📜
၁၀။ ဒသကနိပါတော
၄၃၉။ စတုဒွါရဇာတကံ (၁)
စတုဒွါရမိဒံ ¶ ¶ ¶ နဂရံ၊ အာယသံ ဒဠှပါကာရံ၊
ဩရုဒ္ဓပဋိရုဒ္ဓါသ္မိ၊ ကိံ ပါပံ ပကတံ မယာ။
သဗ္ဗေ အပိဟိတာ ဒွါရာ၊ ဩရုဒ္ဓါသ္မိ ယထာ ဒိဇော၊
ကိမာဓိကရဏံ ယက္ခ၊ စက္ကာဘိနိဟတော အဟံ။
လဒ္ဓါ သတသဟဿာနိ၊ အတိရေကာနိ ဝီသတိ၊
အနုကမ္ပကာနံ ဉာတီနံ၊ ဝစနံ သမ္မ နာကရိ။
လင်္ဃိံ သမုဒ္ဒံ ပက္ခန္ဒိ၊ သာဂရံ အပ္ပသိဒ္ဓိကံ၊
စတုဗ္ဘိ အဋ္ဌဇ္ဈဂမာ၊ အဋ္ဌာဟိပိ စ သောဠသ။
သောဠသာဟိ စ ဗာတ္တိံသ၊ အတြိစ္ဆံ စက္ကမာသဒေါ၊
ဣစ္ဆာဟတဿ ပေါသဿ၊ စက္ကံ ဘမတိ မတ္ထကေ။
ဥပရိဝိသာလာ ဒုပ္ပူရာ၊ ဣစ္ဆာ ဝိသဋဂါမိနီ [ဝိသဋဂါမိနိံ (ပီ။ က။)]၊
ယေ စ တံ အနုဂိဇ္ဈန္တိ၊ တေ ဟောန္တိ စက္ကဓာရိနော။
ဗဟုဘဏ္ဍံ [ဗဟုံ ဘဏ္ဍံ (သီ။ ပီ။)] အဝဟာယ၊ မဂ္ဂံ အပ္ပဋိဝေက္ခိယ၊
ယေသဉ္စေတံ အသင်္ခါတံ၊ တေ ဟောန္တိ စက္ကဓာရိနော။
ကမ္မံ သမေက္ခေ ဝိပုလဉ္စ ဘောဂံ၊ ဣစ္ဆံ ¶ န သေဝေယျ အနတ္ထသံဟိတံ၊
ကရေယျ ဝါကျံ အနုကမ္ပကာနံ၊ တံ တာဒိသံ နာတိဝတ္တေယျ စက္ကံ။
ကီဝစိရံ နု မေ ယက္ခ၊ စက္ကံ သိရသိ ဌဿတိ၊
ကတိ ဝဿသဟဿာနိ၊ တံ မေ အက္ခာဟိ ပုစ္ဆိတော။
အတိသရော ပစ္စသရော [အစ္စသရော (သီ။ သျာ။ ပီ။)]၊ မိတ္တဝိန္ဒ သုဏောဟိ မေ၊
စက္ကံ တေ သိရသိ [သိရသ္မိ (သျာ။)] မာဝိဒ္ဓံ၊ န တံ ဇီဝံ ပမောက္ခသီတိ။
စတုဒွါရဇာတကံ ပဌမံ။
၄၄၀။ ကဏှဇာတကံ (၂)
ကဏှော ¶ ¶ ဝတာယံ ပုရိသော၊ ကဏှံ ဘုဉ္ဇတိ ဘောဇနံ၊
ကဏှေ ဘူမိပဒေသသ္မိံ၊ န မယှံ မနသော ပိယော။
န ကဏှော တစသာ ဟောတိ၊ အန္တောသာရော ဟိ ဗြာဟ္မဏော၊
ယသ္မိံ ပါပါနိ ကမ္မာနိ၊ သ ဝေ ကဏှော သုဇမ္ပတိ။
ဧတသ္မိံ တေ သုလပိတေ၊ ပတိရူပေ သုဘာသိတေ၊
ဝရံ ဗြာဟ္မဏ တေ ဒမ္မိ၊ ယံ ကိဉ္စိ မနသိစ္ဆသိ။
ဝရဉ္စေ မေ အဒေါ သက္က၊ သဗ္ဗဘူတာနမိဿရ၊
သုနိက္ကောဓံ သုနိဒ္ဒေါသံ၊ နိလ္လောဘံ ဝုတ္တိမတ္တနော၊
နိသ္နေဟမဘိကင်္ခါမိ၊ ဧတေ မေ စတုရော ဝရေ။
ကိံ နု ကောဓေ ဝါ [ကောဓေဝ (သီ။ ပီ။)] ဒေါသေ ဝါ၊ လောဘေ သ္နေဟေ စ ဗြာဟ္မဏ၊
အာဒီနဝံ ¶ တွံ ပဿသိ [သမ္ပဿသိ (သီ။ ပီ။)]၊ တံ မေ အက္ခာဟိ ပုစ္ဆိတော။
အပ္ပော ဟုတွာ ဗဟု ဟောတိ၊ ဝဍ္ဎတေ သော အခန္တိဇော၊
အာသင်္ဂီ ဗဟုပါယာသော၊ တသ္မာ ကောဓံ န ရောစယေ။
ဒုဋ္ဌဿ ဖရုသာ [ပဌမာ (ပီ။ သီ။ နိယျ)] ဝါစာ၊ ပရာမာသော အနန္တရာ၊
တတော ပါဏိ တတော ဒဏ္ဍော၊ သတ္ထဿ ပရမာ ဂတိ [ပရာမသတိ (က။)]၊
ဒေါသော ကောဓသမုဋ္ဌာနော၊ တသ္မာ ဒေါသံ န ရောစယေ။
အာလောပသာဟသာကာရာ [သဟသာကာရာ (သီ။ သျာ။ ပီ။)]၊ နိကတီ ဝဉ္စနာနိ စ၊
ဒိဿန္တိ လောဘဓမ္မေသု၊ တသ္မာ လောဘံ န ရောစယေ။
သ္နေဟသင်္ဂထိတာ [သင်္ဂဓိတာ (က။)၊ သင်္ဂန္တိတာ (သျာ။)] ဂန္ထာ၊ သေန္တိ မနောမယာ ပုထူ၊
တေ ဘုသံ ဥပတာပေန္တိ၊ တသ္မာ သ္နေဟံ န ရောစယေ။
ဧတသ္မိံ တေ သုလပိတေ၊ ပတိရူပေ သုဘာသိတေ၊
ဝရံ ဗြာဟ္မဏ တေ ဒမ္မိ၊ ယံ ကိဉ္စိ မနသိစ္ဆသိ။
ဝရဉ္စေ မေ အဒေါ သက္က၊ သဗ္ဗဘူတာနမိဿရ၊
အရညေ မေ ဝိဟရတော၊ နိစ္စံ ဧကဝိဟာရိနော၊
အာဗာဓာ မာ [န (သျာ။ ပီ။)] ဥပ္ပဇ္ဇေယျုံ၊ အန္တရာယကရာ ဘုသာ။
ဧတသ္မိံ ¶ တေ သုလပိတေ၊ ပတိရူပေ သုဘာသိတေ၊
ဝရံ ဗြာဟ္မဏ တေ ဒမ္မိ၊ ယံ ကိဉ္စိ မနသိစ္ဆသိ။
ဝရဉ္စေ ¶ မေ အဒေါ သက္က၊ သဗ္ဗဘူတာနမိဿရ၊
န မနော ဝါ သရီရံ ဝါ၊ မံ-ကတေ သက္က ကဿစိ၊
ကဒါစိ ¶ ဥပဟညေထ၊ ဧတံ သက္က ဝရံ ဝရေတိ။
ကဏှဇာတကံ ဒုတိယံ။
၄၄၁။ စတုပေါသထိယဇာတကံ (၃)
ယော ကောပနေယျေ န ကရောတိ ကောပံ၊ န ကုဇ္ဈတိ သပ္ပုရိသော ကဒါစိ၊
ကုဒ္ဓါပိ သော နာဝိကရောတိ ကောပံ၊ တံ ဝေ နရံ သမဏမာဟု [သမဏံ အာဟု (သီ။)] လောကေ။
ဦနူဒရော ယော သဟတေ ဇိဃစ္ဆံ၊ ဒန္တော တပဿီ မိတပါနဘောဇနော၊
အာဟာရဟေတု န ကရောတိ ပါပံ၊ တံ ဝေ နရံ သမဏမာဟု လောကေ။
