📜

၃။ အနိယတကဏ္ဍံ

၁။ ပဌမအနိယတသိက္ခာပဒံ

ဣမေ ခေါ ပနာယသ္မန္တော ဒွေ အနိယတာ ဓမ္မာ

ဥဒ္ဒေသံ အာဂစ္ဆန္တိ။

၄၄၃။ တေန သမယေန ဗုဒ္ဓါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အာယသ္မာ ဥဒါယီ သာဝတ္ထိယံ ကုလူပကော ဟောတိ၊ ဗဟုကာနိ ကုလာနိ ဥပသင်္ကမတိ။ တေန ခေါ ပန သမယေန အာယသ္မတော ဥဒါယိဿ ဥပဋ္ဌာကကုလဿ ကုမာရိကာ အညတရဿ ကုလဿ ကုမာရကဿ ဒိန္နာ ဟောတိ။ အထ ခေါ အာယသ္မာ ဥဒါယီ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန တံ ကုလံ တေနုပသင်္ကမိ၊ ဥပသင်္ကမိတွာ မနုဿေ ပုစ္ဆိ – ‘‘ကဟံ ဣတ္ထန္နာမာ’’တိ? တေ ဧဝမာဟံသု – ‘‘ဒိန္နာ၊ ဘန္တေ၊ အမုကဿ ကုလဿ ကုမာရကဿာ’’တိ။ တမ္ပိ ခေါ ကုလံ အာယသ္မတော ဥဒါယိဿ ဥပဋ္ဌာကံ ဟောတိ။ အထ ခေါ အာယသ္မာ ဥဒါယီ ယေန တံ ကုလံ တေနုပသင်္ကမိ၊ ဥပသင်္ကမိတွာ မနုဿေ ပုစ္ဆိ – ‘‘ကဟံ ဣတ္ထန္နာမာ’’တိ? တေ ဧဝမာဟံသု – ‘‘ဧသာယျ၊ ဩဝရကေ နိသိန္နာ’’တိ။ အထ ခေါ အာယသ္မာ ဥဒါယီ ယေန သာ ကုမာရိကာ တေနုပသင်္ကမိ၊ ဥပသင်္ကမိတွာ တဿာ ကုမာရိကာယ သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလံကမ္မနိယေ နိသဇ္ဇံ ကပ္ပေသိ ကာလယုတ္တံ သမုလ္လပန္တော ကာလယုတ္တံ ဓမ္မံ ဘဏန္တော။

တေန ခေါ ပန သမယေန ဝိသာခါ မိဂါရမာတာ ဗဟုပုတ္တာ ဟောတိ ဗဟုနတ္တာ အရောဂပုတ္တာ အရောဂနတ္တာ အဘိမင်္ဂလသမ္မတာ။ မနုဿာ ယညေသု ဆဏေသု ဥဿဝေသု ဝိသာခံ မိဂါရမာတရံ ပဌမံ ဘောဇေန္တိ။ အထ ခေါ ဝိသာခါ မိဂါရမာတာ နိမန္တိတာ တံ ကုလံ အဂမာသိ။ အဒ္ဒသာ ခေါ ဝိသာခါ မိဂါရမာတာ အာယသ္မန္တံ ဥဒါယိံ တဿာ ကုမာရိကာယ သဒ္ဓိံ ဧကံ ဧကာယ ရဟော ပဋိစ္ဆန္နေ အာသနေ အလံကမ္မနိယေ နိသိန္နံ။ ဒိသွာန အာယသ္မန္တံ ဥဒါယိံ ဧတဒဝေါစ – ‘‘ဣဒံ၊ ဘန္တေ၊ နစ္ဆန္နံ နပ္ပတိရူပံ ယံ အယျော မာတုဂါမေန သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလံကမ္မနိယေ နိသဇ္ဇံ ကပ္ပေတိ။ ကိဉ္စာပိ၊ ဘန္တေ၊ အယျော အနတ္ထိကော တေန ဓမ္မေန၊ အပိစ ဒုဿဒ္ဓါပယာ အပ္ပသန္နာ မနုဿာ’’တိ။ ဧဝမ္ပိ ခေါ အာယသ္မာ ဥဒါယီ ဝိသာခါယ မိဂါရမာတုယာ ဝုစ္စမာနော နာဒိယိ။ အထ ခေါ ဝိသာခါ မိဂါရမာတာ နိက္ခမိတွာ ဘိက္ခူနံ ဧတမတ္ထံ အာရောစေသိ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥဒါယီ မာတုဂါမေန သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလံကမ္မနိယေ နိသဇ္ဇံ ကပ္ပေဿတီ’’တိ! အထ ခေါ တေ ဘိက္ခူ အာယသ္မန္တံ ဥဒါယိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ…ပေ… ‘‘သစ္စံ ကိရ တွံ၊ ဥဒါယိ၊ မာတုဂါမေန သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလံကမ္မနိယေ နိသဇ္ဇံ ကပ္ပေသီ’’တိ? ‘‘သစ္စံ၊ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ…ပေ… ကထဉှိ နာမ တွံ၊ မောဃပုရိသ၊ မာတုဂါမေန သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလံကမ္မနိယေ နိသဇ္ဇံ ကပ္ပေဿသိ! နေတံ၊ မောဃပုရိသ၊ အပ္ပသန္နာနံ ဝါ ပသာဒါယ…ပေ… ဧဝဉ္စ ပန၊ ဘိက္ခဝေ ၊ ဣမံ သိက္ခာပဒံ ဥဒ္ဒိသေယျာထ –

