ သဘာ နိကိရဏာနိ စ၊
အာရကာ ပရိဝဇ္ဇေဟိ၊ ယာနီဝ ဝိသမံ ပထန္တိ။
စူဠနာရဒဇာတကံ စတုတ္ထံ။
၄၇၈။ ဒူတဇာတကံ (၅)
ဒူတေ ¶ တေ ဗြဟ္မေ [ဒူတေ ဗြာဟ္မဏ (က။)] ပါဟေသိံ၊ ဂင်္ဂါတီရသ္မိ ဈာယတော၊
တေသံ ပုဋ္ဌော န ဗျာကာသိ၊ ဒုက္ခံ ဂုယှမတံ [ဂုယှံ မတံ (သီ။)၊ တုယှံ မတံ (သျာ။ က။)] နု တေ။
သစေ တေ ဒုက္ခမုပ္ပဇ္ဇေ၊ ကာသီနံ ရဋ္ဌဝဍ္ဎန၊
မာ ခေါ နံ တဿ အက္ခာဟိ၊ ယော တံ ဒုက္ခာ န မောစယေ။
ယော တဿ [ယော စ တထာ (ပီ။)] ဒုက္ခဇာတဿ၊ ဧကင်္ဂမပိ ဘာဂသော [ဧကန္တမပိ ဘာသတော (သီ။ ပီ။)]၊
ဝိပ္ပမောစေယျ ဓမ္မေန၊ ကာမံ တဿ ပဝေဒယ [ပဝေဒယေ (သီ။)]။
သုဝိဇာနံ သိင်္ဂါလာနံ၊ သကုဏာနဉ္စ ဝဿိတံ၊
မနုဿဝဿိတံ ရာဇ၊ ဒုဗ္ဗိဇာနတရံ တတော။
အပိ စေ မညတီ ပေါသော၊ ဉာတိ မိတ္တော သခါတိ ဝါ၊
ယော ပုဗ္ဗေ သုမနော ဟုတွာ၊ ပစ္ဆာ သမ္ပဇ္ဇတေ ဒိသော။
ယော အတ္တနော ဒုက္ခမနာနုပုဋ္ဌော၊ ပဝေဒယေ ဇန္တု အကာလရူပေ၊
အာနန္ဒိနော တဿ ဘဝန္တိမိတ္တာ [ဘဝန္တ’မိတ္တာ (သီ။ ပီ။)]၊ ဟိတေသိနော တဿ ဒုခီ ဘဝန္တိ။
ကာလဉ္စ ဉတွာန တထာဝိဓဿ၊ မေဓာဝီနံ ဧကမနံ ဝိဒိတွာ၊
အက္ခေယျ တိဗ္ဗာနိ [တိပ္ပာနိ (သီ။ သျာ။ ပီ။)] ပရဿ ဓီရော၊ သဏှံ ဂိရံ အတ္ထဝတိံ ပမုဉ္စေ။
သစေ ¶ ¶ စ ဇညာ အဝိသယှမတ္တနော၊ န တေ ဟိ မယှံ [နာယံ နီတိ မယှ (သီ။ ပီ။)] သုခါဂမာယ၊
ဧကောဝ တိဗ္ဗာနိ သဟေယျ ဓီရော၊ သစ္စံ ဟိရောတ္တပ္ပမပေက္ခမာနော။
အဟံ ¶ ရဋ္ဌာနိ ဝိစရန္တော၊ နိဂမေ ရာဇဓာနိယော၊
ဘိက္ခမာနော မဟာရာဇ၊ အာစရိယဿ ဓနတ္ထိကော။
ဂဟပတီ ရာဇပုရိသေ၊ မဟာသာလေ စ ဗြာဟ္မဏေ၊
အလတ္ထံ သတ္တ နိက္ခာနိ၊ သုဝဏ္ဏဿ ဇနာဓိပ၊
တေ မေ နဋ္ဌာ မဟာရာဇ၊ တသ္မာ သောစာမဟံ ဘုသံ။
ပုရိသာ တေ မဟာရာဇ၊ မနသာနုဝိစိန္တိတာ၊
နာလံ ဒုက္ခာ ပမောစေတုံ၊ တသ္မာ တေသံ န ဗျာဟရိံ။
တွဉ္စ ခေါ မေ မဟာရာဇ၊ မနသာနုဝိစိန္တိတော၊
အလံ ဒုက္ခာ ပမောစေတုံ၊ တသ္မာ တုယှံ ပဝေဒယိံ။
တဿာဒါသိ ပသန္နတ္တော၊ ကာသီနံ ရဋ္ဌဝဍ္ဎနော၊
ဇာတရူပမယေ နိက္ခေ၊ သုဝဏ္ဏဿ စတုဒ္ဒသာတိ။
ဒူတဇာတကံ ပဉ္စမံ။
၄၇၉။ ကာလိင်္ဂဗောဓိဇာတကံ (၆)
