📜
၄။ စတုက္ကနိပါတော
၁။ ကာလိင်္ဂဝဂ္ဂေါ
၃၀၁။ စူဠကာလိင်္ဂဇာတကံ (၄-၁-၁)
ဝိဝရထိမာသံ ¶ ¶ ¶ [ဝိဝရထ ဣမာသံ (သီ။ သျာ။ ပီ။)] ဒွါရံ၊ နဂရံ ပဝိသန္တု [ပဝိသိတုံ မယာ၊ (က။)] အရုဏရာဇဿ၊
သီဟေန သုသိဋ္ဌေန၊ သုရက္ခိတံ [သုသတ္ထေန၊ သုရက္ခိတံ (သီ။ ပီ။)၊ သုသိဋ္ဌေန (က။)] နန္ဒိသေနေန။
ဇယော ကလိင်္ဂါနမသယှသာဟိနံ၊ ပရာဇယော အနယော [အဇယော (သျာ။)၊ အနွိတော (က။)] အဿကာနံ၊
ဣစ္စေဝ တေ ဘာသိတံ ဗြဟ္မစာရိ၊ န ဥဇ္ဇုဘူတာ ဝိတထံ ဘဏန္တိ။
ဒေဝါ မုသာဝါဒမုပါတိဝတ္တာ၊ သစ္စံ ဓနံ ပရမံ တေသု [တထံ ပေမကရံ နု (က။)၊ တထံ ပရမံ ကရံ နု (သျာ။)] သက္က၊
တံ တေ မုသာ ဘာသိတံ ဒေဝရာဇ၊ ကိံ ဝါ ပဋိစ္စ မဃဝါ မဟိန္ဒ။
နနု တေ သုတံ ဗြာဟ္မဏ ဘညမာနေ၊ ဒေဝါ န ဣဿန္တိ ပုရိသပရက္ကမဿ၊
ဒမော သမာဓိ မနသော အဘေဇ္ဇော [အဒေဇ္ဇော (သီ။ ပီ။)၊ အဘိဇ္ဇော (က။)]၊ အဗျဂ္ဂတာ ¶ နိက္ကမနဉ္စ [နိက္ခမနဉ္စ (သီ။)] ကာလေ၊
ဒဠှဉ္စ ဝိရိယံ ပုရိသပရက္ကမော စ၊ တေနေဝ အာသိ ဝိဇယော အဿကာနန္တိ။
စူဠကာလိင်္ဂဇာတကံ ပဌမံ။
၃၀၂။ မဟာအဿာရောဟဇာတကံ (၄-၁-၂)
အဒေယျေသု ဒဒံ ဒါနံ၊ ဒေယျေသု နပ္ပဝေစ္ဆတိ၊
အာပါသု ဗျသနံ ပတ္တော၊ သဟာယံ နာဓိဂစ္ဆတိ။
နာဒေယျေသု ¶ ဒဒံ ဒါနံ၊ ဒေယျေသု ယော ပဝေစ္ဆတိ၊
အာပါသု ဗျသနံ ပတ္တော၊ သဟာယမဓိဂစ္ဆတိ။
သညောဂသမ္ဘောဂဝိသေသဒဿနံ၊ အနရိယဓမ္မေသု သဌေသု နဿတိ၊
ကတဉ္စ အရိယေသု စ အဇ္ဇဝေသု၊ မဟပ္ဖလံ ဟောတိ အဏုမ္ပိ တာဒိသု။
ယော ပုဗ္ဗေ ကတကလျာဏော၊ အကာ လောကေ သုဒုက္ကရံ၊
ပစ္ဆာ ကယိရာ န ဝါ ကယိရာ၊ အစ္စန္တံ ပူဇနာရဟောတိ။
မဟာအဿာရောဟဇာတကံ ဒုတိယံ။
၃၀၃။ ဧကရာဇဇာတကံ (၄-၁-၃)
အနုတ္တရေ ¶ ¶ ကာမဂုဏေ သမိဒ္ဓေ၊ ဘုတွာန ပုဗ္ဗေ ဝသီ ဧကရာဇ၊
သော ဒါနိ ဒုဂ္ဂေ နရကမှိ ခိတ္တော၊ နပ္ပဇ္ဇဟေ ဝဏ္ဏဗလံ ပုရာဏံ။
ပုဗ္ဗေဝ ခန္တီ စ တပေါ စ မယှံ၊ သမ္ပတ္ထိတာ ဒုဗ္ဘိသေန [ဒဗ္ဗသေနာ (သီ။ ပီ။)] အဟောသိ၊
တံ ဒါနိ လဒ္ဓါန ကထံ နု ရာဇ၊ ဇဟေ အဟံ ဝဏ္ဏဗလံ ပုရာဏံ။
သဗ္ဗာ ကိရေဝံ ပရိနိဋ္ဌိတာနိ၊ ယသဿိနံ ပညဝန္တံ ဝိသယှ၊
ယသော စ လဒ္ဓါ ပုရိမံ ဥဠာရံ၊ နပ္ပဇ္ဇဟေ ဝဏ္ဏဗလံ ပုရာဏံ။
ပနုဇ္ဇ ဒုက္ခေန သုခံ ဇနိန္ဒ၊ သုခေန ဝါ ဒုက္ခမသယှသာဟိ၊
ဥဘယတ္ထ သန္တော အဘိနိဗ္ဗုတတ္တာ၊ သုခေ စ ဒုက္ခေ စ ဘဝန္တိ တုလျာတိ။
ဧကရာဇဇာတကံ တတိယံ။
၃၀၄။ ဒဒ္ဒရဇာတကံ (၄-၁-၄)
ဣမာနိ ¶ ¶ မံ ဒဒ္ဒရ တာပယန္တိ၊ ဝါစာဒုရုတ္တာနိ မနုဿလောကေ၊
မဏ္ဍူကဘက္ခာ ဥဒကန္တသေဝီ၊ အာသီဝိသံ မံ အဝိသာ သပန္တိ။
သကာ ရဋ္ဌာ ပဗ္ဗာဇိတော၊ အညံ ဇနပဒံ ဂတော၊
မဟန္တံ ကောဋ္ဌံ ကယိရာထ၊ ဒုရုတ္တာနံ [ဒုရုတ္တာနိ (က။)] နိဓေတဝေ။
ယတ္ထ ပေါသံ န ဇာနန္တိ၊ ဇာတိယာ ဝိနယေန ဝါ၊
န တတ္ထ မာနံ ကယိရာထ၊ ဝသမညာတကေ ဇနေ။
ဝိဒေသဝါသံ ဝသတော၊ ဇာတဝေဒသမေနပိ [ဇာတဝေဒဘယေနပိ (က။)]၊
ခမိတဗ္ဗံ သပညေန၊ အပိ ဒါသဿ တဇ္ဇိတန္တိ။
ဒဒ္ဒရဇာတကံ စတုတ္ထံ။
၃၀၅။ သီလဝီမံသနဇာတကံ (၄-၁-၅)
နတ္ထိ လောကေ ရဟော နာမ၊ ပါပကမ္မံ ပကုဗ္ဗတော၊
ပဿန္တိ ဝနဘူတာနိ၊ တံ ဗာလော မညတီ ရဟော။
အဟံ ရဟော န ပဿာမိ၊ သုညံ ဝါပိ န ဝိဇ္ဇတိ၊
ယတ္ထ အညံ [သုညံ (သျာ။ က။)] န ပဿာမိ၊ အသုညံ ဟောတိ တံ မယာ။
ဒုဇ္ဇစ္စော စ သုဇစ္စော [အဇစ္စော (ပီ။)] စ၊ နန္ဒော စ သုခဝဍ္ဎိတော [သုခဝစ္ဆကော (သီ။)၊ သုခဝစ္ဆနော (သျာ။ ပီ။)]၊
ဝေဇ္ဇော ¶ စ အဒ္ဓုဝသီလော [အထ သီလော (က။)] စ၊ တေ ဓမ္မံ ဇဟု မတ္ထိကာ။
ဗြာဟ္မဏော ¶ စ ကထံ ဇဟေ၊ သဗ္ဗဓမ္မာန ပါရဂူ၊
ယော ဓမ္မမနုပါလေတိ၊ ဓိတိမာ သစ္စနိက္ကမောတိ။
သီလဝီမံသနဇာတကံ ပဉ္စမံ။
၃၀၆။ သုဇာတဇာတကံ (၄-၁-၆)
ကိမဏ္ဍကာ ¶ ဣမေ ဒေဝ၊ နိက္ခိတ္တာ ကံသမလ္လကေ၊
ဥပလောဟိတကာ ဝဂ္ဂူ၊ တံ [တေ (ပီ။)] မေ အက္ခာဟိ ပုစ္ဆိတော။
ယာနိ ပုရေ တုဝံ ဒေဝိ၊ ဘဏ္ဍု နန္တကဝါသိနီ၊
ဥစ္ဆင်္ဂဟတ္ထာ ပစိနာသိ၊ တဿာ တေ ကောလိယံ ဖလံ။
ဥဍ္ဍယှတေ န ရမတိ၊ ဘောဂါ ဝိပ္ပဇဟန္တိ တံ [ဝိပ္ပဇဟန္တိ’မံ (?)]၊
တတ္ထေဝိမံ ပဋိနေထ၊ ယတ္ထ ကောလံ ပစိဿတိ။
ဟောန္တိ ဟေတေ မဟာရာဇ၊ ဣဒ္ဓိပ္ပတ္တာယ [ဣဒ္ဓိမတ္တာယ (က။)] နာရိယာ၊
ခမ ဒေဝ သုဇာတာယ၊ မာဿာ [မာသု (က။)] ကုဇ္ဈ ရထေသဘာတိ။
သုဇာတဇာတကံ ဆဋ္ဌံ။