၄၄၄။ ‘‘ယော ပန ဘိက္ခု မာတုဂါမေန သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလံကမ္မနိယေ နိသဇ္ဇံ ကပ္ပေယျ၊ တမေနံ သဒ္ဓေယျဝစသာ ဥပါသိကာ ဒိသွာ တိဏ္ဏံ ဓမ္မာနံ အညတရေန ဝဒေယျ – ပါရာဇိကေန ဝါ သင်္ဃာဒိသေသေန ဝါ ပါစိတ္တိယေန ဝါ၊ နိသဇ္ဇံ ဘိက္ခု ပဋိဇာနမာနော တိဏ္ဏံ ဓမ္မာနံ အညတရေန ကာရေတဗ္ဗော – ပါရာဇိကေန ဝါ သင်္ဃာဒိသေသေန ဝါ ပါစိတ္တိယေန ဝါ ယေန ဝါ သာ သဒ္ဓေယျဝစသာ ဥပါသိကာ ဝဒေယျ၊ တေန သော ဘိက္ခု ကာရေတဗ္ဗော။ အယံ ဓမ္မော အနိယတော’’တိ။

၄၄၅။ ယော ပနာတိ ယော ယာဒိသော…ပေ… ဘိက္ခူတိ…ပေ… အယံ ဣမသ္မိံ အတ္ထေ အဓိပ္ပေတော ဘိက္ခူတိ။

မာတုဂါမော နာမ မနုဿိတ္ထီ၊ န ယက္ခီ န ပေတီ န တိရစ္ဆာနဂတာ။ အန္တမသော တဒဟုဇာတာပိ ဒါရိကာ၊ ပဂေဝ မဟတ္တရီ။

သဒ္ဓိန္တိ ဧကတော။

ဧကော ဧကာယာတိ ဘိက္ခု စေဝ ဟောတိ မာတုဂါမော စ။

ရဟော နာမ စက္ခုဿ ရဟော၊ သောတဿ ရဟော။ စက္ခုဿ ရဟောနာမ န သက္ကာ ဟောတိ အက္ခိံ ဝါ နိခဏီယမာနေ ဘမုကံ ဝါ ဥက္ခိပီယမာနေ သီသံ ဝါ ဥက္ခိပီယမာနေ ပဿိတုံ။ သောတဿ ရဟောနာမ န သက္ကာ ဟောတိ ပကတိကထာ သောတုံ။

ပဋိစ္ဆန္နံ နာမ အာသနံ ကုဋ္ဋေန ဝါ [ကုဍ္ဍေန ဝါ (သီ။ သျာ။)] ကဝါဋေန ဝါ ကိလဉ္ဇေန ဝါ သာဏိပါကာရေန ဝါ ရုက္ခေန ဝါ ထမ္ဘေန ဝါ ကောတ္ထဠိယာ ဝါ ယေန ကေနစိ ပဋိစ္ဆန္နံ ဟောတိ။

အလံကမ္မနိယေတိ သက္ကာ ဟောတိ မေထုနံ ဓမ္မံ ပဋိသေဝိတုံ။

နိသဇ္ဇံကပ္ပေယျာတိ မာတုဂါမေ နိသိန္နေ ဘိက္ခု ဥပနိသိန္နော ဝါ ဟောတိ ဥပနိပန္နော ဝါ။ ဘိက္ခု နိသိန္နေ မာတုဂါမော ဥပနိသိန္နော ဝါ ဟောတိ ဥပနိပန္နော ဝါ။ ဥဘော ဝါ နိသိန္နာ ဟောန္တိ ဥဘော ဝါ နိပန္နာ။