ခိဍ္ဍံ ရတိံ ဝိပ္ပဇဟိတွာန သဗ္ဗံ၊ န စာလိကံ ဘာသသိ ကိဉ္စိ လောကေ၊
ဝိဘူသဋ္ဌာနာ ဝိရတော မေထုနသ္မာ၊ တံ ဝေ နရံ သမဏမာဟု လောကေ။
ပရိဂ္ဂဟံ လောဘဓမ္မဉ္စ သဗ္ဗံ၊ ယော ဝေ ပရိညာယ ပရိစ္စဇေတိ၊
ဒန္တံ ဌိတတ္တံ အမမံ နိရာသံ၊ တံ ဝေ နရံ သမဏမာဟု လောကေ။
ပုစ္ဆာမ ¶ ကတ္တာရမနောမပညံ [မနောမပည (သျာ။ က။)]၊ ကထာသု နော ဝိဂ္ဂဟော အတ္ထိ ဇာတော၊
ဆိန္ဒဇ္ဇ ကင်္ခံ ဝိစိကိစ္ဆိတာနိ၊ တဒဇ္ဇ [တယာဇ္ဇ (သီ။)] ကင်္ခံ ဝိတရေမု သဗ္ဗေ။
ယေ ¶ ပဏ္ဍိတာ အတ္ထဒသာ ဘဝန္တိ၊ ဘာသန္တိ တေ ယောနိသော တတ္ထ ကာလေ၊
ကထံ နု ကထာနံ အဘာသိတာနံ၊ အတ္ထံ နယေယျုံ ကုသလာ ဇနိန္ဒာ။
ကထံ ဟဝေ ဘာသတိ နာဂရာဇာ၊ ဂရုဠော ပန ဝေနတေယျော ကိမာဟ၊
ဂန္ဓဗ္ဗရာဇာ ပန ကိံ ဝဒေသိ၊ ကထံ ပန ကုရူနံ ရာဇသေဋ္ဌော။
ခန္တိံ ဟဝေ ဘာသတိ နာဂရာဇာ၊ အပ္ပာဟာရံ ဂရုဠော ဝေနတေယျော၊
ဂန္ဓဗ္ဗရာဇာ ရတိဝိပ္ပဟာနံ၊ အကိဉ္စနံ ကုရူနံ ရာဇသေဋ္ဌော။
သဗ္ဗာနိ ဧတာနိ သုဘာသိတာနိ၊ န ဟေတ္ထ ဒုဗ္ဘာသိတမတ္ထိ ကိဉ္စိ၊
ယသ္မိဉ္စ ဧတာနိ ပတိဋ္ဌိတာနိ၊ အရာဝ ¶ နာဘျာ သုသမောဟိတာနိ၊
စတုဗ္ဘိ ဓမ္မေဟိ သမင်္ဂိဘူတံ၊ တံ ဝေ နရံ သမဏမာဟု လောကေ။
တုဝဉှိ [တုဝံ နု (သီ။ ပီ။)] သေဋ္ဌော တွမနုတ္တရောသိ၊ တွံ ဓမ္မဂူ ဓမ္မဝိဒူ သုမေဓော၊
ပညာယ ပဉှံ သမဓိဂ္ဂဟေတွာ၊ အစ္ဆေစ္ဆိ ဓီရော ဝိစိကိစ္ဆိတာနိ၊
အစ္ဆေစ္ဆိ ကင်္ခံ ဝိစိကိစ္ဆိတာနိ၊ စုန္ဒော ယထာ နာဂဒန္တံ ခရေန။
နီလုပ္ပလာဘံ ဝိမလံ အနဂ္ဃံ၊ ဝတ္ထံ ဣဒံ ဓူမသမာနဝဏ္ဏံ၊
ပဉှဿ ¶ ဝေယျာကရဏေန တုဋ္ဌော၊ ဒဒါမိ တေ ဓမ္မပူဇာယ ဓီရ။
သုဝဏ္ဏမာလံ ¶ ¶ သတပတ္တဖုလ္လိတံ၊ သကေသရံ ရတ္နသဟဿမဏ္ဍိတံ၊
ပဉှဿ ဝေယျာကရဏေန တုဋ္ဌော၊ ဒဒါမိ တေ ဓမ္မပူဇာယ ဓီရ။
မဏိံ အနဂ္ဃံ ရုစိရံ ပဘဿရံ၊ ကဏ္ဌာဝသတ္တံ [ဝသိတံ (က။)] မဏိဘူသိတံ မေ၊
ပဉှဿ ဝေယျာကရဏေန တုဋ္ဌော၊ ဒဒါမိ တေ ဓမ္မပူဇာယ ဓီရ။
ဂဝံ သဟဿံ ဥသဘဉ္စ နာဂံ၊ အာဇညယုတ္တေ စ ရထေ ဒသ ဣမေ၊
ပဉှဿ ဝေယျာကရဏေန တုဋ္ဌော၊ ဒဒါမိ တေ ဂါမဝရာနိ သောဠသ။
သာရိပုတ္တော တဒါ နာဂေါ၊ သုပဏ္ဏော ပန ကောလိတော၊
ဂန္ဓဗ္ဗရာဇာ အနုရုဒ္ဓါ၊ ရာဇာ အာနန္ဒ ပဏ္ဍိတော၊
ဝိဓုရော ဗောဓိသတ္တော စ၊ ဧဝံ ဓာရေထ ဇာတကန္တိ။
စတုပေါသထိယဇာတကံ တတိယံ။
၄၄၂။ သင်္ခဇာတကံ (၄)
ဗဟုဿုတော သုတဓမ္မောသိ သင်္ခ၊ ဒိဋ္ဌာ တယာ သမဏဗြာဟ္မဏာ စ၊
အထက္ခဏေ ဒဿယသေ ဝိလာပံ၊ အညော နု ကော တေ ပဋိမန္တကော မယာ။
သုဗ္ဘူ [သုဗ္ဘာ (သျာ။)၊ သုမ္ဘာ၊ သုဘ္မာ (က။)] သုဘာ သုပ္ပဋိမုက္ကကမ္ဗု၊ ပဂ္ဂယှ သောဝဏ္ဏမယာယ ပါတိယာ၊
‘‘ဘုဉ္ဇဿု ဘတ္တံ’’ ဣတိ မံ ဝဒေတိ၊ သဒ္ဓါဝိတ္တာ [သဒ္ဓါစိတ္တာ (သီ။ ပီ။ က။)]၊ တမဟံ နောတိ ဗြူမိ။
ဧတာဒိသံ ¶ ¶ ဗြာဟ္မဏ ဒိသွာန [ဒိသွ (သီ။ ပီ။)] ယက္ခံ၊ ပုစ္ဆေယျ ပေါသော သုခမာသိသာနော [သုခမာသသာနော (သျာ။)၊ သုခမာသိသမာနော (က။)]၊
ဥဋ္ဌေဟိ နံ ပဉ္ဇလိကာဘိပုစ္ဆ၊ ဒေဝီ နုသိ တွံ ဥဒ မာနုသီ နု။
ယံ တွံ သုခေနာဘိသမေက္ခသေ မံ၊ ဘုဉ္ဇဿု ဘတ္တံ ဣတိ မံ ဝဒေသိ၊
ပုစ္ဆာမိ တံ နာရိ မဟာနုဘာဝေ၊ ဒေဝီ နုသိ တွံ ဥဒ မာနုသီ နု။
ဒေဝီ အဟံ သင်္ခ မဟာနုဘာဝါ၊ ဣဓာဂတာ သာဂရဝါရိမဇ္ဈေ၊
အနုကမ္ပိကာ နော စ ပဒုဋ္ဌစိတ္တာ၊ တဝေဝ အတ္ထာယ ဣဓာဂတာသ္မိ။
ဣဓန္နပါနံ သယနာသနဉ္စ၊ ယာနာနိ နာနာဝိဝိဓာနိ သင်္ခ၊
သဗ္ဗဿ တျာဟံ ပဋိပါဒယာမိ၊ ယံ ကိဉ္စိ တုယှံ မနသာဘိပတ္ထိတံ။
ယံ ကိဉ္စိ ယိဋ္ဌဉ္စ ဟုတဉ္စ [ယိဋ္ဌံဝ ဟုတံဝ (သီ။ ပီ။)] မယှံ၊ သဗ္ဗဿ နော ဣဿရာ တွံ သုဂတ္တေ၊
သုသောဏိ သုဗ္ဘမု [သုဗ္ဘု (သီ။)၊ သုဗ္ဘာ (သျာ။)] သုဝိလဂ္ဂမဇ္ဈေ [သုဝိလာကမဇ္ဈေ (သျာ။ ပီ။ သီ။ အဋ္ဌ။)၊ သုဝိလာတမဇ္ဈေ (က။)]၊ ကိဿ မေ ကမ္မဿ အယံ ဝိပါကော။
ဃမ္မေ ¶ ပထေ ဗြာဟ္မဏ ဧကဘိက္ခုံ၊ ဥဂ္ဃဋ္ဋပါဒံ တသိတံ ကိလန္တံ၊