ရာဇာ ¶ ကာလိင်္ဂေါ စက္ကဝတ္တိ၊ ဓမ္မေန ပထဝိမနုသာသံ [မနုသာသိ (သျာ။ က။)]၊
အဂမာ [အဂမာသိ (သျာ။ က။)] ဗောဓိသမီပံ၊ နာဂေန မဟာနုဘာဝေန။
ကာလိင်္ဂေါ ဘာရဒွါဇော စ၊ ရာဇာနံ ကာလိင်္ဂံ သမဏကောလညံ၊
စက္ကံ ဝတ္တယတော ပရိဂ္ဂဟေတွာ [ပရိဏေတွာ (ပီ။)]၊ ပဉ္ဇလီ ဣဒမဝေါစ။
ပစ္စောရောဟ မဟာရာဇ၊ ဘူမိဘာဂေါ ယထာ သမဏုဂ္ဂတော [သမနုဂီတော (သီ။ သျာ။ ပီ။)]၊
ဣဓ အနဓိဝရာ ဗုဒ္ဓါ၊ အဘိသမ္ဗုဒ္ဓါ ဝိရောစန္တိ။
ပဒက္ခိဏတော ¶ အာဝဋ္ဋာ၊ တိဏလတာ အသ္မိံ ဘူမိဘာဂသ္မိံ၊
ပထဝိယာ နာဘိယံ [ပုထုဝိယာ အယံ (သီ။)၊ ပဌဝိယာ အယံ (သျာ။)၊ ပုထဝိယာ’ယံ (ပီ။)] မဏ္ဍော၊ ဣတိ နော သုတံ မန္တေ မဟာရာဇ [သုတံ မဟာရာဇ (သီ။ သျာ။ ပီ။)]။
သာဂရပရိယန္တာယ၊ မေဒိနိယာ သဗ္ဗဘူတဓရဏိယာ၊
ပထဝိယာ အယံ မဏ္ဍော၊ ဩရောဟိတွာ နမော ကရောဟိ။
ယေ တေ ဘဝန္တိ နာဂါ စ၊ အဘိဇာတာ စ ကုဉ္ဇရာ၊
ဧတ္တာဝတာ ပဒေသံ တေ၊ နာဂါ နေဝ မုပယန္တိ။
အဘိဇာတော နာဂေါ [အဘိဇာတော တေ နာဂေါ (သီ။ ပီ။ အဋ္ဌ။)] ကာမံ၊ ပေသေဟိ ကုဉ္ဇရံ ဒန္တိံ၊
ဧတ္တာဝတာ ပဒေသော [ပဒေသော စ (သျာ။ က။)]၊ သက္ကာ [န သက္ကာ (သျာ။)] နာဂေန မုပဂန္တုံ။
တံ သုတွာ ရာဇာ ကာလိင်္ဂေါ၊ ဝေယျဉ္ဇနိကဝစော နိသာမေတွာ၊
သမ္ပေသေသိ နာဂံ ဉဿာမ၊ မယံ ယထိမဿိဒံ [ယထာ ဣဒံ (သီ။ သျာ။ ပီ။)] ဝစနံ။
သမ္ပေသိတော ¶ စ ရညာ၊ နာဂေါ ကောဉ္စောဝ အဘိနဒိတွာန၊
ပဋိသက္ကိတွာ ¶ [ပဋိဩသက္ကိတွာ (က။)] နိသီဒိ၊ ဂရုံဝ ဘာရံ အသဟမာနော။
ကာလိင်္ဂဘာရဒွါဇော၊ နာဂံ ခီဏာယုကံ ဝိဒိတွာန၊
ရာဇာနံ ကာလိင်္ဂံ၊ တရမာနော အဇ္ဈဘာသိတ္ထ၊
အညံ သင်္ကမ နာဂံ၊ နာဂေါ ခီဏာယုကော မဟာရာဇ။
တံ သုတွာ ကာလိင်္ဂေါ၊ တရမာနော သင်္ကမီ နာဂံ၊
သင်္ကန္တေဝ ရညေ၊ နာဂေါ တတ္ထေဝ ပတိ [ပတိတော (က။)] ဘုမျာ၊
ဝေယျဉ္ဇနိကဝစော၊ ယထာ တထာ အဟု နာဂေါ။
ကာလိင်္ဂေါ ရာဇာ ကာလိင်္ဂံ၊ ဗြာဟ္မဏံ ဧတဒဝေါစ၊
တွမေဝ အသိ သမ္ဗုဒ္ဓါ၊ သဗ္ဗညူ သဗ္ဗဒဿာဝီ။
တံ အနဓိဝါသေန္တော ကာလိင်္ဂံ [ကာလိင်္ဂေါ (သီ။ သျာ။ ပီ။)]၊ ဗြာဟ္မဏော ဣဒမဝေါစ၊
ဝေယျဉ္ဇနိကာ ဟိ မယံ၊ ဗုဒ္ဓါ သဗ္ဗညုနော မဟာရာဇ။