သဒ္ဓေယျဝစသာ နာမ အာဂတဖလာ အဘိသမေတာဝိနီ ဝိညာတသာသနာ။

ဥပါသိကာ နာမ ဗုဒ္ဓံ သရဏံ ဂတာ၊ ဓမ္မံ သရဏံ ဂတာ၊ သင်္ဃံ သရဏံ ဂတာ။

ဒိသွာတိ ပဿိတွာ။

တိဏ္ဏံ ဓမ္မာနံ အညတရေန ဝဒေယျ – ပါရာဇိကေန ဝါ သင်္ဃာဒိသေသေန ဝါ ပါစိတ္တိယေန ဝါ။ နိသဇ္ဇံ ဘိက္ခု ပဋိဇာနမာနော တိဏ္ဏံ ဓမ္မာနံ အညတရေန ကာရေတဗ္ဗော – ပါရာဇိကေန ဝါ သင်္ဃာဒိသေသေန ဝါ ပါစိတ္တိယေန ဝါ။ ယေန ဝါ သာ သဒ္ဓေယျဝစသာ ဥပါသိကာ ဝဒေယျ တေန သော ဘိက္ခု ကာရေတဗ္ဗော။

၄၄၆။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိသိန္နော မာတုဂါမဿ မေထုနံ ဓမ္မံ ပဋိသေဝန္တော’’တိ၊ သော စ တံ ပဋိဇာနာတိ၊ အာပတ္တိယာ ကာရေတဗ္ဗော။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိသိန္နော မာတုဂါမဿ မေထုနံ ဓမ္မံ ပဋိသေဝန္တော’’တိ၊ သော စေ ဧဝံ ဝဒေယျ – ‘‘သစ္စာဟံ နိသိန္နော၊ နော စ ခေါ မေထုနံ ဓမ္မံ ပဋိသေဝိ’’န္တိ၊ နိသဇ္ဇာယ ကာရေတဗ္ဗော။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိသိန္နော မာတုဂါမဿ မေထုနံ ဓမ္မံ ပဋိသေဝန္တော’’တိ၊ သော စေ ဧဝံ ဝဒေယျ – ‘‘နာဟံ နိသိန္နော၊ အပိစ ခေါ နိပန္နော’’တိ၊ နိပဇ္ဇာယ ကာရေတဗ္ဗော ။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိသိန္နော မာတုဂါမဿ မေထုနံ ဓမ္မံ ပဋိသေဝန္တော’’တိ၊ သော စေ ဧဝံ ဝဒေယျ – ‘‘နာဟံ နိသိန္နော အပိစ ခေါ ဌိတော’’တိ၊ န ကာရေတဗ္ဗော။

၄၄၇။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိပန္နော မာတုဂါမဿ မေထုနံ ဓမ္မံ ပဋိသေဝန္တော’’တိ၊ သော စ တံ ပဋိဇာနာတိ၊ အာပတ္တိယာ ကာရေတဗ္ဗော။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိပန္နော မာတုဂါမဿ မေထုနံ ဓမ္မံ ပဋိသေဝန္တော’’တိ၊ သော စေ ဧဝံ ဝဒေယျ – ‘‘သစ္စာဟံ နိပန္နော၊ နော စ ခေါ မေထုနံ ဓမ္မံ ပဋိသေဝိ’’န္တိ၊ နိပဇ္ဇာယ ကာရေတဗ္ဗော။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိပန္နော မာတုဂါမဿ မေထုနံ ဓမ္မံ ပဋိသေဝန္တော’’တိ၊ သော စေ ဧဝံ ဝဒေယျ – ‘‘နာဟံ နိပန္နော၊ အပိစ ခေါ နိသိန္နော’’တိ၊ နိသဇ္ဇာယ ကာရေတဗ္ဗော။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိပန္နော မာတုဂါမဿ မေထုနံ ဓမ္မံ ပဋိသေဝန္တော’’တိ ၊ သော စေ ဧဝံ ဝဒေယျ – ‘‘နာဟံ နိပန္နော အပိစ ခေါ ဌိတော’’တိ၊ န ကာရေတဗ္ဗော။