ပဋိပါဒယီ သင်္ခ ဥပါဟနာနိ [ဥပါဟနာဟိ (သီ။ ပီ။)]၊ သာ ဒက္ခိဏာ ကာမဒုဟာ တဝဇ္ဇ။
သာ ¶ ဟောတု နာဝါ ဖလကူပပန္နာ၊ အနဝဿုတာ ဧရကဝါတယုတ္တာ၊
အညဿ ယာနဿ န ဟေတ္ထ [န ဟတ္ထိ (ပီ။)] ဘူမိ၊ အဇ္ဇေဝ မံ မောဠိနိံ ပါပယဿု။
သာ ¶ တတ္ထ ဝိတ္တာ သုမနာ ပတီတာ၊ နာဝံ သုစိတ္တံ အဘိနိမ္မိနိတွာ၊
အာဒါယ သင်္ခံ ပုရိသေန သဒ္ဓိံ၊ ဥပါနယီ နဂရံ သာဓုရမ္မန္တိ။
သင်္ခဇာတကံ စတုတ္ထံ။
၄၄၃။ စူဠဗောဓိဇာတကံ (၅)
ယော တေ ဣမံ ဝိသာလက္ခိံ၊ ပိယံ သမှိတဘာသိနိံ [သမ္မိလ္လဘာသိနိံ (သီ။ ပီ။)၊ သမ္မိလ္လဟာသိနိံ (သျာ။)]၊
အာဒါယ ဗလာ ဂစ္ဆေယျ၊ ကိံ နု ကယိရာသိ ဗြာဟ္မဏ။
ဥပ္ပဇ္ဇေ [ဥပ္ပဇ္ဇ (သီ။ ပီ။)] မေ န မုစ္စေယျ၊ န မေ မုစ္စေယျ ဇီဝတော၊
ရဇံဝ ¶ ဝိပုလာ ဝုဋ္ဌိ၊ ခိပ္ပမေဝ နိဝါရယေ [နိဝါရယိံ (က။)]။
ယံ နု ပုဗ္ဗေ ဝိကတ္ထိတ္ထော [ဝိကတ္ထိတော (က။ သီ။ သျာ။ က။)]၊ ဗလမှိဝ အပဿိတော၊
သွဇ္ဇ တုဏှိကတော [တုဏှိကတော (သီ။)၊ တုဏှိက္ခကော (ပီ။)] ဒါနိ၊ သင်္ဃာဋိံ သိဗ္ဗမစ္ဆသိ။
ဥပ္ပဇ္ဇိ မေ န မုစ္စိတ္ထ၊ န မေ မုစ္စိတ္ထ ဇီဝတော၊
ရဇံဝ ဝိပုလာ ဝုဋ္ဌိ၊ ခိပ္ပမေဝ နိဝါရယိံ။
ကိံ တေ ဥပ္ပဇ္ဇိ နော မုစ္စိ၊ ကိံ တေ န မုစ္စိ ဇီဝတော၊
ရဇံဝ ဝိပုလာ ဝုဋ္ဌိ၊ ကတမံ တွံ နိဝါရယိ။
ယမှိ ဇာတေ န ပဿတိ၊ အဇာတေ သာဓု ပဿတိ၊
သော မေ ဥပ္ပဇ္ဇိ နော မုစ္စိ၊ ကောဓော ဒုမ္မေဓဂေါစရော။
ယေန ဇာတေန နန္ဒန္တိ၊ အမိတ္တာ ဒုက္ခမေသိနော၊
သော မေ ဥပ္ပဇ္ဇိ နော မုစ္စိ၊ ကောဓော ဒုမ္မေဓဂေါစရော။
ယသ္မိဉ္စ ¶ ဇာယမာနမှိ၊ သဒတ္ထံ နာဝဗုဇ္ဈတိ၊
သော မေ ဥပ္ပဇ္ဇိ နော မုစ္စိ၊ ကောဓော ဒုမ္မေဓဂေါစရော။
ယေနာဘိဘူတော ကုသလံ ဇဟာတိ၊ ပရက္ကရေ ဝိပုလဉ္စာပိ အတ္ထံ၊
သ ဘီမသေနော ဗလဝါ ပမဒ္ဒီ၊ ကောဓော မဟာရာဇ န မေ အမုစ္စထ။
ကဋ္ဌသ္မိံ မတ္ထမာနသ္မိံ [မန္ထမာနသ္မိံ (ပီ။)၊ မဒ္ဒမာနသ္မိံ (က။)]၊ ပါဝကော နာမ ဇာယတိ၊
တမေဝ ကဋ္ဌံ ဍဟတိ၊ ယသ္မာ သော ဇာယတေ ဂိနိ။
ဧဝံ မန္ဒဿ ပေါသဿ၊ ဗာလဿ အဝိဇာနတော၊
သာရမ္ဘာ ¶ [သာရဗ္ဘာ (က။)] ဇာယတေ ကောဓော၊ သောပိ တေနေဝ ဍယှတိ။
အဂ္ဂီဝ တိဏကဋ္ဌသ္မိံ၊ ကောဓော ယဿ ပဝဍ္ဎတိ၊
နိဟီယတိ တဿ ယသော၊ ကာဠပက္ခေဝ စန္ဒိမာ။
အနေဓော ¶ [အနိန္ဓော (သီ။ က။)၊ အနိန္ဒော (သျာ။)] ဓူမကေတူဝ၊ ကောဓော ယဿူပသမ္မတိ၊
အာပူရတိ တဿ ယသော၊ သုက္ကပက္ခေဝ စန္ဒိမာတိ။
စူဠဗောဓိဇာတကံ ပဉ္စမံ။
၄၄၄။ ကဏှဒီပါယနဇာတကံ (၆)
သတ္တာဟမေဝါဟံ ပသန္နစိတ္တော၊ ပုညတ္ထိကော အာစရိံ [အစရိံ (သီ။ သျာ။ ပီ။)] ဗြဟ္မစရိယံ၊
အထာပရံ ယံ စရိတံ မမေဒံ [မမ ယိဒံ (သျာ။)၊ မမာယိဒံ (ပီ။)]၊ ဝဿာနိ ပညာသ သမာဓိကာနိ၊
အကာမကော ဝါပိ [ဝါဟိ (ပီ။ က။)] အဟံ စရာမိ၊ ဧတေန ¶ သစ္စေန သုဝတ္ထိ ဟောတု၊
ဟတံ ဝိသံ ဇီဝတု ယညဒတ္တော။
ယသ္မာ ¶ ဒါနံ နာဘိနန္ဒိံ ကဒါစိ၊ ဒိသွာနဟံ အတိထိံ ဝါသကာလေ၊
န စာပိ မေ အပ္ပိယတံ အဝေဒုံ၊ ဗဟုဿုတာ သမဏဗြာဟ္မဏာ စ။
အကာမကော ဝါပိ အဟံ ဒဒါမိ၊ ဧတေန သစ္စေန သုဝတ္ထိ ဟောတု၊
ဟတံ ဝိသံ ဇီဝတု ယညဒတ္တော။
အာသီဝိသော တာတ ပဟူတတေဇော၊ ယော တံ အဒံသီ [အဍံသီ (သျာ။)] သစရာ [ဗိလရာ (သီ။)၊ ပိဠာရာ (သျာ။)၊ ပတရာ (ပီ။)] ဥဒိစ္စ၊
တသ္မိဉ္စ မေ အပ္ပိယတာယ အဇ္ဇ၊ ပိတရိ စ တေ နတ္ထိ ကောစိ ဝိသေသော၊
ဧတေန သစ္စေန သုဝတ္ထိ ဟောတု၊ ဟတံ ဝိသံ ဇီဝတု ယညဒတ္တော။
သန္တာ ဒန္တာယေဝ [ဒန္တာ သန္တာ ယေ စ (သျာ။ က။)] ပရိဗ္ဗဇန္တိ၊ အညတြ ကဏှာ နတ္ထာကာမရူပါ [အနကာမရူပါ (သီ။ သျာ။ ပီ။)]၊
ဒီပါယန ကိဿ ဇိဂုစ္ဆမာနော၊ အကာမကော စရသိ ဗြဟ္မစရိယံ။
သဒ္ဓါယ နိက္ခမ္မ ပုနံ နိဝတ္တော၊ သော ဧဠမူဂေါဝ ဗာလော [ဧဠမူဂေါ စပလော (သျာ။ က။)] ဝတာယံ၊