၃၀၇။ ပလာသဇာတကံ (၄-၁-၇)
အစေတနံ ဗြာဟ္မဏ အဿုဏန္တံ၊ ဇာနော အဇာနန္တမိမံ ပလာသံ၊
အာရဒ္ဓဝိရိယော ဓုဝံ အပ္ပမတ္တော၊ သုခသေယျံ ¶ ပုစ္ဆသိ ကိဿ ဟေတု။
ဒူရေ သုတော စေဝ ဗြဟာ စ ရုက္ခော၊ ဒေသေ ဌိတော ဘူတနိဝါသရူပေါ၊
တသ္မာ နမဿာမိ ဣမံ ပလာသံ၊ ယေ စေတ္ထ ဘူတာ တေ [တေ စ (သီ။ ပီ။)] ဓနဿ ဟေတု။
သော တေ ကရိဿာမိ ယထာနုဘာဝံ၊ ကတညုတံ ဗြာဟ္မဏ ပေက္ခမာနော၊
ကထဉှိ အာဂမ္မ သတံ သကာသေ၊ မောဃာနိ တေ အဿု ပရိဖန္ဒိတာနိ။
ယော ¶ တိန္ဒုကရုက္ခဿ ပရော [ပုရော (က။)] ပိလက္ခော [ပိလက္ခု (သီ။ ပီ။)၊ မိလက္ခု (က။)]၊ ပရိဝါရိတော ပုဗ္ဗယညော ဥဠာရော၊
တဿေသ မူလသ္မိံ နိဓိ နိခါတော၊ အဒါယာဒေါ ဂစ္ဆ တံ ဥဒ္ဓရာဟီတိ။
ပလာသဇာတကံ သတ္တမံ။
၃၀၈။ သကုဏဇာတကံ (၄-၁-၈)
အကရမှသ တေ ကိစ္စံ၊ ယံ ဗလံ အဟုဝမှသေ၊
မိဂရာဇ နမော တျတ္ထု၊ အပိ ကိဉ္စိ လဘာမသေ။
မမ ¶ လောဟိတဘက္ခဿ၊ နိစ္စံ လုဒ္ဒါနိ ကုဗ္ဗတော၊
ဒန္တန္တရဂတော သန္တော၊ တံ ဗဟုံ ယမ္ပိ ဇီဝသိ။
အကတညုမကတ္တာရံ ¶ ၊ ကတဿ အပ္ပဋိကာရကံ၊
ယသ္မိံ ကတညုတာ နတ္ထိ၊ နိရတ္ထာ တဿ သေဝနာ။
ယဿ သမ္မုခစိဏ္ဏေန၊ မိတ္တဓမ္မော န လဗ္ဘတိ၊
အနုသူယ [အနုသုယျ (သီ။ ပီ။)] မနက္ကောသံ၊ သဏိကံ တမှာ အပက္ကမေတိ။
သကုဏဇာတကံ အဋ္ဌမံ။
၃၀၉။ ဆဝကဇာတကံ (၄-၁-၉)
သဗ္ဗမိဒံ စရိမံ ကတံ [စရိမဝတံ (သီ။ ပီ။)]၊ ဥဘော ဓမ္မံ န ပဿရေ၊
ဥဘော ပကတိယာ စုတာ၊ ယော စာယံ မန္တေဇ္ဈာပေတိ [မန္တဇ္ဈာယတိ (သီ။)၊ သဇ္ဈာပယတိ (ပီ။)]၊
ယော စ မန္တံ အဓီယတိ။
သာလီနံ ဩဒနံ ဘုဉ္ဇေ၊ သုစိံ မံသူပသေစနံ၊
တသ္မာ ဧတံ န သေဝါမိ၊ ဓမ္မံ ဣသီဟိ သေဝိတံ။
ပရိဗ္ဗဇ မဟာ လောကော [မဟာဗြဟ္မေ (က။)]၊ ပစန္တညေပိ ပါဏိနော၊
မာ တံ အဓမ္မော အာစရိတော၊ အသ္မာ ကုမ္ဘမိဝါဘိဒါ။
ဓိရတ္ထု ¶ တံ ယသလာဘံ၊ ဓနလာဘဉ္စ ဗြာဟ္မဏ၊
ယာ ဝုတ္တိ ဝိနိပါတေန၊ အဓမ္မစရဏေန ဝါတိ။
ဆဝကဇာတကံ နဝမံ။
၃၁၀။ သေယျဇာတကံ (၄-၁-၁၀)
သသမုဒ္ဒပရိယာယံ ¶ ၊ မဟိံ သာဂရကုဏ္ဍလံ၊
န ဣစ္ဆေ သဟ နိန္ဒာယ၊ ဧဝံ သေယျ [သယှ (သီ။ သျာ။ ပီ။)] ဝိဇာနဟိ။
ဓိရတ္ထု တံ ယသလာဘံ၊ ဓနလာဘဉ္စ ဗြာဟ္မဏ၊
ယာ ဝုတ္တိ ဝိနိပါတေန၊ အဓမ္မစရဏေန ဝါ။
အပိ စေ ပတ္တမာဒါယ၊ အနဂါရော ပရိဗ္ဗဇေ၊
သာယေဝ ဇီဝိကာ သေယျော၊ ယာ စာဓမ္မေန ဧသနာ။
အပိ ¶ စေ ပတ္တမာဒါယ၊ အနဂါရော ပရိဗ္ဗဇေ၊
အညံ အဟိံသယံ လောကေ၊ အပိ ရဇ္ဇေန တံ ဝရန္တိ။
သေယျဇာတကံ [သယှဇာတကံ (သီ။ သျာ။ ပီ။)] ဒသမံ။
ကာလိင်္ဂဝဂ္ဂေါ [ဝိဝရဝဂ္ဂေါ (သီ။ ပီ။)] ပဌမော။
တဿုဒ္ဒါနံ –
ဝိဝရဉ္စ အဒေယျ သမိဒ္ဓဝရံ၊ အထ ဒဒ္ဒရ ပါပမဟာတိရဟော၊
အထ ကောလိ ပလာသဝရဉ္စ ကရ၊ စရိမံ သသမုဒ္ဒဝရေန ဒသာတိ။
၂။ ပုစိမန္ဒဝဂ္ဂေါ
၃၁၁။ ပုစိမန္ဒဇာတကံ (၄-၂-၁)
ဥဋ္ဌေဟိ စောရ ကိံ သေသိ၊ ကော အတ္ထော သုပနေန [သုပိတေန (သီ။)၊ သုပိနေန (ပီ။ က။)] တေ၊
မာ ¶ တံ ဂဟေသုံ [ဂဏှေယျုံ (က။)] ရာဇာနော၊ ဂါမေ ကိဗ္ဗိသကာရကံ။
ယံ ¶ နု [နူန (သျာ။)] စောရံ ဂဟေဿန္တိ၊ ဂါမေ ကိဗ္ဗိသကာရကံ၊
ကိံ တတ္ထ ပုစိမန္ဒဿ၊ ဝနေ ဇာတဿ တိဋ္ဌတော။
န တွံ အဿတ္ထ ဇာနာသိ၊ မမ စောရဿ စန္တရံ၊
စောရံ ဂဟေတွာ ရာဇာနော၊ ဂါမေ ကိဗ္ဗိသကာရကံ၊
အပ္ပေန္တိ [အစ္စေန္တိ (သျာ။)] နိမ္ဗသူလသ္မိံ၊ တသ္မိံ မေ သင်္ကတေ မနော။
သင်္ကေယျ သင်္ကိတဗ္ဗာနိ၊ ရက္ခေယျာနာဂတံ ဘယံ၊
အနာဂတဘယာ ဓီရော၊ ဥဘော လောကေ အဝေက္ခတီတိ။
ပုစိမန္ဒဇာတကံ ပဌမံ။
၃၁၂။ ကဿပမန္ဒိယဇာတကံ (၄-၂-၂)
အပိ ကဿပ မန္ဒိယာ၊ ယုဝါ သပတိ ဟန္တိ [သမ္ပဋိဟန္တိ (က။)] ဝါ၊
သဗ္ဗံ တံ ခမတေ ဓီရော၊ ပဏ္ဍိတော တံ တိတိက္ခတိ။
သစေပိ သန္တော ဝိဝဒန္တိ၊ ခိပ္ပံ သန္ဓီယရေ ပုန၊
ဗာလာ ပတ္တာဝ ဘိဇ္ဇန္တိ၊ န တေ သမထမဇ္ဈဂူ။
ဧတေ ¶ ဘိယျော သမာယန္တိ၊ သန္ဓိ တေသံ န ဇီရတိ၊
ယော စာဓိပန္နံ ဇာနာတိ၊ ယော စ ဇာနာတိ ဒေသနံ။
ဧသော ဟိ ဥတ္တရိတရော၊ ဘာရဝဟော ဓုရဒ္ဓရော၊
ယော ပရေသာဓိပန္နာနံ ¶ ၊ သယံ သန္ဓာတုမရဟတီတိ။
ကဿပမန္ဒိယဇာတကံ ဒုတိယံ။
၃၁၃။ ခန္တီဝါဒီဇာတကံ (၄-၂-၃)
ယော တေ ဟတ္ထေ စ ပါဒေ စ၊ ကဏ္ဏနာသဉ္စ ဆေဒယိ၊
တဿ ကုဇ္ဈ မဟာဝီရ၊ မာ ရဋ္ဌံ ဝိနသာ [ဝိနဿ (က။ သီ။ သျာ။ က။)] ဣဒံ။
ယော မေ ဟတ္ထေ စ ပါဒေ စ၊ ကဏ္ဏနာသဉ္စ ဆေဒယိ၊