၄၄၈။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိသိန္နော မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တော’’တိ၊ သော စ တံ ပဋိဇာနာတိ၊ အာပတ္တိယာ ကာရေတဗ္ဗော…ပေ… သစ္စာဟံ နိသိန္နော နော စ ခေါ ကာယသံသဂ္ဂံ သမာပဇ္ဇိန္တိ၊ နိသဇ္ဇာယ ကာရေတဗ္ဗော…ပေ… နာဟံ နိသိန္နော အပိစ ခေါ နိပန္နောတိ၊ နိပဇ္ဇာယ ကာရေတဗ္ဗော…ပေ… နာဟံ နိသိန္နော အပိစ ခေါ ဌိတောတိ၊ န ကာရေတဗ္ဗော။

သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိပန္နော မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တော’’တိ၊ သော စ တံ ပဋိဇာနာတိ၊ အာပတ္တိယာ ကာရေတဗ္ဗော…ပေ… သစ္စာဟံ နိပန္နော၊ နော စ ခေါ ကာယသံသဂ္ဂံ သမာပဇ္ဇိန္တိ၊ နိပဇ္ဇာယ ကာရေတဗ္ဗော…ပေ… နာဟံ နိပန္နော၊ အပိစ ခေါ နိသိန္နောတိ၊ နိသဇ္ဇာယ ကာရေတဗ္ဗော…ပေ… နာဟံ နိပန္နော၊ အပိစ ခေါ ဌိတောတိ၊ န ကာရေတဗ္ဗော။

၄၄၉။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော မာတုဂါမေန သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလံကမ္မနိယေ နိသိန္နော’’တိ ၊ သော စ တံ ပဋိဇာနာတိ၊ နိသဇ္ဇာယ ကာရေတဗ္ဗော…ပေ… နာဟံ နိသိန္နော အပိစ ခေါ နိပန္နောတိ၊ နိပဇ္ဇာယ ကာရေတဗ္ဗော…ပေ… နာဟံ နိသိန္နော၊ အပိစ ခေါ ဌိတောတိ၊ န ကာရေတဗ္ဗော။

၄၅၀။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော မာတုဂါမေန သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလံကမ္မနိယေ နိပန္နော’’တိ၊ သော စ တံ ပဋိဇာနာတိ၊ နိပဇ္ဇာယ ကာရေတဗ္ဗော…ပေ… နာဟံ နိပန္နော၊ အပိစ ခေါ နိသိန္နောတိ၊ နိသဇ္ဇာယ ကာရေတဗ္ဗော…ပေ… နာဟံ နိပန္နော၊ အပိစ ခေါ ဌိတောတိ၊ န ကာရေတဗ္ဗော။

အနိယတောတိ န နိယတော၊ ပါရာဇိကံ ဝါ သင်္ဃာဒိသေသော ဝါ ပါစိတ္တိယံ ဝါ။

၄၅၁။ ဂမနံ ပဋိဇာနာတိ၊ နိသဇ္ဇံ ပဋိဇာနာတိ၊ အာပတ္တိံ ပဋိဇာနာတိ၊ အာပတ္တိယာ ကာရေတဗ္ဗော။ ဂမနံ ပဋိဇာနာတိ၊ နိသဇ္ဇံ န ပဋိဇာနာတိ၊ အာပတ္တိံ ပဋိဇာနာတိ၊ အာပတ္တိယာ ကာရေတဗ္ဗော။ ဂမနံ ပဋိဇာနာတိ၊ နိသဇ္ဇံ ပဋိဇာနာတိ၊ အာပတ္တိံ န ပဋိဇာနာတိ၊ နိသဇ္ဇာယ ကာရေတဗ္ဗော။ ဂမနံ ပဋိဇာနာတိ၊ နိသဇ္ဇံ န ပဋိဇာနာတိ၊ အာပတ္တိံ န ပဋိဇာနာတိ၊ န ကာရေတဗ္ဗော။

ဂမနံ န ပဋိဇာနာတိ၊ နိသဇ္ဇံ ပဋိဇာနာတိ၊ အာပတ္တိံ ပဋိဇာနာတိ၊ အာပတ္တိယာ

ကာရေတဗ္ဗော။ ဂမနံ န ပဋိဇာနာတိ၊ နိသဇ္ဇံ န ပဋိဇာနာတိ၊ အာပတ္တိံ ပဋိဇာနာတိ၊ အာပတ္တိယာ ကာရေတဗ္ဗော။ ဂမနံ န ပဋိဇာနာတိ၊ နိသဇ္ဇံ ပဋိဇာနာတိ၊ အာပတ္တိံ န ပဋိဇာနာတိ၊ နိသဇ္ဇာယ ကာရေတဗ္ဗော။ ဂမနံ န ပဋိဇာနာတိ၊ နိသဇ္ဇံ န ပဋိဇာနာတိ၊ အာပတ္တိံ န ပဋိဇာနာတိ၊ န ကာရေတဗ္ဗောတိ။