သဗ္ဗညူ သဗ္ဗဝိဒူ စ၊ ဗုဒ္ဓါ န လက္ခဏေန ဇာနန္တိ၊
အာဂမဗလသာ [အာဂမပုရိသာ (ပီ။)] ဟိ မယံ၊ ဗုဒ္ဓါ သဗ္ဗံ ပဇာနန္တိ။
မဟယိတွာ ¶ သမ္ဗောဓိံ [မဟာယိတွာန သမ္ဗောဓိံ (သီ။ ပီ။)၊ ပဟံသိတွာန သမ္ဗောဓိံ (သျာ။)၊ မမာယိတွာန တံ ဗောဓိံ (က။)]၊ နာနာတုရိယေဟိ ဝဇ္ဇမာနေဟိ၊
မာလာဝိလေပနံ အဘိဟရိတွာ [မာလာဂန္ဓဝိလေပနံ အာဟရိတွာ (သီ။ ပီ။)၊ ပါကာရပရိက္ခေပံ ကာရေသိ၊ အထ ရာဇာ ပါယာသိ (သီ။ သျာ။ ပီ။)] အထ ရာဇာ မနုပါယာသိ [ပါကာရပရိက္ခေပံ ကာရေသိ၊ အထ ရာဇာ ပါယာသိ (သီ။ သျာ။ ပီ။)]။
သဋ္ဌိ ဝါဟသဟဿာနိ၊ ပုပ္ဖာနံ သန္နိပါတယိ၊
ပူဇေသိ ¶ ရာဇာ ကာလိင်္ဂေါ၊ ဗောဓိမဏ္ဍမနုတ္တရန္တိ [ဝရုတ္တမေတိ (သီ။)]။
ကာလိင်္ဂဗောဓိဇာတကံ ဆဋ္ဌံ။
၄၈၀။ အကိတ္တိဇာတကံ (၇)
အကိတ္တိံ [အကတ္တိံ (က။)] ဒိသွာ သမ္မန္တံ၊ သက္ကော ဘူတပတီ ဗြဝိ၊
ကိံ ပတ္ထယံ မဟာဗြဟ္မေ၊ ဧကော သမ္မသိ ဃမ္မနိ။
ဒုက္ခော ပုနဗ္ဘဝေါ သက္က၊ သရီရဿ စ ဘေဒနံ၊
သမ္မောဟမရဏံ ဒုက္ခံ၊ တသ္မာ သမ္မာမိ ဝါသဝ။
ဧတသ္မိံ တေ သုလပိတေ၊ ပတိရူပေ သုဘာသိတေ၊
ဝရံ ကဿပ တေ ဒမ္မိ၊ ယံ ကိဉ္စိ မနသိစ္ဆသိ။
ဝရံ စေ မေ အဒေါ သက္က၊ သဗ္ဗဘူတာနမိဿရ၊
ယေန ပုတ္တေ စ ဒါရေ စ၊ ဓနဓညံ ပိယာနိ စ၊
လဒ္ဓါ နရာ န [လဒ္ဓါ နညာနိ (က။)] တပ္ပန္တိ၊ သော လောဘော န မယီ ဝသေ။
ဧတသ္မိံ ¶ တေ သုလပိတေ၊ ပတိရူပေ သုဘာသိတေ၊
ဝရံ ¶ ကဿပ တေ ဒမ္မိ၊ ယံ ကိဉ္စိ မနသိစ္ဆသိ။
ဝရံ စေ မေ အဒေါ သက္က၊ သဗ္ဗဘူတာနမိဿရ၊
ခေတ္တံ ဝတ္ထုံ ဟိရညဉ္စ၊ ဂဝဿံ ဒါသပေါရိသံ၊
ယေန ဇာတေန ဇီယန္တိ၊ သော ဒေါသော န မယီ ဝသေ။
ဧတသ္မိံ တေ သုလပိတေ၊ ပတိရူပေ သုဘာသိတေ၊
ဝရံ ကဿပ တေ ဒမ္မိ၊ ယံ ကိဉ္စိ မနသိစ္ဆသိ။
ဝရံ ¶ စေ မေ အဒေါ သက္က၊ သဗ္ဗဘူတာနမိဿရ၊
ဗာလံ န ပဿေ န သုဏေ၊ န စ ဗာလေန သံဝသေ၊
ဗာလေနလ္လာပ [ဗာလေနာ’လာပ (?)] သလ္လာပံ၊ န ကရေ န စ ရောစယေ။
ကိံ နု တေ အကရံ ဗာလော၊ ဝဒ ကဿပ ကာရဏံ၊
ကေန ကဿပ ဗာလဿ၊ ဒဿနံ နာဘိကင်္ခသိ။
အနယံ နယတိ ဒုမ္မေဓော၊ အဓုရာယံ နိယုဉ္ဇတိ၊
ဒုန္နယော သေယျသော ဟောတိ၊ သမ္မာ ဝုတ္တော ပကုပ္ပတိ၊