စိရံ ဇီဝတု သော ရာဇာ၊ န ဟိ ကုဇ္ဈန္တိ မာဒိသာ။
အဟူ အတီတမဒ္ဓါနံ [အဟု အတီတမဒ္ဓါနေ (သျာ။ ပီ။ က။)]၊ သမဏော ခန္တိဒီပနော၊
တံ ခန္တိယာယေဝ ဌိတံ၊ ကာသိရာဇာ အဆေဒယိ။
တဿ ¶ ကမ္မ [ကမ္မဿ (သီ။ ပီ။)] ဖရုသဿ၊ ဝိပါကော ကဋုကော အဟု၊
ယံ ကာသိရာဇာ ဝေဒေသိ၊ နိရယမှိ သမပ္ပိတောတိ။
ခန္တီဝါဒီဇာတကံ တတိယံ။
၃၁၄။ လောဟကုမ္ဘိဇာတကံ (၄-၂-၄)
ဒုဇ္ဇီဝိတမဇီဝိမှ၊ ယေ သန္တေ [ယေသံ နော (သျာ။ က။)] န ဒဒမှသေ၊
ဝိဇ္ဇမာနေသု ဘောဂေသု၊ ဒီပံ နာကမှ အတ္တနော။
သဋ္ဌိ [သဋ္ဌိံ (သျာ။)] ဝဿသဟဿာနိ၊ ပရိပုဏ္ဏာနိ သဗ္ဗသော၊
နိရယေ ပစ္စမာနာနံ၊ ကဒါ အန္တော ဘဝိဿတိ။
နတ္ထိ အန္တော ကုတော အန္တော၊ န အန္တော ပဋိဒိဿတိ၊
တဒါ ¶ ဟိ ပကတံ ပါပံ၊ မမ တုယှဉ္စ မာရိသာ [မာရိသ (သီ။ သျာ။ ပီ။)]။
သောဟံ နူန ဣတော ဂန္တွာ၊ ယောနိံ လဒ္ဓါန မာနုသိံ၊
ဝဒညူ သီလသမ္ပန္နော၊ ကာဟာမိ ကုသလံ ဗဟုန္တိ။
လောဟကုမ္ဘိဇာတကံ စတုတ္ထံ။
၃၁၅။ သဗ္ဗမံသလာဘဇာတကံ (၄-၂-၅)
ဖရုသာ ¶ ဝတ တေ ဝါစာ၊ မံသံ [သမ္မ (ပီ။ က။)] ယာစနကော အသိ [စသိ (ပီ။)]၊
ကိလောမသဒိသီ [ကိလောမဿ သဒိသာ (ပီ။)] ဝါစာ၊ ကိလောမံ သမ္မ ဒမ္မိ တေ။
အင်္ဂမေတံ မနုဿာနံ၊ ဘာတာ လောကေ ပဝုစ္စတိ၊
အင်္ဂဿ သဒိသီ ဝါစာ [အင်္ဂဿဒိသီ တေ ဝါစာ (က။)]၊ အင်္ဂံ သမ္မ ဒဒါမိ တေ။
တာတာတိ ပုတ္တော ဝဒမာနော၊ ကမ္ပေတိ [သမ္မေတိ (က။)] ဟဒယံ ပိတု၊
ဟဒယဿ သဒိသီ [ဟဒယဿဒိသီ (က။)] ဝါစာ၊ ဟဒယံ သမ္မ ဒမ္မိ တေ။
ယဿ ဂါမေ သခါ နတ္ထိ၊ ယထာရညံ တထေဝ တံ၊
သဗ္ဗဿ သဒိသီ ဝါစာ၊ သဗ္ဗံ သမ္မ ဒဒါမိ တေတိ။
သဗ္ဗမံသလာဘဇာတကံ [မံသဇာတကံ (သီ။ သျာ။ ပီ။)] ပဉ္စမံ။
၃၁၆။ သသပဏ္ဍိတဇာတကံ (၄-၂-၆)
သတ္တ ¶ မေ ရောဟိတာ မစ္ဆာ၊ ဥဒကာ ထလမုဗ္ဘတာ၊
ဣဒံ ဗြာဟ္မဏ မေ အတ္ထိ၊ ဧတံ ဘုတွာ ဝနေ ဝသ။
ဒုဿ မေ ခေတ္တပါလဿ၊ ရတ္တိဘတ္တံ အပါဘတံ၊
မံသသူလာ ¶ စ ဒွေ ဂေါဓာ၊ ဧကဉ္စ ဒဓိဝါရကံ၊
ဣဒံ ဗြာဟ္မဏ မေ အတ္ထိ၊ ဧတံ ဘုတွာ ဝနေ ဝသ။
အမ္ဗပက္ကံ ဒကံ [အမ္ဗပက္ကောဒကံ (သီ။ ပီ။)] သီတံ၊ သီတစ္ဆာယာ မနောရမာ [သီတစ္ဆာယံ မနောရမံ (သီ။ သျာ။ ပီ။)]၊
ဣဒံ ဗြာဟ္မဏ မေ အတ္ထိ၊ ဧတံ ဘုတွာ ဝနေ ဝသ။
န သသဿ တိလာ အတ္ထိ၊ န မုဂ္ဂါ နပိ တဏ္ဍုလာ၊
ဣမိနာ အဂ္ဂိနာ ပက္ကံ၊ မမံ [မံသံ (က။)] ဘုတွာ ဝနေ ဝသာတိ။
သသပဏ္ဍိတဇာတကံ ဆဋ္ဌံ။
၃၁၇။ မတရောဒနဇာတကံ (၄-၂-၇)
မတံ မတံ ဧဝ [မတမတမေဝ (သီ။ သျာ။ ပီ။)] ရောဒထ၊ န ဟိ တံ ရောဒထ ယော မရိဿတိ၊
သဗ္ဗေပိ [သဗ္ဗေဝ (သီ။ သျာ။ ပီ။)] သရီရဓာရိနော၊ အနုပုဗ္ဗေန ဇဟန္တိ ဇီဝိတံ။
ဒေဝမနုဿာ စတုပ္ပဒါ၊ ပက္ခိဂဏာ ဥရဂါ စ ဘောဂိနော၊
သမှိ [ယမှိ (သျာ။)၊ အသ္မိံ (ပီ။ က။)] သရီရေ အနိဿရာ၊ ရမမာနာဝ ဇဟန္တိ ဇီဝိတံ။
ဧဝံ ¶ စလိတံ အသဏ္ဌိတံ၊ သုခဒုက္ခံ မနုဇေသွပေက္ခိယ၊
ကန္ဒိတရုဒိတံ နိရတ္ထကံ၊ ကိံ ဝေါ သောကဂဏာဘိကီရရေ။
ဓုတ္တာ စ သောဏ္ဍာ [ဓုတ္တာ သောဏ္ဍာ (သီ။)၊ ဓုတ္တာ သောဏ္ဍာ စ (သျာ။)] အကတာ၊ ဗာလာ သူရာ အယောဂိနော [ဗာလာ သူရာ ဝီရာ အယောဂိနော (ပီ။)]၊
ဓီရံ မညန္တိ ဗာလောတိ၊ ယေ ဓမ္မဿ အကောဝိဒါတိ။
မတရောဒနဇာတကံ သတ္တမံ။
၃၁၈။ ကဏဝေရဇာတကံ (၄-၂-၈)
ယံ ¶ ¶ တံ ဝသန္တသမယေ၊ ကဏဝေရေသု ဘာဏုသု၊
သာမံ ဗာဟာယ ပီဠေသိ၊ သာ တံ အာရောဂျမဗြဝိ။
အမ္ဘော န ကိရ သဒ္ဓေယျံ၊ ယံ ဝါတော ပဗ္ဗတံ ဝဟေ၊
ပဗ္ဗတဉ္စေ ဝဟေ ဝါတော၊ သဗ္ဗမ္ပိ ပထဝိံ ဝဟေ၊
ယတ္ထ သာမာ ကာလကတာ [ကာလင်္ကတာ (က။)]၊ သာ မံ အာရောဂျမဗြဝိ။
န စေဝ သာ ကာလကတာ၊ န စ သာ အညမိစ္ဆတိ၊
ဧကဘတ္တိကိနီ [ဧကဘတ္တာ ကိရ (သီ။ သျာ။)၊ ဧကဘတ္တကိနီ (ပီ။)] သာမာ၊ တမေဝ အဘိကင်္ခတိ။
အသန္ထုတံ မံ စိရသန္ထုတေန [အသန္ဓတံ မံ စိရသန္ဓတေန (က။)]၊ နိမီနိ သာမာ အဓုဝံ ဓုဝေန၊
မယာပိ သာမာ နိမိနေယျ အညံ၊ ဣတော အဟံ ဒူရတရံ ဂမိဿန္တိ။
ကဏဝေရဇာတကံ အဋ္ဌမံ။
၃၁၉။ တိတ္တိရဇာတကံ (၄-၂-၉)
သုသုခံ ဝတ ဇီဝါမိ၊ လဘာမိ စေဝ ဘုဉ္ဇိတုံ၊
ပရိပန္ထေဝ တိဋ္ဌာမိ၊ ကာ နု ဘန္တေ ဂတီ မမ။
မနော စေ တေ နပ္ပဏမတိ၊ ပက္ခိ ပါပဿ ကမ္မုနော၊
အဗျာဝဋဿ ဘဒြဿ၊ န ပါပမုပလိမ္ပတိ။
ဉာတကော နော နိသိန္နောတိ၊ ဗဟု အာဂစ္ဆတေ ဇနော၊
ပဋိစ္စ ¶ ကမ္မံ ဖုသတိ၊ တသ္မိံ မေ သင်္ကတေ မနော။