ပဌမော အနိယတော နိဋ္ဌိတော။

၂။ ဒုတိယအနိယတသိက္ခာပဒံ

၄၅၂။ တေန သမယေန ဗုဒ္ဓါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အာယသ္မာ ဥဒါယီ – ‘‘ဘဂဝတာ ပဋိက္ခိတ္တံ မာတုဂါမေန သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလံကမ္မနိယေ နိသဇ္ဇံ ကပ္ပေတု’’န္တိ တဿာယေဝ ကုမာရိကာယ သဒ္ဓိံ ဧကော ဧကာယ ရဟော နိသဇ္ဇံ ကပ္ပေသိ ကာလယုတ္တံ သမုလ္လပန္တော ကာလယုတ္တံ ဓမ္မံ ဘဏန္တော။ ဒုတိယမ္ပိ ခေါ ဝိသာခါ မိဂါရမာတာ နိမန္တိတာ တံ ကုလံ အဂမာသိ။ အဒ္ဒသာ ခေါ ဝိသာခါ မိဂါရမာတာ အာယသ္မန္တံ ဥဒါယိံ တဿာယေဝ ကုမာရိကာယ သဒ္ဓိံ ဧကံ ဧကာယ ရဟော နိသိန္နံ။ ဒိသွာန အာယသ္မန္တံ ဥဒါယိံ ဧတဒဝေါစ – ‘‘ဣဒံ၊ ဘန္တေ၊ နစ္ဆန္နံ နပ္ပတိရူပံ ယံ အယျော မာတုဂါမေန သဒ္ဓိံ ဧကော ဧကာယ ရဟော နိသဇ္ဇံ ကပ္ပေတိ။ ကိဉ္စာပိ၊ ဘန္တေ၊ အယျော အနတ္ထိကော တေန ဓမ္မေန၊ အပိစ ဒုဿဒ္ဓါပယာ အပ္ပသန္နာ မနုဿာ’’တိ။ ဧဝမ္ပိ ခေါ အာယသ္မာ ဥဒါယီ ဝိသာခါယ မိဂါရမာတုယာ ဝုစ္စမာနော နာဒိယိ။ အထ ခေါ ဝိသာခါ မိဂါရမာတာ နိက္ခမိတွာ ဘိက္ခူနံ ဧတမတ္ထံ အာရောစေသိ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥဒါယီ မာတုဂါမေန သဒ္ဓိံ ဧကော ဧကာယ ရဟော နိသဇ္ဇံ ကပ္ပေဿတီ’’တိ! အထ ခေါ တေ ဘိက္ခူ အာယသ္မန္တံ ဥဒါယိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ …ပေ… ‘‘သစ္စံ ကိရ တွံ၊ ဥဒါယိ၊ မာတုဂါမေန သဒ္ဓိံ ဧကော ဧကာယ ရဟော နိသဇ္ဇံ ကပ္ပေသီ’’တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ…ပေ… ကထဉှိ နာမ တွံ၊ မောဃပုရိသ၊ မာတုဂါမေန သဒ္ဓိံ ဧကော ဧကာယ ရဟော နိသဇ္ဇံ ကပ္ပေဿသိ! နေတံ၊ မောဃပုရိသ၊ အပ္ပသန္နာနံ ဝါ ပသာဒါယ…ပေ… ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၄၅၃။ ‘‘န ဟေဝ ခေါ ပန ပဋိစ္ဆန္နံ အာသနံ ဟောတိ နာလံ ကမ္မနိယံ၊ အလဉ္စ ခေါ ဟောတိ မာတုဂါမံ ဒုဋ္ဌုလ္လာဟိ ဝါစာဟိ ဩဘာသိတုံ။ ယော ပန ဘိက္ခု တထာရူပေ အာသနေ မာတုဂါမေန သဒ္ဓိံ ဧကော ဧကာယ ရဟော နိသဇ္ဇံ ကပ္ပေယျ၊ တမေနံ သဒ္ဓေယျဝစသာ ဥပါသိကာ ဒိသွာ ဒွိန္နံ ဓမ္မာနံ အညတရေန ဝဒေယျ – သင်္ဃာဒိသေသေန ဝါ ပါစိတ္တိယေန ဝါ။ နိသဇ္ဇံ ဘိက္ခု ပဋိဇာနမာနော ဒွိန္နံ ဓမ္မာနံ အညတရေန ကာရေတဗ္ဗော – သင်္ဃာဒိသေသေန ဝါ ပါစိတ္တိယေန ဝါ။ ယေန ဝါ သာသဒ္ဓေယျဝစသာ ဥပါသိကာ ဝဒေယျ တေန သော ဘိက္ခု ကာရေတဗ္ဗော။ အယမ္ပိ ဓမ္မော အနိယတော’’တိ။

