📜
၁၅။ ဝီသတိနိပါတော
၄၉၇။ မာတင်္ဂဇာတကံ (၁)
ကုတော ¶ ¶ ¶ နု အာဂစ္ဆသိ ဒုမ္မဝါသီ [ရုမ္မဝါသီ (သီ။ ပီ။)]၊ ဩတလ္လကော ပံသုပိသာစကောဝ၊
သင်္ကာရစောဠံ ပဋိမုဉ္စ [ပဋိမုစ္စ (သီ။ ပီ။)] ကဏ္ဌေ၊ ကော ရေ တုဝံ ဟောသိ [ဟောဟိသိ (သီ။ ပီ။)] အဒက္ခိဏေယျော။
အန္နံ တဝေဒံ [တဝ ဣဒံ (က။ သီ။ ပီ။)၊ တဝယိဒံ (သျာ။)] ပကတံ ယသဿိ၊ တံ ခဇ္ဇရေ ဘုဉ္ဇရေ ပိယျရေ စ၊
ဇာနာသိ မံ တွံ ပရဒတ္တူပဇီဝိံ၊ ဥတ္တိဋ္ဌပိဏ္ဍံ လဘတံ သပါကော။
အန္နံ မမေဒံ [မမ ဣဒံ (က။ သီ။ ပီ။)၊ မမယိဒံ (သျာ။)] ပကတံ ဗြာဟ္မဏာနံ၊ အတ္တတ္ထာယ သဒ္ဒဟတော မမေဒံ [မမ ဣဒံ (က။ သီ။ ပီ။)၊ မမယိဒံ (သျာ။)]၊
အပေဟိ ဧတ္တော ကိမိဓဋ္ဌိတောသိ၊ န မာဒိသာ တုယှံ ဒဒန္တိ ဇမ္မ။
ထလေ စ နိန္နေ စ ဝပန္တိ ဗီဇံ၊ အနူပခေတ္တေ ဖလမာသမာနာ [မာသသာနာ (သီ။ ပီ။)၊ မာသိံ သမာနာ (သျာ။)]၊
ဧတာယ သဒ္ဓါယ ဒဒါဟိ ဒါနံ၊ အပ္ပေဝ အာရာဓယေ ဒက္ခိဏေယျေ။
ခေတ္တာနိ မယှံ ဝိဒိတာနိ လောကေ၊ ယေသာဟံ ¶ ဗီဇာနိ ပတိဋ္ဌပေမိ၊
ယေ ဗြာဟ္မဏာ ဇာတိမန္တူပပန္နာ၊ တာနီဓ ခေတ္တာနိ သုပေသလာနိ။
ဇာတိမဒေါ စ အတိမာနိတာ စ၊ လောဘော စ ဒေါသော စ မဒေါ စ မောဟော၊
ဧတေ အဂုဏာ ယေသု စ သန္တိ [ယေသု ဝသန္တိ (သီ။ ပီ။)] သဗ္ဗေ၊ တာနီဓ ခေတ္တာနိ အပေသလာနိ။
ဇာတိမဒေါ ¶ စ အတိမာနိတာ စ၊ လောဘော စ ဒေါသော စ မဒေါ စ မောဟော၊
ဧတေ အဂုဏာ ယေသု န သန္တိ သဗ္ဗေ၊ တာနီဓ ခေတ္တာနိ သုပေသလာနိ။
ကွေတ္ထ ဂတာ [ကွတ္ထ ဂတာ (သျာ။)၊ ကတ္ထေဝ ဘဋ္ဌာ (ပီ။)] ဥပဇောတိယော စ၊ ဥပဇ္ဈာယော စ အထဝါ ဂဏ္ဍကုစ္ဆိ [အဏ္ဍကုစ္ဆိ (သီ။ သျာ။ ပီ။)]၊
ဣမဿ ဒဏ္ဍဉ္စ ဝဓဉ္စ ဒတွာ၊ ဂလေ ဂဟေတွာ ခလယာထ [ဂလယာထ (က။)] ဇမ္မံ။
ဂိရိံ နခေန ခဏသိ၊ အယော ဒန္တေဟိ [ဒန္တေန (သီ။ ပီ။)] ခါဒသိ၊
ဇာတဝေဒံ ပဒဟသိ၊ ယော ဣသိံ ပရိဘာသသိ။
ဣဒံ ဝတွာန မာတင်္ဂေါ၊ ဣသိ သစ္စပရက္ကမော၊
အန္တလိက္ခသ္မိံ ¶ ပက္ကာမိ [ပက္ကမိ (က။)]၊ ဗြာဟ္မဏာနံ ဥဒိက္ခတံ။
အာဝေလ္လိတံ [အဝေဌိတံ (သီ။ ပီ။)] ပိဋ္ဌိတော ဥတ္တမင်္ဂံ၊ ဗာဟုံ [ဗာဟံ (သီ။ ပီ။)] ပသာရေတိ အကမ္မနေယျံ [အကမ္ပနေယျံ (က။)]၊
သေတာနိ အက္ခီနိ ယထာ မတဿ၊ ကော မေ ဣမံ ပုတ္တမကာသိ ဧဝံ။
ဣဓာဂမာ ¶ သမဏော ဒုမ္မဝါသီ၊ ဩတလ္လကော ပံသုပိသာစကောဝ၊
သင်္ကာရစောဠံ ပဋိမုဉ္စ ကဏ္ဌေ၊ သော တေ ဣမံ ပုတ္တမကာသိ ဧဝံ။
ကတမံ ဒိသံ အဂမာ ဘူရိပညော၊ အက္ခာထ မေ မာဏဝါ ဧတမတ္ထံ၊
ဂန္တွာန တံ ပဋိကရေမု အစ္စယံ၊ အပ္ပေဝ နံ ပုတ္တ လဘေမု ဇီဝိတံ။
ဝေဟာယသံ ¶ အဂမာ ဘူရိပညော၊ ပထဒ္ဓုနော ပန္နရသေဝ စန္ဒော၊
အပိ စာပိ သော ပုရိမဒိသံ အဂစ္ဆိ၊ သစ္စပ္ပဋိညော ဣသိ သာဓုရူပေါ။
အာဝေလ္လိတံ ပိဋ္ဌိတော ဥတ္တမင်္ဂံ၊ ဗာဟုံ ပသာရေတိ အကမ္မနေယျံ၊
သေတာနိ အက္ခီနိ ယထာ မတဿ၊ ကော ¶ မေ ဣမံ ပုတ္တမကာသိ ဧဝံ။
ယက္ခာ ဟဝေ သန္တိ မဟာနုဘာဝါ၊ အနွာဂတာ ဣသယော သာဓုရူပါ၊
တေ ဒုဋ္ဌစိတ္တံ ကုပိတံ ဝိဒိတွာ၊ ယက္ခာ ဟိ တေ ပုတ္တမကံသု ဧဝံ။
ယက္ခာ စ မေ ပုတ္တမကံသု ဧဝံ၊ တွညေဝ မေ မာ ကုဒ္ဓါ [ကုဒ္ဓ (က။)] ဗြဟ္မစာရိ၊
တုမှေဝ [တုယှေဝ (က။)] ပါဒေ သရဏံ ဂတာသ္မိ၊ အနွာဂတာ ပုတ္တသောကေန ဘိက္ခု။
တဒေဝ ဟိ ဧတရဟိ စ မယှံ၊ မနောပဒေါသော န မမတ္ထိ [မမ နတ္ထိ (ပီ။)] ကောစိ၊
ပုတ္တော စ တေ ဝေဒမဒေန မတ္တော၊ အတ္ထံ န ဇာနာတိ အဓိစ္စ ဝေဒေ။
အဒ္ဓါ ဟဝေ ဘိက္ခု မုဟုတ္တကေန၊ သမ္မုယှတေဝ ပုရိသဿ သညာ၊
ဧကာပရာဓံ [ဧတာပရာဓံ (က။)] ခမ ဘူရိပည၊ န ပဏ္ဍိတာ ကောဓဗလာ ဘဝန္တိ။
ဣဒဉ္စ မယှံ ဥတ္တိဋ္ဌပိဏ္ဍံ၊ တဝ [နတ္ထိ သီ။ ပီ။ ပေါတ္ထကေသု] မဏ္ဍဗျော ဘုဉ္ဇတု အပ္ပပညော၊
ယက္ခာ စ တေ နံ [တေ ပုတ္တံ (သျာ။)] န ဝိဟေဌယေယျုံ၊ ပုတ္တော ¶ စ တေ ဟေဿတိ [ဟောဟိတိ (သီ။ ပီ။)] သော အရောဂေါ။
မဏ္ဍဗျ ¶ ဗာလောသိ ပရိတ္တပညော၊ ယော ပုညခေတ္တာနမကောဝိဒေါသိ၊
မဟက္ကသာဝေသု ဒဒါသိ ဒါနံ၊ ကိလိဋ္ဌကမ္မေသု အသညတေသု။
ဇဋာ စ ကေသာ အဇိနာ နိဝတ္ထာ၊ ဇရူဒပါနံဝ မုခံ ပရူဠှံ၊
ပဇံ ဣမံ ပဿထ ဒုမ္မရူပံ [ရုမ္မရူပိံ (သီ။ ပီ။)]၊ န ဇဋာဇိနံ တာယတိ အပ္ပပညံ။
ယေသံ ရာဂေါ စ ဒေါသော စ၊ အဝိဇ္ဇာ စ ဝိရာဇိတာ၊
ခီဏာသဝါ အရဟန္တော၊ တေသု ဒိန္နံ မဟပ္ဖလန္တိ။
မာတင်္ဂဇာတကံ ပဌမံ။
၄၉၈။ စိတ္တသမ္ဘူတဇာတကံ (၂)
သဗ္ဗံ နရာနံ သဖလံ သုစိဏ္ဏံ၊ န ကမ္မုနာ ကိဉ္စန မောဃမတ္ထိ၊
ပဿာမိ သမ္ဘူတံ မဟာနုဘာဝံ၊ သကမ္မုနာ ¶ ပုညဖလူပပန္နံ။
သဗ္ဗံ ¶ နရာနံ သဖလံ သုစိဏ္ဏံ၊ န ကမ္မုနာ ကိဉ္စန မောဃမတ္ထိ၊
ကစ္စိန္နု စိတ္တဿပိ ဧဝမေဝံ၊ ဣဒ္ဓါ မနော တဿ ယထာပိ မယှံ။
သဗ္ဗံ နရာနံ သဖလံ သုစိဏ္ဏံ၊ န ကမ္မုနာ ကိဉ္စန မောဃမတ္ထိ၊
စိတ္တမ္ပိ ဇာနာဟိ [စိတ္တံ ဝိဇာနာဟိ (သီ။ ပီ။)] တထေဝ ဒေဝ၊ ဣဒ္ဓါ မနော တဿ ယထာပိ တုယှံ။
ဘဝံ နု စိတ္တော သုတမညတော တေ၊ ဥဒါဟု တေ ကောစိ နံ ဧတဒက္ခာ၊
ဂါထာ သုဂီတာ န မမတ္ထိ ကင်္ခါ၊ ဒဒါမိ တေ ဂါမဝရံ သတဉ္စ။
န ¶ စာဟံ စိတ္တော သုတမညတော မေ၊ ဣသီ စ မေ ဧတမတ္ထံ အသံသိ၊
‘‘ဂန္တွာန ရညော ပဋိဂါဟိ [ပဋိဂါယိ (သျာ။ က။)၊ ပဋိဂါယ (?)] ဂါထံ၊ အပိ တေ ဝရံ အတ္တမနော ဒဒေယျ’’ [အပိ နု တေ ဝရံ အတ္တမနော ဒဒေယျ (သျာ။)၊ အပိ နု တေ အတ္တမနော ဝရံ ဒဒေ (က။)]။
ယောဇေန္တု ဝေ ရာဇရထေ၊ သုကတေ စိတ္တသိဗ္ဗနေ၊
ကစ္ဆံ နာဂါနံ ဗန္ဓထ၊ ဂီဝေယျံ ပဋိမုဉ္စထ။
အာဟညန္တု ¶ [အာဟညရေ (သျာ။)] ဘေရိမုဒိင်္ဂသင်္ခေ [သင်္ခါ (သျာ။)]၊ သီဃာနိ ယာနာနိ စ ယောဇယန္တု၊
အဇ္ဇေဝဟံ အဿမံ တံ ဂမိဿံ၊ ယတ္ထေဝ ဒက္ခိဿမိသိံ နိသိန္နံ။
သုလဒ္ဓလာဘော ဝတ မေ အဟောသိ၊ ဂါထာ သုဂီတာ ပရိသာယ မဇ္ဈေ၊
သွာဟံ ဣသိံ သီလဝတူပပန္နံ၊ ဒိသွာ ပတီတော သုမနောဟမသ္မိ။
အာသနံ ဥဒကံ ပဇ္ဇံ၊ ပဋိဂ္ဂဏှာတု နော ဘဝံ၊
အဂ္ဃေ ဘဝန္တံ ပုစ္ဆာမ၊ အဂ္ဃံ ကုရုတု နော ဘဝံ။
ရမ္မဉ္စ တေ အာဝသထံ ကရောန္တု၊ နာရီဂဏေဟိ ပရိစာရယဿု၊
ကရောဟိ ဩကာသမနုဂ္ဂဟာယ၊ ဥဘောပိ မံ ဣဿရိယံ ကရောမ။
ဒိသွာ ဖလံ ဒုစ္စရိတဿ ရာဇ၊ အထော သုစိဏ္ဏဿ မဟာဝိပါကံ၊
အတ္တာနမေဝ ပဋိသံယမိဿံ၊ န ပတ္ထယေ ပုတ္တ [ပုတ္တံ (သီ။ ပီ။)] ပသုံ ဓနံ ဝါ။
ဒသေဝိမာ ဝဿဒသာ၊ မစ္စာနံ ဣဓ ဇီဝိတံ၊
အပတ္တညေဝ ¶ တံ ဩဓိံ၊ နဠော ဆိန္နောဝ သုဿတိ။
တတ္ထ ¶ ကာ နန္ဒိ ကာ ခိဍ္ဍာ၊ ကာ ရတီ ကာ ဓနေသနာ၊
ကိံ မေ ပုတ္တေဟိ ဒါရေဟိ၊ ရာဇ မုတ္တောသ္မိ ဗန္ဓနာ။
သောဟံ ဧဝံ ပဇာနာမိ [သော အဟံ သုပ္ပဇာနာမိ (သီ။ ပီ။)]၊ မစ္စု မေ နပ္ပမဇ္ဇတိ၊
အန္တကေနာဓိပန္နဿ၊ ကာ ရတီ ကာ ဓနေသနာ။
ဇာတိ နရာနံ အဓမာ ဇနိန္ဒ၊ စဏ္ဍာလယောနိ ဒွိပဒါကနိဋ္ဌာ [ဒိပဒါကနိဋ္ဌာ (သီ။ ပီ။)]၊
သကေဟိ ကမ္မေဟိ သုပါပကေဟိ၊ စဏ္ဍာလဂဗ္ဘေ [စဏ္ဍာလိဂဗ္ဘေ (သျာ။)] အဝသိမှ ပုဗ္ဗေ။
စဏ္ဍာလာဟုမှ အဝန္တီသု၊ မိဂါ နေရဉ္ဇရံ ပတိ၊
ဥက္ကုသာ နမ္မဒါတီရေ [ရမ္မဒါတီရေ (သျာ။ က။)]၊ တျဇ္ဇ ဗြာဟ္မဏခတ္တိယာ။
ဥပနီယတိ ¶ ဇီဝိတမပ္ပမာယု၊ ဇရူပနီတဿ ¶ န သန္တိ တာဏာ၊
ကရောဟိ ပဉ္စာလ မမေတ [မမေဝ (သျာ။ က။)] ဝါကျံ၊ မာကာသိ ကမ္မာနိ ဒုက္ခုဒြယာနိ။
ဥပနီယတိ ဇီဝိတမပ္ပမာယု၊ ဇရူပနီတဿ န သန္တိ တာဏာ၊
ကရောဟိ ပဉ္စာလ မမေတ ဝါကျံ၊ မာကာသိ ကမ္မာနိ ဒုက္ခပ္ဖလာနိ။
ဥပနီယတိ ဇီဝိတမပ္ပမာယု၊ ဇရူပနီတဿ န သန္တိ တာဏာ၊
ကရောဟိ ပဉ္စာလ မမေတ ဝါကျံ၊ မာကာသိ ကမ္မာနိ ရဇဿိရာနိ။
ဥပနီယတိ ဇီဝိတမပ္ပမာယု၊ ဝဏ္ဏံ ဇရာ ဟန္တိ နရဿ ဇိယျတော၊
ကရောဟိ ပဉ္စာလ မမေတ ဝါကျံ၊ မာကာသိ ကမ္မံ နိရယူပပတ္တိယာ။
အဒ္ဓါ ¶ ဟိ သစ္စံ ဝစနံ တဝေတံ၊ ယထာ ဣသီ ဘာသသိ ဧဝမေတံ၊
ကာမာ စ မေ သန္တိ အနပ္ပရူပါ၊ တေ ဒုစ္စဇာ မာဒိသကေန ဘိက္ခု။
နာဂေါ ယထာ ပင်္ကမဇ္ဈေ ဗျသန္နော၊ ပဿံ ထလံ နာဘိသမ္ဘောတိ ဂန္တုံ၊
ဧဝမ္ပဟံ [ဧဝမဟံ (သျာ။)] ကာမပင်္ကေ ဗျသန္နော၊ န ဘိက္ခုနော မဂ္ဂမနုဗ္ဗဇာမိ။
ယထာပိ မာတာ စ ပိတာ စ ပုတ္တံ၊ အနုသာသရေ ကိန္တိ သုခီ ဘဝေယျ၊
ဧဝမ္ပိ မံ တွံ အနုသာသ ဘန္တေ၊ ယထာ စိရံ [ယမာစရံ (သီ။ ပီ။ က။ အဋ္ဌ။)] ပေစ္စ သုခီ ဘဝေယျံ။