ဧတဿ ဝါဒဿ ဇိဂုစ္ဆမာနော၊ အကာမကော စရာမိ ဗြဟ္မစရိယံ၊
ဝိညုပ္ပသတ္ထဉ္စ သတဉ္စ ဌာနံ [ဝိညူပသတ္ထံ ဝသိတံ စ ဌာနံ (က။)]၊ ဧဝမ္ပဟံ ပုညကရော ဘဝါမိ။
သမဏေ ¶ တုဝံ ဗြာဟ္မဏေ အဒ္ဓိကေ စ၊ သန္တပ္ပယာသိ ¶ အန္နပါနေန ဘိက္ခံ၊
ဩပါနဘူတံဝ ဃရံ တဝ ယိဒံ၊ အန္နေန ပါနေန ဥပေတရူပံ၊
အထ ကိဿ ဝါဒဿ ဇိဂုစ္ဆမာနော၊ အကာမကော ဒါနမိမံ ဒဒါသိ။
ပိတရော စ မေ အာသုံ ပိတာမဟာ စ၊ သဒ္ဓါ အဟုံ ဒါနပတီ ဝဒညူ၊
တံ ကုလ္လဝတ္တံ အနုဝတ္တမာနော၊ မာဟံ ကုလေ အန္တိမဂန္ဓနော [ဂန္ဓိနော (သျာ။ ပီ။ က။)၊ ဂန္ဓိနီ (သီ။)] အဟုံ၊
ဧတဿ ဝါဒဿ ဇိဂုစ္ဆမာနော၊ အကာမကော ဒါနမိမံ ဒဒါမိ။
ဒဟရိံ ကုမာရိံ အသမတ္ထပညံ၊ ယံ တာနယိံ ဉာတိကုလာ သုဂတ္တေ၊
န စာပိ မေ အပ္ပိယတံ အဝေဒိ၊ အညတြ ကာမာ ပရိစာရယန္တာ [ပရိစာရယန္တီ (သီ။ ပီ။)]၊
အထ ကေန ဝဏ္ဏေန မယာ တေ ဘောတိ၊ သံဝါသဓမ္မော အဟု ဧဝရူပေါ။
အာရာ ¶ ဒူရေ နယိဓ ကဒါစိ အတ္ထိ၊ ပရမ္ပရာ နာမ ကုလေ ဣမသ္မိံ၊
တံ ကုလ္လဝတ္တံ အနုဝတ္တမာနာ၊ မာဟံ ¶ ကုလေ အန္တိမဂန္ဓိနီ အဟုံ၊
ဧတဿ ဝါဒဿ ဇိဂုစ္ဆမာနာ၊ အကာမိကာ ပဒ္ဓစရာမှိ [ပဋ္ဌစရာမှိ (သျာ။ က။)] တုယှံ။
မဏ္ဍဗျ ¶ ဘာသိံ ယမဘာသနေယျံ [ဘာသိဿံ အဘာသနေယျံ (သီ။ သျာ။ ပီ။)၊ ဘာသိဿ’မဘာသနေယျံ (?)]၊ တံ ခမျတံ ပုတ္တကဟေတု မဇ္ဇ၊
ပုတ္တပေမာ န ဣဓ ပရတ္ထိ ကိဉ္စိ၊ သော နော အယံ ဇီဝတိ ယညဒတ္တောတိ။
ကဏှဒီပါယနဇာတကံ [မဏ္ဍဗျဇာတကံ (သျာ။ က။)] ဆဋ္ဌံ။
၄၄၅။ နိဂြောဓဇာတကံ (၇)
န ဝါဟမေတံ [န စာဟမေတံ (သီ။)] ဇာနာမိ၊ ကော ဝါယံ ကဿ ဝါတိ ဝါ [စာတိ ဝါ (သီ။)]၊
ယထာ သာခေါ စရိ [ဝဒီ (သီ။ သျာ။ ပီ။)] ဧဝံ၊ နိဂြောဓ ကိန္တိ မညသိ။
တတော ဂလဝိနီတေန၊ ပုရိသာ နီဟရိံသု မံ၊
ဒတွာ မုခပဟာရာနိ၊ သာခဿ ဝစနံကရာ။
ဧတာဒိသံ ဒုမ္မတိနာ၊ အကတညုန ဒုဗ္ဘိနာ၊
ကတံ အနရိယံ သာခေန၊ သခိနာ တေ ဇနာဓိပ။
န ဝါဟမေတံ ဇာနာမိ၊ နပိ မေ ကောစိ သံသတိ၊
ယံ မေ တွံ သမ္မ အက္ခာသိ၊ သာခေန ကာရဏံ [ကဍ္ဎနံ (သီ။ သျာ။)] ကတံ။
သခီနံ ¶ သာဇီဝကရော၊ မမ သာခဿ စူဘယံ၊
တွံ နောသိဿရိယံ ဒါတာ၊ မနုဿေသု မဟန္တတံ၊
တယာမာ လဗ္ဘိတာ ဣဒ္ဓီ၊ ဧတ္ထ မေ နတ္ထိ သံသယော။
ယထာပိ ဗီဇမဂ္ဂိမှိ၊ ဍယှတိ န ဝိရူဟတိ၊
ဧဝံ ကတံ အသပ္ပုရိသေ၊ နဿတိ န ဝိရူဟတိ။
ကတညုမှိ စ ပေါသမှိ၊ သီလဝန္တေ အရိယဝုတ္တိနေ၊
သုခေတ္တေ ဝိယ ဗီဇာနိ၊ ကတံ တမှိ န နဿတိ။
ဣမံ ဇမ္မံ နေကတိကံ၊ အသပ္ပုရိသစိန္တကံ၊
ဟနန္တု သာခံ သတ္တီဟိ၊ နာဿ ဣစ္ဆာမိ ဇီဝိတံ။
ခမတဿ ¶ မဟာရာဇ၊ ပါဏာ န ပဋိအာနယာ [ဒုပ္ပဋိအာနယာ (သီ။ သျာ။ ပီ။)]၊
ခမ ဒေဝ အသပ္ပုရိသဿ၊ နာဿ ဣစ္ဆာမဟံ ဝဓံ။
နိဂြောဓမေဝ သေဝေယျ၊ န သာခမုပသံဝသေ၊
နိဂြောဓသ္မိံ မတံ သေယျော၊ ယဉ္စေ သာခသ္မိ ဇီဝိတန္တိ။
နိဂြောဓဇာတကံ သတ္တမံ။
၄၄၆။ တက္ကလဇာတကံ (၈)
န ¶ တက္ကလာ သန္တိ န အာလုဝါနိ [အာလုပါနိ (သီ။ သျာ။ ပီ။)]၊ န ဗိဠာလိယော န ကဠမ္ဗာနိ တာတ၊
ဧကော အရညမှိ သုသာနမဇ္ဈေ၊ ကိမတ္ထိကော တာတ ခဏာသိ ကာသုံ။
ပိတာမဟော ¶ တာတ သုဒုဗ္ဗလော တေ၊ အနေကဗျာဓီဟိ ဒုခေန ဖုဋ္ဌော၊
တမဇ္ဇဟံ နိခဏိဿာမိ သောဗ္ဘေ၊ န ဟိဿ တံ ဇီဝိတံ ရောစယာမိ။
သင်္ကပ္ပမေတံ ပဋိလဒ္ဓ ပါပကံ၊ အစ္စာဟိတံ ကမ္မ ကရောသိ လုဒ္ဒံ၊
မယာပိ တာတ ပဋိလစ္ဆသေ တုဝံ၊ ဧတာဒိသံ ကမ္မ ဇရူပနီတော၊
တံ ကုလ္လဝတ္တံ အနုဝတ္တမာနော၊ အဟမ္ပိ တံ နိခဏိဿာမိ သောဗ္ဘေ။
ဖရုသာဟိ ဝါစာဟိ ပကုဗ္ဗမာနော၊ အာသဇ္ဇ မံ တွံ ဝဒသေ ကုမာရ၊
ပုတ္တော မမံ ဩရသကော သမာနော၊ အဟိတာနုကမ္ပီ မမ တွံသိ ပုတ္တ။
န ¶ တာဟံ [တျာဟံ (သျာ။)] တာတ အဟိတာနုကမ္ပီ၊ ဟိတာနုကမ္ပီ တေ အဟမ္ပိ [အဟဉှိ (သျာ။)] တာတ၊
ပါပဉ္စ တံ ကမ္မ ပကုဗ္ဗမာနံ၊ အရဟာမိ နော ဝါရယိတုံ တတော။