ဝိနယံ သော န ဇာနာတိ၊ သာဓု တဿ အဒဿနံ။
ဧတသ္မိံ တေ သုလပိတေ၊ ပတိရူပေ သုဘာသိတေ၊
ဝရံ ကဿပ တေ ဒမ္မိ၊ ယံ ကိဉ္စိ မနသိစ္ဆသိ။
ဝရံ စေ မေ အဒေါ သက္က၊ သဗ္ဗဘူတာနမိဿရ၊
ဓီရံ ပဿေ သုဏေ ဓီရံ၊ ဓီရေန သဟ သံဝသေ၊
ဓီရေနလ္လာပသလ္လာပံ၊ တံ ကရေ တဉ္စ ရောစယေ။
ကိံ နု တေ အကရံ ဓီရော၊ ဝဒ ကဿပ ကာရဏံ၊
ကေန ကဿပ ဓီရဿ၊ ဒဿနံ အဘိကင်္ခသိ။
နယံ နယတိ မေဓာဝီ၊ အဓုရာယံ န ယုဉ္ဇတိ၊
သုနယော သေယျသော ဟောတိ၊ သမ္မာ ဝုတ္တော န ကုပ္ပတိ၊
ဝိနယံ သော ပဇာနာတိ၊ သာဓု တေန သမာဂမော။
ဧတသ္မိံ တေ သုလပိတေ၊ ပတိရူပေ သုဘာသိတေ၊
ဝရံ ¶ ကဿပ တေ ဒမ္မိ၊ ယံ ကိဉ္စိ မနသိစ္ဆသိ။
ဝရံ စေ မေ အဒေါ သက္က၊ သဗ္ဗဘူတာနမိဿရ၊
တတော ရတျာ ဝိဝသာနေ [ဝိဝသနေ (သီ။ သျာ။ ပီ။)]၊ သူရိယုဂ္ဂမနံ [သုရိယဿုဂ္ဂမနံ (သီ။ သျာ။ ပီ။)] ပတိ၊
ဒိဗ္ဗာ ဘက္ခာ ပါတုဘဝေယျုံ၊ သီလဝန္တော စ ယာစကာ။
ဒဒတော ¶ မေ [ဒဒတော စ မေ (ပီ။)] န ခီယေထ၊ ဒတွာ နာနုတပေယျဟံ၊
ဒဒံ စိတ္တံ ပသာဒေယျံ၊ ဧတံ သက္က ဝရံ ဝရေ။
ဧတသ္မိံ ¶ တေ သုလပိတေ၊ ပတိရူပေ သုဘာသိတေ၊
ဝရံ ကဿပ တေ ဒမ္မိ၊ ယံ ကိဉ္စိ မနသိစ္ဆသိ။
ဝရံ စေ မေ အဒေါ သက္က၊ သဗ္ဗဘူတာနမိဿရ၊
န မံ ပုန ဥပေယျာသိ၊ ဧတံ သက္က ဝရံ ဝရေ။
ဗဟူဟိ ဝတစရိယာဟိ [ဝတ္တစရိယာဟိ (သီ။ သျာ။ က။)]၊ နရာ စ အထ နာရိယော၊
ဒဿနံ အဘိကင်္ခန္တိ၊ ကိံ နု မေ ဒဿနေ ဘယံ။
တံ တာဒိသံ ဒေဝဝဏ္ဏံ [ဒေဝဝဏ္ဏိံ (ပီ။)]၊ သဗ္ဗကာမသမိဒ္ဓိနံ၊
ဒိသွာ တပေါ ပမဇ္ဇေယျ [ဒိသွာ တပေါ ပမဇ္ဇေယျံ (သီ။ သျာ။ ပီ။)၊ ဒိသွာနဟံ ပမဇ္ဇေယျံ (စရိယာပိဋကဋ္ဌကထာ)]၊ ဧတံ တေ ဒဿနေ ဘယန္တိ။
အကိတ္တိဇာတကံ သတ္တမံ။
၄၈၁။ တက္ကာရိယဇာတကံ (၈)
အဟမေဝ ဒုဗ္ဘာသိတံ ဘာသိ ဗာလော၊ ဘေကောဝရညေ အဟိမဝှာယမာနော [မဝှယာနော (သီ။ ပီ။)]၊
တက္ကာရိယေ သောဗ္ဘမိမံ [သောဗ္ဘမှိ အဟံ (က။)] ပတာမိ၊ န ¶ ကိရေဝ သာဓု အတိဝေလဘာဏီ [သာဓူတျတိဝေလဘာဏီ (က။)]။
ပပ္ပောတိ မစ္စော အတိဝေလဘာဏီ၊ ဗန္ဓံ ဝဓံ သောကပရိဒ္ဒဝဉ္စ၊
အတ္တာနမေဝ ဂရဟာသိ ဧတ္ထ၊ အာစေရ ယံ တံ နိခဏန္တိ သောဗ္ဘေ။