နော ¶ စေ တုဝံ ဥဿဟသေ ဇနိန္ဒ၊ ကာမေ ဣမေ မာနုသကေ ပဟာတုံ၊
ဓမ္မိံ [ဓမ္မံ (သီ။ ပီ။)] ဗလိံ ပဋ္ဌပယဿု ရာဇ၊ အဓမ္မကာရော တဝ [အဓမ္မကာရော စ တေ (သီ။ သျာ။ ပီ။)] မာဟု ရဋ္ဌေ။
ဒူတာ ဝိဓာဝန္တု ဒိသာ စတဿော၊ နိမန္တကာ သမဏဗြာဟ္မဏာနံ၊
တေ အန္နပါနေန ဥပဋ္ဌဟဿု၊ ဝတ္ထေန သေနာသနပစ္စယေန စ။
အန္နေန ပါနေန ပသန္နစိတ္တော၊ သန္တပ္ပယ သမဏဗြာဟ္မဏေ စ၊
ဒတွာ စ ဘုတွာ စ ယထာနုဘာဝံ၊ အနိန္ဒိတော သဂ္ဂမုပေဟိ [မုပေတိ (ပီ။ က။)] ဌာနံ။
သစေ စ တံ ရာဇ မဒေါ သဟေယျ၊ နာရီဂဏေဟိ ပရိစာရယန္တံ၊
ဣမမေဝ ဂါထံ မနသီ ကရောဟိ၊ ဘာသေသိ [ဘာသေဟိ (သျာ။ ပီ။ က။)] စေနံ ပရိသာယ မဇ္ဈေ။
အဗ္ဘောကာသသယော ¶ ဇန္တု၊ ဝဇန္တျာ ခီရပါယိတော၊
ပရိကိဏ္ဏော သုဝါနေဟိ [သုပိနေဟိ (သီ။ ပီ။)]၊ သွာဇ္ဇ ရာဇာတိ ဝုစ္စတီတိ။
စိတ္တသမ္ဘူတဇာတကံ ဒုတိယံ။
၄၉၉။ သိဝိဇာတကံ (၃)
ဒူရေ ¶ အပဿံ ထေရောဝ၊ စက္ခုံ ယာစိတုမာဂတော၊
ဧကနေတ္တာ ဘဝိဿာမ၊ စက္ခုံ မေ ဒေဟိ ယာစိတော။
ကေနာနုသိဋ္ဌော ¶ ဣဓ မာဂတောသိ၊ ဝနိဗ္ဗက [ဝဏိဗ္ဗက (သီ။)] စက္ခုပထာနိ ယာစိတုံ၊
သုဒုစ္စဇံ ယာစသိ ဥတ္တမင်္ဂံ၊ ယမာဟု နေတ္တံ ပုရိသေန ဒုစ္စဇံ။
ယမာဟု ဒေဝေသု သုဇမ္ပတီတိ၊ မဃဝါတိ နံ အာဟု မနုဿလောကေ၊
တေနာနုသိဋ္ဌော ဣဓ မာဂတောသ္မိ၊ ဝနိဗ္ဗကော စက္ခုပထာနိ ယာစိတုံ။
ဝနိဗ္ဗတော [ဝနိဗ္ဗကော (သျာ။ ပီ။)] မယှ ဝနိံ [ဝနံ (က။)၊ ဝဏိံ (သီ။ သျာ။ ပီ။)] အနုတ္တရံ၊ ဒဒါဟိ တေ စက္ခုပထာနိ ယာစိတော၊
ဒဒါဟိ မေ စက္ခုပထံ အနုတ္တရံ၊ ယမာဟု နေတ္တံ ပုရိသေန ဒုစ္စဇံ။
ယေန အတ္ထေန အာဂစ္ဆိ [အာဂဉ္ဆိ (သီ။ ပီ။)]၊ ယမတ္ထမဘိပတ္ထယံ၊
တေ တေ ဣဇ္ဈန္တု သင်္ကပ္ပာ၊ လဘ စက္ခူနိ ဗြာဟ္မဏ။
ဧကံ တေ ယာစမာနဿ၊ ဥဘယာနိ ဒဒါမဟံ၊
သ စက္ခုမာ ဂစ္ဆ ဇနဿ ပေက္ခတော၊ ယဒိစ္ဆသေ တွံ တဒတေ သမိဇ္ဈတု။
မာ ¶ ¶ နော ဒေဝ အဒါ စက္ခုံ၊ မာ နော သဗ္ဗေ ပရာကရိ [ပရက္ကရိ (သျာ။ က။ အဋ္ဌ။)၊ ပရိက္ကရိ (က။) ပရိ + အာ + ကရိ = ပရာကရိ]၊
ဓနံ ဒေဟိ မဟာရာဇ၊ မုတ္တာ ဝေဠုရိယာ ဗဟူ။
ယုတ္တေ ဒေဝ ရထေ ဒေဟိ၊ အာဇာနီယေ စလင်္ကတေ၊
နာဂေ ဒေဟိ မဟာရာဇ၊ ဟေမကပ္ပနဝါသသေ။
ယထာ တံ သိဝယော [သီဝိယော (သျာ။)] သဗ္ဗေ၊ သယောဂ္ဂါ သရထာ သဒါ၊
သမန္တာ ပရိကိရေယျုံ [ပရိကရေယျုံ (သျာ။ ပီ။)]၊ ဧဝံ ဒေဟိ ရထေသဘ။
ယော ဝေ ဒဿန္တိ ဝတွာန၊ အဒါနေ ကုရုတေ မနော၊
ဘူမျံ [ဘူမျာ (သီ။ ပီ။)] သော ပတိတံ ပါသံ၊ ဂီဝါယံ ပဋိမုဉ္စတိ။
ယော ဝေ ဒဿန္တိ ဝတွာန၊ အဒါနေ ကုရုတေ မနော၊
ပါပါ ပါပတရော ဟောတိ၊ သမ္ပတ္တော ယမသာဓနံ။
ယဉှိ ယာစေ တဉှိ ဒဒေ၊ ယံ န ယာစေ န တံ ဒဒေ၊
သွာဟံ တမေဝ ဒဿာမိ၊ ယံ မံ ယာစတိ ဗြာဟ္မဏော။
အာယုံ နု ဝဏ္ဏံ နု သုခံ ဗလံ နု၊ ကိံ ပတ္ထယာနော နု ဇနိန္ဒ ဒေသိ၊
ကထဉှိ ရာဇာ သိဝိနံ အနုတ္တရော၊ စက္ခူနိ ဒဇ္ဇာ ပရလောကဟေတု။
န ဝါဟမေတံ ယသသာ ဒဒါမိ၊ န ပုတ္တမိစ္ဆေ န ဓနံ န ရဋ္ဌံ၊
သတဉ္စ ဓမ္မော စရိတော ပုရာဏော၊ ဣစ္စေဝ ဒါနေ ရမတေ မနော မမ [မမံ (သီ။ ပီ။)]။
သခါ ¶ စ မိတ္တော စ မမာသိ သီဝိက [သီဝက (သီ။ ပီ။)]၊ သုသိက္ခိတော သာဓု ကရောဟိ မေ ဝစော၊
ဥဒ္ဓရိတွာ [ဥဒ္ဓတွ (သီ။)၊ လဒ္ဓ တွံ (ပီ။)] စက္ခူနိ မမံ ဇိဂီသတော၊ ဟတ္ထေသု ဌပေဟိ [အာဝေသိ (သီ။)] ဝနိဗ္ဗကဿ။
စောဒိတော ¶ ¶ သိဝိရာဇေန၊ သိဝိကော ဝစနင်္ကရော၊
ရညော စက္ခူနုဒ္ဓရိတွာ [စက္ခူနိ ဥဒ္ဓတွာ (သီ။ ပီ။)]၊ ဗြာဟ္မဏဿူပနာမယိ၊
သစက္ခု ဗြာဟ္မဏော အာသိ၊ အန္ဓော ရာဇာ ဥပါဝိသိ။
တတော သော ကတိပါဟဿ၊ ဥပရူဠှေသု စက္ခုသု၊
သူတံ အာမန္တယီ ရာဇာ၊ သိဝီနံ ရဋ္ဌဝဍ္ဎနော။
ယောဇေဟိ သာရထိ ယာနံ၊ ယုတ္တဉ္စ ပဋိဝေဒယ၊
ဥယျာနဘူမိံ ဂစ္ဆာမ၊ ပေါက္ခရညော ဝနာနိ စ။
သော စ ပေါက္ခရဏီတီရေ [ပေါက္ခရဏိယာ တီရေ (သီ။ ပီ။)]၊ ပလ္လင်္ကေန ဥပါဝိသိ၊
တဿ သက္ကော ပါတုရဟု၊ ဒေဝရာဇာ သုဇမ္ပတိ။
သက္ကောဟမသ္မိ ဒေဝိန္ဒော၊ အာဂတောသ္မိ တဝန္တိကေ၊
ဝရံ ဝရဿု ရာဇီသိ၊ ယံ ကိဉ္စိ မနသိစ္ဆသိ။
ပဟူတံ မေ ဓနံ သက္က၊ ဗလံ ကောသော စနပ္ပကော၊
အန္ဓဿ မေ သတော ဒါနိ၊ မရဏညေဝ ရုစ္စတိ။
ယာနိ ¶ သစ္စာနိ ဒွိပဒိန္ဒ၊ တာနိ ဘာသဿု ခတ္တိယ၊
သစ္စံ တေ ဘဏမာနဿ၊ ပုန စက္ခု ဘဝိဿတိ။
ယေ မံ ယာစိတုမာယန္တိ၊ နာနာဂေါတ္တာ ဝနိဗ္ဗကာ၊
ယောပိ မံ ယာစတေ တတ္ထ၊ သောပိ မေ မနသော ပိယော၊
ဧတေန သစ္စဝဇ္ဇေန၊ စက္ခု မေ ဥပပဇ္ဇထ။
ယံ မံ သော ယာစိတုံ အာဂါ၊ ဒေဟိ စက္ခုန္တိ ဗြာဟ္မဏော၊
တဿ စက္ခူနိ ပါဒါသိံ၊ ဗြာဟ္မဏဿ ဝနိဗ္ဗတော [ဝဏိဗ္ဗိနော (သီ။)၊ ဝနိဗ္ဗိနော (ပီ။)]။
ဘိယျော မံ အာဝိသီ ပီတိ၊ သောမနဿဉ္စနပ္ပကံ၊
ဧတေန သစ္စဝဇ္ဇေန၊ ဒုတိယံ မေ ဥပပဇ္ဇထ။
ဓမ္မေန ဘာသိတာ ဂါထာ၊ သိဝီနံ ရဋ္ဌဝဍ္ဎန၊
ဧတာနိ တဝ နေတ္တာနိ၊ ဒိဗ္ဗာနိ ပဋိဒိဿရေ။
တိရောကုဋ္ဋံ တိရောသေလံ၊ သမတိဂ္ဂယှ ပဗ္ဗတံ၊
သမန္တာ ယောဇနသတံ၊ ဒဿနံ အနုဘောန္တု တေ။
ကော ¶ နီဓ ဝိတ္တံ န ဒဒေယျ ယာစိတော၊ အပိ ဝိသိဋ္ဌံ သုပိယမ္ပိ အတ္တနော၊
တဒိင်္ဃ သဗ္ဗေ သိဝယော သမာဂတာ၊ ဒိဗ္ဗာနိ နေတ္တာနိ မမဇ္ဇ ပဿထ။
တိရောကုဋ္ဋံ တိရောသေလံ၊ သမတိဂ္ဂယှ ပဗ္ဗတံ၊
သမန္တာ ယောဇနသတံ၊ ဒဿနံ အနုဘောန္တိ မေ။
န ¶ စာဂမတ္တာ ပရမတ္ထိ ကိဉ္စိ၊ မစ္စာနံ ဣဓ ဇီဝိတေ၊
ဒတွာန ¶ မာနုသံ [ဒတွာ မာနုသကံ (သီ။)] စက္ခုံ၊ လဒ္ဓံ မေ [မေ ဣတိ ပဒံ နတ္ထိ သီ။ ပေါတ္ထကေ] စက္ခုံ အမာနုသံ။
ဧတမ္ပိ ဒိသွာ သိဝယော၊ ဒေထ ဒါနာနိ ဘုဉ္ဇထ၊
ဒတွာ စ ဘုတွာ စ ယထာနုဘာဝံ၊ အနိန္ဒိတာ သဂ္ဂမုပေထ ဌာနန္တိ။
သိဝိဇာတကံ တတိယံ။
၅၀၀။ သိရီမန္တဇာတကံ (၄)
ပညာယုပေတံ သိရိယာ ဝိဟီနံ၊ ယသဿိနံ ဝါပိ အပေတပညံ၊
ပုစ္ဆာမိ တံ သေနက ဧတမတ္ထံ၊ ကမေတ္ထ သေယျော ကုသလာ ဝဒန္တိ။
ဓီရာ စ ဗာလာ စ ဟဝေ ဇနိန္ဒ၊ သိပ္ပူပပန္နာ စ အသိပ္ပိနော စ၊
သုဇာတိမန္တောပိ အဇာတိမဿ၊ ယသဿိနော ပေသကရာ [ပေဿကရာ (သီ။ ပီ။)] ဘဝန္တိ၊
ဧတမ္ပိ ဒိသွာန အဟံ ဝဒါမိ၊ ပညော နိဟီနော သိရီမာဝ [သိရိမာဝ (သီ။ သျာ။ ပီ။)] သေယျော။
တုဝမ္ပိ ပုစ္ဆာမိ အနောမပည၊ မဟောသဓ ကေဝလဓမ္မဒဿိ၊
ဗာလံ ယသဿိံ ပဏ္ဍိတံ အပ္ပဘောဂံ၊ ကမေတ္ထ ¶ သေယျော ကုသလာ ဝဒန္တိ။
ပါပါနိ ¶ ကမ္မာနိ ကရောတိ ဗာလော [ကရောန္တိ ဗာလာ (သျာ။ က။)]၊ ဣဓမေဝ [ဣဒမေဝ (သျာ။ က။ အဋ္ဌ။)၊ ဣမမေဝ (က။)] သေယျော ဣတိ မညမာနော [မညမာနာ (သျာ။ က။)]၊
ဣဓလောကဒဿီ ပရလောကမဒဿီ၊ ဥဘယတ္ထ ဗာလော ကလိမဂ္ဂဟေသိ၊
ဧတမ္ပိ ဒိသွာန အဟံ ဝဒါမိ၊ ပညောဝ သေယျော န ယသဿိ ဗာလော။
န သိပ္ပမေတံ ဝိဒဓာတိ ဘောဂံ၊ န ဗန္ဓုဝါ [န ဗန္ဓဝါ (သီ။ သျာ။ က။)] န သရီရဝဏ္ဏော ယော [န သရီရာဝကာသော (သီ။ သျာ။ ပီ။)]၊
ပဿေဠမူဂံ သုခမေဓမာနံ၊ သိရီ ဟိ နံ ဘဇတေ ဂေါရဝိန္ဒံ [ဂေါရိမန္ဒံ (သီ။ ပီ။)]၊
ဧတမ္ပိ ဒိသွာန အဟံ ဝဒါမိ၊ ပညော နိဟီနော သိရီမာဝ သေယျော။
လဒ္ဓါ သုခံ မဇ္ဇတိ အပ္ပပညော၊ ဒုက္ခေန ဖုဋ္ဌောပိ ပမောဟမေတိ၊
အာဂန္တုနာ ဒုက္ခသုခေန ဖုဋ္ဌော၊ ပဝေဓတိ ဝါရိစရောဝ ဃမ္မေ၊
ဧတမ္ပိ ဒိသွာန အဟံ ဝဒါမိ၊ ပညောဝ သေယျော န ယသဿိ ဗာလော။
ဒုမံ ယထာ သာဒုဖလံ အရညေ၊ သမန္တတော ¶ သမဘိသရန္တိ [သမဘိစရန္တိ (သီ။ ပီ။)] ပက္ခီ၊
ဧဝမ္ပိ အဍ္ဎံ သဓနံ သဘောဂံ၊ ဗဟုဇ္ဇနော ဘဇတိ အတ္ထဟေတု၊
ဧတမ္ပိ ဒိသွာန အဟံ ဝဒါမိ၊ ပညော နိဟီနော သိရီမာဝ သေယျော။
န သာဓု ဗလဝါ ဗာလော၊ သာဟသာ ဝိန္ဒတေ ဓနံ၊
ကန္ဒန္တမေတံ ဒုမ္မေဓံ၊ ကဍ္ဎန္တိ နိရယံ ဘုသံ၊
ဧတမ္ပိ ဒိသွာန အဟံ ဝဒါမိ၊ ပညောဝ သေယျော န ယသဿိ ဗာလော။
ယာ ¶ ¶ ကာစိ နဇ္ဇော ဂင်္ဂမဘိဿဝန္တိ၊ သဗ္ဗာဝ တာ နာမဂေါတ္တံ ဇဟန္တိ၊
ဂင်္ဂါ သမုဒ္ဒံ ပဋိပဇ္ဇမာနာ၊ န ခါယတေ ဣဒ္ဓိံ ပညောပိ လောကေ [ဣဒ္ဓိပရော ဟိ လောကေ (က။ သီ။ သျာ။)၊ ဣဒ္ဓိပရော ဟိ လောကော (သီ။ ပီ။ အဋ္ဌ။)]၊
ဧတမ္ပိ ဒိသွာန အဟံ ဝဒါမိ၊ ပညော နိဟီနော သိရီမာဝ သေယျော။
ယမေတမက္ခာ ဥဒဓိံ မဟန္တံ၊ သဝန္တိ နဇ္ဇော သဗ္ဗကာလမသင်္ချံ၊
သော သာဂရော နိစ္စမုဠာရဝေဂေါ၊ ဝေလံ န အစ္စေတိ မဟာသမုဒ္ဒေါ။