န ပဋိစ္စ ကမ္မံ ဖုသတိ၊ မနော စေ နပ္ပဒုဿတိ၊
အပ္ပောဿုက္ကဿ ဘဒြဿ၊ န ပါပမုပလိမ္ပတီတိ။
တိတ္တိရဇာတကံ နဝမံ။
၃၂၀။ သုစ္စဇဇာတကံ (၄-၂-၁၀)
သုစ္စဇံ ¶ ¶ ဝတ နစ္စဇိ၊ ဝါစာယ အဒဒံ ဂိရိံ၊
ကိံ ဟိတဿ စဇန္တဿ၊ ဝါစာယ အဒဒ ပဗ္ဗတံ။
ယဉှိ ကယိရာ တဉှိ ဝဒေ၊ ယံ န ကယိရာ န တံ ဝဒေ၊
အကရောန္တံ ဘာသမာနံ၊ ပရိဇာနန္တိ ပဏ္ဍိတာ။
ရာဇပုတ္တ နမော တျတ္ထု၊ သစ္စေ ဓမ္မေ ဌိတော စသိ၊
ယဿ တေ ဗျသနံ ပတ္တော၊ သစ္စသ္မိံ ရမတေ မနော။
ယာ ဒလိဒ္ဒီ ဒလိဒ္ဒဿ၊ အဍ္ဎာ အဍ္ဎဿ ကိတ္တိမ [ကိတ္တိမာ (သီ။ သျာ။ ပီ။)]၊
သာ ဟိဿ ပရမာ ဘရိယာ၊ သဟိရညဿ ဣတ္ထိယောတိ။
သုစ္စဇဇာတကံ ဒသမံ။
ပုစိမန္ဒဝဂ္ဂေါ ဒုတိယော။
တဿုဒ္ဒါနံ –
အထ စောရ သကဿပ ခန္တီဝရော၊ ဒုဇ္ဇီဝိတတာ စ ဝရာ ဖရုသာ၊
အထ ¶ သသ မတဉ္စ ဝသန္တ သုခံ၊ သုစ္စဇံဝတနစ္စဇိနာ စ ဒသာတိ။
၃။ ကုဋိဒူသကဝဂ္ဂေါ
၃၂၁။ ကုဋိဒူသကဇာတကံ (၄-၃-၁)
မနုဿဿေဝ တေ သီသံ၊ ဟတ္ထပါဒါ စ ဝါနရ၊
အထ ကေန နု ဝဏ္ဏေန၊ အဂါရံ တေ န ဝိဇ္ဇတိ။
မနုဿဿေဝ မေ သီသံ၊ ဟတ္ထပါဒါ စ သိင်္ဂိလ [သိင်္ဂါလ (က။)၊ ပိင်္ဂလ (ဋီကာ)]၊
ယာဟု သေဋ္ဌာ မနုဿေသု၊ သာ မေ ပညာ န ဝိဇ္ဇတိ။
အနဝဋ္ဌိတစိတ္တဿ ¶ ၊ လဟုစိတ္တဿ ဒုဗ္ဘိနော [ဒူဘိနော (ပီ။)]၊
နိစ္စံ အဒ္ဓုဝသီလဿ၊ သုခဘာဝေါ [သုစိဘာဝေါ (သီ။)၊ သုခဘာဂေါ (?)] န ဝိဇ္ဇတိ။
သော ¶ ကရဿု အာနုဘာဝံ၊ ဝီတိဝတ္တဿု သီလိယံ၊
သီတဝါတပရိတ္တာဏံ၊ ကရဿု ကုဋဝံ [ကုဋိကံ (သီ။ သျာ။)] ကပီတိ။
ကုဋိဒူသက [သိင်္ဂါလသကုဏ (က။)] ဇာတကံ ပဌမံ။
၃၂၂။ ဒုဒ္ဒုဘဇာတကံ (၄-၃-၂)
ဒုဒ္ဒုဘာယတိ [ဒဒ္ဒဘာယတိ (သီ။ ပီ။)] ဘဒ္ဒန္တေ၊ ယသ္မိံ ဒေသေ ဝသာမဟံ၊
အဟမ္ပေတံ န ဇာနာမိ၊ ကိမေတံ ဒုဒ္ဒုဘာယတိ။
ဗေလုဝံ ¶ ပတိတံ သုတွာ၊ ဒုဒ္ဒုဘန္တိ [ဒဒ္ဒဘန္တိ (သီ။)] သသော ဇဝိ၊
သသဿ ဝစနံ သုတွာ၊ သန္တတ္တာ မိဂဝါဟိနီ။
အပ္ပတွာ ပဒဝိညာဏံ၊ ပရဃောသာနုသာရိနော၊
ပနာဒပရမာ ဗာလာ၊ တေ ဟောန္တိ ပရပတ္တိယာ။
ယေ စ သီလေန သမ္ပန္နာ၊ ပညာယူပသမေ ရတာ၊
အာရကာ ဝိရတာ ဓီရာ၊ န ဟောန္တိ ပရပတ္တိယာတိ။
ဒုဒ္ဒုဘဇာတကံ [ဒဒ္ဒဘဇာတကံ (သီ။ ပီ။)] ဒုတိယံ။
၃၂၃။ ဗြဟ္မဒတ္တဇာတကံ (၄-၃-၃)
ဒွယံ ယာစနကော ရာဇ၊ ဗြဟ္မဒတ္တ နိဂစ္ဆတိ၊
အလာဘံ ဓနလာဘံ ဝါ၊ ဧဝံ ဓမ္မာ ဟိ ယာစနာ။
ယာစနံ ရောဒနံ အာဟု၊ ပဉ္စာလာနံ ရထေသဘ၊
ယော ယာစနံ ပစ္စက္ခာတိ၊ တမာဟု ပဋိရောဒနံ။
မာ မဒ္ဒသံသု ရောဒန္တံ၊ ပဉ္စာလာ သုသမာဂတာ၊
တုဝံ ဝါ ပဋိရောဒန္တံ၊ တသ္မာ ဣစ္ဆာမဟံ ရဟော။
ဒဒါမိ ¶ တေ ဗြာဟ္မဏ ရောဟိဏီနံ၊ ဂဝံ သဟဿံ သဟ ပုင်္ဂဝေန၊
အရိယော ဟိ အရိယဿ ကထံ န ဒဇ္ဇာ [ဒဇ္ဇေ (သီ။)၊ ဒဇ္ဇံ (?)]၊ သုတွာန ဂါထာ တဝ ဓမ္မယုတ္တာတိ။
ဗြဟ္မဒတ္တဇာတကံ တတိယံ။
၃၂၄။ စမ္မသာဋကဇာတကံ (၄-၃-၄)
ကလျာဏရူပေါ ¶ ဝတယံ စတုပ္ပဒေါ၊ သုဘဒ္ဒကော စေဝ သုပေသလော စ၊
ယော ဗြာဟ္မဏံ ဇာတိမန္တူပပန္နံ၊ အပစာယတိ မေဏ္ဍဝရော ယသဿီ။
မာ ¶ ဗြာဟ္မဏ ဣတ္တရဒဿနေန၊ ဝိဿာသမာပဇ္ဇိ စတုပ္ပဒဿ၊
ဒဠှပ္ပဟာရံ အဘိကင်္ခမာနော [အဘိကတ္တုကာမော (သျာ။)]၊ အဝသက္ကတီ ဒဿတိ သုပ္ပဟာရံ။
ဦရုဋ္ဌိ [ဦရဋ္ဌိ (သီ။)] ဘဂ္ဂံ ပဝဋ္ဋိတော [ပတိတော (သီ။ သျာ။)] ခါရိဘာရော၊ သဗ္ဗဉ္စ ဘဏ္ဍံ ဗြာဟ္မဏဿ [ဗြာဟ္မဏဿီဓ (က။ သီ။ ပီ။)၊ ဗြာဟ္မဏဿေဝ (က။ သီ။ သျာ။ က။)] ဘိန္နံ၊
ဥဘောပိ ဗာဟာ ပဂ္ဂယှ [ပဂ္ဂယျေဝ (သျာ။)၊ ပဂ္ဂဟီယ (?)] ကန္ဒတိ [ဗာဟာ ပဂ္ဂယျ ကန္ဒတိ (ပီ။ က။)]၊ အဘိဓာဝထ ဟညတေ ဗြဟ္မစာရီ။
ဧဝံ သော နိဟတော သေတိ၊ ယော အပူဇံ ပသံသတိ [နမဿတိ (ပီ။)]၊
ယထာဟမဇ္ဇ ပဟတော၊ ဟတော မေဏ္ဍေန ဒုမ္မတီတိ။
စမ္မသာဋကဇာတကံ စတုတ္ထံ။
၃၂၅။ ဂေါဓရာဇဇာတကံ (၄-၃-၅)
သမဏံ ¶ တံ မညမာနော၊ ဥပဂစ္ဆိမသညတံ၊
သော မံ ဒဏ္ဍေန ပါဟာသိ၊ ယထာ အဿမဏော တထာ။
ကိံ ¶ တေ ဇဋာဟိ ဒုမ္မေဓ၊ ကိံ တေ အဇိနသာဋိယာ၊
အဗ္ဘန္တရံ တေ ဂဟနံ၊ ဗာဟိရံ ပရိမဇ္ဇသိ။
ဧဟိ ဂေါဓ နိဝတ္တဿု၊ ဘုဉ္ဇ သာလီနမောဒနံ၊
တေလံ လောဏဉ္စ မေ အတ္ထိ၊ ပဟူတံ မယှ ပိပ္ဖလိ။
ဧသ ဘိယျော ပဝေက္ခာမိ၊ ဝမ္မိကံ သတပေါရိသံ၊
တေလံ လောဏဉ္စ ကိတ္တေသိ [ကိန္တေသိ (သျာ။ ပီ။)]၊ အဟိတံ မယှ ပိပ္ဖလီတိ။
ဂေါဓရာဇဇာတကံ ပဉ္စမံ။
၃၂၆။ ကက္ကာရုဇာတကံ (၄-၃-၆)