၄၅၄။ န ဟေဝခေါ ပန ပဋိစ္ဆန္နံ အာသနံ ဟောတီတိ အပ္ပဋိစ္ဆန္နံ ဟောတိ ကုဋ္ဋေန ဝါ ကဝါဋေန ဝါ ကိလဉ္ဇေန ဝါ သာဏိပါကာရေန ဝါ ရုက္ခေန ဝါ ထမ္ဘေန ဝါ ကောတ္ထဠိယာ ဝါ ယေန ကေနစိ အပ္ပဋိစ္ဆန္နံ ဟောတိ။

နာလံကမ္မနိယန္တိ န သက္ကာ ဟောတိ မေထုနံ ဓမ္မံ ပဋိသေဝိတုံ။

အလဉ္စ ခေါ ဟောတိ မာတုဂါမံ ဒုဋ္ဌုလ္လာဟိ ဝါစာဟိ ဩဘာသိတုန္တိ သက္ကာ ဟောတိ မာတုဂါမံ ဒုဋ္ဌုလ္လာဟိ ဝါစာဟိ ဩဘာသိတုံ။

ယောပနာတိ ယော ယာဒိသော…ပေ… ဘိက္ခူတိ…ပေ… အယံ ဣမသ္မိံ အတ္ထေ အဓိပ္ပေတော ဘိက္ခူတိ။

တထာရူပေ အာသနေတိ ဧဝရူပေ အာသနေ။

မာတုဂါမော နာမ မနုဿိတ္ထီ၊ န ယက္ခီ န ပေတီ န တိရစ္ဆာနဂတာ၊ ဝိညူ ပဋိဗလာ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတုံ။

သဒ္ဓိန္တိ ဧကတော။

ဧကော ဧကာယာတိ ဘိက္ခု စေဝ ဟောတိ မာတုဂါမော စ။

ရဟော နာမ စက္ခုဿ ရဟော၊ သောတဿ ရဟော။ စက္ခုဿ ရဟော နာမ န သက္ကာ ဟောတိ အက္ခိံ ဝါ နိခဏီယမာနေ ဘမုကံ ဝါ ဥက္ခိပီယမာနေ သီသံ ဝါ ဥက္ခိပီယမာနေ ပဿိတုံ။ သောတဿ ရဟော နာမ န သက္ကာ ဟောတိ ပကတိကထာ သောတုံ။

နိသဇ္ဇံ ကပ္ပေယျာတိ မာတုဂါမေ နိသိန္နေ ဘိက္ခု ဥပနိသိန္နော ဝါ ဟောတိ ဥပနိပန္နော ဝါ။ ဘိက္ခု နိသိန္နေ မာတုဂါမော ဥပနိသိန္နော ဝါ ဟောတိ ဥပနိပန္နော ဝါ။ ဥဘော ဝါ နိသိန္နာ ဟောန္တိ ဥဘော ဝါ နိပန္နာ။

သဒ္ဓေယျဝစသာ နာမ အာဂတဖလာ အဘိသမေတာဝိနီ ဝိညာတသာသနာ။

ဥပါသိကာ နာမ ဗုဒ္ဓံ သရဏံ ဂတာ၊ ဓမ္မံ သရဏံ ဂတာ၊ သင်္ဃံ သရဏံ ဂတာ။

ဒိသွာတိ ပဿိတွာ။

ဒွိန္နံ ဓမ္မာနံ အညတရေန ဝဒေယျ သင်္ဃာဒိသေသေန ဝါ ပါစိတ္တိယေန ဝါ။ နိသဇ္ဇံ ဘိက္ခု ပဋိဇာနမာနော ဒွိန္နံ ဓမ္မာနံ အညတရေန ကာရေတဗ္ဗော – သင်္ဃာဒိသေသေန ဝါ ပါစိတ္တိယေန ဝါ။ ယေန ဝါ သာ သဒ္ဓေယျဝစသာ ဥပါသိကာ ဝဒေယျ၊ တေန သော ဘိက္ခု ကာရေတဗ္ဗော။