ဧဝမ္ပိ ¶ ဗာလဿ ပဇပ္ပိတာနိ၊ ပညံ န အစ္စေတိ သိရီ ကဒါစိ၊
ဧတမ္ပိ ဒိသွာန အဟံ ဝဒါမိ၊ ပညောဝ သေယျော န ယသဿိ ဗာလော။
အသညတော စေပိ ပရေသမတ္ထံ၊ ဘဏာတိ သန္ဓာနဂတော [သဏ္ဌာနဂတော (သျာ။ ပီ။)၊ သန္ထာနဂတော (သီ။)] ယသဿီ၊
တဿေဝ တံ ရူဟတိ ဉာတိမဇ္ဈေ၊ သိရီ ဟိ နံ [သိရိဟီနံ (သီ။ က။)၊ သိရီဟီနံ (သျာ။ ပီ။)] ကာရယတေ န ပညာ [န ပညော (သီ။)၊ န ပညံ (သျာ။ က။)]၊
ဧတမ္ပိ ဒိသွာန အဟံ ဝဒါမိ၊ ပညော နိဟီနော သိရီမာဝ သေယျော။
ပရဿ ဝါ အတ္တနော ဝါပိ ဟေတု၊ ဗာလော မုသာ ဘာသတိ အပ္ပပညော၊
သော နိန္ဒိတော ဟောတိ သဘာယ မဇ္ဈေ၊ ပစ္ဆာပိ [ပေစ္စမ္ပိ (သီ။ ပီ။)၊ ပေစ္စာပိ (?)] သော ဒုဂ္ဂတိဂါမီ ဟောတိ၊
ဧတမ္ပိ ဒိသွာန အဟံ ဝဒါမိ၊ ပညောဝ သေယျော န ယသဿိ ဗာလော။
အတ္ထမ္ပိ ¶ စေ ဘာသတိ ဘူရိပညော၊ အနာဠှိယော [အနာလယော (ပီ။)] အပ္ပဓနော ဒလိဒ္ဒေါ၊
န တဿ တံ ရူဟတိ ဉာတိမဇ္ဈေ၊ သိရီ ¶ စ ပညာဏဝတော န ဟောတိ၊
ဧတမ္ပိ ဒိသွာန အဟံ ဝဒါမိ၊ ပညော နိဟီနော သိရီမာဝ သေယျော။
ပရဿ ဝါ အတ္တနော ဝါပိ ဟေတု၊ န ဘာသတိ အလိကံ ဘူရိပညော၊
သော ပူဇိတော ဟောတိ သဘာယ မဇ္ဈေ၊ ပစ္ဆာပိ သော သုဂ္ဂတိဂါမီ ဟောတိ၊
ဧတမ္ပိ ဒိသွာန အဟံ ဝဒါမိ၊ ပညောဝ သေယျော န ယသဿိ ဗာလော။
ဟတ္ထီ ဂဝဿာ မဏိကုဏ္ဍလာ စ၊ ထိယော စ ဣဒ္ဓေသု ကုလေသု ဇာတာ၊
သဗ္ဗာဝ တာ ဥပဘောဂါ ဘဝန္တိ၊ ဣဒ္ဓဿ ပေါသဿ အနိဒ္ဓိမန္တော၊
ဧတမ္ပိ ဒိသွာန အဟံ ဝဒါမိ၊ ပညော နိဟီနော သိရီမာဝ သေယျော။
အသံဝိဟိတကမ္မန္တံ၊ ဗာလံ ဒုမ္မေဓမန္တိနံ၊
သိရီ ဇဟတိ ဒုမ္မေဓံ၊ ဇိဏ္ဏံဝ ဥရဂေါ တစံ၊
ဧတမ္ပိ ဒိသွာန အဟံ ဝဒါမိ၊ ပညောဝ သေယျော န ယသဿိ ဗာလော။
ပဉ္စ ပဏ္ဍိတာ မယံ ဘဒ္ဒန္တေ၊ သဗ္ဗေ ¶ ပဉ္ဇလိကာ ဥပဋ္ဌိတာ၊
တွံ နော အဘိဘုယျ ဣဿရောသိ၊ သက္ကောဝ ဘူတပတိ ဒေဝရာဇာ၊
ဧတမ္ပိ ဒိသွာန အဟံ ဝဒါမိ၊ ပညော နိဟီနော သိရီမာဝ သေယျော။
ဒါသောဝ ¶ ¶ ပညဿ ယသဿိ ဗာလော၊ အတ္ထေသု ဇာတေသု တထာဝိဓေသု၊
ယံ ပဏ္ဍိတော နိပုဏံ သံဝိဓေတိ၊ သမ္မောဟမာပဇ္ဇတိ တတ္ထ ဗာလော၊
ဧတမ္ပိ ဒိသွာန အဟံ ဝဒါမိ၊ ပညောဝ သေယျော န ယသဿိ ဗာလော။
အဒ္ဓါ ဟိ ပညာဝ သတံ ပသတ္ထာ၊ ကန္တာ သိရီ ဘောဂရတာ မနုဿာ၊
ဉာဏဉ္စ ဗုဒ္ဓါနမတုလျရူပံ၊ ပညံ န အစ္စေတိ သိရီ ကဒါစိ။
ယံ တံ အပုစ္ဆိမှ အကိတ္တယီ နော၊ မဟောသဓ ကေဝလဓမ္မဒဿီ၊
ဂဝံ သဟဿံ ဥသဘဉ္စ နာဂံ၊ အာဇညယုတ္တေ စ ရထေ ဒသ ဣမေ၊
ပဉှဿ ဝေယျာကရဏေန တုဋ္ဌော၊ ဒဒါမိ ¶ တေ ဂါမဝရာနိ သောဠသာတိ။
သိရီမန္တဇာတကံ [သိရိမန္ဒဇာတကံ (သီ။ သျာ။ ပီ။)] စတုတ္ထံ။
၅၀၁။ ရောဟဏမိဂဇာတကံ (၅)
ဧတေ ယူထာ ပတိယန္တိ၊ ဘီတာ မရဏဿ [မရဏာ (သျာ။ ပီ။)၊ မရဏ (က။)] စိတ္တက၊
ဂစ္ဆ တုဝမ္ပိ မာကင်္ခိ၊ ဇီဝိဿန္တိ တယာ သဟ။
နာဟံ ရောဟဏ [ရောဟန္တ (သီ။ ပီ။)၊ ရောဟန (သျာ။)] ဂစ္ဆာမိ၊ ဟဒယံ မေ အဝကဿတိ၊
န တံ အဟံ ဇဟိဿာမိ၊ ဣဓ ဟိဿာမိ ဇီဝိတံ။
တေ ဟိ နူန မရိဿန္တိ၊ အန္ဓာ အပရိဏာယကာ၊
ဂစ္ဆ တုဝမ္ပိ မာကင်္ခိ၊ ဇီဝိဿန္တိ တယာ သဟ။
နာဟံ ရောဟဏ ဂစ္ဆာမိ၊ ဟဒယံ မေ အဝကဿတိ၊
န တံ ဗဒ္ဓံ [ဗန္ဓံ (က။)] ဇဟိဿာမိ၊ ဣဓ ဟိဿာမိ ဇီဝိတံ။
ဂစ္ဆ ¶ ဘီရု ပလာယဿု၊ ကူဋေ ဗဒ္ဓါသ္မိ အာယသေ၊
ဂစ္ဆ တုဝမ္ပိ မာကင်္ခိ၊ ဇီဝိဿန္တိ တယာ သဟ။
နာဟံ ရောဟဏ ဂစ္ဆာမိ၊ ဟဒယံ မေ အဝကဿတိ၊
န တံ အဟံ ဇဟိဿာမိ၊ ဣဓ ဟိဿာမိ ဇီဝိတံ။
တေ ဟိ နူန မရိဿန္တိ၊ အန္ဓာ အပရိဏာယကာ၊
ဂစ္ဆ တုဝမ္ပိ မာကင်္ခိ၊ ဇီဝိဿန္တိ တယာ သဟ။
နာဟံ ရောဟဏ ဂစ္ဆာမိ၊ ဟဒယံ မေ အဝကဿတိ၊
န ¶ တံ ဗဒ္ဓံ ဇဟိဿာမိ၊ ဣဓ ဟိဿာမိ ဇီဝိတံ။
အယံ သော လုဒ္ဒကော ဧတိ၊ လုဒ္ဒရူပေါ [ရုဒ္ဒရူပေါ (သီ။ ပီ။)] သဟာဝုဓော၊
ယော နော ဝဓိဿတိ အဇ္ဇ၊ ဥသုနာ သတ္တိယာ အပိ [မပိ (သီ။ သျာ။ ပီ။)]။
သာ ¶ မုဟုတ္တံ ပလာယိတွာ၊ ဘယဋ္ဋာ [ဘယဋ္ဌာ (ပီ။)] ဘယတဇ္ဇိတာ၊
သုဒုက္ကရံ အကရာ ဘီရု၊ မရဏာယူပနိဝတ္တထ။
ကိန္နု တေမေ မိဂါ ဟောန္တိ၊ မုတ္တာ ဗဒ္ဓံ ဥပါသရေ၊
န တံ စဇိတုမိစ္ဆန္တိ၊ ဇီဝိတဿပိ ကာရဏာ။
ဘာတရော ဟောန္တိ မေ လုဒ္ဒ၊ သောဒရိယာ ဧကမာတုကာ၊
န မံ စဇိတုမိစ္ဆန္တိ၊ ဇီဝိတဿပိ ကာရဏာ။
တေ ဟိ နူန မရိဿန္တိ၊ အန္ဓာ အပရိဏာယကာ၊
ပဉ္စန္နံ ဇီဝိတံ ဒေဟိ၊ ဘာတရံ မုဉ္စ လုဒ္ဒက။
သော ဝေါ အဟံ ပမောက္ခာမိ၊ မာတာပေတ္တိဘရံ မိဂံ၊
နန္ဒန္တု မာတာပိတရော၊ မုတ္တံ ဒိသွာ မဟာမိဂံ။
ဧဝံ လုဒ္ဒက နန္ဒဿု၊ သဟ သဗ္ဗေဟိ ဉာတိဘိ၊
ယထာဟမဇ္ဇ နန္ဒာမိ၊ မုတ္တံ ဒိသွာ မဟာမိဂံ။
ကထံ တွံ ပမောက္ခော [ကထံ ပမောက္ခော (သီ။ ပီ။)၊ ကထံ တေ ပရောက္ခော (?)] အာသိ၊ ဥပနီတသ္မိ ဇီဝိတေ၊
ကထံ ပုတ္တ အမောစေသိ၊ ကူဋပါသမှ လုဒ္ဒကော။
ဘဏံ ကဏ္ဏသုခံ ဝါစံ၊ ဟဒယင်္ဂံ ဟဒယဿိတံ၊
သုဘာသိတာဟိ ဝါစာဟိ၊ စိတ္တကော မံ အမောစယိ။
ဘဏံ ¶ ကဏ္ဏသုခံ ဝါစံ၊ ဟဒယင်္ဂံ ဟဒယဿိတံ၊
သုဘာသိတာဟိ ¶ ဝါစာဟိ၊ သုတနာ မံ အမောစယိ။
သုတွာ ကဏ္ဏသုခံ ဝါစံ၊ ဟဒယင်္ဂံ ဟဒယဿိတံ၊
သုဘာသိတာနိ သုတွာန၊ လုဒ္ဒကော မံ အမောစယိ။
ဧဝံ အာနန္ဒိတော ဟောတု၊ သဟ ဒါရေဟိ လုဒ္ဒကော၊
ယထာ မယဇ္ဇ နန္ဒာမ၊ ဒိသွာ ရောဟဏမာဂတံ။
နနု တွံ အဝစ [အဝစာ (သီ။ ပီ။)] လုဒ္ဒ၊ ‘‘မိဂစမ္မာနိ အာဟရိံ’’၊
အထ ကေန နု ဝဏ္ဏေန၊ မိဂစမ္မာနိ နာဟရိ။
အာဂမာ စေဝ ဟတ္ထတ္ထံ၊ ကူဋပါသဉ္စ သော မိဂေါ၊
အဗဇ္ဈိ တံ [အဗဇ္ဈိ တဉ္စ (ပီ။)] မိဂရာဇံ၊ တဉ္စ မုတ္တာ ဥပါသရေ။
တဿ မေ အဟု သံဝေဂေါ၊ အဗ္ဘုတော လောမဟံသနော၊
ဣမဉ္စာဟံ မိဂံ ဟညေ၊ အဇ္ဇ ဟိဿာမိ ဇီဝိတံ။
ကီဒိသာ တေ မိဂါ လုဒ္ဒ၊ ကီဒိသာ ဓမ္မိကာ မိဂါ၊
ကထံဝဏ္ဏာ ကထံသီလာ၊ ဗာဠှံ ခေါ နေ ပသံသသိ။
ဩဒါတသိင်္ဂါ ¶ သုစိဝါဠာ၊ ဇာတရူပတစူပမာ၊
ပါဒါ လောဟိတကာ တေသံ၊ အဉ္ဇိတက္ခာ မနောရမာ။
ဧဒိသာ တေ မိဂါ ဒေဝ၊ ဧဒိသာ ဓမ္မိကာ မိဂါ၊
မာတာပေတ္တိဘရာ ဒေဝ၊ န တေ သော အဘိဟာရိတုံ [အဘိဟာရယုံ (က။ သီ။)၊ အဘိဟာရယိံ (သျာ။)၊ အဘိဟာရယံ (ပီ။)]။
ဒမ္မိ နိက္ခသတံ လုဒ္ဒ၊ ထူလဉ္စ မဏိကုဏ္ဍလံ၊
စတုဿဒဉ္စ [စတုရဿဉ္စ (သျာ။ က။)] ပလ္လင်္ကံ၊ ဥမာပုပ္ဖသရိန္နိဘံ [ဥမ္မာပုပ္ဖသိရိန္နိဘံ (သီ။ သျာ။ ပီ။ က။)]။
ဒွေ ¶ စ သာဒိသိယော ဘရိယာ၊ ဥသဘဉ္စ ဂဝံ သတံ၊
ဓမ္မေန ရဇ္ဇံ ကာရေဿံ၊ ဗဟုကာရော မေသိ လုဒ္ဒက။
ကသိဝါဏိဇ္ဇာ [ကသီ ဝဏိဇ္ဇာ (သီ။ သျာ။ ပီ။)] ဣဏဒါနံ၊ ဥဉ္ဆာစရိယာ စ လုဒ္ဒက၊
ဧတေန ဒါရံ ပေါသေဟိ၊ မာ ပါပံ အကရီ ပုနာတိ [အကရာ ပုနန္တိ (က။ သီ။ ပီ။)]။
ရောဟဏမိဂဇာတကံ [ရောဟန္တမိဂဇာတကံ (သီ။ ပီ။)] ပဉ္စမံ။
၅၀၂။ စူဠဟံသဇာတကံ (၆)
ဧတေ ¶ ဟံသာ ပက္ကမန္တိ၊ ဝက္ကင်္ဂါ ဘယမေရိတာ၊
ဟရိတ္တစ ဟေမဝဏ္ဏ၊ ကာမံ သုမုခ ပက္ကမ။
ဩဟာယ မံ ဉာတိဂဏာ၊ ဧကံ ပါသဝသံ ဂတံ၊
အနပေက္ခမာနာ [နာပေက္ခမာနာ (က။)] ဂစ္ဆန္တိ၊ ကိံ ဧသော အဝဟိယျသိ။
ပတေဝ ပတတံ သေဋ္ဌ၊ နတ္ထိ ဗဒ္ဓေ သဟာယတာ [သဟာယကာ (သျာ။)]၊
မာ အနီဃာယ ဟာပေသိ၊ ကာမံ သုမုခ ပက္ကမ။
နာဟံ ‘‘ဒုက္ခပရေတော’’တိ [ဒုက္ခပရေတောပိ (က။)]၊ ဓတရဋ္ဌ တုဝံ [တဝံ (သီ။ ပီ။)] ဇဟေ၊
ဇီဝိတံ မရဏံ ဝါ မေ၊ တယာ သဒ္ဓိံ ဘဝိဿတိ။
ဧတဒရိယဿ ကလျာဏံ၊ ယံ တွံ သုမုခ ဘာသသိ၊
တဉ္စ ဝီမံသမာနောဟံ၊ ‘‘ပတတေတံ’’ အဝဿဇိံ။
အပဒေန ပဒံ ယာတိ၊ အန္တလိက္ခစရော [အန္တလိက္ခေ စရော (သီ။ ပီ။)] ဒိဇော၊
အာရာ ပါသံ န ဗုဇ္ဈိ တွံ၊ ဟံသာနံ ပဝရုတ္တမ [ပဝရုတ္တမော (က။ သီ။ ပီ။)]။
ယဒါ ပရာဘဝေါ ဟောတိ၊ ပေါသော ဇီဝိတသင်္ခယေ၊
အထ ¶ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈတိ။
ဧတေ ဟံသာ ပက္ကမန္တိ၊ ဝက္ကင်္ဂါ ဘယမေရိတာ၊
ဟရိတ္တစ ဟေမဝဏ္ဏ၊ တွညေဝ [တွဉ္စ တံ (သီ။)၊ တွဉ္စ (ပီ။)] အဝဟိယျသိ။
ဧတေ ¶ ဘုတွာ စ ပိတွာ စ၊ ပက္ကမန္တိ ဝိဟင်္ဂမာ၊
အနပေက္ခမာနာ ဝက္ကင်္ဂါ၊ တွညေဝေကော ဥပါသသိ။
ကိန္နု တျာယံ [တာယံ (သီ။ သျာ။ ပီ။)] ဒိဇော ဟောတိ၊ မုတ္တော ဗဒ္ဓံ ဥပါသသိ၊
ဩဟာယ သကုဏာ ယန္တိ၊ ကိံ ဧကော အဝဟိယျသိ။
ရာဇာ မေ သော ဒိဇော မိတ္တော၊ သခါ ပါဏသမော စ မေ၊
နေဝ နံ ဝိဇဟိဿာမိ၊ ယာဝ ကာလဿ ပရိယာယံ။