ကာယေန ယော နာဝဟရေ၊ ဝါစာယ န မုသာ ဘဏေ၊
ယသော လဒ္ဓါ န မဇ္ဇေယျ၊ သ ဝေ ကက္ကာရုမရဟတိ။
ဓမ္မေန ဝိတ္တမေသေယျ၊ န နိကတျာ ဓနံ ဟရေ၊
ဘောဂေ လဒ္ဓါ န မဇ္ဇေယျ၊ သ ဝေ ကက္ကာရုမရဟတိ။
ယဿ စိတ္တံ အဟာလိဒ္ဒံ၊ သဒ္ဓါ စ အဝိရာဂိနီ၊
ဧကော သာဒုံ န ဘုဉ္ဇေယျ၊ သ ဝေ ကက္ကာရုမရဟတိ။
သမ္မုခါ ဝါ တိရောက္ခာ ဝါ [ပရောက္ခာ ဝါ (ပီ။)၊ ပရမ္မုခါ (က။)]၊ ယော သန္တေ န ပရိဘာသတိ၊
ယထာဝါဒီ ¶ တထာကာရီ၊ သ ဝေ ကက္ကာရုမရဟတီတိ။
ကက္ကာရုဇာတကံ ဆဋ္ဌံ။
၃၂၇။ ကာကဝတီဇာတကံ (၄-၃-၇)
ဝါတိ ¶ စာယံ [ဝါယံ (က။)] တတော ဂန္ဓော၊ ယတ္ထ မေ ဝသတီ ပိယာ၊
ဒူရေ ဣတော ဟိ ကာကဝတီ [ကာကာတီ (သီ။)၊ ကာကာတိ (သျာ။ ပီ။)]၊ ယတ္ထ မေ နိရတော မနော။
ကထံ သမုဒ္ဒမတရီ၊ ကထံ အတရိ ကေပုကံ [ကေဗုကံ (သီ။ ပီ။)]၊
ကထံ သတ္တ သမုဒ္ဒါနိ၊ ကထံ သိမ္ဗလိမာရုဟိ။
တယာ သမုဒ္ဒမတရိံ၊ တယာ အတရိ ကေပုကံ [ကေဗုကံ (သီ။ ပီ။)]၊
တယာ သတ္တ သမုဒ္ဒါနိ၊ တယာ သိမ္ဗလိမာရုဟိံ။
ဓိရတ္ထုမံ ¶ မဟာကာယံ၊ ဓိရတ္ထုမံ အစေတနံ၊
ယတ္ထ ဇာယာယဟံ ဇာရံ၊ အာဝဟာမိ ဝဟာမိ စာတိ။
ကာကဝတီဇာတကံ သတ္တမံ။
၃၂၈။ အနနုသောစိယဇာတကံ (၄-၃-၈)
ဗဟူနံ ဝိဇ္ဇတီ ဘောတီ၊ တေဟိ မေ ကိံ ဘဝိဿတိ၊
တသ္မာ ဧတံ န သောစာမိ၊ ပိယံ သမ္မိလ္လဟာသိနိံ။
တံ တံ စေ အနုသောစေယျ၊ ယံ ယံ တဿ န ဝိဇ္ဇတိ၊
အတ္တာနမနုသောစေယျ၊ သဒါ မစ္စုဝသံ ပတံ။
န ¶ ဟေဝ ဌိတံ နာသီနံ၊ န သယာနံ န ပဒ္ဓဂုံ [ပတ္ထဂုံ (သျာ။)]၊
ယာဝ ဗျာတိ နိမိသတိ၊ တတြာပိ ရသတီ [သရတီ (သီ။ သျာ။ ပီ။)] ဝယော။
တတ္ထတ္တနိ ဝတပ္ပဒ္ဓေ [ဝတ ပန္ထေ (သျာ။)၊ ဝတ ဗန္ဓေ (က။) ဝတ + ပ-အဒ္ဓေ = ဝတပ္ပဒ္ဓေ]၊ ဝိနာဘာဝေ အသံသယေ၊
ဘူတံ သေသံ ဒယိတဗ္ဗံ၊ ဝီတံ အနနုသောစိယန္တိ [စဝိတံ နာနုသောစိယန္တိ (သျာ။)၊ မတန္တံ နာနုသောစိယံ (က။)]။
အနနုသောစိယဇာတကံ အဋ္ဌမံ။
၃၂၉။ ကာဠဗာဟုဇာတကံ (၄-၃-၉)
ယံ အန္နပါနဿ ပုရေ လဘာမ၊ တံ ဒါနိ သာခမိဂမေဝ ဂစ္ဆတိ၊
ဂစ္ဆာမ ဒါနိ ဝနမေဝ ရာဓ၊ အသက္ကတာ စသ္မ ဓနဉ္ဇယာယ [ဓနဉ္စယာယ (က။)]။
လာဘော အလာဘော ယသော အယသော စ၊ နိန္ဒာ ပသံသာ စ သုခဉ္စ ဒုက္ခံ၊
ဧတေ အနိစ္စာ မနုဇေသု ဓမ္မာ၊ မာ သောစိ ကိံ သောစသိ ပေါဋ္ဌပါဒ။
အဒ္ဓါ ¶ တုဝံ ပဏ္ဍိတကောသိ ရာဓ၊ ဇာနာသိ အတ္ထာနိ အနာဂတာနိ၊
ကထံ ¶ နု သာခါမိဂံ ဒက္ခိသာမ [ဒက္ခိယာမ (က။)၊ ဒက္ခာမ (သျာ။)]၊ နိဒ္ဓါဝိတံ [နိဒ္ဓါပိတံ (သီ။ သျာ။)၊ နိဗ္ဗာပိတံ (ပီ။)၊ နိစ္ဆဒံ (က။)] ရာဇကုလတောဝ ဇမ္မံ။
စာလေတိ ¶ ကဏ္ဏံ ဘကုဋိံ ကရောတိ၊ မုဟုံ မုဟုံ ဘာယယတေ [ဘာယတေ (သျာ။)၊ ဘာယာပတေ (က။)] ကုမာရေ၊
သယမေဝ တံ ကာဟတိ ကာဠဗာဟု၊ ယေနာရကာ ဌဿတိ အန္နပါနာတိ။
ကာဠဗာဟုဇာတကံ နဝမံ။
၃၃၀။ သီလဝီမံသဇာတကံ (၄-၃-၁၀)
သီလံ ကိရေဝ ကလျာဏံ၊ သီလံ လောကေ အနုတ္တရံ၊
ပဿ ဃောရဝိသော နာဂေါ၊ သီလဝါတိ န ဟညတိ။
ယာဝဒေဝဿဟူ ကိဉ္စိ၊ တာဝဒေဝ အခါဒိသုံ၊
သင်္ဂမ္မ ကုလလာ လောကေ၊ န ဟိံသန္တိ အကိဉ္စနံ။
သုခံ နိရာသာ သုပတိ၊ အာသာ ဖလဝတီ သုခါ၊
အာသံ နိရာသံ ကတွာန၊ သုခံ သုပတိ ပိင်္ဂလာ။
န သမာဓိပရော အတ္ထိ၊ အသ္မိံ လောကေ ပရမှိ စ၊
န ပရံ နာပိ အတ္တာနံ၊ ဝိဟိံသတိ သမာဟိတောတိ။
သီလဝီမံသဇာတကံ ဒသမံ။
ကုဋိဒူသကဝဂ္ဂေါ တတိယော။
တဿုဒ္ဒါနံ –
သမနုဿ ¶ -သဒုဒ္ဒုဘ-ယာစနကော၊ အထ မေဏ္ဍဝရုတ္တမ-ဂေါဓဝရော၊
အထ ကာယသကေပုက ဘောတီဝရော၊ အထ ရာဓသုသီလဝရေန ဒသာတိ။
၄။ ကောကိလဝဂ္ဂေါ
၃၃၁။ ကောကိလဇာတကံ (၄-၄-၁)
ယော ¶ ဝေ ကာလေ အသမ္ပတ္တေ၊ အတိဝေလံ ပဘာသတိ၊
ဧဝံ သော နိဟတော သေတိ၊ ကောကိလာယိဝ အတြဇော။
န ဟိ သတ္ထံ သုနိသိတံ၊ ဝိသံ ဟလာဟလာမိဝ [ဟလာဟလံ ဣဝ (ပီ။)]၊
ဧဝံ နိကဋ္ဌေ [နိက္ကဍ္ဎေ (သျာ။)၊ နိကဍ္ဎေ (က။)] ပါတေတိ၊ ဝါစာ ဒုဗ္ဘာသိတာ ယထာ။
တသ္မာ ကာလေ အကာလေ ဝါ [အကာလေ စ (သီ။ သျာ။)]၊ ဝါစံ ရက္ခေယျ ပဏ္ဍိတော၊
နာတိဝေလံ ပဘာသေယျ၊ အပိ အတ္တသမမှိ ဝါ။
ယော ¶ စ ကာလေ မိတံ ဘာသေ၊ မတိပုဗ္ဗော ဝိစက္ခဏော၊
သဗ္ဗေ အမိတ္တေ အာဒေတိ၊ သုပဏ္ဏော ဥရဂါမိဝါတိ။
ကောကိလဇာတကံ [ကောကာလိကဇာတကံ (သဗ္ဗတ္ထ)] ပဌမံ။
၃၃၂။ ရထလဋ္ဌိဇာတကံ (၄-၄-၂)
အပိ ဟန္တွာ ဟတော ဗြူတိ၊ ဇေတွာ ဇိတောတိ ဘာသတိ၊