ကိမေဝဟံ တုဏ္ဍိလမနုပုစ္ဆိံ၊ ကရေယျ သံ [ကရေယျာသံ (သျာ။)၊ ကရေယျ သ (က။)၊ ဘရေယျ သံ (?)] ဘာတရံ ကာဠိကာယံ [ကာဠိကာယ (သျာ။ က။)]၊
နဂ္ဂေါဝဟံ [နဂ္ဂေါစ’ဟံ (?)] ဝတ္ထယုဂဉ္စ ဇီနော၊ အယမ္ပိ အတ္ထော ဗဟုတာဒိသောဝ။
ယော ¶ ယုဇ္ဈမာနာနမယုဇ္ဈမာနော [ယုဇ္ဈမာနေန အယုဇ္ဈမာနော (က။)]၊ မေဏ္ဍန္တရံ အစ္စုပတီ ကုလိင်္ဂေါ၊
သော ပိံသိတော မေဏ္ဍသိရေဟိ တတ္ထ၊ အယမ္ပိ အတ္ထော ဗဟုတာဒိသောဝ။
စတုရော ဇနာ ပေါတ္ထကမဂ္ဂဟေသုံ၊ ဧကဉ္စ ပေါသံ အနုရက္ခမာနာ၊
သဗ္ဗေဝ တေ ဘိန္နသိရာ သယိံသု၊ အယမ္ပိ အတ္ထော ဗဟုတာဒိသောဝ။
အဇာ ယထာ ဝေဠုဂုမ္ဗသ္မိံ ဗဒ္ဓါ [ဗန္ဓံ (သျာ။ က။)]၊ အဝက္ခိပန္တီ အသိမဇ္ဈဂစ္ဆိ၊
တေနေဝ ¶ တဿာ ဂလကာဝကန္တံ [ဂလယာ ဝိကန္တုံ (က။)၊ ဂလကံ ဝိကန္တာ (သျာ။)]၊ အယမ္ပိ အတ္ထော ဗဟုတာဒိသောဝ။
ဣမေ န ဒေဝါ န ဂန္ဓဗ္ဗပုတ္တာ၊ မိဂါ ဣမေ အတ္ထဝသံ ဂတာ မေ [အတ္ထဝသာဘတာ ဣမေ (သီ။ သျာ။ ပီ။)]၊
ဧကဉ္စ နံ သာယမာသေ ပစန္တု၊ ဧကံ ပုနပ္ပာတရာသေ [ဧကဉ္စ နံ ပါတရာသေ (က။ သီ။ ပီ။)] ပစန္တု။
သတံ သဟဿာနိ ဒုဘာသိတာနိ၊ ကလမ္ပိ နာဂ္ဃန္တိ သုဘာသိတဿ၊
ဒုဗ္ဘာသိတံ သင်္ကမာနော ကိလေသော [ကိလိဿတိ (?)]၊ တသ္မာ တုဏှီ ကိမ္ပုရိသာ [ကိံပုရိသော (သီ။ သျာ။)] န ဗာလျာ။
ယာ ¶ မေသာ ဗျာဟာသိ [ဗျာကာသိ (သီ။ သျာ။ ပီ။)] ပမုဉ္စထေတံ၊ ဂိရိဉ္စ နံ [ဂိရိံ ဝရံ (က။)] ဟိမဝန္တံ နယန္တု၊
ဣမဉ္စ ခေါ ဒေန္တု မဟာနသာယ၊ ပါတောဝ နံ ပါတရာသေ ပစန္တု။
ပဇ္ဇုန္နနာထာ ¶ ပသဝေါ၊ ပသုနာထာ အယံ ပဇာ၊
တွံ နာထောသိ [တွံ-နာထော’သ္မိ (သီ။ သျာ။ ပီ။)] မဟာရာဇ၊ နာထောဟံ ဘရိယာယ မေ [အမှ-နာထာ မမ ဘရိယာ (က။ သီ။ သျာ။)]၊
ဒွိန္နမညတရံ ဉတွာ၊ မုတ္တော ဂစ္ဆေယျ ပဗ္ဗတံ။
န ဝေ နိန္ဒာ သုပရိဝဇ္ဇယေထ [သုပရိဝဇ္ဇယာထ (သျာ။)]၊ နာနာ ¶ ဇနာ သေဝိတဗ္ဗာ ဇနိန္ဒ၊
ယေနေဝ ဧကော လဘတေ ပသံသံ၊ တေနေဝ အညော လဘတေ နိန္ဒိတာရံ။
သဗ္ဗော လောကော ပရိစိတ္တော အတိစိတ္တော [ပရစိတ္တေန အတိစိတ္တော (သီ။ သျာ။)၊ ပရစိတ္တေန အစိတ္တော (သီ။ အဋ္ဌ။)]၊ သဗ္ဗော လောကော စိတ္တဝါ သမှိ စိတ္တေ၊