၄၅၅။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိသိန္နော မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တော’’တိ၊ သော စ တံ ပဋိဇာနာတိ၊ အာပတ္တိယာ ကာရေတဗ္ဗော။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိသိန္နော မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တော’’တိ၊ သော စေ ဧဝံ ဝဒေယျ – ‘‘သစ္စာဟံ နိသိန္နော၊ နော စ ခေါ ကာယသံသဂ္ဂံ သမာပဇ္ဇိ’’န္တိ၊ နိသဇ္ဇာယ ကာရေတဗ္ဗော…ပေ… နာဟံ နိသိန္နော၊ အပိစ ခေါ နိပန္နောတိ၊ နိပဇ္ဇာယ ကာရေတဗ္ဗော…ပေ… နာဟံ နိသိန္နော၊ အပိစ ခေါ ဌိတောတိ၊ န ကာရေတဗ္ဗော။

သာ စေ ဧဝံ ဝဒေယျ – ‘‘အယျော မယာ ဒိဋ္ဌော နိပန္နော မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တော’’တိ၊ သော စ တံ ပဋိဇာနာတိ၊ အာပတ္တိယာ ကာရေတဗ္ဗော…ပေ… သစ္စာဟံ နိပန္နော၊ နော စ ခေါ ကာယသံသဂ္ဂံ သမာပဇ္ဇိန္တိ၊ နိပဇ္ဇာယ ကာရေတဗ္ဗော…ပေ… နာဟံ နိပန္နော၊ အပိစ ခေါ နိသိန္နောတိ၊ နိသဇ္ဇာယ ကာရေတဗ္ဗော …ပေ… နာဟံ နိပန္နော၊ အပိစ ခေါ ဌိတောတိ၊ န ကာရေတဗ္ဗော။

သာ စေ ဧဝံ ဝဒေယျ – ‘‘အယျဿ မယာ သုတံ နိသိန္နဿ မာတုဂါမံ ဒုဋ္ဌုလ္လာဟိ ဝါစာဟိ ဩဘာသန္တဿာ’’တိ၊ သော စ တံ ပဋိဇာနာတိ၊ အာပတ္တိယာ ကာရေတဗ္ဗော။ သာ စေ ဧဝံ ဝဒေယျ – ‘‘အယျဿ မယာ သုတံ နိသိန္နဿ မာတုဂါမံ ဒုဋ္ဌုလ္လာဟိ ဝါစာဟိ ဩဘာသန္တဿာ’’တိ၊ သော စေ ဧဝံ ဝဒေယျ – ‘‘သစ္စာဟံ နိသိန္နော၊ နော စ ခေါ ဒုဋ္ဌုလ္လာဟိ ဝါစာဟိ ဩဘာသိ’’န္တိ၊ နိသဇ္ဇာယ ကာရေတဗ္ဗော…ပေ… နာဟံ နိသိန္နော၊ အပိစ ခေါ နိပန္နောတိ၊ နိပဇ္ဇာယ ကာရေတဗ္ဗော…ပေ… နာဟံ နိသိန္နော၊ အပိစ ခေါ ဌိတောတိ၊ န ကာရေတဗ္ဗော။

သာ စေ ဧဝံ ဝဒေယျ – ‘‘အယျဿ မယာ သုတံ နိပန္နဿ မာတုဂါမံ ဒုဋ္ဌုလ္လာဟိ ဝါစာဟိ ဩဘာသန္တဿာ’’တိ၊ သော စ တံ ပဋိဇာနာတိ၊ အာပတ္တိယာ ကာရေတဗ္ဗော…ပေ… သစ္စာဟံ နိပန္နော နော စ ခေါ ဒုဋ္ဌုလ္လာဟိ ဝါစာဟိ ဩဘာသိန္တိ၊ နိပဇ္ဇာယ ကာရေတဗ္ဗော…ပေ… နာဟံ နိပန္နော၊ အပိစ ခေါ နိသိန္နောတိ၊ နိသဇ္ဇာယ ကာရေတဗ္ဗော…ပေ… နာဟံ နိပန္နော၊ အပိစ ခေါ ဌိတောတိ၊ န ကာရေတဗ္ဗော။