ပုဗ္ဗဝက္ခာယိနော ¶ [ပုဗ္ဗမက္ခာယိနော (သီ။ သျာ။)] ရာဇ၊ အညဒတ္ထု [ဧကဒတ္ထု (သီ။ ပီ။)] န သဒ္ဒဟေ။
တသ္မာ ပဏ္ဍိတဇာတိယော၊ သုဏေယျ ဣတရဿပိ၊
ဥဘိန္နံ ဝစနံ သုတွာ၊ ယထာ ဓမ္မော တထာ ကရေ။
အလသော ဂိဟီ ကာမဘောဂီ န သာဓု၊ အသညတော ပဗ္ဗဇိတော န သာဓု၊
ရာဇာ န သာဓု အနိသမ္မကာရီ၊ ယော ပဏ္ဍိတော ကောဓနော တံ န သာဓု။
နိသမ္မ ခတ္တိယော ကယိရာ၊ နာနိသမ္မ ဒိသမ္ပတိ၊
နိသမ္မကာရိနော ရာဇ [ရညော (သီ။ သျာ။)]၊ ယသော ကိတ္တိ စ ဝဍ္ဎတီတိ။
ရထလဋ္ဌိဇာတကံ ဒုတိယံ။
၃၃၃။ ပက္ကဂေါဓဇာတကံ (၄-၄-၃)
တဒေဝ ¶ မေ တွံ ဝိဒိတော၊ ဝနမဇ္ဈေ ရထေသဘ၊
ယဿ တေ ခဂ္ဂဗဒ္ဓဿ၊ သန္နဒ္ဓဿ တိရီဋိနော၊
အဿတ္ထဒုမသာခါယ၊ ပက္ကာ ဂေါဓာ ပလာယထ။
နမေ နမန္တဿ ဘဇေ ဘဇန္တံ၊ ကိစ္စာနုကုဗ္ဗဿ ကရေယျ ကိစ္စံ၊
နာနတ္ထကာမဿ ကရေယျ အတ္ထံ၊ အသမ္ဘဇန္တမ္ပိ န သမ္ဘဇေယျ။
စဇေ ¶ စဇန္တံ ဝနထံ န ကယိရာ၊ အပေတစိတ္တေန န သမ္ဘဇေယျ၊
ဒိဇော ဒုမံ ခီဏဖလန္တိ [ဖလံဝ (က။ သီ။ သျာ။ က။)၊ ဒုကနိပါတေ ပုဋဘတ္တဇာတကေန သံသန္ဒေတဗ္ဗံ] ဉတွာ၊ အညံ သမေက္ခေယျ မဟာ ဟိ လောကော။
သော တေ ကရိဿာမိ ယထာနုဘာဝံ၊ ကတညုတံ ခတ္တိယေ [ခတ္တိယော (သျာ။ က။)] ပေက္ခမာနော၊
သဗ္ဗဉ္စ တေ ဣဿရိယံ ဒဒါမိ၊ ယဿိစ္ဆသီ တဿ တုဝံ ဒဒါမီတိ။
ပက္ကဂေါဓဇာတကံ [ဂေါဓဇာတကံ (သီ။ သျာ။ ပီ။)] တတိယံ။
၃၃၄။ ရာဇောဝါဒဇာတကံ (၄-၄-၄)
ဂဝံ စေ တရမာနာနံ၊ ဇိမှံ ဂစ္ဆတိ ပုင်္ဂဝေါ၊
သဗ္ဗာ တာ ဇိမှံ ဂစ္ဆန္တိ [သဗ္ဗာ ဂါဝီ ဇိမှံ ယန္တိ (သီ။ သျာ။)]၊ နေတ္တေ ဇိမှံ ဂတေ သတိ။
ဧဝမေဝ ¶ မနုဿေသု၊ ယော ဟောတိ သေဋ္ဌသမ္မတော၊
သော စေ အဓမ္မံ စရတိ၊ ပဂေဝ ဣတရာ ပဇာ၊
သဗ္ဗံ ရဋ္ဌံ ဒုခံ သေတိ၊ ရာဇာ စေ ဟောတိ အဓမ္မိကော။
ဂဝံ စေ တရမာနာနံ၊ ဥဇုံ ဂစ္ဆတိ ပုင်္ဂဝေါ၊
သဗ္ဗာ ဂါဝီ ဥဇုံ ယန္တိ [သဗ္ဗာ တာ ဥဇုံ ဂစ္ဆန္တိ (ပီ။ အ။ နိ။ ၄။၇၀)]၊ နေတ္တေ ဥဇုံ ဂတေ သတိ။
ဧဝမေဝ ¶ မနုဿေသု၊ ယော ဟောတိ သေဋ္ဌသမ္မတော၊
သော သစေ ဓမ္မံ စရတိ၊ ပဂေဝ ဣတရာ ပဇာ၊
သဗ္ဗံ ¶ ရဋ္ဌံ သုခံ သေတိ၊ ရာဇာ စေ ဟောတိ ဓမ္မိကောတိ။
ရာဇောဝါဒဇာတကံ စတုတ္ထံ။
၃၃၅။ ဇမ္ဗုကဇာတကံ (၄-၄-၅)
ဗြဟာ ပဝဍ္ဎကာယော သော၊ ဒီဃဒါဌော စ ဇမ္ဗုက၊
န တွံ တတ္ထ ကုလေ ဇာတော၊ ယတ္ထ ဂဏှန္တိ ကုဉ္ဇရံ။
အသီဟော သီဟမာနေန၊ ယော အတ္တာနံ ဝိကုဗ္ဗတိ၊
ကောတ္ထူဝ [ကုဋ္ဌူဝ (သီ။)၊ ကုတ္ထုဝ (သျာ။ ပီ)] ဂဇမာသဇ္ဇ၊ သေတိ ဘူမျာ အနုတ္ထုနံ။
ယသဿိနော ဥတ္တမပုဂ္ဂလဿ၊ သဉ္ဇာတခန္ဓဿ မဟဗ္ဗလဿ၊
အသမေက္ခိယ ထာမဗလူပပတ္တိံ၊ သ သေတိ နာဂေန ဟတောယံ ဇမ္ဗုကော။
ယော စီဓ ကမ္မံ ကုရုတေ ပမာယ၊ ထာမဗ္ဗလံ အတ္တနိ သံဝိဒိတွာ၊
ဇပ္ပေန မန္တေန သုဘာသိတေန၊ ပရိက္ခဝါ သော ဝိပုလံ ဇိနာတီတိ။
ဇမ္ဗုကဇာတကံ ပဉ္စမံ။
၃၃၆။ ဗြဟာဆတ္တဇာတကံ (၄-၄-၆)
တိဏံ တိဏန္တိ လပသိ၊ ကော နု တေ တိဏမာဟရိ၊
ကိံ ¶ နု တေ တိဏကိစ္စတ္ထိ၊ တိဏမေဝ ပဘာသသိ။
ဣဓာဂမာ ဗြဟ္မစာရီ၊ ဗြဟာ ဆတ္တော ဗဟုဿုတော၊
သော မေ [သော ဝေ (က။)] သဗ္ဗံ သမာဒါယ၊ တိဏံ နိက္ခိပ္ပ ဂစ္ဆတိ။
ဧဝေတံ ဟောတိ ကတ္တဗ္ဗံ၊ အပ္ပေန ဗဟုမိစ္ဆတာ၊
သဗ္ဗံ သကဿ အာဒါနံ၊ အနာဒါနံ တိဏဿ စ။ ( ) [(တိဏဿ စာဋီသု ဂတော၊ တတ္ထ ကာ ပရိဒေဝနာ) (သီ။ သျာ။) (စာဋီသု ပက္ခိပိတွာန၊ တတ္ထ ကာ ပရိဒေဝနာ) (က။)]
သီလဝန္တော ¶ ¶ န ကုဗ္ဗန္တိ၊ ဗာလော သီလာနိ ကုဗ္ဗတိ၊
အနိစ္စသီလံ ဒုဿီလျံ [ဒုဿီလံ (ပီ။)]၊ ကိံ ပဏ္ဍိစ္စံ ကရိဿတီတိ။
ဗြဟာဆတ္တဇာတကံ ဆဋ္ဌံ။
၃၃၇။ ပီဌဇာတကံ (၄-၄-၇)
န တေ ပီဌမဒါယိမှာ [မဒါသိမှ (ပီ။ က။)]၊ န ပါနံ နပိ ဘောဇနံ၊
ဗြဟ္မစာရိ ခမဿု မေ၊ ဧတံ ပဿာမိ အစ္စယံ။
နေဝါဘိသဇ္ဇာမိ န စာပိ ကုပ္ပေ၊ န စာပိ မေ အပ္ပိယမာသိ ကိဉ္စိ၊
အထောပိ မေ အာသိ မနောဝိတက္ကော၊ ဧတာဒိသော နူန ကုလဿ ဓမ္မော။
ဧသသ္မာကံ ကုလေ ဓမ္မော၊ ပိတုပိတာမဟော သဒါ၊
အာသနံ ဥဒကံ ပဇ္ဇံ၊ သဗ္ဗေတံ နိပဒါမသေ။
ဧသသ္မာကံ ¶ ကုလေ ဓမ္မော၊ ပိတုပိတာမဟော သဒါ၊
သက္ကစ္စံ ဥပတိဋ္ဌာမ၊ ဥတ္တမံ ဝိယ ဉာတကန္တိ။
ပီဌဇာတကံ သတ္တမံ။
၃၃၈။ ထုသဇာတကံ (၄-၄-၈)
ဝိဒိတံ ထုသံ ဥန္ဒုရာနံ [ဥန္ဒူရာနံ (က။)]၊ ဝိဒိတံ ပန တဏ္ဍုလံ၊
ထုသံ ထုသံ [ထုသံ ထူလံ (သီ။)] ဝိဝဇ္ဇေတွာ၊ တဏ္ဍုလံ ပန ခါဒရေ။