ပစ္စေကစိတ္တာ ပုထု သဗ္ဗသတ္တာ၊ ကဿီဓ စိတ္တဿ ဝသေ န ဝတ္တေ။
တုဏှီ အဟူ ကိမ္ပုရိသော သဘရိယော [အဘာဏီ (က။)]၊ ယော ဒါနိ ဗျာဟာသိ ဘယဿ ဘီတော၊
သော ဒါနိ မုတ္တော သုခိတော အရောဂေါ၊ ဝါစာကိရေဝတ္တဝတီ နရာနန္တိ။
တက္ကာရိယဇာတကံ အဋ္ဌမံ။
၄၈၂။ ရုရုမိဂရာဇဇာတကံ (၉)
တဿ [ကဿ (သီ။ ပီ။)] ဂါမဝရံ ဒမ္မိ၊ နာရိယော စ အလင်္ကတာ၊
ယော [ကော (သီ။ သျာ။ ပီ။)] မေတံ မိဂမက္ခာတိ [မက္ခာသိ (သျာ။ က။)]၊ မိဂါနံ မိဂမုတ္တမံ။
မယှံ ဂါမဝရံ ဒေဟိ၊ နာရိယော စ အလင်္ကတာ၊
အဟံ တေ မိဂမက္ခိဿံ၊ မိဂါနံ မိဂမုတ္တမံ။
ဧတသ္မိံ ဝနသဏ္ဍသ္မိံ၊ အမ္ဗာ သာလာ စ ပုပ္ဖိတာ၊
ဣန္ဒဂေါပကသဉ္ဆန္နာ ¶ ၊ ဧတ္ထေသော တိဋ္ဌတေ မိဂေါ။
ဓနုံ အဒွေဇ္ဈံ [အဒေဇ္ဈံ (သီ။ ပီ။)၊ သရဇ္ဇံ (က။)] ကတွာန၊ ဥသုံ သန္နယှုပါဂမိ [သန္ဓာယုပါဂမိ (သီ။ ပီ။)]၊
မိဂေါ စ ဒိသွာ ရာဇာနံ၊ ဒူရတော အဇ္ဈဘာသထ။
အာဂမေဟိ ¶ မဟာရာဇ၊ မာ မံ ဝိဇ္ဈိ ရထေသဘ၊
ကော နု တေ ဣဒမက္ခာသိ၊ ဧတ္ထေသော တိဋ္ဌတေ မိဂေါ။
ဧသ ပါပစရော ပေါသော၊ သမ္မ တိဋ္ဌတိ အာရကာ၊
သောယံ [သော ဟိ (သီ။ သျာ။ ပီ။)] မေ ဣဒမက္ခာသိ၊ ဧတ္ထေသော တိဋ္ဌတေ မိဂေါ။
သစ္စံ ကိရေဝ မာဟံသု၊ နရာ ဧကစ္စိယာ ဣဓ၊
ကဋ္ဌံ နိပ္လဝိတံ သေယျော၊ န တွေဝေကစ္စိ ယော နရော။
ကိံ ¶ နု ရုရု ဂရဟသိ မိဂါနံ၊ ကိံ ပက္ခီနံ ကိံ ပန မာနုသာနံ၊
ဘယဉှိ မံ ဝိန္ဒတိနပ္ပရူပံ၊ သုတွာန တံ မာနုသိံ ဘာသမာနံ။
ယမုဒ္ဓရိံ ဝါဟနေ ဝုယှမာနံ၊ မဟောဒကေ သလိလေ သီဃသောတေ၊
တတောနိဒါနံ ဘယမာဂတံ မမ၊ ဒုက္ခော ဟဝေ ရာဇ အသဗ္ဘိ သင်္ဂမော။
သောဟံ စတုပ္ပတ္တမိမံ ဝိဟင်္ဂမံ၊ တနုစ္ဆိဒံ ဟဒယေ ဩဿဇာမိ၊
ဟနာမိ ¶ တံ မိတ္တဒုဗ္ဘိံ အကိစ္စကာရိံ [ဟနာမိ မိတ္တဒ္ဒု’မကိစ္စကာရိံ (သီ။ ပီ။)]၊ ယော တာဒိသံ ကမ္မကတံ န ဇာနေ။
ဓီရဿ ဗာလဿ ဟဝေ ဇနိန္ဒ၊ သန္တော ဝဓံ နပ္ပသံသန္တိ ဇာတု၊
ကာမံ ဃရံ ဂစ္ဆတု ပါပဓမ္မော၊ ယဉ္စဿ ဘဋ္ဌံ တဒေတဿ ဒေဟိ၊
အဟဉ္စ တေ ကာမကရော ဘဝါမိ။
အဒ္ဓါ ရုရု အညတရော သတံ သော [သတံ’သေ (သီ။)]၊ ယော ဒုဗ္ဘတော [ဒုဗ္ဘိနော (သျာ။)၊ ဒူဘတော (ပီ။)] မာနုသဿ န ဒုဗ္ဘိ၊