ယော မာတရံ ဝါ ပိတရံ သဝိဋ္ဌ [မာတရံ ပိတရံ ဝါ ဝသိဋ္ဌ (သီ။ ပီ။)]၊ အဒူသကေ ဟိံသတိ ပါပဓမ္မော၊
ကာယဿ ¶ ဘေဒါ အဘိသမ္ပရာယံ၊ အသံသယံ သော နိရယံ ဥပေတိ [ပရေတိ (သီ။ ပီ။)]။
ယော မာတရံ ဝါ ပိတရံ သဝိဋ္ဌ၊ အန္နေန ပါနေန ဥပဋ္ဌဟာတိ၊
ကာယဿ ဘေဒါ အဘိသမ္ပရာယံ၊ အသံသယံ သော သုဂတိံ ဥပေတိ။
န မေ တွံ ပုတ္တ အဟိတာနုကမ္ပီ၊ ဟိတာနုကမ္ပီ မေ [မမ (?)] တွံသိ ပုတ္တ၊
အဟဉ္စ တံ မာတရာ ဝုစ္စမာနော၊ ဧတာဒိသံ ကမ္မ ကရောမိ လုဒ္ဒံ။
ယာ တေ သာ ဘရိယာ အနရိယရူပါ၊ မာတာ မမေသာ သကိယာ ဇနေတ္တိ၊
နိဒ္ဓါပယေ [နိဒ္ဓါမသေ (ပီ။)] တဉ္စ သကာ အဂါရာ၊ အညမ္ပိ တေ သာ ဒုခမာဝဟေယျ။
ယာ တေ သာ ဘရိယာ အနရိယရူပါ၊ မာတာ မမေသာ သကိယာ ဇနေတ္တိ၊
ဒန္တာ ကရေဏူဝ ဝသူပနီတာ၊ သာ ပါပဓမ္မာ ပုနရာဝဇာတူတိ။
တက္ကလဇာတကံ အဋ္ဌမံ။
၄၄၇။ မဟာဓမ္မပါလဇာတကံ (၉)
ကိံ ¶ ¶ တေ ဝတံ ကိံ ပန ဗြဟ္မစရိယံ၊ ကိဿ သုစိဏ္ဏဿ အယံ ဝိပါကော၊
အက္ခာဟိ မေ ဗြာဟ္မဏ ဧတမတ္ထံ၊ ကသ္မာ နု တုမှံ ဒဟရာ န မိယျရေ [မီယရေ (သီ။ ပီ။)]။
ဓမ္မံ စရာမ န မုသာ ဘဏာမ၊ ပါပါနိ ကမ္မာနိ ပရိဝဇ္ဇယာမ [ဝိဝဇ္ဇယာမ (သီ။ သျာ။ ပီ။)]၊
အနရိယံ ပရိဝဇ္ဇေမု သဗ္ဗံ၊ တသ္မာ ဟိ အမှံ ဒဟရာ န မိယျရေ။
သုဏောမ ¶ ဓမ္မံ အသတံ သတဉ္စ၊ န စာပိ ဓမ္မံ အသတံ ရောစယာမ၊
ဟိတွာ အသန္တေ န ဇဟာမ သန္တေ၊ တသ္မာ ဟိ အမှံ ဒဟရာ န မိယျရေ။
ပုဗ္ဗေဝ ဒါနာ သုမနာ ဘဝါမ၊ ဒဒမ္ပိ ဝေ အတ္တမနာ ဘဝါမ၊
ဒတွာပိ ဝေ နာနုတပ္ပာမ ပစ္ဆာ၊ တသ္မာ ဟိ အမှံ ဒဟရာ န မိယျရေ။
သမဏေ မယံ ဗြာဟ္မဏေ အဒ္ဓိကေ စ၊ ဝနိဗ္ဗကေ ယာစနကေ ဒလိဒ္ဒေ၊
အန္နေန ပါနေန အဘိတပ္ပယာမ၊ တသ္မာ ¶ ဟိ အမှံ ဒဟရာ န မိယျရေ။
မယဉ္စ ဘရိယံ နာတိက္ကမာမ၊ အမှေ စ ဘရိယာ နာတိက္ကမန္တိ၊
အညတြ တာဟိ ဗြဟ္မစရိယံ စရာမ၊ တသ္မာ ဟိ အမှံ ဒဟရာ န မိယျရေ။
ပါဏာတိပါတာ ¶ ဝိရမာမ သဗ္ဗေ၊ လောကေ အဒိန္နံ ပရိဝဇ္ဇယာမ၊
အမဇ္ဇပါ နောပိ မုသာ ဘဏာမ၊ တသ္မာ ဟိ အမှံ ဒဟရာ န မိယျရေ။
ဧတာသု ဝေ ဇာယရေ သုတ္တမာသု၊ မေဓာဝိနော ဟောန္တိ ပဟူတပညာ၊
ဗဟုဿုတာ ဝေဒဂုနော [ဝေဒဂုဏာ (သျာ။ က။)] စ ဟောန္တိ၊ တသ္မာ ဟိ အမှံ ဒဟရာ န မိယျရေ။
မာတာ ပိတာ စ [မာတာ စ ပိတာ (က။)၊ မာတာပိတရာ (သျာ။)] ဘဂိနီ ဘာတရော စ၊ ပုတ္တာ စ ဒါရာ စ မယဉ္စ သဗ္ဗေ၊
ဓမ္မံ စရာမ ပရလောကဟေတု၊ တသ္မာ ဟိ အမှံ ဒဟရာ န မိယျရေ။
ဒါသာ စ ဒါသျော [ဒါဿော (သီ။ ပီ။)၊ ဒါသီ (သျာ။)] အနုဇီဝိနော စ၊ ပရိစာရကာ ကမ္မကရာ စ သဗ္ဗေ၊
ဓမ္မံ စရန္တိ ပရလောကဟေတု၊ တသ္မာ ¶ ဟိ အမှံ ဒဟရာ န မိယျရေ။
ဓမ္မော ဟဝေ ရက္ခတိ ဓမ္မစာရိံ၊ ဓမ္မော သုစိဏ္ဏော သုခမာဝဟာတိ၊
ဧသာနိသံသော ဓမ္မေ သုစိဏ္ဏေ၊ န ဒုဂ္ဂတိံ ဂစ္ဆတိ ဓမ္မစာရီ။
ဓမ္မော ဟဝေ ရက္ခတိ ဓမ္မစာရိံ၊ ဆတ္တံ မဟန္တံ ဝိယ ဝဿကာလေ၊
ဓမ္မေန ဂုတ္တော မမ ဓမ္မပါလော၊ အညဿ အဋ္ဌီနိ သုခီ ကုမာရောတိ။
မဟာဓမ္မပါလဇာတကံ နဝမံ။
၄၄၈။ ကုက္ကုဋဇာတကံ (၁၀)
နာသ္မသေ ¶ ကတပါပမှိ၊ နာသ္မသေ အလိကဝါဒိနေ၊
နာသ္မသေ အတ္တတ္ထပညမှိ၊ အတိသန္တေပိ နာသ္မသေ။
ဘဝန္တိ ဟေကေ ပုရိသာ၊ ဂေါပိပါသိကဇာတိကာ [ဂေါပိပါသကဇာတိကာ (သီ။ သျာ။ ပီ။)]၊
ဃသန္တိ မညေ မိတ္တာနိ၊ ဝါစာယ န စ ကမ္မုနာ။
သုက္ခဉ္ဇလိပဂ္ဂဟိတာ၊ ဝါစာယ ပလိဂုဏ္ဌိတာ၊
မနုဿဖေဂ္ဂူ နာသီဒေ၊ ယသ္မိံ နတ္ထိ ကတညုတာ။
န ¶ ဟိ အညညစိတ္တာနံ၊ ဣတ္ထီနံ ပုရိသာန ဝါ၊
နာနာဝိကတွာ [နာနာဝ ကတွာ (သီ။ ပီ။)] သံသဂ္ဂံ၊ တာဒိသမ္ပိ စ နာသ္မသေ [တာဒိသမ္ပိ န ဝိဿသေ (သျာ။)]။
အနရိယကမ္မမောက္ကန္တံ ¶ ၊ အထေတံ [အတ္ထေတံ (သီ။ သျာ။ ပီ။)] သဗ္ဗဃာတိနံ၊
နိသိတံဝ ပဋိစ္ဆန္နံ၊ တာဒိသမ္ပိ စ နာသ္မသေ။
မိတ္တရူပေနိဓေကစ္စေ၊ သာခလျေန အစေတသာ၊
ဝိဝိဓေဟိ ဥပါယန္တိ၊ တာဒိသမ္ပိ စ နာသ္မသေ။