၄၅၆။ သာ စေ ဧဝံ ဝဒေယျ – ‘‘အယျော မယာ ဒိဋ္ဌော မာတုဂါမေန သဒ္ဓိံ ဧကော ဧကာယ ရဟော နိသိန္နော’’တိ၊ သော စ တံ ပဋိဇာနာတိ၊ နိသဇ္ဇာယ ကာရေတဗ္ဗော…ပေ… နာဟံ နိသိန္နော၊ အပိစ ခေါ နိပန္နောတိ၊ နိပဇ္ဇာယ ကာရေတဗ္ဗော…ပေ… နာဟံ နိသိန္နော၊ အပိစ ခေါ ဌိတောတိ၊ န ကာရေတဗ္ဗော။

သာ စေ ဧဝံ ဝဒေယျ – ‘‘အယျော မယာ ဒိဋ္ဌော မာတုဂါမေန သဒ္ဓိံ ဧကော ဧကာယ ရဟော နိပန္နော’’တိ၊ သော စ တံ ပဋိဇာနာတိ၊ နိပဇ္ဇာယ ကာရေတဗ္ဗော…ပေ… နာဟံ နိပန္နော၊ အပိစ ခေါ နိသိန္နောတိ၊ နိသဇ္ဇာယ ကာရေတဗ္ဗော…ပေ… နာဟံ နိပန္နော၊ အပိစ ခေါ ဌိတောတိ၊ န ကာရေတဗ္ဗော။

အယမ္ပီတိ ပုရိမံ ဥပါဒါယ ဝုစ္စတိ။

အနိယတောတိ န နိယတော၊ သင်္ဃာဒိသေသော ဝါ ပါစိတ္တိယံ ဝါ။

၄၅၇။ ဂမနံ ပဋိဇာနာတိ နိသဇ္ဇံ ပဋိဇာနာတိ အာပတ္တိံ ပဋိဇာနာတိ၊ အာပတ္တိယာ ကာရေတဗ္ဗော။ ဂမနံ ပဋိဇာနာတိ နိသဇ္ဇံ န ပဋိဇာနာတိ အာပတ္တိံ ပဋိဇာနာတိ၊ အာပတ္တိယာ ကာရေတဗ္ဗော။ ဂမနံ ပဋိဇာနာတိ နိသဇ္ဇံ ပဋိဇာနာတိ အာပတ္တိံ န ပဋိဇာနာတိ၊ နိသဇ္ဇာယ ကာရေတဗ္ဗော။ ဂမနံ ပဋိဇာနာတိ နိသဇ္ဇံ န ပဋိဇာနာတိ အာပတ္တိံ န ပဋိဇာနာတိ၊ န ကာရေတဗ္ဗော။

ဂမနံ န ပဋိဇာနာတိ နိသဇ္ဇံ ပဋိဇာနာတိ အာပတ္တိံ ပဋိဇာနာတိ၊ အာပတ္တိယာ ကာရေတဗ္ဗော။ ဂမနံ န ပဋိဇာနာတိ နိသဇ္ဇံ န ပဋိဇာနာတိ အာပတ္တိံ ပဋိဇာနာတိ၊ အာပတ္တိယာ ကာရေတဗ္ဗော။ ဂမနံ န ပဋိဇာနာတိ နိသဇ္ဇံ ပဋိဇာနာတိ အာပတ္တိံ န ပဋိဇာနာတိ ၊ နိသဇ္ဇာယ ကာရေတဗ္ဗော။ ဂမနံ န ပဋိဇာနာတိ နိသဇ္ဇံ န ပဋိဇာနာတိ အာပတ္တိံ န ပဋိဇာနာတိ၊ န ကာရေတဗ္ဗောတိ။

ဒုတိယော အနိယတော နိဋ္ဌိတော။

၄၅၈။ ဥဒ္ဒိဋ္ဌာ ခေါ အာယသ္မန္တော ဒွေ အနိယတာ ဓမ္မာ။ တတ္ထာယသ္မန္တေ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ပရိသုဒ္ဓေတ္ထာယသ္မန္တော၊ တသ္မာ တုဏှီ၊ ဧဝမေတံ ဓာရယာမီတိ။

တဿုဒ္ဒါနံ –

အလံ ကမ္မနိယဉ္စေဝ၊ တထေဝ စ နဟေဝ ခေါ၊

အနိယတာ သုပညတ္တာ၊ ဗုဒ္ဓသေဋ္ဌေန တာဒိနာတိ။

အနိယတကဏ္ဍံ နိဋ္ဌိတံ။