ကာမံ ဃရံ ဂစ္ဆတု ပါပဓမ္မော၊ ယဉ္စဿ ဘဋ္ဌံ တဒေတဿ ဒမ္မိ၊
အဟဉ္စ တေ ကာမစာရံ ဒဒါမိ။
သုဝိဇာနံ ¶ သိင်္ဂါလာနံ၊ သကုဏာနဉ္စဝဿိတံ၊
မနုဿဝဿိတံ ရာဇ၊ ဒုဗ္ဗိဇာနတရံ တတော။
အပိ စေ မညတီ ပေါသော၊ ဉာတိ မိတ္တော သခါတိ ဝါ၊
ယော ပုဗ္ဗေ သုမနော ဟုတွာ၊ ပစ္ဆာ သမ္ပဇ္ဇတေ ဒိသော။
သမာဂတာ ဇာနပဒါ၊ နေဂမာ စ သမာဂတာ၊
မိဂါ သဿာနိ ခါဒန္တိ၊ တံ ဒေဝေါ ပဋိသေဓတု။
ကာမံ ဇနပဒေါ မာသိ၊ ရဋ္ဌဉ္စာပိ ဝိနဿတု၊
န တွေဝါဟံ ရုရုံ ဒုဗ္ဘေ၊ ဒတွာ အဘယဒက္ခိဏံ။
မာ ¶ မေ ဇနပဒေါ အာသိ [မာ မံ ဇနပဒေါ အဟု (သျာ။)]၊ ရဋ္ဌဉ္စာပိ ဝိနဿတု၊
န တွေဝါဟံ [န တွေဝ (က။ သီ။ က။)] မိဂရာဇဿ၊ ဝရံ ဒတွာ မုသာ ဘဏေတိ။
ရုရုမိဂရာဇဇာတကံ နဝမံ။
၄၈၃။ သရဘမိဂဇာတကံ (၁၀)
အာသီသေထေဝ [အာသိံသေထေဝ (သီ။ သျာ။ ပီ။)] ပုရိသော၊ န နိဗ္ဗိန္ဒေယျ ပဏ္ဍိတော၊
ပဿာမိ ဝေါဟံ အတ္တာနံ၊ ယထာ ဣစ္ဆိံ တထာ အဟု။
အာသီသေထေဝ ပုရိသော၊ န နိဗ္ဗိန္ဒေယျ ပဏ္ဍိတော၊
ပဿာမိ ဝေါဟံ အတ္တာနံ၊ ဥဒကာ ထလမုဗ္ဘတံ။
ဝါယမေထေဝ ¶ ပုရိသော၊ န နိဗ္ဗိန္ဒေယျ ပဏ္ဍိတော၊
ပဿာမိ ဝေါဟံ အတ္တာနံ၊ ယထာ ဣစ္ဆိံ တထာ အဟု။
ဝါယမေထေဝ ပုရိသော၊ န နိဗ္ဗိန္ဒေယျ ပဏ္ဍိတော၊
ပဿာမိ ဝေါဟံ အတ္တာနံ၊ ဥဒကာ ထလမုဗ္ဘတံ။
ဒုက္ခူပနီတောပိ နရော သပညော၊ အာသံ န ဆိန္ဒေယျ သုခါဂမာယ၊
ဗဟူ ဟိ ဖဿာ အဟိတာ ဟိတာ စ၊ အဝိတက္ကိတာ မစ္စမုပဗ္ဗဇန္တိ [မစ္စုမုပဗ္ဗဇန္တိ (က။ သီ။ ပီ။)၊ မစ္စုမုပပဇ္ဇန္တိ (သျာ။ က။) ဧတ္ထ ‘‘အဝိတက္ကိတာပိ ဖဿော မစ္စံ ဇနံ ဥပဂစ္ဆန္တီ’’တိ အတ္ထော]။
အစိန္တိတမ္ပိ ¶ ဘဝတိ၊ စိန္တိတမ္ပိ ဝိနဿတိ၊
န ဟိ စိန္တာမယာ ဘောဂါ၊ ဣတ္ထိယာ ပုရိသဿ ဝါ။
သရဘံ ¶ ဂိရိဒုဂ္ဂသ္မိံ၊ ယံ တွံ အနုသရီ ပုရေ၊
အလီနစိတ္တဿ တုဝံ၊ ဝိက္ကန္တမနုဇီဝသိ [တဝ၊ ဝိက္ကန္တံ ဇီဝိတံ လဘိ (က။)]။
ယော တံ ဝိဒုဂ္ဂါ နရကာ သမုဒ္ဓရိ၊ သိလာယ ယောဂ္ဂံ သရဘော ကရိတွာ၊
ဒုက္ခူပနီတံ မစ္စုမုခါ ပမောစယိ၊ အလီနစိတ္တံ တံ မိဂံ [တမေဝ (သျာ။ က။)] ဝဒေသိ။