ယာ မန္တနာ အရညသ္မိံ၊ ယာ စ ဂါမေ နိကဏ္ဏိကာ၊
ယဉ္စေတံ ဣတိ စီတိ စ၊ ဧတမ္ပိ ဝိဒိတံ မယာ။
ဓမ္မေန ကိရ ဇာတဿ၊ ပိတာ ပုတ္တဿ မက္ကဋော၊
ဒဟရဿေဝ သန္တဿ၊ ဒန္တေဟိ ဖလမစ္ဆိဒါ။
ယမေတံ ပရိသပ္ပသိ [ပရိသဗ္ဗေသိ (က။)]၊ အဇကာဏောဝ သာသပေ၊
ယောပါယံ ဟေဋ္ဌတော သေတိ [သေသိ (သီ။)]၊ ဧတမ္ပိ ဝိဒိတံ မယာတိ။
ထုသဇာတကံ အဋ္ဌမံ။
၃၃၉။ ဗာဝေရုဇာတကံ (၄-၄-၉)
အဒဿနေန ¶ မောရဿ၊ သိခိနော မဉ္ဇုဘာဏိနော၊
ကာကံ တတ္ထ အပူဇေသုံ၊ မံသေန စ ဖလေန စ။
ယဒါ ¶ စ သရသမ္ပန္နော၊ မောရော ဗာဝေရုမာဂမာ၊
အထ ¶ လာဘော စ သက္ကာရော၊ ဝါယသဿ အဟာယထ။
ယာဝ နုပ္ပဇ္ဇတီ ဗုဒ္ဓါ၊ ဓမ္မရာဇာ ပဘင်္ကရော၊
တာဝ အညေ အပူဇေသုံ၊ ပုထူ သမဏဗြာဟ္မဏေ။
ယဒါ စ သရသမ္ပန္နော၊ ဗုဒ္ဓါ ဓမ္မံ အဒေသယိ၊
အထ လာဘော စ သက္ကာရော၊ တိတ္ထိယာနံ အဟာယထာတိ။
ဗာဝေရုဇာတကံ နဝမံ။
၃၄၀။ ဝိသယှဇာတကံ (၄-၄-၁၀)
အဒါသိ ဒါနာနိ ပုရေ ဝိသယှ၊ ဒဒတော စ တေ ခယဓမ္မော အဟောသိ၊
ဣတော ပရံ စေ န ဒဒေယျ ဒါနံ၊ တိဋ္ဌေယျုံ တေ သံယမန္တဿ ဘောဂါ။
အနရိယမရိယေန သဟဿနေတ္တ၊ သုဒုဂ္ဂတေနာပိ အကိစ္စမာဟု၊
မာ ဝေါ ဓနံ တံ အဟု ဒေဝရာဇ [အဟုဝါ ဇနိန္ဒ (က။ သီ။ သျာ။ ပီ။)]၊ ယံ ဘောဂဟေတု ဝိဇဟေမု သဒ္ဓံ။
ယေန ဧကော ရထော ယာတိ၊ ယာတိ တေနာပရော ရထော၊
ပေါရာဏံ နိဟိတံ ဝတ္တံ၊ ဝတ္တတညေဝ [ဝဒ္ဓံ၊ ဝဒ္ဓတညေဝ (က။ သီ။ ပီ။)] ဝါသဝ။
ယဒိ ¶ ဟေဿတိ ဒဿာမ၊ အသန္တေ ကိံ ဒဒါမသေ၊
ဧဝံဘူတာပိ ဒဿာမ၊ မာ ဒါနံ ပမဒမှသေတိ။
ဝိသယှဇာတကံ ဒသမံ။
ကောကိလဝဂ္ဂေါ [ကောကာလိကဝဂ္ဂေါ (က။)] စတုတ္ထော။
တဿုဒ္ဒါနံ –
အတိဝေလပဘာသတိ ¶ ဇီတဝရော၊ ဝနမဇ္ဈ ရထေသဘ ဇိမှဂမော၊
အထ ဇမ္ဗု တိဏာသနပီဌဝရံ၊ အထ တဏ္ဍုလ မောရ ဝိသယှ ဒသာတိ။
၅။ စူဠကုဏာလဝဂ္ဂေါ
၃၄၁။ ကဏ္ဍရီဇာတကံ (၄-၅-၁)
နရာနမာရာမကရာသု နာရိသု၊ အနေကစိတ္တာသု အနိဂ္ဂဟာသု စ၊
သဗ္ဗတ္ထ နာပီတိကရာပိ [သဗ္ဗ’တ္တနာ’ပီတိကရာပိ (သီ။ သျာ။)] စေ သိယာ [သိယုံ (သျာ။)]၊ န ဝိဿသေ တိတ္ထသမာ ဟိ နာရိယော။
ယံ ¶ ဝေ [ယဉ္စ (သျာ။ က။)] ဒိသွာ ကဏ္ဍရီကိန္နရာနံ [ကိန္နရကိန္နရီနံ (သျာ။)၊ ကိန္နရီကိန္နရာနံ (က။)]၊ သဗ္ဗိတ္ထိယော န ရမန္တိ အဂါရေ၊
တံ ¶ တာဒိသံ မစ္စံ စဇိတွာ ဘရိယာ၊ အညံ ဒိသွာ ပုရိသံ ပီဌသပ္ပိံ။
ဗကဿ စ ဗာဝရိကဿ [ပါဝါရိကဿ (သီ။)] ရညော၊ အစ္စန္တကာမာနုဂတဿ ဘရိယာ၊
အဝါစရီ [အစ္စာစရိ (သျာ။)၊ အနာစရိ (က။)] ပဋ္ဌဝသာနုဂဿ [ဗဒ္ဓဝသာနုဂဿ (သီ။ သျာ။)၊ ပတ္တဝသာနုဂတဿ (က။)]၊ ကံ ဝါပိ ဣတ္ထီ နာတိစရေ တဒညံ။
ပိင်္ဂိယာနီ သဗ္ဗလောကိဿရဿ၊ ရညော ပိယာ ဗြဟ္မဒတ္တဿ ဘရိယာ၊
အဝါစရီ ပဋ္ဌဝသာနုဂဿ၊ တံ ဝါပိ သာ နာဇ္ဈဂါ ကာမကာမိနီတိ။
ကဏ္ဍရီဇာတကံ [ကိန္နရီဇာတကံ (က။ သီ။ က။)၊ ကုဏ္ဍလိကဇာတကံ (သျာ။)] ပဌမံ။
၃၄၂။ ဝါနရဇာတကံ (၄-၅-၂)
အသက္ခိံ ¶ ဝတ အတ္တာနံ၊ ဥဒ္ဓါတုံ ဥဒကာ ထလံ၊
န ဒါနာဟံ ပုန တုယှံ၊ ဝသံ ဂစ္ဆာမိ ဝါရိဇ။
အလမေတေဟိ အမ္ဗေဟိ၊ ဇမ္ဗူဟိ ပနသေဟိ စ၊
ယာနိ ပါရံ သမုဒ္ဒဿ၊ ဝရံ မယှံ ဥဒုမ္ဗရော။
ယော စ ဥပ္ပတိတံ အတ္ထံ၊ န ခိပ္ပမနုဗုဇ္ဈတိ၊
အမိတ္တဝသမနွေတိ ¶ ၊ ပစ္ဆာ စ အနုတပ္ပတိ။
ယော စ ဥပ္ပတိတံ အတ္ထံ၊ ခိပ္ပမေဝ နိဗောဓတိ၊
မုစ္စတေ သတ္တုသမ္ဗာဓာ၊ န စ ပစ္ဆာနုတပ္ပတီတိ။
ဝါနရဇာတကံ ဒုတိယံ။
၃၄၃။ ကုန္တိနီဇာတကံ (၄-၅-၃)
အဝသိမှ တဝါဂါရေ၊ နိစ္စံ သက္ကတပူဇိတာ၊
တွမေဝ ဒါနိမကရိ၊ ဟန္ဒ ရာဇ ဝဇာမဟံ။
ယော ဝေ ကတေ ပဋိကတေ၊ ကိဗ္ဗိသေ ပဋိကိဗ္ဗိသေ၊
ဧဝံ တံ သမ္မတီ ဝေရံ၊ ဝသ ကုန္တိနိ မာဂမာ။
န ကတဿ စ ကတ္တာ စ၊ မေတ္တိ [မေတ္တီ (ပီ။)၊ မိတ္တီ (က။)] သန္ဓီယတေ ပုန၊
ဟဒယံ နာနုဇာနာတိ၊ ဂစ္ဆညေဝ ရထေသဘ။
ကတဿ စေဝ ကတ္တာ စ၊ မေတ္တိ သန္ဓီယတေ ပုန၊
ဓီရာနံ နော စ ဗာလာနံ၊ ဝသ ကုန္တိနိ မာဂမာတိ။
ကုန္တိနီဇာတကံ တတိယံ။
၃၄၄။ အမ္ဗဇာတကံ (၄-၅-၄)
ယော ¶ နီလိယံ မဏ္ဍယတိ၊ သဏ္ဍာသေန ဝိဟညတိ၊
တဿ သာ ဝသမနွေတု၊ ယာ တေ အမ္ဗေ အဝါဟရိ။
ဝီသံ ဝါ ပဉ္စဝီသံ [ပဏ္ဏုဝီသံ (က။ သီ။ ပီ။)] ဝါ၊ ဦနတိံသံ ဝ ဇာတိယာ၊
တာဒိသာ ¶ ပတိ မာ လဒ္ဓါ [ပတိံ မာ လဒ္ဓါ (ပီ။)၊ ပတိ မာ’လတ္ထ (?)]၊ ယာ တေ အမ္ဗေ အဝါဟရိ။
ဒီဃံ ¶ ဂစ္ဆတု အဒ္ဓါနံ၊ ဧကိကာ အဘိသာရိကာ၊