အာမိသံ ဝါ ဓနံ ဝါပိ၊ ယတ္ထ ပဿတိ တာဒိသော၊
ဒုဗ္ဘိံ ကရောတိ ဒုမ္မေဓော၊ တဉ္စ ဟန္တွာန [ဈာတွာန (သီ။ ပီ။)၊ ဟိတွာန (သျာ။)] ဂစ္ဆတိ။
မိတ္တရူပေန ဗဟဝေါ၊ ဆန္နာ သေဝန္တိ သတ္တဝေါ၊
ဇဟေ ကာပုရိသေ ဟေတေ၊ ကုက္ကုဋော ဝိယ သေနကံ။
ယော စ [ယောဓ (ဇာ။ ၁။၈။၂၅ သုလသာဇာတကေ)] ဥပ္ပတိတံ အတ္ထံ၊ န ခိပ္ပမနုဗုဇ္ဈတိ၊
အမိတ္တဝသမနွေတိ၊ ပစ္ဆာ စ အနုတပ္ပတိ။
ယော စ ဥပ္ပတိတံ အတ္ထံ၊ ခိပ္ပမေဝ နိဗောဓတိ၊
မုစ္စတေ သတ္တုသမ္ဗာဓာ၊ ကုက္ကုဋော ဝိယ သေနကာ၊
တံ တာဒိသံ ကူဋမိဝေါဍ္ဍိတံ ဝနေ၊ အဓမ္မိကံ နိစ္စဝိဓံသကာရိနံ၊
အာရာ ဝိဝဇ္ဇေယျ နရော ဝိစက္ခဏော၊ သေနံ ယထာ ကုက္ကုဋော ဝံသကာနနေတိ။
ကုက္ကုဋဇာတကံ ဒသမံ။
၄၄၉။ မဋ္ဌကုဏ္ဍလီဇာတကံ (၁၁)
အလင်္ကတော ¶ ¶ မဋ္ဌကုဏ္ဍလီ [မဋ္ဋကုဏ္ဍလီ (သီ။ ပီ။)]၊ မာလဓာရီ [မာလဘာရီ (သီ။ ပီ။)] ဟရိစန္ဒနုဿဒေါ၊
ဗာဟာ ပဂ္ဂယှ ကန္ဒသိ၊ ဝနမဇ္ဈေ ကိံ ဒုက္ခိတော တုဝံ။
သောဝဏ္ဏမယော ပဘဿရော၊ ဥပ္ပန္နော ရထပဉ္ဇရော မမ၊
တဿ စက္ကယုဂံ န ဝိန္ဒာမိ၊ တေန ဒုက္ခေန ဇဟာမိ ဇီဝိတံ။
သောဝဏ္ဏမယံ မဏီမယံ၊ လောဟမယံ အထ ရူပိယာမယံ၊
[အာစိက္ခ မေ ဘဒ္ဒမာဏဝ (ဝိ။ ဝ။ ၁၂၀၉)] ပါဝဒ ရထံ ကရိဿာမိ [ကာရယာမိ (သီ။ ပီ။)] တေ [အာစိက္ခ မေ ဘဒ္ဒမာဏဝ (ဝိ။ ဝ။ ၁၂၀၉)]၊ စက္ကယုဂံ ပဋိပါဒယာမိ တံ။
သော [အထ (သျာ။)] မာဏဝေါ တဿ ပါဝဒိ၊ စန္ဒိမသူရိယာ [စန္ဒိမသူရိယာ (သျာ။)] ဥဘယေတ္ထ ဘာတရော [ဒိဿရေ (ဝိ။ ဝ။ ၁၂၁၀)]၊
သောဝဏ္ဏမယော ရထော မမ၊ တေန စက္ကယုဂေန သောဘတိ။
ဗာလော ခေါ တွံသိ မာဏဝ၊ ယော တွံ ပတ္ထယသေ အပတ္ထိယံ၊
မညာမိ တုဝံ မရိဿသိ၊ န ¶ ဟိ တွံ လစ္ဆသိ စန္ဒသူရိယေ။
ဂမနာဂမနမ္ပိ ¶ ဒိဿတိ၊ ဝဏ္ဏဓာတု ဥဘယေတ္ထ ဝီထိယော၊
ပေတော ပန နေဝ ဒိဿတိ၊ ကော နု ခေါ [ကော နိဓ (ဝိ။ ဝ။ ၁၂၁၂)] ကန္ဒတံ ဗာလျတရော။
သစ္စံ ¶ ခေါ ဝဒေသိ မာဏဝ၊ အဟမေဝ ကန္ဒတံ ဗာလျတရော၊
စန္ဒံ ဝိယ ဒါရကော ရုဒံ၊ ပေတံ ကာလကတာဘိပတ္ထယေ။
အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ၊
ဝါရိနာ ဝိယ ဩသိဉ္စံ၊ သဗ္ဗံ နိဗ္ဗာပယေ ဒရံ။
အဗ္ဗဟီ [အဗ္ဗုဟိ (သျာ။)၊ အဗ္ဘုဠှံ (က။)] ဝတ မေ သလ္လံ၊ ယမာသိ ဟဒယဿိတံ [သောကံ ဟဒယနိဿိတံ (ဝိ။ ဝ။ ၁၂၁၅)]၊
ယော မေ သောကပရေတဿ၊ ပုတ္တသောကံ အပါနုဒိ။
သောဟံ အဗ္ဗူဠှသလ္လောသ္မိ၊ ဝီတသောကော အနာဝိလော၊
န သောစာမိ န ရောဒါမိ၊ တဝ သုတွာန မာဏဝါတိ။
မဋ္ဌကုဏ္ဍလီဇာတကံ ဧကာဒသမံ။
၄၅၀။ ဗိလာရကောသိယဇာတကံ (၁၂)
အပစန္တာပိ ဒိစ္ဆန္တိ၊ သန္တော လဒ္ဓါန ဘောဇနံ၊
ကိမေဝ တွံ ပစမာနော၊ ယံ န ဒဇ္ဇာ န တံ သမံ။
မစ္ဆေရာ ¶ စ ပမာဒါ စ၊ ဧဝံ ဒါနံ န ဒိယျတိ၊
ပုညံ အာကင်္ခမာနေန၊ ဒေယျံ ဟောတိ ဝိဇာနတာ။
ယဿေဝ ဘီတော န ဒဒါတိ မစ္ဆရီ၊ တဒေဝါဒဒတော ဘယံ၊
ဇိဃစ္ဆာ စ ပိပါသာ စ၊ ယဿ ဘာယတိ မစ္ဆရီ၊
တမေဝ ဗာလံ ဖုသတိ၊ အသ္မိံ လောကေ ပရမှိ စ။
တသ္မာ ဝိနေယျ မစ္ဆေရံ၊ ဒဇ္ဇာ ဒါနံ မလာဘိဘူ၊
ပုညာနိ ပရလောကသ္မိံ၊ ပတိဋ္ဌာ ဟောန္တိ ပါဏိနံ။
ဒုဒ္ဒဒံ ဒဒမာနာနံ၊ ဒုက္ကရံ ကမ္မ ကုဗ္ဗတံ၊
အသန္တော နာနုကုဗ္ဗန္တိ၊ သတံ ဓမ္မော ဒုရန္နယော။
တသ္မာ သတဉ္စ အသတံ [အသတဉ္စ (သီ။ သျာ။ ပီ။)]၊ နာနာ ဟောတိ ဣတော ဂတိ၊
အသန္တော နိရယံ ယန္တိ၊ သန္တော သဂ္ဂပရာယနာ။
အပ္ပသ္မေကေ ¶ [အပ္ပမ္ပေကေ (သျာ။)] ပဝေစ္ဆန္တိ၊ ဗဟုနေကေ န ဒိစ္ဆရေ၊
အပ္ပသ္မာ ဒက္ခိဏာ ဒိန္နာ၊ သဟဿေန သမံ မိတာ။
ဓမ္မံ စရေ ယောပိ သမုဉ္ဆကံ စရေ၊ ဒါရဉ္စ ပေါသံ ဒဒမပ္ပကသ္မိံ [ဒဒံ အပ္ပကသ္မိပိ (ပီ။)]၊
သတံ သဟဿာနံ သဟဿယာဂိနံ၊ ကလမ္ပိ ¶ နာဂ္ဃန္တိ တထာဝိဓဿ တေ။
ကေနေသ ¶ ယညော ဝိပုလော မဟဂ္ဃတော [မဟဂ္ဂတော (သံ။ နိ။ ၁။၃၂)]၊ သမေန ဒိန္နဿ န အဂ္ဃမေတိ၊