ယော စ တွံ သခိနော ဟေတု၊ ပါဏံ စဇိတုမိစ္ဆသိ၊
သော တေ သဟာယံ မုဉ္စာမိ၊ ဟောတု ရာဇာ တဝါနုဂေါ။
ဧဝံ ¶ လုဒ္ဒက နန္ဒဿု၊ သဟ သဗ္ဗေဟိ ဉာတိဘိ၊
ယထာဟမဇ္ဇ နန္ဒာမိ၊ ဒိသွာ မုတ္တံ ဒိဇာဓိပံ။
ကစ္စိန္နု ဘောတော ကုသလံ၊ ကစ္စိ ဘောတော အနာမယံ၊
ကစ္စိ ရဋ္ဌမိဒံ ဖီတံ၊ ဓမ္မေန မနုသာသသိ။
ကုသလဉ္စေဝ မေ ဟံသ၊ အထော ဟံသ အနာမယံ၊
အထော ရဋ္ဌမိဒံ ဖီတံ၊ ဓမ္မေန မနုသာသဟံ။
ကစ္စိ ဘောတော အမစ္စေသု၊ ဒေါသော ကောစိ န ဝိဇ္ဇတိ၊
ကစ္စိ အာရာ အမိတ္တာ တေ၊ ဆာယာ ဒက္ခိဏတောရိဝ။
အထောပိ မေ အမစ္စေသု၊ ဒေါသော ကောစိ န ဝိဇ္ဇတိ၊
အထော ¶ အာရာ အမိတ္တာ မေ၊ ဆာယာ ဒက္ခိဏတောရိဝ။
ကစ္စိ တေ သာဒိသီ ဘရိယာ၊ အဿဝါ ပိယဘာဏိနီ၊
ပုတ္တရူပယသူပေတာ၊ တဝ ဆန္ဒဝသာနုဂါ။
အထော မေ သာဒိသီ ဘရိယာ၊ အဿဝါ ပိယဘာဏိနီ၊
ပုတ္တရူပယသူပေတာ၊ မမ ဆန္ဒဝသာနုဂါ။
ကစ္စိ တေ ဗဟဝေါ ပုတ္တာ၊ သုဇာတာ ရဋ္ဌဝဍ္ဎန၊
ပညာဇဝေန သမ္ပန္နာ၊ သမ္မောဒန္တိ တတော တတော။
သတမေကော စ မေ ပုတ္တာ၊ ဓတရဋ္ဌ မယာ သုတာ၊
တေသံ တွံ ကိစ္စမက္ခာဟိ၊ နာဝရုဇ္ဈန္တိ [နာဝရဇ္ဈန္တိ (က။ သီ။ ပီ။)] တေ ဝစော။
ဥပပန္နောပိ စေ ဟောတိ၊ ဇာတိယာ ဝိနယေန ဝါ၊
အထ ပစ္ဆာ ကုရုတေ ယောဂံ၊ ကိစ္ဆေ [ကိစ္စေ (သီ။ သျာ။ ပီ။)] အာပါသု [အာဝါသု (သျာ။)၊ အာပဒါသု (က။)] သီဒတိ။
တဿ သံဟီရပညဿ၊ ဝိဝရော ဇာယတေ မဟာ၊
ရတ္တိမန္ဓောဝ [နတ္တမန္ဓောဝ (သီ။ ပီ။)] ရူပါနိ၊ ထူလာနိ မနုပဿတိ။
အသာရေ ¶ သာရယောဂညူ၊ မတိံ န တွေဝ ဝိန္ဒတိ၊
သရဘောဝ ဂိရိဒုဂ္ဂသ္မိံ၊ အန္တရာယေဝ သီဒတိ။
ဟီနဇစ္စောပိ စေ ဟောတိ၊ ဥဋ္ဌာတာ ဓိတိမာ နရော၊
အာစာရသီလသမ္ပန္နော၊ နိသေ အဂ္ဂီဝ ဘာသတိ။
ဧတံ ¶ မေ ဥပမံ ကတွာ၊ ပုတ္တေ ဝိဇ္ဇာသု ဝါစယ [ဌာပသ (သျာ။ က။)]၊
သံဝိရူဠှေထ မေဓာဝီ၊ ခေတ္တေ ဗီဇံဝ [ခေတ္တဗီဇံဝ (သီ။ ပီ။)] ဝုဋ္ဌိယာတိ။
စူဠဟံသဇာတကံ ဆဋ္ဌံ။
၅၀၃။ သတ္တိဂုမ္ဗဇာတကံ (၇)
မိဂလုဒ္ဒေါ ¶ မဟာရာဇာ၊ ပဉ္စာလာနံ ရထေသဘော၊
နိက္ခန္တော သဟ သေနာယ၊ ဩဂဏော ဝနမာဂမာ။
တတ္ထဒ္ဒသာ အရညသ္မိံ၊ တက္ကရာနံ ကုဋိံ ကတံ၊
တဿာ [တသ္မာ (သျာ။ ပီ။ က။)] ကုဋိယာ နိက္ခမ္မ၊ သုဝေါ လုဒ္ဒါနိ ဘာသတိ။
သမ္ပန္နဝါဟနော ပေါသော၊ ယုဝါ သမ္မဋ္ဌကုဏ္ဍလော [ကုဏ္ဍလီ (သျာ။ က။)]၊
သောဘတိ လောဟိတုဏှီသော၊ ဒိဝါ သူရိယောဝ ဘာသတိ။
မဇ္ဈနှိကေ [မဇ္ဈန္တိကေ (သဗ္ဗတ္ထ)] သမ္ပတိကေ၊ သုတ္တော ရာဇာ သသာရထိ၊
ဟန္ဒဿာဘရဏံ သဗ္ဗံ၊ ဂဏှာမ သာဟသာ [သဟသာ (သီ။ သျာ။ ပီ။)] မယံ။
နိသီထေပိ ရဟော ဒါနိ၊ သုတ္တော ရာဇာ သသာရထိ၊
အာဒါယ ဝတ္ထံ မဏိကုဏ္ဍလဉ္စ၊ ဟန္တွာန သာခါဟိ အဝတ္ထရာမ။
ကိန္နု ဥမ္မတ္တရူပေါဝ၊ သတ္တိဂုမ္ဗ ပဘာသသိ၊
ဒုရာသဒါ ဟိ ရာဇာနော၊ အဂ္ဂိ ပဇ္ဇလိတော ယထာ။
အထ တွံ ပတိကောလမ္ဗ၊ မတ္တော ထုလ္လာနိ ဂဇ္ဇသိ၊
မာတရိ မယှံ နဂ္ဂါယ၊ ကိန္နု တွံ ဝိဇိဂုစ္ဆသေ။
ဥဋ္ဌေဟိ သမ္မ တရမာနော၊ ရထံ ယောဇေဟိ သာရထိ၊
သကုဏော မေ န ရုစ္စတိ၊ အညံ ဂစ္ဆာမ အဿမံ။
ယုတ္တော ရထော မဟာရာဇ၊ ယုတ္တော စ ဗလဝါဟနော၊
အဓိတိဋ္ဌ မဟာရာဇ၊ အညံ ဂစ္ဆာမ အဿမံ။
ကော ¶ နုမေဝ ဂတာ [ကွ နု’မေ’ပဂတာ (?)] သဗ္ဗေ၊ ယေ အသ္မိံ ပရိစာရကာ၊
ဧသ ဂစ္ဆတိ ပဉ္စာလော၊ မုတ္တော တေသံ အဒဿနာ။
ကောဒဏ္ဍကာနိ ¶ ¶ ဂဏှထ၊ သတ္တိယော တောမရာနိ စ၊
ဧသ ဂစ္ဆတိ ပဉ္စာလော၊ မာ ဝေါ မုဉ္စိတ္ထ ဇီဝတံ [ဇီဝိတံ (ဗဟူသု)]။
အထာပရော ပဋိနန္ဒိတ္ထ၊ သုဝေါ လောဟိတတုဏ္ဍကော၊
သွာဂတံ တေ မဟာရာဇ၊ အထော တေ အဒုရာဂတံ၊
ဣဿရောသိ အနုပ္ပတ္တော၊ ယံ ဣဓတ္ထိ ပဝေဒယ။
တိန္ဒုကာနိ ပိယာလာနိ၊ မဓုကေ ကာသုမာရိယော၊
ဖလာနိ ခုဒ္ဒကပ္ပာနိ၊ ဘုဉ္ဇ ရာဇ ဝရံ ဝရံ။
ဣဒမ္ပိ ပါနီယံ သီတံ၊ အာဘတံ ဂိရိဂဗ္ဘရာ၊
တတော ပိဝ မဟာရာဇ၊ သစေ တွံ အဘိကင်္ခသိ။
အရညံ ဥဉ္ဆာယ ဂတာ၊ ယေ အသ္မိံ ပရိစာရကာ၊
သယံ ဥဋ္ဌာယ ဂဏှဝှော၊ ဟတ္ထာ မေ နတ္ထိ ဒါတဝေ။
ဘဒ္ဒကော ဝတယံ ပက္ခီ၊ ဒိဇော ပရမဓမ္မိကော၊
အထေသော ဣတရော ပက္ခီ၊ သုဝေါ လုဒ္ဒါနိ ဘာသတိ။
‘‘ဧတံ ဟနထ ဗန္ဓထ၊ မာ ဝေါ မုဉ္စိတ္ထ ဇီဝတံ’’၊
ဣစ္စေဝံ ဝိလပန္တဿ၊ သောတ္ထိံ [သောတ္ထီ (သျာ။)] ပတ္တောသ္မိ အဿမံ။
ဘာတရောသ္မ မဟာရာဇ၊ သောဒရိယာ ဧကမာတုကာ၊
ဧကရုက္ခသ္မိံ သံဝဍ္ဎာ၊ နာနာခေတ္တဂတာ ဥဘော။
သတ္တိဂုမ္ဗော စ စောရာနံ၊ အဟဉ္စ ဣသီနံ ဣဓ၊
အသတံ ¶ သော၊ သတံ အဟံ၊ တေန ဓမ္မေန နော ဝိနာ။
တတ္ထ ဝဓော စ ဗန္ဓော စ၊ နိကတီ ဝဉ္စနာနိ စ၊
အာလောပါ သာဟသာကာရာ၊ တာနိ သော တတ္ထ သိက္ခတိ။
ဣဓ သစ္စဉ္စ ဓမ္မော စ၊ အဟိံသာ သံယမော ဒမော၊
အာသနူဒကဒါယီနံ၊ အင်္ကေ ဝဒ္ဓါသ္မိ ဘာရဓ [ဘာရတ (သီ။ သျာ။ ပီ။)]။
ယံ ယဉှိ ရာဇ ဘဇတိ၊ သန္တံ ဝါ ယဒိ ဝါ အသံ၊
သီလဝန္တံ ဝိသီလံ ဝါ၊ ဝသံ တဿေဝ ဂစ္ဆတိ။
ယာဒိသံ ကုရုတေ မိတ္တံ၊ ယာဒိသံ စူပသေဝတိ၊
သောပိ တာဒိသကော ဟောတိ၊ သဟဝါသော ဟိ [သဟဝါသောပိ (သျာ။ က။)] တာဒိသော။
သေဝမာနော ¶ သေဝမာနံ၊ သမ္ဖုဋ္ဌော သမ္ဖုသံ ပရံ၊
သရော ဒိဒ္ဓါ ကလာပံဝ၊ အလိတ္တမုပလိမ္ပတိ၊
ဥပလေပဘယာ [ဥပလိမ္ပဘယာ (သျာ။ က။)] ဓီရော၊ နေဝ ပါပသခါ သိယာ။
ပူတိမစ္ဆံ ¶ ကုသဂ္ဂေန၊ ယော နရော ဥပနယှတိ၊
ကုသာပိ ပူတိ [ပူတီ (သီ။ ပီ။)] ဝါယန္တိ၊ ဧဝံ ဗာလူပသေဝနာ။
တဂရဉ္စ ပလာသေန၊ ယော နရော ဥပနယှတိ၊
ပတ္တာပိ သုရဘိ [သုရဘီ (သီ။ သျာ။ ပီ။)] ဝါယန္တိ၊ ဧဝံ ဓီရူပသေဝနာ။
တသ္မာ ပတ္တပုဋဿေဝ [ဖလပုဋဿေဝ (သီ။ ပီ။)၊ ပလပုဋဿေဝ (က။ အဋ္ဌ။)၊ ပလာသပုဋဿေဝ (သျာ။ က။)]၊ ဉတွာ သမ္ပာကမတ္တနော၊
အသန္တေ နောပသေဝေယျ၊ သန္တေ သေဝေယျ ပဏ္ဍိတော၊
အသန္တော နိရယံ နေန္တိ၊ သန္တော ပါပေန္တိ သုဂ္ဂတိန္တိ။
သတ္တိဂုမ္ဗဇာတကံ သတ္တမံ။
၅၀၄။ ဘလ္လာတိယဇာတကံ (၈)
ဘလ္လာတိယော ¶ [ဘလ္လာဋိယော (သီ။ ပီ။)] နာမ အဟောသိ ရာဇာ၊ ရဋ္ဌံ ပဟာယ မိဂဝံ အစာရိ သော၊
အဂမာ ဂိရိဝရံ ဂန္ဓမာဒနံ၊ သုပုပ္ဖိတံ [သမ္ပုပ္ဖိတံ (သီ။ ပီ။)] ကိမ္ပုရိသာနုစိဏ္ဏံ။
သာဠူရသင်္ဃဉ္စ နိသေဓယိတွာ၊ ဓနုံ [ဓနု (သီ။ သျာ။ ပီ။)] ကလာပဉ္စ သော နိက္ခိပိတွာ၊
ဥပါဂမိ ဝစနံ ဝတ္တုကာမော၊ ယတ္ထဋ္ဌိတာ ကိမ္ပုရိသာ အဟေသုံ။
ဟိမစ္စယေ ဟေမဝတာယ တီရေ၊ ကိမိဓဋ္ဌိတာ မန္တယဝှော အဘိဏှံ၊
ပုစ္ဆာမိ ဝေါ မာနုသဒေဟဝဏ္ဏေ၊ ကထံ နု [ကထံ ဝေါ (သီ။ သျာ။ ပီ။)] ဇာနန္တိ မနုဿလောကေ။
မလ္လံ ¶ ဂိရိံ ပဏ္ဍရကံ တိကူဋံ၊ သီတောဒကာ [သီတောဒိယာ (သီ။ ပီ။)၊ သီတောဒိကာ (?)] အနုဝိစရာမ နဇ္ဇော၊
မိဂါ မနုဿာဝ နိဘာသဝဏ္ဏာ၊ ဇာနန္တိ နော ကိမ္ပုရိသာတိ လုဒ္ဒ။
သုကိစ္ဆရူပံ ပရိဒေဝယဝှော [ပရိဒေဝထဝှော (?) မောဂ္ဂလ္လာနဗျာကရဏေ ၆။၃၈ သုတ္တံ]၊ အာလိင်္ဂိတော စာသိ ပိယော ပိယာယ၊
ပုစ္ဆာမိ ဝေါ မာနုသဒေဟဝဏ္ဏေ၊ ကိမိဓ ဝနေ ရောဒထ အပ္ပတီတာ။
သုကိစ္ဆရူပံ ပရိဒေဝယဝှော၊ အာလိင်္ဂိတော စာသိ ပိယော ပိယာယ၊
ပုစ္ဆာမိ ဝေါ မာနုသဒေဟဝဏ္ဏေ၊ ကိမိဓ ဝနေ ဝိလပထ အပ္ပတီတာ။
သုကိစ္ဆရူပံ ပရိဒေဝယဝှော၊ အာလိင်္ဂိတော စာသိ ပိယော ပိယာယ၊
ပုစ္ဆာမိ ဝေါ မာနုသဒေဟဝဏ္ဏေ၊ ကိမိဓ ¶ ဝနေ သောစထ အပ္ပတီတာ။
မယေကရတ္တံ [ရတ္တိံ (ပီ။)] ဝိပ္ပဝသိမှ လုဒ္ဒ၊ အကာမကာ အညမညံ သရန္တာ၊
တမေကရတ္တံ အနုတပ္ပမာနာ၊ သောစာမ ‘‘သာ ရတ္တိ ပုနံ န ဟေဿတိ’’။
ယမေကရတ္တံ အနုတပ္ပထေတံ၊ ဓနံ ဝ နဋ္ဌံ ပိတရံ ဝ ပေတံ၊
ပုစ္ဆာမိ ဝေါ မာနုသဒေဟဝဏ္ဏေ၊ ကထံ ဝိနာ ဝါသမကပ္ပယိတ္ထ။
ယမိမံ ¶ [ယယိမံ (က။ သီ။)] နဒိံ ပဿသိ သီဃသောတံ၊ နာနာဒုမစ္ဆာဒနံ သေလကူလံ [ဒုမစ္ဆဒနံ သေလကူဋံ (သီ။ ပီ။)၊ ဒုမသဉ္ဆန္နံ သေလကူလံ (က။)]၊
တံ မေ ပိယော ဥတ္တရိ ဝဿကာလေ၊ မမဉ္စ ¶ မညံ အနုဗန္ဓတီတိ။
အဟဉ္စ ¶ အင်္ကောလကမောစိနာမိ၊ အတိမုတ္တကံ သတ္တလိယောထိကဉ္စ၊
‘‘ပိယော စ မေ ဟေဟိတိ မာလဘာရီ၊ အဟဉ္စ နံ မာလိနီ အဇ္ဈုပေဿံ’’။
အဟဉ္စိဒံ ကုရဝကမောစိနာမိ၊ ဥဒ္ဒါလကာ ပါဋလိသိန္ဓုဝါရကာ [သိန္ဓုဝါရိတာ (သျာ။ ပီ။ က။)]၊
‘‘ပိယော စ မေ ဟေဟိတိ မာလဘာရီ၊ အဟဉ္စ နံ မာလိနီ အဇ္ဈုပေဿံ’’။