ကိံ တွံ နု [တုဝန္နု (သီ။ ပီ။)] တတ္ထေဝ တဒါ အဟောသိ၊ ဥဒါဟု တေ ကောစိ နံ [တံ (က။)] ဧတဒက္ခာ၊
ဝိဝဋ္ဋစ္ဆဒ္ဒေါ နုသိ သဗ္ဗဒဿီ၊ ဉာဏံ နု တေ ဗြာဟ္မဏ ဘိံသရူပံ။
န စေဝဟံ တတ္ထ တဒါ အဟောသိံ၊ န စာပိ မေ ကောစိ နံ [တံ (က။)] ဧတဒက္ခာ၊
ဂါထာပဒါနဉ္စ သုဘာသိတာနံ၊ အတ္ထံ တဒါနေန္တိ ဇနိန္ဒ ဓီရာ။
အာဒါယ ပတ္တိံ [ပတ္တံ (သျာ။)၊ ပဋ္ဋိံ (က။)] ပရဝိရိယဃာတိံ၊ စာပေ သရံ ကိံ ဝိစိကိစ္ဆသေ တုဝံ၊
နုန္နော [နုဏ္ဏော (က။ သီ။ သျာ။)၊ တုဏ္ဏော (က။)] သရော သရဘံ ဟန္တု ခိပ္ပံ၊ အန္နဉှိ ဧတံ ဝရပည ရညော။
အဒ္ဓါ ပဇာနာမိ အဟမ္ပိ ဧတံ၊ အန္နံ မိဂေါ ဗြာဟ္မဏ ခတ္တိယဿ၊
ပုဗ္ဗေ ¶ ကတဉ္စ [ပုဗ္ဗေ စ ကတံ (က။)] အပစာယမာနော၊ တသ္မာ မိဂံ သရဘံ နော ဟနာမိ။
နေသော မိဂေါ မဟာရာဇ၊ အသုရေသော ဒိသမ္ပတိ၊
ဧတံ ဟန္တွာ မနုဿိန္ဒ၊ ဘဝဿု အမရာဓိပေါ။
သစေ ¶ စ ရာဇာ [ရာဇ (သီ။ သျာ။ ပီ။)] ဝိစိကိစ္ဆသေ တုဝံ၊ ဟန္တုံ မိဂံ သရဘံ သဟာယကံ [သဟာယကံ မေ (သီ။ ပီ။)]၊
သပုတ္တဒါရော နရဝီရသေဋ္ဌ [နရဝိရိယသေဋ္ဌ (သီ။ ပီ။)]၊ ဂန္တွာ [ဂန္တာ (သီ။ ပီ။ အဋ္ဌ။)] တုဝံ ဝေတရဏိံ ယမဿ။
ကာမံ အဟံ ဇာနပဒါ စ သဗ္ဗေ၊ ပုတ္တာ စ ဒါရာ စ သဟာယသင်္ဃာ၊
ဂစ္ဆေမု တံ ဝေတရဏိံ ယမဿ၊ န တွေဝ ဟညော မမ ပါဏဒေါ ယော [ပါဏဒ’ဿ (သီ။ သျာ။ ပီ။)]။
အယံ မိဂေါ ကိစ္ဆဂတဿ မယှံ၊ ဧကဿ ကတ္တာ ဝိဝနသ္မိ ဃောရေ၊
တံ တာဒိသံ ပုဗ္ဗကိစ္စံ သရန္တော၊ ဇာနံ မဟာဗြဟ္မေ ကထံ ဟနေယျံ။
မိတ္တာဘိရာဓီ ¶ စိရမေဝ ဇီဝ၊ ရဇ္ဇံ ဣမံ ဓမ္မဂုဏေ [ရဇ္ဇမ္ပိမံ စဿ ဂဏေ (က။)] ပသာသ၊
နာရီဂဏေဟိ ပရိစာရိယန္တော၊ မောဒဿု ရဋ္ဌေ တိဒိဝေဝ ဝါသဝေါ။
အက္ကောဓနော ¶ နိစ္စပသန္နစိတ္တော၊ သဗ္ဗာတိထီ ယာစယောဂေါ ဘဝိတွာ [ပါဟုနကေ ကရိတွာ (သျာ။)၊ ယာစယောဂေါ ဝိဒိတွာ (က။)]၊
ဒတွာ စ ဘုတွာ စ ယထာနုဘာဝံ၊ အနိန္ဒိတော သဂ္ဂမုပေဟိ ဌာနန္တိ။
သရဘမိဂဇာတကံ ဒသမံ။
တေရသကနိပါတံ နိဋ္ဌိတံ။
တဿုဒ္ဒါနံ –
ဝရအမ္ဗ ¶ ကုဌာရိ သဟံသဝရော၊ အထရညသ္မိံ ဒူတကပဉ္စမကော၊
အထ ဗောဓိ အကိတ္တိ သုတက္ကရိနာ၊ အထ ရုရုမိဂေနပရော သရဘောတိ။