ကထံ သတံ သဟဿာနံ [ကထံ သဟဿာနံ (သီ။ သျာ။ ပီ။)] သဟဿယာဂိနံ၊ ကလမ္ပိ နာဂ္ဃန္တိ တထာဝိဓဿ တေ။
ဒဒန္တိ ဟေကေ ဝိသမေ နိဝိဋ္ဌာ၊ ဆေတွာ [ဈတွာ (သီ။ ပီ။)၊ ဃတွာ (သျာ။)] ဝဓိတွာ အထ သောစယိတွာ၊
သာ ဒက္ခိဏာ အဿုမုခါ သဒဏ္ဍာ၊ သမေန ဒိန္နဿ န အဂ္ဃမေတိ၊
ဧဝံ သတံ သဟဿာနံ [ဧဝံ သဟဿာနံ (သီ။ သျာ။ ပီ။)] သဟဿယာဂိနံ၊ ကလမ္ပိ နာဂ္ဃန္တိ တထာဝိဓဿ တေတိ။
ဗိလာရကောသိယဇာတကံ ဒွါဒသမံ။
၄၅၁။ စက္ကဝါကဇာတကံ (၁၃)
ဝဏ္ဏဝါ အဘိရူပေါသိ၊ ဃနော သဉ္ဇာတရောဟိတော၊
စက္ကဝါက သုရူပေါသိ၊ ဝိပ္ပသန္နမုခိန္ဒြိယော။
ပါဌီနံ ပါဝုသံ မစ္ဆံ၊ ဗလဇံ [ဝါလဇံ (သီ။ ပီ။)၊ ဗလဇ္ဇံ (သျာ။)] မုဉ္ဇရောဟိတံ၊
ဂင်္ဂါယ တီရေ နိသိန္နော [ဂင်္ဂါတီရေ နိသိန္နောသိ (သျာ။ က။)]၊ ဧဝံ ဘုဉ္ဇသိ ဘောဇနံ။
န ဝါဟမေတံ [သဗ္ဗတ္ထပိ သမာနံ] ဘုဉ္ဇာမိ၊ ဇင်္ဂလာနောဒကာနိ ဝါ၊
အညတြ သေဝါလပဏကာ၊ ဧတံ [အညံ (သျာ။)] မေ သမ္မ ဘောဇနံ။
န ¶ ဝါဟမေတံ သဒ္ဒဟာမိ၊ စက္ကဝါကဿ ဘောဇနံ၊
အဟမ္ပိ သမ္မ ဘုဉ္ဇာမိ၊ ဂါမေ လောဏိယတေလိယံ။
မနုဿေသု ကတံ ဘတ္တံ၊ သုစိံ မံသူပသေစနံ၊
န ¶ စ မေ တာဒိသော ဝဏ္ဏော၊ စက္ကဝါက ယထာ တုဝံ။
သမ္ပဿံ အတ္တနိ ဝေရံ၊ ဟိံသယံ [ဟိံသာယ (သျာ။ ပီ။ က။)] မာနုသိံ ပဇံ၊
ဥတြသ္တော ဃသသီ ဘီတော၊ တေန ဝဏ္ဏော တဝေဒိသော။
သဗ္ဗလောကဝိရုဒ္ဓါသိ၊ ဓင်္က ပါပေန ကမ္မုနာ၊
လဒ္ဓါ ပိဏ္ဍော န ပီဏေတိ၊ တေန ဝဏ္ဏော တဝေဒိသော။
အဟမ္ပိ [အဟဉ္စ (?)] သမ္မ ဘုဉ္ဇာမိ၊ အဟိံသံ သဗ္ဗပါဏိနံ၊
အပ္ပောဿုက္ကော နိရာသင်္ကီ၊ အသောကော အကုတောဘယော။
သော ကရဿု အာနုဘာဝံ၊ ဝီတိဝတ္တဿု သီလိယံ၊
အဟိံသာယ စရ လောကေ၊ ပိယော ဟောဟိသိ မံမိဝ။
ယော န ဟန္တိ န ဃာတေတိ၊ န ဇိနာတိ န ဇာပယေ၊
မေတ္တံသော သဗ္ဗဘူတေသု၊ ဝေရံ တဿ န ကေနစီတိ။
စက္ကဝါကဇာတကံ တေရသမံ။
၄၅၂။ ဘူရိပညဇာတကံ (၁၄)
သစ္စံ ¶ ကိရ တွံ အပိ [တွမ္ပိ (သီ။)၊ တုဝမ္ပိ (သျာ။)၊ တွံ အသိ (က။)] ဘူရိပည၊ ယာ တာဒိသီ သီရိ ဓိတီ မတီ စ၊
န တာယတေဘာဝဝသူပနိတံ၊ ယော ယဝကံ ဘုဉ္ဇသိ အပ္ပသူပံ။
သုခံ ဒုက္ခေန ပရိပါစယန္တော၊ ကာလာ ကာလံ ဝိစိနံ ဆန္ဒဆန္နော၊
အတ္ထဿ ¶ ဒွါရာနိ အဝါပုရန္တော၊ တေနာဟံ တုဿာမိ ယဝေါဒနေန။
ကာလဉ္စ ¶ ဉတွာ အဘိဇီဟနာယ၊ မန္တေဟိ အတ္ထံ ပရိပါစယိတွာ၊
ဝိဇမ္ဘိဿံ သီဟဝိဇမ္ဘိတာနိ၊ တာယိဒ္ဓိယာ ဒက္ခသိ မံ ပုနာပိ။
သုခီပိ ဟေကေ [သုခီ ဟိ ဧကေ (သီ။)၊ သုခီတိ ဟေကေ (?)] န ကရောန္တိ ပါပံ၊ အဝဏ္ဏသံသဂ္ဂဘယာ ပုနေကေ၊
ပဟူ သမာနော ဝိပုလတ္ထစိန္တီ၊ ကိံကာရဏာ မေ န ကရောသိ ဒုက္ခံ။
န ပဏ္ဍိတာ အတ္တသုခဿ ဟေတု၊ ပါပါနိ ကမ္မာနိ သမာစရန္တိ၊
ဒုက္ခေန ဖုဋ္ဌာ ခလိတာပိ သန္တာ၊ ဆန္ဒာ စ ဒေါသာ န ဇဟန္တိ ဓမ္မံ။
ယေန ကေနစိ ဝဏ္ဏေန၊ မုဒုနာ ဒါရုဏေန ဝါ၊
ဥဒ္ဓရေ ဒီနမတ္တာနံ၊ ပစ္ဆာ ဓမ္မံ သမာစရေ။
ယဿ ရုက္ခဿ ဆာယာယ၊ နိသီဒေယျ သယေယျ ဝါ၊
န တဿ သာခံ ဘဉ္ဇေယျ၊ မိတ္တဒုဗ္ဘော ဟိ ပါပကော။
ယဿာပိ [ယဿ ဟိ (သီ။ က။)] ဓမ္မံ ပုရိသော [မနုဇော (သီ။)] ဝိဇညာ၊ ယေ စဿ ကင်္ခံ ဝိနယန္တိ သန္တော၊
တံ ¶ ဟိဿ ဒီပဉ္စ ပရာယနဉ္စ၊ န တေန မေတ္တိံ ဇရယေထ ပညော။
အလသော ဂိဟီ ကာမဘောဂီ န သာဓု၊ အသညတော ပဗ္ဗဇိတော န သာဓု၊
ရာဇာ န သာဓု အနိသမ္မကာရီ၊ ယော ပဏ္ဍိတော ကောဓနော တံ န သာဓု။
နိသမ္မ ခတ္တိယော ကယိရာ၊ နာနိသမ္မ ဒိသမ္ပတိ၊
နိသမ္မကာရိနော ရာဇ၊ ယသော ကိတ္တိ စ ဝဍ္ဎတီတိ။
ဘူရိပညဇာတကံ စုဒ္ဒသမံ။
၄၅၃။ မဟာမင်္ဂလဇာတကံ (၁၅)
ကိံသု ¶ နရော ဇပ္ပမဓိစ္စကာလေ၊ ကံ ဝါ ဝိဇ္ဇံ ကတမံ ဝါ သုတာနံ၊
သော မစ္စော အသ္မိဉ္စ [အသ္မိံဝ (ပီ။)] ပရမှိ လောကေ၊ ကထံ ကရော သောတ္ထာနေန ဂုတ္တော။
ယဿ ဒေဝါ ပိတရော စ သဗ္ဗေ၊ သရီသပါ [သိရိံသပါ (သီ။ သျာ။ ပီ။)] သဗ္ဗဘူတာနိ စာပိ၊