အဟဉ္စ သာလဿ သုပုပ္ဖိတဿ၊ ဩစေယျ ပုပ္ဖာနိ ကရောမိ မာလံ၊
‘‘ပိယော စ မေ ဟေဟိတိ မာလဘာရီ၊ အဟဉ္စ နံ မာလိနီ အဇ္ဈုပေဿံ’’။
အဟဉ္စ သာလဿ သုပုပ္ဖိတဿ၊ ဩစေယျ ပုပ္ဖာနိ ကရောမိ ဘာရံ၊
ဣဒဉ္စ နော ဟေဟိတိ သန္ထရတ္ထံ၊ ယတ္ထဇ္ဇိမံ [ယတ္ထဇ္ဇမံ (သီ။ ပီ။)] ဝိဟရိဿာမ [ဝိဟရိဿာမု (ပီ။)] ရတ္တိံ။
အဟဉ္စ ခေါ အဂဠုံ [အဂ္ဂလု (သျာ။ က။)၊ အကလုံ (ပီ။)] စန္ဒနဉ္စ၊ သိလာယ ပိံသာမိ ပမတ္တရူပါ၊
‘‘ပိယော စ မေ ဟေဟိတိ ရောသိတင်္ဂေါ၊ အဟဉ္စ ¶ နံ ရောသိတာ အဇ္ဈုပေဿံ’’။
အထာဂမာ သလိလံ သီဃသောတံ၊ နုဒံ သာလေ သလဠေ ကဏ္ဏိကာရေ၊
အာပူရထ [အပူရထ (သီ။ ပီ။)၊ အာပူရထေ (သျာ။)] တေန မုဟုတ္တကေန၊ သာယံ နဒီ အာသိ မယာ သုဒုတ္တရာ။
ဥဘောသု တီရေသု မယံ တဒါ ဌိတာ၊ သမ္ပဿန္တာ ဥဘယော အညမညံ၊
သကိမ္ပိ ရောဒါမ သကိံ ဟသာမ၊ ကိစ္ဆေန နော အာဂမာ [အဂမာ (သီ။ သျာ။ ပီ။)] သံဝရီ သာ။
ပါတောဝ ¶ [ပါတော စ (သီ။ သျာ။ ပီ။)] ခေါ ဥဂ္ဂတေ သူရိယမှိ၊ စတုက္ကံ နဒိံ ဥတ္တရိယာန လုဒ္ဒ၊
အာလိင်္ဂိယာ အညမညံ မယံ ဥဘော၊ သကိမ္ပိ ရောဒါမ သကိံ ဟသာမ။
တီဟူနကံ သတ္တသတာနိ လုဒ္ဒ၊ ယမိဓ မယံ ဝိပ္ပဝသိမှ ပုဗ္ဗေ၊
ဝဿေကိမံ [ဝါသေကိမံ (သီ။ ပီ။)] ဇီဝိတံ ဘူမိပါလ၊ ကော နီဓ ကန္တာယ ဝိနာ ဝသေယျ။
အာယုဉ္စ ဝေါ ကီဝတကော နု သမ္မ၊ သစေပိ ဇာနာထ ဝဒေထ အာယုံ၊
အနုဿဝါ ဝုဍ္ဎတော အာဂမာ ဝါ၊ အက္ခာထ ¶ မေ တံ အဝိကမ္ပမာနာ။
အာယုဉ္စ နော ဝဿသဟဿံ လုဒ္ဒ၊ န စန္တရာ ပါပကော အတ္ထိ ရောဂေါ၊
အပ္ပဉ္စ [အပ္ပံဝ (သျာ။ က။)] ဒုက္ခံ သုခမေဝ ဘိယျော၊ အဝီတရာဂါ ဝိဇဟာမ ဇီဝိတံ။
ဣဒဉ္စ သုတွာန အမာနုသာနံ၊ ဘလ္လာတိယော ဣတ္တရ ဇီဝိတန္တိ၊
နိဝတ္တထ န မိဂဝံ အစရိ၊ အဒါသိ ဒါနာနိ အဘုဉ္ဇိ ဘောဂေ။
ဣဒဉ္စ သုတွာန အမာနုသာနံ၊ သမ္မောဒထ မာ ကလဟံ အကတ္ထ၊
မာ ဝေါ တပီ အတ္တကမ္မာပရာဓော၊ ယထာပိ တေ ကိမ္ပုရိသေကရတ္တံ။
ဣဒဉ္စ ¶ သုတွာန အမာနုသာနံ၊ သမ္မောဒထ မာ ဝိဝါဒံ အကတ္ထ၊
မာ ဝေါ တပီ အတ္တကမ္မာပရာဓော၊ ယထာပိ တေ ကိမ္ပုရိသေကရတ္တံ။
ဝိဝိဓံ ¶ [ဝိဝိဓ (သီ။ သျာ။)] အဓိမနာ သုဏောမဟံ၊ ဝစနပထံ တဝ အတ္ထသံဟိတံ၊
မုဉ္စံ [မုဉ္စ (သီ။ ပီ။)] ဂိရံ နုဒသေဝ မေ ဒရံ၊ သမဏ ¶ သုခါဝဟ ဇီဝ မေ စိရန္တိ။
ဘလ္လာတိယဇာတကံ အဋ္ဌမံ။
၅၀၅။ သောမနဿဇာတကံ (၉)
ကော တံ ဟိံသတိ ဟေဌေတိ၊ ကိံ [ကိန္နု (ပီ။ က။)] ဒုမ္မနော သောစသိ အပ္ပတီတော၊
ကဿဇ္ဇ မာတာပိတရော ရုဒန္တု၊ ကွဇ္ဇ သေတု [ကော နွေဇ္ဇ သေတိ (က။)၊ ကော အဇ္ဇ သေတု (?)] နိဟတော ပထဗျာ။
တုဋ္ဌောသ္မိ ဒေဝ တဝ ဒဿနေန၊ စိရဿံ ပဿာမိ တံ ဘူမိပါလ၊
အဟိံသကော ရေဏုမနုပ္ပဝိဿ၊ ပုတ္တေန တေ ဟေဌယိတောသ္မိ [ပေါထယိတောသ္မိ (က။)] ဒေဝ။
အာယန္တု ဒေါဝါရိကာ ခဂ္ဂဗန္ဓာ [ခဂ္ဂဗဒ္ဓါ (သီ။ ပီ။)]၊ ကာသာဝိယာ ယန္တု [ဟန္တု (က။)] အန္တေပုရန္တံ၊
ဟန္တွာန တံ သောမနဿံ ကုမာရံ၊ ဆေတွာန သီသံ ဝရမာဟရန္တု။
ပေသိတာ ရာဇိနော ဒူတာ၊ ကုမာရံ ဧတဒဗြဝုံ၊
ဣဿရေန ဝိတိဏ္ဏောသိ၊ ဝဓံ ပတ္တောသိ ခတ္တိယ။
သ ရာဇပုတ္တော ပရိဒေဝယန္တော၊ ဒသင်္ဂုလိံ အဉ္ဇလိံ ပဂ္ဂဟေတွာ၊
အဟမ္ပိ ¶ ဣစ္ဆာမိ ဇနိန္ဒ ဒဋ္ဌုံ၊ ဇီဝံ မံ နေတွာ [ဇီဝံ ပနေတွာ (သီ။ ပီ။)] ပဋိဒဿယေထ။
တဿ တံ ဝစနံ သုတွာ၊ ရညော ပုတ္တံ အဒဿယုံ၊
ပုတ္တော စ ပိတရံ ဒိသွာ၊ ဒူရတောဝဇ္ဈဘာသထ။
အာဂစ္ဆုံ ¶ [အာဂဉ္ဆုံ (သီ။)၊ အာဂဉ္ဆု (ပီ။)] ဒေါဝါရိကာ ခဂ္ဂဗန္ဓာ၊ ကာသာဝိယာ ဟန္တု မမံ ဇနိန္ဒ၊
အက္ခာဟိ မေ ပုစ္ဆိတော ဧတမတ္ထံ၊ အပရာဓော ကော နိဓ မမဇ္ဇ အတ္ထိ။
သာယဉ္စ ပါတော ဥဒကံ သဇာတိ၊ အဂ္ဂိံ သဒါ ပါရိစရတပ္ပမတ္တော၊
တံ တာဒိသံ သံယတံ ဗြဟ္မစာရိံ၊ ကသ္မာ တုဝံ ဗြူသိ ဂဟပ္ပတီတိ။
တာလာ စ မူလာ စ ဖလာ စ ဒေဝ၊ ပရိဂ္ဂဟာ ဝိဝိဓာ သန္တိမဿ၊
တေ ရက္ခတိ ဂေါပယတပ္ပမတ္တော၊ [ဗြာဟ္မဏော ဂဟပတိ တေန ဟောတိ (သီ။ သျာ။ ပီ။)] တသ္မာ အဟံ ဗြူမိ ဂဟပ္ပတီတိ [ဗြာဟ္မဏော ဂဟပတိ တေန ဟောတိ (သီ။ သျာ။ ပီ။)]။
သစ္စံ ခေါ ဧတံ ဝဒသိ ကုမာရ၊ ပရိဂ္ဂဟာ ဝိဝိဓာ သန္တိမဿ၊
တေ ရက္ခတိ ဂေါပယတပ္ပမတ္တော၊ သ [နတ္ထိ ဣဒံ သီ။ သျာ။ ပီ။ ပေါတ္ထကေသု] ဗြာဟ္မဏော ¶ ဂဟပတိ တေန ဟောတိ။
သုဏန္တု မယှံ ပရိသာ သမာဂတာ၊ သနေဂမာ ဇာနပဒါ စ သဗ္ဗေ၊
ဗာလာယံ ဗာလဿ ဝစော နိသမ္မ၊ အဟေတုနာ ဃာတယတေ မံ [ဃာတယတေ (သီ။ ပီ။)] ဇနိန္ဒော။
ဒဠှသ္မိ ¶ မူလေ ဝိသဋေ ဝိရူဠှေ၊ ဒုန္နိက္ကယော ဝေဠု ပသာခဇာတော၊
ဝန္ဒာမိ ပါဒါနိ တဝ [တဝံ (သီ။ ပီ။)] ဇနိန္ဒ၊ အနုဇာန မံ ပဗ္ဗဇိဿာမိ ဒေဝ။
ဘုဉ္ဇဿု ဘောဂေ ဝိပုလေ ကုမာရ၊ သဗ္ဗဉ္စ တေ ဣဿရိယံ ဒဒါမိ၊
အဇ္ဇေဝ တွံ ကုရူနံ ဟောဟိ ရာဇာ၊ မာ ပဗ္ဗဇီ ပဗ္ဗဇ္ဇာ ဟိ ဒုက္ခာ။
ကိန္နူဓ ¶ ဒေဝ တဝမတ္ထိ ဘောဂါ၊ ပုဗ္ဗေဝဟံ [ပုဗ္ဗေ စဟံ (က။)] ဒေဝလောကေ ရမိဿံ၊
ရူပေဟိ သဒ္ဒေဟိ အထော ရသေဟိ၊ ဂန္ဓေဟိ ဖဿေဟိ မနောရမေဟိ။
ဘုတ္တာ စ မေ [ဘုတ္တာ (သီ။ ပီ။)] ဘောဂါ တိဒိဝသ္မိံ ဒေဝ၊ ပရိဝါရိတာ [ပရိစာရိတာ (က။)] အစ္ဆရာနံ ဂဏေန [အစ္ဆရာသံဂဏေန (သျာ။ ပီ။ က။)]၊
တုဝဉ္စ [တဝဉ္စ (သီ။ ပီ။)] ဗာလံ ပရနေယျံ ဝိဒိတွာ၊ န ¶ တာဒိသေ ရာဇကုလေ ဝသေယျံ။
သစာဟံ ဗာလော ပရနေယျော အသ္မိ၊ ဧကာပရာဓံ [ဧတာပရာဓံ (က။)] ခမ ပုတ္တ မယှံ၊
ပုနပိ စေ ဧဒိသကံ ဘဝေယျ၊ ယထာမတိံ သောမနဿ ကရောဟိ။
အနိသမ္မ ကတံ ကမ္မံ၊ အနဝတ္ထာယ စိန္တိတံ၊
ဘေသဇ္ဇဿေဝ ဝေဘင်္ဂေါ၊ ဝိပါကော ဟောတိ ပါပကော။
နိသမ္မ စ ကတံ ကမ္မံ၊ သမ္မာဝတ္ထာယ စိန္တိတံ၊
ဘေသဇ္ဇဿေဝ သမ္ပတ္တိ၊ ဝိပါကော ဟောတိ ဘဒြကော။
အလသော ဂိဟီ ကာမဘောဂီ န သာဓု၊ အသညတော ပဗ္ဗဇိတော န သာဓု၊
ရာဇာ န သာဓု အနိသမ္မကာရီ၊ ယော ပဏ္ဍိတော ကောဓနော တံ န သာဓု။
နိသမ္မ ခတ္တိယော ကယိရာ၊ နာနိသမ္မ ဒိသမ္ပတိ၊
နိသမ္မကာရိနော ရာဇ၊ ယသော ကိတ္တိ စ ဝဍ္ဎတိ။
နိသမ္မ ဒဏ္ဍံ ပဏယေယျ ဣဿရော၊ ဝေဂါ ကတံ တပ္ပတိ ဘူမိပါလ၊
သမ္မာပဏီဓီ စ နရဿ အတ္ထာ၊ အနာနုတပ္ပာ တေ ဘဝန္တိ ပစ္ဆာ။
အနာနုတပ္ပာနိ ¶ ဟိ ယေ ကရောန္တိ၊ ဝိဘဇ္ဇ ¶ ကမ္မာယတနာနိ လောကေ၊
ဝိညုပ္ပသတ္ထာနိ သုခုဒြယာနိ၊ ဘဝန္တိ ဗုဒ္ဓါနုမတာနိ [ဝဒ္ဓါနုမတာနိ (သီ။ ပီ။)] တာနိ။
အာဂစ္ဆုံ ဒေါဝါရိကာ ခဂ္ဂဗန္ဓာ၊ ကာသာဝိယာ ဟန္တု မမံ ဇနိန္ဒ၊
မာတုဉ္စ [မာတုစ္စ (ပီ။)] အင်္ကသ္မိမဟံ နိသိန္နော၊ အာကဍ္ဎိတော သဟသာ တေဟိ ဒေဝ။
ကဋုကဉှိ သမ္ဗာဓံ သုကိစ္ဆံ [သုကိစ္ဆ (သီ။ ပီ။)] ပတ္တော၊ မဓုရမ္ပိ ယံ ဇီဝိတံ လဒ္ဓ ရာဇ၊
ကိစ္ဆေနဟံ အဇ္ဇ ဝဓာ ပမုတ္တော၊ ပဗ္ဗဇ္ဇမေဝါဘိမနောဟမသ္မိ။
ပုတ္တော တဝါယံ တရုဏော သုဓမ္မေ၊ အနုကမ္ပကော သောမနဿော ကုမာရော၊
တံ ယာစမာနော န လဘာမိ သွဇ္ဇ [သဇ္ဇ (သီ။ ပီ။)]၊ အရဟသိ နံ ယာစိတဝေ [ယာစိတုယေ (က။)] တုဝမ္ပိ။
ရမဿု ¶ ဘိက္ခာစရိယာယ ပုတ္တ၊ နိသမ္မ ဓမ္မေသု ပရိဗ္ဗဇဿု၊
သဗ္ဗေသု ဘူတေသု နိဓာယ ဒဏ္ဍံ၊ အနိန္ဒိတော ဗြဟ္မမုပေဟိ ဌာနံ။
အစ္ဆေရ [အစ္ဆရိယ (သီ။ သျာ။ ပီ။)] ရူပံ ဝတ ယာဒိသဉ္စ၊ ဒုက္ခိတံ ¶ မံ ဒုက္ခာပယသေ သုဓမ္မေ၊
ယာစဿု ပုတ္တံ ဣတိ ဝုစ္စမာနာ၊ ဘိယျောဝ ဥဿာဟယသေ ကုမာရံ။
ယေ ဝိပ္ပမုတ္တာ အနဝဇ္ဇဘောဂိနော [ဘောဇိနော (သီ။ သျာ။ ပီ။)]၊ ပရိနိဗ္ဗုတာ လောကမိမံ စရန္တိ၊
တမရိယမဂ္ဂံ ပဋိပဇ္ဇမာနံ၊ န ဥဿဟေ ဝါရယိတုံ ကုမာရံ။
အဒ္ဓါ ¶ ဟဝေ သေဝိတဗ္ဗာ သပညာ၊ ဗဟုဿုတာ ယေ ဗဟုဌာနစိန္တိနော၊
ယေသာယံ သုတွာန သုဘာသိတာနိ၊ အပ္ပောဿုက္ကာ ဝီတသောကာ သုဓမ္မာတိ။
သောမနဿဇာတကံ နဝမံ။
၅၀၆။ စမ္ပေယျဇာတကံ (၁၀)
ကာ နု ဝိဇ္ဇုရိဝါဘာသိ၊ ဩသဓီ ဝိယ တာရကာ၊
ဒေဝတာ နုသိ ဂန္ဓဗ္ဗီ၊ န တံ မညာမိ မာနုသိံ [မာနုသီ (သျာ။ က။)]။
နမှိ ဒေဝီ န ဂန္ဓဗ္ဗီ၊ န မဟာရာဇ မာနုသီ၊
နာဂကညာသ္မိ ဘဒ္ဒန္တေ၊ အတ္ထေနမှိ ဣဓာဂတာ။
ဝိဗ္ဘန္တစိတ္တာ ကုပိတိန္ဒြိယာသိ၊ နေတ္တေဟိ တေ ဝါရိဂဏာ သဝန္တိ၊
ကိံ ¶ တေ နဋ္ဌံ ကိံ ပန ပတ္ထယာနာ၊ ဣဓာဂတာ နာရိ တဒိင်္ဃ ဗြူဟိ။
ယမုဂ္ဂတေဇော ဥရဂေါတိ စာဟု၊ နာဂေါတိ နံ အာဟု ဇနာ ဇနိန္ဒ၊