သင်္ကေတေ ပတိ မာ အဒ္ဒ [မာ အဒ္ဒသ (သီ။ ပီ။)]၊ ယာ တေ အမ္ဗေ အဝါဟရိ။
အလင်္ကတာ သုဝသနာ၊ မာလိနီ စန္ဒနုဿဒါ၊
ဧကိကာ သယနေ သေတု၊ ယာ တေ အမ္ဗေ အဝါဟရီတိ။
အမ္ဗဇာတကံ [အမ္ဗစောရဇာတကံ (က။ သီ။ ပီ။)] စတုတ္ထံ။
၃၄၅။ ဂဇကုမ္ဘဇာတကံ (၄-၅-၅)
ဝနံ ယဒဂ္ဂိ ဒဟတိ၊ ပါဝကော ကဏှဝတ္တနီ၊
ကထံ ကရောသိ ပစလက၊ ဧဝံ ဒန္ဓပရက္ကမော။
ဗဟူနိ ရုက္ခဆိဒ္ဒါနိ၊ ပထဗျာ ဝိဝရာနိ စ၊
တာနိ စေ နာဘိသမ္ဘောမ၊ ဟောတိ နော ကာလပရိယာယော။
ယော ဒန္ဓကာလေ တရတိ၊ တရဏီယေ စ ဒန္ဓတိ၊
သုက္ခပဏ္ဏံဝ အက္ကမ္မ၊ အတ္ထံ ဘဉ္ဇတိ အတ္တနော။
ယော ဒန္ဓကာလေ ဒန္ဓေတိ၊ တရဏီယေ စ တာရယိ၊
သသီဝ ရတ္တိံ ဝိဘဇံ၊ တဿတ္ထော ပရိပူရတီတိ။
ဂဇကုမ္ဘဇာတကံ ပဉ္စမံ။
၃၄၆။ ကေသဝဇာတကံ (၄-၅-၆)
မနုဿိန္ဒံ ¶ ဇဟိတွာန၊ သဗ္ဗကာမသမိဒ္ဓိနံ၊
ကထံ နု ဘဂဝါ ကေသီ၊ ကပ္ပဿ ရမတိ အဿမေ [ရမတဿမေ (က။)]။
သာဒူနီ [သာဓူနိ (က။ သီ။ သျာ။ က။)] ရမဏီယာနိ၊ သန္တိ ဝက္ခာ မနောရမာ၊
သုဘာသိတာနိ ကပ္ပဿ၊ နာရဒ ရမယန္တိ မံ။
သာလီနံ ဩဒနံ ဘုဉ္ဇေ၊ သုစိံ မံသူပသေစနံ၊
ကထံ သာမာကနီဝါရံ၊ အလောဏံ ဆာဒယန္တိ တံ။
သာဒုံ ¶ ဝါ [အသာဒုံ (ပီ။)] ယဒိ ဝါသာဒုံ၊ အပ္ပံ ဝါ ယဒိ ဝါ ဗဟုံ၊
ဝိဿတ္ထော ယတ္ထ ဘုဉ္ဇေယျ၊ ဝိဿာသပရမာ ရသာတိ။
ကေသဝဇာတကံ [ကေသီဇာတကံ (က။)] ဆဋ္ဌံ။
၃၄၇။ အယကူဋဇာတကံ (၄-၅-၇)
သဗ္ဗာယသံ ¶ ကူဋမတိပ္ပမာဏံ၊ ပဂ္ဂယှ ယော [သော (ပီ။)] တိဋ္ဌသိ အန္တလိက္ခေ၊
ရက္ခာယ မေ [မံ (သီ။)] တွံ ဝိဟိတော နုသဇ္ဇ၊ ဥဒါဟု မေ စေတယသေ [ဝါယမသေ (သီ။ သျာ။)] ဝဓာယ။
ဒူတော အဟံ ရာဇိဓ ရက္ခသာနံ၊ ဝဓာယ တုယှံ ပဟိတောဟမသ္မိ၊
ဣန္ဒော ¶ စ တံ ရက္ခတိ ဒေဝရာဇာ၊ တေနုတ္တမင်္ဂံ န တေ [န ဟိ (က။ သီ။ ပီ။)၊ တေ န (က။)] ဖာလယာမိ။
သစေ စ မံ ရက္ခတိ ဒေဝရာဇာ၊ ဒေဝါနမိန္ဒော မဃဝါ သုဇမ္ပတိ၊
ကာမံ ပိသာစာ ဝိနဒန္တု သဗ္ဗေ၊ န သန္တသေ ရက္ခသိယာ ပဇာယ။
ကာမံ ကန္ဒန္တု [ကန္တန္တု (က။)၊ ကဏ္ဍန္တု (သျာ။)] ကုမ္ဘဏ္ဍာ၊ သဗ္ဗေ ပံသုပိသာစကာ၊
နာလံ ပိသာစာ ယုဒ္ဓါယ၊ မဟတီ သာ ဝိဘိံသိကာတိ [ဝိဘေသိကာတိ (သျာ။)၊ ဝိဟေသိကာတိ (ပီ။)]။
အယကူဋဇာတကံ သတ္တမံ။
၃၄၈။ အရညဇာတကံ (၄-၅-၈)
အရညာ ဂါမမာဂမ္မ၊ ကိံသီလံ ကိံဝတံ အဟံ၊
ပုရိသံ တာတ သေဝေယျံ၊ တံ မေ အက္ခာဟိ ပုစ္ဆိတော။
ယော တံ ဝိဿာသယေ တာတ၊ ဝိဿာသဉ္စ ခမေယျ တေ၊
သုဿူသီ စ တိတိက္ခီ စ၊ တံ ဘဇေဟိ ဣတော [တံ ဘဇေယျာသိတော (က။)] ဂတော။
ယဿ ကာယေန ဝါစာယ၊ မနသာ နတ္ထိ ဒုက္ကဋံ၊
ဥရသီဝ ပတိဋ္ဌာယ၊ တံ ဘဇေဟိ ဣတော ဂတော။
ဟလိဒ္ဒိရာဂံ ¶ ကပိစိတ္တံ၊ ပုရိသံ ရာဂဝိရာဂိနံ၊
တာဒိသံ ¶ တာတ မာ သေဝိ၊ နိမ္မနုဿမ္ပိ စေ သိယာတိ။
အရညဇာတကံ အဋ္ဌမံ။
၃၄၉။ သန္ဓိဘေဒဇာတကံ (၄-၅-၉)
နေဝ ဣတ္ထီသု သာမညံ၊ နာပိ ဘက္ခေသု သာရထိ၊
အထဿ သန္ဓိဘေဒဿ၊ ပဿ ယာဝ သုစိန္တိတံ။
အသိ ¶ တိက္ခောဝ မံသမှိ၊ ပေသုညံ ပရိဝတ္တတိ၊
ယတ္ထူသဘဉ္စ သီဟဉ္စ၊ ဘက္ခယန္တိ မိဂါဓမာ။
ဣမံ သော သယနံ သေတိ၊ ယမိမံ [ယယိမံ (သီ။ ပီ။)၊ ယိမံ (က။)] ပဿသိ သာရထိ၊
ယော ဝါစံ သန္ဓိဘေဒဿ၊ ပိသုဏဿ နိဗောဓတိ။
တေ ဇနာ သုခမေဓန္တိ၊ နရာ သဂ္ဂဂတာရိဝ၊
ယေ ဝါစံ သန္ဓိဘေဒဿ၊ နာဝဗောဓန္တိ သာရထီတိ။
သန္ဓိဘေဒဇာတကံ နဝမံ။
၃၅၀။ ဒေဝတာပဉှဇာတကံ (၄-၅-၁၀)
ဟန္တိ ဟတ္ထေဟိ ပါဒေဟိ၊ မုခဉ္စ ပရိသုမ္ဘတိ၊
သ ဝေ ရာဇ ပိယော ဟောတိ၊ ကံ တေန တွာဘိပဿသိ [မဘိပဿသိ (သီ။)]။
အက္ကောသတိ ယထာကာမံ၊ အာဂမဉ္စဿ ဣစ္ဆတိ၊
သ ¶ ဝေ ရာဇ ပိယော ဟောတိ၊ ကံ တေန တွာဘိပဿသိ။
အဗ္ဘက္ခာတိ အဘူတေန၊ အလိကေနာဘိသာရယေ၊
သ ဝေ ရာဇ ပိယော ဟောတိ၊ ကံ တေန တွာဘိပဿသိ။
ဟရံ အန္နဉ္စ ပါနဉ္စ၊ ဝတ္ထသေနာသနာနိ စ၊
အညဒတ္ထုဟရာ သန္တာ၊ တေ ဝေ ရာဇ ပိယာ ဟောန္တိ၊
ကံ တေန တွာဘိပဿသီတိ။
ဒေဝတာပဉှဇာတကံ ဒသမံ။
စူဠကုဏာလဝဂ္ဂေါ ပဉ္စမော။
တဿုဒ္ဒါနံ –
နရာနံ ¶ အသက္ခိဝသိမှဝရော၊ နီလိယမဂ္ဂိဝရဉ္စ ပုန၊
ပုန ရသာယသကူဋဝရော၊ တထာရည သာရထိ ဟန္တိ ဒသာတိ။
အထ ဝဂ္ဂုဒ္ဒါနံ –
ကာလိင်္ဂံ [ဝိဝရံ (ဗဟူသု)] ပုစိမန္ဒဉ္စ၊ ကုဋိဒူသက ကောကိလာ [ကုဋိဒူသံ ဗဟုဘာဏကံ (ဗဟူသု)]၊
စူဠကုဏာလဝဂ္ဂေါ သော၊ ပဉ္စမော သုပ္ပကာသိတောတိ။
စတုက္ကနိပါတံ နိဋ္ဌိတံ။