မေတ္တာယ နိစ္စံ အပစိတာနိ ဟောန္တိ၊ ဘူတေသု ဝေ သောတ္ထာနံ တဒါဟု။
ယော ¶ သဗ္ဗလောကဿ နိဝါတဝုတ္တိ၊ ဣတ္ထီပုမာနံ ¶ သဟဒါရကာနံ၊
ခန္တာ ဒုရုတ္တာနမပ္ပဋိကူလဝါဒီ၊ အဓိဝါသနံ သောတ္ထာနံ တဒါဟု။
ယော နာဝဇာနာတိ သဟာယမိတ္တေ [သဟာယမတ္တေ (သီ။ ပီ။)]၊ သိပ္ပေန ကုလျာဟိ ဓနေန ဇစ္စာ၊
ရုစိပညော အတ္ထကာလေ မတီမာ [မုတီမာ (သီ။ ပီ။)]၊ သဟာယေသု ဝေ သောတ္ထာနံ တဒါဟု။
မိတ္တာနိ ဝေ ယဿ ဘဝန္တိ သန္တော၊ သံဝိဿတ္ထာ အဝိသံဝါဒကဿ၊
န မိတ္တဒုဗ္ဘီ သံဝိဘာဂီ ဓနေန၊ မိတ္တေသု ဝေ သောတ္ထာနံ တဒါဟု။
ယဿ ဘရိယာ တုလျဝယာ သမဂ္ဂါ၊ အနုဗ္ဗတာ ဓမ္မကာမာ ပဇာတာ [သဇာတာ (က။)]၊
ကောလိနိယာ သီလဝတီ ပတိဗ္ဗတာ၊ ဒါရေသု ဝေ သောတ္ထာနံ တဒါဟု။
ယဿ ¶ ရာဇာ ဘူတပတိ [ဘူတပတီ (သီ။ သျာ။ ပီ။)] ယသဿီ၊ ဇာနာတိ သောစေယျံ ပရက္ကမဉ္စ၊
အဒွေဇ္ဈတာ သုဟဒယံ မမန္တိ၊ ရာဇူသု ဝေ သောတ္ထာနံ တဒါဟု။
အန္နဉ္စ ¶ ပါနဉ္စ ဒဒါတိ သဒ္ဓါ၊ မာလဉ္စ ဂန္ဓဉ္စ ဝိလေပနဉ္စ၊
ပသန္နစိတ္တော အနုမောဒမာနော၊ သဂ္ဂေသု ဝေ သောတ္ထာနံ တဒါဟု။
ယမရိယဓမ္မေန ပုနန္တိ ဝုဒ္ဓါ၊ အာရာဓိတာ သမစရိယာယ သန္တော၊
ဗဟုဿုတာ ဣသယော သီလဝန္တော၊ အရဟန္တမဇ္ဈေ သောတ္ထာနံ တဒါဟု။
ဧတာနိ ခေါ သောတ္ထာနာနိ လောကေ၊ ဝိညုပ္ပသတ္ထာနိ သုခုဒြယာနိ [သုခိန္ဒြိယာနိ (ပီ။)]၊
တာနီဓ သေဝေထ နရော သပညော၊ န ဟိ မင်္ဂလေ ကိဉ္စနမတ္ထိ သစ္စန္တိ။
မဟာမင်္ဂလဇာတကံ ပန္နရသမံ။
၄၅၄။ ဃဋပဏ္ဍိတဇာတကံ (၁၆)
ဥဋ္ဌေဟိ ကဏှ ကိံ သေသိ၊ ကော အတ္ထော သုပနေန တေ၊
ယောပိ တုယှံ [တာယံ (ပီ။)] သကော ဘာတာ၊ ဟဒယံ စက္ခု စ [စက္ခုံဝ (ပီ။)] ဒက္ခိဏံ၊
တဿ ဝါတာ ဗလီယန္တိ၊ ဃဋော ဇပ္ပတိ [သသံ ဇပ္ပတိ (?)] ကေသဝ။
တဿ တံ ဝစနံ သုတွာ၊ ရောဟိဏေယျဿ ကေသဝေါ၊
တရမာနရူပေါ ဝုဋ္ဌာသိ၊ ဘာတုသောကေန အဋ္ဋိတော။
ကိံ နု ¶ ဥမ္မတ္တရူပေါဝ၊ ကေဝလံ ဒွါရကံ ဣမံ၊
သသော သသောတိ လပသိ၊ ကော နု တေ သသမာဟရိ။
သောဝဏ္ဏမယံ ¶ မဏီမယံ၊ လောဟမယံ အထ ရူပိယာမယံ၊
သင်္ခသိလာပဝါဠမယံ၊ ကာရယိဿာမိ တေ သသံ။
သန္တိ အညေပိ သသကာ၊ အရညေ ဝနဂေါစရာ၊
တေပိ တေ အာနယိဿာမိ၊ ကီဒိသံ သသမိစ္ဆသိ။
န ¶ စာဟမေတေ [န စာဟမေတံ (သီ။)၊ န ဝါဟမေတေ (သျာ။)၊ န ဝါဟမေတံ (ပီ။)] ဣစ္ဆာမိ၊ ယေ သသာ ပထဝိဿိတာ [ပဌဝိံသိတာ (သီ။ သျာ။ ပီ။)]၊
စန္ဒတော သသမိစ္ဆာမိ၊ တံ မေ ဩဟရ ကေသဝ။
သော နူန မဓုရံ ဉာတိ၊ ဇီဝိတံ ဝိဇဟိဿသိ၊
အပတ္ထိယံ ယော ပတ္ထယသိ၊ စန္ဒတော သသမိစ္ဆသိ။
ဧဝံ စေ ကဏှ ဇာနာသိ၊ ယဒညမနုသာသသိ၊
ကသ္မာ ပုရေ မတံ ပုတ္တံ၊ အဇ္ဇာပိ မနုသောစသိ။
ယံ န လဗ္ဘာ မနုဿေန၊ အမနုဿေန ဝါ ပုန [ပန (ပေ။ ဝ။ ၂၁၅)]၊
ဇာတော မေ မာ မရီ ပုတ္တော၊ ကုတော လဗ္ဘာ အလဗ္ဘိယံ။
န မန္တာ မူလဘေသဇ္ဇာ၊ ဩသဓေဟိ ဓနေန ဝါ၊
သက္ကာ အာနယိတုံ ကဏှ၊ ယံ ပေတမနုသောစသိ။
ယဿ ဧတာဒိသာ အဿု၊ အမစ္စာ ပုရိသပဏ္ဍိတာ၊
ယထာ နိဇ္ဈာပယေ အဇ္ဇ၊ ဃဋော ပုရိသပဏ္ဍိတော။
အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ၊
ဝါရိနာ ဝိယ ဩသိဉ္စံ၊ သဗ္ဗံ နိဗ္ဗာပယေ ဒရံ။
အဗ္ဗဟီ ¶ ဝတ မေ သလ္လံ၊ ယမာသိ ဟဒယဿိတံ၊
ယော မေ သောကပရေတဿ၊ ပုတ္တသောကံ အပါနုဒိ။
သောဟံ အဗ္ဗူဠှသလ္လောသ္မိ၊ ဝီတသောကော အနာဝိလော၊
န သောစာမိ န ရောဒါမိ၊ တဝ သုတွာန မာဏဝ [ဘာတိက (ပေ။ ဝ။ ၂၂၄)]။
ဧဝံ ကရောန္တိ သပ္ပညာ၊ ယေ ဟောန္တိ အနုကမ္ပကာ၊
နိဝတ္တယန္တိ သောကမှာ၊ ဃဋော ဇေဋ္ဌံဝ ဘာတရန္တိ။
ဃဋပဏ္ဍိတဇာတကံ သောဠသမံ။
ဒသကနိပါတံ နိဋ္ဌိတံ။
တဿုဒ္ဒါနံ –
ဒဠှ ¶ ကဏှ ဓနဉ္ဇယ သင်္ခဝရော၊ ရဇ သတ္တဟ ကဿ စ [သတ္တာဟသသာခ (သျာ။)] တက္ကလိနာ၊
ဓမ္မံ ကုက္ကုဋ ကုဏ္ဍလိ ဘောဇနဒါ၊ စက္ကဝါက သုဘူရိသ သောတ္ထိ ဃဋောတိ။