တမဂ္ဂဟီ ပုရိသော ဇီဝိကတ္ထော၊ တံ ဗန္ဓနာ မုဉ္စ ပတီ မမေသော။
ကထံ နွယံ ဗလဝိရိယူပပန္နော၊ ဟတ္ထတ္တ [ဟတ္ထတ္ထ (သီ။ သျာ။ ပီ။)] မာဂစ္ဆိ ဝနိဗ္ဗကဿ၊
အက္ခာဟိ မေ နာဂကညေ တမတ္ထံ၊ ကထံ ဝိဇာနေမု ဂဟီတနာဂံ။
နဂရမ္ပိ နာဂေါ ဘသ္မံ ကရေယျ၊ တထာ ဟိ သော ဗလဝိရိယူပပန္နော၊
ဓမ္မဉ္စ နာဂေါ အပစာယမာနော၊ တသ္မာ ပရက္ကမ္မ တပေါ ကရောတိ။
စာတုဒ္ဒသိံ ¶ ပဉ္စဒသိံ [ပန္နရသိံ (သီ။ သျာ။ ပီ။)] စ ရာဇ၊ စတုပ္ပထေ သမ္မတိ နာဂရာဇာ၊
တမဂ္ဂဟီ ပုရိသော ဇီဝိကတ္ထော၊ တံ ဗန္ဓနာ မုဉ္စ ပတီ မမေသော။
သောဠသိတ္ထိသဟဿာနိ၊ အာမုတ္တမဏိကုဏ္ဍလာ၊
ဝါရိဂေဟသယာ နာရီ [နာရိယော (ပီ။)]၊ တာပိ တံ သရဏံ ဂတာ။
ဓမ္မေန ¶ မောစေဟိ အသာဟသေန၊ ဂါမေန နိက္ခေန ဂဝံ သတေန၊
ဩဿဋ္ဌကာယော ဥရဂေါ စရာတု၊ ပုညတ္ထိကော မုဉ္စတု ဗန္ဓနသ္မာ။
ဓမ္မေန ¶ မောစေမိ အသာဟသေန၊ ဂါမေန နိက္ခေန ဂဝံ သတေန၊
ဩဿဋ္ဌကာယော ဥရဂေါ စရာတု၊ ပုညတ္ထိကော မုဉ္စတု ဗန္ဓနသ္မာ။
ဒမ္မိ နိက္ခသတံ လုဒ္ဒ၊ ထူလဉ္စ မဏိကုဏ္ဍလံ၊
စတုဿဒဉ္စ ပလ္လင်္ကံ၊ ဥမာပုပ္ဖသရိန္နိဘံ။
ဒွေ စ သာဒိသိယော ဘရိယာ၊ ဥသဘဉ္စ ဂဝံ သတံ၊
ဩဿဋ္ဌကာယော ဥရဂေါ စရာတု၊ ပုညတ္ထိကော မုဉ္စတု ဗန္ဓနသ္မာ။
ဝိနာပိ ဒါနာ တဝ ဝစနံ ဇနိန္ဒ၊ မုဉ္စေမု နံ ဥရဂံ ဗန္ဓနသ္မာ၊
ဩဿဋ္ဌကာယော ဥရဂေါ စရာတု၊ ပုညတ္ထိကော မုဉ္စတု ဗန္ဓနသ္မာ။
မုတ္တော စမ္ပေယျကော နာဂေါ၊ ရာဇာနံ ဧတဒဗြဝိ၊
နမော တေ ကာသိရာဇတ္ထု၊ နမော တေ ကာသိဝဍ္ဎန၊
အဉ္ဇလိံ တေ ပဂ္ဂဏှာမိ၊ ပဿေယျံ မေ နိဝေသနံ။
အဒ္ဓါ ¶ ¶ ဟိ ဒုဗ္ဗိဿသမေတမာဟု၊ ယံ မာနုသော ဝိဿသေ အမာနုသမှိ၊
သစေ စ မံ ယာစသိ ဧတမတ္ထံ၊ ဒက္ခေမု တေ နာဂ နိဝေသနာနိ။
သစေပိ [သစေ ဟိ (သီ။ ပီ။ အဋ္ဌ။)] ဝါတော ဂိရိမာဝဟေယျ၊ စန္ဒော စ သုရိယော စ ဆမာ ပတေယျုံ၊
သဗ္ဗာ စ နဇ္ဇော ပဋိသောတံ ဝဇေယျုံ၊ န တွေဝဟံ ရာဇ မုသာ ဘဏေယျံ။
နဘံ ဖလေယျ ဥဒဓီပိ သုဿေ၊ သံဝဋ္ဋယေ [သံဝဋ္ဋေယံ (သီ။ ပီ။)၊ သံဝဋ္ဋေယျ (သျာ။ က။)] ဘူတဓရာ ဝသုန္ဓရာ၊
သိလုစ္စယော မေရု သမူလမုပ္ပတေ [မုဗ္ဗဟေ (သီ။ သျာ။ ပီ။ က။ အဋ္ဌ။)၊ မုဋ္ဌဟေ (က။)]၊ န တွေဝဟံ ရာဇ မုသာ ဘဏေယျံ။
အဒ္ဓါ ဟိ ဒုဗ္ဗိဿသမေတမာဟု၊ ယံ မာနုသော ဝိဿသေ အမာနုသမှိ၊
သစေ စ မံ ယာစသိ ဧတမတ္ထံ၊ ဒက္ခေမု တေ နာဂ နိဝေသနာနိ။
တုမှေ ခေါတ္ထ ဃောရဝိသာ ဥဠာရာ၊ မဟာတေဇာ ခိပ္ပကောပီ စ ဟောထ၊
မံကာရဏာ [မမ ကာရဏာ (သီ။ သျာ။ ပီ။)] ဗန္ဓနသ္မာ ပမုတ္တော၊ အရဟသိ နော ဇာနိတုယေ [ဇာနိတာယေ (သီ။)၊ ဇာနိတဝေ (သျာ။)၊ ဇာနိတယေ (ပီ။)] ကတာနိ။
သော ¶ ပစ္စတံ နိရယေ ဃောရရူပေ၊ မာ ကာယိကံ သာတမလတ္ထ ကိဉ္စိ၊
ပေဠာယ ဗဒ္ဓါ မရဏံ ဥပေတု၊ ယော တာဒိသံ ကမ္မကတံ န ဇာနေ။
သစ္စပ္ပဋိညာ ¶ တဝမေသ ဟောတု၊ အက္ကောဓနော ဟောဟိ အနုပနာဟီ၊
သဗ္ဗဉ္စ တေ နာဂကုလံ သုပဏ္ဏာ၊ အဂ္ဂိံဝ ဂိမှေသု [ဂိမှာသု (သီ။ သျာ။ ပီ။)] ဝိဝဇ္ဇယန္တု။
အနုကမ္ပသီ နာဂကုလံ ဇနိန္ဒ၊ မာတာ ယထာ သုပ္ပိယံ ဧကပုတ္တံ၊
အဟဉ္စ တေ နာဂကုလေန သဒ္ဓိံ၊ ကာဟာမိ ဝေယျာဝဋိကံ ဥဠာရံ။
ယောဇေန္တု ဝေ ရာဇရထေ သုစိတ္တေ၊ ကမ္ဗောဇကေ အဿတရေ သုဒန္တေ၊
နာဂေ စ ယောဇေန္တု သုဝဏ္ဏကပ္ပနေ၊ ဒက္ခေမု နာဂဿ နိဝေသနာနိ။
ဘေရီ ¶ မုဒိင်္ဂါ [မုတိင်္ဂါ (သီ။ ပီ။)] ပဏဝါ စ သင်္ခါ၊ အဝဇ္ဇယိံသု ဥဂ္ဂသေနဿ ရညော၊
ပါယာသိ ရာဇာ ဗဟုသောဘမာနော၊ ပုရက္ခတော နာရိဂဏဿ မဇ္ဈေ။
သုဝဏ္ဏစိတကံ ¶ ဘူမိံ၊ အဒ္ဒက္ခိ ကာသိဝဍ္ဎနော၊
သောဝဏ္ဏမယပါသာဒေ၊ ဝေဠုရိယဖလကတ္ထတေ။
သ ရာဇာ ပါဝိသိ ဗျမှံ၊ စမ္ပေယျဿ နိဝေသနံ၊
အာဒိစ္စဝဏ္ဏသန္နိဘံ၊ ကံသဝိဇ္ဇု ပဘဿရံ။
နာနာရုက္ခေဟိ သဉ္ဆန္နံ၊ နာနာဂန္ဓသမီရိတံ၊
သော ပါဝေက္ခိ ကာသိရာဇာ၊ စမ္ပေယျဿ နိဝေသနံ။
ပဝိဋ္ဌသ္မိံ ကာသိရညေ၊ စမ္ပေယျဿ နိဝေသနံ၊
ဒိဗ္ဗာ တူရိယာ ပဝဇ္ဇိံသု၊ နာဂကညာ စ နစ္စိသုံ [နစ္စယုံ (သီ။ ပီ။ က။)]။
တံ နာဂကညာ စရိတံ ဂဏေန၊ အနွာရုဟီ ကာသိရာဇာ ပသန္နော၊
နိသီဒိ သောဝဏ္ဏမယမှိ ပီဌေ၊ သာပဿယေ [သောပဿယေ (က။)] စန္ဒနသာရလိတ္တေ။
သော ¶ တတ္ထ ဘုတွာ စ အထော ရမိတွာ၊ စမ္ပေယျကံ ကာသိရာဇာ အဝေါစ၊
ဝိမာနသေဋ္ဌာနိ ဣမာနိ တုယှံ၊ အာဒိစ္စဝဏ္ဏာနိ ပဘဿရာနိ၊
နေတာဒိသံ အတ္ထိ မနုဿလောကေ၊ ကိံ ပတ္ထယံ [ကိမတ္ထိယံ (သီ။ သျာ။ ပီ။)] နာဂ တပေါ ကရောသိ။
တာ ကမ္ဗုကာယူရဓရာ သုဝတ္ထာ၊ ဝဋ္ဋင်္ဂုလီ တမ္ဗတလူပပန္နာ၊
ပဂ္ဂယှ ¶ ပါယေန္တိ အနောမဝဏ္ဏာ၊ နေတာဒိသံ အတ္ထိ မနုဿလောကေ၊
ကိံ ပတ္ထယံ နာဂ တပေါ ကရောသိ။
နဇ္ဇော စ တေမာ ပုထုလောမမစ္ဆာ၊ အာဋာ [အာဒါ (သျာ။)၊ အဒါ (ပီ။)] သကုန္တာဘိရုဒါ သုတိတ္ထာ၊
နေတာဒိသံ အတ္ထိ မနုဿလောကေ၊ ကိံ ပတ္ထယံ နာဂ တပေါ ကရောသိ။
ကောဉ္စာ မယူရာ ဒိဝိယာ စ ဟံသာ၊ ဝဂ္ဂုဿရာ ကောကိလာ သမ္ပတန္တိ၊
နေတာဒိသံ အတ္ထိ မနုဿလောကေ၊ ကိံ ပတ္ထယံ နာဂ တပေါ ကရောသိ။
အမ္ဗာ စ သာလာ တိလကာ စ ဇမ္ဗုယော၊ ဥဒ္ဒါလကာ ပါဋလိယော စ ဖုလ္လာ၊
နေတာဒိသံ အတ္ထိ မနုဿလောကေ၊ ကိံ ပတ္ထယံ နာဂ တပေါ ကရောသိ။
ဣမာ စ တေ ပေါက္ခရညော သမန္တတော၊ ဒိဗ္ဗာ [ဒိဗျာ (သျာ။)၊ ဒိဝိယာ (ပီ။)] စ ဂန္ဓာ သတတံ ပဝါယန္တိ၊
နေတာဒိသံ အတ္ထိ မနုဿလောကေ၊ ကိံ ပတ္ထယံ နာဂ တပေါ ကရောသိ။
န ¶ ပုတ္တဟေတု န ဓနဿ ဟေတု၊ န ¶ အာယုနော စာပိ [ဝါပိ (သီ။ ပီ။)] ဇနိန္ဒ ဟေတု၊
မနုဿယောနိံ အဘိပတ္ထယာနော၊ တသ္မာ ပရက္ကမ္မ တပေါ ကရောမိ။
တွံ ¶ လောဟိတက္ခော ဝိဟတန္တရံသော၊ အလင်္ကတော ကပ္ပိတကေသမဿု၊
သုရောသိတော လောဟိတစန္ဒနေန၊ ဂန္ဓဗ္ဗရာဇာဝ ဒိသာ ပဘာသသိ။
ဒေဝိဒ္ဓိပတ္တောသိ မဟာနုဘာဝေါ၊ သဗ္ဗေဟိ ကာမေဟိ သမင်္ဂိဘူတော၊
ပုစ္ဆာမိ တံ နာဂရာဇေတမတ္ထံ၊ သေယျော ဣတော ကေန မနုဿလောကော။
ဇနိန္ဒ နာညတြ မနုဿလောကာ၊ သုဒ္ဓီ ဝ သံဝိဇ္ဇတိ သံယမော ဝါ၊
အဟဉ္စ လဒ္ဓါန မနုဿယောနိံ၊ ကာဟာမိ ဇာတိမရဏဿ အန္တံ။
အဒ္ဓါ ဟဝေ သေဝိတဗ္ဗာ သပညာ၊ ဗဟုဿုတာ ယေ ဗဟုဌာနစိန္တိနော၊
နာရိယော စ ဒိသွာန တုဝဉ္စ နာဂ၊ ကာဟာမိ ပုညာနိ အနပ္ပကာနိ။
အဒ္ဓါ ဟဝေ သေဝိတဗ္ဗာ သပညာ၊ ဗဟုဿုတာ ¶ ယေ ဗဟုဌာနစိန္တိနော၊
နာရိယော စ ဒိသွာန မမဉ္စ ရာဇ၊ ကရောဟိ ပုညာနိ အနပ္ပကာနိ။
ဣဒဉ္စ မေ ဇာတရူပံ ပဟူတံ၊ ရာသီ သုဝဏ္ဏဿ စ တာလမတ္တာ၊
[ဣတော ဟရိတွာ သောဝဏ္ဏဃရာနိ ကာရယ၊ ရူပိယဿ စ ပါကာရံ ကရောန္တု (သီ။ သျာ။) ဣတော ဟရိတွာ သောဝဏ္ဏဃရာနိ၊ [ကာရယ] ရူပိယဿ စ ပါကာရံ ကရောန္တု (ပီ။)] ဣတော ဟရိတွာန သုဝဏ္ဏဃရာနိ၊ ကရဿု ရူပိယပါကာရံ ကရောန္တု [ဣတော ဟရိတွာ သောဝဏ္ဏဃရာနိ ကာရယ၊ ရူပိယဿ စ ပါကာရံ ကရောန္တု (သီ။ သျာ။) ဣတော ဟရိတွာ သောဝဏ္ဏဃရာနိ၊ [ကာရယ] ရူပိယဿ စ ပါကာရံ ကရောန္တု (ပီ။)]။
မုတ္တာ ¶ စ [မုတ္တာနဉ္စ (သီ။ သျာ။)] ဝါဟသဟဿာနိ ပဉ္စ၊ ဝေဠုရိယမိဿာနိ ဣတော ဟရိတွာ၊
အန္တေပုရေ ဘူမိယံ သန္ထရန္တု၊ နိက္ကဒ္ဒမာ ဟေဟိတိ နီရဇာ စ။
ဧတာဒိသံ အာဝသ ရာဇသေဋ္ဌ၊ ဝိမာနသေဋ္ဌံ ဗဟု သောဘမာနံ၊
ဗာရာဏသိံ နဂရံ ဣဒ္ဓံ ဖီတံ၊ ရဇ္ဇဉ္စ ကာရေဟိ အနောမပညာတိ။
စမ္ပေယျဇာတကံ ဒသမံ။
၅၀၇။ မဟာပလောဘနဇာတကံ (၁၁)
ဗြဟ္မလောကာ စဝိတွာန၊ ဒေဝပုတ္တော မဟိဒ္ဓိကော၊
ရညော ပုတ္တော ဥဒပါဒိ၊ သဗ္ဗကာမသမိဒ္ဓိသု။
ကာမာ ¶ ဝါ ကာမသညာ ဝါ၊ ဗြဟ္မလောကေ န ဝိဇ္ဇတိ၊
သွာဿု [ယွာဿ (သီ။)] တာယေဝ သညာယ၊ ကာမေဟိ ဝိဇိဂုစ္ဆထ။
တဿ စန္တေပုရေ အာသိ၊ ဈာနာဂါရံ သုမာပိတံ၊
သော တတ္ထ ပဋိသလ္လီနော [ပဋိသလ္လာနော (က။)]၊ ဧကော ရဟသိ ဈာယထ။
သ ရာဇာ ပရိဒေဝေသိ၊ ပုတ္တသောကေန အဋ္ဋိတော၊
ဧကပုတ္တော စယံ မယှံ၊ န စ ကာမာနိ ဘုဉ္ဇတိ။
ကော နု ခွေတ္ထ [ခေတ္ထ (သီ။ ပီ။)] ဥပါယော သော၊ ကော ဝါ ဇာနာတိ ကိဉ္စနံ၊
ယော [ကော (သီ။ ပီ။)] မေ ပုတ္တံ ပလောဘေယျ၊ ယထာ ကာမာနိ ပတ္ထယေ။
အဟု ¶ ကုမာရီ တတ္ထေဝ၊ ဝဏ္ဏရူပသမာဟိတာ၊
ကုသလာ နစ္စဂီတဿ၊ ဝါဒိတေ စ ပဒက္ခိဏာ။
သာ တတ္ထ ဥပသင်္ကမ္မ၊ ရာဇာနံ ဧတဒဗြဝိ၊
အဟံ ခေါ နံ ပလောဘေယျံ၊ သစေ ဘတ္တာ ဘဝိဿတိ။
တံ တထာဝါဒိနိံ ရာဇာ၊ ကုမာရိံ ဧတဒဗြဝိ၊
တွညေဝ နံ ပလောဘေဟိ၊ တဝ ဘတ္တာ ဘဝိဿတိ။
သာ ¶ စ အန္တေပုရံ ဂန္တွာ၊ ဗဟုံ ကာမုပသံဟိတံ၊
ဟဒယင်္ဂမာ ပေမနီယာ၊ စိတြာ ဂါထာ အဘာသထ။
တဿာ စ ဂါယမာနာယ၊ သဒ္ဒံ သုတွာန နာရိယာ၊
ကာမစ္ဆန္ဒဿ ဥပ္ပဇ္ဇိ၊ ဇနံ သော ပရိပုစ္ဆထ။
ကဿေသော သဒ္ဒေါ ကော ဝါ သော၊ ဘဏတိ ဥစ္စာဝစံ ဗဟုံ၊
ဟဒယင်္ဂမံ ပေမနီယံ၊ အဟော [အထော (သီ။ ပီ။)] ကဏ္ဏသုခံ မမ။
ဧသာ ¶ ခေါ ပမဒါ ဒေဝ၊ ခိဍ္ဍာ ဧသာ အနပ္ပိကာ [အနပ္ပကာ (က။)]၊
သစေ တွံ ကာမေ ဘုဉ္ဇေယျ၊ ဘိယျော ဘိယျော ဆာဒေယျု တံ။
ဣင်္ဃ အာဂစ္ဆတောရေန [အာဂစ္ဆတောရေနံ (က။) အာဂစ္ဆတု + ဩရေန]၊ အဝိဒူရမှိ ဂါယတု၊
အဿမဿ သမီပမှိ၊ သန္တိကေ မယှံ ဂါယတု။
တိရောကုဋ္ဋမှိ ဂါယိတွာ၊ ဈာနာဂါရမှိ ပါဝိသိ၊
ဗန္ဓိ နံ [ဘန္ဓိတုံ (သျာ။ က။)] အနုပုဗ္ဗေန၊ အာရညမိဝ ကုဉ္ဇရံ။
တဿ [တဿာ (သျာ။)] ကာမရသံ ဉတွာ၊ ဣဿာဓမ္မော အဇာယထ၊
‘‘အဟမေဝ ကာမေ ဘုဉ္ဇေယျံ၊ မာ အညော ပုရိသော အဟု’’။
တတော အသိံ ဂဟေတွာန၊ ပုရိသေ ဟန္တုံ ဥပက္ကမိ၊
အဟမေဝေကော ဘုဉ္ဇိဿံ၊ မာ အညော ပုရိသော သိယာ။
တတော ဇာနပဒါ သဗ္ဗေ၊ ဝိက္ကန္ဒိံသု သမာဂတာ၊
ပုတ္တော တျာယံ မဟာရာဇ၊ ဇနံ ဟေဌေတျဒူသကံ။
တဉ္စ ရာဇာ ဝိဝါဟေသိ [နိဝါဟေသိ (သျာ။)၊ ဝိဟာဟေသိ (ပီ။)]၊ သမှာ ရဋ္ဌာ စ [ရဋ္ဌာတော (သီ။ ပီ။)၊ ရဋ္ဌတော (က။)] ခတ္တိယော၊
ယာဝတာ ဝိဇိတံ မယှံ၊ န တေ ဝတ္ထဗ္ဗ [ဝတ္တဗ္ဗ (သီ။ ပီ။)] တာဝဒေ။
တတော သော ဘရိယမာဒါယ၊ သမုဒ္ဒံ ဥပသင်္ကမိ၊
ပဏ္ဏသာလံ ကရိတွာန၊ ဝနမုဉ္ဆာယ ပါဝိသိ။
အထေတ္ထ ¶ ဣသိ မာဂစ္ဆိ၊ သမုဒ္ဒံ ဥပရူပရိ၊
သော တဿ ဂေဟံ ပါဝေက္ခိ၊ ဘတ္တကာလေ ဥပဋ္ဌိတေ။
တဉ္စ ¶ ဘရိယာ ပလောဘေသိ၊ ပဿ ယာဝ သုဒါရုဏံ၊
စုတော သော ဗြဟ္မစရိယမှာ၊ ဣဒ္ဓိယာ ပရိဟာယထ။
ရာဇပုတ္တော ¶ စ ဥဉ္ဆာတော၊ ဝနမူလဖလံ ဗဟုံ၊
သာယံ ကာဇေန [ကာစေန (ပီ။)] အာဒါယ၊ အဿမံ ဥပသင်္ကမိ။
ဣသီ စ ခတ္တိယံ ဒိသွာ၊ သမုဒ္ဒံ ဥပသင်္ကမိ၊
‘‘ဝေဟာယသံ ဂမိဿ’’န္တိ၊ သီဒတေ သော မဟဏ္ဏဝေ။
ခတ္တိယော စ ဣသိံ ဒိသွာ၊ သီဒမာနံ မဟဏ္ဏဝေ၊
တဿေဝ အနုကမ္ပာယ၊ ဣမာ ဂါထာ အဘာသထ။
အဘိဇ္ဇမာနေ ဝါရိသ္မိံ၊ သယံ အာဂမ္မ ဣဒ္ဓိယာ၊
မိဿီဘာဝိတ္ထိယာ ဂန္တွာ၊ သံသီဒသိ မဟဏ္ဏဝေ။
အာဝဋ္ဋနီ မဟာမာယာ၊ ဗြဟ္မစရိယဝိကောပနာ၊
သီဒန္တိ နံ ဝိဒိတွာန၊ အာရကာ ပရိဝဇ္ဇယေ။
အနလာ မုဒုသမ္ဘာသာ၊ ဒုပ္ပူရာ တာ နဒီသမာ၊
သီဒန္တိ နံ ဝိဒိတွာန၊ အာရကာ ပရိဝဇ္ဇယေ။
ယံ ဧတာ ဥပသေဝန္တိ၊ ဆန္ဒသာ ဝါ ဓနေန ဝါ၊
ဇာတဝေဒေါဝ သံ ဌာနံ၊ ခိပ္ပံ အနုဒဟန္တိ နံ။
ခတ္တိယဿ ဝစော သုတွာ၊ ဣသိဿ နိဗ္ဗိဒါ အဟု၊
လဒ္ဓါ ပေါရာဏကံ မဂ္ဂံ၊ ဂစ္ဆတေ သော ဝိဟာယသံ။
ခတ္တိယော စ ဣသိံ ဒိသွာ၊ ဂစ္ဆမာနံ ဝိဟာယသံ၊
သံဝေဂံ အလဘီ ဓီရော၊ ပဗ္ဗဇ္ဇံ သမရောစယိ။
တတော သော ပဗ္ဗဇိတွာန၊ ကာမရာဂံ ဝိရာဇယိ၊
ကာမရာဂံ ¶ ဝိရာဇေတွာ၊ ဗြဟ္မလောကူပဂေါ အဟူတိ။
မဟာပလောဘနဇာတကံ ဧကာဒသမံ။
၅၀၈။ ပဉ္စပဏ္ဍိတဇာတကံ (၁၂)
ပဉ္စ ¶ ပဏ္ဍိတာ သမာဂတာတ္ထ၊ ပဉှာ မေ ပဋိဘာတိ တံ သုဏာထ၊
နိန္ဒိယမတ္ထံ ပသံသိယံ ဝါ၊ ကဿေဝါဝိကရေယျ [ကဿ ဝါဝီကရေယျ (က။)] ဂုယှမတ္ထံ။
တွံ ¶ အာဝိကရောဟိ ဘူမိပါလ၊ ဘတ္တာ ဘာရသဟော တုဝံ ဝဒေ တံ၊
တဝ ဆန္ဒရုစီနိ [ဆန္ဒဉ္စ ရုစိဉ္စ (သီ။ ပီ။)] သမ္မသိတွာ၊ အထ ဝက္ခန္တိ ဇနိန္ဒ ပဉ္စ ဓီရာ။
ယာ သီလဝတီ အနညထေယျာ [အနညဓေယျာ (သီ။ ပီ။)]၊ ဘတ္တုစ္ဆန္ဒဝသာနုဂါ (ပိယာ) [( ) နတ္ထိ သီ။ ပီ။ ပေါတ္ထကေသု] မနာပါ၊
နိန္ဒိယမတ္ထံ ပသံသိယံ ဝါ၊ ဘရိယာယာဝိကရေယျ [ဘရိယာယ ဝါဝီကရေယျ (က။)] ဂုယှမတ္ထံ။
ယော ကိစ္ဆဂတဿ အာတုရဿ၊ သရဏံ ဟောတိ ဂတီ ပရာယနဉ္စ၊
နိန္ဒိယမတ္ထံ ပသံသိယံ ဝါ၊ သခိနော ဝါဝိကရေယျ ဂုယှမတ္ထံ။
ဇေဋ္ဌော ¶ [ယော ဇေဋ္ဌော (သျာ။)] အထ မဇ္ဈိမော ကနိဋ္ဌော၊ ယော [သော (သီ။ သျာ။ ပီ။)] စေ သီလသမာဟိတော ဌိတတ္တော၊
နိန္ဒိယမတ္ထံ ပသံသိယံ ဝါ၊ ဘာတု ဝါဝီကရေယျ ဂုယှမတ္ထံ။
ယော ဝေ ပိတုဟဒယဿ ပဒ္ဓဂူ [ပတ္ထဂူ (သျာ။)၊ ပတ္တဂူ (က။)]၊ အနုဇာတော ပိတရံ အနောမပညော၊
နိန္ဒိယမတ္ထံ ပသံသိယံ ဝါ၊ ပုတ္တဿာဝိကရေယျ [ပုတ္တဿ ဝါဝီကရေယျ (က။)] ဂုယှမတ္ထံ။
မာတာ ¶ ဒွိပဒါဇနိန္ဒသေဋ္ဌ၊ ယာ နံ [ယော တံ (သီ။ ပီ။)] ပေါသေတိ ဆန္ဒသာ ပိယေန၊
နိန္ဒိယမတ္ထံ ပသံသိယံ ဝါ၊ မာတုယာဝီကရေယျ [မာတုယာ ဝါဝီကရေယျ (က။)] ဂုယှမတ္ထံ။
ဂုယှဿ ဟိ ဂုယှမေဝ သာဓု၊ န ဟိ ဂုယှဿ ပသတ္ထမာဝိကမ္မံ၊
အနိပ္ဖန္နတာ [အနိပ္ဖာဒါယ (သီ။ ပီ။)၊ အနိပ္ဖန္နတာယ (သျာ။)၊ အာ နိပ္ဖာဒါ (?)] သဟေယျ ဓီရော၊ နိပ္ဖန္နောဝ [နိပ္ဖန္နတ္ထော (သီ။ ပီ။)၊ နိပ္ဖန္နတ္ထောဝ (သျာ။)] ယထာသုခံ ဘဏေယျ။
ကိံ တွံ ဝိမနောသိ ရာဇသေဋ္ဌ၊ ဒွိပဒဇနိန္ဒ [ဒိပဒိန္ဒ (သီ။ သျာ။ ပီ။)] ဝစနံ သုဏောမ မေတံ [နေတံ (သီ။ ပီ။)၊ တေတံ (သျာ။)]၊
ကိံ စိန္တယမာနော ဒုမ္မနောသိ၊ နူန ဒေဝ အပရာဓော အတ္ထိ မယှံ။
‘‘ပဏှေ ¶ [ပညော (သီ။ ပီ။)၊ ပဉှေ (သျာ။)၊ ပနှေ (က။)] ဝဇ္ဈော မဟောသဓော’’တိ၊ အာဏတ္တော မေ ဝဓာယ ဘူရိပညော၊
တံ စိန္တယမာနော ဒုမ္မနောသ္မိ၊ န ဟိ ဒေဝီ အပရာဓော အတ္ထိ တုယှံ။
အဘိဒေါသဂတော ဒါနိ ဧဟိသိ၊ ကိံ သုတွာ ကိံ သင်္ကတေ မနော တေ၊
ကော တေ ကိမဝေါစ ဘူရိပည၊ ဣင်္ဃ ဝစနံ သုဏောမ ဗြူဟိ မေတံ။
‘‘ပဏှေ ဝဇ္ဈော မဟောသဓော’’တိ၊ ယဒိ တေ မန္တယိတံ ဇနိန္ဒ ဒေါသံ၊
ဘရိယာယ ရဟောဂတော အသံသိ၊ ဂုယှံ ပါတုကတံ သုတံ မမေတံ။
ယံ ¶ သာလဝနသ္မိံ သေနကော၊ ပါပကမ္မံ အကာသိ အသဗ္ဘိရူပံ၊
သခိနောဝ ရဟောဂတော အသံသိ၊ ဂုယှံ ပါတုကတံ သုတံ မမေတံ။
ပုက္ကုသ [ပက္ကုသ (က။) ဇာ။ ၁။၇။၄၁ ပဏ္ဏဇာတကေ ပဿိတဗ္ဗံ] ပုရိသဿ တေ ဇနိန္ဒ၊ ဥပ္ပန္နော ရောဂေါ အရာဇယုတ္တော၊
ဘာတုဉ္စ [ဘာတုစ္စ (သီ။ ပီ။)၊ ဘာတုဝ (သျာ။)] ရဟောဂတော အသံသိ၊ ဂုယှံ ပါတုကတံ သုတံ မမေတံ။
အာဗာဓောယံ ¶ အသဗ္ဘိရူပေါ၊ ကာမိန္ဒော [ကာဝိန္ဒော (သီ။ ပီ။)] နရဒေဝေန ဖုဋ္ဌော၊
ပုတ္တဿ ရဟောဂတော အသံသိ၊ ဂုယှံ ပါတုကတံ သုတံ မမေတံ။
အဋ္ဌဝင်္ကံ ¶ မဏိရတနံ ဥဠာရံ၊ သက္ကော တေ အဒဒါ ပိတာမဟဿ၊
ဒေဝိန္ဒဿ ဂတံ တဒဇ္ဇ ဟတ္ထံ [ဒေဝိန္ဒဿ တဒဇ္ဇ ဟတ္ထဂတံ (က။)]၊ မာတုဉ္စ ရဟောဂတော အသံသိ၊
ဂုယှံ ပါတုကတံ သုတံ မမေတံ။
ဂုယှဿ ဟိ ဂုယှမေဝ သာဓု၊ န ဟိ ဂုယှဿ ပသတ္ထမာဝိကမ္မံ၊
အနိပ္ဖန္နတာ သဟေယျ ဓီရော၊ နိပ္ဖန္နောဝ ယထာသုခံ ဘဏေယျ။
န ဂုယှမတ္ထံ ဝိဝရေယျ၊ ရက္ခေယျ နံ ယထာ နိဓိံ၊
န ဟိ ပါတုကတော သာဓု၊ ဂုယှော အတ္ထော ပဇာနတာ။
ထိယာ ဂုယှံ န သံသေယျ၊ အမိတ္တဿ စ ပဏ္ဍိတော၊
ယော စာမိသေန သံဟီရော၊ ဟဒယတ္ထေနော စ ယော နရော။
ဂုယှမတ္ထံ အသမ္ဗုဒ္ဓံ၊ သမ္ဗောဓယတိ ယော နရော၊
မန္တဘေဒဘယာ တဿ၊ ဒါသဘူတော တိတိက္ခတိ။
ယာဝန္တော ¶ ပုရိသဿတ္ထံ၊ ဂုယှံ ဇာနန္တိ မန္တိနံ၊
တာဝန္တော ¶ တဿ ဥဗ္ဗေဂါ၊ တသ္မာ ဂုယှံ န ဝိဿဇေ။
ဝိဝိစ္စ ဘာသေယျ ဒိဝါ ရဟဿံ၊ ရတ္တိံ ဂိရံ နာတိဝေလံ ပမုဉ္စေ၊
ဥပဿုတိကာ ဟိ သုဏန္တိ မန္တံ၊ တသ္မာ မန္တော ခိပ္ပမုပေတိ ဘေဒန္တိ။
ပဉ္စပဏ္ဍိတဇာတကံ ဒွါဒသမံ။
၅၀၉။ ဟတ္ထိပါလဇာတကံ (၁၃)
စိရဿံ ဝတ ပဿာမ၊ ဗြာဟ္မဏံ ဒေဝဝဏ္ဏိနံ၊
မဟာဇဋံ ခါရိဓရံ [ဘာရဓရံ (ပီ။)]၊ ပင်္ကဒန္တံ ရဇဿိရံ။
စိရဿံ ဝတ ပဿာမ၊ ဣသိံ ဓမ္မဂုဏေ ရတံ၊
ကာသာယဝတ္ထဝသနံ၊ ဝါကစီရံ ပဋိစ္ဆဒံ။
အာသနံ ဥဒကံ ပဇ္ဇံ၊ ပဋိဂဏှာတု နော ဘဝံ၊
အဂ္ဃေ ဘဝန္တံ ပုစ္ဆာမ၊ အဂ္ဃံ ကုရုတု နော ဘဝံ။
အဓိစ္စ ဝေဒေ ပရိယေသ ဝိတ္တံ၊ ပုတ္တေ ဂဟေ [ဂေဟေ (သီ။ သျာ။ ပီ။)] တာတ ပတိဋ္ဌပေတွာ၊
ဂန္ဓေ ရသေ ပစ္စနုဘုယျ [ပစ္စနုဘောတွ (သျာ။)၊ ပစ္စနုဘုတွ (ပီ။)] သဗ္ဗံ၊ အရညံ သာဓု မုနိ သော ပသတ္ထော။
ဝေဒါ န သစ္စာ န စ ဝိတ္တလာဘော၊ န ပုတ္တလာဘေန ဇရံ ဝိဟန္တိ၊
ဂန္ဓေ ¶ ရသေ မုစ္စန [မုဉ္စန (သီ။ က။)] မာဟု သန္တော၊ သကမ္မုနာ [သကမ္မနာ (သီ။ ပီ။)] ဟောတိ ဖလူပပတ္တိ။
အဒ္ဓါ ဟိ သစ္စံ ဝစနံ တဝေတံ၊ သကမ္မုနာ ဟောတိ ဖလူပပတ္တိ၊
ဇိဏ္ဏာ စ မာတာပိတရော တဝီမေ [တဝေမေ (သီ။)၊ တဝ ယိမေ (သျာ။ ပီ။)]၊ ပဿေယျုံ တံ ဝဿသတံ အရောဂံ [အရောဂျံ (သျာ။ က။)]။
ယဿဿ ¶ ¶ သက္ခီ မရဏေန ရာဇ၊ ဇရာယ မေတ္တီ နရဝီရသေဋ္ဌ၊
ယော စာပိ ဇညာ န မရိဿံ ကဒါစိ၊ ပဿေယျုံ တံ ဝဿသတံ အရောဂံ။
ယထာပိ နာဝံ ပုရိသော ဒကမှိ၊ ဧရေတိ စေ နံ ဥပနေတိ တီရံ၊
ဧဝမ္ပိ ဗျာဓီ သတတံ ဇရာ စ၊ ဥပနေတိ မစ္စံ [မစ္စု (သျာ။ ပီ။)] ဝသမန္တကဿ။
ပင်္ကော စ ကာမာ ပလိပေါ စ ကာမာ၊ မနောဟရာ ဒုတ္တရာ မစ္စုဓေယျာ၊
ဧတသ္မိံ ပင်္ကေ ပလိပေ ဗျသန္နာ [ဝိသန္နာ (သျာ။ က။)]၊ ဟီနတ္တရူပါ န တရန္တိ ပါရံ။
အယံ ပုရေ လုဒ္ဒမကာသိ ကမ္မံ၊ သွာယံ ဂဟီတော န ဟိ မောက္ခိတော မေ၊
ဩရုန္ဓိယာ ¶ နံ ပရိရက္ခိဿာမိ၊ မာယံ ပုန လုဒ္ဒမကာသိ ကမ္မံ။
ဂဝံဝ [ဂါဝံဝ (သီ။)] နဋ္ဌံ ပုရိသော ယထာ ဝနေ၊ အနွေသတီ [ပရိယေသတီ (သီ။ ပီ။)] ရာဇ အပဿမာနော၊
ဧဝံ နဋ္ဌော ဧသုကာရီ မမတ္ထော၊ သောဟံ ကထံ န ဂဝေသေယျံ ရာဇ။
ဟိယျောတိ ဟိယျတိ [ဟီယောတိ ဟီယတိ (သီ။)] ပေါသော၊ ပရေတိ ပရိဟာယတိ၊
အနာဂတံ နေတမတ္ထီတိ ဉတွာ၊ ဥပ္ပန္နဆန္ဒံ ကော ပနုဒေယျ ဓီရော။
ပဿာမိ ဝေါဟံ ဒဟရံ [ဒဟရီ (သျာ။ ပီ။ က။)] ကုမာရိံ၊ မတ္တူပမံ ကေတကပုပ္ဖနေတ္တံ၊
အဘုတ္တဘောဂေ [အဘုတွ ဘောဂေ (သျာ။ က။ အဋ္ဌ။)၊ အဘုတွ ဘောဂေ (ပီ။)၊ ဘောဂေ အတုတွာ (က။)] ပဌမေ ဝယသ္မိံ၊ အာဒါယ မစ္စု ဝဇတေ ကုမာရိံ။
ယုဝါ ¶ သုဇာတော သုမုခေါ သုဒဿနော၊ သာမော ကုသုမ္ဘပရိကိဏ္ဏမဿု၊
ဟိတွာန ကာမေ ပဋိကစ္စ [ပဋိဂစ္စ (သီ။)၊ ပဋိဂစ္ဆ (သျာ။ ပီ။)] ဂေဟံ၊ အနုဇာန မံ ပဗ္ဗဇိဿာမိ ဒေဝ။
သာခါဟိ ရုက္ခော လဘတေ သမညံ၊ ပဟီနသာခံ ပန ခါဏုမာဟု၊
ပဟီနပုတ္တဿ မမဇ္ဇ ဘောတိ၊ ဝါသေဋ္ဌိ ¶ ဘိက္ခာစရိယာယ ကာလော။
အဃသ္မိ ကောဉ္စာဝ ယထာ ဟိမစ္စယေ၊ ကတာနိ [တန္တာနိ (သီ။ ပီ။)] ဇာလာနိ ပဒါလိယ [ပဒါလေယျ (သီ။)] ဟံသာ၊
ဂစ္ဆန္တိ ပုတ္တာ စ ပတီ စ မယှံ၊ သာဟံ ကထံ နာနုဝဇေ ပဇာနံ။
ဧတေ ဘုတွာ ဝမိတွာ စ၊ ပက္ကမန္တိ ဝိဟင်္ဂမာ၊
ယေ စ ဘုတွာန ဝမိံသု၊ တေ မေ ဟတ္ထတ္တ [ဟတ္ထတ္ထ (သီ။ သျာ။ ပီ။)] မာဂတာ။
အဝမီ ဗြာဟ္မဏော ကာမေ၊ သော [တေ (သီ။ ပီ။)] တွံ ပစ္စာဝမိဿသိ၊
ဝန္တာဒေါ ပုရိသော ရာဇ၊ န သော ဟောတိ ပသံသိယော။
ပင်္ကေ စ [ပင်္ကေဝ (သီ။ ပီ။)] ပေါသံ ပလိပေ ဗျသန္နံ၊ ဗလီ ယထာ ဒုဗ္ဗလမုဒ္ဓရေယျ၊
ဧဝမ္ပိ မံ တွံ ဥဒတာရိ ဘောတိ၊ ပဉ္စာလိ ဂါထာဟိ သုဘာသိတာဟိ။
ဣဒံ ဝတွာ မဟာရာဇာ၊ ဧသုကာရီ ဒိသမ္ပတိ၊
ရဋ္ဌံ ဟိတွာန ပဗ္ဗဇိ၊ နာဂေါ ဆေတွာဝ ဗန္ဓနံ။
ရာဇာ ¶ စ ပဗ္ဗဇ္ဇမရောစယိတ္ထ၊ ရဋ္ဌံ ပဟာယ နရဝီရသေဋ္ဌော၊
တုဝမ္ပိ နော ဟောတိ ယထေဝ ရာဇာ၊ အမှေဟိ ဂုတ္တာ အနုသာသ ရဇ္ဇံ။
ရာဇာ ¶ စ ပဗ္ဗဇ္ဇမရောစယိတ္ထ၊ ရဋ္ဌံ ¶ ပဟာယ နရဝီရသေဋ္ဌော၊
အဟမ္ပိ ဧကာ [ဧကာဝ (သီ။)] စရိဿာမိ လောကေ၊ ဟိတွာန ကာမာနိ မနောရမာနိ။
ရာဇာ စ ပဗ္ဗဇ္ဇမရောစယိတ္ထ၊ ရဋ္ဌံ ပဟာယ နရဝီရသေဋ္ဌော၊
အဟမ္ပိ ဧကာ စရိဿာမိ လောကေ၊ ဟိတွာန ကာမာနိ ယထောဓိကာနိ။
အစ္စေန္တိ ကာလာ တရယန္တိ ရတ္တိယော၊ ဝယောဂုဏာ အနုပုဗ္ဗံ ဇဟန္တိ၊
အဟမ္ပိ ဧကာ စရိဿာမိ လောကေ၊ ဟိတွာန ကာမာနိ မနောရမာနိ။
အစ္စေန္တိ ကာလာ တရယန္တိ ရတ္တိယော၊ ဝယောဂုဏာ အနုပုဗ္ဗံ ဇဟန္တိ၊
အဟမ္ပိ ဧကာ စရိဿာမိ လောကေ၊ ဟိတွာန ကာမာနိ ယထောဓိကာနိ။
အစ္စေန္တိ ကာလာ တရယန္တိ ရတ္တိယော၊ ဝယောဂုဏာ အနုပုဗ္ဗံ ဇဟန္တိ၊
အဟမ္ပိ ဧကာ စရိဿာမိ လောကေ၊ သီတိဘူတာ [သီတီဘူတာ (သီ။)] သဗ္ဗမတိစ္စ သင်္ဂန္တိ။
ဟတ္ထိပါလဇာတကံ တေရသမံ။
၅၁၀။ အယောဃရဇာတကံ (၁၄)
ယမေကရတ္တိံ ¶ ပဌမံ၊ ဂဗ္ဘေ ဝသတိ မာဏဝေါ၊
အဗ္ဘုဋ္ဌိတောဝ သော ယာတိ [သယတိ (သီ။ ပီ။)၊ သ ယာတိ (ကတ္ထစိ)]၊ သဂစ္ဆံ န နိဝတ္တတိ။
န ¶ ယုဇ္ဈမာနာ န ဗလေနဝဿိတာ၊ နရာ န ဇီရန္တိ န စာပိ မိယျရေ၊
သဗ္ဗံ ဟိဒံ [ဟိ တံ (သီ။ ပီ။)] ဇာတိဇရာယုပဒ္ဒုတံ၊ တံ မေ မတီ ဟောတိ စရာမိ ဓမ္မံ။
စတုရင်္ဂိနိံ သေနံ သုဘိံသရူပံ၊ ဇယန္တိ ရဋ္ဌာဓိပတီ ပသယှ၊
န မစ္စုနော ဇယိတုမုဿဟန္တိ၊ တံ မေ မတီ ဟောတိ စရာမိ ဓမ္မံ။
ဟတ္ထီဟိ အဿေဟိ ရထေဟိ ပတ္တိဘိ၊ ပရိဝါရိတာ မုစ္စရေ ဧကစ္စေယျာ [ဧကစေယျာ (သီ။ ပီ။)]၊
န မစ္စုနော [န မစ္စုတော (သီ။)] မုစ္စိတုမုဿဟန္တိ၊ တံ မေ မတီ ဟောတိ စရာမိ ဓမ္မံ။
ဟတ္ထီဟိ အဿေဟိ ရထေဟိ ပတ္တိဘိ၊ သူရာ [ပုရာ (က။)] ပဘဉ္ဇန္တိ ပဓံသယန္တိ၊
န မစ္စုနော ဘဉ္ဇိတုမုဿဟန္တိ၊ တံ မေ မတီ ဟောတိ စရာမိ ဓမ္မံ။
မတ္တာ ဂဇာ ဘိန္နဂဠာ [ပဘိန္နဂလာ (သီ။)] ပဘိန္နာ၊ နဂရာနိ ¶ မဒ္ဒန္တိ ဇနံ ဟနန္တိ၊
န မစ္စုနော မဒ္ဒိတုမုဿဟန္တိ၊ တံ မေ မတီ ဟောတိ စရာမိ ဓမ္မံ။
ဣဿာသိနော ကတဟတ္ထာပိ ဝီရာ [ဝီရာ (သီ။ ပီ။)]၊ ဒူရေပါတီ [ပတီ (က။)] အက္ခဏဝေဓိနောပိ၊
န မစ္စုနော ဝိဇ္ဈိတုမုဿဟန္တိ၊ တံ မေ မတီ ဟောတိ စရာမိ ဓမ္မံ။
သရာနိ ¶ ခီယန္တိ သသေလကာနနာ၊ သဗ္ဗံ ဟိဒံ [ဟိ တံ (သီ။ ပီ။)၊ ပိတံ (သျာ။)] ခီယတိ ဒီဃမန္တရံ၊
သဗ္ဗံ ဟိဒံ [ဟိ တံ (သီ။ ပီ။)၊ ပိတံ (သျာ။)] ဘဉ္ဇရေ ကာလပရိယာယံ၊ တံ မေ မတီ ဟောတိ စရာမိ ဓမ္မံ။
သဗ္ဗေ ¶ သမေဝံ ဟိ နရာနနာရိနံ [နရာနရီနံ (ပီ။)၊ နာရီ နရာနံ (သျာ။)၊ နရနာရီနံ (က။)]၊ စလာစလံ ပါဏဘုနောဓ ဇီဝိတံ၊
ပဋောဝ ဓုတ္တဿ ဒုမောဝ ကူလဇော၊ တံ မေ မတီ ဟောတိ စရာမိ ဓမ္မံ။
ဒုမပ္ဖလာနေဝ ပတန္တိ မာဏဝါ၊ ဒဟရာ စ ဝုဒ္ဓါ စ သရီရဘေဒါ၊
နာရိယော နရာ မဇ္ဈိမပေါရိသာ စ၊ တံ မေ မတီ ဟောတိ စရာမိ ဓမ္မံ။
နာယံ ဝယော တာရကရာဇသန္နိဘော၊ ယဒဗ္ဘတီတံ ¶ ဂတမေဝ ဒါနိ တံ၊
ဇိဏ္ဏဿ ဟီ နတ္ထိ ရတီ ကုတော သုခံ၊ တံ မေ မတီ ဟောတိ စရာမိ ဓမ္မံ။
ယက္ခာ ပိသာစာ အထဝါပိ ပေတာ၊ ကုပိတာတေ [ကုပိတာပိ တေ (သီ။ ပီ။)] အဿသန္တိ မနုဿေ၊
န မစ္စုနော အဿသိတုဿဟန္တိ၊ တံ မေ မတီ ဟောတိ စရာမိ ဓမ္မံ။
ယက္ခေ ပိသာစေ အထဝါပိ ပေတေ၊ ကုပိတေပိ တေ နိဇ္ဈပနံ ကရောန္တိ၊
န မစ္စုနော နိဇ္ဈပနံ ကရောန္တိ၊ တံ မေ မတီ ဟောတိ စရာမိ ဓမ္မံ။
အပရာဓကေ ဒူသကေ ဟေဌကေ စ၊ ရာဇာနော ဒဏ္ဍေန္တိ ဝိဒိတွာန ဒေါသံ၊
န မစ္စုနော ဒဏ္ဍယိတုဿဟန္တိ၊ တံ မေ မတီ ဟောတိ စရာမိ ဓမ္မံ။
အပရာဓကာ ဒူသကာ ဟေဋ္ဌကာ စ၊ လဘန္တိ တေ ရာဇိနော နိဇ္ဈပေတုံ၊
န မစ္စုနော နိဇ္ဈပနံ ကရောန္တိ၊ တံ မေ မတီ ဟောတိ စရာမိ ဓမ္မံ။
န ¶ ခတ္တိယောတိ န စ ဗြာဟ္မဏောတိ၊ န ¶ အဍ္ဎကာ ဗလဝါ တေဇဝါပိ၊
န မစ္စုရာဇဿ အပေက္ခမတ္ထိ၊ တံ မေ မတီ ဟောတိ စရာမိ ဓမ္မံ။
သီဟာ စ ဗျဂ္ဃာ စ အထောပိ ဒီပိယော၊ ပသယှ ခါဒန္တိ ဝိပ္ဖန္ဒမာနံ၊
န မစ္စုနော ခါဒိတုမုဿဟန္တိ၊ တံ မေ မတီ ဟောတိ စရာမိ ဓမ္မံ။
မာယာကာရာ ရင်္ဂမဇ္ဈေ ကရောန္တာ၊ မောဟေန္တိ စက္ခူနိ ဇနဿ တာဝဒေ၊
န မစ္စုနော မောဟယိတုဿဟန္တိ၊ တံ မေ မတီ ဟောတိ စရာမိ ဓမ္မံ။
အာသီဝိသာ ကုပိတာ ဥဂ္ဂတေဇာ၊ ဍံသန္တိ မာရေန္တိပိ တေ မနုဿေ၊
န မစ္စုနော ဍံသိတုမုဿဟန္တိ၊ တံ မေ မတီ ဟောတိ စရာမိ ဓမ္မံ။
အာသီဝိသာ ကုပိတာ ယံ ဍံသန္တိ၊ တိကိစ္ဆကာ တေသ ဝိသံ ဟနန္တိ၊
န မစ္စုနော ဒဋ္ဌဝိသံ [ဒဋ္ဌဿ ဝိသံ (က။)] ဟနန္တိ၊ တံ မေ မတီ ဟောတိ စရာမိ ဓမ္မံ။
ဓမ္မန္တရီ ဝေတ္တရဏီ [ဝေတရဏီ (သီ။ ပီ။)] စ ဘောဇော၊ ဝိသာနိ ¶ ဟန္တွာန ဘုဇင်္ဂမာနံ၊
သုယျန္တိ တေ ကာလကတာ တထေဝ၊ တံ မေ မတီ ဟောတိ စရာမိ ဓမ္မံ။
ဝိဇ္ဇာဓရာ ¶ ဃောရမဓီယမာနာ၊ အဒဿနံ ဩသဓေဟိ ဝဇန္တိ၊
န မစ္စုရာဇဿ ဝဇန္တဒဿနံ [ဝဇန္တိ အဒဿနံ (သျာ။ က။)]၊ တံ မေ မတီ ဟောတိ စရာမိ ဓမ္မံ။
ဓမ္မော ¶ ဟဝေ ရက္ခတိ ဓမ္မစာရိံ၊ ဓမ္မော သုစိဏ္ဏော သုခမာဝဟာတိ၊
ဧသာနိသံသော ဓမ္မေ သုစိဏ္ဏေ၊ န ဒုဂ္ဂတိံ ဂစ္ဆတိ ဓမ္မစာရီ။
န ဟိ ဓမ္မော အဓမ္မော စ၊ ဥဘော သမဝိပါကိနော၊
အဓမ္မော နိရယံ နေတိ၊ ဓမ္မော ပါပေတိ သုဂ္ဂတိန္တိ။
အယောဃရဇာတကံ စုဒ္ဒသမံ။
တဿုဒ္ဒါနံ –
မာတင်္ဂ သမ္ဘူတ သိဝိ သိရိမန္တော၊ ရောဟဏ ဟံသ သတ္တိဂုမ္ဗော ဘလ္လာတိယ၊
သောမနဿ စမ္ပေယျ ဗြဟ္မ ပဉ္စ-ပဏ္ဍိတ စိရဿံဝတ အယောဃရာတိ။
ဝီသတိနိပါတံ နိဋ္ဌိတံ။